Gʼaw Ve Chaw Na Nyi Hkawˇ

Yeˍsuˆ Behˍlehˍhehnˍ venˇ lo paw peuˬ hkʼawꞈ nawˉ aˬ htoꞈ ma te Yoˇsehꞈ leh Maˍriˆ Naˍzaˍrehˆ hkʼaˆ lo haˆ maˇ kʼawꞈ˗e ve le?

Liꞈ hpu hkʼaw hteˇ˗ehˬ maˇ gʼa kʼoˆ laˇ taˬ. Yaꞈ hkʼaˇ, aˬ htoꞈ ma te yawˇ hui chi hkʼe dawˇ cheˆ ve le? Awˬ hkʼaˇ teˇ ceuˬ ceuˬ kʼoˆ maˍ laˇ taˍ ve yoˬ.

Maˍriˆ yaˇ hu tuˬ yoˬ tehꞈ mvuhˇ naw ma tcuh yaˇ yawˇ htaꞈ kʼoˆ piˇ htaˇ, Yoˇsehꞈ leh Maˍriˆ Gaˍliˍlehˇ mvuhˇ miˬ Naˍzaˍrehˆ hkʼaˆ lo chehˇ ve yoˬ. (Luˉkaꞈ 1:26-31; 2:4) Peuˬ hkʼawꞈ nawˉ yawˇ hui Eˇjiˇtuꞈ mvuhˇ miˬ lo gʼa hpaw˗e ve yoˬ. Peuˬ leh yawˇ hui Naˍzaˍrehˆ lo kʼawꞈ kʼawꞈ la ve yoˬ. Yeˍsuˆ Naˍzaˍrehˆ lo uiˍ la ve pa taw, oˇ kaˬ lo ve chaw tehꞈ kʼoˆ ve yoˬ. (Maꞈhtehˍ 2:19-23) Chi htaꞈ pa taw, Yeˍsuˆ, Yoˇsehꞈ, leh Maˍriˆ htaꞈ kʼoˆ htaˇ, yawˇ hui Naˍzaˍrehˆ lo chehˇ ve htaꞈ ngaˬ hui dawˇ mawˬ ve yoˬ.

Maˍriˆ ve awˬ viˉ awˬ nyi teˇ gʼaˇ Yuˇdaꞈ mvuhˇ miˬ lo chehˇ ve Eˇliˇsaˍbehˆ tehꞈ meh ve yoˬ. Eˇliˇsaˍbehˆ paw hkuˇ Zaˍhkaˍriˆ ve awˬ miˇ ma hpehꞈ leh Baˆtiˆsaˬ piˇ paˍ Yoˇhanˬ ve awˬ e hpehꞈ ve yoˬ. (Luˉkaꞈ 1:5, 9, 13, 36) Maˍriˆ Yuˇdaꞈ mvuhˇ miˬ lo Eˇliˇsaˍbehˆ geh kʼai leh oˇ kaˬ lo 3 ha pa chehˇ ve yoˬ. Peuˬ hkʼawꞈ nawˉ yawˇ Naˍzaˍrehˆ lo kʼawꞈ kʼawꞈ˗e ve yoˬ. (Luˉkaꞈ 1:39, 40, 56) Hkʼe te leh, Maˍriˆ Yuˇdaꞈ mvuhˇ miˬ lo hkʼa dehꞈ shiˍ ve yoˬ.

Peuˬ hkʼawꞈ nawˉ chaw teˇ gʼaˇ le le a shu yawˇ ve chehˇ kuiˬ lo “awˬ meh ca keu tuˬ” tawˇ piˇ ve yoˬ. Yoˇsehꞈ leh Maˍriˆ Daˍviˆ ve “awˬ ceuˬ awˬ hkʼaˇ hpehꞈ ve pa taw” Behˍlehˍhehnˍ venˇ lo kʼai ve yoˬ. Leh Meˍsiˉyaꞈ oˇ kaˬ lo paw tuˬ yoˬ tehꞈ tcuh kaˍ paˍ tawˇ hkawˇ kʼoˆ taˍ ve yoˬ. (Luˉkaꞈ 2:3, 4; 1 Saˍmo˗eˍlaˆ 17:15; 20:6; Miˆhkaˍ 5:2) Maˍriˆ Yeˍsuˆ htaꞈ paw peuˬ hkʼawꞈ nawˉ kaꞈ Yoˇsehꞈ ve yehˬ kʼa Naˍzaˍrehˆ lo maˇ kʼawꞈ˗e sheˍ. Yawˇ hui Behˍlehˍhehnˍ venˇ lo kʼawꞈ chehˇ ve yoˬ. Chi hkʼoˆ kaꞈ, Behˍlehˍhehnˍ venˇ leh Naˍzaˍrehˆ lo 9 kiˇ loˇ vuiˇ daꞈ ve yoˬ. Moˉseˍ ve awˬ liˇ tawˇ hkawˇ kʼoˆ taˍ ve hkʼe bon yehˬ lonˉ hkʼaw ca tuˉ tanˇ˗e tuˬ, Yeˍsuˆ paw gehˇ sheˍ ve pa taw yawˇ hui oˇ kaˬ lo kʼai ve sha ve yoˬ.—Oˉ kʼoˍ pui ve 12:2, 6-8; Luˉkaꞈ 2:22-24.

Chi awˬ gʼuˇ suhˍ htaˇ mvuhˇ naw ma tcuh yaˇ Maˍriˆ htaꞈ kʼoˆ piˇ ve, nawˬ ve yaˇ paˍ “Daˍviˆ ve kʼaw jaw” hkʼoˆ mui leh “co co taiˍ taiˍ uˉ peunˍ tuˬ yoˬ.” Chi ve htaꞈ pa taw, Yoˇsehꞈ leh Maˍriˆ Yeˍsuˆ Daˍviˆ ve awˬ ceuˬ awˬ hkʼaˇ hkʼaw paw la ve lehˬ daꞈ jaˇ ve tehꞈ dawˇ ve yoˬ. (Luˉkaꞈ 1:32, 33; 2:11, 17) Hkʼe te leh, yawˇ hui Behˍlehˍhehnˍ venˇ lo kʼawꞈ chehˇ kʼai leh Gʼuiˬ sha yawˇ hui htaꞈ aˬ htoꞈ ma te tcuh laˇ tuˬ ve htaꞈ law taˍ ve yoˬ.

Cuˇ yiˍ cawˬ paˍ hui yawˇ hui geh maˇ laˬ sheˍ htaˇ, yawˇ hui Behˍlehˍhehnˍ venˇ lo hkʼaˬ hkʼe maw chehˇ˗oˬ ve ngaˬ hui maˇ shiˍ ve yoˬ. Yaꞈ hkʼaˇ, cuˇ yiˍ cawˬ paˍ hui laˬ htaˇ yawˇ hui yehˬ hkʼaw chehˇ taˍ leh Yeˍsuˆ “yaˇ paˍ ehˉ” hpehꞈ leh paw gehˇ sheˍ ve maˇ heˆ˗o tehꞈ ngaˬ hui shiˍ ve yoˬ. (Maꞈhtehˍ 2:11) Chi htaꞈ pa taw, nyi˗a kʼo yawˇ hui Naˍzaˍrehˆ lo kʼawꞈ˗e cawˇ ve htawˇ, Behˍlehˍhehnˍ venˇ lo yawˇ hui chehˇ maw jaˇ leh yawˇ hui ve chehˇ kuiˬ hkʼe hpehꞈ ve yoˬ.

Heˍroˆ “Behˍlehˍhehnˍ venˇ awˬ hkʼaw lo leh awˬ paˇ awˬ kui lo hkʼa chehˇ ve a shaꞈ 2 hkʼawꞈ te leh awˬ hawˉ ve hawˉ hkʼaˆ paˍ ehˉ hkʼa peu˗eˬ htaꞈ ca tiˇ pehˍ tcuh ve yoˬ.” (Maꞈhtehˍ 2:16) Awˬ lawn chi ve Yoˇsehꞈ shiˍ tuˬ mvuhˇ naw ma tcuh yaˇ kʼoˆ piˇ ve yoˬ. Hkʼe te leh, yawˇ ve yehˬ kʼa htaꞈ shiˍ veu leh Eˇjiˇtuꞈ mvuhˇ miˬ lo hpaw˗e leh Heˍroˆ suh htaˇ hkʼa gaˬ yawˇ hui oˇ kaˬ lo chehˇ taˍ ve yoˬ. Peuˬ hkʼawꞈ nawˉ, yawˇ hui Naˍzaˍrehˆ lo kʼawꞈ˗e ve yoˬ. Aˬ htoꞈ ma pa taw yawˇ hui Behˍlehˍhehnˍ venˇ lo maˇ kʼawꞈ˗e ve le? Awˬ lawn kʼo, Heˍroˆ ve yaˇ paˍ Aˍhkeˍlaˆ Yuˇdaꞈ mvuhˇ miˬ htaꞈ kʼawꞈ uˉ peunˍ leh yawˇ haiˬ jaˇ ve chaw hpehꞈ ve yoˬ. Hkʼe te leh, Yoˇsehꞈ oˇ kaˬ lo maˇ kʼawꞈ˗e tuˬ Gʼuiˬ sha yawˇ htaꞈ tawˇ piˇ ve yoˬ. Yaꞈ hkʼaˇ, Naˍzaˍrehˆ lo Yeˍsuˆ awˬ pon kawˆ tuˬ maˇ cawˬ ve yoˬ.—Maꞈhtehˍ 2:19-22; 13:55; Luˉkaꞈ 2:39, 52.

Nyi˗a kʼo Yeˍsuˆ maˇ suh sheˍ htaˇ Yoˇsehꞈ awˉ lawˉ suh˗e ve yoˬ. Awˬ lawn kʼo, oˇ ve teˇ yanˇ mvuhˇ naw ma hkʼoˆ lo taˆ˗e tuˬ Yeˍsuˆ a hkaw˗anˬ maˇ piˇ sheˍ. Awˬ gʼuˇ suhˍ hpawˇ Yoˇsehꞈ htaꞈ miˬ guiˬ hkʼoˆ lo kʼawꞈ teꞈ tu la tcuh piˇ tuˬ yoˬ. Oˇ ve teˇ yanˇ ngaˬ hui teˇ gʼaˇ le le Yoˇsehꞈ htaꞈ tawˇ gʼa yaw daꞈ tuˬ awˬ hkʼaˇ cawˬ leh yawˇ leh Maˍriˆ Yeˍsuˆ htaꞈ paw peuˬ hkʼawꞈ nawˉ Behˍlehˍhehnˍ venˇ lo kʼawꞈ chehˇ kʼai ve awˬ lawn htaꞈ hkʼa dehꞈ gʼa shiˍ tuˬ yoˬ.