Ha pa 1 maˬ

Mehˇ chawˇ ma chi teˇ gʼaˇ nyi ma luˬ jaˇ ve htaꞈ Yeˍsuˆ gʼa mawˬ ve pa taw, yawˇ ha kʼaˉ ve yoˬ. (Luˉ 7:13) Yaꞈ hkʼaˇ, Yeˍsuˆ ha kʼaˉ ve ceh tiˉ maˇ heˆ. Yawˇ hkʼaˬ hkʼe dawˇ ve htaꞈ kaꞈ Yeˍsuˆ na gʼa ve yoˬ. Yeˍsuˆ nyi ma nuˇ nehˬ ve hkʼaw yawˇ htaꞈ tawˇ yaw piˇ ve, “taˇ hawˬ” tehꞈ kʼoˆ piˇ ve yoˬ. Leh Yeˍsuˆ kaꞈ mehˇ chawˇ ma chi teˇ gʼaˇ htaꞈ ga piˇ ve yoˬ. Yeˍsuˆ lehˬ yawˇ ve yaˇ paˍ htaꞈ kʼawꞈ teꞈ tu la piˇ leh “awˬ e ve laꞈ hkʼaw lo yawˇ htaꞈ aꞈ piˇ ve yoˬ.” (Luˉ 7:14, 15) Yeˍsuˆ mehˇ chawˇ ma ve yaˇ paˍ htaꞈ kʼawꞈ teꞈ tu la piˇ ve awˬ lawn ngaˬ hui aˬ htoꞈ ma henˇ yuˬ gʼa ve le? Nyi ma luˬ chehˇ ve chaw htaꞈ ngaˬ hui ha kʼaˉ leh na gʼa piˇ cawˇ ve tehꞈ hpeuꞈ maw laˇ ve yoˬ. Yeˍsuˆ shu htaꞈ chaˬ nyi puiˉ ve htaꞈ ngaˬ hui henˇ yuˬ gʼa ve yoˬ. Chi hkʼoˆ kaꞈ, nyi ma luˬ chehˇ ve chaw htaꞈ ngaˬ hui awˉ lawˉ tawˇ yaw piˇ ve, maˇ heˆ leh teˇ ceuˬ ceuˬ ga piˇ tuˬ te ve leh awˬ gʼaˇ piˇ ve yoˬ. (Tawˇ 17:17; 2 Kawˇ 1:3, 4; 1 Peˍ 3:8) Hkʼa sha sha˗ehˬ ve tawˇ yaw piˇ ve, maˇ heˆ leh teˇ ceuˬ ceuˬ te piˇ ve kaꞈ yawˇ hui awˬ gʼaˇ gʼa jaˇ tuˬ te piˇ ve yoˬ hehˉ. w23.04 5-6 ¶13-15

Yawˇ haꞈ ve awˬ chawˇ Laˍzaˍruˆ suh˗oˬ ve shiˍ ve kaꞈ yawˇ oˇ kaˬ lo 2 nyi chehˇ sheˍ leh Beˍtaˍniˆ hkʼaˆ lo kʼai ve yoˬ. Chi htaꞈ pa taw Yeˍsuˆ Beˍtaˍniˆ hkʼaˆ lo gaˬ la htaˇ, Laˍzaˍruˆ suh˗e ve 4 nyi gaˬ˗oˬ ve yoˬ. Yawˇ chi hkʼe te ve lehˬ yawˇ ve awˬ chawˇ teˇ hpaˍ awˬ pon teˇ ceuˬ ceuˬ te leh Gʼuiˬ sha htaꞈ chiˇ uiˍ chiˇ mvuh tuˬ awˬ pon kaꞈ te tuˬ yawˇ dawˇ teh taˍ ve yoˬ. (Yoˇ 11:6, 11, 17) Awˬ lawn chi ve daꞈ ve awˬ chawˇ hkʼaˬ hkʼe hpehꞈ ve ngaˬ hui htaꞈ maˍ laˇ ve yoˬ. Maˍhtaˆ leh Maˍriˆ Yeˍsuˆ geh shu htaꞈ kʼai tcuh htaˇ, Yeˍsuˆ Beˍtaˍniˆ hkʼaˆ lo laˬ tuˬ maˇ kʼoˆ piˇ tcuh. Yawˇ haꞈ ve awˬ chawˇ naˬ jaˇ tehꞈ kʼoˆ piˇ tcuh ve yoˬ. (Yoˇ 11:3) Laˍzaˍruˆ suh˗oˬ htaˇ yawˇ htaꞈ kʼawꞈ teꞈ tu la piˇ tuˬ Yeˍsuˆ Beˍtaˍniˆ hkʼaˆ lo maˇ kʼai kaꞈ hpehꞈ ve yoˬ. Yeˍsuˆ oˇ kaˬ lo chehˇ leh Laˍzaˍruˆ htaꞈ kʼawꞈ teꞈ tu la piˇ kaꞈ gʼa ve yoˬ. Yaꞈ hkʼaˇ, Yeˍsuˆ oˇ kaˬ lo kʼai leh Maˍhtaˆ leh Maˍriˆ htaꞈ awˬ chawˇ te piˇ ve yoˬ. Nawˬ htaꞈ ga laˇ tuˬ maˇ lawˬ ve kaꞈ nawˬ htaꞈ ga laˇ gaˇ ve awˬ chawˇ cawˬ˗aw laˇ? Cawˬ ve kʼo, ‘ga laˇ tuˬ loˍ htaˇ’ yawˇ htaꞈ gʼaˇ va gʼa ve tehꞈ nawˬ shiˍ ve yoˬ. (Tawˇ 17:17) Ngaˬ hui Yeˍsuˆ htaꞈ henˇ yuˬ leh awˬ nu ve chaw htaꞈ daꞈ ve awˬ chawˇ hpehꞈ tuˬ te sheˍ. w23.04 10 ¶10-11

Shoꞈ shaꞈ ve gʼa hpuˇ ve awˬ yanˇ htaˇ, miˬ guiˬ awˬ suhˉ ve awˬ lawn Yaˬhoˉvaˬ ka tiꞈ te taˍ laˇ ve maw jaˇ sheˍ tehꞈ ngaˬ hui dawˇ la ve yoˬ hehˉ. Yaꞈ hkʼaˇ, chi ve lehˬ ngaˬ hui ve yonˍ hkʼaˇ awˬ gʼaˇ nuˇ ve tehꞈ kʼoˆ gaˇ ve laˇ? Maˇ heˆ. Tawˇ pa haˉ chi ve htaꞈ teˇ geh dawˇ nyi sheˍ. Mvuhˇ goˇ ve awˬ yanˇ laiˉ shinˉ haw jaˇ ve yoˬ. Aˬ htoꞈ ma te mvuhˇ yeˬ yanˇ haˆ haˆ maˇ gaˬ la ve le tehꞈ ngaˬ hui dawˇ ve yoˬ. Yaꞈ hkʼaˇ, maˇ maw maw kʼo, mvuhˇ yeˬ laˬ tuˬ yoˬ tehꞈ ngaˬ hui shiˍ ve yoˬ. Chi ve hkʼa shuˍ shuˍ ngaˬ hui shoꞈ shaꞈ ve gʼa hpuˇ leh awˬ gʼaˇ nuˇ jaˇ htaˇ, miˬ guiˬ awˬ suhˉ gaˬ la tuˬ maw jaˇ sheˍ tehꞈ ngaˬ hui dawˇ ve yoˬ. Aˬ htoꞈ ma te haˆ haˆ maˇ gaˬ la sheˍ ve le? Yaꞈ hkʼaˇ, ngaˬ hui ve yonˍ hkʼaˇ yonˍ yeˬ ve kʼo, Yaˬhoˉvaˬ ka tiꞈ te taˍ laˇ ve hkʼa peu˗eˬ awˬ tehˬ awˬ na hpehꞈ la tuˬ yoˬ tehꞈ ngaˬ hui shiˍ leh miˬ guiˬ awˬ suhˉ gaˬ la tuˬ kaꞈ ngaˬ hui shiˍ ve yoˬ. (Chiˇ 94:3, 14, 15; Heˍ 6:17-19) Ngaˬ hui chi hkʼe yonˍ ve kʼo, a shaꞈ teꞈ kuiˬ hkʼaw aˬ htoꞈ ma gʼa hpuˇ ve htawˇ maˇ kʼoˆ, Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ shawˍ ve yoˬ. Hto toˇ˗e htaˇ, ngaˬ hui ve yonˍ hkʼaˇ gʼa yonˍ yeˬ cawˇ ve yoˬ. Chaw laiˉ gʼaˇ miˬ guiˬ awˬ suhˉ ve awˬ lawn htaꞈ caˉ daꞈ ve “ha lehˬ ve bon hkawˇ” daꞈ jaˇ leh hpehꞈ kʼai maˇ gʼa taˬ tehꞈ dawˇ ve yoˬ. (Maꞈ 24:14; Ysk 33:32) Yawˇ hui dawˇ ve hkʼe ngaˬ hui maˇ gʼa dawˇ cawˇ ve yoˬ. Leh ngaˬ hui chi hkʼe te gʼa tuˬ, ngaˬ hui ve yonˍ hkʼaˇ yonˍ yeˬ tuˬ gʼa te cawˇ ve yoˬ. w23.04 27 ¶6-7; 30 ¶14

Nawˬ ve bon lawˬ hkawˇ htaꞈ Yaˬhoˉvaˬ maˇ hkʼawꞈ laˇ hehˉ tehꞈ nawˬ htawˇ dawˇ nawˬ dawˇ cawˬ˗aw laˇ? Cawˬ jaw ve kʼo chi hkʼe dawˇ ve nawˬ teˇ gʼaˇ tiˉ maˇ heˆ. Ngaˬ hui ve awˬ viˉ awˬ nyi laiˉ gʼaˇ tuꞈ ve hkanˍ ve gʼa hpuˇ htaˇ, nawˬ hkʼa shuˍ dawˇ ve yoˬ. Ngaˬ hui shoꞈ shaꞈ ve gʼa hpuˇ jaˇ ve kʼo, Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ tuˬ ve naˍ maˇ heˆ leh maˇ hkʼawꞈ laˇ tuˬ ve naˍ htawˇ dawˇ nawˬ dawˇ cawˬ ve yoˬ. Yaˬhoˉvaˬ yawˇ ve kanˉ te ve chaw ve bon lawˬ hkawˇ htaꞈ hkʼawꞈ piˇ ve tehꞈ ngaˬ hui hkʼaˬ hkʼe yonˍ gʼa tuˬ le? Yaˬhoˉvaˬ ngaˬ hui htaꞈ haꞈ jaˇ leh ngaˬ hui lehˬ, yawˇ awˬ pon awˬ hpfuhˇ hkʼaˆ jaˇ ve tehꞈ shawˍ ve, Liꞈ hpu hkʼaw ka tiꞈ te taˍ laˇ ve yoˬ. (Haˆ 2:7; 1 Yoˇ 4:10) Hkʼe te leh, ngaˬ hui yawˇ ga laˇ tuˬ yawˇ geh bon lawˬ tcuh gaˇ ve yoˬ. (1 Peˍ 5:6, 7) Chi hkʼoˆ kaꞈ, ngaˬ hui Yaˬhoˉvaˬ geh meuˆ daꞈ leh shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ kaꞈ yawˇ ga laˇ gaˇ ve yoˬ. Liꞈ hpu hkʼaw ngaˬ hui gʼa gʼaw ve, Yaˬhoˉvaˬ lehˬ yawˇ ve kanˉ te ve chaw ve bon lawˬ hkawˇ htaꞈ hkʼawꞈ piˇ ve yoˬ. Nawˬ a shu ve awˬ lawn htaꞈ dawˇ mawˬ ve le? w23.05 8-9 ¶1-4

Maˍriˆ kaꞈ Yaˬhoˉvaˬ geh meuˆ daꞈ ve yoˬ. Yawˇ ve awˬ hpawˇ yonˍ leh yonˍ ve ceh maˇ heˆ. Yaꞈ hkʼaˇ, yawˇ ve yonˍ hkʼaˇ kaꞈ yonˍ yeˬ jaˇ ve yoˬ. Maˍriˆ Liꞈ hpu hkʼaw hkʼa dehꞈ shiˍ ve yoˬ. Leh yawˇ Liꞈ hpu hkʼaw hkʼa dehꞈ dawˇ nyi ve yoˬ. (Luˉ 2:19, 51) Maˍriˆ Yaˬhoˉvaˬ geh hkʼa dehꞈ meuˆ daꞈ ve pa taw, daꞈ ve awˬ miˇ ma hpehꞈ tuˬ te piˇ ve yoˬ. Chi beuꞈ teˇ co˗e awˬ miˇ ma laiˉ gʼaˇ kaꞈ Maˍriˆ htaꞈ henˇ yuˬ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ Eh˗mi˗koꞈ kʼoˆ ve, “ngaˬ awˬ hpawˇ maˇ heuˆ sheˍ htaˇ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te ve yoˬ. Yaꞈ hkʼaˇ, ngaˬ awˬ hpawˇ heuˆ peuˬ hkʼawꞈ nawˉ ngaˬ ve awˬ hpawˇ bon lawˬ htaˇ leh yehˬ kʼa hkʼaw oˉ kʼoˍ pui htaˇ kaꞈ sheh kʼai ve yoˬ. Awˬ yanˇ maw la htaˇ, ngaˬ ve yonˍ hkʼaˇ yonˍ yeˬ tuˬ, maˇ heˆ leh maˇ yonˍ yeˬ tuˬ, ngaˬ ve awˬ hpawˇ htaꞈ cawˬ ve tehꞈ dawˇ la ve yoˬ. Hkʼe te leh, ngaˬ dawˇ ve Yaˬhoˉvaˬ geh meuˆ daꞈ tuˬ ve awˬ lawn ngaˬ hkʼaˇ ngaˬ gʼa te cawˇ ve yoˬ. Yaˬhoˉvaˬ geh bon lawˬ ve, Liꞈ hpu gʼaw ve, hkʼa dehꞈ dawˇ nyi ve leh hpfuhˆ nyi ve, chi ve teˇ hpaˍ htaꞈ te tuˬ awˬ yanˇ shawˍ teh ve yoˬ.” (Gaˍ 6:5) Awˬ miˇ ma hpehꞈ ve chaw˗oˬ, nawˬ Yaˬhoˉvaˬ geh hkʼa dehꞈ meuˆ daꞈ ve kʼo, nawˬ ve awˬ hpawˇ nawˬ htaꞈ haꞈ leh chiˇ mvuh tuˬ yoˬ.—Tawˇ 31:30. w23.05 22 ¶6

Chaw yaˇ paw la htaˇ kaꞈ Yaˬhoˉvaˬ htaꞈ kawˆ leh yawˆ yan ve maˇ heˆ ve pa taw, ngaˬ hui te hkʼaˇ dawˇ hkʼaˇ chi ve cawˬ tuˬ gʼa coˇ caˇ ve yoˬ. Hkʼe te leh, ngaˬ hui Yaˬhoˉvaˬ htaꞈ kawˆ leh yawˆ yan ve cawˬ tuˬ gʼa coˇ caˇ ve yoˬ. Ngaˬ hui Yaˬhoˉvaˬ htaꞈ yawˆ yan ve cawˬ tuˬ ga laˇ gʼa ve teˇ ceuˬ lehˬ, yawˇ hpanˍ taˍ ve awˬ ceuˬ htaꞈ chaˬ nyi ve yoˬ. Ngaˬ hui “Gʼuiˬ sha hpanˍ taˍ ve awˬ ceuˬ” gʼa mawˬ htaˇ, yawˇ cuˇ yiˍ cawˬ ve, kanˇ paˆ cawˬ ve, leh ngaˬ hui htaꞈ hkʼaˬ hkʼe taw haꞈ jaˇ ve mawˬ htaˇ, ngaˬ hui leuˉ leh yawˇ htaꞈ haꞈ jaˇ leh yawˆ yan ve yoˬ. (Roˉ 1:20) Ngaˬ hui Yaˬhoˉvaˬ htaꞈ kawˆ leh yawˆ yan tuˬ ga laˇ gʼa ve teˇ ceuˬ lehˬ hkʼaˬ htaˆ kaꞈ bon lawˬ ve yoˬ. Ngaˬ hui bon leuˉ leh lawˬ ve kʼo, yawˇ htaꞈ hkʼa dehꞈ shiˍ daꞈ ve yoˬ. Ngaˬ hui tuꞈ ve hkanˍ ve htaꞈ yeunˇ hkanˍ gʼaˇ tuˬ teˇ pawˆ le le Yaˬhoˉvaˬ ngaˬ hui htaꞈ awˬ gʼaˇ peꞈ laˇ tuˬ lawˬ ve yoˬ. Yawˇ kanˇ paˆ hkʼaˬ hkʼe taw cawˬ ve ngaˬ hui shiˍ tuˬ te laˇ ve yoˬ. Yaˬhoˉvaˬ yawˇ haꞈ jaˇ ve Yaˇ paˍ ngaˬ hui awˬ pon tanˇ laˇ ve awˬ bon uiˍ jaˇ tehꞈ kʼoˆ piˇ htaˇ, chi Yaˬhoˉvaˬ ngaˬ hui htaꞈ hkʼaˬ hkʼe taw haꞈ ve dawˇ nyi tuˬ te laˇ ve yoˬ. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ, Yaˬhoˉvaˬ geh lawˬ htaˇ yawˇ cuˇ yiˍ cawˬ jaˇ ve tehꞈ ngaˬ hui shiˍ tuˬ te laˇ ve yoˬ. Ngaˬ hui bon chi hkʼe te lawˬ htaˇ, Yaˬhoˉvaˬ htaꞈ leuˉ leh yawˆ yan tuˬ te laˇ leh ngaˬ hui Yaˬhoˉvaˬ geh meuˆ daꞈ ve htaꞈ maˇ te luˬ laˇ tuˬ dawˇ teh taˍ tuˬ kaꞈ te laˇ ve yoˬ. w23.06 15 ¶6-7

Yaˬhoˉvaˬ lehˬ awˬ liˇ awˬ hkʼaˇ teh tuˬ a hkaw˗anˬ cawˬ ve yoˬ. Leh yawˇ peꞈ laˇ ve awˬ liˇ awˬ hkʼaˇ lehˬ hkʼaˬ htaˆ kaꞈ yehˇ gʼa ve yoˬ. Tawˇ pa haˉ te kʼo, awˉ lawˉ peuˇ teˇ co˗e ve uˉ peunˍ ve kawˍmiˍtiˍ lehˬ, Hkriꞈ yaˇ gʼa yonˍ yeˬ cawˇ ve 3 ceuˬ htaꞈ kʼoˆ taˍ ve yoˬ. (1) Yaˬhoˉvaˬ htaꞈ ceh tiˉ oˉ kʼoˍ gʼa pui ve, (2) Awˬ suhˍ ve awˬ lawn htaꞈ yawˆ yan leh (3) Liꞈ hpu hkʼaw awˬ liˇ awˬ hkʼaˇ cawˇ ve hpawˇ hkʼaˬ htaˆ kaꞈ gʼa gʼaꞈ te ve yoˬ. (Tcuh 15:28, 29) Leh chi beuꞈ teˇ co˗e ve Hkriꞈ yaˇ awˬ lawn chi ve 3 ceuˬ htaꞈ hkʼaˬ hkʼe te yonˍ yeˬ gʼa tuˬ le? Yaˬhoˉvaˬ htaꞈ ceh tiˉ oˉ kʼoˍ gʼa pui leh gʼa na yuˬ ve yoˬ. Yaˬhoˉvaˬ lehˬ Iˉsaˍreˍlaˆ chaw yawˇ htaꞈ ceh tiˉ oˉ kʼoˍ pui tehꞈ kʼoˆ piˇ ve yoˬ. (Bon 5:6-10) Leh Saˍtanˍ Yeˍsuˆ htaꞈ beˬ piˇ lawˇ piˇ htaˇ, ngaˬ hui Yaˬhoˉvaˬ htaꞈ ceh tiˉ oˉ kʼoˍ gʼa pui ve tehꞈ Yeˍsuˆ hkʼa dehꞈ kʼoˆ laˇ taˍ ve yoˬ. (Maꞈ 4:8-10) Chi htaꞈ pa taw, ngaˬ hui shaˉ hoꞈ htaꞈ oˉ kʼoˍ maˇ pui leh chaw yaˇ htaꞈ kaꞈ oˉ kʼoˍ maˇ pui ve yoˬ. Tawˇ pa haˉ te kʼo, bon hpawˇ ve awˬ hoˉ teˇ hpaˍ, mvuhˇ miˬ kanˉ te paˍ, awˬ han te ve chaw, liꞈ hkawˇ kʼa ve chaw, maˇ heˆ leh enˍ daꞈ ve chaw, awˬ meh bvuhˬ ve chaw chi teˇ hpaˍ ngaˬ hui yawˆ yan leh Gʼuiˬ sha hkʼe shawnˍ leh oˉ kʼoˍ maˇ pui ve yoˬ. Ngaˬ hui ‘awˬ ceuˬ hkʼa peu˗eˬ htaꞈ hpanˍ shehˍ hpaˇ’ Gʼuiˬ sha htaꞈ ceh tiˉ oˉ kʼoˍ pui ve yoˬ.—Hpeuꞈ 4:11. w23.07 14-15 ¶3-4

Saˍtanˍ ve miˬ guiˬ hkʼoˆ lo haˉ chawˇ haˉ paˆ leh awˬ ku nyi ve awˬ han cawˬ maˇ jaˇ ve tehꞈ ngaˬ hui tawnˇ taˍ cawˇ ve yoˬ. (Efs 4:19) Hkʼe te leh, ngaˬ hui Yaˬhoˉvaˬ htaꞈ kawˆ leh yawˆ yan ve a yeˇ uiˍ jaˇ tehꞈ gʼa shawˍ leh maˇ daꞈ ve awˬ ceuˬ htaꞈ kaꞈ maˇ caˉ daꞈ cawˇ ve yoˬ. Tawˇ naˉ ve liꞈ kaˇ nanˉ uiˍ 9 hkʼaw yaˇ miˇ 2 gʼaˇ htaꞈ caˉ daꞈ ve awˬ lawn htaꞈ ngaˬ hui gʼaw gʼa ve yoˬ. Yaˇ miˇ teˇ gʼaˇ lehˬ cuˇ yiˍ cawˬ ve yoˬ. Leh awˬ nu ve yaˇ miˇ teˇ gʼaˇ lehˬ cuˇ yiˍ maˇ cawˬ ve yoˬ. Yaˇ miˇ 2 gʼaˇ ‘cuˇ yiˍ maˇ cawˬ ve chaw’ htaꞈ jehˬ piˇ chehˇ ve yoˬ. Yawˇ hui chaw chi teˇ hpaˍ htaꞈ kʼoˆ piˇ ve, ‘ngaˬ ve yehˬ hkʼaw loꞈ la leh caˇ tuˬ caˇ la˗o.’ (Tawˇ 9:1, 4-6) Yaꞈ hkʼaˇ, yaˇ miˇ chi 2 gʼaˇ jehˬ piˇ ve htaꞈ gʼaꞈ te ve chaw lehˬ peun daꞈ jaˇ ve yoˬ. ‘Cuˇ yiˍ maˇ cawˬ ve yaˇ miˇ’ jehˬ piˇ ve hkawˇ htaꞈ ngaˬ hui teˇ geh nyi sheˍ. (Tawˇ 9:13-18) Yawˇ maˇ dawˇ nyi puiˉ ve chaw htaꞈ “choˬ kaˬ laˬ˗oꞈ” tehꞈ jehˬ piˇ ve yoˬ. Yawˇ yawˇ hui htaꞈ yawˇ ve yehˬ lo caˇ tuˬ caˇ la tcuh gaˇ ve yoˬ. Yawˇ ve yehˬ lo kʼai ve chaw hkʼaˬ hkʼe hpehꞈ tuˬ le? Liꞈ hpu hkʼaw kʼoˆ ve, “yawˇ ve yehˬ hkʼaw loꞈ˗e ve chaw hkʼa peu˗eˬ suh kʼai peuˬ.” Oˇ kaˬ lo ngaˬ hui htaꞈ “heˍ yuˬ beˬ yuˬ gaˇ ve haiˬ ve yaˇ miˇ htaꞈ” shaˍ tiꞈ te˗o tehꞈ kʼoˆ laˇ ve yoˬ. Leh kʼawꞈ kʼoˆ sheˍ ve, “yawˇ ve yehˬ lo kʼai ve kʼo, suh kuiˬ lo nawˬ kʼai chehˇ ve yoˬ.” (Tawˇ 2:11-19) Chi hkʼoˆ kaꞈ, “haiˬ ve yaˇ miˇ” teˇ gʼaˇ “suh mvuhˇ miˬ lo shiˍ kʼai laˇ tuˬ” ve htaꞈ caˉ daꞈ ve Tawˇ naˉ ve liꞈ 5:3-10 hkʼaw shaˍ tiꞈ peꞈ laˇ sheˍ ve yoˬ. w23.06 22 ¶6-7

Nyi haꞈ shaˉ paˍ lehˬ awˬ hkʼaˇ ca puiˉ ve daꞈ ve henˇ yuˬ tuˬ gʼa hpehꞈ ve yoˬ. (1 Tiˆ 3:2, 3) Tawˇ pa haˉ te kʼo, yawˇ a ciˉ a shaꞈ maˇ ve pa taw, awˬ nu ve nyi haꞈ shaˉ paˍ yawˇ dawˇ ve hkʼe dawˇ tuˬ maˇ te piˇ cawˇ. Yaˬhoˉvaˬ daꞈ kehˬ ve awˬ ha hpu htaꞈ cuˇ leh nyi haꞈ shaˉ paˍ awˬ moˍ hkʼaw hpawnˬ daꞈ htaˇ, cuˇ yiˍ cawˬ ve hkʼaw dawˇ cheˆ gʼa tuˬ, nyi haꞈ shaˉ paˍ hkʼaˬ ve teˇ gʼaˇ htaꞈ cuˇ leh daꞈ ve tawˇ kʼoˆ tcuh kaꞈ gʼa ve tehꞈ, ngaˬ hui tawnˇ taˍ cawˇ ve yoˬ. Nyi haꞈ shaˉ paˍ awˬ moˍ hkʼaw awˬ lawn teˇ lawn htaꞈ dawˇ cheˆ htaˇ, Liꞈ hpu hkʼaw ve awˬ liˇ awˬ hkʼaˇ htaꞈ maˇ yaꞈ ve kʼo haꞈ yuˬ ve yoˬ. Dawˇ cheˆ ve chi htaꞈ yawˇ hkʼa dehꞈ maˇ dawˇ cawˇ ve htawˇ, nyi haꞈ shaˉ paˍ awˬ hkʼaˇ ca puiˉ ve kʼo, dawˇ cheˆ ve oˇ ve htaꞈ haꞈ yuˬ ve yoˬ. Ngaˬ hui awˬ hkʼaˇ ca puiˉ ve chaw hpehꞈ ve kʼo awˬ bon laiˉ ceuˬ gʼa tuˬ yoˬ. Ngaˬ hui awˬ viˉ awˬ nyi geh hkʼa dehꞈ meuˆ daꞈ ve kʼo, Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ yoˬ. Chi hkʼoˆ kaꞈ, ngaˬ hui lehˬ awˬ viˉ awˬ nyi chaw liˇ vaˇ liˇ leh te hkʼaˇ dawˇ hkʼaˇ maˇ shuˍ daꞈ ve chaw geh Yaˬhoˉvaˬ htaꞈ oˉ kʼoˍ teˇ geh gʼa pui ve ha lehˬ jaˇ. A yeˇ uiˍ jaˇ ve lehˬ, ngaˬ hui Yaˬhoˉvaˬ awˬ hkʼaˇ ca puiˉ ve Gʼuiˬ sha htaꞈ henˇ yuˬ chehˇ ve tehꞈ, gʼa shiˍ ve ha lehˬ jaˇ. w23.07 25 ¶16-17

Daˍyeˍlaˆ tcuh kaˍ paˍ ve tawˇ hkawˇ htaꞈ henˇ ve lehˬ, cawˇ ve awˬ hkʼaˇ cawˬ ve yoˬ. Chi ve lehˬ Liꞈ hpu hkʼaw yawˇ awˬ tehˬ shiˍ gaˇ ve yoˬ. Chi hkʼoˆ kaꞈ, Daˍyeˍlaˆ nyi ma nuˇ nehˬ sheˍ ve yoˬ. Yaˬhoˉvaˬ teˇ gʼaˇ ceh tiˉ Daˍyeˍlaˆ shiˍ gaˇ ve htaꞈ ga laˇ gʼa leh, a shaꞈ teꞈ kuiˬ hkʼaw yawˇ ve awˬ liˇ awˬ hkʼaˇ htaꞈ yuˬ yehˇ leh tcuh kaˍ paˍ ve tawˇ hkawˇ na gʼa tuˬ, yawˇ teˇ gʼaˇ ceh tiˉ ga laˇ gʼa ve tehꞈ Daˍyeˍlaˆ kʼoˆ ve yoˬ. (Daˍ 2:27, 28) Daˍyeˍlaˆ nyi ma nuˇ nehˬ ve tehꞈ hpeuꞈ maw laˇ ve lehˬ, Yaˬhoˉvaˬ ga laˇ tuˬ lawˬ ve yoˬ. (Daˍ 2:18) Chi hkʼe ceh tiˉ maˇ heˆ. Daˍyeˍlaˆ lehˬ tcuh kaˍ paˍ ve tawˇ hkawˇ htaꞈ hkʼa dehꞈ henˇ leh hpfuhˆ nyi ve yoˬ. Yawˇ ve awˬ co˗e htaˇ, Liꞈ hpu cawˬ taˍ ve htaꞈ hkʼa dehꞈ hpfuhˆ nyi ve yoˬ. (Yrm 25:11, 12; Daˍ 9:2) Nawˬ Daˍyeˍlaˆ htaꞈ hkʼaˬ hkʼe te henˇ yuˬ gʼa tuˬ le? Liꞈ hpu hkʼaw tcuh kaˍ paˍ ve tawˇ hkawˇ nawˬ henˇ ve aˬ htoꞈ ma pa taw le dawˇ nyi sheˍ. Nawˬ henˇ ve awˬ tehˬ ve htaꞈ shiˍ gaˇ ve pa taw laˇ? Awˬ tehˬ ve htaꞈ shiˍ gaˇ ve kʼo, Yaˬhoˉvaˬ nawˬ htaꞈ ga laˇ tuˬ yoˬ. (Yoˇ 4:23, 24; 14:16, 17) Chaw teˇ hpaˍ kʼo, aˬ htoꞈ ma cawˇ ve, maˇ cawˇ ve, yawˇ hui hkʼaˇ yawˇ hui dawˇ cheˆ gʼa tuˬ, leh yawˇ hui te gaˇ ve hkʼe te gʼa tuˬ, Liꞈ hpu lehˬ Gʼuiˬ sha geh laˬ ve awˬ ceuˬ hpehꞈ ve maˇ heˆ tehꞈ, yawˇ hui shaˉ hkiˆ ca gaˇ ve yoˬ. Yaꞈ hkʼaˇ, ngaˬ hui yawˇ hui hkʼe maˇ hpehꞈ. Ngaˬ hui tcuh kaˍ paˍ ve tawˇ hkawˇ htaꞈ henˇ ve lehˬ, cawˇ ve awˬ hkʼaˇ htaꞈ pa taw yoˬ. w23.08 9-10 ¶7-8

Ngaˬ hui lehˬ awˬ nu ve chaw htaꞈ tehˆ daꞈ ve kʼo, a shu yawˇ awˬ to htaꞈ dawˇ law jaˇ leh, chi ve lehˬ ngaˬ hui awˬ pon hehnˇ jaˇ ve awˬ ceuˬ hpehꞈ la ve yoˬ. (Gaˍ 6:4) Ngaˬ hui chi hkʼe te ve kʼo, hkawehˉ leh enˍ daꞈ gaˇ la ve yoˬ. (Gaˍ 5:26) A shu yawˇ awˬ to te maˇ gʼa ve kaꞈ awˬ nu ve chaw htaꞈ tehˆ daꞈ leh te gʼa tuˬ nyiˉ te ve yoˬ. Chi ve a shu yawˇ awˬ to htaꞈ heuˆ la kuiˬ cawˬ ve yoˬ. Liꞈ hpu hkʼaw kʼoˆ ve, “dawˇ law tuˬ mehˉ kʼai ve kʼo, nyi ma htawˇ luˬ kʼai ve yoˬ.” A shu yawˇ awˬ to te maˇ gʼa ve htaꞈ te gʼa tuˬ dawˇ law jaˇ ve kʼo, leuˉ leh nyi ma htawˇ luˬ kʼai tuˬ yoˬ. (Tawˇ 13:12) Chi ve ngaˬ hui awˬ gʼaˇ nuˇ tuˬ te laˇ leh a shaꞈ gʼa tuˬ awˬ pon hkʼa dehꞈ gʼuiˇ maˇ gʼa. Yaˬhoˉvaˬ loˍ ve aꞈ kehˉ a shu yawˇ awˬ to htaꞈ taˇ dawˇ law jaˇ. Nawˬ te maˇ gʼa ve awˬ leuˉ Yaˬhoˉvaˬ maˇ dawˇ law. (2 Kawˇ 8:12) Nawˬ awˬ to awˬ nu ve chaw htaꞈ Yaˬhoˉvaˬ maˇ tehˆ daꞈ ve tehꞈ yonˍ sheˍ. (Maꞈ 25:20-23) Nawˬ nyi ma awˬ tawˬ hkʼa gaˬ yawˇ ve kanˉ te ve, nawˬ ka tiꞈ yeˬ ve, leh nawˬ yeunˇ hkanˍ ve htaꞈ Gʼuiˬ sha awˬ hpfuhˇ shiˍ ve yoˬ. w23.08 29 ¶10-11

Sanˍsonˍ bon lawˬ ve htaꞈ Yaˬhoˉvaˬ hkʼawꞈ piˇ ve lehˬ, anˇ tuˬ te leh lawˬ hkʼoꞈ hkʼaw iˉ kaˆ tawˆ la tcuh piˇ ve pa taw, Sanˍsonˍ iˉ kaˆ gʼa dawˬ ve yoˬ. Hkʼe te leh, yawˇ “awˬ gʼaˇ kʼawꞈ cawˬ la ve yoˬ.” (Suhˉ 15:19) Tcuh kaˍ paˍ Saˍmo˗eˍlaˆ htaꞈ dawˇ pawnˍ piˇ leh Suhˉ jehˬ ve liꞈ bvuhꞈ tcuh htaˇ kaꞈ iˉ kaˆ tawˆ la kuiˬ lawˬ hkʼoꞈ oˇ ve laiˉ hkʼawꞈ cawˬ sheˍ ve yoˬ hehˉ. Teˇ pawˆ le le lawˬ hkʼoꞈ oˇ ve hkʼaw iˉ kaˆ tawˆ la ve htaꞈ Iˉsaˍreˍlaˆ chaw gʼa mawˬ leh ga laˇ tuˬ loˍ htaˇ, yawˇ hui Yaˬhoˉvaˬ htaꞈ hkʼaˬ htaˆ kaꞈ gʼaˇ va gʼa ve tehꞈ shaˍ tiꞈ piˇ ve yoˬ. Ngaˬ hui kaꞈ hkʼa shuˍ shuˍ, ngaˬ hui te puiˉ te hpehꞈ ve hkʼaˬ hkʼe taw cawˬ ve, maˇ heˆ leh ngaˬ hui Gʼuiˬ sha ve kanˉ hkʼa dehꞈ te gʼa˗oˬ ve htawˇ, ngaˬ hui Yaˬhoˉvaˬ ga laˇ tcuh sheˍ ve yoˬ. Ngaˬ hui Gʼuiˬ sha ve kanˉ hkʼa dehꞈ te gʼa ve lehˬ, yawˇ htaꞈ gʼaˇ va leh nyi ma nuˇ nehˬ ve hkʼaw gʼa haꞈ yuˬ ve yoˬ. Yaˬhoˉvaˬ Sanˍsonˍ htaꞈ iˉ kaˆ taw piˇ leh awˬ gʼaˇ cawˬ la ve hkʼa shuˍ, ngaˬ hui yonˍ yeˬ ve hkʼaw caˉ leh ka tiꞈ yeˬ gaˇ ve kʼo, Yaˬhoˉvaˬ gu teh taˍ laˇ ve awˬ ceuˬ teˇ hpaˍ htaꞈ ngaˬ hui gʼa haꞈ yuˬ cawˇ ve yoˬ.—Maꞈ 11:28. w23.09 4 ¶8-10

Ngaˬ hui nyi ma zuhˆ tuˬ te laˇ ve chaw htaꞈ gʼa mawˬ daꞈ ve kʼo, hkʼaˬ hkʼe te tuˬ ve le? Tawˇ pa haˉ te kʼo, Yaˬhoˉvaˬ maˇ heˆ leh Liꞈ hpu htaꞈ caˉ daꞈ ve shu maˇ daꞈ ve kʼoˆ laˇ htaˇ, Yaˬhoˉvaˬ geh daꞈ kehˬ ve awˬ ha hpu lawˬ leh chi hkʼe ve awˬ yanˇ htaˇ, nyi ma nuˇ nehˬ ve tehꞈ hpeuꞈ maw piˇ tuˬ yawˇ geh cuˇ yiˍ lawˬ sheˍ. Ngaˬ hui maˇ te cawˇ ve awˬ hkʼaˇ oˇ ve teˇ gʼaˇ htaꞈ te hkʼawꞈ piˇ ve kʼo, hkʼaˬ hkʼe te tuˬ le? Ngaˬ hui bon teˇ pawˆ kʼawꞈ lawˬ leh awˬ gʼuˇ suhˍ teˇ pawˆ yawˇ htaꞈ chi aꞈ kehˉ daꞈ ve te piˇ gʼa tuˬ, dawˇ nyi sheˍ. Ngaˬ hui ve te hkʼaˇ dawˇ hkʼaˇ htaꞈ yuˬ tiˍ gʼaˇ leh nyi ma nuˇ nehˬ ve tehꞈ hpeuꞈ maw piˇ tuˬ, Yaˬhoˉvaˬ daꞈ kehˬ ve awˬ ha hpu ngaˬ hui htaꞈ peꞈ laˇ gʼa ve tehꞈ yonˍ gʼa ve yoˬ. Ngaˬ hui nyi ma zuhˆ tuˬ te laˇ htaˇ, Liꞈ hpu teˇ tawn tawn ngaˬ hui ve tawˇ hkawˇ htaꞈ yuˬ tiˍ gʼaˇ tuˬ ga laˇ gʼa ve yoˬ. Leh Liꞈ hpu awˬ tawn chi ve htaꞈ tawnˇ gʼa tuˬ, Yaˬhoˉvaˬ ve daꞈ kehˬ ve awˬ ha hpu ngaˬ hui htaꞈ ga laˇ gʼa ve yoˬ. (Yoˇ 14:26) Tawˇ pa haˉ te kʼo, Tawˇ naˉ ve liꞈ hkʼaw awˬ liˇ awˬ hkʼaˇ teˇ tawn tawn htaꞈ ngaˬ hui gʼaw ve kʼo, nyi ma nuˇ nehˬ ve chaw hpehꞈ tuˬ ga laˇ gʼa ve yoˬ. (Tawˇ 15:18) Chi hkʼoˆ kaꞈ, nyiˉ laˇ ve gʼa hpuˇ htaˇ, a shu yawˇ awˬ to htaꞈ yuˬ tiˍ gʼaˇ tuˬ, Tawˇ naˉ ve liꞈ awˬ nu ve awˬ tawn hkʼaw awˬ bon cawˬ ve htaꞈ kʼoˆ taˍ sheˍ ve yoˬ.—Tawˇ 10:19; 17:27; 21:23; 25:15. w23.09 15-16 ¶6-7

Peˍtruˆ maˇ maw kʼo, yawˇ gʼa suh˗e tuˬ ve htaꞈ shiˍ ve yoˬ. Peˍtruˆ Gʼuiˬ sha ve kanˉ ka tiꞈ yeˬ ve hkʼaw laiˉ hkʼawꞈ te ve yoˬ. Yawˇ Yeˍsuˆ geh teˇ geh bon gʼa maˍ ve, buiˇ shaˆ aˉ naˆ chaw htaꞈ bon maˍ piˇ leh uˉ peunˍ ve kawˍmiˍtiˍ hkʼaw kaꞈ teˇ gʼaˇ hpehꞈ ve yoˬ. Chi hkʼe ceh tiˉ maˇ heˆ. Peˍtruˆ maˇ suh sheˍ htaˇ, Yaˬhoˉvaˬ Peˍtruˆ htaꞈ kanˉ kʼawꞈ piˇ ve yoˬ. Aˬ laˬ hkʼe 62-64 hkʼawꞈ C.E. htaˇ, Gʼuiˬ sha ve awˬ ha hpu Peˍtruˆ htaꞈ dawˇ pawnˍ piˇ leh 1 Peˍtruˆ liꞈ leh 2 Peˍtruˆ liꞈ bvuhꞈ tcuh ve yoˬ. (2 Peˍ 1:13-15) Yonˍ hkʼaˇ hkʼa shuˍ ve awˬ chawˇ ‘tuꞈ ve hkanˍ ve leh lawˇ nyi piˇ ve laiˉ ceuˬ htaꞈ gʼa hpuˇ’ chehˇ htaˇ, Peˍtruˆ yawˇ ve liꞈ yawˇ bvuhꞈ ve yoˬ. (1 Peˍ 1:6) Haiˬ ve chaw lehˬ, Hkriꞈ yaˇ awˬ moˍ hkʼaw ve chaw htaꞈ maˇ heˆ heˆ ve awˬ lawn maˍ piˇ leh, Hkriꞈ yaˇ Gʼuiˬ sha mehˆ gʼuˇ suhˍ lo maˇ daꞈ ve awˬ ceuˬ htaꞈ te tuˬ kaꞈ jehˬ piˇ ve yoˬ. (2 Peˍ 2:1, 2, 14) Chi hkʼoˆ kaꞈ, maˇ maw ve awˬ yanˇ hkʼaw Yeˍruˆsaˍlehnˍ venˇ lo chehˇ ve Hkriꞈ yaˇ “awˬ ceuˬ hkʼa peu˗eˬ ve lehˬ, awˬ leh meuˇ gaˬ la paˇ neˇ” ve htaꞈ gʼa hpuˇ tuˬ yoˬ. Chi ve lehˬ Roˉmaꞈ ve maꞈ yaˇ Yeˍruˆsaˍlehnˍ venˇ leh bon yehˬ lonˉ htaꞈ kaꞈ te luˬ ve yoˬ. (1 Peˍ 4:7) Oˇ ve teˇ yanˇ ve Hkriꞈ yaˇ tuꞈ ve hkanˍ ve htaꞈ yeunˇ hkanˍ gʼaˇ tuˬ, yawˇ hui aˬ htoꞈ ma gʼa te cawˇ ve htaꞈ shiˍ leh awˬ gʼuˇ suhˍ hpawˇ tuꞈ ve hkanˍ ve gʼa hpuˇ htaˇ gu hehnˇ taˍ gʼa tuˬ, hkʼaˬ hkʼe gʼa te cawˇ ve htaꞈ shiˍ tuˬ, Peˍtruˆ ve liꞈ yawˇ hui htaꞈ ga piˇ ve yoˬ hehˉ. w23.09 26 ¶1-2

Yeˍsuˆ hkʼa shuˍ shuˍ, teˇ pawˆ pawˆ ngaˬ hui tuꞈ ve hkanˍ ve gʼa hpuˇ htaˇ, na yuˬ tuˬ shiˍ la ve yoˬ. Tawˇ pa haˉ te kʼo, a naˍ 19 ve awˬ yanˇ htaˇ, ngaˬ hui hpawnˬ daꞈ kuiˬ yehˬ lo maˇ hpawnˬ daꞈ˗e ve, leh teˇ yehˬ peuˬ teˇ yehˬ maˇ hto toˇ˗e tuˬ beˆ maˍ laˇ ve yoˬ. Beˆ maˍ laˇ ve chi htaꞈ nawˬ gʼaꞈ te tuˬ haˍ jaˇ tehꞈ dawˇ˗aw laˇ? Haˍ jaˇ tehꞈ dawˇ ve htawˇ, na yuˬ ve lehˬ nawˬ htaꞈ haꞈ shaˉ laˇ leh, awˬ viˉ awˬ nyi geh teˇ moˍ tiˉ hpehꞈ leh, Yaˬhoˉvaˬ ha lehˬ tuˬ kaꞈ te piˇ ve yoˬ. Tuꞈ jaˇ hkanˍ jaˇ ve awˬ yanˇ htaˇ chi ve hkʼa peu˗eˬ beˆ maˍ laˇ ve htaꞈ ngaˬ hui na yuˬ puiˉ ve chaw hpehꞈ tuˬ ga laˇ ve yoˬ. Beˆ maˍ laˇ ve htaꞈ na yuˬ ve chi ngaˬ hui a shaꞈ kaꞈ gʼa ponˬ tuˬ ga laˇ ve yoˬ. (Yb 36:11) A yeˇ uiˍ jaˇ ve lehˬ ngaˬ hui Yaˬhoˉvaˬ htaꞈ haꞈ leh yawˇ nyi hkʼaˇ suh tuˬ te piˇ gaˇ ve pa taw na yuˬ ve yoˬ. (1 Yoˇ 5:3) Yaˬhoˉvaˬ ngaˬ hui awˬ pon te laˇ ve teˇ ceuˬ le le htaꞈ ngaˬ hui te hkʼawꞈ piˇ maˇ gʼa. (Chiˇ 116:12) Yaꞈ hkʼaˇ, ngaˬ hui yawˇ ve hkawˇ na yuˬ leh kanˇ paˆ cawˬ ve chaw hkawˇ kaꞈ gʼa na yuˬ ve yoˬ. Ngaˬ hui na yuˬ ve kʼo, cuˇ yiˍ cawˬ ve chaw hpehꞈ ve tehꞈ hpeuꞈ maw piˇ leh cuˇ yiˍ cawˬ ve chaw lehˬ Yaˬhoˉvaˬ ha lehˬ tuˬ te piˇ ve yoˬ.—Tawˇ 27:11. w23.10 11 ¶18-19

Mvuhˇ naw ma tcuh yaˇ nawˬ htaꞈ tawˇ yaw laˇ ve kʼo, yawˇ kʼoˆ ve awˬ ceuˬ htaꞈ nawˬ na˗aw laˇ? Chi beuꞈ teˇ co˗e mvuhˇ naw ma tcuh yaˇ “mvuhˇ miˬ teˇ peˆ le le htaꞈ maˇ kʼoˆ, awˬ ceuˬ awˬ hkʼaˇ teˇ ceuˬ le le htaꞈ maˇ kʼoˆ, tawˇ hkawˇ teˇ ceuˬ le le htaꞈ maˇ kʼoˆ, chaw ceuˬ teˇ ceuˬ le le htaꞈ maˇ kʼoˆ” kʼoˆ piˇ chehˇ ve yoˬ. Leh yawˇ aˬ htoꞈ ma kʼoˆ chehˇ ve le? Yawˇ kʼoˆ ve, ‘Gʼuiˬ sha htaꞈ kawˆ leh yawˇ htaꞈ chiˇ uiˍ chiˇ mvuh piˇ˗oˆ. Mvuhˇ naw ma miˬ naˆ ma te hpanˍ shehˍ hpaˇ htaꞈ oˉ kʼoˍ pui˗o.’ (Hpeuꞈ 14:6, 7) Yaˬhoˉvaˬ lehˬ chaw yaˇ teˇ gʼaˇ le le oˉ kʼoˍ pui keunˍ ve Gʼuiˬ sha hpehꞈ ve yoˬ. Co ha hpawˇ ve Yaˬhoˉvaˬ ve bon yehˬ lonˉ hkʼaw ngaˬ hui yawˇ htaꞈ oˉ kʼoˍ gʼa pui ve awˬ bon uiˍ jaˇ tehꞈ kʼoˆ piˇ gaˇ ve yoˬ. Co ha hpawˇ ve bon yehˬ lonˉ aˬ htoꞈ ma htaꞈ kʼoˆ gaˇ ve le? Chi htaꞈ caˉ daꞈ ve kʼoˆ maˍ laˇ tuˬ ve awˬ lawn ngaˬ hui hkʼaˬ kaˬ lo ca gʼa ve le? Co ha hpawˇ ve bon yehˬ lonˉ lehˬ miˬ guiˬ hkʼoˆ lo cawˬ ve yehˬ htaꞈ kʼoˆ gaˇ ve maˇ heˆ. Ngaˬ hui cawˇ ve hkʼaw Yaˬhoˉvaˬ htaꞈ oˉ kʼoˍ pui tuˬ, Yeˍsuˆ htaiˍ hkʼawꞈ laˇ ve Yaˬhoˉvaˬ gu teh taˍ laˇ ve htaꞈ kʼoˆ gaˇ ve yoˬ. Tcuh yaˇ Pawˇluꞈ awˬ lawn chi htaꞈ caˉ daꞈ ve Heˍbrehˇ chaw Hkriꞈ yaˇ Yuˇdaꞈ mvuhˇ miˬ hkʼaw chehˇ taˍ ve htaꞈ liꞈ bvuhꞈ piˇ ve yoˬ. w23.10 24 ¶1-2

522 hkʼawꞈ B.C.E. htaˇ, Yuˇdaꞈ chaw ve canˇ paˍ Paˇshaˇ uˉ peunˍ ve htaꞈ kʼoˆ piˇ leh Yuˇdaꞈ chaw Yaˬhoˉvaˬ ve bon yehˬ maˇ gʼa te tuˬ tawˇ piˇ tcuh htaˇ, yawˇ hui tawˍ piˇ gʼa ve yoˬ. Yaꞈ hkʼaˇ, tcuh kaˍ paˍ Zaˍhkaˍriˆ Yuˇdaꞈ chaw htaꞈ ka tiꞈ te piˇ ve, Yaˬhoˉvaˬ yawˇ ve kanˇ paˆ htaꞈ cuˇ leh tawˍ ve tsuhˇ ve hkʼa peu˗eˬ htaꞈ gu laˇ tuˬ yoˬ. 520 hkʼawꞈ B.C.E. htaˇ, jawˇ mawˇ Daˍriˆ lehˬ bon yehˬ lonˉ kʼawꞈ te tuˬ tawˇ piˇ ve yoˬ. Bon yehˬ lonˉ chi te tuˬ awˬ pon yawˇ hpu tanˇ piˇ leh yawˇ ve awˬ hoˉ awˬ naˬ Yuˇdaꞈ chaw htaꞈ ga piˇ tuˬ kaꞈ tawˇ piˇ ve yoˬ. (Ezr 6:1, 6-10) Yaˬhoˉvaˬ Yuˇdaꞈ chaw htaꞈ ka tiꞈ te piˇ ve yoˬ. Yawˇ hui Yaˬhoˉvaˬ ve bon yehˬ lonˉ te tuˬ a yeˇ uiˍ jaˇ tehꞈ shawˍ ve kʼo, yawˇ yawˇ hui htaꞈ ga piˇ tuˬ yoˬ. (Haˆ 1:8, 13, 14; Zaˍ 1:3, 16) Yuˇdaꞈ chaw chi teˇ hpaˍ tcuh kaˍ paˍ hui geh awˬ gʼaˇ gʼa jaˇ ve yoˬ. Hkʼe te leh, yawˇ hui 520 hkʼawꞈ B.C.E. htaˇ bon yehˬ lonˉ kʼawꞈ tanˬ te ve yoˬ. Leh 5 hkʼawꞈ maˇ gaˬ sheˍ htaˇ kaꞈ bon yehˬ lonˉ chi te peuˬ ve yoˬ. Yuˇdaꞈ chaw maˇ dawˇ maˇ gaˇ ve leh tuꞈ ve hkanˍ ve gʼa hpuˇ ve htawˇ, Yaˬhoˉvaˬ ve a loˍ yawˇ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. Yaˬhoˉvaˬ yawˇ hui htaꞈ ga piˇ ve yoˬ. Hkʼe te leh, yawˇ hui ha lehˬ ha kʼa ve hkʼaw Yaˬhoˉvaˬ htaꞈ oˉ kʼoˍ pui ve yoˬ.—Ezr 6:14-16, 22. w23.11 15-16 ¶6-7

Chaw laiˉ gʼaˇ Aˍbraˍhanˍ ve awˬ meh htaꞈ gʼa kaˇ jaw ve yoˬ. Yaꞈ hkʼaˇ, awˬ tehˬ kʼo yawˇ a shu hpehꞈ ve maˇ shiˍ. Nawˬ Aˍbraˍhanˍ htaꞈ caˉ daꞈ ve laiˉ ceuˬ shiˍ ve yoˬ. Tawˇ pa haˉ te kʼo, Liꞈ hpu hkʼaw yawˇ htaꞈ ‘yonˍ ve chaw hkʼa peu˗eˬ ve awˬ pa hpehꞈ ve yoˬ’ tehꞈ kʼoˆ ve yoˬ. (Roˉ 4:11) Chi hkʼe hpehꞈ ve htawˇ nawˬ htawˇ dawˇ nawˬ dawˇ cawˬ ve, ‘ngaˬ Aˍbraˍhanˍ htaꞈ henˇ yuˬ leh yawˇ hkʼe leˇ yonˍ yeˬ ve cawˬ˗aw laˇ?’ Cawˬ gʼa ve yoˬ. Ngaˬ hui Aˍbraˍhanˍ hkʼa shuˍ yonˍ yeˬ ve cawˬ gʼa tuˬ ve teˇ hkʼaˇ lehˬ, yawˇ ve awˬ lawn htaꞈ henˇ ve yoˬ. Yaˬhoˉvaˬ Aˍbraˍhanˍ htaꞈ aˬ htoꞈ ma te tcuh ve kʼo, yawˇ te ve yoˬ. Tawˇ pa haˉ te kʼo, yawˇ ve chehˇ kuiˬ htaꞈ baˬ taˉ leh vuiˇ jaˇ kuiˬ lo gʼa hpaw˗e ve yoˬ. Yawˇ hui aˉ po kʼo hkʼaw laiˉ chi hkʼawꞈ gʼa chehˇ ve yoˬ. Yawˇ haꞈ jaˇ ve yaˇ paˍ Iˉcaˆ Yaˬhoˉvaˬ htaꞈ tuˉ tanˇ laˇ tuˬ kʼoˆ piˇ htaˇ yawˇ te ve yoˬ. Chi ve hkʼa peu˗eˬ Aˍbraˍhanˍ yonˍ ve tehꞈ hpeuꞈ maw piˇ leh, yawˇ yonˍ ve hkʼe gʼaꞈ te ve yoˬ. Chi ve yawˇ Yaˬhoˉvaˬ haꞈ yuˬ laˇ ve chaw hpehꞈ tuˬ te piˇ leh Gʼuiˬ sha yawˇ htaꞈ nyi hkʼaˇ suh jaˇ ve yoˬ. (Yaˍ 2:22, 23) Yaˬhoˉvaˬ lehˬ ngaˬ hui teˇ gʼaˇ le le leh nawˬ htaꞈ kaꞈ Aˍbraˍhanˍ hkʼa shuˍ, awˬ bon gʼa tcuh gaˇ ve yoˬ. Hkʼe te leh, Yaˬhoˉvaˬ Pawˇluꞈ leh Yaˍkoˆ htaꞈ dawˇ pawnˍ piˇ leh Aˍbraˍhanˍ ve awˬ lawn htaꞈ bvuhꞈ tcuh ve yoˬ. w23.12 2 ¶1-2

Awˬ viˉ awˬ nyi yaˇ miˇ teˇ hpaˍ˗oˬ, shu tawˇ yaw ve htaꞈ hkʼa dehꞈ na sheˍ. Chi ve lehˬ Hkriꞈ yaˇ awˬ pon a yeˇ uiˍ jaˇ. Awˬ lawn chi ve htaꞈ caˉ daꞈ ve awˬ na hpawˇ lo ve Liꞈ hpu awˬ tawn hkʼaw Yaˍkoˆ beˆ maˍ laˇ ve yoˬ. Nawˬ shu tawˇ yaw ve htaꞈ hkʼa dehꞈ na taˍ ve kʼo nawˬ yawˇ htaꞈ “ha kʼaˉ” ve tehꞈ hpeuꞈ maw piˇ chehˇ ve yoˬ. (1 Peˍ 3:8) Nawˬ shu tawˇ yaw laˇ ve htaꞈ hkʼa dehꞈ maˇ na gʼa ve tehꞈ shiˍ ve kʼo, yawˇ htaꞈ kʼawꞈ na nyi piˇ sheˍ. Nawˬ na gʼa peuˬ hkʼawꞈ nawˉ, nawˬ tawˇ maˇ yaw sheˍ htaˇ a ciˉ dawˇ nyi sheˍ. (Tawˇ 15:28) Nawˬ a shu yawˇ awˬ to htaꞈ na nyi cawˇ ve, ‘ngaˬ tawˇ yaw ve awˬ ceuˬ awˬ tehˬ hpehꞈ leh yawˇ nyi ma sha tuˬ te piˇ˗aw laˇ? Ngaˬ yawˇ htaꞈ yawˆ yan leh ha kʼaˉ ve tehꞈ hpeuꞈ maw piˇ˗aw laˇ?’ Chi hkʼoˆ kaꞈ, awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ ve, tawˇ yaw ve awˬ hkʼaˇ leh na ve awˬ hkʼaˇ henˇ yuˬ gʼa ve htaꞈ chaˬ nyi sheˍ. (Tawˇ 31:26) Nawˬ chi ve teˇ hpaˍ htaꞈ hkʼa dehꞈ henˇ yuˬ gʼa ve kʼo, nawˬ awˬ nu ve chaw geh awˬ chawˇ te gʼa leh meuˆ daꞈ gʼa tuˬ yoˬ. w23.12 21 ¶12

Chi beuˬ teˇ co˗e Yaˬhoˉvaˬ ngaˬ hui htaꞈ ga laˇ tuˬ yehˬ kʼa hkʼaw ve chaw, awˬ chawˇ maˇ heˆ leh, nyi haꞈ shaˉ paˍ htaꞈ yehˇ ve yoˬ. Yaꞈ hkʼaˇ, teˇ pawˆ pawˆ kʼo ngaˬ hui nyi ma naˬ jaˇ htaˇ, ngaˬ hui teˇ gʼaˇ˗ehꞈ kaꞈ maˇ mawˬ gaˇ leh teˇ gʼaˇ tiˉ chehˇ gaˇ ve yoˬ. Chi hkʼe dawˇ ve lehˬ a hkʼe leˇ hpehꞈ ve yoˬ. Leh ngaˬ hui Yaˬhoˉvaˬ ga laˇ ve htaꞈ gʼa tuˬ hkʼaˬ hkʼe gʼa te cawˇ ve le? Ngaˬ hui teˇ gʼaˇ tiˉ chehˇ gaˇ ve htawˇ, chi hkʼe taˇ te. Awˬ lawn kʼo, ngaˬ hui teˇ gʼaˇ tiˉ chehˇ htaˇ, ngaˬ hui maˇ daꞈ ve dawˇ hkʼaˇ cawˬ ve, a shu yawˇ awˬ to pon tiˉ dawˇ nyi la ve, ngaˬ hui gʼa hpuˇ chehˇ ve awˬ lawn htaꞈ tiˉ dawˇ nyi la ve, leh chi ngaˬ hui maˇ daꞈ ve htaꞈ te tuˬ dawˇ cheˆ la ve yoˬ. Ngaˬ hui shoꞈ shaꞈ ve awˬ lawn gʼa hpuˇ jaˇ htaˇ teˇ gʼaˇ tiˉ chehˇ gaˇ ve yoˬ. Yaꞈ hkʼaˇ, ngaˬ hui awˬ nu ve chaw htaꞈ maˇ mawˬ daꞈ leh teˇ gʼaˇ tiˉ chi maw maw chehˇ ve kʼo, Yaˬhoˉvaˬ awˬ nu ve chaw htaꞈ yehˇ leh ngaˬ hui htaꞈ ga laˇ ve maˇ gʼa la ve yoˬ. Chi htaꞈ pa taw, yehˬ kʼa hkʼaw ve chaw, awˬ chawˇ maˇ heˆ leh nyi haꞈ shaˉ paˍ ga laˇ tcuh cawˇ ve yoˬ. Chi ve lehˬ, Yaˬhoˉvaˬ nawˬ htaꞈ ga laˇ ve awˬ hkʼaˇ hpehꞈ ve tehꞈ dawˇ sheˍ.—Tawˇ 17:17; Isy 32:1, 2. w24.01 24 ¶12-13

Naˍzaˍriˆ chaw hpehꞈ ve lehˬ oˉ kʼoˍ mvuh maˇ gʼa nuˇ tuˬ hkanˍ taˍ ve yoˬ. Chi ve lehˬ yawˇ hui Yaˬhoˉvaˬ ve kanˇ paˆ awˬ hawˉ lo chehˇ leh yawˇ ve hkawˇ teˇ ceuˬ le le htaꞈ kaꞈ na yuˬ tuˬ hpeuꞈ maw laˇ ve yoˬ. Yaꞈ hkʼaˇ, hkanˍ taˍ ve hkʼe teˇ gʼaˇ le le gʼaꞈ te ve maˇ heˆ. Naˍzaˍriˆ chaw hpehꞈ ve te ve awˬ ceuˬ htaꞈ Iˉsaˍreˍlaˆ chaw awˬ hpfuhˇ maˇ shiˍ leh laiˉ pawˆ kʼo awˬ gʼaˇ maˇ piˇ. Naˍzaˍriˆ chaw hpehꞈ ve hkanˍ taˍ ve hkʼe gʼaꞈ te leh awˬ nu ve chaw htaꞈ peun daꞈ tuˬ yawˇ hui gʼa haꞈ hanˉ jaˇ ve yoˬ. (Aˍ 2:12) Ngaˬ hui Yaˬhoˉvaˬ ve a loˍ htaꞈ te tuˬ leuˆ yuˬ ve pa taw, miˬ guiˬ hkʼoˆ lo ve chaw htaꞈ ngaˬ hui peun daꞈ ve yoˬ. Kanˉ te kuiˬ maˇ heˆ leh, liꞈ henˇ kuiˬ lo, ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ, awˬ nu ve chaw htaꞈ kʼoˆ piˇ tuˬ gʼa haꞈ hanˉ cawˇ ve yoˬ. Miˬ guiˬ yaˇ ve te hkʼaˇ dawˇ hkʼaˇ gʼaˇ hteꞈ luˬ kʼai chehˇ ve pa taw, Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te leh awˬ nu ve chaw htaꞈ daꞈ ve awˬ lawn sha tanˇ hto maˍ piˇ tuˬ ngaˬ hui awˬ pon haˍ ve yoˬ. (2 Tiˆ 1:8; 3:13) Yaˬhoˉvaˬ ve kanˉ maˇ te ve chaw htaꞈ ngaˬ hui peun daꞈ tuˬ haꞈ hanˉ ve kʼo, ‘Yaˬhoˉvaˬ ha lehˬ tuˬ te piˇ veʼ tehꞈ tawnˇ taˍ sheˍ.—Tawˇ 27:11; Ml 3:18. w24.02 16 ¶7; 17 ¶9

Roˉmaꞈ venˇ lo Hkriꞈ yaˇ awˬ moˍ hkʼaw peun daꞈ jaˇ ve htaꞈ dawˇ nyi sheˍ. Choˬ kaˬ lo ve Hkriꞈ yaˇ lehˬ Moˉseˍ ve awˬ liˇ tawˇ hkawˇ htaꞈ gʼaꞈ te tuˬ, Yuˇdaꞈ chaw htaꞈ ceh tiˉ maˍ piˇ ve maˇ heˆ. Yaꞈ hkʼaˇ, hpehꞈ laˬ jaw ve leh, chaw liˇ vaˇ liˇ maˇ shuˍ daꞈ ve chaw htaꞈ kaꞈ maˍ piˇ ve yoˬ. Chi hkʼoˆ kaꞈ, Hkriꞈ yaˇ teˇ hpaˍ kʼo awˬ ceˬ hpehꞈ ve, teˇ hpaˍ kʼo awˬ ceˬ maˇ hpehꞈ leh, teˇ hpaˍ kʼo awˬ shehˍ hpaˇ hpehꞈ ve yoˬ. Hkriꞈ yaˇ chi ve teˇ hpaˍ peun daꞈ jaˇ ve htawˇ, hkʼaˬ hkʼe te yawˇ hui hkʼa dehꞈ haꞈ daꞈ gʼa ve le? Pawˇluꞈ yawˇ hui “teˇ gʼaˇ leh teˇ gʼaˇ htaꞈ haꞈ yuˬ daꞈ˗oꞈ” tehꞈ kʼoˆ piˇ ve yoˬ. Chi hkʼaˬ hkʼe kʼoˆ gaˇ ve le? “Haꞈ yuˬ” tehꞈ kʼoˆ ve tawˇ hkawˇ lehˬ, chaw teˇ gʼaˇ aˉ hkʼaw lo laˬ tuˬ haꞈ yuˬ piˇ ve, maˇ heˆ leh ngaˬ hui htaꞈ awˬ chawˇ te la tuˬ ve htaꞈ kʼoˆ gaˇ ve yoˬ. Tawˇ pa haˉ te kʼo, Awˍneˍsiˍmuˆ lehˬ Hpiˇleˍmonˍ ve awˬ ceˬ te jaw ve htawˇ, Pawˇluꞈ Hpiˇleˍmonˍ htaꞈ kʼoˆ piˇ ve, Awˍneˍsiˍmuˆ htaꞈ hkʼa dehꞈ “haꞈ yuˬ” piˇ˗oˆ. (Hplm 17) Piˇkiˇlaˆ leh Aˍkuˉlaˆ Aˍpawˇluꞈ htaꞈ haꞈ yuˬ piˇ leh Aˍpawˇluꞈ yawˇ hui hkʼe taw Hkriꞈ yaˇ ve awˬ lawn maˇ shiˍ ve htawˇ, yawˇ hui ve aˉ hkʼaw lo “kuˬ” laˬ ve yoˬ. (Tcuh 18:26) Oˇ htaˇ teˇ co˗e ve Hkriꞈ yaˇ peun daꞈ jaˇ ve htawˇ, yawˇ hui maˇ fuiˍ daꞈ pehˬ daꞈ leh haꞈ yuˬ daꞈ leh haꞈ daꞈ jaˇ ve yoˬ. w23.07 6 ¶13

Nawˬ Yaˬhoˉvaˬ htaꞈ awˬ to chiˇ aꞈ piˇ ve a yeˇ uiˍ jaˇ ve lehˬ, yawˇ htaꞈ haꞈ ve yoˬ. Haꞈ ve chi ve lehˬ ‘yonˍ veʼ leh “co ha hpawˇ ve cuˇ yiˍ maˍ yiˍ” geh ceh tiˉ laˬ ve maˇ heˆ. Nawˬ Yaˬhoˉvaˬ htaꞈ caˉ daꞈ ve gʼa henˇ leh yawˇ htaꞈ leuˉ leh haꞈ ve yoˬ. (Kawˇ 1:9) Nawˬ Liꞈ hpu hkʼaw gʼa henˇ ve awˬ hkʼaˇ teˇ hpaˍ lehˬ (1) Yaˬhoˉvaˬ awˬ tehˬ cawˬ ve, (2) Liꞈ hpu lehˬ Gʼuiˬ sha dawˇ pawnˍ piˇ taˍ ve liꞈ hpehꞈ ve, leh (3) Yaˬhoˉvaˬ yawˇ ve a loˍ awˬ tehˬ hpehꞈ tcuh gʼa tuˬ yawˇ ve kanˉ hkʼaˇ htaꞈ cuˇ ve tehꞈ nawˬ yonˍ ve yoˬ. Yaˬhoˉvaˬ htaꞈ awˬ to chiˇ aꞈ piˇ gaˇ ve chaw lehˬ, Liꞈ hpu hkʼaw awˬ lawn lonˉ ma htaꞈ gʼa na gʼa tcuh ve yoˬ. Leh Yaˬhoˉvaˬ ve awˬ liˇ awˬ hkʼaˇ htaꞈ gʼa gʼaꞈ te ve yoˬ. Chi hkʼoˆ kaꞈ, yawˇ ve yonˍ hkʼaˇ awˬ nu ve chaw htaꞈ kʼoˆ maˍ piˇ tuˬ yawˇ gʼa coˇ caˇ ve yoˬ. (Maꞈ 28:19, 20) Yawˇ Yaˬhoˉvaˬ htaꞈ leuˉ leh haꞈ ve kʼo, Yaˬhoˉvaˬ teˇ gʼaˇ htaꞈ ceh tiˉ yawˇ oˉ kʼoˍ pui gaˇ ve yoˬ. Nawˬ chi hkʼe dawˇ˗aw laˇ? w24.03 4-5 ¶6-8

Aˍbiˆgeˍlaˆ Naˍbaˍlaˆ htaꞈ heuˆ ve yoˬ. Liꞈ hpu hkʼaw kʼoˆ ve, Naˍbaˍlaˆ lehˬ nyi ma maˇ daꞈ leh haiˬ ve chaw hpehꞈ ve yoˬ. (1 Saˍ 25:3) Aˍbiˆgeˍlaˆ hawˉ hkʼaˆ chi hkʼe ve geh gʼa chehˇ ve nyi ma luˬ jaˇ ve yoˬ hehˉ. Leh yawˇ chi ve hpaˇ geh maˇ heuˆ daꞈ˗o ve laˇ? Maˇ heˆ. Naˍbaˍlaˆ Daˍviˆ leh yawˇ ve chaw htaꞈ nyi cha piˇ ve pa taw, Iˉsaˍreˍlaˆ ve jawˇ mawˇ Daˍviˆ yawˇ htaꞈ tiˇ pehˍ tuˬ dawˇ cheˆ htaˇ, Aˍbiˆgeˍlaˆ awˬ hkʼaˇ ca ve yoˬ. (1 Saˍ 25:9-13) Awˬ tehˬ kʼo, Aˍbiˆgeˍlaˆ hpaw˗e leh Daˍviˆ Naˍbaˍlaˆ htaꞈ tiˇ pehˍ tcuh kaꞈ gʼa ve yoˬ. Yaꞈ hkʼaˇ, yawˇ chi hkʼe maˇ te. Daˍviˆ Naˍbaˍlaˆ htaꞈ maˇ gʼa tiˇ pehˍ tuˬ yawˇ lawˬ hkawˉ piˇ ve yoˬ. (1 Saˍ 25:23-27) Aˬ htoꞈ ma pa taw Aˍbiˆgeˍlaˆ chi hkʼe te ve le? Aˍbiˆgeˍlaˆ Yaˬhoˉvaˬ htaꞈ haꞈ leh yawˇ ve awˬ ca htaꞈ yawˆ yan ve yoˬ. Heuˆ daꞈ ve lehˬ Yaˬhoˉvaˬ gu teh taˍ laˇ ve daꞈ jaˇ ve awˬ ceuˬ hpehꞈ ve tehꞈ yawˇ shiˍ ve yoˬ. Aˍbiˆgeˍlaˆ Yaˬhoˉvaˬ nyi hkʼaˇ suh tuˬ te piˇ gaˇ ve pa taw, yawˇ ve yehˬ kʼa hkʼaw ve chaw teˇ gʼaˇ le le leh yawˇ ve awˬ hpawˇ htaꞈ kaꞈ haꞈ shaˉ piˇ tuˬ, yawˇ te gʼa ve hkʼe teˇ ceuˬ le le te ve yoˬ. Daˍviˆ Naˍbaˍlaˆ htaꞈ maˇ gʼa tiˇ pehˍ tuˬ laꞈ haˉ gu ve yoˬ. w24.03 16-17 ¶9-10

Nawˬ chehˇ ve Hkriꞈ yaˇ awˬ moˍ hkʼaw awˬ viˉ awˬ nyi Yaˬhoˉvaˬ ve kanˉ hkʼa dehꞈ te gʼa tuˬ, a shaꞈ teꞈ hkʼaˇ hkʼa sha sha˗ehˬ te tuˬ leuˆ yuˬ ve chaw cawˬ˗aw laˇ? Yaˇ ehˉ, yaˇ nehˬ, liꞈ henˇ kuiˬ lo awˬ nu ve chaw htaꞈ peun daꞈ ve nawˬ shiˍ daꞈ ve chaw cawˬ˗aw laˇ? Yawˇ hui yehˬ kʼa hkʼaw ve chaw tawˍ piˇ ve htawˇ, ka tiꞈ yeˬ ve nawˬ shiˍ daꞈ ve chaw cawˬ˗aw laˇ? Chi hkʼe gʼa hpuˇ ve chaw htaꞈ nawˬ shiˍ daꞈ ve kʼo, nawˬ yawˇ hui htaꞈ chiˇ mvuh piˇ leh yawˇ hui chi hkʼe yuˬ tanˇ leh haꞈ hanˉ ve cawˬ ve htaꞈ nawˬ awˬ hpfuhˇ shiˍ ve tehꞈ, yawˇ hui yonˍ gʼa tuˬ hpeuꞈ maw piˇ sheˍ. (Hplm 4, 5, 7) Ngaˬ hui Gʼuiˬ sha nyi hkʼaˇ suh tuˬ te piˇ gaˇ leh, ngaˬ hui Gʼuiˬ sha htaꞈ awˬ to chiˇ aꞈ piˇ taˍ ve hkʼa shuˍ gʼaꞈ te gaˇ ve tehꞈ Yaˬhoˉvaˬ yonˍ gʼa ve yoˬ. Yaˬhoˉvaˬ ngaˬ hui htaꞈ yawˆ yan laˇ ve lehˬ, ngaˬ hui yawˇ htaꞈ haꞈ tuˬ a shu yawˇ hkʼaˇ yawˇ leuˆ yuˬ tcuh laˇ ve yoˬ. (Tawˇ 23:15, 16) Chi htaꞈ pa taw, ngaˬ hui Yaˬhoˉvaˬ ve kanˉ caˉ leh te tuˬ dawˇ teh taˍ leh daꞈ jaˇ ve awˬ ceuˬ yawˇ htaꞈ piˇ gaˇ ve tehꞈ dawˇ teh taˍ sheˍ. w24.02 18-19 ¶14, 16

Yeˍsuˆ miˬ guiˬ hkʼoˆ lo Gʼuiˬ sha ve kanˉ tanˬ te ve 29 hkʼawꞈ C.E. htaˇ, oˇ ve teˇ hkʼawꞈ peuˬ la paˇ neˇ htaˇ ve awˬ lawn htaꞈ dawˇ nyi sheˍ. Yeˍsuˆ leh yawˇ ve awˬ e Maˍriˆ Naˍzaˍrehˆ venˇ awˬ na hpawˇ Kaˍnaˆ hkʼaˆ hkʼaw hkehˉ caˇ kuiˬ lo laˬ tuˬ shu kuˬ piˇ ve yoˬ. Maˍriˆ hkehˉ chaw htaꞈ haꞈ yuˬ tuˬ ca ga piˇ˗e ve yoˬ. Yaꞈ hkʼaˇ, hkehˉ caˇ kuiˬ lo hti caˇ hti dawˬ chehˇ htaˇ shoꞈ shaꞈ ve teˇ lawn cawˬ ve yoˬ. Hkehˉ caˇ kuiˬ lo a pehˉ meuˇ gʼuiˬ peuˬ la yoˬ ve yoˬ. “A pehˉ meuˇ gʼuiˬ maˇ cawˬ˗oˬ” tehꞈ Maˍriˆ yawˇ ve Yaˇ paˍ htaꞈ haˆ ca kʼoˆ piˇ ve yoˬ. (Yoˇ 2:1-3) Leh Yeˍsuˆ hkʼaˬ hkʼe te ve le? Yeˍsuˆ anˇ tuˬ te ve lehˬ iˉ kaˆ htaꞈ “daꞈ ve a pehˉ meuˇ gʼuiˬ” te ve yoˬ. (Yoˇ 2:9, 10) Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, yawˇ anˇ tuˬ laiˉ ceuˬ te ve yoˬ. Yeˍsuˆ chaw laiˉ meunˍ gʼaˇ htaꞈ ga piˇ tuˬ yawˇ kanˇ paˆ yehˇ leh anˇ tuˬ te ve yoˬ. Tawˇ pa haˉ te kʼo, chaw awˬ moˍ lonˉ chi teˇ hpaˍ htaꞈ caˍ piˇ tuˬ yawˇ anˇ tuˬ 2 pawˆ te ve yoˬ. Awˉ lawˉ teˇ pawˆ lehˬ, hawˉ hkʼaˆ htaꞈ ceh tiˉ gʼaw ve kaꞈ 5,000 gʼaˇ cawˬ ve yoˬ. Leh 2 pawˆ teˇ pawˆ htawˇ, hawˉ hkʼaˆ htaꞈ ceh tiˉ gʼaw ve kaꞈ 4,000 gʼaˇ cawˬ ve yoˬ. Chi ve 2 pawˆ lehˬ yaˇ miˇ leh yaˇ ehˉ kaꞈ teˇ geh caˇ ve yoˬ. Yeˍsuˆ chaw awˬ moˍ lonˉ 27,000 gʼaˇ htaꞈ caˇ tuˬ caˍ piˇ ve yoˬ. (Maꞈ 14:15-21; 15:32-38) Leh anˇ tuˬ te ve chi 2 pawˆ lehˬ Yeˍsuˆ chaw naˬ laiˉ gʼaˇ htaꞈ kaꞈ gu na˗e piˇ ve yoˬ.—Maꞈ 14:14; 15:30, 31. w23.04 2-3 ¶1-2

Ngaˬ hui nyi ma naˬ jaˇ tuˬ awˬ lawn gʼa hpuˇ htaˇ, teˇ nyi nyi kʼo awˬ gʼaˇ nuˇ jaˇ leh teꞈ chiˉ kaꞈ maˇ te gaˇ˗o ve yoˬ. Eˇliˇyaꞈ awˬ gʼaˇ peuˬ˗e leh teꞈ chiˉ maˇ te gaˇ˗o ve hkʼa shuˍ, ngaˬ hui kaꞈ maˇ te gaˇ˗o ve yoˬ. (1 Jawˇ 19:5-7) Ngaˬ hui Yaˬhoˉvaˬ ve kanˉ caˉ leh te kʼai gʼa tuˬ ngaˬ hui htaꞈ ga laˇ tuˬ loˍ ve yoˬ. Ngaˬ hui shoꞈ shaꞈ ve awˬ lawn gʼa hpuˇ htaˇ, yaꞈ nyi ve Liꞈ hpu awˬ tawn hkʼaw kʼoˆ ve hkʼe, Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ ka tiꞈ te taˍ laˇ ve yoˬ. Jawˇ mawˇ Daˍviˆ kaꞈ chi ve hkʼa shuˍ ga piˇ ve htaꞈ gʼa ve yoˬ. Yawˇ shoꞈ shaꞈ ve gʼa hpuˇ jaˇ leh canˇ paˍ gʼaꞈ yuˬ piˇ htaˇ, yawˇ Yaˬhoˉvaˬ htaꞈ kʼoˆ ve, “nawˬ ngaˬ htaꞈ haꞈ shaˉ laˇ leh ponˬ laˇ ve yoˬ. (Chiˇ 18:35) Yaˬhoˉvaˬ ngaˬ hui htaꞈ haꞈ shaˉ laˇ tuˬ ve teˇ hkʼaˇ lehˬ, yawˇ awˬ nu ve chaw ngaˬ hui htaꞈ ga laˇ tcuh ve yoˬ. Tawˇ pa haˉ te kʼo, Daˍviˆ awˬ gʼaˇ nuˇ htaˇ, Yawˇnaˆtanˍ Daˍviˆ geh laˬ leh awˬ gʼaˇ piˇ ve yoˬ. (1 Saˍ 23:16, 17) Yaˬhoˉvaˬ Eˇliˇshehˇ htaꞈ cuˇ leh Eˇliˇyaꞈ htaꞈ ga piˇ tcuh ve yoˬ.—1 Jawˇ 19:16, 21; 2 Jawˇ 2:2. w24.01 23-24 ¶10-12

Tawˇ naˉ ve liꞈ kaˇ nanˉ uiˍ 9 hkʼaw ‘awˬ tehˬ ve cuˇ yiˍ’ yaˇ miˇ teˇ gʼaˇ hpehꞈ ve htaꞈ tehˆ maˍ laˇ taˍ ve yoˬ. Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ leh ngaˬ hui htaꞈ daꞈ ve awˬ ceuˬ maˇ maˇ peꞈ laˇ ve tehꞈ tehˆ maˍ laˇ taˍ ve chi ngaˬ hui mawˬ tuˬ te laˇ ve yoˬ. Yaˇ miˇ chi ve teˇ gʼaˇ caˇ tuˬ mehˬ jaˇ ve htaꞈ gu ve, a pehˉ meuˇ gʼuiˬ gu teh ve, leh hpui lawˇ hkʼoˆ lo hkʼa dehꞈ gu teh taˍ ve yoˬ. (Tawˇ 9:2) Kaˇ nanˉ ehˉ 4 leh 5 hkʼaw yawˇ kʼoˆ sheˍ ve, “[chaw luˬ paˍ teˇ hpaˍ˗oˬ] ‘ngaˬ gu taˍ ve caˇ tuˬ dawˬ tuˬ htaꞈ ca caˇ ca dawˬ la˗o.’” Aˬ htoꞈ ma te ngaˬ hui cuˇ yiˍ cawˬ ve yaˇ miˇ chi ve teˇ gʼaˇ aˉ hkʼaw lo kʼai leh ca caˇ˗e cawˇ ve le? Ngaˬ hui chi hkʼe te ve lehˬ Yaˬhoˉvaˬ ngaˬ hui htaꞈ haꞈ shaˉ laˇ leh cuˇ yiˍ cawˬ ve chaw hpehꞈ tcuh gaˇ ve tehꞈ shiˍ ve pa taw yoˬ. Yawˇ ngaˬ hui htaꞈ maˇ te yaꞈ tcuh gaˇ leh ngaˬ hui te yaꞈ leh nyi ma naˬ ve awˬ ceuˬ htaꞈ kaꞈ maˇ te yaꞈ tcuh gaˇ ve yoˬ. Hkʼe te leh, yawˇ “hteˇ ve cawˇ ve chaw htaꞈ ga piˇ leh haꞈ shaˉ piˇ ve yoˬ.” (Tawˇ 2:7) Ngaˬ hui Yaˬhoˉvaˬ htaꞈ kawˆ leh yawˆ yan ve kʼo, yawˇ nyi hkʼaˇ suh tuˬ te piˇ gaˇ ve yoˬ. Ngaˬ hui yawˇ beˆ maˍ laˇ ve tawˇ hkawˇ htaꞈ na yuˬ leh gʼaꞈ te ve pa taw ha lehˬ jaˇ ve yoˬ.—Yaˍ 1:25. w23.06 23-24 ¶14-15

Teˇ pawˆ pawˆ kʼo ngaˬ hui Yaˬhoˉvaˬ ve kanˉ te gaˇ ve hkʼe te maˇ gʼa ve htawˇ, ngaˬ hui yawˇ awˬ pon te ve teˇ ceuˬ le le htaꞈ yawˇ awˬ hpfuhˇ shiˍ ve tehꞈ yonˍ gʼa ve yoˬ. Chi ngaˬ hui hkʼaˬ hkʼe te shiˍ gʼa ve le? Zaˍhkaˍriˆ ve awˬ co˗e htaˇ, Yuˇdaꞈ chaw Baˍbuˍlonˍ mvuhˇ miˬ lo gʼa veu laˇ taˍ ve hpu, shi, yuˬ leh shi uˉ tcuhˍ te˗o tehꞈ Yaˬhoˉvaˬ tawˇ piˇ ve yoˬ. (Zaˍ 6:11) “Shi uˉ tcuhˍ” Yuˇdaꞈ chaw chi teˇ hpaˍ awˬ yanˇ yuˬ tanˇ ve htaꞈ “dawˇ nawˇ tuˬ” te piˇ ve yoˬ. (Zaˍ 6:14) Chi ve hkʼa shuˍ shuˍ, ngaˬ hui a shaꞈ teꞈ kuiˬ hkʼaw maˇ dawˇ maˇ gaˇ ve leh, tuꞈ ve hkanˍ ve gʼa hpuˇ ve htawˇ, ngaˬ hui nyi ma awˬ tawˬ hkʼa gaˬ Yaˬhoˉvaˬ ve kanˉ te ve kʼo, yawˇ maˇ leunˇ laˇ taˬ tehꞈ ngaˬ hui yonˍ gʼa ve yoˬ. Awˬ leh meuˇ ve awˬ yanˇ hkʼaw ngaˬ hui shoꞈ shaꞈ ve leh, tuꞈ ve hkanˍ ve laiˉ ceuˬ gʼa hpuˇ leh awˬ gʼuˇ suhˍ hpawˇ chi aꞈ kehˉ gʼa hpuˇ jaˇ tuˬ shiˍ ve yoˬ. (2 Tiˆ 3:1, 13) Yaꞈ hkʼaˇ, ngaˬ hui taˇ dawˇ haˍ dawˇ hkiˉ jaˇ. Haˆgehˇ ve awˬ co˗e htaˇ, Yaˬhoˉvaˬ Yuˇdaꞈ chaw htaꞈ kʼoˆ piˇ ve htaꞈ tawnˇ taˍ sheˍ. Oˇ kaˬ lo kʼoˆ ve, “ngaˬ nawˬ hui geh chehˇ taˍ ve yoˬ. Chi htaꞈ pa taw taˇ kawˆ.” (Haˆ 2:4, 5) Ngaˬ hui Yaˬhoˉvaˬ loˍ ve awˬ ceuˬ htaꞈ te gʼa ve hkʼe te ve kʼo, yawˇ ngaˬ hui htaꞈ ga laˇ tuˬ yoˬ tehꞈ yonˍ gʼa ve yoˬ. w23.11 19 ¶20-21

Yaˬhoˉvaˬ lehˬ tcuh yaˇ Peˍtruˆ te yaꞈ ve awˬ lawn maˇ bvuhꞈ keu tcuh kaꞈ gʼa ve htawˇ, bvuhꞈ keu tcuh sheˍ ve yoˬ. Aˬ htoꞈ ma pa taw le? Awˬ lawn kʼo, Peˍtruˆ ve awˬ lawn ngaˬ hui htaꞈ henˇ yuˬ tcuh gaˇ ve yoˬ. (2 Tiˆ 3:16, 17) Peˍtruˆ kaꞈ ngaˬ hui hkʼa shuˍ awˬ gʼaˇ nuˇ leh dawˇ haˍ ve yoˬ. Chi ve htaꞈ gʼa mawˬ htaˇ, ngaˬ hui kaꞈ hkʼa dehꞈ te gʼa tuˬ Yaˬhoˉvaˬ maˇ dawˇ law. Yaꞈ hkʼaˇ, Yaˬhoˉvaˬ lehˬ ngaˬ hui awˬ gʼaˇ nuˇ kuiˬ cawˬ ve htawˇ, coˇ caˇ leh awˬ gʼaˇ maˇ nuˇ tcuh gaˇ ve yoˬ. Aˬ htoꞈ ma pa taw, ngaˬ hui coˇ caˇ leh awˬ gʼaˇ maˇ nuˇ cawˇ ve le? Ngaˬ hui kaꞈ awˬ gʼaˇ nuˇ kuiˬ teˇ ceuˬ ceuˬ htaꞈ gʼaˇ˗oˬ ve tehꞈ dawˇ ve htawˇ, awˬ gʼaˇ kʼawꞈ nuˇ la puiˉ ve yoˬ. Chi htaꞈ pa taw, ngaˬ hui caˉ leh gʼa coˇ caˇ cawˇ ve yoˬ. Teˇ gʼaˇ le le kʼoˆ ve, maˇ heˆ leh te ve awˬ ceuˬ peuˬ hkʼawꞈ nawˉ nyi ma luˬ tuˬ te laˇ gʼa ve yoˬ. Yaꞈ hkʼaˇ, ngaˬ hui awˬ gʼaˇ maˇ nuˇ ve kʼo, Yaˬhoˉvaˬ ga laˇ tuˬ yoˬ. (1 Peˍ 5:10) Tcuh yaˇ Peˍtruˆ te yaꞈ ve htawˇ, Yeˍsuˆ yawˇ htaꞈ ha kʼaˉ piˇ ve awˬ lawn htaꞈ teˇ geh nyi sheˍ. Chi ve ngaˬ hui Yaˬhoˉvaˬ ve kanˉ caˉ leh te kʼai tuˬ awˬ gʼaˇ hkʼaˬ hkʼe peꞈ laˇ ve kaꞈ teˇ geh nyi sheˍ. w23.09 20-21 ¶2-3

Yaꞈ nyi ve Liꞈ hpu awˬ tawn hkʼaw Maˍhtaˆ kʼoˆ ve hkʼa shuˍ Laˍzaˍruˆ maˇ suh sheˍ ve kʼo, Yeˍsuˆ yawˇ htaꞈ gu na˗e piˇ gʼa tuˬ yoˬ. Yaꞈ hkʼaˇ, Yeˍsuˆ anˇ tuˬ te ve yoˬ. Yawˇ Maˍhtaˆ htaꞈ ka tiꞈ te piˇ ve, “nawˬ ve awˬ nyi paˍ kʼawꞈ teꞈ tu la tuˬ yoˬ.” Leh Yeˍsuˆ kʼawꞈ kʼoˆ ve, ‘ngaˬ lehˬ, kʼawꞈ teꞈ tu la ve teˇ ceuˬ hpehꞈ leh yawˇ htaꞈ kʼawꞈ teꞈ tu la piˇ ve yoˬ.’ (Yoˇ 11:23, 25) Yaˬhoˉvaˬ Yeˍsuˆ htaꞈ kanˇ paˆ piˇ leh suh ve chaw htaꞈ kʼawꞈ teꞈ tu la piˇ tcuh ve yoˬ. Chi awˬ gʼuˇ suhˍ htaˇ yaˇ miˇ ehˉ suh gehˇ sheˍ ve teˇ gʼaˇ htaꞈ Yeˍsuˆ kʼawꞈ teꞈ tu la piˇ ve yoˬ. Leh oˇ ve teˇ nyi hkʼaw ceh tiˉ suh taˍ ve hawˉ hkʼaˆ teˇ gʼaˇ htaꞈ kaꞈ Yeˍsuˆ kʼawꞈ tu la piˇ ve yoˬ. (Luˉ 7:11-15; 8:49-55) Yaꞈ hkʼaˇ, suh˗oˬ ve 4 nyi gaˬ peuˬ leh kuiˇ nuˬ˗oˬ ve kaꞈ Yeˍsuˆ kʼawꞈ teꞈ tu la piˇ gʼa˗aw laˇ? Maˍriˆ kaꞈ Yeˍsuˆ geh kʼai ve yoˬ. Yawˇ Maˍhtaˆ hkʼa shuˍ “Jawˇ mawˇ˗oˬ, nawˬ choˬ kaˬ chehˇ taˍ ve hkʼe kʼo, ngaˬ ve awˬ nyi paˍ suh tuˬ ve maˇ heˆ” tehꞈ kʼoˆ ve yoˬ. (Yoˇ 11:32) Maˍriˆ leh awˬ nu ve chaw hawˬ ve htaꞈ Yeˍsuˆ gʼa mawˬ htaˇ, yawˇ awˬ chawˇ htaꞈ ha kʼaˉ jaˇ leh hawˬ ve yoˬ. Ngaˬ hui haꞈ ve chaw suh˗e htaˇ nyi ma hkʼaˬ hkʼe taw naˬ ve htaꞈ Yeˍsuˆ shiˍ ve yoˬ. Leh chaw yaˇ nyi ma luˬ jaˇ tuˬ te piˇ ve awˬ ceuˬ htaꞈ Yeˍsuˆ gu piˇ gaˇ jaˇ ve yoˬ. w23.04 10-11 ¶12-13