Shoolwe Nshetucite Ceebo ca Lusuno Yehova Ndwaatutondesha

1. Ino nciinshi nceenga twaciita kwaamba ayi tusangalashe Yehova?

AMUYEEYE ayi mwapa muntu umwi ngomusuni cipo cibotu abuumbi alimwi ceenga camucafwa. Ino inga mwalinyumfwa buyani na muntu uyo watambulabo cipo ico akucibika mpeeke walubaako? Ncakutatoonsha kwaamba ayi inga mwalinyumfwa cibiibi. Sombi inga mwanyumfwa kabotu na muntu uyo wamulumba pacipo ncomwamupa akunocisebensesha. Ino cakubonenaako ici citotwiisha nshi? Yehova wakatupa Mwanaakwe kwaamba ayi ese mukutufwita. Alasangalala abuumbi na katutondesha kulumba pacipo ici ciyandika abuumbi apalusuno lwakwe ulo lwakapa kwaamba ayi atupe cilubula!—Joni 3:16; Loma. 5:​7, 8.

2. Ino tutokwiiya nshi mumutwi uyu?

² Ano na twacileka kutondesha kulumba pa cilubula, inga cababo anga twatambula cipo Lesa ncakatupa akucibika lyalo twalubaako. Aboobo kwaamba ayi ici citacitiki, ciindi aciindi tulyeelete kunoyeeya pashintu Yehova a Yesu nshobakatucitila. Mutwi uyu wakabambilwa kutucafwa kucita boobo. Tutobandika pa shoolwe nshotucite pacecino ciindi ceebo ca cilubula ashoolwe nsheshi tukatambule kunembo. Tutokwiiya ambweenga twatondesha kulumba pa lusuno lwakwe Yehova bunene bunene pacecino ciindi ndyekwakacaalabo nshiku shiniini kwaamba ayi Ciibalusho cishike.

SHOOLWE NSHOTUCITE PACECINO CIINDI CEEBO CA CILUBULA

3. Ino ninshila nshi yomwi cilubula mbocitucafwa pacecino ciindi?

³ Mulambu wacilubula cakwe Yesu ulatucafwa nabibo pacecino ciindi. Kucakubonenaako, Yehova alatulekelela shibiibi shesu ceebo ca cilubula. Tayandiki kutulekelela, sombi lusuno ndolupa kwaamba ayi acite boobo. Shikulumbaisha wakalumba Yehova ndyaakaamba ayi: ‘No Yehova, mulicite nkuumbu alimwi mulilibambite kulekelela shibiibi.’—Kulu. 86:5; 103:​3, 10-13.

4. Ino mbaani Yehova mbaakapa cilubula? (Luka 5:32; 1 Timoti 1:15)

⁴ Sobamwi inga twalinyumfwa ayi Yehova tayandiki kutulekelela. Cancine ncakwaamba ayi soonse tatweeleli kwaamba ayi Yehova inga watulekelela. Mutumwi Paulo wakalinga kucishi ayi taakalinga ‘kweeleteewo akwiitwa ayi mutumwi.’ Sombi wakaamba ayi: ‘Kwiinda mu nkuumbu shakwe Lesa ndakaba mbuli mboombete bulya.’ (1 Koli. 15:​9, 10) Ino nceebonshi Yehova alatulekelela na twaana kuswa kushibiibi shesu? Nceebo cakwaamba ayi alitusuni kuteshi ceebo cakwaamba ayi tutokweelela kulekelelwa. Na mutolinyumfwa cibiibi ceebo cakuyeeya ayi tamweeleli kulekelelwa kuli Yehova, munokwiibaluka ayi Yehova taakwe kupa cilubula bantu batabishi. Wakapa cilubula ku bantu batamaninite abo balinyumfwa cibiibi pa shilubo shabo alimwi basuni kwaana.—Amubelenge Luka 5:32; 1 Timoti 1:15.

5. Sa tulyeelete kunolinyumfwa ayi Yehova alyeelete kutulekelela ceebo cakwaamba ayi twamusebensela kwamyaaka iinji? Amusansulule.

⁵ Tatweelete kunolinyumfwa ayi Yehova alyeelete kutulekelela ceebo cakwaamba ayi twamusebensela kwamyaaka iinji. Kwalo, Yehova aleebaluka shintu shoonse nshotwakamucitila. (Ebu. 6:10) Nacibi boobo, wakatupa cilubula mbuli cipo kuteshi kwaamba ayi atulipile pashintu shibotu nshotwakamucitila. Aboobo tatweelete kunoyeeya ayi Yehova alyeelete kutulekelela ceebo cakwaamba ayi twacita shiinji muncito yakwe. Na katuyeeya boobo, inga caba anga Yesu taakalinga kweelete kutufwita.—Amweelanye a Bene Galatiya 2:21.

6. Ino nceebonshi Paulo wakalinga kusebensa cankusu muncito yakwe Yehova?

⁶ Paulo wakalinga kucishi ayi Yehova inga tamulekeleliiwo nabi wacita shiinji buyani muncito yakwe Lesa. Ano ino nceebonshi wakalinga kusebensa cankusu muncito yakwe Yehova? Wakacita boobo kwaamba ayi atondeshe kulumba pa nkuumbu Yehova nshaakamutondesha. (Efe. 3:7) Bweenka mbuli Paulo, tulasebensa cankusu muncito yakwe Yehova kwaamba ayi tutondeshe kulumba pa nkuumbu shakwe kuteshi kwaamba ayi atulekelele.

7. Ino ncoolwe nshi acimwi ncotucite ceebo ca cilubula? (Bene Loma 5:1; Jemusi 2:23)

⁷ Coolwe acimwi ncotucite ceebo ca cilubula, nkuba abushicibusa buyumu a Yehova.a Kweelana ambotwakeeya mumutwi wamana, ndyetwakashalwa tatwakalinga kucitewo bushicibusa a Lesa. Sombi ceebo cacilubula, inga ‘twaba muluumuno a Lesa’ akuba abushicibusa buyumu anguwe.—Amubelenge Bene Loma 5:1; Jemusi 2:23.

8. Ino nceebonshi tulyeelete kunoolumba Yehova pacoolwe ncotucite ca kupaila kuli nguwe?

⁸ Kupaila kuli Yehova ncintu cilibetele nceenga twaciita ceebo cakuba abushicibusa buyumu anguwe. Yehova taakutikibo mipailo njotupaila ndyetuli kumabungano, sombi alakutika amipailo njotupaila na tuli sweenka. Na twapaila, tulalinyumfwa kukalikana mumoyo akuba aluumuno lwa mumiyeeyo. Sombi kuli nshila aimwi kupaila mbokutucafwa. Inga kwatucafwa kuyumya bushicibusa bwesu a Lesa. (Kulu. 65:2; Jemu. 4:8; 1 Joni 5:14) Yesu ndyaakalinga pacishi, liinji wakalinga kupaila kuli Yehova mukwiinga wakalinga kucishi ayi atoomukutika alimwi ayi kucita boobo inga kwamucafwa kutolelela kuba abushicibusa buyumu a Baishi. (Luka 5:16) Tulalumba abuumbi pa coolwe ncotucite cakuba abushicibusa a Yehova a cakupaila kuli nguwe ceebo cakwaamba ayi Yesu wakaaba buumi bwakwe mbuli cilubula!

KULANGILA KUBOTU NKOTUCITE CEEBO CA CILUBULA

9. Ino ncoolwe nshi basebenshi bakwe Yehova bashomeka nceshi bakatambule kunembo ceebo ca cilubula?

⁹ Ino ncoolwe nshi basebenshi bakwe Yehova bashomeka nceshi bakatambule kunembo ceebo ca cilubula? Yehova alaakubapa buumi butamaani. Bantu baanji balayeeya ayi inga tacikonsheki kukala kwamuyayaya mukwiinga kuswabo kale kale bantu balafwa. Sombi Yehova ndyaakalenga bantu wakalinga kusuni ayi banookala kwamuyayaya. Adamu naatakwe kubisha, naakwiinga taakuwo muntu uyeeya ayi inga tacikonsheki kukala kwamuyayaya mukwiinga bantu naakwiinga kabatafwiiwo. Alimwi nabi kwaamba ayi pacecino ciindi nciyumu kushoma ayi inga twekala kwamuyayaya, inga twashoma ayi cilaakucitika mukwiinga tulicishi ayi Yehova wakaaba buumi bwa Mwanaakwe ngwaasuni abuumbi kwaamba ayi ici cikakonsheke.—Loma. 8:32.

10. Ino Beneklistu bananikitwe abambelele shimwi batolangila nshi?

¹⁰ Nabi kwaamba ayi kunembo ndyeshi tukatambule buumi butamaani, Yehova alisuni ayi tunooyeeyawo pakulangila uku pacecino ciindi. Beneklistu bananikitwe batolangila kuba abuumi busangalasha kwiculu ndyeshi bakanokweendelesha cishi pomwi a Klistu. (Ciyu. 20:6) Bambelele shimwi batolangila kukala mu Paladaiso pacishi, umo mweshi bakabule kunonyumfwa shicisa, kupenga nabi kulinyumfwa cibiibi. (Ciyu. 21:​3, 4) Sa mutoolangila kukala kwamuyayaya pacishi capanshi? Yehova wakalenga bantu kwaamba ayi banookala pacishi. Aboobo kukala kwamuyayaya pacishi, kulaakutupa kuba alusangalalo abuumbi.

11-12. Ino nshoolwe nshi shimwi nshetutolangila mu Paladaiso? (Amubone ashikope.)

¹¹ Amuyeeyebo buumi bwanu mbweshi bukabe ndyeshi mukanookala mu Paladaiso pacishi. Teshi mukanolisukamawo ayi inga mwaciswa nabi kufwa. (Isa. 25:8; 33:24) Alimwi Yehova alaakumupa shintu shoonse shibotu nshemuyandika. Ino nshiinshi nshomusuni kusa mukwiiya? Sa nkwiiya shiinji pashinyama, kwiiya bwakulisha cisebensesho cimwi, na kwiiya bwakulemba shikope? Kwiilikaawo, mu Paladaiso tulaakuyandika kuba abantu bacishi bwakulemba mapulani amaanda alimwi abeshikuyaka. Alimwi bantu balaakuyandika kunooteleka akubamba shakulya, kupanga shisebensesho akulima myuunda. (Isa. 35:1; 65:21) Mulaakuba aciindi cakucita shintu shoonse ishi alimwi ashimwi shiinji, ceebo cakwamba ayi mulaakukala kwamuyayaya.

¹² Tulaakusangalala abuumbi kutambula beshikamukowa abeshicibusa besu ndyeshi bakanobushikwa! (Milimo 24:15) Alimwi amuyeeyebo mbweshi mukasangalale kwiiya pashintu shiinji Yehova nshaakalenga. (Kulu. 104:24; Isa. 11:9) Ciinditeewo ncakwaamba ayi teshi mukabisheewo, aboobo mulaakucikonsha kunoosebensela Yehova kwakubula kumusenga ayi amulekelele! Sa inga mwasuna kwiindwa shoolwe ishi nsheshi tukatambule kunembo ceebo ca kusuna “kusangalalila mububi kwaciindi ciniini”? (Ebu. 11:25) Ncakutatoonsha kwaamba ayi tamusuniwo kwiindwa! Buumi bubotu mbweshi tukabaabo, bulaakunooli bubotu kwiinda ashintu nsheenga twabaasho pacecino ciindi. Munokwiibaluka ayi, teshi tukatolelele kulangila Paladaiso. Conoonobo mweshi tukanookala. Ishi shoonse shilaakukonsheka mukwiinga Lesa wakatutondesha lusuno abuumbi kwiinda mukututumina Mwanaakwe kwaamba ayi atufwiite!

AMUTONDESHE KULUMBA PALUSUNO YEHOVA NDWAATUTONDESHA

13. Ino nshiinshi nsheenga twaciita kwaamba ayi tutondeshe kulumba pa cilubula Yehova ncaakatupa? (2 Bene Kolinto 6:1)

¹³ Ino nshiinshi nsheenga twaciita kwaamba ayi tutondeshe kulumba pa cilubula Yehova ncaakatupa? Nkwiinda mukubikila maano ku kumusebensela mubuumi bwesu. (Mate. 6:33) Alimwi tulyeelete kucita boobo mukwiinga Yesu wakatufwita ‘kwaamba ayi abo boomi batekali buumi bwakulisangalasha beene, sombi wooyo wakafwa akubushikwa ceebo ca mbabo.’ (2 Koli. 5:15) Yehova alatutondesha nkuumbu abuumbi alimwi alatulekelela. Aboobo na katucita nsheenga twacikonsha muncito yakwe, tulatondesha kulumba alimwi ayi tulicishi kabotu shoonse nshaakatucitila.—Amubelenge 2 Bene Kolinto 6:1.

14. Ino inga twatondesha buyani ayi tulashoma butanjilishi bwakwe Yehova?

¹⁴ Inga twatondesha kulumba pa cilubula Yehova ncaakatupa kwiinda mukushoma mulinguwe alimwi akukonkela butanjilishi bwakwe. Munshila nshi? Ndyetutosala lwiiyo lwakumubili ndweenga tweeya, nabi incito yakumubili njeenga twasuna kusebensa, tulyeelete kushiba Yehova nshaasuni ayi tucite. (1 Koli. 10:31; 2 Koli. 5:7) Na twasalawo shakucita ceebo ca lushomo ndotucite muli Yehova, lushomo lwesu lulayuminaako alimwi bushicibusa bwesu anguwe abwalo bulayuminaako. Alimwi tulashoma cakutatoonsha ayi tulaakukala kwamuyayaya.—Loma. 5:​3-5; Jemu. 2:​21, 22.

15. Ino inga twacita buyani kwaamba ayi tutondeshe kulumba munshiku shiniini shacaalaako kwaamba ayi Ciibalusho cishike?

¹⁵ Kuli nshila aimwi mbweenga twatondesha kulumba palusuno lwakwe Yehova. Inga twacita boobo kwiinda mukucita nsheenga twacikoonsha munshiku shiniini shacaalako kwaamba ayi Ciibalusho cishike, kwaamba ayi tutondeshe ayi tulamulumba abuumbi Yehova pakutupa cilubula. Kwiilika pa kulibambila kucanikaako ku Ciibalusho, inga tweetako bamwi kwaamba ayi abalo bakacanikeeko. (1 Timo. 2:4) Abo mbweshi mukeete mukabasansulwiite sheshi shikacitike pa Ciibalusho. Inga mwabatondesha vidyo icanika pa jw.org icite mutwi waamba ayi Ino Yesu Wakafwita Nshi? ayaamba ayi Amwiibaluke Lufu Lwakwe Yesu. Bamanene balyeelete kushinisha kwiitako baabo bakaboolela pesule. Amuyeeyebo kwiculu mbweshi bakasangalale abuumbi pomwi andiswe na mbelele shakwe Yehova shimwi shisowekete shikayuminishikwe lyalo akusalawo kuboolela mulitanga! (Luka 15:​4-7) Pa Ciibalusho, atukeeleshe kutanokwanshanyabo abashominyineesu, sombi kwaanshaako abaabo beshi bakacanikeeko ciindi cakutaanguna abaabo bakacanikako kale kale abuumbi. Tulisuni ayi bakalinyuumfwe ayi twabatambula kabotu!—Loma. 12:13.

16. Ino nceebonshi tulyeelete kweelesha kucita shiinji muncito yakushimikila munshiku shiniini shacaalaako kwaamba ayi Ciibalusho cishike apesule lya Ciibalusho?

¹⁶ Sa inga mwacita shiinji muncito yakushimikila munshiku shiniini shacaalaako kwaamba ayi Ciibalusho cishike apesule lya Ciibalusho? Kucita boobo ninshila ibotu mbweenga mwatondesha kulumba pashintu shoonse Yehova a Yesu nshobakatucitila. Na kamwaabanamo lubasu abuumbi muncito yakushimikila mulaakubona Yehova mbweshi akanoomucafwa munshila shipusenepusene alimwi lushomo lwanu muli nguwe lulaakuyuminaako. (1 Koli. 3:9) Alimwi amukashinishe kukonkela mulongo wa Kubelenga Baibo kwa Ciibalusho ucanika mukabuku ka Kwiinduluka Mumalembo Bushiku Abushiku na mulongo ucanika mukabuku kamabungano. Na kamusuni inga mwasalawo kunobelenga Malembo ayo pa ciiyo ca Baibo capalwaanu.

17. Ino nciinshi cipa kwaamba ayi Yehova asangalale? (Amubone akabokosi kacite mutwi utokwaamba ayi “Mbweenga Twatondesha Kulumba pa Lusuno Yehova Ndwatutondesha.”)

¹⁷ Mpashi ceebo ca bukaalo mbomubeteemo, inga tamucikoonshi kucita shiinji muncito yakwe Yehova. Na ubo mbocibete, munookwiibaluka ayi Yehova taelanyi nshomucita kubamwi nshobacikonsha kucita. Alalumba palusuno ndomucite pali nguwe. Alasangalala abuumbi na wabona mbomulumba pacipo ciyandika ca cilubula.—1 Samwe. 16:7; Maako 12:​41-44.

18. Ino nceebonshi tulalumba Yehova Lesa alimwi a Yesu Klistu?

¹⁸ Cilubula ncocipa kwaamba ayi tunolekelelwa shibiibi shesu, kuba abushicibusa a Yehova akulangila kukala kwamuyayaya. Atutolelele kunotondesha kulumba palusuno lwakwe Yehova ulo lwakapa kwaamba ayi atupe shoolwe ishi shibotu. (1 Joni 4:19) Alimwi atutolelele kunotondesha kulumba kuli Yesu uyo wakatutondesha lusuno abuumbi kwiinda mukutufwita!—Joni 15:13.