Nsheenga Twaciita Kwaamba Ayi Tucileeke Kutoonsha

1-2. (a) Ino nshiinshi shimwi basebenshi bakwe Yehova nshobatoonsha? (b) Ino tutokwiiya nshi mumutwi uyu?

SOONSEBO, inga caba ayi tuli bacanike na bacinene, cimwi ciindi tulatoonsha na Yehova alatubikilako maano alimwi a na nshotwakasalawo kucita kale kale shakalingabo kabotu. Kucakubonenaako, shikushimikila wacanike inga kaatoonsha na ncakwiila Yehova alamubikilako maano. Aboobo inga watalika kutoonsha na alyeelete kubombekwa. Cakubonenaako cimwi nca mukwesu uyo wakasalawo kubika sha Bwaami panembo ndyaakalinga wacanike, muciindi cakusalawo kuba amaali aanji. Ano pacecino ciindi ngumunene alimwi alacanabo maali akwene kuula shiyandika sha mukwashi wakwe. Mpashi inga watalika kutoonsha na nshaakasalawo kucita ndyaakalinga wacanike shakalingabo kabotu. Na mpashi inga kakuli nankashi wacinene uyo utacite nkusu shiinji ceebo cakukula. Inga walinyumfwa kulefuka ceebo cakwaalilwa kucita nshaakalinga kucita kale kale. Sa mwakaliipushawo kale miipusho mbuli: ‘Sa ncakwiila Yehova alambikilako maano? Sa nshondakasalawo kucita kwaamba ayi ncite shiinji muncito yakwe Yehova shakalingabo kabotu? Sa Yehova inga watolelela kunsebensesha?’

² Na twabula kweelesha kucana shikumbulo kumiipusho mbuli yeeyi, lushomo lwesu muli Yehova inga lwaceya nabibo kucileka kumulambila. Mumutwi uyu, tutokwiiya mbweenga njiisho shamu Baibo shatucafwa na tulatoonsha ayi (1) Yehova alatubikilako maano, (2) nshotwakasalawo kucita kale kale shakalingabo kabotu, alimwi (3) na tulalinyumfwa ayi Yehova inga taatoleleli kutusebensesha.

SHEENGA SHATUCAFWA NA TULATOONSHA

3. Ino nciinshi nceenga twaciita kwaamba ayi tucileeke kutoonsha?

³ Comwi nceenga twaciita kwaamba ayi tucileeke kutoonsha, nkubelenga Maswi akwe Lesa kwaamba ayi tucane shikumbulo kumiipusho njotucite. Na twacita boobo, lushomo lwesu muli Yehova abushicibusa bwesu anguwe shilaakuyuminaako alimwi tulaakucikoonsha ‘kwiimikana cakutatenkaana mulushomo.’—1 Koli. 16:13.

4. Ino inga twacita buyani kwaamba ayi ‘tushinishe shintu shoonse’? (1 Bene Tesalonika 5:21)

⁴ Amubelenge 1 Bene Tesalonika 5:​21, NWT. Palilembo ili Baibo ilatulwiita ayi “amushinishe shintu shoonse.” Ino inga twacita buyani ubo? Na tulatoonsha pamakani amwi, tulyeelete kubona Baibo nshoyaamba pamakani ayo. Kucakubonenaako, amuyeeye pa wacanike utoonsha na ncakwiila Lesa alamubikilako maano. Sa alyeelete kusuulakobo akusumina ayi ncakwiila Lesa tamubikiliko maano? Sobwe, alyeelete ‘kushinisha shintu shoonse’ kwiinda mukwiiya Baibo kwaamba ayi ashibe Yehova mbwaamubona.

5. Ino inga twacita buyani kwaamba ayi Yehova akumbule miipusho njotucite?

⁵ Na tutobelenga Baibo, cilababo anga Yehova atobandika andiswe. Sombi tatweelete kweelabo pakubelenga Baibo na tulisuni kwaamba ayi Yehova akumbule miipusho njotucite. Tulyeleete kulangoola akwiiya makani amu Baibo eenga atucafwa kucana shikumbulo kumwiipusho ngweenga katucite. Kwaamba ayi tucite boobo, inga twalangoola makani mumabuku esu. (Tus. 2:​3-6) Tulayandika kupaila kuli Yehova kwaamba ayi atucaafwe kucana cikumbulo kumwiipusho ngweenga katucite. Lyalo inga twalangoola njiisho shamu Baibo amakani eenga atucafwa mubukaalo mbotubeteemo. Alimwi cimwi ceenga catucafwa nkubelenga makani amu Baibo aamba pabasebenshi bakwe Yehova bashomeka abo bakeenda mubukaalo bukoshenye ambotubeteemo.

6. Ino mabungano alatucafwa buyani kucileka kutoonsha?

⁶ Nshila aimwi Yehova mbwaabandika andiswe, nciindi ndyetutobungana. Na katucanika kumabungano lyoonse, inga twanyumfwa makani amwi mu likani na mu cikumbulo umwi nceenga waamba mpashi eenga atucafwa kucileka kutoonsha. (Tus. 27:17) Ano amuleke tubandike sheenga shatucafwa kucileka kutoonsha pa shintu shimwi.

NA MULATOONSHA AYI YEHOVA ALAMUBIKILAKO MAANO

7. Ino ngumwiipusho nshi bamwi ngweenga baliipusha?

⁷ Sa mwakaliipushawo kale ayi, ‘Sa ncakwiila Yehova alambikilako maano?’ Na mulalinyumfwa ayi tamuyandiki, inga mwatalika kuyeeya ayi inga tacikonsheki kuba abushicibusa a Mulengi wa bubumbo boonse. Mpashi Mwaami Defedi alakwe wakalinga walinyumfwawo kale boobo. Wakakankamana ndyaakashiba ayi Yehova alababikilako maano bantu. Wakaamba ayi: ‘No Yehova, anu muntu nciinshi ngweenga kamuyeeya, muntubo nciinshi cakwaamba ayi kamumulama?’ (Kulu. 144:3) Ino nkuli nkweenga mwacana cikumbulo kumwiipusho uyu?

8. Kweelana a 1 Samwelo 16:​6, 7, 10-12, ino nshiinshi Yehova nshaabona mubantu?

⁸ Baibo ilatucafwa kushiba ayi Yehova alababikilako maano abo baboneka anga tabayandiki kubamwi. Kucakubonenaako, Yehova wakatuma Samwelo kuŋanda yakwe Jese kwaamba ayi ananike mwanaakwe musankwa umwi uyo wakalinga kusa mukuba mwaami wa bene Isilaeli. Jese wakeeta bana bakwe basankwa bali 7 kwaamba ayi babonane a Samwelo, sombi taakwe kwiita Defedi uyo wakalinga mwanike paboonse.a Nacibi boobo, Yehova wakasala Defedi. (Amubelenge 1 Samwelo 16:​6, 7, 10-12.) Yehova wakabona Defedi mbwaakalinga mumoyo. Alimwi wakalinga kucishi ayi musankwa uyu wacanike wakalinga kumusuni abuumbi.

9. Ino nceebonshi inga mwashoma cakutatoonsha ayi Yehova alamubikilako maano? (Amubone acikope.)

⁹ Amuyeeye pashintu Yehova nshaakacita kale kutondesha ayi alamubikilako maano. Alamulwiita makani eenga amucafwa kabotu mubukaalo mbomubeteemo. (Kulu. 32:8) Ici cilatondesha ayi alicishi kabotu nshomuyandika. (Kulu. 139:1) Na mwakonkela Yehova nshaamulwiita akubona mboshimucafwa, mulaakushoma cakutatoonsha ayi alamubikilako maano. (1 Maka. 28:9; Milimo 17:​26, 27) Yehova alabona shoonse nshomucita kwaamba ayi mumusebensele akumunyumfwila. Alabona mibo ibotu njomucite alimwi alisuni kwaamba ayi abe shicibusa wanu. (Jele. 17:10) Alimwi alaakusangalala abuumbi na amwebo mukasalewo kuba abushicibusa anguwe.—1 Joni 4:19.

NA MULATOONSHA AYI NSHOMWAKASALAWO KUCITA KALE KALE SHAKALINGABO KABOTU

10. Ino njimiipusho nshi mpashi njeenga twaliipusha na twayeeya pashintu nshotwakasalawo kucita kale kale?

¹⁰ Cimwi ciindi, bamwi inga batalika kuyeeya pa shintu nshobakasalawo kucita kale kale akutalika kutoonsha na shakalingabo kabotu. Mpashi bakacileka ncito yakufola maali aanji na kutatalika makwebo kwaamba ayi bacite shiinji muncito yakwe Yehova. Sombi mpashi ndikale kale abuumbi ndyebakasalawo kucita boobo. Inga bayeeya pa bantu bamwi mbobeshi abo bakasalawo kucita shintu shipuseneeko alimwi pacecino ciindi batoboneka ayi balicite maali aanji alimwi balekala kabotu. Aboobo mpashi inga baliipusha ayi: ‘Sa ndakacitabo kabotu kulyaaba kutacita shintu shimwi kwaamba ayi nsebensele Yehova? Nabi sa kucita boobo kwapa kwaamba ayi ntabi amaali aanji?’

11. Ino nceebonshi wakalemba Kulumbaisha 73 wakalefuka?

¹¹ Na amwebo mwakaliipushawo kale miipusho iyi, amuyeeye pa mbwakalinyumfwa wakalemba Kulumbaisha 73. Wakabona bantu batakalinga kusebensela Yehova sombi bakalinga kucite buumi buli kabotu, babile alimwi bakalinga kuboneka anga tabapengiiwo. (Kulu. 73:​3-5, 12) Ndyaakabona ayi shintu shitobeendela kabotu mubuumi, wakabona anga kusebensela Yehova nkusowabo ciindi. Wakalinga kupenshekwa “kulila bwaca” ceebo cakuyeeya pamakani aya alefula. (Kulu. 73:​13, 14) Ino wakacita buyani kwaamba ayi acileeke kulinyumfwa kulefuka?

12. Kweelana a Kulumbaisha 73:​16-18, ino shikulumbaisha wakacita buyani kwaamba ayi acileeke kulinyumfwa kulefuka?

¹² Amubelenge Kulumbaisha 73:​16-18. Shikulumbaisha wakaya mumusena usalalite wakwe Yehova. Ndyaakashika kumusena uyu akuba pomwi abantu bakwe Yehova, wakatalika kuyeeya kabotu. Wakanyumfwishisha ayi nabi kwaamba ayi bantu batakalinga kusebensela Yehova bakalinga kukala kabotu, tabakalinga kuciteewo kulangila. Aboobo wakacileka kulinyumfwa kulefuka alimwi wakashoma cakutatoonsha ayi kusebensela Yehova ncintu cibotu abuumbi ncaakasalawo kucita. Alimwi wakaba ushinishite kutolelela kusebensela Yehova.—Kulu. 73:​23-28.

13. Ino inga mwacita buyani kwaamba ayi mube aluumuno lwa mumiyeeyo na mulatoonsha ayi nshomwakasalawo kucita kale kale shakalingabo kabotu? (Amubone acikope.)

¹³ Bweenka mbuli shikulumbaisha mbwaakacita, amwebo Maswi akwe Lesa inga amucafwa kuba aluumuno lwa mumiyeeyo. Munshila nshi? Munokwiibaluka shintu shibotu nshemucite kale ashoolwe Yehova nshaatomupa, alimwi ayi taabacafwiiwo abo batamusebenseli. Bantu baanji batasebenseli Yehova balabona ayi kukala buumi buli kabotu ncocintu ciyandika abuumbi mukwiinga tabaciteewo kulangila. Nacibi boobo, mwebo Yehova wakamushomesha kumupa shoolwe shiinji kwiinda ansheenga mwayeeyela. (Kulu. 145:16) Alimwi amuyeeye paceeci: Sa naakwiinga kamucishi buumi bwanu mbobubete naakwiinga mwakasalawo kucita shintu shipuseneeko? Sombi kuli cintu comwi nceenga mwashoma cakutatoonsha: Na mwasalawo shakucita ceebo cakusuna Lesa abantu, lyoonse mulaakunooba ashintu shiinji mubuumi sheshi shinoomupa kusangalala.

NA MULALINYUMFWA AYI YEHOVA INGA TAATOLELELI KUMUSEBENSESHA

14. Ino nceebonshi bamwi balalinyumfwa ayi tabayandiki alimwi ino ngumwiipusho nshi ngweenga baliipusha?

¹⁴ Basebenshi bakwe Yehova bamwi tabacikonshi kucita shiinji kweelana ambweenga kabasuni ceebo cakucembela, kuciswa na kulemana. Aboobo mpashi inga balinyumfwa ayi tabayandiki kuli Yehova. Inga baliipusha ayi, ‘Sa Yehova inga watolelela kunsebensesha?’

15. Ino nciinshi wakalemba Kulumbaisha 71 ncaakalinga kushomete cakutatoonsha?

¹⁵ Wakalemba Kulumbaisha 71 alakwe mbwaakalinga kulinyumfwa. Wakapaila ayi: “Mutamfutatili bulya mbondamana nkusu.” (Kulu. 71:​9, 18) Nacibi boobo, shikulumbaisha wakalinga kushomete cakutatoonsha ayi Yehova alaakunomutanjilila akumucafwa na watolelela kumusebensela cakushomeka. Shikulumbaisha wakeeya ayi Yehova alasangalala na wabona baabo bacita nsheenga bacikonsha kwaamba ayi bamusebensele nabi ndyebatatocikoonsha kucita kweelana ambobasuni.—Kulu. 37:​23-25.

16. Ino Yehova inga wabasebensesha buyani bacinene? (Kulumbaisha 92:​12-15)

¹⁶ Na muli bacinene, amuyeeye Yehova mbwalinyumfwa pali ndimwe. Inga wamucafwa kumusebensela cakushomeka nabi tamucikonshi kucita shiinji. (Amubelenge Kulumbaisha 92:​12-15.) Amubikile maano ku nsheenga mwacikonsha kucita. Kucakubonenaako, inga mwacafwa bamwi kwiinda mukusebensela Yehova cakushomeka akubatondesha ayi mulababikilaako maano. Inga mwalwiitako bamwi Yehova mbwaamucafwa kwamyaaka iinji ashishomesho shamu Baibo nshomusunishishi ayi shikakumanishikwe. Alimwi munokwiibaluka ayi mipailo yakuswa paanshi lyamoyo njomupaililaako bamwi ilacafwa abuumbi. (1 Pit. 3:12) Tacicite mulandu abukaalo mbotubeteemo, soonsebo kuli nsheenga twaciita muncito yakwe Yehova akucafwako bamwi.

17. Ino nceebonshi tulyeelete kuleya kulyelanya kubamwi?

¹⁷ Na mulalinyumfwa cibiibi ceebo cakwaalilwa kucita shiinji muncito yakwe Yehova, amushibe kwaamba ayi alalumba pashintu shoonse nshemucikonsha kucita. Mpashi inga kamweelesha kweelanya nshomucikonsha kucita, kushintu bamwi nshobacita. Amuleye kucita boobo! Ino nceebonshi? Mukwiinga Yehova taamwelanyi kubamwi. (Gala. 6:4) Kucakubonenaako, Maliya wakapa Yesu mafuta anunkila kabotu adulite abuumbi. (Joni 12:​3-5) Ano mubupusano, mukalubinje mukandu wakabenga tumaali tobilo twamukuba twakalinga kucite mpindu iniini abuumbi. (Luka 21:​1-4) Sombi Yesu taana kweelanya banakashi bobilo aba nshobakacita. Muciindi cakucita boobo, wakabona ayi Maliya amukalubinje mukandu boonse bakatondesha lushomo. Yesu wakalinga kukonkela cakubonenaako ca Baishi cakumaninina. Aboobo inga mwashoma ayi Yehova alabona shoonse nshomucita ceebo calushomo lwanu alusuno ndomucite pali nguwe, alimwi alalumba abuumbi nabi kamulinyumfwa ayi tamutoocita shiinji.

18. Ino nciinshi ceenga catucafwa kwaamba ayi tucileeke kutoonsha? (Amubone akabokosi kacite mutwi utokwaamba ayi “Maswi Akwe Yehova Inga Amucafwa Kucileka Kutoonsha.”)

¹⁸ Soonsebo cimwi ciindi tulatoonsha. Sombi kweelana ambotweeya, Baibo inga yatucafwa kucileka kutoonsha. Aboobo amucite nsheenga mwacikonsha kucana shikumbulo kumiipusho njeenga kamucite, lyalo mulaakucileka kutoonsha. Yehova alamubikilako maano palwaanu. Alalumba pashintu shoonse nshomwakasalawo kucita kwaamba ayi mucite shiinji muncito yakwe alimwi alaakumupa cilambu. Amushibe ayi Yehova alibasuni alimwi alababikilaako maano basebenshi bakwe boonse bashomeka.