Nsheenga Tweeya Kumaswi Akweelaako Basankwa Bashomeka Ngobakaamba

1. Ino nceebonshi inga twaamba ayi kuli nsheenga tweeya kubacinene?

SOONSE tulayandika lucafwo kwaamba ayi tunoosala kabotu shakucita. Bamanene mulibungano alimwi abamakwesu abenankashi bashimpite lwakumushimu inga batucafwa abuumbi kunoosala kabotu shakucita. Na mbanene pali ndiswe, tatweelete kunoyeeya ayi nsheenga batulwiita inga tashitucafwiiwo munshiku shino. Yehova alisuni kwaamba ayi twiiyeeko kubacinene. Bekala myaaka iinji kwiinda ndiswe alimwi beeya shintu shiinji mubuumi bwabo akuba basongo.—Jobo 12:12.

2. Ino tutokwiiya nshi mumutwi uyu?

² Muciindi camu Baibo, Yehova wakasebensesha bacinene bashomeka kuyuminisha akutanjilila bantu bakwe. Kucakubonenaako, amuyeeye pali Mose, Defedi amutumwi Joni. Bakalingako pashiindi shipusene alimwi bukaalo bwabo bwakalinga kupusene abuumbi. Ndyebakalinga pafwiifwi akufwa, bakaamba maswi eenga acafwa bacanike. Boonse botatwe bakaamba pakuyandika kwa kunyumfwila Lesa. Yehova wakapa kwaamba ayi maswi abusongo ngobakaamba alembwe mu Baibo kwaamba ayi twiiyeeko. Kwiiya maswi ngobakaamba inga kwatucafwa, inga caba ayi tuli bacanike na bacinene. (Loma. 15:4; 2 Timo. 3:16) Mumutwi uyu, tutoobona nsheenga tweeya ku maswi amwi akweelaako basankwa aba ngobakaamba.

“MULAAKWIKALA MYAAKA IINJI”

3. Ino Mose wakalinga kucite mikuli nshi ndyaakalinga kusebensela Yehova abene Isilaeli?

³ Mose wakasebensela Yehova peela nkusu shakwe mubuumi bwakwe boonse. Wakalinga mushinshimi, moomboloshi, mutanjilili wa bashilumamba alimwi mulembi. Mose wakeeya shiinji mubuumi bwakwe kuswa kushintu nshaakeendaamo! Wakatanjilila bene Isilaeli kuswa mubusha mu Ijipiti alimwi wakabona shaankamiko shiinji Yehova nshaakacita. Yehova wakamusebensesha kulemba mabuku akutaanguna ali 5 amu Baibo, kwiilikaawo a Kulumbaisha 90, mpashi a Kulumbaisha 91. Alimwi cilyeelete ngwaakalemba alibuku lya Jobo.

4. Ino mbaani Mose mbakayuminisha alimwi ino nceebonshi?

⁴ Ndyekwakacaalabo paniini kwaamba ayi Mose afwe kaacite myaaka 120, wakeeta bene Isilaeli boonse kwaamba ayi abeebalushe shintu nshebakabona Yehova nshakabacitila. Bene Isilaeli bamwi ndyebakalinga bacikula bwangu, bakabona shaankamiko Yehova nshaakacita ambwakaanisha bene Ijipiti. (Kulo. 7:​3, 4) Bakabonaako Yehova ndyakapansaanya maanshi pa Lweenge Lusalala kwaamba ayi beende payumu. Lyalo bakabona ambwakanyonyoola Falawo abashilumamba bakwe boonse. (Kulo. 14:​29-31) Ndyebakalinga muluyanga, bakabona Yehova mbwaakabashitilisha akubalama. (Duto. 8:​3, 4) Kwakalinga kucaalitebo paniini kwaamba ayi bene Isilaeli banjile mu Cishi Cakashomeshekwa. Aboobo Mose wakalinga kusuni kubayuminisha kaatana kufwa.a

5. Ino maswi akweelaako Mose ngaakaamba ngotucana pa Dutolonomi 30:​19, 20 akabacafwa buyani bene Isilaeli?

⁵ Ino nshiinshi Mose nshaakaamba? (Amubelenge Dutolonomi 30:​19, 20.) Wakeebalusha bene Isilaeli ayi bakalinga kulangila shintu shibotu. Kwiinda mulucafwo lwakwe Yehova, bene Isilaeli bakalinga kucite coolwe cakukala myaaka iinji mucishi ncaakabashomesha. Cishi ico cakalinga cibotu abuumbi alimwi shishango shakalinga kucata kabotu! Mose wakaamba cishi ico mbocakalinga ndyakabalwiita ayi: “Ulaakumupa mandabala anene asumpukite ayo mwebo ngomutakwe kuyakaako. Maanda alaakunooswitebo shintu shiinji shibotu nshemutakwe kubikaamo mwebo. Mulaakuba amikalo ikabitwe kale, myuunda ya minyansa aya maolifi mwebo njemutakwe kulima.”—Duto. 6:​10, 11.

6. Ino nceebonshi Lesa wakasuminisha mishobo imwi kukoma bene Isilaeli?

⁶ Mose wakeelikaawo akucenjesha bene Isilaeli. Bakalinga kweelete kunokonkela milawo yakwe Yehova, kwaamba ayi batolelele kukala mucishi cibotu ncaakabashomesha. Mose wakabayuminisha ‘kusala buumi’ kwiinda mukunonyumfwila Yehova ‘akunooshomeka lyoonse kuli nguwe.’ Nacibi boobo, bene Isilaeli tabakwe kutolelela kunyumfwila Yehova. Aboobo Lesa wakasuminisha bene Asilya lyalo mukuya kwaciindi abene Babiloni kwaamba ayi bese mukukoma bene Isilaeli akubatola mubusha.—2 Baam. 17:​6-8, 13, 14; 2 Maka. 36:​15-17, 20.

7. Ino nshiinshi nsheenga tweeya kumaswi Mose ngaakaamba? (Amubone acikope.)

⁷ Ino tutokwiiyako nshi? Na katunyumfwila Yehova tulaakukala kwamuyayaya. Bweenka mbocakalinga kubene Isilaeli abo bakalinga pafwiifwi abuumbi kunjila mu Cishi Cakashomeshekwa, aswebo tuli pafwiifwi abuumbi kunjila mu cishi cipya Lesa ncaakatushomesha. Conoonobo cishi coonse cilaakuba Paladaiso bweenka mbocakalinga pakutaanguna. (Isa. 35:1; Luka 23:43) Satana ashibanda shakwe teshi bakabeeko. (Ciyu. 20:​2, 3) Teshi kukabeewo bupailishi bwiisha shakubeca pali Yehova. (Ciyu. 17:16) Teshi kukabeewo mfulumeende sha bantu isho shipensha bantu mbosheendelesha. (Ciyu. 19:​19, 20) Yehova teshi akasuminishewo muntu uli woonse kucita shintu shitabete kabotu mu Paladaiso. (Kulu. 37:​10, 11) Bantu boonse mu paladaiso balaakunookonkela milawo yakwe Yehova. Aboobo kulaakuba luumuno. Bantu boonse balaakunotondeshanya lusuno akushoma bamwi. (Isa. 11:9) Ishi nshintu shibotu abuumbi nshetutolangila! Alimwi na katunyumfwila Yehova, tulaakutolelela kukala mu paladaiso kwamuyayaya.—Kulu. 37:29; Joni 3:16.

8. Ino cishomesho ca buumi butamaani cakamucafwa buyani mishonali umwi? (Judi 20, 21)

⁸ Na katukutumana kuyeeya pacishomesho ca buumi butamaani Lesa ncaakatushomesha, cilaakutucafwa kutolelela kumunyumfwila nabi tweenda mumapensho ali buyani. (Amubelenge Judi 20, 21.) Alimwi cishomesho ici inga catucafwa kweelesha cankusu kusebensela pashintu nshetutaciti kabotu. Mukwesu umwi wakasebensa mbuli mishonali mu Africa kwamyaaka iinji, wakaamba ayi liinji wakalinga kweeleshekwa kucita cintu citasangalashi Yehova. Wakaamba ayi: “Ndakesa mukushiba ayi inga nshikali kwamuyayaya mu paladaiso na kantanyumfwili Yehova. Kushiba makani aya kwakancafwa kutolelela kweelesha kukoma bweelesho ubo akupaililawo abuumbi kuli Yehova. Kwiinda mulucafwo lwakwe, ndakacikonsha kutolelela kumusebensela.”

‘ULAAKUSWITILILA MUSHINTU SHOONSE’

9. Ino ngamapensho nshi Defedi ngakeendaamo mubuumi bwakwe?

⁹ Defedi wakalinga mwaami wa bantu bakwe Yehova alimwi wakalinga kushomeka kuli Lesa. Kwiilikaawo, wakalinga shilumamba, mushinshimi alimwi wakalinga kulisha akulemba nyimbo. Wakeenda mumapensho aanji. Kwamyaaka iinji, wakalinga kucica kuyuba Mwaami Saulo uyo wakalinga kusuni kumucaya. Defedi ndyakaaba mwaami, wakacica alimwi kwaamba ayi atacaikwi kuli Abusalomu mwanaakwe uyo wakalinga kusuni kumunyaya bwaami. Ano nabi kwaamba ayi Defedi wakeenda mumapensho aya oonse alimwi wakacita shilubo shimwi shinene, wakatolelela kushomeka kuli Lesa kushikila ndyaakafwa. Yehova wakamwaamba ayi ngu “muntu ngoonsuni abuumbi.” Ncakutatoonsha kwaamba ayi aswebo tulyeelete kukonkela maswi Defedi ngakaamba!—Milimo 13:22; 1 Baam. 15:5.

10. Ino nceebonshi Defedi wakayuminisha Solomoni mwanaakwe uyo wakesa mukumupyana pa bwaami?

¹⁰ Kucakubonenaako, amuyeeye pa maswi Defedi ngaakalwiita Solomoni mwanaakwe uyo wakesa mukumupyana pa bwaami. Yehova wakasala Solomoni kuyaka tempele umo bantu mobakalinga kweelete kunoolambilila Lesa. (1 Maka. 22:5) Iyi yakalinga ncito iyumu alimwi Solomoni wakalinga kuyandika lucafwo lwakwe Yehova kwaamba ayi acikoonshe kunootanjilila bene Isilaeli. Ino nshiinshi Defedi nshaakalwiita mwanaakwe? Amuleke tubone.

11. Kweelana a 1 Baami 2:​2, 3, ino ngamaswi nshi Defedi ngaakalwiita Solomoni, alimwi ino nshiinshi shakacitika Solomoni ndyaakakonkela maswi ayo? (Amubone acikope.)

¹¹ Ino nshiinshi Defedi nshaakaamba? (Amubelenge 1 Baami 2:​2, 3.) Defedi wakalwiita mwanaakwe ayi na kaanyumfwila Yehova, alaakuswitilila mubuumi. Alimwi kwamyaaka iinji, Solomoni wakaswitilila mushintu shiinji. (1 Maka. 29:​23-25) Wakayaka tempele ibotu abuumbi, kulemba mabuku amwi amu Baibo alimwi maswi amwi ngakaamba akalembwa mumabuku amwi amu Baibo. Wakapuka ceebo ca busongo abubile mbwaakalinga kucite. (1 Baam. 4:34) Sombi kweelana a Defedi mbwaakaamba, Solomoni wakalinga kusa mukuswitililabo na kaanyumfwila Yehova Lesa. Cakabicaako ncakwaamba ayi, Solomoni ndyaakacembela wakatalika kulambila shibumbwabumbwa. Yehova taakwe kukondwa, aboobo wakacileka kupa Solomoni busongo bwakweendelesha bantu cabululami alimwi cakutanyengelela.—1 Baam. 11:​9, 10; 12:4.

12. Ino nshiinshi nsheenga tweeya kumaswi Defedi ngaakaamba?

¹² Ino tutokwiiyako nshi? Tulaakuswitilila na katunyumfwila Yehova. (Kulu. 1:​1-3) Kwalo, Yehova taakwe kutushomesha kutupa bubile abulemu mbuli mbwaakacita kuli Solomoni. Sombi na katunyumfwila Lesa wesu, alaakutupa busongo bweshi bukatucaafwe kunoosala kabotu shakucita. (Tus. 2:​6, 7; Jemu. 1:5) Njiisho shakwe shamu Baibo inga shatucafwa kusala kabotu shakucita pamakani ancito, lwiiyo, shakulikondelesha amaali. Na katukonkela Yehova nshaatulwiita, tulashitilisha bushicibusa bwesu anguwe alimwi tulaakuba abuumi butamaani. (Tus. 2:​10, 11) Tulaakuba abeshicibusa bali kabotu. Alimwi tulaakuba alusangalalo mumukwashi wesu.

13. Ino nshiinshi shakacafwa ba Carmen kwaalula nshobakasala kucita mubuumi bwabo?

¹³ Ba Carmen abo bakala ku Mozambique, bakalinga kuyeeya ayi kuba alwiiyo lwapeculu nkweenga kwabapa kukala buumi buli kabotu. Aboobo bakaya ku yunivesiti kwaamba ayi bakeeye bwakulemba mapulani akuyaka maanda. Bakalemba ayi: “Ndakalinga kushisuni nshondakalinga kwiiya. Sombi shakalinga kumanina ciindi alimwi ndakalinga kulema. Ndakalinga kuba kucikolo kuswa 07:30 kushika 18:00. Cakalinga kunjumina kunoocanika kumabungano alimwi ndakaboolela pesule lwakumushimu. Ndakesa mukushiba ayi ndakalinga kweelesha kusebensela bamaami bobilo.” (Mate. 6:24) Ba Carmen bakapaililaawo pabukaalo bwabo akulangoola makani mumabuku esu. Bakatolelela akwaamba ayi: “Bamanene mulibungano alimwi abama ndyebakancafwa, ndakasalawo kuswaako ku yunivesiti akutalika kusebensela Yehova muncito yaciindi coonse. Ndalinyumfwa ayi ndakasalawo kucita cintu cili kabotu alimwi ndisangalete abuumbi.”

14. Ino ngamakani nshi ayandika Mose a Defedi ngobakaamba?

¹⁴ Mose a Defedi bakalinga kusuni Yehova alimwi bakalinga kucishi ayi kumunyumfwila kulayandika abuumbi. Aboobo mumaswi akweelaako ngobakaamba, bakayuminisha bamwi kukonkela cakubonenaako cabo akutolelela kushomeka kuli Yehova. Alimwi boonse bobilo bakacenjesha bamwi ayi na bacileka kushomeka kuli Yehova, inga tabatoleleli kuba abushicibusa anguwe na kutambula shoolwe kuswa kuli nguwe. Maswi ngobakaamba inga atucafwa abuumbi munshiku shino. Ndyepakeenda myaaka iinji, musebenshi wakwe Yehova aumwi wakaamba ncotuyandikila kutolelela kushomeka kuli Lesa.

“TAAKU CIMWI CINSANGALASHA ABUUMBI”

15. Ino nshiinshi mutumwi Joni nshaakabona mubuumi bwakwe?

¹⁵ Joni wakalinga mutumwi Yesu Klistu ngwaakalinga kusuni abuumbi. (Mate. 10:2; Joni 19:26) Joni wakalinga kuya a Yesu muncito yakushimikila, wakabona shaankamiko nshaakacita alimwi wakatolelela kushomeka kuli Yesu nabi shintu ndyeshakalinga shiyumu. Wakabonaako Yesu ndyaakalinga kucaikwa alimwi wakamubona ndyaakabushikwa. Alimwi wakabona libungano lya Bwineklistu mbolyakalinga kuya panembo. Kwiilikaawo, Joni wakekala myaaka iinji cakwaamba ayi wakabonaako makani abotu ndyaakalinga kushimikilwa ‘kubantu boonse mucishi ca panshi.’—Kolo. 1:23.

16. Ino mbaani bakafubilaamo mumakalata Joni ngaakalemba, alimwi ino mbaani bafubilaamo munshiku shino?

¹⁶ Joni ndyaakacembela abuumbi, wakapekwa coolwe cakulemba libuku lisangalasha lya Ciyubululo. (Ciyu. 1:1) Alimwi wakalemba libuku lya Makani Abotu licite liina lyakwe. Kwiilikaawo, Joni wakalemba amakalata otatwe ayo pacecino ciindi eetwa ayi 1 Joni, 2 Joni a 3 Joni. Nkalata yatatu wakailembela Mwineklistu ushomeka waliina lya Gayasi, uyo Joni ngwaakalinga kubona ayi ngu mwanaakwe lwakumushimu ngwaasuni abuumbi. (3 Joni 1) Paciindi ici, cilyeelete kwakalinga bantu baanji Joni mbaakalinga kubona ayi mbana bakwe lwakumushimu. Makani ngaakalemba musankwa uyu wacinene ushomeka, alayuminisha bashikwiiya bakwe Yesu boonse kushika apacecino ciindi.

17. Kweelana a 3 Joni 4, ino nciinshi cisangalasha abuumbi?

¹⁷ Ino nshiinshi Joni nshaakalemba? (Amubelenge 3 Joni 4.) Munkalata yatatu Joni njaakalemba, wakaamba ayi wakalinga kusangalala kubona bashominyina kabanyumfwila Lesa. Paciindi Joni ndyaakalemba nkalata iyi, bantu bamwi bakalinga kwiisha njiisho shakubeca akupa kwaamba ayi mulibungano mutabi lucatano. Nacibi boobo, bamwi mulibungano bakatolelela ‘kukonkela shalushinisho.’ Bakalinga “kukonkela milawo” yakwe Yehova. (2 Joni 4, 6) Beneklistu bashomeka aba bakapa kwaamba ayi Joni a Yehova basangalale abuumbi.—Tus. 27:11.

18. Ino nshiinshi nsheenga tweeya kumaswi Joni ngaakaamba?

¹⁸ Ino tutokwiiyako nshi? Na twatolelela kushomeka kuli Yehova, tulaakuba alusangalalo akusangalasha bamwi. (1 Joni 5:3) Kucakubonenaako, tulasangalala ceebo cakushiba ayi tutosangalasha Yehova. Alimwi Yehova alasangalala abuumbi na katukonkela milawo yakwe akuleya kucita shibiibi. (Tus. 23:15) Baanjelo kwiculu abalo balasangalala. (Luka 15:10) Cimwi citusangalasha nkubona bamakwesu abenankashi mbobatolelela kushomeka nabi ndyebatopenshekwa na kweeleshekwa kucita shintu shitabete kabotu. (2 Tesa. 1:4) Alimwi na cishi cakwe Satana cikanyonyoolwe, tulaakusangalala ceebo ca kushiba ayi twakatolelela kushomeka kuli Yehova.

19. Ino nshiinshi nankashi waliina lya Rachel nshaakaamba pamakani akwiishako bamwi pali Yehova? (Amubone acikope.)

¹⁹ Tulasangalala bunene bunene na katwiishako bamwi pali Yehova. Ba Rachel abo bakala ku Dominican Republic, balalinyumfwa ayi ncoolwe cinene kwiishako bamwi pali Yehova Lesa wesu. Bacafwa bantu baanji kutalika kulambila Yehova. Bakaamba ayi: “Nciyumu akwaamba mbonsangalala na mbonjiisha Baibo batalika kwiiya kusuna Yehova, kucinka manungo muli nguwe cakumaninina akwaalula buumi bwabo kwaamba ayi bamusangalashe. Lusangalalo ndombaalo inga talweelani akusebensa cankusu na kulyaaba kuli koonse nkweenga ndaciita kwaamba ayi mbaiishe pali Yehova.”

AMUFUBILEEMO MUMASWI AKWEELAAKO BASANKWA BASHOMEKA NGOBAKAAMBA

20. Ino nshiinshi nshotucita shikoshenye ashakalinga kucita Mose, Defedi, a Joni?

²⁰ Mose, Defedi alimwi a Joni, ndikale kale abuumbi ndyebakalingaako. Alimwi mbobakalinga kukala paciindi cilya shilipusene abuumbi ambotukala munshiku shino. Sombi kuli shintu shiinji nshotucita shikoshenye anshobakalinga kucita. Bakalinga kusebensela Lesa wancine bweenka mbuli ndiswe. Bweenka mbocakalinga kuli mbabo, tulapaila kuli Yehova akucinka manungo muli nguwe kwaamba ayi atucaafwe akututanjilila. Alimwi bweenka mbuli basankwa aba, tulashoma ayi Yehova alapa shoolwe abo bamunyumfwila.

21. Ino nshoolwe nshi nsheshi tukatambule na katukonkela maswi akaamba Mose, Defedi, alimwi a Joni?

²¹ Atukonkele maswi akweelaako basankwa aba bacinene ngobakaamba akunoonyumfwila Yehova. Na twacita boobo, tulaakuswitilila mushintu shoonse nshotucita. Tulaakukala “myaaka iinji,” nkokwaamba ayi kuba abuumi kwamuyayaya! (Duto. 30:20) Alimwi tulaakuba alusangalalo ceebo cakusangalasha Ishiwesu wakwiculu shilusuno, uyo weshi akakumanishe shishomesho shakwe shoonse munshila iinditeewo abuumbi kwiinda ambweenga twayeeyela.—Efe. 3:20.