Ha pa 3 maˬ

Chi teˇ hkui miˬ guiˬ awˬ suhˉ maˇ gaˬ la sheˍ htaˇ, ngaˬ hui mawˬ ve awˬ ceuˬ teˇ hpaˍ meuꞈ keu shiˍ awˬ moˍ awˬ coˇ lonˉ, suhˆ cehˬ, to nuˇ to shaˆ leh chaw yaˇ chi ve teˇ hpaˍ htaꞈ ngaˬ hui nyi leh dawˇ nyi cawˇ ve yoˬ. Chi teˇ hpaˍ lehˬ awˬ tehˬ awˬ na cawˬ ve tehꞈ chaw yaˇ shiˍ ve yoˬ. Chi awˬ gʼuˇ suhˍ htaˇ, awˬ ceuˬ chi ve teˇ hpaˍ maˇ cawˬ sheˍ ve yoˬ. Yaꞈ hkʼaˇ, Yaˬhoˉvaˬ hpanˍ peuˬ hkʼawꞈ nawˉ cawˬ la ve yoˬ. (Awˬ 1:1, 26, 27) Yaˬhoˉvaˬ miˬ guiˬ awˬ suhˉ cawˬ la tcuh tuˬ dawˇ teh taˍ ve htaꞈ shuˍ ve yoˬ. Leh chi ve lehˬ awˬ tehˬ awˬ na hpehꞈ la tcuh tuˬ yoˬ. Miˬ guiˬ awˬ suhˉ hkʼaw chaw yaˇ teˇ gʼaˇ le le co co taiˍ taiˍ ve a shaꞈ gʼa leh biˇ ve chaw hpehꞈ tuˬ yoˬ. Gʼuiˬ sha ka tiꞈ te taˍ ve awˬ yanˇ gaˬ kʼo, mvuhˇ naw ma miˬ naˆ ma awˬ tehˬ cawˬ ve hkʼa shuˍ miˬ guiˬ awˬ suhˉ awˬ tehˬ awˬ na cawˬ la tuˬ yoˬ. (Isy 65:17; Hpeuꞈ 21:3, 4) Htaiˍ hkʼawꞈ laˇ ve awˬ lawn htaꞈ dawˇ nyi ve, Yaˬhoˉvaˬ ve kanˇ paˆ htaꞈ dawˇ nyi ve, Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te ve, chi ve teˇ hpaˍ chi teˇ hkui nawˬ ve yonˍ hkʼaˇ yonˍ yeˬ maˇ la tuˬ hkʼaˬ htaˆ kaꞈ te cawˇ ve yoˬ. Nawˬ chi hkʼe te chehˇ ve kʼo, “yonˍ ve leh yeunˇ hkanˍ ve htaꞈ pa taw, Gʼuiˬ sha kʼoˆ taˍ ve teˇ hpaˍ htaꞈ gʼa taˍ ve chaw teˇ hpaˍ hkʼa shuˍ shuˍ” nawˬ kaꞈ teˇ gʼaˇ hpehꞈ ve yoˬ.—Heˍ 6:11, 12. w23.04 31 ¶18-19

Yeˍsuˆ mvuhˇ naw ma hkʼoˆ chiˇ nyi leh teˇ gʼaˇ le le mehˆ gʼuˇ suhˍ lo Yaˬhoˉvaˬ geh bon lawˬ ve yoˬ. Yawˇ te˗a te chehˇ ve awˬ ceuˬ Yaˬhoˉvaˬ awˬ meꞈ awˬ hponˇ gʼa tuˬ te piˇ gaˇ ve yoˬ. Peuˬ leh yawˇ awˬ hkawˇ bvuhˬ chaweh kuˬ leh “Laˍzaˍruˆ˗oˬ, tawˆ la˗o” tehꞈ kʼoˆ ve yoˬ. (Yoˇ 11:43) Hkʼe te leh, Laˍzaˍruˆ kaꞈ tuˍ hpfuh hkʼaw tawˆ la ve yoˬ. Chaw teˇ hpaˍ hpehꞈ la maˇ gʼa tehꞈ dawˇ ve awˬ ceuˬ htaꞈ Yeˍsuˆ te gʼa ve yoˬ. Kʼawꞈ teꞈ tu la ve awˬ lawn chi dawˇ law kuiˬ ngaˬ hui hkʼa dehꞈ yonˍ gʼa tuˬ te laˇ ve yoˬ. Aˬ htoꞈ ma te chi hkʼe kʼoˆ gʼa ve le? Yeˍsuˆ Maˍhtaˆ htaꞈ ka tiꞈ te piˇ ve, “nawˬ ve awˬ nyi paˍ kʼawꞈ teꞈ tu la tuˬ yoˬ” tehꞈ kʼoˆ piˇ ve htaꞈ tawnˇ gʼa˗aw laˇ? (Yoˇ 11:23) Yeˍsuˆ kaꞈ Yaˬhoˉvaˬ htaꞈ shuˍ ve yoˬ. Yawˇ suh taˍ ve chaw htaꞈ kʼawꞈ teꞈ tu la piˇ gaˇ leh yawˇ kanˇ paˆ cawˬ leh ka tiꞈ te taˍ ve hkʼe te gʼa ve yoˬ. Yeˍsuˆ hawˬ ve ngaˬ hui shiˍ tuˬ te laˇ ve lehˬ, yawˇ suh taˍ ve chaw htaꞈ kʼawꞈ teꞈ tu la piˇ gaˇ leh chaw yaˇ tuꞈ ve hkanˍ ve suh ve teˇ ceuˬ htaꞈ kaꞈ Yeˍsuˆ te luˬ piˇ gaˇ jaˇ ve yoˬ. Leh Laˍzaˍruˆ tuˍ hpfuh hkʼaw tawˆ la htaˇ, Yeˍsuˆ kanˇ paˇ cawˬ leh suh taˍ ve chaw htaꞈ kʼawꞈ teꞈ tu la piˇ gʼa ve tehꞈ ngaˬ hui gʼa mawˬ ve yoˬ. Chi hkʼoˆ kaꞈ, Yeˍsuˆ Maˍhtaˆ htaꞈ kʼoˆ piˇ ve awˬ lawn htaꞈ dawˇ nyi sheˍ. Yaꞈ nyi ve Liꞈ hpu awˬ tawn hkʼaw awˬ lawn oˇ ve htaꞈ kʼoˆ maˍ laˇ taˍ ve yoˬ. Chi htaꞈ pa taw, kʼawꞈ teꞈ tu la ve awˬ lawn awˬ tehˬ awˬ na hpehꞈ la tuˬ yoˬ tehꞈ Yaˬhoˉvaˬ ka tiꞈ te taˍ laˇ ve htaꞈ ngaˬ hui hkʼa dehꞈ yonˍ gʼa ve yoˬ. w23.04 11-12 ¶15-16

Yaˬhoˉvaˬ aˬ htoꞈ ma loˍ ve ngaˬ hui hkʼa dehꞈ shiˍ htaˇ, ngaˬ hui ve bon lawˬ hkawˇ hkʼaw yawˇ a loˍ cawˇ ve hkʼe gʼa lawˬ ve yoˬ. Yaˬhoˉvaˬ ve a loˍ biˇ la tuˬ yawˇ tinˍ taˍ ve awˬ yanˇ gaˬ kʼo, awˬ tehˬ hpehꞈ la tuˬ yoˬ tehꞈ ngaˬ hui tawnˇ taˍ cawˇ ve yoˬ. Yawˇ te luˬ gaˇ jaˇ ve awˬ ceuˬ lehˬ, mvuhˇ yeˬ mvuhˇ haw lonˉ, naˬ ve gawˬ ve, leh suh ve chi ve teˇ hpaˍ yoˬ. Yaˬhoˉvaˬ yawˇ ve mvuhˇ miˬ htaꞈ cuˇ leh yawˇ ve a loˍ biˇ la tuˬ awˬ tehˬ te tuˬ yoˬ. (Daˍ 2:44; Hpeuꞈ 21:3, 4) Yaꞈ hkʼaˇ, oˇ ve teˇ yanˇ maˇ gaˬ sheˍ htaˇ, Yaˬhoˉvaˬ lehˬ miˬ guiˬ chi Saˍtanˍ htaꞈ uˉ peunˍ tcuh sheˍ ve yoˬ. (Yoˇ 12:31; Hpeuꞈ 12:9) Yaˬhoˉvaˬ lehˬ chaw yaˇ gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ chi teˇ hkui kaꞈ gu laˇ ve kʼo, Saˍtanˍ uˉ peunˍ ve daꞈ jaˇ ve htaꞈ shuˍ ve yoˬ. Chi htaꞈ pa taw, Yaˬhoˉvaˬ ka tiꞈ te taˍ ve awˬ tehˬ hpehꞈ la tuˬ ngaˬ hui gʼa law cawˇ ve yoˬ. Chi lehˬ ngaˬ hui law chehˇ ve awˬ yanˇ htaˇ, yawˇ ngaˬ hui htaꞈ maˇ ga laˇ tuˬ ve tehꞈ kʼoˆ gaˇ ve maˇ heˆ. Yaˬhoˉvaˬ ngaˬ hui htaꞈ nyi haꞈ shaˉ laˇ tuˬ yoˬ. w23.05 8-10 ¶4, 7-8

Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ hkʼaw ngaˬ hui awˬ nu ve chaw awˬ bon gʼa tuˬ hkʼaˬ hkʼe ga piˇ gʼa ve le? Teˇ ceuˬ lehˬ, ngaˬ hui yawˇ hui htaꞈ gʼa jehˬ piˇ ve yoˬ. Ngaˬ hui teˇ yehˬ peuˬ teˇ yehˬ jehˬ piˇ ve, awˬ hkʼoˆ kaꞈ ngaˬ hui jehˬ piˇ gaˇ ve chaw awˬ meh kaꞈ bvuhꞈ tawˆ la leh jehˬ piˇ gʼa ve yoˬ. Tawˇ pa haˉ te kʼo, awˬ suhˍ awˬ shaˍ hpawˇ ve awˬ viˉ awˬ nyi, kanˉ te kuiˬ lo ve awˬ chawˇ, maˇ heˆ leh liꞈ henˇ yehˬ lo ve awˬ chawˇ htaꞈ jehˬ piˇ gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve jehˬ piˇ ve liꞈ kʼoˆ ehˉ maˇ lawꞈ ve htawˇ, tawˇ yaw tuˬ awˬ hkʼeun hkʼaw jehˬ piˇ ve liꞈ kʼoˆ ehˉ feu piˇ gʼa ve yoˬ. Ngaˬ hui coˇ caˇ leh chi hkʼe te ve kʼo, Yeˍsuˆ suh ve dawˇ nawˇ tuˬ hpawnˬ daꞈ ve, chi ve hkʼaw ngaˬ hui dawˇ taˍ ve aꞈ kehˉ chaw laˬ maˇ jaˇ tuˬ yoˬ hehˉ! (Cuˇ 11:6) Ngaˬ hui jehˬ piˇ ve chaw maˇ hpawnˬ daꞈ la jaw sheˍ ve kʼo, na hkawˇ cawˬ tuˬ yoˬ tehꞈ tawnˇ taˍ sheˍ. Yawˇ ve na hkawˇ htaꞈ hkʼawꞈ piˇ tuˬ ngaˬ hui kaꞈ gu hehnˇ taˍ gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve peuˬ hkʼawꞈ nawˉ, nyi ma pfuhˇ ve chaw na hkawˇ cawˬ tuˬ yoˬ hehˉ. Hpawnˬ daꞈ ve maˇ gaˬ sheˍ htaˇ leh hpawnˬ daꞈ ve awˬ yanˇ hkʼaw leh, hpawnˬ daꞈ ve peuˬ hkʼawꞈ nawˉ yawˇ hui hta ngaˬ hui te gʼa ve hkʼe ga piˇ gaˇ ve yoˬ.—Tcuh 13:48. w24.01 12-13 ¶13, 15; 13 ¶16

Liꞈ hpu hkʼaw chaw yaˇ 8 gʼaˇ kʼawꞈ teꞈ tu la ve awˬ lawn kʼoˆ taˍ ve yoˬ. Teˇ lawn leh teˇ lawn htaꞈ henˇ leh hpfuhˆ nyi sheˍ. Nawˬ chi hkʼe te htaˇ, yawˇ hui ve awˬ lawn aˬ htoꞈ ma gʼa henˇ ve htaꞈ dawˇ nyi sheˍ. Yawˇ hui ve awˬ lawn nawˬ gʼaw htaˇ, Yaˬhoˉvaˬ yawˇ hui htaꞈ kʼawꞈ teꞈ tu la piˇ tcuh gaˇ jaˇ leh yawˇ kanˇ paˆ cawˬ leh awˬ tehˬ awˬ na te gʼa ve tehꞈ nawˬ dawˇ nyi sheˍ. A yeˇ uiˍ jaˇ ve lehˬ, Yeˍsuˆ kʼawꞈ teꞈ tu la ve htaꞈ caˉ daꞈ ve henˇ leh hpfuhˆ nyi sheˍ. Yeˍsuˆ kʼawꞈ teꞈ tu la ve htaꞈ chaw laiˉ han gʼaˇ gʼa mawˬ ve htaꞈ tawnˇ taˍ sheˍ. Yeˍsuˆ kʼawꞈ teꞈ tu la ve awˬ lawn lehˬ, awˬ gʼuˇ suhˍ hpawˇ suh taˍ ve chaw kʼawꞈ teꞈ tu la tuˬ yoˬ tehꞈ ngaˬ hui yonˍ gʼa tuˬ te laˇ ve yoˬ. (1 Kawˇ 15:3-6, 20-22) Kʼawꞈ teꞈ tu la ve awˬ lawn ka tiꞈ te taˍ laˇ ve ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Yaˬhoˉvaˬ suh taˍ ve chaw htaꞈ kʼawꞈ teꞈ tu la piˇ tcuh gaˇ ve tehꞈ, ngaˬ hui awˬ tehˬ awˬ na hkʼa dehꞈ yonˍ gʼa ve yoˬ. Leh Yaˬhoˉvaˬ chi hkʼe te tuˬ kanˇ paˆ cawˬ ve yoˬ. Ngaˬ hui dawˇ law kuiˬ chi htaꞈ hkʼa dehꞈ yonˍ gʼa tuˬ coˇ caˇ leh teˇ ceuˬ ceuˬ te sheˍ. Ngaˬ hui chi hkʼe te ve kʼo, Yaˬhoˉvaˬ geh meuˆ daꞈ maˇ la tuˬ yoˬ. Yawˇ ngaˬ hui teˇ gʼaˇ le le htaꞈ ka tiꞈ te laˇ ve, ‘nawˬ haꞈ ve chaw suh˗oˬ ve kʼawꞈ teꞈ tu la tuˬ yoˬ!’—Yoˇ 11:23. w23.04 8 ¶2; 12-13 ¶17, 20

Nyi ma nuˇ nehˬ ve leh nyi ma taˍ nehˬ ve shuˍ daꞈ jaˇ. Ngaˬ hui nyi ma taˍ nehˬ ve chaw hpehꞈ ve kʼo, ngaˬ hui awˬ to a yeˇ uiˍ jaˇ tehꞈ maˇ shawˍ. Ngaˬ hkʼaˬ hkʼe taw te gʼa ve htaꞈ shiˍ ve yoˬ. Leh ngaˬ hui nyi ma nuˇ nehˬ ve chaw hpehꞈ ve kʼo, ngaˬ hui awˬ to aꞈ kehˉ shu htaꞈ taˍ uiˍ taˍ mvuh piˇ ve yoˬ. (Hpi 2:3) Maˇ˗awˍ ve kʼo a shu yawˇ awˬ to htaꞈ taˍ nehˬ ve chaw lehˬ nyi ma nuˇ nehˬ ve chaw hpehꞈ ve yoˬ. Giˉdonˍ lehˬ nyi ma nuˇ nehˬ leh nyi ma taˍ nehˬ ve yoˬ. Yaˬhoˉvaˬ mvuhˇ naw ma tcuh yaˇ htaꞈ cuˇ leh Giˉdonˍ htaꞈ kʼoˆ piˇ tcuh ve, Iˉsaˍreˍlaˆ chaw lehˬ Meˇdiˍanˍ chaw awˬ gʼaˇ uiˍ ve htaꞈ ponˬ piˇ tuˬ yawˇ htaꞈ leuˆ yuˬ leh ga piˇ tcuh ve yoˬ. Giˉdonˍ nyi ma nuˇ nehˬ ve hkʼaw kʼoˆ ve, “Maˍnaˍseˍ awˬ ceuˬ awˬ hkʼaˇ awˬ hkʼaw lo, ngaˬ ve chaw teˇ hpaˍ lehˬ shu aꞈ kehˉ i jaˇ ve yoˬ. Ngaˬ htawˇ kaꞈ, ngaˬ ve yehˬ hkʼaw lo shu aꞈ kehˉ i jaˇ ve chaw teˇ gʼaˇ hpehꞈ ve yoˬ.” (Suhˉ 6:15) Giˉdonˍ lehˬ Gʼuiˬ sha yawˇ htaꞈ awˬ vuiˬ te tcuh laˇ taˍ ve htaꞈ maˇ keunˍ tehꞈ dawˇ ve yoˬ. Yaꞈ hkʼaˇ, yawˇ te gʼa ve tehꞈ Gʼuiˬ sha shiˍ ve yoˬ. Leh Yaˬhoˉvaˬ yawˇ htaꞈ ga piˇ ve pa taw yawˇ ve awˬ vuiˬ htaꞈ hkʼa dehꞈ te gʼa ve yoˬ. Nyi haꞈ shaˉ paˍ nyi ma nuˇ nehˬ ve, leh nyi ma taˍ nehˬ tuˬ gʼa coˇ caˇ jaˇ. (Tcuh 20:18, 19) Yawˇ hui cheuˬ ve maˇ heˆ leh te gʼa ve htaꞈ maˇ chiˇ mvuh laˇ tcuh gaˇ. Yawˇ hui teˇ ceuˬ ceuˬ te yaꞈ htaˇ, yawˇ hui kanˉ te tawˆ la ve hkʼa dehꞈ maˇ daꞈ ve pa taw, yawˇ hui awˬ to awˬ hpfuhˇ maˇ cawˬ ve tehꞈ maˇ dawˇ. w23.06 3 ¶4-5

Saˍtanˍ ve oˉ kʼoˍ htaꞈ dawˆ nehˆ tuˬ ve lehˬ, 1,000 hkʼawꞈ peuˬ hkʼawꞈ nawˉ awˬ tehˬ hpehꞈ la tuˬ yoˬ. (Hpeuꞈ 20:7-10) Chi hkʼe maˇ hpehꞈ sheˍ htaˇ, miˬ guiˬ hkʼoˆ lo chaw yaˇ hkʼa peu˗eˬ htaꞈ heuˆ la kuiˬ cawˬ tuˬ ve awˬ lawn Liꞈ hpu hkʼaw awˬ gʼuˇ suhˍ htaˇ kaꞈ kʼoˆ laˇ taˍ ve yoˬ. Awˉ lawˉ htaˇ, maˇ maw ve awˬ yanˇ hkʼaw ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ’ tehꞈ mvuhˇ miˬ teˇ hpaˍ kʼoˆ laˇ tuˬ yoˬ. (1 Hteˇ 5:2, 3) Leh peuˬ hkʼawꞈ nawˉ “teˇ cawˬ haˉ” mvuhˇ miˬ teˇ hpaˍ maˇ heˆ heˆ ve bon liˇ hkʼa peu˗eˬ htaꞈ te luˬ tuˬ yoˬ. Leh tuꞈ jaˇ hkanˍ jaˇ ve oˇ htaˇ tanˬ tuˬ yoˬ. (Hpeuꞈ 17:16) Peuˬ hkʼawꞈ nawˉ Yeˍsuˆ chaw yaˇ htaꞈ yawˬ hawˉ paˍ aˉ cheꞈ leh yawˬ htaꞈ pehˬ daꞈ ve hkʼa shuˍ te tuˬ yoˬ. (Maꞈ 25:31-33, 46) Oˇ ve teˇ yanˇ Saˍtanˍ taꞈ iˉ maˇ chehˇ taˬ. Yawˇ Yaˬhoˉvaˬ htaꞈ gʼaˇ hteꞈ tawˍ daꞈ tuˬ yoˬ. Leh yawˇ Yaˬhoˉvaˬ ve kanˉ te ve chaw htaꞈ nyi bawˬ jaˇ. Yawˇ mvuhˇ miˬ teˇ hpaˍ htaꞈ pawnˇ daꞈ tuˬ dawˇ pawnˍ piˇ ve yoˬ. Chi ve lehˬ Gʼuiˬ sha ve chaw htaꞈ te luˬ tuˬ Liꞈ hpu hkʼaw Gawˇgaˆ leh Maˍgawˇgaˆ tehꞈ kʼoˆ ve yoˬ. (Ysk 38:2, 10, 11) Awˬ yanˇ teˇ yanˇ htaˇ, miˬ guiˬ hkʼoˆ lo leuˆ yuˬ taˍ ve leuˉ taˍ ve chaw, Yeˍsuˆ leh mvuhˇ naw ma tcuh yaˇ awˬ moˍ lonˉ geh pawnˇ daꞈ˗e tuˬ, mvuhˇ naw ma hkʼoˆ taˆ˗e ve yoˬ. Leh yawˇ hui Aˍmaˍgeˍdonˍ hkʼaw maꞈ bawˆ tuˬ yoˬ. Chi ve lehˬ, tuꞈ jaˇ hkanˍ jaˇ ve awˬ leh meuˇ teˇ pawˆ hpehꞈ ve yoˬ. (Maꞈ 24:31; Hpeuꞈ 16:14, 16) Chi hkʼoˆ kaꞈ, Yeˍsuˆ uˉ peunˍ ve 1,000 hkʼawꞈ ve awˬ yanˇ kaꞈ tanˬ tuˬ yoˬ.—Hpeuꞈ 20:6. w23.10 20-21 ¶9-10

Chi beuꞈ teˇ co˗e Yaˬhoˉvaˬ ve kanˉ te ve chaw laiˉ gʼaˇ, yawˇ ve kanˉ maˇ te tcuh laˇ kuiˬ mvuhˇ miˬ hkʼaw chehˇ ve yoˬ. Yawˇ hui mvuhˇ miˬ uˉ peunˍ ve awˬ hawˉ lo chehˇ ve yoˬ. Yaꞈ hkʼaˇ, yawˇ hui aˬ htoꞈ ma gʼa hpuˇ ve htawˇ maˇ kʼoˆ, Awˇbaˍdiˆ Yaˬhoˉvaˬ htaꞈ oˉ kʼoˍ pui ve hkʼe yawˇ hui kaꞈ pui ve yoˬ. (Maꞈ 22:21) Awˬ viˉ awˬ nyi chi teˇ hpaˍ Yaˬhoˉvaˬ htaꞈ kawˆ leh yawˆ yan ve pa taw, chaw yaˇ ve tawˇ hkawˇ aꞈ kehˉ Yaˬhoˉvaˬ ve tawˇ hkawˇ htaꞈ na yuˬ ve yoˬ. (Tcuh 5:29) Yawˇ hui chi hkʼe te gʼa tuˬ maˇ sha ve htawˇ, hto toˇ ve, leh hpawnˬ daꞈ ve hkʼaˬ htaˆ kaꞈ coˇ caˇ leh te ve yoˬ. (Maꞈ 10:16, 28) Chi hkʼoˆ kaꞈ, awˬ viˉ awˬ nyi yonˍ hkʼaˇ yonˍ yeˬ leh Yaˬhoˉvaˬ geh caˉ leh meuˆ daꞈ tuˬ, awˬ viˉ awˬ nyi loˍ ve awˬ ceuˬ htaꞈ yawˇ hui ga piˇ ve yoˬ. Aˍfaˍriˆkaˆ miˬ guiˬ lo ngaˬ hui ve kanˉ teˇ tcuhˉ teˇ yanˇ maˇ te tcuh laˇ kuiˬ lo chehˇ ve Awn˗li ve awˬ lawn htaꞈ teˇ geh nyi sheˍ. Oˇ ve teˇ yanˇ Awn˗li Gʼuiˬ sha ve kanˉ hkʼaˇ hkʼaw ve liꞈ awˬ viˉ awˬ nyi htaꞈ ca yuˬ piˇ ve yoˬ. Yawˇ kʼoˆ ve, “awˬ tehˬ kʼo ngaˬ yaꞈ taw puiˉ jaˇ. Ngaˬ chi hkʼe te haˆ ve lehˬ Yaˬhoˉvaˬ htaꞈ yawˆ yan ve pa taw yoˬ.” Nawˬ Awn˗li hpehꞈ ve kʼo yawˇ hkʼa shuˍ haꞈ hanˉ gʼa˗aw laˇ? Nawˬ chi teˇ hkui kaꞈ Yaˬhoˉvaˬ htaꞈ kawˆ leh yawˆ yan ve kʼo, haꞈ hanˉ gʼa tuˬ yoˬ. w23.06 16 ¶9; 17 ¶11

Aˍdanˍ leh Eˇvaꞈ Gʼuiˬ sha htaꞈ hpfuhˆ ve teˇ yanˇ htaˇ, miˬ guiˬ hkʼoˆ lo Yaˬhoˉvaˬ ve a loˍ htaꞈ te biˇ ve chaw yaˇ htaꞈ Saˍtanˍ tawˍ piˇ gʼa ve tehꞈ ngaˬ hui dawˇ la gʼa ve yoˬ hehˉ. Yaˬhoˉvaˬ leuˆ te tuˬ ve awˬ hkʼaˇ maˇ maˇ tehꞈ Saˍtanˍ dawˇ ve yoˬ. Yaˬhoˉvaˬ gʼa te cawˇ ve teˇ hkʼaˇ lehˬ, yawˇ Aˍdanˍ leh Eˇvaꞈ htaꞈ gʼa tiˇ pehˍ leh Yaˬhoˉvaˬ ve a loˍ biˇ la tuˬ, biˇ ve chaw yaˇ gʼa kʼawꞈ te hpanˍ ve yoˬ. Yaꞈ hkʼaˇ, Yaˬhoˉvaˬ chi hkʼe te ve kʼo, yawˇ heˍ ve tehꞈ Saˍtanˍ kʼoˆ gʼa ve yoˬ. Aˬ htoꞈ ma pa taw le? Awˬ lawn kʼo, Awˬ hkuiˉ puiˍ ve liꞈ 1:28 hkʼaw kʼoˆ taˍ ve hkʼe, Yaˬhoˉvaˬ Aˍdanˍ leh Eˇvaꞈ htaꞈ kʼoˆ piˇ ve, nawˬ huiˉ maˬ ve awˬ yaˇ awˬ duˬ miˬ guiˬ hkʼoˆ lo maˇ maˇ cawˬ la tuˬ yoˬ. Maˇ heˆ leh Yaˬhoˉvaˬ lehˬ Aˍdanˍ leh Eˇvaꞈ htaꞈ yaˇ cawˬ tcuh ve tehꞈ Saˍtanˍ dawˇ ve yoˬ hehˉ. Yaꞈ hkʼaˇ, yawˇ hui ve awˬ yaˇ awˬ duˬ lehˬ maˇ biˇ ve chaw hpehꞈ ve yoˬ. (Cuˇ 7:20; Roˉ 3:23) Chi hkʼe hpehꞈ htaˇ, miˬ guiˬ hkʼoˆ lo chaw yaˇ maˇ biˇ ve ceh tiˉ cawˬ ve pa taw, Yaˬhoˉvaˬ yawˇ dawˇ taˍ ve hkʼe te maˇ gʼa taˬ tehꞈ Saˍtanˍ kʼoˆ ve yoˬ. w23.11 6 ¶15-16

Yaˬhoˉvaˬ lehˬ Liꞈ hpu leh yawˇ ve kanˉ hkʼaˇ htaꞈ cuˇ leh ngaˬ hui htaꞈ hkʼa tawˍ lehˆ beˆ maˍ laˇ taˍ ve yoˬ. Chi lehˬ ngaˬ hui awˬ leuˉ kʼawꞈ keu tuˬ maˇ loˍ. (Tawˇ 3:5-7) Chi htaꞈ pa taw, Liꞈ hpu hkʼaw maˇ gʼa kʼoˆ laˇ taˍ ve, awˬ liˇ awˬ hkʼaˇ awˬ leuˉ ngaˬ hui maˇ gʼa keu leh a shu yawˇ hkʼaˇ yawˇ ve awˬ liˇ awˬ viˉ awˬ nyi htaꞈ maˇ gʼa teh piˇ. Saˍtanˍ lehˬ chaw yaˇ maˇ cawˇ maˇ hawˍ daꞈ tuˬ leh maˇ daꞈ ve htaꞈ te tuˬ “tcuhˉ kuiˬ maˇ cawˬ ve heˍ ve tawˇ hkawˇ” leh “miˬ guiˬ htaꞈ caˉ daꞈ ve dawˇ hkʼaˇ” htaꞈ yehˇ ve yoˬ. (Kawˇ 2:8) Awˉ lawˉ peuˇ teˇ co˗e htaˇ awˬ ceuˬ chi teˇ hpaˍ lehˬ, chaw yaˇ ve cuˇ yiˍ, Yuˇdaꞈ chaw maˍ ve Liꞈ hpu hkʼaw maˍ ve htaꞈ maˇ shuˍ daꞈ leh, Hkriꞈ yaˇ Moˉseˍ ve awˬ liˇ tawˇ hkawˇ htaꞈ gʼaꞈ te tehꞈ kʼoˆ maˍ ve kaꞈ maˇ shuˍ daꞈ ve yoˬ. Awˬ ceuˬ chi teˇ hpaˍ lehˬ heˍ ve tawˇ hkawˇ hpehꞈ ve pa taw, Yaˬhoˉvaˬ cuˇ yiˍ maˍ yiˍ peꞈ laˇ shehˍ hpaˇ htaꞈ chaw yaˇ a yeˇ maˇ te tuˬ Saˍtanˍ te piˇ ve yoˬ. Chi beuꞈ teˇ co˗e Saˍtanˍ yehˇ ve lehˬ, chaw yaˇ ve dawˇ hkʼaˇ leh mvuhˇ miˬ kanˉ te paˍ geh laˬ ve awˬ lawn sha tanˇ maˇ heˆ heˆ ve, leh in˗teu˗neꞈ hkʼaw leh awˬ han teˇ hpaˍ hkʼaw hpehꞈ ve yoˬ. w23.07 16-17 ¶11-12

Yaˬhoˉvaˬ gu tuˬ ve awˬ hkʼaˇ lehˬ, Saˍtanˍ dawˇ maˇ gaˬ ve yoˬ hehˉ. Awˬ lawn kʼo, Aˍdanˍ leh Eˇvaꞈ Gʼuiˬ sha htaꞈ hpfuhˆ ve htawˇ, yawˇ ve a loˍ awˬ tehˬ hpehꞈ la tuˬ daꞈ jaˇ ve awˬ hkʼaˇ htaꞈ te tuˬ yoˬ. Yaˬhoˉvaˬ lehˬ Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo maˇ maˇ cawˬ tcuh ve pa taw, yawˇ maˇ heˍ puiˉ ve Gʼuiˬ sha hpehꞈ ve tehꞈ hpeuꞈ maw laˇ ve yoˬ. Chi hkʼoˆ kaꞈ, Aˍdanˍ leh Eˇvaꞈ ve awˬ yaˇ awˬ duˬ na yuˬ ve chaw gʼa ponˬ tuˬ, yawˇ hui ve “awˬ yaˇ awˬ duˬ” teˇ gʼaˇ Gʼuiˬ sha gu teh taˍ laˇ ve pa taw, yawˇ dawˇ taˍ ve hkʼe te gʼa ve tehꞈ hpeuꞈ maw laˇ ve yoˬ. (Awˬ 3:15; 22:18) Gu teh taˍ laˇ ve chi htaꞈ Saˍtanˍ lehˬ cheˆ˗ehˬ kʼai tuˬ yoˬ hehˉ. Awˬ lawn kʼo, chi Yaˬhoˉvaˬ haꞈ pehnˇ ve tehꞈ hpeuꞈ maw laˇ ve yoˬ. Saˍtanˍ lehˬ haꞈ pehnˇ ve chi hkʼe ve maˇ cawˬ jaw. (Maꞈ 20:28; Yoˇ 3:16) Yeˍsuˆ uˉ peunˍ ve 1,000 hkʼawꞈ peuˬ hkʼawꞈ nawˉ, gu teh taˍ ve htaiˍ hkʼawꞈ laˇ ve chi hkʼaˬ hkʼe hpehꞈ la tcuh tuˬ le? Aˍdanˍ leh Eˇvaꞈ ve awˬ yaˇ awˬ duˬ na yuˬ ve biˇ ve chaw hpehꞈ tcuh tuˬ yoˬ. Yaˬhoˉvaˬ awˉ lawˉ htaˇ kaꞈ dawˇ teh taˍ ve hkʼe, yawˇ hui miˬ guiˬ awˬ suhˉ hkʼaw gʼa chehˇ tuˬ yoˬ. w23.11 6-7 ¶17

A shaꞈ leh awˬ suhˍ ve awˬ lawn ngaˬ hui Yaˬhoˉvaˬ ve awˬ liˇ tawˇ hkawˇ htaꞈ na yuˬ cawˇ ve yoˬ. Aˬ htoꞈ ma pa taw le? Awˬ lawn kʼo, awˬ suhˍ lehˬ a shaꞈ htaꞈ kʼoˆ gaˇ ve yoˬ. Chi lehˬ Yaˬhoˉvaˬ geh gʼa ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. (Oˉ 17:14) Yaˬhoˉvaˬ chaw yaˇ htaꞈ to nuˇ to shaˆ ve awˬ shaˍ caˇ tcuh ve awˉ lawˉ teˇ pawˆ htaˇ, awˬ suhˍ taˇ caˇ tehꞈ kʼoˆ piˇ ve yoˬ. (Awˬ 9:4) Peuˬ hkʼawꞈ nawˉ Moˉseˍ ve awˬ liˇ tawˇ hkawˇ hkʼaw awˬ suhˍ ve awˬ lawn hkʼa tawˍ lehˆ bvuhꞈ keu tcuh taˍ ve yoˬ. (Oˉ 17:10) Awˉ lawˉ peuˇ ve Hkriꞈ yaˇ teˇ co˗e htaˇ gaˬ leh Yaˬhoˉvaˬ uˉ peunˍ ve kawˍmiˍtiˍ htaꞈ beˆ maˍ piˇ leh Hkriꞈ yaˇ teˇ gʼaˇ le le ‘awˬ suhˍ htaꞈ taˇ caˇ’ tehꞈ kʼoˆ piˇ tcuh ve yoˬ. (Tcuh 15:28, 29) Ngaˬ hui naˆ tsuhˇ yehˬ lo haꞈ shaˉ tuˬ awˬ lawn dawˇ cheˆ htaˇ, awˬ lawn chi ve, chi beuꞈ teˇ ce˗e ngaˬ hui na yuˬ leh yonˍ yeˬ cawˇ ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ kaꞈ hkʼaˬ htaˆ kaꞈ gʼaꞈ te ve yoˬ. Tcuh yaˇ Pawˇluꞈ ngaˬ hui htaꞈ beˆ maˍ laˇ ve, “miˬ guiˬ htaꞈ caˉ daꞈ ve awˬ ceuˬ teˇ hpaˍ htaꞈ tiˇ pehˍ˗oꞈ.” Chi ve lehˬ, ngaˬ hui maˇ daꞈ ve te gaˇ ve nyi ma cawˬ ve htaꞈ coˇ caˇ leh gʼa yuˬ baˬ ve htaꞈ kʼoˆ gaˇ ve yoˬ. Ngaˬ hui haˉ chawˇ haˉ paˆ te la ve awˬ ceuˬ htaꞈ maˇ nyi leh maˇ te ve yoˬ.—Kawˇ 3:5; Yb 31:1. w23.07 15 ¶5-6

Sanˍsonˍ Deˍleˍlaˆ htaꞈ haꞈ jaˇ ve pa taw, yawˇ hkʼaˬ hkʼe dawˇ ve htaꞈ a yeˇ maˇ te ve laˇ? Nawˬ awˬ gʼaˇ hkʼaˬ hkʼe te leh chi taw taw uiˍ ve yawˇ htaꞈ kʼoˆ laˇ tuˬ hkʼaˬ htaˆ kaꞈ beˬ na piˇ ve pa taw, yawˇ htaꞈ hteˇ lehˍ kʼoˆ piˇ ve yoˬ. Sanˍsonˍ yawˇ te yaꞈ ve pa taw, yawˇ ve awˬ gʼaˇ awˬ shaˉ nuˇ kʼai leh Yaˬhoˉvaˬ yawˇ htaꞈ teˇ tcuhˉ teˇ yanˇ chiˇ baˬ peuˬ ve tehꞈ yawˇ maˇ shiˍ ve yoˬ. (Suhˉ 16:16-20) Sanˍsonˍ Yaˬhoˉvaˬ ve hkawˇ na ve aꞈ kehˉ Deˍleˍlaˆ ve hkawˇ na ve pa taw, yawˇ luˬ ve sheˆ ve gʼa hpuˇ ve yoˬ. Sanˍsonˍ htaꞈ Hpiˇliˇtiˆ chaw hpeh yuˬ leh mehˆ shiˍ 2 paˉ paˉ juˆ peꞈ piˇ ve yoˬ. Yawˇ hui Gaˍsaˍ venˇ lo Sanˍsonˍ htaꞈ haw tiˍ piˇ ve yoˬ. Leh yawˇ hui Sanˍsonˍ htaꞈ awˬ ceˬ hkʼe kanˉ te tcuh leh htawnˍ hkʼaw lo ve caˬ geuˆ tcuh ve yoˬ. Yawˇ hui Sanˍsonˍ htaꞈ hpeh yuˬ gʼa ve lehˬ, Daˍgonˍ gʼuiˬ sha ga laˇ ve tehꞈ yonˍ ve pa taw, Hpiˇliˇtiˆ chaw hui Daˍgonˍ gʼuiˬ sha htaꞈ ha lehˬ ha kʼa tuˉ tanˇ piˇ ve yoˬ. Yawˇ hui Sanˍsonˍ htaꞈ htawnˍ hkʼaw lo yuˬ tawˆ la tcuh leh Sanˍsonˍ htaꞈ “hkʼa mvuhˇ hkʼa na” te piˇ ve yoˬ.—Suhˉ 16:21-25. w23.09 5-6 ¶13-14

Teˇ pawˆ pawˆ kʼo liꞈ henˇ kuiˬ lo ve awˬ chawˇ, maˇ heˆ leh kanˉ te kuiˬ lo ve awˬ chawˇ, Liꞈ hpu hkʼaw ve awˬ liˇ awˬ hkʼaˇ htaꞈ caˉ daꞈ ve ngaˬ hui htaꞈ na laˇ ve yoˬ hehˉ. Liꞈ hpu hkʼaw ve awˬ liˇ awˬ hkʼaˇ daꞈ jaˇ ve tehꞈ, ngaˬ hui coˇ caˇ leh yawˇ htaꞈ kʼoˆ maˍ piˇ ve yoˬ. Yaꞈ hkʼaˇ, yawˇ ve dawˇ hkʼaˇ htaꞈ ngaˬ hui yawˆ yan piˇ cawˇ ve yoˬ. (1 Peˍ 3:15) Chi htaꞈ pa taw, ngaˬ hui geh awˬ lawn cawˬ gaˇ ve, maˇ heˆ leh lawˇ nyi laˇ gaˇ ve tehꞈ dawˇ ve aꞈ kehˉ yawˇ na laˇ ve lehˬ, ngaˬ hui yawˇ geh leuˉ leh kʼawꞈ shiˍ daꞈ gaˇ tuˬ te laˇ ve tehꞈ dawˇ sheˍ. Yaꞈ hkʼaˇ, na laˇ ve chaw aˬ htoꞈ ma awˬ hkʼaˇ hpehꞈ ve htawˇ maˇ kʼoˆ, ngaˬ hui coˇ caˇ leh nyi ma nuˇ nehˬ ve hkʼaw hkʼawꞈ piˇ cawˇ ve yoˬ. Ngaˬ hui hkʼawꞈ piˇ ve lehˬ, yawˇ yonˍ ve awˬ ceuˬ awˬ hkʼaˇ cawˬ˗aw laˇ tehꞈ, dawˇ nyi tuˬ te piˇ ve yoˬ. Awˬ nu ve chaw ngaˬ hui htaꞈ na laˇ htaˇ, yawˇ aˬ htoꞈ ma pa taw na laˇ ve tehꞈ, ngaˬ hui dawˇ nyi tuˬ a yeˇ uiˍ jaˇ. Tawˇ pa haˉ te kʼo, kanˉ teˇ geh te ve awˬ chawˇ, aˬ htoꞈ ma pa taw ngaˬ hui paw ve awˬ nyi maˇ te ve le tehꞈ na laˇ ve kʼo, Shaˉhkiˆhkanˍ ve chaw pyawˍ ve awˬ ceuˬ maˇ te gʼa ve tehꞈ, yawˇ htawˇ dawˇ nawˬ dawˇ cawˬ ve laˇ tehꞈ dawˇ nyi sheˍ. Chi hkʼe hpehꞈ ve kʼo, yawˇ maˇ dawˇ hkiˉ jaˇ tuˬ ga piˇ gʼa ve lehˬ, kanˉ te kuiˬ lo yawˇ awˬ nu ve awˬ chawˇ htaꞈ a yeˇ yuˬ piˇ ve, awˬ bon uiˍ jaˇ tehꞈ kʼoˆ piˇ gʼa ve yoˬ. Chi hkʼe te ve lehˬ Liꞈ hpu hkʼaw paw ve awˬ nyi te ve htaꞈ hkʼaˬ hkʼe kʼoˆ taˍ ve yawˇ geh yaw daꞈ gʼa tuˬ ga laˇ gʼa ve yoˬ. w23.09 17 ¶10-11

Chi teˇ hkui leuˉ taˍ ve awˬ yanˇ miˬ guiˬ hkʼoˆ lo teˇ gʼaˇ le le htaꞈ hto maˍ piˇ tuˬ, ngaˬ hui daꞈ jaˇ ve awˬ vuiˬ gʼa ve yoˬ. Tcuh yaˇ Peˍtruˆ ngaˬ hui htaꞈ “Gʼuiˬ sha ve awˬ nyi htaꞈ law taˍ leh dawˇ law” chehˇ tuˬ awˬ gʼaˇ peꞈ laˇ ve yoˬ. (2 Peˍ 3:11, 12) Chi ve ngaˬ hui hkʼaˬ hkʼe te gʼa tuˬ le? Hpehꞈ gʼa ve kʼo miˬ guiˬ awˬ suhˉ hkʼaw ve a shaꞈ hkʼaˬ hkʼe hpehꞈ tuˬ, teˇ nyi le le ngaˬ hui hkʼa dehꞈ dawˇ nyi cawˇ ve yoˬ. Daꞈ jaˇ ve mvuhˇ haw awˬ shaˉ, awˬ bon cawˬ ve caˇ tuˬ mehˬ jaˇ ve, nawˬ haꞈ ve chaw kʼawꞈ teꞈ tu la ve htaꞈ haꞈ yuˬ piˇ ve, chi teˇ hpaˍ htaꞈ dawˇ mawˬ gʼa ve yoˬ. Leh Liꞈ hpu hkʼaw tcuh kaˍ paˍ ve tawˇ hkawˇ awˬ tehˬ hpehꞈ la˗oˬ ve htaꞈ caˉ daꞈ ve, ponˬ laˬ ve laiˉ hinˉ hkʼawꞈ htaˇ a shaꞈ teꞈ chehˇ jaw ve chaw htaꞈ gʼa maˍ piˇ ve htaꞈ kaꞈ dawˇ mawˬ gʼa ve yoˬ. Awˬ ceuˬ chi ve teˇ hpaˍ htaꞈ dawˇ nyi ve lehˬ, Yaˬhoˉvaˬ ve awˬ nyi htaꞈ law taˍ leh dawˇ nyi tcuhˉ taˍ tuˬ ga laˇ leh haiˬ ve miˬ guiˬ chi htaꞈ te luˬ tuˬ yoˬ tehꞈ yonˍ gʼa ve yoˬ. Awˬ gʼuˇ suhˍ hpawˇ daꞈ jaˇ ve awˬ ceuˬ ngaˬ hui htaꞈ law taˍ ve gʼa shiˍ htaˇ, maˇ heˆ heˆ maˍ ve ‘te yaꞈ ve awˬ hkʼaˇ suh maˇ gʼa sheh kʼai laˇ tuˬ’ gʼa shiˍ ve yoˬ. w23.09 27 ¶5-6

Yaˇ leh yaˇ nehˬ teˇ hpaˍ “awˬ pa awˬ e hkawˇ htaꞈ maˇ na yuˬ ve chaw” geh awˬ chawˇ te ve yoˬ. (2 Tiˆ 3:1, 2) Yaˇ leh yaˇ nehˬ teˇ hpaˍ aˬ htoꞈ ma pa taw, awˬ pa awˬ e hkawˇ maˇ na yuˬ ve le? Yaˇ teˇ hpaˍ hpaˍ kʼo, awˬ pa awˬ e yawˇ hui maˍ laˇ ve hkʼe maˇ gʼaꞈ te ve tehꞈ dawˇ ve yoˬ. Yaꞈ hkʼaˇ, yaˇ teˇ hpaˍ hpaˍ kʼo, awˬ pa awˬ e beˆ maˍ piˇ ve hkawˇ yuˬ yehˇ maˇ gʼa tehꞈ dawˇ ve yoˬ. Leh yawˇ hui maˍ laˇ ve awˬ liˇ awˬ hkʼaˇ hehnˇ jaˇ tehꞈ dawˇ ve yoˬ. Nawˬ yaˇ leh yaˇ nehˬ hpehꞈ ve kʼo, chi hkʼe dawˇ˗aw laˇ? Laiˉ gʼaˇ yaꞈ nyi ve Liꞈ hpu awˬ tawn hkʼaw kʼoˆ taˍ ve hkʼe Yaˬhoˉvaˬ ve tawˇ hkawˇ htaꞈ gʼaꞈ te gʼa tuˬ haˍ jaˇ tehꞈ dawˇ ve yoˬ. Nawˬ Yaˬhoˉvaˬ ve tawˇ hkawˇ htaꞈ gʼaꞈ te gʼa tuˬ aˬ htoꞈ ma ga laˇ gʼa ve le? Awˬ pa awˬ e hkawˇ na yuˬ ve lehˬ, Yeˍsuˆ daꞈ jaˇ ve henˇ yuˬ tuˬ hpehꞈ leh nawˬ kaꞈ yawˇ htaꞈ henˇ yuˬ gʼa ve yoˬ. (1 Peˍ 2:21-24) Yeˍsuˆ lehˬ biˇ jaˇ ve chaw hpehꞈ ve yoˬ. Yaꞈ hkʼaˇ, yawˇ ve awˬ pa awˬ e maˇ biˇ ve chaw hpehꞈ ve yoˬ. Awˬ pa awˬ e yawˇ htaꞈ te yaꞈ leh maˇ na gʼa ve htawˇ, yawˇ awˬ pa awˬ e htaꞈ yawˆ yan piˇ ve yoˬ.—Tawˆ 20:12. w23.10 7 ¶4-5

Tcuh yaˇ Pawˇluꞈ kʼoˆ ve, Moˉseˍ ve awˬ liˇ tawˇ hkawˇ tuˉ tanˇ ve hkʼe tuˉ tanˇ ve lehˬ, venˇ baˆ hkʼa peu˗eˬ htaꞈ ponˬ laˇ maˇ gʼa ve yoˬ. Ponˬ laˬ htaˇ Moˉseˍ ve awˬ liˇ tawˇ hkawˇ piˇ taˍ ve htaꞈ maˇ kʼawꞈ te˗o. Chi htaꞈ pa taw, Pawˇluꞈ lehˬ Hkriꞈ yaˇ chi teˇ hpaˍ htaꞈ Liꞈ hpu hkʼaw tcuhˉ kuiˬ naˉ ve tawˇ hkawˇ htaꞈ caˉ daꞈ ve maˍ piˇ ve yoˬ. Hkʼe te leh, Pawˇluꞈ yawˇ hui htaꞈ “oˇ ve aꞈ kehˉ daꞈ leuˉ ve dawˇ law tuˬ” htaꞈ dawˇ nyi tuˬ shaˍ tiꞈ piˇ ve yoˬ. Chi ve htaꞈ Yeˍsuˆ htaiˍ hkʼawꞈ laˇ ve awˬ tehˬ hpehꞈ gʼa leh yawˇ hui “Gʼuiˬ sha geh lo jiˆ kʼai hpehꞈ” tuˬ kaꞈ ga piˇ ve yoˬ. (Heˍ 7:19) Hkriꞈ yaˇ oˉ kʼoˍ pui ve lehˬ, Yuˇdaꞈ chaw ve oˉ kʼoˍ pui ve aꞈ kehˉ daꞈ ve tehꞈ Pawˇluꞈ Heˍbrehˇ chaw Hkriꞈ yaˇ htaꞈ kʼoˆ maˍ piˇ ve yoˬ. Moˉseˍ ve awˬ liˇ tawˇ hkawˇ piˇ taˍ ve hkʼe, Yuˇdaꞈ chaw oˉ kʼoˍ pui ve lehˬ, “gaˬ la tuˬ ve awˬ ceuˬ teˇ hpaˍ ve aˉ gʼuiˬ ha ceh tiˉ hpehꞈ ve yoˬ. Yaꞈ hkʼaˇ, awˬ tehˬ awˬ na ve awˬ ceuˬ lehˬ, Hkriꞈ awˬ hkʼaw lo cawˬ ve yoˬ.” (Kawˇ 2:17) Aˉ gʼuiˬ ha lehˬ yehˬ maˇ beh sheˍ ve awˬ hkaꞈ laꞈ htaꞈ shuˍ ve htawˇ, awˬ tehˬ tehˬ chi hkʼe ve htaꞈ kʼoˆ gaˇ ve maˇ heˆ. Oˇ htaˇ teˇ co˗e Yuˇdaꞈ chaw ve oˉ kʼoˍ pui ve lehˬ, Hkriꞈ yaˇ awˬ pon kʼo aˉ gʼuiˬ ha ceh tiˉ hpehꞈ ve yoˬ. Ngaˬ hui Yaˬhoˉvaˬ htaꞈ cawˇ ve hkʼaw oˉ kʼoˍ pui tuˬ yawˇ gu teh taˍ laˇ ve, venˇ baˆ hpehˇ ve awˬ lawn htaꞈ ngaˬ hui gʼa na gʼa cawˇ ve yoˬ. w23.10 25-26 ¶4-5

Daˍyeˍlaˆ liꞈ kaˇ nanˉ uiˍ 11 hkʼaw jawˇ mawˇ 2 gʼaˇ htaꞈ kʼoˆ taˍ ve yoˬ. Jawˇ mawˇ chi ve 2 gʼaˇ lehˬ, a shu teˇ gʼaˇ gʼa uˉ peunˍ tuˬ kanˇ paˆ veh daꞈ chehˇ ve yoˬ. Tcuh kaˍ paˍ ve tawˇ hkawˇ chi ve lehˬ, awˬ nu ve tcuh kaˍ paˍ ve tawˇ hkawˇ Liꞈ hpu hkʼaw ngaˬ hui tehˆ daꞈ htaˇ, “awˬ na hpawˇ ve jawˇ mawˇ” chi beuꞈ teˇ co˗e Ruˇsaˆ leh yawˇ geh pawnˇ daꞈ ve mvuhˇ miˬ teˇ hpaˍ hpehꞈ ve tehꞈ, ngaˬ hui gʼa shiˍ ve yoˬ. “Awˬ hawˉ hpawˇ ve jawˇ mawˇ” Eˍgaˍlanˍ leh Aˍmeˬriˆkaꞈ kanˇ paˆ lonˉ hpehꞈ ve tehꞈ, ngaˬ hui gʼa shiˍ ve yoˬ. “Awˬ na hpawˇ ve jawˇ mawˇ” uˉ peunˍ ve awˬ hawˉ lo chehˇ ve Gʼuiˬ sha ve chaw lehˬ, fawˉ mehˍ ve htaꞈ gʼa hkanˍ ve yoˬ. Yaˬhoˉvaˬ ve Shaˉhkiˆhkanˍ ve chaw yonˍ ve htaꞈ pa taw, laiˉ gʼaˇ shu dawˆ piˇ leh htawnˍ hkʼaw yuˬ keu piˇ ve yoˬ. Yaꞈ hkʼaˇ, yawˇ hui kawˆ ve aꞈ kehˉ yawˇ hui ve yonˍ hkʼaˇ leuˉ leh yonˍ yeˬ ve yoˬ. Aˬ htoꞈ ma pa taw chi hkʼe hpehꞈ ve le? Gʼuiˬ sha ve chaw fawˉ mehˍ ve htaꞈ gʼa hkanˍ ve lehˬ, Daˍyeˍlaˆ liꞈ hkʼaw tcuh kaˍ paˍ ve tawˇ hkawˇ awˬ tehˬ hpehꞈ la ve htaꞈ yawˇ hui shiˍ tuˬ te piˇ ve yoˬ. (Daˍ 11:41) Chi hkʼe shiˍ ve lehˬ, ngaˬ hui ve dawˇ law kuiˬ htaꞈ yonˍ yeˬ tuˬ ga laˇ leh, Yaˬhoˉvaˬ htaꞈ caˉ leh ka tiꞈ yeˬ tuˬ kaꞈ dawˇ teh taˍ ve yoˬ. w23.08 11-12 ¶15-16

Yaˬhoˉvaˬ ngaˬ hui htaꞈ haꞈ jaˇ ve pa taw, yawˇ ngaˬ hui ve dawˇ hkʼaˇ htaꞈ na gʼa leh haꞈ shaˉ laˇ tuˬ yoˬ. Ngaˬ hui nyi ma naˬ ve kʼo, yawˇ kaꞈ nyi ma naˬ ve pa taw, ngaˬ hui ve bon lawˬ hkawˇ htaꞈ yawˇ hkʼawꞈ laˇ tuˬ yoˬ tehꞈ yonˍ gʼa ve yoˬ. Ngaˬ hui htaꞈ haꞈ shaˉ laˇ tuˬ yawˇ geh lawˬ ve kʼo, ‘yawˇ ve mehˆ shiˍ htaꞈ yawˇ haꞈ shaˉ taˍ ve hkʼe haꞈ shaˉ laˇ tuˬ yoˬ.’ (Chiˇ 17:8) Awˬ to hkʼaw cawˬ ve awˬ hkʼeun hkʼa peu˗eˬ hkʼaw mehˆ shiˍ lehˬ a yeˇ uiˍ jaˇ. Chi htaꞈ pa taw, Yaˬhoˉvaˬ ngaˬ hui htaꞈ yawˇ ve mehˆ shiˍ hkʼe hpehꞈ ve tehꞈ tehˆ taˍ ve yoˬ. Yawˇ ngaˬ hui htaꞈ kʼoˆ laˇ chehˇ ve, ‘nawˬ hui htaꞈ a shu ca yaꞈ la ve kʼo, ngaˬ ve mawˇ awˬ hpfuhˇ hkʼaˆ jaˇ ve htaꞈ ca yaꞈ la ve hkʼe hpehꞈ ve yoˬ.ʼ Yaˬhoˉvaˬ nawˬ htaꞈ haꞈ jaˇ ve tehꞈ yonˍ gʼa tcuh gaˇ ve yoˬ. Yaꞈ hkʼaˇ, peuˬ laˬ htaˇ nawˬ shoꞈ shaꞈ ve awˬ lawn gʼa hpuˇ ve Gʼuiˬ sha nawˬ htaꞈ awˬ tehˬ tehˬ haꞈ ve laˇ tehꞈ, htawˇ dawˇ nawˬ dawˇ cawˬ tuˬ te laˇ ve htaꞈ yawˇ shiˍ ve yoˬ. Maˇ heˆ leh chi teˇ hkui shoꞈ shaꞈ ve awˬ lawn nawˬ gʼa hpuˇ chehˇ ve Gʼuiˬ sha nawˬ htaꞈ haꞈ ve laˇ tehꞈ, maˇ yonˍ gʼa tuˬ te laˇ ve yoˬ. Hkʼe kʼo, Yaˬhoˉvaˬ haꞈ pehnˇ ve htaꞈ ngaˬ hui yonˍ gʼa tuˬ aˬ htoꞈ ma te laˇ ve le? Yeˍsuˆ, leuˆ yuˬ taˍ ve chaw, leh ngaˬ hui teˇ gʼaˇ le le htaꞈ Yaˬhoˉvaˬ haꞈ ve tehꞈ hkʼaˬ hkʼe hpeuꞈ maw laˇ ve teˇ geh nyi sheˍ. w24.01 27-28¶6-7

Tuꞈ ve hkanˍ ve awˬ yanˇ htaˇ, Yaˬhoˉvaˬ yawˇ ve chaw htaꞈ hkʼaˬ hkʼe ga piˇ ve Eˇzaˍraˆ gʼa mawˬ ve yoˬ. 484 hkʼawꞈ B.C.E. htaˇ, Paˇshaˇ mvuhˇ miˬ hkʼaˬ ti chi ti lo Yuˇdaꞈ chaw ve awˬ ceuˬ awˬ hkʼaˇ htaꞈ tiˇ pehˍ tuˬ jawˇ mawˇ Aˍshaˍruˆ tawˇ piˇ htaˇ, Eˇzaˍraˆ Baˍbuˍlonˍ mvuhˇ miˬ lo chehˇ ve yoˬ. (Ist 3:7, 13-15) Eˇzaˍraˆ leh Yuˇdaꞈ chaw kawˆ tuˬ cawˬ ve yoˬ. Yawˇ hui oˇ hkʼe gʼa kaˇ htaˇ kawˆ jaˇ ve pa taw, caˇ tuˬ ce ve, paˆ hawˬ ve, leh Yaˬhoˉvaˬ ga laˇ tuˬ bon lawˬ ve yoˬ. (Ist 4:3) Yaꞈ hkʼaˇ, Yuˇdaꞈ chaw ve awˬ ceuˬ awˬ hkʼaˇ htaꞈ tiˇ pehˍ tuˬ dawˇ ve chaw htaꞈ kʼawꞈ tiˇ pehˍ piˇ ve yoˬ. Eˇzaˍraˆ leh Yuˇdaꞈ chaw hkʼaˬ hkʼe dawˇ ve htaꞈ dawˇ nyi sheˍ. (Ist 9:1, 2) Awˬ ceuˬ chi ve teˇ hpaˍ lehˬ, Eˇzaˍraˆ awˬ gʼuˇ suhˍ hpawˇ gʼa hpuˇ tuˬ ve awˬ ceuˬ teˇ hpaˍ htaꞈ gu hehnˇ taˍ tuˬ ga piˇ leh, Yaˬhoˉvaˬ yawˇ ve chaw htaꞈ haꞈ shaˉ laˇ ve tehꞈ yawˇ hkʼa dehꞈ yonˍ gʼa tuˬ te piˇ ve yoˬ. w23.11 17 ¶12-13

Gʼuiˬ sha Iˉsaˍreˍlaˆ chaw htaꞈ piˇ taˍ ve Moˉseˍ ve “awˬ liˇ tawˇ hkawˇ” htaꞈ tcuh yaˇ Pawˇluꞈ kʼoˆ chehˇ ve yoˬ. (Roˉ 3:21, 28) Oˇ ve teˇ co˗e Yuˇdaꞈ chaw Hkriꞈ yaˇ teˇ hpaˍ hpaˍ, yawˇ hui Moˉseˍ ve awˬ liˇ tawˇ hkawˇ htaꞈ gʼa gʼaꞈ te cawˇ sheˍ ve tehꞈ kʼoˆ ve yoˬ. Gʼuiˬ sha nyi ma cawˇ ve chaw hpehꞈ tuˬ, chaw yaˇ Moˉseˍ ve “awˬ liˇ tawˇ hkawˇ” htaꞈ gʼaꞈ te tuˬ maˇ loˍ tehꞈ Pawˇluꞈ Aˍbraˍhanˍ ve awˬ lawn htaꞈ tehˆ maˍ laˇ ve yoˬ. Yaꞈ hkʼaˇ, a yeˇ uiˍ jaˇ ve lehˬ, yonˍ ve gʼa cawˬ ve yoˬ. Awˬ lawn chi ve, chi beuꞈ teˇ co˗e ngaˬ hui htaꞈ kaꞈ awˬ gʼaˇ peꞈ laˇ ve yoˬ. Ngaˬ hui Yaˬhoˉvaˬ leh Yeˍsuˆ htaꞈ yonˍ ve kʼo, ngaˬ hui kaꞈ Gʼuiˬ sha nyi hkʼaˇ suh ve chaw hpehꞈ gʼa ve yoˬ. Yaꞈ hkʼaˇ, Yaˍkoˆ liꞈ kaˇ nanˉ uiˍ 2 hkʼaw “te ve” awˬ ceuˬ Moˉseˍ ve “awˬ liˇ tawˇ hkawˇ” gʼaꞈ te ve htaꞈ kʼoˆ gaˇ ve maˇ heˆ. Chi hkʼoˆ kaꞈ, Hkriꞈ yaˇ te cawˇ ve awˬ nu ve awˬ ceuˬ htaꞈ kʼoˆ gaˇ ve yoˬ. (Yaˍ 2:24) Chi ve lehˬ, yawˇ yonˍ ve cawˬ ve tehꞈ hpeuꞈ maw laˇ ve yoˬ. w23.12 3-5 ¶8, 10-11

Heuˆ daꞈ tuˬ dawˇ ve awˬ viˉ awˬ nyi yaˇ miˇ haˉ lehˬ, awˬ ca leuˆ htaˇ hkʼa dehꞈ gʼa dawˇ nyi ve yoˬ. Nawˬ heuˆ ve chaw nawˬ htaꞈ sheh kʼai laˇ gʼa ve, leh nawˬ yawˇ ve kanˇ paˆ awˬ hawˉ lo gʼa chehˇ ve tehꞈ tawnˇ taˍ sheˍ. (Roˉ 7:2; Efs 5:33) Chi htaꞈ pa taw, a shu yawˇ awˬ to htaꞈ na nyi cawˇ ve, ‘yawˇ co ha hpawˇ ve chaw mawˇ hpehꞈ˗aw laˇ? Yawˇ awˬ pon Yaˬhoˉvaˬ a yeˇ uiˍ jaˇ tehꞈ shawˍ˗aw laˇ? Yawˇ teˇ lawn lawn htaꞈ dawˇ cheˆ htaˇ cuˇ yiˍ cawˬ ve hkʼaw dawˇ cheˆ˗aw laˇ? Yawˇ te yaꞈ ve kʼo, haꞈ yuˬ˗aw laˇ? Yawˇ yaˇ miˇ htaꞈ yawˆ yan˗aw laˇ? Yawˇ ngaˬ htaꞈ nyi haꞈ shaˉ laˇ gʼa˗aw laˇ? Yawˇ ngaˬ Yaˬhoˉvaˬ geh meuˆ daꞈ tuˬ ga laˇ gʼa˗aw laˇ? Ngaˬ nyi ma luˬ ve maˇ heˆ leh dawˇ haˍ htaˇ, yawˇ ngaˬ htaꞈ awˬ gʼaˇ peꞈ laˇ˗aw laˇ?’ Nawˬ daꞈ ve awˬ hpawˇ gʼa gaˇ ve kʼo, nawˬ daꞈ ve awˬ miˇ ma gʼa hpehꞈ ve yoˬ. Yaˇ miˇ lehˬ awˬ hpawˇ htaꞈ ga piˇ shehˍ ma hpehꞈ tuˬ “ngaˬ yawˇ htaꞈ keunˍ daꞈ ve awˬ chawˇ teˇ gʼaˇ ca piˇ shaˍ.” (Awˬ 2:18) Yawˇ Yaˬhoˉvaˬ htaꞈ haꞈ ve pa taw, awˬ hpawˇ daꞈ ve awˬ meh cawˬ tuˬ kaꞈ te piˇ gʼa ve yoˬ. (Tawˇ 31:11, 12; 1 Tiˆ 3:11) Awˬ viˉ awˬ nyi yaˇ miˇ haˉ awˬ vuiˬ chi htaꞈ hkʼa dehꞈ te gʼa tuˬ ga laˇ gʼa ve lehˬ, Yaˬhoˉvaˬ htaꞈ hkʼa dehꞈ haꞈ leh chi teˇ hkui kaꞈ yehˬ kʼa hkʼaw leh Hkriꞈ yaˇ awˬ moˍ hkʼaw ga piˇ gʼa ve yoˬ. w23.12 22-23 ¶18-19

Ngaˬ hui cawˇ ve hkʼaw dawˇ cheˆ gʼa tuˬ Yaˬhoˉvaˬ cuˇ yiˍ peꞈ laˇ tuˬ yoˬ tehꞈ ka tiꞈ te taˍ laˇ ve yoˬ. Ngaˬ hui a yeˇ uiˍ ve awˬ lawn dawˇ cheˆ htaˇ, Yaˬhoˉvaˬ geh cuˇ yiˍ gʼa lawˬ cawˇ ve yoˬ. Chi hkʼoˆ kaꞈ, Yaˬhoˉvaˬ lehˬ ngaˬ hui yeunˇ hkanˍ gʼaˇ tuˬ awˬ gʼaˇ peꞈ laˇ ve yoˬ. Yaˬhoˉvaˬ Pawˇluꞈ htaꞈ awˬ gʼaˇ piˇ jaw˗oˬ ve hkʼa shuˍ, ngaˬ hui kaꞈ tuꞈ ve hkanˍ ve htaꞈ yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ tuˬ yoˬ. (Hpi 4:13) Yaˬhoˉvaˬ awˬ viˉ awˬ nyi htaꞈ cuˇ leh ngaˬ hui htaꞈ ga laˇ tcuh ve yoˬ. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ bon laiˉ pawˆ lawˬ ve yoˬ. Yawˇ htaꞈ pa taw Yaˬhoˉvaˬ htaꞈ maˇ gʼa nyi chaˬ tuˬ bon lawˬ ve yoˬ. Yaꞈ hkʼaˇ, Yeˍsuˆ lawˬ ve hkʼe Yaˬhoˉvaˬ ga piˇ cawˇ ve htawˇ, Yeˍsuˆ htaꞈ ga piˇ tuˬ Yaˬhoˉvaˬ mvuhˇ naw ma tcuh yaˇ htaꞈ kʼai tcuh leh Yeˍsuˆ htaꞈ awˬ gʼaˇ piˇ tcuh ve yoˬ. (Luˉ 22:42, 43) Chi ve hkʼa shuˍ Yaˬhoˉvaˬ kaꞈ ngaˬ hui htaꞈ ga laˇ ve yoˬ. Yaˬhoˉvaˬ awˬ viˉ awˬ nyi htaꞈ cuˇ leh ngaˬ hui geh awˬ hkʼeun hkʼaw te laˬ tcuh ve, awˬ gʼaˇ peꞈ laˇ ve, maˇ heˆ leh aˉ hkʼaw ca guiˇ la tcuh ve yoˬ. Ngaˬ hui teˇ gʼaˇ le le awˬ yanˇ ca leh “na sha ve tawˇ” yaw ve hkʼaw awˬ gʼaˇ piˇ daꞈ gʼa ve yoˬ.—Tawˇ 12:25. w23.05 10-11 ¶9-11

Yeˍsuˆ suh ve dawˇ nawˇ tuˬ hpawnˬ daꞈ la jaw ve, leh maˇ hto toˇ˗o ve chaw awˬ viˉ awˬ nyi yawˇ htaꞈ maˇ haꞈ yuˬ laˇ ve htaꞈ kawˆ tuˬ yo hehˉ. Chi htaꞈ pa taw, yawˇ yaꞈ taw tuˬ maˇ heˆ leh nyi ma luˬ tuˬ maˇ te piˇ cawˇ. Yawˇ hui ngaˬ hui ve awˬ viˉ awˬ nyi hpehꞈ leh yawˇ hui geh Yaˬhoˉvaˬ htaꞈ oˉ kʼoˍ teˇ geh gʼa pui ve ha lehˬ jaˇ! (Chiˇ 119:176; Tcuh 20:35) Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve te tehꞈ Yeˍsuˆ kʼoˆ laˇ ve htaꞈ ngaˬ hui awˬ bon uiˍ jaˇ ve yoˬ. Hpawnˬ daꞈ ve chi a yeˇ uiˍ jaˇ ve tehꞈ, ngaˬ hui shiˍ leh ngaˬ hui hpawnˬ daꞈ ve chi hkʼaw kʼai htaˇ, ngaˬ hui kaꞈ awˬ bon gʼa leh, awˬ nu ve chaw awˬ bon gʼa tuˬ kaꞈ ga piˇ gʼa ve yoˬ. (Isy 48:17, 18) Ngaˬ hui Yaˬhoˉvaˬ leh Yeˍsuˆ htaꞈ haꞈ jaˇ. Yawˇ huiˉ maˬ ngaˬ hui awˬ pon teˇ ceuˬ le le te laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ gaˇ ve yoˬ. Chi ngaˬ hui awˬ viˉ awˬ nyi geh hkʼa dehꞈ meuˆ daꞈ leh yawˇ hui kaꞈ ngaˬ hui hkʼa shuˍ htaiˍ hkʼawꞈ ve htaꞈ awˬ bon gʼa tuˬ ga piˇ gaˇ ve yoˬ. Chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve awˬ pon ngaˬ hui hkʼa dehꞈ gu hehnˇ taˍ gʼa tuˬ, te gʼa ve hkʼe te sheˍ. Chi ve lehˬ chi teˇ hkʼawꞈ hkʼaw ve a yeˇ uiˍ jaˇ ve awˬ nyi hpehꞈ ve yoˬ! w24.01 14 ¶18-19

Yaˬhoˉvaˬ ngaˬ hui htaꞈ hkʼaˬ hkʼe beˆ maˍ laˇ ve le? Yawˇ yehˇ ve awˬ hkʼaˇ teˇ hkʼaˇ lehˬ Liꞈ hpu hpehꞈ ve yoˬ. Yaꞈ hkʼaˇ, ngaˬ hui htaꞈ beˆ maˍ laˇ tuˬ, Yaˬhoˉvaˬ yawˇ awˬ tan hpehꞈ ve chaw yaˇ htaꞈ yehˇ sheˍ ve yoˬ. Tawˇ pa haˉ te kʼo, ngaˬ hui yonˍ hkʼaˇ hpawˇ yonˍ yeˬ leh cuˇ yiˍ cawˬ ve hkʼaw dawˇ cheˆ gʼa tuˬ, Yaˬhoˉvaˬ lehˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ cuˇ leh ga laˇ ve yoˬ. (Maꞈ 24:45) Chi hkʼe ceh tiˉ maˇ heˆ. Ngaˬ hui htaꞈ beˆ maˍ laˇ gʼa ve hawˉ hkʼaˆ htaꞈ kaꞈ yehˇ sheˍ ve yoˬ. Tawˇ pa haˉ te kʼo, ngaˬ hui tuꞈ jaˇ hkanˍ jaˇ ve htaꞈ ponˬ kʼai gʼa tuˬ, Yaˬhoˉvaˬ lehˬ toˇ nyi shehˍ hpaˇ leh Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ cuˇ leh ngaˬ hui htaꞈ awˬ gʼaˇ peꞈ laˇ leh beˆ maˍ laˇ tcuh ve yoˬ. Ngaˬ hui awˬ leh meuˇ ve awˬ yanˇ hkʼaw shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ gʼa ve, yonˍ gʼa ve beˆ maˍ laˇ hkawˇ cawˬ ve awˬ bon uiˍ jaˇ. Ngaˬ hui Yaˬhoˉvaˬ haꞈ yuˬ laˇ ve chaw hpehꞈ tuˬ leh co co taiˍ taiˍ a shaꞈ gʼa tuˬ yaꞈ kʼaw hkʼoˆ chehˇ tuˬ ga laˇ gʼa ve awˬ bon uiˍ jaˇ. Teˇ pawˆ pawˆ kʼo, Yaˬhoˉvaˬ lehˬ maˇ biˇ ve chaw yaˇ htaꞈ cuˇ leh ngaˬ hui htaꞈ beˆ maˍ laˇ tcuh ve kʼo, beˆ maˍ laˇ ve htaꞈ gʼaꞈ te tuˬ haˍ jaˇ tehꞈ dawˇ ve yoˬ. Ngaˬ hui chi hkʼe dawˇ htaˇ, Yaˬhoˉvaˬ yawˇ ve mvuhˇ miˬ yaˇ htaꞈ beˆ maˍ piˇ chehˇ ve tehꞈ ngaˬ hui yonˍ gʼa tuˬ gʼa te leh, yawˇ beˆ maˍ laˇ ve htaꞈ gʼaꞈ te ve lehˬ ngaˬ hui awˬ bon gʼa tuˬ te laˇ ve yoˬ. w24.02 20-21 ¶2-3

Ngaˬ hui Yaˬhoˉvaˬ htaꞈ leuˉ leh haꞈ tuˬ kaiˬ ve hkʼaw Liꞈ hpu gʼaw leh henˇ ve yoˬ. Teˇ pawˆ le le ngaˬ hui Liꞈ hpu gʼaw htaˇ, awˬ lawn oˇ ve ngaˬ hui Yaˬhoˉvaˬ htaꞈ hkʼa dehꞈ shiˍ tuˬ, aˬ htoꞈ ma ga laˇ ve htaꞈ nyi sheˍ. Leh a shu yawˇ awˬ to htaꞈ na nyi cawˇ ve, “ngaˬ gʼaw ve awˬ lawn Yaˬhoˉvaˬ ngaˬ htaꞈ haꞈ ve tehꞈ mawˬ tuˬ hkʼaˬ hkʼe ga laˇ ve le? Leh awˬ lawn chi ngaˬ Yaˬhoˉvaˬ htaꞈ haꞈ tuˬ hkʼaˬ hkʼe ga laˇ ve le?” Ngaˬ hui Yaˬhoˉvaˬ htaꞈ leuˉ leh haꞈ tuˬ awˬ hkʼaˇ teˇ hkʼaˇ lehˬ, hkʼaˬ htaˆ kaꞈ yawˇ geh bon lawˬ ve yoˬ. Ngaˬ hui hkʼaˬ hkʼe dawˇ ve kaꞈ yawˇ htaꞈ kʼoˆ piˇ ve yoˬ. (Chiˇ 25:4, 5) Leh Yaˬhoˉvaˬ ngaˬ hui ve bon lawˬ hkawˇ htaꞈ awˬ tehˬ hkʼawꞈ laˇ tuˬ yoˬ. (1 Yoˇ 3:21, 22) Ngaˬ hui awˬ nu ve chaw htaꞈ kaꞈ leuˉ leh gʼa haꞈ sheˍ ve yoˬ. Tcuh yaˇ Pawˇluꞈ Hkriꞈ yaˇ hpehꞈ peuˬ hkʼawꞈ nawˉ laiˉ hkʼawꞈ htaˇ yawˇ yaˇ nehˬ teˇ gʼaˇ Tiˆmoˉseˍ htaꞈ mawˬ daꞈ ve yoˬ. Tiˆmoˉseˍ lehˬ Yaˬhoˉvaˬ leh awˬ nu ve chaw htaꞈ haꞈ ve yoˬ. Pawˇluꞈ Hpiˇliˇpiˆ venˇ hkʼaw chehˇ ve awˬ viˉ awˬ nyi htaꞈ kʼoˆ piˇ ve, “yawˇ hkʼa shuˍ shuˍ nyi ma taˍ ve chaw teˇ gʼaˇ kaꞈ ngaˬ geh maˇ cawˬ. Yawˇ lehˬ, nawˬ hui awˬ pon daꞈ ve teˇ ceuˬ htaꞈ awˬ tehˬ awˬ na dawˇ nyi puiˉ ve chaw teˇ gʼaˇ hpehꞈ ve yoˬ.” (Hpi 2:20) Tiˆmoˉseˍ awˬ viˉ awˬ nyi htaꞈ haꞈ ve Pawˇluꞈ chiˇ mvuh piˇ ve yoˬ. Chi htaꞈ pa taw, Tiˆmoˉseˍ ca guiˇ la leh yawˇ htaꞈ gʼa mawˬ daꞈ tuˬ Hkriꞈ yaˇ awˬ moˍ hkʼaw ve awˬ viˉ awˬ nyi dawˇ law chehˇ ve yoˬ.—1 Kawˇ 4:17. w23.07 9-10 ¶7-10

Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw maˇ loꞈ˗e sheˍ htaˇ, Moˉseˍ suh˗e ve yoˬ. Moˉseˍ suh peuˬ hkʼawꞈ nawˉ Gʼuiˬ sha ve mvuhˇ miˬ yaˇ htaꞈ baˬ taˉ piˇ˗aw laˇ? Maˇ baˬ taˉ piˇ. Yawˇ hui Yaˬhoˉvaˬ htaꞈ ka tiꞈ yeˬ ve awˬ yanˇ htaˇ, yawˇ yawˇ hui htaꞈ hkʼaˬ htaˆ kaꞈ nyi haꞈ shaˉ piˇ ve yoˬ. Moˉseˍ maˇ suh sheˍ htaˇ, Yaˬhoˉvaˬ lehˬ Moˉseˍ htaꞈ Iˉsaˍreˍlaˆ chaw hui htaꞈ sheh kʼai tuˬ, Yawˇsuˆ htaꞈ awˬ vuiˬ te tuˬ maˍ piˇ ve yoˬ. Chi awˬ gʼuˇ suhˍ htaˇ Moˉseˍ Yawˇsuˆ htaꞈ laiˉ chi hkʼawꞈ maˍ piˇ jaw˗oˬ ve yoˬ. (Tawˆ 33:11; Bon 34:9) Chi hkʼoˆ kaꞈ, Moˉseˍ lehˬ hawˉ hkʼaˆ laiˉ gʼaˇ sheh kʼai paˍ te keunˍ ve htaꞈ leuˆ yuˬ leh sheh kʼai tcuh ve yoˬ. Chaw teˇ hpaˍ htaꞈ teˇ hinˉ gʼaˇ, teˇ ha gʼaˇ, ngaˇ chi gʼaˇ, teˇ chi gʼaˇ awˬ hkʼoˆ awˬ hoˉ te tcuh ve yoˬ. (Bon 1:15) Yaˬhoˉvaˬ ve chaw lehˬ hkʼa dehꞈ nyi haꞈ shaˉ piˇ ve htaꞈ gʼa ve yoˬ. Chi hkʼe ve awˬ nu ve teˇ lawn htaꞈ kaꞈ ngaˬ hui gʼa mawˬ ve yoˬ. Chi ve Eˇliˇyaꞈ lehˬ Gʼuiˬ sha ve chaw daꞈ kehˬ ve oˉ kʼoˍ pui ve htaꞈ laiˉ chi hkʼawꞈ sheh kʼai piˇ ve yoˬ. Yaꞈ hkʼaˇ, Yaˬhoˉvaˬ Eˇliˇyaꞈ ve awˬ vuiˬ htaꞈ pa piˇ leh Yuˇdaꞈ mvuhˇ miˬ lo kʼai tcuh ve yoˬ. (2 Jawˇ 2:1; 2 Raˍ 21:12) Iˉsaˍreˍlaˆ mvuhˇ miˬ awˬ na hpawˇ chehˇ ve 10 chaw ceuˬ Yaˬhoˉvaˬ ve kanˉ ka tiꞈ yeˬ ve hkʼaw te ve chaw htaꞈ baˬ taˉ piˇ˗aw laˇ? Maˇ baˬ taˉ piˇ. Eˇliˇyaꞈ Eˇliˇshehˇ htaꞈ laiˉ hkʼawꞈ maˍ piˇ jaw˗oˬ ve yoˬ. Yaˬhoˉvaˬ ve a loˍ htaꞈ te tuˬ teˇ gʼaˇ˗ehˬ kaꞈ tawˍ piˇ maˇ gʼa ve yoˬ. Leh Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw htaꞈ hkʼa dehꞈ nyi haꞈ shaˉ piˇ tuˬ yoˬ. w24.02 5 ¶12

Eˇfeˇsuꞈ venˇ hkʼaw ve Hkriꞈ yaˇ chi teˇ hpaˍ Liꞈ hpu hkʼaw awˬ tehˬ ve chi awˬ gʼeuˆ htaꞈ shuˍ ve tehꞈ haꞈ yuˬ ve yoˬ. (Chiˇ 119:105) Yawˇ hui maˇ heˆ heˆ ve bon liˇ htaꞈ caˉ daꞈ ve teˇ ceuˬ le le maˇ te leh, haˉ chawˇ haˉ paˆ kaꞈ maˇ te˗o ve yoˬ. Yawˇ hui ‘Gʼuiˬ sha te ve hkʼe te’ leh, Yaˬhoˉvaˬ htaꞈ ha lehˬ ha kʼa ve hkʼaw oˉ kʼoˍ pui leh, yawˇ nyi hkʼaˇ suh tuˬ kaꞈ te piˇ ve yoˬ. (Efs 5:1) Ngaˬ hui kaꞈ hkʼa shuˍ shuˍ, Liꞈ hpu maˇ henˇ la sheˍ htaˇ, bon hpawˇ naˆ hoꞈ ve hkʼaw chehˇ leh ngaˬ hui maˇ daꞈ ve awˬ liˇ awˬ hkʼaˇ kaꞈ te chehˇ ve yoˬ. Leh teˇ hpaˍ kʼo, bon hpawˇ jehˇ ve awˬ liˇ awˬ hkʼaˇ htaꞈ te jaw ve yoˬ. Teˇ hpaˍ kʼo, haˉ chawˇ haˉ paˆ kaꞈ te jaw ve yoˬ. Yaꞈ hkʼaˇ, Yaˬhoˉvaˬ htaꞈ gʼa shiˍ daꞈ la htaˇ, ngaˬ hui ve te hkʼaˇ dawˇ hkʼaˇ htaꞈ pa leh Yaˬhoˉvaˬ ve awˬ liˇ awˬ hkʼaˇ htaꞈ tanˬ te ve yoˬ. Chi hkʼe te ve lehˬ, ngaˬ hui awˬ bon laiˉ ceuˬ gʼa ve yoˬ. (Isy 48:17) Chi teˇ hkui ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve htawˇ, ngaˬ hui baˬ taˉ ve naˆ hoꞈ ve hkʼaw maˇ gʼa caˉ daꞈ˗o leh ngaˬ hui “awˬ gʼeuˆ” hkʼaw caˉ leh gʼa chehˇ ve yoˬ. w24.03 21-22 ¶6-7

Nawˬ awˬ to chiˇ aꞈ leh Baˆtiˆsaˬ haꞈ yuˬ tuˬ maˇ te gʼa sheˍ tehꞈ dawˇ ve yoˬ hehˉ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gʼa tuˬ, laiˉ ceuˬ gʼa pa sheˍ ve tehꞈ nawˬ dawˇ ve yoˬ hehˉ. Maˇ heˆ leh nawˬ ve yonˍ hkʼaˇ yonˍ yeˬ maˇ la tuˬ te cawˇ sheˍ ve tehꞈ dawˇ ve yoˬ hehˉ. (Kawˇ 2:6, 7) Liꞈ hpu henˇ ve chaw teˇ gʼaˇ le le hkʼa shuˍ uiˍ la mvuh la ve maˇ heˆ. Leh Shaˉhkiˆhkanˍ ve chaw ve yaˇ a shaꞈ hkʼa ma˗ehˬ htaˇ awˬ to chiˇ aꞈ leh Baˆtiˆsaˬ haꞈ yuˬ ve kaꞈ maˇ heˆ. Chi htaꞈ pa taw, nawˬ hkʼaˬ hkʼe taw uiˍ la mvuh la˗oˬ ve htaꞈ chaˬ nyi leh, nawˬ gʼa pa cawˇ sheˍ ve aˬ htoꞈ ma cawˬ ve htaꞈ kaꞈ chaˬ nyi leh nawˬ awˬ to awˬ nu ve chaw htaꞈ taˇ tehˆ daꞈ. (Gaˍ 6:4, 5) Nawˬ Yaˬhoˉvaˬ htaꞈ awˬ to chiˇ aꞈ piˇ tuˬ maˇ gu hehnˇ taˍ sheˍ ve kʼo, awˬ gʼaˇ taˇ nuˇ piˇ sheˍ. Nawˬ Yaˬhoˉvaˬ htaꞈ awˬ to chiˇ aꞈ piˇ tuˬ caˉ leh dawˇ teh taˍ sheˍ. Nawˬ gʼa pa cawˇ ve htaꞈ Yaˬhoˉvaˬ ga laˇ tuˬ bon lawˬ sheˍ. (Hpi 2:13) Yaˬhoˉvaˬ nawˬ ve bon lawˬ hkawˇ htaꞈ na leh ga laˇ gaˇ jaˇ ve tehꞈ nawˬ yonˍ gʼa ve yoˬ.—1 Yoˇ 5:14. w24.03 5 ¶9-10

Teˇ pawˆ htaˇ Saˍraˇ dawˇ maˇ jaˇ ve pa taw, yawˇ tawˇ hehnˇ chaweh yaw leh Aˍbraˍhanˍ htaꞈ nawˬ hkʼaˬ hkʼe dawˇ ve le tehꞈ kʼoˆ leh, Aˍbraˍhanˍ htaꞈ venˇ baˆ taˍ ve yoˬ. Saˍraˇ lehˬ awˬ hpawˇ ve kanˇ paˆ awˬ hawˉ lo chehˇ leh hkʼaˬ htaˆ kaꞈ yawˇ hkawˇ na ve tehꞈ Aˍbraˍhanˍ shiˍ ve yoˬ. Yawˇ Saˍraˇ hkawˇ na leh shoꞈ shaꞈ ve awˬ lawn htaꞈ kaꞈ gu piˇ ve yoˬ. (Awˬ 16:5, 6) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Awˬ hpawˇ hpehꞈ ve chaw˗oˬ, yehˬ kʼa hkʼaw dawˇ cheˆ tuˬ Gʼuiˬ sha nawˬ htaꞈ kanˇ paˆ peꞈ laˇ taˍ ve yoˬ. (1 Kawˇ 11:3) Yaꞈ hkʼaˇ, nawˬ awˬ miˇ ma htaꞈ haꞈ leh awˬ lawn chi yawˇ htaꞈ heuˆ la kuiˬ cawˬ ve kʼo, nawˬ maˇ dawˇ cheˆ sheˍ htaˇ yawˇ kʼoˆ ve hkawˇ htaꞈ hkʼa dehꞈ na piˇ tuˬ yoˬ. (1 Kawˇ 13:4, 5) Awˬ nu ve teˇ pawˆ htaˇ Aˍbraˍhanˍ maˇ dawˇ maˇ gaˇ ve hkʼaw hkehˉ chaw htaꞈ gʼa haꞈ yuˬ ve yoˬ. Leh yawˇ Saˍraˇ htaꞈ hkaoˍ monˇ haˆ haˆ te tcuh ve yoˬ. (Awˬ 18:6) Saˍraˇ awˬ hpawˇ dawˇ cheˆ ve htaꞈ na yuˬ leh laꞈ haˉ gʼaꞈ te ve yoˬ. Awˬ miˇ ma hpehꞈ ve chaw˗oˬ, nawˬ Saˍraˇ htaꞈ henˇ yuˬ gʼa ve lehˬ awˬ hpawˇ dawˇ cheˆ ve htaꞈ na yuˬ ve yoˬ. Nawˬ chi hkʼe te ve kʼo, nawˬ ve awˬ ca geh hkʼaˬ htaˆ kaꞈ teˇ geh chehˇ gʼa tuˬ ga piˇ chehˇ ve yoˬ.—1 Peˍ 3:5, 6. w23.05 24-25 ¶16-17

Giˉdonˍ Iˉsaˍreˍlaˆ chaw htaꞈ sheh kʼai tuˬ suhˉ jehˬ paˍ te tuˬ leuˆ yuˬ piˇ peuˬ hkʼawꞈ nawˉ, yawˇ na yuˬ ve leh haꞈ hanˉ ve gʼa cawˬ ve yoˬ. Giˉdonˍ ve awˬ vuiˬ lehˬ kawˆ tuˬ cawˬ jaˇ. Chi lehˬ yawˇ awˬ pa Baˍlaˆ gʼuiˬ sha htaꞈ tuˉ tanˇ kuiˬ te taˍ ve htaꞈ dawˆ baˬ ve yoˬ. (Suhˉ 6:25, 26) Chi hkʼoˆ kaꞈ, Giˉdonˍ maꞈ yaˇ shaw hponˆ peuˬ hkʼawꞈ nawˉ, Yaˬhoˉvaˬ Giˉdonˍ htaꞈ maꞈ yaˇ chi ma ma taˇ shiˍ kʼai tehꞈ kʼoˆ piˇ ve yoˬ. (Suhˉ 7:2-7) Hkʼe te leh, tanˇ hkuinˇ htaˇ yawˇ canˇ paˍ htaꞈ bawˆ tuˬ Yaˬhoˉvaˬ kʼoˆ piˇ ve yoˬ. (Suhˉ 7:9-11) Nyi haꞈ shaˉ paˍ “na yuˬ puiˉ ve” chaw hpehꞈ cawˇ ve yoˬ. Na yuˬ puiˉ ve nyi haꞈ shaˉ paˍ lehˬ, Liꞈ hpu hkʼaw leh Yaˬhoˉvaˬ ve kanˉ hkʼaˇ beˆ maˍ laˇ ve htaꞈ gʼaꞈ te tuˬ yoˬ. Hkʼe te leh, yawˇ awˬ viˉ awˬ nyi awˬ pon daꞈ ve henˇ yuˬ tuˬ hpehꞈ ve yoˬ. Yaꞈ hkʼaˇ, chi hkʼe te tuˬ teˇ pawˆ pawˆ kʼo, maˇ sha ve yoˬ. Tawˇ pa haˉ te kʼo, Gʼuiˬ sha ve kanˉ hkʼaˇ beˆ maˍ laˇ ve laiˉ ceuˬ cawˬ leh pa vaiˇ jaˇ. Hkʼe te leh, yawˇ gʼaꞈ te gʼa tuˬ haˍ jaˇ tehꞈ dawˇ ve yoˬ. Chi hkʼoˆ kaꞈ, beˆ maˍ laˇ ve teˇ ceuˬ ceuˬ awˬ tehˬ yehˇ gʼa ve laˇ, maˇ heˆ leh beˆ maˍ laˇ ve chi daꞈ jaˇ ve laˇ tehꞈ, yawˇ htawˇ dawˇ nawˬ dawˇ cawˬ ve yoˬ. Leh yawˇ gʼa te ve awˬ vuiˬ shu yawˇ htaꞈ hpeh yuˬ tuˬ te piˇ ve yoˬ hehˉ. Nyi haꞈ shaˉ paˍ chi hkʼe gʼa hpuˇ htaˇ, Giˉdonˍ htaꞈ hkʼaˬ hkʼe te henˇ yuˬ gʼa tuˬ le? Beˆ maˍ laˇ ve htaꞈ na yuˬ leh gʼaꞈ te sheˍ. w23.06 4-5 ¶9-11