Ha pa 6 maˬ

Yawˇbaˆ Yaˬhoˉvaˬ geh meuˆ daꞈ ve yoˬ. Yawˇ ve yehˬ kʼa hkʼaw ve chaw haꞈ daꞈ leh paw sha jaˇ ve yoˬ. (Yb 1:1-5) Yaꞈ hkʼaˇ, teˇ nyi gaˬ leh Yawˇbaˆ teˇ ceuˬ le le shonˇ kʼai ve yoˬ. (Yb 1:13-17) Peuˬ leh yawˇ ve yaˇ hkʼa peu˗eˬ kaꞈ suh˗e ve yoˬ. Oˇ ve teˇ yanˇ Yawˇbaˆ leh yawˇ ve awˬ miˇ ma yaˇ 10 gʼaˇ laꞈ tcuh laꞈ hanˉ ve hkʼaw suh˗e ve shiˍ htaˇ, cheˆ˗ehˬ kʼai leh nyi ma luˬ jaˇ ve yoˬ. Yawˇbaˆ nyi ma luˬ jaˇ ve hkʼaw aˉ poꞈ zuhꞈ suhˍ leh miˬ chaˇ hkʼoˆ lo mui taˍ ve anˇ tuˬ maˇ loˍ. (Yb 1:18-20) Peuˬ hkʼawꞈ nawˉ Saˍtanˍ lehˬ Yawˇbaˆ awˬ to naˬ tuˬ kaꞈ te piˇ leh hpehꞈ bawˬ jaˇ tuˬ kaꞈ te piˇ ve yoˬ. (Yb 2:6-8) Yawˇbaˆ lehˬ oˇ teˇ taw lo chehˇ ve chaw yawˇ htaꞈ yawˆ yan piˇ jaw ve yoˬ. Laiˉ gʼaˇ yawˇ geh awˬ lawn ca na la leh beˆ maˍ laˇ tuˬ kaꞈ lawˬ jaw ve yoˬ. (Yb 31:18) Yaꞈ hkʼaˇ, chi teˇ hkui yawˇ geh chaw teˇ gʼaˇ kaꞈ maˇ laˬ gaˇ˗o. Awˬ viˉ awˬ nyi, awˬ chawˇ, maˇ heˆ leh awˬ ceˬ teˇ hpaˍ kaꞈ yawˇ geh maˇ laˬ˗o.—Yb 19:13, 14, 16. w22.06 21 ¶5-6

Ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ, tcuh yaˇ Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ “biˇ la htaˇ hkʼa gaˬ” gʼaꞈ te tehꞈ kʼoˆ piˇ ve hkʼa shuˍ ngaˬ hui teˇ gʼaˇ le le kaꞈ gʼaꞈ te cawˇ ve yoˬ. (Efs 4:13) Hteˇ˗ehˬ kʼoˆ ve kʼo, ‘caˉ leh gʼa uiˍ la mvuh la tcuh ve yoˬ.’ Chi teˇ hkui nawˬ Yaˬhoˉvaˬ htaꞈ haꞈ jaˇ ve yoˬ. Yaꞈ hkʼaˇ, nawˬ Yaˬhoˉvaˬ htaꞈ caˉ leh gʼaˇ hteꞈ gʼa kʼawꞈ haꞈ ve yoˬ. Chi nawˬ hkʼaˬ hkʼe te gʼa tuˬ le? Chi hkʼe te gʼa tuˬ ve teˇ hkʼaˇ lehˬ, Hpiˇliˇpiˆ liꞈ 1:9 hkʼaw kʼoˆ laˇ taˍ ve yoˬ. Pawˇluꞈ Hpiˇliˇpiˆ chaw Hkriꞈ yaˇ htaꞈ “haꞈ pehnˇ ve teˇ ceuˬ shaˬ te shaˬ uiˍ la maˇ la tuˬ” bon lawˬ piˇ ve yoˬ. Chi lehˬ ngaˬ hui Yaˬhoˉvaˬ htaꞈ gʼaˇ hteꞈ haꞈ maˇ la gʼa ve tehꞈ hpeuꞈ maw laˇ ve yoˬ. Leh chi ngaˬ hui hkʼaˬ hkʼe te gʼa tuˬ le? Chi lehˬ “daꞈ ve awˬ ceuˬ htaꞈ shiˍ puiˉ tuˬ, cuˇ yiˍ maˍ yiˍ” gʼa cawˬ ve yoˬ. Ngaˬ hui Yaˬhoˉvaˬ htaꞈ gʼaˇ hteꞈ shiˍ daꞈ maˇ la ve kʼo, yawˇ htaꞈ haꞈ leh yawˇ ve te hkʼaˇ dawˇ htaꞈ nyi hkʼaˇ suh jaˇ tuˬ yoˬ. Leh yawˇ ngaˬ hui awˬ pon te laˇ ve teˇ hpaˍ htaꞈ awˬ bon uiˍ jaˇ. Chi hkʼoˆ kaꞈ, ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ leh yawˇ nyi ma luˬ tuˬ maˇ te piˇ gaˇ. Hkʼe te leh, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve leh yawˇ loˍ ve awˬ ceuˬ htaꞈ hkʼaˬ hkʼe te gʼaꞈ te gʼa tuˬ, shiˍ tuˬ kaꞈ gʼa coˇ caˇ ve yoˬ. w22.08 2-3 ¶3-4

Hpeuꞈ maˍ ve liꞈ lehˬ, awˬ nu ve chaw awˬ pon bvuhꞈ piˇ taˍ ve maˇ heˆ. Yaꞈ hkʼaˇ, Gʼuiˬ sha ve kanˉ te ve chaw awˬ pon bvuhꞈ piˇ taˍ ve yoˬ. Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ ve ngaˬ hui kaꞈ teˇ gʼaˇ hpehꞈ ve pa taw anˇ tuˬ maˇ loˍ. Tcuh yaˇ Yoˇhanˬ Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ teˇ hpaˍ awˬ tehˬ hpehꞈ la ve awˬ yanˇ htaꞈ, “Jawˇ mawˇ Yeˍsuˆ ve awˬ nyi teˇ nyi htaˇ Awˬ ha hpu awˬ hkʼaw lo ngaˬ chehˇ” ve tehꞈ kʼoˆ ve yoˬ. (Hpeuꞈ 1:10) Yoˇhanˬ Hpeuꞈ maˍ ve liꞈ bvuhꞈ ve 96 hkʼawꞈ C.E. htaˇ, “Jawˇ mawˇ Yeˍsuˆ ve awˬ nyi” gaˬ la tuˬ maw jaˇ sheˍ tehꞈ kʼoˆ ve yoˬ. (Maꞈ 25:14, 19; Luˉ 19:12) Yaꞈ hkʼaˇ, Liꞈ hpu hkʼaw kʼoˆ taˍ ve hkʼe, Yeˍsuˆ mvuhˇ naw ma hkʼoˆ Jawˇ mawˇ te ve 1914 hkʼawꞈ htaˇ, awˬ nyi oˇ ve tanˬ˗oˬ ve yoˬ. Leh oˇ ve teˇ hkʼawꞈ htaꞈ tanˬ leh Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ Gʼuiˬ sha ve chaw htaꞈ caˉ daꞈ ve awˬ tehˬ hpehꞈ la ve yoˬ. Chi teˇ hkui ngaˬ hui “Jawˇ mawˇ Yeˍsuˆ ve awˬ nyi” hkʼaw chehˇ taˍ ve yoˬ!—Hpeuꞈ 1:3. w22.05 2-3 ¶2-3

Maˇ heˆ heˆ ve tcuh kaˍ paˍ oˇ ve lehˬ, haiˬ ve to nuˇ to shaˆ Aˬ miˍ toꞈ chehˇ ve maꞈ shiˉ gʼuiˬ po awˬ hkʼaw lo haiˬ ve to nuˇ to shaˆ leh maˇ heˆ heˆ ve tcuh kaˍ paˍ oˇ ve htaꞈ awˬ teꞈ teꞈ baˬ keu ve yoˬ. Chi htaꞈ pa taw, mvuhˇ miˬ teˇ hpaˍ uˉ peunˍ chehˇ sheˍ htaˇ, yawˇ hui htaꞈ Gʼuiˬ sha co co taiˍ taiˍ te luˬ piˇ tuˬ yoˬ. Awˬ lawn chi ve ngaˬ hui awˬ pon tcuhˉ kuiˬ hkʼaˬ hkʼe cawˬ ve le? Hkriꞈ yaˇ lehˬ Gʼuiˬ sha leh yawˇ ve mvuhˇ miˬ htaꞈ ka tiꞈ gʼa yeˬ ve yoˬ. (Yoˇ 18:36) Ngaˬ hui mvuhˇ miˬ uˉ peunˍ ve choˬ paˉ oˇ paˉ maˇ chehˇ. Chi hkʼe te ve lehˬ haˍ jaˇ ve yoˬ. Awˬ lawn kʼo, mvuhˇ miˬ teˇ hpaˍ hpaˍ ngaˬ hui kʼoˆ ve leh te ve awˬ ceuˬ yawˇ hui hpawˇ hkʼa dehꞈ chehˇ tcuh gaˇ ve yoˬ. Mvuhˇ miˬ uˉ peunˍ ve hpawˇ chehˇ ve chaw lehˬ, haiˬ ve to nuˇ to shaˆ ve awˬ maiˉ htaꞈ gʼa tuˬ yoˬ. (Hpeuꞈ 13:16, 17) Yaꞈ hkʼaˇ, yawˇ hui htaꞈ Yaˬhoˉvaˬ nyi hkʼaˇ maˇ suh leh co co taiˍ taiˍ ve a shaꞈ kaꞈ maˇ gʼa tuˬ yoˬ. (Hpeuꞈ 14:9, 10; 20:4) Mvuhˇ miˬ uˉ peunˍ ve chaw ngaˬ hui htaꞈ nyiˉ laˇ ve htawˇ, mvuhˇ miˬ hpawˇ choˬ paˉ oˇ paˉ maˇ chehˇ tuˬ a yeˇ uiˍ jaˇ! w22.05 10-11 ¶12-13

Nawˬ te gʼa gaˇ ve teˇ ceuˬ dawˇ teh taˍ gʼa sheˍ ve yoˬ. Chi ve lehˬ awˬ bon cawˬ tuˬ ve awˬ hkʼaˇ htaꞈ henˇ ve yoˬ. Ngaˬ hui te puiˉ te hpehꞈ ve htaꞈ hkʼaˬ htaˆ kaꞈ te jawˬ ve kʼo, ngaˬ hui awˬ vuiˬ gʼa taˍ ve htaꞈ hkʼa dehꞈ te gʼa leh, Yaˬhoˉvaˬ ve kanˉ maˇ maˇ te gʼa tuˬ yoˬ. Chi teˇ hkui Gʼuiˬ sha ve kanˉ hkʼaˇ hkʼaw yehˬ te ve hpawˇ awˬ viˉ awˬ nyi maˇ maˇ htaꞈ loˍ ve yoˬ. Tawˇ pa haˉ te kʼo, Beˍteˍlaˆ, hpawnˬ daꞈ kuiˬ yehˬ, leh hpawnˬ daꞈ kuiˬ yehˬ lonˉ awˬ suhˉ te ve yoˬ. Maˇ˗awˍ ve awˬ viˉ awˬ nyi ca ga la gehˇ sheˍ ve chaw lehˬ, oˇ kaˬ lo awˬ viˉ awˬ nyi kanˉ te maw˗oˬ ve chaw geh henˇ yuˬ ve yoˬ. Chi beuꞈ teˇ co˗e, hpawnˬ daꞈ kuiˬ yehˬ, leh hpawnˬ daꞈ kuiˬ yehˬ lonˉ htaꞈ gu leh nyi haꞈ shaˉ tuˬ, awˬ viˉ awˬ nyi geh henˇ chehˇ ve yoˬ. Yaˬhoˉvaˬ lehˬ “co co taiˍ taiˍ uˉ peunˍ ve Hkunˉ hawˉ hkanˇ” hpehꞈ leh Yeˍsuˆ lehˬ “Jawˇ mawˇ awˬ hkʼoˆ Jawˇ mawˇ hpehꞈ” leh awˬ viˉ awˬ nyi htaꞈ cuˇ leh laiˉ ceuˬ hpawˇ te gʼa ve yoˬ. (1 Tiˆ 1:17; 6:15) Yaˬhoˉvaˬ chiˇ uiˍ chiˇ mvuh ve htaꞈ gʼa tuˬ, ngaˬ hui kaiˬ ve hkʼaw kanˉ te leh puiˉ ve hpehꞈ ve htaꞈ kaꞈ yehˇ gaˇ ve yoˬ. Ngaˬ hui chiˇ uiˍ chiˇ mvuh ve htaꞈ gʼa tuˬ te ve maˇ heˆ.—Yoˇ 8:54. w22.04 24 ¶7; 25 ¶11

Sawˉlaꞈmonˍ paw sha jaˇ leh yawˇ ve a shaꞈ teꞈ kuiˬ hkʼaw hpehꞈ sha jaˇ. (1 Jawˇ 10:7, 14, 15) Yaꞈ hkʼaˇ, Yeˍsuˆ lehˬ mawˇ yehˇ hkʼeun hkʼaˬ nyiˇ ceuˬ maˇ cawˬ. Chi hkʼoˆ kaꞈ yehˬ kaꞈ maˇ cawˬ. (Maꞈ 8:20) Chi hkʼe hpehꞈ ve htawˇ, yawˇ huiˉ maˬ hpu shi mawˇ jeˬ hpawˇ cawˇ ve dawˇ hkʼaˇ cawˬ ve yoˬ. Chi lehˬ yawˇ huiˉ maˬ Yaˬhoˉvaˬ geh cuˇ yiˍ hkʼa shuˍ gʼa ve yoˬ. Sawˉlaꞈmonˍ kʼoˆ ve, ngaˬ hui loˍ ve awˬ ceuˬ htaꞈ vuiˬ gʼa tuˬ leh heuˆ gaˇ ve awˬ ceuˬ htaꞈ vuiˬ gʼa tuˬ hpu gʼa cawˬ ve yoˬ. Yaꞈ hkʼaˇ, Sawˉlaꞈmonˍ kʼoˆ ve, hpu aꞈ kehˉ a yeˇ uiˍ ve laiˉ ceuˬ cawˬ sheˍ ve yoˬ. Tawˇ pa haˉ te kʼo, yawˇ kʼoˆ ve, “hpu shi mawˇ jeˬ htaꞈ leuˆ yuˬ tcuh laˇ ve kʼo, daꞈ ve awˬ meh htaꞈ leuˆ yuˬ˗oꞈ.” (Tawˇ 22:1) Chi hkʼoˆ kaꞈ Sawˉlaꞈmonˍ kʼoˆ sheˍ ve, hpu htaꞈ haꞈ ve chaw lehˬ yawˇ ca gʼa taˍ ve hpu htaꞈ nyi hkʼaˇ maˇ suh. (Cuˇ 5:10, 12) Leh yawˇ shaˍ tiꞈ peꞈ laˇ sheˍ ve, hpu shi mawˇ jeˬ htaꞈ gʼaˇ taˇ va. Awˬ lawn kʼo, hpu shi mawˇ jeˬ lehˬ teˇ hkui tiˉ mehˉ kʼai puiˉ ve yoˬ.—Tawˇ 23:4, 5. w22.05 21 ¶4-5

Chi teˇ hkui ngaˬ hui Yaˬhoˉvaˬ geh awˬ bon gʼa leh daꞈ ve awˬ ceuˬ aˬ htoꞈ ma gʼa ve htaꞈ dawˇ nyi htaˇ, ngaˬ hui yawˇ geh hkʼa dehꞈ meuˆ daꞈ maˇ la tuˬ te laˇ ve yoˬ. Leh awˬ gʼuˇ suhˍ hpawˇ yawˇ ngaˬ hui htaꞈ daꞈ ve awˬ ceuˬ peꞈ laˇ tuˬ ve htaꞈ dawˇ nyi htaˇ, dawˇ law kuiˬ chi ve lehˬ, ngaˬ hui ve a shaꞈ co co taiˍ taiˍ gʼa tuˬ leh Gʼuiˬ sha ve kanˉ hkʼa dehꞈ te gʼa tuˬ ga laˇ ve yoˬ. Chi ve hkʼa peu˗eˬ lehˬ ngaˬ hui Yaˬhoˉvaˬ ve kanˉ ha lehˬ ha kʼa ve hkʼaw te gʼa tuˬ ga laˇ ve yoˬ. Maˇ maw kʼo, Yaˬhoˉvaˬ lehˬ ngaˬ hui awˬ pon miˬ guiˬ chi hkʼoˆ lo maˇ daꞈ ve awˬ ceuˬ hkʼa peu˗eˬ htaꞈ te luˬ laˇ tuˬ yoˬ. Hteˇ ve cawˇ ve Gʼuiˬ sha lehˬ, Saˍtanˍ uˉ peunˍ ve miˬ guiˬ htaꞈ yawˇ tinˍ taˍ ve awˬ nyi gaˬ ve kʼo, teˇ nyi ceh kaꞈ maˇ leuˉ kʼai tcuh ve tehꞈ ngaˬ hui hkʼa dehꞈ yonˍ gʼa ve yoˬ. (Isy 25:9) Yaˬhoˉvaˬ ponˬ laˇ tuˬ ve awˬ nyi htaꞈ ngaˬ hui yeunˇ hkanˍ leh law taˍ ve yoˬ. Awˬ yanˇ chi ve hkʼaw, bon lawˬ ve, Liꞈ hpu gʼaw leh hkʼa dehꞈ dawˇ nyi ve, yawˇ ngaˬ hui htaꞈ awˬ bon naꞈ laˇ leh daꞈ ve awˬ ceuˬ peꞈ laˇ ve htaꞈ dawˇ nyi ve, chi hkʼa peu˗eˬ htaꞈ ngaˬ hui awˬ hpfuhˇ shiˍ ve yoˬ. Chi hkʼe te ve lehˬ ngaˬ hui tuꞈ ve hkanˍ ve htaꞈ yeunˇ hkanˍ gʼaˇ tuˬ ga laˇ leh yawˇ htaꞈ oˉ kʼoˍ pui ve awˬ hkʼaw lo ngaˬ hui ha lehˬ ve yoˬ. w22.11 13 ¶18-19

Tiˆmoˉseˍ Baˆtiˆsaˬ haꞈ yuˬ htaˇ ve awˬ lawn Liꞈ hpu hkʼaw maˇ gʼa kʼoˆ laˇ taˍ ve htawˇ, oˇ ve teˇ nyi Tiˆmoˉseˍ ve awˬ e Uˇniˆ hkʼaˬ hkʼe taw ha lehˬ jaˇ ve htaꞈ ngaˬ hui dawˇ mawˬ gʼa ve yoˬ. (Tawˇ 23:25) Uˇniˆ lehˬ yawˇ ve yaˇ paˍ Yaˬhoˉvaˬ leh Yeˍsuˆ htaꞈ haꞈ tuˬ maˍ piˇ gʼa ve yoˬ. Tiˆmoˉseˍ lehˬ bon liˇ maˇ shuˍ daꞈ ve yehˬ kʼa hkʼaw uiˍ la ve yoˬ. Yawˇ ve awˬ pa Heˍlaˍsaˆ chaw hpehꞈ leh yawˇ ve awˬ e leh awˬ pi Yuˇdaꞈ chaw hpehꞈ ve yoˬ. (Tcuh 16:1) Uˇniˆ leh Lawˇiˆ Yeˍsuˆ htaꞈ yonˍ la htaˇ, Tiˆmoˉseˍ yaˇ nehˬ hpehˬ ve yoˬ hehˉ. Yaꞈ hkʼaˇ, yawˇ ve awˬ pa Yeˍsuˆ htaꞈ maˇ yonˍ. Hkʼe kʼo, Tiˆmoˉseˍ hkʼa hpawˇ leuˆ yuˬ tuˬ le? Chi beuꞈ teˇ co˗e awˬ e hpehꞈ ve awˬ viˉ awˬ nyi kaꞈ yehˬ kʼa htaꞈ haꞈ ve yoˬ. Hkʼe te leh, yawˇ hui awˬ pon a yeˇ uiˍ jaˇ ve lehˬ, yaˇ Yaˬhoˉvaˬ htaꞈ haꞈ leh meuˆ daꞈ tuˬ ga piˇ gaˇ ve yoˬ. Leh yawˇ hui chi hkʼe te ve htaꞈ Yaˬhoˉvaˬ awˬ hpfuhˇ shiˍ ve yoˬ. (Tawˇ 1:8, 9) Awˬ e yaˇ htaꞈ ga piˇ leh yaˇ Yaˬhoˉvaˬ ve kanˉ te la tuˬ yawˇ hui htaꞈ daꞈ ve beˆ maˍ piˇ hkawˇ laiˉ ceuˬ cawˬ ve yoˬ. w22.04 16-17 ¶1-3

Yaˬhoˉvaˬ lehˬ mvuhˇ miˬ uˉ peunˍ paˍ teˇ hpaˍ htaꞈ kanˇ paˆ piˇ leh ‘Gʼuiˬ sha nyi ma cawˇ ve htaꞈ te tuˬ dawˇ pawnˍ piˇ ve yoˬ.’ Hkʼe kʼo, aˬ htoꞈ ma hpehꞈ la tuˬ le? Miˬ guiˬ hkʼoˆ lo mvuhˇ miˬ uˉ peunˍ paˍ teˇ hpaˍ lehˬ “hkunˉ hawˉ hkanˇ 10 gʼaˇ” hpehꞈ leh maˇ heˆ heˆ ve bon liˇ hkʼa peu˗eˬ htaꞈ te luˬ piˇ tuˬ yoˬ. (Hpeuꞈ 17:1, 2, 12, 16) Uiˍ ve Baˍbuˍlonˍ lehˬ awˬ leh meuˇ gaˬ la tuˬ yoˬ tehꞈ ngaˬ hui hkʼaˬ hkʼe te shiˍ gʼa tuˬ le? Awˬ lawn chi ve htaꞈ shiˍ tuˬ oˇ htaˇ teˇ co˗e Uiˍ ve Baˍbuˍlonˍ lehˬ Uˇhpaˍraˆ iˉ kaˆ law venˇ htaꞈ haꞈ shaˉ tuˬ awˬ jaˇ lo caw zuhˇ taˍ ve htaꞈ dawˇ nyi sheˍ. Hpeuꞈ maˍ ve liꞈ hkʼaw kʼoˆ ve, chaw laiˉ lanˍ gʼaˇ Uiˍ ve Baˍbuˍlonˍ htaꞈ awˬ gʼaˇ piˇ ve lehˬ “iˉ kaˆ oˇ ve teˇ hpaˍ” htaꞈ shuˍ ve yoˬ. (Hpeuꞈ 17:15) Yaꞈ hkʼaˇ, Hpeuꞈ maˍ ve liꞈ hkʼaw kʼawꞈ kʼoˆ sheˍ ve, iˉ kaˆ oˇ ve “fiˍ kʼai” tuˬ yoˬ. Chi kʼoˆ gaˇ ve lehˬ Uiˍ ve Baˍbuˍlonˍ htaꞈ gʼa ga piˇ ve chaw maˇ cawˬ maˇ˗o. Tcuh kaˍ paˍ ve tawˇ hkawˇ chi lehˬ chi beuꞈ teˇ co˗e awˬ tehˬ hpehꞈ ve tehꞈ ngaˬ hui gʼa mawˬ ve yoˬ. (Hpeuꞈ 16:12) Chaw maˇ maˇ, maˇ heˆ heˆ ve bon htaꞈ maˇ yawˆ yan˗o leh awˬ nu ve awˬ hkʼaˇ htaꞈ ca leh a shu yawˇ ve shoꞈ shaꞈ ve htaꞈ gu ve yoˬ. w22.07 5-6 ¶14-15

Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ ha kʼaˉ laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ ve. Yeˍsuˆ tawˇ pa haˉ te maˍ laˇ ve hkʼaw awˬ ceˬ teˇ gʼaˇ awˬ shehˍ hpaˇ geh jeˬ cha jaˇ leh maˇ kʼawꞈ shaiˍ tcuh ve yoˬ. Leh Yeˍsuˆ kaꞈ Yaˬhoˉvaˬ chi ve htaꞈ shuˍ ve tehꞈ tehˆ taˍ ve yoˬ. Yaꞈ hkʼaˇ, awˬ ceˬ chi ve teˇ gʼaˇ lehˬ yawˇ ve awˬ chawˇ yawˇ geh jeˬ a ciˉ ceh tiˉ cha ve htawˇ yawˇ maˇ ha kʼaˉ piˇ. (Maꞈ 18:23-35) Awˬ lawn chi ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ ha kʼaˉ laˇ ve htaꞈ ngaˬ hui awˬ hpfuhˇ shiˍ ve kʼo, chi ve ngaˬ hui awˬ nu ve chaw htaꞈ venˇ baˆ hpehˇ piˇ gaˇ tuˬ te laˇ ve yoˬ. (Chiˇ 103:9) Ponˬ laˬ ve laiˉ hkʼawꞈ htaˇ Shaw nyi kuiˬ Taꞈ yehˬ hkʼaw kʼoˆ ve, “ngaˬ hui shu htaꞈ venˇ baˆ hkʼaˬ ma hpehˇ piˇ ve htawˇ, Yaˬhoˉvaˬ Yeˍsuˆ htaꞈ cuˇ leh ngaˬ hui htaꞈ venˇ baˆ hpehˇ laˇ ve, leh ha kʼaˉ laˇ ve htaꞈ tehˆ maˇ gʼa.” Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ kaꞈ ngaˬ hui htaꞈ venˇ baˆ hpehˇ laˇ ve yoˬ. Shu htaꞈ ha kʼaˉ piˇ ve chaw htaꞈ Yaˬhoˉvaˬ ha kʼaˉ ve yoˬ. (Maꞈ 5:7) Yeˍsuˆ awˬ laꞈ gʼawˇ htaꞈ bon lawˬ tuˬ maˍ piˇ htaˇ, awˬ lawn chi ngaˬ hui hkʼa tawˍ lehˆ mawˬ gʼa ve yoˬ.—Maꞈ 6:14, 15. w22.06 10 ¶8-9

Yeˍsuˆ miˬ guiˬ hkʼoˆ lo chaw yaˇ hpehꞈ htaˇ, yawˇ Yaˬhoˉvaˬ hkʼa shuˍ te hkʼaˇ dawˇ hkʼaˇ cawˬ ve tehꞈ hpeuꞈ maw laˇ ve yoˬ. (Yoˇ 14:9) Yeˍsuˆ ve awˬ lawn ngaˬ hui Yaˬhoˉvaˬ htaꞈ shiˍ leh haꞈ tuˬ ga laˇ ve yoˬ. Leh chi beuꞈ teˇ co˗e yawˇ Hkriꞈ yaˇ awˬ moˍ htaꞈ beˆ maˍ piˇ ve kaꞈ ngaˬ hui awˬ bon gʼa sheˍ ve yoˬ. Gʼuiˬ sha nyi hkʼaˇ suh tuˬ ngaˬ hui hkʼaˬ hkʼe gʼa te cawˇ ve kaꞈ Yeˍsuˆ maˍ laˇ ve yoˬ. Yeˍsuˆ gʼa suh˗e leh ngaˬ hui teˇ gʼaˇ le le awˬ bon gʼa tuˬ yoˬ. Yeˍsuˆ suh˗e leh Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ htaˇ, Yaˬhoˉvaˬ lehˬ Yeˍsuˆ ve tuˉ tanˇ tuˬ biˇ jaˇ ve htaꞈ haꞈ yuˬ ve yoˬ. Gʼuiˬ sha lehˬ tuˉ tanˇ tuˬ chi htaꞈ yehˇ leh “ngaˬ hui ve venˇ baˆ teˇ ceuˬ le le htaꞈ tsuhˇ baˬ laˇ chehˇ ve yoˬ. (1 Yoˇ 1:7) Chi teˇ hkui Yeˍsuˆ lehˬ Jawˇ mawˇ lonˉ hpehꞈ leh maˇ suh puiˉ˗o. Maˇ maw ve awˬ yanˇ, yawˇ vuiˬ ve oˉ kʼoˍ htaꞈ dawˆ nehˆ tuˬ yoˬ. (Awˬ 3:15) Saˍtanˍ htaꞈ co co taiˍ taiˍ te luˬ piˇ htaˇ, Yaˬhoˉvaˬ ve kanˉ te ve chaw ha lehˬ jaˇ tuˬ yoˬ. Yaꞈ hkʼaˇ, oˇ ve teˇ nyi maˇ gaˬ sheˍ htaˇ, ngaˬ hui awˬ gʼaˇ maˇ nuˇ leh Yaˬhoˉvaˬ htaꞈ gʼaˇ va sheˍ. Yawˇ “miˬ guiˬ chaw ceuˬ hkʼa peu˗eˬ” htaꞈ awˬ bon naꞈ piˇ tuˬ yoˬ. w22.07 18 ¶13; 19 ¶19

Ngaˬ hui dawˇ teh taˍ htaˇ pa tuˬ gʼa gu hehnˇ taˍ cawˇ ve yoˬ. Aˬ htoꞈ ma te chi hkʼe te ve le? Ngaˬ hui a shaꞈ teꞈ kuiˬ hkʼaw awˬ tcuhˉ awˬ yanˇ pa kʼai puiˉ ve pa taw yoˬ. Teˇ ceuˬ le le htaꞈ ngaˬ hui hkʼa biˇ te maˇ gʼa. Tcuh yaˇ Pawˇluꞈ ve awˬ lawn htaꞈ teˇ geh nyi sheˍ. Hteˇsaˍlawˇniˆ venˇ lo Hkriꞈ yaˇ awˬ moˍ cawˬ tuˬ Pawˇluꞈ ga piˇ leh yawˇ oˇ kaˬ lo caˉ leh kʼawꞈ chehˇ tuˬ dawˇ teh taˍ ve yoˬ. Yaꞈ hkʼaˇ, Hteˇsaˍlawˇniˆ venˇ hkʼaw lo ve chaw Pawˇluꞈ htaꞈ tawˍ piˇ jaˇ. (Tcuh 17:1-5, 10) Yawˇ venˇ oˇ ve hkʼaw maˇ tawˆ˗e ve kʼo, awˬ viˉ awˬ nyi awˬ pon kaꞈ kawˆ tuˬ cawˬ ve yoˬ. Hkʼe te leh, Pawˇluꞈ awˬ hkʼaˇ kʼawꞈ gu ve yoˬ. Yawˇ venˇ oˇ ve awˬ hkʼaw lo tawˆ˗e ve yoˬ. Yaꞈ hkʼaˇ, yawˇ dawˇ teh taˍ ve htaꞈ maˇ pa. Yawˇ Tiˆmoˉseˍ htaꞈ oˇ kaˬ lo ve awˬ viˉ awˬ nyi htaꞈ ga piˇ tuˬ kʼai tcuh ve yoˬ. (1 Hteˇ 3:1, 2) Oˇ kaˬ lo ve awˬ viˉ awˬ nyi ha leh jaˇ. Pawˇluꞈ Hteˇsaˍlawˇniˆ venˇ hkʼaw chehˇ htaˇ, yawˇ ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve teˇ geh nyi sheˍ. Ngaˬ hui teˇ ceuˬ ceuˬ te tuˬ dawˇ teh taˍ htaˇ, ngaˬ hui a shaꞈ teꞈ kuiˬ hkʼaw pa ve awˬ ceuˬ cawˬ ve pa taw, dawˇ teh taˍ ve htaꞈ te maˇ gʼa la ve yoˬ. (Cuˇ 9:11) Nawˬ chi hkʼe hpehꞈ ve kʼo, nawˬ te gʼa tuˬ htaꞈ kʼawꞈ dawˇ teh taˍ sheˍ. w22.04 25-26 ¶14-15

Yaˬhoˉvaˬ lehˬ awˬ gʼuˇ suhˍ hpawˇ daꞈ jaˇ ve dawˇ law kuiˬ htaꞈ caˉ daꞈ ve ngaˬ hui htaꞈ maˍ laˇ leh awˬ gʼaˇ peꞈ laˇ ve yoˬ. Ngaˬ hui tuꞈ ve hkanˍ ve maˇ heˆ leh shoꞈ shaꞈ ve gʼa hpuˇ htaˇ, ngaˬ hui htaꞈ awˬ gʼaˇ peꞈ laˇ gʼa ve Liꞈ hpu awˬ tawn teˇ hpaˍ htaꞈ dawˇ nyi sheˍ. Tawˇ pa haˉ te kʼo, chi teˇ hkui ngaˬ hui shoꞈ shaꞈ ve gʼa hpuˇ maˇ jaˇ ve htawˇ, “Gʼuiˬ sha ve haꞈ pehnˇ ve awˬ hkʼaw lo ngaˬ hui htaꞈ yuˬ hpaˆ laˇ maˇ hpehꞈ” tehꞈ Gʼuiˬ sha ngaˬ hui htaꞈ ka tiꞈ te laˇ ve yoˬ. (Roˉ 8:38, 39) Bon lawˬ htaˇ, “yawˇ htaꞈ kuˬ ve chaw hui awˬ paˇ lo yawˇ chehˇ taˍ ve” tehꞈ htawˆ hkanˍ laˇ ve yoˬ. (Chiˇ 145:18) Ngaˬ hui Yaˬhoˉvaˬ htaꞈ gʼaˇ va ve kʼo, tuꞈ ve hkanˍ ve teˇ ceuˬ le le htaꞈ yeunˇ hkanˍ gʼaˇ leh ngaˬ hui ha lehˬ ve cawˬ tuˬ yoˬ tehꞈ Yaˬhoˉvaˬ kʼoˆ laˇ ve yoˬ. (1 Kawˇ 10:13; Yaˍ 1:2) Chi hkʼoˆ kaꞈ, Liꞈ hpu hkʼaw kʼawꞈ kʼoˆ ve, ngaˬ hui tuꞈ ve hkanˍ ve gʼa hpuˇ chehˇ ve lehˬ Gʼuiˬ sha ngaˬ hui htaꞈ gu teh taˍ laˇ ve miˬ guiˬ awˬ suhˉ hkʼaw co co taiˍ taiˍ ve a shaꞈ htaꞈ tehˆ ve kʼo, chi teˇ hkui ve awˬ yanˇ lehˬ a ciˉ ceh tiˉ hpehꞈ ve yoˬ. (2 Kawˇ 4:16-18) Ngaˬ hui htaꞈ tuꞈ ve hkanˍ ve te laˇ shehˍ hpaˇ lehˬ, Saˍtanˍ leh yawˇ hpawˇ chehˇ ve chaw htaꞈ Yaˬhoˉvaˬ te luˬ piˇ tuˬ yoˬ tehꞈ ngaˬ hui htaꞈ dawˇ law kuiˬ peꞈ laˇ ve yoˬ. (Chiˇ 37:10) Nawˬ tuꞈ ve hkanˍ ve htaꞈ yeunˇ hkanˍ gʼaˇ tuˬ Liꞈ hpu awˬ tawn hkʼaˬ ve teˇ tawn htaꞈ tawnˇ gʼa tuˬ ga laˇ ve le? w22.08 11-12 ¶11

Yaˬhoˉvaˬ ve awˬ liˇ awˬ hkʼaˇ hteˇ ve cawˇ ve htaꞈ nawˬ caˉ leh gʼaꞈ te gʼa˗aw laˇ tehꞈ dawˇ ve maˇ heˆ laˇ? Gʼuiˬ sha kʼoˆ ve, yawˇ ve daꞈ ve leh hteˇ ve cawˇ ve lehˬ “laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ hkʼa shuˍ” hpehꞈ ve yoˬ. (Isy 48:18) Nawˬ laˇ tsuhˇ gʼuiˬ pfuhˍ lo huˉ taˍ ve htaꞈ dawˇ nyi sheˍ. Gʼuiˬ baˇ hkʼaˬ htaˆ kaꞈ taˆ taˆ yaꞈ yaꞈ te chehˇ ve htaꞈ nawˬ mawˬ ve yoˬ. Nawˬ chi hkʼe ve htaꞈ gʼa mawˬ htaˇ nyi ma gawˬ lehˍ cawˬ leh nyi ma sha ve yoˬ. Laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ maˇ taˆ la˗o ve htaꞈ nawˬ dawˇ hkiˉ˗aw laˇ? Maˇ dawˇ hkiˉ taˬ! Laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ lehˬ hkʼaˬ htaˆ kaꞈ chi hkʼe hpehꞈ kʼai tuˬ ve htaꞈ nawˬ shiˍ ve yoˬ. Nawˬ ve hteˇ ve cawˇ ve kaꞈ laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ hkʼe hpehꞈ˗aw laˇ dawˇ nyi sheˍ. Hkʼaˬ hkʼe te chi hkʼe hpehꞈ gʼa tuˬ le? Nawˬ a shaꞈ teꞈ kuiˬ hkʼaw awˬ lawn teˇ ceuˬ ceuˬ dawˇ cheˆ˗a te htaˇ, Yaˬhoˉvaˬ nawˬ htaꞈ aˬ htoꞈ ma te tcuh gaˇ ve dawˇ nyi leh awˉ lawˉ gʼaꞈ te sheˍ. Haˍ jaˇ ve awˬ lawn gʼa dawˇ cheˆ ve htawˇ maˇ kʼoˆ, nawˬ htaꞈ haꞈ ve Awˬ pa Yaˬhoˉvaˬ lehˬ nawˬ htaꞈ ga laˇ leh nawˬ yonˍ yeˬ maˇ la tuˬ kaꞈ ga laˇ tuˬ yoˬ. Nawˬ a shaꞈ teꞈ kuiˬ hkʼaw Gʼuiˬ sha ve awˬ liˇ awˬ hkʼaˇ teˇ nyi le le yuˬ yehˇ tuˬ yawˇ ga laˇ tuˬ yoˬ.—Isy 40:29-31. w22.08 30 ¶15-17

1,000 hkʼawꞈ peuˬ hkʼawꞈ nawˉ, yawˇ htaꞈ hpehˇ piˇ leh biˇ ve chaw yaˇ htaꞈ beˬ yuˬ tuˬ yoˬ. Beˬ ve lawˇ ve awˬ leh meuˇ chi ve teˇ pawˆ biˇ ve chaw yaˇ Yaˬhoˉvaˬ ve awˬ meh htaꞈ yawˆ yan tuˬ laˇ, leh Yaˬhoˉvaˬ uˉ peunˍ ve hpawˇ yawˇ hui chehˇ tuˬ tehꞈ hpeuꞈ maw piˇ tuˬ awˬ yanˇ cawˬ ve yoˬ. (Hpeuꞈ 20:8-10) Co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh hkʼaˬ htaˆ kaꞈ cawˬ keunˍ ve tehꞈ gʼa hpeuꞈ maw piˇ ve yoˬ. Gʼuiˬ sha uˉ peunˍ ve htaꞈ maˇ haꞈ yuˬ ve chaw Liꞈ hpu hkʼaw hkʼaˬ hkʼe ma cawˬ ve tehꞈ maˇ gʼa kʼoˆ laˇ taˍ ve htawˇ, maˇ haꞈ yuˬ ve chaw teˇ hpaˍ cawˬ tuˬ yoˬ. Leh yawˇ hui htaꞈ hkʼaˬ hkʼe hpehꞈ la tuˬ le? Hpeuꞈ maˍ ve liꞈ 20:15 hkʼaw kʼoˆ ve, “co tiꞈ ha tiꞈ liꞈ awˬ hkʼaw lo awˬ meh maˇ cawˬ ve chaw hkʼaˬ ve teˇ gʼaˇ htaꞈ maˇ kʼoˆ, aˬ miˍ gʼuiˬ po awˬ hkʼaw lo baˬ keu ve yoˬ.” Chi kʼoˆ gaˇ ve lehˬ Yaˬhoˉvaˬ uˉ peunˍ keunˍ ve htaꞈ maˇ loˍ ve tehꞈ hpeuꞈ maw piˇ ve chaw htaꞈ co co taiˍ taiˍ te luˬ piˇ tuˬ yoˬ. Yaꞈ hkʼaˇ, biˇ ve chaw maˇ˗awˍ ve lehˬ beˬ ve lawˇ ve chi teˇ pawˆ htaꞈ ponˬ tuˬ yoˬ. w22.09 23-24 ¶15-16

Awˬ nu ve chaw maˇ gʼa kʼoˆ tuˬ buiˇ shaˆ aˉ naˆ chaw htaꞈ awˬ guiˬ meuˇ shoˍ piˇ tehꞈ Hkriꞈ yaˇ teˇ hpaˍ hpaˍ kʼoˆ ve yoˬ. (Gaˍ 6:12) Awˬ lawn chi ve htaꞈ tcuh yaˇ Pawˇluꞈ maˇ dawˇ cawˇ. Yaꞈ hkʼaˇ, awˬ viˉ awˬ nyi oˇ ve teˇ hpaˍ Pawˇluꞈ ve dawˇ hkʼaˇ htaꞈ gʼaꞈ te tuˬ maˇ kʼoˆ piˇ. Yawˇ nyi ma nuˇ nehˬ leh Yeˍruˆsaˍlehnˍ venˇ lo tcuh yaˇ hui leh awˬ hoˉ chaw mawˇ teˇ hpaˍ htaꞈ jehˬ cheˆ tcuh ve yoˬ. (Tcuh 15:2) Pawˇluꞈ te ve awˬ ceuˬ Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ leh awˬ viˉ awˬ nyi ha lehˬ tuˬ te piˇ ve yoˬ. (Tcuh 15:30, 31) Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ ve cawˬ htaˇ, Yaˬhoˉvaˬ leuˆ yuˬ taˍ ve nyi haꞈ shaˉ paˍ beˆ maˍ laˇ tuˬ lawˬ sheˍ. Chi hkʼoˆ kaꞈ, Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ leh awˬ lawn teˇ hpaˍ hkʼaw beˆ maˍ laˇ tuˬ ngaˬ hui hpfuhˆ nyi gʼa ve yoˬ. Ngaˬ hui dawˇ cawˇ ve aꞈ kehˉ beˆ maˍ laˇ hkawˇ coˇ caˇ leh gʼaꞈ ca ve kʼo, ngaˬ hui kaꞈ Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ te piˇ ve yoˬ. w22.08 22-23 ¶8-9

Ngaˬ hui hkʼaˬ hkʼe dawˇ ve meuˆ daꞈ ve awˬ chawˇ htaꞈ kʼoˆ maˍ piˇ gaˇ ve teˇ yanˇ cawˬ ve yoˬ. Yaꞈ hkʼaˇ, teˇ pawˆ pawˆ kʼo sha ve maˇ heˆ. Ngaˬ hui aˬ htoꞈ ma dawˇ ve shu htaꞈ maˇ kʼoˆ maˍ piˇ gaˇ ve yoˬ hehˉ. Ngaˬ hui ve awˬ chawˇ htaꞈ teˇ ceuˬ ceuˬ kʼoˆ maˍ piˇ ve lehˬ, yawˇ awˬ nu ve chaw htaꞈ kʼawꞈ kʼoˆ maˍ piˇ ve kʼo, ngaˬ hui nyi ma luˬ jaˇ tuˬ yoˬ. Ngaˬ hui ve awˬ chawˇ ngaˬ hui ve awˬ lawn awˬ nu ve chaw htaꞈ maˇ kʼoˆ maˍ piˇ ve kʼo, ngaˬ hui ha lehˬ jaˇ tuˬ ve yoˬ. Nyi haꞈ shaˉ paˍ shu ve awˬ lawn maˇ ca kʼoˆ piˇ ve lehˬ, “mvuhˇ haw mvuhˇ yeˬ lonˉ laˬ htaˇ, ca vaꞈ taˍ kuiˬ haˉ hpawˇ hkʼa shuˍ hpehꞈ tuˬ yoˬ.” (Isy 32:2) Nyi haꞈ shaˉ paˍ lehˬ ngaˬ hui ve awˬ lawn awˬ nu ve chaw htaꞈ maˇ ca kʼoˆ piˇ ve tehꞈ ngaˬ hui shiˍ ve pa taw, yawˇ htaꞈ kʼoˆ maˍ piˇ htaˇ ngaˬ hui nyi ma sha ve yoˬ. Leh ngaˬ hui yawˇ hui maˇ kʼoˆ laˇ keunˍ ve awˬ ceuˬ htaꞈ kʼoˆ laˇ tuˬ kaꞈ maˇ na piˇ. Chi hkʼoˆ kaꞈ, nyi haꞈ shaˉ paˍ awˬ miˇ ma lehˬ, awˬ hpawˇ htaꞈ shu ve awˬ lawn kʼoˆ laˇ tuˬ maˇ nyiˉ piˇ ve ngaˬ hui awˬ bon uiˍ jaˇ. Awˬ tehˬ kʼo, yawˇ hui awˬ viˉ awˬ nyi ve awˬ lawn maˇ shiˍ ve lehˬ, yawˇ awˬ pon daꞈ ve yoˬ. w22.09 11-12 ¶10-11

Yaˬhoˉvaˬ lehˬ yawˇ ve chaw “tuꞈ jaˇ hkanˍ jaˇ” ve htaꞈ ponˬ piˇ gʼa tuˬ yoˬ tehꞈ ngaˬ hui yonˍ gʼa ve yoˬ. (Maꞈ 24:21; Daˍ 12:1) Gawˇgaˆ leh Maˍgawˇgaˆ mvuhˇ miˬ awˬ moˍ lonˉ htaꞈ kʼoˆ gaˇ leh Yaˬhoˉvaˬ ve chaw htaꞈ ca bawˆ la htaˇ, Yaˬhoˉvaˬ yawˇ ve chaw htaꞈ ponˬ piˇ tuˬ yoˬ. Mvuhˇ miˬ awˬ moˍ lonˉ leh awˬ nu ve mvuhˇ miˬ 193 mvuhˇ miˬ pawnˇ daꞈ leh uiˍ jaˇ mvuh jaˇ ve Yaˬhoˉvaˬ leh mvuhˇ naw ma tcuh yaˇ hui htaꞈ ca bawˆ la ve htawˇ maˇ gʼaˇ taˬ. Yaˬhoˉvaˬ ka tiꞈ te piˇ ve, “ngaˬ hkʼaˬ ma uiˍ ve leh hkʼaˬ ma daꞈ kehˬ jaˇ ve awˬ lawn chaw ceuˬ hkʼa peu˗eˬ ve htaꞈ hpeuꞈ maˍ piˇ tuˬ yoˬ. Oˇ htaˇ, ngaˬ Gʼuiˬ sha hpehꞈ ve htaꞈ yawˇ hui shiˍ la tuˬ yoˬ.” (Ysk 38:14-16, 23) Gawˇgaˆ Yaˬhoˉvaˬ ve chaw htaꞈ ca te luˬ la htaˇ, Aˍmaˍgeˍdonˍ hkʼaw “miˬ guiˬ ve hkunˉ hawˉ hkanˇ teˇ hpaˍ” htaꞈ Gʼuiˬ sha te luˬ piˇ tuˬ yoˬ. Chi lehˬ maꞈ awˬ leh meuˇ teˇ pawˆ hpehꞈ ve yoˬ. (Hpeuꞈ 16:14, 16; 19:19-21) Yaꞈ hkʼaˇ, “Gʼuiˬ sha lehˬ ka tiꞈ yeˬ ve chaw htaꞈ haꞈ shaˉ piˇ” leh miˬ guiˬ hkʼoˆ lo chehˇ tcuh tuˬ yoˬ.—Tawˇ 2:21. w22.10 17 ¶16-17

Ngaˬ hui shu ve nyi ma htaꞈ maˇ shiˍ gʼa. Gʼuiˬ sha lehˬ yawˇ ve “dawˇ hkʼaˇ htaꞈ” shiˍ ve yoˬ. (Tawˇ 16:2) Hpehꞈ laˬ jaw ve leh chaw liˇ vaˇ liˇ maˇ shuˍ daꞈ ve htawˇ, Yaˬhoˉvaˬ teˇ gʼaˇ le le htaꞈ haꞈ leh yawˇ ngaˬ hui htaꞈ “kʼawꞈ haꞈ” ve cawˬ tcuh gaˇ ve yoˬ. (2 Kawˇ 6:13) Hkʼe te leh, ngaˬ hui awˬ viˉ awˬ nyi teˇ gʼaˇ le le htaꞈ gʼa haꞈ leh maˇ dawˇ cheˆ piˇ. Chi hkʼoˆ kaꞈ, ngaˬ hui awˬ nu ve chaw htaꞈ kaꞈ maˇ dawˇ cheˆ piˇ. Shaˉhkiˆhkanˍ ve chaw maˇ hpehꞈ ve awˬ viˉ awˬ nyi htaꞈ “nawˬ Shaˉhkiˆhkanˍ ve chaw hpehꞈ la maˇ gʼa taˍ tehꞈ dawˇ cheˆ piˇ jaw˗aw laˇ,” ngaˬ hui chi hkʼe maˇ te taˬ. Chi hkʼe te ve lehˬ ngaˬ hui awˬ nu ve chaw aꞈ kehˉ daꞈ ve tehꞈ dawˇ leh te ponˬ te leuˉ ve yoˬ. Yaˬhoˉvaˬ lehˬ “teˇ kaˬ le le lo chehˇ ve chaw hkʼa peu˗eˬ” venˇ baˆ dawˇ hpfuhˆ tcuh gaˇ ve yoˬ. (Tcuh 17:30) Shu aꞈ kehˉ daꞈ ve tehꞈ dawˇ ve chaw lehˬ Gʼuiˬ sha awˬ pon kʼo maˇ daꞈ ve tehꞈ shawˍ ve htaꞈ tawnˇ taˍ sheˍ. Yaˬhoˉvaˬ ve awˬ liˇ awˬ hkʼaˇ hteˇ ve cawˇ ve htaꞈ ngaˬ hui haꞈ ve kʼo, awˬ viˉ awˬ nyi ha lehˬ tuˬ te piˇ leh yawˇ hui Yaˬhoˉvaˬ ve awˬ liˇ awˬ hkʼaˇ htaꞈ haꞈ tuˬ kaꞈ ga piˇ tuˬ yoˬ. Chi ngaˬ hui haꞈ daꞈ tuˬ te laˇ leh awˉ lawˉ htaˇ aꞈ kehˉ kʼawꞈ haꞈ daꞈ tuˬ yoˬ. w22.08 31 ¶20-22

Ngaˬ hui hto toˇ htaˇ tawˍ laˇ ve htaꞈ gʼa hpuˇ tuˬ yoˬ. Leh awˬ gʼuˇ suhˍ hpawˇ tawˍ laˇ ve hehnˇ jaˇ ve htaꞈ kaꞈ gʼa hpuˇ tuˬ yoˬ. (Daˍ 11:44; 2 Tiˆ 3:12; Hpeuꞈ 16:21) Chi hkʼe gʼa hpuˇ ve htawˇ, Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ hkʼa dehꞈ yonˍ gʼa ve yoˬ. Aˬ htoꞈ ma te ngaˬ hui chi hkʼe yonˍ gʼa ve le? Peuˬ laˬ htaˇ Yaˬhoˉvaˬ yawˇ ve kanˉ te ve chaw htaꞈ hkʼaˬ htaˆ kaꞈ hkʼa dehꞈ ga piˇ ve pa taw, kanˉ oˇ ve hkʼaˬ hkʼe taw haˍ ve htawˇ hkʼa dehꞈ te biˇ gʼa ve yoˬ. Tcuh kaˍ paˍ Yeˍsaˍkeˍlaˆ, Baˍbuˍlonˍ mvuhˇ miˬ lo Yuˇdaꞈ chaw shu ceˬ te chehˇ ve htaꞈ hto maˍ piˇ ve htaꞈ dawˇ nyi sheˍ. Yeˍsaˍkeˍlaˆ gʼa hto maˍ piˇ ve Yuˇdaꞈ chaw lehˬ hkʼaˬ hkʼe ve chaw hpehꞈ ve le? Yaˬhoˉvaˬ kʼoˆ ve, yawˇ hui lehˬ “nyi ma heh jaˇ” leh chaw hpfuhˆ hpehꞈ ve yoˬ. Gʼuiˬ sha kʼoˆ ve yawˇ hui haiˬ jaˇ ve lehˬ aˉ chuˇ buiˇ leh aˉ ci ku tawꞈ ma hkʼe hpehꞈ ve yoˬ. Chi htaꞈ pa taw, Yaˬhoˉvaˬ Yeˍsaˍkeˍlaˆ htaꞈ awˬ gʼaˇ laiˉ pawˆ piˇ leh kʼoˆ piˇ ve yawˇ hui htaꞈ “taˇ kawˆ.” (Ysk 2:3-6) Yeˍsaˍkeˍlaˆ Gʼuiˬ sha ve kanˉ hkʼa dehꞈ te gʼa ve lehˬ (1) Yeˍsaˍkeˍlaˆ kanˉ chi ve htaꞈ te gʼa tuˬ Yaˬhoˉvaˬ kʼai tcuh ve, (2) yawˇ Gʼuiˬ sha geh daꞈ kehˬ ve awˬ ha hpu gʼa ve, leh (3) Gʼuiˬ sha ve tawˇ hkawˇ yawˇ ve yonˍ hkʼaˇ yonˍ yeˬ tuˬ te piˇ ve yoˬ. w22.11 2 ¶1-2

Miˬ guiˬ hkʼoˆ lo Yaˬhoˉvaˬ hpanˍ taˍ ve awˬ ceuˬ teˇ hpaˍ lehˬ, chaw yaˇ ceh tiˉ maˇ suh puiˉ ve daꞈ jaˇ ve dawˇ law kuiˬ peꞈ laˇ taˍ ve yoˬ. Yaˬhoˉvaˬ lehˬ ngaˬ hui htaꞈ co co taiˍ taiˍ a shaꞈ teꞈ chehˇ tuˬ hpanˍ taˍ laˇ ve yoˬ. Liꞈ hpu hkʼaw kʼoˆ ve, Yaˬhoˉvaˬ lehˬ chaw yaˇ htaꞈ co co taiˍ taiˍ ve a shaꞈ cawˬ gaˇ tuˬ ve nyi ma yawˇ piˇ laˇ taˍ peuˬ ve yoˬ. (Cuˇ 3:11) Hkʼe te leh, suh ve teˇ ceuˬ lehˬ ngaˬ hui ve canˇ paˍ hpehꞈ ve tehꞈ shawˍ ve yoˬ. (1 Kawˇ 15:26) Ngaˬ hui naˬ jaˇ htaˇ teꞈ chiˉ maˇ te leh suh tuˬ law taˍ ve laˇ? Chi hkʼe maˇ heˆ. Ngaˬ hui naˬ ve htaꞈ haꞈ shaˉ tuˬ saˍ laꞈ gʼonˍ geh kʼai ve, maˇ heˆ leh maˇ gʼa suh tuˬ naˆ tsuhˇ dawˬ ve, leh ngaˬ hui te gʼa ve hkʼe teˇ ceuˬ le le te ve yoˬ. Ngaˬ hui haꞈ ve chaw a shaꞈ i ve maˇ heˆ leh a shaꞈ maˇ ve suh ve kʼo, ngaˬ hui awˬ yanˇ maw chaweh nyi ma luˬ ve yoˬ. (Yoˇ 11:32, 33) Ngaˬ hui maˇ suh gaˇ ve lehˬ Yaˬhoˉvaˬ ngaˬ hui htaꞈ co co taiˍ taiˍ teꞈ chehˇ tuˬ hpanˍ taˍ laˇ ve yoˬ. Yaˬhoˉvaˬ ngaˬ hui htaꞈ co co taiˍ taiˍ teꞈ chehˇ tcuh gaˇ leh ngaˬ hui co co taiˍ taiˍ teꞈ chehˇ gʼa tuˬ yawˇ ga laˇ tuˬ yoˬ tehꞈ yonˍ gʼa ve yoˬ. w22.12 3 ¶5; 4 ¶7

Shoꞈ shaꞈ ve awˬ yanˇ chi awˬ hkʼaw lo ngaˬ hui geh Yaˬhoˉvaˬ ve kanˉ teˇ geh te ve chaw laiˉ gʼaˇ yawˇ hui naˬ ve, kawˆ ve, maˇ heˆ leh chehˇ bawˬ ve htaꞈ gʼa hpuˇ chehˇ ve yoˬ hehˉ. Nawˬ awˬ viˉ awˬ nyi geh hkʼaˬ htaˆ kaꞈ caˉ daꞈ sheˍ. Naˬ beuˬ a naˍ cawˬ ve awˬ yanˇ htaˇ, ngaˬ hui maˇ gʼa mawˬ daꞈ ve yoˬ. Gʼa mawˬ daꞈ ve kʼo, ngaˬ hui tawˇ yaw daꞈ htaˇ awˬ paˇ lo maˇ gʼa chehˇ. Chi hkʼe hpehꞈ ve kʼo nawˬ kaꞈ tcuh yaˇ Yoˇhanˬ hkʼe dawˇ ve yoˬ hehˉ. Yawˇ ve awˬ chehˇ Gaˍyuˆ htaꞈ mawˬ gaˇ jaˇ ve yoˬ. (3 Yoˇ 13, 14) Yaꞈ hkʼaˇ, mawˬ daꞈ maˇ gʼa sheˍ ve tehꞈ yawˇ shiˍ ve yoˬ. Hkʼe te leh, yawˇ te gʼa ve hkʼe te ve lehˬ Gaˍyuˆ htaꞈ liꞈ bvuhꞈ piˇ ve yoˬ. Chi ve hkʼa shuˍ shuˍ, nawˬ awˬ viˉ awˬ nyi htaꞈ mawˬ daꞈ maˇ gʼa sheˍ ve kʼo, yawˇ hui geh awˬ nu ve awˬ hkʼaˇ htaꞈ yehˇ leh tawˇ yaw daꞈ kaꞈ gʼa ve yoˬ. Nawˬ awˬ viˉ awˬ nyi geh caˉ daꞈ leh tawˇ yaw daꞈ ve kʼo, nawˬ hkʼe taw maˇ chehˇ bawˬ leh nyi ma gawˬ lehˍ cawˬ gʼa ve yoˬ. Yaꞈ hkʼaˇ, dawˇ haˍ dawˇ hkiˉ jaˇ ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ geh caˉ daꞈ leh awˬ gʼaˇ peꞈ laˇ tuˬ lawˬ sheˍ.—Isy 32:1, 2. w22.12 17-18 ¶6-7

Yoˇsehꞈ ve hkui sheh leh kʼawˍ peˍ htaꞈ sho caˆ yuˬ hpeh piˇ taˍ ve yoˬ. (Chiˇ 105:17, 18) Yoˇsehꞈ gʼa hpuˇ ve awˬ ceuˬ leuˉ leh haˍ jaˇ tuˬ te piˇ ve yoˬ. Shu yonˍ gʼa jaˇ ve awˬ ceˬ hpehꞈ jaw ve htawˇ, htawnˍ yaˇ gʼa hpehꞈ ve yoˬ. Nawˬ Yaˬhoˉvaˬ ga laˇ tuˬ bon lawˬ ve htawˇ, nawˬ gʼa hpuˇ ve awˬ ceuˬ leuˉ leh haˍ jaˇ tuˬ te laˇ sheˍ ve yoˬ. Nawˬ chi hkʼe gʼa hpuˇ jaw˗aw laˇ? Ngaˬ hui kaꞈ chi hkʼe gʼa hpuˇ jaw ve yoˬ. Miˬ guiˬ hkʼoˆ lo Saˍtanˍ uˉ peunˍ ve awˬ yanˇ htaˇ, ngaˬ hui tuꞈ ve hkanˍ ve htaꞈ Yaˬhoˉvaˬ hpuˇ tcuh laˇ sheˍ ve yoˬ. (1 Yoˇ 5:19) Ngaˬ hui chi hkʼe gʼa hpuˇ ve htawˇ teˇ lawn htaꞈ yonˍ gʼa ve yoˬ. Chi ve lehˬ nawˬ aˬ htoꞈ ma gʼa hpuˇ chehˇ ve htaꞈ Yaˬhoˉvaˬ shiˍ leh yawˇ nawˬ htaꞈ dawˇ haˍ jaˇ ve yoˬ. (Maꞈ 10:29-31; 1 Peˍ 5:6, 7) Chi hkʼoˆ kaꞈ, “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ” tehꞈ Gʼuiˬ sha ka tiꞈ te taˍ laˇ ve yoˬ. (Heˍ 13:5) Nawˬ gʼa hpuˇ ve awˬ ceuˬ dawˇ law kuiˬ maˇ cawˬ leh gu gʼa tuˬ awˬ hkʼaˇ maˇ cawˬ ve tehꞈ shuˍ ve htawˇ, nawˬ yeunˇ hkanˍ gʼaˇ tuˬ Yaˬhoˉvaˬ ga laˇ tuˬ yoˬ. w23.01 16 ¶7-8

Ngaˬ hui te yaꞈ ve htawˇ Yaˬhoˉvaˬ ngaˬ hui htaꞈ maˇ chiˇ baˬ laˇ taˬ tehꞈ ka tiꞈ te taˍ laˇ ve yoˬ. Iˉsaˍreˍlaˆ chaw Yaˬhoˉvaˬ htaꞈ laiˉ pawˆ te yaꞈ ve htawˇ, yawˇ hui venˇ baˆ dawˇ hpfuhˆ htaˇ, Yaˬhoˉvaˬ kaꞈ venˇ baˆ hpehˇ piˇ ve yoˬ. Awˉ lawˉ peuˇ ve Hkriꞈ yaˇ kaꞈ hkʼa shuˍ shuˍ, Yaˬhoˉvaˬ yawˇ hui htaꞈ haꞈ jaˇ ve tehꞈ shiˍ ve yoˬ. Hawˉ hkʼaˆ teˇ gʼaˇ uiˍ jaˇ ve venˇ baˆ htaꞈ te yaꞈ jaw leh venˇ baˆ dawˇ hpfuhˆ˗oˬ htaˇ “yawˇ ve venˇ baˆ htaꞈ hpehˇ piˇ cawˇ leh, yawˇ htaꞈ kʼawꞈ dawˇ sha la piˇ cawˇ ve” tehꞈ tcuh yaˇ Pawˇluꞈ htaꞈ dawˇ pawnˍ piˇ leh Hkriꞈ yaˇ htaꞈ awˬ gʼaˇ piˇ tuˬ bvuhꞈ tcuh ve yoˬ. (2 Kawˇ 2:6, 7; 1 Kawˇ 5:1-5) Yaˬhoˉvaˬ ve kanˉ te ve chaw te yaꞈ ve htaꞈ pa taw, Yaˬhoˉvaˬ maˇ chiˇ baˬ piˇ ve ngaˬ hui ha lehˬ jaˇ. Yaꞈ hkʼaˇ, Yaˬhoˉvaˬ yawˇ hui htaꞈ haꞈ ve, yawˇ hui venˇ baˆ dawˇ hpfuhˆ tuˬ ga piˇ ve, leh yawˇ hui Yaˬhoˉvaˬ geh kʼawꞈ meuˆ daꞈ tuˬ ga piˇ ve yoˬ. Chi beuꞈ teˇ co˗e kaꞈ Yaˬhoˉvaˬ ve kanˉ te ve chaw te yaꞈ leh venˇ baˆ dawˇ hpfuhˆ ve teˇ gʼaˇ le le htaꞈ chi hkʼa shuˍ te piˇ tuˬ yoˬ tehꞈ yawˇ ka tiꞈ te taˍ laˇ ve yoˬ. (Yaˍ 4:8-10) Ngaˬ hui Gʼuiˬ sha ve cuˇ yiˍ cawˬ tuˬ, hteˇ ve cawˇ ve cawˬ tuˬ, leh haꞈ pehnˇ ve cawˬ tuˬ, Liꞈ hpu hkʼaw ngaˬ hui htaꞈ ga laˇ ve yoˬ. Ngaˬ hui Yaˬhoˉvaˬ htaꞈ shiˍ daꞈ tuˬ leh yawˇ geh awˬ chawˇ hpehꞈ tuˬ kaꞈ ga laˇ ve yoˬ. w23.02 7 ¶16-17

Miˬ guiˬ hkʼoˆ lo hpehꞈ la chehˇ ve awˬ heˆ teˇ hpaˍ lehˬ, Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe hpehꞈ la chehˇ ve tehꞈ, ngaˬ hui a yeˇ yuˬ cawˇ ve laiˉ hkʼaˇ cawˬ ve yoˬ. Tawˇ pa haˉ te kʼo, Yeˍsuˆ awˬ heˆ laiˉ ceuˬ htaꞈ hteˇ lehˍ kʼoˆ taˍ ve yoˬ. Chi lehˬ haiˬ jaˇ ve miˬ guiˬ awˬ leh meuˇ gaˬ la paˇ neˇ˗oˬ ve tehꞈ ngaˬ hui shiˍ tuˬ te laˇ ve yoˬ. (Maꞈ 24:3-14) Ngaˬ hui ve yonˍ hkʼaˇ yonˍ yeˬ ve cawˬ tuˬ ga laˇ gʼa tuˬ, tcuh yaˇ Peˍtruˆ kaꞈ Liꞈ hpu hkʼaw tcuh kaˍ paˍ ve tawˇ hkawˇ ngaˬ hui htaꞈ a yeˇ yuˬ tcuh gaˇ ve yoˬ. (2 Peˍ 1:20, 21) Liꞈ hpu hkʼaw tcuh kaˍ paˍ ve tawˇ hkawˇ teˇ hpaˍ htaꞈ ngaˬ hui nyi htaˇ, ngaˬ hui keunˍ lawꞈ cawˇ lawꞈ ve dawˇ hkʼaˇ cawˬ tuˬ, yawˇ heuˆ gaˇ ve yoˬ. Yawˇ kʼoˆ ve, “Gʼuiˬ sha ve awˬ nyi htaꞈ law taˍ leh dawˇ law chehˇ ve yoˬ.” (2 Peˍ 3:11-13) Aˬ htoꞈ ma te ngaˬ hui chi hkʼe te cawˇ ve htaꞈ chaˬ nyi sheˍ. Peˍtruˆ kʼoˆ ve, ngaˬ hui awˬ yanˇ htaꞈ hkʼa dehꞈ vuiˬ hkʼawꞈ leh yehˇ gaˇ ve pa taw, ‘daꞈ kehˬ ve awˬ liˇ awˬ hkʼaˇ htaꞈ tiˉ te leh Gʼuiˬ sha htaꞈ yawˆ yan ve chaw hpehꞈ cawˇ ve yoˬ.’ Aˍmaˍgeˍdonˍ laˬ tuˬ ve “awˬ nyi awˬ haˉ” htaꞈ shiˍ gaˇ ve pa taw maˇ heˆ. (Maꞈ 24:36; Luˉ 12:40) Yaˬhoˉvaˬ cawˇ ve tehꞈ kʼoˆ ve awˬ ceuˬ htaꞈ ngaˬ hui te gaˇ leh, ngaˬ hui yawˇ htaꞈ haꞈ ve pa taw yawˇ ve kanˉ te ve tehꞈ kaꞈ shiˍ tcuh gaˇ ve yoˬ. Ngaˬ hui shaˍ tiꞈ te leh hkʼa dehꞈ gʼa shaw taˍ cawˇ ve yoˬ. w23.02 16 ¶4, 6

Miˬ guiˬ awˬ suhˉ hkʼaw gʼa chehˇ tuˬ “awˬ kaˍ awˬ nu yawˬ” chi teˇ hkui aˬ htoꞈ ma gʼa te sheˍ ve le? Ngaˬ hui Yeˍsuˆ te ve awˬ ceuˬ htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ awˬ yanˇ cawˬ ve yoˬ. Tawˇ pa haˉ te kʼo, ngaˬ hui Yeˍsuˆ htaꞈ haꞈ leh yawˇ hpawˇ chehˇ ve tehꞈ hpeuꞈ maw piˇ ve lehˬ, awˬ viˉ awˬ nyi leuˆ yuˬ taˍ ve chaw htaꞈ ga piˇ ve yoˬ. Yeˍsuˆ kʼoˆ ve, a shu teˇ gʼaˇ yawˬ hpehꞈ ve tehꞈ shiˍ tuˬ yawˇ ve awˬ viˉ awˬ nyi htaꞈ te piˇ ve awˬ ceuˬ htaꞈ mawˬ gʼa ve yoˬ. (Maꞈ 25:31-40) Ngaˬ hui yawˇ hui htaꞈ ga piˇ gʼa ve lehˬ, hto toˇ leh shu awˬ laꞈ gʼawˇ hpehꞈ la tuˬ te ve yoˬ. (Maꞈ 28:18-20) Miˬ guiˬ awˬ suhˉ hkʼaw Yaˬhoˉvaˬ chehˇ tcuh gaˇ ve chaw hpehꞈ tuˬ, ngaˬ hui chi teˇ hkui kaꞈ a shu yawˇ ve te hkʼaˇ dawˇ hkʼaˇ gʼa pa cawˇ ve yoˬ. Ngaˬ hui tawˇ yaw ve leh te ve hkʼaw ka tiꞈ gʼa yeˬ cawˇ leh a shaꞈ teꞈ kuiˬ hkʼaw keunˍ daꞈ cawˇ daꞈ ve gʼa te ve yoˬ. Ngaˬ hui lehˬ Yaˬhoˉvaˬ, a shu yawˇ ve awˬ ca, leh awˬ viˉ awˬ nyi htaꞈ kaꞈ ka tiꞈ gʼa yeˬ ve yoˬ. Ngaˬ hui haiˬ ve miˬ guiˬ chi hkʼoˆ lo chehˇ htaˇ, Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw hkʼa dehꞈ yuˬ yehˇ ve kʼo, miˬ guiˬ awˬ suhˉ hkʼaw chehˇ htaˇ Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw caˉ leh yuˬ yehˇ tuˬ sha ve yoˬ. Chi hkʼoˆ kaꞈ, ngaˬ hui puiˉ ve hpehꞈ ve teˇ ceuˬ ceuˬ htaꞈ te jaw ve, maˇ heˆ leh awˬ nu ve daꞈ ve te hkʼaˇ dawˇ hkʼaˇ htaꞈ te jaw ve kʼo, Gʼuiˬ sha ve miˬ guiˬ awˬ suhˉ hkʼaw ngaˬ hui chehˇ tuˬ gu hehnˇ taˍ ve tehꞈ hpeuꞈ maw piˇ ve yoˬ. w22.12 11-13 ¶14-16

Yeˍsuˆ daꞈ jaˇ ve uˉ peunˍ shehˍ hpaˇ hpehꞈ ve pa taw, ngaˬ hui yawˇ htaꞈ haꞈ ve yoˬ. Yaˬhoˉvaˬ lehˬ Yeˍsuˆ htaꞈ maˍ piˇ leh Jawˇ mawˇ te tcuh ve yoˬ. (Isy 50:4, 5) Chi hkʼoˆ kaꞈ, Yeˍsuˆ haꞈ pehnˇ ve hkʼaw teˇ ceuˬ le le hpawˇ tanˇ laˇ ve htaꞈ ngaˬ hui dawˇ nyi sheˍ. (Yoˇ 13:1) Yeˍsuˆ nawˬ ve Jawˇ mawˇ hpehꞈ ve pa taw nawˬ yawˇ htaꞈ haꞈ jaˇ ve yoˬ. Yeˍsuˆ kʼoˆ ve, yawˇ htaꞈ haꞈ ve chaw lehˬ yawˇ ve tawˇ hkawˇ htaꞈ na yuˬ leh gʼaꞈ te ve tehꞈ hpeuꞈ maw piˇ ve chaw hui yoˬ. (Yoˇ 14:15; 15:14, 15) Yaˬhoˉvaˬ ve Yaˇ paˍ Yeˍsuˆ htaꞈ ngaˬ hui awˬ chawˇ gʼa te ve daꞈ jaˇ ve yoˬ. Yeˍsuˆ nyi ma nuˇ nehˬ jaˇ leh Yaˬhoˉvaˬ htaꞈ hkʼa dehꞈ henˇ yuˬ gʼa ve tehꞈ nawˬ gʼa mawˬ ve yoˬ. Yeˍsuˆ meuꞈ ve kaˆ ve chaw htaꞈ caˍ piˇ ve, awˬ gʼaˇ nuˇ ve chaw htaꞈ awˬ gʼaˇ piˇ ve, leh naˬ ve chaw htaꞈ kaꞈ gu na˗e piˇ ve nawˬ gʼa henˇ˗oˬ ve yoˬ. (Maꞈ 14:14-21) Yeˍsuˆ chi beuꞈ teˇ co˗e ve Hkriꞈ yaˇ awˬ moˍ htaꞈ hkʼaˬ hkʼe sheh kʼai chehˇ ve nawˬ gʼa mawˬ ve yoˬ. (Maꞈ 23:10) Leh awˬ gʼuˇ suhˍ hpawˇ miˬ guiˬ awˬ suhˉ hkʼaw yawˇ uˉ peunˍ htaˇ, chi aꞈ kehˉ kʼawꞈ te tuˬ ve tehꞈ nawˬ gʼa henˇ˗oˬ ve yoˬ. Nawˬ yawˇ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le? Yawˇ htaꞈ henˇ yuˬ gʼa ve yoˬ. Nawˬ te gʼa ve awˬ hkʼaˇ lehˬ, Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ. w23.03 4 ¶8, 10

Yaˬhoˉvaˬ mvuhˇ naw ma hkʼoˆ lo cawˬ ve awˬ ceuˬ teˇ hpaˍ htaꞈ ceh tiˉ hpanˍ taˍ ve maˇ heˆ. Miˬ guiˬ hkʼoˆ lo leh laˇ tsuhˇ gʼuiˬ hkʼaw lo cawˬ ve awˬ ceuˬ teˇ hpaˍ anˇ tuˬ uiˍ jaˇ ve htaꞈ kaꞈ yawˇ hpanˍ taˍ ve yoˬ. Chi ve teˇ hpaˍ lehˬ Gʼuiˬ sha htaꞈ caˉ daꞈ ve awˬ lawn ngaˬ hui shiˍ tuˬ te laˇ ve yoˬ. (Chiˇ 104:24, 25) Chi hkʼoˆ kaꞈ, Yaˬhoˉvaˬ ngaˬ hui htaꞈ hkʼaˬ hkʼe te hpanˍ taˍ laˇ ve htaꞈ kaꞈ dawˇ nyi sheˍ. Gʼuiˬ sha ngaˬ hui htaꞈ hpanˍ taˍ laˇ ve lehˬ yawˇ hpanˍ taˍ ve awˬ ceuˬ daꞈ jaˇ ve htaꞈ ngaˬ hui ha lehˬ tuˬ kaꞈ te laˇ ve yoˬ. Gʼuiˬ sha lehˬ ngaˬ hui jawˬ puiˉ ve awˬ ceuˬ 5 ceuˬ cawˬ tuˬ kaꞈ te laˇ ve yoˬ. Chi ve lehˬ mawˬ puiˉ ve, kaˇ puiˉ ve, jawˬ puiˉ ve, awˬ cheh htaꞈ shiˍ ve leh awˬ shaˉ hawnˉ puiˉ ve chi teˇ hpaˍ hpehꞈ ve yoˬ. Chi ve teˇ hpaˍ lehˬ Gʼuiˬ sha hpanˍ taˍ ve awˬ ceuˬ teˇ hpaˍ htaꞈ ngaˬ hui ha lehˬ tuˬ kaꞈ te laˇ ve yoˬ. Chi hkʼoˆ kaꞈ, Liꞈ hpu hkʼaw teˇ ceuˬ kʼawꞈ kʼoˆ laˇ sheˍ ve lehˬ, Yaˬhoˉvaˬ hpanˍ taˍ ve awˬ ceuˬ htaꞈ ngaˬ hui chaˬ nyi cawˇ ve yoˬ. Chi ve lehˬ Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ caˉ daꞈ ve ngaˬ hui htaꞈ maˍ laˇ ve yoˬ. (Roˉ 1:20) Tawˇ pa haˉ te kʼo, hpanˍ taˍ ve awˬ ceuˬ daꞈ jaˇ leh anˇ tuˬ uiˍ jaˇ ve yoˬ. Chi ve teˇ hpaˍ htaꞈ hpanˍ shehˍ hpaˇ Gʼuiˬ sha lehˬ cuˇ yiˍ cawˬ jaˇ ve tehꞈ ngaˬ hui gʼa mawˬ ve yoˬ. Miˬ guiˬ hkʼoˆ lo caˇ tuˬ laiˉ ceuˬ cawˬ maˇ jaˇ ve htaꞈ ngaˬ hui dawˇ nyi sheˍ. Yaˬhoˉvaˬ chaw yaˇ htaꞈ haꞈ jaˇ ve tehꞈ nawˬ dawˇ nyi tuˬ te laˇ ve maˇ heˆ laˇ? Yaˬhoˉvaˬ hpanˍ taˍ ve awˬ ceuˬ teˇ hpaˍ hkʼaw yawˇ ve te hkʼaˇ dawˇ hkʼaˇ teˇ hpaˍ htaꞈ ngaˬ hui gʼa mawˬ htaˇ, ngaˬ hui yawˇ htaꞈ hkʼa dehꞈ shiˍ la ve yoˬ. Hkʼe te leh, ngaˬ hui yawˇ geh gʼaˇ hteꞈ meuˆ daꞈ gaˇ tuˬ kaꞈ te laˇ ve yoˬ. w23.03 16 ¶4-5

Chi beuꞈ teˇ co˗e miˬ guiˬ chi hkʼoˆ lo gʼaˇ hteꞈ luˬ kʼai chehˇ ve pa taw, Liꞈ hpu htaꞈ yonˍ gʼa tuˬ haˍ ve yoˬ. Laiˉ gʼaˇ ngaˬ hui htawˇ dawˇ nawˬ dawˇ cawˬ tuˬ te laˇ ve yoˬ. Tawˇ pa haˉ te kʼo, Liꞈ hpu lehˬ awˬ tehˬ hpehꞈ ve hehˉ laˇ, Yaˬhoˉvaˬ lehˬ ka tiꞈ yeˬ leh cuˇ yiˍ cawˬ ve awˬ ceˬ htaꞈ leuˆ leh chi beuꞈ teˇ co˗e yawˇ ve kanˉ te ve chaw htaꞈ beˆ maˍ piˇ chehˇ ve awˬ tehˬ hpehꞈ ve laˇ, Yaˬhoˉvaˬ ve tawˇ hkawˇ awˬ tehˬ hpehꞈ ve tehꞈ ngaˬ hui yonˍ ve kʼo, Saˍtanˍ beˬ laˇ ve teˇ ceuˬ le le htaꞈ ngaˬ hui tawˍ daꞈ gʼaˇ tuˬ yoˬ. Ngaˬ hui ‘suh htaˇ hkʼa gaˬ Yaˬhoˉvaˬ ve awˬ liˇ tawˇ hkawˇ na yuˬ tuˬ dawˇ cheˆ taˍ peuˬ.’ (Chiˇ 119:112) Ngaˬ hui awˬ tehˬ ve awˬ lawn awˬ nu ve chaw htaꞈ kʼoˆ piˇ tuˬ “maˇ yaꞈ taw” leh yawˇ hui Liꞈ hpu hkʼaw ve awˬ liˇ awˬ hkʼaˇ a shaꞈ teꞈ kuiˬ hkʼaw yuˬ yehˇ tuˬ ga piˇ ve yoˬ. (Chiˇ 119:46) Ngaˬ hui shoꞈ shaꞈ ve leh fawˉ ve mehˍ ve gʼa hpuˇ hehnˇ jaˇ ve htawˇ yeunˇ hkanˍ gʼaˇ tuˬ yoˬ. Ngaˬ hui “ha lehˬ ha kʼa ve awˬ hkʼaw lo nyi ma yeˬ leh yeunˇ hkanˍ puiˉ tuˬ” yoˬ. (Kawˇ 1:11; Chiˇ 119:143, 157) Awˬ tehˬ ve lehˬ ngaˬ hui nyi ma gawˬ lehˍ cawˬ tuˬ te laˇ ve, dawˇ law kuiˬ cawˬ tuˬ te laˇ ve, leh ngaˬ hui a shaꞈ teꞈ kuiˬ hkʼaw hkʼaˬ hkʼe te tuˬ, Liꞈ hpu hkʼaw hkʼa tawˍ lehˆ beˆ maˍ laˇ taˍ ve yoˬ. Gʼuiˬ sha ve mvuhˇ miˬ uˉ peunˍ la htaˇ, ngaˬ hui ve a shaꞈ teꞈ hkʼaˇ chi teˇ hkui aꞈ kehˉ daꞈ tuˬ yoˬ tehꞈ Liꞈ hpu hkʼaw awˬ tehˬ ve ngaˬ hui dawˇ law kuiˬ cawˬ tuˬ te laˇ ve yoˬ. w23.01 7 ¶16-17

Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, awˬ laꞈ gʼawˇ awˬ pon yawˇ bon lawˬ ve yoˬ. Yeˍsuˆ yawˇ ve Awˬ pa geh yawˇ hui htaꞈ ‘haiˬ ve awˬ ceuˬ ponˬ piˇ tuˬ bon lawˬ ve yoˬ.’ (Yoˇ 17:15) Oˇ ve teˇ hkui Yeˍsuˆ lehˬ tuꞈ jaˇ hkanˍ jaˇ ve htaꞈ gʼa hpuˇ˗a tehꞈ te chehˇ ve teˇ yanˇ, yawˇ ve awˬ laꞈ gʼawˇ htaꞈ dawˇ haˍ jaˇ ve yoˬ. Awˬ lawn kʼo, Yeˍsuˆ yawˇ hui htaꞈ haꞈ jaˇ ve yoˬ. Ngaˬ hui a shu yawˇ awˬ pon ceh tiˉ maˇ gʼa dawˇ nyi tuˬ, Yeˍsuˆ htaꞈ henˇ yuˬ cawˇ ve yoˬ. Yaꞈ hkʼaˇ, awˬ viˉ awˬ nyi awˬ pon dawˇ nyi leh yawˇ hui htaꞈ hkʼaˬ htaˆ kaꞈ bon lawˬ piˇ cawˇ ve yoˬ. Ngaˬ hui chi hkʼe te ve kʼo, Yeˍsuˆ haꞈ daꞈ tehꞈ kʼoˆ laˇ ve tawˇ htaꞈ ngaˬ hui gʼaꞈ te chehˇ ve yoˬ. Awˬ viˉ awˬ nyi awˬ pon bon lawˬ piˇ ve lehˬ awˬ yanˇ shonˇ ve tehꞈ taˇ dawˇ. Yaꞈ hkʼaˇ, chi lehˬ yawˇ hui htaꞈ ga piˇ gʼa jaˇ. Awˬ lawn kʼo, Liꞈ hpu hkʼaw kʼoˆ ve, “hteˇ ve cawˇ ve chaw bon lawˬ ve lehˬ, kanˇ paˆ cawˬ jaˇ ve yoˬ.” (Yaˍ 5:16) Awˬ viˉ awˬ nyi lehˬ shoꞈ shaꞈ ve laiˉ ceuˬ gʼa hpuˇ ve pa taw, ngaˬ hui yawˇ hui awˬ pon bon lawˬ laˇ tcuh gaˇ ve yoˬ. w22.07 23-24 ¶13-15