“Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve”

1, 2. Hpiˇliˇpiˆ venˇ lo Pawˇluꞈ leh Siˍlaˆ aˬ htoꞈ ma gʼa hpuˇ ve le? (Awˬ lawn tanˬ htaˇ ve awˬ han htaꞈ nyi sheˍ.)

Dawˇ nyi sheˍ. Aˬ laˬ hkʼe shehˍ kʼaw hkui htaˇ, Miˍshenˍnaˍliˍ te ve Pawˇluꞈ leh Siˍlaˆ Hpiˇliˇpiˆ venˇ hkʼaw htawnˍ naˆ hoꞈ leh naˉ jaˇ ve hkʼaw gʼa chehˇ ve yoˬ. Yawˇ hui ve hkui sheh suhˆ htawˆ taˍ ve hkʼaw keu piˇ ve yoˬ. Yawˇ hui naˇ naˇ te maˇ gʼa leh yawˇ hui htaꞈ maˇ maˇ dawˆ peuˬ hkʼawꞈ nawˉ yawˇ hui ve hkʼawꞈ nawˉ paˉ lo naˬ jaˇ ve yoˬ. (Tcuh yaˇ 16:23, 24) Oˇ ve teˇ nyi tanˇ vanˇ htaˇ, maˇ dawˇ maˇ gaˇ ve hkʼaw Pawˇluꞈ leh Siˍlaˆ htaꞈ tcuh hkʼaw lo gʼawˬ kʼai ve yoˬ. Yawˇ hui yawˇ huiˉ maˬ htaꞈ haˆ haˆ ve hkʼaw suhˉ jehˬ cheˆ piˇ leh yawˇ huiˉ maˬ ve veuꞈ kʼaˇ htaꞈ kʼehˆ baˬ sheˬ leh, suhˆ taˬ yuˬ leh dawˆ piˇ ve yoˬ. (Tcuh yaˇ 16:16-22) Maˇ hteˇ maˇ cawˇ tehˬ tehˬ yoˬ! Pawˇluꞈ Roˉmaꞈ chaw hpehꞈ leh hteˇ ve cawˇ ve htaꞈ suhˉ jehˬ piˇ tuˬ a hkaw˗anˬ cawˬ ve yoˬ.a—Awˬ maiˉ htaꞈ nyi sheˍ.

² Pawˇluꞈ htawnˍ hkʼaw lo chehˇ htaˇ, oˇ ve teˇ nyi hpehꞈ ve awˬ lawn leh Hpiˇliˇpiˆ venˇ hkʼaw chehˇ ve chaw hui htaꞈ dawˇ nyi ve yoˬ hehˉ. Pawˇluꞈ kʼai jaw ve awˬ nu ve venˇ teˇ hpaˍ htaꞈ maˇ shuˍ, yawˇ hui ve venˇ hkʼaw Yuˇdaꞈ chaw awˬ pon bon yehˬ teˇ yehˬ kaꞈ maˇ cawˬ. Hkʼe te leh, yawˇ hui laˇ venˇ awˬ jaˇ lo iˉ kaˆ lawˬ paˇ lo kʼai leh oˉ kʼoˍ gʼa pui ve yoˬ. (Tcuh yaˇ 16:13, 14) Awˬ liˇ awˬ hkʼaˇ hkʼaw bon yehˬ cawˬ gʼa tuˬ, hawˉ hkʼaˆ paˍ 10 gʼaˇ gʼa cawˬ cawˇ ve yoˬ. Venˇ chi hkʼaw maˇ cawˬ ve laˇ? Hpiˇliˇpiˆ venˇ hkʼaw chehˇ ve chaw Roˉmaꞈ ve chaw gʼa hpehꞈ ve, nyi hkʼaˇ suh jaˇ. (Tcuh yaˇ 16:21) Yawˇ hui nyi htaˇ, Pawˇluꞈ leh Siˍlaˆ Yuˇdaꞈ chaw hpehꞈ ve tehꞈ dawˇ nyi ve pa taw, Roˉmaꞈ chaw kaꞈ hpehꞈ gʼa ve yawˇ hui maˇ dawˇ. Chi hkʼe hpehꞈ ve ngaˬ hui maˇ shiˍ. Yaꞈ hkʼaˇ, ngaˬ hui shiˍ ve yawˇ hui maˇ hteˇ maˇ cawˇ ve htawnˍ hkʼaw yuˬ keu piˇ ve yoˬ.

3. Pawˇluꞈ htawnˍ hkʼaw lo yuˬ keu piˇ htaˇ, aˬ htoꞈ ma te yawˇ htawˇ dawˇ nawˬ dawˇ cawˬ ve le? Yawˇ daꞈ ve dawˇ hkʼaˇ aˬ htoꞈ ma cawˬ sheˍ ve le?

³ Pawˇluꞈ aˬ htoꞈ ma te chi teˇ hkui, Hpiˇliˇpiˆ venˇ lo chehˇ ve tehꞈ dawˇ ve hehˉ le? Aˬ suhˆ hkʼaˬ nyiˇ ha pa maˇ gaˬ sheˍ htaˇ, yawˇ Iˉci˗an laˇ tsuhˇ gʼuiˬ coˇ paˉ lo chehˇ sheˍ ve yoˬ. Yawˇ oˇ kaˬ lo chehˇ htaˇ, laiˉ pawˆ daꞈ kehˬ ve awˬ ha hpu yawˇ teˇ kaˬ kaˬ bon maˇ gʼa maˍ tuˬ, tawˍ piˇ ve yoˬ. Daꞈ kehˬ ve awˬ ha hpu teˇ hpawˇ lo shiˍ kʼai piˇ ve yoˬ. (Tcuh yaˇ 16:6, 7) Hkʼaˬ kaˬ lo shiˍ kʼai piˇ ve le? Yawˇ Taˍroˇaˆ venˇ lo chehˇ htaˇ, zuhꞈ maˆ awˬ hkʼaw lo Pawˇluꞈ htaꞈ kʼoˆ piˇ ve, ‘Maˍkeˍdawˇniˆ mvuhˇ miˬ lo laˬ˗oꞈ’ Yaˬhoˉvaˬ ve a loˍ Pawˇluꞈ hkʼa dehꞈ gʼa mawˬ ve pa taw, yawˇ Maˍkeˍdawˇniˆ mvuhˇ miˬ lo laꞈ haˉ kʼai ve yoˬ. (Tcuh yaˇ 16:8-10 gʼaw ve.) Oˇ ve hkʼawꞈ nawˉ aˬ htoꞈ ma hpehꞈ la ve le? Maˍkeˍdawˇniˆ mvuhˇ miˬ lo gaˬ la ve maˇ maw sheˍ htaˇ, htawnˍ hkʼaw lo gʼa chehˇ ve yoˬ. Aˬ htoꞈ ma te Yaˬhoˉvaˬ Pawˇluꞈ htaꞈ chi hkʼe hpuˇ tcuh ve le? Yawˇ htawnˍ hkʼaw lo hkʼaˬ hkʼe maw gʼa chehˇ tuˬ le? Pawˇluꞈ yawˇ chi hkʼe dawˇ ve htawˇ, yawˇ ve yonˍ hkʼaˇ awˬ gʼaˇ hehnˇ leh ha lehˬ gʼa sheˍ ve yoˬ. “Pawˇluꞈ leh Siˍlaˆ bon lawˬ leh Gʼuiˬ sha htaꞈ kʼa muiˬ chiˇ mvuh chehˇ ve yoˬ.” (Tcuh yaˇ 16:25) Gʼuiˬ sha lo laˬ ve dawˇ sha gaˇ sha ve yawˇ hui ve nyi ma leh dawˇ hkʼaˇ gawˬ lehˍ cawˬ tuˬ te piˇ ve yoˬ.

4, 5. (a) Ngaˬ hui Pawˇluꞈ hkʼa shuˍ shuˍ hkʼaˬ hkʼe gʼa hpuˇ ve le? (b) Pawˇluꞈ gʼa hpuˇ chehˇ ve htaꞈ hkʼaˬ hkʼe te laꞈ haˉ pa piˇ ve le?

⁴ Nawˬ Pawˇluꞈ hkʼe dawˇ jaw˗aw laˇ? Nawˬ dawˇ cheˆ ve Yaˬhoˉvaˬ ga laˇ tuˬ bon lawˬ leh daꞈ kehˬ ve awˬ ha hpu beˆ maˍ laˇ ve awˬ hkʼaˇ suh gʼaꞈ te ve tehꞈ dawˇ jaw ve yoˬ hehˉ. Yaꞈ hkʼaˇ, peuˬ hkʼawꞈ nawˉ nawˬ tawˍ ve tsuhˇ ve laiˉ ceuˬ gʼa hpuˇ ve, maˇ heˆ leh nawˬ a shaꞈ teꞈ kuiˬ hkʼaw laiˉ ceuˬ gʼa pa ve yoˬ. (Cuˇ yiˍ piˇ ve 9:11) Chi teˇ hkui, aˬ htoꞈ ma te Yaˬhoˉvaˬ chi hkʼe hpuˇ tcuh laˇ ve tehꞈ nawˬ dawˇ ve yoˬ hehˉ. Nawˬ caˉ leh yeunˇ hkanˍ ve hkʼaw Yaˬhoˉvaˬ htaꞈ gʼaˇ hkʼa dehꞈ va tuˬ, aˬ htoꞈ ma nawˬ htaꞈ ga laˇ ve le? Pawˇluꞈ leh Siˍlaˆ gʼa hpuˇ ve awˬ lawn ngaˬ hui htaꞈ maˍ laˇ gʼa ve yoˬ.

⁵ Pawˇluꞈ leh Siˍlaˆ kʼa muiˬ hkawˇ kʼa chehˇ htaˇ, anˇ tuˬ ve laiˉ ceuˬ hpehꞈ la ve yoˬ. Awˉ lawˉ teˇ ceuˬ miˬ hiˆ hehnˇ jaˇ la ve yoˬ. Htawnˍ ve yehˬ miˉ yawˇ hkʼaˇ yawˇ hpaw la ve yoˬ. Hkui sheh keu taˍ ve sho chaˆ yawˇ hkʼaˇ yawˇ kʼehˆ tawˆ˗e ve yoˬ. Htawnˍ nyi haꞈ shaˉ paˍ yawˇ hkʼaˇ yawˇ tiˇ pehˍ suh˗e te htaˇ, Pawˇluꞈ yawˇ htaꞈ tawˍ piˇ leh oˇ ve teˇ gʼaˇ leh yawˇ ve yehˬ kʼa hkʼaw ve chaw hkʼa peu˗eˬ, baˆtiˆsaˬ haꞈ yuˬ ve yoˬ. Gʼuˇ suhˍ teˇ nyi mvuhˇ shawˉ naꞈ htaˇ, venˇ nyi haꞈ shaˉ paˍ Pawˇluꞈ leh Siˍlaˆ htaꞈ shiˍ tawˆ la tcuh leh venˇ hkʼaw lo tawˆ˗e tuˬ yawˇ hui htaꞈ lawˬ piˇ ve yoˬ. Venˇ nyi haꞈ shaˉ paˍ Pawˇluꞈ leh Siˍlaˆ Roˉmaꞈ chaw hpehꞈ ve yawˇ hui shiˍ htaˇ, yawˇ hui te yaꞈ jaˇ tehꞈ shiˍ la leh yawˇ huiˉ maˬ htaꞈ shiˍ tawˆ˗e ve yoˬ. Venˇ hkʼaw lo maˇ tawˆ˗e sheˍ htaˇ, Pawˇluꞈ leh Siˍlaˆ, awˬ viˉ awˬ nyi awˬ suhˉ Luˍdiˇ geh kʼai leh yawˇ hui kʼai yoˬ ca kʼoˆ piˇ taˉ ve yoˬ. Oˇ ve teˇ yanˇ, yawˇ huiˉ maˬ Hpiˇliˇpiˆ venˇ lo awˬ viˉ awˬ nyi htaꞈ awˬ gʼaˇ piˇ taˉ ve yoˬ. (Tcuh yaˇ 16:26-40) Teˇ ceuˬ le le pa kʼai vaiˇ jaˇ!

“Chaw yaˇ hui ca dawˇ maˇ gaˬ ve”

6. Ngaˬ hui aˬ htoꞈ ma awˬ lawn htaꞈ henˇ tuˬ le?

⁶ Awˬ lawn chi ngaˬ hui htaꞈ aˬ htoꞈ ma maˍ laˇ ve le? Ngaˬ hui dawˇ maˇ gaˬ ve awˬ ceuˬ Yaˬhoˉvaˬ te gʼa ve pa taw, ngaˬ hui tuꞈ ve hkanˍ ve gʼa hpuˇ htawˇ maˇ dawˇ haˍ cawˇ ve yoˬ. Pawˇluꞈ awˬ lawn chi htaꞈ hkʼa dehꞈ gʼa henˇ ve yoˬ. Dawˇ haˍ ve leh Gʼuiˬ sha lo laˬ ve dawˇ sha gaˇ sha ve awˬ lawn Pawˇluꞈ Hpiˇliˇpiˆ venˇ awˬ viˉ awˬ nyi htaꞈ liꞈ bvuhꞈ piˇ ve yoˬ. Awˬ lawn chi ve Hpiˇliˇpiˆ liꞈ 4:6, 7 (gʼaw ve) hkʼaw cawˬ ve Pawˇluꞈ ve tawˇ hkawˇ ngaˬ hui hkʼa dehꞈ gʼa henˇ ve yoˬ. Peuˬ hkʼawꞈ nawˉ, Liꞈ hpu hkʼaw awˬ nu ve awˬ lawn teˇ hpaˍ ngaˬ hui maˇ dawˇ gaˬ ve Yaˬhoˉvaˬ te ve htaꞈ ngaˬ hui teˇ geh henˇ tuˬ yoˬ. Ngaˬ hui Yaˬhoˉvaˬ htaꞈ gʼaˇ hkʼa dehꞈ va htaˇ, tuꞈ ve hkanˍ ve htaꞈ yeunˇ hkanˍ gʼaˇ tuˬ, “Gʼuiˬ sha lo laˬ ve dawˇ sha gaˇ sha ve” ngaˬ hui htaꞈ hkʼaˬ hkʼe ga laˇ gʼa ve, teˇ geh jehˬ daꞈ tuˬ yoˬ.

7. Pawˇluꞈ Hpiˇliˇpiˆ venˇ awˬ viˉ awˬ nyi htaꞈ liꞈ bvuhꞈ piˇ htaˇ, yawˇ yawˇ hui htaꞈ aˬ htoꞈ ma maˍ piˇ ve le? Ngaˬ hui kaꞈ aˬ htoꞈ ma henˇ gʼa ve le?

⁷ Pawˇluꞈ geh laˬ ve liꞈ Hpiˇliˇpiˆ venˇ awˬ viˉ awˬ nyi gʼa gʼaw htaˇ, yawˇ hui aˬ htoꞈ ma htaꞈ dawˇ nawˇ ve le? Pawˇluꞈ leh Siˍlaˆ aˬ htoꞈ ma gʼa hpuˇ leh Yaˬhoˉvaˬ anˇ tuˬ te leh ga piˇ ve htaꞈ yawˇ hui dawˇ nawˇ ve yoˬ. Liꞈ chi ve hkʼaw Pawˇluꞈ yawˇ hui htaꞈ hkʼaˬ hkʼe maˍ piˇ ve le? Pawˇluꞈ kʼoˆ gaˇ ve, taˇ dawˇ haˍ nawˬ bon lawˬ ve kʼo, “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve” nawˬ gʼa tuˬ yoˬ. Liꞈ hpu teˇ kʼoˆ kʼoˆ hkʼaw tawˇ chi ve lehˬ, “ngaˬ hui dawˇ taˍ ve aꞈ kehˉ daꞈ jaˇ ve” tehꞈ, yuˬ tawˆ ve yoˬ. Teˇ pawˆ pawˆ ngaˬ hui gu tuˬ ve awˬ hkʼaˇ maˇ shiˍ ve htawˇ, Yaˬhoˉvaˬ shiˍ lehˬ, ngaˬ hui dawˇ maˇ gaˬ ve yawˇ te gʼa ve yoˬ.—2 Peˍtruˆ 2:9 gʼaw ve.

8, 9. (a) Hpiˇliˇpiˆ venˇ lo Pawˇluꞈ maˇ hteˇ maˇ cawˇ ve htaꞈ gʼa hpuˇ ve htawˇ, chi daꞈ ve awˬ ceuˬ aˬ htoꞈ ma cawˬ tuˬ te piˇ ve le? (b) Aˬ htoꞈ ma te Hpiˇliˇpiˆ venˇ lo awˬ viˉ awˬ nyi Pawˇluꞈ ve tawˇ hkawˇ htaꞈ hkʼa dehꞈ yonˍ gʼa ve le?

⁸ Pawˇluꞈ ve liꞈ leh ponˬ laˬ ve 10 hkʼawꞈ Yaˬhoˉvaˬ yawˇ hui htaꞈ te piˇ jaw ve awˬ lawn Hpiˇliˇpiˆ venˇ awˬ viˉ awˬ nyi htaꞈ awˬ gʼaˇ piˇ maˇ jaˇ ve yoˬ hehˉ. Yaˬhoˉvaˬ Pawˇluꞈ leh Siˍlaˆ htaꞈ maˇ hteˇ maˇ cawˇ ve gʼa hpuˇ tcuh ve htawˇ, ‘ha lehˬ ve bon hkawˇ lehˬ cawˇ ve yoˬ tehꞈ, shaˉ hkiˆ hkanˍ tuˬ awˬ ceuˬ chi ve teˇ hpaˍ ga laˇ ve yoˬ.’ (Hpiˇliˇpiˆ 1:7) Hpiˇliˇpiˆ venˇ htaꞈ nyi haꞈ shaˉ paˍ Hkriꞈ yaˇ awˬ moˍ awˬ suhˉ htaꞈ fawˉ mehˍ maˇ haˆ ve yoˬ. Pawˇluꞈ yawˇ Roˉmaꞈ chaw hpehꞈ ve tehꞈ kʼoˆ maˍ piˇ ve pa taw, Pawˇluꞈ leh Siˍlaˆ Hpiˇliˇpiˆ venˇ lo tawˆ˗e peuˬ hkʼawꞈ nawˉ kaꞈ, Luˉkaꞈ kʼawꞈ chehˇ kʼai gʼa sheˍ ve yoˬ hehˉ. Luˉkaꞈ Hpiˇliˇpiˆ venˇ Hkriꞈ yaˇ awˬ suhˉ htaꞈ caˉ leh kʼawꞈ ga ve yoˬ.

⁹ Hpiˇliˇpiˆ venˇ awˬ viˉ awˬ nyi Pawˇluꞈ ve liꞈ gʼaw htaˇ, yawˇ ve dawˇ hkʼaˇ htaꞈ ceh kʼoˆ ve maˇ heˆ tehꞈ yawˇ hui shiˍ ve yoˬ. Pawˇluꞈ tuꞈ jaˇ hkanˍ jaˇ ve gʼa hpuˇ ve yoˬ. Yawˇ hui htaꞈ liꞈ bvuhꞈ piˇ htaˇ kaꞈ, Roˉmaꞈ chaw yuˬ tiˍ taˍ ve yoˬ. Yaꞈ hkʼaˇ, “Gʼuiˬ sha lo laˬ ve dawˇ sha gaˇ sha ve” yawˇ cawˬ sheˍ ve tehꞈ hpeuꞈ maw piˇ ve yoˬ.—Hpiˇliˇpiˆ 1:12-14; 4:7, 11, 22.

‘Aˬ htoꞈ ma htaꞈ maˇ kʼoˆ, taˇ dawˇ hkiˉ’

10, 11. Ngaˬ hui dawˇ haˍ dawˇ hkiˉ chehˇ htaˇ, ngaˬ hui aˬ htoꞈ ma htaꞈ dawˇ law gʼa ve le?

¹⁰ ‘Aˬ htoꞈ ma teˇ ceuˬ awˬ lawn htaꞈ kaꞈ maˇ gʼa dawˇ hkiˉ tuˬ,’ leh ‘Gʼuiˬ sha lo laˬ ve dawˇ sha gaˇ sha ve cawˬ tuˬ,’ aˬ htoꞈ ma teˇ ceuˬ ngaˬ hui htaꞈ ga laˇ gʼa ve le? Pawˇluꞈ Hpiˇliˇpiˆ Hkriꞈ yaˇ htaꞈ liꞈ bvuhꞈ piˇ ve hkʼaw ngaˬ hui gʼa mawˬ ve, dawˇ hkiˉ chehˇ ve kʼo, bon lawˬ ve lehˬ gu laˇ gʼa ve yoˬ. Hkʼe te leh hkʼaˬ htaˆ kaꞈ maˇ kʼoˆ, ngaˬ hui dawˇ hkiˉ htaˇ, bon lawˬ cawˇ ve yoˬ. (1 Peˍtruˆ 5:6, 7 gʼaw ve.) Nawˬ Yaˬhoˉvaˬ geh bon lawˬ htaˇ, yawˇ nawˬ htaꞈ nyi haꞈ shaˉ laˇ tuˬ hkʼa dehꞈ yonˍ gʼa ve yo. Nawˬ gʼa ve awˬ bon teˇ ceuˬ le le yawˇ htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. Yaˬhoˉvaˬ lehˬ “ngaˬ hui lawˬ ve leh dawˇ ve hkʼa peu˗eˬ aꞈ kehˉ leuˉ leh yawˇ maˇ chaweh te la puiˉ ve yoˬ” tehꞈ, taˇ leunˇ sheˍ.—Eˇfeˇsuꞈ 3:20.

¹¹ Pawˇluꞈ leh Siˍlaˆ hkʼa shuˍ, Yaˬhoˉvaˬ ngaˬ hui htaꞈ ga laˇ ve awˬ hkʼaˇ, ngaˬ hui htaꞈ anˇ tuˬ te laˇ gʼa ve yoˬ. Awˬ lawn uiˍ jaˇ ve maˇ heˆ ve htawˇ, teˇ pawˆ le le ngaˬ hui loˍ ve htaꞈ cawˇ daꞈ ve yoˬ. (1 Kawˇrenˍhtuˆ 10:13) Chi lehˬ ngaˬ hui teꞈ chiˉ maˇ te leh Yaˬhoˉvaˬ ga laˇ tuˬ law taˍ ve kʼoˆ gaˇ ve maˇ heˆ. Ngaˬ hui bon lawˬ ve hkʼe gʼa gʼaꞈ te ve yoˬ. (Roˉmaꞈ 12:11) Ngaˬ hui te ve awˬ ceuˬ coˇ caˇ chehˇ ve tehꞈ hpeuꞈ maw piˇ ve lehˬ Yaˬhoˉvaˬ awˬ bon naꞈ laˇ gʼa ve yoˬ. Ngaˬ hui dawˇ ve lawˬ ve aꞈ kehˉ Yaˬhoˉvaˬ te laˇ gʼa ve tehꞈ maˇ leunˇ cawˇ. Teˇ pawˆ pawˆ ngaˬ hui maˇ gʼa dawˇ taˍ ve kaꞈ yawˇ te laˇ ve yoˬ. Awˬ lawn chi ve htaꞈ caˉ daꞈ ve teˇ hpaˍ hpaˍ teˇ geh dawˇ nyi sheˍ.

Ngaˬ hui dawˇ maˇ gaˬ ve htaꞈ Yaˬhoˉvaˬ te jaw ve

12. (a) Jawˇmawˇ Seˍnaˍhkaˍriˆ Heˍsaˍkiˆ htaꞈ ca kawˆ ho la htaˇ, yawˇ hkʼaˬ hkʼe te ve le? (b) Awˬ lawn chi ve Yaˬhoˉvaˬ gu piˇ ve, ngaˬ hui htaꞈ hkʼaˬ hkʼe maˍ laˇ ve le?

¹² Ngaˬ hui dawˇ maˇ gaˬ ve htaꞈ Liꞈ hpu hkʼaw Yaˬhoˉvaˬ te jaw ve laiˉ lawn cawˬ ve yoˬ. Tawˇ pa haˉ te kʼo, Heˍsaˍkiˆ Yuˇdaꞈ mvuhˇ miˬ ve jawˇ mawˇ te htaˇ, Aˍsuˇriˆ ve jawˇ mawˇ Seˍnaˍhkaˍriˆ Yuˇdaꞈ mvuhˇ miˬ htaꞈ ca bawˆ la leh Yeˍruˆsaˍlehnˍ venˇ maˇ heˆ kʼo, teˇ venˇ le le htaꞈ hoˆ gʼa ve yoˬ. (2 Jawˇmawˇ 18:1-3, 13) Peuˬ hkʼawꞈ nawˉ, Seˍnaˍhkaˍriˆ Yeˍruˆsaˍlehnˍ venˇ htaꞈ ca bawˆ la ve yoˬ. Jawˇmawˇ Heˍsaˍkiˆ hkʼaˬ hkʼe te ve le? Awˉ lawˉ htaˇ, Yaˬhoˉvaˬ ga laˇ tuˬ yawˇ bon lawˬ ve yoˬ. Yaˬhoˉvaˬ ve tcuh kaˍ paˍ Iˉsaˍyaˆ peˆ maˍ laˇ tuˬ htaꞈ yawˇ lawˬ ve yoˬ. (2 Jawˇmawˇ 19:5, 15-20) Peuˬ hkʼawꞈ nawˉ, yawˇ hkʼa dehꞈ dawˇ nyi leh Seˍnaˍhkaˍriˆ meuˉ ve awˬ hpfuhˇ yawˇ keu piˇ ve yoˬ. (2 Jawˇmawˇ 18:14, 15) Aˍsuˇriˆ chaw venˇ htaꞈ maw chaweh ca hoˆ la tuˬ Heˍsaˍkiˆ gu hehnˇ taˍ ve yoˬ. (2 Raˍsaˍvanˍ 32:2-4) Awˬ leh meuˇ htaˇ hkʼaˬ hkʼe hpehꞈ la ve le? Yaˬhoˉvaˬ mvuhˇ naw ma tcuh yaˇ htaꞈ cuˇ leh teˇ haˉ ve hkʼaw ceh tiˉ Seˍnaˍhkaˍriˆ ve maꞈ yaˇ 185,000 gʼaˇ htaꞈ tiˇ pehˍ piˇ ve yoˬ. Chi hkʼe hpehꞈ tuˬ jawˇ mawˇ Heˍsaˍkiˆ dawˇ maˇ gaˬ!—2 Jawˇmawˇ 19:35.

13. (a) Yoˇsehꞈ gʼa hpuˇ ve ngaˬ hui htaꞈ aˬ htoꞈ ma maˍ laˇ ve le? (b) Saˍraˇ yawˇ maˇ dawˇ gaˬ ve aˬ htoꞈ ma hpehꞈ la ve le?

¹³ Yoˇsehꞈ aˬ htoꞈ ma gʼa hpuˇ ve htaꞈ dawˇ nyi sheˍ. Eˇjiˇtuꞈ mvuhˇ miˬ htawnˍ hkʼaw chehˇ htaˇ, Eˇjiˇtuꞈ mvuhˇ miˬ jawˇ mawˇ awˬ hawˉ lo ve teˇ gʼaˇ gʼa te leh, Yaˬhoˉvaˬ yawˇ htaꞈ cuˇ leh yawˇ ve yehˬ kʼa htaꞈ ponˬ piˇ gʼa tuˬ tehꞈ, yawˇ maˇ dawˇ gaˬ. (Awˬ hkuiˉ puiˍ 40:15; 41:39-43; 50:20) Yaˬhoˉvaˬ te ve hkʼa peu˗eˬ, Yoˇsehꞈ anˇ jaˇ ve yoˬ hehˉ. Yoˇsehꞈ ve awˬ pi lonˉ Saˍraˇ htaꞈ kaꞈ dawˇ nyi sheˍ. Yaˬhoˉvaˬ yawˇ htaꞈ yaˇ paˍ piˇ laˇ tuˬ, yawˇ tawnˇ gʼa˗aw laˇ? Awˬ ceˬ ma ve yaˇ maˇ heˆ, yawˇ ve yaˇ Iˉ caˆ htaꞈ gʼa tuˬ tehꞈ, Saˍraˇ dawˇ maˇ gaˬ ve yoˬ hehˉ.—Awˬ hkuiˉ puiˍ 21:1-3, 6, 7.

14. Yaˬhoˉvaˬ htaꞈ ngaˬ hui aˬ htoꞈ ma ve awˬ lawn yonˍ gʼa ve le?

¹⁴ Miˬ guiˬ awˬ suhˉ maˇ gaˬ la sheˍ htaˇ, ngaˬ hui dawˇ haˍ dawˇ hkiˉ ve htaꞈ, Yaˬhoˉvaˬ anˇ tuˬ te leh yuˬ baˬ laˇ tuˬ htaꞈ kaꞈ ngaˬ hui maˇ dawˇ law leh maˇ lawˬ. Yawˇ ve kanˉ te ve ka tiꞈ yeˬ ve chaw htaꞈ yawˇ anˇ tuˬ te leh ga piˇ jaw ve kaꞈ ngaˬ hui shiˍ ve yoˬ. Yaˬhoˉvaˬ maˇ pa jaw. (Iˉsaˍyaˆ 43:10-13 gʼaw ve.) Chi ngaˬ hui yawˇ htaꞈ yonˍ tuˬ te laˇ ve yoˬ. Ngaˬ hui Yaˬhoˉvaˬ ve a loˍ htaꞈ gʼaꞈ te tuˬ, yawˇ ngaˬ hui htaꞈ awˬ gʼaˇ peꞈ laˇ ve, hkʼa dehꞈ yonˍ gʼa ve yoˬ. (2 Kawˇrenˍhtuˆ 4:7-9) Heˍsaˍkiˆ Yoˇsehꞈ leh Saˍraˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ htaꞈ yonˍ ve ngaˬ hui haꞈ shaˉ ve kʼo, ngaˬ hui haˍ jaˇ ve awˬ lawn gʼa hpuˇ ve htawˇ, yawˇ ngaˬ hui htaꞈ ga laˇ gʼa ve yoˬ.

15. Ngaˬ hui shoꞈ shaꞈ ve awˬ lawn cawˬ ve htawˇ, “Gʼuiˬ sha lo laˬ ve dawˇ sha gaˇ sha ve” ngaˬ hui hkʼaˬ hkʼe te cawˬ gʼa ve le?

¹⁵ Ngaˬ hui shoꞈ shaꞈ ve awˬ lawn cawˬ ve htawˇ, “Gʼuiˬ sha lo laˬ ve dawˇ sha gaˇ sha ve” ngaˬ hui hkʼaˬ hkʼe te cawˬ gʼa ve le? Ngaˬ hui caˉ leh Yaˬhoˉvaˬ geh meuˆ daꞈ cawˇ ve yoˬ. Yeˍsuˆ Hkriꞈ htaiˍ hkʼawꞈ laˇ ve htaꞈ pa taw, ngaˬ hui chi hkʼe te gʼa ve yoˬ. Htaiˍ hkʼawꞈ laˇ ve chi Yaˬhoˉvaˬ anˇ tuˬ te ve teˇ ceuˬ hpehꞈ ve yoˬ. Htaiˍ hkʼawꞈ laˇ ve htaꞈ pa taw, yawˇ ngaˬ hui htaꞈ venˇ baˆ hpehˇ laˇ gʼa ve, ngaˬ hui dawˇ shiˍ puiˉ ve nyi ma daꞈ la kehˬ la gʼa ve leh, yawˇ geh meuˆ daꞈ gʼa ve yoˬ.—Yoˇhanˬ 14:6; Yaˍkoˆ 4:8; 1 Peˍtruˆ 3:21.

Ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ

16. “Gʼuiˬ sha lo laˬ ve dawˇ sha gaˇ sha ve” ngaˬ hui gʼa htaˇ hkʼaˬ hkʼe kʼai ve le? Tawˇ pa haˉ kʼoˆ maˍ laˇ sheˍ.

¹⁶ “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve” ngaˬ hui gʼa htaˇ, hkʼaˬ hkʼe kʼai ve le? Liꞈ hpu hkʼaw kʼoˆ ve, chi ngaˬ hui ve nyi ma leh dawˇ hkʼaˇ htaꞈ “haꞈ shaˉ laˇ tuˬ yoˬ.” (Hpiˇliˇpiˆ 4:7) “Haꞈ shaˉ laˇ tuˬ” kʼoˆ gaˇ ve tcuhˉ kuiˬ lehˬ, maꞈ yaˇ teˇ hpaˍ leh venˇ htaꞈ haꞈ shaˉ tuˬ ve awˬ hkʼaˇ teˇ hpaˍ hkʼa shuˍ yoˬ. Hpiˇliˇpiˆ venˇ teˇ hpaˍ htawˇ maꞈ yaˇ chi hkʼa shuˍ cawˬ ve yoˬ. Venˇ hkʼaw chehˇ ve chaw teˇ hpaˍ venˇ htaꞈ hkʼa dehꞈ haꞈ shaˉ taˍ ve htaꞈ shiˍ ve pa taw, yawˇ hui zuhꞈ mehˬ ve yoˬ. Chi hkʼa shuˍ shuˍ ngaˬ hui “Gʼuiˬ sha lo laˬ ve dawˇ sha gaˇ sha ve” cawˬ htaˇ, ngaˬ hui dawˇ haˍ dawˇ hkiˉ ve maˇ cawˬ leh, nyi ma leh dawˇ hkʼaˇ gʼaˇ gʼa jehˇ ve yoˬ. Yaˬhoˉvaˬ ngaˬ hui htaꞈ nyi haꞈ shaˉ laˇ leh ngaˬ hui dawˇ taˍ ve htaꞈ hpuˇ tcuh laˇ ve yoˬ. (1 Peˍtruˆ 5:10) Chi ngaˬ hui dawˇ haˍ dawˇ hkiˉ leh awˬ gʼaˇ nuˇ tuˬ maˇ te laˇ.

17. Tuꞈ jaˇ hkanˍ jaˇ htaˇ, Yaˬhoˉvaˬ htaꞈ gʼaˇ va gʼa tuˬ aˬ htoꞈ ma teˇ ceuˬ ngaˬ hui ga laˇ ve le?

¹⁷ Maˇ maw ve awˬ yanˇ tuꞈ jaˇ hkanˍ jaˇ ve gaˬ la tuˬ yoˬ. (Maꞈhtehˍ 24:21, 22) Ngaˬ hui teˇ gʼaˇ leh teˇ gʼaˇ aˬ htoꞈ ma gʼa hpuˇ ve maˇ shiˍ. Awˬ lawn oˇ ve ngaˬ hui maˇ dawˇ haˍ maˇ dawˇ hkiˉ cawˇ ve yoˬ. Yaˬhoˉvaˬ te tuˬ ve teˇ ceuˬ le le ngaˬ hui maˇ shiˍ ve htawˇ, ngaˬ hui ve Gʼui sha htaꞈ hkʼa dehꞈ shiˍ ve yoˬ. Oˇ htaˇ teˇ co˗e, yawˇ ve kanˉ te ve ka tiꞈ yeˬ ve chaw htaꞈ hkʼaˬ hkʼe te piˇ jaw ve, ngaˬ hui hkʼa dehꞈ shiˍ ve yoˬ. Hkʼaˬ hkʼe hpehꞈ ve htawˇ maˇ kʼoˆ, Yaˬhoˉvaˬ yawˇ ve a loˍ awˬ tehˬ biˇ la ve ngaˬ hui mawˬ jaw peuˬ ve yoˬ. Yawˇ anˇ tuˬ htaꞈ kaꞈ yehˇ ve yoˬ hehˉ. Chi htaꞈ pa taw, teˇ pawˆ le le Yaˬhoˉvaˬ ngaˬ hui htaꞈ te laˇ htaˇ, “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve” awˬ hkʼaˇ awˬ suhˉ ngaˬ hui gʼa hpuˇ ve yoˬ.