Shaˍ tiꞈ peꞈ laˇ ve tawˇ hkawˇ htaꞈ nawˬ a yeˇ yuˬ˗aw laˇ?

1. Maˇ maw ve awˬ yanˇ Yeˍsuˆ aˬ htoꞈ ma te tuˬ le?

Ngaˬ hui chehˇ ve awˬ yanˇ lehˬ, pa ve laiˉ ceuˬ cawˬ tuˬ yoˬ. Maˇ maw ve awˬ yanˇ miˬ guiˬ hkʼoˆ lo chehˇ ve chaw teˇ gʼaˇ le le htaꞈ Yeˍsuˆ suhˉ jehˬ piˇ tuˬ yoˬ. Awˬ yanˇ chi ve maˇ gaˬ sheˍ htaˇ yawˇ kʼoˆ ve, yawˇ kʼawꞈ yaꞈ la tuˬ ve “awˬ heˆ” hkʼaˬ hkʼe hpehꞈ tuˬ kʼoˆ laˇ tuˬ yoˬ. Leh yawˇ ngaˬ hui htaꞈ “miˬ guiˬ chi awˬ yanˇ leh tuˬ” kaꞈ kʼoˆ laˇ tuˬ yoˬ. (Maꞈhtehˍ 24:3) “Awˬ heˆ” chi ve teˇ hpaˍ Maꞈhtehˍ liꞈ kaˇ nanˉ uiˍ 24 leh 25 hkʼaw kʼoˆ taˍ ve yoˬ. Leh awˬ lawn chi ve hkʼa shuˍ, Maˍkuˆ liꞈ kaˇ nanˉ uiˍ 13 leh, Luˉkaꞈ liꞈ kaˇ nanˉ uiˍ 21 hkʼaw kaꞈ bvuhꞈ taˍ ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? Leh aˬ htoꞈ ma te awˬ lawn chi teˇ hpaˍ henˇ ve lehˬ, ngaˬ hui awˬ pon awˬ bon cawˬ ve le?

² Yeˍsuˆ ngaˬ hui htaꞈ shaˍ tiꞈ peꞈ laˇ tuˬ yawˇ tawˇ pa haˉ 3 maˬ yehˇ ve lehˬ, yawˬ leh aˉ cheꞈ, cuˇ yiˍ cawˬ ve yaˇ miˇ haˉ leh cuˇ yiˍ maˇ cawˬ ve yaˇ miˇ haˉ, leh hpu ve awˬ lawn, chi ve teˇ hpaˍ hpehꞈ ve yoˬ. Yaꞈ hkʼaˇ, awˬ lawn chi ngaˬ hui na gʼa tuˬ, teˇ gʼaˇ leh teˇ gʼaˇ a shu yawˇ te taˍ ve hkʼe, Yeˍsuˆ suhˉ jehˬ piˇ tuˬ yoˬ. Awˬ lawn chi ve hkʼaw tawˇ pa haˉ teˇ lawn leh teˇ lawn tehˆ maˍ laˇ ve, leh ngaˬ hui awˬ bon hkʼaˬ hkʼe gʼa ve kaꞈ teˇ geh henˇ tuˬ yoˬ. Awˉ lawˉ teˇ lawn lehˬ, yawˬ leh aˉ cheꞈ htaꞈ teˇ geh henˇ tuˬ yoˬ.

YAWˬ LEH Aˉ CHEꞈ

3. Yeˍsuˆ chaw yaˇ htaꞈ hkʼaˬ hkʼe htaˇ suhˉ jehˬ piˇ tuˬ ve le?

³ Yawˬ leh aˉ cheꞈ tawˇ pa haˉ tehˆ maˍ laˇ ve hkʼaw, Yeˍsuˆ chaw yaˇ htaꞈ suhˉ jehˬ piˇ tuˬ ve awˬ lawn lehˬ, yawˇ hui daꞈ ve awˬ lawn sha tanˇ htaꞈ hkʼaˬ hkʼe haꞈ yuˬ ve, leh yawˇ hui leuˆ yuˬ taˍ ve chaw htaꞈ hkʼaˬ hkʼe ga piˇ ve, chi ve teˇ hpaˍ htaꞈ nyi tuˬ yoˬ tehꞈ Yeˍsuˆ kʼoˆ ve yoˬ. (Maꞈhtehˍ 25:31-46) “Tuꞈ jaˇ hkanˍ jaˇ ve” awˬ yanˇ Aˍmaˍgeˍdonˍ maˇ tanˬ sheˍ htaˇ, a shu yawˬ hpehꞈ ve, leh a shu aˉ cheꞈ hpehꞈ ve htaꞈ Yeˍsuˆ leuˆ yuˬ tuˬ yoˬ. (Maꞈhtehˍ 24:21) Yawˬ hawˉ paˍ lehˬ, yawˬ leh aˉ cheꞈ htaꞈ pehˬ daꞈ ve hkʼa shuˍ, leuˆ yuˬ taˍ ve chaw htaꞈ ga piˇ ve chaw leh, maˇ ga piˇ ve chaw htaꞈ Yeˍsuˆ pehˬ daꞈ tuˬ yoˬ.

4. Iˉsaˍyaˆ liꞈ 11:3, 4 hkʼaw kʼoˆ taˍ ve hkʼe, Yeˍsuˆ chaw yaˇ htaꞈ hteˇ ve cawˇ ve hkʼaw suhˉ jehˬ piˇ tuˬ yoˬ tehꞈ, aˬ htoꞈ ma te ngaˬ hui yonˍ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Liꞈ hpu hkʼaw kʼoˆ ve, Yeˍsuˆ lehˬ Yaˬhoˉvaˬ leuˆ yuˬ taˍ ve suhˉ jehˬ shehˍ hpaˇ hpehꞈ leh, hteˇ ve cawˇ ve hkʼaw suhˉ jehˬ piˇ tuˬ yoˬ. (Iˉsaˍyaˆ 11:3, 4 gʼaw sheˍ.) Yeˍsuˆ lehˬ chaw yaˇ teˇ gʼaˇ le le te ve, dawˇ ve, leh kʼoˆ ve htaꞈ hkʼa dehꞈ chaˬ nyi tuˬ yoˬ. Yawˇ ve awˬ viˉ awˬ nyi leuˆ yuˬ taˍ ve chaw htaꞈ hkʼaˬ hkʼe te piˇ ve kaꞈ nyi tuˬ yoˬ. (Maꞈhtehˍ 12:36, 37; 25:40) A shu teˇ gʼaˇ leuˆ yuˬ taˍ ve hpawˇ chehˇ leh, yawˇ hui ve kanˉ htaꞈ ga piˇ ve Yeˍsuˆ shiˍ ve yoˬ.a A yeˇ uiˍ jaˇ ve teˇ hkʼaˇ lehˬ, Yeˍsuˆ Hkriꞈ ve awˬ viˉ awˬ nyi htaꞈ ga piˇ ve lehˬ, hto toˇ ve kanˉ te ve yoˬ. Chi hkʼe ga piˇ ve chaw htaꞈ “hteˇ ve cawˇ ve chaw” hpehꞈ ve tehꞈ, dawˇ cheˆ piˇ leh miˬ guiˬ hkʼoˆ lo yawˇ hui “co co taiˍ taiˍ” a shaꞈ gʼa tuˬ yoˬ. (Maꞈhtehˍ 25:46; Hpeuꞈ maˍ ve 7:16, 17) Chi ve lehˬ, ka tiꞈ yeˬ ve chaw awˬ pon daꞈ jaˇ ve laꞈ shawnˍ hpehꞈ ve yoˬ. Yawˇ hui tuꞈ jaˇ hkanˍ jaˇ ve awˬ yanˇ leh peuˬ hkʼawꞈ nawˉ kaꞈ caˉ leh ka tiꞈ yeˬ ve kʼo, yawˇ hui “co tiꞈ ha tiꞈ liꞈ awˬ hkʼaw lo awˬ meh” cawˬ tuˬ yoˬ.—Hpeuꞈ maˍ ve 20:15.

5. Yawˬ leh aˉ cheꞈ awˬ lawn tawˇ pa haˉ tehˆ maˍ laˇ ve ngaˬ hui htaꞈ aˬ htoꞈ ma maˍ laˇ ve le? Leh tawˇ pa haˉ chi ve htaꞈ a shu a yeˇ yuˬ cawˇ ve le?

⁵ Nawˬ ka tiꞈ yeˬ ve tehꞈ hpeuꞈ maw piˇ ve. Miˬ guiˬ hkʼoˆ lo dawˇ law kuiˬ cawˬ ve chaw htaꞈ caˉ daꞈ ve, yawˬ leh aˉ cheꞈ awˬ lawn Yeˍsuˆ tawˇ pa haˉ tehˆ maˍ laˇ ve yoˬ. Yawˇ hui yonˍ ve tehꞈ hpeuꞈ maw laˇ ve lehˬ, Yeˍsuˆ Hkriꞈ ve awˬ viˉ awˬ nyi htaꞈ ga piˇ ve, hto toˇ ve htaꞈ ceh tiˉ te ve maˇ heˆ. Yeˍsuˆ leuˆ teh taˍ ve awˬ moˍ ehˉ sheh kʼai tcuh ve chaw htaꞈ kaꞈ yawˇ hui haꞈ yuˬ ve yoˬ. (Maꞈhtehˍ 24:45) Chi hkʼe hpehꞈ ve htawˇ, tawˇ pa haˉ tehˆ maˍ laˇ ve chi htaꞈ mvuhˇ naw ma hkʼoˆ dawˇ law kuiˬ cawˬ ve chaw htawˇ, shaˍ tiꞈ piˇ laˇ ve tawˇ hkawˇ chi htaꞈ a yeˇ gʼa yuˬ cawˇ ve yoˬ. Aˬ htoꞈ ma pa taw le? Awˬ lawn kʼo, yawˇ hui te ve, dawˇ ve, leh kʼoˆ ve htaꞈ Yeˍsuˆ hkʼa dehꞈ chaˬ nyi ve yoˬ. Yawˇ hui ka tiꞈ yeˬ ve tehꞈ gʼa hpeuꞈ maw piˇ cawˇ ve yoˬ. Leuˆ yuˬ taˍ ve chaw htaꞈ caˉ daꞈ ve, Yeˍsuˆ tawˇ pa haˉ 2 lawn htaꞈ kʼoˆ sheˍ ve yoˬ. Tawˇ pa haˉ chi ve lehˬ, Maꞈhtehˍ liꞈ kaˇ nanˉ uiˍ 25 hkʼaw ngaˬ hui gʼa mawˬ ve yoˬ. Awˉ lawˉ teˇ lawn cuˇ yiˍ cawˬ ve yaˇ miˇ haˉ, leh cuˇ yiˍ maˇ cawˬ ve yaˇ miˇ haˉ ve awˬ lawn, tawˇ pa haˉ tehˆ maˍ laˇ ve htaꞈ awˉ lawˉ nyi sheˍ.

CUˇ YIˍ CAWˬ VE YAˇ MIˇ HAˉ LEH CUˇ YIˍ MAˇ CAWˬ VE YAˇ MIˇ HAˉ

6. Yaˇ miˇ haˉ 5 gʼaˇ yawˇ hui cuˇ yiˍ cawˬ ve tehꞈ hkʼaˬ hkʼe hpeuꞈ maw piˇ ve le? (Maꞈhtehˍ 25:6-10)

⁶ Yaˇ miˇ haˉ ve awˬ lawn tawˇ pa haˉ tehˆ maˍ laˇ ve hkʼaw, awˬ miˇ ma heuˆ shehˍ hpaˇ htaꞈ ca haꞈ yuˬ ve yaˇ miˇ haˉ 10 gʼaˇ ve awˬ lawn, Yeˍsuˆ kʼoˆ taˍ ve yoˬ. (Maꞈhtehˍ 25:1-4) Yawˇ hui awˬ miˇ ma heuˆ shehˍ hpaˇ geh teˇ geh hkehˉ caˇ kuiˬ hkʼaw loꞈ˗e tuˬ law chehˇ ve yoˬ. Cuˇ yiˍ cawˬ ve yaˇ miˇ haˉ 5 gʼaˇ htaꞈ Yeˍsuˆ kʼoˆ taˍ ve yoˬ. Leh awˬ nu ve 5 gʼaˇ htaꞈ cuˇ yiˍ maˇ cawˬ ve tehꞈ kʼoˆ ve yoˬ. Leh cuˇ yiˍ cawˬ ve yaˇ miˇ lehˬ, hkʼa dehꞈ gu hehnˇ taˍ leh law chehˇ ve yoˬ. Awˬ miˇ ma heuˆ shehˍ hpaˇ htaꞈ yawˇ hui tanˇ hkuinˇ htaˇ hkʼa gaˬ gʼa law ve htawˇ, hkʼa dehꞈ gu hehnˇ taˍ ve yoˬ. Hkʼe te leh, yawˇ hui kawˆ faiˇ leh naˍ manˇ kaꞈ yuˬ kʼai ve yoˬ. Awˬ miˇ ma heuˆ shehˍ hpaˇ haˆ haˆ maˇ gaˬ la taˬ tehꞈ yawˇ hui dawˇ ve pa taw, naˍ manˇ awˬ leuˉ kaꞈ yuˬ kʼai ve yoˬ. (Maꞈhtehˍ 25:6-10 gʼaw sheˍ.) Awˬ miˇ ma heuˆ shehˍ hpaˇ gaˬ la htaˇ, cuˇ yiˍ cawˬ ve yaˇ miˇ haˉ awˬ miˇ ma heuˆ shehˍ hpaˇ geh teˇ geh hkehˉ caˇ kuiˬ hkʼaw loꞈ˗e ve yoˬ. Chi ve hkʼa shuˍ shuˍ, leuˆ yuˬ taˍ ve chaw hkʼa dehꞈ gʼa gu hehnˇ taˍ shawˍ taˍ leh, Yeˍsuˆ Hkriꞈ yawˇ hui htaꞈ laꞈ shawnˍ piˇ htaˇ hkʼa gaˬ ka tiꞈ gʼa yeˬ ve yoˬ. Chi yawˇ hui mvuhˇ naw ma hkʼoˆ lo Yeˍsuˆ geh teˇ geh gʼa uˉ peunˍ htaˇ hkʼa gaˬ yoˬ.b (Hpeuꞈ maˍ ve 7:1-3) Cuˇ yiˍ maˇ cawˬ ve yaˇ miˇ haˉ hkʼaˬ hkʼe te tuˬ le?

7. Cuˇ yiˍ maˇ cawˬ ve yaˇ miˇ haˉ htaꞈ aˬ htoꞈ ma hpehꞈ la ve le? Leh aˬ htoꞈ ma pa taw yawˇ hui chi hkʼe gʼa hpuˇ ve le?

⁷ Cuˇ yiˍ maˇ cawˬ ve yaˇ miˇ haˉ 5 gʼaˇ, cuˇ yiˍ cawˬ ve yaˇ miˇ haˉ htaꞈ peun daꞈ ve yoˬ. Cuˇ yiˍ maˇ cawˬ ve yaˇ miˇ haˉ lehˬ, awˬ miˇ ma heuˆ shehˍ hpaˇ gaˬ la htaˇ, yawˇ hui hkʼa dehꞈ maˇ gu hehnˇ taˍ. Yawˇ hui ve kawˆ faiˇ naˍ manˇ peuˬ˗e leh, suh˗e la paˇ neˇ ve yoˬ. Awˬ hkʼoˆ kaꞈ, yawˇ hui naˍ manˇ awˬ leuˉ maˇ gʼa yuˬ laˬ ve pa taw yoˬ. Awˬ miˇ ma heuˆ shehˍ hpaˇ gaˬ la paˇ neˇ la yoˬ ve htaꞈ shiˍ htaˇ, yawˇ hui naˍ manˇ ca kʼawꞈ vuiˬ˗e ve yoˬ. Hkʼe te leh, awˬ miˇ ma heuˆ shehˍ hpaˇ gaˬ la htaˇ, yawˇ hui kʼawꞈ la maˇ taˇ˗o. Yaꞈ hkʼaˇ, “awˬ miˇ ma heuˆ shehˍ hpaˇ laˬ leh, gu taˍ hehnˇ taˍ ve chaw teˇ hpaˍ hkehˉ caˇ kuiˬ lo yawˇ geh teˇ geh loꞈ˗e peuˬ hkʼawꞈ nawˉ, yehˬ miˉ hoˆ taˍ ve yoˬ.” (Maꞈhtehˍ 25:10) Peuˬ hkʼawꞈ nawˉ cuˇ yiˍ maˇ cawˬ ve yaˇ miˇ kʼawꞈ gaˬ la leh, hkehˉ caˇ kuiˬ hkʼaw yawˇ hui kaꞈ loꞈ˗e gaˇ ve yoˬ. Hkʼe te leh, awˬ miˇ ma heuˆ shehˍ hpaˇ yawˇ hui htaꞈ “ngaˬ nawˬ hui htaꞈ awˬ tehˬ awˬ na kʼoˆ laˇ ve, ngaˬ nawˬ hui htaꞈ maˇ shiˍ tehꞈ, kʼawꞈ kʼoˆ piˇ ve yoˬ.” (Maꞈhtehˍ 25:11, 12) Cuˇ yiˍ maˇ cawˬ ve yaˇ miˇ haˉ lehˬ, awˬ miˇ ma heuˆ shehˍ hpaˇ laˬ tuˬ ve htaꞈ hkʼa dehꞈ maˇ gu hehnˇ taˍ. Chi leuˆ yuˬ taˍ ve chaw awˬ pon hkʼaˬ hkʼe henˇ yuˬ gʼa ve le?

8-9. Yaˇ miˇ haˉ ve awˬ lawn tawˇ pa haˉ tehˆ maˍ laˇ ve htaꞈ leuˆ yuˬ taˍ ve chaw aˬ htoꞈ ma henˇ yuˬ gʼa ve le? (Awˬ han htaꞈ nyi sheˍ.)

⁸ Hkʼa dehꞈ gu taˍ hehnˇ taˍ˗oˬ ve tehꞈ hpeuꞈ maw piˇ ve. Leuˆ yuˬ taˍ ve chaw 2 moˍ cawˬ tuˬ yoˬ tehꞈ, awˉ lawˉ htaˇ kaꞈ Yeˍsuˆ maˇ gʼa kʼoˆ laˇ taˍ. Teˇ moˍ lehˬ awˬ leh meuˇ ve awˬ yanˇ gaˬ htaˇ hkʼa gaˬ hkʼa dehꞈ gu hehnˇ taˍ ve yoˬ. Leh awˬ nu ve teˇ moˍ lehˬ hkʼa dehꞈ maˇ gu hehnˇ taˍ ve chaw hpehꞈ ve yoˬ. Leuˆ yuˬ taˍ ve chaw awˬ leh hkʼa gaˬ ka tiꞈ yeˬ tuˬ maˇ gu hehnˇ taˍ ve kʼo, yawˇ hui htaꞈ aˬ htoꞈ ma hpehꞈ la tuˬ Yeˍsuˆ kʼoˆ chehˇ ve yoˬ. Yawˇ hui hkʼa dehꞈ maˇ gu hehnˇ taˍ ve kʼo, yawˇ hui laꞈ shawnˍ gʼa tuˬ ve maˇ heˆ. Chi sheˉ lai jaˇ. (Yoˇhanˬ 14:3, 4) Mvuhˇ naw ma hkʼoˆ, maˇ heˆ leh miˬ guiˬ hkʼoˆ lo chehˇ tuˬ dawˇ law kuiˬ cawˬ ve chaw htawˇ maˇ kʼoˆ, yaˇ miˇ haˉ ve awˬ lawn tawˇ pa haˉ tehˆ maˍ laˇ ve hkʼaw, shaˍ tiꞈ peꞈ laˇ ve tawˇ hkawˇ htaꞈ ngaˬ hui teˇ gʼaˇ le le a yeˇ yuˬ cawˇ ve yoˬ. Ngaˬ hui teˇ gʼaˇ le le hkʼa dehꞈ shaw taˍ leh awˬ leh hkʼa gaˬ yeunˇ hkanˍ sheˍ.—Maꞈhtehˍ 24:13.

⁹ Yeˍsuˆ yaˇ miˇ haˉ ve awˬ lawn tawˇ pa haˉ tehˆ maˍ laˇ ve htaꞈ kʼoˆ peuˬ hkʼawꞈ nawˉ, hkʼa dehꞈ gu taˍ leh shaw taˍ cawˇ ve tehꞈ kʼoˆ sheˍ ve yoˬ. Yeˍsuˆ hpu ve awˬ lawn tawˇ pa haˉ tehˆ maˍ laˇ ve htaꞈ kaꞈ kʼoˆ sheˍ ve yoˬ. Chi kaiˬ ve chaw hpehꞈ tuˬ a yeˇ yuˬ cawˇ ve tehꞈ kaꞈ kʼoˆ sheˍ ve yoˬ.

HPU VE AWˬ LAWN

10. Awˬ ceˬ 2 gʼaˇ yawˇ hui ka tiꞈ yeˬ ve tehꞈ hkʼaˬ hkʼe hpeuꞈ maw piˇ ve le? (Maꞈhtehˍ 25:19-23)

¹⁰ Hpu ve awˬ lawn tawˇ pa haˉ tehˆ maˍ laˇ ve hkʼaw, awˬ ceˬ 2 gʼaˇ awˬ shehˍ hpaˇ htaꞈ ka tiꞈ yeˬ leh, awˬ nu ve teˇ gʼaˇ ka tiꞈ maˇ yeˬ ve htaꞈ Yeˍsuˆ kʼoˆ taˍ ve yoˬ. (Maꞈhtehˍ 25:14-18) Ka tiꞈ yeˬ ve awˬ ceˬ 2 gʼaˇ lehˬ, awˬ shehˍ hpaˇ awˬ bon gʼa tuˬ yawˇ hui kanˉ te hkeuꞈ ve yoˬ. Awˬ shehˍ hpaˇ awˬ nu ve teˇ mvuhˇ miˬ lo maˇ kʼai sheˍ htaˇ, yawˇ hui htaꞈ hpu maˇ chaweh piˇ ve yoˬ. Ka tiꞈ yeˬ ve awˬ ceˬ 2 gʼaˇ lehˬ, kaiˬ leh cuˇ yiˍ cawˬ ve hkʼaw hpu awˬ yawˬ gʼa tuˬ te ve yoˬ. Awˬ bon gʼa ve lehˬ, awˬ shehˍ hpaˇ kʼawꞈ la htaˇ, yawˇ hui hpu awˬ yawˬ 2 pun kʼawꞈ gʼa ve yoˬ. Leh awˬ shehˍ hpaˇ yawˇ hui htaꞈ chiˇ mvuh piˇ ve yoˬ. Hkʼe te leh, awˬ shehˍ hpaˇ “ha lehˬ” ve hkʼe, yawˇ hui kaꞈ ha lehˬ ve yoˬ. (Maꞈhtehˍ 25:19-23 gʼaw sheˍ.) Awˬ ceˬ 3 gʼaˇ teˇ gʼaˇ awˬ shehˍ hpaˇ yawˇ htaꞈ hpu piˇ taˍ ve hkʼaˬ hkʼe te ve le?

11. “Bawˬ” jaˇ ve awˬ ceˬ htaꞈ aˬ htoꞈ ma hpehꞈ la ve le? Leh aˬ htoꞈ ma te chi hkʼe hpehꞈ ve le?

¹¹ Awˬ ceˬ 3 gʼaˇ teˇ gʼaˇ hpu teˇ hinˉ gʼa ve yoˬ. Yaꞈ hkʼaˇ, yawˇ “bawˬ” jaˇ ve yoˬ. Awˬ shehˍ hpaˇ yawˇ htaꞈ cuˇ yiˍ cawˬ ve hkʼaw awˬ yawˬ gʼa tuˬ dawˇ law taˍ ve yoˬ. Yaꞈ hkʼaˇ, yawˇ miˬ kʼoˍ hkʼaw ca duˇ faˉ taˍ ve yoˬ. Leh awˬ shehˍ hpaˇ kʼawꞈ la htaˇ, awˬ ceˬ chi ve teˇ gʼaˇ lehˬ, awˬ shehˍ hpaˇ htaꞈ teꞈ chiˉ awˬ yawˬ piˇ maˇ gʼa ve yoˬ. Awˬ hkʼoˆ kaꞈ, yawˇ maˇ daꞈ ve dawˇ hkʼaˇ kaꞈ cawˬ ve yoˬ. Yawˇ awˬ shehˍ hpaˇ htaꞈ awˬ yawˬ te piˇ maˇ gʼa ve htaꞈ lawˬ hkawˉ cawˇ ve htawˇ, yawˇ awˬ shehˍ hpaˇ htaꞈ kʼoˆ piˇ ve, “nawˬ lehˬ te haˍ ve chaw teˇ gʼaˇ hpehꞈ ve” yoˬ. Hkʼe te leh, awˬ ceˬ chi ve teˇ gʼaˇ htaꞈ awˬ shehˍ hpaˇ maˇ dawˇ cawˇ ve yoˬ. Chi hkʼe ceh tiˉ maˇ heˆ. Awˬ shehˍ hpaˇ yawˇ geh hpu yuˬ hkʼawꞈ leh yehˬ hkʼaw kaꞈ gʼa tawˆ piˇ ve yoˬ.—Maꞈhtehˍ 25:24, 26-30.

12. Ka tiꞈ yeˬ ve awˬ ceˬ 2 gʼaˇ chi beuꞈ teˇ co˗e a shu htaꞈ kʼoˆ gaˇ ve le?

¹² Ka tiꞈ yeˬ ve awˬ ceˬ oˇ ve 2 gʼaˇ lehˬ, leuˆ yuˬ taˍ ve ka tiꞈ yeˬ ve Hkriꞈ yaˇ htaꞈ kʼoˆ gaˇ ve yoˬ. Tawˇ pa haˉ tehˆ maˍ laˇ ve hkʼaw awˬ shehˍ hpaˇ lehˬ, Yeˍsuˆ htaꞈ kʼoˆ gaˇ ve yoˬ. Yeˍsuˆ yawˇ hui htaꞈ teˇ geh “ha lehˬ” laˇ˗oˆ tehꞈ jehˬ piˇ ve yoˬ. Chi lehˬ yawˇ hui kʼawꞈ teꞈ tu la leh, mvuhˇ naw ma hkʼoˆ laꞈ shawnˍ gʼa tuˬ yoˬ. (Maꞈhtehˍ 25:21, 23; Hpeuꞈ maˍ ve 20:5) Yaꞈ hkʼaˇ, bawˬ ve awˬ ceˬ ve awˬ lawn kaꞈ leuˆ yuˬ taˍ ve chaw htaꞈ shaˍ tiꞈ piˇ sheˍ ve yoˬ. Yawˇ hui aˬ htoꞈ ma awˬ lawn htaꞈ shaˍ tiꞈ te cawˇ ve le?

13-14. Hpu ve awˬ lawn tawˇ pa haˉ tehˆ maˍ laˇ ve htaꞈ leuˆ yuˬ taˍ ve chaw aˬ htoꞈ ma henˇ yuˬ gʼa ve le? (Awˬ han htaꞈ nyi sheˍ.)

¹³ Kaiˬ leh kanˉ hkʼa dehꞈ te ve tehꞈ hpeuꞈ maw piˇ ve. Yaˇ miˇ haˉ ve awˬ lawn tawˇ pa haˉ tehˆ maˍ laˇ ve hkʼa shuˍ, hpu ve awˬ lawn kaꞈ tawˇ pa haˉ tehˆ maˍ laˇ ve yoˬ. Leuˆ yuˬ taˍ ve chaw bawˬ ve chaw hpehꞈ ve tehꞈ, Yeˍsuˆ awˉ lawˉ htaˇ kaꞈ maˇ gʼa kʼoˆ laˇ taˍ. Yaꞈ hkʼaˇ, leuˆ yuˬ taˍ ve chaw bawˬ ve kʼo, aˬ htoꞈ ma hpehꞈ la tuˬ ve htaꞈ Yeˍsuˆ kʼoˆ chehˇ ve yoˬ. Yawˇ hui chi hkʼe hpehꞈ ve kʼo, ‘Gʼuiˬ sha kuˬ yuˬ leuˆ yuˬ taˍ ve chaw maˇ hpehꞈ.’ Leh chi yawˇ hui Gʼuiˬ sha ve mvuhˇ miˬ hkʼaw daꞈ jaˇ ve awˬ vuiˬ maˇ gʼa tuˬ te piˇ ve yoˬ.—2 Peˍtruˆ 1:10.

¹⁴ Yeˍsuˆ tawˇ pa haˉ tehˆ maˍ laˇ ve hkʼaw yaˇ miˇ haˉ ve awˬ lawn leh hpu ve awˬ lawn lehˬ, leuˆ yuˬ taˍ ve Hkriꞈ yaˇ teˇ gʼaˇ le le gʼa gu hehnˇ taˍ leh yawˇ hui kaiˬ ve hkʼaw kanˉ hkʼa dehꞈ te ve chaw hpehꞈ ve tehꞈ, hkʼa tawˍ lehˆ mawˬ tuˬ te piˇ ve yoˬ. Yaꞈ hkʼaˇ, Yeˍsuˆ lehˬ leuˆ yuˬ taˍ ve chaw htaꞈ awˬ nu ve awˬ lawn kaꞈ shaˍ tiꞈ piˇ˗aw laˇ? Piˇ ve yoˬ. Yawˇ shaˍ tiꞈ piˇ ve tawˇ hkawˇ Maꞈhtehˍ liꞈ 24:40, 41 hkʼaw cawˬ ve yoˬ. Leuˆ yuˬ taˍ ve chaw htaꞈ awˬ leh meuˇ teˇ pawˆ suhˉ jehˬ piˇ ve htaꞈ caˉ daꞈ ve yoˬ.

A SHU HTAꞈ “SHIˍ VEU” TUˬ LE?

15-16. Maꞈhtehˍ liꞈ 24:40, 41 hkʼaw leuˆ yuˬ taˍ ve Hkriꞈ yaˇ hkʼaˬ htaˆ kaꞈ gʼa shaw taˍ cawˇ ve tehꞈ hkʼaˬ hkʼe gʼa te cawˇ ve le?

¹⁵ Awˬ lawn chi ve 3 lawn htaꞈ Yeˍsuˆ tawˇ pa haˉ maˇ gʼa tehˆ maˍ laˇ sheˍ htaˇ, a shu Gʼuiˬ sha haꞈ yuˬ laˇ ve chaw hpehꞈ tuˬ, leuˆ yuˬ taˍ ve chaw htaꞈ awˬ leh meuˇ teˇ pawˆ, suhˉ jehˬ piˇ ve htaꞈ Yeˍsuˆ kʼoˆ ve yoˬ. Hawˉ hkʼaˆ 2 gʼaˇ ti mi hkʼaw lo kanˉ teˇ geh te chehˇ ve htaꞈ Yeˍsuˆ kʼoˆ leh, yaˇ miˇ 2 gʼaˇ haˉ pui mawˍ geuˆ chehˇ ve htaꞈ kaꞈ Yeˍsuˆ kʼoˆ ve yoˬ. Chi ve 2 lawn yawˇ hui kanˉ hkʼa shuˍ te chehˇ ve yoˬ. Yaꞈ hkʼaˇ, Yeˍsuˆ kʼoˆ ve, “teˇ gʼaˇ htaꞈ shiˍ veu leh teˇ gʼaˇ htaꞈ teh taˉ tuˬ yoˬ.” (Maꞈhtehˍ 24:40, 41 gʼaw sheˍ.) Yeˍsuˆ tawˇ pa haˉ chi ve kʼoˆ peuˬ hkʼawꞈ nawˉ, “nawˬ ve Awˬ jawˇ mawˇ hkʼaˬ ve teˇ nyi kʼawꞈ gaˬ la tuˬ ve htaꞈ nawˬ hui maˇ shiˍ ve pa taw shaw taˍ˗oꞈ” tehꞈ, Yeˍsuˆ awˬ laꞈ gʼawˇ hui htaꞈ kʼoˆ piˇ ve yoˬ. (Maꞈhtehˍ 24:42) Yaˇ miˇ haˉ ve awˬ lawn tawˇ pa haˉ tehˆ maˍ laˇ htaˇ kaꞈ, Yeˍsuˆ chi hkʼa shuˍ kʼoˆ ve yoˬ. (Maꞈhtehˍ 25:13) Yeˍsuˆ kʼoˆ ve tawˇ hkawˇ oˇ ve 2 pawˆ caˉ daꞈ˗aw laˇ? Nyi˗a kʼo, caˉ daꞈ ve yoˬ. Chi lehˬ leuˆ yuˬ taˍ ve chaw ceh tiˉ cawˬ leh leuˆ yuˬ taˍ ve chaw ka tiꞈ yeˬ ve chaw htaꞈ ceh tiˉ, Yeˍsuˆ mvuhˇ naw ma hkʼoˆ “shiˍ veu” tuˬ yoˬ.—Yoˇhanˬ 14:3.

¹⁶ Hkʼa dehꞈ shaw taˍ ve tehꞈ hpeuꞈ maw piˇ ve. Leuˆ yuˬ taˍ ve Hkriꞈ yaˇ hkʼaˬ ve teˇ gʼaˇ hkʼa dehꞈ maˇ shaw taˍ ve kʼo, ‘Gʼuiˬ sha leuˆ yuˬ taˍ ve chaw’ awˬ moˍ hkʼaw maˇ gʼa chehˇ. (Maꞈhtehˍ 24:31) Chi hkʼoˆ kaꞈ, ngaˬ hui Gʼuiˬ sha ve mvuhˇ miˬ yaˇ hpehꞈ ve chaw teˇ gʼaˇ le le dawˇ law kuiˬ hkʼaˬ kaˬ lo cawˬ ve htawˇ maˇ kʼoˆ, ngaˬ hui hkʼaˬ htaˆ kaꞈ gʼa shaw taˍ cawˇ leh ka tiꞈ gʼa yeˬ cawˇ ve yoˬ.

17. Yaˬhoˉvaˬ lehˬ chaw teˇ hpaˍ htaꞈ chi beuꞈ teˇ co˗e leuˆ yuˬ piˇ ve, aˬ htoꞈ ma te ngaˬ hui htawˇ dawˇ nawˬ dawˇ maˇ cawˬ cawˇ ve le?

¹⁷ Ngaˬ hui Yaˬhoˉvaˬ htaꞈ hkʼa dehꞈ shiˍ ve pa taw, yawˇ dawˇ cheˆ ve htaꞈ yonˍ gʼa jaˇ ve yoˬ. Hkʼaˬ nyiˇ hkʼawꞈ maˇ gaˬ sheˍ htaˇ, Yaˬhoˉvaˬ chaw teˇ gʼaˇ gʼaˇ htaꞈ leuˆ yuˬ ve ngaˬ hui htawˇ dawˇ nawˬ dawˇ maˇ cawˬ.c A pehˉ meuˇ hko hkʼaw awˬ leh meuˇ teˇ naˍ riˍ htaˇ kanˉ te la ve chaw htaꞈ caˉ daꞈ ve, Yeˍsuˆ tawˇ pa haˉ tehˆ maˍ laˇ ve htaꞈ dawˇ nyi sheˍ. (Maꞈhtehˍ 20:1-16) Awˬ leh meuˇ htaˇ kanˉ ca te la ve chaw lehˬ, chi awˬ gʼuˇ suhˍ htaˇ kanˉ te ve chaw hkʼa shuˍ awˬ hpfuhˇ gʼa ve yoˬ. Chi ve hkʼa shuˍ shuˍ, leuˆ yuˬ taˍ ve chaw htaꞈ hkʼaˬ hkʼe htaˇ leuˆ yuˬ piˇ ve htawˇ maˇ kʼoˆ, yawˇ hui ka tiꞈ yeˬ ve kʼo, yawˇ hui mvuhˇ naw ma hkʼoˆ lo laꞈ shawnˍ hkʼa shuˍ gʼa ve yoˬ.

SHAˍ TIꞈ PEꞈ LAˇ VE TAWˇ HKAWˇ HTAꞈ A YEˇ YUˬ VE

18-19. Awˬ lawn chi ve hkʼaw ngaˬ hui htaꞈ aˬ htoꞈ ma awˬ lawn maˍ laˇ ve, leh aˬ htoꞈ ma awˬ lawn shaˍ tiꞈ peꞈ laˇ ve le?

¹⁸ Ngaˬ hui aˬ htoꞈ ma awˬ lawn gʼa henˇ˗oˬ ve le? Miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve chaw awˬ pon kʼo, yawˬ leh aˉ cheꞈ ve awˬ lawn tawˇ pa haˉ tehˆ maˍ laˇ ve lehˬ, chi teˇ hkui leh tuꞈ jaˇ hkanˍ jaˇ ve awˬ yanˇ htaˇ, ngaˬ hui Yaˬhoˉvaˬ htaꞈ ka tiꞈ gʼa yeˬ ve a yeˇ uiˍ jaˇ ve tehꞈ kʼoˆ ve yoˬ. Leh oˇ ve teˇ yanˇ ka tiꞈ yeˬ ve chaw htaꞈ “co co taiˍ taiˍ” ve a shaꞈ gʼa tuˬ yoˬ tehꞈ, Yeˍsuˆ dawˇ cheˆ piˇ tuˬ yoˬ.—Maꞈhtehˍ 25:46.

¹⁹ Leuˆ yuˬ taˍ ve chaw htaꞈ shaˍ tiꞈ piˇ ve tawˇ hkawˇ 2 lawn tawˇ pa haˉ tehˆ maˍ laˇ ve htaꞈ caˉ daꞈ ve, ngaˬ hui gʼa kʼawꞈ henˇ tuˬ yoˬ. Tawˇ pa haˉ tehˆ maˍ laˇ taˍ ve chi hkʼaw cuˇ yiˍ cawˬ ve yaˇ miˇ haˉ leh, cuˇ yiˍ maˇ cawˬ ve yaˇ miˇ haˉ ve awˬ lawn hpehꞈ ve yoˬ. Cuˇ yiˍ cawˬ ve yaˇ miˇ haˉ 5 gʼaˇ lehˬ, hkehˉ caˇ shehˍ hpaˇ htaꞈ hkʼaˬ hkʼe maw gʼa law ve htawˇ maˇ kʼoˆ, yawˇ hui hkʼa dehꞈ gu taˍ leh shaw taˍ ve yoˬ. Yaꞈ hkʼaˇ, cuˇ yiˍ maˇ cawˬ ve yaˇ miˇ lehˬ, maˇ gu hehnˇ taˍ. Hkehˉ caˇ shehˍ hpaˇ laˬ htaˇ, yawˇ hui hkehˉ caˇ kuiˬ awˬ hkʼaw lo teˇ geh maˇ gʼa loꞈ˗e. Yeˍsuˆ miˬ guiˬ chi htaꞈ suhˉ jehˬ la tuˬ, ngaˬ hui hkʼaˬ hkʼe maw gʼa law ve htawˇ maˇ kʼoˆ, hkʼa dehꞈ gu hehnˇ taˍ cawˇ ve yoˬ. Chi hkʼoˆ kaꞈ, hpu ve awˬ lawn tawˇ pa haˉ tehˆ maˍ laˇ ve hkʼaw, ka tiꞈ yeˬ ve awˬ ceˬ 2 gʼaˇ kaiˬ leh kanˉ hkʼa dehꞈ te ve htaꞈ ngaˬ hui gʼa mawˬ ve yoˬ. Yawˇ hui ve jawˇ mawˇ awˬ pon kanˉ hkʼa dehꞈ te piˇ leh nyi hkʼaˇ suh tuˬ kaꞈ te piˇ ve yoˬ. Yaꞈ hkʼaˇ, bawˬ ve awˬ ceˬ htaꞈ gʼaꞈ kʼoˬ piˇ ve yoˬ. Aˬ htoꞈ ma henˇ yuˬ gʼa ve le? Ngaˬ hui awˬ leh hkʼa gaˬ Yaˬhoˉvaˬ ve kanˉ kaiˬ ve hkʼaw te cawˇ ve yoˬ. Leh awˬ leh meuˇ ve tawˇ pa haˉ lehˬ, leuˆ yuˬ taˍ ve chaw htaꞈ shaw hpoˆ leh mvuhˇ naw ma hkʼoˆ lo Yeˍsuˆ geh teˇ geh gʼa chehˇ tuˬ “shiˍ veu” laˇ tuˬ, yawˇ hui hkʼaˬ htaˆ kaꞈ gʼa shaw taˍ cawˇ ve tehꞈ, ngaˬ hui gʼa mawˬ ve yoˬ. Aˍmaˍgeˍdonˍ peuˬ hkʼawꞈ nawˉ, yawˇ hui Gʼuiˬ sha ve yawˬ ehˉ hkehˉ caˇ kuiˬ hkʼaw, Yeˍsuˆ ve yaˇ miˇ haˉ hpehꞈ tuˬ yoˬ.—2 Hteˇsaˍlawˇniˆ 2:1; Hpeuꞈ maˍ ve 19:9.

20. Yaˬhoˉvaˬ shaˍ tiꞈ peꞈ laˇ ve tawˇ hkawˇ htaꞈ a yeˇ yuˬ ve chaw yawˇ aˬ htoꞈ ma te piˇ tuˬ le?

²⁰ Suhˉ jehˬ tuˬ ve awˬ yanˇ gʼaˇ hteꞈ gaˬ la paˇ neˇ ve htawˇ, ngaˬ hui maˇ kawˆ cawˇ ve yoˬ. Ngaˬ hui hkʼaˬ htaˆ kaꞈ ka tiꞈ yeˬ ve kʼo, ngaˬ hui htaꞈ haꞈ ve Awˬ pa Yaˬhoˉvaˬ lehˬ, ‘ngaˬ hui gʼa ponˬ leh, chaw yaˇ ve Yaˇ hpu mehˆ gʼuˇ suhˍ huˉ chehˇ hpehꞈ tuˬ’ yawˇ awˬ gʼaˇ awˬ shaˉ peꞈ laˇ ve yoˬ. (2 Kawˇrenˍhtuˆ 4:7; Luˉkaꞈ 21:36) Mvuhˇ naw ma hkʼoˆ, maˇ heˆ leh miˬ guiˬ hkʼoˆ lo dawˇ law kuiˬ cawˬ ve chaw htawˇ, Yeˍsuˆ tawˇ pa haˉ tehˆ maˍ laˇ ve hkʼaw, shaˍ tiꞈ peꞈ laˇ ve htaꞈ ngaˬ hui a yeˇ yuˬ ve kʼo, Yaˬhoˉvaˬ nyi hkʼaˇ suh tuˬ te piˇ gʼa ve yoˬ. Haꞈ pehnˇ uiˍ jaˇ ve Yaˬhoˉvaˬ lehˬ, ngaˬ hui co co taiˍ taiˍ a shaꞈ gʼa tuˬ ‘liꞈ daw hkʼaw awˬ meh bvuhꞈ taˍ’ laˇ tuˬ yoˬ.—Daˍyeˍlaˆ 12:1; Hpeuꞈ maˍ ve 3:5.