Yehova Alayuminisha Baabo ‘Balefukite Mumoyo’

1. Ino Yehova alalinyumfwa buyani pa basebenshi bakwe?

YEHOVA alabona shintu shoonse basebenshi bakwe nshobendaamo. Alabona na twasangalala a na twalinyumfwa buumba. (Kulu. 37:​18, NWT) Alasangalala abuumbi na watubona katucita nsheenga twacikonsha kwaamba ayi tumusebensele nabi ndyetucite buumba! Kwiilikaawo, alisunishishi kutucafwa akutuyuminisha.

2. Ino nshiinshi Yehova nshaacitila baabo balefukite mumoyo, alimwi ino nshiinshi nshotweelete kucita kwaamba ayi atucaafwe?

² Kulumbaisha 147:3 ilaamba ayi Yehova ‘alaanga shiloonda’ sha baabo balefukite mumoyo. Lilembo ili lilasansulula Yehova mbwaacafwa calusuno abo balinyumfwa kuba abuumba. Sombi ino nshiinshi nshotweelete kucita kwaamba ayi Yehova atucaafwe? Amuyeeye pacikoshanyo ici. Dokota ucite lushibo inga wamucafwa abuumbi muntu walicisa kwaamba ayi oole. Nacibi boobo, kwaamba ayi muntu walicisa oole, alyeelete kukonkela cakubikila maano nsheenga dokota wamulwiita. Mumutwi uyu, tutobandika Yehova nshaalwiita baabo balinyumfwa cibiibi kwiinda mu Maswi akwe alimwi tutokwiiya ambweenga twakonkela kululika kwakwe kwa lusuno.

YEHOVA ALATUCAFWA KUSHOMA AYI TULAYANDIKA ABUUMBI

3. Ino nceebonshi bamwi balalinyumfwa ayi taakuwo mbobabete?

³ Tulekala mucishi bantu baanji mobatatondeshanyi lusuno. Aboobo inga bacitila bamwi shintu shibiibi akubapa kulinyumfwa ayi tabayandiki. Nankashi waliina lya Helena wakaamba ayi: “Bashali bangu tabakalinga kututondeshaawo lusuno nabibo paniini. Bata bakalinga bakali alimwi bushiku abushiku bakalinga kundwiita ayi ndi muntu utacite ncito.” Mpashi muntu umwi wakamucitila shintu shitabete kabotu abuumbi, kumucobola mankanda aanji na kumupa kulinyumfwa ayi taakuwo mbomubete. Na ubo mbocibete, mpashi inga camubeta ciyumu kushoma ayi ncakwiila kuli bamwi bamusuni.

4. Kweelana a Kulumbaisha 34:​18, ino Yehova alalinyumfwa buyani pa baabo balefukite alimwi wakashomesha kubacitila nshi?

⁴ Nabi kwaamba ayi bamwi bakamucitila shintu shitabete kabotu, inga mwashooma ayi Yehova alimusuni alimwi alamubona ayi mulayandika. ‘Ulibo muliimfwa kubaabo balefukite.’ (Amubelenge Kulumbaisha 34:18.) Na mwalinyumfwa ayi taakuwo mbomubete, munookwiibaluka ayi Yehova wakabona mibo ibotu njomucite akumusenya kuli nguwe. (Joni 6:44) Lyoonse alilibambite kumucafwa mukwiinga alimusuni abuumbi.

5. Ino nshiinshi nsheenga tweeya kuswa kushintu Yesu nshaakalinga kucita kubaabo mpashi bakalinga kulinyumfwa ayi taakuwo mbobabete?

⁵ Kwiiya cakubonenaako cakwe Yesu inga kwatucafwa kushiba Yehova mbwaalinyumfwa. Yesu ndyaakalinga pacishi, wakalinga kutondesha nkuumbu abuumbi kubantu bakalinga kulinyumfwa ayi taakuwo mbobabete ceebo ca shintu shitabete kabotu bamwi nshobakalinga kubacitila. (Mate. 9:​9-12) Mwanakashi umwi wakalinga kuciswa bulwashi bubiibi abuumbi ndyaakamucata kucisani capeculu ceebo cakulangila ayi atokoola, Yesu wakamuyuminisha akumulumba ceebo ca lushomo lwakwe. (Maako 5:​25-34) Yesu alakonkela cakubonenaako ca Baishi cakumaninina. (Joni 14:9) Aboobo inga mwashooma ayi Yehova alamubona ayi mulayandika alimwi alabona mibo ibotu njemucite kwiilikaawo alushomo lwanu alimwi alusuno ndomucite pali nguwe.

6. Ino nshiinshi nsheenga mwaciita na mulalinyumfwa ayi taakuwo mbomubete?

⁶ Ino nshiinshi nsheenga mwaciita na cimwi ciindi mulalinyumfwa ayi taakuwo mbomubete? Amubelenge malembo amucafwa kushoma ayi Yehova alamubona ayi mulayandika lyalo akukutumana kuyeeyawo.b (Kulu. 94:19) Tamweelete kunolyeelanya kubamwi alimwi mutanobikila maano kushintu nsheenga tamucikoonshi. Yehova taamulangili kucita nsheenga tamucikoonshi. (Kulu. 103:​13, 14) Na muntu umwi wakamucitila shintu shitabete kabotu, teshi ndimwe mwakalengesha! Munookwiibaluka ayi Yehova alaakoombolosha baabo bacitila bamwi shintu shitabete kabotu, sombi alacafwa baabo bacitilwa shintu shitabete kabotu. (1 Pit. 3:12) Ba Sandra abo bakalinga kuumwa abuumbi kubwanike kubashali babo, bakaamba ayi, “Lyoonse ndasenga Yehova kwaamba ayi ancaafwe kunoobona mibo ibotu njaabona muli ndime.”

7. Ino nshotwakeendaamo inga twashisebensesha buyani muncito yakwe Yehova?

⁷ Mutanootonsha kwaamba ayi Yehova inga wamusebensesha kucafwa bamwi. Wakamupa coolwe cinene cakusebensela pomwi anguwe muncito yakushimikila. (1 Koli. 3:9) Ceebo ca bukaalo buyumu mbomwakeendaamo, mpashi inga camubeta cuubu kunyumfwishisha mbobalinyumfwa abo batoopenga. Inga mwabacafwa abuumbi. Ba Helen mbotwalinga twaambawo bakacafwikwa kuli Yehova akubamakwesu abenankashi alimwi balilibambite kucafwako bamwi. Bakaamba ayi: “Ndakalinga kulinyumfwa ayi taakuwo mbombete. Sombi Yehova wakancafwa kulinyumfwa ayi alinsuni alimwi alansebensesha kucafwako bamwi.” Ba Helen balisangalete kusebensa mbuli painiya waciindi coonse.

YEHOVA ALISUNI AYI TUSHOME AYI WAKATULEKELELA

8. Ino Yehova alatulwiita nshi palilembo lya Isaya 1:18?

⁸ Basebenshi bakwe Yehova bamwi bacilinyumfwa cibiibi abuumbi pashibiibi nshobakacita kale kale, inga caba ayi kabatana kubombekwa nabi pesule lya kubombekwa. Sombi tunokwiibaluka ayi Yehova wakatupa cilubula ceebo cakwaamba ayi alitusuni abuumbi. Inga twashooma ayi alisuni ayi tusumine cipo ncaakatupa. Yehova alatucafwa kushoma ayi na ‘twekala panshi’c anguwe, alaakutulekelela cakumaninina. (Amubelenge Isaya 1:18.) Tulalumba abuumbi ceebo cakwaamba ayi Yehova Ishiwesu shilusuno, taibaluki shilubo nshotwakacita kale kale! Nacibi boobo, taalubi shintu shibotu nshotwakacita.—Kulu. 103:​9, 12; Ebu. 6:10.

9. Ino nciinshi ncotweelete kucita muciindi ca kunooyeeya pashilubo nshotwakacita kale kale?

⁹ Na mulalinyumfwa cibiibi pashintu nshomwakacita kale kale, amucite nsheenga mwacikoonsha kuyeeya pashintu nshomutoocita pacecino ciindi alimwi ansheshi mukanoocita kunembo. Amuyeeye pacakubonenaako ca mutumwi Paulo. Wakalinga kulinyumfwa cibiibi ceebo cakwaamba ayi wakalinga kupensha Beneklistu abuumbi, sombi wakalinga kucishi ayi Yehova wakamulekelela. (1 Timo. 1:​12-15) Aboobo sa wakatolelela kuyeeya pashilubo nshaakacita kale kale? Cilyeelete kwaamba ayi taakwe kucita boobo bweenka mbwaakacileka kuyeeya pashintu nshaakacita kwaamba ayi abe mu Falisi ulemekwa. (Filip. 3:​4-8, 13-15) Muciindi cakucita boobo, Paulo wakatolelela kucita nsheenga wacikoonsha muncito yakushimikila alimwi akubikila maano ku cilambu ncaakalinga kusa mukupekwa. Bweenka mbuli Paulo, inga tamwaaluli nshomwakacita kale. Sombi inga mwalumbaisha Yehova akumusangalasha pacecino ciiindi. Alimwi inga mwayeeya pashintu shibotu nshaakamushomesha kunembo.

10. Ino nshiinshi nsheenga twaciita na nshotwakacita shakakalasha bamwi?

¹⁰ Mpashi inga kamulinyumfwa cibiibi ceebo ca shintu shimwi nshomwakacita shakakalasha bamwi. Ino nciinshi nceenga mwaciita? Amucite nsheenga mwacikoonsha kwaamba ayi balinyumfwe kabotu. Alimwi amusenge kulekelelwa kuswa paanshi lya moyo. (2 Koli. 7:11) Amusenge Yehova kwaamba ayi acafwe baabo mbomwakakalasha. Inga wamucafwa noonse kwaamba ayi mutolelele kumusebensela akuba aluumuno lwa mumiyeeyo.

11. Ino nciinshi nceenga tweeya kuswa kucakubonenaako ca mushinshimi Jona? (Amubone a cikope cili papeeji yakutaanguna.)

¹¹ Amwiiye kuswa kushilubo nshomwakacita akuba balibambite kusebenseshekwa a Yehova munshila ili yoonse njaasuni. Amuyeeye pacakubonenaako ca mushinshimi Jona. Muciindi cakuya kwicwe ku Ninife Lesa nkwaakamutuma, wakacicila kumbo ku Tashishi. Yehova wakalulika Jona alimwi Jona wakeeya ciiyo kuswa kucilubo ncaakacita. (Jona 1:​1-4, 15-17; 2:​7-10) Yehova taakwe kucileka kusebensesha Jona mbuli mushinshimi. Lesa wakamulwiita alimwi ayi aye ku Ninife lyalo Jona wakanyumfwila peenkapo. Nabi kwaamba ayi Jona wakalinyumfwa cibiibi pacilubo ncaakacita, wakacita Yehova nshaakamulwiita.—Jona 3:​1-3.

YEHOVA ALATUYUMINISHA KWIINDA MUKUTUPA MUSHIMU USALASHI

12. Ino Yehova alatupa buyani luumuno na cintu cibiibi abuumbi catucitikila? (Bene Filipi 4:​6, 7)

¹² Na cintu cibiibi abuumbi catucitikila, Yehova alatuyuminisha kwiinda mukutupa mushimu wakwe usalashi. Amuyeeye pa shakacitikila ba Ron aba Carol. Kuli cintu cibiibi cakabacitikila. Mwanaabo musankwa wakalicaya. Bakaamba ayi: “Twakeendawo mumapensho ayumu, sombi ili lyakalinga lipenshi liyumu kwiindaawo. Liinji mashiku tatwakalinga koonawo, aboobo twakalinga kupaila kuli Yehova alimwi wakatupa luumuno lwaambwa pa Bene Filipi 4:​6, 7.” (Amubelenge.) Na mutolinyumfwa kulefuka abuumbi ceebo ca cintu cimwi cibiibi cakamucitikila, amulwiite Yehova mbomutolinyumfwa. Inga mwapaila kuli nguwe mankanda aanji alimwi kwaciindi cilaamfu kweelana ambomusuni. (Kulu. 86:3; 88:1) Amutolelele kusenga Yehova kwaamba ayi amupe mushimu usalashi. Lyoonse alaakunomucafwa.—Luka 11:​9-13.

13. Ino mushimu usalashi inga watucafwa buyani kutolelela kulambila Yehova cakushomeka? (Bene Efeso 3:16)

¹³ Sa mwakeenda mulipenshi liyumu alimwi pacecino ciindi mutolinyumfwa ayi tamuciteewo nkusu shakucita cili coonse? Mushimu usalashi inga wamupa nkusu nshomutoyandika kwaamba ayi mutolelele kulambila Yehova cakushomeka. (Amubelenge Bene Efeso 3:16.) Amuyeeye pa shakacitikila nankashi waliina lya Flora. Lakwe abeebaye bakalinga kusebensa mbuli ba mishonali. Lyalo beebaye bakacita bulale alimwi cikwati cakamana. Ba Flora bakaamba ayi: “Ndakalinyumfwa cibiibi abuumbi ceebo cakutashomeka kwabo alimwi ncocintu ncondakalinga kuyeeyawobo. Ndakapaila kuli Yehova kusenga mushimu usalashi kwaamba ayi ntolelele kuliyumya. Yehova wakanjuminisha alimwi nabi kwaamba ayi pakutaanguna cakalinga kuboneka anga inga tacikonsheki kuliyumya, ndakayuma alimwi ndakacikonsha kuliyumya kwiinda mulucafwo lwakwe.” Ba Flora balalinyumfwa ayi Lesa wakabacafwa kunoomushoma abuumbi alimwi balishomete ayi ananoobacafwa mumapensho oonse ngeshi banokwiindaamo. Ba Flora bakaamba ayi maswi acanika pa Kulumbaisha 119:32 alasansulula kabotu Yehova mbwaakabacafwa. Palaamba ayi: “Ndeenda munshila ya milawo yanu ceebo mwakaangulula moyo wangu ayi kaamunyumfwila.”

14. Ino nshiinshi nshotweelete kucita kwaamba ayi mushimu usalashi utucaafwe?

¹⁴ Ino nshiinshi nshomweelete kucita pesule lyakwaamba ayi mwasenga Yehova kwaamba ayi amupe mushimu usalashi? Amucite shintu sheenga shamucafwa kutambula mushimu usalashi. Shintu isho shileelikaawo kucanika kumabungano akwaabanamo lubasu muncito yakushimikila. Amubelenge Maswi akwe Lesa bushiku abushiku. Kucita boobo kulaakumucafwa kunookutumana kuyeeya pa Maswi akwe. (Filip. 4:​8, 9) Ndyemutobelenga Baibo, amubikile maano kubantu bakeenda mubukaalo buyumu akukutumana kuyeeya Yehova mbwakabacafwa kuliyumya. Ba Sandra mbotwalinga twaambaawo bakeenda mubukaalo buyumu bupusenepusene. Bakaamba ayi: “Makani aamba pali Josefu alanjuminisha abuumbi. Taakwe kusuminisha mapensho nabi shintu shitaluleme nshaakacitilwa kunyonyoola bushicibusa bwakwe a Yehova.”—Mata. 39:​21-23.

YEHOVA ALATUYUMINISHA KWIINDA MUBASHOMINYINEESU

15. Ino mbaani beenga batuyuminisha alimwi ino inga batucafwa buyani? (Amubone acikope.)

¹⁵ Na tutokwiinda mubukaalo buyumu, bashominyineesu inga ‘batuyuminisha abuumbi.’ (Kolo. 4:11) Nshila yomwi Yehova mbwaatondesha ayi alitusuni nkwiinda mukutupa bamakwesu abenankashi kwaamba ayi banootucafwa. Bashominyineesu inga batuyuminisha kwiinda mukucana ciindi cakuba pomwi andiswe akutukutika ndyetutokwaamba mbotutolinyumfwa. Inga batulwiitako lilembo liyuminisha na kupaila pomwi andiswe.d (Loma. 15:4) Cimwi ciindi mukwesu nabi nankashi inga watwiibalusha Yehova mbwaabona bukaalo mbotutokwiindaamo, alimwi kucita boobo inga kwatucafwa kutolelela kuliyumya. Alimwi liinji bamakwesu abenankashi balatucafwa munshila shimwi mbuli kututelekelako shakulya kwaamba ayi tulinyumfwe kabotu.

16. Ino nshiinshi nsheenga twayandika kucita kwaamba ayi bamwi batucaafwe?

¹⁶ Cimwi ciindi mpashi inga twayandika kusenga lucafwo kubamwi. Bamakwesu abenankashi balitusuni alimwi balisuni kutucafwa. (Tus. 17:17) Sombi inga tabashibiwo mbotutolinyumfwa na nshetutoyandika. (Tus. 14:10) Na mutolinyumfwa kulefuka, inga mwabandika abeshicibusa mbomushoma akubalwiita mbomutolinyumfwa. Amubalwiite lucafwo ndomutoyandika. Inga mwasalawo kubandika amunene womwi nabi bobilo mbomwangulukite kubandikaabo. Benankashi bamwi bakacana ayi balayuminishikwa na babandika anankashi umwi ushimpite lwakumushimu.

17. Ino nshiinshi nshotweelete kuleya, kwaamba ayi bamakwesu abenankashi banootuyuminisha?

¹⁷ Amuleye kulitalamusha kubamwi. Cimwi ciindi inga kamulinyumfwa cibiibi abuumbi cakwaamba ayi inga kamutasuniiwo kuba pomwi abamwi. Alimwi mpashi bamakwesu abenankashi inga tabanyumfwishishi mbomutolinyumfwa na mpashi inga baamba maswi eenga amukalasha. (Jemu. 3:2) Nacibi boobo, tamweelete kulitalamusha kubamakwesu abenankashi mukwiinga Yehova inga wasebensesha mbabo kumuyuminisha. Munene waliina lya Gavin uyo uciswa bulwashi bwa kulisukama abuumbi, wakaamba ayi: “Liinji nshisuni bunene kubandika abeshicibusa bangu na kucana ciindi cakuba pomwi ambabo.” Sombi ba Gavin baleelesha kuba pomwi abashominyinaabo. Alimwi na bacita boobo liinji balalinyumfwako kabotu. Nankashi waliina lya Amy wakaamba ayi: “Ceebo ca shintu nshendakeendaamo, cilanjumina kushoma bamwi. Sombi ntokwiiya kusuna bamakwesu abenankashi akunoobashoma bweenka Yehova mbwaacita. Ndicishi ayi kucita boobo kulasangalasha Yehova alimwi anebo ndasangalala.”

SHISHOMESHO SHAKWE YEHOVA INGA SHATUYUMINISHA

18. Ino nshiinshi nshetutolangila kunembo alimwi ino nshiinshi nsheenga twaciita pacecino ciindi?

¹⁸ Conoonobo Yehova alaakukushaawo shintu shoonse shitupa kulefuka akulinyumfwa cibiibi. (Ciyu. 21:​3, 4) Paciindi ico, shintu shitupa kulinyumfwa cibiibi “teshi shikeebalukweewo.” (Isa. 65:17) Kweelana ambotweeya, Yehova alaanga shiloonda shesu nabibo pacecino ciindi. Yehova wakatupa shintu shiinji kwaamba ayi atuyuminishe akutucafwa. Amube bashinishite kusumina lucafwo lwakwe. Mutanootonsha nabibo paniini ayi ‘alamubikilako maano.’—1 Pit. 5:7.