Yehˬ Kʼa Hkʼaw ha lehˬ ve awˬ Hkʼaˇ
Yehˬ kʼa hkʼaw ha lehˬ ve cawˬ gʼa tehˬ tehˬ laˇ.
Hkʼaˬ hkʼe te hpehꞈ gʼa le.
Awˬ han chi ve awˬ hkʼaw lo hkʼa shuˍ hawˍ daꞈ leh ha lehˬ ve yehˬ kʼa htaꞈ nawˬ shiˍ daꞈ ve cawˬ˗aw laˇ. Hkʼaˬ ti chi ti lo laiˉ yehˬ kʼa hpaˆ hpaˆ ngaˆ ngaˆ hpehꞈ chehˇ ve yoˬ. Baˬ daꞈ ve, kanˉ hkʼa dehꞈ maˇ cawˬ, mehˇ chawˇ paˍ mehˇ chawˇ ma yaˇ hu duˬ hu ve, hpehꞈ haˍ ve, awˬ ceuˬ chi teˇ hpaˍ lehˬ haˍ jaˇ ve yoˬ. Maˇ cawˇ maˇ hawˍ daꞈ ve yehˬ kʼa htaꞈ beˆ maˍ paˍ teˇ gʼaˇ hkʼanˇ leh kʼoˆ ve, awˬ gʼuˇ suhˍ hpawˇ yehˬ kʼa mehˉ kʼai tuˬ yoˬ tehꞈ, chi teˇ hkui kʼoˆ daꞈ chehˇ ve htaꞈ chaw teˇ gʼaˇ le le shiˍ chehˇ ve yoˬ.
Aˬ htoꞈ ma pa taw chi teˇ hkui chi hkʼe ve dawˇ haˍ tuˬ yehˬ kʼa awˬ hkʼaw lo awˬ caˆ maˇ cheˆ cheˆ loꞈ la ve le. Yehˬ kʼa hkʼaw ngaˬ hui hkʼaˬ hkʼe ha lehˬ gʼa tuˬ le.
Yehˬ kʼa Tawˆ la Kuiˬ
Na hkawˇ chi teˇ hpaˍ htaꞈ hkʼawꞈ laˇ tuˬ awˬ pon laꞈ kʼawˍ toˆ ve leh yehˬ kʼa hkʼaˬ kaꞈ lo laˬ taˍ ve htaꞈ gʼa shiˍ cawˇ sheˍ ve yoˬ. Chi nyiˇ ceuˬ htaꞈ Te hpanˍ shehˍ hpaˇ cawˬ ve kʼo, oˇ ve teˇ gʼaˇ beˆ maˍ laˇ ve awˬ ceuˬ htaꞈ yehˬ yaˇ kʼa yaˇ cuˇ cawˇ ve yoˬ. Awˬ lawn kʼo, ngaˬ hui yehˬ kʼa htaꞈ awˬ tehˬ awˬ na hkʼa dehꞈ ha lehˬ tuˬ awˬ hkʼaˇ yawˇ shiˍ jaˇ ve yoˬ.
Yehˬ kʼa htaꞈ Te hpanˍ shehˍ hpaˇ maˇ cawˬ tehꞈ laiˉ gʼaˇ yonˍ ve yoˬ. Yaꞈ hkʼaˇ, hawˉ hkʼaˆ leh yaˇ miˇ hpanˍ taˍ ve teˇ ceuˬ htaꞈ Yeˍsuˆ kʼoˆ ve yoˬ. Liꞈ hpu awˬ hkʼaw lo tanˬ bvuhꞈ keu taˍ ve shaˉ hkiˆ htaꞈ Yeˍsuˆ yuˬ laˬ leh kʼoˆ ve, “Gʼuiˬ sha caˉ daꞈ piˇ taˍ ve htaꞈ chaw yaˇ maˇ gʼa yuˬ hpaˆ daꞈ piˇ tehꞈ kʼoˆ piˇ ve yoˬ.”—Maꞈhtehˍ 19:4-6.
Yeˍsuˆ kʼoˆ ve hkʼe, cuˇ yiˍ cawˬ shehˍ hpaˇ Gʼuiˬ sha lehˬ, chaw yaˇ awˉ lawˉ teˇ ca htaꞈ hpanˍ leh yehˬ kʼa ha lehˬ tuˬ awˬ pon gu taˍ ve yoˬ. Gʼuiˬ sha yawˇ huiˉ maˬ htaꞈ laꞈ kʼawˍ toˆ ve awˬ hkʼaw lo caˉ daꞈ piˇ taˍ leh kʼoˆ ve, “hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:22-24) Oˇ hkʼe kʼo, Te hpanˍ shehˍ hpaˇ Gʼuiˬ sha ve awˬ liˇ awˬ hkʼaˇ Liꞈ hpu awˬ hkʼaw lo teh taˍ ve htaꞈ maˇ na yuˬ leh a shaꞈ teꞈ chehˇ ve pa taw, chi beuꞈ teˇ co˗e dawˇ haˍ tuˬ yehˬ kʼa hkʼaw cawˬ la ve hehˉ neˬ.
Ha lehˬ Kuiˬ Sheh kʼai laˇ tuˬ Hkʼaˬ ve Teˇ Caˆ Le
Nawˬ shiˍ˗oˬ ve hkʼe, chi beuꞈ teˇ co˗e ve miˬ guiˬ yaˇ lehˬ, a shu yawˇ awˬ to pon ceh tiˉ dawˇ nyi leh hpu gʼa tuˬ awˬ gʼaˇ piˇ ve yoˬ. Hpu hpawˇ kanˉ te paˍ teˇ gʼaˇ Aˍmeˍriˆkaꞈ mvuhˇ miˬ ve cawnˇ yehˬ lonˉ awˬ hkʼaw lo henˇ peuˬ ve chaw htaꞈ kʼoˆ piˇ ve, sheˉ lai ve teˇ ceuˬ daꞈ ve yoˬ. Nawˬ lawˇ hpaꞈ uiˍ ve chaw hpehꞈ ve kaꞈ, daꞈ ve chaw hpehꞈ g’a ve yoˬ tehꞈ, nawˬ dawˇ hpehꞈ ve yoˬ tehꞈ yawˇ kʼoˆ piˇ ve yoˬ. Yaꞈ hkʼaˇ, hpu shi mawˇ jeˬ hpawˇ paw sha la tuˬ gʼaꞈ ca ve teˇ ceuˬ lehˬ, ha lehˬ tuˬ hpehꞈ kʼai maˇ gʼa. Awˬ tehˬ kʼo, hpu shi mawˇ jeˬ hpawˇ heuˇ ve teˇ ceuˬ yehˬ kʼa awˬ hkʼaw lo kawˆ tuˬ uiˍ jaˇ ve teˇ ceuˬ hpehꞈ ve yoˬ. Awˬ lawn kʼo, chaw yaˇ awˬ chawˇ muiˬ daꞈ ve awˬ hkʼaw lo tawˍ taˍ tsuhˇ taˍ tuˬ hpehꞈ leh chaw yaˇ ve awˬ yanˇ leh hpu htaꞈ chawꞈ kʼai˗e ve yoˬ. A yeˇ uiˍ ve ha lehˬ tuˬ peꞈ laˇ gʼa ve awˬ ceuˬ Tawˇ naˉ ve liꞈ nyiˇ tawn Liꞈ hpu awˬ hkʼaw lo dawˇ nyi sheˍ.
“A shu yawˇ ve awˬ chawˇ awˬ paˆ (“haꞈ daꞈ ve chaw,” MGS) hui geh gʼawˇ hpaꞈ mvuhˬ naweh ceh tiˉ gʼa caˇ chehˇ ve chaw htawˇ, maˇ cawˇ maˇ hawˍ daꞈ ve awˬ hkʼaw lo shaˍ gʼa mui caˇ chehˇ ve chaw aꞈ kehˉ daꞈ leuˉ ve yoˬ.”
“Nyi ma gawˬ lehˍ ve awˬ hkʼaw lo hkaoˍ monˇ ehˉ teˇ diˬ htaꞈ gʼa caˇ ve teˇ ceuˬ lehˬ, yaꞈ daꞈ jiˆ daꞈ ve awˬ hkʼaw lo gʼa hti caˇ hti dawˬ chehˇ ve aꞈ kehˉ daꞈ leuˉ ve yoˬ.”
Nyi ma htaꞈ heuˆ ve maˇ heˆ laˇ. Dawˇ nyi sheˍ mehˍ, yehˬ kʼa teˇ yehˬ le le awˬ liˇ chi ve htaꞈ awˬ hkuiˉ puiˍ gʼawˆ tiˍ taˍ ve kʼo, miˬ guiˬ chi hkʼaˬ hkʼe taw taw pa kʼai tuˬ le. Yehˬ kʼa awˬ hkʼaw lo yehˬ yaˇ kʼa yaˇ teˇ gʼaˇ leh teˇ gʼaˇ te laˇ piˇ lawˬ gaˇ ve hkʼe teˇ gʼaˇ leh teˇ gʼaˇ te ve awˬ hkʼaˇ awˬ bon cawˬ ve beˆ maˍ laˇ ve tawˇ hkawˇ Liꞈ hpu awˬ hkʼaw lo gu teh taˍ ve yoˬ. Beˆ maˍ laˇ ve tawˇ hkawˇ oˇ ve teˇ ceuˬ ceuˬ htaꞈ dawˇ nyi sheˍ.
Awˬ hpawˇ teˇ hpaˍ˗oˬ, “a shu yawˇ ve awˬ to htaꞈ haꞈ ve hkʼe, a shu yawˇ ve awˬ miˇ ma htaꞈ haꞈ cawˇ ve yoˬ.”—Eˇfeˇsuꞈ 5:28-30.
Tawˇ hkawˇ chi ve yaw sha ve htawˇ, awˬ tehˬ awˬ na yehˇ hpehꞈ˗aw. Chi ve awˬ hkʼoˆ a shu yawˇ awˬ miˇ ma htaꞈ “yawˆ yan˗o” tehꞈ awˬ hpawˇ htaꞈ Liꞈ hpu beˆ maˍ piˇ ve yoˬ. (1 Peˍtruˆ 3:7) Awˬ hpawˇ chi hkʼe te ve awˬ hkʼaw lo shu aꞈ kehˉ yawˇ htaꞈ a yeˇ gʼa te piˇ ve yoˬ. Tcuhˉ kuiˬ chi ve lehˬ, nuˇ˗ehˍ te piˇ ve, na gʼa piˇ ve, leh awˬ miˇ ma htaꞈ gʼa yonˍ gʼa tcuh ve yoˬ. Yawˇ dawˇ hkʼaˇ piˇ laˇ ve awˬ ceuˬ htaꞈ awˬ bon cawˬ ve yoˬ tehꞈ, shawˍ leh yawˇ tawˇ yaw hkawˇ htaꞈ gʼa na piˇ ve yoˬ. (Awˬ hkuiˉ puiˍ 21:12 tehˆ daꞈ nyi sheˍ.) Hkʼaˬ ve teˇ yehˬ kʼa htawˇ maˇ kʼoˆ, a shu yawˇ loˍ ve hkʼe awˬ hpawˇ dawˇ nyi puiˉ ve awˬ hkʼaw lo awˬ miˇ ma htaꞈ te piˇ ve kʼo, awˬ bon gʼa tuˬ yoˬ tehꞈ nawˬ kaꞈ mawˬ ve maˇ heˆ laˇ.—Maꞈhtehˍ 7:12.
Awˬ miˇ ma teˇ hpaˍ˗oˬ, “a shu yawˇ ve awˬ hpawˇ htaꞈ yawˆ yan˗o.”—Eˇfeˇsuꞈ 5:33.
Yehˬ kʼa awˬ hkʼaw lo ha lehˬ tuˬ awˬ hpawˇ awˬ vuiˬ hehnˇ ve htaꞈ te gʼa tuˬ awˬ miˇ ma gʼa ga piˇ ve yoˬ. Chi ve lehˬ, Gʼuiˬ sha dawˇ law taˍ ve hkʼe awˬ miˇ ma keunˍ ve awˬ chawˇ ga piˇ ma teˇ gʼaˇ hpehꞈ tuˬ Yawˇ peꞈ laˇ taˍ ve yoˬ. (Awˬ hkuiˉ puiˍ 2:18) Awˬ miˇ ma awˬ hpawˇ htaꞈ yawˆ yan ve awˬ hkʼaw lo yehˬ kʼa hkʼaw dawˇ taˍ ve htaꞈ te gʼa tuˬ awˬ pon yawˇ dawˇ cheˆ ve awˬ ceuˬ htaꞈ haꞈ yuˬ leh laꞈ sheh caˉ daꞈ ve kʼo, yehˬ kʼa awˬ bon gʼa tuˬ yoˬ tehꞈ nawˬ mawˬ ve maˇ heˆ laˇ.
Yehˬ kʼa teˇ hpaˍ˗oˬ, “awˬ hpawˇ awˬ miˇ ma teˇ gʼaˇ leh teˇ gʼaˇ htaꞈ gʼa hteˇ cawˇ daꞈ ve yoˬ.”—Heˍbrehˇ 13:4; Chi beuꞈ Kaˇlaˇ hpu hkawˇ ve Liꞈ hpu)
Yawˇ huiˉ maˬ nyiˇ gʼaˇ hteˇ cawˇ daꞈ ve kʼo, yehˬ kʼa awˬ hkʼaw lo awˬ tehˬ awˬ na awˬ bon gʼa ve yoˬ. Maˇ˗awˍ ve kʼo, haˉ chawˇ te ve teˇ ceuˬ lehˬ yehˬ kʼa htaꞈ te luˬ piˇ ve yoˬ. (Tawˇ naˉ ve 6:27-29, 32) Chi htaꞈ pa taw, Liꞈ hpu awˬ hkʼaw lo cawˬ ve cuˇ yiˍ tawˇ hkawˇ kʼoˆ taˍ ve, “nawˬ miˇ ma geh ceh tiˉ ha lehˬ chehˇ˗oˆ” leh “aˬ htoꞈ ma pa taw awˬ nu ve yaˇ miˇ teˇ hpaˍ htaꞈ nawˬ kʼawꞈ haꞈ gaˇ sheˍ ve le.”—Tawˇ naˉ ve 5:18-20.
Awˬ pa awˬ e teˇ hpaˍ˗oˬ, “Yaˇ ehˉ teˇ gʼaˇ hkʼaˬ hkʼe a shaꞈ teꞈ cawˇ ve awˬ hkʼaˇ beˆ maˍ piˇ˗oˆ.”—Tawˇ naˉ ve 22:6.
Yaˇ htaꞈ haꞈ shaˉ leh yaˇ geh chehˇ tuˬ awˬ yanˇ cawˬ ve kʼo, yehˬ kʼa ha lehˬ tuˬ cawˬ maˇ la ve yoˬ. Chi htaꞈ pa taw, Liꞈ hpu awˬ pa awˬ e htaꞈ awˬ gʼaˇ piˇ taˍ ve, “aˉ hkʼaw lo chehˇ taˍ htaˇ maˇ kʼoˆ, yaꞈ kʼaw te toˇ chehˇ htaˇ maˇ kʼoˆ, gʼaˇ jehˇ chehˇ htaˇ maˇ kʼoˆ, kanˉ te chehˇ htaˇ maˇ kʼoˆ,” cawˇ ve awˬ liˇ awˬ hkʼaˇ yaˇ htaꞈ gʼa maˍ piˇ ve yoˬ. (Bon maˍ ve 11:19) Liꞈ hpu awˬ hkʼaw lo kʼawꞈ kʼoˆ taˍ ve, awˬ pa awˬ e yaˇ htaꞈ haꞈ ve awˬ hkʼaw lo hpeuꞈ maw piˇ leh yaˇ htaꞈ gʼa jawꞈ maˍ piˇ ve yoˬ.—Eˇfeˇsuꞈ 6:4.
Yaˇ teˇ hpaˍ˗oˬ, “Jawˇmawˇ Yeˍsuˆ awˬ hkʼaw lo nawˬ hui ve awˬ pa awˬ e ve tawˇ hkawˇ htaꞈ na yuˬ˗oꞈ.”—Eˇfeˇsuꞈ 6:1.
Awˬ tehˬ yoˬ. Miˬ guiˬ chi hkʼoˆ lo awˬ liˇ htaꞈ maˇ na yuˬ, teˇ pawˆ le le awˬ pa awˬ e tawˇ hkawˇ htaꞈ na yuˬ tuˬ maˇ sha ve yoˬ. Hkʼaˬ hkʼe hpehꞈ ve htawˇ, yehˬ kʼa htaꞈ Te hpanˍ shehˍ hpaˇ ngaˬ hui htaꞈ tawˇ piˇ ve awˬ ceuˬ htaꞈ te ve teˇ ceuˬ lehˬ, cuˇ yiˍ cawˬ ve yoˬ tehꞈ nawˬ mawˬ ve maˇ heˆ laˇ. Yehˬ kʼa ha lehˬ ve teˇ ceuˬ htaꞈ shaˬ te shaˬ hpuˇ tuˬ aˬ htoꞈ ma teˇ ceuˬ daꞈ jaˇ ve htaꞈ yawˇ shiˍ ve yoˬ. Chi htaꞈ pa taw, nawˬ ve awˬ pa awˬ e hkawˇ htaꞈ na yuˬ tuˬ gʼaˇ hteꞈ coˇ caˇ loˬ. Miˬ guiˬ chi hkʼoˆ lo haiˬ ve awˬ ceuˬ lawˇ nyi ve maˇ jaˇ ve htaꞈ jaw kʼai tuˬ dawˇ cheˆ loˬ.—Tawˇ naˉ ve 1:10-19.
Yehˬ yaˇ kʼa yaˇ teˇ gʼaˇ le le Liꞈ hpu awˬ hkʼaw lo beˆ maˍ laˇ ve awˬ hkʼaˇ suh shaˬ gʼaꞈ te ve kʼo, yehˬ kʼa awˬ bon shaˬ gʼa ve yoˬ. Chi teˇ hkui yehˬ kʼa daꞈ ve a shaꞈ teꞈ chehˇ ve ceh tiˉ maˇ heˆ. Yaꞈ hkʼaˇ, awˬ gʼuˇ suhˍ hpawˇ Gʼuiˬ sha ka tiꞈ te taˍ ve miˬ guiˬ awˬ suhˉ awˬ hkʼaw lo daꞈ jaˇ ve dawˇ law kuiˬ kaꞈ kʼawꞈ cawˬ ve yoˬ. (2 Peˍtruˆ 3:13; Hpeuꞈ maˍ ve 21:3, 4) Chi htaꞈ pa taw, hkʼaˬ htaˆ chi htaˆ kaꞈ yehˬ kʼa awˬ hkʼaw lo Liꞈ hpu teˇ geh henˇ gaˇ ve nyi ma cawˬ tuˬ te˗oꞈ.
Awˬ kaˍ awˬ nu awˬ heˆ te taˍ ve maˇ heˆ kʼo, Liꞈ hpu teˇ tawn le le The Lahu Bible, Thailand Bible Society (CL83-TBS-1997-3M) ve Liꞈ hpu htaꞈ yuˬ tawˆ taˍ ve yoˬ.