Nsheenga Tweeya Kuli Yesu Ndyaakalinga Pacishi Kwanshiku 40 Shakweelaako

1-2. Ino nshiinshi shakacitika ku bashikwiiya bakwe Yesu bobilo ndyebakalinga kuya ku Emausi?

PAKALINGA pa Nisani 16, mu 33 C.E. Bashikwiiya bakwe Yesu bakalinyumfwa cibiibi abuumbi akuloonda. Bashikwiiya bamwi bobilo bakaswa mu Jelusalemu akuya ku Emausi, mushi wakalinga palaamfu makilomita ali 11 kuswa ku Jelusalemu. Basankwa abo bakalefuka abuumbi mukwiinga Yesu uyo ngobakalinga kukonkela wakacaikwa. Bakalinga kulangila ayi Mesiya alaakubacitila shintu shibotu baJuda, ano wacaikwa. Lyalo kwakacitika cintu cimwi cakabakankamika.

² Musankwa umwi wakaya kuli mbabo akutalika kweendela pomwi ambabo. Bashikwiiya bakalwiita musankwa uyo mbobakalinyumfwa cibiibi pashintu shakacitikila Yesu. Lyalo musankwa uyo wakatalika kubalwiita shintu nshobatakwe kulubaawo mubuumi bwabo. Wakabasansulwiita Mesiya ncaakalinga kweelete kupengela akufwa, ‘kutalikila kuli Mose kushikila akubashinshimi bamwi boonse.’ Ndyebakashika ku Emausi, bashikwiiya bakashiba ayi musankwa ngobabetaakwe ngu Yesu uyo wabushikwa kuli Lesa! Amuyeeyebo bashikwiiya abo mbobakasangalala ndyebakashiba ayi Mesiya ngu muumi!—Luka 24:​13-35.

3-4. Ino nshiinshi shakacitikila bashikwiiya bakwe Yesu alimwi ino tutokwiiya nshi mumutwi uyu? (Milimo 1:3)

³ Pesule lya kubushikwa, Yesu wakekala pacishi inshiku shili 40 kaatana kuboolela kwiculu. Munshiku shoonse ishi wakabonekela kubashikwiiya bakwe mankanda aanji.a (Amubelenge Milimo 1:3.) Yesu wakayuminisha bashikwiiya bakwe abo bakalinga kulinyumfwite cibiibi abuumbi alimwi bakalinga kuloondete. Kwiilikaawo, bakasangalala akutalika kushimikila cakutaloonda makani abotu aamba pa Bwaami bwakwe Lesa.

⁴ Inga twafubilaamo mushintu Yesu nshaakacita paciindi ici. Mumutwi uyu, tutokwiiya Yesu mbwakasebensesha kabotu ciindi ici kwiinda (1) kuyuminisha bashikwiiya bakwe, (2) kubacafwa kunyumfwishisha kabotu malembo, alimwi (3) kubeeisha bwakusebensa kabotu incito njobakalinga kusa mukusebensa kunembo. Ndyeshi tunoobandika shiteente ishi, tutokwiiya mbweenga twakonkela cakubonenaako cakwe Yesu.

AMUYUMINISHE BAMWI

5. Ino nceebonshi bashikwiiya bakwe Yesu bakalinga kuyandika kuyuminishikwa?

⁵ Bashikwiiya bakwe Yesu bakalinga kuyandika kuyuminishikwa. Ino nceebonshi? Bamwi bakashiya maanda, mikwashi alimwi amakwebo kwaamba ayi bakonkele Yesu. (Mate. 19:27) Bamwi bakalinga kucitilwa shintu shitaluleme ceebo cakwaamba ayi bakaba bashikwiiya bakwe. (Joni 9:22) Bakalinga kulyaabite kushiya shintu ishi akupenga ceebo cakwaamba ayi bakashoma ayi Yesu ngo Mesiya wakashomeshekwa. (Mate. 16:16) Sombi Yesu ndyaakacaikwa, bakalinyumfwa cibiibi abuumbi alimwi bakalefuka mukwiiinga tabakalinga kucishiwo shakalinga kusa mukucitika.

6. Ino nciinshi Yesu ncaakacita ndyaakabushikwa?

⁶ Yesu wakanyumfwishisha ayi cakalingabo kabotu bashikwiiya bakwe kulinyumfwa cibiibi ndyaakafwa. Alimwi wakalinga kucishi ayi teshi kubula lushomo kwakapa kwaamba ayi balinyumfwe cibiibi. Aboobo pabushiku ndyaakabushikwabo, wakatalika kuyuminisha beshicibusa bakwe. Kucakubonenaako, wakabonekela kuli Maliya waku Magadala ndyaakalinga kulila kucuumbwe Yesu nkwaakalinga wabikwa. (Joni 20:​11, 16) Alimwi wakabonekela ku bashikwiiya bobilo mbotwaambaawo kumatalikilo kwa mutwi uyu. Wakabonekela aku mutumwi Pita. (Luka 24:34) Ino nshiinshi nsheenga tweeya kuswa kucakubonenaako cakwe Yesu? Amuyeeye pashakacitika ndyaakaboneka kuli Maliya waku Magadala.

7. Ino Yesu wakabona Maliya kaacita nshi, alimwi ino wakamucitila nshi? (Joni 20:​11-16) (Amubone acikope.)

⁷ Amubelenge Joni 20:​11-16. Macuunsa pa Nisani 16, banakashi bamwi bakaya kucuumbwe Yesu nkwaakalinga wabikwa. (Luka 24:​1, 10) Womwi pa banakashi abo wakalinga ngu Maliya waku Magadala. Maliya ndyaakashika kucuumbwe, wakacana Yesu taamo. Wakacica akuya mukulwiita Pita a Joni lyalo bakacicilaako kucuumbwe alimwi Maliya alakwe wakabakonkela. Pita a Joni ndyebakacana ayi Yesu taamo mucuumbwe, bakaboolela kuŋanda. Sombi Maliya wakacaala kaalila. Yesu wakamubona Maliya ndyaakalinga kulila, nabi kwaamba ayi lakwe taakalinga kucishiiwo ayi Yesu mpaali. Wakabona ayi atoolila nguwe, alimwi wakalinga kusuni kumuyuminisha. Aboobo wakabonekela kuli Maliya akumucitila cintu cuubu sombi cakamuyuminisha abuumbi. Wakabandikaakwe akumupa ncito iyandika yakuya mukulwiita bashikwiiya bamwi ayi Yesu wabushikwa.—Joni 20:​17, 18.

8. Ino cakubonenaako cakwe Yesu inga twacikonkela buyani?

⁸ Ino cakubonenaako cakwe Yesu inga twacikonkela buyani? Tulakonkela cakubonenaako cakwe Yesu na katuyuminisha bamakwesu abenankashi kwaamba ayi batolelele kusebensela Yehova. Bweenka mbuli Yesu, tulayandika kubikila maano kumapensho bamwi ngobatokwiindaamo, kweelesha kunyumfwishisha mbobatolinyumfwa akubayuminisha. Amuyeeye shakacitikila nankashi waliina lya Jocelyn, uyo wakafwitwa mwanike wakwe mwanakashi mu akisidenti ibiibi abuumbi. Ba Jocylen bakaamba ayi: “Kwamyeenshi iinji, ndakalinga kulinyumfwa cibiibi abuumbi.” Nacibi boobo, mukwesu umwi amukaakwe bakamwiita kumishaabo akumupa ciindi kwaamba ayi aambe mbwaakalinga kulinyumfwa. Bakakutika cakubikila maano, kumutondesha nkumbu akumulwiita ayi Yehova alimusuni abuumbi. Ba Jocelyn bakaamba ayi: “Ndakalinyumfwabo anga Yehova wabasebensesha kunsubula palweenge pali cipuupu cinene abuumbi akumbika mubwaato. Bakancafwa kuba alusuno lwa kutolelela kusebensela Yehova.” Aswebo inga twayuminisha bamwi na katukutika cakubikila maano ndyebatokwaamba mbobatolinyumfwa. Na twacita boobo inga twabayuminisha akubacafwa kutolelela kusebensela Yehova.—Loma. 12:15.

AMUCAFWE BAMWI KUNYUMFWISHISHA MASWI AKWE LESA

9. Ino ndipenshi nshi bashikwiiya bakwe Yesu ndyebakalinga kucite, alimwi ino Yesu wakabacafwa buyani?

⁹ Bashikwiiya bakwe Yesu bakalinga kushoma Maswi akwe Lesa akucita nsheenga bacikoonsha kwaakonkela mubuumi bwabo. (Joni 17:6) Sombi bakaalilwa kunyumfwishisha Yesu ndyaakafwa mbuli kapondo pacisamu cakupenshesha. Yesu wakalinga kucishi ayi bashikwiiya bakwe bakalinga kucite lushomo alimwi bakalinga kusuni Yehova, sombi wakashiba ayi bakalinga kuyandika kwaanyumfwishisha kabotu Malembo. (Luka 9:​44, 45; Joni 20:9) Aboobo wakabacafwa kunyumfwishisha nshobakalinga kubelenga mu Malembo. Amubone mbwaakacita boobo ndyaakabonekela ku bashikwiiya bobilo abo bakalinga kuya ku Emausi.

10. Ino Yesu wakabacafwa buyani bashikwiiya bakwe kunyumfwishisha ayi ncakwiila ngo Mesiya? (Luka 24:​18-27)

¹⁰ Amubelenge Luka 24:​18-27. Yesu taakwe kuliyubulula kubashikwiiya aba peenkaapo. Muciindi cakucita boobo, wakabeepusha miipusho. Ino nceebonshi? Mpashi wakalinga kusuni kwaamba ayi baambe nshobakalinga kuyeeya. Alimwi bakamulwiita nshobakalinga kuyeeya. Bakamulwiita ayi bakalinga kulangila ayi Yesu alaakubapulusha kukupenshekwa ku bene Loma. Yesu wakabaleka baamba mbobakalinga kulinyumfwa. Lyalo wakasebensesha Malembo kubacafwa kunyumfwishisha bushinshimi buunji bwakakumanishikwa.b Lyalo macolesha pabushiku bweenka bulya, wakabonana abashikwiiya bamwi akubasansulwiita bushinshimi ubu. (Luka 24:​33-48) Ino nshiinshi nsheenga tweeya kuswa kumakani aya?

11-12. (a) Ino nciinshi nceenga tweeya kuli Yesu ku mbwaakalinga kwiisha bantu cancine camu Baibo? (Amubone ashikope.) (b) Ino mukwesu umwi wakamucafwa buyani shikwiiya Baibo wakwe?

¹¹ Ino cakubonenaako cakwe Yesu inga twacikonkela buyani? Cakutaanguna, ndyemutokwiisha beshikwiiya Baibo, amubeepushe miipusho munshila yeenga yapa kwaamba ayi baambe mbobatolinyumfwa. (Tus. 20:5) Pesule lya kunyumfwishisha mbobatolinyumfwa, amubatondeshe mbweenga bacana Malembo eenga abacafwa mubukaalo mbobabeteemo. Mutabalwiiti shakucita. Muciindi cakucita boobo, amubeepushe miipusho kwaamba ayi baambe mbobatoyeeya pa Malembo. Amubayuminishe kuyeeya pa nshobatobelenga ambweenga bashikonkela mubuumi bwabo. Amuyeeye shakacitikila mukwesu waliina lya Nortey ukala ku Ghana.

¹² Ba Nortey ndyebakalinga kucite myaaka 16, bakatalika kwiiya Baibo. Nacibi boobo, tapana kwiinda aciindi bakatalika kupikishikwa ku bamumukwashi wabo. Ino nciinshi cakabacafwa kutolelela kwiiya Baibo? Paciindi ici, mukwesu wakalinga kubeeisha Baibo wakabandikaabo kale makani acanika mu Mateyo capita 10 akubacafwa kushiba ayi Beneklistu bancine balaakupenshekwa. Ba Nortey bakaamba ayi: “Aboobo ndyendakatalika kupenshekwa, ndakashoma cakutatoonsha ayi ndakacana cancine.” Alimwi mukwesu wakalinga kubeeisha Baibo wakabatondesha Mateyo 10:16 iyo yaamba ayi tulyeelete kuba bacenjete. Lyalo bakabandika mbweenga lilembo ili lyacafwa ba Nortey kusansulula nshobashoma ku bamumukwashi wabo munshila ya bulemu. Ba Nortey ndyebakabombekwa, bakalinga kusuni kutalika bupainiya, sombi baishiwabo bakalinga kusuni ayi baye ku yunivesiti. Mukwesu taakwe kulwiita ba Nortey shakucita. Sombi wakabeepusha miipusho kwaamba ayi abacaafwe kuyeeya panjiisho shamu Baibo akusalawo cakucita cili kabotu. Ino nshiinshi ba Nortey nshobakacita? Ba Nortey bakasalawo kutalika kusebensa bupainiya. Baishiwabo bakabatandaawo paŋanda. Ino ba Nortey bakalinyumfwa buyani pasheeshi shakacitika? Bakaamba ayi: “Ndakashoma cakutatoonsha ayi ndakasalawo cakucita cili kabotu.” Aswebo na katuyuminisha bamwi kukutumana kuyeeya pa Malembo, tulabacafwa kuyumya lushomo lwabo akutolelela kusebensela Yehova.—Efe. 3:​16-19.

AMUCAFWE BAMAKWESU KUBA ‘SHIPO MUBANTU’

13. Ino nciinshi Yesu ncaakacita kwaamba ayi incito yakushimikila itolelele pesule lyakuboolela kwiculu? (Bene Efeso 4:8)

¹³ Yesu ndyaakalinga pacishi, wakacita kweelana a Baishi mbobakamulwiita. (Joni 17:4) Sombi Yesu taakalinga kuyeeya ayi lakwe eenkabo ngweenga wacita Yehova nshaasuni. Mumyaaka yotatwe amyeenshi 6 ndyaakalinga kushimikila, wakaiishako bamwi bwakusebensa ncito iyi. Yesu wakalinga kushoma bashikwiiya bakwe. Wakabapa ncito yakushimikila makani abotu akulama bantu bakwe Yehova bayandika. Bashikwiiya bamwi bakalinga kutanjilila muncito iyi mpashi bakalinga kucite myaaka itashiki ku 30. (Amubelenge Bene Efeso 4:8.) Basankwa aba bakasebensa cankusu a Yesu alimwi bakalinga kushomeka kuli nguwe. Sombi kataana kuya kwiculu, wakabacafwa abuumbi kwiiya bwakusebensa ncito kwaamba ayi bakabe ‘shipo mubantu.’ Ino wakabacafwa buyani?

14. Ino nshiinshi Yesu nshaakaiisha bashikwiiya bakwe munshiku shili 40 shakweelaako ndyaakalinga pacishi? (Amubone acikope.)

¹⁴ Yesu wakalulika bashikwiiya bakwe cakuteenda mweela sombi munshila yalusuno. Kucakubonenaako, wakabona ayi bashikwiiya bakwe bamwi bakalinga kutoonsha, aboobo wakabalulika. (Luka 24:​25-27; Joni 20:27) Alimwi wakabalwiita kubikila maano kukulama bantu bakwe Yehova muciindi cakucita makwebo. (Joni 21:15) Kwiilikaawo, wakabalwiita ayi tabeelete kweelanya nsheenga bacita muncito yakwe Yehova, kubamwi nsheenga bacita. (Joni 21:​20-22) Alimwi wakabacafwa kwaalula miyeeyo itabete kabotu njobakalinga kucite pa Bwaami akubacafwa kubikila maano kukushimikila makani abotu. (Milimo 1:​6-8) Ino nshiinshi nsheenga bamanene beeya kuswa kucakubonenaako cakwe Yesu?

15-16. (a) Ino bamanene inga bacikonkela buyani cakubonenaako cakwe Yesu? Amusansulule. (b) Ino Patrick wakafubilaamo buyani mukululikwa?

¹⁵ Ino bamanene inga bacikonkela buyani cakubonenaako cakwe Yesu? Balyeelete kwiisha bamakwesu, kwiilikaawo abaabo bacili bacanike kushiba bwakusebensa ncito shimwi mulibungano.c Bamanene balanyumfwishisha ayi bamakwesu aba balayandika kwiiya shintu shiinji. Balayandika kubeeisha calusuno kwaamba ayi beeye kuba baliceesha, bantu bamwi mbweenga bashoma akuba balyaabite kucafwa bamwi.—1 Timo. 3:1; 2 Timo. 2:2; 1 Pit. 5:5.

¹⁶ Amuyeeye pacakubonenaako ca mukwesu waliina lya Patrick uyo wakafubilaamo mukululikwa. Liinji wakalinga kwaamba akucita shintu munshila itatondeshi nkuumbu, kwiilikaawo akubenankashi. Munene umwi ushimpite lwakumushimu wakabona ayi Patrick wakalinga kweelete kwaalulako mbwaakalinga kwaamba akucita shintu kubamwi. Aboobo wakamululika cakuteenda mweela sombi munshila yalusuno. Patrick wakaamba ayi: “Ndisangalete kwaamba ayi munene wakancafwa kushiba mpondakalinga kuyandika kusebensela. Ndakalinga kulefuka na bamakwesu bamwi bapekwa mikuli njondakalinga kusuni. Sombi kululika kwa munene kwakancafwa kushiba ayi ndyeelete kuba muntu uliceesha akutondesha lusuno kubamakwesu abenankashi muciindi cakubikila maano kukuba amukuli.” Aboobo Patrick wakasalwa kusebensa mbuli munene ndyaakalinga kucite myaaka 23.—Tus. 27:9.

17. Ino Yesu wakatondesha buyani ayi wakalinga kubashoma bashikwiiya bakwe?

¹⁷ Yesu wakapa bashikwiiya bakwe incito yakushimikila bantu makani abotu akubasansulwiita Malembo. (Mate. 28:20) Mpashi bashikwiiya bakalinga kulinyumfwa ayi tabatokweelela kusebensa ncito iyi. Nacibi boobo, Yesu wakalinga kushomete cakutatoonsha ayi inga bacikoonsha cakwaamba ayi wakabalwiita ayi: “Bweenka baTa mbobakantuma, anebo ntoomutuma mbweeke ubo.”—Joni 20:21.

18. Ino bamanene inga bacikonkela buyani cakubonenaako cakwe Yesu?

¹⁸ Ino bamanene inga bacikonkela buyani cakubonenaako cakwe Yesu? Bamanene basongo balapako bamwi mikuli. (Filip. 2:​19-22) Kucakubonenaako, inga basenga bacanike kunokwaabanamo lubasu mukubotesha akubamba Ŋanda ya Bwaami. Bamanene inga bapako bamakwesu mikuli imwi, kubeeisha bwa kwiikumanisha lyalo akushoma ayi inga bacikoonsha. Mukwesu waliina lya Matthew uyo wakasalwa conoono kusebensa mbuli munene, wakaamba ayi alalumba abuumbi ceebo cakwaamba ayi bamanene bacite lushibo bakamwiisha bwakusebensa ncito shipusenepusene mulibungano akushoma ayi inga washisebensa kabotu. Wakaamba ayi, “Na kuli nshontana kucita kabotu, bakalinga kuncafwa kubona nsheenga ndeeya kusheesho nshontana kucita kabotu akubona mbweenga ndacita kabotu kunembo.”

19. Ino nciinshi ncotweelete kuba bashinishite kucita?

¹⁹ Munshiku shakweelaako shili 40 Yesu ndyaakalinga pacishi wakayuminisha bamwi, kubeeisha akubacafwa kushiba bwakusebensa ncito yakushimikila. Atube bashinishite kweelesha cankusu kukonkela cakubonenaako cakwe. (1 Pit. 2:21) Alaakutucafwa kucita boobo mukwiinga wakatushomesha ayi: “Nebo nanooli amwebo lyoonse kushikila kumamanino a cishi.”—Mate. 28:20.