Ha pa 9 maˬ

Yeˍsuˆ Maˍriˆ leh Maˍhtaˆ awˬ pon dawˇ nyi piˇ ve yoˬ. Laˍzaˍruˆ suh˗e leh Maˍriˆ leh Maˍhtaˆ nyi ma luˬ jaˇ htaˇ, ‘Yeˍsuˆ kaꞈ mehˆ gʼuiˬ yaꞈ la ve yoˬ.’ (Yoˇ 11:32-35) Yawˇ awˬ chawˇ meuˆ daꞈ jaˇ ve geh maˇ gʼa chehˇ˗o ve pa taw hawˬ ve maˇ heˆ. Awˬ tehˬ tehˬ kʼo, yawˇ Laˍzaˍruˆ htaꞈ kʼawꞈ teꞈ tu la piˇ˗a te ve yoˬ. Yaꞈ hkʼaˇ, awˬ nu ve awˬ chawˇ nyi ma luˬ ve htaꞈ dawˇ nyi leh yawˇ kaꞈ hawˬ ve yoˬ. Yeˍsuˆ shu awˬ pon dawˇ nyi puiˉ ve lehˬ ngaˬ hui htaꞈ maˍ laˇ gʼa ve yoˬ. Ngaˬ hui yawˇ hkʼe leˇ biˇ jaˇ ve maˇ hpehꞈ. Yaꞈ hkʼaˇ, yawˇ chi hkʼe ve nyi ma cawˬ ve pa taw ngaˬ hui yawˇ htaꞈ haꞈ jaˇ. Chi teˇ hkui yawˇ Gʼuiˬ sha ve mvuhˇ miˬ hkʼaw Jawˇmawˇ te chehˇ ve ngaˬ hui ha lehˬ jaˇ. Maˇ maw ve awˬ yanˇ yawˇ tuꞈ ve hkanˍ ve hkʼa peu˗eˬ te luˬ tuˬ yoˬ. Saˍtanˍ uˉ peunˍ ve chaw yaˇ naˬ tuˬ te laˇ ve, Yeˍsuˆ hkʼa dehꞈ gu laˇ tuˬ yoˬ. Awˬ lawn kʼo yawˇ chaw yaˇ hpehꞈ jaw ve pa taw ngaˬ hui htaꞈ hkʼa dehꞈ na gʼa ve yoˬ. Ngaˬ hui ve Uˉ peunˍ paˍ “ha kʼaˉ puiˉ jaˇ” ve pa taw ha lehˬ jaˇ.—Heˍ 2:17, 18; 4:15, 16. w19.03 17 ¶12-13

Ngaˬ hui hto toˇ˗e htaˇ, keunˍ lawꞈ cawˇ lawꞈ te gaˇ ve yoˬ. Shu Gʼuiˬ sha htaꞈ shiˍ la tuˬ ngaˬ hui ve awˬ vuiˬ te gʼa ve yoˬ. Yaꞈ hkʼaˇ, ngaˬ hui te ve lehˬ a yeˇ uiˍ jaˇ ve maˇ heˆ. (1 Kawˇ 3:6, 7) Yaˬhoˉvaˬ yawˇ hui htaꞈ gʼawˬ veu laˇ ve yoˬ. Awˬ leh meuˇ htaˇ, chaw teˇ gʼaˇ daꞈ ve awˬ lawn sha tanˇ haꞈ yuˬ maˇ haꞈ yuˬ tuˬ yawˇ ve nyi ma htaꞈ cawˬ ve yoˬ. (Maꞈ 13:4-8) Yeˍsuˆ miˬ guiˬ hkʼoˆ chehˇ htaˇ yawˇ daꞈ ve saˍ laꞈ lonˉ hpehꞈ ve htawˇ, daꞈ ve awˬ lawn sha tanˇ maˍ ve htaꞈ shu maˇ haꞈ yuˬ ve tehꞈ tawnˇ taˍ sheˍ. Chi htaꞈ pa taw, ngaˬ hui maˍ piˇ ve htaꞈ laiˉ gʼaˇ yawˇ hui maˇ haꞈ yuˬ ve htawˇ ngaˬ hui awˬ gʼaˇ taˇ nuˇ sheˍ. Ngaˬ hui hto toˇ kuiˬ lo shu awˬ pon dawˇ nyi htaˇ awˬ bon gʼa ve yoˬ. Ngaˬ hui Gʼuiˬ sha ve kanˉ te ve hkʼaw ha lehˬ jaˇ. Ngaˬ hui piˇ ve htaꞈ ha lehˬ ve yoˬ. “Co tiꞈ ha tiꞈ htaꞈ gʼa tuˬ awˬ pon” haꞈ yuˬ laˇ ve chaw htaꞈ ngaˬ hui kaꞈ ga piˇ sha ve yoˬ. (Tcuh 13:48) Chi htaꞈ pa taw, “chaw hkʼa peu˗eˬ awˬ pon daꞈ ve htaꞈ te˗a veuˬ.” (Gaˍ 6:10) Ngaˬ hui chi hkʼe te ve kʼo, mvuhˇ naw ma hkʼoˆ chehˇ ve ngaˬ hui ve Awˬ pa awˬ meꞈ awˬ hponˇ gʼa leh ngaˬ hui ha lehˬ jaˇ tuˬ yoˬ.—Maꞈ 5:16. w19.03 25 ¶18-19

Jawˇmawˇ Daˍviˆ bvuhꞈ ve, “[Yaˬhoˉvaˬ] lehˬ uiˍ jaˇ mvuh jaˇ ve pa taw, yawˇ htaꞈ gʼaˇ hteꞈ chiˇ mvuh cawˇ ve yoˬ.” (Chiˇ 145:3) Daˍviˆ Yaˬhoˉvaˬ htaꞈ haꞈ jaˇ leh “hpawnˬ daꞈ chehˇ kuiˬ lo” yawˇ htaꞈ chiˇ mvuh ve yoˬ. (1 Raˍ 29:10-13; Chiˇ 40:5) Chi beuꞈ ngaˬ hui Yaˬhoˉvaˬ htaꞈ chiˇ mvuh ve awˬ hkʼaˇ teˇ hkʼaˇ lehˬ Hkriꞈ yaˇ hpawnˬ daꞈ ve hkʼaw laꞈ sheh chiˇ leh hkʼawꞈ ve yoˬ. Laiˉ ceuˬ hkʼawꞈ ve htaꞈ ngaˬ hui dawˇ cawˇ ve yoˬ. Yaˇ ehˉ teˇ hpaˍ nyi ma hkʼaw tawˆ la leh chi suhˉ˗ehˍ hkʼawꞈ ve yoˬ. Chaw teˇ hpaˍ awˬ tehˬ ve yawˇ hui tanˬ henˇ htaˇ ve hpehꞈ la jaw ve awˬ lawn htaꞈ hkʼawꞈ htaˇ, ngaˬ hui kaꞈ awˬ gʼaˇ gʼa jaˇ. Teˇ hpaˍ yaꞈ taw puiˉ jaˇ ve maˇ heˆ leh chaw ceuˬ tawˇ hkawˇ awˬ suhˉ tanˬ henˇ chehˇ ve yawˇ hui “haꞈ hanˉ te leh” hkʼawꞈ htaˇ ngaˬ hui yawˇ hui htaꞈ chiˇ mvuh piˇ gʼa ve yoˬ. (1 Hteˇ 2:2) Yawˇ hui coˇ caˇ ve chi ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa ve le? Hpawnˬ daꞈ ve hpehˇ htaˇ, awˬ bon uiˍ jaˇ kʼoˆ piˇ gʼa ve yoˬ. Awˬ nu ve teˇ hkʼaˇ lehˬ ngaˬ hui laꞈ sheh chiˇ leh hkʼawꞈ ve yoˬ. Ngaˬ hui awˬ gʼaˇ gʼa ve ceh maˇ heˆ. Hpawnˬ daꞈ kuiˬ hkʼaw awˬ nu ve chaw htaꞈ kaꞈ awˬ gʼaˇ piˇ chehˇ ve yoˬ.—Roˉ 1:11, 12. w19.01 8 ¶1-2; 9 ¶6

Oˇ kaˬ lo ve 10 gʼaˇ dawˇ haˍ jaˇ. Yawˇ hui hkiˬ tuꞈ paˍ hpehꞈ leh maˇ daꞈ la gʼa. Yaꞈ hkʼaˇ teˇ nyi htaˇ Yeˍsuˆ vuiˇ kuiˬ lo chehˇ taˍ ve htaꞈ yawˇ hui gʼa mawˬ ve yoˬ. Uiˍ jaˇ ve saˍ laꞈ lonˉ chi teˇ gʼaˇ chaw naˬ htaꞈ gu na˗e gʼa ve tehꞈ yawˇ hui gʼa kaˇ jaw. Hkʼe te leh yawˇ hui lehˬ “Jawˇmawˇ Yeˍsuˆ˗oˬ, ngaˬ hui htaꞈ ha kʼaˉ laˇ˗oˆ” tehꞈ bvuhˬ chaweh kuˬ ve yoˬ. Yeˍsuˆ hkiˬ tuꞈ paˍ 10 gʼaˇ htaꞈ gu na˗e piˇ ve yoˬ. Yawˇ hui teˇ gʼaˇ le le Yeˍsuˆ htaꞈ awˬ bon uiˍ jaˇ tehꞈ dawˇ ve yoˬ hehˉ. Yaꞈ hkʼaˇ, teˇ gʼaˇ lehˬ dawˇ ve ceh maˇ heˆ, yawˇ awˬ hpfuhˇ shiˍ ve te tawˆ la ve yoˬ. Saˍmaˍriˆ chaw hpehꞈ ve chi teˇ gʼaˇ lehˬ “awˬ hkawˇ bvuhˬ chaweh kuˬ leh Gʼuiˬʼsha htaꞈ chiˇ uiˍ chiˇ mvuh ve yoˬ.” (Luˉ 17:12-19) Saˍmaˍriˆ chaw chi teˇ gʼaˇ hkʼa shuˍ, ngaˬ hui kaꞈ daꞈ ve chaw htaꞈ awˬ bon uiˍ jaˇ kʼoˆ piˇ gaˇ ve yoˬ. Yaˬhoˉvaˬ lehˬ awˬ hpfuhˇ shiˍ ve te tawˆ la ve daꞈ jaˇ ve henˇ yuˬ tuˬ hpehꞈ ve yoˬ. Yawˇ te ve awˬ hkʼaˇ teˇ hkʼaˇ lehˬ yawˇ nyi hkʼaˇ suh tuˬ te piˇ ve chaw htaꞈ awˬ bon naꞈ piˇ ve yoˬ. (2 Saˍ 22:21; Chiˇ 13:6; Maꞈ 10:40, 41) Liꞈ hpu hkʼaw kʼoˆ ve, “Gʼuiˬ sha haꞈ ve awˬ yaˇ awˬ duˬ hpehꞈ ve hkʼe, yawˇ te ve hkʼa shuˍ shuˍ te˗o.” (Efs 5:1) Hkʼe te leh, Yaˬhoˉvaˬ htaꞈ ngaˬ hui henˇ yuˬ leh awˬ hpfuhˇ shiˍ ve te tawˆ la gaˇ ve yoˬ. w19.02 14 ¶1-2, 4

Yaˇ miˇ ehˉ teˇ gʼaˇ jehˇ ve awˬ nyi maˇ te tuˬ yawˇ yawˆ yan ve hkʼaw kʼoˆ piˇ ve yoˬ. Hawˉ hkʼaˆ yaˇ nehˬ teˇ gʼaˇ yaꞈ tawˍ puiˉ jaˇ ve teˇ yehˬ peuˬ teˇ yehˬ hto toˇ chehˇ htaˇ, liꞈ henˇ kuiˬ lo ve awˬ chawˇ teˇ gʼaˇ Yaˬhoˉvaˬ ve chaw htaꞈ kʼoˆ guiˇ gʼuiˬ guiˇ jaw ve yehˬ lo kʼai leh yawˇ yehˬ miˉ htawˆ ve yoˬ. Yehˬ shehˍ hpaˇ teˇ gʼaˇ yehˬ kʼa hkʼaw gʼa caˇ tuˬ yawˇ kanˉ te hkeuꞈ jaˇ ve yoˬ. Yawˇ awˬ hoˉ yawˇ htaꞈ maˇ hteˇ maˇ cawˇ ve te yaꞈ tuˬ te tcuh gaˇ ve yoˬ. Yawˇ maˇ te ve kʼo gʼaꞈ tawˆ laˇ ve htawˇ, “Gʼuiˬ sha ngaˬ htaꞈ hteˇ ve cawˇ ve te leh awˬ liˇ htaꞈ na yuˬ tcuh gaˇ ve pa taw, ngaˬ chi hkʼe te maˇ hpehꞈ” tehꞈ awˬ hoˉ htaꞈ kʼoˆ piˇ ve yoˬ.(Roˉ 13:1-4; Heˍ 13:18) Chaw chi 3 gʼaˇ ve te hkʼaˇ dawˇ hkʼaˇ htaꞈ nawˬ aˬ htoꞈ ma mawˬ ve le? Haꞈ hanˉ ve hteˇ ve cawˇ ve leh awˬ nu ve te hkʼaˇ dawˇ hkʼaˇ htaꞈ kaꞈ nawˬ mawˬ ve yoˬ hehˉ. Yaꞈ hkʼaˇ, te hkʼaˇ dawˇ hkʼaˇ awˬ hpfuhˇ hkʼaˆ jaˇ ve teˇ ceuˬ lehˬ ka tiꞈ yeˬ ve yoˬ. Yawˇ hui teˇ gʼaˇ leh teˇ gʼaˇ Yaˬhoˉvaˬ htaꞈ ka tiꞈ yeˬ ve yoˬ. Yawˇ hui Gʼuiˬ sha ve awˬ liˇ awˬ hkʼaˇ htaꞈ te yaꞈ tuˬ maˇ te. Ka tiꞈ yeˬ ve chi yawˇ hui chi hkʼe te tuˬ ga piˇ ve yoˬ. A shu teˇ gʼaˇ te hkʼaˇ dawˇ hkʼaˇ chi hkʼe ve cawˬ ve kʼo, Yaˬhoˉvaˬ yawˇ htaꞈ nyi hkʼaˇ suh jaˇ. Ngaˬ hui kaꞈ mvuhˇ naw ma hkʼoˆ ve Awˬ pa nyi hkʼaˇ suh tuˬ te piˇ gaˇ ve yoˬ. w19.02 2 ¶1-2

Awˬ liˇ tawˇ hkawˇ lehˬ a shu yawˇ awˬ to htaꞈ haꞈ shaˉ maˇ gʼa ve chaw htaꞈ haꞈ shaˉ piˇ ve yoˬ Tawˇ pa haˉ te kʼo, Iˉsaˍreˍlaˆ mvuhˇ miˬ hkʼaw chehˇ la ve yaˇ cuˬ shi, mehˇ chawˇ ma, leh buiˇ shaˆ aˉ naˆ chaw yoˬ. Iˉsaˍreˍlaˆ mvuhˇ miˬ hkʼaw suhˉ jehˬ paˍ “hkehˉ chaw leh yaˇ cuˬ shi teˇ hpaˍ htaꞈ maˇ hteˇ maˇ cawˇ ve hkʼaw suhˉ jehˬ piˇ ve maˇ gʼa te. Mehˇ chawˇ ma htaꞈ hpu chiˇ piˇ ve kʼo, chiˇ piˇ ve hpu oˇ ve awˬ tan yawˇ ve aˉ poꞈ htaꞈ nawˬ maˇ gʼa yuˬ teh taˍ” tehꞈ kʼoˆ piˇ ve yoˬ. (Bon 24:17) Yaˬhoˉvaˬ lehˬ shu htaꞈ maˇ gʼaˇ puiˉ ve chaw htaꞈ haꞈ leh ha kʼaˉ ve yoˬ. A shu teˇ gʼaˇ yawˇ hui htaꞈ maˇ hteˇ maˇ cawˇ ve te piˇ ve kʼo, yawˇ htaꞈ ciˍ yanˍ piˇ tuˬ yoˬ. (Tawˆ 22:22-24) Yaˬhoˉvaˬ lehˬ sheh kʼai paˍ teˇ hpaˍ yawˇ ve chaw htaꞈ haꞈ pehnˇ ve hkʼaw nyi haꞈ shaˉ tcuh gaˇ ve yoˬ. Yawˇ pehꞈ ve tzuhˆ ve htaꞈ nyi bawˬ jaˇ leh shu htaꞈ maˇ gʼaˇ puiˉ ve chaw htawˇ, hteˇ ve cawˇ ve hkʼaw haꞈ shaˉ piˇ tcuh gaˇ ve yoˬ. (Oˉ 18:6-30) Yaˬhoˉvaˬ hteˇ ve cawˇ ve hkʼaw te laˇ ve htaꞈ ngaˬgaatahkʼa dehꞈ shiˍ htaˇ, yawˇ htaꞈ haꞈ maˇ la ve yoˬ. Ngaˬ hui yawˇ htaꞈ haꞈ leh hteˇ ve cawˇ ve awˬ liˇ awˬ hkʼaˇ htaꞈ gʼaꞈ te htaˇ, shu htaꞈ haꞈ leh hteˇ ve cawˇ ve hkʼaw te piˇ gaˇ ve yoˬ. w19.02 24-25 ¶22-26

Saˍtanˍ ve dawˇ hkʼaˇ maˇ gʼa heuˆ la tuˬ ngaˬ hui a shu yawˇ awˬ to htaꞈ hkʼaˬ hkʼe haꞈ shaˉ gʼa ve, tawˇ pa haˉ teˇ maˬ teˇ geh dawˇ nyi sheˍ. Yaˬhoˉvaˬ ngaˬ hui htaꞈ maˍ laˇ ve, “haˉ chawˇ haˉ paˆ te ve, chaꞈ chiˆ ve hkʼa peu˗eˬ ve leh, shu mawˇ shu jeˬ htaꞈ sheˉ lai ve, chi teˇ hpaˍ awˬ lawn nawˬ hui awˬ hkʼaw lo tawˇ yaw daꞈ ve ceh kaꞈ taˇ te.” (Efs 5:3) Yaꞈ hkʼaˇ, kanˉ teˇ geh te ve chaw, liꞈ teˇ geh henˇ ve chaw pehꞈ ve tzuhˆ ve awˬ lawn htaꞈ kʼoˆ daꞈ htaˇ, ngaˬ hui hkʼaˬ hkʼe te tuˬ le? Dawˇ shiˍ puiˉ ve nyi ma sanˍ deˍ shaw paˍ hkʼe hpehꞈ ve ngaˬ hui htaꞈ shaˍ tiꞈ peꞈ laˇ tuˬ yoˬ hehˉ. (Roˉ 2:15) Ngaˬ hui na tuˬ laˇ? Ngaˬ hui yawˇ hui yaw daꞈ chehˇ ve hkawˇ ca na˗e gaˇ ve, maˇ heˆ leh yawˇ hui nyi chehˇ ve awˬ han nyi gaˇ tuˬ yoˬ hehˉ? Yaꞈ hkʼaˇ, nawˬ ve nyi ma yehˬ miˉ htaꞈ laꞈ haˉ hoˆ sheˍ. Yaw daꞈ chehˇ ve awˬ lawn pa ve, maˇ heˆ leh jaw hpaw˗e gʼa ve yoˬ. Shu ngaˬ hui htaꞈ maˇ daꞈ ve dawˇ tcuh leh te tcuh laˇ gaˇ htaˇ, tawˍ baˬ tuˬ haꞈ hanˉ ve gʼa cawˬ ve yoˬ. Ngaˬ hui coˇ caˇ ve Yaˬhoˉvaˬ hkʼa dehꞈ nyi chehˇ ve yoˬ. Saˍtanˍ ve dawˇ hkʼaˇ htaꞈ tawˍ daꞈ gʼaˇ tuˬ, yawˇ ngaˬ hui htaꞈ awˬ gʼaˇ leh cuˇ yiˍ peꞈ laˇ ve yoˬ.—2 Raˍ 16:9; Isy 40:29; Yaˍ 1:5. w19.01 17-18 ¶12-13

Sawˉlaꞈmonˍ lehˬ paw sha jaˇ leh kanˇ paˆ cawˬ jaˇ ve chaw teˇ gʼaˇ hpehꞈ ve yoˬ. Yawˇ awˬ to htaꞈ kʼoˆ piˇ ve, “ngaˬ ve awˬ to htaꞈ ha lehˬ tuˬ te piˇ leh, ha lehˬ ve kʼoˆ ve aˬ htoꞈ ma hpehꞈ ve htaꞈ ca nyi tuˬ, ngaˬ dawˇ cheˆ taˍ ve yoˬ.” (Cuˇ 2:1-10) Chi htaꞈ pa taw Sawˉlaꞈmonˍ yehˬ daꞈ jaˇ ve htaꞈ te ve, hko daꞈ jaˇ ve htaꞈ te tuˬ awˬ hkʼaˇ gu ve, leh yawˇ te gaˇ ve teˇ ceuˬ le le te ve yoˬ. Yawˇ nyi hkʼaˇ suh leh ha lehˬ˗aw laˇ? Sawˉlaꞈmonˍ yaꞈ nyi ve Liꞈ hpu awˬ tawn kʼoˆ maˍ laˇ ve yoˬ. Sawˉlaꞈmonˍ ve awˬ lawn htaꞈ nawˬ aˬ htoꞈ ma henˇ yuˬ gʼa ve le? Chaw teˇ hpaˍ hpaˍ awˬ pon kʼo, yawˇ hui te yaꞈ leh tuꞈ ve gʼa hpuˇ htaˇ hehꞈ shiˍ la ve yoˬ. Yaˬhoˉvaˬ nawˬ htaꞈ chi hkʼe ve maˇ hpuˇ tcuh gaˇ. Yawˇ maˍ laˇ ve tawˇ hkawˇ htaꞈ nawˬ na yuˬ leh gʼaꞈ te tcuh gaˇ ve yoˬ. Awˬ ceuˬ chi ve yonˍ ve gʼa cawˬ ve yoˬ. Yaꞈ hkʼaˇ, nawˬ dawˇ cheˆ leh te a te htaˇ nawˬ yonˍ ve htaꞈ caˉ daꞈ ve kʼo awˬ tehˬ awˬ na nyi ma maˇ luˬ taˬ. Leh ‘haꞈ pehnˇ ve chi Gʼuiˬ sha awˬ pon nawˬ hui hpeuꞈ maˍ piˇ ve yawˇ leunˇ tuˬ ve maˇ heˆ.’ (Heˍ 6:10) Chi htaꞈta h h0.’nawˬ yonˍ ve uiˍ la mvuh la tuˬ coˇ caˇ sheˍ. Nawˬ chi hkʼe te ve kʼo, daꞈ ve htaꞈ dawˇ cheˆ gʼa leh mvuhˇ naw ma hkʼoˆ chehˇ ve Awˬ pa nawˬ htaꞈ daꞈ jaˇ ve awˬ ceuˬ gʼa tcuh gaˇ ve tehꞈ hkʼa dehꞈ gʼa mawˬ tuˬ yoˬ.—Chiˇ 32:8. w18.12 18-19 ¶14-15

Gʼuiˬ sha ve awˬ ha hpu dawˇ pawnˍ piˇ ve chaw lehˬ Gʼuiˬ sha htaꞈ yonˍ leh yawˇ dawˇ ve hkʼe coˇ caˇ leh dawˇ ve yoˬ. Yawˇ a shaꞈ teꞈ kuiˬ hkʼaw Yaˬhoˉvaˬ htaꞈ beˆ maˍ tcuh leh coˇ caˇ leh yawˇ hkawˇ na yuˬ gaˇ ve yoˬ. (1 Kawˇ 2:12, 13) Awˬ lawn chi ve hkʼaw Daˍviˆ leh daꞈ jaˇ ve henˇ yuˬ tuˬ hpehꞈ ve yoˬ. Yawˇ kʼa muiˬ hkawˇ kʼa ve, “Yaˬhoˉvaˬ lehˬ ngaˬ awˬ pon teˇ pun hpehꞈ ve yoˬ.” (Chiˇ 16:5, MGS) Daˍviˆ kaꞈ Gʼuiˬ sha ve “teˇ pun” hpehꞈ ve pa taw awˬ bon uiˍ ve yoˬ. Yawˇ Gʼuiˬ sha geh meuˆ daꞈ leh gʼaˇ va ve yoˬ. (Chiˇ 16:1) Chi htaꞈ pa taw yawˇ kʼoˆ ve, “ngaˬ geh ha lehˬ dawˇ sha tuˬ hkʼa biˇ cawˬ taˍ” ve yoˬ. Daˍviˆ Yaˬhoˉvaˬ geh meuˆ daꞈ jaˇ ve yoˬ. Chi aꞈ kehˉ yawˇ htaꞈ ha lehˬ tuˬ te piˇ gʼa ve maˇ cawˬ! (Chiˇ 16:9, 11) Hpu leh pyawˍ ve htaꞈ tiˉ dawˇ nyi chehˇ ve chaw lehˬ Daˍviˆ ha lehˬ ve hkʼe yawˇ hui maˇ ha lehˬ gʼa. (1 Tiˆ 6:9, 10) Nawˬ Yaˬhoˉvaˬ htaꞈ yonˍ leh yawˇ ve kanˉ te ve kʼo, nawˬ a shaꞈ teꞈ hkʼaˇ ha lehˬ leh awˬ tehˬ awˬ na nyi hkʼaˇ suh tuˬ yoˬ. Chi htaꞈ pa taw nawˬ ve yonˍ hkʼaˇ uiˍ la mvuh la tuˬ hkʼaˬ hkʼe te gʼa ve le? Nawˬ Yaˬhoˉvaˬ geh meuˆ daꞈ tuˬ Liꞈ hpu gʼaw ve, yawˇ hpanˍ taˍ ve daꞈ jaˇ ve awˬ ceuˬ htaꞈ chaˬ nyi ve, yawˇ ve te hkʼaˇ dawˇ hkʼaˇ leh yawˇ nawˬ htaꞈ haꞈ ve htaꞈ kaꞈ dawˇ nyi ve yoˬ.—Roˉ 1:20. w18.12 22-23 ¶7-8

Hkriꞈ yaˇ lehˬ heuˆ daꞈ ve htaꞈ gʼa yawˆ yan daꞈ ve tehꞈ Pawˇluꞈ kʼoˆ gaˇ ve yoˬ. Heuˆ daꞈ ve awˬ hpfuhˇ hkʼaˆ jaˇ ve tehꞈ yawˇ hui gʼa shawˍ ve htaꞈ kʼoˆ gaˇ ve yoˬ. Heuˆ daꞈ ve htaꞈ awˬ hpfuhˇ hkʼaˆ ve tehꞈ nawˬ dawˇ˗aw laˇ? Nawˬ heuˆ daꞈ˗oˬ ve kʼo, chi ve htaꞈ awˬ hpfuhˇ hkʼaˆ ve tehꞈ dawˇ˗aw laˇ? Heuˆ daꞈ ve htaꞈ nawˬ awˬ hpfuhˇ hkʼaˆ jaˇ ve tehꞈ shawˍ ve kʼo, daꞈ ve htaꞈ te chehˇ ve yoˬ. Heuˆ daꞈ ve htaꞈ Yeˍsuˆ kaꞈ yawˆ yan ve yoˬ. Baˬ daꞈ ve awˬ lawn Hpaˍriˍsehˇ hui yawˇ htaꞈ na piˇ htaˇ, awˉ lawˉ peuˇ heuˆ daꞈ ve Gʼuiˬ sha kʼoˆ taˍ ve awˬ ceuˬ htaꞈ yawˇ kʼoˆ maˍ piˇ ve yoˬ. Gʼuiˬ sha kʼoˆ ve, “chi htaꞈ pa taw hawˉ hkʼaˆ lehˬ, yawˇ ve awˬ pa awˬ e htaꞈ hpaˆ daꞈ taˉ leh, yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” Yeˍsuˆ kʼawꞈ kʼoˆ ve, “Gʼuiˬ sha caˉ daꞈ piˇ taˍ ve htaꞈ chaw yaˇ maˇ gʼa yuˬ hpaˆ daꞈ piˇ.” (Mk 10:2-12; Awˬ 2:24) Gʼuiˬ sha lehˬ heuˆ daꞈ ve awˬ hkuiˉ puiˍ tanˬ shehˍ hpaˇ hpehꞈ ve tehꞈ Yeˍsuˆ haꞈ yuˬ ve yoˬ. Heuˆ daꞈ ve lehˬ co co taiˍ taiˍ teˇ geh chehˇ tuˬ tehꞈ yawˇ shiˍ ve yoˬ. Gʼuiˬ sha lehˬ awˉ lawˉ teˇ ca Aˍdanˍ leh Eˇvaꞈ htaꞈ heuˆ daꞈ tcuh htaˇ, baˬ daꞈ gʼa ve tehꞈ yawˇ maˇ gʼa kʼoˆ piˇ. Yaꞈ hkʼaˇ, yawˇ ve a loˍ lehˬ “yawˇ huiˉ maˬ” co co taiˍ taiˍ teˇ geh chehˇ cawˇ ve yoˬ. w18.12 9-10 ¶2-4

Chaw teˇ gʼaˇ yaˇ htaꞈ laꞈ shawnˍ piˇ ve dawˇ nyi sheˍ. Awˬ pa awˬ e yaˇ htaꞈ awˬ bon uiˍ jaˇ kʼoˆ piˇ tcuh leh yaˇ kaꞈ awˬ pa awˬ e kʼoˆ piˇ ve hkʼa shuˍ te ve yoˬ. Yaꞈ hkʼaˇ, yaˇ uiˍ la˗oˬ htaˇ, aˬ htoꞈ ma te awˬ pa awˬ e chi hkʼe maˍ ve le naˍ yawˇ na gʼa la ve yoˬ. Awˬ leh meuˇ htaˇ, yawˇ ha lehˬ ve teˇ yanˇ shu htaꞈ awˬ bon uiˍ jaˇ yawˇ hkʼaˇ yawˇ kʼoˆ piˇ puiˉ ve yoˬ. Ngaˬ hui kaꞈ chi hkʼe gʼa henˇ jaw ve yoˬ. Ngaˬ hui awˬ tehˬ ve htaꞈ tanˬ henˇ htaˇ, Yaˬhoˉvaˬ beˆ maˍ laˇ ve htaꞈ na yuˬ ve a yeˇ uiˍ jaˇ ve tehꞈ ngaˬ hui gʼa henˇ ve yoˬ. Yaꞈ hkʼaˇ, co ha hpawˇ uiˍ la mvuh la htaˇ, ngaˬ hui yawˇ ve dawˇ hkʼaˇ htaꞈ shiˍ la ve yoˬ. Yawˇ aˬ htoꞈ ma dawˇ cawˇ ve, maˇ dawˇ cawˇ ve kaꞈ shiˍ la ve yoˬ. Chi hkʼe te htaˇ, ngaˬ hui Yaˬhoˉvaˬ ve dawˇ hkʼaˇ htaꞈ ngaˬ hui ve te hkʼaˇ dawˇ hkʼaˇ pa tcuh ve yoˬ. Ngaˬ hui Yaˬhoˉvaˬ dawˇ ve hkʼe dawˇ gaˇ ve htawˇ, ngaˬ hui maˇ biˇ ve pa taw, teˇ pawˆ pawˆ kʼo te tuˬ haˍ jaˇ. Pehꞈ ve tzuhˆ ve, hpu shi mawˇ jeˬ, Gʼuiˬ sha ve kanˉ, awˬ suhˍ yehˇ ve, leh awˬ kaˍ awˬ nu ve htaꞈ Yaˬhoˉvaˬ hkʼaˬ hkʼe dawˇ ve ngaˬ hui shiˍ˗oˬ ve yoˬ. Yaꞈ hkʼaˇ, aˬ htoꞈ ma te yawˇ chi hkʼe dawˇ ve ngaˬ hui teˇ pawˆ pawˆ kʼo hkʼa dehꞈ na maˇ gʼa. Ngaˬ hui hkʼaˬ hkʼe te Yaˬhoˉvaˬ dawˇ ve hkʼe dawˇ maˇ la gʼa tuˬ le? Ngaˬ hui Gʼuiˬ sha ve tawˇ hkawˇ htaꞈ gʼa henˇ leh, yawˇ ve dawˇ hkʼaˇ htaꞈ hkʼa dehꞈ gʼa dawˇ nyi leh, yawˇ hkʼe leˇ dawˇ tuˬ ngaˬ hui gʼa coˇ caˇ ve yoˬ. w18.11 27-28 ¶2-4

Haˍbaˍkuˆ ve awˬ co˗e htaˇ, tuꞈ jaˇ hkanˍ jaˇ. Awˬ paˇ awˬ kui chehˇ ve chaw haiˬ jaˇ ve pa taw, yawˇ nyi ma luˬ jaˇ. Iˉsaˍreˍlaˆ chaw maˇ hteˇ maˇ cawˇ leh teˇ gʼaˇ leh teˇ gʼaˇ maˇ daꞈ ve te daꞈ ve yoˬ. Haˍbaˍkuˆ dawˇ ve, ‘haiˬ ve chi hkʼaˬ htaˆ peuˬ˗e tuˬ le naˍ. Aˬ htoꞈ ma te Yaˬhoˉvaˬ haˆ maˇ gu ve le naˍ.’ Yawˇ teꞈ chiˉ te maˇ gʼa tehꞈ dawˇ ve yoˬ. Hkʼe te leh yawˇ teˇ ceuˬ ceuˬ te gʼa tuˬ Yaˬhoˉvaˬ geh lawˬ ve yoˬ. Yaˬhoˉvaˬ yawˇ ve chaw htaꞈ maˇ dawˇ nawˇ˗o, maˇ heˆ kʼo yawˇ maˇ ga laˇ tuˬ yoˬ tehꞈ dawˇ ve yoˬ hehˉ. Nawˬ kaꞈ chi hkʼe dawˇ jaw ve laˇ? Haˍbaˍkuˆ tawˇ chi hkʼe na ve lehˬ Yaˬhoˉvaˬ ka tiꞈ te taˍ ve maˇ yonˍ˗o ve hehˉ laˇ? Maˇ heˆ. Haˍbaˍkuˆ htawˇ dawˇ nawˬ dawˇ te leh awˬ lawn cawˬ htaˇ, yawˇ Yaˬhoˉvaˬ ga laˇ tuˬ lawˬ ve yoˬ. Chi kʼoˆ gaˇ ve lehˬ yawˇ dawˇ lawˬ kuiˬ cawˬ sheˍ leh Yaˬhoˉvaˬ htaꞈ gʼaˇ va chehˇ sheˍ ve yoˬ. Haˍbaˍkuˆ dawˇ haˍ leh hkʼaˬ hkʼe te tuˬ maˇ shiˍ. Aˬ htoꞈ ma te Yaˬhoˉvaˬ teꞈ chiˉ maˇ te leh yawˇ htaꞈ tuꞈ hkanˍ tcuh laˇ ve le naˍ yawˇ maˇ shiˍ. w18.11 16 ¶4-5

Tawˇ pa haˉ te kʼo, Peˍtruˆ leh Anˍdrehˍ ngaˇ ca paˍ hpehꞈ ve yoˬ. Yaꞈ hkʼaˇ, Yeˍsuˆ yawˇ hui htaꞈ yawˇ ve awˬ laꞈ gʼawˇ te la tuˬ jehˬ piˇ htaˇ, ngaˇ ca hawˇ ve kanˉ laꞈ haˉ baˬ taˉ ve yoˬ. (Maꞈ 4:18) Nawˬ awˬ tehˬ ve htaꞈ henˇ htaˇ nawˬ kanˉ te chehˇ ve htaꞈ gʼa tawˆ la cawˇ ve tehꞈ kʼoˆ gaˇ ve maˇ heˆ. Chaw yaˇ lehˬ kanˉ te leh yehˬ kʼa htaꞈ gʼa haꞈ shaˉ ve yoˬ. (1 Tiˆ 5:8) Yaꞈ hkʼaˇ, nawˬ awˬ tehˬ ve htaꞈ henˇ htaˇ nawˬ hpu shi mawˇ jeˬ hpawˇ dawˇ ve kaꞈ pa kʼai ve yoˬ. Nawˬ a shaꞈ teꞈ kuiˬ hkʼaw aˬ htoꞈ ma a yeˇ uiˍ jaˇ ve kaꞈ nawˬ na gʼa ve yoˬ. Maˍriˆ a shaꞈ teꞈ kuiˬ hkʼaw lehˬ bawˇ shi ehˉ dawˆ ve (golf) hpu chi ma ma gʼa tuˬ dawˇ teh taˍ ve yoˬ. Peuˬ hkʼawꞈ nawˉ yawˇ Liꞈ hpu tanˬ henˇ ve yoˬ. Maˍriˆ yawˇ gʼa henˇ ve htaꞈ dawˇ cawˇ jaˇ leh a shaꞈ teꞈ kuiˬ hkʼaw yuˬ yehˇ ve yoˬ. Yawˇ Yaˬhoˉvaˬ geh meuˆ daꞈ ve, leh bawˇ shi ehˉ dawˆ ve (golf) htaꞈ haꞈ shaˉ tuˬ maˇ sha tehꞈ yawˇ shiˍ ve yoˬ. (Maꞈ 6:24) Chi teˇ hkui yawˇ gʼuˇ suhˍ peuˍ ve te leh yawˇ ve a shaꞈ teꞈ hkʼaˇ “ha lehˬ jaˇ leh awˬ hpfuhˇ hkʼaˆ jaˇ tehꞈ shawˍ ve yoˬ.” w18.11 6 ¶9-10

Yeˍsuˆ a shaꞈ 30 hkʼawꞈ htaˇ, laꞈ shaˉ maˉ maˇ te˗o ve yoˬ. Maˍ ve kanˉ a yeˇ uiˍ jaˇ ve tehꞈ yawˇ shiˍ ve yoˬ. Gʼuiˬ sha ve Mvuhˇ miˬ daꞈ ve awˬ lawn sha tanˇ maˍ tuˬ Gʼuiˬ sha Yeˍsuˆ htaꞈ miˬ guiˬ hkʼoˆ lo peu laˇ ve tehꞈ yawˇ shiˍ ve yoˬ. (Maꞈ 20:28; Luˉ 3:23; 4:43) Yeˍsuˆ daꞈ ve awˬ lawn sha tanˇ maˍ tuˬ hkʼaˬ htaˆ kaꞈ dawˇ nawˇ taˍ leh, yawˇ awˬ nu ve chaw kaꞈ hkʼa shuˍ dawˇ tcuh gaˇ ve yoˬ. (Maꞈ 9:35-38) Ngaˬ hui maˇ˗awˍ ve laꞈ shaˉ maˉ maˇ te puiˉ. Yaꞈ hkʼaˇ, ngaˬ hui teˇ gʼaˇ le le daꞈ ve awˬ lawn sha tanˇ maˍ ve chaw hpehꞈ ve yoˬ. Kanˉ chi Gʼuiˬ sha htaꞈ caˉ daꞈ ve pa taw a yeˇ uiˍ jaˇ. Hkʼe te leh Liꞈ hpu hkʼaw ngaˬ hui htaꞈ “teˇ geh Gʼuiˬ sha ve kanˉ te shehˍ hpaˇ” tehꞈ kuˬ ve yoˬ. (1 Kawˇ 3:9; 2 Kawˇ 6:4) Chiˇ mvuh ve liꞈ bvuhꞈ paˍ kʼoˆ ve, “nawˬ ve awˬ liˇ tawˇ hkawˇ lehˬ, hteˇ jaˇ cawˇ jaˇ.” (Chiˇ 119:159, 160) Yaˬhoˉvaˬ ve hkawˇ hteˇ jaˇ cawˇ jaˇ tehꞈ ngaˬ hui kaꞈ dawˇ ve pa taw, “awˬ tehˬ awˬ na ve tawˇ hkawˇ htaꞈ hteˇ lehˍ cawˇ lehˍ maˍ piˇ puiˉ ve kanˉ te shehˍ hpaˇ” hpehꞈ gaˇ ve yoˬ. (2 Tiˆ 2:15) Yaˬhoˉvaˬ, Yeˍsuˆ, leh Gʼuiˬ sha ve Mvuhˇ miˬ ve awˬ lawn shu htaꞈ maˍ piˇ tuˬ, ngaˬ hui Liꞈ hpu htaꞈ hkʼa dehꞈ yehˇ cheuˬ gaˇ ve yoˬ. w18.10 9 ¶1-2

Awˬ hpawˇ sheh kʼai shehˍ hpaˇ daꞈ jaˇ ve Yeˍsuˆ Hkriꞈ htaꞈ henˇ yuˬ htaˇ, awˬ miˇ ma “awˬ hpawˇ htaꞈ yawˆ yan” tuˬ sha ve yoˬ. (Efs 5:22-25, 33) Leh nawˬ awˬ hpawˇ htaꞈ yawˆ yan htaˇ, awˬ hpawˇ Hkriꞈ yaˇ awˬ moˍ hkʼaw awˬ vuiˬ cawˬ maˇ jaˇ ve htawˇ, maˇ heˆ leh shoꞈ shaꞈ ve awˬ lawn gu tuˬ cawˬ ve htawˇ, nawˬ yawˇ htaꞈ na gʼa piˇ leh daꞈ ve te piˇ sheˍ. Awˬ pa awˬ e teˇ gʼaˇ leh teˇ gʼaˇ dawˇ nyi daꞈ ve kʼo, yaˇ awˬ pon daꞈ ve henˇ yuˬ tuˬ hpehꞈ ve yoˬ. Yawˇ hui ve yaˇ shu htaꞈ dawˇ nyi leh daꞈ ve te piˇ gʼa tuˬ maˍ piˇ ve yoˬ. Tawˇ pa haˉ te kʼo, yaˇ hpawnˬ daꞈ kuiˬ hkʼaw maˇ gʼa guiˇ toˇ tuˬ maˍ piˇ ve yoˬ. Maˇ heˆ leh yawˇ hui awˍ teˇ geh caˇ˗e htaˇ, chaw mawˇ teˇ hpaˍ awˍ chiˇ nyiˉ peuˬ hkʼaw nawˉ htaˇ hehꞈ awˍ chiˇ nyiˉ tehꞈ maˍ piˇ gʼa ve yoˬ. Chi htaꞈ pa taw yaˇ teˇ hpaˍ shu htaꞈ dawˇ nyi ve tehꞈ teˇ ceuˬ ceuˬ te leh hpeuꞈ maw laˇ htaˇ, ngaˬ hui chiˇ mvuh piˇ cawˇ ve yoˬ. Tawˇ pa haˉ te kʼo, yawˇ ngaˬ hui htaꞈ yehˬ miˉ hpaw laˇ htaˇ yoˬ. Chi yaˇ ha lehˬ tuˬ te piˇ leh, “piˇ ve lehˬ gʼa ve aꞈ kehˉ ha lehˬ tuˬ te laˇ ve yoˬ” tehꞈ yaˇ shiˍ la tuˬ ga piˇ ve yoˬ. w18.09 28 ¶5-6

Uˉ peunˍ chehˇ ve Jawˇmawˇ Yeˍsuˆ Hkriꞈ geh laˬ ve beˆ maˍ laˇ hkawˇ chi teˇ hkui leh gʼuˇ suhˍ hpawˇ kaꞈ ngaˬ hui htaꞈ ga laˇ ve yoˬ. Pa ve cawˬ leh ngaˬ hui kaꞈ gʼaꞈ pa htaˇ, awˬ bon aˬ htoꞈ ma gʼa˗oˬ ve le hkʼaˬ htaˆ kaꞈ dawˇ nyi sheˍ. Hpawnˬ daꞈ ve leh hto toˇ ve awˬ hkʼaˇ pa htaˇ, nawˬ ve yehˬ kʼa htaꞈ hkʼaˬ hkʼe ga laˇ ve le yehˬ kʼa hkʼaw oˉ kʼoˍ pui htaˇ tawˇ yaw daꞈ sheˍ. Yaˬhoˉvaˬ ve kanˉ hkʼaˇ hkʼaw beˆ maˍ laˇ ve gʼaꞈ te ve kʼo, daꞈ ve awˬ bon gʼa maˇ jaˇ. Awˬ lawn chi ngaˬ hui tawnˇ taˍ ve kʼo, gʼaꞈ te sha leh ha lehˬ tuˬ yoˬ. Tawˇ pa haˉ te kʼo, ngaˬ hui oˇ htaˇ hkʼe leˇ liꞈ kʼoˆ maˇ gʼa yanˍ tawˆ maˇ ve pa taw, hpu kaꞈ maˇ peuˬ maˇ. Leh ngaˬ hui awˬ hkʼeun yehˇ maˇ ve pa taw, chaw maˇ maˇ daꞈ ve awˬ lawn sha tanˇ shiˍ la tcuh gʼa ve yoˬ. Ngaˬ hui liꞈ kʼoˆ leh VDO awˬ hkʼeun hkʼaw chi aꞈ kehˉ yehˇ gʼa ve laˇ? Chi hkʼe te ve kʼo, Yeˍsuˆ htaꞈ ga piˇ gʼa ve yoˬ. Yawˇ ngaˬ hui htaꞈ Gʼuiˬ sha ve kanˉ hkʼaˇ ve hpu shi mawˇ jeˬ cuˇ yiˍ cawˬ ve hkʼaw yehˇ tcuh gaˇ ve yoˬ. Yeˍsuˆ beˆ maˍ laˇ ve htaꞈ gʼaꞈ te ve kʼo, awˬ viˉ awˬ nyi ve yonˍ hkʼaˇ uiˍ la mvuh la tuˬ, teˇ moˍ tiˉ hpehꞈ tuˬ, ngaˬ hui ga piˇ chehˇ ve yoˬ. w18.10 21 ¶17-19

Ngaˬ hui Yaˬhoˉvaˬ hkʼe nyi ma nuˇ nehˬ cawˬ ve kʼo, awˬ viˉ awˬ nyi bon lawˬ chehˇ ve hkʼe awˬ gʼaˇ piˇ gʼa ve yoˬ. Yaꞈ hkʼaˇ, Awˬ viˉ awˬ nyi biˇ ve chaw hpehꞈ ve tehꞈ taˇ dawˇ law ve yoˬ. Awˬ tehˬ hpehꞈ gʼa ve teˇ hpaˍ htaꞈ dawˇ nyi sheˍ. Awˬ viˉ awˬ nyi biˇ ve tehꞈ nawˬ dawˇ ve kʼo, nyi ma luˬ tuˬ yoˬ. (Cuˇ 7:21, 22) Yaˬhoˉvaˬ htaꞈ henˇ yuˬ gaˇ ve yoˬ. Ngaˬ hui aˬ htoꞈ ma te gʼa ve maˇ te gʼa ve Yaˬhoˉvaˬ hkʼa dehꞈ shiˍ ve tehꞈ ngaˬ hui tawnˇ taˍ cawˇ ve yoˬ. Hkʼe te leh ngaˬ hui kaꞈ teˇ gʼaˇ leh teˇ gʼaˇ yeunˇ hkanˍ daꞈ cawˇ ve yoˬ. (Efs 4:2, 32) Awˬ viˉ awˬ nyi te ve hkʼa dehꞈ maˇ daꞈ ve maˇ heˆ leh yawˇ hui leh awˬ nu ve chaw htaꞈ ngaˬ hui tehˆ daꞈ ve tehꞈ yawˇ hui htaꞈ maˇ dawˇ tcuh gaˇ. Yaꞈ hkʼaˇ, ngaˬ hui yawˇ hui htaꞈ awˬ gʼaˇ piˇ leh yawˇ hui te chehˇ ve daꞈ ve awˬ ceuˬ htaꞈ mawˬ tcuh cawˇ ve yoˬ. Chi yawˇ hui Yaˬhoˉvaˬ ve kanˉ ha lehˬ ha kʼa ve hkʼaw te gʼa tuˬ ga piˇ ve yoˬ.—Gaˍ 6:4. w18.09 12-13 ¶16-17

Yeˍsuˆ awˬ pon Gʼuiˬ sha ve a loˍ htaꞈ gʼaꞈ te ve lehˬ yawˇ ve caˇ tuˬ hkʼe hpehꞈ ve yoˬ. Caˇ tuˬ awˬ bon cawˬ ve htaꞈ caˇ ve kʼo, ngaˬ hui ha lehˬ leh awˬ to kaꞈ awˬ bon cawˬ ve yoˬ. Chi hkʼa shuˍ shuˍ, Gʼuiˬ sha ve a loˍ awˬ hkʼaˇ suh gʼaꞈ te ve kʼo, ngaˬ hui ha lehˬ leh yonˍ hkʼaˇ kaꞈ uiˍ la mvuh la tuˬ yoˬ. Yaˬhoˉvaˬ te tcuh laˇ ve htaꞈ ngaˬ hui te ve kʼo, cuˇ yiˍ cawˬ tuˬ yoˬ. (Chiˇ 107:43) Cuˇ yiˍ cawˬ ve chaw geh daꞈ ve laiˉ ceuˬ cawˬ la ve yoˬ. “Nawˬ heuˆ gaˇ ve awˬ ceuˬ hkʼaˬ ve teˇ ceuˬ maˇ kʼoˆ, oˇ ve htaꞈ ca tehˆ daꞈ maˇ gʼa. . . . Cuˇ yiˍ cawˬ ve chaw lehˬ ha lehˬ ha kʼa gʼa chehˇ ve yoˬ. Cuˇ yiˍ yawˇ htaꞈ a shaꞈ teꞈ chehˇ piˇ lawˬ tuˬ yoˬ.” (Tawˇ 3:13-18) Yeˍsuˆ kʼoˆ ve, “awˬ ceuˬ chi teˇ hpaˍ htaꞈ nawˬ hui shiˍ leh, shiˍ ve hkʼe te ve kʼo, nawˬ hui awˬ bon uiˍ ve yoˬ.” (Yoˇ 13:17) Yeˍsuˆ ve awˬ laꞈ gʼawˇ yawˇ kʼoˆ ve hkʼe gʼaꞈ te ve kʼo, awˬ bon gʼa leh ha lehˬ tuˬ yoˬ. Yeˍsuˆ te ve leh maˍ ve awˬ hkʼaˇ suh yawˇ hui gʼaꞈ te ve yoˬ. w18.09 4 ¶4-5

Eˍdenˍ hko hkʼaw Aˍdanˍ leh Eˉvaꞈ 2 gʼaˇ tiˉ chehˇ ve htawˇ, shu htaꞈ kaꞈ dawˇ nyi cawˇ ve yoˬ. Aˬ htoꞈ ma pa taw le? Yaˬhoˉvaˬ yawˇ hui htaꞈ kanˉ te tcuh ve yoˬ. Yawˇ hui miˬ guiˬ hkʼoˆ yaˇ hkʼa biˇ cawˬ la leh Paˍraˍdiˇsuˆ hpehꞈ la piˇ˗oˆ tehꞈ kʼoˆ piˇ ve yoˬ. (Awˬ 1:28) Yaˬhoˉvaˬ teˇ gʼaˇ le le htaꞈ ha lehˬ tcuh gaˇ ve hkʼa shuˍ Aˍdanˍ leh Eˉvaꞈ kaꞈ yawˇ hui ve yaˇ htaꞈ ha lehˬ tcuh gaˇ ve yoˬ. Gʼuiˬ sha yawˇ hui htaꞈ kanˉ teˇ geh te tcuh leh miˬ guiˬ hkʼa peu˗eˬ Paˍraˍdiˇsuˆ hpehꞈ la tcuh ve yoˬ. Kanˉ chi ve a yeˇ uiˍ jaˇ! Miˬ guiˬ chi hkʼoˆ Paˍraˍdiˇsuˆ hpehꞈ la tuˬ biˇ ve chaw yaˇ lehˬ Yaˬhoˉvaˬ awˬ paˇ lo kanˉ teˇ geh te leh yawˇ loˍ ve hkʼe te gʼa tuˬ yoˬ. Awˬ hkʼaˇ chi ve lehˬ yawˇ hui Gʼuiˬ sha ve gʼaˇ jehˇ kuiˬ lo loꞈ˗e gʼa ve yoˬ. (Heˍ 4:11) Kanˉ chi ve hkʼaˬ hkʼe taw nyi hkʼaˇ suh leh ha lehˬ tuˬ te laˇ ve htaꞈ dawˇ˗a nyi sheˍ! Yawˇ hui a shu yawˇ awˬ pon tiˉ maˇ dawˇ nyi leh shu htaꞈ dawˇ nyi htaˇ, Yaˬhoˉvaˬ awˬ bon maˇ maˇ naꞈ piˇ tuˬ yoˬ. w18.08 15 ¶2; 17 ¶8-9

Chaw teˇ hpaˍ nawˬ htaꞈ caˉ daꞈ ve maˇ daꞈ ve awˬ lawn heˍ leh kʼoˆ ve kʼo, nawˬ hkʼaˬ hkʼe te tuˬ le? Yeˍsuˆ leh Baˆtiˆsaˬ piˇ paˍ Yoˇhanˬ kaꞈ chi hkʼe ve gʼa hpuˇ jaw ve yoˬ. (Maꞈ 11:18, 19) Yeˍsuˆ hkʼaˬ hkʼe te ve le? Awˬ lawn oˇ ve awˬ tehˬ maˇ heˆ ve tehꞈ teˇ gʼaˇ le le yonˍ tuˬ, Yeˍsuˆ awˬ yanˇ leh awˬ gʼaˇ maˇ yehˇ. Yaꞈ hkʼaˇ, chaw yaˇ awˬ tehˬ ve htaꞈ shiˍ tuˬ yawˇ awˬ gʼaˇ piˇ ve yoˬ. Yawˇ te ve leh maˍ ve awˬ ceuˬ htaꞈ chaw yaˇ dawˇ nawˇ tcuh gaˇ ve yoˬ. Yeˍsuˆ kʼoˆ ve, “cuˇ yiˍ maˍ yiˍ teˇ ceuˬ lehˬ, yawˇ te ve kanˉ teˇ hpaˍ awˬ hkʼaw lo, hteˇ ve cawˇ ve htaꞈ shu gʼa shiˍ ve yoˬ.” (Maꞈ 11:19) Yeˍsuˆ ve awˬ lawn ngaˬ hui awˬ pon awˬ hpfuhˇ hkʼaˆ jaˇ. Teˇ pawˆ pawˆ kʼo, chaw yaˇ ngaˬ hui htaꞈ caˉ daꞈ ve maˇ daꞈ ve awˬ lawn kʼoˆ leh ngaˬ hui ve awˬ meh luˬ la ve htaꞈ hkiˉ ve yoˬ. Yaꞈ hkʼaˇ, ngaˬ hui awˬ tehˬ awˬ na hkʼaˬ hkʼe hpehꞈ ve ngaˬ hui ve a shaꞈ teꞈ hkʼaˇ hkʼaw hpeuꞈ maw piˇ gʼa ve yoˬ. Yeˍsuˆ ve awˬ lawn hkʼa shuˍ, shu kʼoˆ ve lehˬ maˇ hteˇ maˇ cawˇ ve tehꞈ ngaˬ hui ve te hkʼaˇ dawˇ hkʼaˇ htaꞈ cuˇ leh hpeuꞈ maw piˇ gʼa ve yoˬ. w18.08 6-7 ¶11-13

Kaˍiˉnaˆ, Sawˉlaꞈmonˍ, leh Iˉsaˍreˍlaˆ chaw hui venˇ baˆ dawˇ hpfuhˆ leh yawˇ hui ve te hkʼaˇ dawˇ hkʼaˇ htaꞈ pa tuˬ awˬ yanˇ cawˬ ve yoˬ. (Tcuh 3:19) Yaˬhoˉvaˬ ve mvuhˇ miˬ yaˇ te yaꞈ ve htawˇ, yawˇ yawˇ hui htaꞈ maˇ dawˇ law ve maˇ heˆ. Yawˇ Aˍronˍ htaꞈ venˇ baˆ hpehˇ piˇ ve awˬ hkʼaˇ htaꞈ dawˇ nyi sheˍ. Chi beuꞈ teˇ co˗e ngaˬ hui yaꞈ ve htaꞈ maˇ gʼa te tuˬ Yaˬhoˉvaˬ haꞈ pehnˇ ve hkʼaw ngaˬ hui htaꞈ shaˍ tiꞈ peꞈ laˇ ve yoˬ. Liꞈ hpu, liꞈ kʼoˆ, leh awˬ viˉ awˬ nyi ngaˬ hui htaꞈ ga laˇ gʼa tuˬ chi teˇ hpaˍ htaꞈ yawˇ yehˇ ve yoˬ. Yaˬhoˉvaˬ shaˍ tiꞈ piˇ laˇ ve htaꞈ ngaˬ hui a yeˇ yuˬ ve kʼo, yawˇ ngaˬ hui htaꞈ ha kʼaˉ laˇ tuˬ tehꞈ ngaˬ hui yonˍ gʼa ve yoˬ. Yaˬhoˉvaˬ haꞈ pehnˇ uiˍ jaˇ ve ngaˬ hui htaꞈ peꞈ laˇ ve yoˬ. (2 Kawˇ 6:1) Awˬ ceuˬ chi ve ngaˬ hui “miˬ guiˬ htaꞈ caˉ daꞈ ve sheˉ lai ve teˇ hpaˍ htaꞈ baˬ taˉ tuˬ maˍ laˇ ve yoˬ.” (Tiˇ 2:11-14) Chi beuꞈ teˇ co˗e ngaˬ hui Yaˬhoˉvaˬ geh ka tiꞈ yeˬ ve htaꞈ gʼaˇ hteꞈ lawˇ nyi laˇ chehˇ ve yoˬ.Yaˬhoˉvaˬ hpawˇ hkʼa dehꞈ chehˇ tuˬ coˇ caˇ cawˇ ve yoˬ! w18.07 20 ¶20-21

Saˍtanˍ ve miˬ guiˬ maˇ heˆ, Yaˬhoˉvaˬ ngaˬ hui htaꞈ a yeˇ yuˬ laˇ tcuh gaˇ ve tehꞈ ngaˬ hui ve nyi ma hkʼaw dawˇ tuˬ, hkʼaˬ hkʼe gʼa te cawˇ ve le? Ngaˬ hui a yeˇ uiˍ ve awˬ tehˬ ve 2 ceuˬ htaꞈ gʼa tawnˇ taˍ ve yoˬ. Awˉ lawˉ teˇ ceuˬ lehˬ Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw htaꞈ hkʼaˬ htaˆ kaꞈ a yeˇ yuˬ ve yoˬ. (Heˍ 6:10; 11:6) Yaˬhoˉvaˬ awˬ pon kʼo, yawˇ ve kanˉ ka tiꞈ yeˬ ve hkʼaw te ve chaw teˇ gʼaˇ le le awˬ hpfuhˇ hkʼaˆ jaˇ. Yawˇ hui htaꞈ a yeˇ maˇ yuˬ ve kʼo, “maˇ hteˇ maˇ cawˇ ve” tehꞈ Yaˬhoˉvaˬ dawˇ ve yoˬ. Yawˇ hteˇ ve cawˇ ve chaw hui htaꞈ hkʼaˬ hkʼe haꞈ shaˉ piˇ tuˬ yawˇ shiˍ ve yoˬ. (Chiˇ 1:6; 2 Peˍ 2:9) Awˬ tehˬ ve nyiˇ ceuˬ teˇ ceuˬ lehˬ ngaˬ hui maˇ dawˇ maˇ gaˇ ve hkʼaw Yaˬhoˉvaˬ a yeˇ yuˬ laˇ gʼa ve tehꞈ ngaˬ hui tawnˇ taˍ cawˇ ve yoˬ. Chaw teˇ gʼaˇ shu chiˇ mvuh laˇ tuˬ ceh daꞈ ve htaꞈ te ve kʼo, Yaˬhoˉvaˬ yawˇ htaꞈ awˬ bon maˇ naꞈ piˇ. Awˬ lawn kʼo, Yeˍsuˆ kʼoˆ taˍ ve hkʼe, shu yawˇ htaꞈ chiˇ mvuh piˇ ve kʼo yawˇ awˬ bon gʼa peuˬ. (Maꞈ 6:1-5) Yaꞈ hkʼaˇ, “shu maˇ mawˬ kuiˬ lo mawˬ puiˉ ve nawˬ ve Awˬ pa” Yaˬhoˉvaˬ lehˬ chaw teˇ gʼaˇ daꞈ ve htaꞈ te ve htawˇ chiˇ mvuh piˇ ve htaꞈ maˇ gʼa ve yawˇ mawˬ ve yoˬ. Yawˇ te chehˇ ve awˬ ceuˬ Yaˬhoˉvaˬ chaˬ nyi chehˇ leh yawˇ htaꞈ awˬ bon naꞈ piˇ ve yoˬ. w18.07 5 ¶8, 10

Awˬ hkawˇ oˇ ve Peˍtruˆ htaꞈ aˬ htoꞈ ma kʼoˆ piˇ gaˇ ve yawˇ maˇ na gʼa. Oˇ ve teˇ yanˇ, Kawˍneˍliˆ tcuh peu laˇ ve chaw kaꞈ gaˬ la ve yoˬ. Daꞈ kehˬ ve awˬ ha hpu Peˍtruˆ Kawˍneˍliˆ ve aˉ hkʼaw kʼai tuˬ beˆ maˍ piˇ ve yoˬ. Chi htaꞈ pa taw Peˍtruˆ Kawˍneˍliˆ tcuh peu laˇ ve chaw geh kʼai ve yoˬ. Peˍtruˆ “mawˬ ve awˬ ceuˬ htaꞈ ceh nyi” leh dawˇ cheˆ ve kʼo, yawˇ Kawˍneˍliˆ ve aˉ hkʼaw lo maˇ kʼai taˍ. Yuˇdaꞈ chaw buiˇ shaˆ aˉ naˆ chaw ve aˉ hkʼaw lo maˇ kʼai jaw. Hkʼe kʼo, aˬ htoꞈ ma te Peˍtruˆ kʼai ve le? Yawˇ buiˇ shaˆ aˉ naˆ chaw htaꞈ nyi cha jaw ve htawˇ, yawˇ gʼa mawˬ ve zuhꞈ maˆ lehˬ Gʼuiˬ sha ve awˬ ha hpu daꞈ kehˬ ve yawˇ htaꞈ beˆ maˍ piˇ leh yawˇ ve dawˇ hkʼaˇ pa tuˬ te piˇ ve yoˬ. Kawˍneˍliˆ kʼoˆ ve htaꞈ Peˍtruˆ na peuˬ hkʼawꞈ nawˉ yawˇ kʼoˆ ve, “Gʼuiˬ sha lehˬ chaw mehˆ hpfuhˇ htaꞈ maˇ nyi ve ngaˬ awˬ tehˬ awˬ na gʼa shiˍ ve yoˬ. Chaw teˇ ceuˬ le le awˬ hkʼaw lo Gʼuiˬ sha htaꞈ kawˆ leh, hteˇ ve cawˇ ve htaꞈ te ve chaw teˇ gʼaˇ htaꞈ yawˇ nyi ma cawˇ ve yoˬ.” (Tcuh 10:34, 35) Na gʼa ve awˬ suhˉ chi Peˍtruˆ anˇ tuˬ te piˇ leh chi ve Hkriꞈ yaˇ htaꞈ heuˆ la kuiˬ cawˬ ve yoˬ. w18.08 10 ¶3-4

Gʼuiˬ sha canˇ ve awˬ ceuˬ htaꞈ ngaˬ hui gʼa vuiˇ daꞈ ve yoˬ. Yaꞈ hkʼaˇ, Liꞈ hpu hkʼaw bvuhꞈ taˍ ve awˬ liˇ awˬ hkʼaˇ hkʼa dehꞈ maˇ kʼoˆ taˍ laˇ ve kʼo, ngaˬ hui hkʼaˬ hkʼe te tuˬ le? Gʼuiˬ sha ngaˬ hui htaꞈ aˬ htoꞈ ma te tcuh gaˇ ve ngaˬ hui hkʼaˬ hkʼe shiˍ gʼa tuˬ le? Liꞈ hpu hkʼaw ve awˬ lawn ngaˬ hui ve dawˇ shiˍ puiˉ ve nyi ma htaꞈ maˍ laˇ tcuh ve kʼo, cuˇ yiˍ cawˬ ve hkʼaw dawˇ cheˆ gʼa ve yoˬ. Yaˬhoˉvaˬ ngaˬ hui htaꞈ haꞈ ve pa taw, ngaˬ hui ve dawˇ shiˍ puiˉ ve nyi ma htaꞈ beˆ maˍ laˇ tuˬ yawˇ ve awˬ liˇ awˬ hkʼaˇ gu teh taˍ laˇ ve yoˬ. Yawˇ kʼoˆ ve, “ngaˬ lehˬ nawˬ hui ve Gʼuiˬ sha hpehꞈ leh, nawˬ hui daꞈ la tuˬ maˍ laˇ shehˍ hpaˇ leh nawˬ hui kʼai cawˇ ve yaꞈ kʼaw htaꞈ beˆ maˍ laˇ shehˍ hpaˇ hpehꞈ ve yoˬ.” (Isy 48:17, 18) Liꞈ hpu hkʼaw Gʼuiˬ sha ve awˬ liˇ awˬ hkʼaˇ htaꞈ ngaˬ hui hkʼa dehꞈ dawˇ nyi leh Gʼuiˬ sha ve awˬ liˇ awˬ hkʼaˇ oˇ ve ngaˬ hui ve nyi ma hkʼaw gaˬ tcuh ve kʼo, dawˇ shiˍ puiˉ ve nyi ma htaꞈ pa leh gu gʼa ve yoˬ. Chi hkʼe te ve kʼo, ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ ga laˇ ve yoˬ. Gʼuiˬ sha ve awˬ liˇ awˬ hkʼaˇ ngaˬ hui htaꞈ beˆ maˍ laˇ tuˬ awˬ tehˬ ve awˬ hkuiˉ puiˍ hpehꞈ ve, ngaˬ hui hkʼa dehꞈ dawˇ cheˆ tuˬ ga laˇ ve yoˬ. Yaˬhoˉvaˬ ve awˬ liˇ awˬ hkʼaˇ ngaˬ hui shiˍ ve kʼo, yawˇ ve dawˇ hkʼaˇ leh aˬ htoꞈ ma pa taw yawˇ awˬ liˇ awˬ hkʼaˇ peꞈ laˇ ve htaꞈ ngaˬ hui na gʼa tuˬ yoˬ. w18.06 16 ¶5; 17-18 ¶8-10

Jawˇmawˇ Heˍroˆ dawˇ ve hkʼe dawˇ ve chaw awˬ moˍ teˇ moˍ htaꞈ yawˇ hui awˬ hkawnˍ maˇ keu cawˇ tehꞈ Yeˍsuˆ htaꞈ kʼoˆ tcuh gaˇ ve yoˬ. Yeˍsuˆ oˇ hkʼe kʼoˆ ve kʼo, yawˇ hui Yeˍsuˆ htaꞈ yaꞈ kuiˬ ca gʼa ve yoˬ. Yeˍsuˆ awˬ hkawnˍ taˇ keu tehꞈ kʼoˆ ve kʼo, Roˉmaꞈ mvuhˇ miˬ ve canˇ paˍ tehꞈ yawˇ hui kʼoˆ gʼa ve yoˬ. Yaꞈ hkʼaˇ, Yeˍsuˆ yawˇ hui htaꞈ awˬ hkawnˍ keu cawˇ ve tehꞈ kʼoˆ piˇ ve kʼo, yawˇ hui Yeˍsuˆ awˬ hkʼaˇ suh maˇ gʼaꞈ yuˬ taˬ. Oˇ hkʼe hpehꞈ ve kʼo Yeˍsuˆ hkʼaˬ hkʼe te ve le? Yeˍsuˆ choˬ paˉ oˇ paˉ maˇ chehˇ tuˬ shaˍ tiꞈ te jaˇ. Awˬ hkawnˍ gʼawˆ ve chaw laiˉ gʼaˇ maˇ hteˇ maˇ cawˇ. Yaꞈ hkʼaˇ, Yeˍsuˆ a yeˇ maˇ te. Chaw yaˇ gʼa hpuˇ chehˇ ve htaꞈ gu piˇ gʼa tuˬ oˇ ve lehˬ Gʼuiˬ sha ve mvuhˇ miˬ hpehꞈ ve yoˬ. Yeˍsuˆ ngaˬ hui awˬ pon daꞈ ve henˇ yuˬ tuˬ te maˍ laˇ ve yoˬ. Nyi˗a kʼo teˇ hpawˇ lo cawˇ ve teˇ hpawˇ lo maˇ cawˇ ve htawˇ, mvuhˇ miˬ uˉ peunˍ ve teˇ hpawˇ˗ehˬ kaꞈ ngaˬ hui maˇ dawˇ cawˇ cawˇ. Hkriꞈ yaˇ Gʼuiˬ sha ve mvuhˇ miˬ leh Gʼuiˬ sha cawˇ ve tehꞈ kʼoˆ laˇ ve htaꞈ dawˇ nyi cawˇ ve yoˬ. Chi htaꞈ pa taw, maˇ hteˇ maˇ cawˇ ve htaꞈ ngaˬ hui maˇ dawˇ nyi cawˇ leh awˬ lawn chi hkʼe ve kaꞈ maˇ kʼoˆ daꞈ cawˇ. (Maꞈ 6:33) Yaˬhoˉvaˬ ve Shaˉhkiˆhkanˍ ve chaw mvuhˇ miˬ uˉ peunˍ ve awˬ lawn htaꞈ dawˇ cawˇ jaw ve yoˬ. Yaꞈ hkʼaˇ, yawˇ hui dawˇ hkʼaˇ oˇ hkʼe ve htaꞈ yuˬ baˬ gʼa ve yoˬ. w18.06 6 ¶9-11

Mvuhˇ naw ma tcuh yaˇ htaꞈ beˬ yuˬ tuˬ Saˍtanˍ pehꞈ ve tzuhˆ ve ceh tiˉ yehˇ ve maˇ heˆ. Yawˇ hui chaw yaˇ hkʼa peu˗eˬ hkʼoˆ kanˇ paˆ cawˬ tuˬ kaꞈ Saˍtanˍ ka tiꞈ te piˇ ve yoˬ hehˉ. Chi htaꞈ pa taw, “yaˇ miˇ ve awˬ yaˇ awˬ duˬ” htaꞈ caˉ daꞈ ve Yaˬhoˉvaˬ ve tcuh kaˍ paˍ tawˇ hkawˇ maˇ gʼa biˇ la tuˬ, Saˍtanˍ coˇ caˇ ve yoˬ. (Awˬ 3:15) Yaꞈ hkʼaˇ, Yaˬhoˉvaˬ Saˍtanˍ htaꞈ maˇ te gʼa tcuh. Saˍtanˍ leh neˇ teˇ hpaˍ dawˇ teh taˍ ve hkʼa peu˗eˬ htaꞈ te luˬ tuˬ, Yaˬhoˉvaˬ iˉ kaˆ lonˉ htonˍ tcuh ve yoˬ. Pehꞈ ve tzuhˆ ve leh uiˍ muiˬ caˆ muiˬ ve lehˬ daꞈ ve va hpehꞈ ve yoˬ. Saˍtanˍ hpawˇ chehˇ ve mvuhˇ naw ma tcuh yaˇ Yaˬhoˉvaˬ geh laiˉ hkʼawꞈ chehˇ jaw ve yoˬ! Yaꞈ hkʼaˇ, yawˇ hui laiˉ gʼaˇ maˇ daꞈ ve dawˇ hkʼaˇ nyi ma hkʼaw cawˬ tcuh leh uiˍ la tcuh ve yoˬ. Ngaˬ hui Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ, maˇ daꞈ ve dawˇ hkʼaˇ nyi ma hkʼaw cawˬ leh uiˍ la gʼa ve tehꞈ hkʼaˬ htaˆ kaꞈ tawnˇ taˍ cawˇ ve yoˬ. (1 Kawˇ 10:12) Chi htaꞈ pa taw, ngaˬ hui ve nyi ma hkʼaw hkʼaˬ htaˆ kaꞈ chaˬ nyi leh pehꞈ ve tzuhˆ ve leh uiˍ muiˬ caˆ muiˬ ve yuˬ baˬ cawˇ ve yoˬ!—Gaˍ 5:26; Kawˇ 3:5. w18.05 18 ¶11-12

Yuˇdaꞈ chaw Gʼuiˬ sha ve mvuhˇ miˬ ha lehˬ ve bon hkawˇ htaꞈ maˇ haꞈ yuˬ htaˇ, Pawˇluꞈ awˬ gʼaˇ nuˇ ve tehꞈ ngaˬ hui shiˍ ve yoˬ. Yaꞈ hkʼaˇ, Pawˇluꞈ yawˇ hui htaꞈ ha lehˬ ve bon hkawˇ maˍ piˇ ve maˇ jehˇ jaw. Yuˇdaꞈ chaw htaꞈ kʼoˆ htaˇ Pawˇluꞈ kʼoˆ ve, “Iˉsaˍreˍlaˆ chaw hui htaiˍ hkʼawꞈ ve htaꞈ gʼa tuˬ, ngaˬ nyi ma cawˇ jaˇ leh, yawˇ hui awˬ pon Gʼuiˬ sha htaꞈ ngaˬ bon lawˬ chehˇ ve yoˬ. Awˬ lawn kʼo, yawˇ hui lehˬ Gʼuiˬ sha awˬ pon nyi ma pfuhˇ jaˇ ve htaꞈ ngaˬ shaˉ hkiˆ hkanˍ ve yoˬ. Yaꞈ hkʼaˇ, yawˇ hui shiˍ leh te ve teˇ ceuˬ maˇ heˆ.” (Roˉ 10:1, 2) Pawˇluꞈ awˉ lawˉ teˇ pawˆ kʼoˆ ve yawˇ Yuˇdaꞈ chaw htaꞈ bon maˍ piˇ tuˬ awˬ gʼaˇ gʼa ve pa taw yawˇ, ‘nyi ma cawˇ jaˇ.’ Pawˇluꞈ yawˇ hui htaꞈ awˬ tehˬ awˬ na ponˬ tcuh gaˇ jaˇ. (Roˉ 11:13, 14) Yuˇdaꞈ chaw teˇ gʼaˇ leh teˇ gʼaˇ Gʼuiˬ sha ve mvuhˇ miˬ htaꞈ caˉ daꞈ ve haꞈ yuˬ tuˬ ve Pawˇluꞈ Yaˬhoˉvaˬ geh lawˬ ve yoˬ. Pawˇluꞈ kʼoˆ ve, “yawˇ hui lehˬ Gʼuiˬ sha awˬ pon nyi ma pfuhˇ jaˇ.” Yawˇ hui Yaˬhoˉvaˬ ve kanˉ te la gʼa ve tehꞈ Pawˇluꞈ nyi mawˬ ve yoˬ. Pawˇluꞈ hkʼa shuˍ shuˍ Yuˇdaꞈ chaw nyi ma pfuhˇ ve Yeˍsuˆ ve awˬ laꞈ gʼawˇ nyi ma pfuhˇ ve pa la gʼa ve tehꞈ yawˇ shiˍ ve yoˬ. w18.05 4 ¶4; 7-8 ¶13-14

Shu htaꞈ ga piˇ tuˬ, yawˇ hui aˬ htoꞈ ma loˍ ve ngaˬ hui dawˇ nyi cawˇ ve yoˬ. Pawˇluꞈ Heˍbrehˇ chaw Hkriꞈ yaˇ htaꞈ liꞈ bvuhꞈ piˇ ve, “nawˬ hui ve laꞈ sheh deu lehˍ te chehˇ ve teˇ hpaˍ htaꞈ chiˇ leh, awˬ gʼaˇ maˇ cawˬ ve hkui tcuhˉ kʼu teˇ hpaˍ htaꞈ awˬ gʼaˇ cawˬ la piˇ˗oˆ. Hkui sheh luˬ ve chaw teˇ hpaˍ awˬ tcuhˉ maˇ gʼa jiˆ kʼai leh na˗e la tuˬ, nawˬ hui ve hkui sheh awˬ pon yaꞈ kʼaw hteˇ lehˍ gu taˍ˗oꞈ.” (Heˍ 12:12, 13) Ngaˬ hui awˬ gʼaˇ cawˬ tuˬ ga daꞈ leh awˬ gʼaˇ piˇ daꞈ gʼa ve yoˬ. A shaꞈ i sheˍ ve htawˇ te gʼa ve yoˬ. Pawˇluꞈ kʼoˆ ve, “hkʼe te leh, Hkriꞈ awˬ hkʼaw lo awˬ gʼaˇ gʼa ve teˇ ceuˬ maˇ kʼoˆ, haꞈ pehnˇ ve awˬ hkʼaˇ suh kʼai ve teˇ ceuˬ maˇ kʼoˆ, Awˬ ha hpu awˬ hkʼaw lo awˬ chawˇ te ve teˇ ceuˬ maˇ kʼoˆ, shu htaꞈ dawˇ nyi leh ha kʼaˉ puiˉ ve teˇ ceuˬ maˇ kʼoˆ, chi teˇ hpaˍ nawˬ hui awˬ hkʼaw lo cawˬ ve kʼo, . . . nawˬ hui nyi ma teˇ shiˍ tiˉ, haꞈ daꞈ pehnˇ daꞈ ve teˇ ceuˬ tiˉ leh, nyi ma dawˇ hkʼaˇ taˍ hkʼaˇ teˇ hkʼaˇ tiˉ cawˬ piˇ˗oˆ. Hkʼaˬ ve teˇ ceuˬ htawˇ maˇ kʼoˆ, tawˇ gʼawˬ daꞈ leh nyi ma uiˍ ve awˬ hkʼaw lo taˇ te. Yaꞈ hkʼaˇ, nyi ma nuˇ nehˬ ve awˬ hkʼaw lo, teˇ gʼaˇ leh teˇ gʼaˇ a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ˗oˆ. A shu yawˇ awˬ to htaꞈ caˉ daꞈ ve awˬ lawn teˇ hpaˍ htaꞈ ceh tiˉ taˇ dawˇ nyi. Yaꞈ hkʼaˇ, shu htaꞈ caˉ daꞈ ve awˬ lawn teˇ hpaˍ htaꞈ htawˇ dawˇ nyi˗o.”—Hpi 2:1-4. w18.04 23 ¶10; 24 ¶12

Ngaˬ hui ve awˬ gʼaˇ awˬ shaˉ hkʼa peu˗eˬ Yaˬhoˉvaˬ ve kanˉ te tuˬ, yawˇ Yeˍsuˆ htaꞈ cuˇ leh venˇ baˆ leh suh ve awˬ hawˉ lo ngaˬ hui htaꞈ ponˬ laˇ ve yoˬ. Ngaˬ hui leuˆ yuˬ ve a hkaw˗anˬ daꞈ jaˇ ve hpawˇ yehˇ tuˬ, ngaˬ hui ve awˬ gʼaˇ awˬ shaˉ leh awˬ yanˇ yehˇ leh Yaˬhoˉvaˬ ve kanˉ te cawˇ ve yoˬ. Ngaˬ hui chi hkʼe te ve kʼo, miˬ guiˬ chi hkʼoˆ dawˇ teh taˍ ve awˬ ceuˬ leh ngaˬ hui dawˇ cawˇ ve awˬ ceuˬ htaꞈ a shaꞈ teꞈ kuiˬ hkʼaw a yeˇ uiˍ jaˇ ve maˇ te tcuh. (Gaˍ 5:16) Noˉaꞈ leh yawˇ ve yehˬ kʼa hkʼaˬ hkʼe te ve le dawˇ nyi sheˍ. Yawˇ hui ve awˬ co˗e htaˇ, haiˬ ve leh pehꞈ ve tzuhˆ ve maˇ jaˇ. Yaꞈ hkʼaˇ, yawˇ hui awˬ paˇ awˬ kui chehˇ ve chaw hkʼe maˇ te. Yaˬhoˉvaˬ piˇ ve kanˉ htaꞈ yawˇ hui kaiˬ ve hkʼaw te ve yoˬ. Yawˇ hui haw loꞈ kʼoˍ lonˉ te leh, yawˇ hui leh to nuˇ to shaˆ awˬ pon caˇ tuˬ gu teh leh, iˉ kaˆ htonˍ tuˬ yoˬ tehꞈ awˬ nu ve chaw htaꞈ shaˍ tiꞈ piˇ ve yoˬ. “Gʼuiˬ sha yawˇ htaꞈ hkʼa kʼoˆ piˇ taˍ ve hkʼa peu˗eˬ htaꞈ Noˉaꞈ na yuˬ leh te ve yoˬ.” (Awˬ 6:22) Chi htaꞈ pa taw, Noˉaꞈ leh yawˇ ve yehˬ kʼa haiˬ ve miˬ guiˬ oˇ ve htaꞈ gʼa ponˬ ve yoˬ.—Heˍ 11:7. w18.04 11 ¶8; 12 ¶11-12

Saˍtanˍ leh neˇ teˇ hpaˍ maˇ heˆ heˆ ve bon liˇ leh tanˇ kaˬ hkʼaˇ htaꞈ yehˇ leh “miˬ guiˬ yaˇ hkʼa peu˗eˬ” htaꞈ beˬ yuˬ ve yoˬ. (Hpeuꞈ 12:9) Saˍtanˍ Yaˬhoˉvaˬ htaꞈ caˉ daꞈ ve awˬ lawn heˍ tuˬ maˇ heˆ heˆ ve bon liˇ htaꞈ cuˇ ve yoˬ. Yawˇ Gʼuiˬ sha ve awˬ meh htaꞈ yuˬ faˉ tuˬ kaꞈ coˇ caˇ ve yoˬ. (Yrm 23:26, 27) Chi htaꞈ pa taw, teˇ hpaˍ hpaˍ nyi ma awˬ tawˍ hkʼa gaˬ Gʼuiˬ sha htaꞈ oˉ kʼoˍ pui ve tehꞈ dawˇ ve htawˇ, yawˇ hui neˇ teˇ hpaˍ htaꞈ oˉ kʼoˍ pui chehˇ ve yoˬ. (1 Kawˇ 10:20; 2 Kawˇ 11:13-15) Saˍtanˍ tanˇ kaˬ hkʼaˇ htaꞈ kaꞈ cuˇ leh heˍ ve yoˬ. Tawˇ pa haˉ te kʼo, hpu shi mawˇ jeˬ yawˇ hui ha lehˬ tuˬ te laˇ gʼa ve tehꞈ Saˍtanˍ heˍ chehˇ ve yoˬ. (Tawˇ 18:11) Saˍtanˍ heˍ ve tawˇ chi teˇ hpaˍ htaꞈ yonˍ ve chaw lehˬ “hpu shi mawˇ jeˬ” ve awˬ ceˬ te chehˇ ve Gʼuiˬ sha ve awˬ ceˬ te ve maˇ heˆ. (Maꞈ 6:24) Teˇ hpaˍ hpaˍ Gʼuiˬ sha htaꞈ haꞈ jaw ve htawˇ, hpu shi mawˇ jeˬ htaꞈ haꞈ maˇ ve pa taw, Gʼuiˬ sha htaꞈ haꞈ ve i kʼai ve yoˬ.—Maꞈ 13:22; 1 Yoˇ 2:15, 16. w18.05 16-17 ¶6-7