Yaˍhoˉvaꞈ Shaˉhkiˆhkanˍ Paˍ Aˬ htoꞈ ma htaꞈ yonˍ ve le?
“Teˇ kaˬ le le lo chehˇ ve chaw hui lehˬ, shu htaꞈ hpaˆ daꞈ kʼai ve chaw awˬ moˍ chi htaꞈ venˇ baˆ taˍ chehˇ ve awˬ lawn ngaˬ hui shiˍ ve pa taw, nawˬ dawˇ taˍ ve teˇ hpaˍ nawˬ kʼoˆ laˇ ve htaꞈ ngaˬ hui kaˇ gaˇ ve yoˬ.” (Tcuh yaˇ 28:22) Roˉmaꞈ teˇ co˗e htaˇ ve awˬ hoˉ sheh kʼai paˍ chi teˇ hpaˍ lehˬ henˇ yuˬ tuˬ daꞈ ve yoˬ. Awˬ nu awˬ na shu kʼoˆ daꞈ ve htaꞈ yawˇ hui maˇ na, awˬ hkuiˉ puiˍ lo laˬ ve htaꞈ yawˇ hui na gaˇ ve yoˬ.
Chi beuꞈ awˬ co˗e htawˇ chi hkʼa shuˍ yoˬ. Yaˍhoˉvaꞈ Shaˉhkiˆhkanˍ paˍ awˬ moˍ htaꞈ htawˇ, shu kʼoˆ daꞈ hkʼeh jaˇ ve yoˬ. Yawˇ hui htaꞈ nyi cha ve dawˇ yaꞈ ve chaw hui geh nawˬ hui awˬ tehˬ ve htaꞈ shiˍ tuˬ yaꞈ kʼaw maˇ cawˬ hehˉ. Hkʼe htaꞈ pa taw, ngaˬ hui yonˍ chehˇ ve awˬ hkʼaˇ teˇ hpaˍ ha lehˬ ve awˬ hkʼaw lo naw hui htaꞈ beˆ maˍ laˇ gaˇ ve yoˬ.
Liꞈ hpu, Yeˍsuˆ hkriꞈ leh, Gʼuiˬ sha
“Liꞈ hpu hkʼa peu˗eˬ lehˬ, Gʼuiˬ sha ve Awˬ ha hpu dawˇ pawnˍ piˇ ve htaꞈ pa taw . . . awˬ bon cawˬ ve yoˬ” tehꞈ ngaˬ hui yonˍ ve yoˬ. (2 Tiˆmoˉseˍ 3:16, 17) Chaw teˇ hpaˍ ngaˬ hui htaꞈ awˬ tehˬ ve hkriꞈ yaˇ maˇ heˆ tehꞈ kʼoˆ chehˇ ve lehˬ, maˇ cawˇ. Yeˍsuˆ hkriꞈ awˬ lawn htaꞈ Peˍtruˆ kʼoˆ ve hkʼa shuˍ ngaˬ hui htawˇ chi hkʼe yonˍ ve yoˬ: “Ngaˬ hui htaiˍ hkʼawꞈ ve htaꞈ gʼa tuˬ, yawˇ ve awˬ meh maˇ heˆ kʼo, miˬ guiˬ hkʼoˆ lo chaw yaˇ hui htaꞈ piˇ taˍ ve awˬ kaˍ awˬ nu ve awˬ meh maˇ cawˬ.”—Tcuh yaˇ 4:12.
Awˬ lawn kʼo, Yeˍsuˆ hkriꞈ kʼoˆ ve hkʼa shuˍ, yawˇ lehˬ “Gʼuiˬ sha ve yaˇ hpu” hpehꞈ ve yoˬ leh, “Awˬ pa ngaˬ htaꞈ peu laˇ ve” Yaˍhoˉvaꞈ Shaˉhkiˆhkanˍ paˍ htawˇ, Gʼuiˬ sha lehˬ Yeˍsuˆ hkriꞈ aꞈ kehˉ uiˍ ve yoˬ tehꞈ, yonˍ ve yoˬ. (Yoˇhanˬ 10:36; 6:57) Yeˍsuˆ hkriꞈ htawˇ, “Awˬ pa lehˬ ngaˬ aꞈ kehˉ uiˍ ve yoˬ” tehꞈ, kʼoˆ ve yoˬ. (Yoˇhanˬ 14:28; 8:28) Hkʼe htaꞈ pa taw, Gʼuiˬ sha shehˆ gʼaˇ teˇ to hpehꞈ ve tehꞈ, kʼoˆ maˍ chehˇ ve hkʼa shuˍ Yeˍsuˆ hkriꞈ lehˬ Awˬ pa Gʼuiˬ sha hkʼa shuˍ uiˍ ve tehꞈ, ngaˬ hui maˇ yonˍ. Gʼuiˬ sha Yeˍsuˆ hkriꞈ htaꞈ hpanˍ leh, Yaˇ hpu lehˬ Gʼuiˬ sha kanˇ paˆ awˬ hawˉ lo chehˇ ve yoˬ tehꞈ, ngaˬ hui yonˍ ve yoˬ.—Kawˇlawˇsehˇ 1:15; 1 Kawˇrenˍhtuˆ 11:3.
Laˇhuˍ hkawˇ Gʼuiˬ sha ve awˬ meh Yaˍhoˉvaꞈ tehꞈ kʼoˆ ve yoˬ. Liꞈ hpu hkʼaw kʼoˆ ve, “Nawˬ teˇ gʼaˇ ceh tiˉ Yaˍhoˉvaꞈ meh ve yoˬ, miˬ guiˬ hkʼa peu˗eˬ htaꞈ uˉ peunˍ chehˇ ve uiˍ jaˇ mvuh jaˇ ve Gʼuiˬ sha hpehꞈ ve yoˬ.” (Chiˇ mvuh ve 83:18, MGS) Awˬ na paˉ lo kʼoˆ taˍ ve hkʼa shuˍ Yeˍsuˆ hkriꞈ lehˬ, Gʼuiˬ sha ve awˬ meh htaꞈ a yeˇ uiˍ jaˇ tehꞈ shawˍ leh, awˬ laꞈ gʼawˇ htaꞈ bon chi hkʼe te lawˬ˗oꞈ tehꞈ maˍ piˇ ve yoˬ: “Mvuhˇ naw ma hkʼoˆ chehˇ ve ngaˬ hui ve awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ.” Yeˍsuˆ hkriꞈ htawˇ, Gʼuiˬ sha geh bon chi hkʼe lawˬ ve, “nawˬ ngaˬ htaꞈ peꞈ laˇ peuˬ ve chaw teˇ hpaˍ htaꞈ nawˬ ve awˬ lawn (“nawˬ ve awˬ meh,” MGS) ngaˬ hpeuꞈ maw piˇ peuˬ.”—Maꞈhtehˍ 6:9; Yoˇhanˬ 17:6.
Yeˍsuˆ hkriꞈ lehˬ, Gʼuiˬ sha ve a loˍ leh Gʼuiˬ sha ve awˬ meh shu htaꞈ shiˍ piˇ ve hkʼa shuˍ, Yaˍhoˉvaꞈ Shaˉhkiˆhkanˍ paˍ htawˇ, chi hkʼe te cawˇ ve yoˬ tehꞈ, yonˍ ve yoˬ. Hkʼe pa taw, Yeˍsuˆ hkriꞈ “ka tiꞈ yeˬ ve shaˉ hkiˆ hkanˍ shehˍ hpaˇ” hpehꞈ ve hkʼe, ngaˬ hui htawˇ Yaˍhoˉvaꞈ Shaˉhkiˆhkanˍ paˍ tehꞈ meh ve yoˬ. (Hpeuꞈ maˍ ve 1:5; 3:14) Miˬ guiˬ yaˇ yawˇ awˬ tan te paˍ htaꞈ Iˉsaˍyaˆ 43:10 awˬ hkʼaw lo Gʼuiˬ sha chi hkʼe kʼoˆ ve: “Nawˬ hui lehˬ ngaˬ ve shaˉ hkiˆ hpehꞈ ve yoˬ . . . ngaˬ nawˬ hui htaꞈ leuˆ yuˬ taˍ ve yoˬ.”
Gʼuiˬ sha ve mvuhˇ miˬ
Yeˍsuˆ hkriꞈ awˬ laꞈ gʼawˇ htaꞈ bon chi hkʼe te lawˬ˗oꞈ tehꞈ maˍ piˇ ve, “nawˬ ve mvuhˇ miˬ gaˬ la piˇ˗oˆ.” Yawˇ maˍ ve teˇ yanˇ, Gʼuiˬ sha ve mvuhˇ miˬ awˬ lawn lehˬ, a yeˇ uiˍ jaˇ ve teˇ ceuˬ hpehꞈ ve yoˬ. (Maꞈhtehˍ 6:10; Luˉkaꞈ 4:43) Yaˍhoˉvaꞈ Shaˉhkiˆhkanˍ paˍ hui lehˬ Gʼuiˬ sha ve mvuhˇ miˬ mvuhˇ naw ma hkʼoˆ chehˇ ve laˇhtaˇbanˇ awˬ tehˬ ve hpehꞈ leh miˬ guiˬ chi hkʼa peu˗eˬ htaꞈ uˉ peunˍ tuˬ yoˬ tehꞈ yonˍ leh, Yeˍsuˆ hkriꞈ htawˇ, mehˆ shiˍ nyi maˇ mawˬ ve jawˇ mawˇ gʼa hpehꞈ˗oˬ tehꞈ, yonˍ ve yoˬ. Liꞈ hpu hkʼaw kʼoˆ ve, “Yawˇ lehˬ, ngaˬ hui htaꞈ uˉ peunˍ shehˍ hpaˇ hpehꞈ la tuˬ yoˬ . . . yawˇ ve kanˇ paˆ shaˬ te shaˬ uiˍ la leh, yawˇ ve mvuhˇ miˬ lehˬ, hkʼaˬ htaˆ kaꞈ gawˬ lehˍ cawˬ tuˬ yoˬ.”—Iˉsaˍyaˆ 9:6, 7.
Yaꞈ hkʼaˇ, Yeˍsuˆ hkriꞈ Gʼuiˬ sha ve laˇhtaˇbanˇ hkʼaw lo yawˇ teˇ gʼaˇ ceh tiˉ jawˇ mawˇ hpehꞈ ve maˇ heˆ. Mvuhˇ naw ma hkʼoˆ lo yawˇ geh uˉ peunˍ paˍ laiˉ gʼaˇ cawˬ ve yoˬ. Awˬ laꞈ gʼawˇ Pawˇluꞈ bvuhꞈ taˍ ve, “Ngaˬ hui yeunˇ hkanˍ ve kʼo, yawˇ geh teˇ geh gʼa uˉ peunˍ tuˬ yoˬ.” (2 Tiˆmoˉseˍ 2:12) Liꞈ hpu hkʼaw bvuhꞈ taˍ ve, Yeˍsuˆ hkriꞈ geh uˉ peunˍ tuˬ kʼawꞈ teꞈ tu la ve chaw yaˇ lehˬ, “miˬ guiˬ hkʼoˆ lo vuiˬ hkʼawꞈ taˍ peuˬ ve chaw teˇ shehnˉ awˇ meunˍ awˇ hinˉ gʼaˇ” ceh tiˉ cawˬ ve yoˬ.—Hpeuꞈ maˍ ve 14:1, 3.
Laˇhtaˇbanˇ teˇ moˍ le le mvuhˇ miˬ yaˇ gʼa cawˬ ve yoˬ. Yaˍhoˉvaꞈ Shaˉhkiˆhkanˍ paˍ hui yonˍ ve, mvuhˇ naw ma hkʼoˆ uˉ peunˍ shehˍ hpaˇ awˬ hkʼoˆ kaꞈ miˬ guiˬ hkʼoˆ lo co co taiˍ taiˍ ve a shaꞈ gʼa teꞈ chehˇ paˍ teˇ hpaˍ htawˇ laiˉ lanˬ gʼaˇ cawˬ ve yoˬ. Awˬ leh meuˇ gaˬ kʼo, miˬ guiˬ chi daꞈ jaˇ nyi sha jaˇ ve hko kʼawꞈ hpehꞈ leh, Gʼuiˬ sha ve mvuhˇ miˬ uˉ peunˍ ve awˬ hawˉ lo chehˇ keunˍ ve mvuhˇ miˬ yaˇ hkʼa biˇ cawˬ tuˬ yoˬ. Teˇ gʼaˇ le le Yeˍsuˆ hkriꞈ uˉ peunˍ ve leh, yawˇ geh gʼa ga uˉ peunˍ shehˍ hpaˇ awˬ hawˉ lo na yuˬ puiˉ ve chaw hpehꞈ ve yoˬ. Hkʼe htaꞈ pa taw, Yaˍhoˉvaꞈ Shaˉhkiˆhkanˍ paˍ miˬ guiˬ chi ve htaꞈ te luˬ ve awˬ nyi maˇ cawˬ tehꞈ yonˍ ve yoˬ. “Hteˇ ve cawˇ ve chaw hui lehˬ, miˬ guiˬ hkʼoˆ gʼa chehˇ leh, oˇ kaꞈ lo co co taiˍ taiˍ gʼa chehˇ tuˬ yoˬ.” Liꞈ hpu hkʼaw ka tiꞈ chi hkʼe te taˍ laˇ ve htaꞈ awˬ tehˬ hpehꞈ tuˬ yoˬ tehꞈ yonˍ ve yoˬ.—Chiˇ mvuh ve 37:29; 104:5 MGS.
Yaꞈ hkʼaˇ, Gʼuiˬ sha ve mvuhˇ miˬ hkʼaˬ hkʼe te gaˬ la tuˬ le? Gʼuiˬ sha uˉ peunˍ ve awˬ hawˉ lo na yuˬ gaˇ ve miˬ guiˬ yaˇ hkʼa peu˗eˬ na yuˬ ve pa taw laˇ? Maˇ heˆ. Liꞈ hpu hkʼaw lo hteˇ lehˬ, kʼoˆ taˍ ve, Gʼuiˬ sha ve mvuhˇ miˬ gaˬ la tuˬ ve oˇ ve lehˬ, Gʼuiˬ sha lehˬ, uiˍ jaˇ ve kanˇ paˆ htaꞈ yuˬ leh uˉ peunˍ tuˬ yoˬ. “Mvuhˇ naw ma Gʼuiˬ sha lehˬ, te luˬ maˇ gʼa ve mvuhˇ miˬ lonˉ teˇ peˆ kʼawꞈ cawˬ la piˇ tuˬ yoˬ. Mvuhˇ miˬ chi ve awˬ nu ve mvuhˇ miˬ hkʼa peu˗eˬ htaꞈ te luˬ te sheˆ piˇ leh . . . mvuhˇ miˬ chi ve co co taiˍ taiˍ yeˬ chehˇ tuˬ yoˬ.”—Daˍyeˍlaˆ 2:44 MGS.
Gʼuiˬ sha ve mvuhˇ miˬ hkʼaˬ htaˆ gaˬ la tuˬ le? Liꞈ hpu hkʼaw tcuh kaˍ paˍ kʼoˆ taˍ ve tawˇ hkawˇ htaꞈ chi teˇ hkui biˇ la chehˇ ve htaꞈ gʼa mawˬ ve teˇ yanˇ, maˇ maw kʼo, Gʼuiˬ sha ve mvuhˇ miˬ gaˬ la yoˬ tehꞈ, Yaˍhoˉvaꞈ Shaˉhkiˆhkanˍ paˍ yonˍ ve yoˬ. Chi beuꞈ miˬ guiˬ chi haiˬ jaˇ ve “awˬ leh meuˇ” ve awˬ heˆ teˇ hpaˍ, maˇ hpehꞈ la sheˍ gʼuˇ suhˍ htaˇ kaꞈ hto laˇ taˍ ve tcuh kaˍ paˍ ve tawˇ hkawˇ, ngaˬ hui kaꞈ nawˬ htaꞈ chaˬ nyi tehˆ nyi tcuh gaˇ ve yoˬ. Tcuh kaˍ paˍ ve tawˇ hkawˇ chi teˇ hpaˍ lehˬ, Maꞈhtehˍ 24:3-14; Luˉkaꞈ 21:7-13, 25-31 leh 2 Tiˆmoˉseˍ 3:1-5 awˬ hkʼaw lo bvuhꞈ taˍ ve yoˬ.
Awˬ lawn kʼo, ngaˬ hui ve ‘nyi ma hkʼa peu˗eˬ, co ha hkʼa peu˗eˬ, dawˇ hkʼaˇ hkʼa peu˗eˬ, awˬ gʼaˇ awˬ shaˉ hkʼa peu˗eˬ ngaˬ hui ve Gʼuiˬ sha Yaˍhoˉvaꞈ htaꞈ gʼa haꞈ ve yoˬ leh, nawˬ awˬ to htaꞈ haꞈ ve hkʼe, nawˬ awˬ paˇ awˬ kui chehˇ ve chaw htaꞈ gʼa haꞈ ve yoˬ’ ngaˬ hui lehˬ, chaw ceuˬ maˇ kʼoˆ aˉ yaˇ maˇ kʼoˆ, maˇ fuiˍ maˇ pehˬ daꞈ. (Maˍkuˆ 12:30, 31) Hkriꞈ yaˇ awˬ moˍ awˬ viˉ awˬ nyi hkʼaw lo ngaˬ hui haꞈ daꞈ chehˇ ve htaꞈ teˇ mvuhˇ miˬ le le htawˇ, gʼa mawˬ gʼa shiˍ chehˇ ve yoˬ. (Yoˇhanˬ 13:35; 1 Yoˇhanˬ 3:10-12) Hkʼe htaꞈ pa taw, mvuhˇ miˬ hpawˇ maˇ kʼoˆ, chaw ceuˬ hpawˇ maˇ kʼoˆ, choˬ hpawˇ oˇ hpawˇ maˇ pawˬ leh, awˬ kaˬ lo chehˇ ve yoˬ. Ngaˬ hui lehˬ, awˬ hkuiˉ puiˍ htaˇ Yeˍsuˆ hkriꞈ ve awˬ laꞈ gʼawˇ hkʼa shuˍ gʼaꞈ te ve yoˬ. Yeˍsuˆ hkriꞈ yawˇ hui htaꞈ kʼoˆ piˇ ve, “ngaˬ lehˬ chi miˬ guiˬ htaꞈ maˇ caˉ daꞈ ve hkʼe, yawˇ hui htawˇ chi miˬ guiˬ htaꞈ maˇ caˉ daꞈ.” (Yoˇhanˬ 17:16) Miˬ guiˬ htaꞈ maˇ caˉ daꞈ kʼoˆ ve tcuhˉ kuiˬ lehˬ, chi beuꞈ ve awˬ co˗e hkʼaw lo shu a yeˇ maˇ uiˍ tehꞈ dawˇ leh te chehˇ ve maˇ hteˇ maˇ cawˇ ve awˬ ceuˬ teˇ hpaˍ maˇ te ve htaꞈ kʼoˆ ve yoˬ tehꞈ, ngaˬ hui yonˍ ve yoˬ. Heˍ ve, shu mawˇ hkʼawˇ ve, haˉ chawˇ haˉ paˆ te ve, guiˇ yaꞈ ve, hawˉ hkʼaˆ chawˇ hawˉ hkʼaˆ, yaˇ miˇ chawˇ yaˇ miˇ pehꞈ ve tzuhˆ ve, leh awˬ suhˍ htaꞈ caˇ ve, shaˉ hoꞈ htaꞈ oˉ kʼoˍ pui ve, Liꞈ hpu hkʼaw lo hkʼa tawˍ taˍ laˇ ve te hkʼaˇ hkʼa peu˗eˬ yaꞈ ve yoˬ.—1 Kawˇrenˍhtuˆ 6:9-11; Eˇfeˇsuꞈ 5:3-5; Tcuh yaˇ 15:28, 29.
Awˬ gʼuˇ suhˍ hpawˇ ve dawˇ law kuiˬ
Ngaˬ hui a shaꞈ chi hkʼe ceh tiˉ gʼa teꞈ chehˇ cawˇ ve maˇ heˆ tehꞈ, Yaˍhoˉvaꞈ Shaˉhkiˆhkanˍ paˍ yonˍ ve yoˬ. Yaˍhoˉvaꞈ Gʼuiˬ sha Yeˍsuˆ hkriꞈ htaꞈ miˬ guiˬ hkʼoˆ lo peu laˇ ve awˬ hkʼoˆ yawˇ ve awˬ suhˍ gʼa sheˆ leh htaiˍ hkʼawꞈ laˇ ve lehˬ, miˬ guiˬ chaw yaˇ Gʼuiˬ sha mehˆ gʼuˇ suhˍ lo hteˇ ve cawˇ ve chaw hpehꞈ leh, miˬ guiˬ awˬ suhˉ hkʼaw lo co co taiˍ taiˍ a shaꞈ gʼa teꞈ chehˇ tuˬ awˬ pon hpehꞈ ve yoˬ tehꞈ, ngaˬ hui yonˍ ve yoˬ. Yeˍsuˆ hkriꞈ ve awˬ laꞈ gʼawˇ kʼoˆ taˍ ve hkʼa shuˍ “Hkriꞈ ve awˬ suhˍ htaꞈ pa taw, chi beuꞈ ngaˬ hui hteˇ ve cawˇ ve chaw hpehꞈ la peuˬ.” (Roˉmaꞈ 5:9; Maꞈhtehˍ 20:28) Gʼuiˬ sha gu teh taˍ ve, yawˇ ve yaˇ hpu htaiˍ hkʼawꞈ laˇ ve htaꞈ awˬ gʼuˇ suhˍ hpawˇ a shaꞈ kʼawꞈ gʼa tuˬ hpehꞈ kʼai gʼa ve pa taw, Yaˍhoˉvaꞈ Shaˉhkiˆhkanˍ paˍ lehˬ Gʼuiˬ sha ve awˬ bon htaꞈ chiˇ uiˍ chiˇ mvuh ve yoˬ.
Awˬ gʼuˇ suhˍ hpawˇ ve a shaꞈ awˬ lawn htaꞈ Yaˍhoˉvaꞈ Shaˉhkiˆhkanˍ paˍ hui lehˬ Gʼuiˬ sha mvuhˇ miˬ uˉ peunˍ ve awˬ yanˇ htaˇ, suh taˍ ve chaw kʼawꞈ teꞈ tu la tuˬ ve htaꞈ hkʼa dehꞈ yonˍ ve yoˬ. Ngaˬ hui lehˬ, Liꞈ hpu hkʼaw maˍ laˇ taˍ ve hkʼa shuˍ, chaw yaˇ suh˗e ve teˇ yanˇ, teꞈ chiˉ kaꞈ maˇ kʼawꞈ cawˬ˗o tehꞈ, ngaˬ hui yonˍ ve yoˬ. “Yawˇ hui ve dawˇ hkʼaˇ teˇ hpaˍ htawˇ mehˉ kʼai ve yoˬ.” (Chiˇ mvuh ve 146:3, 4; Yeˍsaˍkeˍlaˆ 18:4; Cuˇ yiˍ piˇ ve 9:5) Yoˬ, suh taˍ ve chaw awˬ pon awˬ gʼuˇ suhˍ hpawˇ yawˇ hui ve a shaꞈ kʼawꞈ teꞈ tu la tuˬ ve lehˬ, Gʼuiˬ sha dawˇ nawˇ piˇ ve htaꞈ ceh tiˉ cawˬ ve yoˬ.—Yoˇhanˬ 5:28, 29.
Hkʼaˬ hkʼe hpehꞈ ve maˇ kʼoˆ, chi beuꞈ uˉ peunˍ chehˇ ve hkʼa peu˗eˬ htaꞈ Gʼuiˬ sha te luˬ ve awˬ yanˇ htaˇ, chi teˇ hkui a shaꞈ teꞈ chehˇ ve chaw maˇ maˇ gʼa ponˬ tuˬ yoˬ tehꞈ, Yaˍhoˉvaꞈ Shaˉhkiˆhkanˍ paˍ hui yonˍ ve yoˬ. Iˉ kaˆ htonˍ ve awˬ co˗e htaˇ, Noˉaꞈ leh yawˇ ve yehˬ yaˇ kʼa yaˇ gʼa ponˬ ve hkʼa shuˍ, gʼa ponˬ ve chaw oˇ ve teˇ hpaˍ lehˬ, Gʼuiˬ sha tsuhˇ baˬ taˍ ve daꞈ kehˬ ve miˬ guiˬ awˬ hkʼoˆ lo co co taiˍ taiˍ gʼa chehˇ tuˬ yoˬ. (Maꞈhtehˍ 24:36-39; 2 Peˍtruˆ 3:5-7, 13) Yaꞈ hkʼaˇ, Gʼuiˬ sha a loˍ htaꞈ te ve chaw ceh tiˉ gʼa ponˬ ve tehꞈ, ngaˬ hui yonˍ ve yoˬ. Liꞈ hpu hkʼaw lo chi hkʼe kʼoˆ ve: “Miˬ guiˬ leh miˬ guiˬ htaꞈ caˉ daꞈ ve sheˉ lai ve teˇ hpaˍ lehˬ mehˉ kʼai chehˇ ve yoˬ. Yaꞈ hkʼaˇ, Gʼuiˬ sha ve a loˍ htaꞈ te ve chaw teˇ gʼaˇ lehˬ, co co taiˍ taiˍ teꞈ chehˇ tuˬ yoˬ.”—1 Yoˇhanˬ 2:17; Chiˇ mvuh ve 37:11; Hpeuꞈ maˍ ve 7:9, 13-15; 21:1-5.
Yaˍhoˉvaꞈ Shaˉhkiˆhkanˍ paˍ hui ve yonˍ hkʼaˇ hkʼa peu˗eˬ teˇ ceuˬ le le choˬ kaꞈ lo ceh tiˉ kʼoˆ maˍ laˇ maˇ peuˬ taˍ. Yaꞈ hkʼaˇ, ngaˬ hui lehˬ nawˬ hui htaꞈ chi aꞈ kehˉ henˇ shiˍ tcuh gaˇ ve yoˬ.
Awˬ kaˬ awˬ nu awˬ heˆ te taˍ ve maˇ heˆ kʼo, Liꞈ hpu teˇ tawn le le Lahu Bible (TBS-1997) hkʼaw yuˬ tawˆ taˍ ve yoˬ. MGS te taˍ ve liꞈ mehˆ chi ve htaꞈ mawˬ kʼo Liꞈ Hpu Miˬ Guiˬ Suhˉ awˬ hkʼaw lo ve (Kaˇlaˇhpu hkawˇ) htaꞈ yuˬ tawˆ taˍ ve tehꞈ kʼoˆ gaˇ ve yoˬ.
[Liꞈ mehˆ hpfuhˇ 4 a yeˇ uiˍ ve kʼoˆ laˇ taˍ ve]
Yeˍsuˆ hkriꞈ htaꞈ henˇ yuˬ ve pa taw, ngaˬ hui lehˬ Yaˍhoˉvaꞈ Shaˉhkiˆhkanˍ Paˍ tehꞈ meh ve yoˬ.