Makani Ayumya Lushomo Alimwi Ngeenga Twashoma

Bakamboni Bakwe Yehova balabikila maano abuumbi kubashominyinaabo. (1 Pita 2:17) Buunji bwandiswe tulalinyumfwa mbuli nankashi waliina lya Tannis ukala kucishi ca Kenya. Wakaamba ayi: “Ndasuna kushiba shitoocitika kubamakwesu abenankashi nsengwe yoonse.” Ino ba Tannis alimwi a Bakamboni bamwi baanji balashiba buyani shitoocitika? Kuswabo mu 2013, tulashiba shitoocitika kwiinda mukusebensesha lubasu lwa Newsroom lucanika pa webusaiti ya jw.org.

Palubasu ulu palacanika makani ngeenga twashoma aamba pa Bakamboni Bakwe Yehova. Makani mbuli kukushikwa kwa Baibo, kupa lucafwo na kwacitika mapensho anene akuteengashila, incito shakuyaka alimwi ashakucitika shimwi shiyandika. Alimwi tulashiba amakani aamba pabamakwesu abenankashi batokwaangwa ceebo calushomo lwabo. Kwiilikaawo, palacanika ashakucitika shiyuminisha shaamba pa kushimikila kulibetele kubaako alimwi a Ciibalusho ca lufu lwakwe Yesu. Ino mbaani beshikulangoola makani aya? Alimwi ino makani aya alabambwa buyani?

Kucana Akubika Makani

Lubasu lwa Newsroom lulabambwa abamu ofesi ya Public Information (OPI). Dipatimenti iyi ilacanika kumaofesi esu anene alimwi ilatanjililwa abamu Komiti ya Beshikubunganya ya Likoto Litanjilila. Bamakwesu abenankashi beendilila 100 mbobasebensela mu dipatimenti iyi. Alimwi buunji bwa mbabo mbasebenshi bakalyaaba basebensela kuŋanda. Bamakwesu abenankashi aba balasebensa mbuli beshikulemba, beshikulangoola makani, beshikupanga shikope alimwi abasansulushi. Bamwi balabandika abacinenenene bamumfulumeende, bamapulofesa, bamatica alimwi abaabo beshikulemba nyusi. Bamu ofesi ya OPI balacafwikwa amaofesi a Public Information Desks (PID) eendilila 80 mu misampi nsengwe yoonse.

Bamu ofesi ya OPI balasebensela pomwi abamakwesu basebensela mumaofesi a PID kwaamba ayi balembe makani. Na bamakwesu bashiba ayi kuli makani abotu ngeenga balwiita bamwi, balalangoola makani ancine aamba pasheesho nshebasuni kulwiita bamwi. Ishi shileelikaawo kwiipusha miipusho akubandika abamwi bacishi kabotu makani ayo. Pesule lyakucana makani ancine, balaalemba, kwiindulukaamo, kwaalula mweelete, kubikaamo shikope akwaatuma ku bamu Komiti ya Beshikubunganya kwaamba ayi basuminishe.

Maswi Akulumba

Ino bamakwesu abenankashi balalinyumfwa buyani pamakani acanika pa Newsroom? Nankashi waliina lya Cheryl, ukala kucishi ca Philippines, wakaamba ayi: “Ndalinyumfwa kabotu lyoonse macuunsa kutaanguna kubelenga makani aamba pa libunga lyakwe Yehova alimwi abantu bakwe.”

Bantu baanji balaamba pa bupusano buli pakati ka makani acanika palubasu lwa Newsroom lucanika pa webusaiti ya jw.org alimwi ambasu shimwi shakucishi pacanika makani. Ba Tatiana bekala kucishi ca Kazakhstan, bakaamba ayi: “Ndikondetwe abuumbi kwaamba ayi inga ndashoma makani acanika pa jw.org mukwiinga ngancine.” Nankashi waliina lya Alma ukala kucishi ca Mexico, wakaamba ayi: “Makani acanika pa Newsroom alayuminisha abuumbi kwiinda makani apa nyusi ayo aamba pashintu shibiibi shicitika.”

Alimwi makani acanika pa Newsroom alayumya lushomo lwesu. Ba Bernard bekala kucishi ca Kenya, bakaamba ayi: “Makani acanika pa Newsroom ancafwa kunoobona bamakwesu abenankashi nsengwe yoonse mbuli mukwashi wangu teshi mulandu ankobakala. Ndyentopaila ndaamba meena abo alimwi abukaalo mbobatokwiindaamo.” Nankashi waliina lya Bybron alakwe ukala kucishi ca Kenya, wakaamba ayi: “Lyoonse ndasangalala na ndabona makani aamba pa kukushikwa kwa Baibo mumushobo umwi! Makani aya alanjibalusha ayi Yehova tacite kasalulushi.”

Nabibo makani aamba pa bamakwesu abenankashi batopenshekwa inga atuyuminisha. Ba Jackline bekala kucishi ca Kenya, bakaamba ayi: “Lushomo lwangu lwayuma abuumbi na ndayeeya mbobatondesha mubo wakutaloonda. Lyoonse ndeelesha kwiiya cibacafwa kutolelela kuliyumya. Ndakesa mukushiba kwaamba ayi shintu bantu nshobabona anga taaku mboshibete mbuli kupaila, kubelenga Baibo akwiimba, nsheshicafwa bamakwesu abenankashi kutolelela kuyuma.”

Nankashi waliina lya Beatriz ukala kucishi ca Costa Rica ulanyumfwa kabotu kubelenga makani aamba pamapensho anene acitika cakuteengashila. Wakaamba ayi: “Makani acanika pa Newsroom alancafwa kubona libunga lyesu mbolifwambaana kucafwa bamakwesu abenankashi munshila ibotu alimwi yalusuno. Ici cilampa kushoma cakutatoonsha ayi ili ndibunga lyakwe Yehova.”

Tulalumba abuumbi kutambula makani atushibisha shitocitikila bamakwesu abenankashi nsengwe yoonse! Ishi shilakonsheka ceebo ca maali ngomupa acafwilisha ncito ya nsengwe yoonse alimwi buunji bwangawo alapekwa kwiinda mukusebensesha donate.jw.org. Twalumba abuumbi pa bwaabi bwanu.