CIIYO 16
Ino Nshiinshi Yesu Nshaakacita Ndyaakalinga Pacishi?
Bantu baanji na bayeeya pali Yesu, balayeyabo mbwaakashalwa mbuli mwaana, busongo mbwaakalinga kucite mbuli mushinshimi, na lufu ndwaakafwa. Ano sa kuli makani aamwi ngeenga tweeya na twalanga langa pabuumi bwakwe ndyaakalinga pacishi? Muciiyo ici, tutokwiiya pashintu shimwi shiyandika abuumbi Yesu nshaakacita alimwi ambweenga shamucafwa.
1. Ino Yesu wakalinga kusebensa ncito nshi iyandika abuumbi?
Incito iyandika abuumbi Yesu njaakalinga kusebensa ‘nkushimikila makani abotu a Bwaami bwakwe Lesa.’ (Amubelenge Luka 4:43.) Wakalinga kushimikila makani abotu akwaamba ayi Lesa alaakubika bwaami na mfulumeende, yeshi ikamane mapensho oonse bantu ngobatokwiindaamo.a Yesu wakasebensa cankusu abuumbi muncito iyi kwamyaaka yotatwe amyeenshi ili 6.—Mateyo 9:35.
2. Ino nceebonshi Yesu wakalinga kucita shaankamiko?
Baibo ilaamba pa ‘shaankamiko ashitondesho sha nkusu Lesa nshaakacita kwiinda muli Yesu.’ (Milimo 2:22) Kwiinda munkusu shakwe Lesa, Yesu wakacikonsha kuumusha cipuupu, kusanina bantu baanji, kushilika balwashi, alimwi akubusha bafu. (Mateyo 8:23-27; 14:15-21; Maako 6:56; Luka 7:11-17) Shaankamiko Yesu nshaakacita shakatondesha patuba kwaamba ayi wakatumwa a Lesa. Alimwi shakatondesha ayi Yehova alicite nkusu shakumana mapensho oonse.
3. Ino nshiinshi nsheenga tweeya kucakubonenaako cakwe Yesu?
Yesu wakalinga kunyumfwila Yehova mushintu shoonse. (Amubelenge Joni 8:29.) Nabi kwaamba ayi wakalinga kupikishikwa, Yesu wakatolelela kucita kuyanda kwa Baishi kushikila kulufu. Wakatondesha patuba kwaamba ayi muntu inga wacikonsha kutolelela kusebensela Lesa nabi ndyaatokwiinda mumapensho. Aboobo ‘wakatushiila citondesho ayi tunokonkela mwaakeenda.’—1 Pita 2:21.
AMWIIYILEWO ASHIMWI
Amwiiye Yesu mbwaakalinga kushimikila makani abotu akucita shaankamiko.
4. Yesu wakalinga kushimikila makani abotu
Yesu wakeenda mishinso ilaamfu munshila shakalinga kucite lusuko kuya bushimikila makani abotu kubantu baanji. Amubelenge Luka 8:1, akubandika miipusho iyi:
Sa Yesu wakalinga kushimikilabo kubantu bakalinga kubungana ayi bamukutike?
Ino Yesu wakacita buyani kwaamba ayi ashimikile bantu baanji?
Lesa wakaambila limwi ayi Mesiya alaakunooshimikila makani abotu. Amubelenge Isaya 61:1, 2, akubandika miipusho iyi:
Ino Yesu wakabukumanisha buyani bushinshimi ubu?
Sa mutoobona ayi amunshiku shino bantu batoyandika kukutika kumakani abotu?
5. Yesu wakalinga kwiisha shiiyo shiyandika
Kwiilika pa kushimikila makani abotu a Bwaami bwakwe Lesa, Yesu wakalinga kwiisha makani acafwa. Amubone makani amwi ngaakaamba mulikani lyakwe lya Pakalundu. Amubelenge Mateyo 6:14, 34 alimwi a 7:12, akubandika miipusho iyi:
Ino ngamakani nshi acafwa Yesu ngakaamba mumavesi aya?
Sa mutoobona ayi nshaakaamba shilacafwa apacecino ciindi?
6. Yesu wakacita shaankamiko
Yehova wakapa Yesu nkusu shakucita shaankamiko shiinji. Kwaamba ayi mubone cakubonenaako, amubelenge Maako 5:25-34 na kweebela VIDYO. Lyalo amubandike miipusho itokonkelaawo.
Kweelana anshomweebela muvidyo, ino mwanakashi mulwashi ulya wakalinga kushomete nshi?
Ino nciinshi camunyumfwisha kabotu pacaankamiko ici?
Amubelenge Joni 5:36, akubandika mwiipusho uyu:
Ino shaankamiko Yesu nshaakacita shakalinga kutondesha nshi pali nguwe?
Sa mulishi?
Makani aanji ngotushi pali Yesu alacanika mumabuku ali 4 amu Baibo eetwa ayi Mabuku Amakani Abotu, nkokwaamba ayi libuku lyakwe Mateyo, Maako, Luka, alimwi a Joni. Shikulemba womwi awomwi wakalemba makani amwi ngeenga tatucani mulibuku limwi lya Makani Abotu. Na twabelenga mabuku oonse ali 4 inga twashiba shiinji pabuumi bwakwe Yesu.
MATEYO
ngowakataanguna kulemba libuku lya Makani Abotu. Libuku ili lilaamba shiinji pamakani Yesu ngakalinga kwiisha, bunene bunene nshaakaamba pamakani a Bwaami bwakwe Lesa.
MAAKO
ngowakalemba libuku litacite makani aanji. Wakalemba shakucitika shiinji shisangalasha.
LUKA
wakaamba bunene Yesu mbwakalinga kubikila maano kumakani akupaila alimwi ambwaakalinga kutondesha nkumbu kubanakashi.
JONI
wakaamba bunene pashintu shiinji Yesu nshaakaambawo ndyaakalinga kubandikishanya abeshicibusa bakwe alimwi abantu bamwi. Makani ngotucana mulibuku ili alatucafwa kumushiba kabotu Yesu.
BANTU BAMWI BALAAMBA AYI: “Yesu wakalingabo muntu mubotu, sombi kuteshi Mesiya.”
Ino mwebo mutoobona buyani?
CITEENTE CINENE
Yesu wakalinga kwiisha sha Bwaami bwakwe Lesa, kucita shaankamiko, alimwi akunyumfwila Yehova mushintu shoonse.
Kwiindulukaamo
Ino Yesu wakalinga kusebensa ncito nshi iyandika abuumbi ndyaakalinga pacishi?
Ino shaankamiko Yesu nshaakacita shilatondesha nshi?
Ino ngamakani nshi acafwa Yesu ngaakalinga kwiisha?
AMULANGWETEEWO ASHIMWI
Ino ngamakani nshi Yesu ngaakalinga kwaambawo bunene?
“Bwaami Bwakwe Lesa—Ncobuyandikila Kuli Yesu” (Njashi Yamulindilishi, October 1, 2014)
Amubone nceenga twashomena ayi shaankamiko Yesu nshaakalinga kucita ncakwiila shakacitika.
Amubelenge musankwa umwi mbwakaalula buumi bwakwe ndyaakabelenga makani atondesha Yesu mbwakalinga kubikila maano kubantu.
“Ndakalinga Kulisuni Abuumbi” (Njashi Yamulindilishi, October 1, 2014)
Amubone shintu shiyandika Yesu nshaakalinga kucita shilembetwe kweelana amboshakalinga kukonkana.
a Tulaakubandika shiinji pa Bwaami bwakwe Lesa mushiiyo 31-33.