Okutuukiriza Obulungi Obuweereza Bwaffe—Okutandika Emboozi Osobole Okubuulira Embagirawo

Lwaki Kikulu: Bwe tuba tubuulira nnyumba ku nnyumba, oluusi tetusanga bantu mu maka gaabwe. Kyokka tuyinza okubasanga nga tulinnye takisi, nga tugenze mu ddwaliro, nga tuli ku mirimu gyaffe, ku ssomero, oba mu bifo ebirala. Yakuwa ayagala abantu bonna bafune akakisa okuwulira amawulire amalungi ag’Obwakabaka. (1 Tim. 2:3, 4) Naye okusobola okubabuulira, emirundi mingi ffe tuba tulina okutandika okwogera nabo.

Engeri y’Okukikolamu:

Sooka weetegereze. Omuntu oyo afaayo era akiraga nti yandyagadde okunyumya naawe? Embeera eneebasobozesa okunyumya obulungi awatali kutaataaganyizibwa? Ababuulizi abamu basooka kutunuulira muntu mu maaso ne bassaako akamwenyumwenyu. Omuntu oyo naye bw’assaako akamwenyumwenyu, bagezaako okutandika okunyumya naye.
Bw’owulira ng’otidde okwogera n’omuntu, saba Yakuwa mu kasirise akuyambe okufuna obuvumu.—Nek. 2:4; Bik. 4:29.
Oyinza okutandika ng’olamusa omuntu. Yesu bwe yali atandika okwogera n’omukazi Omusamaliya, teyatandikira ku Bwakabaka bwa Katonda. (Yok. 4:7) Ebiseera ebimu oyinza okutandika okwogera n’omuntu ng’omusiima. Oyinza okumugamba nti: “Abaana bo balina empisa ennungi!” Okubuuza omuntu ekibuuzo nakyo kiyinza okukuyamba okutandika okunyumya naye. Oyinza okumubuuza nti: “Walabye ebyabadde mu mawulire?”
Bw’oba otandise okunyumya n’omuntu, lowooza ku ky’oyinza okutandikirako okumubuulira amawulire amalungi, naye weewale okwogera ng’oyanguyiriza. Nyumya naye mu ngeri eya bulijjo. Oyinza okwogera ekintu ekiyinza okumuleetera okukubuuza ekibuuzo ng’ayagala okumanya ebisingawo. Ng’ekyokulabirako, singa muba mwogera ku maka, oyinza okumugamba nti, “Nnina amagezi amalungi ge nnazudde agayinza okuyamba abazadde okukuza obulungi abaana baabwe.” Bwe muba mwogera ku ebyo ebyabadde mu mawulire, oyinza okumugamba nti, “Nnina amawulire amalungi ge nnasomye agalaga nti wagenda kubaawo enkyukakyuka ennungi.” Emboozi bw’ekoma nga tonnamubuulira, toggwaamu maanyi.
Tambula ne tulakiti oba ebitabo ebirala by’oyinza okuwa abo ababa baagala okumanya ebisingawo.

Mu Mwezi Guno Gezaako Kino:

Buli wiiki gezaako okutandika okunyumya waakiri n’omuntu omu ng’olina ekigendererwa eky’okumubuulira amawulire amalungi.