Ha pa 4 maˬ

Hkʼe kʼo ngaˬ hui˗ehꞈ? Ngaˬ hui Yaˬhoˉvaˬ hkʼe dawˇ ve laˇ? Maˇ heˆ leh miˬ guiˬ yaˇ dawˇ ve hkʼe dawˇ ve laˇ? Ngaˬ hui Hkriꞈ yaˇ hpehꞈ ve pa taw, Gʼuiˬ sha dawˇ cawˇ ve htaꞈ coˇ caˇ leh te ve yoˬ. Yaꞈ hkʼaˇ, ngaˬ hui ve dawˇ hkʼaˇ˗ehꞈ? Ngaˬ hui coˇ caˇ leh Yaˬhoˉvaˬ dawˇ ve hkʼe dawˇ˗aw laˇ? Chi hkʼe te ve maˇ sha. Miˬ guiˬ yaˇ ve dawˇ hkʼaˇ ngaˬ hui awˬ paˇ awˬ kui hkʼa caw zuhˇ cawˬ ve pa taw, ngaˬ hui kaꞈ yawˇ hui hkʼe dawˇ tuˬ sha jaˇ. (Efs 2:2) Miˬ guiˬ yaˇ ngaˬ hui htaꞈ a shu yawˇ awˬ pon tiˉ dawˇ nyi tcuh gaˇ ve yoˬ. Hkʼe te leh, Yaˬhoˉvaˬ hkʼe dawˇ ve haˍ jaˇ leh miˬ guiˬ yaˇ hkʼe dawˇ ve sha jaˇ. Miˬ guiˬ yaˇ ve dawˇ hkʼaˇ ngaˬ hui htaꞈ beˆ maˍ laˇ tcuh ve kʼo, ngaˬ hui a shu yawˇ awˬ pon tiˉ dawˇ nyi la leh, aˬ htoꞈ ma cawˇ maˇ cawˇ ve ngaˬ hui hkʼaˇ ngaˬ hui dawˇ cheˆ gaˇ tuˬ yoˬ. (Mk 7:21, 22) Yaˬhoˉvaˬ dawˇ ve hkʼe dawˇ ve lehˬ nyiˉ laˇ ve htaꞈ maˇ shuˍ, ngaˬ hui awˬ pon awˬ bon cawˬ jaˇ ve yoˬ. w18.11 21 ¶1; 22 ¶3-4

Yaˬhoˉvaˬ Yeˍsuˆ geh tawˇ 3 pawˆ yaw piˇ leh yawˇ htaꞈ haꞈ jaˇ ve tehꞈ shiˍ tcuh ve yoˬ. Chi Yeˍsuˆ awˬ gʼaˇ gʼa jaˇ! Yawˇdanˍ gʼuiˬ ma hkʼaw Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ Yaˬhoˉvaˬ lehˬ yaꞈ nyi ve Liꞈ hpu awˬ tawn laꞈ haˉ kʼoˆ ve yoˬ. Baˆtiˆsaˬ piˇ paˍ Yoˇhanˬ leh Yeˍsuˆ ceh tiˉ awˬ hkawˇ chi ve htaꞈ kaˇ ve yoˬ. Peuˬ hkʼawꞈ nawˉ Yeˍsuˆ maˇ suh sheˍ 1 hkʼawꞈ htaˇ, “chaw chi lehˬ ngaˬ haꞈ jaˇ ve ngaˬ ve Yaˇ hpu hpehꞈ leh, yawˇ htaꞈ ngaˬ nyi hkʼaˇ suh jaˇ ve yoˬ. Yawˇ ve tawˇ hkawˇ htaꞈ na yuˬ˗oꞈ” tehꞈ Yaˬhoˉvaˬ kʼoˆ ve htaꞈ tcuh yaˇ 3 gʼaˇ gʼa kaˇ ve yoˬ. (Maꞈ 17:5) Chi hkʼoˆ kaꞈ, Yeˍsuˆ maˇ suh sheˍ 4 nyi htaˇ, Yaˬhoˉvaˬ yawˇ ve Yaˇ paˍ htaꞈ teˇ pawˆ kʼawꞈ yaw piˇ ve yoˬ. (Yoˇ 12:28) Chaw yaˇ Yeˍsuˆ htaꞈ heˍ shehˍ hpaˇ tehꞈ kuˬ leh yawˇ yaꞈ taw jaˇ ve awˬ hkʼaw lo suh˗e tuˬ tehꞈ yawˇ shiˍ ve yoˬ. Yaꞈ hkʼaˇ, ‘ngaˬ ve a loˍ maˇ heˆ, nawˬ ve a loˍ cawˇ ve hkʼe hpehꞈ piˇ˗oˆ’ tehꞈ Yeˍsuˆ bon lawˬ ve yoˬ. (Maꞈ 26:39, 42) Miˬ guiˬ chi yawˇ htaꞈ a yeˇ yuˬ tcuh gaˇ ve maˇ heˆ. Yawˇ ve Awˬ pa yawˇ htaꞈ a yeˇ yuˬ tcuh gaˇ ve pa taw, ‘yaꞈ taw ve teˇ ceuˬ htaꞈ maˇ dawˇ leh suhˆ hkuiˉ daw hkʼoˆ lo hkanˍ suh’ ve yoˬ.—Heˍ 12:2. w18.07 7-8 ¶15-16

Jawˇmawˇ ve mvuhˇ haˉ awˍ caˇ ve tanˬ te peuˬ hkʼawꞈ nawˉ, Yeˍsuˆ haꞈ hanˉ jaˇ. Yawˇ aˬ htoꞈ ma te ve le? Yeˍsuˆ yawˇ Awˬ pa ve hkawˇ na yuˬ leh Awˬ pa ve a loˍ htaꞈ gʼaꞈ te ve yoˬ. Chi hkʼe te htaˇ, chaw teˇ hpaˍ Yeˍsuˆ htaꞈ chaw haiˬ teˇ gʼaˇ hkʼe shawˍ leh tiˇ pehˍ piˇ tuˬ yawˇ shiˍ ve htawˇ, gʼaꞈ te ve yoˬ. (Maꞈ 26:65, 66) Yaˬhoˉvaˬ ve awˬ meh htaꞈ yawˆ yan tuˬ, yawˇ uˉ peunˍ ve hpawˇ chehˇ gʼa tuˬ, leh venˇ baˆ dawˇ hpfuhˆ ve chaw teˇ hpaˍ co co taiˍ taiˍ ve a shaꞈ gʼa tuˬ, Yeˍsuˆ ka tiꞈ yeˬ ve yoˬ. Awˬ laꞈ gʼawˇ maˇ maw ve awˬ yanˇ hkʼaw gʼa hpuˇ tuˬ ve awˬ ceuˬ htaꞈ haꞈ yuˬ gʼa tuˬ kaꞈ yawˇ gu piˇ ve yoˬ. Yeˍsuˆ haꞈ hanˉ ve awˬ nu ve teˇ hkʼaˇ kaꞈ hpeuꞈ maw piˇ sheˍ ve yoˬ. Yawˇ laiˉ ceuˬ dawˇ haˍ dawˇ hkiˉ ve htawˇ, tcuh yaˇ hui loˍ ve awˬ ceuˬ htaꞈ yawˇ a yeˇ yuˬ ve yoˬ. Yawˇ Yuˇdaꞈ htaꞈ tawˆ˗e tcuh peuˬ hkʼawꞈ nawˉ, yawˇ hkʼa sha sha˗ehˍ ve pawehˇ caˇ tuˬ te maˍ piˇ ve yoˬ. Yeˍsuˆ ve awˬ suhˍ leh ka tiꞈ shaˉ caˆ awˬ suhˉ htaꞈ pa taw, leuˆ yuˬ taˍ ve awˬ laꞈ gʼawˇ awˬ bon gʼa ve tehꞈ tawnˇ gʼa tuˬ, mvuhˇ haˉ awˍ caˇ ve chi ga piˇ ve yoˬ.—1 Kawˇ 10:16, 17. w19.01 22 ¶7-8

Mvuhˇ naw ma hkʼoˆ chehˇ ve Yeˍsuˆ ve Awˬ pa lehˬ Yeˍsuˆ htaꞈ hkʼawꞈ piˇ ve, “ngaˬ ve awˬ meh htaꞈ awˬ meꞈ awˬ hponˇ cawˬ piˇ peuˬ. Ngaˬ teˇ pawˆ kʼawꞈ cawˬ piˇ tuˬ sheˍ.” Yeˍsuˆ Yaˬhoˉvaˬ htaꞈ ka tiꞈ yeˬ tuˬ a yeˇ uiˍ jaˇ ve awˬ vuiˬ cawˬ ve pa taw, yawˇ nyi ma tuꞈ hkanˍ jaˇ. Yawˇ shu jawꞈ leh tuꞈ jaˇ hkanˍ jaˇ ve hkʼaw gʼa suh˗e tuˬ shiˍ ve yoˬ. (Maꞈ 26:38) Yaꞈ hkʼaˇ, a yeˇ uiˍ jaˇ ve lehˬ Yeˍsuˆ yawˇ ve Awˬ pa ve awˬ meh htaꞈ chiˇ mvuh gaˇ ve yoˬ. Yeˍsuˆ Gʼuiˬ sha htaꞈ maˇ shawˍ maˇ caˆ kʼoˆ ve tehꞈ shu she pfuhˍ piˇ leh, yawˇ suh˗e ve Gʼuiˬ sha ve awˬ meh luˬ la ve htaꞈ kawˆ ve yoˬ. Yeˍsuˆ hkʼa shuˍ, Yaˬhoˉvaˬ ve awˬ meh htaꞈ shu nyi cha la ve ngaˬ hui kaꞈ kawˆ ve yoˬ. Yeˍsuˆ hkʼa shuˍ, ngaˬ hui kaꞈ maˇ hteˇ maˇ cawˇ ve gʼa hpuˇ la ve yoˬ. Tawˍ taˍ paˍ ngaˬ hui htaꞈ caˉ daꞈ ve awˬ lawn heˍ laˇ ve ngaˬ hui maˇ dawˇ cawˇ ve yoˬ hehˉ. Chi hkʼe ve Yaˬhoˉvaˬ ve awˬ meh luˬ la ve yoˬ. Chi ngaˬ hui gʼa hpuˇ htaˇ Yaˬhoˉvaˬ ve hkawˇ awˬ gʼaˇ peꞈ laˇ gʼa ve yoˬ. Yaˬhoˉvaˬ yawˇ ve awˬ meh awˬ meꞈ awˬ hponˇ gʼa tuˬ te tuˬ yoˬ.—Chiˇ 94:22, 23; Isy 65:17. w19.03 11-12 ¶14-16

Yeˍsuˆ ve awˬ laꞈ gʼawˇ cheˆ˗ehꞈ kʼai ve yoˬ! Yeˍsuˆ Iˉsaˍreˍlaˆ mvuhˇ miˬ htaꞈ kʼawꞈ gu te tuˬ yoˬ tehꞈ yawˇ hui dawˇ ve yoˬ. Yaꞈ hkʼaˇ, Yeˍsuˆ kʼoˆ ve, maˇ maw ve awˬ yanˇ yawˇ gʼa tuꞈ gʼa hkanˍ leh suh˗e tuˬ yoˬ. Tcuh yaˇ Peˍtruˆ kʼoˆ piˇ ve, “Jawˇmawˇ˗oˬ, chi hkʼe gʼa hpehꞈ tuˬ maˇ heˆ. Chi hkʼe ve teˇ ceuˬ nawˬ htaꞈ a ciˉ kaꞈ maˇ gʼa heuˆ.” Yeˍsuˆ hkʼawꞈ piˇ ve, “Saˍtanˍ˗oˬ, ngaˬ awˬ hkʼawꞈ nawˉ hpawˇ lo jiˆ kʼai˗o. . . . Nawˬ ve dawˇ hkʼaˇ lehˬ Gʼuiˬ sha ve dawˇ hkʼaˇ maˇ heˆ, chaw yaˇ ve dawˇ hkʼaˇ hpehꞈ ve yoˬ.” (Maꞈ 16:21-23; Tcuh 1:6) Yaˬhoˉvaˬ ve dawˇ hkʼaˇ leh Saˍtanˍ ve miˬ guiˬ ve dawˇ hkʼaˇ htaꞈ maˇ shuˍ daꞈ ve tehꞈ Yeˍsuˆ hkʼa tawˍ lehˆ kʼoˆ maˍ laˇ ve yoˬ. (1 Yoˇ 5:19) Miˬ guiˬ yaˇ laiˉ gʼaˇ dawˇ ve hkʼe, Peˍtruˆ Yeˍsuˆ htaꞈ kaꞈ a shu yawˇ awˬ pon tiˉ dawˇ nyi tcuh gaˇ ve yoˬ. Yaꞈ hkʼaˇ, gʼa tuꞈ gʼa hkanˍ leh suh˗e ve htaꞈ Yeˍsuˆ yeunˇ hkanˍ gʼaˇ tuˬ, Yaˬhoˉvaˬ yawˇ htaꞈ gu hehnˇ taˍ tcuh gaˇ ve yoˬ. Yeˍsuˆ chi hkʼe hkʼawꞈ piˇ ve lehˬ Yaˬhoˉvaˬ ve dawˇ hkʼaˇ htaꞈ yawˇ haꞈ yuˬ leh, miˬ guiˬ ve dawˇ hkʼaˇ htaꞈ yawˇ tawˍ baˬ ve tehꞈ kʼoˆ gaˇ ve yoˬ. w18.11 21 ¶1-2

Miˬ guiˬ chi hkʼoˆ lo laiˉ lanˬ gʼaˇ Jawˇmawˇ ve mvuhˇ haˉ awˍ caˇ ve hpawnˬ daꞈ ve laˬ htaˇ, Yaˬhoˉvaˬ aˬ htoꞈ ma mawˬ ve le dawˇ nyi sheˍ. Yawˇ chaw awˬ moˍ lonˉ htaꞈ ceh nyi ve maˇ heˆ, teˇ gʼaˇ leh teˇ gʼaˇ htaꞈ yawˇ chaˬ nyi ve yoˬ. Tawˇ pa haˉ te kʼo, teˇ hkʼawꞈ le le ka tiꞈ yeˬ leh hpawnˬ daꞈ la ve chaw htaꞈ yawˇ mawˬ ve yoˬ. Chaw teˇ hpaˍ fawˉ ve mehˍ ve gʼa hpuˇ jaˇ ve htawˇ, laˬ sheˍ ve yoˬ. Chaw teˇ hpaˍ awˬ kaˍ awˬ nu ve hpawnˬ daꞈ ve hkʼaˬ htaˆ kaꞈ maˇ laˬ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ ve laˬ ve a yeˇ uiˍ jaˇ tehꞈ shawˍ ve yoˬ. Chaw teˇ hpaˍ hpaˍ hpawnˬ daꞈ ve chi hkʼaˬ hkʼe kʼai ve htaꞈ shiˍ gaˇ leh awˉ lawˉ teˇ pawˆ laˬ ve pa taw, Yaˬhoˉvaˬ kaꞈ yawˇ hui htaꞈ mawˬ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve chaw maˇ maˇ laˬ ve htaꞈ Yaˬhoˉvaˬ mawˬ htaˇ ha lehˬ ve yoˬ. (Luˉ 22:19) Yaꞈ hkʼaˇ, aˬ htoꞈ ma te yawˇ hui laˬ gaˇ ve htaꞈ yawˇ a yeˇ yuˬ ve yoˬ. Yawˇ hui nyi ma hkʼaw cawˬ ve yawˇ awˬ pon a yeˇ uiˍ jaˇ. Yaˬhoˉvaˬ leh yawˇ ve kanˉ hkʼaˇ ngaˬ hui htaꞈ maˍ laˇ tcuh gaˇ ve yoˬ.—Isy 30:20; Yoˇ 6:45. w19.01 26 ¶1-3

Yeˍsuˆ yawˇ ve awˬ laꞈ gʼawˇ awˬ pon hkanˍ suh ve yoˬ. A shaꞈ teꞈ kuiˬ hkʼaw yawˇ awˬ to aꞈ kehˉ shu htaꞈ a yeˇ yuˬ ve yoˬ. Tawˇ pa haˉ te kʼo, yawˇ heuˬ jaˇ leh dawˇ maˇ ve htawˇ, awˬ laꞈ gʼawˇ geh maˇ maˇ chehˇ ve yoˬ. (Luˉ 22:39-46) Yawˇ shu htaꞈ aˬ htoꞈ ma piˇ gʼa ve hkʼaˬ htaˆ kaꞈ dawˇ nyi ve yoˬ. Yawˇ shu geh gʼa tuˬ ve awˬ ceuˬ htaꞈ maˇ dawˇ nyi. (Maꞈ 20:28) Awˬ tehˬ haꞈ daꞈ ve Hkriꞈ yaˇ awˬ moˍ hkʼaw chehˇ leh Yeˍsuˆ suh ve dawˇ nawˇ tuˬ hpawnˬ daꞈ ve maˇ laˬ jaw sheˍ ve chaw htaꞈ gʼa kuˬ piˇ ve ha lehˬ jaˇ. Yaꞈ hkʼaˇ, “yehˬ yaˇ kʼa yaˇ tehꞈ kʼoˆ ve yonˍ ve chaw teˇ hpaˍ” htaꞈ Gʼuiˬ sha ve kanˉ maˇ te˗oˬ ve chaw htaꞈ ngaˬ hui a yeˇ hkʼa dehꞈ yuˬ leh ga piˇ gaˇ ve yoˬ. (Gaˍ 6:10) Yawˇ hui hpawnˬ daꞈ la tuˬ, a yeˇ uiˍ jaˇ ve Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ, ngaˬ hui haꞈ pehnˇ ve hkʼaw awˬ gʼaˇ piˇ ve yoˬ. Yaˬhoˉvaˬ leh Yeˍsuˆ hkʼe chaw chi ve teˇ hpaˍ kʼawꞈ la htaˇ, ngaˬ hui ha lehˬ jaˇ.—Maꞈ 18:14. w19.01 29-30 ¶12, 14, 15

Yeˍsuˆ mvuhˇ haˉ awˍ caˇ tuˬ te maˍ htaˇ, yawˇ Paˍsaˍhkanˍ pawehˇ hkaoˍ monˇ leh a pehˉ meuˇ gʼuiˬ cawˬ taˍ ve htaꞈ yehˇ ve yoˬ. Awˬ heˆ chi ve 2 ceuˬ lehˬ yawˇ ve awˬ to leh awˬ suhˍ biˇ jaˇ ve awˬ tan hpehꞈ leh, maˇ maw ve awˬ yanˇ Yeˍsuˆ yawˇ hui awˬ pon tuˉ tanˇ piˇ tuˬ yoˬ tehꞈ Yeˍsuˆ tcuh yaˇ hui htaꞈ kʼoˆ piˇ ve yoˬ. Mvuhˇ haˉ awˍ caˇ ve a yeˇ uiˍ jaˇ ve chi hkʼa sha sha˗ehˍ te gʼa ve tehꞈ tcuh yaˇ hui maˇ anˇ. Aˬ htoꞈ ma pa taw le? Aˬ htoꞈ ma hpehꞈ la ve le dawˇ nyi sheˍ. Yeˍsuˆ Gʼuiˬ sha ve kanˉ te ve 3 hkʼawꞈ teˇ hkʼawꞈ htaˇ yawˇ awˬ chawˇ daꞈ jaˇ ve Laˍzaˍruˆ, Maˍhtaˆ, leh Maˍriˆ ve aˉ hkʼaw lo kʼai htaˇ, yawˇ chaw yaˇ htaꞈ tanˬ maˍ piˇ ve yoˬ. Hkehˉ chaw a yeˇ uiˍ jaˇ ve htaꞈ haꞈ yuˬ tuˬ, Maˍhtaˆ te caˍ te taw ve kanˉ maˇ jaˇ ve yoˬ. Yeˍsuˆ chi htaꞈ mawˬ htaˇ, caˇ tuˬ daꞈ jaˇ ve hkʼaˬ htaˆ kaꞈ cawˬ tuˬ maˇ loˍ tehꞈ yawˇ Maˍhtaˆ htaꞈ nyi ma nuˇ nehˬ ve hkʼaw kʼoˆ piˇ ve yoˬ. (Luˉ 10:40-42) Yeˍsuˆ yawˇ ve a shaꞈ tanˇ piˇ tuˬ gaˬ la paˇ neˇ htaˇ, yawˇ hkʼaˇ yawˇ beˆ maˍ ve hkawˇ htaꞈ gʼaꞈ te ve yoˬ. Yawˇ mvuhˇ haˉ awˍ caˇ ve hkʼa sha sha˗ehˍ te ve yoˬ. w19.01 20-21 ¶3-4

Yeˍsuˆ maˇ dawˇ maˇ gaˇ ve awˬ hkʼaw lo Yaˬhoˉvaˬ yawˇ htaꞈ chiˇ mvuh piˇ ve yoˬ. Yaˬhoˉvaˬ Yeˍsuˆ htaꞈ mvuhˇ naw ma hkʼoˆ lo teꞈ tu la piˇ htaˇ, yawˇ htaꞈ “hkʼa peu˗eˬ awˬ hkʼoˆ htaꞈ yuˬ uiˍ yuˬ mvuh piˇ” ve yoˬ. Yaˬhoˉvaˬ Yeˍsuˆ htaꞈ maˇ suh puiˉ ve a shaꞈ piˇ ve yoˬ. A shaꞈ chi hkʼe ve teˇ gʼaˇ˗ehˬ kaꞈ maˇ gʼa jaw! (Hpi 2:9; 1 Tiˆ 6:16) Yeˍsuˆ ka tiꞈ yeˬ ve hkʼaw kanˉ te ve pa taw, Yaˬhoˉvaˬ awˬ bon naꞈ piˇ leh daꞈ jaˇ ve laꞈ shawnˍ piˇ ve yoˬ! Ngaˬ hui Saˍtanˍ ve miˬ guiˬ a yeˇ maˇ yuˬ laˇ tcuh gaˇ leh Yaˬhoˉvaˬ ngaˬ hui htaꞈ a yeˇ yuˬ laˇ tcuh gaˇ ve kʼo, hkʼaˬ hkʼe gʼa te cawˇ ve le? Yaˬhoˉvaˬ lehˬ yawˇ htaꞈ ka tiꞈ yeˬ ve chaw teˇ hpaˍ htaꞈ hkʼaˬ htaˆ kaꞈ a yeˇ yuˬ leh, yawˇ hui htaꞈ maˇ dawˇ maˇ gaˇ ve awˬ hkʼaw lo awˬ bon naꞈ piˇ tuˬ yoˬ. Awˬ tehˬ ve chi htaꞈ ngaˬ hui hkʼaˬ htaˆ kaꞈ tawnˇ taˍ cawˇ ve yoˬ. Awˬ gʼuˇ suhˍ hpawˇ Yaˬhoˉvaˬ ngaˬ hui htaꞈ awˬ bon hkʼaˬ hkʼe taw naꞈ laˇ tuˬ, ngaˬ hui ca dawˇ maˇ gʼa! Yaꞈ hkʼaˇ, haiˬ ve miˬ guiˬ chi geh laˬ ve shoꞈ shaꞈ ve awˬ lawn htaꞈ ngaˬ hui gʼa yeunˇ hkanˍ chehˇ ve teˇ yanˇ htaˇ, miˬ guiˬ chi mehˉ kʼai chehˇ ve tehꞈ ngaˬ hui gʼa tawnˇ taˍ cawˇ ve yoˬ. (1 Yoˇ 2:17) Ngaˬ hui ve haꞈ pehnˇ ve Awˬ pa Yaˬhoˉvaˬ lehˬ “maˇ hteˇ maˇ cawˇ ve Gʼuiˬ sha hpehꞈ ve maˇ heˆ.”—Heˍ 6:10. w18.07 8 ¶17-18

Yeˍsuˆ tcuh yaˇ hui geh awˍ caˇ ve awˬ leh meuˇ teˇ haˉ htaˇ, yawˇ hui teˇ moˍ tiˉ hpehꞈ gʼa tuˬ laˇ tehꞈ yawˇ dawˇ haˍ ve yoˬ. Yeˍsuˆ yawˇ hui geh bon lawˬ htaˇ yawˇ kʼoˆ ve, Awˬ pa leh yawˇ teˇ gʼaˇ tiˉ hpehꞈ ve hkʼe, yawˇ yawˇ hui htaꞈ htawˇ teˇ moˍ tiˉ hpehꞈ tcuh gaˇ ve yoˬ. Yeˍsuˆ ve awˬ laꞈ gʼawˇ teˇ moˍ tiˉ hpehꞈ ve kʼo, Yaˬhoˉvaˬ lehˬ Yeˍsuˆ htaꞈ miˬ guiˬ hkʼoˆ peu laˇ ve tehꞈ chaw yaˇ hkʼa peu˗eˬ htaꞈ hpeuꞈ maw piˇ ve yoˬ. Yawˇ hui haꞈ daꞈ ve kʼo, awˬ tehˬ awˬ na Yeˍsuˆ ve awˬ laꞈ gʼawˇ hpehꞈ ve tehꞈ shu shiˍ gʼa leh, haꞈ pehnˇ ve chi yawˇ hui teˇ moˍ tiˉ hpehꞈ gʼa tuˬ ga piˇ ve yoˬ. (Yoˇ 13:34, 35) Awˬ laꞈ gʼawˇ teˇ moˍ tiˉ hkʼa dehꞈ maˇ hpehꞈ ve yawˇ mawˬ ve pa taw, oˇ ve teˇ haˉ hkʼaw yawˇ hui teˇ moˍ tiˉ hpehꞈ tuˬ ve htaꞈ Yeˍsuˆ laiˉ pawˆ kʼoˆ ve yoˬ. Tawˇ pa haˉ te kʼo, “yawˇ hui awˬ hkʼaw lo hkʼaˬ ve teˇ gʼaˇ shu aꞈ kehˉ gʼa uiˍ tuˬ le” tehꞈ yawˇ hui gʼawˬ daꞈ ve yoˬ. Chi awˬ gʼuˇ suhˍ htaˇ kaꞈ yawˇ hui chi hkʼe te jaw ve yoˬ. (Luˉ 22:24-27; Mk 9:33, 34) Yaˍkoˆ leh Yoˇhanˬ Yeˍsuˆ awˬ paˇ lo mui tuˬ ve leh mvuhˇ naw ma hkʼoˆ ve mvuhˇ miˬ hkʼaw a yeˇ uiˍ ve aˉ yaˇ gʼa tuˬ teˇ pawˆ kʼawꞈ lawˬ ve yoˬ.—Mk 10:35-40. w18.06 9 ¶1-2

Nawˬ ve awˬ ca htaꞈ ka tiꞈ yeˬ leh yaˇ teˇ hpaˍ htaꞈ nyi haꞈ shaˉ sheˍ. Yaˬhoˉvaˬ lehˬ awˬ ca htaꞈ haꞈ daꞈ leh co co teˇ geh chehˇ tcuh gaˇ ve yoˬ. (Maꞈ 19:3-6) Haˉ chawˇ haˉ paˆ te ve lehˬ awˬ ca htaꞈ te yaꞈ jaˇ ve teˇ ceuˬ hpehꞈ ve yoˬ. Chi htaꞈ pa taw, awˬ liˇ tawˇ hkawˇ 7 maˬ hkʼaw kʼoˆ ve haˉ chawˇ haˉ paˆ maˇ gʼa te. (Bon 5:18) Chi ‘Gʼuiˬ sha htaꞈ te yaꞈ jaˇ’ leh awˬ ca htaꞈ naˬ jaˇ tuˬ te piˇ ve yoˬ. (Awˬ 39:7-9) Haˉ chawˇ haˉ paˆ te ve kʼo, laiˉ chi hkʼawꞈ gaˬ˗oˬ ve htawˇ nyi ma naˬ chehˇ sheˍ ve yoˬ. Yaˬhoˉvaˬ yaˇ teˇ hpaˍ htaꞈ ha lehˬ leh kawˆ tuˬ maˇ cawˬ tcuh gaˇ ve tehꞈ awˬ liˇ tawˇ hkawˇ chi hpeuꞈ maw laˇ ve yoˬ. Yaˬhoˉvaˬ lehˬ awˬ pa awˬ e yaˇ teˇ hpaˍ htaꞈ awˬ suhˍ awˬ shaˍ hpawˇ leh co ha hpawˇ nyi haꞈ shaˉ tcuh ve yoˬ. Yaˬhoˉvaˬ ve awˬ liˇ tawˇ hkawˇ htaꞈ yaˇ haꞈ leh awˬ hpfuhˇ shiˍ tuˬ, awˬ pa awˬ e awˬ yanˇ gʼa yehˇ leh gʼa maˍ piˇ ve yoˬ. (Bon 6:6-9; 7:13) Awˬ pa awˬ e yaˇ htaꞈ mawˇ hkʼe shawˍ leh hkʼaˬ hkʼe te gaˇ kaꞈ te gʼa ve tehꞈ maˇ gʼa dawˇ. Yaˇ lehˬ Yaˬhoˉvaˬ geh gʼa ve awˬ shinˉ awˬ ka hpehꞈ leh hkʼa dehꞈ gʼa nyi haꞈ shaˉ ve yoˬ.—Chiˇ 127:3. w19.02 21 ¶5, 7

Yawˇbaˆ ka tiꞈ yeˬ gʼa tuˬ Gʼuiˬ sha yawˇ htaꞈ awˬ gʼuˇ suhˍ hpawˇ laꞈ shawnˍ peꞈ laˇ tuˬ ve htaꞈ dawˇ nyi taˍ ve yoˬ. Yawˇbaˆ ka tiꞈ yeˬ ve htaꞈ Yaˬhoˉvaˬ a yeˇ yuˬ ve tehꞈ yawˇ yonˍ ve yoˬ. Yawˇbaˆ tuꞈ ve hkanˍ ve laiˉ ceuˬ gʼa hpuˇ ve htawˇ, awˬ leh meuˇ htaˇ Yaˬhoˉvaˬ yawˇ htaꞈ laꞈ shawnˍ peꞈ laˇ tuˬ yoˬ tehꞈ yawˇ yonˍ ve yoˬ. Chi yawˇ ka tiꞈ yeˬ gʼa tuˬ ga piˇ ve yoˬ. Yawˇbaˆ ka tiꞈ yeˬ ve htaꞈ Yaˬhoˉvaˬ nyi hkʼaˇ suh jaˇ leh yawˇ maˇ biˇ ve chaw hpehꞈ sheˍ ve kaꞈ Yaˬhoˉvaˬ awˬ bon maˇ maˇ naꞈ piˇ ve yoˬ! (Yb 42:12-17; Yaˍ 5:11) Daꞈ jaˇ ve laꞈ shawnˍ kaꞈ Yawˇbaˆ htaꞈ law taˍ ve yoˬ. Nawˬ ka tiꞈ yeˬ ve htaꞈ Yaˬhoˉvaˬ laꞈ shawnˍ peꞈ laˇ tuˬ yoˬ tehꞈ dawˇ law˗aw laˇ? Ngaˬ hui ve Gʼuiˬ sha maˇ pa jaw. (Ml 3:6) Ngaˬ hui ka tiꞈ yeˬ ve htaꞈ Gʼuiˬ sha awˬ hpfuhˇ shiˍ ve kʼo, awˬ gʼuˇ suhˍ hpawˇ ve dawˇ law kuiˬ ngaˬ hui ve nyi ma hkʼaw hkʼa tawˍ lehˆ cawˬ ve tawnˇ gʼa ve yoˬ. (1 Hteˇ 5:8, 9) Nawˬ caˉ leh ka tiꞈ yeˬ tuˬ dawˇ teh taˍ sheˍ. Teˇ pawˆ pawˆ kʼo, nawˬ teˇ gʼaˇ tiˉ chehˇ ve tehꞈ dawˇ ve yoˬ. Yaꞈ hkʼaˇ, nawˬ teˇ gʼaˇ tiˉ chehˇ ve maˇ heˆ. Miˬ guiˬ chi hkʼoˆ lo laiˉ lanˬ gʼaˇ ka tiꞈ yeˬ ve hkʼaw nawˬ chehˇ taˍ ve yoˬ. Oˇ htaˇ teˇ co˗e hawˉ hkʼaˆ yaˇ miˇ yawˇ hui suh ve htaꞈ gʼa hpuˇ ve htawˇ, ka tiꞈ yeˬ gʼa ve hkʼaw nawˬ kaꞈ teˇ gʼaˇ hpehꞈ ve yoˬ.—Heˍ 11:36-38; 12:1. w19.02 7 ¶15-16

Yeˍsuˆ suh ve dawˇ nawˇ tuˬ hpawnˬ daꞈ ve gaˬ la paˇ neˇ htaˇ, ngaˬ hui a shu yawˇ awˬ to htaꞈ na nyi cawˇ ve, ‘ngaˬ hkʼaˬ hkʼe te Yeˍsuˆ htaꞈ henˇ yuˬ leh awˬ nu ve chaw htaꞈ haꞈ maˇ la gʼa tuˬ le? Ngaˬ loˍ ve aꞈ kehˉ awˬ viˉ awˬ nyi loˍ ve htaꞈ dawˇ nyi˗aw laˇ? Yawˇ hui piˇ gʼa ve aꞈ kehˉ ngaˬ awˬ viˉ awˬ nyi geh dawˇ law ve laˇ? Maˇ heˆ leh yawˇ hui piˇ maˇ gʼa ve htaꞈ dawˇ nyi˗aw laˇ?’ Ngaˬ hui Yeˍsuˆ htaꞈ henˇ yuˬ leh “teˇ gʼaˇ leh teˇ gʼaˇ ha kʼaˉ daꞈ leh haꞈ daꞈ˗oꞈ.” Yeˍsuˆ suh ve dawˇ nawˇ tuˬ hpawnˬ daꞈ ve te tcuh laˇ ve cawˬ tuˬ ve chi maˇ maw˗o. Tuꞈ jaˇ hkanˍ jaˇ ve awˬ yanˇ Yeˍsuˆ kʼawꞈ yaꞈ “la htaˇ” miˬ guiˬ hkʼoˆ “[Gʼuiˬ sha] leuˆ yuˬ taˍ ve chaw hui” htaꞈ mvuhˇ naw ma hkʼoˆ Yeˍsuˆ shiˍ taˆ˗e tuˬ yoˬ. Oˇ ve teˇ yanˇ, Yeˍsuˆ suh ve dawˇ nawˇ tuˬ hpawnˬ daꞈ ve maˇ kʼawꞈ cawˬ˗o. (1 Kawˇ 11:26; Maꞈ 24:31) Yeˍsuˆ suh ve dawˇ nawˇ tuˬ hpawnˬ daꞈ ve hkʼa sha sha˗ehˍ te ve lehˬ nyi ma nuˇ nehˬ ve, haꞈ hanˉ ve, haꞈ pehnˇ uiˍ jaˇ ve chi teˇ hpaˍ lehˬ chaw teˇ gʼaˇ hpeuꞈ maw laˇ jaw ve yoˬ. Hpawnˬ daꞈ ve chi maˇ cawˬ˗o ve htawˇ, Yaˬhoˉvaˬ ve chaw awˬ lawn chi htaꞈ tawnˇ gʼa sheˍ ve yoˬ. w19.01 13 ¶17-19

Awˬ tehˬ tehˬ kʼo, ngaˬ hui hkʼaˬ hkʼe ve chaw hpehꞈ ve a yeˇ uiˍ jaˇ. Chi ve ngaˬ hui ve awˬ to htaꞈ tehˆ daꞈ gʼa ve yoˬ. Ngaˬ hui awˬ to chehˇ sha tuˬ, awˬ bon cawˬ ve caˇ tuˬ htaꞈ caˇ leh hkʼaˬ htaˆ kaꞈ awˬ gʼaˇ gʼa caw ve yoˬ. Chi hkʼa shuˍ shuˍ, ngaˬ hui ve co ha hpawˇ daꞈ tuˬ, co ha hpawˇ ve caˇ tuˬ htaꞈ caˇ leh Yaˬhoˉvaˬ htaꞈ yonˍ ve tehꞈ hkʼaˬ htaˆ kaꞈ hpeuꞈ maw piˇ cawˇ ve yoˬ. Chi kʼoˆ gaˇ ve lehˬ ngaˬ hui henˇ taˍ ve htaꞈ yuˬ yehˇ leh ngaˬ hui ve yonˍ hkʼaˇ shu htaꞈ gʼa kʼoˆ piˇ ve yoˬ. (Roˉ 10:8-10; Yaˍ 2:26) Chi hkʼoˆ kaꞈ, nyi˗a kʼo ngaˬ hui chehˇ sha ve htaꞈ shuˍ ve htawˇ, awˬ to hkʼaw a naˍ cawˬ gʼa ve yoˬ. Chi hkʼa shuˍ shuˍ, ngaˬ hui hkʼaˬ htaˆ kaꞈ Gʼuiˬ sha ve kanˉ te chehˇ leh ngaˬ hui ve yonˍ hkʼaˇ yeˬ˗oˬ tehꞈ dawˇ ve htawˇ, nyi ma hkʼaw maˇ daꞈ ve dawˇ hkʼaˇ uiˍ la gʼa ve yoˬ. (1 Kawˇ 10:12; Yaˍ 1:14, 15) Saˍtanˍ yawˇ ve dawˇ hkʼaˇ ngaˬ hui ve nyi ma hkʼaw cawˬ tcuh gaˇ ve yoˬ. w19.01 14-15 ¶4-5

Ngaˬ hui a shu yawˇ awˬ to htaꞈ na nyi cawˇ ve, ‘awˬ paˇ awˬ kui chehˇ ve Saˍmaˍriˆ chaw hkʼe ngaˬ te˗aw laˇ? (Luˉ 10:30-35) Shu tuꞈ ve hkanˍ ve gʼa hpuˇ htaˇ, ngaˬ yawˇ hui htaꞈ ga piˇ tuˬ aˬ htoꞈ ma te gʼa ve le? Tawˇ pa haˉ te kʼo, Hkriꞈ yaˇ awˬ moˍ hkʼaw ngaˬ chaw mawˇ htaꞈ ga piˇ ve, mehˇ chawˇ ma, maˇ heˆ leh awˬ pa awˬ e Yaˬhoˉvaˬ htaꞈ oˉ kʼoˍ maˇ pui ve yawˇ hui ve yaˇ teˇ hpaˍ htaꞈ ga piˇ gʼa˗aw laˇ? Dawˇ maˇ ve a naˍ cawˬ ve chaw htaꞈ ngaˬ awˬ gʼaˇ piˇ gʼa˗aw laˇ?’ (1 Hteˇ 5:14; Yaˍ 1:27) Ngaˬ hui ha kʼaˉ ve cawˬ htaˇ aˬ htoꞈ ma te ha lehˬ ve le? Ngaˬ hui shu htaꞈ ha kʼaˉ piˇ htaˇ, ngaˬ hui kaꞈ yawˇ hui htaꞈ piˇ chehˇ ve leh Yeˍsuˆ kʼoˆ ve hkʼe piˇ ve lehˬ gʼa ve aꞈ kehˉ awˬ bon uiˍ ve yoˬ. Chi hkʼoˆ kaꞈ, Yaˬhoˉvaˬ ha lehˬ tuˬ te piˇ chehˇ ve tehꞈ ngaˬ hui shiˍ ve yoˬ. (Tcuh 20:35; Heˍ 13:16) Ha kʼaˉ puiˉ ve chaw htaꞈ kʼoˆ htaˇ, “[Yaˬhoˉvaˬ] yawˇ hui htaꞈ haꞈ shaˉ piˇ leh mvuhˇ miˬ awˬ hkʼaw lo ha lehˬ chehˇ tcuh tuˬ yoˬ” tehꞈ Jawˇmawˇ Daˍviˆ kʼoˆ ve yoˬ. (Chiˇ 41:1, 2) Ngaˬ hui shu htaꞈ ha kʼaˉ leh haꞈ ve kʼo, Yaˬhoˉvaˬ ha kʼaˉ laˇ ve htaꞈ ngaˬ hui gʼa leh co co taiˍ taiˍ ve a shaꞈ gʼa tuˬ yoˬ.—Yaˍ 2:13. w18.09 18 ¶11-12

Awˬ viˉ awˬ nyi ka tiꞈ yeˬ ve yaˇ miˇ teˇ gʼaˇ Yoˬshiˬkoꞈ yawˇ ve maˇ daꞈ ve awˬ lawn htaꞈ gʼa shiˍ ve yoˬ. Hkʼaˬ nyiˇ ha pa maˇ gʼa chehˇ˗o tehꞈ saˍ laꞈ gʼonˍ kʼoˆ piˇ ve yoˬ. Yawˇ hkʼaˬ hkʼe te ve le? Yaꞈ nyi ve Liꞈ hpu awˬ tawn Yoˬshiˬkoꞈ dawˇ cawˇ jaˇ. Peuˬ hkʼawꞈ nawˉ yawˇ nyi ma gawˬ lehˍ ve hkʼaw saˍ laꞈ gʼonˍ htaꞈ kʼoˆ piˇ ve, Yaˬhoˉvaˬ ngaˬ ve laꞈ sheh htaꞈ vawˆ taˍ laˇ ve pa taw kawˆ tuˬ maˇ cawˬ. Yawˇ Yaˬhoˉvaˬ htaꞈ gʼaˇ hkʼa dehꞈ va tuˬ, Liꞈ hpu awˬ tawn chi ga piˇ ve yoˬ. Beˬ ve lawˇ ve gʼa hpuˇ htaˇ, ngaˬ hui nyi ma gawˬ lehˍ cawˬ tuˬ kaꞈ ga laˇ ve yoˬ. Yuˇdaꞈ chaw Baˍbuˍlonˍ mvuhˇ miˬ lo shu ceˬ te htaˇ, yawˇ hui htaꞈ awˬ gʼaˇ piˇ tuˬ Yaˬhoˉvaˬ Iˉsaˍyaˆ htaꞈ awˉ lawˉ htaˇ kaꞈ awˬ lawn chi bvuhꞈ tcuh taˍ ve yoˬ. Yaꞈ hkʼaˇ, Yaˬhoˉvaˬ liꞈ chi htaꞈ haꞈ shaˉ tcuh taˍ ve lehˬ Yuˇdaꞈ chaw awˬ pon ceh tiˉ maˇ heˆ. Chi beuꞈ teˇ co˗e hkʼa gaˬ yawˇ ve chaw kaꞈ awˬ bon gʼa sheˍ ve yoˬ. (Isy 40:8; Roˉ 15:4) Ngaˬ hui “haˍ jaˇ ve awˬ yanˇ” hkʼaw chehˇ taˍ ve pa taw yoˬ. Iˉsaˍyaˆ liꞈ hkʼaw bvuhꞈ taˍ ve hkʼe ngaˬ hui awˬ gʼaˇ gʼa tuˬ loˍ ve yoˬ.—2 Tiˆ 3:1. w19.01 2 ¶1-2

Awˬ hpawˇ awˬ miˇ ma hpaˆ daꞈ chehˇ ve kʼo, yawˇ hui heuˆ daꞈ chehˇ leh awˬ lawn teˇ hpaˍ cawˬ sheˍ ve yoˬ. Tcuh yaˇ Pawˇluꞈ awˬ hpawˇ awˬ miˇ ma teˇ geh chehˇ tuˬ teˇ ceuˬ kʼawꞈ kʼoˆ sheˍ ve, ve, “Hkriꞈ yaˇ maˇ hpehꞈ ve awˬ hpawˇ lehˬ awˬ miˇ ma htaꞈ pa taw daꞈ la kehˬ la ve yoˬ. Hkriꞈ yaˇ maˇ hpehꞈ ve awˬ miˇ ma htawˇ, awˬ hpawˇ htaꞈ pa taw daꞈ la kehˬ la ve yoˬ. Chi hkʼe maˇ heˆ kʼo, nawˬ hui ve awˬ yaˇ awˬ duˬ lehˬ maˇ daꞈ maˇ kehˬ ve yoˬ. Yaꞈ hkʼaˇ, chi beuꞈ lehˬ yawˇ hui daꞈ kehˬ peuˬ.” (1 Kawˇ 7:14) A shaꞈ teꞈ hkʼaˇ haˍ jaˇ ve htawˇ Hkriꞈ yaˇ laiˉ gʼaˇ yawˇ hui ve awˬ ca Yaˬhoˉvaˬ htaꞈ oˉ kʼoˍ maˇ pui ve chaw geh chehˇ tuˬ dawˇ cheˆ ve yoˬ. Yawˇ hui chi hkʼe te ve pa taw, yawˇ hui ve awˬ ca Yaˬhoˉvaˬ ve Shaˉhkiˆhkanˍ ve chaw hpehꞈ la leh ha lehˬ ve yoˬ. (1 Kawˇ 7:16; 1 Peˍ 3:1, 2) Chi beuꞈ teˇ co˗e miˬ guiˬ chi hkʼoˆ lo Hkriꞈ yaˇ awˬ moˍ hkʼaw laiˉ ca ha lehˬ ve yoˬ. Nawˬ ve Hkriꞈ yaˇ awˬ moˍ hkʼaw nawˬ kaꞈ mawˬ ve yoˬ hehˉ. Ka tiꞈ yeˬ ve awˬ hpawˇ yawˇ hui ve awˬ miˇ ma htaꞈ haꞈ leh haꞈ lu diˬ ve awˬ miˇ ma yawˇ hui ve awˬ hpawˇ htaꞈ yawˆ yan ve yoˬ. Yawˇ hui hkʼa peu˗eˬ heuˆ daꞈ ve htaꞈ yawˆ yan keunˍ ve tehꞈ hpeuꞈ mawˬ laˇ ve yoˬ.—Heˍ 13:4. w18.12 14 ¶18-19

Eˍdenˍ lehˬ “ha lehˬ dawˇ sha ve” htaꞈ kʼoˆ gaˇ ve yoˬ. Hko oˇ ve lehˬ awˬ tehˬ awˬ na ha lehˬ tuˬ te laˇ ve yoˬ. Daꞈ jaˇ ve, caˇ tuˬ hkʼa biˇ cawˬ ve, leh chaw yaˇ leh to nuˇ to shaˆ ha lehˬ ve hkʼaw teˇ geh chehˇ ve yoˬ. (Awˬ 1:29-31) Heˍbrehˇ ve tawˇ hkawˇ kʼo “hko” tehꞈ kʼoˆ ve, Heˍlaˍsaˆ ve tawˇ hkawˇ kʼo pa˗ra˗dai˗saw (pa·raʹdei·sos) tehꞈ kʼoˆ ve yoˬ. Liꞈ kʼoˆ teˇ kʼoˆ hkʼaw kʼoˆ ve, Heˍlaˍsaˆ chaw tawˇ chi htaꞈ gʼa kaˇ htaˇ daꞈ jaˇ kʼehˬ jaˇ ve hko dawˇ mawˬ ve yoˬ. Hko oˇ ve hkʼaw kawˆ tuˬ maˇ cawˬ. Suhˆ cehˬ iˉ shiˍ laiˉ ceuˬ nawꞈ leh iˉ kaˆ lawˬ kʼaˉ kehˬ daꞈ jaˇ leh mvuhꞈ nawˉ lehˍ cawˬ leh hkuiˉ zuhˬ leh yawˬ ehˉ kʼaˆ caˇ˗e gʼa ve yoˬ. (Awˬ 2:15, 16) Yaˬhoˉvaˬ lehˬ Aˍdanˍ leh Eˇvaꞈ htaꞈ hko oˇ hkʼe ve hkʼaw chehˇ tcuh leh oˇ ve lehˬ Paˍraˍdiˇsuˆ hpehꞈ ve yoˬ. Yaꞈ hkʼaˇ, yawˇ hui Yaˬhoˉvaˬ hkawˇ maˇ na yuˬ ve pa taw, yawˇ hui leh yawˇ hui ve yaˇ teˇ hpaˍ Paˍraˍdiˇsuˆ hkʼaw chehˇ tuˬ a hkaw˗anˬ maˇ cawˬ. (Awˬ 3:23, 24) Paˍraˍdiˇsuˆ oˇ ve hkʼaw chaw yaˇ maˇ kʼawꞈ gʼa chehˇ ve htawˇ, nyi a kʼo hko oˇ ve Noˉaꞈ iˉ kaˆ htonˍ htaˇ hkʼa gaˬ cawˬ sheˍ ve yoˬ. w18.12 3-4 ¶3-5

Tawˇ pa haˉ chi htaꞈ dawˇ nyi sheˍ. Yaˇ uiˍ la leh awˬ pa awˬ e geh maˇ chehˇ˗oˬ htaˇ, laiˉ ceuˬ yawˇ hkʼaˇ yawˇ gʼa dawˇ cheˆ ve yoˬ. Awˬ pa awˬ e maˍ ve hkʼe yawˇ gʼaꞈ te ve kʼo, yawˇ cawˇ ve hkʼaw dawˇ cheˆ gʼa leh shoꞈ shaꞈ ve awˬ lawn htaꞈ jaw kʼai gʼa leh gʼa dawˇ haˍ jaˇ tuˬ ve maˇ heˆ. Daꞈ ve awˬ pa awˬ e hkʼa shuˍ, Yaˬhoˉvaˬ kaꞈ yawˇ ve yaˇ hui htaꞈ ha lehˬ tcuh gaˇ ve yoˬ. (Isy 48:18) Hkʼe te leh, daꞈ ve te hkʼaˇ dawˇ hkʼaˇ leh shu htaꞈ hkʼaˬ hkʼe te piˇ cawˇ ve ngaˬ hui htaꞈ maˍ laˇ ve yoˬ. Yawˇ dawˇ ve hkʼe ngaˬ hui htaꞈ kaꞈ dawˇ tcuh gaˇ leh te tcuh gaˇ ve yoˬ. Yaꞈ hkʼaˇ, yawˇ ngaˬ hui htaꞈ maˇ nyiˉ laˇ. Ngaˬ hui hkʼaˇ ngaˬ hui hkʼa dehꞈ dawˇ cheˆ gʼa tuˬ leh ngaˬ hui cuˇ yiˍ cawˬ maˇ la tuˬ ga laˇ ve yoˬ. (Chiˇ 92:5; Tawˇ 2:1-5; Isy 55:9) Ngaˬ hui dawˇ cheˆ puiˉ ve chaw hpehꞈ leh ha lehˬ tuˬ yoˬ. (Chiˇ 1:2, 3) Ngaˬ hui Yaˬhoˉvaˬ dawˇ ve hkʼe dawˇ ve kʼo awˬ bon gʼa jaˇ! w18.11 22-23 ¶7-8

Awˬ tehˬ ve hkʼaw caˉ leh toˇ kʼai gʼa tuˬ, Yaˬhoˉvaˬ htaꞈ oˉ kʼoˍ maˇ pui ve chaw ngaˬ hui htaꞈ heuˆ la kuiˬ maˇ cawˬ tcuh cawˇ. Ngaˬ hui awˬ tehˬ ve htaꞈ henˇ la htaˇ, yehˬ kʼa hkʼaw ve chaw leh awˬ chawˇ Shaˉhkiˆhkanˍ ve chaw maˇ hpehꞈ ve kʼo, yawˇ hui geh meuˆ daꞈ ve kaꞈ pa kʼai ve yoˬ. Teˇ hpaˍ kʼo, ngaˬ hui ve yonˍ hkʼaˇ htaꞈ yawˆ yan ve yoˬ. Yaꞈ hkʼaˇ, awˬ nu ve chaw kʼo tawˍ laˇ ve yoˬ. Yehˬ kʼa hkʼaw ve chaw, kanˉ teˇ geh te ve chaw, liꞈ henˇ yehˬ lo ve awˬ chawˇ yawˇ hui ve pawehˇ hkʼaw ngaˬ hui htaꞈ kʼai tcuh gaˇ ve yoˬ hehˉ. Chaw liˇ vaˇ liˇ leh Yaˬhoˉvaˬ maˇ dawˇ cawˇ ve te hkʼaˇ dawˇ hkʼaˇ htaꞈ te tuˬ shu nyiˉ laˇ htaˇ, ngaˬ hui tawˍ daꞈ gʼaˇ tuˬ aˬ htoꞈ ma ga laˇ gʼa ve le? Aˬ htoꞈ ma te Yaˬhoˉvaˬ pawehˇ chi teˇ hpaˍ htaꞈ maˇ dawˇ cawˇ ve ngaˬ hui maˇ leunˇ cawˇ. Pawehˇ chi teˇ hpaˍ hkʼaˬ kaˬ lo laˬ ve ngaˬ hui tawnˇ gʼa tuˬ, Gʼuiˬ sha ve kanˉ hkʼaˇ liꞈ kʼoˆ hkʼaw hpfuhˆ nyi gʼa ve yoˬ. Aˬ htoꞈ ma te pawehˇ chi te ve Liꞈ hpu hkʼaw ve awˬ liˇ awˬ hkʼaˇ htaꞈ maˇ hawˍ daꞈ ve le tehꞈ ngaˬ hui hkʼa dehꞈ dawˇ nyi ve kʼo, Gʼuiˬ sha “nyi ma cawˇ ve awˬ ceuˬ htaꞈ” te chehˇ ve tehꞈ ngaˬ hui yonˍ gʼa ve yoˬ. (Efs 5:10) Ngaˬ hui Yaˬhoˉvaˬ leh Liꞈ hpu htaꞈ yonˍ ve kʼo, shu hkʼaˬ hkʼe dawˇ ve kaꞈ ngaˬ hui maˇ kawˆ.—Tawˇ 29:25. w18.11 12 ¶10, 12

Ngaˬ hui a shaꞈ teꞈ hkʼaˇ laꞈ haˉ pa ve kʼo, dawˇ haˍ leh shoꞈ shaꞈ ve awˬ lawn htaꞈ tiˉ dawˇ nyi ve yoˬ hehˉ. Yoˇsehꞈ chi hkʼe dawˇ ve kaꞈ hpehꞈ ve yoˬ. Yaꞈ hkʼaˇ, awˬ lawn teˇ hpaˍ htaꞈ gʼa hpuˇ htaˇ, yawˇ te gʼa ve hkʼe daꞈ ve htaꞈ te tuˬ leuˆ yuˬ ve yoˬ. Pawˇtiˆhpaˍ awˬ pon yawˇ kanˉ te hkeuꞈ ve hkʼa shuˍ, yawˇ htawnˍ hkʼaw chehˇ htaˇ kanˉ te hkeuꞈ leh htawnˍ awˬ hoˉ te tcuh ve hkʼe yawˇ te ve yoˬ. (Awˬ 39:21, 22) Ngaˬ hui gʼa hpuˇ ve awˬ ceuˬ Yoˇsehꞈ hkʼe, pa leh daꞈ la tuˬ teˇ pawˆ pawˆ kʼo ngaˬ hui te maˇ gʼa. Yaꞈ hkʼaˇ, ngaˬ hui yeunˇ hkanˍ leh te gʼa ve hkʼe te ve kʼo, Yaˬhoˉvaˬ awˬ bon naꞈ laˇ tuˬ yoˬ. (Chiˇ 37:5) Ngaˬ hui htawˇ dawˇ nawˬ dawˇ cawˬ leh dawˇ haˍ ve htawˇ, dawˇ law kuiˬ cawˬ sheˍ. (2 Kawˇ 4:8) Ngaˬ hui Yaˬhoˉvaˬ ve kanˉ te ve htaꞈ hkʼaˬ htaˆ kaꞈ dawˇ nyi ve kʼo, yawˇ ngaˬ hui geh chehˇ tuˬ yoˬ. w18.10 24-25 ¶11, 13

Nawˬ shiˍ daꞈ leh yawˆ yan ve chaw yawˇ nawˬ ve awˬ meh htaꞈ leunˇ ve kʼo, maˇ heˆ leh nawˬ htaꞈ maˇ tawnˇ gʼa˗oˬ ve kʼo, nawˬ hkʼaˬ hkʼe dawˇ tuˬ le? Nawˬ gʼaˇ nuˇ tuˬ yoˬ hehˉ. Ngaˬ hui teˇ gʼaˇ le le lehˬ shu a yeˇ yuˬ laˇ tcuh gaˇ ve pa taw yoˬ. Yaꞈ hkʼaˇ, yawˇ hui ngaˬ hui ve awˬ meh htaꞈ tawnˇ gʼa tcuh gaˇ ve hkʼe ceh maˇ heˆ. Ngaˬ hui hkʼaˬ hkʼe ve chaw hpehꞈ ve leh hkʼaˬ hkʼe te jaw ve yawˇ htaꞈ shiˍ tcuh gaˇ ve yoˬ. (Heh 11:16; Yb 31:6) Yaꞈ hkʼaˇ, ngaˬ hui shaˍ tiꞈ maˇ te ve kʼo, dawˇ hkʼaˇ chi hkʼe ve maˇ daꞈ ve awˬ ceuˬ hpehꞈ la gʼa ve yoˬ. Saˍtanˍ ve miˬ guiˬ ngaˬ hui awˬ meh bvuhˬ ve leh a yeˇ uiˍ ve chaw tehꞈ shawˍ tcuh gaˇ ve yoˬ. Chi hkʼe hpehꞈ ve kʼo, mvuhˇ naw ma hkʼoˆ chehˇ ve Awˬ pa Yaˬhoˉvaˬ gʼa keunˍ ve hkʼe ngaˬ hui yawˆ yan leh oˉ kʼoˍ pui ve maˇ te piˇ.—Hpeuꞈ 4:11. w18.07 3 ¶1-2

Saˍtanˍ leh yawˇ hpawˇ chehˇ ve neˇ teˇ hpaˍ lehˬ kanˇ paˆ uiˍ ve chaw teˇ hpaˍ “heˍ puiˉ” tuˬ te piˇ ve tehꞈ ngaˬ hui hkʼa dehꞈ shiˍ ve yoˬ. (1 Tiˆ 4:1, 2) Bon awˬ hoˉ teˇ hpaˍ heˍ ve lehˬ luˬ tuˬ te laˇ jaˇ. Aˬ htoꞈ ma pa taw le? Chaw teˇ gʼaˇ heˍ ve tawˇ htaꞈ na leh Gʼuiˬ sha maˇ dawˇ cawˇ ve htaꞈ te ve pa taw, yawˇ co co taiˍ taiˍ a shaꞈ maˇ gʼa. (Hawˇ 4:9) Yeˍsuˆ ve awˬ co˗e htaˇ, bon awˬ hoˉ teˇ hpaˍ chaw yaˇ htaꞈ heˍ ve tehꞈ yawˇ shiˍ ve yoˬ. Yawˇ yawˇ hui htaꞈ haꞈ hanˉ leh kʼoˆ piˇ ve, “liꞈ bvuhꞈ paˍ leh Hpaˍriˍsehˇ chaw heˍ paˍ teˇ hpaˍ˗oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, chaw teˇ gʼaˇ nawˬ hui ve awˬ laꞈ gʼawˇ hpehꞈ la tuˬ, miˬ guiˬ hkʼoˆ leh laˇ tsuhˇ gʼuiˬ hkʼoˆ nawˬ hui teˇ kaˬ peuˬ teˇ kaˬ lo kʼai ve yoˬ. Chaw teˇ gʼaˇ nawˬ hui ve awˬ laꞈ gʼawˇ hpehꞈ la ve teˇ yanˇ, . . . yawˇ htaꞈ [Geˍhenˍnaˍ] ve awˬ yaˇ hpehꞈ piˇ lawˬ ve yoˬ.” Geˍhenˍnaˍ lehˬ co co taiˍ taiˍ te luˬ ve htaꞈ kʼoˆ gaˇ ve yoˬ. (Maꞈ 23:15) Bon awˬ hoˉ teˇ hpaˍ ve awˬ pa lehˬ cawˇ shehˍ ma lonˉ “tiˇ pehˍ shehˍ hpaˇ hpehꞈ ve” tehꞈ Yeˍsuˆ kʼoˆ ve yoˬ.—Yoˇ 8:44. w18.10 4 ¶5-6

Yeˍsuˆ hkʼaˬ hkʼe kʼoˆ gaˇ ve le? Yawˇ kʼawꞈ kʼoˆ ve, “ha lehˬ ve hkʼa biˇ cawˬ piˇ˗oˆ. Awˬ lawn kʼo, mvuhˇ naw ma hkʼoˆ lo nawˬ hui ve laꞈ shawnˍ uiˍ jaˇ ve yoˬ. Nawˬ hui awˬ gʼuˇ suhˍ tawˆ la peuˬ ve Gʼuiˬ sha ve tcuh kaˍ paˍ hui htaꞈ htawˇ shu oˇ hkʼe te fawˉ mehˍ jaw ve yoˬ.” (Maꞈ 5:12) Tcuh yaˇ hui bon maˇ gʼa maˍ tuˬ shu dawˆ piˇ htaˇ, yawˇ hui “jehˬ daꞈ shehˍ hpaˇ awˬ moˍ mehˆ gʼuˇ suhˍ yawˇ hui ha lehˬ ha kʼa tawˆ kʼai ve yoˬ.” Yawˇ hui shu dawˆ piˇ ve htaꞈ pa taw ha lehˬ ve maˇ heˆ. Yaꞈ hkʼaˇ, “awˬ meh oˇ ve htaꞈ pa taw maˇ shawˍ maˇ caˆ te laˇ ve htaꞈ hkanˍ keunˍ ve yoˬ tehꞈ Yeˍsuˆ shawˍ taˍ ve pa taw,” yawˇ hui ha lehˬ ve yoˬ.(Tcuh 5:41) Chi beuꞈ teˇ co˗e Yaˬhoˉvaˬ ve chaw Yeˍsuˆ ve awˬ meh htaꞈ pa taw fawˉ mehˍ ve gʼa hpuˇ ve htawˇ, ha lehˬ ve hkʼaw yeunˇ hkanˍ gʼaˇ ve yoˬ. (Yaˍ 1:2-4) Tcuh yaˇ hui hkʼe ngaˬ hui gʼa tuꞈ gʼa hkanˍ ve pa taw ha lehˬ ve maˇ heˆ. Yaꞈ hkʼaˇ, ngaˬ hui Yaˬhoˉvaˬ geh ka tiꞈ yeˬ ve htaꞈ haꞈ shaˉ ve kʼo, yeunˇ hkanˍ gʼaˇ tuˬ haꞈ hanˉ ve yawˇ peꞈ laˇ tuˬ yoˬ. Ha lehˬ ve Gʼuiˬ sha Yaˬhoˉvaˬ ngaˬ hui htaꞈ nyi hkʼaˇ suh htaˇ, ngaˬ hui fawˉ mehˍ ve gʼa hpuˇ ve htawˇ, yehˬ kʼa hkʼaw ve chaw tawˍ laˇ ve htawˇ, naˬ ve htawˇ, mawˇ˗e ve htawˇ, ngaˬ hui kaꞈ ha lehˬ gʼa ve yoˬ.—1Tiˆ 1:11. w18.09 20 ¶18-20

Ngaˬ hui “haˍ jaˇ ve awˬ yanˇ” hkʼaw teꞈ chehˇ ve pa taw, “kawˆ tuˬ dawˇ haˍ tuˬ” cawˬ ve yoˬ. Chi beuꞈ teˇ co˗e laiˉ gʼaˇ tuꞈ hkanˍ jaˇ ve pa taw, yeunˇ hkanˍ maˇ gʼaˇ˗o tehꞈ dawˇ ve yoˬ. (2 Tiˆ 3:1-5) Teˇ hkʼawꞈ le le 800,000 gʼaˇ hpaˆ a shu yawˇ awˬ to htaꞈ tiˇ pehˍ ve yoˬ. Chi kʼoˆ gaˇ ve lehˬ 40 miꞈ niꞈ ehˉ hkʼaw teˇ gʼaˇ suh˗e ve yoˬ. Awˬ viˉ awˬ nyi laiˉ gʼaˇ chi hkʼe dawˇ jaw leh a shu yawˇ awˬ to htaꞈ tiˇ pehˍ ve sheˉ lai jaˇ. Chi beuꞈ teˇ co˗e, awˬ viˉ awˬ nyi dawˇ maˇ ve a naˍ cawˬ leh ngaˬ hui haꞈ pehnˇ ve htaꞈ loˍ ve yoˬ. Shu yawˇ hui htaꞈ kʼoˆ guiˇ gʼuiˬ guiˇ leh fawˉ mehˍ piˇ ve yoˬ. Kanˉ te kuiˬ hkʼaw shu yawˇ hui htaꞈ naˬ taweh te piˇ ve maˇ heˆ leh hkʼaiˉ piˇ ve yoˬ. Laiˉ gʼaˇ kanˉ laiˉ naˍ riˍ gʼa te ve pa taw heuˬ jaˇ, maˇ heˆ kʼo yawˇ ve kanˉ dawˇ maˇ tuˬ te piˇ ve yoˬ. Yehˬ kʼa teˇ hpaˍ hpaˍ shoꞈ shaꞈ ve cawˬ maˇ jaˇ. Yaˬhoˉvaˬ ve kanˉ maˇ te ve chaw htaꞈ heuˆ daꞈ leh yawˇ hui ve awˬ ca deˇ piˇ hkʼeh ve yoˬ hehˉ. Awˬ nu ve awˬ ceuˬ yawˇ hui htaꞈ nyiˉ piˇ leh awˬ gʼaˇ nuˇ jaˇ leh awˬ hpfuhˇ maˇ cawˬ tehꞈ tanˬ dawˇ ve yoˬ hehˉ. w18.09 9 ¶3, 5

Hkriꞈ yaˇ awˬ pa awˬ e Yaˬhoˉvaˬ geh kanˉ teˇ geh te gʼa ve lehˬ yaˇ Yaˬhoˉvaˬ ve kanˉ te tuˬ awˬ hkʼaˇ gu teh piˇ ve yoˬ. Awˬ pa awˬ e laiˉ gʼaˇ chi hkʼe te ve yoˬ. Yawˇ hui chi hkʼe te ve pa taw, yawˇ hui ve yaˇ vuiˇ kuiˬ lo gʼa chehˇ ve htawˇ, Yaˬhoˉvaˬ ve kanˉ awˬ yanˇ hkʼa biˇ te tuˬ dawˇ cheˆ gʼa ve yoˬ. Teˇ hpaˍ hpaˍ miˍshenˍnaˍliˍ te ve, teˇ hpaˍ hpaˍ hto toˇ ve chaw loˍ jaˇ kuiˬ lo gʼuˇ suhˍ peuˍ ve chaw te ve, leh teˇ hpaˍ hpaˍ Beˍteˍlaˆ hkʼaw kanˉ te ve yoˬ. Yaˇ teˇ hpaˍ vuiˇ kuiˬ lo ca chehˇ˗e htaˇ, yawˇ hui yaˇ geh hkʼa dehꞈ maˇ gʼa chehˇ ve yoˬ. Yaꞈ hkʼaˇ, yawˇ hui a shu yawˇ awˬ to maˇ dawˇ nyi leh yaˇ hkʼaˬ kaˬ lo gʼa chehˇ ve htawˇ maˇ kʼoˆ, Yaˬhoˉvaˬ ve kanˉ hkʼa dehꞈ te gʼa tuˬ yaˇ htaꞈ awˬ gʼaˇ gʼa piˇ ve yoˬ. Aˬ htoꞈ ma pa taw le? Yaˇ teˇ hpaˍ a shaꞈ teꞈ chehˇ kuiˬ hkʼaw Yaˬhoˉvaˬ htaꞈ awˉ lawˉ teh ve yawˇ hui gʼa mawˬ ve pa taw ha lehˬ jaˇ. Haˍnaˆ lehˬ Saˍmo˗eˍlaˆ Yaˬhoˉvaˬ htaꞈ “chiˇ aꞈ piˇ ve” yoˬ tehꞈ yawˇ kʼoˆ ve yoˬ. Awˬ pa awˬ e laiˉ gʼaˇ kaꞈ Haˍnaˆ hkʼa shuˍ dawˇ ve yoˬ hehˉ. Yaˬhoˉvaˬ geh kanˉ teˇ geh gʼa te ve awˬ hkʼaˇ chi ve lehˬ a yeˇ uiˍ jaˇ tehꞈ yawˇ hui dawˇ ve yoˬ.—1 Saˍ 1:28. w18.08 22 ¶4

Chi hpehꞈ kʼai maˇ gʼa taˬ tehꞈ Yeˍsuˆ maˇ gʼa kʼoˆ. Yeˍsuˆ kʼawꞈ kʼoˆ ve, “nawˬ hui haˍ ve gʼawˇ ve chaw hui awˬ bon uiˍ ve yoˬ. Awˬ lawn kʼo, Gʼuiˬ sha ve mvuhˇ miˬ lehˬ nawˬ hui ve mvuhˇ miˬ hpehꞈ ve yoˬ” (Luˉ 6:20) Yaꞈ hkʼaˇ, haˍ ve gʼawˇ ve chaw teˇ gʼaˇ le le Yeˍsuˆ ve tawˇ hkawˇ na yuˬ leh awˬ bon gʼa ve tehꞈ kʼoˆ gaˇ ve maˇ heˆ. Haˍ ve gʼawˇ ve chaw laiˉ gʼaˇ Yeˍsuˆ awˬ hkʼaˇ suh maˇ gʼaꞈ yuˬ. Awˬ tehˬ ve lehˬ chaw teˇ gʼaˇ Yaˬhoˉvaˬ geh meuˆ daꞈ maˇ meuˆ daꞈ ve htaꞈ shiˍ tuˬ, ngaˬ hui yawˇ hui cawˬ ve hpu shi mawˇ jeˬ htaꞈ nyi leh suhˉ jehˬ cheˆ maˇ gʼa. Yaˬhoˉvaˬ ve awˬ moˍ hkʼaw awˬ viˉ awˬ nyi hawˉ hkʼaˆ yaˇ miˇ laiˉ gʼaˇ paw sha ve leh awˬ nu ve chaw teˇ hpaˍ kʼo haˍ gʼawˇ ve yoˬ. Yaꞈ hkʼaˇ, yawˇ hui Yaˬhoˉvaˬ htaꞈ haꞈ leh yawˇ ve kanˉ nyi ma awˬ tawˬ hkʼa gaˬ te ve yoˬ. Liꞈ hpu hkʼaw paw sha ve chaw htaꞈ kʼoˆ piˇ ve, “luˬ puiˉ sheˆ puiˉ ve mawˇ jeˬ teˇ hpaˍ htaꞈ maˇ gʼa dawˇ law tuˬ, yawˇ hui htaꞈ tawˇ piˇ˗oˆ.” (1 Tiˆ 6:17-19) Chi hkʼoˆ kaꞈ, Liꞈ hpu hkʼaw Yaˬhoˉvaˬ ve kanˉ te ve paw sha ve leh haˍ ve gʼawˇ ve chaw awˬ pon hpu htaꞈ haꞈ ve kawˆ tuˬ cawˬ ve tehꞈ shaˍ tiꞈ piˇ laˇ ve yoˬ. (1 Tiˆ 6:9, 10) Ngaˬ hui ve awˬ viˉ awˬ nyi htaꞈ Yaˬhoˉvaˬ nyi ve hkʼe nyi ve kʼo, yawˇ hui cawˬ ve awˬ ceuˬ leh maˇ cawˬ ve awˬ ceuˬ htaꞈ ngaˬ hui suhˉ maˇ jehˬ. w18.08 12-13 ¶11-12

Ngaˬ hui Yaˬhoˉvaˬ ve chaw hpehꞈ ve lehˬ ngaˬ hui awˬ pon awˬ hpfuhˇ hkʼaˆ jaˇ ve tehꞈ Yaˬhoˉvaˬ htaꞈ shiˍ tcuh gaˇ ve yoˬ. Ngaˬ hui ve awˬ to yawˇ htaꞈ chiˇ aꞈ piˇ htaˇ, leuˆ yuˬ ve chi daꞈ jaˇ ve tehꞈ ngaˬ hui shiˍ ve yoˬ. Yaˬhoˉvaˬ maˇ dawˇ cawˇ ve awˬ ceuˬ hkʼa peu˗eˬ htaꞈ ngaˬ hui maˇ gʼa te tuˬ dawˇ teh taˍ ve yoˬ. Ngaˬ hui ve awˬ viˉ awˬ nyi kaꞈ Yaˬhoˉvaˬ ve mawˇ hpehꞈ leh ngaˬ hui yawˇ hui htaꞈ haꞈ leh yawˆ yan ve yoˬ. (Roˉ 12:10) Liꞈ hpu hkʼaw ka tiꞈ te taˍ laˇ ve, “Gʼuiˬ sha lehˬ yawˇ ve chaw teˇ hpaˍ htaꞈ chiˇ baˬ taˍ tuˬ ve maˇ heˆ.” (Chiˇ 94:14) Chi awˬ tehˬ awˬ na yonˍ gʼa ve yoˬ. Aˬ htoꞈ ma gʼa hpuˇ ve htawˇ, Yaˬhoˉvaˬ ngaˬ hui geh chehˇ tuˬ yoˬ. Ngaˬ hui suh˗e ve htawˇ yawˇ ngaˬ hui htaꞈ leunˇ tuˬ ve maˇ heˆ. (Roˉ 8:38, 39) ‘Ngaˬ hui teꞈ ve lehˬ Yaˬhoˉvaˬ awˬ pon teꞈ ve yoˬ. Ngaˬ hui suh ve htawˇ, Yaˬhoˉvaˬ awˬ pon suh ve yoˬ. Hkʼe te leh teꞈ ve maˇ kʼoˆ, suh ve maˇ kʼoˆ, ngaˬ hui lehˬ Yaˬhoˉvaˬ ve mawˇ hpehꞈ ve yoˬ.’ (Roˉ 14:8) Yaˬhoˉvaˬ ve ka tiꞈ yeˬ ve awˬ chawˇ suh peuˬ ve teˇ gʼaˇ le le kʼawꞈ teꞈ tu la piˇ tuˬ kʼoˆ taˍ ve awˬ yanˇ oˇ ve htaꞈ ngaˬ hui law taˍ ve yoˬ. (Maꞈ 22:32) Chi teˇ hkui htawˇ, ngaˬ hui ve Awˬ pa laꞈ shawnˍ laiˉ ceuˬ peꞈ laˇ ve ngaˬ hui ha lehˬ jaˇ. Liꞈ hpu hkʼaw kʼoˆ taˍ ve hkʼa shuˍ, “Gʼuiˬ sha htaꞈ oˉ kʼoˍ pui ve chaw hui gʼa ha lehˬ ve yoˬ. Yawˇ ve chaw hpehꞈ la tuˬ leuˆ yuˬ ve htaꞈ gʼa hkanˍ ve chaw hui htawˇ gʼa ha lehˬ ve yoˬ.”—Chiˇ 33:12. w18.07 26 ¶18-19

Dawˇ cheˆ ve teˇ hpaˍ hpaˍ lehˬ a shu yawˇ hkʼaˇ yawˇ te cawˇ ve tehꞈ chaw teˇ hpaˍ dawˇ ve yoˬ. Tawˇ pa haˉ te kʼo, liꞈ henˇ ve, kanˉ te ve chi teˇ hpaˍ hpehꞈ ve yoˬ. Yawˇ hui ve dawˇ shiˍ puiˉ ve htaꞈ maˇ shoꞈ shaꞈ piˇ ve kʼo, hkʼaˬ hkʼe dawˇ cheˆ kaꞈ gʼa ve tehꞈ dawˇ ve yoˬ. Pawˇluꞈ “ngaˬ te hpehꞈ ve teˇ hpaˍ htaꞈ aˬ htoꞈ ma pa taw shu ve shiˍ puiˉ ve nyi ma tawˍ taˍ laˇ ve le” kʼoˆ taˍ ve htaꞈ yawˇ hui awˉ ve yoˬ. (1 Kawˇ 10:29) Ngaˬ hui a shu yawˇ hkʼaˇ yawˇ leuˆ yuˬ gʼa ve htawˇ, ngaˬ hui dawˇ cheˆ ve heuˆ la kuiˬ cawˬ ve yoˬ tehꞈ tawnˇ taˍ cawˇ ve yoˬ. Hkʼe te leh Pawˇluꞈ yaꞈnyi ve Liꞈ hpu awˬ tawn kʼo maˍ laˇ ve yoˬ. Chi htaꞈ pa taw, ngaˬ hui awˬ lawn teˇ hpaˍ a shu yawˇ hkʼaˇ yawˇ leuˆ yuˬ gʼa ve htawˇ, ngaˬ hui heuˆ gaˇ ve lehˬ a yeˇ uiˍ jaˇ ve maˇ heˆ. w18.04 12 ¶10

Hkriꞈ yaˇ laiˉ gʼaˇ Yaˬhoˉvaˬ htaꞈ oˉ kʼoˍ pui ve tehꞈ kʼoˆ ve htawˇ, Yaˬhoˉvaˬ maˇ dawˇ cawˇ ve awˬ ceuˬ htaꞈ te chehˇ ve yoˬ. (Yuˇ 11) Yawˇ hto toˇ˗e ve leh hpawnˬ daꞈ˗e ve hkʼaˬ htaˆ kaꞈ kʼai ve yoˬ. Yaꞈ hkʼaˇ, awˬ yanˇ teˇ yanˇ htaˇ, pehꞈ ve tzuhˆ ve, lawˇ hpaꞈ uiˍ ve, maˇ heˆ leh maˇ daꞈ ve dawˇ hkʼaˇ yawˇ htaꞈ uˉ peunˍ tcuh ve yoˬ. (1 Yoˇ 2:15-17; 3:15) Dawˇ hkʼaˇ chi hkʼe ve venˇ baˆ te yaꞈ tuˬ sheh kʼai laˇ ve yoˬ. Ngaˬ hui aˬ htoꞈ ma dawˇ leh te ve htaꞈ shu maˇ shiˍ gʼa ve htawˇ, Yaˬhoˉvaˬ shiˍ ve yoˬ. Ngaˬ hui yawˇ hpawˇ lo hkʼa dehꞈ maˇ chehˇ ve kʼo, yawˇ shiˍ gʼa ve yoˬ. (Yrm 17:9, 10) Ngaˬ hui te yaꞈ ve htawˇ, Yaˬhoˉvaˬ ngaˬ hui htaꞈ dawˇ law chehˇ sheˍ. Kawˆ tuˬ cawˬ ve yaꞈ kʼaw htaꞈ ngaˬ hui juˇ kʼai htaˇ, Yaˬhoˉvaˬ ngaˬ hui htaꞈ kʼoˆ laˇ ve, “Ngaˬ htawˇ nawˬ hui geh kʼawꞈ hpfuhˆ kʼawꞈ la tuˬ yoˬ.” Ngaˬ hui ve gʼaˇ nuˇ kuiˬ gʼa tawˍ daꞈ ve tehꞈ Yaˬhoˉvaˬ shiˍ ve yoˬ. Yaꞈ hkʼaˇ, yawˇ ngaˬ hui htaꞈ caˉ leh yeˬ chehˇ tcuh gaˇ leh maˇ daꞈ ve htaꞈ tawˍ daꞈ tcuh gaˇ ve yoˬ. (Isy 55:7) Ngaˬ hui chi hkʼe te ve kʼo, maˇ daꞈ ve dawˇ hkʼaˇ htaꞈ gʼaˇ tuˬ yawˇ ga laˇ leh ngaˬ hui loˍ ve awˬ gʼaˇ htaꞈ peꞈ laˇ tuˬ yoˬ tehꞈ yawˇ ka tiꞈ te taˍ laˇ ve yoˬ.—Awˬ 4:7. w18.07 16 ¶5-6