Ha pa 12 maˬ

Yaˬhoˉvaˬ lehˬ kanˇ paˆ cawˬ leh suh˗oˬ ve chaw htaꞈ kʼawꞈ teꞈ tu la piˇ gʼa˗aw laˇ? Kʼawꞈ teꞈ tu la piˇ gʼa ve yoˬ. Yawˇ lehˬ “kanˇ paˆ uiˍ shehˍ hpaˇ” Gʼuiˬ sha hpehꞈ ve yoˬ. (Hpeuꞈ 1:8) Hkʼe te leh, Gʼuiˬ sha kanˇ paˆ cawˬ maˇ jaˇ ve pa taw, canˇ paˍ leh suh ve htaꞈ kaꞈ te luˬ piˇ tuˬ yoˬ. (1 Kawˇ 15:26) Yaˬhoˉvaˬ suh taˍ ve chaw htaꞈ kʼawꞈ teꞈ tu la piˇ gʼa ve tehꞈ ngaˬ hui shiˍ tuˬ te laˇ ve teˇ hkʼaˇ lehˬ, yawˇ lehˬ teˇ ceuˬ le le htaꞈ hkʼa dehꞈ tawnˇ gʼa ve yoˬ. Yawˇ lehˬ meuꞈ keu shiˍ teˇ shiˍ le le ve awˬ meh htaꞈ htawˇ shiˍ taˍ ve yoˬ. (Isy 40:26) Leh suh˗oˬ ve chaw teˇ gʼaˇ le le htaꞈ kaꞈ yawˇ tawnˇ gʼa ve yoˬ. (Yb 14:13; Luˉ 20:38) Gʼuiˬ sha kʼawꞈ teꞈ tu la piˇ tuˬ ve chaw teˇ gʼaˇ le le htaꞈ yawˇ tawnˇ gʼa ve yoˬ. Tawˇ pa haˉ te kʼo, yawˇ hui ve awˬ ceuˬ awˬ hkʼaˇ, yawˇ hui ve mehˆ hpfuhˇ leh awˬ hoꞈ awˬ han hkʼaˬ hkʼe hpehꞈ ve, leh yawˇ hui ve a shaꞈ teꞈ hkʼaˇ hkʼaw hkʼaˬ hkʼe gʼa hpuˇ ve hkʼa peu˗eˬ htaꞈ Gʼuiˬ sha tawnˇ gʼa ve yoˬ. Leh yawˇ hui aˬ htoꞈ ma htaꞈ tawnˇ gʼa ve kaꞈ Gʼuiˬ sha shiˍ ve yoˬ. Kʼawꞈ teꞈ tu la ve awˬ lawn Yaˬhoˉvaˬ ka tiꞈ te taˍ laˇ ve htaꞈ ngaˬ hui hkʼa dehꞈ yonˍ gʼa ve yoˬ. Awˬ lawn kʼo, Gʼuiˬ sha lehˬ kanˇ paˆ cawˬ leh suh˗oˬ ve chaw htaꞈ kʼawꞈ teꞈ tu la tcuh gaˇ ve tehꞈ ngaˬ hui shiˍ ve yoˬ. Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa ve awˬ hkʼaˇ teˇ hkʼaˇ htaꞈ teˇ geh nyi sheˍ. Chi lehˬ yawˇ suh˗oˬ ve chaw htaꞈ kʼawꞈ teꞈ tu la piˇ jaw˗oˬ ve yoˬ. Liꞈ hpu ve awˬ co˗e htaˇ, Yaˬhoˉvaˬ lehˬ yawˇ ve kanˉ te ve chaw teˇ hpaˍ htaꞈ kanˇ paˆ piˇ jaw ve yoˬ. Chi lehˬ Yeˍsuˆ htaꞈ kaꞈ kanˇ paˆ piˇ leh suh˗oˬ ve chaw htaꞈ kʼawꞈ teꞈ tu la piˇ gʼa ve yoˬ. w23.04 9-10 ¶7-9

Ngaˬ hui ve yonˍ hkʼaˇ htaꞈ nuˇ nehˬ ve, leh na sha ve hkʼaw yaw piˇ ve kʼo, ngaˬ hui yaw daꞈ ve chaw kaꞈ na gaˇ leh kʼawꞈ yaw daꞈ gaˇ tuˬ yoˬ. Yaꞈ hkʼaˇ, ngaˬ hui ve yonˍ hkʼaˇ htaꞈ nyi cha laˇ ve chaw htaꞈ gʼa mawˬ daꞈ ve, maˇ heˆ leh ngaˬ hui htaꞈ gʼawˬ daꞈ gʼaˇ gaˇ ve chaw htaꞈ gʼa mawˬ daꞈ puiˉ la ve yoˬ hehˉ. Chi hkʼe hpehꞈ ve kʼo, yawˇ hui geh tawˇ taˇ kʼawꞈ yaw daꞈ. (Tawˇ 26:4) Yaꞈ hkʼaˇ, chi hkʼe ve chaw htaꞈ mawˬ daꞈ ve lehˬ hkʼaˬ nyiˇ gʼaˇ maˇ heˆ. Ngaˬ hui nuˇ nehˬ ve hkʼaw tawˇ yaw piˇ ve kʼo, maˇ˗awˍ ve chaw na gaˇ tuˬ yoˬ. Ngaˬ hui nyi ma nuˇ nehˬ ve chaw hpehꞈ tuˬ coˇ caˇ ve kʼo, awˬ bon gʼa jaˇ ve tehꞈ gʼa mawˬ ve yoˬ. Awˬ nu ve chaw nawˬ htaꞈ deˇ laˇ ve, maˇ heˆ leh kʼoˆ guiˇ gʼuiˬ guiˇ laˇ htaˇ, nawˬ nyi ma nuˇ nehˬ ve chaw hpehꞈ gʼa tuˬ Yaˬhoˉvaˬ geh bon lawˬ sheˍ. Dawˇ hkʼaˇ maˇ shuˍ daꞈ htaˇ, nyi ma nuˇ nehˬ ve chaw hpehꞈ ve kʼo, maˇ gʼawˬ daꞈ leh maˇ deˇ daꞈ tuˬ ga laˇ gʼa ve tehꞈ tawnˇ taˍ sheˍ. Chi hkʼoˆ kaꞈ, nawˬ nuˇ nehˬ ve leh yawˆ yan ve hkʼaw hkʼawꞈ piˇ ve kʼo, nawˬ htaꞈ na laˇ ve chaw lehˬ Shaˉhkiˆhkanˍ ve chaw, leh Liꞈ hpu hkʼaw awˬ tehˬ ve htaꞈ daꞈ ve hpawˇ dawˇ tuˬ ga piˇ gʼa ve yoˬ. Nawˬ ve yonˍ hkʼaˇ “hkʼaˬ hkʼe yaw hkʼawꞈ piˇ tuˬ, hkʼa dehꞈ gu taˍ˗oꞈ.” Leh “nyi ma nuˇ nehˬ leh yawˆ yan ve awˬ hkʼaw lo te˗o.” (1 Peˍ 3:15) Nawˬ nyi ma nuˇ nehˬ ve htawˇ, awˬ gʼaˇ cawˬ ve chaw hpehꞈ ve tehꞈ coˇ caˇ leh te sheˍ. w23.09 19 ¶18-19

Ngaˬ hui yeunˇ hkanˍ ve chaw hpehꞈ ve tehꞈ hpeuꞈ maw piˇ tuˬ 4 ceuˬ htaꞈ teˇ geh nyi sheˍ. Awˉ lawˉ teˇ ceuˬ lehˬ yeunˇ hkanˍ ve chaw haˆ maˇ beuꞈ puiˉ. Yawˇ nyi ma maˇ sha htaˇ, awˬ nu ve chaw htaꞈ kʼoˆ ve, leh maˇ daꞈ ve maˇ te piˇ. Maˇ heˆ leh a shu teˇ gʼaˇ yawˇ nyi ma zuhˆ tuˬ te piˇ ve kʼo, yawˇ nyi ma gawˬ lehˍ cawˬ tuˬ coˇ caˇ leh, yawˇ nyi ma naˬ tuˬ te laˇ ve chaw htaꞈ maˇ te hkʼawꞈ piˇ. (Tawˆ 34:6) Nyiˇ ceuˬ teˇ ceuˬ lehˬ, yeunˇ hkanˍ ve chaw nyi ma gawˬ lehˍ cawˬ ve yoˬ. Yawˇ dawˇ taˍ ve aꞈ kehˉ gʼa law maw jaˇ htaˇ, yawˇ nyi ma maˇ zuhˆ leh maˇ beuꞈ. (Maꞈ 18:26, 27) Shehˆ ceuˬ teˇ ceuˬ lehˬ, yeunˇ hkanˍ ve chaw maˇ dawˇ nyi sheˍ htaˇ, laꞈ haˉ maˇ te. A yeˇ uiˍ jaˇ ve awˬ lawn hpehꞈ ve kʼo, yeunˇ hkanˍ ve chaw lehˬ, awˬ hkʼaˇ maˇ gu sheˍ htaˇ laꞈ haˉ maˇ te. Yawˇ aˬ htoꞈ ma te tuˬ awˬ hkʼaˇ gu htaˇ, awˬ yanˇ yehˇ maw leh kanˉ chi ve htaꞈ yawˇ te htaˇ, haˆ haˆ peuˬ tuˬ vaiˇ vaiˇ ve hkʼaw maˇ te. Awˇ ceuˬ teˇ ceuˬ lehˬ, yawˇ shoꞈ shaꞈ ve leh tuꞈ ve hkanˍ ve gʼa hpuˇ htaˇ, maˇ hkʼanˇ. Yawˇ daꞈ ve hpawˇ coˇ caˇ leh dawˇ nyi ve pa taw, yawˇ shoꞈ shaꞈ ve gʼa hpuˇ ve htawˇ, Yaˬhoˉvaˬ ve kanˉ ha lehˬ ha kʼa ve hkʼaw te gʼa ve yoˬ. (Kawˇ 1:11) Ngaˬ hui yeunˇ hkanˍ ve chaw hpehꞈ tuˬ gʼa te cawˇ ve 4 ceuˬ htaꞈ gʼa henˇ˗oˬ ve yoˬ. Ngaˬ hui teˇ gʼaˇ le le Yaˬhoˉvaˬ ve chaw hpehꞈ ve pa taw, chi ve hkʼa peu˗eˬ gʼa te cawˇ ve yoˬ. w23.08 20-21 ¶3-6

Ngaˬ hui ve nyi ma htaꞈ haꞈ shaˉ laˇ tuˬ a yeˇ uiˍ jaˇ ve teˇ ceuˬ lehˬ, Yaˬhoˉvaˬ ngaˬ hui ve nyi ma htaꞈ chaˬ nyi shehˍ hpaˇ hpehꞈ ve yoˬ. Chi kʼoˆ gaˇ ve lehˬ, Yaˬhoˉvaˬ ngaˬ hui ve nyi ma awˬ nu ve chaw maˇ mawˬ gʼa ve htaꞈ teˇ ceuˬ le le mawˬ gʼa leh, ngaˬ hui hkʼaˬ hkʼe ve chaw hpehꞈ ve htaꞈ kaꞈ yawˇ shiˍ ve yoˬ. Yaˬhoˉvaˬ beˆ maˍ laˇ taˍ ve ngaˬ hui ve nyi ma leh dawˇ hkʼaˇ hkʼaw hkʼaˬ htaˆ kaꞈ cawˬ tcuh ve kʼo, yawˇ ngaˬ hui htaꞈ haꞈ ve yoˬ. Chi lehˬ ngaˬ hui co co taiˍ taiˍ ve a shaꞈ gʼa tuˬ kaꞈ ga laˇ ve yoˬ. (Yoˇ 4:14) Ngaˬ hui chi hkʼe te ve kʼo, pehꞈ ve tzuhˆ ve te tuˬ maˇ dawˇ nyi leh Saˍtanˍ heˍ laˇ ve htaꞈ maˇ na leh miˬ guiˬ yaˇ htaꞈ kaꞈ maˇ henˇ yuˬ. (1 Yoˇ 5:18, 19) Ngaˬ hui Yaˬhoˉvaˬ geh hkʼa dehꞈ meuˆ daꞈ ve kʼo, ngaˬ hui yawˇ htaꞈ haꞈ leh yawˆ yan tuˬ yoˬ. Ngaˬ hui Yaˬhoˉvaˬ nyi ma luˬ tuˬ maˇ te piˇ gaˇ ve pa taw, te yaꞈ tuˬ kaꞈ maˇ dawˇ nyi leh te yaꞈ tuˬ lawˇ nyi laˇ ve htaꞈ kaꞈ maˇ te ve yoˬ. Hko˗eˇshaˍ mvuhˇ miˬ lo chehˇ ve awˬ viˉ awˬ nyi yaˇ miˇ Maˍhtaˆ yawˇ haˉ chawˇ haˉ paˆ te yaꞈ tuˬ beˬ piˇ jaw ve yoˬ. Yawˇ kʼoˆ ve, “oˇ ve teˇ yanˇ ngaˬ htawˇ dawˇ nawˬ dawˇ cawˬ leh ngaˬ ve nyi ma htaꞈ yuˬ tiˍ gʼa tuˬ haˍ jaˇ ve yoˬ. Yaꞈ hkʼaˇ, Yaˬhoˉvaˬ htaꞈ kawˆ leh yawˆ yan ve ngaˬ htaꞈ haꞈ shaˉ laˇ ve yoˬ.” Yaˬhoˉvaˬ htaꞈ kawˆ leh yawˆ yan ve hkʼaˬ hkʼe ga laˇ ve le? Maˍhtaˆ kʼoˆ ve, yawˇ dawˇ cheˆ ve maˇ cawˇ ve kʼo, heuˆ la kuiˬ cawˬ ve htaꞈ dawˇ nyi ve yoˬ. Ngaˬ hui kaꞈ chi ve hkʼa shuˍ shuˍ gʼa te cawˇ ve yoˬ. w23.06 20-21 ¶3-4

Yeˍsuˆ shiˍ ve Yaˬhoˉvaˬ ve a loˍ lehˬ, yawˇ ve awˬ meh htaꞈ yawˆ yan te piˇ leh she pfuhˍ laˇ ve hkʼa peu˗eˬ htaꞈ ponˬ tcuh gaˇ ve yoˬ. “Mvuhˇ naw ma hkʼoˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ” tehꞈ Yeˍsuˆ awˬ laꞈ gʼawˇ hui htaꞈ bon chi hkʼe lawˬ tuˬ maˍ piˇ ve yoˬ. (Maꞈ 6:9) Chi hkʼe te ve lehˬ a yeˇ uiˍ jaˇ ve tehꞈ Yeˍsuˆ shiˍ leh Yaˬhoˉvaˬ hpanˍ taˍ ve teˇ ceuˬ le le awˬ pon awˬ bon cawˬ ve yoˬ. Awˬ tehˬ kʼo, mvuhˇ naw ma miˬ naˆ ma hkʼa peu˗eˬ hkʼoˆ Yaˬhoˉvaˬ ve awˬ meh htaꞈ yawˆ yan ve Yeˍsuˆ hkʼe taw te maˇ gʼa. Yaꞈ hkʼaˇ, Yeˍsuˆ htaꞈ shu hpeh yuˬ htaˇ, canˇ paˍ yawˇ htaꞈ aˬ htoꞈ ma she pfuhˍ piˇ ve le? Yawˇ hui kʼoˆ ve, Yeˍsuˆ Gʼuiˬ sha htaꞈ maˇ yawˆ maˇ yan te ve yoˬ. Yaˬhoˉvaˬ ve awˬ meh daꞈ kehˬ jaˇ ve htaꞈ chaꞈ chiˆ tuˬ te piˇ ve lehˬ, venˇ baˆ uiˍ jaˇ ve awˬ ceuˬ hpehꞈ ve tehꞈ Yeˍsuˆ shiˍ ve yoˬ. Hkʼe te leh, Yeˍsuˆ htaꞈ chi hkʼe she pfuhˍ piˇ ve yawˇ nyi ma luˬ jaˇ. Chi htaꞈ pa taw, Yeˍsuˆ htaꞈ shu hpeh yuˬ la yoˬ te htaˇ, “yawˇ nyi ma hkʼaw tuꞈ jaˇ hkanˍ jaˇ” tuˬ te piˇ ve yoˬ.—Luˉ 22:41-44. w24.02 11 ¶11

A shaꞈ gʼa tuˬ awˬ pon gʼuiˇ enˍ daꞈ ve lehˬ, awˬ viˉ awˬ nyi leh yehˬ kʼa hkʼaw ve chaw htaꞈ haꞈ ve aꞈ kehˉ, ngaˬ hui Yaˬhoˉvaˬ leh Yeˍsuˆ htaꞈ gʼa haꞈ cawˇ ve yoˬ. (Maꞈ 10:37) Yaꞈ hkʼaˇ, chi ve lehˬ ngaˬ hui yehˬ kʼa hkʼaw ve awˬ vuiˬ htaꞈ maˇ te cawˇ ve tehꞈ kʼoˆ gaˇ ve maˇ heˆ. Yaˬhoˉvaˬ leh Yeˍsuˆ ngaˬ hui htaꞈ haꞈ yuˬ laˇ tuˬ yehˬ kʼa hkʼaw ve awˬ vuiˬ htaꞈ ngaˬ hui hkʼa dehꞈ te cawˇ ve yoˬ. (1 Tiˆ 5:4, 8) Ngaˬ hui chi hkʼe te ve kʼo, ha lehˬ jaˇ tuˬ yoˬ. Awˬ hpawˇ awˬ miˇ ma haꞈ daꞈ leh yawˆ yan daꞈ ve, awˬ pa awˬ e yaˇ htaꞈ haꞈ leh maˍ piˇ ve kʼo, yawˇ hui awˬ pa awˬ e ve hkawˇ na yuˬ tuˬ yoˬ. Leh yehˬ kʼa hkʼaw ve chaw teˇ gʼaˇ le le kaꞈ ha lehˬ jaˇ tuˬ yoˬ. Awˬ lawn kʼo, Yaˬhoˉvaˬ ngaˬ hui htaꞈ chi hkʼe hpehꞈ tcuh gaˇ ve yoˬ. (Efs 5:33; 6:1, 4) Awˬ hpawˇ awˬ miˇ ma, awˬ pa awˬ e, maˇ heˆ leh yaˇ hpehꞈ ve htawˇ, Liꞈ hpu hkʼaw beˆ maˍ laˇ taˍ ve htaꞈ gʼaˇ va sheˍ. Hkʼaˬ hkʼe te tuˬ a shu yawˇ hkʼaˇ yawˇ taˇ dawˇ cheˆ. Awˬ liˇ awˬ hkʼaˇ leh chaw liˇ vaˇ liˇ maˇ˗awˍ ve chaw te ve hkʼe taˇ te. Maˇ heˆ leh cuˇ yiˍ cawˬ paˍ kʼoˆ laˇ ve htaꞈ na ve ceh kaꞈ taˇ te. Chi hkʼoˆ kaꞈ, Liꞈ hpu hkʼaw ve awˬ liˇ awˬ hkʼaˇ htaꞈ hkʼaˬ hkʼe yuˬ yehˇ tuˬ, Gʼuiˬ sha ve kanˉ hkʼaˇ hkʼaw ve liꞈ teˇ hpaˍ htaꞈ gʼaw gʼa ve yoˬ. w23.08 28 ¶6-7

Awˬ viˉ awˬ nyi yaˇ miˇ awˬ bon cawˬ ve leh awˬ tehˬ yehˇ gʼa ve te hkʼaˇ dawˇ hkʼaˇ cawˬ cawˇ ve yoˬ. Chi ve teˇ hpaˍ yaˇ ehˉ htaˇ kaꞈ cawˬ tcuh ve kʼo, yawˇ a shaꞈ teꞈ ve teˇ co˗e awˬ bon cawˬ ve yoˬ. Tawˇ pa haˉ te kʼo, liꞈ gʼaw gʼa leh bvuhꞈ gʼa tcuh ve yoˬ. Chaw liˇ vaˇ liˇ teˇ ceuˬ ceuˬ kʼo, yaˇ miˇ lehˬ liꞈ gʼaw gʼa leh bvuhꞈ gʼa tuˬ maˇ loˍ tehꞈ laiˉ gʼaˇ dawˇ ve yoˬ. Yaꞈ hkʼaˇ, Hkriꞈ yaˇ teˇ gʼaˇ le le liꞈ gʼaw gʼa leh bvuhꞈ gʼa tuˬ a yeˇ uiˍ jaˇ. (1 Tiˆ 4:13) Chi htaꞈ pa taw, liꞈ gʼaw gʼa leh bvuhꞈ gʼa tuˬ haˍ jaˇ tehꞈ nawˬ dawˇ ve htawˇ, coˇ caˇ leh te sheˍ. Nawˬ liꞈ gʼaw gʼa leh hkʼa dehꞈ bvuhꞈ gʼa ve kʼo, aˬ htoꞈ ma awˬ bon gʼa tuˬ le? Nawˬ kanˉ ca sha leh gʼaˇ hpfuhˇ gʼa daꞈ tuˬ ga laˇ gʼa ve yoˬ. Liꞈ henˇ gʼa leh Liꞈ hpu hkʼa dehꞈ maˍ gʼa tuˬ kaꞈ ga laˇ gʼa ve yoˬ. A yeˇ uiˍ jaˇ ve lehˬ, Liꞈ hpu hkʼaw Yaˬhoˉvaˬ ve tawˇ hkawˇ maˍ laˇ ve htaꞈ nawˬ gʼaw leh hkʼa dehꞈ dawˇ nyi ve pa taw, Yaˬhoˉvaˬ geh kaꞈ meuˆ daꞈ tuˬ yoˬ.—1 Tiˆ 4:15. w23.12 20-21 ¶10-11

Beˬ ve lawˇ ve htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ tcuh sheˍ. Ngaˬ hui lehˬ maˇ biˇ ve chaw hpehꞈ ve pa taw, maˇ gʼa te yaꞈ tuˬ hkʼaˬ htaˆ kaꞈ gʼa tawˍ daꞈ chehˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Ngaˬ hui beˬ ve lawˇ ve htaꞈ maˇ tawˍ daꞈ gʼaˇ tuˬ, Saˍtanˍ awˬ hkʼaˇ laiˉ hkʼaˇ yehˇ ve yoˬ. Saˍtanˍ yehˇ ve awˬ hkʼaˇ teˇ hkʼaˇ lehˬ, pyawˍ ve awˬ ceuˬ hpehꞈ ve yoˬ. Pyawˍ ve chi hkʼe ve lehˬ ngaˬ hui maˇ daꞈ ve dawˇ hkʼaˇ cawˬ tuˬ te laˇ ve yoˬ. Chi ve lehˬ ngaˬ hui Yaˬhoˉvaˬ mehˆ gʼuˇ suhˍ lo maˇ daꞈ kehˬ tuˬ te laˇ leh venˇ baˆ uiˍ jaˇ ve htaꞈ te yaꞈ tuˬ kaꞈ te laˇ ve yoˬ. (Mk 7:21-23; Yaˍ 1:14, 15) Beˬ ve lawˇ ve htaꞈ ngaˬ hui gʼaˇ tuˬ Yaˬhoˉvaˬ gʼa ga laˇ tcuh ve yoˬ. Yeˍsuˆ ve bon lawˬ hkawˇ hkʼaw awˬ laꞈ gʼawˇ awˬ lawn chi ve htaꞈ lawˬ tuˬ kaꞈ maˍ piˇ ve yoˬ. Yawˇ kʼoˆ ve, “venˇ baˆ beˬ ve awˬ hkʼaˇ suh ngaˬ hui htaꞈ taˇ kʼai piˇ. Yaꞈ hkʼaˇ, haiˬ ve awˬ hkʼaw lo ngaˬ hui htaꞈ ponˬ laˇ˗oˆ.” (Maꞈ 6:13) Yaˬhoˉvaˬ ngaˬ hui htaꞈ ga laˇ gaˇ ve yoˬ. Leh ngaˬ hui kaꞈ bon lawˬ taˍ ve hkʼe gʼa gʼaꞈ te cawˇ ve yoˬ. w23.05 6-7 ¶15-17

Awˬ hpawˇ awˬ miˇ ma Yaˬhoˉvaˬ geh meuˆ daꞈ ve lehˬ, yawˇ hui a shaꞈ teꞈ kuiˬ hkʼaw a yeˇ uiˍ jaˇ ve tehꞈ shawˍ ve kʼo, yawˇ hui kaꞈ yawˇ beˆ maˍ laˇ ve awˬ liˇ awˬ hkʼaˇ htaꞈ yuˬ yehˇ ve yoˬ. Chi ve lehˬ yawˇ hui hkʼaˬ htaˆ kaꞈ haꞈ daꞈ tuˬ ga piˇ ve yoˬ. Maˇ heˆ leh yawˇ hui shoꞈ shaꞈ ve awˬ lawn gʼa hpuˇ ve kʼo, gu gʼa tuˬ kaꞈ ga piˇ ve yoˬ. Chi hkʼoˆ kaꞈ, Yaˬhoˉvaˬ geh meuˆ daꞈ ve chaw lehˬ, Yaˬhoˉvaˬ htaꞈ henˇ yuˬ leh yawˇ hkʼe ve te hkʼaˇ dawˇ hkʼaˇ cawˬ tuˬ coˇ coˇ leh hpeuꞈ maw piˇ ve yoˬ. Tawˇ pa haˉ te kʼo, haꞈ daꞈ ve, yeunˇ hkanˍ daꞈ ve, leh venˇ baˆ hpehˇ daꞈ ve yoˬ. (Efs 4:32–5:1) Awˬ hpawˇ awˬ miˇ ma te hkʼaˇ dawˇ hkʼaˇ chi ve teˇ hpaˍ hpeuꞈ maw daꞈ ve kʼo, yawˇ hui hkʼa dehꞈ haꞈ daꞈ tuˬ sha ve yoˬ. Awˬ viˉ awˬ nyi yaˇ miˇ Len˗naiˇ yawˇ heuˆ daꞈ ve 25 hkʼawꞈ hpaˆ gaˬ˗oˬ ve kʼoˆ ve, “Yaˬhoˉvaˬ htaꞈ meuˆ daꞈ ve chaw geh haꞈ daꞈ leh yawˆ yan daꞈ tuˬ sha ve yoˬ.” Liꞈ hpu hkʼaw ve teˇ lawn htaꞈ teˇ geh nyi sheˍ. Yaˬhoˉvaˬ lehˬ Yoˇsehꞈ leh Maˍriˆ htaꞈ leuˆ yuˬ leh Yeˍsuˆ ve awˬ pa awˬ e hpehꞈ tcuh ve yoˬ. Leh Yeˍsuˆ Meˍsiˉyaꞈ kaꞈ hpehꞈ ve yoˬ. Awˬ tehˬ kʼo, Daˍviˆ ve awˬ yaˇ awˬ duˬ cawˬ maˇ jaˇ ve htawˇ, aˬ htoꞈ ma te Yaˬhoˉvaˬ chi ve 2 gʼaˇ htaꞈ leuˆ yuˬ ve le? Awˬ lawn kʼo, yawˇ huiˉ maˬ Yaˬhoˉvaˬ geh meuˆ daꞈ jaˇ ve yoˬ. Leh yawˇ huiˉ maˬ a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve yawˇ shiˍ ve yoˬ. w23.05 21 ¶3-4

Yeˍsuˆ lehˬ ngaˬ hui htaꞈ sheh kʼai shehˍ hpaˇ biˇ jaˇ ve chaw hpehꞈ ve yoˬ. Yaꞈ hkʼaˇ, Hkriꞈ yaˇ awˬ moˍ hkʼaw nyi haꞈ shaˉ paˍ maˇ biˇ ve chaw hpehꞈ ve yoˬ. Ngaˬ hui maˇ te gaˇ ve awˬ ceuˬ yawˇ hui te tcuh laˇ htaˇ, na yuˬ tuˬ haˍ jaˇ tehꞈ dawˇ ve yoˬ. Tcuh yaˇ Peˍtruˆ kaꞈ chi hkʼe dawˇ jaw ve yoˬ. Moˉseˍ ve awˬ liˇ tawˇ hkawˇ cawˬ taˍ ve hkʼe, maˇ daꞈ kehˬ ve shaˍ Peˍtruˆ htaꞈ caˇ tehꞈ mvuhˇ naw ma tcuh yaˇ kʼoˆ piˇ htaˇ, yawˇ maˇ caˇ tehꞈ kʼoˆ piˇ ve yoˬ. Yawˇ maˇ caˇ tehꞈ mvuhˇ naw ma tcuh yaˇ htaꞈ teˇ pawˆ ceh tiˉ kʼoˆ piˇ ve maˇ heˆ, 3 pawˆ hkʼa gaˬ kʼoˆ piˇ ve yoˬ. (Tcuh 10:9-16) Aˬ htoꞈ ma pa taw le? Awˬ lawn kʼo, beˆ maˍ laˇ hkawˇ awˬ suhˉ chi awˬ hkʼaˇ maˇ ca tehꞈ dawˇ ve yoˬ. Yaꞈ hkʼaˇ, Tcuh yaˇ Pawˇluꞈ Yeˍruˆsaˍlehnˍ venˇ lo ve awˬ hoˉ chaw mawˇ hawˉ hkʼaˆ 4 gʼaˇ htaꞈ shiˍ veu leh, bon yehˬ lonˉ hkʼaw kʼai tehꞈ Pawˇluꞈ htaꞈ beˆ maˍ piˇ htaˇ, yawˇ awˬ liˇ tawˇ hkawˇ chi htaꞈ gʼaꞈ te ve tehꞈ hpeuꞈ maw piˇ tuˬ, awˬ liˇ cawˬ taˍ ve hkʼe awˬ to htaꞈ daꞈ kehˬ tuˬ te ve yoˬ. Hkriꞈ yaˇ lehˬ Moˉseˍ ve awˬ liˇ tawˇ hkawˇ awˬ hawˉ lo maˇ chehˇ˗oˬ ve tehꞈ Pawˇluꞈ shiˍ ve yoˬ. Yawˇ teꞈ chiˉ maˇ te yaꞈ. Chi hkʼe hpehꞈ ve htawˇ yawˇ hkʼa dehꞈ na yuˬ ve yoˬ. Liꞈ hpu hkʼaw kʼoˆ ve, “oˇ htaˇ Pawˇluꞈ lehˬ, shawˉ pawˍ teˇ nyi hkʼe chaw oˇ ve awˇ gʼaˇ htaꞈ kuˬ yuˬ leh, yawˇ hui geh teˇ geh daꞈ la kehˬ la tuˬ ve awˬ liˇ htaꞈ ca te” ve yoˬ. (Tcuh 21:23, 24, 26) Pawˇluꞈ na yuˬ htaˇ, awˬ viˉ awˬ nyi dawˇ sha gawˬ lehˍ cawˬ leh teˇ moˍ tiˉ hpehꞈ tuˬ kaꞈ te piˇ ve yoˬ.—Roˉ 14:19, 21. w23.10 10 ¶15-16

Kawˆ ve lehˬ awˬ chawˇ te daꞈ maˇ gʼa taˬ tehꞈ nawˬ maˇ dawˇ ve yoˬ hehˉ. Yaꞈ hkʼaˇ, Yaˬhoˉvaˬ geh awˬ chawˇ te ve chaw lehˬ, “yawˇ htaꞈ kawˆ leh yawˆ yan ve” chaw gʼa hpehꞈ ve yoˬ. Ngaˬ hui Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ maˇ kʼoˆ, teˇ gʼaˇ le le hkʼaˬ htaˆ kaꞈ Yaˬhoˉvaˬ htaꞈ kawˆ leh gʼa yawˆ yan cawˇ ve yoˬ. Yaꞈ hkʼaˇ, Yaˬhoˉvaˬ htaꞈ kawˆ leh yawˆ yan ve aˬ htoꞈ ma kʼoˆ gaˇ ve le? Yaˬhoˉvaˬ htaꞈ kawˆ leh yawˆ yan ve chaw lehˬ, yawˇ htaꞈ haꞈ leh yawˇ Yaˬhoˉvaˬ geh meuˆ daꞈ ve htaꞈ teˇ ceuˬ˗ehˬ kaꞈ maˇ te luˬ laˇ tcuh gaˇ ve yoˬ. Yeˍsuˆ kaꞈ “Gʼuiˬ sha htaꞈ yawˆ yan puiˉ” ve yoˬ. (Heˍ 5:7) Yawˇ Yaˬhoˉvaˬ htaꞈ maˇ kawˆ. (Isy 11:2, 3) Yaꞈ hkʼaˇ, yawˇ Yaˬhoˉvaˬ htaꞈ haꞈ jaˇ leh hkʼa dehꞈ na yuˬ ve yoˬ. (Yoˇ 14:21, 31) Ngaˬ hui kaꞈ Yeˍsuˆ hkʼa shuˍ te gʼa ve yoˬ. Yaˬhoˉvaˬ te ve teˇ ceuˬ le le yawˇ haꞈ pehnˇ ve hkʼaw hpeuꞈ maw laˇ ve pa taw, ngaˬ hui yawˇ htaꞈ haꞈ jaˇ leh yawˆ yan ve yoˬ. Yaˬhoˉvaˬ cuˇ yiˍ, hteˇ ve cawˇ ve, leh kanˇ paˆ cawˬ ve yoˬ. Chi hkʼoˆ kaꞈ, Gʼuiˬ sha ngaˬ hui htaꞈ haꞈ leh a yeˇ yuˬ laˇ ve lehˬ, yawˇ maˍ laˇ ve awˬ ceuˬ htaꞈ ngaˬ hui gʼaꞈ te ve hehˉ laˇ, leh ngaˬ hui te ve awˬ ceuˬ yawˇ htaꞈ heuˆ la kuiˬ cawˬ ve tehꞈ ngaˬ hui shiˍ ve yoˬ. Ngaˬ hui maˇ na yuˬ ve kʼo, Yaˬhoˉvaˬ kaꞈ nyi ma luˬ ve yoˬ. Yaꞈ hkʼaˇ, ngaˬ hui na yuˬ ve kʼo, ngaˬ hui yawˇ htaꞈ ha lehˬ tuˬ te piˇ ve yoˬ.—Chiˇ 78:41; Tawˇ 27:11. w23.06 14 ¶1-2; 15 ¶5

Awˇziˆ kanˇ paˆ cawˬ la htaˇ, Yaˬhoˉvaˬ yawˇ awˬ pon te piˇ jaw ve awˬ ceuˬ teˇ hpaˍ htaꞈ yawˇ awˬ hpfuhˇ maˇ shiˍ ve yoˬ. Aˬ htoꞈ ma maˍ laˇ ve le? Daꞈ ve awˬ ceuˬ hkʼa peu˗eˬ leh ngaˬ hui Yaˬhoˉvaˬ ve kanˉ te ve hkʼa peu˗eˬ yawˇ geh laˬ ve tehꞈ gʼa tawnˇ taˍ cawˇ ve yoˬ. (1 Kawˇ 4:7) Ngaˬ hui te gʼa ve awˬ ceuˬ htaꞈ chiˇ mvuh ve aꞈ kehˉ ngaˬ hui chi hkʼe te gʼa ve Yaˬhoˉvaˬ htaꞈ chiˇ mvuh cawˇ ve yoˬ. Ngaˬ hui maˇ biˇ ve chaw hpehꞈ leh hkʼaˬ htaˆ kaꞈ gʼa beˆ maˍ laˇ cawˇ ve tehꞈ gʼa haꞈ yuˬ cawˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ aˬ laˬ hkʼe 60 hkʼawꞈ gaˬ ve kʼoˆ ve, “awˬ nu ve chaw beˆ maˍ laˇ htaˇ, ngaˬ maˇ beuꞈ leh awˬ gʼaˇ maˇ nuˇ. Yaꞈ hkʼaˇ, ngaˬ a shu yawˇ ve dawˇ hkʼaˇ pa leh uiˍ la mvuh la tuˬ coˇ caˇ ve yoˬ.” Ngaˬ hui Yaˬhoˉvaˬ htaꞈ yawˆ yan leh hkʼaˬ htaˆ kaꞈ nyi ma nuˇ nehˬ ve chaw hpehꞈ ve kʼo, ngaˬ hui ve a shaꞈ teꞈ kuiˬ hkʼaw ha lehˬ jaˇ tuˬ yoˬ.—Tawˇ 22:4. w23.09 10-11 ¶10-11

Awˉ lawˉ peuˇ ve Hkriꞈ yaˇ yeunˇ hkanˍ ve gʼa cawˬ ve yoˬ. Yawˇ hui lehˬ maˇ˗awˍ ve chaw shoꞈ shaꞈ ve gʼa hpuˇ ve hkʼe gʼa hpuˇ ve htaꞈ gʼa yeunˇ hkanˍ ve yoˬ. Yawˇ hui chi aꞈ kehˉ tuꞈ ve hkanˍ ve kaꞈ gʼa hpuˇ sheˍ ve yoˬ. Yuˇdaꞈ chaw bon awˬ hoˉ leh Roˉmaꞈ maꞈ yaˇ yawˇ hui htaꞈ fawˉ mehˍ piˇ ve ceh tiˉ maˇ heˆ. Yaꞈ hkʼaˇ, yawˇ hui ve yehˬ kʼa hkʼaw ve chaw kaꞈ yawˇ hui htaꞈ fawˉ mehˍ piˇ ve yoˬ. (Maꞈ 10:21) Teˇ pawˆ pawˆ kʼo, Hkriꞈ yaˇ chi ve teˇ hpaˍ Gʼuiˬ sha htaꞈ hpfuhˆ ve chaw, Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ te ve, leh maˇ heˆ heˆ maˍ ve htaꞈ kaꞈ yawˇ hui gʼa yeunˇ hkanˍ ve yoˬ. (Tcuh 20:29, 30) Yawˇ hui chi hkʼe gʼa hpuˇ ve htawˇ, Hkriꞈ yaˇ chi ve teˇ hpaˍ yeunˇ hkanˍ gʼaˇ leh hkʼaˬ htaˆ kaꞈ ka tiꞈ yeˬ sheˍ ve yoˬ. (Hpeuꞈ 2:3) Hkʼaˬ hkʼe te yawˇ hui yeunˇ hkanˍ gʼaˇ ve le? Liꞈ hpu hkʼaw Yawˇbaˆ ve awˬ lawn htaꞈ yawˇ hui dawˇ nyi ve yoˬ. (Yaˍ 5:10, 11) Leh yawˇ hui awˬ gʼaˇ gʼa tuˬ Yaˬhoˉvaˬ geh bon lawˬ ve yoˬ. (Tcuh 4:29-31) Chi hkʼoˆ kaꞈ, Hkriꞈ yaˇ chi ve teˇ hpaˍ yawˇ hui yeunˇ hkanˍ ve kʼo, awˬ bon gʼa tuˬ yoˬ tehꞈ dawˇ ve yoˬ. (Tcuh 5:41) Liꞈ hpu hkʼaw yeunˇ hkanˍ gʼaˇ ve chaw awˬ lawn leh Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ htaꞈ ngaˬ hui gʼaw nyi leh, awˬ lawn chi ve teˇ hpaˍ htaꞈ dawˇ nyi ve kʼo, ngaˬ hui kaꞈ yeunˇ hkanˍ gʼaˇ tuˬ yoˬ. w23.07 3 ¶5-6

Yaˬhoˉvaˬ leh Yeˍsuˆ ngaˬ hui htaꞈ dawˇ law chehˇ ve yoˬ. Tcuh yaˇ Peˍtruˆ Yeˍsuˆ htaꞈ chiˇ baˬ peuˬ hkʼawꞈ nawˉ, yawˇ a shaꞈ teꞈ kuiˬ hkʼaw a yeˇ uiˍ jaˇ ve teˇ ceuˬ gʼa dawˇ cheˆ ve yoˬ. Chi ve lehˬ yawˇ Yeˍsuˆ ve awˬ laꞈ gʼawˇ maˇ te˗o ve, maˇ heˆ leh yawˇ awˬ gʼaˇ maˇ nuˇ leh Yeˍsuˆ awˬ hkʼaˇ suh caˉ leh gʼaꞈ kʼai tuˬ ve laˇ? Peˍtruˆ dawˇ cheˆ gʼa tuˬ ga piˇ gʼa ve teˇ ceuˬ lehˬ, yawˇ Yeˍsuˆ kʼoˆ ve tawˇ hkawˇ htaꞈ dawˇ nyi ve yoˬ. Chi awˬ gʼuˇ suhˍ htaˇ Yeˍsuˆ Peˍtruˆ htaꞈ kʼoˆ piˇ ve, Peˍtruˆ ve yonˍ hkʼaˇ yonˍ yeˬ tuˬ Yeˍsuˆ Yaˬhoˉvaˬ geh bon lawˬ ve yoˬ. Peˍtruˆ awˬ viˉ awˬ nyi yonˍ hkʼaˇ hpawˇ awˬ gʼaˇ hehnˇ la tuˬ ga piˇ gʼa ve tehꞈ Yeˍsuˆ yonˍ ve yoˬ. (Luˉ 22:31, 32) Ngaˬ hui kaꞈ hkʼa shuˍ shuˍ, a shaꞈ teꞈ kuiˬ hkʼaw a yeˇ uiˍ jaˇ ve awˬ lawn gʼa dawˇ cheˆ htaˇ, ngaˬ hui caˉ leh ka tiꞈ yeˬ gʼa tuˬ Yaˬhoˉvaˬ nyi haꞈ shaˉ paˍ htaꞈ cuˇ leh ga laˇ ve tehꞈ ngaˬ hui yonˍ gʼa ve yoˬ. (Efs 4:8, 11) Peˍtruˆ leh tcuh yaˇ hui a shaꞈ teꞈ kuiˬ hkʼaw loˍ ve awˬ ceuˬ cawˬ tuˬ Yaˬhoˉvaˬ nyi haꞈ shaˉ piˇ ve hkʼa shuˍ, ngaˬ hui kaꞈ a shaꞈ teꞈ kuiˬ hkʼaw yawˇ ve kanˉ a yeˇ uiˍ jaˇ tehꞈ shawˍ ve kʼo, yawˇ nyi haꞈ shaˉ laˇ tuˬ yoˬ. w23.09 24-25 ¶14-15

Ngaˬ hui awˬ nu ve chaw awˬ pon te piˇ ve i jaˇ ve awˬ ceuˬ hpehꞈ ve htawˇ, Yaˬhoˉvaˬ mawˬ ve yoˬ. Chi lehˬ awˬ hpfuhˇ hkʼaˆ jaˇ ve tuˉ tanˇ tuˬ hkʼe hpehꞈ ve tehꞈ Gʼuiˬ sha shawˍ leh, ngaˬ hui htaꞈ te hkʼawꞈ laˇ tuˬ yoˬ. Nawˬ ga piˇ shehˍ hpaˇ maˇ heˆ leh nyi haꞈ shaˉ paˍ te jaw leh chi teˇ hkui maˇ gʼa te˗oˬ ve kʼo, nawˬ haꞈ pehnˇ ve leh nawˬ te jaw ve kanˉ htaꞈ Yaˬhoˉvaˬ maˇ leunˇ. (1 Kawˇ 15:58) Chi hkʼoˆ kaꞈ, nawˬ haꞈ pehnˇ ve caˉ leh kʼawꞈ hpeuꞈ maw piˇ ve htaꞈ Yaˬhoˉvaˬ mawˬ ve yoˬ. Yaˬhoˉvaˬ lehˬ ngaˬ hui teˇ gʼaˇ le le yawˇ htaꞈ haꞈ leh awˬ nu ve chaw htaꞈ leuˉ leh haꞈ tcuh gaˇ ve yoˬ. Ngaˬ hui Yaˬhoˉvaˬ htaꞈ leuˉ leh haꞈ tuˬ Liꞈ hpu gʼaw leh hkʼa dehꞈ dawˇ nyi ve yoˬ. Leh hkʼaˬ htaˆ kaꞈ yawˇ geh bon lawˬ ve yoˬ. Awˬ viˉ awˬ nyi htaꞈ leuˉ leh haꞈ tuˬ yawˇ hui htaꞈ ga piˇ gʼa tuˬ ve awˬ hkʼaˇ ca ve yoˬ. Ngaˬ hui Yaˬhoˉvaˬ leh awˬ viˉ awˬ nyi htaꞈ leuˉ leh haꞈ ve tehꞈ hpeuꞈ maw piˇ ve kʼo, yawˇ hui geh meuˆ daꞈ jaˇ tuˬ yoˬ. Ngaˬ hui lehˬ Yaˬhoˉvaˬ leh awˬ viˉ awˬ nyi geh hkʼaˬ htaˆ kaꞈ awˬ chawˇ hpehꞈ tuˬ yoˬ. w23.07 10-12 ¶11, 13; 13 ¶18

Hkriꞈ yaˇ lehˬ chehˇ sha cawˬ sha hpawˇ nyi haꞈ shaˉ tuˬ, teˇ gʼaˇ leh teˇ gʼaˇ gʼa dawˇ cheˆ ve yoˬ. Liꞈ hpu hkʼaw awˬ liˇ awˬ hkʼaˇ awˬ suhˍ ve awˬ lawn leh neˇ htaꞈ kaꞈ maˇ gʼa caˉ daꞈ ve hkʼaˬ nyiˇ tawn maˇ teh taˍ laˇ ve yoˬ. (Tcuh 15:20; Gaˍ 5:19, 20) Awˬ lawn chi ve teˇ hpaˍ awˬ hkʼoˆ kaꞈ, ngaˬ hui chehˇ sha cawˬ sha hpawˇ hkʼaˬ hkʼe te nyi haꞈ shaˉ tuˬ gʼa dawˇ cheˆ cawˇ ve yoˬ. Ngaˬ hui hkʼaˬ hkʼe haꞈ shaˉ tuˬ ve awˬ hkʼaˇ teˇ hkʼaˇ htaꞈ dawˇ cawˇ ve maˇ kʼoˆ, awˬ viˉ awˬ nyi hkʼaˬ hkʼe te haꞈ shaˉ tuˬ leuˆ yuˬ ve htaꞈ gʼa yawˆ yan piˇ ve yoˬ. (1) Gʼuiˬ sha ve mvuhˇ miˬ ceh tiˉ naˬ ve gawˬ ve teˇ ceuˬ le le htaꞈ gu gʼa ve yoˬ. (Isy 33:24) (2) Hkriꞈ yaˇ teˇ gʼaˇ leh teˇ gʼaˇ yawˇ awˬ pon haꞈ shaˉ tuˬ daꞈ jaˇ ve leuˆ yuˬ tuˬ “dawˇ cheˆ loˬ.” (Roˉ 14:5) (3) Ngaˬ hui awˬ nu ve chaw htaꞈ maˇ dawˇ cheˆ piˇ leh awˬ viˉ awˬ nyi, nyi ma maˇ sha tuˬ kaꞈ maˇ te piˇ. (Roˉ 14:13) (4) Hkriꞈ yaˇ lehˬ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve yoˬ. Ngaˬ hui chehˇ sha cawˬ sha hpawˇ nyi haꞈ shaˉ tuˬ leuˆ gʼa ve htawˇ, awˬ lawn chi ve lehˬ Hkriꞈ yaˇ awˬ moˍ hkʼaw teˇ moˍ tiˉ hpehꞈ tuˬ hkʼe taw a yeˇ maˇ uiˍ.—Roˉ 14:15, 19, 20. w23.07 25 ¶15

Nawˬ Yaˬhoˉvaˬ htaꞈ haꞈ˗aw laˇ? Nawˬ yawˇ htaꞈ haꞈ ve yoˬ. Yaꞈ hkʼaˇ, chi hkʼe haꞈ ve nawˬ teˇ gʼaˇ ceh tiˉ maˇ heˆ. Yaˬhoˉvaˬ ve kanˉ te ve oˇ htaˇ teˇ co˗e ve chaw kaꞈ yawˇ htaꞈ haꞈ jaˇ ve yoˬ. (Chiˇ 104:33, 34) Laiˉ gʼaˇ Gʼuiˬ sha htaꞈ oˉ kʼoˍ pui gʼa tuˬ gʼa yuˬ tanˇ jaˇ. Chi ve hkʼaw ve teˇ moˍ lehˬ Naˍzaˍriˆ chaw hui hpehꞈ ve, maˇ heˆ leh yawˇ awˬ to Gʼuiˬ sha htaꞈ chiˇ aꞈ piˇ taˍ peuˬ ve chaw teˇ hpaˍ hpehꞈ ve yoˬ. Iˉsaˍreˍlaˆ chaw nyi ma pfuhˇ jaˇ ve htaꞈ kʼoˆ htaˇ, Naˍzaˍriˆ chaw tehꞈ kʼoˆ ve yoˬ. Chi ve lehˬ Yaˬhoˉvaˬ ve kanˉ te tuˬ laiˉ ceuˬ yuˬ tanˇ ve yoˬ. Moˉseˍ ve awˬ liˇ tawˇ hkawˇ hkʼaw kʼoˆ ve, hawˉ hkʼaˆ maˇ heˆ leh yaˇ miˇ kaꞈ Yaˬhoˉvaˬ awˬ pon kanˉ te tuˬ teˇ tcuhˉ teˇ yanˇ Naˍzaˍriˆ chaw hkʼe hpehꞈ tuˬ hkanˍ taˍ ve yoˬ. (Heh 6:1, 2) Chi hkʼe hkanˍ ve, maˇ heˆ leh ka tiꞈ te ve lehˬ teˇ ceuˬ ceuˬ kʼoˆ taˍ ve htaꞈ gʼaꞈ te ve yoˬ. Chi ve lehˬ Iˉsaˍreˍlaˆ chaw teˇ gʼaˇ le le gʼa te cawˇ ve awˬ ceuˬ hpehꞈ ve maˇ heˆ. Leh aˬ htoꞈ ma te Iˉsaˍreˍlaˆ chaw teˇ hpaˍ Naˍzaˍriˆ chaw hpehꞈ tuˬ hkanˍ taˍ ve le? Yawˇ hui Yaˬhoˉvaˬ htaꞈ haꞈ jaˇ leh Yaˬhoˉvaˬ yawˇ hui awˬ pon te laˇ ve awˬ ceuˬ htaꞈ awˬ hpfuhˇ shiˍ ve yoˬ.—Bon 6:5; 16:17. w24.02 14 ¶1-2

Liꞈ hpu hkʼaw Heˍbrehˇ hkawˇ “ka tiꞈ yeˬ ve” maˇ heˆ leh “ha kʼaˉ ve” tehꞈ kʼoˆ ve lehˬ, nyi ma awˬ tawˬ hkʼa gaˬ haꞈ daꞈ ve htaꞈ kʼoˆ gaˇ ve yoˬ. Tawˇ hkawˇ chi ve lehˬ Yaˬhoˉvaˬ yawˇ ve kanˉ te ve chaw htaꞈ kʼoˆ htaˇ yehˇ ve yoˬ. Leh tawˇ hkawˇ chi ve kaꞈ Gʼuiˬ sha ve kanˉ te ve chaw teˇ gʼaˇ leh teˇ gʼaˇ kʼoˆ htaˇ yehˇ ve yoˬ. (2 Saˍ 9:6, 7) Ka tiꞈ yeˬ ve lehˬ awˬ yanˇ ponˬ kʼai ve htawˇ, leuˉ leh cawˬ gʼa sheˍ ve yoˬ. Awˬ lawn chi ve Daˍyeˍlaˆ ve awˬ lawn htaꞈ teˇ geh nyi sheˍ. Daˍyeˍlaˆ a shaꞈ teꞈ ve teˇ ce˗o, yawˇ Yaˬhoˉvaˬ htaꞈ ka tiꞈ yeˬ sheˍ ve hehˉ laˇ tehꞈ lawˇ nyi piˇ ve laiˉ ceuˬ gʼa hpuˇ sheˍ ve yoˬ. Yaꞈ hkʼaˇ, lawˇ nyi piˇ hehnˇ jaˇ ve teˇ ceuˬ lehˬ, yawˇ a shaꞈ 90 hkʼawꞈ hpaˆ˗oˬ htaˇ ve awˬ lawn hpehꞈ ve yoˬ. A maꞈ lonˉ laiˉ gʼaˇ Daˍyeˍlaˆ htaꞈ maˇ dawˇ cawˇ leh Yaˬhoˉvaˬ htaꞈ kaꞈ maˇ yawˆ yan ve pa taw, yawˇ hui Daˍyeˍlaˆ htaꞈ tiˇ pehˍ tuˬ awˬ hkʼaˇ ca ve yoˬ. Daˍyeˍlaˆ lehˬ jawˇ mawˇ maˇ heˆ leh Yaˬhoˉvaˬ htaꞈ ka tiꞈ yeˬ ve laˇ tehꞈ lawˇ nyi piˇ tuˬ, jawˇ mawˇ Daˍriˆ yawˇ htaꞈ teˇ ceuˬ ceuˬ te tcuh tuˬ lawˬ ve yoˬ. Daˍyeˍlaˆ jawˇ mawˇ htaꞈ ka tiꞈ yeˬ ve tehꞈ hpeuꞈ maw piˇ tuˬ, gʼa te cawˇ ve teˇ ceuˬ lehˬ 30 nyi hkʼa gaˬ yawˇ Yaˬhoˉvaˬ geh bon maˇ gʼa lawˬ tehꞈ kʼoˆ piˇ ve yoˬ.—Daˍ 6:12-15, 20-22. w23.08 4-5 ¶10-12

Yaˬhoˉvaˬ lehˬ ngaˬ hui awˬ viˉ awˬ nyi htaꞈ haꞈ tcuh gaˇ ve yoˬ. Awˬ viˉ awˬ nyi teˇ gʼaˇ gʼaˇ ngaˬ hui nyi ma luˬ tuˬ te laˇ ve kʼo, yawˇ ngaˬ hui nyi ma luˬ tuˬ te laˇ gaˇ ve maˇ heˆ tehꞈ dawˇ sheˍ. Leh yawˇ kaꞈ ngaˬ hui hkʼa shuˍ Yaˬhoˉvaˬ nyi hkʼaˇ suh tuˬ coˇ caˇ leh teˇ piˇ chehˇ ve yoˬ. (Tawˇ 12:18) Yaˬhoˉvaˬ ve kanˉ te ve chaw teˇ gʼaˇ le le awˬ gʼaˇ nuˇ ve, maˇ heˆ leh yaꞈ kuiˬ cawˬ ve htawˇ, yawˇ yawˇ hui htaꞈ haꞈ jaˇ ve yoˬ. Ngaˬ hui te yaꞈ htaˇ Yaˬhoˉvaˬ ngaˬ hui htaꞈ baˬ taˉ leh, yawˇ hkʼaˬ htaˆ kaꞈ beuꞈ chehˇ ve maˇ heˆ. (Chiˇ 103:9) Chi htaꞈ pa taw, Yaˬhoˉvaˬ Gʼuiˬ sha ngaˬ hui htaꞈ hkʼaˬ htaˆ kaꞈ venˇ baˆ hpehˇ laˇ ve, ngaˬ hui henˇ yuˬ tuˬ daꞈ jaˇ ve hpehꞈ ve yoˬ! (Efs 4:32–5:1) Haiˬ ve miˬ guiˬ awˬ yanˇ peuˬ la paˇ neˇ ve kʼo, ngaˬ hui awˬ viˉ awˬ nyi geh leuˉ leh gʼa meuˆ daꞈ cawˇ ve tehꞈ tawnˇ taˍ sheˍ. Fawˉ ve mehˍ ve leuˉ leh gʼa hpuˇ tuˬ yoˬ tehꞈ ngaˬ hui shiˍ gʼa leh, yonˍ ve htaꞈ pa taw htawnˍ hkʼaw lo gʼa chehˇ tuˬ kaꞈ shiˍ gʼa ve yoˬ. Chi hkʼe hpehꞈ ve kʼo, peuˬ laˬ htaˇ aꞈ kehˉ ngaˬ hui awˬ viˉ awˬ nyi geh leuˉ leh meuˆ daꞈ cawˇ ve yoˬ.—Tawˇ 17:17. w24.03 15-16 ¶6-7

Liꞈ hpu hkʼaw yaˇ nehˬ Yaˬhoˉvaˬ geh meuˆ daꞈ ve awˬ lawn yawˇ nyi hkʼaˇ suh tuˬ te piˇ ve, leh yawˇ hui a shaꞈ teꞈ kuiˬ hkʼaw ha lehˬ gʼa ve awˬ lawn Liꞈ hpu hkʼaw bvuhꞈ keu taˍ ve yoˬ. Daˍviˆ kaꞈ teˇ gʼaˇ chi hkʼe hpehꞈ ve yoˬ. Yawˇ a shaꞈ i chehˇ sheˍ htaˇ kaꞈ Yaˬhoˉvaˬ ve kanˉ te tuˬ leuˆ yuˬ leh, yawˇ ka tiꞈ yeˬ ve jawˇ mawˇ hpehꞈ la ve yoˬ. (1 Jawˇ 3:6; 9:4, 5; 14:8) Nawˬ Daˍviˆ ve awˬ lawn gʼaw ve kʼo, yawˇ ve awˬ lawn nawˬ Yaˬhoˉvaˬ ve kanˉ ka tiꞈ yeˬ ve hkʼaw te gʼa tuˬ ga laˇ gʼa ve yoˬ. Maˍkuˆ leh Tiˆmoˉseˍ htaꞈ caˉ daꞈ ve awˬ lawn a shu yawˇ hkʼaˇ yawˇ Liꞈ hpu henˇ nyi gʼa ve yoˬ. Yawˇ hui a shaꞈ i chehˇ sheˍ htaˇ kaꞈ Yaˬhoˉvaˬ ve kanˉ te leh yawˇ hui ka tiꞈ yeˬ ve hkʼaw Yaˬhoˉvaˬ ve kanˉ te ve htaꞈ nawˬ gʼa mawˬ tuˬ yoˬ. Yawˇ hui dawˇ cheˆ ve Yaˬhoˉvaˬ ha lehˬ tuˬ te piˇ ve yoˬ. A shaꞈ teꞈ kuiˬ hkʼaw hkʼaˬ hkʼe hpehꞈ ve chi teˇ hkui nawˬ te ve htaꞈ cawˬ ve yoˬ. Nawˬ Yaˬhoˉvaˬ htaꞈ gʼaˇ va leh a shu yawˇ awˬ to htaꞈ gʼaˇ maˇ va ve kʼo, nawˬ cuˇ yiˍ cawˬ ve hkʼaw dawˇ cheˆ gʼa tuˬ yawˇ ga laˇ tuˬ yoˬ. Nawˬ a shaꞈ teꞈ kuiˬ hkʼaw ha lehˬ jaˇ ve yoˬ. Nawˬ Yaˬhoˉvaˬ awˬ pon te piˇ ve htaꞈ yawˇ awˬ hpfuhˇ shiˍ ve tehꞈ tawnˇ taˍ sheˍ. Ngaˬ hui htaꞈ haꞈ jaˇ ve Awˬ pa Yaˬhoˉvaˬ ve kanˉ te ve aꞈ kehˉ daꞈ jaˇ ve awˬ ceuˬ maˇ cawˬ. w23.09 13 ¶18-19

Awˬ viˉ awˬ nyi lehˬ maˇ biˇ ve chaw hpehꞈ ve tehꞈ tcuh yaˇ Pawˇluꞈ shiˍ ve yoˬ. Tawˇ pa haˉ te kʼo, Pawˇluꞈ Yeˍruˆsaˍlehnˍ venˇ Hkriꞈ yaˇ awˬ moˍ hkʼaw ca guiˇ˗e peuˬ hkʼawꞈ nawˉ, yawˇ awˬ tehˬ ve awˬ laꞈ gʼawˇ hpehꞈ la˗oˬ ve tehꞈ, awˬ viˉ awˬ nyi teˇ hpaˍ maˇ yonˍ ve yoˬ. (Tcuh 9:26) Peuˬ hkʼawꞈ nawˉ, chaw teˇ hpaˍ Pawˇluꞈ htaꞈ maˇ heˆ heˆ kʼoˆ leh awˬ meh luˬ tuˬ te piˇ ve yoˬ. (2 Kawˇ 10:10) Pawˇluꞈ lehˬ awˬ hoˉ chaw mawˇ teˇ hpaˍ maˇ cawˇ ve awˬ ceuˬ te ve htaꞈ kaꞈ gʼa mawˬ ve yoˬ. Chi ve lehˬ awˬ viˉ awˬ nyi teˇ hpaˍ nyi ma maˇ sha tuˬ te piˇ ve yoˬ. (Gaˍ 2:11, 12) Pawˇluꞈ meuˆ daꞈ jaˇ ve awˬ chawˇ Maˍkuˆ kaꞈ Pawˇluꞈ nyi ma luˬ tuˬ te piˇ ve yoˬ. (Tcuh 15:37, 38) Chi ve hkʼa peu˗eˬ Pawˇluꞈ awˬ viˉ awˬ nyi chi teˇ hpaˍ geh tawˇ maˇ yaw daꞈ kaꞈ gʼa ve yoˬ. Yaꞈ hkʼaˇ, yawˇ chi hkʼe maˇ te. Pawˇluꞈ awˬ viˉ awˬ nyi htaꞈ daꞈ ve hpawˇ nyi leh, Yaˬhoˉvaˬ ve kanˉ nyi ma pfuhˇ ve hkʼaw te chehˇ sheˍ ve yoˬ. Pawˇluꞈ chi hkʼe te gʼa tuˬ aˬ htoꞈ ma ga piˇ ve le? Pawˇluꞈ awˬ viˉ awˬ nyi htaꞈ haꞈ jaˇ ve pa taw, yawˇ awˬ viˉ awˬ nyi htaꞈ daꞈ ve hpawˇ nyi tuˬ te piˇ leh yawˇ hui maˇ biˇ ve htaꞈ maˇ nyi. Chi hkʼoˆ kaꞈ yaꞈ nyi ve Liꞈ hpu awˬ tawn hkʼaw kʼoˆ taˍ ve hkʼe, haꞈ pehnˇ ve chi lehˬ yawˇ daꞈ ve awˬ ceuˬ te tuˬ ga piˇ ve yoˬ. w24.03 15 ¶4-5

Nyi ma nuˇ nehˬ ve lehˬ awˬ hpfuhˇ hkʼaˆ jaˇ ve tehꞈ, Liꞈ hpu hkʼaw laiˉ gʼaˇ ve awˬ lawn htaꞈ gʼa mawˬ ve yoˬ. Iˉcaˆ ve awˬ lawn htaꞈ teˇ geh nyi sheˍ. Hpiˇliˇtiˆ chaw ve awˬ ti Geˍraˆ venˇ hkʼaw Iˉcaˆ chehˇ htaˇ, Aˍbraˍhanˍ ve awˬ ceˬ nanˬ bawˍ duˇ taˍ ve teˇ bawˍ le le htaꞈ awˬ chawˇ awˬ paˆ hkawehˉ ve pa taw jeꞈ gʼaˆ keu piˇ ve yoˬ. Yaꞈ hkʼaˇ, yawˇ hui htaꞈ awˬ lawn te daꞈ ve aꞈ kehˉ nyi ma nuˇ nehˬ ve te piˇ leh nanˬ bawˍ teˇ kaˬ lo kʼawꞈ duˇ ve yoˬ. Yawˇ chi hkʼe te tuˬ coˇ caˇ jaˇ. (Awˬ 26:12-18) Yawˇ htaꞈ awˬ nu ve chaw shoꞈ shaꞈ piˇ ve htawˇ, yawˇ nyi ma nuˇ nehˬ ve cawˬ tuˬ aˬ htoꞈ ma ga piˇ ve le? Iˉcaˆ lehˬ Aˍbraˍhanˍ nyi ma nuˇ nehˬ ve hkʼaw shoꞈ shaꞈ ve awˬ lawn gu ve htaꞈ gʼa mawˬ leh, Saˍraˇ “nyi ma nuˇ nehˬ ve leh gawˬ lehˍ chehˇ puiˉ ve” awˬ lawn htaꞈ kaꞈ yawˇ gʼa mawˬ jaw ve yoˬ.—1 Peˍ 3:4-6; Awˬ 21:22-34. w23.09 15 ¶4

Yaˬhoˉvaˬ haꞈ jaˇ ve Yaˇ paˍ miˬ guiˬ hkʼoˆ lo peu laˇ leh ngaˬ hui venˇ baˆ leh suh ve htaꞈ ponˬ tuˬ, Gʼuiˬ sha ve mvuhˇ miˬ htaꞈ caˉ daꞈ ve chaw yaˇ htaꞈ maˍ piˇ leh, yawˇ ve a shaꞈ kaꞈ tanˇ laˇ ve yoˬ. Peuˬ hkʼawꞈ nawˉ Yeˍsuˆ kʼawꞈ teꞈ tu la leh Gʼuiˬ sha ve mvuhˇ miˬ hkʼaw Jawˇ mawˇ te tuˬ mvuhˇ naw ma hkʼoˆ taˆ˗e ve yoˬ. Liꞈ hpu hkʼaw a yeˇ uiˍ ve awˬ lawn lehˬ, Yaˬhoˉvaˬ yawˇ ve awˬ meh htaꞈ yawˆ yan tuˬ hkʼaˬ htaˆ kaꞈ te ve yoˬ. Yawˇ chi hkʼe te ve lehˬ Yeˍsuˆ uˉ peunˍ ve mvuhˇ miˬ htaꞈ cuˇ leh miˬ guiˬ htaꞈ caˉ daꞈ ve, Gʼuiˬ sha ve a loˍ biˇ tuˬ te ve yoˬ. Yaˬhoˉvaˬ ve a loˍ lehˬ maˇ pa jaw. Yawˇ dawˇ taˍ ve teˇ ceuˬ le le awˬ tehˬ hpehꞈ la tuˬ yoˬ tehꞈ ka tiꞈ te taˍ laˇ ve yoˬ. (Isy 46:10; Heˍ 6:17, 18) Tinˍ taˍ ve awˬ yanˇ gaˬ htaˇ, na yuˬ ve chaw biˇ ve chaw hpehꞈ tuˬ yoˬ. Chi ve lehˬ Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo daꞈ jaˇ ve hko hpehꞈ tuˬ te leh “co co taiˍ taiˍ” a shaꞈ gʼa tuˬ yoˬ. (Chiˇ 22:26) Yaꞈ hkʼaˇ, Yaˬhoˉvaˬ ve a loˍ biˇ la tuˬ chi hkʼe ceh tiˉ maˇ heˆ. Yawˇ ve a loˍ biˇ la tuˬ daꞈ jaˇ ve lehˬ, yawˇ ve kanˉ te ve chaw mvuhˇ naw ma hkʼoˆ leh miˬ guiˬ hkʼoˆ ve chaw teˇ moˍ tiˉ hpehꞈ tuˬ te piˇ tuˬ yoˬ. Yawˇ hui hkʼa peu˗eˬ Yaˬhoˉvaˬ htaꞈ ka tiꞈ yeˬ leh uˉ peunˍ shehˍ hpaˇ uiˍ jaˇ mvuhˇ jaˇ ve yawˇ ve kanˇ paˆ awˬ hawˉ lo chehˇ tuˬ yoˬ. (Efs 1:8-11) Yaˬhoˉvaˬ yawˇ ve a loˍ htaꞈ biˇ la tuˬ te ve daꞈ jaˇ ve awˬ hkʼaˇ htaꞈ gʼa mawˬ htaˇ, nawˬ ha lehˬ jaˇ ve maˇ heˆ laˇ? w23.10 20 ¶7-8

Baˍbuˍlonˍ mvuhˇ miˬ lo laˬ ve Yuˇdaꞈ chaw teˇ hpaˍ Yeˍruˆsaˍlehnˍ venˇ lo gaˬ htaˇ, yehˬ kʼa hkʼaw ve chaw htaꞈ ponˬ piˇ tuˬ yawˇ hui tuꞈ ve hkanˍ ve gʼa hpuˇ ve yoˬ. Oˇ ve teˇ yanˇ Iˉsaˍreˍlaˆ mvuhˇ miˬ Paˇshaˇ mvuhˇ miˬ uˉ peunˍ ve awˬ hawˉ lo chehˇ taˍ leh Paˇshaˇ mvuhˇ miˬ kaꞈ mvuhˇ miˬ hpawˇ shoꞈ shaꞈ jaˇ ve yoˬ. Chi hkʼe ceh tiˉ maˇ heˆ. Yuˇdaꞈ chaw lehˬ awˬ paˇ awˬ kui lo ve chaw ceuˬ tawˍ piˇ ve htaꞈ kaꞈ gʼa hpuˇ sheˍ ve yoˬ. Hkʼe te leh, Yuˇdaꞈ chaw teˇ hpaˍ Yaˬhoˉvaˬ ve bon yehˬ lonˉ te tuˬ haˍ jaˇ tehꞈ dawˇ ve yoˬ. Chi htaꞈ pa taw, Yaˬhoˉvaˬ lehˬ tcuh kaˍ paˍ Haˆgehˇ leh Zaˍhkaˍriˆ htaꞈ yawˇ hui geh kʼai tcuh leh awˬ gʼaˇ ca piˇ tcuh ve yoˬ. Leh tcuh kaˍ paˍ chi 2 gʼaˇ te ve kanˉ awˬ bon cawˬ ve yoˬ. (Haˆ 1:1; Zaˍ 1:1) Yaꞈ hkʼaˇ, aˬ laˬ hkʼe 50 hkʼawꞈ ponˬ kʼai htaˇ, Yuˇdaꞈ chaw awˬ gʼaˇ kʼawꞈ nuˇ la ve yoˬ. Hkʼe te leh, Yaˬhoˉvaˬ Moˉseˍ ve awˬ liˇ tawˇ hkawˇ gʼaꞈ bvuhꞈ paˍ Eˇzaˍraˆ htaꞈ Baˍbuˍlonˍ te leh Yeˍruˆsaˍlehnˍ venˇ lo kʼai tcuh ve yoˬ. Yuˇdaꞈ chaw Yaˬhoˉvaˬ htaꞈ yawˇ hui a shaꞈ teꞈ kuiˬ hkʼaw oˉ kʼoˍ pui ve a yeˇ uiˍ jaˇ tehꞈ shawˍ tuˬ ga piˇ ve yoˬ. (Ezr 7:1, 6) Oˇ htaˇ teˇ co˗e Yaˬhoˉvaˬ ve kanˉ te ve chaw tawˍ ve tsuhˇ ve gʼa hpuˇ ve htawˇ, Haˆgehˇ leh Zaˍhkaˍriˆ ve tcuh kaˍ paˍ ve tawˇ hkawˇ yawˇ hui Yaˬhoˉvaˬ htaꞈ gʼaˇ va tuˬ ga piˇ gʼa ve yoˬ. Ngaˬ hui maˇ dawˇ maˇ gaˇ ve leh a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve htawˇ, tcuh kaˍ paˍ ve tawˇ hkawˇ chi ve kaꞈ ngaˬ hui Yaˬhoˉvaˬ htaꞈ gʼaˇ va tuˬ ga laˇ gʼa ve yoˬ.—Tawˇ 22:19. w23.11 14-15 ¶2-3

Ngaˬ hui awˬ viˉ awˬ nyi htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Awˬ hkʼaˇ teˇ hkʼaˇ lehˬ, awˬ gʼaˇ piˇ daꞈ ve yoˬ. Ngaˬ hui ha kʼaˉ daꞈ ve kʼo, “teˇ gʼaˇ leh teˇ gʼaˇ awˬ gʼaˇ piˇ daꞈ ve yoˬ.” (1 Hteˇ 4:18) Leh ngaˬ hui hkʼaˬ htaˆ kaꞈ hkʼaˬ hkʼe te haꞈ daꞈ gʼa tuˬ le? Chi hkʼe te gʼa tuˬ ngaˬ hui venˇ baˆ hpehˇ daꞈ ve yoˬ. Aˬ htoꞈ ma te ngaˬ hui chi teˇ hkui leuˉ leh haꞈ daꞈ cawˇ ve le? Peˍtruˆ kʼoˆ ve, ‘awˬ ceuˬ hkʼa peu˗eˬ ve lehˬ, awˬ leh meuˇ gaˬ la paˇ neˇ ve yoˬ. Teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ.’ (1 Peˍ 4:7, 8) Awˬ leh meuˇ ve awˬ yanˇ gʼaˇ hteꞈ gaˬ la paˇ neˇ ve pa taw, Yeˍsuˆ kʼoˆ taˍ ve awˬ ceuˬ awˬ tehˬ hpehꞈ la tuˬ yoˬ tehꞈ ngaˬ hui shiˍ ve yoˬ. Chi ve lehˬ, “ngaˬ ve awˬ meh htaꞈ pa taw chaw ceuˬ hkʼa peu˗eˬ nawˬ hui htaꞈ canˇ tuˬ yoˬ.” (Maꞈ 24:9) Chi ve htaꞈ ngaˬ hui yeunˇ hkanˍ gʼaˇ tuˬ teˇ moˍ tiˉ gʼa hpehꞈ ve yoˬ. Ngaˬ hui chi hkʼe te ve kʼo, Saˍtanˍ ngaˬ hui htaꞈ hpaˆ daꞈ tuˬ te laˇ maˇ gʼa. Ngaˬ hui teˇ gʼaˇ leh teˇ gʼaˇ haꞈ daꞈ ve pa taw yoˬ.—Hpi 2:1, 2. w23.11 13 ¶18-19

Liꞈ hpu hkʼaw awˬ tehˬ ve kanˇ paˆ cawˬ jaˇ. Awˬ nu ve chaw Yaˬhoˉvaˬ htaꞈ shiˍ la tuˬ ngaˬ hui maˍ piˇ leh yawˇ hkʼaˬ hkʼe ve Gʼuiˬ sha hpehꞈ ve htaꞈ shiˍ tuˬ kaꞈ maˍ piˇ ve yoˬ. Ngaˬ hui nyi ma pfuhˇ lawꞈ lawꞈ te laˇ ve laiˉ ceuˬ htaꞈ gʼa mawˬ ve yoˬ. Saˍtanˍ heˍ piˇ ve htaꞈ pa taw, Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve htaꞈ maˇ gʼa kaˇ jaw ve chaw lehˬ, Yaˬhoˉvaˬ ve kanˇ paˆ uiˍ jaˇ mvuh jaˇ ve htaꞈ yawˇ hui gʼa shiˍ htaˇ, dawˇ cawˇ jaˇ ve tehꞈ ngaˬ hui gʼa mawˬ ve yoˬ. (Isy 40:26) Yaˬhoˉvaˬ hteˇ jaˇ cawˇ jaˇ ve tehꞈ hpeuꞈ maw piˇ ve pa taw, yawˇ hui yawˇ htaꞈ gʼaˇ va gʼa ve yoˬ. (Bon 32:4) Gʼuiˬ sha ve cuˇ yiˍ naˉ jaˇ ve htaꞈ yawˇ hui gʼa shiˍ htaˇ, anˇ jaˇ ve yoˬ. (Isy 55:9; Roˉ 11:33) Chi hkʼoˆ kaꞈ, Gʼuiˬ sha haꞈ pehnˇ ve cawˬ ve tehꞈ yawˇ hui shiˍ htaˇ, awˬ gʼaˇ gʼa jaˇ ve yoˬ. (1 Yoˇ 4:8) Yawˇ hui Yaˬhoˉvaˬ geh meuˆ daꞈ tuˬ coˇ caˇ htaˇ, yawˇ hui Yaˬhoˉvaˬ ve yaˇ hpehꞈ leh co co taiˍ taiˍ ve a shaꞈ gʼa tuˬ dawˇ law kuiˬ htaꞈ hkʼa tawˍ lehˆ mawˬ gʼa ve yoˬ. Awˬ pa Yaˬhoˉvaˬ geh awˬ nu ve chaw laiˉ gʼaˇ meuˆ daꞈ la tuˬ, ngaˬ hui ga piˇ ve daꞈ jaˇ ve awˬ vuiˬ gʼa ve yoˬ. Ngaˬ hui chi hkʼe te htaˇ, ngaˬ hui “Gʼuiˬ sha ve kanˉ te shehˍ hpaˇ hpehꞈ ve yoˬ.”—1 Kawˇ 3:5. w24.02 12 ¶15

Nawˬ Liꞈ hpu henˇ chehˇ ve maˇ heˆ leh Shaˉhkiˆhkanˍ ve chaw yehˬ kʼa hkʼaw uiˍ la ve kʼo, nawˬ Baˆtiˆsaˬ haꞈ yuˬ tuˬ dawˇ nyi˗oˬ laˇ? Dawˇ nyi˗oˬ ve kʼo, chi daꞈ jaˇ. Yaꞈ hkʼaˇ, nawˬ Baˆtiˆsaˬ maˇ haꞈ yuˬ sheˍ htaˇ, nawˬ Yaˬhoˉvaˬ htaꞈ awˬ to awˉ lawˉ gʼa chiˇ aꞈ piˇ ve yoˬ. Nawˬ Yaˬhoˉvaˬ htaꞈ hkʼaˬ hkʼe te awˬ to chiˇ aꞈ piˇ tuˬ le? Chi hkʼe te gʼa tuˬ nawˬ bon lawˬ ve hkʼaw Yaˬhoˉvaˬ htaꞈ ceh tiˉ oˉ kʼoˍ pui tuˬ yoˬ tehꞈ ka tiꞈ te leh, Yaˬhoˉvaˬ loˍ ve awˬ ceuˬ nawˬ a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ tuˬ ka tiꞈ te ve yoˬ. Nawˬ Yaˬhoˉvaˬ htaꞈ ‘nyi ma hkʼa peu˗eˬ, co ha hkʼa peu˗eˬ, dawˇ hkʼaˇ hkʼa peu˗eˬ leh awˬ gʼaˇ awˬ shaˉ hkʼa peu˗eˬ haꞈ tuˬ yoˬʼ tehꞈ ka tiꞈ te ve yoˬ. (Mk 12:30) Awˬ to chiˇ aꞈ ve lehˬ nawˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, Baˆtiˆsaˬ haꞈ yuˬ ve lehˬ nawˬ Yaˬhoˉvaˬ htaꞈ awˬ to chiˇ aꞈ˗oˬ ve tehꞈ, awˬ nu ve chaw htaꞈ hpeuꞈ maw piˇ ve yoˬ. Nawˬ awˬ to chiˇ aꞈ htaˇ, a yeˇ uiˍ jaˇ ve awˬ ceuˬ Yaˬhoˉvaˬ geh nawˬ ka tiꞈ te ve yoˬ. Chi htaꞈ pa taw, nawˬ ka tiꞈ gʼa yeˬ leh Gʼuiˬ sha kaꞈ nawˬ htaꞈ chi hkʼe te tcuh gaˇ ve yoˬ.—Cuˇ 5:4. w24.03 2 ¶2; 3 ¶5

Heuˆ daꞈ˗oˬ ve chaw teˇ nyi maˇ heˆ kʼo teˇ nyi shoꞈ shaꞈ ve awˬ lawn gʼa hpuˇ tuˬ yoˬ. Awˬ lawn kʼo, Liꞈ hpu hkʼaw hteˇ˗ehˍ kʼoˆ laˇ ve, heuˆ daꞈ˗oˬ ve chaw “awˬ suhˍ awˬ shaˍ hpawˇ tuꞈ ve hkanˍ ve gʼa hkanˍ tuˬ yoˬ.” (1 Kawˇ 7:28) Aˬ htoꞈ ma pa taw chi hkʼe gʼa hpuˇ ve le? Awˬ lawn kʼo, heuˆ daꞈ ve lehˬ maˇ biˇ ve chaw 2 gʼaˇ teˇ geh chehˇ ve pa taw yoˬ. Teˇ gʼaˇ leh teˇ gʼaˇ te hkʼaˇ dawˇ hkʼaˇ maˇ shuˍ daꞈ ve, dawˇ cawˇ ve leh maˇ dawˇ cawˇ ve kaꞈ maˇ shuˍ daꞈ ve yoˬ. Leh awˬ hpawˇ awˬ miˇ ma teˇ ca ca kʼo, chaw ceuˬ maˇ shuˍ daꞈ ve, chaw liˇ vaˇ liˇ leh hpehꞈ laˬ ve kaꞈ maˇ shuˍ daꞈ ve yoˬ. Teˇ gʼaˇ leh teˇ gʼaˇ maˇ heuˆ daꞈ sheˍ htaˇ, maˇ te tawˆ la ve te hkʼaˇ dawˇ hkʼaˇ kaꞈ gʼa mawˬ ve yoˬ. Leh chi ve teˇ hpaˍ yawˇ hui deˇ daꞈ tuˬ kaꞈ cawˬ la ve yoˬ. Teˇ gʼaˇ leh teˇ gʼaˇ shoꞈ shaꞈ ve awˬ lawn gu tuˬ ga daꞈ cawˇ ve htawˇ, yawˇ huiˉ maˬ 2 gʼaˇ gʼaˇ yaꞈ ve htaꞈ teˇ gʼaˇ leh teˇ gʼaˇ venˇ baˆ taˍ daꞈ ve yoˬ. Teˇ ca ca kʼo, teˇ gʼaˇ teˇ kaˬ chehˇ ve maˇ heˆ leh baˬ daꞈ ve kʼo, daꞈ jaˇ ve awˬ hkʼaˇ hpehꞈ ve tehꞈ dawˇ ve yoˬ. Chi hkʼe te ve lehˬ yawˇ hui ha lehˬ tuˬ te piˇ˗aw laˇ? Maˇ heˆ. Yaˬhoˉvaˬ lehˬ awˬ hpawˇ awˬ miˇ ma htaꞈ yawˆ yan daꞈ tcuh gaˇ ve yoˬ. Yawˇ huiˉ maˬ teˇ geh chehˇ ve shoꞈ shaꞈ ve awˬ lawn cawˬ ve htawˇ, hkʼaˬ htaˆ kaꞈ teˇ geh chehˇ tcuh gaˇ ve yoˬ. w24.03 16 ¶8; 17 ¶11

Nawˬ Baˆtiˆsaˬ haꞈ yuˬ˗oˬ htaˇ, nawˬ Yaˬhoˉvaˬ geh hkʼa dehꞈ meuˆ daꞈ leh yawˇ htaꞈ haꞈ tuˬ yoˬ tehꞈ dawˇ teh taˍ ve kʼo, nawˬ miˬ guiˬ awˬ suhˉ hkʼaw co co taiˍ taiˍ a shaꞈ gʼa tuˬ ve dawˇ law kuiˬ htaꞈ hkʼa dehꞈ yonˍ gʼa tuˬ te laˇ ve yoˬ. (Heˍ 5:13–6:1) Roˉmaꞈ liꞈ 5:2-4 hkʼaw nawˬ awˬ pon awˬ tehˬ hpehꞈ ve tehꞈ dawˇ ve yoˬ. Nawˬ tuꞈ ve hkanˍ ve laiˉ ceuˬ gʼa hpuˇ ve htawˇ, yeunˇ hkanˍ gʼaˇ leh Gʼuiˬ sha nawˬ htaꞈ nyi ma cawˇ ve yoˬ tehꞈ dawˇ ve yoˬ. Yaˬhoˉvaˬ nawˬ htaꞈ haꞈ ve tehꞈ yonˍ gʼa ve yoˬ. Yawˇ ka tiꞈ te taˍ ve hkʼe gʼaꞈ te tuˬ yoˬ tehꞈ nawˬ yonˍ gʼa ve yoˬ. Liꞈ hpu henˇ gehˇ sheˍ htaˇ aꞈ kehˉ, chi teˇ hkui nawˬ ve dawˇ law kuiˬ htaꞈ hkʼa dehꞈ yonˍ gʼa ve yoˬ. Nawˬ ve dawˇ law kuiˬ htaꞈ hkʼa tawˍ lehˆ mawˬ leh, awˬ hpfuhˇ shiˍ ve kʼo, Gʼuiˬ sha lehˬ nawˬ htaꞈ daꞈ ve awˬ ceuˬ peꞈ laˇ gaˇ ve tehꞈ nawˬ dawˇ ve yoˬ. Chi hkʼe dawˇ htaˇ, dawˇ law kuiˬ nawˬ ve a shaꞈ teꞈ kuiˬ hkʼaw teˇ hpawˇ le le awˬ bon cawˬ ve yoˬ. Yehˬ kʼa hkʼaw ve chaw htaꞈ daꞈ ve te piˇ ve, nawˬ a shaꞈ teꞈ kuiˬ hkʼaw dawˇ cheˆ ve awˬ lawn, maˇ heˆ leh nawˬ te ve awˬ ceuˬ htaꞈ kaꞈ awˬ bon cawˬ ve yoˬ. Tcuh yaˇ Pawˇluꞈ kʼoˆ peuˬ hkʼawꞈ nawˉ, Gʼuiˬ sha nyi hkʼaˇ suh tuˬ te piˇ htaˇ dawˇ law kuiˬ cawˬ ve yoˬ. Dawˇ law kuiˬ htaꞈ caˉ daꞈ ve a yeˇ uiˍ ve teˇ lawn htaꞈ Pawˇluꞈ kʼoˆ sheˍ ve yoˬ. Yawˇ kʼoˆ ve, nawˬ ve dawˇ law kuiˬ awˬ tehˬ hpehꞈ tuˬ yoˬ.—Roˉ 15:13. w23.12 12-13 ¶16-19

Ngaˬ hui shoꞈ shaꞈ ve gʼa hpuˇ jaˇ htaˇ ngaˬ hui ve dawˇ hkʼaˇ keunˍ lawꞈ cawˇ lawꞈ maˇ cawˬ la ve yoˬ. Yonˍ yeˬ ve maˇ cawˬ leh maˇ te jaw ve awˬ ceuˬ htaꞈ te la ve yoˬ. Heuˇ shan hpawˇ gʼuiˬ baˇ lonˉ htinˍ piˇ ve hkʼa shuˍ, ngaˬ hui shoꞈ shaꞈ ve laiˉ ceuˬ gʼa hpuˇ ve yoˬ. Ngaˬ hui chi hkʼe gʼa hpuˇ htaˇ Yaˬhoˉvaˬ hkʼaˬ hkʼe ga laˇ tuˬ ve le? Ngaˬ hui yonˍ yeˬ ve cawˬ tuˬ Yaˬhoˉvaˬ te laˇ tuˬ yoˬ tehꞈ ka tiꞈ te taˍ laˇ ve yoˬ. Heuˇ shan hpawˇ mvuhˇ yeˬ mvuhˇ haw lonˉ gʼa hpuˇ htaˇ, awˬ liˉ awˬ laˬ te leh hpfuhˆ baˬ˗e te ve yoˬ. Chi hkʼe maˇ hpehꞈ tuˬ heuˇ shan hpawˇ laiˉ hkeh awˬ jaˇ lo sho baˉ li cawˬ ve yoˬ. Chi ve lehˬ heuˇ shan hpawˇ awˬ jaˇ lo nyiˇ paˉ paˉ cawˬ ve yoˬ. Sho baˉ li chi ve lehˬ heuˇ shan hpawˇ gʼuiˬ baˇ lonˉ gʼa hpuˇ htaˇ, maˇ hpfuhˆ˗e tuˬ ga piˇ ve yoˬ. Chi hkʼe te htaˇ, heuˇ shan hpawˇ hkʼaw ciˇ ve chaw kawˆ tuˬ maˇ cawˬ leh oˉ kʼoˍ maˇ muiˬ tuˬ te piˇ ve yoˬ. Yaꞈ hkʼaˇ, sho baˉ li chi ve kanˉ hkʼa dehꞈ te gʼa tuˬ heuˇ shan hpawˇ gʼuˇ suhˍ hpawˇ lo tiˉ gʼaꞈ kʼai ve yoˬ. Chi ve hkʼa shuˍ shuˍ, ngaˬ hui shoꞈ shaꞈ ve gʼa hpuˇ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw te ve kʼo, yawˇ ngaˬ hui htaꞈ yonˍ yeˬ ve cawˬ tcuh laˇ tuˬ yoˬ. w24.01 22 ¶7-8

Nawˬ kawˆ htaˇ a shu yawˇ awˬ to htaꞈ na nyi cawˇ ve, ‘Yaˬhoˉvaˬ aˬ htoꞈ ma te jaw˗oˬ ve le?ʼ Yaˬhoˉvaˬ hpanˍ taˍ ve awˬ ceuˬ ngaˆ leh suhˉ veˆ teˇ hpaˍ htaꞈ hkʼaˬ hkʼe te nyi haꞈ shaˉ piˇ ve htaꞈ dawˇ nyi sheˍ. Awˬ ceuˬ chi teˇ hpaˍ Yaˬhoˉvaˬ ve awˬ hoꞈ awˬ han hkʼe maˇ hpanˍ taˍ leh yawˇ htaꞈ oˉ kʼoˍ maˇ pui gʼa ve htawˇ, Yaˬhoˉvaˬ kaꞈ awˬ ceuˬ chi teˇ hpaˍ htaꞈ hkʼa dehꞈ nyi haꞈ shaˉ piˇ ve yoˬ. Chi htaꞈ pa taw, yawˇ lehˬ awˬ ceuˬ chi teˇ hpaˍ aꞈ kehˉ ngaˬ hui htaꞈ a yeˇ yuˬ leh nyi haꞈ shaˉ laˇ gaˇ ve maˇ heˆ laˇ? (Maꞈhtehˍ 6:25-32) Awˬ lawn chi ve teˇ hpaˍ htaꞈ dawˇ nyi htaˇ, ngaˬ hui Yaˬhoˉvaˬ htaꞈ gʼaˇ hkʼa dehꞈ va tuˬ te laˇ ve yoˬ. Chi hkʼoˆ kaꞈ, Yaˬhoˉvaˬ yawˇ ve kanˉ te ve chaw awˬ pon te piˇ ve htaꞈ kaꞈ dawˇ nyi sheˍ. Liꞈ hpu hkʼaw ve chaw yonˍ yeˬ ve awˬ lawn htaꞈ hpfuhˆ nyi ve, maˇ heˆ leh chi beuꞈ teˇ co˗e Yaˬhoˉvaˬ ve kanˉ te ve chaw awˬ lawn gʼaw nyi sheˍ. Nawˬ te gʼa ve teˇ ceuˬ lehˬ, Yaˬhoˉvaˬ nawˬ htaꞈ hkʼaˬ hkʼe te nyi haꞈ shaˉ laˇ ve, leh nawˬ awˬ tehˬ ve htaꞈ hkʼaˬ hkʼe te shiˍ la tuˬ yawˇ ga laˇ ve htaꞈ kaꞈ dawˇ nyi sheˍ. (Yoˇ 6:44) Yaˬhoˉvaˬ nawˬ ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le? (1 Yoˇ 5:14) Yaˬhoˉvaˬ yawˇ haꞈ jaˇ ve Yaˇ paˍ htaiˍ hkʼawꞈ tcuh laˇ ve, nawˬ teˇ nyi leh teˇ nyi awˬ bon hkʼaˬ hkʼe gʼa ve le?—Efs 1:7; Heˍ 4:14-16 w24.01 4 ¶6; 7 ¶17