Ha pa 2 maˬ

Yaꞈ nyi ve Liꞈ hpu awˬ tawn lehˬ hkʼaˬ hkʼe kʼoˆ gaˇ ve le? Yeˍsuˆ kʼawꞈ kʼoˆ ve, nawˬ hui a shu yawˇ awˬ to htaꞈ haꞈ ve aꞈ kehˉ yonˍ hkʼaˇ hkʼa shuˍ ve chaw htaꞈ haꞈ cawˇ ve yoˬ. Haꞈ ve lehˬ a yeˇ uiˍ jaˇ ve awˬ ceuˬ hpehꞈ ve tehꞈ Liꞈ hpu hkʼaw kʼoˆ laˇ ve yoˬ. Laiˉ gʼaˇ a shu yawˇ dawˇ cawˇ ve Liꞈ hpu awˬ tawn cawˬ ve yoˬ. Tawˇ pa haˉ te kʼo, “Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇ 4:8) “Nawˬ awˬ to htaꞈ haꞈ ve hkʼe, nawˬ awˬ paˇ awˬ kui chehˇ ve chaw htaꞈ gʼa haꞈ ve yoˬ.” (Maꞈ 22:39) “Haꞈ pehnˇ ve teˇ ceuˬ lehˬ, maˇ jaˇ ve venˇ baˆ teˇ hpaˍ htaꞈ beh taˍ ve yoˬ.” (1 Peˍ 4:8) “Haꞈ pehnˇ ve lehˬ maˇ luˬ puiˉ.” (1 Kawˇ 13:8) Liꞈ hpu awˬ tawn chi teˇ hpaˍ leh awˬ nu ve Liꞈ hpu awˬ tawn teˇ hpaˍ haꞈ daꞈ ve teˇ ceuˬ a yeˇ uiˍ jaˇ ve tehꞈ hkʼa tawˍ lehˆ hpeuꞈ maw laˇ ve yoˬ. Awˬ tehˬ haꞈ ve lehˬ Yaˬhoˉvaˬ geh laˬ leh yawˇ geh daꞈ kehˬ ve awˬ ha hpu gʼa ve chaw lehˬ, teˇ gʼaˇ leh teˇ gʼaˇ awˬ tehˬ haꞈ daꞈ gʼa tuˬ yawˇ awˬ bon naꞈ laˇ ve yoˬ. (1 Yoˇ 4:7) Awˬ hkʼaˇ chi ve htaꞈ pa taw Yeˍsuˆ kʼoˆ ve, a shu awˬ tehˬ ve Hkriꞈ yaˇ hpehꞈ ve tehꞈ shiˍ tuˬ haꞈ daꞈ ve teˇ ceuˬ hpeuꞈ maw laˇ ve yoˬ. Awˬ gʼuˇ suhˍ htaˇ kaꞈ Yeˍsuˆ kʼoˆ laˇ taˍ ve hkʼa shuˍ, a shu awˬ tehˬ ve Hkriꞈ yaˇ hpehꞈ ve htaꞈ shiˍ gʼa tuˬ yawˇ hui haꞈ daꞈ ve htaꞈ pa taw yoˬ. w23.03 27-28 ¶5-8

Nawˬ shu htaꞈ venˇ baˆ hpehˇ piˇ gaˇ˗aw laˇ? Liꞈ hpu hkʼaw ve chaw shu htaꞈ venˇ baˆ hpehˇ piˇ leh shu htaꞈ venˇ baˆ maˇ hpehˇ piˇ ve chaw ve awˬ lawn nawˬ gʼaw leh hkʼa dehꞈ dawˇ nyi sheˍ. Yeˍsuˆ ve awˬ lawn htaꞈ kaꞈ dawˇ nyi sheˍ. Yawˇ hkʼaˬ htaˆ kaꞈ shu htaꞈ venˇ baˆ hpehˇ piˇ ve yoˬ. Yeˍsuˆ shu yaꞈ kuiˬ htaꞈ maˇ nyi leh shu daꞈ ve awˬ ceuˬ htaꞈ nyi ve yoˬ. (Luˉ 7:47) Yeˍsuˆ ve awˬ co˗e htaˇ, Hpaˍriˍsehˇ hui shu htaꞈ nyi cha ve yoˬ. (Luˉ 18:9) Ngaˬ hui awˬ lawn chi ve teˇ hpaˍ htaꞈ dawˇ nyi htaˇ, a shu yawˇ awˬ to htaꞈ na nyi cawˇ ve, “ngaˬ shu htaꞈ nyi htaˇ, yawˇ hkʼaˬ hkʼe ve chaw hpehꞈ ve htaꞈ nyi ve laˇ? Yawˇ htaꞈ maˇ daꞈ ve hpawˇ nyi ve, maˇ heˆ leh daꞈ ve hpawˇ nyi tuˬ laˇ?” Nawˬ chaw teˇ hpaˍ htaꞈ venˇ baˆ hpehˇ piˇ tuˬ haˍ jaˇ tehꞈ dawˇ ve kʼo, chaw oˇ ve teˇ gʼaˇ daꞈ ve te hkʼaˇ dawˇ hkʼaˇ aˬ htoꞈ ma cawˬ ve nawˬ bvuhꞈ nyi sheˍ. Peuˬ leh a shu yawˇ awˬ to htaꞈ na nyi cawˇ ve, ‘Yeˍsuˆ lehˬ yawˇ htaꞈ hkʼaˬ hkʼe hpawˇ nyi ve le? Yeˍsuˆ hpehꞈ ve kʼo, yawˇ htaꞈ venˇ baˆ hpehˇ piˇ˗aw laˇ?’ Liꞈ hpu hkʼaw ve awˬ lawn htaꞈ henˇ leh hkʼa dehꞈ dawˇ nyi htaˇ, ngaˬ hui ve dawˇ hkʼaˇ htaꞈ pa gʼa ve yoˬ. Awˉ lawˉ htaˇ, ngaˬ hui htaꞈ beuꞈ tuˬ te laˇ ve chaw htaꞈ venˇ baˆ hpehˇ piˇ tuˬ haˍ ve yoˬ. Yaꞈ hkʼaˇ, ngaˬ hui caˉ leh te jawˬ ve kʼo, shu htaꞈ venˇ baˆ hpehˇ piˇ tuˬ sha ve yoˬ. w22.04 23-24 ¶6

Hpeuꞈ maˍ ve liꞈ hkʼaw Gʼuiˬ sha ve canˇ paˍ lehˬ haiˬ ve to nuˇ to shaˆ laiˉ hkeh htaꞈ tehˆ taˍ ve yoˬ. Tawˇ pa haˉ te kʼo, ‘laˇ tsuhˇ gʼuiˬ awˬ hkʼaw lo haiˬ ve to nuˇ to shaˆ teˇ hkeh tawˆ la leh yawˇ lehˬ, awˬ hkaw 10 maˬ cawˬ leh oˉ kʼoˍ 7 shiˍ cawˬ ve yoˬ.’ (Hpeuꞈ 13:1) Peuˬ hkʼawꞈ nawˉ, “miˬ guiˬ awˬ hkʼaw lo awˬ kaˍ awˬ nu haiˬ ve to nuˇ to shaˆ teˇ hkeh tawˆ la” ve yoˬ. Yawˇ “cawˇ shehˍ ma tawˇ yaw ve hkʼa shuˍ shuˍ yawˇ tawˇ yaw” leh ʼmvuhˇ naw ma lo te leh miˬ guiˬ hkʼoˆ hkʼa gaˬ, yawˇ aˬ miˍ htaꞈ ce la tcuh ve yoˬ.ʼ (Hpeuꞈ 13:11-13) Leh haiˬ ve to nuˇ to shaˆ 3 hkeh teˇ hkeh lehˬ, “nyiˉ˗ehˍ ve haiˬ ve to nuˇ to shaˆ” hpehꞈ leh meh maˬ lanˉ lonˉ yawˇ awˬ hkʼoˆ mui taˍ ve yoˬ. Haiˬ ve to nuˇ to shaˆ chi ve 3 hkeh lehˬ, Yaˬhoˉvaˬ ve canˇ paˍ hpehꞈ leh, yawˇ ve mvuhˇ miˬ htaꞈ tawˍ daꞈ chehˇ ve maw jaˇ˗oˬ ve htaꞈ kʼoˆ gaˇ ve yoˬ. Hkʼe te lehˬ, yawˇ hui a shu hpehꞈ ve tehꞈ ngaˬ hui shiˍ tuˬ a yeˇ uiˍ jaˇ. (Hpeuꞈ 17:1, 3) Ngaˬ hui “awˬ lawn” oˇ ve teˇ hpaˍ ve tcuhˉ kuiˬ gʼa na gʼa tcuh ve yoˬ. Ngaˬ hui shiˍ tuˬ ga laˇ gʼa ve teˇ hkʼaˇ lehˬ, awˬ nu ve Liꞈ hpu awˬ tawn teˇ hpaˍ Hpeuꞈ maˍ ve liꞈ hkʼaw ve kʼoˆ maˍ laˇ taˍ ve yoˬ. Liꞈ kʼoˆ chi ve hkʼaw awˬ han tehˆ maˍ laˇ taˍ ve laiˉ ceuˬ lehˬ, Liꞈ hpu hkʼaw ve awˬ lawn awˬ nu ve liꞈ kʼoˆ hkʼaw kaꞈ kʼoˆ maˍ laˇ taˍ ve yoˬ. w22.05 8-9 ¶3-4

Ngaˬ hui a shaꞈ maˇ leh maˇ chehˇ sha ve pa taw, oˇ htaˇ hkʼe leˇ Gʼuiˬ sha ve kanˉ hkʼa dehꞈ te maˇ gʼa ve kʼo, ngaˬ hui haꞈ yuˬ gʼa tuˬ haˍ ve yoˬ. Nawˬ oˇ htaˇ hkʼe leˇ Yaˬhoˉvaˬ ve kanˉ hkʼa dehꞈ te maˇ gʼa leh awˬ gʼaˇ nuˇ ve kʼo, a shu yawˇ awˬ to htaꞈ na nyi cawˇ ve, “Yaˬhoˉvaˬ ngaˬ htaꞈ aˬ htoꞈ ma te tcuh gaˇ ve le?” Yawˇ lehˬ chi teˇ hkui nawˬ te gʼa ve awˬ ceuˬ htaꞈ hkʼa dehꞈ te tcuh gaˇ ve yoˬ. Awˬ lawn chi htaꞈ dawˇ nyi sheˍ. Awˬ viˉ awˬ nyi yaˇ miˇ a shaꞈ 80 hkʼawꞈ gaˬ˗oˬ leh a shaꞈ 40 hkʼawꞈ htaˇ hkʼe taw Yaˬhoˉvaˬ ve kanˉ hkʼa dehꞈ te maˇ gʼa ve pa taw, awˬ gʼaˇ nuˇ ve yoˬ. Yaˬhoˉvaˬ ve kanˉ hkʼaˬ hkʼe taw te ve htawˇ yawˇ nyi hkʼaˇ nyi suh tuˬ te piˇ maˇ gʼa tehꞈ dawˇ ve yoˬ. Awˬ tehˬ awˬ na chi hkʼe hpehꞈ˗aw laˇ? Dawˇ nyi sheˍ. Yawˇ 40 hkʼawꞈ htaˇ Gʼuiˬ sha ve kanˉ hkʼa dehꞈ te gʼa ve yoˬ. 80 hkʼawꞈ gaˬ˗oˬ ve htawˇ kaꞈ yawˇ Gʼuiˬ sha ve kanˉ hkʼa dehꞈ te sheˍ ve yoˬ. A shaꞈ hkʼaˬ hkʼe ma gaˬ˗oˬ ve htawˇ, yawˇ Yaˬhoˉvaˬ ve kanˉ te gʼa ve hkʼe hkʼa dehꞈ te sheˍ ve yoˬ. Ngaˬ hui te gʼa ve hkʼe hkʼa dehꞈ te ve kʼo, Yaˬhoˉvaˬ ngaˬ hui htaꞈ daꞈ jaˇ tehꞈ kʼoˆ laˇ tuˬ yoˬ. (Maꞈhtehˍ 25:20-23 htaꞈ tehˆ daꞈ sheˍ.) Ngaˬ hui te gʼa ve awˬ ceuˬ htaꞈ a yeˇ yuˬ ve kʼo, ngaˬ hui Gʼuiˬ sha ve kanˉ te ve htaꞈ ha lehˬ tuˬ yoˬ. w22.04 10 ¶2; 11 ¶4-6

Hpeuꞈ maˍ ve liꞈ kaˇ nanˉ uiˍ 21 hkʼaw 144,000 gʼaˇ htaꞈ “Yeˍruˆsaˍlehnˍ venˇ awˬ suhˉ” daꞈ jaˇ ve htaꞈ tehˆ taˍ ve yoˬ. Venˇ oˇ ve lehˬ, “awˬ hkuiˉ puiˍ kawˍ taˍ ve haˉ pui 12 shiˍ cawˬ leh, oˇ ve teˇ hpaˍ awˬ hkʼoˆ htaꞈ Yawˬ ehˉ ve tcuh yaˇ 12 gʼaˇ ve awˬ meh cawˬ taˍ ve yoˬ.” (Hpeuꞈ 21:10-14; Efs 2:20) Venˇ oˇ ve lehˬ awˬ nu ve venˇ htaꞈ maˇ shuˍ. Venˇ oˇ ve awˬ hkʼaw lo cawˬ ve yaꞈ kʼaw lonˉ lehˬ daꞈ jaˇ ve shiˍ hpehꞈ ve yoˬ. Yehˬ miˉ 12 maˬ lehˬ piˉ ko˗eˍ shehnˉ 12 shiˍ cawˬ ve yoˬ. Lanˇ venˇ awˬ hkuiˉ puiˍ kawˍ taˍ ve teˇ hpaˍ awˬ hpfuhˇ hkʼaˆ jaˇ ve piˉ ko˗eˍ shehnˉ yuˬ te taˍ ve yoˬ. Venˇ oˇ ve lehˬ kʼehˬ hpawˇ, zuhˬ hpawˇ, mvuh hpawˇ hkʼa shuˍ hpehꞈ ve yoˬ. (Hpeuꞈ 21:15-21) Yaꞈ hkʼaˇ, venˇ oˇ ve teˇ ceuˬ ceuˬ maˇ cawˬ ve htaꞈ Yoˇhanˬ mawˬ ve yoˬ. Yawˇ kʼoˆ ve, “venˇ oˇ ve awˬ hkʼaw lo bon yehˬ lonˉ htaꞈ ngaˬ maˇ mawˬ. Awˬ lawn kʼo, kanˇ paˆ uiˍ jaˇ ve Jawˇ mawˇ Gʼuiˬ sha leh Yawˬ ehˉ lehˬ, venˇ oˇ ve awˬ hkʼaw lo bon yehˬ lonˉ hpehꞈ ve yoˬ. Venˇ oˇ ve awˬ hkʼaw lo mvuhˇ nyi leh ha pa awˬ gʼeuˆ ba tuˬ maˇ loˍ. Awˬ lawn kʼo, Gʼuiˬ sha ve awˬ meꞈ awˬ hponˇ lehˬ, venˇ oˇ ve htaꞈ awˬ gʼeuˆ ba piˇ leh, Yawˬ ehˉ lehˬ, venˇ oˇ ve awˬ pon kawˆ faiˇ hpehꞈ ve yoˬ.” (Hpeuꞈ 21:22, 23) Yeˍruˆsaˍlehnˍ venˇ awˬ suhˉ htaꞈ shuˍ ve 144,000 gʼaˇ lehˬ Yaˬhoˉvaˬ geh hkʼaˬ htaˆ kaꞈ kʼai gʼa ve yoˬ. Hkʼe te leh, yawˇ hui bon yehˬ lonˉ cawˬ tuˬ maˇ loˍ. Chi hkʼoˆ kaꞈ, yawˇ hui Gʼuiˬ sha ve kanˉ daꞈ kehˬ ve htaꞈ te tuˬ mvuhˇ naw ma hkʼoˆ lo ve Paw hkuˇ lonˉ Yeˍsuˆ lehˬ yawˇ hui htaꞈ sheh kʼai chehˇ ve yoˬ.—Heˍ 7:27; Hpeuꞈ 22:3, 4. w22.05 17-18 ¶14-15

Yaˬhoˉvaˬ lehˬ hpanˍ shehˍ hpaˇ hpehꞈ ve awˬ hkʼoˆ kaꞈ, awˬ liˇ awˬ hkʼaˇ teh shehˍ hpaˇ, suhˉ jehˬ shehˍ hpaˇ, leh ngaˬ hui htaꞈ haꞈ ve Awˬ pa kaꞈ hpehꞈ ve yoˬ. (Chiˇ 100:3; Isy 33:22) Ngaˬ hui Gʼuiˬ sha htaꞈ venˇ baˆ te yaꞈ leh awˬ tehˬ awˬ na dawˇ hpfuhˆ ve kʼo, yawˇ ngaˬ hui htaꞈ venˇ baˆ hpehˇ laˇ gaˇ ve yoˬ. (Chiˇ 86:5) Yaˬhoˉvaˬ tcuh kaˍ paˍ Iˉsaˍyaˆ htaꞈ cuˇ leh ngaˬ hui htaꞈ ka tiꞈ te laˇ ve, “nawˬ hui lehˬ venˇ baˆ htaꞈ pa taw nyiˉ˗ehˍ hpehꞈ chehˇ taˍ ve htawˇ, vaˇ meu˗e hkʼa shuˍ kʼawꞈ hpu la tuˬ ngaˬ tsuhˇ baˬ laˇ tuˬ yoˬ.” (Isy 1:18) Ngaˬ hui teˇ gʼaˇ le le maˇ biˇ ve chaw hpehꞈ ve yoˬ. Hkʼe te leh, ngaˬ hui tawˇ yaw ve leh te ve awˬ ceuˬ awˬ nu ve chaw beuꞈ tuˬ te piˇ ve yoˬ. (Yaˍ 3:2) Yaꞈ hkʼaˇ, chi ve lehˬ ngaˬ hui shu htaꞈ maˇ caˉ daꞈ˗o ve tehꞈ kʼoˆ gaˇ ve maˇ heˆ. Ngaˬ hui venˇ baˆ hpehˇ daꞈ ve kʼo, awˉ lawˉ htaˇ hkʼe kʼawꞈ haꞈ daꞈ gʼa ve yoˬ. (Tawˇ 17:9; 19:11; Maꞈ 18:21, 22) Ngaˬ hui awˬ viˉ awˬ nyi geh awˬ lawn cawˬ daꞈ leh nyi ma naˬ tuˬ te piˇ ve kʼo, Yaˬhoˉvaˬ lehˬ ngaˬ hui htaꞈ venˇ baˆ hpehˇ daꞈ tcuh gaˇ ve yoˬ. Awˬ lawn kʼo, Yaˬhoˉvaˬ lehˬ ngaˬ hui htaꞈ ‘venˇ baˆ hpehˇ laˇ puiˉ ve’ pa taw, ngaˬ hui kaꞈ chi hkʼe te gaˇ ve yoˬ.—Isy 55:7. w22.06 8 ¶1-2

Ngaˬ hui ve awˬ to shu htaꞈ maˇ tehˆ daꞈ ve htawˇ, Yaˬhoˉvaˬ ve kanˉ te ve ka tiꞈ ve chaw htaꞈ ngaˬ hui nyi htaˇ awˬ bon gʼa ve yoˬ. Yeˍsuˆ lehˬ ngaˬ hui awˬ pon henˇ yuˬ tuˬ daꞈ jaˇ ve yoˬ. Yeˍsuˆ biˇ ve chaw hpehꞈ ve htawˇ, yawˇ aˬ htoꞈ ma te ve leh yawˇ ve daꞈ ve te hkʼaˇ dawˇ hkʼaˇ htaꞈ ngaˬ hui henˇ yuˬ gʼa ve yoˬ. (1 Peˍtruˆ 2:21) Yeˍsuˆ ve awˬ lawn htaꞈ ngaˬ hui hkʼa dehꞈ henˇ yuˬ htaˇ, ngaˬ hui Yaˬhoˉvaˬ ve kanˉ hkʼa dehꞈ te gʼa tuˬ yoˬ. Liꞈ hpu hkʼaw Gʼuiˬ sha ve kanˉ te ve ka tiꞈ yeˬ ve chaw hawˉ hkʼaˆ leh yaˇ miˇ laiˉ gʼaˇ cawˬ ve yoˬ. Yawˇ hui maˇ biˇ ve chaw hpehꞈ ve htawˇ, ngaˬ hui yawˇ hui htaꞈ henˇ yuˬ gʼa ve yoˬ. Tawˇ pa haˉ te kʼo, Yaˬhoˉvaˬ lehˬ Daˍviˆ htaꞈ “ngaˬ nyi ma cawˇ ve chaw” tehꞈ kuˬ ve htaꞈ dawˇ nyi sheˍ. (Tcuh 13:22) Daˍviˆ uiˍ jaˇ ve venˇ baˆ htaꞈ te yaꞈ jaw ve chaw hpehꞈ ve htawˇ, yawˇ ngaˬ hui awˬ pon daꞈ ve henˇ yuˬ tuˬ hpehꞈ ve yoˬ. Aˬ htoꞈ ma pa taw le? Yawˇ te yaꞈ ve htaꞈ haꞈ yuˬ ve yoˬ. Yaꞈ hkʼaˇ, beˆ maˍ piˇ ve chi hehnˇ ve awˬ ceuˬ hpehꞈ ve htawˇ, yawˇ haꞈ yuˬ ve yoˬ. Leh Daˍviˆ kaꞈ yawˇ te ve awˬ ceuˬ htaꞈ nyi ma luˬ jaˇ ve yoˬ. Chi htaꞈ pa taw, Yaˬhoˉvaˬ yawˇ htaꞈ venˇ baˆ hpehˇ piˇ ve yoˬ.—Chiˇ 51:3, 4, 10-12. w22.04 13 ¶11-12

Liꞈ hpu hkʼaw kʼoˆ ve suh ve lehˬ canˇ paˍ hpehꞈ ve yoˬ. (1 Kawˇ 15:25, 26) Ngaˬ hui awˬ to maˇ heˆ leh ngaˬ hui haꞈ ve chaw naˬ jaˇ htaˇ, suh ve awˬ lawn htaꞈ ngaˬ hui dawˇ nyi htaˇ nyi ma maˇ sha ve yoˬ. Aˬ htoꞈ ma pa taw ngaˬ hui suh ve htaꞈ kawˆ ve le? Yaˬhoˉvaˬ ngaˬ hui htaꞈ suh tuˬ hpanˍ laˇ ve maˇ heˆ. Co co taiˍ taiˍ chehˇ gʼa tuˬ hpanˍ laˇ ve yoˬ. (Cuˇ 3:11) Yaꞈ hkʼaˇ, suh ve htaꞈ kawˆ ve kaꞈ awˬ bon cawˬ ve yoˬ. Awˬ bon cawˬ ve caˇ tuˬ htaꞈ caˇ ve, hkʼaˬ htaˆ kaꞈ awˬ gʼaˇ caw ve, saˍ laꞈ gʼonˍ geh kʼai ve, maˇ heˆ leh naˬ htaˇ naˆ tsuhˇ dawˬ ve leh kawˆ tuˬ cawˬ ve awˬ ceuˬ htaꞈ maˇ te tuˬ chi ve teˇ hpaˍ ngaˬ hui shiˍ tuˬ ga laˇ ve yoˬ. Ngaˬ hui a shaꞈ htaꞈ haꞈ ve tehꞈ Saˍtanˍ shiˍ ve yoˬ. Ngaˬ hui a shaꞈ gʼa teꞈ chehˇ tuˬ awˬ pon ngaˬ hui cawˬ taˍ ve teˇ ceuˬ le le leh Yaˬhoˉvaˬ geh meuˆ daꞈ ve shonˇ kʼai piˇ hpehꞈ ve tehꞈ Saˍtanˍ kʼoˆ ve yoˬ. (Yb 2:5) Yaꞈ hkʼaˇ, Saˍtanˍ dawˇ ve lehˬ yaꞈ jaˇ. Saˍtanˍ lehˬ “suh ve teˇ ceuˬ awˬ hkʼoˆ kanˇ paˆ cawˬ” ve yoˬ. Hkʼe te leh, ngaˬ hui Yaˬhoˉvaˬ htaꞈ baˬ taˉ tuˬ suh ve htaꞈ kawˆ tuˬ Saˍtanˍ yehˇ ve yoˬ.—Heˍ 2:14, 15. w22.06 18 ¶15-16

Ngaˬ hui ve kanˉ htaꞈ tawˍ laˇ ve awˬ yanˇ htaˇ, laiˉ gʼaˇ htaꞈ mawˬ daꞈ maˇ gʼa ve yoˬ. chi htaꞈ pa taw a yeˇ uiˍ jaˇ ve lehˬ, awˬ viˉ awˬ nyi teˇ gʼaˇ le le gʼa haꞈ daꞈ cawˇ ve yoˬ. Ngaˬ hui tawˍ daꞈ chehˇ ve lehˬ Saˍtanˍ yoˬ. Awˬ viˉ awˬ nyi maˇ heˆ. Awˬ viˉ awˬ nyi yaꞈ kuiˬ htaꞈ taˇ nyi. Nawˬ hui maˇ na gʼa daꞈ ve awˬ ceuˬ cawˬ ve kʼo laꞈ haˉ gu sheˍ. (Tawˇ 19:11) Teˇ gʼaˇ leh teˇ gʼaˇ ga daꞈ tuˬ awˉ lawˉ te sheˍ. (Tiˇ 3:14) Kaˇ hpawˇ caˉ daꞈ ve maˇ dawˇ maˇ gaˇ gʼa hpuˇ ve awˬ viˉ awˬ nyi yaˇ miˇ ve awˬ lawn lehˬ, awˬ nu ve awˬ viˉ awˬ nyi yawˇ htaꞈ ga piˇ ve pa taw awˬ bon gʼa jaˇ. Hto toˇ ve awˬ moˍ ehˉ hkʼaw awˬ viˉ awˬ nyi teˇ gʼaˇ le le haꞈ daꞈ leh meuˆ daꞈ jaˇ ve pa taw, teˇ yehˬ kʼa hkʼaw ve chaw hkʼe hpehꞈ ve yoˬ. (Chiˇ 133:1) Awˬ viˉ awˬ nyi laiˉ shehnˉ gʼaˇ mvuhˇ miˬ uˉ peunˍ paˍ ngaˬ hui ve kanˉ htaꞈ tawˍ laˇ kuiˬ lo yawˇ hui Yaˬhoˉvaˬ ve kanˉ te ve yoˬ. Teˇ hpaˍ kʼo yonˍ ve htaꞈ pa taw htawnˍ hkʼaw lo gʼa chehˇ ve yoˬ. Ngaˬ hui yawˇ hui awˬ pon leh yehˬ kʼa hkʼaw ve chaw awˬ pon bon lawˬ piˇ gʼa ve yoˬ. Awˬ viˉ awˬ nyi chi ve teˇ hpaˍ htaꞈ yonˍ hkʼaˇ hpawˇ, awˬ to hpawˇ, leh mvuhˇ miˬ awˬ liˇ hpawˇ, ca ga piˇ ve kawˆ tuˬ cawˬ ve chaw awˬ pon ngaˬ hui bon lawˬ piˇ gʼa ve yoˬ. (Kawˇ 4:3, 18) Nawˬ ve bon lawˬ hkawˇ lehˬ nawˬ dawˇ taˍ ve aꞈ kehˉ kanˇ paˆ cawˬ jaˇ!—2 Hteˇ 3:1, 2; 1 Tiˆ 2:1, 2. w22.12 26-27 ¶15-16

Yaˇ lehˬ awˬ pa awˬ e te ve awˬ ceuˬ htaꞈ henˇ yuˬ ve yoˬ. Awˬ pa awˬ e biˇ ve chaw teˇ gʼaˇ kaꞈ maˇ hpehꞈ. (Roˉ 3:23) Yaꞈ hkʼaˇ, awˬ pa awˬ e cuˇ yiˍ cawˬ ve lehˬ, yaˇ awˬ pon daꞈ ve henˇ tuˬ hpehꞈ tuˬ coˇ caˇ leh te ve yoˬ. Awˬ pa teˇ gʼaˇ kʼoˆ ve, “yaˇ teˇ hpaˍ lehˬ hpa htaꞈ shuˍ ve yoˬ. Hpa lehˬ iˉ kaˆ awˬ paˇ lo teh piˇ htaˇ chawꞈ ve yoˬ. Ngaˬ hui maˍ ve hkʼe maˇ gʼaꞈ te ve kʼo, yaˇ ngaˬ hui htaꞈ laꞈ haˉ kʼoˆ laˇ ve yoˬ.” Chi htaꞈ pa taw, nawˬ ve yaˇ Yaˬhoˉvaˬ htaꞈ haꞈ tcuh gaˇ ve kʼo, nawˬ Yaˬhoˉvaˬ htaꞈ haꞈ ve tehꞈ yaˇ mawˬ tuˬ gʼa te maˍ piˇ ve yoˬ. Yaˇ Yaˬhoˉvaˬ htaꞈ haꞈ tuˬ awˬ pa awˬ e maˍ piˇ gʼa ve laiˉ hkʼaˇ cawˬ ve yoˬ. Awˬ viˉ awˬ nyi yaˇ nehˬ Eh˗don meh ve 17 hkʼawꞈ gaˬ˗oˬ ve kʼoˆ ve, “bon lawˬ ve a yeˇ hkʼaˬ hkʼe taw uiˍ ve ngaˬ pa ngaˬ e hkʼaˬ htaˆ kʼaꞈ ngaˬ htaꞈ kʼoˆ laˇ ve yoˬ. Teˇ haˉ le le ngaˬ bon lawˬ˗oˬ ve htawˇ, ngaˬ pa ngaˬ geh bon lawˬ laˇ sheˍ ve yoˬ. . . . Chi teˇ hkui ngaˬ Yaˬhoˉvaˬ geh bon lawˬ ve nyi ma sha jaˇ leh Yaˬhoˉvaˬ lehˬ ngaˬ htaꞈ haꞈ jaˇ ve Awˬ pa hpehꞈ ve yoˬ.” Awˬ pa awˬ e hpehꞈ ve chaw˗oˬ, nawˬ Yaˬhoˉvaˬ htaꞈ haꞈ ve nawˬ dawˇ taˍ ve aꞈ kehˉ nawˬ ve yaˇ awˬ pon awˬ bon cawˬ jaˇ. w22.05 28 ¶7-8

Baˆtiˆsaˬ haꞈ yuˬ gʼa tuˬ ngaˬ hui te cawˇ ve awˉ lawˉ teˇ ceuˬ lehˬ, awˬ tehˬ awˬ na venˇ baˆ dawˇ hpfuhˆ ve yoˬ. (Tcuh 2:37, 38) Nawˬ awˬ tehˬ awˬ na venˇ baˆ dawˇ hpfuhˆ ve kʼo, chi ve nawˬ ve te hkʼaˇ dawˇ hkʼaˇ htaꞈ pa tuˬ ga laˇ gʼa ve yoˬ. Tawˇ pa haˉ te kʼo, Yaˬhoˉvaˬ maˇ dawˇ cawˇ ve awˬ ceuˬ lehˬ, haˉ chawˇ haˉ paˆ te ve, shuˉ dawˬ ve, leh maˇ daꞈ ve tawˇ yaw ve, chi ve teˇ hpaˍ htaꞈ nawˬ maˇ te˗o ve laˇ? (1 Kawˇ 6:9, 10; 2 Kawˇ 7:1; Efs 4:29) Caˉ leh pa tuˬ coˇ caˇ sheˍ. Nawˬ htaꞈ Liꞈ hpu maˍ laˇ ve chaw geh yaw daꞈ ve, maˇ heˆ leh Hkriꞈ yaˇ awˬ moˍ hkʼaw nyi haꞈ shaˉ paˍ geh beˆ maˍ laˇ tuˬ lawˬ sheˍ. Nawˬ yaˇ nehˬ hpehꞈ leh awˬ pa awˬ e geh chehˇ sheˍ ve kʼo, nawˬ Baˆtiˆsaˬ maˇ haꞈ yuˬ tuˬ te laˇ ve, maˇ daꞈ ve te hkʼaˇ dawˇ hkʼaˇ htaꞈ awˬ pa awˬ e beˆ maˍ laˇ tuˬ lawˬ sheˍ. Chi hkʼoˆ kaꞈ, nawˬ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te gʼa tuˬ a yeˇ uiˍ jaˇ ve yoˬ. Tawˇ pa haˉ te kʼo, nawˬ hpawnˬ daꞈ ve hkʼaˬ htaˆ kaꞈ kʼai leh awˬ gʼaˇ piˇ daꞈ sheˍ. (Heˍ 10:24, 25) Nawˬ teˇ yehˬ peuˬ teˇ yehˬ hto toˇ tuˬ te gʼa˗oˬ htaˇ, hto toˇ ve hkʼaˬ htaˆ kaꞈ kʼai sheˍ. w23.03 10-12 ¶14-16

“Vuiˬ” leh ‘vuiˬ ve awˬ yaˇ awˬ duˬʼ Awˬ hkuiˉ puiˍ liꞈ 3:14, 15 hkʼaw kʼoˆ taˍ ve yoˬ. Vuiˬ lehˬ to nuˇ to shaˆ hpehꞈ leh Eˍdenˍ hko hkʼaw Yaˬhoˉvaˬ Eˇvaꞈ htaꞈ kʼoˆ piˇ ve awˬ ceuˬ yawˇ maˇ na gʼa. Chi htaꞈ pa taw, chi ve lehˬ a shaꞈ teꞈ chehˇ ve cuˇ yiˍ cawˬ ve awˬ ceuˬ hpehꞈ ve yoˬ. Hkʼe kʼo, a shu htaꞈ kʼoˆ gaˇ ve le? Hpeuꞈ maˍ ve liꞈ 12:9 hkʼaw hkʼa tawˍ lehˆ kʼoˆ laˇ ve, “vuiˬ haiˬ” chi ve lehˬ Saˍtanˍ hpehꞈ ve yoˬ. Maˇ˗awˍ ve kʼo, yaˇ lehˬ awˬ pa hkʼa shuˍ dawˇ leh te ve yoˬ. Teˇ pawˆ pawˆ kʼo, Liꞈ hpu hkʼaw “awˬ yaˇ awˬ duˬ” tehꞈ kʼoˆ ve lehˬ yawˇ ve awˬ pa hkʼa shuˍ dawˇ leh te ve htaꞈ kʼoˆ gaˇ ve yoˬ. Chi htaꞈ pa taw, vuiˬ ve awˬ yaˇ awˬ duˬ lehˬ Yaˬhoˉvaˬ leh yawˇ ve chaw htaꞈ tawˍ ve chaw hui htaꞈ kʼoˆ gaˇ ve yoˬ. Noˉaꞈ ve awˬ co˗e htaˇ mvuhˇ naw ma tcuh yaˇ yawˇ hui ve awˬ vuiˬ htaꞈ baˬ taˉ leh miˬ guiˬ hkʼoˆ yaꞈ la leh, haiˬ ve chaw lehˬ yawˇ hui awˬ pa Saˍtanˍ hkʼa shuˍ te ve chi teˇ hpaˍ htaꞈ kʼoˆ gaˇ ve yoˬ.—Awˬ 6:1, 2; Yoˇ 8:44; 1 Yoˇ 5:19; Yuˇ 6. w22.07 14-15 ¶4-5

Tcuh yaˇ Pawˇluꞈ yawˇ tuꞈ ve hkanˍ ve gʼa hpuˇ jaw ve pa taw, awˬ viˉ awˬ nyi htaꞈ haꞈ jaˇ. Hkʼe te leh, yawˇ awˬ viˉ awˬ nyi htaꞈ ha kʼaˉ leh yawˇ hui tuꞈ ve hkanˍ ve gʼa hpuˇ ve htaꞈ yawˇ shiˍ ve yoˬ. Teˇ pawˆ htaˇ, Pawˇluꞈ hpu maˇ cawˬ ve pa taw yawˇ awˬ to leh yawˇ geh chehˇ ve chaw htaꞈ hu tuˬ kanˉ gʼa te ve yoˬ. (Tcuh 20:34) Pawˇluꞈ Kawˇrenˍhtuˆ venˇ lo ga la gehˇ sheˍ htaˇ, hpa aˉ po kʼo tawˉ ve yoˬ. Yawˇ lehˬ Aˍkuˉlaˆ leh Piˇkiˇlaˆ geh hpa aˉ po kʼo teˇ geh tawˉ ve yoˬ. Yaꞈ hkʼaˇ, ‘teˇ shinˉ le le’ Yuˇdaꞈ chaw leh Heˍlaˍsaˆ chaw htaꞈ bon maˍ piˇ ve yoˬ. Siˍlaˆ leh Tiˆmoˉseˍ yawˇ geh Kawˇrenˍhtuˆ venˇ lo laˬ htaˇ, “yawˇ lehˬ gʼaˇ hteꞈ bon maˍ chehˇ” ve yoˬ. (Tcuh 18:2-5) Pawˇluꞈ yawˇ a shaꞈ teꞈ kuiˬ hkʼaw dawˇ teh taˍ ve lehˬ, Yaˬhoˉvaˬ ve kanˉ gʼa te ve tehꞈ hkʼaˬ htaˆ kaꞈ dawˇ nyi ve yoˬ. Pawˇluꞈ kaiˬ ve hkʼaw Gʼuiˬ sha ve kanˉ te leh yawˇ awˬ to htaꞈ hu tuˬ kanˉ te ve pa taw, yawˇ daꞈ jaˇ ve henˇ yuˬ tuˬ hpehꞈ leh awˬ viˉ awˬ nyi awˬ gʼaˇ piˇ daꞈ tuˬ yawˇ beˆ maˍ piˇ gʼa ve yoˬ. A shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve aꞈ kehˉ yehˬ kʼa htaꞈ hu tuˬ a yeˇ uiˍ jaˇ ve tehꞈ maˇ gʼa shawˍ tuˬ yawˇ awˬ viˉ awˬ nyi htaꞈ shaˍ tiꞈ piˇ ve yoˬ. w22.08 20-21 ¶3

Chi beuꞈ teˇ co˗e Gʼuiˬ sha lehˬ yawˇ ve mvuhˇ miˬ htaꞈ caˉ daꞈ ve daꞈ ve awˬ lawn sha tanˇ miˬ guiˬ hkʼoˆ teˇ kaˬ le le lo hto toˇ tcuh gaˇ ve yoˬ. (1 Tiˆ 2:3, 4) Kanˉ chi ve lehˬ Yaˬhoˉvaˬ ve kanˉ hpehꞈ leh a yeˇ uiˍ jaˇ tehꞈ shawˍ ve yoˬ. Hkʼe te leh, Gʼuiˬ sha lehˬ yawˇ haꞈ jaˇ ve Yaˇ paˍ Yeˍsuˆ htaꞈ kanˉ chi ve nyi haꞈ shaˉ tcuh ve yoˬ. Yeˍsuˆ lehˬ kanˉ chi ve htaꞈ beˆ maˍ chehˇ ve pa taw awˬ leh meuˇ ve awˬ nyi maˇ gaˬ sheˍ htaˇ, kanˉ chi ve Yaˬhoˉvaˬ loˍ ve hkʼe te biˇ gʼa tuˬ yoˬ tehꞈ ngaˬ hui yonˍ gʼa ve yoˬ. (Maꞈ 24:14) Chi ngaˬ hui hkʼaˬ hkʼe te shiˍ gʼa ve le? Yeˍsuˆ mvuhˇ naw ma hkʼoˆ maˇ kʼoꞈ˗e sheˍ htaˇ, Gaˍliˍlehˇ hkʼaw hkʼoˆ lo yawˇ awˬ laꞈ gʼawˇ laiˉ gʼaˇ htaꞈ mawˬ daꞈ ve yoˬ. Yeˍsuˆ yawˇ hui htaꞈ kʼoˆ piˇ ve, Gʼuiˬ sha lehˬ “mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ ngaˬ htaꞈ peꞈ laˇ peuˬ.” Leh Yeˍsuˆ yawˇ hui htaꞈ kʼoˆ piˇ ve awˬ ceuˬ htaꞈ kʼawꞈ nyi sheˍ. Yawˇ kʼoˆ ve, “nawˬ hui kʼai leh, chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.” (Maꞈ 28:18, 19) Yeˍsuˆ Yaˬhoˉvaˬ geh kanˇ paˆ gʼa ve teˇ ceuˬ lehˬ, hto toˇ ve htaꞈ nyi haꞈ shaˉ ve yoˬ. Leh yawˇ lehˬ chi teˇ hkui hkʼa gaˬ hto toˇ ve htaꞈ nyi haꞈ shaˉ chehˇ ve yoˬ. w22.07 8 ¶1, 3; 9 ¶4

Yawˇ hui maˇ suh sheˍ htaˇ daꞈ ve awˬ ceuˬ htaꞈ te ve chaw lehˬ, ‘a shaꞈ gʼa tuˬ kʼawꞈ teꞈ tu la tuˬ yoˬ.’ Awˬ lawn kʼo, co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ˗oˬ ve yoˬ. Chi kʼoˆ gaˇ ve lehˬ Yoˇhanˬ liꞈ 5:29 hkʼaw “daꞈ ve htaꞈ te ve chaw” kʼawꞈ teꞈ tu la leh Tcuh yaˇ liꞈ 24:15 hkʼaw “hteˇ ve chaw” kʼawꞈ teꞈ tu la ve chi ve 2 ceuˬ shuˍ daꞈ ve yoˬ. Roˉmaꞈ liꞈ 6:7 hkʼaw kʼoˆ ve, “suh peuˬ ve chaw teˇ gʼaˇ lehˬ, venˇ baˆ awˬ hkʼaw lo ponˬ tawˆ la peuˬ.” Awˬ tehˬ yoˬ, yawˇ hui suh peuˬ kʼo venˇ baˆ gʼa ponˬ peuˬ. Yaꞈ hkʼaˇ, yawˇ hui Gʼuiˬ sha ve kanˉ ka tiꞈ yeˬ ve hkʼaw te ve hkʼaˬ htaˆ kaꞈ cawˬ tuˬ yoˬ. Chi htaꞈ pa taw, yawˇ hui suh˗oˬ ve htawˇ, co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ ve yoˬ. (Heˍ 6:10) Yawˇ hui ve awˬ meh liꞈ chi ve hkʼaw hkʼaˬ htaˆ kaꞈ cawˬ tuˬ ka tiꞈ gʼa yeˬ ve yoˬ. w22.09 18 ¶13, 15

Yonˍ gʼa ve chaw hpehꞈ tuˬ tcuh kaˍ paˍ Daˍyeˍlaˆ lehˬ daꞈ jaˇ ve henˇ yuˬ tuˬ hpehꞈ ve yoˬ. Yawˇ Baˍbuˍlonˍ mvuhˇ miˬ lo shu ceˬ te tuˬ yuˬ kʼai ve htawˇ, maˇ maw yawˇ lehˬ yonˍ gʼa ve chaw hpehꞈ leh awˬ meh bvuhˬ ve yoˬ. Baˍbuˍlonˍ jawˇ mawˇ Neˍbuˍhkaˍneˍzaˍ ve zuhꞈ maˆ htaꞈ yawˇ yuˬ tawˆ gʼa tuˬ Yaˬhoˉvaˬ ga piˇ htaˇ, chaw yaˇ kaꞈ yawˇ htaꞈ yonˍ maˇ la ve yoˬ. (Daˍ 4:20-22, 25) Laiˉ hkʼawꞈ peuˬ hkʼawꞈ nawˉ Baˍbuˍlonˍ venˇ gʼoꞈ pa hkʼoˆ lo liꞈ mehˆ bvuhꞈ tawˆ la ve htaꞈ yawˇ yuˬ tawˆ piˇ htaˇ, yawˇ lehˬ yonˍ gʼa ve chaw kʼawꞈ hpehꞈ ve tehꞈ hpeuꞈ maw laˇ ve yoˬ. (Daˍ 5:5, 25-29) Meˍdiˆ chaw jawˇ mawˇ Daˍriˆ ve awˬ co˗e gaˬ htaˇ, Daˍyeˍlaˆ lehˬ “cuˇ yiˍ cawˬ leh kanˉ te puiˉ jaˇ ve” htaꞈ jawˇ mawˇ leh a maꞈ lonˉ teˇ hpaˍ gʼa mawˬ ve yoˬ. “Daˍyeˍlaˆ lehˬ maˇ hteˇ maˇ cawˇ ve kanˉ htaꞈ a ciˉ kaꞈ maˇ te ve” tehꞈ yawˇ hui kʼoˆ ve yoˬ. (Daˍ 6:3, 4) Ngaˬ hui a shu yawˇ awˬ to htaꞈ na nyi cawˇ ve, ‘ngaˬ yonˍ gʼa ve chaw hpehꞈ ve tehꞈ shu dawˇ˗aw laˇ?’ Ngaˬ hui yonˍ gʼa ve chaw hpehꞈ ve kʼo, Yaˬhoˉvaˬ lehˬ chiˇ uiˍ chiˇ mvuh ve htaꞈ gʼa tuˬ yoˬ. w22.09 8-9 ¶2-4

Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve kʼo, ngaˬ hui awˬ bon gʼa jaˇ tuˬ yoˬ. Nawˬ shiˍ˗aˬ laˇ aˬ htoꞈ ma pa taw le? Teˇ gʼaˇ le le a shu yawˇ ve awˬ liˇ awˬ hkʼaˇ htaꞈ gʼaꞈ te ve kʼo, hkʼaˬ hkʼe hpehꞈ tuˬ le dawˇ sheˍ. Tawˇ pa haˉ te kʼo, hpu gʼawˆ teh kuiˬ htawnˍ yehˬ teˇ kaˬ le le lo hpu pa ve awˬ hkʼaˇ yawˇ hui hkʼaˇ yawˇ hui teh ve kʼo, teˇ ceuˬ le le shoꞈ shaꞈ jaˇ tuˬ yoˬ hehˉ. Maˇ heˆ leh saˍ laꞈ gʼonˍ leh saˍ laꞈ gʼonˍ htaꞈ ga piˇ ve chaw, chaw naˬ htaꞈ nyi haꞈ shaˉ ve awˬ liˇ awˬ hkʼaˇ teh taˍ ve hkʼe maˇ gʼaꞈ te ve kʼo, laiˉ gʼaˇ suh˗e tuˬ yoˬ hehˉ. Hteˇ ve cawˇ ve awˬ liˇ awˬ hkʼaˇ ngaˬ hui yonˍ gʼa ve lehˬ, ngaˬ hui htaꞈ haꞈ shaˉ laˇ gʼa ve tehꞈ hkʼa tawˍ lehˆ gʼa mawˬ ve yoˬ. Yaˬhoˉvaˬ ve awˬ liˇ awˬ hkʼaˇ aˬ htoꞈ ma cawˇ ve maˇ cawˇ ve kaꞈ ngaˬ hui htaꞈ haꞈ shaˉ laˇ gʼa ve yoˬ. Yaˬhoˉvaˬ lehˬ yawˇ ve awˬ liˇ awˬ hkʼaˇ htaꞈ gʼaꞈ te ve chaw teˇ gʼaˇ le le htaꞈ awˬ bon naꞈ piˇ ve yoˬ. Chi hkʼe te ve chaw htaꞈ Gʼuiˬ sha ka tiꞈ te piˇ ve, “hteˇ ve cawˇ ve chaw hui lehˬ, mvuhˇ miˬ hkʼaw co co taiˍ taiˍ gʼa chehˇ tuˬ yoˬ.” (Chiˇ mvuh ve 37:29) Teˇ gʼaˇ le le Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve kʼo, miˬ guiˬ hkʼoˆ lo dawˇ sha gawˬ lehˍ ve cawˬ ve, ha lehˬ ve cawˬ ve, teˇ moˍ tiˉ hpehꞈ tuˬ ve htaꞈ dawˇ nyi sheˍ. Yaˬhoˉvaˬ lehˬ nawˬ htaꞈ a shaꞈ teꞈ hkʼaˇ chi hkʼe ve cawˬ tcuh gaˇ ve yoˬ. Chi teˇ hkui ngaˬ hui teˇ gʼaˇ le le Yaˬhoˉvaˬ ve awˬ liˇ awˬ hkʼaˇ htaꞈ gʼa haꞈ cawˇ ve tehꞈ shiˍ˗oˬ ve yoˬ. w22.08 27-28 ¶6-8

Teˇ ceuˬ ceuˬ ngaˬ hui dawˇ haˍ leh nyi ma maˇ sha tuˬ te laˇ ve kʼo, chi ve lehˬ ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va tuˬ sheˍ ve laˇ tehꞈ, ngaˬ hui ka tiꞈ yeˬ ve htaꞈ lawˇ nyi laˇ ve yoˬ. Hkʼe kʼo, ngaˬ hui hkʼaˬ hkʼe te cawˇ ve le? Ngaˬ hui shaˍ tiꞈ gʼa cawˬ ve, gʼa nawˇ taˍ cawˇ ve, leh ngaˬ hui ve yonˍ hkʼaˇ gʼa yeˬ cawˇ ve yoˬ. Shaˍ tiꞈ cawˬ ve kʼoˆ gaˇ ve lehˬ, nyi ma gawˬ lehˍ cawˬ ve, keunˍ daꞈ cawˇ daꞈ ve dawˇ hkʼaˇ cawˬ tuˬ gʼa te ve, awˬ lawn teˇ hpaˍ htaꞈ Yaˬhoˉvaˬ nyi ve hkʼe ngaˬ hui kaꞈ gʼa nyi ve htaꞈ kʼoˆ gaˇ ve yoˬ. Ngaˬ hui chi hkʼe te ve kʼo, ngaˬ hui ve te hkʼaˇ dawˇ hkʼaˇ htaꞈ yuˬ tiˍ gʼa leh chi ve ngaˬ hui ve dawˇ hkʼaˇ htaꞈ heuˆ la kuiˬ maˇ cawˬ. Awˬ viˉ awˬ nyi maˇ heˆ leh nyi haꞈ shaˉ paˍ ngaˬ hui htaꞈ maˇ daꞈ ve tawˇ yaw laˇ leh maˇ daꞈ ve te laˇ ve yoˬ hehˉ. Awˬ tehˬ kʼo, yawˇ hui coˇ caˇ leh nawˬ nyi ma naˬ tuˬ te laˇ gaˇ ve maˇ heˆ. (Roˉ 3:23; Yaˍ 3:2) Chi lehˬ teˇ pawˆ pawˆ kʼo nawˬ dawˇ haˍ jaˇ tuˬ te laˇ ve yoˬ. Leh nawˬ dawˇ htawˇ nawˬ dawˇ cawˬ ve, ‘aˬ htoꞈ ma te awˬ viˉ awˬ nyi chi hkʼe te daꞈ ve le? Chi ve awˬ tehˬ awˬ na Gʼuiˬ sha ve kanˉ hkʼaˇ hpehꞈ ve laˇ?’ Yaꞈ hkʼaˇ, Saˍtanˍ lehˬ ngaˬ hui htaꞈ chi hkʼe dawˇ tcuh gaˇ ve tehꞈ taˇ leunˇ sheˍ. (2 Kawˇ 2:11) Awˬ lawn kʼo, dawˇ hkʼaˇ chi hkʼe ve lehˬ, ngaˬ hui Yaˬhoˉvaˬ geh maˇ meuˆ daꞈ tuˬ te laˇ leh yawˇ ve kanˉ hkʼaˇ htaꞈ kaꞈ gʼaˇ maˇ va tuˬ te laˇ ve yoˬ. Chi htaꞈ pa taw, ngaˬ hui beuꞈ ve htaꞈ maˇ tawnˇ taˬ tuˬ shaˍ tiꞈ gʼa te cawˇ ve yoˬ. w22.11 20-21 ¶1, 3-4

Yaˬhoˉvaˬ lehˬ ngaˬ hui htaꞈ co co taiˍ taiˍ a shaꞈ teꞈ chehˇ gʼa tuˬ dawˇ law kuiˬ peꞈ laˇ ve yoˬ. Chaw teˇ hpaˍ kʼo, mvuhˇ naw ma hkʼoˆ co co taiˍ taiˍ chehˇ tuˬ leh yawˇ hui maˇ suh puiˉ ve dawˇ law kuiˬ cawˬ ve yoˬ. (1 Kawˇ 15:50, 53) Yaꞈ hkʼaˇ, maˇ˗awˍ ve chaw miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve yoˬ. Ngaˬ hui naˬ ve gawˬ ve maˇ cawˬ leh ha lehˬ jaˇ tuˬ yoˬ. (Hpeuꞈ 21:3, 4) Ngaˬ hui mvuhˇ naw ma hkʼoˆ maˇ heˆ leh miˬ guiˬ hkʼoˆ dawˇ law kuiˬ cawˬ ve htawˇ maˇ kʼoˆ, dawˇ law kuiˬ chi lehˬ ngaˬ hui awˬ pon daꞈ jaˇ ve awˬ ceuˬ hpehꞈ ve yoˬ. Awˬ gʼuˇ suhˍ hpawˇ ve dawˇ law kuiˬ chi Yaˬhoˉvaˬ geh laˬ ve pa taw, ngaˬ hui yonˍ gʼa ve yoˬ. (Roˉ 15:13) Yaˬhoˉvaˬ aˬ htoꞈ ma ka tiꞈ te taˍ laˇ ve htaꞈ ngaˬ hui shiˍ ve yoˬ. Leh yawˇ ka tiꞈ te taˍ laˇ ve awˬ tehˬ hpehꞈ la tuˬ yoˬ. (Heh 23:19) Yaˬhoˉvaˬ ka tiꞈ te taˍ ve awˬ ceuˬ awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa leh yawˇ chi hkʼe te gʼa tuˬ kanˇ paˆ cawˬ ve yoˬ. Mvuhˇ naw ma hkʼoˆ chehˇ ve Awˬ pa Yaˬhoˉvaˬ ngaˬ hui htaꞈ haꞈ jaˇ leh ngaˬ hui yawˇ htaꞈ gʼaˇ va tcuh gaˇ ve yoˬ. Ngaˬ hui Yaˬhoˉvaˬ htaꞈ gʼaˇ va htaˇ, ngaˬ hui ve dawˇ law kuiˬ hkʼa tawˍ lehˆ mawˬ tuˬ te laˇ ve yoˬ. Awˬ gʼuˇ suhˍ hpawˇ ngaˬ hui tuꞈ ve hkanˍ ve gʼa hpuˇ htaˇ, yeunˇ hkanˍ gʼaˇ ve, haꞈ hanˉ ve cawˬ ve, leh ha lehˬ ve cawˬ tuˬ te laˇ ve yoˬ. w22.10 24 ¶1-3

Iˉsaˍreˍlaˆ chaw chi teˇ hpaˍ lehˬ Yaˬhoˉvaˬ ve hkawˇ maˇ na yuˬ ve yoˬ. Iˉsaˍyaˆ awˬ gʼuˇ suhˍ htaˇ kaꞈ kʼoˆ taˍ ve, Gʼuiˬ sha yawˇ hui htaꞈ luˬ ve sheˆ ve gʼa hpuˇ tcuh tuˬ yoˬ. (Isy 30:5, 17; Yrm 25:8-11) Yawˇ hui htaꞈ Baˍbuˍlonˍ mvuhˇ miˬ lo shu ve awˬ ceˬ te tuˬ hpeh kʼai htaˇ, chi ve awˬ tehˬ hpehꞈ la ve yoˬ. Chi hkʼe hpehꞈ ve htawˇ, Iˉsaˍreˍlaˆ chaw teˇ hpaˍ Yaˬhoˉvaˬ htaꞈ ka tiꞈ yeˬ chehˇ sheˍ ve yoˬ. Iˉsaˍyaˆ kʼoˆ ve, teˇ nyi kʼo Iˉsaˍreˍlaˆ chaw yawˇ hui paw kuiˬ Yeˍruˆsaˍlehnˍ venˇ lo Gʼuiˬ sha yawˇ hui htaꞈ kʼawꞈ˗e tcuh tuˬ yoˬ. Chi lehˬ Gʼuiˬ sha ka tiꞈ te taˍ ve htaꞈ haꞈ shaˉ ve yoˬ. (Isy 30:18, 19) Yaꞈ hkʼaˇ, Gʼuiˬ sha yawˇ hui htaꞈ laꞈ haˉ ponˬ piˇ ve maˇ heˆ. Yaˬhoˉvaˬ kʼoˆ ve, ‘Gʼuiˬ sha lehˬ yawˇ hui htaꞈ ha kʼaˉ ve nyi ma cawˬ chehˇ sheˍ leh nawˬ hui htaꞈ ga laˇ tuˬ gu taˍ hehnˇ taˍ ve yoˬ.’ Ka tiꞈ yeˬ ve Iˉsaˍreˍlaˆ chaw shu ve awˬ ceˬ te chehˇ ve htaꞈ ponˬ piˇ tuˬ, laiˉ hkʼawꞈ cawˬ sheˍ ve tehꞈ shiˍ tuˬ te piˇ ve yoˬ. Awˬ tehˬ kʼo, Baˍbuˍlonˍ venˇ lo shu ve awˬ ceˬ 70 hkʼawꞈ hpaˆ te peuˬ hkʼawꞈ nawˉ, Yeˍruˆsaˍlehnˍ venˇ lo gʼa kʼawꞈ˗e ve yoˬ. (Isy 10:21; Yrm 29:10) Yawˇ hui a shu yawˇ ve chehˇ kuiˬ lo gʼa kʼawꞈ˗e htaˇ, ha lehˬ jaˇ leh mehˆ gʼuiˬ yaꞈ la ve yoˬ. w22.11 9 ¶4

Chi beuꞈ teˇ co˗e, laiˉ muvhˇ miˬ awˬ hkʼaw lo tcuh yaˇ hui Yeˍsuˆ ve awˬ lawn maˍ ve pa taw, fawˉ ve mehˬ ve gʼa hpuˇ ve hkʼe, ngaˬ hui ve awˬ viˉ awˬ nyi kaꞈ gʼa hpuˇ chehˇ ve yoˬ. Yuˇdaꞈ chaw suhˉ jehˬ shehˍ hpaˇ awˬ moˍ yawˇ hui htaꞈ “Yeˍsuˆ ve awˬ meh htaꞈ cuˇ ve awˬ hkʼaw lo maˍ piˇ hto piˇ ve teˇ ceuˬ a ciˉ kaꞈ taˇ te tehꞈ tawˇ piˇ ve yoˬ.” (Tcuh 4:18-20; 5:27, 28, 40) Yaꞈ hkʼaˇ, suhˉ jehˬ shehˍ hpaˇ chi teˇ moˍ aꞈ kehˉ kanˇ paˆ uiˍ shehˍ hpaˇ teˇ gʼaˇ kʼoˆ ve lehˬ Yeˍsuˆ htaꞈ caˉ daꞈ ve awˬ lawn “chaw chi ma ve htaꞈ bon maˍ piˇ tuˬ yawˇ ngaˬ hui htaꞈ tawˇ piˇ taˉ laˇ ve yoˬ” tehꞈ yawˇ hui shiˍ ve yoˬ. (Tcuh 10:42) Chi htaꞈ pa taw, Peˍtruˆ leh Yoˇhanˬ awˬ laꞈ gʼawˇ hui awˬ tan te leh haꞈ hanˉ ve hkʼaw kʼoˆ ve, jehˬ daꞈ shehˍ hpaˇ awˬ moˍ ve tawˇ aꞈ kehˉ Gʼuiˬ sha ve tawˇ hkawˇ gʼa na yuˬ cawˇ ve yoˬ. Leh kʼawꞈ kʼoˆ sheˍ ve yawˇ hui Yeˍsuˆ ve awˬ lawn caˉ leh bon kʼawꞈ maˍ sheˍ ve yoˬ. (Tcuh 5:29) Tcuh yaˇ hui Gʼuiˬ sha htaꞈ ka tiꞈ yeˬ ve pa taw, jawꞈ piˇ peuˬ hkʼawꞈ nawˉ “tcuh yaˇ hui lehˬ, awˬ meh oˇ ve htaꞈ pa taw maˇ shawˍ maˇ caˆ te laˇ ve htaꞈ hkanˍ keunˍ ve yoˬ tehꞈ Gʼuiˬ sha shawˍ taˍ ve pa taw, jehˬ daꞈ shehˍ hpaˇ awˬ moˍ mehˆ gʼuˇ suhˍ yawˇ hui ha lehˬ ha kʼa tawˆ kʼai ve yoˬ.” Peuˬ leh yawˇ hui bon kʼawꞈ maˍ kʼai ve yoˬ.—Tcuh 5:41, 42. w22.10 12-13 ¶2-4

Yaˬhoˉvaˬ htaꞈ caˉ daꞈ ve awˬ lawn ngaˬ hui tanˬ henˇ htaˇ, Liꞈ hpu hkʼaw awˬ lawn lonˉ ma hkʼa sha sha˗ehˬ ve htaꞈ gʼa henˇ ve yoˬ. Pawˇluꞈ awˬ viˉ awˬ nyi Heˍbrehˇ chaw htaꞈ liꞈ bvuhꞈ piˇ ve hkʼaw yawˇ tawˇ hkawˇ chi ve teˇ hpaˍ htaꞈ “awˬ lawn lonˉ ma” tehꞈ kʼoˆ ve yoˬ. Yaꞈ hkʼaˇ, yawˇ “awˬ lawn awˬ hkuiˉ puiˍ” a yeˇ maˇ uiˍ ve tehꞈ maˇ dawˇ. Chi lehˬ yaˇ ehˉ cuˉ gʼa dawˬ cawˇ ve hkʼe hpehꞈ ve tehꞈ yawˇ tehˆ taˍ ve yoˬ. (Heˍ 5:12; 6:1) Pawˇluꞈ Hkriꞈ yaˇ teˇ gʼaˇ le le htaꞈ awˬ gʼaˇ piˇ ve, awˬ lawn lonˉ ma htaꞈ ceh shiˍ ve nyi hkʼaˇ taˇ suh. Yaꞈ hkʼaˇ, Liꞈ hpu hkʼaw awˬ tehˬ ve tcuhˉ kuiˬ naˉ ve htaꞈ kaꞈ shiˍ tcuh gaˇ ve yoˬ. Nawˬ Liꞈ hpu hkʼaw tcuhˉ kuiˬ naˉ ve htaꞈ henˇ gaˇ˗aw laˇ? Yaˬhoˉvaˬ leh yawˇ ve a loˍ htaꞈ caˉ daꞈ ve nawˬ leuˉ leh kʼawꞈ henˇ shiˍ gaˇ˗aw laˇ? Yaꞈ hkʼaˇ, ngaˬ hui Liꞈ hpu henˇ leh hpfuhˆ nyi ve htaꞈ hkʼa dehꞈ maˇ dawˇ cawˇ. Hkʼe kʼo, nawˬ˗ehꞈ? Nawˬ liꞈ henˇ htaˇ, nawˬ liꞈ hkʼa dehꞈ gʼaw gʼa leh hpfuhˆ nyi ve cheuˬ˗aw laˇ? Nawˬ liꞈ henˇ gaˇ leh henˇ ve awˬ ceuˬ htaꞈ pyawˍ leh awˬ bon cawˬ ve tehꞈ dawˇ˗aw laˇ? Maˇ heˆ leh nawˬ liꞈ hkʼa dehꞈ gʼaw maˇ gʼa leh maˇ henˇ cheuˬ ve tehꞈ dawˇ˗aw laˇ? Nawˬ chi hkʼe dawˇ ve kʼo, nawˬ teˇ gʼaˇ ceh tiˉ maˇ heˆ. Taˇ dawˇ haˍ. Yaˬhoˉvaˬ nawˬ htaꞈ ga laˇ tuˬ yoˬ. Gʼuiˬ sha lehˬ cheuˬ leh daꞈ jaˇ ve Saˍlaꞈ lonˉ hpehꞈ ve yoˬ. w23.03 9-10 ¶8-10

Ngaˬ hui nyi ma nuˇ nehˬ ve awˬ hkʼaw lo Gʼuiˬ sha ve tawˇ hkawˇ htaꞈ haꞈ yuˬ ve kʼo, Gʼuiˬ sha ve tawˇ hkawˇ chi ngaˬ hui ve te hkʼaˇ dawˇ hkʼaˇ htaꞈ pa laˇ gʼa ve yoˬ. Liꞈ hpu hkʼaw ha kʼaˉ puiˉ ve, haꞈ pehnˇ ve awˬ lawn, leh ngaˬ hui henˇ ve hkʼe a shu yawˇ ve te hkʼaˇ dawˇ hkʼaˇ htaꞈ pa tcuh sheˍ. Ngaˬ hui uiˍ muiˬ caˆ muiˬ ve maˇ cawˬ leh Liꞈ hpu hkʼaw maˍ laˇ ve awˬ ceuˬ awˬ nu ve chaw awˬ pon hpehꞈ ve tehꞈ maˇ dawˇ nyi cawˇ. Ngaˬ hui awˬ nu ve chaw htaꞈ te piˇ ve awˬ hkʼaˇ kaꞈ Liꞈ hpu hkʼaw maˍ laˇ ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ pa tcuh ve tehꞈ hpeuꞈ maw laˇ ve yoˬ. Hpaˍriˍsehˇ hui lehˬ Liꞈ hpu hkʼaw maˍ laˇ ve awˬ ceuˬ yawˇ hui ve te hkʼaˇ dawˇ hkʼaˇ htaꞈ maˇ pa tcuh ve pa taw, ‘venˇ baˆ maˇ cawˬ ve chaw hui htaꞈ venˇ baˆ taˍ ve yoˬ.’ (Maꞈ 12:7) Chi ve hkʼa shuˍ shuˍ, ngaˬ hui shu htaꞈ nyi ve awˬ hkʼaˇ leh shu htaꞈ te piˇ ve awˬ hkʼaˇ, Liꞈ hpu hkʼaw maˍ laˇ ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ pa tcuh˗aw laˇ tehꞈ mawˬ tuˬ te laˇ ve yoˬ. Tawˇ pa haˉ te kʼo, ngaˬ hui shu htaꞈ daꞈ ve hpawˇ nyi ve, maˇ heˆ leh shu yaꞈ kuiˬ htaꞈ nyi ve laˇ? Ngaˬ hui ha kʼaˉ puiˉ ve chaw hpehꞈ leh venˇ baˆ hpehˇ piˇ˗aw laˇ? Maˇ heˆ leh shu ve awˬ lawn kʼoˆ leh beuꞈ chehˇ sheˍ ve laˇ? Ngaˬ hui gʼaw ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ heuˆ la kuiˬ cawˬ˗aw laˇ tehꞈ a shu yawˇ awˬ to htaꞈ chaˬ nyi sheˍ.—1 Tiˆ 4:12, 15; Heˍ 4:12. w23.02 12-13 ¶13-14

Aˍriˆmaꞈhtehˍ venˇ yaˇ Yoˇsehꞈ ve awˬ lawn htaꞈ teˇ geh nyi sheˍ. Yawˇ lehˬ Yuˇdaꞈ chaw shaˉ nanˉ lonˉ hkʼaw leh, yawˇ chehˇ kuiˬ teˇ tawn lo awˬ meh bvuhˬ ve chaw kaꞈ hpehꞈ ve yoˬ. Yaꞈ hkʼaˇ, Yoˇsehꞈ lehˬ haꞈ hanˉ ve hkʼa dehꞈ maˇ cawˬ. Yoˇhanˬ kʼoˆ ve, “Yoˇsehꞈ oˇ ve teˇ gʼaˇ lehˬ, Yeˍsuˆ ve awˬ laꞈ gʼawˇ hpehꞈ ve htawˇ, Yuˇdaꞈ chaw hui htaꞈ kawˆ ve pa taw, awˬ laꞈ gʼawˇ hpehꞈ ve yoˬ tehꞈ shu htaꞈ maˇ shiˍ tcuh.” (Yoˇ 19:38) Yoˇsehꞈ lehˬ Gʼuiˬ sha ve mvuhˇ miˬ daꞈ ve awˬ lawn sha tanˇ htaꞈ a yeˇ yuˬ ve htawˇ, yawˇ Yeˍsuˆ htaꞈ yonˍ ve tehꞈ shu htaꞈ maˇ shiˍ tcuh gaˇ ve yoˬ. Yawˇ lehˬ shu maˇ yawˆ yan laˇ ve htaꞈ kawˆ ve pa taw yoˬ hehˉ. Liꞈ hpu hkʼaw kʼoˆ ve, Yeˍsuˆ suh peuˬ hkʼawꞈ nawˉ Yoˇsehꞈ lehˬ “nyi ma haꞈ hanˉ te leh, jawˇ mawˇ Piˉlaꞈ geh kʼai leh Yeˍsuˆ ve awˬ to htaꞈ lawˬ yuˬ ve yoˬ.” (Mk 15:42, 43) Yoˇsehꞈ lehˬ Yeˍsuˆ ve awˬ laꞈ gʼawˇ hpehꞈ ve tehꞈ maˇ faˉ taˍ˗o. Nawˬ Yoˇsehꞈ hkʼa shuˍ chaw htaꞈ kawˆ jaw˗aw laˇ? w23.01 30 13-14

Sawˉlaꞈmonˍ uˉ peunˍ ve awˬ hawˉ lo Iˉsaˍreˍlaˆ chaw dawˇ sha gawˬ lehˍ ve leh hpehꞈ hpehꞈ sha sha ve awˬ lawn Sheˍbaˆ mvuhˇ miˬ htaꞈ uˉ peunˍ ve jawˇ mawˇ ma gʼa kaˇ htaˇ, yawˇ oˇ kaˬ lo ca nyi la tuˬ ve lehˬ laˬ vuiˇ jaˇ. (1 Jawˇ 10:1) Yawˇ gʼa mawˬ peuˬ hkʼawꞈ nawˉ yaꞈ nyi ve Liꞈ hpu awˬ tawn hkʼa shuˍ kʼoˆ ve yoˬ. Sawˉlaꞈmonˍ ve awˬ co˗e htaˇ dawˇ sha gawˬ lehˍ cawˬ ve lehˬ, Yeˍsuˆ uˉ peunˍ ve awˬ hawˉ lo chaw yaˇ awˬ pon Yaˬhoˉvaˬ te laˇ tuˬ ve awˬ ceuˬ htaꞈ tehˆ taˍ ve yoˬ. Sawˉlaꞈmonˍ aꞈ kehˉ Yeˍsuˆ lehˬ teˇ hpawˇ le le lo uiˍ ve yoˬ. Sawˉlaꞈmonˍ lehˬ maˇ biˇ ve chaw yaˇ hpehꞈ ve yoˬ. Yawˇ lehˬ laiˉ pawˆ te yaꞈ leh Iˉsaˍreˍlaˆ chaw hkʼa peu˗eˬ luˬ ve sheˆ ve gʼa hpuˇ tuˬ te piˇ ve yoˬ. Yeˍsuˆ lehˬ biˇ jaˇ ve uˉ peunˍ shehˍ hpaˇ hpehꞈ leh teˇ pawˆ kaꞈ maˇ te yaꞈ jaw ve yoˬ. (Luˉ 1:32; Heˍ 4:14, 15) Yawˇ lehˬ venˇ baˆ maˇ te yaꞈ jaw leh yawˇ uˉ peunˍ ve awˬ hawˉ lo chehˇ ve chaw yaˇ htaꞈ luˬ ve sheˆ ve gʼa hpuˇ tuˬ maˇ te piˇ ve tehꞈ hpeuꞈ maw laˇ ve yoˬ. Yeˍsuˆ lehˬ ngaˬ hui ve Jawˇ mawˇ lonˉ hpehꞈ ve yoˬ. w22.12 11 ¶9-10

Ngaˬ hui chehˇ kuiˬ teˇ tawn lo naˬ beuꞈ a naˍ cawˬ ve kʼo, ngaˬ hui mvuhˇ miˬ uˉ peunˍ paˍ hkawˇ na yuˬ cawˇ˗aw laˇ? Tawˇ pa haˉ te kʼo, laꞈ sheh tsuhˇ ve, shu paˇ lo maˇ kʼai ve, naˍ hkʼawˇ hpa hoˆ ve, a shu yawˇ hkʼaˇ yawˇ tiˉ chehˇ ve, chi ve teˇ hpaˍ ngaˬ hui gʼa na yuˬ leh gʼaꞈ te ve kʼo, Gʼuiˬ sha ngaˬ hui htaꞈ peꞈ laˇ ve a shaꞈ htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ. Maˇ dawˇ maˇ gaˇ ve awˬ ceuˬ hpehꞈ la htaˇ, awˬ chawˇ, yehˬ paˇ yehˬ kuiˬ ve chaw, maˇ heˆ leh awˬ lawn teˇ hpaˍ hkʼaw maˇ cawˇ ve awˬ lawn teˇ caˉ peuˬ teˇ caˉ kʼoˆ laˇ ve htaꞈ ngaˬ hui gʼa kaˇ ve yoˬ. ‘Tawˇ teˇ hkawˇ le le htaꞈ’ ngaˬ hui yonˍ ve aꞈ kehˉ mvuhˇ miˬ uˉ peunˍ paˍ leh chehˇ sha cawˬ sha ve hpawˇ kʼoˆ laˇ ve chaw tawˇ hkawˇ ngaˬ hui na cawˇ ve yoˬ. (Tawˇ 14:15) Uˉ peunˍ ve Kawˍmiˍtiˍ leh awˬ tcuhˉ puiˍ lo ve kawˍmiˍtiˍ lehˬ, hpawnˬ daꞈ ve leh hto toˇ ve hkʼaw awˬ viˉ awˬ nyi htaꞈ maˇ beˆ maˍ piˇ sheˍ htaˇ, yawˇ hui awˬ lawn awˬ tanˇ htaꞈ awˉ lawˉ hkʼa dehꞈ gʼa chaˬ nyi sheˍ ve yoˬ. Ngaˬ hui Gʼuiˬ sha ve kanˉ hkʼaˇ htaꞈ hkʼa dehꞈ na yuˬ ve kʼo, ngaˬ hui ve awˬ to htaꞈ haꞈ shaˉ gʼa leh awˬ nu ve chaw kaꞈ kawˆ tuˬ maˇ cawˬ. Leh ngaˬ hui Gʼuiˬ sha ve kanˉ hkʼaˇ htaꞈ awˬ meh bvuhˬ tuˬ kaꞈ te piˇ gʼa sheˍ ve yoˬ.—1 Peˍ 2:12. w23.02 23 ¶11-12

Iˉsaˍreˍlaˆ chaw Gʼuiˬ sha ka tiꞈ te taˍ ve mvuhˇ miˬ hkʼaw loꞈ˗e htaˇ, yawˇ hui teˇ gʼaˇ teˇ kaˬ lo chehˇ kʼai ve yoˬ. Iˉsaˍreˍlaˆ chaw teˇ gʼaˇ teˇ kaˬ chehˇ kʼai ve pa taw a yeˇ maˇ yuˬ daꞈ ve yoˬ. Chi htaꞈ pa taw, Gʼuiˬ sha ve awˬ liˇ tawˇ hkawˇ gʼaw maˍ piˇ ve htaꞈ ca na la tuˬ, Iˉsaˍreˍlaˆ chaw teˇ geh hpawnˬ daꞈ la tuˬ Yaˬhoˉvaˬ gu teh taˍ piˇ ve yoˬ. (Bon 31:10-12; Neˍ 8:2, 8, 18) Ka tiꞈ yeˬ ve Iˉsaˍreˍlaˆ chaw Yeˍruˆsaˍlehnˍ venˇ lo laˬ htaˇ, laiˉ kaˬ lo laˬ ve yonˍ hkʼaˇ hkʼa shuˍ˗ehˬ ve laiˉ lanˬ gʼaˇ htaꞈ yawˇ hui mawˬ daꞈ ve hkʼaˬ hkʼe dawˇ ve htaꞈ dawˇ nyi sheˍ. Chi ve lehˬ yawˇ hui teˇ moˍ tiˉ hpehꞈ tuˬ Yaˬhoˉvaˬ ga piˇ ve yoˬ. Awˉ lawˉ peuˇ ve Hkriꞈ yaˇ awˬ co˗e gaˬ leh Hkriꞈ yaˇ awˬ moˍ hkʼaw hawˉ hkʼaˆ leh yaˇ miˇ tawˇ hkawˇ maˇ shuˍ daꞈ ve, paw sha ve haˍ gʼawˇ ve kaꞈ maˇ shuˍ daꞈ ve htawˇ, teˇ moˍ tiˉ te leh Gʼuiˬ sha htaꞈ oˉ kʼoˍ pui ve yoˬ. Hkriꞈ yaˇ hpehꞈ la ve chaw Liꞈ hpu hkʼaw na gʼa tuˬ ga piˇ ve lehˬ, Gʼuiˬ sha htaꞈ oˉ kʼoˍ pui ve awˬ chawˇ yawˇ hui htaꞈ ga piˇ leh teˇ geh hpawnˬ daꞈ ve chaw kaꞈ yawˇ hui htaꞈ ga piˇ gʼa ve yoˬ.—Tcuh 2:42; 8:30, 31. w23.02 4 ¶7

Yaˬhoˉvaˬ hkawˇ na yuˬ ve chaw “co co taiˍ taiˍ” ve a shaꞈ gʼa tuˬ yoˬ tehꞈ yawˇ ka tiꞈ te taˍ laˇ ve yoˬ. (Roˉ 6:23) Ka tiꞈ chi ve htaꞈ ngaˬ hui dawˇ nyi htaˇ, ngaˬ hui yawˇ htaꞈ haꞈ maˇ la ve yoˬ. Yaˬhoˉvaˬ ngaˬ hui htaꞈ haꞈ jaˇ ve pa taw, ngaˬ hui htaꞈ maˇ suh˗e tcuh gaˇ leh ngaˬ hui yawˇ geh hkʼaˬ htaˆ kaꞈ chehˇ tcuh gaˇ ve yoˬ. Co co taiˍ taiˍ a shaꞈ gʼa tuˬ Gʼuiˬ sha ka tiꞈ te taˍ laˇ ve lehˬ, chi teˇ hkui ngaˬ hui gʼa hpuˇ chehˇ ve tuꞈ ve hkanˍ ve htaꞈ yeunˇ hkanˍ gʼaˇ tuˬ ga laˇ ve yoˬ. Canˇ paˍ ngaˬ hui htaꞈ tiˇ pehˍ laˇ tuˬ yoˬ tehꞈ kawˆ ho laˇ ve htawˇ, ngaˬ hui Yaˬhoˉvaˬ ve kanˉ caˉ leh te tuˬ yoˬ. Aˬ htoꞈ ma pa taw le? Awˬ hkʼaˇ teˇ hkʼaˇ lehˬ, ngaˬ hui Yaˬhoˉvaˬ htaꞈ ka tiꞈ yeˬ leh gʼa suh ve htawˇ, yawˇ kʼawꞈ teꞈ tu la tcuh laˇ tuˬ yoˬ tehꞈ ngaˬ hui shiˍ ve yoˬ. Yawˇ lehˬ ngaˬ hui htaꞈ co co taiˍ taiˍ a shaꞈ teꞈ chehˇ tcuh laˇ tuˬ yoˬ tehꞈ shiˍ ve yoˬ. (Yoˇ 5:28, 29; 1 Kawˇ 15:55-58; Heˍ 2:15) Yaˬhoˉvaˬ lehˬ ngaˬ hui htaꞈ co co taiˍ taiˍ ve a shaꞈ teꞈ chehˇ tcuh gaˇ ve tehꞈ shiˍ ve yoˬ. Yaˬhoˉvaˬ lehˬ a shaꞈ teꞈ ve awˬ hkuiˉ pui hpehꞈ leh yawˇ lehˬ co co taiˍ taiˍ teꞈ chehˇ ve yoˬ. (Chiˇ 36:9) Yaˬhoˉvaˬ lehˬ co co taiˍ taiˍ teꞈ chehˇ leh yawˇ lehˬ maˇ suh puiˉ ve tehꞈ Liꞈ hpu hkʼaw gʼa mawˬ ve yoˬ.—Chiˇ 90:2; 102:12, 24, 27. w22.12 2-3 ¶1-3

Ngaˬ hui Yaˬhoˉvaˬ ve chaw hpehꞈ ve pa taw, shoꞈ shaꞈ ve leh tuꞈ ve hkanˍ ve gʼa hpuˇ ve anˇ tuˬ maˇ loˍ. Liꞈ hpu hkʼaw kʼoˆ ve, “ngaˬ hui lehˬ tuꞈ ve hkanˍ ve maˇ maˇ htaꞈ hkanˍ ve hkʼaw lo Gʼuiˬ sha ve mvuhˇ miˬ hkʼaw gʼa loꞈ˗e ve yoˬ.” (Tcuh 14:22) Chi hkʼoˆ kaꞈ, shoꞈ shaꞈ ve teˇ ceuˬ ceuˬ kʼo, miˬ guiˬ awˬ suhˉ maˇ gaˬ la sheˍ ve ceh ceh ngaˬ hui gu maˇ gʼa tehꞈ shiˍ ve yoˬ. Miˬ guiˬ awˬ suhˉ hkʼaw gaˬ kʼo, “suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.” (Hpeuꞈ 21:4) Ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ ve htaꞈ Yaˬhoˉvaˬ haꞈ shaˉ laˇ ve maˇ heˆ. Yaꞈ hkʼaˇ, ngaˬ hui yeunˇ hkanˍ gʼaˇ tuˬ yawˇ ga laˇ ve yoˬ. Tcuh yaˇ Pawˇluꞈ Roˉmaꞈ venˇ hkʼaw chehˇ ve awˬ viˉ awˬ nyi htaꞈ liꞈ bvuhꞈ piˇ htaˇ, yawˇ leh awˬ viˉ awˬ nyi gʼa hpuˇ ve shoꞈ shaꞈ ve leh tuꞈ ve hkanˍ ve laiˉ ceuˬ htaꞈ kʼoˆ ve yoˬ. Peuˬ leh yawˇ kʼawꞈ kʼoˆ ve, “ngaˬ hui htaꞈ haꞈ ve chaw teˇ gʼaˇ htaꞈ pa taw, chi hkʼa peu˗eˬ htaꞈ ngaˬ hui leuˉ leh gʼaˇ shehˍ hpaˇ hpehꞈ chehˇ taˍ peuˬ.” (Roˉ 8:36, 37) Chi lehˬ nawˬ shoꞈ shaꞈ ve gʼa hpuˇ chehˇ ve htawˇ, nawˬ hkʼa dehꞈ te gʼa tuˬ Yaˬhoˉvaˬ ga laˇ gʼa ve tehꞈ kʼoˆ gʼa ve yoˬ. w23.01 14 ¶1-2