Awˬ Lawn 17
Nawˬ a shaꞈ teꞈ kuiˬ hkʼaw maˇ dawˇ maˇ gaˇ ve gʼa hpuˇ htaˇ, yeunˇ hkanˍ gʼaˇ tuˬ Yaˬhoˉvaˬ ga laˇ ve
“Daꞈ ve chaw lehˬ dawˇ haˍ tuˬ laiˉ ceuˬ htaꞈ gʼa hpuˇ ve yoˬ. Yaꞈ hkʼaˇ Gʼuiˬ sha yawˇ htaꞈ ponˬ piˇ ve yoˬ.”—CHIˇ MVUH VE 34:19.
KʼA MUIˬ HKAWˇ 44 Haˍ ve gʼawˇ ve chaw hui ve bon lawˬ hkawˇ
HENˇ TUˬ VE TEˇ HPAˍa
1. Nga hui aˬ htoꞈ ma awˬ lawn htaꞈ yonˍ gʼa ve le?
Ngaˬ hui Yaˬhoˉvaˬ ve chaw hpehꞈ ve yoˬ. Yaˬhoˉvaˬ ngaˬ hui htaꞈ haꞈ jaˇ leh yawˇ ngaˬ hui htaꞈ ha lehˬ tcuh gaˇ ve tehꞈ shiˍ ve yoˬ. (Roˉmaꞈ 8:35-39) Ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve kʼo, ngaˬ hui kaꞈ awˬ bon gʼa tuˬ tehꞈ yonˍ gʼa ve yoˬ. (Iˉsaˍyaˆ 48:17, 18) Yaꞈ hkʼaˇ, ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve kʼo, hkʼaˬ hkʼe te tuˬ le?
2. Ngaˬ hui shoꞈ shaꞈ ve aˬ htoꞈ ma gʼa hpuˇ ve le? Leh ngaˬ hui shoꞈ shaꞈ ve gʼa hpuˇ htaˇ, chi ngaˬ hui htawˇ dawˇ nawˬ dawˇ cawˬ tuˬ aˬ htoꞈ ma te laˇ ve le?
2 Ngaˬ hui Yaˬhoˉvaˬ ve kanˉ te ve chaw hpehꞈ ve htawˇ, shoꞈ shaꞈ ve maˇ gʼa hpuˇ taˬ tehꞈ kʼoˆ gaˇ ve maˇ heˆ. Tawˇ pa haˉ te kʼo, yehˬ kʼa hkʼaw ve chaw teˇ hpaˍ ngaˬ hui nyi ma luˬ tuˬ te laˇ ve, ngaˬ hui naˬ jaˇ leh Yaˬhoˉvaˬ ve kanˉ oˇ htaˇ hkʼe leˇ te maˇ gʼa ve, ngaˬ hui mvuhˇ yeˬ mvuhˇ haw lonˉ maˇ heˆ leh fawˉ mehˍ ve, chi ve teˇ hpaˍ ngaˬ hui gʼa hpuˇ htaˇ, htawˇ dawˇ nawˬ dawˇ cawˬ ve, ‘aˬ htoꞈ ma te ngaˬ chi hkʼe gʼa hpuˇ ve le? Ngaˬ teˇ ceuˬ ceuˬ te yaꞈ ve pa taw chi hkʼe gʼa hpuˇ ve hehˉ laˇ? Ngaˬ chi hkʼe gʼa hpuˇ ve lehˬ Yaˬhoˉvaˬ awˬ bon maˇ naꞈ laˇ ve htaꞈ pa taw hehˉ laˇ?’ Nawˬ kaꞈ chi hkʼe ve htawˇ dawˇ nawˬ dawˇ cawˬ jaw˗aw laˇ? Nawˬ kaꞈ chi hkʼe ve gʼa hpuˇ jaw ve kʼo, awˬ gʼaˇ taˇ nuˇ sheˍ. Yaˬhoˉvaˬ ve kanˉ te ve chaw laiˉ gʼaˇ kaꞈ chi hkʼe gʼa hpuˇ jaw˗oˬ ve yoˬ.—Chiˇ mvuh ve 22:1, 2; Haˍbaˍkuˆ 1:2, 3.
3. Chiˇ mvuh ve liꞈ 34:19 hkʼaw ngaˬ hui htaꞈ aˬ htoꞈ ma maˍ laˇ ve le?
3 Chiˇ mvuh ve liꞈ 34:19 gʼaw sheˍ. Chiˇ mvuh ve liꞈ hkʼaw ngaˬ hui htaꞈ maˍ laˇ ve a yeˇ uiˍ ve 2 lawn htaꞈ teˇ geh nyi sheˍ. (1) Daꞈ ve chaw hpehꞈ ve htawˇ, a shaꞈ teꞈ kuiˬ hkʼaw shoꞈ shaꞈ ve maˇ gʼa hpuˇ ve maˇ heˆ. (2) Ngaˬ hui shoꞈ shaꞈ ve gʼa hpuˇ ve htaꞈ Yaˬhoˉvaˬ ponˬ laˇ tuˬ yoˬ. Hkʼe kʼo yawˇ ngaˬ hui htaꞈ hkʼaˬ hkʼe ga laˇ gʼa tuˬ le? Awˬ hkʼaˇ teˇ hkʼaˇ lehˬ, ngaˬ hui a shaꞈ teꞈ kuiˬ hkʼaw hpehꞈ chehˇ ve awˬ ceuˬ htaꞈ haꞈ yuˬ gʼa tuˬ, Gʼuiˬ sha ga laˇ tuˬ yoˬ. Ngaˬ hui Yaˬhoˉvaˬ ve kanˉ te ve hkʼaw ha lehˬ ve cawˬ tuˬ yoˬ tehꞈ yawˇ ka tiꞈ te taˍ laˇ ve htawˇ, ngaˬ hui shoꞈ shaꞈ ve maˇ gʼa hpuˇ taˬ tehꞈ yawˇ maˇ kʼoˆ taˍ laˇ? (Iˉsaˍyaˆ 66:14) Yaˬhoˉvaˬ ngaˬ hui htaꞈ awˬ gʼuˇ suhˍ hpawˇ ve a yeˇ yuˬ tcuh gaˇ ve lehˬ, ngaˬ hui co co taiˍ taiˍ ve a shaꞈ gʼa leh yawˇ ngaˬ hui htaꞈ ha lehˬ ve cawˬ tcuh gaˇ ve yoˬ. (2 Kawˇrenˍhtuˆ 4:16-18) Yaꞈ hkʼaˇ, ngaˬ hui chi teˇ hkui teˇ nyi leh teˇ nyi yeunˇ hkanˍ gʼaˇ tuˬ yawˇ ga laˇ leh yawˇ ve kanˉ caˉ leh kʼawꞈ te kʼai gʼa tuˬ kaꞈ ga laˇ ve yoˬ.—Dawˇ haˍ ve 3:22-24.
4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
4 Liꞈ hpu ve awˬ co˗e htaˇ, leh ngaˬ hui ve awˬ co˗e htaˇ, Yaˬhoˉvaˬ ve kanˉ te ve ngaˬ hui htaꞈ hkʼaˬ hkʼe maˍ laˇ ve awˬ lawn chi ve hkʼaw teˇ geh henˇ tuˬ yoˬ. Ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve htaꞈ kaꞈ teˇ geh henˇ tuˬ yoˬ. Yaꞈ hkʼaˇ, ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va ve kʼo, yawˇ ngaˬ hui htaꞈ ga laˇ tuˬ yoˬ. (Chiˇ mvuh ve 55:22) Leh ngaˬ hui Yaˬhoˉvaˬ ve kanˉ te ve chaw ve awˬ lawn htaꞈ ngaˬ hui gʼa mawˬ htaˇ, a shu yawˇ awˬ to htaꞈ na nyi cawˇ ve, ‘ngaˬ yawˇ hui hkʼe leˇ gʼa hpuˇ ve kʼo, hkʼaˬ hkʼe te tuˬ le? Yawˇ hui ve awˬ lawn ngaˬ Yaˬhoˉvaˬ htaꞈ gʼaˇ hkʼa dehꞈ va tuˬ hkʼaˬ hkʼe ga laˇ ve le? Leh yawˇ hui ve awˬ lawn ngaˬ a shaꞈ teꞈ kuiˬ hkʼaw hkʼaˬ hkʼe yuˬ yehˇ gʼa ve le?’
LIꞈ HPU VE AWˬ CO˗E HTAˇ
Yaˍkoˆ ve aˉ hpaˇ Laˍbanˍ Yaˍkoˆ htaꞈ hkʼaˬ htaˆ kaꞈ heˍ piˇ ve htawˇ Yaˍkoˆ htaꞈ 20 hkʼawꞈ ve awˬ yanˇ awˬ hkʼaw lo Yaˬhoˉvaˬ awˬ bon naꞈ piˇ ve (Awˬ tawn 5 nyi sheˍ)
5. Laˍbanˍ Yaˍkoˆ htaꞈ shoꞈ shaꞈ ve cawˬ tuˬ aˬ htoꞈ ma te piˇ ve le? (Awˬ han htaꞈ nyi sheˍ.)
5 Liꞈ hpu ve awˬ co˗e htaˇ Yaˬhoˉvaˬ ve kanˉ te ve chaw laiˉ gʼaˇ kaꞈ maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve yoˬ. Yaˍkoˆ ve awˬ lawn htaꞈ teˇ geh nyi sheˍ. Laˍbanˍ Yaˬhoˉvaˬ htaꞈ oˉ kʼoˍ maˇ pui ve pa taw, Laˍbanˍ ve yaˇ miˇ Yaˍkoˆ ve awˬ miˇ ma te tcuh tuˬ, Yaˍkoˆ ve awˬ pa Iˉcaˆ lehˬ Laˍbanˍ geh kʼai tehꞈ kʼoˆ piˇ ve yoˬ. Yaˍkoˆ lehˬ awˬ pa Iˉcaˆ kʼoˆ maˍ piˇ ve hkʼe te ve kʼo, Yaˬhoˉvaˬ awˬ bon naꞈ laˇ tuˬ yoˬ tehꞈ awˬ pa ka tiꞈ te piˇ ve yoˬ. (Awˬ hkuiˉ puiˍ 28:1-4) Hkʼe te leh, Yaˍkoˆ Hkaˍnanˍ mvuhˇ miˬ hkʼaw tawˆ kʼai leh Laˍbanˍ ve aˉ hkʼaw lo kʼai ve yoˬ. Laˍbanˍ ve yaˇ miˇ Leˇ˗aˍ leh Raˍhkeˍlaˆ meh ve yoˬ. Yaˍkoˆ lehˬ Raˍhkeˍlaˆ htaꞈ haꞈ jaˇ ve yoˬ. Yaˍkoˆ Raˍhkeˍlaˆ htaꞈ gʼa heuˆ tuˬ kanˉ 7 hkʼawꞈ te laˇ˗a tehꞈ Laˍbanˍ htaꞈ kʼoˆ piˇ ve yoˬ. (Awˬ hkuiˉ puiˍ 29:18) Yaꞈ hkʼaˇ, Yaˍkoˆ dawˇ taˍ ve hkʼe maˇ hpehꞈ. Laˍbanˍ Yaˍkoˆ htaꞈ heˍ piˇ leh Leˇ˗aˍ htaꞈ heuˆ tcuh ve yoˬ. Teˇ shinˉ peuˬ hkʼawꞈ nawˉ, Laˍbanˍ lehˬ Yaˍkoˆ Raˍhkeˍlaˆ htaꞈ heuˆ tcuh ve htawˇ, Yaˍkoˆ Laˍbanˍ htaꞈ kanˉ 7 hkʼawꞈ gʼa kʼawꞈ te piˇ ve yoˬ. (Awˬ hkuiˉ pui 29:25-27) Yaˍkoˆ lehˬ Laˍbanˍ ve awˬ ceˬ 20 hkʼawꞈ te˗oˬ ve htawˇ, heˍ piˇ sheˍ ve yoˬ.—Awˬ hkuiˉ puiˍ 31:41, 42.
6. Yaˍkoˆ shoꞈ shaꞈ ve aˬ htoꞈ ma htaꞈ gʼa hpuˇ sheˍ ve le?
6 Chi hkʼoˆ kaꞈ, Yaˍkoˆ lehˬ awˬ nu ve shoꞈ shaꞈ ve htaꞈ kaꞈ gʼa yeunˇ hkanˍ sheˍ ve yoˬ. Yaˍkoˆ ve yehˬ kʼa lehˬ yehˬ kʼa lonˉ hpehꞈ ve pa taw, yaˇ teˇ hpaˍ hkʼa dehꞈ maˇ cawˇ daꞈ. Yoˇsehꞈ ve awˬ viˉ paˍ hui lehˬ Yoˇsehꞈ shu ve awˬ ceˬ te tuˬ hawˇ piˇ ve yoˬ. Yaˍkoˆ ve yaˇ paˍ 2 gʼaˇ Suˉmonˍ leh Leˍviˆ kaꞈ yawˇ hui ve yehˬ kʼa yaꞈ taw tuˬ te piˇ leh Yaˬhoˉvaˬ ve awˬ meh luˬ tuˬ kaꞈ te piˇ ve yoˬ. Chi hkʼe ceh tiˉ maˇ heˆ. Yaˍkoˆ haꞈ jaˇ ve Raˍhkeˍlaˆ yaˇ paˍ 2 gʼaˇ teˇ gʼaˇ paw htaˇ suh˗e ve yoˬ. Leh oˇ ve teˇ yanˇ meuꞈ lonˉ kaˆ lonˉ gaˬ la ve pa taw, Yaˍkoˆ mawˇ˗oˬ ve htawˇ, Eˇjiˇtuꞈ mvuhˇ miˬ lo gʼa hpaw˗e ve yoˬ.—Awˬ hkuiˉ puiˍ 34:30; 35:16-19; 37:28; 45:9-11, 28.
7. Yaˬhoˉvaˬ Yaˍkoˆ htaꞈ hkʼaˬ htaˆ kaꞈ haꞈ chehˇ sheˍ ve tehꞈ hkʼaˬ hkʼe hpeuꞈ maw piˇ ve le?
7 Yaˍkoˆ shoꞈ shaꞈ ve gʼa hpuˇ maˇ jaˇ ve htawˇ, Yaˬhoˉvaˬ ka tiꞈ te taˍ laˇ ve htaꞈ hkʼaˬ htaˆ kaꞈ yonˍ ve yoˬ. Yaˬhoˉvaˬ Yaˍkoˆ htaꞈ hkʼaˬ htaˆ kaꞈ haꞈ chehˇ sheˍ ve tehꞈ hpeuꞈ maw piˇ ve yoˬ. Tawˇ pa haˉ te kʼo, Yaˍkoˆ htaꞈ shu heˍ caˇ piˇ ve htawˇ, Yaˬhoˉvaˬ Yaˍkoˆ htaꞈ awˬ bon naꞈ piˇ leh hpu shi mawˇ jeˬ maˇ maˇ cawˬ tcuh ve yoˬ. Yaˍkoˆ yawˇ haꞈ jaˇ ve yaˇ paˍ Yoˇsehꞈ suh maw jaˇ˗oˬ ve tehꞈ dawˇ ve htaꞈ gʼa kʼawꞈ mawˬ daꞈ ve Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve htaꞈ dawˇ nyi sheˍ. Yaˍkoˆ Yaˬhoˉvaˬ htaꞈ meuˆ daꞈ ve pa taw, yawˇ shoꞈ shaꞈ ve gʼa hpuˇ maˇ jaˇ ve htawˇ yeunˇ hkanˍ gʼaˇ ve yoˬ. (Awˬ hkuiˉ puiˍ 30:43; 32:9, 10; 46:28-30) Chi htaꞈ pa taw, ngaˬ hui Yaˬhoˉvaˬ geh hkʼaˬ htaˆ kaꞈ meuˆ daꞈ ve kʼo, ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve htawˇ, ngaˬ hui yeunˇ hkanˍ gʼaˇ tuˬ yoˬ.
8. Jawˇ mawˇ Daˍviˆ aˬ htoꞈ ma te gaˇ ve le?
8 Jawˇ mawˇ Daˍviˆ Yaˬhoˉvaˬ ve kanˉ te tuˬ laiˉ ceuˬ te gaˇ ve yoˬ. Yaꞈ hkʼaˇ, yawˇ dawˇ taˍ ve hkʼe teˇ ceuˬ le le te maˇ gʼa. Tawˇ pa haˉ te kʼo, Daˍviˆ lehˬ Yaˬhoˉvaˬ awˬ pon bon yehˬ lonˉ te gaˇ jaˇ ve pa taw, chi htaꞈ caˉ daꞈ ve tcuh kaˍ paˍ Naˍtanˍ htaꞈ ca yaw daꞈ˗e ve yoˬ. Leh Naˍtanˍ kʼoˆ piˇ ve, “nawˬ te gaˇ ve hkʼe te˗o. Awˬ lawn kʼo, Gʼuiˬ sha nawˬ geh chehˇ taˍ ve yoˬ.” (1 Raˍsaˍvanˍ 17:1, 2) Tawˇ hkawˇ chi lehˬ Daˍviˆ awˬ gʼaˇ hkʼaˬ hkʼe taw gʼa ve htaꞈ ngaˬ hui dawˇ nyi sheˍ. Yawˇ bon yehˬ lonˉ te tuˬ ve awˬ hkʼaˇ htaꞈ laꞈ haˉ gu teh ve yoˬ.
9. Daˍviˆ yawˇ dawˇ taˍ ve hkʼe maˇ gʼa te tuˬ awˬ lawn gʼa kaˇ htaˇ, yawˇ hkʼaˬ hkʼe te ve le?
9 Yaꞈ hkʼaˇ, “oˇ ve teˇ haˉ” Yaˬhoˉvaˬ Naˍtanˍ htaꞈ cuˇ leh Daˍviˆ Yaˬhoˉvaˬ ve bon yehˬ lonˉ htaꞈ maˇ gʼa te tehꞈ kʼoˆ piˇ tcuh ve yoˬ. Leh yawˇ ve yaˇ paˍ teˇ gʼaˇ bon yehˬ lonˉ chi htaꞈ gʼa te tuˬ yoˬ tehꞈ kʼoˆ piˇ tcuh ve yoˬ. (1 Raˍsaˍvanˍ 17:3, 4, 11, 12) Daˍviˆ nyi ma luˬ jaˇ ve pa taw yawˇ hkʼaˬ hkʼe te ve le? Yawˇ dawˇ taˍ ve htaꞈ laꞈ haˉ pa ve yoˬ. Sawˉlaꞈmonˍ bon yehˬ lonˉ chi htaꞈ te tuˬ Daˍviˆ hpu shi mawˇ jeˬ leh awˬ nu ve mawˇ teˇ hpaˍ gu piˇ ve yoˬ.—1 Raˍsaˍvanˍ 29:1-5.
10. Yaˬhoˉvaˬ Daˍviˆ htaꞈ awˬ bon hkʼaˬ hkʼe naꞈ piˇ ve le?
10 Daˍviˆ Yaˬhoˉvaˬ ve bon yehˬ lonˉ maˇ gʼa te tehꞈ kʼoˆ piˇ peuˬ hkʼawꞈ nawˉ, Daˍviˆ ve awˬ yaˇ awˬ duˬ teˇ gʼaˇ hkʼaˬ htaˆ kaꞈ Jawˇ mawˇ gʼa te tuˬ yoˬ tehꞈ Yaˬhoˉvaˬ ka tiꞈ te piˇ ve yoˬ. (2 Saˍmo˗eˍlaˆ 7:16) Miˬ guiˬ awˬ suhˉ hkʼaw Daˍviˆ kʼawꞈ teꞈ tu la htaˇ, 1,000 hkʼawꞈ ve awˬ yanˇ hkʼaw Jawˇ mawˇ te leh gʼa uˉ peunˍ ve lehˬ yawˇ ve awˬ yaˇ awˬ duˬ Yeˍsuˆ Hkriꞈ hpehꞈ ve htaꞈ yawˇ gʼa shiˍ htaˇ, hkʼaˬ hkʼe taw ha lehˬ ve htaꞈ dawˇ nyi sheˍ. Chi ngaˬ hui shiˍ tuˬ te laˇ ve, ngaˬ hui dawˇ taˍ ve hkʼe Yaˬhoˉvaˬ ve kanˉ teˇ ceuˬ le le te maˇ gʼa ve htawˇ, ngaˬ hui maˇ dawˇ maˇ gaˇ ve hkʼaw yawˇ ngaˬ hui htaꞈ daꞈ ve awˬ ceuˬ peꞈ laˇ ve yoˬ.
11. Awˉ lawˉ peuˇ ve Hkriꞈ yaˇ dawˇ taˍ ve hkʼe Gʼuiˬ sha ve mvuhˇ miˬ maˇ gaˬ la sheˍ ve htawˇ, yawˇ hui Gʼuiˬ sha geh aˬ htoꞈ ma awˬ bon gʼa ve le? (Tcuh yaˇ 6:7)
11 Awˉ lawˉ peuˇ ve Hkriꞈ yaˇ kaꞈ a shaꞈ teꞈ kuiˬ hkʼaw maˇ dawˇ maˇ gaˇ ve shoꞈ shaꞈ ve gʼa hpuˇ ve yoˬ. Tawˇ pa haˉ te kʼo, yawˇ hui Gʼuiˬ sha ve mvuhˇ miˬ gaˬ la tuˬ law chehˇ ve htawˇ, hkʼaˬ htaˇ gaˬ la tuˬ ve naˍ kaꞈ maˇ shiˍ ve yoˬ. (Tcuh yaˇ 1:6, 7) Yawˇ hui law chehˇ ve awˬ yanˇ hkʼaˬ hkʼe te ve le? Yawˇ hui leuˉ leh bon maˍ ve laiˉ gʼaˇ gʼa kaˇ ve htaꞈ shiˍ htaˇ, Yaˬhoˉvaˬ yawˇ hui htaꞈ ga laˇ chehˇ ve tehꞈ shiˍ ve yoˬ.—Tcuh yaˇ 6:7 gʼaw sheˍ.
12. Awˉ lawˉ peuˇ ve Hkriꞈ yaˇ meuꞈ lonˉ kaˆ lonˉ gaˬ la htaˇ yawˇ hui hkʼaˬ hkʼe te ve le?
12 Leh “miˬ guiˬ hkʼa peu˗eˬ” hkʼoˆ meuꞈ lonˉ kaˆ lonˉ gaˬ la ve yoˬ. Chi lehˬ awˉ lawˉ peuˇ ve Hkriꞈ yaˇ kaꞈ gʼa hpuˇ ve yoˬ. (Tcuh yaˇ 11:28) Yawˇ hui hkʼaˬ hkʼe taw tuꞈ hkanˍ ve htaꞈ dawˇ nyi sheˍ. Yehˬ shehˍ hpaˇ lehˬ hkʼaˬ hkʼe te yehˬ kʼa hkʼaw ve chaw caˇ tuˬ dawˬ tuˬ gʼa caˇ tuˬ ve htaꞈ dawˇ haˍ ve yoˬ. Yaˇ nehˬ Gʼuiˬ sha ve kanˉ maˇ maˇ te tuˬ dawˇ teh taˍ ve chaw kʼo, yawˇ hui dawˇ teh taˍ ve htaꞈ maˇ te sheˍ tehꞈ dawˇ˗aw laˇ? Yaꞈ hkʼaˇ, awˉ lawˉ peuˇ ve Hkriꞈ yaˇ tuꞈ ve hkanˍ ve aˬ htoꞈ ma gʼa hpuˇ ve htawˇ, yawˇ hui pa tuˬ gu hehnˇ taˍ ve yoˬ. Yawˇ hui te gʼa ve hkʼe bon maˍ ve yoˬ. Yawˇ hui cawˬ taˍ ve hkʼe Yuˇdaꞈ mvuhˇ miˬ lo yonˍ hkʼaˇ hkʼa shuˍ ve chaw htaꞈ caˇ tuˬ pehˬ piˇ ve yoˬ.—Tcuh yaˇ 11:29, 30.
13. Awˉ lawˉ peuˇ ve Hkriꞈ yaˇ meuꞈ lonˉ kaˆ lonˉ gaˬ la htaˇ, Yaˬhoˉvaˬ awˬ bon hkʼaˬ hkʼe naꞈ piˇ ve le?
13 Meuꞈ lonˉ kaˆ lonˉ ve awˬ yanˇ htaˇ Yaˬhoˉvaˬ awˉ lawˉ peuˇ ve Hkriꞈ yaˇ htaꞈ awˬ bon hkʼaˬ hkʼe naꞈ piˇ ve le? Awˬ nu ve awˬ viˉ awˬ nyi, awˬ viˉ awˬ nyi meuꞈ lonˉ kaˆ lonˉ gʼa hpuˇ htaˇ ga laˇ ve htaꞈ mawˬ leh Yaˬhoˉvaˬ yawˇ hui htaꞈ ga laˇ ve tehꞈ shiˍ ve yoˬ. (Maꞈhtehˍ 6:31-33) Yonˍ hkʼaˇ hkʼa shuˍ ve chaw yawˇ hui htaꞈ ga laˇ ve awˬ hpfuhˇ shiˍ leh meuˆ daꞈ ve yoˬ. Piˇ ve chaw leh gʼa ga piˇ ve chaw kaꞈ ha lehˬ ve yoˬ. (Tcuh yaˇ 20:35) Pa ve awˬ ceuˬ cawˬ htaˇ, pa tuˬ coˇ caˇ ve chaw htaꞈ Yaˬhoˉvaˬ awˬ bon naꞈ piˇ tuˬ yoˬ.
14. Pawˇluꞈ leh Baˍnaˍbaˆ aˬ htoꞈ ma gʼa hpuˇ ve le? Leh awˬ bon hkʼaˬ hkʼe gʼa ve le? (Tcuh yaˇ 14:21, 22)
14 Awˉ lawˉ peuˇ ve Hkriꞈ yaˇ fawˉ mehˍ ve teˇ hkui teˇ hkui gʼa hpuˇ ve yoˬ. Chi lehˬ teˇ pawˆ pawˆ kʼo yawˇ hui gʼa hpuˇ tuˬ yoˬ tehꞈ maˇ dawˇ. Pawˇluꞈ leh Baˍnaˍbaˆ Luˇtaˍraˆ venˇ lo bon maˍ htaˇ, yawˇ hui gʼa hpuˇ ve awˬ ceuˬ htaꞈ dawˇ nyi sheˍ. Awˉ lawˉ htaˇ venˇ oˇ ve hkʼaw chehˇ ve chaw Pawˇluꞈ leh Baˍnaˍbaˆ htaꞈ hkʼa dehꞈ haꞈ yuˬ piˇ ve yoˬ. Yaꞈ hkʼaˇ, chaw teˇ hpaˍ “chaw awˬ moˍ lonˉ htaꞈ beˬ” piˇ leh Pawˇluꞈ htaꞈ tawˍ tcuh ve yoˬ. Hkʼe te leh, venˇ oˇ ve hkʼaw chehˇ ve chaw teˇ hpaˍ awˉ lawˉ htaˇ Pawˇluꞈ htaꞈ hkʼa dehꞈ haꞈ yuˬ piˇ ve htawˇ, Pawˇluꞈ htaꞈ haˉ pui baˬ pehˍ piˇ ve yoˬ. (Tcuh yaˇ 14:19) Chi hkʼe hpehꞈ ve htawˇ, Pawˇluꞈ leh Baˍnaˍbaˆ awˬ nu ve venˇ lo bon kʼawꞈ maˍ kʼai ve yoˬ. Awˬ bon hkʼaˬ hkʼe gʼa ve le? Yawˇ hui “chaw maˇ maˇ htaꞈ” awˬ laꞈ gʼawˇ hpehꞈ la tuˬ ga piˇ ve yoˬ. Yawˇ hui ve awˬ lawn awˬ nu ve Hkriꞈ yaˇ awˬ gʼaˇ gʼa tuˬ te piˇ ve yoˬ. (Tcuh yaˇ 14:21, 22 gʼaw sheˍ.) Pawˇluꞈ leh Baˍnaˍbaˆ awˬ gʼaˇ maˇ nuˇ leh yawˇ hui fawˉ ve mehˍ ve gʼa hpuˇ ve htawˇ, Gʼuiˬ sha ve kanˉ caˉ leh te ve pa taw, chaw maˇ maˇ awˬ bon gʼa ve yoˬ. Chi htaꞈ pa taw, ngaˬ hui awˬ gʼaˇ maˇ nuˇ leh Yaˬhoˉvaˬ ve kanˉ caˉ leh te ve kʼo, ngaˬ hui kaꞈ awˬ bon gʼa tuˬ yoˬ.
NGAˬ HUI VE AWˬ CO˗E HTAˇ
15. Awˬ viˉ awˬ nyi A. H Mehˆmiˉlanˇ ve awˬ lawn nawˬ htaꞈ aˬ htoꞈ ma maˍ laˇ ve le?
15 1914 hkʼawꞈ maˇ gaˬ sheˍ htaˇ, Yaˬhoˉvaˬ ve chaw teˇ ceuˬ ceuˬ htaꞈ law chehˇ ve yoˬ. Tawˇ pa haˉ te kʼo, awˬ viˉ awˬ nyi A. H. Mehˆmiˉlanˇ leh awˬ nu ve awˬ viˉ awˬ nyi laiˉ gʼaˇ maˇ maw maw kʼo, yawˇ hui mvuhˇ naw ma hkʼoˆ lo gʼa taˆ˗e tuˬ yoˬ tehꞈ yonˍ ve yoˬ. 1914 hkʼawꞈ ha pa 9 maˬ htaˇ, awˬ viˉ awˬ nyi Mehˆmiˉlanˇ bon maˍ hkawˇ teˇ lawn hkʼaw kʼoˆ ve, “hkawꞈ nyi shinˉ nyi ve bon maˍ htaˇ yawˇ awˬ leh meuˇ teˇ pawˆ bon gʼa maˍ ve tehꞈ dawˇ ve yoˬ.” Yaꞈ hkʼaˇ, bon maˍ ve chi teˇ pawˆ awˬ leh meuˇ teˇ pawˆ hpehꞈ ve maˇ heˆ. Awˬ viˉ awˬ nyi Mehˆmiˉlanˇ kʼawꞈ kʼoˆ ve, “ngaˬ hui hkʼaw ve chaw teˇ hpaˍ mvuhˇ naw ma hkʼoˆ lo taˆ˗e tuˬ kʼoˆ ve vaiˇ jaˇ ve yoˬ. Ngaˬ hui awˬ pon a yeˇ uiˍ jaˇ ve awˬ ceuˬ lehˬ Jawˇ mawˇ Yeˍsuˆ Hkriꞈ ve kanˉ gʼaˇ hteꞈ te cawˇ ve yoˬ.” Awˬ viˉ awˬ nyi Mehˆmiˉlanˇ Gʼuiˬ sha ve kanˉ maˇ maˇ te ve yoˬ. Yawˇ hto toˇ ve kaiˬ jaˇ. Awˬ viˉ awˬ nyi laiˉ gʼaˇ choˬ paˉ oˇ paˉ maˇ chehˇ ve pa taw, htawnˍ hkʼaw lo gʼa chehˇ ve chaw htaꞈ yawˇ awˬ gʼaˇ piˇ ve yoˬ. Chi hkʼoˆ kaꞈ, yawˇ mawˇ jaˇ˗oˬ ve htawˇ hkʼaˬ htaˆ kaꞈ hpawnˬ daꞈ˗e ve yoˬ. Awˬ viˉ awˬ nyi Mehˆmiˉlanˇ yawˇ law chehˇ ve awˬ yanˇ htaˇ, kaiˬ ve hkʼaw Gʼuiˬ sha ve kanˉ te ve yawˇ aˬ htoꞈ ma awˬ bon gʼa ve le? 1966 hkʼawꞈ yawˇ maˇ suh sheˍ htaˇ kʼoˆ ve, “chi teˇ hkui hkʼa gaˬ kaꞈ ngaˬ ve yonˍ hkʼaˇ yonˍ yeˬ chehˇ sheˍ ve yoˬ.” Ngaˬ hui dawˇ taˍ ve aꞈ kehˉ law maw jaˇ htaˇ, yawˇ lehˬ ngaˬ hui awˬ pon daꞈ ve henˇ tuˬ hpehꞈ ve yoˬ.—Heˍbrehˇ 13:7.
16. Awˬ viˉ awˬ nyi Heh˗beu Ceh˗niˆ leh awˬ miˇ ma maˇ dawˇ maˇ gaˇ ve hkʼaw shoꞈ shaꞈ ve aˬ htoꞈ ma gʼa hpuˇ ve le? (Yaˍkoˆ 4:14)
16 Yaˬhoˉvaˬ ve chaw laiˉ gʼaˇ maˇ dawˇ maˇ gaˇ ve hkʼaw maˇ chehˇ sha leh shoꞈ shaꞈ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, awˬ viˉ awˬ nyi Heh˗beu Ceh˗niˆ b ve hpehꞈ laˬ jaw ve awˬ lawn hkʼaw yawˇ kʼoˆ ve, Gaˬnaˬ mvuhˇ miˬ lo yawˇ leh awˬ miˇ ma Miˍshehˍnaˍliˍ gʼa te ve hkʼaˬ hkʼe taw ha lehˬ ve htaꞈ kʼoˆ maˍ laˇ ve yoˬ. Yaꞈ hkʼaˇ, teˇ nyi gaˬ leh dawˇ maˇ ve a naˍ hpehꞈ ve yoˬ. Awˬ viˉ awˬ nyi Ceh˗niˆ Yaˍkoˆ liꞈ 4:14 htaꞈ kʼoˆ ve, yawˇ gʼa hpuˇ ve awˬ ceuˬ lehˬ “shawˉ pawˍ hkʼaˬ hkʼe hpehꞈ la tuˬ ve htaꞈ nawˬ hui maˇ shiˍ.” (Gʼaw sheˍ.) Yawˇ kʼawꞈ kʼoˆ ve, “hpehꞈ la ve awˬ ceuˬ htaꞈ haꞈ yuˬ leh ngaˬ ve a naˍ htaꞈ gu tuˬ Gaˬnaˬ mvuhˇ miˬ lo maˇ chehˇ˗oˬ tuˬ, meuˆ daꞈ jaˇ ve awˬ chawˇ geh hpaˆ daꞈ leh, Kaˬneˬdaˬ mvuhˇ miˬ lo kʼoꞈ˗e tuˬ yawˇ hui htaꞈ kʼoˆ piˇ ve yoˬ.” Awˬ viˉ awˬ nyi Ceh˗niˆ leh awˬ miˇ ma shoꞈ shaꞈ ve gʼa hpuˇ jaˇ ve htawˇ, yawˇ hui ka tiꞈ yeˬ ve hkʼaw Yaˬhoˉvaˬ ve kanˉ caˉ leh te gʼa tuˬ ga piˇ ve yoˬ.
17. Awˬ viˉ awˬ nyi Ceh˗niˆ ve hpehꞈ laˬ jaw ve awˬ lawn awˬ nu awˬ viˉ awˬ nyi awˬ pon awˬ bon hkʼaˬ hkʼe gʼa ve le?
17 Awˬ viˉ awˬ nyi Ceh˗niˆ ve hpehꞈ laˬ jaw ve awˬ lawn hkʼaw awˬ viˉ awˬ nyi laiˉ gʼaˇ awˬ gʼaˇ gʼa jaˇ. Awˬ viˉ awˬ nyi yaˇ miˇ teˇ gʼaˇ kʼoˆ ve, “awˬ lawn chi ve hkʼe taw ngaˬ awˬ gʼaˇ gʼa ve teˇ lawn kaꞈ maˇ cawˬ. Awˬ viˉ awˬ nyi Ceh˗niˆ yawˇ naˬ ve htaꞈ haꞈ shaˉ tuˬ kanˉ chi ve htaꞈ maˇ te˗o ve tehꞈ ngaˬ gʼaw htaˇ, ngaˬ keunˍ lawꞈ cawˇ lawꞈ ve hkʼaw dawˇ hkʼaˇ cawˬ ve yoˬ.” Awˬ viˉ awˬ nyi hawˉ hkʼaˆ teˇ gʼaˇ kaꞈ chi hkʼa shuˍ dawˇ ve yoˬ. Yawˇ kʼoˆ ve, “Hkriꞈ yaˇ awˬ moˍ hkʼaw nyi haꞈ shaˉ paˍ 10 hkʼawꞈ te peuˬ hkʼawꞈ nawˉ yawˇ maˇ chehˇ sha ve pa taw, yawˇ ve awˬ vuiˬ htaꞈ maˇ kʼawꞈ te˗o ve yoˬ. Ngaˬ maˇ chehˇ sha ve pa taw teˇ pawˆ pawˆ kʼo hpehꞈ laˬ jaw ve awˬ lawn kaꞈ gʼaw maˇ gʼa. Yaꞈ hkʼaˇ, awˬ viˉ awˬ nyi Ceh˗niˆ coˇ caˇ ve htaꞈ ngaˬ awˬ gʼaˇ gʼa tuˬ te laˇ ve yoˬ.” Ngaˬ hui maˇ dawˇ maˇ gaˇ ve hkʼaw shoꞈ shaꞈ ve htaꞈ gʼa yeunˇ hkanˍ htaˇ awˬ lawn chi teˇ hpaˍ ngaˬ hui htaꞈ shaˍ tiꞈ peꞈ laˇ ve yoˬ. Ngaˬ hui kaꞈ a shaꞈ teꞈ hkʼaˇ hkʼaw dawˇ taˍ ve hkʼe maˇ hpehꞈ la ve htawˇ, awˬ viˉ awˬ nyi awˬ gʼaˇ gʼa tuˬ te piˇ gʼa ve yoˬ. Yaꞈ hkʼaˇ, ngaˬ hui kaꞈ yonˍ hkʼaˇ hpawˇ leh yeunˇ hkanˍ ve awˬ lawn awˬ nu ve chaw awˬ pon daꞈ ve henˇ yuˬ tuˬ hpehꞈ gʼa ve yoˬ.—1 Peˍtruˆ 5:9.
Ngaˬ hui Yaˬhoˉvaˬ htaꞈ gʼaˇ va ve kʼo maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ htaˇ yawˇ geh hkʼa dehꞈ meuˆ daꞈ tuˬ ga laˇ ve (Awˬ tawn 18 nyi sheˍ)
18. Awˬ han hkʼaw ve awˬ lawn Nai˗jeˇriˇ˗aˇ mvuhˇ miˬ hkʼaw ve mehˇ chawˇ ma ve awˬ lawn nawˬ htaꞈ aˬ htoꞈ ma maˍ laˇ ve le?
18 Yaˬhoˉvaˬ ve chaw kaꞈ tuꞈ ve hkanˍ ve laiˉ ceuˬ htaꞈ gʼa hpuˇ ve yoˬ. Tawˇ pa haˉ te kʼo, a naˍ 19 ve awˬ yanˇ htaˇ, Nai˗jeˇriˇ˗aˇ mvuhˇ miˬ hkʼaw ve awˬ viˉ awˬ nyi mehˇ chawˇ ma ve awˬ lawn htaꞈ teˇ geh nyi sheˍ. Yawˇ lehˬ hpu leh caˇ tuˬ kaꞈ maˇ cawˬ. Mvuhˇ shawˉ gaˬ leh ngaˬ ve yaˇ miˇ caˬ hkʼa teˇ hkawˆ ceh tiˉ cawˬ ve tehꞈ kʼoˆ laˇ ve yoˬ. Chi teˇ ponˬ caˇ peuˬ ve kʼo awˬ nu ve teˇ ponˬ caˇ tuˬ maˇ cawˬ˗o. Awˬ e yawˇ ve yaˇ miˇ htaꞈ kʼoˆ piˇ ve hpu leh caˇ tuˬ maˇ cawˬ˗o ve htawˇ, yawˇ hui kaꞈ Zaˍraˍtaˆ venˇ lo chehˇ ve mehˇ chawˇ ma caˇ tuˬ teˇ ponˬ ceh tiˉ cawˬ ve htaꞈ henˇ yuˬ cawˇ ve yoˬ. Leh yawˇ hui htaꞈ Yaˬhoˉvaˬ hkʼa dehꞈ nyi haꞈ shaˉ laˇ tuˬ yoˬ tehꞈ yonˍ cawˇ ve yoˬ. (1 Jawˇmawˇ 17:8-16) Awˬ e awˬ yaˇ sha gʼuˇ teˇ ponˬ hkʼaˬ hkʼe te gʼa caˇ tuˬ maˇ dawˇ nyi sheˍ htaˇ, awˬ viˉ awˬ nyi geh caˇ tuˬ leh mawˇ teˇ hpaˍ kaꞈ gʼa ve yoˬ. Caˇ tuˬ chi ve teˇ hpaˍ yawˇ hui 2 shinˉ awˬ pon caˇ lawꞈ ve yoˬ. Awˬ e kʼoˆ ve, yawˇ ve yaˇ geh yaw daꞈ ve htaꞈ Yaˬhoˉvaˬ na taˍ laˇ ve tehꞈ maˇ dawˇ. Ngaˬ hui Yaˬhoˉvaˬ htaꞈ gʼaˇ va ve kʼo, maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ htaˇ ngaˬ hui Yaˬhoˉvaˬ geh gʼaˇ hteꞈ meuˆ daꞈ tuˬ te laˇ ve htaꞈ gʼa mawˬ ve yoˬ.—1 Peˍtruˆ 5:6, 7.
19. Awˬ viˉ awˬ nyi Aˬleˇsiˇ Ye˗chawˆ fawˉ ve mehˍ ve aˬ htoꞈ ma gʼa hpuˇ ve le?
19 Peuˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, awˬ viˉ awˬ nyi laiˉ gʼaˇ maˇ dawˇ maˇ gaˇ ve hkʼaw fawˉ ve mehˍ ve gʼa hpuˇ ve yoˬ. Ruˆsaˆ mvuhˇ miˬ lo chehˇ ve awˬ viˉ awˬ nyi Aˬleˇsiˇ Ye˗chawˆ ve awˬ lawn htaꞈ teˇ geh nyi sheˍ. 1994 hkʼawꞈ htaˇ awˬ viˉ awˬ nyi Aˬleˇsiˇ Baˆtiˆsaˬ haꞈ yuˬ ve yoˬ. Leh oˇ ve teˇ yanˇ yawˇ chehˇ kuiˬ teˇ tawn lo Shaˉhkiˆhkanˍ ve chaw Yaˬhoˉvaˬ htaꞈ oˉ kʼoˍ pui gʼa sheˍ ve yoˬ. Yaꞈ hkʼaˇ, peuˬ hkʼawꞈ nawˉ Ruˆsaˆ mvuhˇ miˬ lo ve awˬ liˇ awˬ hkʼaˇ pa kʼai ve yoˬ. 2020 hkʼawꞈ htaˇ taˍ nuꞈ (paˍ leˆ) Aˬleˇsiˇ ve yehˬ lo ca hpfuhˆ la leh mawˇ laiˉ ceuˬ yuˬ kʼai ve yoˬ. Laiˉ ha pa gaˬ leh yawˇ htaꞈ chaw haiˬ tehꞈ she pfuhˍ piˇ ve yoˬ. Chi hkʼe hpehꞈ ve lehˬ, chaw teˇ gʼaˇ Liꞈ hpu ca henˇ la ve 1 hkʼawꞈ hpaˇ gaˬ˗oˬ ve yawˇ VDO hkʼawˇ htawˍ leh taˍ nuꞈ htaꞈ feu piˇ ve yoˬ. Hawˉ hkʼaˆ chi teˇ gʼaˇ hkʼaˬ hkʼe te chi hkʼe te haˆ ve le?
20. Awˬ viˉ awˬ nyi Aˬleˇsiˇ Yaˬhoˉvaˬ geh hkʼaˬ hkʼe te hkʼa dehꞈ meuˆ daꞈ gʼa ve le?
20 Awˬ viˉ awˬ nyi Aˬleˇsiˇ fawˉ ve mehˍ ve gʼa hpuˇ htaˇ aˬ htoꞈ ma awˬ bon gʼa ve le? Aˬleˇsiˇ Yaˬhoˉvaˬ geh hkʼa dehꞈ meuˆ daꞈ ve yoˬ. Yawˇ kʼoˆ ve, “ngaˬ ngaˬ miˇ ma geh teˇ geh bon leuˉ leh kʼawꞈ lawˬ ve yoˬ. Yaˬhoˉvaˬ maˇ ga laˇ ve kʼo, ngaˬ yeunˇ hkanˍ maˇ gʼaˇ taˬ tehꞈ shiˍ ve yoˬ.” Yawˇ kʼawꞈ kʼoˆ ve, “a shu yawˇ hkʼaˇ yawˇ Liꞈ hpu henˇ ve lehˬ awˬ gʼaˇ nuˇ ve htaꞈ ga laˇ gʼa ve yoˬ. Oˇ htaˇ teˇ co˗e Gʼuiˬ sha ve kanˉ ka tiꞈ yeˬ ve hkʼaw te ve chaw ve awˬ lawn ngaˬ dawˇ nyi ve yoˬ. Ngaˬ hui nyi ma gʼawˬ lehˍ cawˬ leh Yaˬhoˉvaˬ htaꞈ gʼaˇ va tuˬ Liꞈ hpu hkʼaw ga laˇ gʼa ve laiˉ lawn cawˬ ve tehꞈ ngaˬ hui shiˍ ve yoˬ.”
21. Awˬ lawn chi ve hkʼaw ngaˬ hui aˬ htoꞈ ma gʼa henˇ˗oˬ ve le?
21 Awˬ lawn chi ve hkʼaw ngaˬ hui aˬ htoꞈ ma gʼa henˇ˗oˬ ve le? Ngaˬ hui a shaꞈ teꞈ kuiˬ hkʼaw maˇ dawˇ maˇ gaˇ ve shoꞈ shaꞈ ve gʼa hpuˇ la ve yoˬ. Chi hkʼe gʼa hpuˇ ve htawˇ, yawˇ hui Yaˬhoˉvaˬ htaꞈ yonˍ leh gʼaˇ va ve kʼo, Yaˬhoˉvaˬ yawˇ hui htaꞈ ga piˇ tuˬ yoˬ. Awˬ lawn chi ve a yeˇ uiˍ ve Liꞈ hpu awˬ tawn hkʼaw kʼoˆ ve, “daꞈ ve chaw lehˬ dawˇ haˍ tuˬ laiˉ ceuˬ htaꞈ gʼa hpuˇ ve yoˬ. Yaꞈ hkʼaˇ Gʼuiˬ sha yawˇ htaꞈ ponˬ piˇ ve yoˬ.” (Chiˇ mvuh ve 34:19) Yaˬhoˉvaˬ kanˇ paˆ cawˬ leh ngaˬ hui htaꞈ ga laˇ gʼa ve dawˇ nyi sheˍ. Ngaˬ hui tuꞈ ve hkanˍ ve gʼa hpuˇ ve htaꞈ ceh tiˉ maˇ dawˇ nyi cawˇ. Ngaˬ hui chi hkʼe te ve kʼo, Pawˉluꞈ hkʼa shuˍ “ngaˬ htaꞈ awˬ gʼaˇ awˬ shaˉ peꞈ laˇ shehˍ hpaˇ htaꞈ cuˇ ve awˬ hkʼaw lo, hkʼa peu˗eˬ htaꞈ ngaˬ te puiˉ te hpehꞈ ve yoˬ” tehꞈ kʼoˆ gʼa ve yoˬ.”—Hpiˇliˇpiˆ 4:13.
KʼA MUIˬ HKAWˇ 38 Yawˇ nawˬ htaꞈ awˬ gʼaˇ cawˬ la piˇ tuˬ yoˬ
a Chi beuꞈ teˇ co˗e ngaˬ hui a shaꞈ teꞈ kuiˬ hkʼaw maˇ dawˇ maˇ gaˇ ve shoꞈ shaꞈ ve gʼa hpuˇ ve yoˬ. Yaꞈ hkʼaˇ, Yaˬhoˉvaˬ ve kanˉ te ve ka tiꞈ yeˬ ve chaw teˇ gʼaˇ le le htaꞈ yawˇ ga piˇ tuˬ yoˬ tehꞈ ngaˬ hui yonˍ gʼa ve yoˬ. Oˇ htaˇ teˇ co˗e Yaˬhoˉvaˬ ve kanˉ te ve chaw htaꞈ yawˇ hkʼaˬ hkʼe ga piˇ jaw ve le? Leh chi beuꞈ teˇ co˗e yawˇ ve kanˉ te ve chaw htaꞈ hkʼaˬ hkʼe ga piˇ tuˬ le? Liꞈ hpu ve awˬ co˗e htaˇ, leh ngaˬ hui ve awˬ co˗e htaˇ, ngaˬ hui Yaˬhoˉvaˬ htaꞈ gʼaˇ va ve kʼo, yawˇ ngaˬ hui htaꞈ hkʼaˬ htaˆ kaꞈ ga laˇ tuˬ yoˬ tehꞈ yonˍ gʼa tuˬ, awˬ lawn chi ve hkʼaw teˇ geh henˇ tuˬ yoˬ.
b Shaw nyi kuiˬ Taꞈ yehˬ Ha pa 12 maˬ 1 nyi 2000 hkʼawꞈ liꞈ mehˆ hpfuhˇ 24-28 htaꞈ nyi sheˍ. (Laˇhuˍ hkawˇ maˇ cawˬ.)