Nsheenga Tweeya Kuswa ku Cilubula

1. Ino kucanika ku Ciibalusho ca lufu lwakwe Yesu kulatucafwa buyani?

YEHOVA wakatupa cipo ciyandika abuumbi ndyaakatuma Mwanaakwe kusa mukutufwita! (2 Koli. 9:15) Inga mwaba abushicibusa a Yehova ceebo cakwaamba ayi Yesu wakatufwita. Alimwi inga mwalangila kukala kwamuyayaya. Tulyeelete kunoolumba Yehova abuumbi uyo wakatupa cilubula ceebo cakwaamba ayi alitusuni abuumbi! (Loma. 5:8) Kwaamba ayi tutolelele kulumba pacilubula akunokwiibaluka Yehova a Yesu nshobakatucitila, Yesu wakatulwiita ayi tulyeelete kunoocanika ku Ciibalusho ca lufu lwakwe ico cibaako linkanda lyomwi pa mwaaka.—Luka 22:​19, 20.

2. Ino tutokwiiya nshi mumutwi uyu?

² Mwaaka uno, Ciibalusho cilaakubako Pacibelu pa 12 April, 2025. Ncakutatoonsha kwaamba ayi soonse tutolangila kucanikaako. Munsondo shiniini shacaalaako kwaamba ayi Ciibalusho cishike apesule lya Ciibalusho, kukutumana kuyeeyaa pashintu Yehova a Yesu nshobakatucitila, kulaakutucafwa abuumbi. Mumutwi uyu, tutobandika nsheenga tweeya pali Yehova a Yesu kuswa ku cilubula. Mumutwi utokonkelaawo, tulaakwiiya mbweenga cilubula catucafwa ambweenga twatondesha kulumba pacipo ici.

INO CILUBULA CILATWIISHA NSHI PALI YEHOVA?

3. Ino inga cakonsheka buyani bantu baanji kulubulwa kuswa kububi alufu kwiinda mu muntu womwi? (Amubone acikope.)

³ Cilubula cilatwiisha ayi Yehova ngu Lesa usuni bululami. (Duto. 32:4) Adamu ndyaakasalaawo kutanyumfwila Lesa, wakabisha alimwi mukuya kwaciindi wakafwa. Ceebo cakwaamba ayi tuli bana bakwe, aswebo tulabisha alimwi tulafwa. (Loma. 5:12) Yehova wakatuma Yesu kusa mukwaaba buumi bwakwe mbuli cilubula, kwaamba ayi atulubule kububi alufu. Ano ino inga cakonsheka buyani muntu womwi umaninite kulubula bantu baanji abuumbi kuswa kububi alufu? Mutumwi Paulo wakaamba ayi: “Bweenka mbuli bantu boonse mbobakaba bamucita shibi ceebo cakutanyumfwila Lesa kwa muntu womwi [Adamu], mbomunya ubo bantu boonse mbobalulamikwa ceebo cakunyumfwila Lesa kwa muntu womwi, Yesu Klistu.” (Loma. 5:19; 1 Timo. 2:6) Paulo wakalinga kusansulula ayi bantu boonse balabisha akufwa ceebo cakwaamba ayi muntu womwi umaninite taakwe kunyumfwila Lesa. Aboobo kwaamba ayi tulubulwe kuswa kububi alufu, muntu womwi umaninite wakalinga kweelete kunyumfwila Lesa.

4. Ino nceebonshi Yehova taakwe kusuminishabo bana bakwe Adamu bakalinga kumunyumfwila kwaamba ayi bakekale kwamuyayaya?

⁴ Sa Yehova wakalinga kweeletebo kutuma Yesu kusa mukutufwita? Ino nceebonshi taakwe kusuminishabo bana bakwe Adamu bakalinga kumunyumfwila kwaamba ayi bakekale kwamuyayaya? Swebo inga twayeeya ayi kucita boobo naakwiinga yakaba nshila ibotu yakumana mapensho Adamu ngaakaleta. Ano naakwiinga Yehova wakacita boobo, naakwiinga taakwe kutondesha bululami. Ino nceebonshi? Naakwiinga cakaba anga Adamu taakwe kucita cilubo cinene alimwi anga bana bakwe teshi bantu batamaninite. Sombi ubo teshi mbocakalinga.

5. Ino nceebonshi inga twashoma ayi lyoonse Yehova ananocita shiluleme?

⁵ Kwiilikaawo, naakwiinga Yehova taakwe kutupa cilubula lyalo akusuminisha bana bakwe Adamu kukala kwamuyayaya nabi kwaamba ayi tabamaninite, naakwiinga wakatondesha ayi taana kukonkela njiisho shakwe shaamba pa shiluleme ashitaluleme. Aboobo ici naakwiinga cakapa bantu kulisukama akuyeeya ayi inga wabooshaawo kucita boobo, akutacita nshakaamba. Kucakubonenaako, naakwiinga bantu balatoonsha na Yehova alaakukumanisha shishomesho shakwe shoonse. Sombi tatweelete kulisukama mukwiinga camushobo uyo teshi cikacitikeewo. Ino nceebonshi? Mukwiinga Yehova wakacita cintu ciluleme nabi kwaamba ayi wakalinga kweelete kwaaba Mwanaakwe ngwaasuni abuumbi. Aboobo inga twashoma ayi lyoonse ananocita shiluleme.

6. Ino ngumubo nshi umwi wakapa kwaamba ayi Yehova atume Mwanaakwe kusa mukutufwita? (1 Joni 4:​9, 10)

⁶ Kuli mubo aumwi wakapa kwaamba ayi Yehova atume Mwanaakwe kusa mukutufwita. Mubo uyo ndusuno. (Joni 3:16; amubelenge 1 Joni 4:​9, 10.) Yehova wakatupa cilubula mukwiinga alisuni ayi tukekale kwamuyayaya akuba mumukwashi wakwe. Adamu ndyaakabisha, taakwe kutolelela kuba mumukwashi wakwe Yehova. Aboobo andiswe twakashalwa katutabete mumukwashi wakwe Lesa. Sombi ceebo cakwaamba ayi Yehova wakatupa cilubula, kunembo abo boonse bashoma muli nguwe akumunyumfwila balaakuba mumukwashi wakwe. Nabibo pacecino ciindi, Yehova inga watulekelela shibiibi shesu alimwi inga twaba abushicibusa buyumu anguwe abamakwesu abenankashi. Ishi shoonse shilatondesha ayi Yehova alitusuni abuumbi!—Loma. 5:​10, 11.

7. Ino kuyeeya Yesu mbwaakapenga kulatucafwa buyani kunyumfwishisha Yehova mbwaatusuni?

⁷ Inga twanyumfwishisha kabotu Yehova mbwaatusuni, na twayeeya mbocakamucisa kumoyo kubona Mwanaakwe kaapenga. Satana wakaamba ayi taakuwo musebenshi wakwe Lesa weenga watolelela kushomeka kuli Nguwe na walangana alufu. Kwaamba ayi Yehova atondeshe ayi Satana nshaakaamba nshakubeca, wakasuminisha Yesu kupenga kaatana kufwa. (Jobo 2:​1-5; 1 Pit. 2:21) Yehova wakalinga kubona bantu ndyebakalinga kuweluluka Yesu, bashilumamba ndyebakamuuma alimwi andyebakamupoopa pacisamu. Lyalo Yehova wakabona Mwanaakwe ngwaasuni abuumbi kaafwa lufu lucisa abuumbi. (Mate. 27:​28-31, 39) Yehova wakalinga kucite nkusu shakupa kwaamba ayi Mwanaakwe acileeke kwiinda mumapensho aya. Kucakubonenaako, bantu ndyebakaamba ayi: “Lesa aamupulushe na ulimusuni,” Yehova naakwiinga wakamupulusha. (Mate. 27:​42, 43) Sombi naakwiinga Yehova wakacita boobo, naakwiinga Yesu taakwe kwaaba buumi bwakwe mbuli cilubula alimwi naakwiinga tatucitewo akulangila. Aboobo Yehova wakasuminisha Mwanaakwe kupenga kushikila wafwa.

8. Ino nceebonshi inga twashooma ayi Yehova wakalinyumfwa cibiibi ndyaakabona Mwanaakwe kaapenga? (Amubone acikope.)

⁸ Yehova ngu Lesa shinkusu shoonse. Sombi ici tacaambi ayi taakuwo mbwaalinyumfwa na kwacitika cintu cimwi! Sobantu kuli mbotulinyumfwa na kwacitika cintu cimwi. Alimwi Baibo ilaamba ayi Lesa wakatulenga mucikoshanyo cakwe. Aboobo alakwe kuli mbwaalinyumfwa na kuli cacitika. Kucakubonenaako, Baibo ilatondesha ayi cimwi ciindi Yehova ‘aloongumana’ nabi ‘kukalala’ na kuli cacitika. (Kulu. 78:​40, 41) Amuyeeye apa makani aamba pali Abulaamu a Isaki. Yehova wakalwiita Abulaamu kubenga mwanaakwe mbuli mulambu. (Mata. 22:​9-12; Ebu. 11:​17-19) Amuyeeyebo Abulaamu mbwaakalinyumfwa cibiibi abuumbi ndyaakalibambila kucaya mwanaakwe. Ano amuyeeyebo Yehova lakwe mbwakeendaawo kulinyumfwa cibiibi ndyaakabona bantu kabapensha Mwanaakwe kushikila bamucaya!—Amuye pa jw.org akweebela vidyo yaamba ayi Amukonkele Cakubonenaako Calushomo Lwabo—Abulaamu, Lubasu 2.

9. Ino Bene Loma 8:​32, 38, 39 ilamwiisha nshi palusuno lwakwe Yehova?

⁹ Cilubula cilatondesha patuba ayi Yehova alitusuni abuumbi kwiinda ashikamukowa nabi shicibusa ngotunyumfwanaakwe mbwaatusuni. (Amubelenge Bene Loma 8:​32, 38, 39.) Inga twashoma cakutatoonsha ayi Yehova alitusuni abuumbi kwiinda ambotulisuni. Sa mulisuni ayi mukekale kwamuyayaya? Yehova lakwe cileendaawo. Sa mulisuni kulekelelwa shibiibi shanu? Yehova lakwe cileendaawo. Ncaasunibo ayi tucite nkutondesha kulumba pacilubula, kushoma muli nguwe akunoomunyumfwila. Cilubula ncipo cibotu abuumbi citondesha ayi Yehova alitusuni abuumbi. Alimwi mucishi cipya tulaakwiiya shiinji Yehova nshaakatucitila ceebo cakwaamba ayi alitusuni.—Shiku. 3:11.

INO CILUBULA CILATWIISHA NSHI PALI YESU?

10. (a) Ino nceebonshi Yesu wakalinyumfwa cibiibi ceebo ca makani ngobakamubekesha? (b) Ino nshiinshi Yesu nshaakacita shakapa kwaamba ayi liina lyakwe Yehova lisalashikwe? (Amubone akabokosi kacite mutwi utokwaamba ayi “Kushomeka Kwakwe Yesu Kwakasalasha Liina Lyakwe Yehova.”)

¹⁰ Yesu alisunishishi ayi Baishi batolelele kuba ampuuwo ibotu. (Joni 14:31) Yesu wakalinyumfwa cibiibi kumubekesha ayi wakalinga kucobola akutanyumfwila Lesa mukwiinga kucita boobo kwakalinga kusa mukusebanya liina lya Baishi. Nceceeco ncakapailila ayi: “Ta, na kacikonsheka, nkomeshi ya mapensho inyindilile.” (Mate. 26:39) Sombi ceebo cakwaamba ayi Yesu wakatolelela kushomeka kuli Yehova kushikila akulufu, wakatondesha ayi Satana nshaakaamba pali Baishi nshakubeca.

11. Ino Yesu wakatondesha buyani ayi wakalinga kubasuni abuumbi bantu? (Joni 13:1)

¹¹ Kwiilikaawo, cilubula cilatwiisha ayi Yesu alibasuni abuumbi bantu, bunene bunene bashikwiiya bakwe. (Tus. 8:31; amubelenge Joni 13:1.) Kucakubonenaako, Yesu wakalinga kucishi ayi shimwi nshaakalinga kusa mukucita pacishi shakalinga shiyumu, bunene bunene kufwa lufu lucisa abuumbi. Sombi Yesu taakalinga kushicitilamobo shintu ndyaakalinga kusebensa ncito njaakesita pacishi. Muciindi cakucita boobo, wakatondesha ayi wakalinga kubasuni bantu kwiinda mukubashimikila, kubaiisha alimwi akubacafwa munshila shimwi. Nabibo bushiku bwakucaikwa ndyebwakashika, Yesu wakacana ciindi cakusansha batumwi bakwe kushimpanta, kubaiisha alimwi akubayuminisha. (Joni 13:​12-15) Lyalo ndyaakalinga pacisamu cakupenshesha kaanyumfwa kucisa abuumbi, wakalwiita kapondo umwi wakapopwa pafwiifwi anguwe ayi alaakuba mu Paladaiso alimwi wakalwiita Joni ayi anoolama banyina. (Luka 23:​42, 43; Joni 19:​26, 27) Aboobo Yesu wakatondesha ayi wakalinga kubasuni abuumbi bantu kuteshibo kwiinda mukubafwita, sombi akwiinda mukunobatondesha lusuno ankuumbu kwiinda mushintu nshaakalinga kubacitila.

12. Ino nshiinshi Yesu nshatootucitila pacecino ciindi?

¹² Yesu wakafwabo “linkanda lyomwi.” Sombi watolelela kutucitila shintu shiinji. (Loma. 6:10) Ino nshiinshi nshatootucitila? Watolelela kusebensa kwaamba ayi anotupa shintu shiinji shibotu nshetufubilaamo ceebo ca cilubula. Kucakubonenaako, pacecino ciindi atosebensa mbuli Mwaami wesu, Mupailishi Munene alimwi ngo mutwi walibungano. (1 Koli. 15:25; Efe. 5:23; Ebu. 2:17) Atobunganya bananikitwe abamu likoto linene alimwi alaakutolelela kucita boobo kushikila na kukacaalebo paniini kwaamba ayi mapensho anene amane.b (Mate. 25:32; Maako 13:27) Alimwi atosebensesha musebenshi ushomeka kunootupa shakulya shakumushimu kwaamba ayi tutolelele kusebensela Yehova cakushomeka munshiku shino shakweelaako. (Mate. 24:45) Kwiilikaawo, ndyeshi akanotweendelesha kwa myaaka 1,000, alaakutolelela kunootucafwa. Ncakwiila, Yehova taakwe kwaababo Mwanaakwe kwaamba ayi atufwiite, sombi akwaamba ayi atucitile shintu shiinji shibotu!

AMUTOLELELE KWIIYA PALI YEHOVA A YESU

13. Ino kukutumana kuyeeyawo inga kwamucafwa buyani kutolelela kwiiya shiinji palusuno Yehova a Yesu Klistu ndobacite pali ndiswe?

¹³ Na mwatolelela kukutumana kuyeeya pashintu Yehova a Yesu Klistu nshobakamucitila, inga mweeya shiinji palusuno ndobacite pali ndiswe. Kucakubonenaako, munsondo shiniini shacaalaako kwaamba ayi Ciibalusho ca mwaaka uno cishike apesule lya Ciibalusho, inga mwabelenga cakubikila maano libuku limwi lya Makani Abotu nabi kwaabelenga oonse. Tamweelete kubelenga macapita aanji abuumbi paciindi comwi. Muciindi cakucita boobo, mulyeelete kubelenga cakukalika moyo akulangweetawo makani aamwi atucafwa kushiba ncotuyandikila kusuna Yehova a Yesu. Alimwi amweeleshe kunoolwiitako bamwi nsheshi munookwiiya.

14. Ino kulangoola makani inga kwatucafwa buyani kutolelela kwiiya pacilubula apa makani amwi? (Kulumbaisha 119:97) (Amubone acikope.)

¹⁴ Na peenda myaaka iinji kuswa ciindi ndyemwakabombekwa, mpashi inga kamuyeeya ayi taakuwo shintu shipya nsheenga mweeya pamakani ashibikitwe abuumbi mbuli bululami bwakwe Lesa, lusuno ndwaacite alimwi acilubula. Cancine ncakwaamba ayi tulaakutolelela kwiiya shintu shipya pamakani aya. Aboobo ino nshiinshi nsheenga mwaciita? Amubelenge akwiiya makani amu Baibo acanika mumabuku esu. Na mwabelenga makani amwi mu Baibo ngomutatonyumfwishisha kabotu, amulangoole makani mumabuku esu kwaamba ayi mwanyumfwishishe. Lyalo ndyemutocita shintu shimwi pabushiku ubo, amukutumane kuyeeya pamakani ngomweeya nshatomwiisha pali Yehova, Mwanaakwe alimwi ambobamusuni.—Amubelenge Kulumbaisha 119:97.

15. Ino nceebonshi cilayandika kutolelela kulangoola makani apya ngeenga mweeya mu Baibo?

¹⁵ Lyoonse na mwekala panshi kwaamba ayi mubelenge Baibo na kulangoola makani, tamweelete kulefuka na taakuwo makani apya ngomweeya. Munoolibona anga ngumuntu utolangoola golodi. Liinji paleenda mawoola aanji nabi inshiku kwaamba ayi muntu acane golodi nabibo iniini. Sombi muntu uyo alatolelela kulangoola mukwiinga golodi ili yoonse njeenga wacana ilayandika abuumbi kuli nguwe nabi ibe iniini. Makani ali oonse apya ngeenga tweeya mu Baibo alayandika abuumbi kwiinda golodi! (Kulu. 119:127; Tus. 8:10) Aboobo amutolelele kubelenga Baibo akutolelela kulangoola makani apya ngeenga mweeya.—Kulu. 1:2.

16. Ino inga twacita buyani kwaamba ayi tukonkele cakubonenaako cakwe Yehova a Yesu?

¹⁶ Ndyemutokwiiya, amuyeeye mbweenga mwakonkela nshomutokwiiya. Kucakubonenaako, inga mwakonkela cakubonenaako cakwe Yehova cakutondesha bululami kwiinda mukutaba akasalulushi kubamwi. Amukonkele cakubonenaako cakwe Yesu cakusuna Baishi abantu kwiinda mukulyaaba kucita shintu Yehova nshaasuni, alimwi akucafwa bashominyinaanu nabi ndyecitabete cuubu kucita boobo. Alimwi inga mwakonkela cakubonenaako cakwe Yesu kwiinda mukushimikilako bamwi kwaamba ayi abalo babe acoolwe cakushiba shintu shibotu Yehova nshatoocitila bantu akushoma mucilubula.

17. Ino tulaakwiiya nshi mumutwi utokonkelaawo?

¹⁷ Na twatolelela kwiiya pacilubula, tulaakumusuna abuumbi Yehova a Yesu. Lyalo abalo balaakutusuna abuumbi. (Joni 14:21; Jemu. 4:8) Aboobo atutolelele kwiiya Baibo amabuku ngotutambula kuswa kulibunga lyesu kwaamba ayi tushibe shiinji pa cilubula. Mumutwi utokonkelaawo, tulaakwiiya pa shoolwe ashimwi nshotucite ceebo ca cilubula alimwi ambweenga twatondesha kulumba palusuno Yehova ndwatutondesha.