Kusansulula Libuku Liyandika Abuumbi Pamabuku Oonse

“Ndakalinga kwiilangila kwamyaaka ili 19!” Ino nciinshi mukwesu ncaakalinga kulangila? Wakalinga kulangila Baibo ya New World Translation of the Christian Greek Scriptures yamu mushobo waci Bengali. Bantu baanji abalo mbobalinyumfwa na Baibo ya New World Translation yaswa mumushobo wabo. Ano ino nshiinshi shilikitweemo mukusansulula akupanga ma Baibo aya?

Cakutaanguna, balasala likoto lya bamakwesu abenankashi beshi kusansulula. Likoto ili lya basansulushi lilatambula butanjilishi kuswa ku Komiti ya Beshikulemba ya Likoto Litanjilila. Ino cilatola ciindi cilaamfu buyani kwaamba ayi likoto lya basansulushi basansulule Baibo? Ba Nicholas Ahladis abo basebensa mu Translation Services ku Warwick, New York, bakaamba ayi: “Kuli shintu shiinji shiilikitweemo mbuli kushiba na mbasansulushi bongaye baliiko beenga basebenselawo, kuyuma na kuuba kwa mushobo, kushiba na beshikubelenga Baibo balanyumfwishisha bukaalo mbobwakalinga muciindi camu Baibo alimwi akushiba na mushobo ulaambwa bupusenepusene mumisena ipusenepusene. Liinji, likoto lya basansulushi lilatola mwaaka womwi kushika ku yotatwe kwaamba ayi basansulule Malembo a Bwineklistu amuci Giliki alimwi kusansulula Baibo yoonse kulatola myaaka yone na kwiindaawo. Sombi kusansulula Baibo mumushobo wa bashinkite matwi kulatola ciindi cilaamfu.”

Kuli abamwi bayandika kucafwa pakusansulula Baibo. Ndikoto lya basankwa abanakashi bacite nkulilo ipusenepusene alimwi cimwi ciindi balekala mushishi shipusenepusene. Likoto ili lileenduluka musheesho shakasansululwa alimwi balacita boobo kwakubula kulipilwa. Nshobayeeya pasheesho shakasansululwa shilacafwa basansulushi kwaamba ayi basansulule Baibo yuubu kunyumfwisha, kubelenga alimwi yancine. Bweenka mbuli shikwiisha baabo basansulula Baibo mbwakaamba ayi, “basansulushi balalinyumfwa ayi balicite mukuli unene abuumbi kuli Yehova akubaabo babelenga Maswi akwe.”

Pesule lyakwaamba ayi bamanisha kusansulula, balyeelete kupulinta akupanga ma Baibo. Kwaamba ayi bacite boobo, kuli shintu shimwi shili likumi shiyandika shicanika mumisena nkobapulintila. Pa shintu ishi pali: mapepa, inki, shakupangila makava, gulu alimwi ashimwi shili 6. Mumwaaka wa 2019, maali amadola aku America ashika 20 miliyoni akasebenseshekwa kuulabo shintu ishi shisebenseshekwa pakupanga Baibo. Abo basebensela mumisena nkobapulintila bakasebensa mawoola eendilila 300,000 mumwaaka wa 2019 kwaamba ayi bapange akutuma ma Baibo.

Ino nceebonshi tulasebensa kwaciindi cilaamfu boobu, alimwi akusebensesha maali aanji pancito ishi? Ba Joel Blue basebensa mu Dipatimenti ya International Printing bakaamba ayi: “Baibo ndibuku liyandika abuumbi ndyotupanga. Aboobo, tulisuni kwaamba ayi mbonekelo ya Baibo kaitondesha bulemu kuli Lesa ngotupaila alimwi aku makani ngotushimikila bantu.”

Kwiilika pama Baibo a New World Translation ngotupanga lyoonse, kuli ama Baibo amwi ngotupanga acite mbonekelo ipuseneeko. Kucakubonenaako, Baibo ya New World Translation ya boofu ilacanika mumishobo ili 10. Kupangabo Baibo yomwi ya boofu inga kwatola mawoola ali 8 alimwi kulayandika musena ukwana mamita mpashi ali 2.3 pakwiibika ceebo cakwaamba ayi ilicite mavolyumu aanji. Alimwi tulapanga ama Baibo alibetele abaabo bali mujeele, uko nkobasuminishabo mabuku acite ca cikava ca mapepa.

Baibo ya New World Translation ilacafwa baabo baibelenga. Amuyeeyebo pa libungano lisebensesha mushobo waci Kiluba, licanika kumusena wiitwa ayi Tombe mucishi ca Democratic Republic of the Congo. Musena wa Tombe uli pa mushinso ulaampa makilomita eendilila 1,700 kuswa mutauni inene. Bakamboni bakumusena uyu bakalinga kucitebo Baibo yomwi yamu mushobo waci Kiluba alimwi yakalinga kucite maswi ayumu kunyumfwisha. Bamakwesu bakalinga kupaana Baibo yeenka iyi kwaamba ayi bacikonshe kulibambila mbasu shakumabungano. Sombi kuswabo mu August 2018, boonse bamu libungano balicite Baibo ya New World Translation mumushobo waci Kiluba alimwi ilicite maswi oobu kunyumfwisha.

Nankashi umwi waamba mushobo waci German wakaamba mbwaalinyumfwa pa Baibo ya New World Translation yakabambululwa mumushobo wabo. Wakaamba ayi: “Ndakacileka kwaamba ayi ndyeelete kubelenga Baibo. Muciindi cakwaamba boobo, ndaliipusha ayi, ‘Ino nciindi nshi ndyeshi mbelengeleewo ashimwi?’” Musankwa umwi uli mujeele wakalemba ayi: “Ndakapekwa Baibo ya New World Translation, alimwi itokwaalula buumi bwangu. Nshikwe kwaanyumfwishishaawo kale Maswi akwe Lesa kushikila ndyendakatalika kubelenga Baibo ya New World Translation. Ndisuni kushiba shiinji pali Bakamboni Bakwe Yehova alimwi asheenga ndacita kwaamba ayi mbe Kamboni.”

Bantu boonse babelenga Baibo ya New World Translation balalumba abuumbi pamaali ngomupa kucafwilisha ncito yakupanga ma Baibo aya. Maali aya apekwa mukuliyandila acafwilisha ncito icitwa nsengwe yoonse alapekwa kwiinda mukusebensesha nshila shicanika pa donate.jw.org. Twalumba abuumbi pa bwaabi bwanu.