Ha pa 3 maˬ

Shu ngaˬ hui htaꞈ maˇ nyi bawˬ tcuh gaˇ leh yonˍ ve htaꞈ pa taw, fawˉ mehˍ laˇ ve htaꞈ kaꞈ ngaˬ hui maˇ dawˇ cawˇ. Hkʼe kʼo, shu nyi bawˬ laˇ ve htawˇ, aˬ htoꞈ ma te ngaˬ hui ha lehˬ gʼa sheˍ ve le? 3 hkʼaˇ htaꞈ teˇ geh nyi sheˍ. (1) Ngaˬ hui yeunˇ hkanˍ ve kʼo, Yaˬhoˉvaˬ nyi hkʼaˇ suh tuˬ te piˇ ve. (1 Peˍ 4:13, 14) (2) Ngaˬ hui ve yonˍ hkʼaˇ uiˍ la mvuh la ve. (1 Peˍ 1:7) Leh, (3) ngaˬ hui laꞈ shawnˍ gʼa tuˬ ve lehˬ co co taiˍ taiˍ ve a shaꞈ yoˬ. (Roˉ 2:6, 7) Yeˍsuˆ kʼawꞈ teꞈ tuˬ la ve maˇ maw sheˍ htaˇ, Yeˍsuˆ kʼoˆ ve, ha lehˬ ve tcuhˉ kuiˬ aˬ htoꞈ ma htaꞈ kʼoˆ gaˇ ve yawˇ hui na gʼa la ve yoˬ. Yawˇ hui htaꞈ jawꞈ piˇ leh bon maˇ maˍ toˇ tcuh ve yoˬ. Yaꞈ hkʼaˇ, yawˇ hui ha lehˬ gʼa sheˍ. Aˬ htoꞈ ma te chi hkʼe hpehꞈ ve le? ‘Tcuh yaˇ hui lehˬ Yeˍsuˆ ve awˬ meh htaꞈ pa taw maˇ shawˍ maˇ caˆ te piˇ ve htaꞈ gʼa hkanˍ ve yoˬ.’ (Tcuh 5:40-42) Yawˇ hui canˇ paˍ nyi bawˬ laˇ ve htaꞈ kawˆ ve aꞈ kehˉ Yeˍsuˆ htaꞈ haꞈ jaˇ. Yawˇ hui haꞈ pehnˇ ve chi htaꞈ pa taw, teˇ nyi le le bon maˍ ve maˇ jehˇ jaw. Chi beuꞈ teˇ co˗e ngaˬ hui ve awˬ viˉ awˬ nyi laiˉ gʼaˇ tuꞈ ve hkanˍ ve gʼa hpuˇ ve htawˇ, yawˇ hui ka tiꞈ yeˬ ve hkʼaw Gʼuiˬ sha ve kanˉ caˉ leh te ve yoˬ. Yawˇ hui Yaˬhoˉvaˬ ve kanˉ te ve leh, yawˇ ve awˬ meh htaꞈ haꞈ ve yawˇ maˇ leunˇ laˇ tehꞈ shiˍ ve yoˬ. w21.03 25 ¶18-19

Leuˆ yuˬ taˍ ve Hkriꞈ yaˇ paw la htaˇ kaꞈ mvuhˇ naw ma hkʼoˆ taˆ˗e tuˬ dawˇ law taˍ ve maˇ heˆ. Hkʼawꞈ nawˉ htaˇ dawˇ law kuiˬ chi ve Yaˬhoˉvaˬ yawˇ hui nyi ma hkʼaw cawˬ tcuh ve yoˬ. Yawˇ hui lehˬ dawˇ law kuiˬ htaꞈ dawˇ nyi leh, awˬ lawn chi htaꞈ caˉ daꞈ ve bon lawˬ leh, mvuhˇ naw ma hkʼoˆ lo laꞈ shawnˍ gʼa tuˬ htaꞈ dawˇ law taˍ ve yoˬ. Mvuhˇ naw ma hkʼoˆ yawˇ hui ve awˬ to hkʼaˬ hkʼe hpehꞈ tuˬ maˇ shiˍ ve htawˇ, yawˇ hui Gʼuiˬ sha ve mvuhˇ miˬ hkʼaw gʼa chehˇ tuˬ dawˇ law taˍ ve yoˬ. (Hpi 3:20, 21; 1 Yoˇ 3:2) Awˬ kaˍ awˬ nu ve yawˬ miˬ guiˬ hkʼoˆ lo co co taiˍ taiˍ a shaꞈ gʼa tuˬ dawˇ law taˍ ve, chi lehˬ chaw yaˇ ve dawˇ law kuiˬ hpehꞈ ve yoˬ. Yawˇ hui miˬ guiˬ hkʼoˆ daꞈ jaˇ ve Paˍraˍdiˇsuˆ hko hpehꞈ tuˬ gʼa ga daꞈ tuˬ dawˇ law taˍ ve yoˬ. Yawˇ hui a shu yawˇ ve yehˬ gʼa te ve, daꞈ jaˇ ve hko gʼa te ve, awˬ hawehˬ awˬ haˆ gʼa hu ve, leh oˇ ve teˇ yanˇ teˇ gʼaˇ le le chehˇ sha cawˬ sha leh awˬ gʼaˇ uiˍ tuˬ yoˬ. (Isy 65:21-23) Yawˇ hui laiˉ kaˬ lo gʼa ca guiˇ˗e ve, hkʼaw hkʼoˆ lo gʼa taˆ˗e ve, laˇ tsuhˇ gʼuiˬ lo gʼa kʼai ve, leh Gʼuiˬ sha hpanˍ taˍ ve awˬ ceuˬ htaꞈ gʼa chaˬ nyi tuˬ yoˬ. Leh yawˇ hui htaꞈ ha lehˬ jaˇ tuˬ te piˇ ve lehˬ, yawˇ hui Yaˬhoˉvaˬ geh gʼaˇ hteꞈ meuˆ daꞈ tuˬ yoˬ. w21.01 18-19 ¶17-18

Baˍbuˍlonˍ chaw ca te luˬ la peuˬ hkʼawꞈ nawˉ, shu kʼoˆ daꞈ ve, “mvuhˇ miˬ chi lehˬ, chaw yaˇ maˇ kʼoˆ, to nuˇ to shaˆ maˇ kʼoˆ, chehˇ maˇ hpehꞈ ve gawˬ cu gawˬ pehˆ ve mvuhˇ miˬ hpehꞈ leh, Baˍbuˍlonˍ jawˇ mawˇ htaꞈ chiˇ aꞈ piˇ peuˬ ve mvuhˇ miˬ hpehꞈ ve yoˬ.” (Yrm 32:43) Yawˇlaˆ tcuh kaˍ paˍ ve tawˇ hkawˇ kʼoˆ ve aˬ laˬ hkʼe 200 hkʼawꞈ peuˬ hkʼawꞈ nawˉ, ca bawˆ la ve chi htaꞈ caˉ daꞈ ve awˬ nu ve tcuh kaˍ paˍ ve tawˇ hkawˇ Yaˬhoˉvaˬ Yeˍraˍmiˆ htaꞈ cuˇ leh kʼoˆ tcuh ve yoˬ. Yawˇ kʼoˆ ve ca bawˆ la ve chaw lehˬ, Iˉsaˍreˍlaˆ chaw te yaꞈ ve chaw hkʼa peu˗eˬ htaꞈ ca hpfuhˇ leh hpeh yuˬ ve yoˬ. “Gʼuiˬ sha kʼoˆ ve, chaw chi teˇ hpaˍ htaꞈ hpeh yuˬ tuˬ, ngaˬ lehˬ ngaˇ ca paˍ maˇ maˇ htaꞈ peuˬ laˇ tuˬ yoˬ. Lawˬ hkʼoꞈ haˉ hkʼoꞈ hkʼaw chehˇ taˍ ve chaw hui htaꞈ gʼaꞈ yuˬ tuˬ, ngaˬ lehˬ shaˍ bawˆ paˍ teˇ hpaˍ htaꞈ laˬ peu laˇ tuˬ yoˬ. Yawˇ hui te chehˇ ve venˇ baˆ awˬ pon, ngaˬ yawˇ hui htaꞈ nyiˇ pun hkanˍ tcuh piˇ tuˬ yoˬ.” Baˍbuˍlonˍ chaw Iˉsaˍreˍlaˆ chaw htaꞈ ca bawˆ la htaˇ, venˇ baˆ maˇ dawˇ hpfuhˆ ve chaw laˇ tsuhˇ laˇ shaˆ gʼuiˬ hkʼaw leh heh puiˉ hkʼaw teˇ kaˬ kaꞈ hpaw vaꞈ taˍ maˇ gʼa.—Yrm 16:16, 18. w20.04 5-6 ¶12-13

Kawˆ tuˬ uiˍ jaˇ ve awˬ yanˇ htaˇ, Lawˇtaˍ Yaˬhoˉvaˬ hkawˇ na yuˬ tuˬ haˆ haˆ maˇ te. Lawˇtaˍ a yeˇ maˇ te leh Yaˬhoˉvaˬ hkawˇ maˇ na ve tehꞈ ngaˬ hui dawˇ ve yoˬ. Yaꞈ hkʼaˇ, Gʼuiˬ sha yawˇ htaꞈ dawˇ law chehˇ sheˍ. “[Yaˬhoˉvaˬ] yawˇ hui htaꞈ ha kʼaˉ ve pa taw” mvuhˇ naw ma tcuh yaˇ oˇ ve nyiˇ gʼaˇ yawˇ hui ve laꞈ sheh htaꞈ gʼawˬ veu leh venˇ baˬ lo hkʼa gaˬ sheh tawˆ la piˇ ve yoˬ. (Awˬ 19:15, 16) Lawˇtaˍ htaꞈ Yaˬhoˉvaˬ ha kʼaˉ ve laiˉ ceuˬ cawˬ ve yoˬ. Yawˇ venˇ baˬ lo ve chaw htaꞈ kawˆ ve pa taw yehˬ hkʼaw tawˆ˗e tuˬ, htawˇ dawˇ nawˬ dawˇ cawˬ ve yoˬ. Miˬ tawˬ kuiˬ chi awˬ hkʼaw lo, awˬ tcuhˇ tawˆ ve awˬ hkʼoꞈ hkʼa biˇ cawˬ leh jawˇ mawˇ nyiˇ gʼaˇ je loꞈ˗e ve Lawˇtaˍ gʼa kaˇ jaw ve pa taw kawˆ ve yoˬ. (Awˬ 14:8-12) Lawˇtaˍ awˬ hpawˇ leh awˬ pa hpehꞈ ve yoˬ. Hkʼe te leh, yawˇ yehˬ kʼa htaꞈ dawˇ haˍ jaˇ. Chi hkʼoˆ kaꞈ, Lawˇtaˍ paw sha jaˇ. Sawˉdonˍ venˇ lo yawˇ cawˬ ve mawˇ leh yehˬ htaꞈ dawˇ haˍ ve yoˬ. (Awˬ 13:5, 6) Lawˇtaˍ Yaˬhoˉvaˬ hkawˇ laꞈ haˆ maˇ na yuˬ tuˬ awˬ ceuˬ chi teˇ hpaˍ htaꞈ maˇ dawˇ nyi cawˇ. Yaꞈ hkʼaˇ, Lawˇtaˍ te yaꞈ ve htaꞈ Yaˬhoˉvaˬ maˇ nyi leh yawˇ “hteˇ ve cawˇ ve” chaw hpehꞈ ve tehꞈ Yaˬhoˉvaˬ shawˍ ve yoˬ.—2 Peˍ 2:7, 8. w20.04 18 ¶13-14

Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw˗oˬ, chaw teˇ hpaˍ nawˬ yaˇ ehˉ htaˇ kaꞈ mawˬ leh awˬ yanˇ ponˬ kʼai maw jaˇ˗oˬ ve htawˇ, nawˬ yaˇ ehˉ hpehꞈ sheˍ ve tehꞈ dawˇ ve yoˬ. Nawˬ chaw mawˇ hpehꞈ˗oˬ ve tehꞈ yawˇ hui dawˇ tuˬ awˬ yanˇ gʼa yehˇ ve yoˬ. Yaꞈ hkʼaˇ, Yaˬhoˉvaˬ nawˬ htaꞈ awˬ htaꞈ hpawˇ ceh nyi ve maˇ heˆ tehꞈ nawˬ yonˍ gʼa ve yoˬ. Nawˬ hkʼaˬ hkʼe ve chaw hpehꞈ leh hkʼaˬ hkʼe taw te gʼa ve yawˇ shiˍ ve yoˬ. (1 Saˍ 16:7) A yeˇ uiˍ jaˇ ve lehˬ nawˬ Yaˬhoˉvaˬ geh gʼa meuˆ daꞈ ve yoˬ. Daˍviˆ chi hkʼe te ve lehˬ, Gʼuiˬ sha hpanˍ taˍ ve awˬ ceuˬ teˇ hpaˍ htaꞈ chaˬ nyi leh Gʼuiˬ sha htaꞈ caˉ daꞈ ve awˬ ceuˬ aˬ htoꞈ ma maˍ laˇ ve htaꞈ dawˇ nyi ve yoˬ. (Chiˇ 8:3, 4; 139:14; Roˉ 1:20) Peuˬ leh nawˬ Yaˬhoˉvaˬ geh awˬ gʼaˇ lawˬ gʼa ve yoˬ. Tawˇ pa haˉ te kʼo, nawˬ Shaˉhkiˆhkanˍ ve chaw hpehꞈ leh liꞈ henˇ yehˬ lo awˬ chawˇ kʼoˆ guiˇ gʼuiˬ guiˇ laˇ˗aw laˇ? Nawˬ chi hkʼe gʼa hpuˇ ve kʼo, yeunˇ hkanˍ gʼaˇ tuˬ Yaˬhoˉvaˬ geh bon lawˬ sheˍ. Liꞈ hpu, Liꞈ kʼoˆ, VDO, Gʼuiˬ sha ve kanˉ hkʼaˇ hkʼaw beˆ maˍ laˇ ve teˇ hpaˍ htaꞈ gʼaꞈ te sheˍ. Yaˬhoˉvaˬ nawˬ htaꞈ ga laˇ ve teˇ pawˆ le le nawˬ mawˬ htaˇ, nawˬ aˬ htoꞈ ma gʼa hpuˇ ve htawˇ maˇ kʼoˆ, yawˇ hkʼaˬ htaˆ kaꞈ ga laˇ chehˇ ve tehꞈ nawˬ yonˍ gʼa ve yoˬ. Nawˬ Yaˬhoˉvaˬ htaꞈ gʼaˇ va ve awˬ nu ve chaw mawˬ htaˇ, yawˇ hui kaꞈ nawˬ htaꞈ yonˍ gʼa ve yoˬ. w21.03 4 ¶7

Ngaˬ hui ve te hkʼaˇ dawˇ hkʼaˇ awˬ chawˇ htaꞈ kʼoˆ piˇ gaˇ ve yoˬ. Ngaˬ hui Yaˬhoˉvaˬ htaꞈ awˬ chawˇ te ve kʼo, chi hkʼe leˇ te hpehꞈ˗aw laˇ? Hpehꞈ ve yoˬ. Yaˬhoˉvaˬ ve te hkʼaˇ dawˇ hkʼaˇ ngaˬ hui shiˍ tuˬ Liꞈ hpu hkʼaw kʼoˆ maˍ laˇ taˍ ve yoˬ. Ngaˬ hui bon lawˬ htaˇ, nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ gʼa ve yoˬ. Yaˬhoˉvaˬ ngaˬ hui htaꞈ haꞈ ve awˬ chawˇ hpehꞈ ve yoˬ. Yawˇ ngaˬ hui ve bon lawˬ hkawˇ htaꞈ ceh na ve maˇ heˆ. Hkʼawꞈ laˇ ve yoˬ. Teˇ pawˆ pawˆ kʼo, bon lawˬ ve laꞈ haˆ hkʼawꞈ laˇ ve yoˬ. Teˇ pawˆ pawˆ kʼo, laiˉ pawˆ gʼa lawˬ ve yoˬ. Yaꞈ hkʼaˇ, keunˍ daꞈ cawˇ daꞈ ve awˬ yanˇ awˬ hkʼaw lo hkʼawꞈ laˇ tuˬ tehꞈ ngaˬ hui yonˍ gʼa ve yoˬ. Yaˬhoˉvaˬ hkʼawꞈ laˇ ve lehˬ ngaˬ hui dawˇ taˍ ve hkʼe maˇ heˆ. Tawˇ pa haˉ te kʼo, ngaˬ hui shoꞈ shaꞈ ve peuˬ˗e tuˬ te laˇ ve aꞈ kehˉ cuˇ yiˍ leh ngaˬ hui ‘hkanˍ hpehꞈ tuˬ’ awˬ gʼaˇ peꞈ laˇ ve yoˬ. (1 Kawˇ 10:13) Bon lawˬ ve teˇ ceuˬ daꞈ jaˇ ve tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le? Awˉ lawˉ teˇ ceuˬ lehˬ, “hkʼaˬ htaˆ kaꞈ bon lawˬ tcuhˉ taˍ˗oꞈ” Yaˬhoˉvaˬ beˆ maˍ laˇ ve htaꞈ ngaˬ hui na yuˬ ve yoˬ.—1 Hteˇ 5:17. w20.05 27-28 ¶7-8

Vuiˇ kuiˬ lo gʼuiˇ htaˇ gʼuiˇ ve chaw lehˬ maˇ gʼa pa˗e tuˬ yaꞈ kʼaw htaꞈ tiˉ gʼa nyi ve yoˬ. Yaꞈ hkʼaˇ, yawˇ pa˗e ve kʼo, teˇ pawˆ kʼaw tu leh haˆ gʼuiˇ kʼai ve yoˬ. Yawˇ aˬ htoꞈ ma te leh pa˗e ve htaꞈ a yeˇ maˇ yuˬ leh awˬ ti lo gaˬ leh laꞈ shawnˍ htaꞈ gʼa tuˬ a yeˇ yuˬ ve yoˬ. Ngaˬ hui a shaꞈ gʼa tuˬ gʼuiˇ ve pa taw, laiˉ pawˆ kʼo pa˗e ve yoˬ. Ngaˬ hui tawˇ yaw yaꞈ ve maˇ heˆ leh te yaꞈ ve yoˬ. Chi hkʼoˆ kaꞈ, ngaˬ hui geh gʼuiˇ chehˇ ve awˬ viˉ awˬ nyi ngaˬ hui pa˗e tuˬ maˇ heˆ leh nyi ma naˬ tuˬ te laˇ ve yoˬ. Chi anˇ tuˬ maˇ loˍ. Ngaˬ hui maˇ biˇ ve chaw hpehꞈ leh a shaꞈ gʼa tuˬ maˇ kʼoˍ ve yaꞈ kʼaw htaꞈ teˇ geh gʼuiˇ chehˇ ve yoˬ. Ngaˬ hui maˇ dawˇ maˇ gaˇ ve hkʼaw kʼoˆ yaꞈ la ve yoˬ. Awˬ viˉ awˬ nyi ngaˬ hui beuꞈ tuˬ te laˇ ve maˇ heˆ leh yawˇ htaꞈ nyi ma maˇ sha tuˬ te piˇ la ve yoˬ. Ngaˬ hui teˇ pawˆ pawˆ shu htaꞈ “venˇ baˆ taˍ daꞈ kuiˬ cawˬ” ve yoˬ. Teˇ pawˆ pawˆ kʼo, shu kaꞈ hkʼa shuˍ te laˇ ve yoˬ. (Kawˇ 3:13) Ngaˬ hui pa˗e tuˬ te laˇ ve htaꞈ a yeˇ yuˬ ve aꞈ kehˉ, ngaˬ hui gʼuˇ suhˍ lo ve laꞈ shawnˍ gʼa tuˬ htaꞈ a yeˇ yuˬ leh caˉ leh gʼuiˇ kʼai sheˍ. Ngaˬ hui chi hkʼe maˇ te leh beuꞈ chehˇ sheˍ ve kʼo, awˬ ti lo maˇ gaˬ leh laꞈ shawnˍ kaꞈ maˇ gʼa taˬ. Chi hkʼe ceh maˇ heˆ. Ngaˬ hui oˇ kaˬ lo pa˗e ve maˇ tu sheˍ ve kʼo, a shaꞈ gʼa tuˬ maˇ kʼoˍ ve yaꞈ kʼaw htaꞈ gʼuiˇ kʼai tuˬ shu htaꞈ ngaˬ hui tawˍ piˇ chehˇ ve yoˬ. w20.04 26 ¶1; 28 ¶8-9

Daˍyeˍlaˆ liꞈ hkʼaw tcuh kaˍ paˍ ve tawˇ hkawˇ chaw awˬ han lonˉ sho laiˉ ceuˬ yuˬ te taˍ ve htaꞈ kʼoˆ taˍ ve yoˬ. Chaw awˬ han lonˉ chi teˇ tawn leh teˇ tawn Gʼuiˬ sha ve chaw mvuhˇ miˬ uˉ peunˍ ve teˇ peˆ le le awˬ hawˉ lo chehˇ ve htaꞈ kʼoˆ gaˇ ve yoˬ. Mvuhˇ miˬ uˉ peunˍ ve chi awˬ yanˇ teˇ yanˇ leh teˇ yanˇ maˇ shuˍ daꞈ. Chaw awˬ han lonˉ chi ve hkui sheh sho leh jeꞈ yuˬ te taˍ ve lehˬ miˬ guiˬ hkʼoˆ ve kanˇ paˆ lonˉ Eˍgaˍlanˍ˗Aˍmeˬriˆkaꞈ htaꞈ kʼoˆ gaˇ ve yoˬ. Gʼuiˬ sha ve mvuhˇ miˬ, chaw yaˇ uˉ peunˍ ve hkʼa peu˗eˬ htaꞈ ca te luˬ la htaˇ, yawˇ hui uˉ peunˍ ve awˬ leh meuˇ teˇ moˍ hpehꞈ ve yoˬ. Miˬ guiˬ hkʼoˆ ve kanˇ paˆ lonˉ teˇ hpaˍ Gʼuiˬ sha ve chaw htaꞈ heuˆ la kuiˬ cawˬ ve tehꞈ tcuh yaˇ Yoˇhanˬ kʼoˆ taˍ ve yoˬ. Mvuhˇ miˬ chi ve teˇ hpaˍ haiˬ ve to nuˇ to shaˆ oˉ kʼoˍ suhˍ shiˍ htaꞈ yawˇ tehˆ taˍ ve yoˬ. Haiˬ ve to nuˇ to shaˆ oˉ kʼoˍ suhˍ shiˍ teˇ shiˍ lehˬ miˬ guiˬ hkʼoˆ ve kanˇ paˆ lonˉ Eˍgaˍlanˍ˗Aˍmeˬriˆkaꞈ htaꞈ kʼoˆ gaˇ ve yoˬ. Aˬ htoꞈ ma te awˬ lawn chi shiˍ ve a yeˇ uiˍ jaˇ ve le? Haiˬ ve to nuˇ to shaˆ chi oˉ kʼoˍ suhˍ shiˍ ceh cawˬ ve pa taw, oˉ kʼoˍ 8 shiˍ teˇ shiˍ cawˬ la maˇ gʼa. Yeˍsuˆ leh mvuhˇ naw ma tcuh yaˇ awˬ moˍ lonˉ, haiˬ ve to nuˇ to shaˆ chi ve htaꞈ ca te luˬ la htaˇ, haiˬ ve to nuˇ to shaˆ oˉ kʼoˍ suhˍ shiˍ teˇ shiˍ kanˇ paˆ cawˬ chehˇ sheˍ.—Hpeuꞈ 13:1, 2; 17:13, 14. w20.05 14-15 ¶11-12

Chi suhˉ˗ehˍ kʼoˆ ve kʼo, ngaˬ hui awˬ tehˬ ve a yeˇ uiˍ ve htaꞈ dawˇ nawˇ tuˬ te laˇ ve yoˬ. A shaꞈ Gʼuiˬ sha geh laˬ leh haꞈ pehnˇ ve kaꞈ yawˇ geh laˬ ve yoˬ. Yawˇ ngaˬ hui htaꞈ haꞈ jaˇ. Gʼuiˬ sha haꞈ pehnˇ ve htaꞈ pa taw, ngaˬ hui kawˆ tuˬ maˇ cawˬ ve, ha lehˬ ve, a shaꞈ awˬ hpfuhˇ cawˬ ve, tehꞈ dawˇ tuˬ te laˇ ve yoˬ. Hkriꞈ yaˇ awˬ pon haꞈ pehnˇ ve teˇ ceuˬ lehˬ, awˬ liˇ tawˇ hkawˇ hpehꞈ ve yoˬ. Te kaꞈ hpehꞈ, maˇ te kaꞈ hpehꞈ, leuˆ yuˬ gʼa ve maˇ heˆ. (Maꞈ 22:37-40) Ngaˬ hui Yaˬhoˉvaˬ htaꞈ hkʼa dehꞈ shiˍ daꞈ htaˇ, awˬ liˇ tawˇ hkawˇ awˉ lawˉ teˇ maˬ htaꞈ na yuˬ tuˬ sha ve yoˬ. Yaˬhoˉvaˬ lehˬ biˇ jaˇ ve Gʼuiˬ sha hpehꞈ ve pa taw yoˬ. Yawˇ nyi ma nuˇ nehˬ leh ngaˬ hui awˬ pon dawˇ nyi laˇ puiˉ jaˇ. Ngaˬ hui ve awˬ viˉ awˬ nyi maˇ biˇ ve chaw hpehꞈ ve pa taw, awˬ liˇ tawˇ hkawˇ 2 hkawˇ teˇ hkawˇ htaꞈ na yuˬ tuˬ haˍ jaˇ tehꞈ dawˇ ve yoˬ. Teˇ pawˆ pawˆ kʼo, yawˇ hui kʼoˆ ve leh te ve ngaˬ hui htaꞈ heuˆ la tuˬ maˇ dawˇ nyi laˇ? Ngaˬ hui chi hkʼe gʼa hpuˇ tuˬ Yaˬhoˉvaˬ shiˍ ve yoˬ. Hkʼe te leh, Yaˬhoˉvaˬ chaw teˇ hpaˍ hpaˍ htaꞈ yehˇ leh haꞈ pehnˇ ve teˇ ceuˬ hpeuꞈ maw piˇ tuˬ a yeˇ uiˍ ve tehꞈ, Liꞈ hpu hkʼaw bvuhꞈ tuˬ beˆ maˍ piˇ ve yoˬ. Chi ngaˬ hui hkʼaˬ hkʼe gʼaꞈ te gʼa tuˬ le? Chi htaꞈ caˉ daꞈ ve bvuhꞈ ve teˇ gʼaˇ lehˬ tcuh yaˇ Yoˇhanˬ yoˬ.—1 Yoˇ 3:11, 12. w21.01 8 ¶1-2

Ngaˬ hui yaꞈ ve tehꞈ shiˍ ve htawˇ, te yaꞈ tuˬ Saˍtanˍ beˬ laˇ ve yoˬ. Hkʼe te leh, Gʼuiˬ sha ve kanˉ te gehˇ sheˍ ve maˇ heˆ leh te maw jaˇ˗oˬ ve htawˇ, a shu yawˇ awˬ to htaꞈ na nyi cawˇ ve, ‘ngaˬ cawˇ ve htaꞈ nyi ma awˬ tawˬ hkʼa gaˬ haꞈ tuˬ te chehˇ˗aw laˇ?’ Tawˇ pa haˉ te kʼo, nawˬ TV nyi ve, in˗teu˗neꞈ hkʼaw leˍ guiˇ leh, pehꞈ ve tzuhˆ ve awˬ han mawˬ leh te gaˇ ve nyi ma cawˬ htaˇ, hkʼaˬ hkʼe te tuˬ le? Nawˬ nyi ve awˬ han awˬ kʼu nyi ve awˬ han maˇ heˆ tehꞈ nawˬ dawˇ ve yoˬ. Nawˬ nyi ma awˬ tawˬ hkʼa gaˬ cawˇ ve htaꞈ maˇ haꞈ leh awˬ nu ve awˬ ceuˬ htaꞈ haꞈ tuˬ, Saˍtanˍ te laˇ ve tehꞈ dawˇ˗aw laˇ? Awˬ han chi ve lehˬ hawˉ hkʼaˆ teˇ gʼaˇ ceˉ ceˇ yuˬ leh suhˆ tawˆ ve htaꞈ tehˆ taˍ ve yoˬ. Yawˇ suhˆ awˉ lawˉ teˇ pawˆ tawˆ htaˇ, hkʼe taw maˇ naˉ sheˍ. Yawˇ gʼaˇ hteꞈ kʼawꞈ tawˆ ve kʼo, suhˆ nyiˇ tawn nehˉ hpehꞈ ve yoˬ. Nawˬ dawˇ kʼo, chi pehꞈ ve tzuhˆ ve nyi ma cawˬ tuˬ te gaˇ ve hkʼe hpehꞈ˗aw laˇ? Awˉ lawˉ htaˇ awˬ han chi ve teˇ hpaˍ awˬ tawꞈ ma cawˬ ve htaꞈ maˇ shuˍ. Peuˬ hkʼawꞈ nawˉ, nyi ma awˬ tawˬ hkʼa gaˬ cawˇ ve htaꞈ maˇ haꞈ tuˬ chaw teˇ gʼaˇ htaꞈ te piˇ leh nyi ma awˬ nu ve awˬ ceuˬ htaꞈ haꞈ ve lehˬ suhˆ nyiˇ tawn tawˆ ve htaꞈ shuˍ ve yoˬ. Awˬ leh meuˇ htaˇ yawˇ Yaˬhoˉvaˬ htaꞈ te yaꞈ tuˬ te piˇ ve yoˬ. Chi htaꞈ pa taw, nawˬ ve nyi ma hkʼaw maˇ daꞈ ve awˬ ceuˬ taˇ cawˬ tcuh! Yaˬhoˉvaˬ ve awˬ meh htaꞈ nyi ma awˬ tawˬ hkʼa gaˬ yawˆ yan tuˬ coˇ caˇ sheˍ! w20.06 11-12 ¶14-15

Maˇ hto toˇ˗o ve leh maˇ hpawnˬ daꞈ la˗o ve chaw htaꞈ ngaˬ hui mawˬ peuˬ hkʼawꞈ nawˉ caˉ leh gʼa kʼawꞈ ga piˇ ve yoˬ. Mehˉ kʼai ve yaˇ paˍ awˬ lawn Yeˍsuˆ tehˆ ve hkʼa shuˍ, yawˇ hui nyi ma hkʼaw naˬ sheˍ ve pa taw, gu na˗e piˇ tuˬ awˬ yanˇ gʼa yehˇ ve yoˬ. (Luˉ 15:17-24) Saˍtanˍ ve miˬ guiˬ yawˇ hui htaꞈ te piˇ ve awˬ ceuˬ kaꞈ awˬ gʼaˇ nuˇ ve pa taw, oˇ htaˇ hkʼe leˇ Yaˬhoˉvaˬ geh maˇ meuˆ daꞈ˗oˬ. Yawˇ hui Yaˬhoˉvaˬ htaꞈ yonˍ tuˬ ngaˬ hui gʼa ga piˇ ve yoˬ. Mehˉ kʼai taˍ ve yawˬ Yeˍsuˆ tawˇ pa haˉ tehˆ maˍ laˇ ve lehˬ, yawˬ hawˉ paˍ yawˇ ve yawˬ htaꞈ mawˬ tuˬ awˬ yanˇ gʼa yehˇ maˇ jaˇ. Yawˬ htaꞈ mawˬ˗oˬ htaˇ yawˬ awˬ gʼaˇ maˇ cawˬ leh, awˬ moˍ geh yawˇ hkʼaˇ yawˇ kʼawꞈ la maˇ gʼa ve tehꞈ yawˇ shiˍ ve yoˬ. Hkʼe te leh, yawˇ yawˬ htaꞈ taˆ kʼawꞈ la ve yoˬ. (Luˉ 15:4, 5) Maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ geh kʼawꞈ la gaˇ ve htawˇ, haˍ jaˇ tehꞈ dawˇ ve chaw htaꞈ ngaˬ hui ga piˇ tuˬ gʼa coˇ caˇ ve yoˬ. Yaꞈ hkʼaˇ, chi hkʼe ceh maˇ heˆ. Daꞈ kehˬ ve Awˬ ha hpu, Liꞈ hpu, leh Gʼuiˬ sha ve kanˉ hkʼaˇ hkʼaw ve liꞈ teˇ hpaˍ cawˬ ve pa taw, yawˇ hui Yaˬhoˉvaˬ geh kʼawꞈ meuˆ daꞈ la tuˬ, ngaˬ hui ga piˇ gʼa ve yoˬ. Maˇ hto toˇ˗o ve leh maˇ hpawnˬ daꞈ la˗o ve chaw geh Liꞈ hpu maˍ piˇ tuˬ nyi haꞈ shaˉ paˍ nawˬ htaꞈ lawˬ laˇ ve kʼo, chi lehˬ daꞈ jaˇ ve laꞈ shawnˍ hpehꞈ ve tehꞈ dawˇ taˍ sheˍ. w20.06 28-29 ¶14-15

Ngaˬ hui awˬ tehˬ ve Hkriꞈ yaˇ hpehꞈ ve kʼo, haꞈ pehnˇ ve cawˬ ve tehꞈ gʼa hpeuꞈ maw piˇ ve yoˬ. Yaꞈ hkʼaˇ, ngaˬ hui “daꞈ ve awˬ ceuˬ htaꞈ shiˍ puiˉ tuˬ, cuˇ yiˍ maˍ yiˍ teˇ ceuˬ” kaꞈ gʼa cawˬ cawˇ ve yoˬ. (Hpi 1:9) Chi hkʼe maˇ te ve kʼo, Gʼuiˬ sha htaꞈ hpfuhˆ ve chaw “laꞈ lehnˉ ve chaw teˇ hpaˍ cuˇ yiˍ te leh heˍ ve awˬ hkʼaw lo laiˉ ceuˬ htaꞈ maˍ ve” awˬ hkʼaˇ suh gʼaꞈ kʼai la tuˬ yoˬ. (Efs 4:14) Awˬ laꞈ gʼawˇ laiˉ gʼaˇ Yeˍsuˆ awˬ hkʼaˇ suh maˇ gʼaꞈ kʼai˗o ve htawˇ, tcuh yaˇ Peˍtruˆ yonˍ gʼa ve hkʼaw kʼoˆ ve, Yeˍsuˆ lehˬ “co tiꞈ ha tiꞈ ve tawˇ hkawˇ cawˬ taˍ ve yoˬ.” (Yoˇ 6:67, 68) Tcuh yaˇ Peˍtruˆ chi hkʼe kʼoˆ ve htawˇ, Yeˍsuˆ maˍ ve tawˇ hkawˇ hkʼa peu˗eˬ htaꞈ na gʼa ve maˇ heˆ. Yeˍsuˆ lehˬ Hkriꞈ hpehꞈ ve yoˬ tehꞈ yawˇ yonˍ ve pa taw, yawˇ Yeˍsuˆ htaꞈ ka tiꞈ yeˬ leh maˇ chiˇ baˬ. Nawˬ kaꞈ hkʼa shuˍ yoˬ. Liꞈ hpu hkʼaw maˍ ve awˬ ceuˬ awˬ tehˬ ve tehꞈ nawˬ yonˍ gʼa tuˬ teˇ ceuˬ ceuˬ te gʼa ve yoˬ. Nawˬ chi hkʼe te ve kʼo, hkʼaˬ hkʼe hpehꞈ ve htawˇ nawˬ ve yonˍ hkʼaˇ yonˍ yeˬ tuˬ yoˬ. Leh shu kaꞈ yonˍ hkʼaˇ yonˍ yeˬ tuˬ nawˬ ga piˇ gʼa ve yoˬ.—2 Yoˇ 1, 2. w20.07 8 ¶2; 13 ¶18

Ngaˬ hui ve awˬ viˉ awˬ nyi awˬ tehˬ ve hkʼaw chehˇ ve ga piˇ gʼa tuˬ ngaˬ hui gʼa ha kʼaˉ ve yoˬ. (1 Yoˇ 3:10, 11, 16, 17) Ngaˬ hui teˇ ceuˬ le le daꞈ˗oˬ htaˇ ceh gʼa haꞈ daꞈ ve maˇ heˆ. Yaꞈ hkʼaˇ, shoꞈ shaꞈ ve cawˬ htaˇ kaꞈ gʼa haꞈ daꞈ ve yoˬ. Tawˇ pa haˉ te kʼo, nawˬ shiˍ daꞈ ve chaw teˇ gʼaˇ yawˇ haꞈ ve chaw suh˗e ve nawˬ gʼa kaˇ htaˇ, yawˇ htaꞈ awˬ gʼaˇ piˇ leh awˬ nu ve awˬ hkʼaˇ kaꞈ ga piˇ˗aw laˇ? Mvuhˇ yeˬ mvuhˇ haw leh awˬ nu ve awˬ ceuˬ gʼa hpuˇ ve pa taw, awˬ viˉ awˬ nyi ve mawˇ luˬ kʼai ve kʼo, hpawnˬ daꞈ kuiˬ yehˬ leh yawˇ hui ve yehˬ kʼawꞈ gu te tuˬ loˍ ve nawˬ gʼa kaˇ˗aw laˇ? Ngaˬ hui awˬ viˉ awˬ nyi htaꞈ haꞈ ve kʼoˆ ve ceh maˇ heˆ. A yeˇ uiˍ jaˇ ve lehˬ gʼa te tawˆ la ve yoˬ. Teˇ gʼaˇ leh teˇ gʼaˇ haꞈ daꞈ htaˇ, ngaˬ hui mvuhˇ naw ma hkʼoˆ ve Awˬ pa htaꞈ henˇ yuˬ gʼa ve yoˬ. (1 Yoˇ 4:7, 8) Haꞈ daꞈ ve a yeˇ uiˍ jaˇ ve lehˬ venˇ baˆ gʼa hpehˇ daꞈ ve yoˬ. Tawˇ pa haˉ te kʼo, chaw teˇ gʼaˇ ngaˬ hui beuꞈ tuˬ te laˇ leh peuˬ hkʼawꞈ nawˉ lawˬ hkawˉ laˇ ve kʼo, ngaˬ hui yawˇ hui htaꞈ venˇ baˆ hpehˇ piˇ leh yaꞈ ve htaꞈ maˇ kʼawꞈ dawˇ nyi˗o.—Kawˇ 3:13. w20.07 24-25 ¶14-15

Oˇ ve teˇ yanˇ, chi teˇ hkui ngaˬ hui teˇ gʼaˇ taw teˇ gʼaˇ Liꞈ hpu maˍ piˇ ve hkʼe gʼa maˍ piˇ tuˬ laˇ? Kʼawꞈ teꞈ tu la ve chaw chi teˇ hpaˍ Hkriꞈ yaˇ awˬ moˍ laiˉ kaˬ lo chehˇ tcuh leh, yawˇ hui teˇ caˉ kʼawꞈ teꞈ tu la ve chaw htaꞈ maˍ piˇ tuˬ, yawˇ hui htaꞈ maˍ piˇ cawˇ˗aw laˇ? Ngaˬ hui caˉ leh law nyi taˍ sheˍ. Teˇ hinˉ hkʼawꞈ peuˬ hkʼawꞈ nawˉ “mvuhˇ miˬ hkʼaw lo Gʼuiˬ sha htaꞈ shiˍ ve cuˇ yiˍ biˇ chehˇ taˍ tuˬ yoˬ.” (Isy 11:9) Oˇ ve teˇ yanˇ ngaˬ hui ha lehˬ tuˬ ve kanˉ cawˬ maˇ jaˇ! Teˇ hinˉ hkʼawꞈ ve awˬ yanˇ awˬ hkʼaw lo Yaˬhoˉvaˬ ve chaw lehˬ, yawˇ nyi hkʼaˇ suh tuˬ yawˇ hui ve te hkʼaˇ dawˇ hkʼaˇ caˉ leh gʼa pa cawˇ ve yoˬ. Chi htaꞈ pa taw, kʼawꞈ teꞈ tu la ve chaw lehˬ, Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ, yawˇ hui ve dawˇ hkʼaˇ leh yawˇ hui yaꞈ ve hpawˇ te gaˇ ve teˇ hpaˍ htaꞈ gʼa tawˍ daꞈ ve pa taw, Gʼuiˬ sha ve chaw yawˇ hui htaꞈ ha kʼaˉ ve yoˬ. (1 Peˍ 3:8) Chi htaꞈ pa taw kʼawꞈ teꞈ tu la ve chaw, Yaˬhoˉvaˬ ve chaw ‘htaiˍ hkʼawꞈ ve htaꞈ gʼa tuˬ gʼaˇ hteꞈ te’ chehˇ ve htaꞈ gʼa mawˬ tuˬ yoˬ.—Hpi 2:12. w20.08 16 ¶6-7

Tcuh yaˇ Pawˇluꞈ beˆ maˍ laˇ ve htaꞈ ngaˬ hui gʼaꞈ te leh ngaˬ hui te ve htaꞈ chaˬ nyi ve kʼo, puiˉ ve hpehꞈ ve awˬ nu ve chaw maˇ cawˬ ve ngaˬ hui cawˬ ve tehꞈ na gʼa ve yoˬ hehˉ. Tawˇ pa haˉ te kʼo, nyi haꞈ shaˉ paˍ teˇ gʼaˇ bon maˍ ve hkʼa dehꞈ maˇ cheuˬ ve htawˇ, yawˇ shu awˬ laꞈ gʼawˇ hpehꞈ la tuˬ maˍ piˇ ve cheuˬ ve yoˬ hehˉ. Maˇ heˆ leh Hkriꞈ yaˇ awˬ moˍ hkʼaw nyi haꞈ shaˉ paˍ awˬ nu ve chaw hkʼe taw, yawˇ awˬ lawn maˇ gu puiˉ ve htawˇ, yawˇ ha kʼaˉ puiˉ ve, haꞈ lu diˬ ve leh awˬ viˉ awˬ nyi Liꞈ hpu hkʼaw ve awˬ lawn yawˇ beˆ maˍ laˇ tuˬ ca lawˬ la htaˇ nyi ma sha ve yoˬ hehˉ. Maˇ heˆ leh yawˇ hkehˉ chaw htaꞈ haꞈ yuˬ puiˉ ve yoˬ hehˉ. (Heˍ 13:2, 16) Ngaˬ hui puiˉ ve hpehꞈ ve htaꞈ hkʼa tawˍ lehˆ mawˬ htaˇ, Hkriꞈ yaˇ awˬ moˍ hkʼaw ngaˬ hui te gʼa ve htaꞈ ha lehˬ ve yoˬ. Awˬ viˉ awˬ nyi puiˉ ve hpehꞈ ve ngaˬ hui htaꞈ peun daꞈ ve ngaˬ hui maˇ hkawehˉ. Hkriꞈ yaˇ awˬ moˍ hkʼaw ngaˬ hui aˬ htoꞈ ma awˬ vuiˬ cawˬ ve htawˇ, ngaˬ hui teˇ gʼaˇ le le puiˉ ve hpehꞈ ve htaꞈ cheuˬ la tuˬ gʼa te ve yoˬ. w20.08 24 ¶16-18

1935 hkʼawꞈ htaˇ Aˍmeˬriˆkaꞈ mvuhˇ miˬ Waw˗che˗tan D.C lo awˬ viˉ awˬ nyi J. F. Raˆhteuˬfawˍ ve bon maˍ hkawˇ awˬ lawn lehˬ,“chaw awˬ moˍ lonˉ” yoˬ. Hpeuꞈ maˍ ve liꞈ 7:9 hkʼaw ve “chaw awˬ moˍ lonˉ” a shu htaꞈ kʼoˆ gaˇ ve awˬ viˉ awˬ nyi Raˆhteuˬfawˍ ve bon maˍ hkawˇ hkʼaw kʼoˆ maˍ piˇ ve yoˬ. Chaw awˬ moˍ lonˉ lehˬ, mvuhˇ naw ma hkʼoˆ gʼa taˆ˗e tuˬ Liꞈ hpu henˇ yaˇ na gʼa jaw ve yoˬ. Awˬ lawn kʼo, yawˇ hui ka tiꞈ yeˬ ve maˇ maw sheˍ leh mvuhˇ naw ma hkʼoˆ taˆ˗e tuˬ awˬ hawˉ lo ve teˇ moˍ hpehꞈ ve yoˬ. Yaꞈ hkʼaˇ, chaw awˬ moˍ lonˉ mvuhˇ naw ma hkʼoˆ maˇ gʼa taˆ˗e ve tehꞈ, Raˆhteuˬfawˍ Liꞈ hpu laiˉ tawn kʼoˆ maˍ piˇ ve yoˬ. Yawˇ hui Yeˍsuˆ Hkriꞈ ve awˬ kaˍ awˬ nu ve yawˬ hpehꞈ leh “uiˍ jaˇ ve tuꞈ ve hkanˍ ve” htaꞈ hpanˍ kʼai leh miˬ guiˬ hkʼoˆ co co taiˍ taiˍ ve a shaꞈ gʼa tuˬ yoˬ. (Hpeuꞈ 7:14) Yeˍsuˆ kʼoˆ ve, “yawˬ hkawˇ chi htaꞈ maˇ caˉ daꞈ ve awˬ kaˍ awˬ nu yawˬ teˇ hpaˍ htawˇ ngaˬ cawˬ sheˍ ve yoˬ. Yawˬ oˇ ve teˇ hpaˍ htaꞈ htawˇ ngaˬ gʼa ca shiˍ veu laˇ leh, yawˇ hui ngaˬ ve hkawˇ htaꞈ na yuˬ tuˬ yoˬ. Oˇ htaˇ, yawˬ moˍ teˇ moˍ tiˉ cawˬ leh, yawˬ hawˉ shehˍ hpaˇ teˇ gʼaˇ tiˉ cawˬ tuˬ yoˬ.” (Yoˇ 10:16) Yawˬ chi teˇ moˍ lehˬ, Yaˬhoˉvaˬ ve ka tiꞈ yeˬ ve shaˉ hkiˆ hkanˍ ve chaw Paˍraˍdiˇsuˆ hkʼo hkʼaw co co taiˍ taiˍ chehˇ tuˬ dawˇ law taˍ ve yoˬ.—Maꞈ 25:31-33, 46. w21.01 14-15 ¶1-2

Ngaˬ hui a shu yawˇ awˬ to awˬ liˇ teh leh Gʼuiˬ sha ve kanˉ te peuˬ htaˇ hkʼa gaˬ gʼa yeunˇ hkanˍ ve yoˬ. (Maꞈ 28:19, 20) Ngaˬ hui paw la htaˇ kaꞈ a shu yawˇ awˬ to awˬ liˇ teh ve maˇ heˆ. Sha ve awˬ lawn hpehꞈ ve kʼo ngaˬ hui te gaˇ ve yoˬ. Yaꞈ hkʼaˇ, laiˉ pawˆ a yeˇ uiˍ ve awˬ lawn a shaꞈ teꞈ kuiˬ hkʼaw te tuˬ sha ve maˇ heˆ. Chi htaꞈ pa taw a shu yawˇ awˬ to awˬ liˇ teh ve chaw hpehꞈ tuˬ, ngaˬ hui a shu yawˇ ve nyi ma htaꞈ gʼa gʼaˇ puiˉ ve yoˬ. Ngaˬ hui te gʼa tuˬ haˍ jaˇ tehꞈ dawˇ ve awˬ ceuˬ htaꞈ Yaˬhoˉvaˬ gʼa ga laˇ tcuh cawˇ ve yoˬ. Yaˬhoˉvaˬ daꞈ kehˬ ve awˬ ha hpu htaꞈ cuˇ leh ngaˬ hui htaꞈ ga laˇ tcuh tuˬ yoˬ. (Gaˍ 5:22, 23) Tcuh yaˇ Pawˇluꞈ lehˬ a shu yawˇ awˬ to awˬ liˇ teh ve chaw hpehꞈ ve yoˬ. Yaꞈ hkʼaˇ, yawˇ kaꞈ yawˇ awˬ to htaꞈ “chu˗iˬ” leh cawˇ ve awˬ ceuˬ htaꞈ te gʼa tuˬ yawˇ awˬ to yawˇ gʼa yuˬ tiˍ ve yoˬ. (1 Kawˇ 9:25-27) Shu kaꞈ awˬ liˇ teh ve chaw hpehꞈ tuˬ yawˇ awˬ gʼaˇ piˇ leh “hkʼa peu˗eˬ ve htaꞈ keunˍ daꞈ cawˇ daꞈ ve hkʼe, nyi sha ve awˬ hkʼaw lo te˗o.” (1 Kawˇ 14:40) Ngaˬ hui caˉ leh Yaˬhoˉvaˬ htaꞈ oˉ kʼoˍ pui tuˬ a shu yawˇ awˬ to awˬ liˇ gʼa teh cawˇ ve yoˬ. Leh ngaˬ hui hkʼaˬ htaˆ kaꞈ hto toˇ leh Liꞈ hpu gʼa maˍ˗e ve yoˬ.—Tcuh 2:46. w20.09 6-7 ¶15-17

Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw laiˉ mvuhˇ miˬ hkʼaw hto toˇ leh yawˇ htaꞈ oˉ kʼoˍ pui gʼa ve yoˬ. Nawˬ mvuhˇ miˬ chi hkʼe ve hkʼaw chehˇ ve laˇ? Chehˇ ve kʼo a shu yawˇ awˬ to htaꞈ na nyi cawˇ ve “ngaˬ hkʼaˬ hkʼe te ve le?” Awˬ leh meuˇ ve awˬ yanˇ Yaˬhoˉvaˬ ve chaw awˬ pon ha lehˬ jaˇ. Awˬ lawn kʼo, teˇ co˗e peuˬ teˇ co˗e miˬ guiˬ chi hkʼoˆ lo hto toˇ ve leh bon maˍ ve ngaˬ hui ve awˬ co˗e hkʼe taw maˇ te jaw sheˍ ve pa taw yoˬ. Ngaˬ hui te tuˬ ve kanˉ cawˬ maˇ jaˇ. Gawˬ lehˍ ve awˬ yanˇ chi nawˬ awˬ bon cawˬ tuˬ hkʼaˬ hkʼe te gʼa ve le? (2 Tiˆ 4:2) Nawˬ leh nawˬ ve yehˬ kʼa hkʼaw ve chaw teˇ gʼaˇ Gʼuiˬ sha ve kanˉ maˇ maˇ te gʼa tuˬ, nawˬ awˬ to teˇ ceuˬ ceuˬ pa gʼa˗aw laˇ? Dawˇ nyi sheˍ. Tawˇ pa haˉ te kʼo, gʼuˇ suhˍ peuˍ ve chaw te ve yoˬ. Chi teˇ hkui hpu maˇ maˇ ca tuˬ awˬ yanˇ maˇ heˆ. Tuꞈ jaˇ hkanˍ jaˇ ve awˬ yanˇ gaˬ la htaˇ, hpu shi mawˇ jeꞈ ngaˬ hui yuˬ kʼai maˇ gʼa ve pa taw yoˬ. (Tawˇ 11:4; Maꞈ 6:31-33; 1 Yoˇ 2:15-17) Awˬ viˉ awˬ nyi laiˉ gʼaˇ chaw ceuˬ tawˇ hkawˇ awˬ suhˉ henˇ leh shu Yaˬhoˉvaˬ htaꞈ shiˍ la tuˬ ga piˇ ve yoˬ. Gʼuiˬ sha ve kanˉ hkʼaˇ yawˇ hui htaꞈ awˬ gʼaˇ piˇ tuˬ, Hkriꞈ yaˇ ve liꞈ kʼoˆ teˇ hpaˍ 1,000 chaw ceuˬ ve tawˇ hkawˇ hpaˆ yuˬ tawˆ ve yoˬ. w20.09 16 ¶9-11

Maꞈ yaˇ kanˇ paˆ cawˬ ve chaw lehˬ yawˇ hui haꞈ ve chaw leh awˬ hpfuhˇ hkʼaˆ ve awˬ ceuˬ htaꞈ haꞈ shaˉ tuˬ yoˬ. Tiˆmoˉseˍ Gʼuiˬ sha hpawˇ chehˇ ve tehꞈ yawˆ yan leh ka tiꞈ yeˬ ve hkʼaw hpeuꞈ maw laˇ ve yoˬ. Tiˆmoˉseˍ Gʼuiˬ sha htaꞈ yawˆ yan tuˬ Pawˇluꞈ kʼoˆ piˇ ve yoˬ. Chi ve lehˬ Gʼuiˬ sha htaꞈ yawˆ yan leh ka tiꞈ yeˬ ve tehꞈ hpeuꞈ maw laˇ ve yoˬ. (1 Tiˆ 4:7) Ngaˬ hui Gʼuiˬ sha htaꞈ haꞈ leh yawˆ yan ve kʼo, awˬ tehˬ ve htaꞈ gʼaˇ hteꞈ vawˆ tiˍ taˍ gaˇ ve yoˬ. (1 Tiˆ 4:8-10; 6:6) Chi hkʼoˆ kaꞈ, daꞈ ve maꞈ yaˇ lehˬ a shu yawˇ awˬ to htaꞈ gʼaˇ puiˉ leh awˬ vuiˬ htaꞈ tawnˇ taˍ ve yoˬ. Maˇ daꞈ ve dawˇ hkʼaˇ htaꞈ tawˍ daꞈ tuˬ, Pawˇluꞈ Tiˆmoˉseˍ htaꞈ beˆ maˍ piˇ ve pa taw, Tiˆmoˉseˍ Saˍtanˍ ve maˇ daꞈ ve kanˇ paˆ htaꞈ tawˍ daꞈ tuˬ gu hehnˇ taˍ ve yoˬ. Yawˇ daꞈ ve te hkʼaˇ dawˇ hkʼaˇ cawˬ tcuh leh awˬ viˉ awˬ nyi geh awˬ yanˇ yehˇ ve yoˬ. Chi hkʼe te gʼa tuˬ, yawˇ awˬ to htaꞈ awˬ liˇ teh leh gʼaˇ tcuh ve yoˬ. (2 Tiˆ 2:22) Chi teˇ hkui ngaˬ hui kaꞈ maꞈ te chehˇ ve yoˬ. Ngaˬ hui maˇ daꞈ ve dawˇ hkʼaˇ htaꞈ tawˍ daꞈ chehˇ ve yoˬ. Ngaˬ hui chi htaꞈ gʼaˇ gaˇ ve kʼo, a shu yawˇ awˬ to htaꞈ awˬ liˇ teh leh gʼaˇ tcuh ve yoˬ. (Roˉ 7:21-25) Chi hkʼoˆ kaꞈ, ngaˬ hui te hkʼaˇ dawˇ hkʼaˇ awˬ piˍ htaꞈ baˬ taˉ leh te hkʼaˇ dawˇ hkʼaˇ awˬ suhˉ cawˬ tcuh htaˇ, a shu yawˇ awˬ to htaꞈ awˬ liˇ teh leh gʼaˇ tcuh ve yoˬ. (Efs 4:22, 24) Teˇ nyi mvuhˇ hkʼa hpeuꞈ kanˉ gʼa te leh heuˬ jaˇ ve htawˇ, hpawnˬ daꞈ˗e ve kʼai gʼa tuˬ coˇ caˇ jaˇ.—Heˍ 10:24, 25. w20.09 28 ¶9-11

Liꞈ hpu henˇ ve chaw uiˍ la mvuh la leh awˬ to chiˇ aꞈ leh Baˆtiˆsaˬ haꞈ yuˬ tuˬ ngaˬ hui ga piˇ htaˇ gʼa yeunˇ hkanˍ cawˇ ve yoˬ. Awˬ yanˇ teˇ yanˇ htaˇ Liꞈ hpu henˇ ve chaw Yaˬhoˉvaˬ ve kanˉ te gaˇ ve naˍ ngaˬ hui gʼa shiˍ cawˇ ve yoˬ. Liꞈ hpu henˇ ve chaw Yeˍsuˆ ve tawˇ hkawˇ htaꞈ coˇ caˇ leh na yuˬ ve, maˇ heˆ leh yawˇ Liꞈ hpu hkʼaw ve cuˇ yiˍ htaꞈ ceh shiˍ gaˇ leh henˇ ve htaꞈ nawˬ shiˍ ve laˇ? Liꞈ hpu henˇ ve chaw uiˍ la mvuh la chehˇ˗aw laˇ, hkʼaˬ htaˆ kaꞈ chaˬ nyi sheˍ. Tawˇ pa haˉ te kʼo, yawˇ Yaˬhoˉvaˬ htaꞈ hkʼaˬ hkʼe dawˇ ve, yawˇ Yaˬhoˉvaˬ geh bon lawˬ ve awˬ lawn kaꞈ kʼoˆ maˍ laˇ˗aw laˇ? (Chiˇ 116:1, 2) Yawˇ Liꞈ hpu gʼaw ve dawˇ cawˇ˗aw laˇ? (Chiˇ 119:97) Yawˇ hkʼaˬ htaˆ kaꞈ hpawnˬ daꞈ˗e˗aw laˇ? (Chiˇ 22:22) Yawˇ gʼa henˇ taˍ ve hkʼe gʼaꞈ te˗aw laˇ? Yawˇ gʼa henˇ taˍ ve awˬ ceuˬ yehˬ kʼa hkʼaw ve chaw leh awˬ chawˇ htaꞈ kʼoˆ maˍ piˇ˗aw laˇ? (Chiˇ 9:1) Leh a yeˇ uiˍ jaˇ ve lehˬ yawˇ Yaˬhoˉvaˬ ve Shaˉhkiˆhkanˍ ve chaw hpehꞈ gaˇ˗aw laˇ? (Chiˇ 40:8) Chi ve hkʼa peu˗eˬ Liꞈ hpu henˇ ve chaw maˇ gʼaꞈ te ve kʼo, aˬ htoꞈ ma te yawˇ maˇ gʼaꞈ te ve le, tehꞈ hteˇ˗ehꞈ na nyi piˇ sheˍ. w20.10 18 ¶14-15

Mvuhˇ ma hkʼoˆ Yeˍsuˆ ve Awˬ pa dawˇ cheˆ ve hkʼaˬ htaˆ kaꞈ cawˇ ve leh, Yeˍsuˆ ve awˬ pa awˬ e kaꞈ cuˇ yiˍ cawˬ ve hkʼaw dawˇ cheˆ ve yoˬ. Yaꞈ hkʼaˇ, Yeˍsuˆ uiˍ la htaˇ yawˇ hkʼaˇ yawˇ gʼa dawˇ cheˆ ve yoˬ. Ngaˬ hui hkʼa shuˍ Yeˍsuˆ kaꞈ yawˇ hkʼaˇ yawˇ leuˆ yuˬ gʼa ve yoˬ. (Gaˍ 6:5) Yawˇ yawˇ ve a loˍ htaꞈ te tuˬ leuˆ yuˬ kaꞈ gʼa ve yoˬ. Yaꞈ hkʼaˇ, yawˇ chi hkʼe maˇ te. Yawˇ Gʼuiˬ sha ve a loˍ htaꞈ gʼaꞈ te tuˬ leuˆ yuˬ leh, yawˇ Gʼuiˬ sha geh meuˆ daꞈ ve htaꞈ hkʼa dehꞈ haꞈ shaˉ ve yoˬ. Yeˍsuˆ lehˬ Yaˬhoˉvaˬ yawˇ htaꞈ aˬ htoꞈ ma te tcuh gaˇ ve shiˍ htaˇ, yawˇ hkʼa dehꞈ na yuˬ ve yoˬ. (Yoˇ 6:38) Yeˍsuˆ chaw laiˉ gʼaˇ yawˇ htaꞈ maˇ dawˇ cawˇ ve shiˍ ve yoˬ. Yawˇ chi hkʼe maˇ hpuˇ gaˇ. Yaꞈ hkʼaˇ, yawˇ a shu hkawˇ na yuˬ tuˬ leuˆ yuˬ leh 29 hkʼawꞈ C.E htaˇ, Baˆtiˆsaˬ haꞈ yuˬ ve yoˬ. Yawˇ awˬ pon a yeˇ uiˍ jaˇ ve lehˬ, Yaˬhoˉvaˬ loˍ ve awˬ ceuˬ htaꞈ gʼaꞈ te ve yoˬ. (Heˍ 10:5-7) Yawˇ suhˆ hkuiˉ daw hkʼoˆ suh˗e yoˬ te htaˇ kaꞈ, yawˇ Awˬ pa ve a loˍ htaꞈ gʼaꞈ te tuˬ maˇ pa jaw.—Yoˇ 19:30. w20.10 29 ¶12; 30 ¶15

Nawˬ ve Hkriꞈ yaˇ awˬ moˍ hkʼaw naˬ ve gawˬ ve maˇ heˆ leh shoꞈ shaꞈ ve awˬ lawn cawˬ ve pa taw, awˬ gʼaˇ nuˇ ve chaw cawˬ˗aw laˇ? Maˇ heˆ leh haꞈ ve chaw suh gehˇ sheˍ ve chaw cawˬ˗aw laˇ? Ga laˇ tuˬ loˍ ve chaw cawˬ ve tehꞈ ngaˬ hui shiˍ htaˇ, yawˇ htaꞈ ga piˇ gʼa tuˬ, ngaˬ hui tawˇ yaw leh teˇ ceuˬ ceuˬ daꞈ ve te piˇ tuˬ, Yaˬhoˉvaˬ ga laˇ tuˬ lawˬ gʼa ve yoˬ. Awˬ viˉ awˬ nyi awˬ gʼaˇ gʼa tuˬ loˍ htaˇ, chi yawˇ htaꞈ awˬ gʼaˇ piˇ gʼa ve yoˬ hehˉ. (1 Peˍ 4:10) Yaˬhoˉvaˬ ngaˬ hui geh chehˇ ve tehꞈ shiˍ ve pa taw, awˬ gʼaˇ gʼa ve yoˬ. Gʼuiˬ sha lehˬ, ngaˬ hui htaꞈ ga laˇ tuˬ Yeˍsuˆ leh mvuhˇ naw ma tcuh yaˇ htaꞈ yehˇ ve awˬ hkʼoˆ kaꞈ, kanˇ paˆ cawˬ ve chaw teˇ hpaˍ htaꞈ yawˇ ve a loˍ te piˇ tuˬ yehˇ gʼa ve yoˬ. Ngaˬ hui a shu yawˇ awˬ to gʼa hpuˇ jaw ve hkʼa shuˍ, Yaˬhoˉvaˬ ngaˬ hui htaꞈ ga laˇ tuˬ awˬ viˉ awˬ nyi htaꞈ daꞈ kehˬ ve awˬ ha hpu piˇ ve yoˬ. Chi htaꞈ pa taw, tcuh yaˇ Pawˇluꞈ hkʼa shuˍ “Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ. Chaw yaˇ ngaˬ htaꞈ aˬ htoꞈ ma te laˇ hpehꞈ tuˬ le?” tehꞈ ngaˬ hui kaꞈ yonˍ ve hkʼaw kʼoˆ gʼa ve yoˬ.—Heˍ 13:6. w20.11 17 ¶19-20

Yaˬhoˉvaˬ yawˇ hui geh chehˇ ve tehꞈ tcuh yaˇ hui yonˍ ve yoˬ. Awˬ lawn kʼo, yawˇ hui Gʼuiˬ sha geh kanˇ paˆ gʼa leh anˇ tuˬ te gʼa ve yoˬ. (Tcuh 5:12-16; 6:8) Yaˬhoˉvaˬ ngaˬ hui htaꞈ chi hkʼe maˇ te laˇ ve htawˇ, Liꞈ hpu hkʼaw kʼoˆ ve, ngaˬ hui cawˇ ve htaꞈ te leh gʼa tuꞈ gʼa hkanˍ htaˇ, Gʼuiˬ sha ngaˬ hui htaꞈ nyi hkʼaˇ suh ve yoˬ. (1 Peˍ 3:14; 4:14) Awˬ gʼuˇ suhˍ hpawˇ ngaˬ hui fawˉ mehˍ ve gʼa hpuˇ htaˇ, hkʼaˬ hkʼe te cawˇ ve htaꞈ dawˇ haˍ ve aꞈ kehˉ, chi teˇ hkui te gʼa ve awˬ ceuˬ htaꞈ te leh Yaˬhoˉvaˬ ga laˇ leh nyi haꞈ shaˉ laˇ gʼa ve tehꞈ ngaˬ hui yonˍ ve yoˬ. Yeˍsuˆ ve ka tiꞈ htaꞈ ngaˬ hui kaꞈ gʼaˇ va cawˇ ve yoˬ. Yeˍsuˆ ka tiꞈ te taˍ laˇ ve, “nawˬ hui ve canˇ paˍ hkʼa peu˗eˬ gʼawˬ hkʼaˆ maˇ gʼa leh tawˍ taˍ maˇ gʼa ve tawˇ hkawˇ leh cuˇ yiˍ maˍ yiˍ ngaˬ nawˬ hui htaꞈ peꞈ laˇ tuˬ yoˬ.” Leh Yeˍsuˆ ngaˬ hui htaꞈ kʼoˆ laˇ ve, ‘nawˬ nyi ma yeˬ puiˉ ve pa taw, a shaꞈ gʼa teꞈ tuˬ yoˬ.’ (Luˉ 21:12-19) Yaˬhoˉvaˬ ve kanˉ ka tiꞈ yeˬ ve hkʼaw te leh suh˗oˬ ve chaw, Yaˬhoˉvaˬ yawˇ hui ve awˬ lawn hkʼa peu˗eˬ htaꞈ tawnˇ gʼa ve tehꞈ taˇ leunˇ. Chi htaꞈ pa taw, nawˬ aˬ htoꞈ ma gʼa hpuˇ ve htawˇ, Yaˬhoˉvaˬ nawˬ htaꞈ kʼawꞈ teꞈ tu la tcuh laˇ tuˬ yoˬ. w21.01 4-6 ¶12

Kʼawꞈ teꞈ tu la ve awˬ lawn htaꞈ tcuh yaˇ Pawˇluꞈ awˉ lawˉ teˇ gʼaˇ kʼoˆ taˍ ve maˇ heˆ. Awˬ lawn chi hkʼe ve Yawˇbaˆ kaꞈ kʼoˆ jaw ve yoˬ. Yaˬhoˉvaˬ yawˇ htaꞈ maˇ leunˇ leh kʼawꞈ teꞈ tu la tcuh laˇ tuˬ yoˬ tehꞈ yawˇ yonˍ ve yoˬ. (Yb 14:7-10, 12-15) “Kʼawꞈ teꞈ tu la ve” lehˬ, “awˬ hkuiˉ puiˍ” teˇ ceuˬ hpehꞈ ve maˇ heˆ leh “kawˍ” ve chi ve hkʼa peu˗eˬ Hkriꞈ yaˇ maˍ ve tawˇ hkawˇ hpehꞈ ve yoˬ. (Heˍ 6:1, 2) Kʼawꞈ teꞈ tu la ve awˬ lawn 1 kawˇreuˍhtuˆ liꞈ kaˇ nanˉ uiˍ 15 hkʼaw Pawˇluꞈ kʼoˆ ve yoˬ. Yawˇ bvuhꞈ ve awˬ ceuˬ oˇ htaˇ teˇ co˗e ve Hkriꞈ yaˇ htaꞈ awˬ gʼaˇ piˇ jaˇ ve yoˬ. Leh kaˇ nanˉ uiˍ 15 hkʼaw ngaˬ hui htaꞈ kaꞈ awˬ gʼaˇ peꞈ laˇ jaˇ ve yoˬ. Dawˇ law kuiˬ ngaˬ hui law maw jaˇ˗oˬ ve, awˬ tehˬ hpehꞈ la tuˬ yoˬ tehꞈ yonˍ gʼa tuˬ ga laˇ ve yoˬ. Ngaˬ hui haꞈ ve chaw kʼawꞈ teꞈ tu la tuˬ yoˬ tehꞈ, Yeˍsuˆ kʼawꞈ teꞈ tu la ve lehˬ ngaˬ hui yonˍ gʼa tuˬ te laˇ ve yoˬ. Ngaˬ hui aˬ htoꞈ ma hpehꞈ leh suh˗e ve htawˇ, kʼawꞈ teꞈ tu la tuˬ yo tehꞈ yonˍ gʼa ve yoˬ. Pawˇluꞈ Kawˇreuˍhtuˆ chaw htaꞈ “ha lehˬ ve bon hkawˇ” maˍ piˇ ve chi daꞈ jaˇ ve teˇ lawn hpehꞈ ve yoˬ. (1 Kawˇ 15:1, 2) Yeˍsuˆ kʼawꞈ teꞈ tu la ve htaꞈ Hkriꞈ yaˇ hkʼaˬ ve teˇ gʼaˇ maˇ yonˍ ve kʼo, yawˇ yonˍ ve lehˬ teꞈ chiˉ awˬ bon maˇ cawˬ.—1 Kawˇ 15:17. w20.12 2-3 ¶2-4

Tcuh yaˇ Peˍtruˆ daꞈ la tuˬ aˬ htoꞈ ma ga piˇ ve le? Chi awˬ gʼuˇ suhˍ htaˇ, Peˍtruˆ ve yonˍ hkʼaˇ maˇ mehˉ kʼai tuˬ, Yeˍsuˆ bon lawˬ laˇ ve htaꞈ yawˇ tawnˇ gʼa ve yoˬ. Bon lawˬ hkawˇ oˇ ve htaꞈ Yaˬhoˉvaˬ hkʼawꞈ piˇ ve yoˬ. Oˇ ve hkʼawꞈ nawˉ, Yeˍsuˆ Peˍtruˆ geh kʼai ve yoˬ. Yeˍsuˆ chi hkʼe te ve lehˬ, Peˍtruˆ htaꞈ awˬ gʼaˇ piˇ ve yoˬ. (Luˉ 22:32; 24:33, 34; 1 Kawˇ 15:5) Peuˬ hkʼawꞈ nawˉ, tcuh yaˇ hui teˇ haˉ mvuhˇ hkʼa htiˇ ngaˇ ca ve htawˇ teˇ hkeh kaꞈ maˇ gʼa. Hkʼe te leh, Yeˍsuˆ yawˇ hui htaꞈ yawˇ ve awˬ to maw piˇ leh, Peˍtruˆ Yeˍsuˆ htaꞈ hkʼaˬ hkʼe taw haꞈ ve kʼawꞈ kʼoˆ tcuh ve yoˬ. Yeˍsuˆ yawˇ haꞈ ve awˬ chawˇ htaꞈ venˇ baˆ hpehˇ piˇ leh yawˇ htaꞈ kanˉ kʼawꞈ piˇ ve yoˬ. (Yoˇ 21:15-17) Yeˍsuˆ Peˍtruˆ htaꞈ te piˇ ve awˬ hkʼaˇ Yeˍsuˆ Peˍtruˆ htaꞈ ha kʼaˉ jaˇ ve tehꞈ hkʼa tawˍ lehˆ hpeuꞈ maw piˇ leh Yeˍsuˆ yawˇ Awˬ pa htaꞈ hkʼa dehꞈ henˇ yuˬ gʼa ve yoˬ. Chi htaꞈ pa taw, ngaˬ hui te yaꞈ htaˇ, Yaˬhoˉvaˬ ngaˬ hui htaꞈ venˇ baˆ maˇ hpehˇ laˇ taˍ tehꞈ taˇ dawˇ. Saˍtanˍ ngaˬ hui htaꞈ chi hkʼe dawˇ tcuh gaˇ ve tehꞈ taˇ leunˇ sheˍ. Yaꞈ hkʼaˇ, ngaˬ hui awˬ to leh ngaˬ hui htaꞈ te yaꞈ laˇ ve chaw htaꞈ Yaˬhoˉvaˬ ngaˬ hui htaꞈ haꞈ ve hkʼe haꞈ leh, ngaˬ hui hkʼaˬ hkʼe taw te gʼa ve htaꞈ yawˇ na gʼa ve hkʼe na gʼa leh, yawˇ ngaˬ hui htaꞈ venˇ baˆ hpehˇ laˇ gaˇ ve hkʼe venˇ baˆ hpehˇ piˇ cawˇ ve yoˬ. Shu ngaˬ hui htaꞈ nyi ma luˬ tuˬ te laˇ htaˇ, ngaˬ hui kaꞈ chi hkʼe te cawˇ ve yoˬ.—Chiˇ 103:13, 14. w20.12 20-21 ¶17-19

Nyi ma gawˬ lehˍ maˇ cawˬ leh Yaˬhoˉvaˬ htaꞈ gʼaˇ maˇ va ve chaw ve awˬ lawn ngaˬ hui htaꞈ maˍ laˇ gʼa ve yoˬ. Yawˇ hui ve awˬ lawn lehˬ ngaˬ hui maˇ gʼa te yaꞈ tuˬ ga laˇ ve yoˬ. Tawˇ pa haˉ te kʼo, Yuˇdaꞈ ve jawˇ mawˇ Aˍsaˍ tanˬ uˉ peunˍ htaˇ, yawˇ shoꞈ shaꞈ ve gʼa hpuˇ htaˇ, Yaˬhoˉvaˬ htaꞈ gʼaˇ va ve yoˬ. Ponˬ kʼai ve awˬ yanˇ, yawˇ shoꞈ shaꞈ ve gʼa hpuˇ htaˇ, Yaˬhoˉvaˬ ga laˇ tuˬ yawˇ maˇ lawˬ leh yawˇ hkʼaˇ yawˇ gu ve yoˬ. (2 Raˍ 16:1-3, 12) Aˍsaˍ Suˇriˆ maꞈ moˍ ga laˇ tuˬ lawˬ ve lehˬ nyi˗a kʼo daꞈ ve yoˬ. Yaꞈ hkʼaˇ, hkʼaˬ htaˆ kaꞈ ga piˇ maˇ gʼa. Yaˬhoˉvaˬ tcuh kaˍ paˍ htaꞈ cuˇ leh Aˍsaˍ htaꞈ ca kʼoˆ piˇ tcuh ve, ‘nawˬ lehˬ, Gʼuiˬ sha htaꞈ gʼaˇ maˇ va leh Suˇriˆ jawˇ mawˇ htaꞈ gʼaˇ va ve pa taw, yawˇ hui htaꞈ maˇ gʼaˇ.’ (2 Raˍ 16:7) Ngaˬ hui a shu yawˇ awˬ to htaꞈ gʼaˇ maˇ va jaˇ tuˬ shaˍ tiꞈ gʼa te ve yoˬ. Awˬ lawn kʼo, ngaˬ hui shoꞈ shaꞈ ve teˇ ceuˬ le le a shu yawˇ hkʼaˇ yawˇ gu gʼa ve tehꞈ dawˇ leh Liꞈ hpu hkʼaw Yaˬhoˉvaˬ beˆ maˍ laˇ ve htaꞈ gʼaˇ maˇ va la ve yoˬ. Ngaˬ hui teˇ ceuˬ ceuˬ gʼa hpuˇ leh laꞈ haˉ gʼa dawˇ cheˆ htaˇ, nyi ma gawˬ lehˍ te leh Yaˬhoˉvaˬ htaꞈ gʼaˇ va ve lehˬ, ngaˬ hui cawˇ ve htaꞈ dawˇ cheˆ gʼa tuˬ yawˇ ga laˇ tuˬ yoˬ. w21.01 6 ¶13-15

Tanˇ kaˬ hkʼaˇ maˇ daꞈ leh maꞈ bawˆ daꞈ ve pa taw, Yaˬhoˉvaˬ ve chaw teˇ hpaˍ caˇ tuˬ vuiˬ tuˬ hpu maˇ lawꞈ leh meuꞈ ve yoˬ. Teˇ hpaˍ kʼo yonˍ ve htaꞈ pa taw htawnˍ hkʼaw lo gʼa chehˇ ve yoˬ. Haiˬ ve miˬ guiˬ htaꞈ te luˬ peuˬ hkʼawꞈ nawˉ, chaw awˬ moˉ lonˉ ha lehˬ jaˇ tuˬ yoˬ. Awˬ lawn kʼo, yawˇ hui caˇ tuˬ dawˬ tuˬ cawˬ maˇ jaˇ leh Yaˬhoˉvaˬ ve cuˇ yiˍ kaꞈ gʼa shiˍ tuˬ yoˬ. Yaˬhoˉvaˬ Saˍtanˍ ve miˬ guiˬ htaꞈ te luˬ htaˇ, yawˇ mvuhˇ miˬ teˇ hpaˍ htaꞈ beuꞈ ve lehˬ “haw ve chiˆ ve” hkʼe hpehꞈ ve yoˬ. Yaꞈ hkʼaˇ, yawˇ chaw awˬ moˍ lonˉ htaꞈ chi hkʼe maˇ te taˬ. Tuꞈ jaˇ hkanˍ jaˇ ve peuˬ hkʼawꞈ nawˉ, gʼa ponˬ ve chaw htaꞈ co co taiˍ taiˍ peꞈ laˇ gʼa ve iˉ kaˆ htaꞈ Yeˍsuˆ shiˍ maˍ piˇ tuˬ yoˬ. (Hpeuꞈ 7:17) Chaw awˬ moˍ lonˉ lehˬ dawˇ law kuiˬ daꞈ jaˇ. A shaꞈ teꞈ chehˇ jaw ve laiˉ hinˉ lanˬ gʼaˇ hkʼaw chaw awˬ moˍ lonˉ ceh tiˉ maˇ gʼa suh! (Yoˇ 11:26) Chaw awˬ moˍ lonˉ dawˇ law kuiˬ daꞈ jaˇ leh Yaˬhoˉvaˬ leh Yeˍsuˆ htaꞈ awˬ bon uiˍ jaˇ kʼoˆ piˇ ve yoˬ. w21.01 16-17 ¶11-12

Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ ve awˬ laꞈ gʼawˇ aˬ htoꞈ ma htaꞈ gʼa hpuˇ tuˬ yawˇ dawˇ nyi ve yoˬ. Yawˇ yawˇ ve awˬ laꞈ gʼawˇ htaꞈ haꞈ jaˇ. Hkʼe te leh, “yawˇ hui lehˬ, haiˬ ve awˬ ceuˬ htaꞈ ponˬ piˇ tuˬ” ngaˬ Awˬ pa Yaˬhoˉvaˬ geh lawˬ ve yoˬ. (Yoˇ 17:14, 15) Yeˍsuˆ lehˬ mvuhˇ naw ma hkʼoˆ taˆ kʼoꞈ˗e peuˬ hkʼawꞈ nawˉ, Saˍtanˍ lehˬ Yaˬhoˉvaˬ ve kanˉ te gaˇ ve chaw teˇ gʼaˇ le le htaꞈ maꞈ te tuˬ yoˬ tehꞈ yawˇ shiˍ ve yoˬ. Yaˬhoˉvaˬ ve chaw haꞈ shaˉ laˇ ve htaꞈ gʼa cawˇ ve yoˬ. Chi teˇ hkui ngaˬ hui Yaˬhoˉvaˬ haꞈ shaˉ laˇ tcuh gaˇ ve yoˬ. Saˍtanˍ miˬ guiˬ hkʼoˆ lo yuˬ baˬ ve teˇ yanˇ “nyi ma zuhˆ jaˇ.” (Hpeuꞈ 12:12) Ngaˬ hui htaꞈ fawˉ mehˍ laˇ ve chaw teˇ hpaˍ dawˇ ve yawˇ chi hkʼe te ve lehˬ, “Gʼuiˬ sha ve kanˉ te peuˬ tehꞈ” Saˍtanˍ dawˇ tcuh ve yoˬ. (Yoˇ 16:2) Ngaˬ hui miˬ guiˬ yaˇ htaꞈ maˇ shuˍ ve pa taw, Gʼuiˬ sha htaꞈ maˇ yonˍ ve chaw kaꞈ ngaˬ hui htaꞈ fawˉ mehˍ laˇ ve yoˬ. Aˬ htoꞈ ma htaꞈ pa taw shu ngaˬ hui htaꞈ fawˉ mehˍ laˇ ve htawˇ maˇ kawˆ. Aˬ htoꞈ ma pa taw le? Yaꞈ nyi ve Liꞈ hpu awˬ tawn hkʼaw awˬ lawn chi htaꞈ hkʼawꞈ laˇ ve yoˬ. w21.03 26-27 ¶1, 3

Yaˬhoˉvaˬ teˇ ceuˬ le le haꞈ pehnˇ ve hkʼaw te ve yoˬ. Yaˬhoˉvaˬ ngaˬ hui loˍ ve teˇ ceuˬ le le htaꞈ nyi haꞈ shaˉ laˇ ve yoˬ. Yaˬhoˉvaˬ ngaˬ hui htaꞈ haꞈ jaˇ ve pa taw, Yeˍsuˆ htaꞈ htaiˍ hkʼawꞈ laˇ tcuh ve yoˬ. Yeˍsuˆ kaꞈ ngaˬ hui htaꞈ haꞈ jaˇ ve pa taw, hkanˍ suh laˇ ve yoˬ. (Yoˇ 3:16; 15:13) Ka tiꞈ yeˬ ve chaw htaꞈ Yaˬhoˉvaˬ leh Yeˍsuˆ maˇ haꞈ tuˬ tawˍ piˇ maˇ gʼa. (Yoˇ 13:1; Roˉ 8:35) Chi ve hkʼa shuˍ shuˍ, yehˬ shehˍ hpaˇ kaꞈ haꞈ pehnˇ ve hkʼaw gʼa te ve yoˬ. Aˬ htoꞈ ma te chi a yeˇ uiˍ jaˇ ve le? Tcuh yaˇ Yoˇhanˬ kʼoˆ ve, “a shu yawˇ mawˬ chehˇ ve awˬ viˉ awˬ nyi [maˇ heˆ leh yehˬ kʼa] htaꞈ maˇ haꞈ ve chaw teˇ gʼaˇ lehˬ, maˇ mawˬ jaw ve Gʼuiˬ sha htaꞈ yawˇ hkʼaˬ hkʼe te haꞈ hpehꞈ tuˬ le?” (1 Yoˇ 4:11, 20) Yehˬ kʼa htaꞈ haꞈ ve hawˉ hkʼaˆ lehˬ, Yaˬhoˉvaˬ leh Yeˍsuˆ htaꞈ henˇ yuˬ leh yehˬ kʼa hkʼaw ve chaw htaꞈ yonˍ hkʼaˇ, dawˇ hkʼaˇ leh awˬ to hpawˇ nyi haꞈ shaˉ piˇ ve yoˬ. (1 Tiˆ 5:8) Leh yawˇ ve yaˇ htaꞈ kaꞈ maˍ piˇ ve yoˬ. Yawˇ dawˇ cheˆ htaˇ kaꞈ Yaˬhoˉvaˬ htaꞈ yawˆ yan leh yehˬ kʼa hkʼaw ve chaw awˬ bon cawˬ tuˬ te ve yoˬ. w21.02 5-6 ¶12-13

Mvuhˇ naw ma hkʼoˆ chehˇ ve ngaˬ hui htaꞈ haꞈ ve Awˬ pa Yaˬhoˉvaˬ lehˬ, ngaˬ hui aˬ htoꞈ ma gʼa hpuˇ ve leh awˬ lawn chi ve ngaˬ hui htaꞈ heuˆ la kuiˬ hkʼaˬ hkʼe cawˬ ve yawˇ shiˍ ve yoˬ. Yaꞈ hkʼaˇ, chi hkʼe ceh maˇ heˆ. Ngaˬ hui nyi ma hkʼaw cawˬ ve awˬ ceuˬ teˇ hpaˍ ngaˬ hui maˇ shiˍ gʼa ve htawˇ, Gʼuiˬ sha lehˬ, ngaˬ hui nyi ma hkʼaw cawˬ ve daꞈ ve awˬ ceuˬ htaꞈ mawˬ ve yoˬ. (1 Yoˇ 3:19, 20) Laiˇ gʼaˇ maˇ daꞈ ve htaꞈ maˇ te tuˬ coˇ caˇ jaˇ ve htawˇ, te yaꞈ sheˍ ve yoˬ. Chi yawˇ dawˇ taˍ ve hkʼe te maˇ gʼa leh awˬ gʼaˇ nuˇ jaˇ ve yoˬ. Yaꞈ hkʼaˇ, ngaˬ hui venˇ baˆ te yaꞈ htaˇ nyi ma luˬ ve lehˬ, a hkʼe leˇ hpehꞈ ve yoˬ. (2 Kawˇ 7:10) Yaꞈ hkʼaˇ, ngaˬ hui awˬ to htaꞈ venˇ baˆ hkʼe taw maˇ taˍ cawˇ. ‘Ngaˬ daꞈ kuiˬ teꞈ chiˉ maˇ cawˬ. Yaˬhoˉvaˬ ngaˬ htaꞈ venˇ baˆ hpehˇ laˇ tuˬ awˬ nyi maˇ cawˬ’ tehꞈ dawˇ ve yoˬ. Chi hkʼe ve dawˇ hkʼaˇ lehˬ awˬ tehˬ maˇ heˆ. Chi ngaˬ hui Yaˬhoˉvaˬ ve kanˉ maˇ te tuˬ te laˇ gʼa ve yoˬ hehˉ. Leh nawˬ Yaˬhoˉvaˬ geh kʼawꞈ la˗oˆ. Yawˇ venˇ baˆ hpehˇ laˇ tuˬ bon lawˬ sheˍ. (Isy 1:18) Nawˬ awˬ tehˬ awˬ na nyi ma luˬ ve Yaˬhoˉvaˬ mawˬ htaˇ maˇ kʼawꞈ te yaꞈ ve kʼo, yawˇ nawˬ htaꞈ venˇ baˆ hpehˇ laˇ tuˬ yoˬ. Chi hkʼoˆ kaꞈ, nyi haꞈ shaˉ paˍ ga laˇ tuˬ lawˬ leh nawˬ co ha hpawˇ awˬ gʼaˇ kʼawꞈ hehnˇ la tuˬ ga laˇ tuˬ yoˬ.—Yaˍ 5:14, 15. w20.12 23 ¶5-6

Yeˍsuˆ yaˇ miˇ htaꞈ yawˆ yan ve yo. Yeˍsuˆ ve awˬ co˗e htaˇ, Hpaˍriˍsehˇ hui yaˇ miˇ htaꞈ nyi cha leh chaw guiˇ kuiˬ lo yaˇ miˇ htaꞈ tawˇ maˇ yaw leh Liꞈ hpu hkʼaw ve awˬ lawn kaꞈ maˇ yaw daꞈ jaw. Yaꞈ hkʼaˇ, Yeˍsuˆ chi hkʼe maˇ te. Yeˍsuˆ Liꞈ hpu hkʼaw tcuhˉ kuiˬ naˉ ve awˬ laꞈ gʼawˇ hui htaꞈ maˍ piˇ htaˇ, yaˇ miˇ htaꞈ kaꞈ maˍ piˇ ve yoˬ. (Luˉ 10:38, 39, 42) Leh yawˇ teˇ venˇ le le lo bon ca maˍ˗e htaˇ kaꞈ yaˇ miˇ teˇ hpaˍ yawˇ awˬ hkʼaˇ suh kʼai tcuh ve yoˬ. (Luˉ 8:1-3) Awˬ hkʼoˆ kaꞈ, yawˇ kʼawꞈ teꞈ tu la˗oˬ tehꞈ tcuh yaˇ hui htaꞈ ca kʼoˆ piˇ tuˬ, yaˇ miˇ htaꞈ daꞈ ve awˬ vuiˬ piˇ ve yoˬ. (Yoˇ 20:16-18) Tiˆmoˉseˍ yaˇ miˇ htaꞈ yawˆ yan tuˬ Pawˇluꞈ kʼoˆ piˇ ve yoˬ. Awˉ lawˉ htaˇ Tiˆmoˉseˍ Liꞈ hpu hkʼaw daꞈ kehˬ ve htaꞈ shiˍ tuˬ awˬ e leh awˬ pi ga piˇ ve htaꞈ Pawˇluꞈ kʼoˆ taˍ ve yoˬ. (2 Tiˆ 1:5; 3:14, 15) Chi hkʼoˆ kaꞈ Pawˇluꞈ Roˉmaꞈ venˇ hkʼaw awˬ viˉ awˬ nyi htaꞈ liꞈ bvuhꞈ piˇ htaˇ, awˬ viˉ awˬ nyi yaˇ miˇ teˇ hpaˍ ve awˬ meh htaꞈ kaꞈ kʼoˆ ve yoˬ. Awˬ viˉ awˬ nyi yaˇ miˇ chi teˇ hpaˍ aˬ htoꞈ ma htaꞈ te ve ceh yawˇ chaˬ nyi ve maˇ heˆ. Yaꞈ hkʼaˇ, yaˇ miˇ chi teˇ hpaˍ te ve htaꞈ yawˇ awˬ hpfuhˇ shiˍ ve yoˬ.—Roˉ 16:1-4, 6, 12; Hpi 4:3. w21.02 15 ¶5-6