Nobamakwesu—Sa Mutosebensa Cankusu Kwaamba Ayi Mweelele Kusebensa Mbuli Musebenshi Ucafwilisha?

1. Ino mutumwi Paulo wakalinga kubabona buyani basebenshi bacafwilisha?

BASEBENSHI bacafwilisha balasebensa ncito shiyandika abuumbi mumabungano. Mutumwi Paulo wakalinga kubona ayi basankwa bashomeka aba balayandika. Kucakubonenaako, ndyaakalembela Beneklistu baku Filipi nkalata, wakaansha basebenshi bacafwilisha abamanene mulibungano.—Filip. 1:1.

2. Ino mukwesu waliina lya Luis alalinyumfwa buyani kusebensa mbuli musebenshi ucafwilisha?

² Bamakwesu baanji balasangalala abuumbi kusebensa mbuli basebenshi bacafwilisha, inga caba ayi mbacanike na mbacinene. Kucakubonenaako, mukwesu waliina lya Devan wakalinga kucite myaaka 18 ndyakasalwa kusebensa mbuli musebenshi ucafwilisha. Sombi mukwesu waliina lya Luis wakasalwa kusebensa mbuli musebenshi ucafwilisha kaacite myaaka iindilila 50. Ino alalinyumfwa buyani kusebensa mbuli musebenshi ucafwilisha? Wakaamba ayi: “Ndisangalete abuumbi kusebensela bamakwesu abenankashi mulibungano munshila iyi. Bakantondesha lusuno abuumbi, andime ano ndyeelete kubatondesha lusuno.” Basebenshi bacafwilisha baanji abalo mbobalinyumfwa.

3. Ino njimiipusho nshi njeshi tubandikeewo?

³ Na muli mukwesu wakabombekwa alimwi tamutosebensa mbuli musebenshi ucafwilisha, sa inga mwasebensa cankusu kwaamba ayi mukeelele? Ino nciinshi ceelete kumuyuminisha kucita boobo? Alimwi ino nshiinshi nshomweelete kucita kwaamba ayi mweelele? Mumutwi uyu, tutocana shikumbulo kumiipusho iyi. Sombi amuleke tutaangune kubandika mikuli njobasebensa basebenshi bacafwilisha.

INO NJIMIKULI NSHI NJOBASEBENSA BASEBENSHI BACAFWILISHA?

4. Ino njimikuli nshi njobasebensa basebenshi bacafwilisha? (Amubone acikope.)

⁴ Musebenshi ucafwilisha ngu mukwesu wakabombekwa uyo wakasalwa amushimu usalashi, kwaamba ayi anoocafwa bamanene kusebensa mikuli iinji iyandika mulibungano. Basebenshi bacafwilisha bamwi balashinisha kwaamba ayi beshikushimikila balicite musena kwa kushimikila amabuku akusebensesha muncito yakushimikila. Bamwi balacafwilisha kubotesha akubamba Ŋanda ya Bwaami. Alimwi basebenshi bacafwilisha balasebensa mbuli baasha akusebensela ku shilimba ciindi camabungano. Sombi ciyandika abuumbi, basebenshi bacafwilisha mbasankwa basuni Yehova alimwi bakonkela njiisho shakwe. Alimwi balibasuni abuumbi bashominyinaabo. (Mate. 22:​37-39) Ino nshiinshi mukwesu wakabombekwa nshaeelete kucita kwaamba ayi eelele kusebensa mbuli musebenshi ucafwilisha?

5. Ino nshiinshi mukwesu nshaeelete kucita kwaamba ayi eelele kusebensa mbuli musebenshi ucafwilisha?

⁵ Baibo ilatulwiita mibo bamakwesu njobeelete kubaayo kwaamba ayi basalwe kusebensa mbuli basebenshi bacafwilisha. (1 Timo. 3:​8-10, 12, 13) Na mulisuni kucafwa bamwi kwiinda mukusebensa mbuli musebenshi ucafwilisha, amwiiye shiinji pamibo iyi akweelesha kunoitondesha. Sombi mulyeelete kutaanguna kuyeeya citoomupa kusuna kusebensa mbuli musebenshi ucafwilisha.

INO NCEEBONSHI MULISUNI KUSEBENSA MBULI MUSEBENSHI UCAFWILISHA?

6. Ino nciinshi ceelete kumuyuminisha kusuna kusebensela bamakwesu abenankashi? (Mateyo 20:28; amubone acikope cili papeeji yakutaanguna.)

⁶ Yesu wakatutondesha cakubonenaako cibotu abuumbi nceenga twakonkela. Wakalinga kucita shintu shoonse ceebo cakwaamba ayi wakalinga kusuni Baishi abantu. Lusuno ulo lwakamuyuminisha kusebensa cankusu alimwi akusebensa ncito bantu bamwi nshobakalinga kubona ayi nshapanshi kwaamba ayi acafwe bamwi. (Amubelenge Mateyo 20:28; Joni 13:​5, 14, 15) Na amwebo mulisuni kusebensa mbuli musebenshi ucafwilisha ceebo cakusuna Yehova abantu, alaakumucafwa kweelela kupekwa mukuli uyu.—1 Koli. 16:14; 1 Pit. 5:5.

7. Ino nceebonshi mukwesu alyeelete kuleya kusuna kuba musebenshi ucafwilisha ceebo cakusuna ayi bamwi banoomubona ayi alayandika?

⁷ Liinji bantu mucishi balakumbwa baabo balibona ayi balayandika. Sombi bantu bakwe Yehova teshi mbobabete ubo. Na mukwesu kaasuni bamwi bweenka Yesu mbwaakacita, inga taasuni kunokweendelesha bamwi na kusuna kunoomubona ayi alayandika. Na mukwesu wamushobo uyo wasalwa mulibungano, mpashi inga kaakaka kusebensa ncito bamwi nshobabona ayi nshapanshi na shintu shimwi shiyandika kucitwa kwaamba ayi mbelele shakwe Yehova shilamwe kabotu. Inga kaalibona ayi taeeleli kusebensa ncito isho. (Joni 10:12) Yehova inga taacafwiwo muntu ucita shintu ceebo ca kusuna ayi bamwi banoomubona ayi alayandika.—1 Koli. 10:​24, 33; 13:​4, 5.

8. Ino nshiinshi Yesu nshaakalwiita batumwi bakwe?

⁸ Paciindi cimwi, nabi bashikwiiya Yesu mbwaakalinga kunyumfwanaabo abuumbi, bakalinga kusuni kupekwa mikuli imwi ceebo cakuba aluyaando lutabete kabotu. Amuyeeye pa mutumwi Jemusi a Joni nshobakacita. Bakasenga Yesu kwaamba ayi akabape mikuli iyandika mu Bwaami. Yesu taakwe kubalwiita ayi nshebakasenga shakalinga kabotu. Sombi wakalwiita batumwi boonse bali 12 ayi: “Uyo woonse usuni kuba munene pali ndimwe, ulyeelete kuba musebenshi wanu. Ncakwiila uyo woonse usuni kuba mutanjilili pali ndimwe, ulyeelete kuba musha wa boonse.” (Maako 10:​35-37, 43, 44) Bamakwesu bacite luyaando lwa kusuna kusebensela bamwi, balaakucafwa libungano munshila shiinji.—1 Tesa. 2:8.

SHEENGA SHAMUPA KUSUNISHISHA KUSEBENSELA BASHOMINYINAANU

9. Ino nshiinshi sheenga shamupa kusunishisha kusebensela bashominyinaanu?

⁹ Ncakutatoonsha kwaamba ayi Yehova mulimusuni alimwi mulisuni kusebensela bamwi. Sombi mpashi inga kamutasunishishi kusebensa ncito basebenshi bacafwilisha nshobasebensa. Ino nshiinshi sheenga shamupa kusunishisha kweelela kupekwa mukuli uyu? Amuyeeye palusangalalo ndweshi mukabaalo na mukanosebensa ncito shimwi kwaamba ayi mucafwe bashominyinaanu. Yesu wakaamba ayi: “Kupa kulaleta lusangalalo abuumbi kwiinda kutambula.” (Milimo 20:​35, NWT) Yesu alakwe ishi nshaakacita. Wakalinga kusangalala abuumbi kusebensela bamwi. Amwebo inga mwasangalala.

10. Ino nshiinshi Yesu nshaakacita shakatondesha ayi wakalinga kusangalala kucafwa bamwi? (Maako 6:​31-34)

¹⁰ Amuyeeye pacakubonenaako citondesha ayi Yesu wakalinga kusangalala kucafwa bamwi. (Amubelenge Maako 6:​31-34.) Paciindi cimwi, Yesu abatumwi bakwe bakalema. Bakasalawo kuya kumusena kwatakalingaawo bantu kwaamba ayi bokesheeko. Sombi bantu baanji bakafwambaana kushika kumusena uko ceebo cakusuna ayi Yesu abeeishe. Yesu naakwiinga wakakaka kubaiisha mukwiinga lakwe abatumwi bakwe tabakalinga kucitewo ‘aciindi cakookesha kwaamba ayi balye.’ Nabi mpashi naakwiinga wakabeeishabo shintu shiniini akubalwiita ayi banooya. Sombi ceebo cakwaamba ayi Yesu wakalinga kusuni bantu, “wakatalika kubeeisha shintu shiinji.” Alimwi wakatolelela kubeeisha kushikila ‘lisuba ndilyakaya mukwipila.’ (Maako 6:35) Wakacita boobo kuteshi ceebo cakwaamba ayi mbwaakalinga kweelete kucita, sombi nceebo cakwaamba ayi “wakabanyumfwila nkuumbu.” Wakalinga kusuni kubeeisha mukwiinga wakalinga kubasuni. Yesu wakalinga kusangalala abuumbi kucafwa bamwi.

11. Ino Yesu wakalinga kubacafwa buyani bantu kuba anshobakalinga kuyandika? (Amubone acikope.)

¹¹ Yesu taakwe kucafwabo bantu kwiinda mukubaiisha pali Lesa, sombi wakabacitila ashintu shimwi. Wakapanga shakulya munshila yacaankamiko akulwiita bashikwiiya bakwe ayi baabile bantu. (Maako 6:41) Yesu ndyaakacita boobo, wakaiisha bashikwiiya bakwe mbweenga bacafwa bamwi. Alimwi wakabacafwa kushiba ayi incito shamushobo uyu isho liinji basebenshi bacafwilisha nshobasebensa, shilayandika. Amuyeeyebo batumwi mbobakasangalala kusebensela pomwi a Yesu kwaabila bantu shakulya isho nshaakapanga munshila yacaankamiko, kushikila ‘boonse balya akukuta’! (Maako 6:42) Ici ncakubonenaako comwibo citondesha ayi Yesu wakalinga kubikila bunene maano kushintu bamwi nshobakalinga kuyandika, kuteshi nshaakalinga kuyandika lakwe. Wakacita boobo mubuumi bwakwe boonse ndyaakalinga pacishi. (Mate. 4:23; 8:16) Yesu wakalinga kusangalala abuumbi kwiisha bamwi akubacafwa kuba anshobakalinga kuyandika. Amwebo mulaakusangalala abuumbi na mulilyaabite kusebensa mbuli musebenshi ucafwilisha.

12. Ino nceebonshi soonse tatweelete kulinyumfwa ayi tatucitewo lushibo ndweenga twasebensesha kucafwa bamakwesu abenankashi?

¹² Na mutolinyumfwa ayi taakuwo lushibo ndomucite ndweenga mwasebensesha kucafwa bamwi, mutalefuki. Ncakutatoonsha kwaamba ayi mulicite mibo yeenga yamucafwa kucita shiinji mulibungano. Amuyeeye pamaswi Paulo ngakaamba ngotucana pa 1 Bene Kolinto 12:​12-30 lyalo akusenga Yehova kwaamba ayi amucaafwe kubona makani aya mbwaamukuma. Maswi Paulo ngaakaamba alatondesha patuba ayi mulayandika abuumbi mulibungano, bweenka mbuli basebenshi bakwe Yehova bamwi boonse. Na pacecino ciindi tamutosebensa mbuli musebenshi ucafwilisha ceebo cakwaamba ayi muciyandika kwiiya kutondesha mibo imwi, amutolelele kusebensa cankusu. Amucite nsheenga mwacikonsha kusebensela Yehova akucafwa bashominyinaanu. Amushibe kwaamba ayi bamanene balaakuyeeyawo pali ndimwe akumupa ncito nsheenga mwacikonsha kusebensa.—Loma. 12:​4-8.

13. Sa bamakwesu nshobeelete kucita kwaamba ayi beelele kupekwa mikuli mulibungano shilipusene a Beneklistu bamwi nshobeelete kucita?

¹³ Alimwi amuyeeye paceeci: Mibo iinji mukwesu njaaelete kubaayo kwaamba ayi abe musebenshi ucafwilisha njo mibo Beneklistu boonse njobeelete kubaayo. Beneklistu boonse balyeelete kuba abushicibusa buyumu a Yehova, kusangalala kucafwa bamwi, akunoocita shintu shisangalasha Lesa. Aboobo mpashi mulatondesha kale mibo iinji iyandika kwaamba ayi mukwesu eelele kusebensa mbuli musebenshi ucafwilisha. Ano ino nshiinshi shiine mukwesu nshaeelete kucita kwaamba ayi eelele?

NSHEENGA MWACIITA KWAAMBA AYI MWEELELE KUSEBENSA MBULI MUSEBENSHI UCAFWILISHA

14. Ino kuba bantu ‘babikila maano kushintu’ cilaamba nshi? (1 Timoti 3:​8-10, 12)

¹⁴ Ano amuleke tubandike pamibo imwi bamakwesu njebayandika kubaayo yaambwa pa 1 Timoti 3:​8-10, 12. (Amubelenge.) Basebenshi bacafwilisha balyeelete kuba bantu ‘babikila maano kushintu.’ Munshila imwi maswi aya inga asansululwa ayi balacita shintu sheenga shapa kwaamba ayi bamwi “banoobalemeka.” Ano maswi aya taasansululi ayi inga tamusekiiwo na kucita shintu shisangalasha. (Shiku. 3:​1, 4) Sombi alasansulula ayi mulasebensa cankusu kukumanisha mikuli njeenga mwapeekwa. Na lyoonse kamumanisha ncito njeenga mwapeekwa akwiisebensa kabotu, bamakwesu abenankashi mulibungano balaakushiba ayi inga bamushoma alimwi balaakunoomupa bulemu.

15. Ino kuba ‘batabeci’ akuba “batayandooli maali munshila sha bucenjeshi” cilaamba nshi?

¹⁵ Kuba ‘batabeci’ cilaamba ayi mulaamba shancine, mulashomeka alimwi muli muntu bamwi ngweenga bashoma. Mulacita nshomwaamba alimwi tamulitondeshi kuba mbomutabete. (Tus. 17:20) “Batayandooli maali munshila sha bucenjeshi” cilaamba ayi mulashomeka ndyemutoocita makwebo abamwi alimwi ambomusebensesha maali. Tamweelete kusebensesha beshicibusa banu mulibungano munshila yakulisuna ceebo cakusuna kucana maali.

16. (a) Ino kuba ‘bateendilishi kunwa waini’ cilaamba nshi? (b) Ino kuba ‘anjeelacaamba isalalite’ cilaamba nshi?

¹⁶ Kuba ‘bateendilishi kunwa waini’ cilaamba ayi tamunwi bwalwa cakwiindilisha alimwi tamushibikitwe mbuli muntu unwa abuumbi. Kuba a ‘anjeelacaamba isalalite’ cilaamba ayi mulakonkela njiisho shakwe Yehova. Nabi kwaamba ayi tamumaninite, inga mwaba aluumuno ceebo cakushiba ayi mulicite bushicibusa bubotu a Lesa.

17. Ino ‘kubeelesha na baleelela’ cilaamba nshi? (1 Timoti 3:10; amubone acikope.)

¹⁷ ‘Kubeelesha na baleelela’ cilaamba ayi bamanene bakabona ayi mulasebensa kabotu mikuli njeenga mwapeekwa alimwi inga bamushoma. Aboobo na bamanene bamupa ncito, amukonkele cakubikila maano nsheenga bamulwiita alimwi abutanjilishi mbotutambula kuswa kulibunga lyakwe Yehova. Amushinishe kwaamba ayi mwanyumfwishisha kabotu nshomutoyandika kucita aciindi ndyemweelete kumanisha ncito iyo. Na kamusebensa cankusu alimwi cakubikila maano incito ili yoonse njeenga mwapeekwa, bamakwesu abenankashi mulibungano balaakubona ayi mutoya panembo kwaamba ayi mweelele kupekwa mikuli. Nobamanene, amube bashinishite kunookwiisha bamakwesu bakabombekwa. (Amubelenge 1 Timoti 3:10.) Sa mulibungano lyanu muli bamakwesu bakabombekwa bacite myaaka 10 kushika ku 14 nabi batana kukwanisha myaaka iyi? Sa balicite mulongo ubotu wakucita ciiyo capalwaabo alimwi balalibambila kabotu mabungano? Sa lyoonse balakumbulaawo kumabungano akwaabanamo lubasu muncito yakushimikila? Na ubo mbocibete, amubape ncito njeenga bacikonsha kusebensa kweelana aciimo ncebabeteewo. Na kamucita boobo, bamakwesu bacanike inga batondesha na inga basebensa kabotu mikuli njeenga bapekwa. Lyalo mpashi na baba amyaaka pakati ka 17 a 19, inga beelela kusebensa mbuli basebenshi bacafwilisha.

18. Ino kuba bantu ‘batacite makani akubabekesha’ cilaamba nshi?

¹⁸ Kuba ‘batacite makani akubabekesha’ cilaamba ayi taakuwo muntu weenga wamubekesha kucita cilubo cinene. Kwalo, Beneklistu inga bababekesha kucita cintu citabete kabotu. Bantu bakabekesha Yesu shintu nshaatakwe kucita, alimwi wakaamba ayi bantu baanji balaakubekesha bashikwiiya bakwe. (Joni 15:20) Nacibi boobo, na mwatolelela kucita shintu shiluleme bweenka Yesu mbwaakacita, mulaakuba ampuwo ibotu mulibungano.—Mate. 11:19.

19. Ino maswi akwaamba ayi “beebete mwanakashi womwi” alasansulula nshi?

¹⁹ “Beebete mwanakashi womwi.” Yehova ndyaakatalika cikwati, wakaamba ayi musankwa womwi amwanakashi womwi mbobeelete kweebana. Alimwi Beneklistu boonse balyeelete kukonkela mulawo uyu. (Mate. 19:​3-9) Musankwa Mwineklistu taaelete kucita bufuule. (Ebu. 13:4) Alimwi ici cilaamba ayi lyoonse alyeelete kunooshomeka kumukaakwe. Aboobo inga taatondeshi lusuno lwa mucikwati ku banakashi bamwi.—Jobo 31:1.

20. Ino mukwesu inga watondesha buyani ayi ‘aleendelesha kabotu’ bamumukwashi wakwe?

²⁰ “Beendelesha kabotu bana babo abamumaandaabo.” Na muli mutwi wamukwashi, mulyeelete kusebensa cankusu kukumanisha mukuli uyu. Lyoonse munoocita kulambila kwamukwashi. Liinji munooya muncito yakushimikila pomwi abakaanu abana banu na kacikonsheka kucita boobo. Amucafwe bana banu kuba abushicibusa a Yehova. (Efe. 6:4) Musankwa ulama kabotu bamumukwashi wakwe alatondesha ayi inga wacikonsha kusebensa mikuli ya mulibungano.—Amweelanye a 1 Timoti 3:5.

21. Ino nshiinshi nsheenga mwaciita na pacecino ciindi tamutosebensa mbuli musebenshi ucafwilisha?

²¹ Nobamakwesu, na pacecino ciindi tamutosebensa mbuli musebenshi ucafwilisha, twamusenga ayi mubelenge mutwi uyu cakubikila maano akupaililawo kuli Yehova pamakani aya. Amwiiye shiinji pamibo bamakwesu njobeelete kubaayo kwaamba ayi beelele kuba basebenshi bacafwilisha, akweelesha cankusu kunotondesha mibo iyo. Amuyeeye mbomusuni Yehova abashominyinaanu. Amuyumye lusuno ndomucite pa bamakwesu abenankashi akuyeeya pa citoomupa kusuna kubasebensela. (1 Pit. 4:​8, 10) Amusebense cankusu kwaamba ayi mukabe musebenshi ucafwilisha, lyalo mulaakuba alusangalalo abuumbi ndyeshi mukanoosebensela bamakwesu abenankashi mulibungano. Yehova aamupe shoolwe ndyemutokweelesha kucita nsheenga mwacikonsha kwaamba ayi mukeelele kusebensa mbuli musebenshi ucafwilisha!—Filip. 2:13.