Hpfuhˆ Nyi Tuˬ Awˬ Hkʼaˇ
A yeˇ uiˍ ve awˬ lawn awˉ lawˉ teh ve
Ngaˬ hui teˇ gʼaˇ le le a shu yawˇ hkʼaˇ yawˇ Liꞈ hpu henˇ tuˬ awˬ yanˇ gʼa shawˍ teh ve yoˬ. Leh awˬ yanˇ chi ve htaꞈ awˬ hpfuhˇ hkʼa hkʼawꞈ hkʼaˬ hkʼe te yehˇ gʼa tuˬ le? Awˉ lawˉ teˇ ceuˬ lehˬ, nawˬ Liꞈ hpu henˇ tuˬ awˬ yanˇ shawˍ teh taˍ ve htaꞈ gʼa cawˇ daꞈ tcuh ve yoˬ. A shu yawˇ hkʼaˇ Liꞈ hpu henˇ htaˇ hkʼa dehꞈ chaˬ nyi ve lehˬ liꞈ haˆ haˆ gʼaw peuˬ ve aꞈ kehˉ awˬ lawn awˬ tanˇ maˇ yehˇ maˇ ve htawˇ awˬ bon gʼa ve yoˬ.
Chi hkʼoˆ kaꞈ, a yeˇ uiˍ ve awˬ lawn awˉ lawˉ teh ve yoˬ. (Eˇfeˇsuꞈ 5:15, 16) Beˆ maˍ laˇ ve teˇ ceuˬ ceuˬ htaꞈ teˇ geh nyi sheˍ.
Teˇ nyi le le Liꞈ hpu gʼaw ve yoˬ. (Chiˇ mvuh ve 1:2) Teˇ shinˉ le le mvuhˇ hpeuꞈ haˉ hpawnˬ daꞈ ve hkʼaw Liꞈ hpu gʼaw tuˬ hkʼaˬ htaˆ kaꞈ kʼoˆ laˇ taˍ ve yoˬ. Nawˬ hkʼaˬ htaˆ kaꞈ Liꞈ hpu gʼaw tuˬ gu ve awˬ hkʼaˇ htaꞈ gʼaꞈ te gʼa ve yoˬ.
Shaw nyi kuiˬ Taꞈ yehˬ gu ve, mvuhˇ hpeuꞈ haˉ hpawnˬ daꞈ tuˬ gu ve, leh hkʼawꞈ tuˬ kaꞈ gu ve yoˬ.—Chiˇ mvuh ve 22:22.
Awˬ yanˇ cawˬ ve kʼo, Gʼuiˬ sha ve kanˉ hkʼaˇ gu teh taˍ laˇ ve htaꞈ gʼaw leh awˬ nu ve awˬ lawn kaꞈ nyi gʼa ve yoˬ. Tawˇ pa haˉ te kʼo, teˇ ha pa le le tawˆ ve liꞈ, VDO, leh vehˆsaiˉ jw.org hkʼaw ve awˬ lawn nyi gʼa ve yoˬ.
Nawˬ a shu yawˇ hkʼaˇ yawˇ Liꞈ hpu henˇ tuˬ awˬ lawn lonˉ ma htaꞈ ca nyi ve yoˬ. Tawˇ pa haˉ te kʼo, nawˬ gʼa hpuˇ chehˇ ve awˬ lawn, nawˬ htawˇ dawˇ nawˬ cawˬ ve awˬ lawn maˇ heˆ leh nawˬ hkʼa dehꞈ na gʼa gaˇ ve Liꞈ hpu hkʼaw ve awˬ lawn leh nawˬ a shu yawˇ hkʼaˇ yawˇ Liꞈ hpu henˇ tuˬ ve awˬ lawn lonˉ ma htaꞈ nyi gʼa ve yoˬ. Vehˆsaiˉ jw.org hkʼaw “Liꞈ hpu henˇ tuˬ awˬ hkʼaˇ cawˬ ve” htaꞈ nyi gʼa ve yoˬ.