Awˬ liˇ awˬ hkʼaˇ awˬ suhˉ veuꞈ deh leh haꞈ shaˉ tuˬ ve awˬ hkʼaˇ

1, 2. (a) Awˬ liˇ awˬ hkʼaˇ awˬ suhˉ ngaˬ hui veuꞈ deh gʼa ve ngaˬ hui hkʼaˬ hkʼe te shiˍ gʼa ve le? (b) Kawˇlawˇsehˇ liꞈ 3:10-14 hkʼaw awˬ liˇ awˬ hkʼaˇ awˬ suhˉ aˬ htoꞈ ma cawˬ ve le?

Miˬ guiˬ awˬ suhˉ yuˬ tawˆ ve Liꞈ hpu (Kaˇlaˇ hkawˇ) hkʼaw “awˬ liˇ awˬ hkʼaˇ awˬ suhˉ” chi kʼoˆ ve 2 pawˆ cawˬ ve yoˬ. (Eˇfeˇsuꞈ 4:24; Kawˇlawˇsehˇ 3:10) Awˬ liˇ awˬ hkʼaˇ chi ve, “Gʼuiˬ sha hpanˍ taˍ” ve yoˬ. Awˬ liˇ awˬ hkʼaˇ awˬ suhˉ chi ngaˬ hui veuꞈ deh gʼa˗aw laˇ? Veuꞈ gʼa ve yoˬ. Yaˬhoˉvaˬ yawˇ ve awˬ hoꞈ awˬ han hkʼa shuˍ chaw yaˇ htaꞈ hpanˍ taˍ ve pa taw, Gʼuiˬ sha ve awˬ liˇ awˬ hkʼaˇ daꞈ ve ngaˬ hui henˇ yuˬ gʼa ve yoˬ.—Awˬ hkuiˉ puiˍ 1:26, 27; Eˇfeˇsuꞈ 5:1.

² Ngaˬ hui maˇ biˇ ve gʼa ve pa taw, teˇ pawˆ pawˆ ngaˬ hui ve dawˇ hkʼaˇ yaꞈ ve cawˬ ve yoˬ. Ngaˬ hui awˬ paˇ awˬ kui lo cawˬ ve awˬ ceuˬ kaꞈ heuˆ la ve yoˬ. Yaˬhoˉvaˬ ga laˇ ve pa taw, yawˇ hpehꞈ tcuh gaˇ ve chaw ngaˬ hui hpehꞈ gʼa ve yoˬ. Chi ve ngaˬ hui coˇ caˇ leh te tuˬ, awˬ liˇ awˬ hkʼaˇ awˬ suhˉ teˇ ceuˬ ceuˬ htaꞈ ngaˬ hui teˇ geh henˇ tuˬ yoˬ. (Kawˇlawˇsehˇ 3:10-14 gʼaw ve.) Peuˬ hkʼawꞈ nawˉ Gʼuiˬ sha ve kanˉ te htaˇ, awˬ liˇ awˬ hkʼaˇ awˬ suhˉ chi ngaˬ hui hkʼaˬ hkʼe te gʼa tuˬ, teˇ geh henˇ tuˬ yoˬ.

“Teˇ to tiˉ hpehꞈ ve”

3. Awˬ liˇ awˬ hkʼaˇ awˬ suhˉ teˇ ceuˬ lehˬ aˬ htoꞈ ma le?

³ Pawˇluꞈ kʼoˆ ve, chaw mehˆ hpfuhˇ htaꞈ maˇ nyi ve, awˬ liˇ awˬ hkʼaˇ awˬ suhˉ a yeˇ uiˍ jaˇ ve teˇ ceuˬ hpehꞈ ve yoˬ. Yawˇ kʼoˆ ve, “Heˍlaˍsaˆ chaw leh Yuˇdaꞈ chaw maˇ cawˬ. Awˬ guiˬ meuˇ shoˍ ve chaw leh awˬ guiˬ meuˇ maˇ shoˍ ve chaw maˇ cawˬ. Chaw hteunˍ leh Saˍkuˍsiˆ chaw maˇ cawˬ. Vuiˬ taˍ ve awˬ ceˬ leh ponˬ ve chaw maˇ cawˬ.”a (Awˬ maiˉ htaꞈ nyi sheˍ.) Hkriꞈ yaˇ awˬ moˍ hkʼaw, chaw hpu chaw naˆ maˇ heˆ leh aˉ yaˇ cawˬ ve pa taw, teˇ gʼaˇ kaꞈ shu aꞈ kehˉ daꞈ ve tehꞈ maˇ dawˇ cawˇ. Aˬ htoꞈ ma pa taw le? Ngaˬ hui Yeˍsuˆ awˬ hkʼaˇ suh gʼaꞈ yuˬ ve chaw hpehꞈ leh “teˇ to tiˉ hpehꞈ ve” pa taw yoˬ.—Kawˇlawˇsehˇ 3:11; Gaˍlaˍtiˆ 3:28.

4. (a) Yaˬhoˉvaˬ ve kanˉ te ve chaw awˬ nu ve chaw htaꞈ hkʼaˬ hkʼe te piˇ cawˇ ve le? (b) Hkriꞈ yaˇ awˬ pon haˍ jaˇ ve awˬ lawn te laˇ ve hkʼaˬ hkʼe ve teˇ ceuˬ le?

⁴ Hkʼaˬ hkʼe ve chaw ceuˬ maˇ kʼoˆ, hkʼaˬ kaˬ lo laˬ ve htawˇ maˇ kʼoˆ, ngaˬ hui teˇ gʼaˇ le le htaꞈ yawˆ yan ve yoˬ. (Roˉmaꞈ 2:11) Teˇ kaˬ kaˬ lo chi hkʼe te ve haˍ jaˇ ve yoˬ. Tawˇ pa haˉ te kʼo, oˇ htaˇ teˇ co˗e Aˉfaˍriˆkaˆ awˬ hawˉ hpawˇ mvuhˇ miˬ lo chaw hpu chaw naˆ maˇ shuˍ daꞈ ve teˇ gʼaˇ teˇ kaˬ chehˇ tuˬ, mvuhˇ miˬ uˉ peunˍ ve chaw awˬ ti gu teh piˇ ve yoˬ. Maˇ˗awˍ ve chaw oˇ kaˬ lo chehˇ taˍ sheˍ leh Shaˉhkiˆhkanˍ ve chaw kaꞈ hkʼa shuˍ chehˇ taˍ ve yoˬ. Uˉ peunˍ ve kawˍmiˍtiˍ ngaˬ hui ve awˬ viˉ awˬ nyi, nyi ma daꞈ ve chaw hpehꞈ tcuh gaˇ ve yoˬ. Chi htaꞈ pa taw, ha pa 10 maˬ 2013 hkʼawꞈ htaˇ, awˬ viˉ awˬ nyi chaw hpu chaw naˆ maˇ shuˍ daꞈ ve htawˇ, shiˍ daꞈ maˇ la tuˬ, yawˇ hui awˬ hkʼaˇ gu piˇ ve yoˬ.—2 Kawˇrenˍhtuˆ 6:13.

5, 6. (a) Gʼuiˬ sha ve chaw teˇ moˍ tiˉ hpehꞈ tuˬ awˬ hkʼaˇ hkʼaˬ hkʼe gu ve le? (Awˬ lawn tanˬ htaˇ ve awˬ han htaꞈ nyi sheˍ.) (b) Awˬ bon hkʼaˬ hkʼe gʼa ve le?

⁵ Awˬ viˉ awˬ nyi awˬ hkʼaˇ gu laˇ ve chi lehˬ teˇ pawˆ pawˆ hkawꞈ nyi shniˉ nyi htaˇ, Shaˉhkiˆhkanˍ ve chaw Hkriꞈ yaˇ awˬ moˍ 2 kaˬ ve, chaw hpu chaw naˆ tawˇ hkawˇ maˇ shuˍ daꞈ ve ca mawˬ daꞈ la tcuh ve yoˬ. Awˬ viˉ awˬ nyi Hkriꞈ yaˇ awˬ moˍ chi 2 kaˬ ve teˇ geh hto toˇ˗e leh teˇ geh hpawnˬ daꞈ leh teˇ gʼaˇ leh teˇ gʼaˇ ve yehˬ lo ca guiˇ˗e ve yoˬ. Hkriꞈ yaˇ awˬ moˍ laiˉ ha kaˬ kaꞈ awˬ hkʼaˇ chi hkʼe yehˇ ve leh awˬ tcuhˆ peuˍ kaꞈ daꞈ ve awˬ lawn laiˉ ceuˬ gʼa kaˇ ve yoˬ. Shaˉhkiˆhkanˍ ve chaw maˇ hpehꞈ ve htawˇ, awˬ hkʼaˇ chi hkʼe ve htaꞈ dawˇ cawˇ ve yoˬ. Tawˇ pa haˉ te kʼo, bon liˇ htaꞈ caˉ daꞈ ve kanˉ te paˍ teˇ gʼaˇ kʼoˆ ve, “ngaˬ Shaˉhkiˆhkanˍ ve chaw maˇ hpehꞈ ve htawˇ, nawˬ hui hto toˇ ve kanˉ te ve gu teh taˍ ve awˬ hkʼaˇ daꞈ jaˇ tehꞈ kʼoˆ piˇ gaˇ ve yoˬ. Teˇ gʼaˇ le le teˇ chaw ceuˬ tiˉ maˇ heˆ ve htawˇ, teˇ moˍ tiˉ hpehꞈ gʼa ve yoˬ.” Awˬ hkʼaˇ chi hkʼe ve ngaˬ hui ve awˬ viˉ awˬ nyi, hkʼaˬ hkʼe dawˇ ve le?

⁶ Awˬ viˉ awˬ nyi teˇ gʼaˇ Noma meh ve, awˉ lawˉ htaˇ, Soˇsaˬ ve chaw ceuˬ tawˇ hkawˇ yaw ve yoˬ. Yawˇ ve yehˬ maˇ uiˍ ve pa taw, awˬ viˉ awˬ nyi kaˇ laˇ ve Hkriꞈ yaˇ awˬ moˍ laˬ tuˬ jehˬ piˇ maˇ haˆ ve yoˬ. Yaꞈ hkʼaˇ, awˬ viˉ awˬ nyi chaw hpuˉ˗ehˍ ve geh teˇ geh hto toˇ˗e leh yawˇ ve aˉ hkʼaw lo ca guiˇ˗e ve, hkʼawꞈ nawˉ nyi ma sha la ve yoˬ. Yawˇ kʼoˆ ve, “yawˇ hui kaꞈ ngaˬ hui hkʼa shuˍ˗ehˬ ve yoˬ!” Chi htaꞈ pa taw, awˬ viˉ awˬ nyi kaˇ laˇ ve Hkriꞈ yaˇ awˬ moˍ Soˇsaˬ ve Hkriꞈ yaˇ awˬ moˍ geh teˇ geh hto toˇ˗e htaˇ Noˇmaˬ yawˇ ve aˉ hkʼaw lo awˍ caˇ la tuˬ jehˬ piˇ ve yoˬ. Nyi haꞈ shaˉ paˍ chaw hpuˉ˗ehˍ ve teˇ gʼaˇ paˇlaˇsaˍtiˆ (plastic) te˗aˬ ve ta kʼoˍ hkʼoˆ mui taˍ ve yoˬ. Chi Noˇmaˬ mawˬ htaˇ ha lehˬ jaˇ ve yoˬ. Chi teˇ hkui, kaˬ awˬ hkʼaˇ chi hkʼe ve yehˇ chehˇ sheˍ ve pa taw, awˬ viˉ awˬ nyi kaꞈ awˬ chawˇ awˬ suhˉ kʼawꞈ cawˬ leh chaw ceuˬ maˇ shuˍ daꞈ ve htawˇ, kʼawꞈ shiˍ daꞈ maˇ la ve yoˬ.

Ha kʼaˉ puiˉ ve htaꞈ veuꞈ deh˗o

7. Aˬ htoꞈ ma te ngaˬ hui shu htaꞈ ha kʼaˉ ve gʼa te piˇ cawˇ ve le?

⁷ Saˍtanˍ ve miˬ guiˬ htaꞈ maˇ gʼa te luˬ sheˍ htaˇ, Yaˬhoˉvaˬ ve chaw beˬ ve lawˇ ve laiˉ ceuˬ gʼa hpuˇ ve yoˬ. Kanˉ maˇ cawˬ ve, a naˍ uiˍ jaˇ ve, shu fawˉ mehˍ ve, mvuhˇ yeˬ mvuhˇ haw, haiˬ ve htaꞈ pa taw mawˇ jeˬ gʼa shonˇ ve maˇ heˆ leh tuꞈ ve hkanˍ ve awˬ kaˍ awˬ nu ve chi ve hkʼa peu˗eˬ, ngaˬ hui htaꞈ heuˆ la kuiˬ cawˬ ve yoˬ. Beˬ ve lawˇ ve chi hkʼe ve gʼa hpuˇ htaˇ, teˇ gʼaˇ leh teˇ gʼaˇ ga daꞈ tuˬ gʼa ha kʼaˉ daꞈ ve yoˬ. Ngaˬ hui ha kʼaˉ puiˉ ve nyi ma cawˬ ve kʼo, shu htaꞈ ha kʼaˉ ve te piˇ gaˇ ve yoˬ. (Eˇfeˇsuꞈ 4:32) Chi ve 2 ceuˬ awˬ liˇ awˬ hkʼaˇ awˬ suhˉ hpehꞈ ve yoˬ. Ngaˬ Gʼuiˬ sha htaꞈ henˇ yuˬ leh shu htaꞈ awˬ gʼaˇ piˇ tuˬ chi ngaˬ hui htaꞈ ga laˇ ve yoˬ.—2 Kawˇrenˍhtuˆ 1:3, 4.

8. Hkriꞈ yaˇ awˬ moˍ hkʼaw teˇ gʼaˇ le le htaꞈ ngaˬ hui ha kʼaˉ ve te piˇ ve kʼo, awˬ bon hkʼaˬ hkʼe gʼa ve le? Tawˇ pa haˉ kʼoˆ maˍ laˇ sheˍ.

⁸ Ngaˬ hui ve Hkriꞈ yaˇ awˬ moˍ hkʼaw, awˬ nu ve teˇ mvuhˇ miˬ ve chaw, ngaˬ hui geh ca chehˇ la ve maˇ heˆ leh shu hkʼe leˇ maˇ gʼa ve chaw chi hkʼe ve cawˬ ve kʼo, ngaˬ hui yawˇ hui htaꞈ ha kʼaˉ ve hkʼaw, hkʼaˬ hkʼe te piˇ tuˬ ve le? Yawˇ hui htaꞈ haꞈ yuˬ piˇ leh awˬ chawˇ te piˇ gaˇ ve yoˬ. Hkriꞈ yaˇ awˬ moˍ hkʼaw yawˇ hui htaꞈ loˍ ve tehꞈ shiˍ tcuh gaˇ ve yoˬ. (1 Kawˇrenˍhtuˆ 12:22, 25) Tawˇ pa haˉ te kʼo, Dehˬniˇhkan Hpiˇliˇpiˆ mvuhˇ miˬ chehˇ ve Jaˬpanˍ mvuhˇ mi lo ca kʼawꞈ chehˇ˗e ve yoˬ. Yawˇ shu mvuhˇ miˬ ve chaw hpehꞈ ve pa taw, yawˇ kanˉ te kuiˬ lo awˬ nu ve chaw hkʼa shuˍ daꞈ ve te laˇ ve htaꞈ maˇ gʼa ve yoˬ. Yawˇ Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ˗e htaˇ, yawˇ kʼoˆ ve, “hpawnˬ daꞈ kuiˬ lo maˇ˗awˍ ve Jaˬpanˍ chaw hpehꞈ ve yoˬ. Yawˇ hui ngaˬ htaꞈ awˬ chawˇ te daꞈ maw jaˇ˗oˬ ve chaw hkʼa shuˍ haꞈ yuˬ laˇ ve yoˬ.” Awˬ viˉ awˬ nyi yawˇ htaꞈ ha kʼaˉ ve te piˇ ve pa taw, yawˇ Yaˬhoˉvaˬ geh meuˆ daꞈ maˇ la tuˬ ga piˇ ve yoˬ. Maˇ maw Dehˬniˇhkan baˆtiˆsaˬ haꞈ yuˬ leh chi teˇ hkui nyi haꞈ shaˉ paˍ te chehˇ ve yoˬ. Yawˇ leh yawˇ ve awˬ miˇ ma Cehˇniˬfeuˬ Hkriꞈ yaˇ awˬ moˍ hkʼaw chehˇ ve pa taw, nyi haꞈ shaˉ paˍ teˇ hpaˍ hpaˍ ha lehˬ jaˇ ve yoˬ. Yawˇ hui kʼoˆ ve, “yawˇ hui gʼuˇ suhˍ peuˍ ve te leh a shaꞈ teꞈ hkʼaˇ caˇ lawꞈ dawˬ lawꞈ ceh te ve yoˬ. Yawˇ hui Gʼuiˬ sha ve mvuhˇ miˬ htaꞈ awˉ lawˉ teh ve daꞈ jaˇ ve henˇ yuˬ tuˬ hpehꞈ ve yoˬ.”—Luˉkaꞈ 12:31.

9, 10. Ngaˬ hui hto toˇ˗e htaˇ awˬ nu ve chaw htaꞈ ha kʼaˉ ve te piˇ ve kʼo, daꞈ ve awˬ bon aˬ htoꞈ ma gʼa ve le?

⁹ Ngaˬ hui Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ˗e htaˇ, ngaˬ hui “chaw hkʼa peu˗eˬ awˬ pon daꞈ ve htaꞈ te” piˇ gʼa ve yoˬ. (Gaˍlaˍtiˆ 6:10) Shaˉhkiˆhkanˍ ve chaw laiˉ gʼaˇ, awˬ nu ve teˇ mvuhˇ miˬ ca chehˇ la ve chaw htaꞈ ha kʼaˉ piˇ ve leh, yawˇ hui ve chaw ceuˬ tawˇ hkawˇ coˇ caˇ leh henˇ ve yoˬ. (1 Kawˇrenˍhtuˆ 9:23) Chi hkʼe te ve awˬ bon gʼa ve htaꞈ gʼa mawˬ ve yoˬ. Tawˇ pa haˉ te kʼo, Awˆsaˍteˇreˇaˇ mvuhˇ miˬ lo gʼuˇ suhˍ peuˍ ve yaˇ miˇ teˇ gʼaˇ Htiˆfaˬniˬ Baˬreˆsaˍbeˇ venˇ lo Soˬ˗aˬhiˬliˇ tawˇ hkawˇ Hkriꞈ yaˇ awˬ moˍ htaꞈ ga tuˬ yawˇ Soˬ˗aˬhiˬliˇ tawˇ hkawˇ henˇ ve yoˬ. Tawˇ hkawˇ chi henˇ ve haˍ jaˇ ve htawˇ, yawˇ ve a shaꞈ teꞈ hkʼaˇ ha lehˬ jaˇ ve yoˬ. Htiˆfaˬniˬ kʼoˆ ve, “nawˬ Gʼuiˬ sha kanˉ te ve htaꞈ pyawˍ gaˇ ve kʼo, nawˬ Hkriꞈ yaˇ awˬ moˍ hkʼaw awˬ nu ve tawˇ hkawˇ yaw ve geh ca chehˇ cawˇ ve yoˬ. Nawˬ chehˇ taˍ ve venˇ htaꞈ, jiˆ kʼai tuˬ maˇ loˍ. Yaꞈ hkʼaˇ, nawˬ awˬ nu ve venˇ lo ca guiˇ˗e ve htaꞈ shuˍ ve yoˬ. Nawˬ awˬ nu ve mvuhˇ miˬ teˇ kaˬ le le lo awˬ viˉ awˬ nyi cawˬ gʼa leh teˇ moˍ tiˉ hpehꞈ ve htaꞈ a shu yawˇ awˬ to gʼa mawˬ ve yoˬ.”

¹⁰ Jaˬpanˍ mvuhˇ miˬ lo awˬ viˉ awˬ nyi kaꞈ hkʼa shuˍ te ve yoˬ. Yawˇ ve awˬ yaˇ miˇ Saˬkiˬkoꞈ kʼoˆ ve, “ngaˬ hui hto toˇ˗e htaˇ, Baˬraˬziˇ chaw hkʼaˬ htaˆ kaꞈ mawˬ ve yoˬ. Ngaˬ hui Pawˬtuˬgiˬ ve tawˇ hkawˇ Liꞈ hpu yehˇ leh Hpeuꞈ maˍ ve liꞈ 21:3, 4 maˇ heˆ leh Chiˇ mvuh ve liꞈ 37:10, 11, 29 yawˇ hui htaꞈ hpeuꞈ maˍ piˇ ve yoˬ. Yawˇ hui hkʼa dehꞈ na leh teˇ pawˆ pawˆ kʼo hawˬ ve yoˬ.” Yehˬ kʼa chi teˇ yehˬ kʼa shu mvuhˇ miˬ lo laˬ ve chaw htaꞈ ha kʼaˉ leh yawˇ hui awˬ tehˬ ve htaꞈ henˇ tcuh gaˇ ve pa taw, yawˇ hui Pawˬtuˬgiˬ tawˇ hkawˇ tanˬ henˇ ve yoˬ. Peuˬ hkʼawꞈ nawˉ, yehˬ kʼa chi teˇ yehˬ kʼa Pawˬtuˬgiˬ ve Hkriꞈ yaˇ awˬ moˍ htaꞈ tanˬ ga ve yoˬ. Laiˉ hkʼawꞈ peuˬ hkʼawꞈ nawˉ, laiˉ gʼaˇ Yaˬhoˉvaˬ htaꞈ oˉ kʼoˍ pui la tuˬ yawˇ hui ga piˇ ve yoˬ. Saˬkiˬkoꞈ kʼoˆ ve, “Pawˬtuˬgiˬ ve tawˇ hkawˇ henˇ ve ngaˬ hui gʼa coˇ caˇ jaˇ. Yaꞈ hkʼaˇ, ngaˬ hui awˬ bon gʼa maˇ ve yoˬ. Ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ.”—Tcuh yaˇ 10:34, 35 gʼaw ve.

Nyi ma nuˇ nehˬ ve htaꞈ veuꞈ deh˗o

11, 12. (a) Awˬ liˇ awˬ hkʼaˇ awˬ suhˉ veuꞈ deh tuˬ aˬ htoꞈ ma te ngaˬ hui cawˇ ve dawˇ hkʼaˇ gʼa cawˬ cawˇ ve le? (b) Hkʼaˬ htaˆ kaꞈ nyi ma nuˇ nehˬ ve gʼa cawˬ tuˬ aˬ htoꞈ ma ngaˬ hui htaꞈ gaˇ laˇ ve le?

¹¹ Ngaˬ hui awˬ liˇ awˬ hkʼaˇ awˬ suhˉ veuꞈ deh gaˇ ve chi, Yaˬhoˉvaˬ htaꞈ awˬ meꞈ awˬ hponˇ cawˬ tcuh gaˇ ve pa taw yoˬ. Shu ngaˬ hui htaꞈ chiˇ mvuh laˇ tuˬ, awˬ liˇ awˬ hkʼaˇ awˬ suhˉ veuꞈ deh ve maˇ te cawˇ. Biˇ ve mvuhˇ naw ma tcuh yaˇ kaꞈ uiˍ muiˬ chenˬ muiˬ ve pa taw te yaꞈ ve yoˬ tehꞈ taˇ leunˇ sheˍ. (Yeˍsaˍkeˍlaˆ 28:17 kaꞈ nyi sheˍ.) Ngaˬ hui maˇ biˇ ve pa taw, uiˍ muiˬ chenˬ muiˬ ve htaꞈ jaw kʼai tuˬ ve haˍ jaˇ ve yoˬ. Yaꞈ hkʼaˇ, ngaˬ hui nyi ma nuˇ nehˬ ve veuꞈ deh gʼa ve yoˬ. Ngaˬ hui htaꞈ aˬ htoꞈ ma ga laˇ ve le?

¹² Ngaˬ hui nyi ma nuˇ nehˬ ve cawˬ la ve teˇ ceuˬ lehˬ, Gʼuiˬ sha ve tawˇ hkawˇ teˇ nyi le le gʼaw leh hkʼa dehꞈ dawˇ nyi ve yoˬ. (Bon maˍ ve 17:18-20) Yeˍsuˆ maˍ ve awˬ ceuˬ leh yawˇ ve nyi ma nuˇ nehˬ ve daꞈ jaˇ ve henˇ yuˬ tuˬ htaꞈ ngaˬ hui hkʼa dehꞈ gʼa dawˇ nyi cawˇ ve yoˬ. (Maꞈhtehˍ 20:28) Yeˍsuˆ nyi ma nuˇ nehˬ jaˇ ve pa taw, yawˇ awˬ laꞈ gʼawˇ ve hkui sheh htaꞈ tsuhˇ piˇ ve yoˬ. (Yoˇhanˬ 13:12-17) Yaˬhoˉvaˬ ve daꞈ kehˬ ve awˬ ha hpu geh ngaˬ hui bon lawˬ gʼa ve yoˬ. Ngaˬ hui shu aꞈ kehˉ daꞈ ve maˇ dawˇ tuˬ, daꞈ kehˬ ve awˬ ha hpu chi ngaˬ hui htaꞈ ga laˇ gʼa ve yoˬ.—Gaˍlaˍtiˆ 6:3, 4; Hpiˇliˇpiˆ 2:3.

13. Ngaˬ hui nyi ma nuˇ nehˬ ve kʼo, aˬ htoꞈ ma heuˆ la kuiˬ cawˬ ve le?

¹³ Tawˇ naˉ ve liꞈ 22:4 gʼaw ve. Yaˬhoˉvaˬ ngaˬ hui htaꞈ nyi ma nuˇ nehˬ ve cawˬ tcuh gaˇ ve yoˬ. Chi ngaˬ hui awˬ bon gʼa maˇ jaˇ ve yoˬ. Ngaˬ hui nyi ma nuˇ nehˬ ve chaw hpehꞈ ve kʼo, Hkriꞈ yaˇ awˬ moˍ hkʼaw htawˇ dawˇ sha gawˬ lehˍ ve cawˬ leh teˇ moˍ tiˉ hpehꞈ ve yoˬ. Chi hkʼoˆ kaˬ Yaˬhoˉvaˬ ngaˬ hui htaꞈ awˬ bon peꞈ laˇ maˇ jaˇ. Tcuh yaˇ Peˍtruˆ kʼoˆ ve, “nawˬ hui hkʼa peu˗eˬ teˇ gʼaˇ leh teˇ gʼaˇ awˬ ceˬ hkʼe nyi ma nehˬ lehˍ taˍ˗oꞈ. Awˬ lawn kʼo, Gʼuiˬ sha lehˬ nyi ma uiˍ ve chaw teˇ hpaˍ htaꞈ tawˍ taˍ ve yoˬ. Yaꞈ hkʼaˇ, nyi ma nuˇ nehˬ ve chaw teˇ hpaˍ htaꞈ awˬ bon piˇ ve yoˬ.”—1 Peˍtruˆ 5:5.

Yeunˇ hkanˍ ve htaꞈ veuꞈ deh˗o

14. Nyi ma taˍ nehˬ leh daꞈ jaˇ ve henˇ yuˬ tuˬ a shu hpehꞈ ve le?

¹⁴ Chi beuꞈ teˇ co˗e, a shu teˇ gʼaˇ nyi ma taˍ nehˬ leh yeunˇ hkanˍ ve kʼo, oˇ ve teˇ gʼaˇ nuˇ nehˬ ve tehꞈ shu dawˇ ve yoˬ. Chi awˬ tehˬ hpehꞈ ve maˇ heˆ. Awˬ liˇ awˬ hkʼaˇ chi Yaˬhoˉvaˬ geh laˬ ve yoˬ. Mvuhˇ naw ma miˬ naˆ ma hkʼa peu˗eˬ hkʼoˆ yawˇ kanˇ paˆ uiˍ jaˇ ve yoˬ. Yaˬhoˉvaˬ lehˬ, nyi ma taˍ nehˬ leh yeunˇ hkanˍ ve henˇ yuˬ tuˬ daꞈ jaˇ ve hpehꞈ ve yoˬ. (2 Peˍtruˆ 3:9) Yaˬhoˉvaˬ mvuhˇ naw ma tcuh yaˇ htaꞈ cuˇ leh Aˍbraˍhanˍ leh Lawˇtaˍ htaꞈ hkʼawꞈ piˇ htaˇ, yawˇ hkʼaˬ hkʼe taw yeunˇ hkanˍ ve htaꞈ dawˇ nyi sheˍ. (Awˬ hkuiˉ puiˍ 18:22-33; 19:18-21) 1,500 hkʼawꞈ ve awˬ yanˇ htaˇ, Iˉsaˍreˍlaˆ chaw maˇ na yuˬ ve htawˇ, Yaˬhoˉvaˬ hkʼaˬ hkʼe taw yeunˇ hkanˍ ve htaꞈ kaꞈ dawˇ nyi sheˍ.—Yeˍsaˍkeˍlaˆ 33:11.

15. Nyi ma taˍ nehˬ leh yeunˇ hkanˍ ve Yeˍsuˆ hkʼaˬ hkʼe te henˇ yuˬ tuˬ daꞈ jaˇ ve hpehꞈ ve le?

¹⁵ Yeˍsuˆ Hkriꞈ “nyi ma nuˇ nuˇ nehˇ nehˇ” cawˬ ve yoˬ. (Maꞈhtehˍ 11:29) Yawˇ ve awˬ laꞈ gʼawˇ yaꞈ kuiˬ laiˉ ceuˬ cawˬ ve htawˇ, Yeˍsuˆ yeunˇ hkanˍ jaˇ ve yoˬ. Yeˍsuˆ miˬ guiˬ hkʼoˆ chehˇ leh Gʼuiˬ sha ve kanˉ te chehˇ htaˇ, maˇ hteˇ maˇ cawˇ ve awˬ hkʼaw lo shu laiˉ pawˆ kʼoˆ leh she pfuhˍ piˇ ve yoˬ. Yaꞈhkʼaˇ, Yeˍsuˆ nyi ma taˍ nehˬ leh suh htaˇ hkʼa gaˬ yeunˇ hkanˍ ve yoˬ. Suhˆ hkuiˉ daw hkʼoˆ lo Yeˍsuˆ naˬ jaˇ htaˇ, yawˇ htaꞈ tiˇ pehˍ laˇ ve chaw htaꞈ venˇ baˆ hpehˇ piˇ tuˬ yawˇ ve awˬ pa geh lawˬ ve yoˬ. Yawˇ kʼoˆ ve, “yawˇ hui hkʼaˬ hkʼe te ve htaꞈ yawˇ hui maˇ shiˍ”ve yoˬ. (Luˉkaꞈ 23:34) Yeˍsuˆ dawˇ haˍ dawˇ hkiˉ leh naˬ jaˇ ve htawˇ, yawˇ nyi ma taˍ nehˬ leh yeunˇ hkanˍ sheˍ ve yoˬ.—1 Peˍtruˆ 2:21-23 gʼaw ve.

16. Ngaˬ hui nyi ma taˍ nehˬ leh yeunˇ hkanˍ ve hkʼaˬ hkʼe te hpeuꞈ maw piˇ gʼa tuˬ le?

¹⁶ Nyi ma taˍ nehˬ leh yeunˇ hkanˍ tuˬ Pawˇluꞈ awˬ hkʼaˇ teˇ hkʼaˇ kʼoˆ ve, “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ. Jawˇmawˇ Gʼuiˬ sha nawˬ hui ve venˇ baˆ htaꞈ hpehˇ hkʼa peuˬ ve hkʼe, nawˬ hui htawˇ venˇ baˆ hpehˇ daꞈ˗oꞈ.” (Kawˇlawˇsehˇ 3:13) Shu htaꞈ venˇ baˆ hpehˇ piˇ tuˬ, ngaˬ hui nyi ma taˍ nehˬ leh gʼa yeunˇ hkanˍ ve yoˬ. Chi hkʼe te ve kʼo, Hkriꞈ yaˇ awˬ moˍ teˇ moˍ tiˉ hpehꞈ ve htaꞈ haꞈ shaˉ gʼa ve yoˬ.

17. Aˬ htoꞈ ma te nyi ma taˍ nehˬ leh yeunˇ hkanˍ ve a yeˇ uiˍ ve le?

¹⁷ Yaˬhoˉvaˬ ngaˬ hui nyi ma taˍ nehˬ leh shu htaꞈ yeunˇ hkanˍ tcuh gaˇ ve yoˬ. Yawˇ ve miˬ guiˬ awˬ suhˉ hkʼaw ngaˬ hui chehˇ gaˇ ve kʼo, awˬ liˇ awˬ hkʼaˇ chi a yeˇ uiˍ ve yoˬ. (Maꞈhtehˍ 5:5; Yaˍkoˆ 1:21) Ngaˬ hui nyi ma taˍ nehˬ leh yeunˇ hkanˍ ve kʼo, Yaˬhoˉvaˬ htaꞈ yawˆ yan leh awˬ nu ve chaw htawˇ, chi hkʼe te tuˬ ga piˇ ve yoˬ.—Gaˍlaˍtiˆ 6:1; 2 Tiˆmoˉseˍ 2:24, 25.

Haꞈ pehnˇ ve htaꞈ veuꞈ deh˗o

18. Haꞈ pehnˇ ve leh chaw mehˆ hpfuhˇ htaꞈ maˇ nyi ve hkʼaˬ hkʼe te caˉ daꞈ ve le?

¹⁸ Ngaˬ hui henˇ laˬ peuˬ ve hkʼa peu˗eˬ haꞈ pehnˇ ve htaꞈ caˉ daꞈ ve yoˬ. Tawˇ pa haˉ te kʼo, awˬ viˉ awˬ nyi paw sha ve chaw htaꞈ haˍ gʼawˇ ve chaw aꞈ kehˉ te daꞈ piˇ htaˇ, tcuh yaˇ Yaˍkoˆ yawˇ hui htaꞈ beˆ maˍ piˇ ve yoˬ. Chi hkʼe te ve, “nawˬ awˬ to htaꞈ haꞈ ve hkʼe nawˬ awˬ paˇ awˬ kui chehˇ ve chaw hui htaꞈ haꞈ” ve maˇ heˆ. Yawˇ kʼawꞈ kʼoˆ sheˍ ve, “shu mehˆ hpfuhˇ htaꞈ nawˬ hui nyi chehˇ ve kʼo, nawˬ hui venˇ baˆ te chehˇ” ve yoˬ. (Yaˍkoˆ 2:8, 9) Ngaˬ hui shu htaꞈ haꞈ ve kʼo, yawˇ liꞈ hkʼaˬ mvuh henˇ ve htawˇ maˇ kʼoˆ, aˬ htoꞈ ma ve chaw ceuˬ htawˇ maˇ kʼoˆ, aˉ yaˇ hkʼaˬ ma cawˬ ve htawˇ maˇ kʼoˆ, ngaˬ hui chaw mehˆ hpfuhˇ htaꞈ maˇ nyi ve yoˬ. Chaw mehˆ hpfuhˇ htaꞈ maˇ nyi ve nyi ma hkʼaw gʼa tawˆ la tcuh ve, maˇ dawˇ taˍ leh te ve maˇ gʼa hpehꞈ ve yoˬ.

19. Aˬ htoꞈ ma te haꞈ pehnˇ ve veuꞈ deh ve a yeˇ uiˍ ve le?

¹⁹ Haꞈ pehnˇ ve lehˬ “dawˇ zuhˬ leh ha kʼaˉ puiˉ ve” leh “nyi ma uiˍ ve mvuh ve maˇ cawˬ” ve yoˬ. (1 Kawˇrenˍhtuˆ 13:4) Awˬ chawˇ awˬ paˆ htaꞈ caˉ leh daꞈ ve awˬ lawn sha tanˇ hto piˇ tuˬ, ngaˬ hui gʼa yeunˇ hkanˍ ve, ha kʼaˉ puiˉ ve nyi ma nuˇ nehˬ ve gʼa cawˬ cawˇ ve yoˬ. (Maꞈhtehˍ 28:19) Awˬ liˇ awˬ hkʼaˇ chi ve hkʼa peu˗eˬ ngaˬ hui cawˬ ve kʼo, Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ le le cawˇ daꞈ hawˍ daꞈ gʼa ve yoˬ. Ngaˬ hui haꞈ pehnˇ ve te daꞈ ve kʼo, Hkriꞈ yaˇ awˬ moˍ teˇ moˍ tiˉ hpehꞈ gʼa leh Yaˬhoˉvaˬ awˬ meꞈ awˬ hponˇ gʼa ve yoˬ. Teˇ moˍ tiˉ hpehꞈ ve awˬ nu ve chaw gʼa mawˬ leh awˬ tehˬ ve htaꞈ henˇ la gaˇ ve yoˬ. Chi htaꞈ pa taw, awˬ leh meuˇ htaˇ, awˬ liˇ awˬ hkʼaˇ awˬ suhˉ Liꞈ hpu hkʼaw kʼoˆ ve, “oˇ ve hkʼa peu˗eˬ awˬ hkʼoˆ haꞈ pehnˇ ve teˇ ceuˬ htaꞈ veuꞈ deh taˍ˗oꞈ. Haꞈ pehnˇ ve lehˬ, hkʼa peu˗eˬ biˇ la tuˬ hpehꞈ tsuhꞈ taˍ ve yoˬ.”—Kawˇlawˇsehˇ 3:14.

Caˉ leh “awˬ suhˉ cawˬ la piˇ˗oˆ”

20. (a) Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le? Aˬ htoꞈ ma pa taw le? (b) Awˬ gʼuˇ suhˍ hpawˇ ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ ve le?

²⁰ Ngaˬ hui teˇ gʼaˇ le le a shu yawˇ awˬ to htaꞈ na nyi cawˇ ve, ‘awˬ liˇ awˬ hkʼaˇ awˬ piˍ kʼehˆ baˬ leh maˇ kʼawꞈ te tuˬ, ngaˬ aˬ htoꞈ ma gʼa pa sheˍ ve le?’ Yaˬhoˉvaˬ ngaˬ hui htaꞈ ga laˇ tuˬ, ngaˬ hui bon gʼa lawˬ cawˇ ve leh maˇ daꞈ ve te hkʼaˇ dawˇ hkʼaˇ htaꞈ pa tuˬ, ngaˬ hui gʼa coˇ caˇ jaˇ ve yoˬ. Chi hkʼe te ve kʼo, ‘Gʼuiˬ sha ve mvuhˇ miˬ awˬ hkʼaw lo gʼa loꞈ’ tuˬ yoˬ. (Gaˍlaˍtiˆ 5:19-21) Ngaˬ hui a shu yawˇ awˬ to htaꞈ na nyi cawˇ sheˍ ve, ‘Yaˬhoˉvaˬ nyi hkʼaˇ suh tuˬ ngaˬ ve dawˇ hkʼaˇ htaꞈ gʼaˇ hteꞈ kʼawꞈ pa chehˇ˗aw laˇ?’ (Eˇfeˇsuꞈ 4:23, 24) Ngaˬ hui maˇ biˇ ve pa taw, awˬ liˇ awˬ hkʼaˇ awˬ suhˉ veuꞈ deh leh haꞈ shaˉ tuˬ, ngaˬ hui gʼa coˇ caˇ jaˇ ve yoˬ. Ngaˬ hui gʼaˇ hteꞈ kʼawꞈ te tcuhˉ taˍ cawˇ ve yoˬ. Teˇ gʼaˇ le le awˬ liˇ awˬ hkʼaˇ awˬ suhˉ kʼawꞈ veuꞈ deh leh Yaˬhoˉvaˬ htaꞈ hkʼa dehꞈ henˇ yuˬ htaˇ, ngaˬ hui ve a shaꞈ hkʼaˬ hkʼe taw ha lehˬ ve dawˇ nyi sheˍ!