Co ha hpawˇ dawˇ pawnˍ ve chaw hpehꞈ ve tcuhˉ kuiˬ hkʼaˬ hkʼe kʼoˆ gaˇ ve le?

1, 2. (a) Co ha hpawˇ ve htaꞈ kʼoˆ htaˇ, awˬ viˉ awˬ nyi laiˉ gʼaˇ hkʼaˬ hkʼe dawˇ ve le? (b) Awˬ lawn chi ve hkʼaw ngaˬ hui aˬ htoꞈ ma henˇ tuˬ le?

Kaˬneˬdaˬ mvuhˇ miˬ lo awˬ viˉ awˬ nyi yaˇ miˇ teˇ gʼaˇ kʼoˆ ve, yawˇ co ha hpawˇ dawˇ pawnˍ ve chaw hpehꞈ ve pa taw, yawˇ ha lehˬ leh shoꞈ shaꞈ ve awˬ lawn htaꞈ gu gʼa ve yoˬ. Baˬraˬziˇ mvuhˇ miˬ lo awˬ viˉ awˬ nyi hawˉ hkʼaˆ teˇ gʼaˇ heuˆ daꞈ ve 23 hkʼawꞈ gaˬ peuˬ ve yawˇ kʼoˆ ve, yawˇ leh yawˇ ve awˬ miˇ ma co ha hpawˇ dawˇ pawnˍ ve chaw hpehꞈ ve pa taw, heuˆ daꞈ ve ha lehˬ kuiˬ cawˬ jaˇ. Hpiˇliˇpaiˍ mvuhˇ miˬ lo awˬ viˉ awˬ nyi hawˉ hkʼaˆ teˇ gʼaˇ kʼoˆ ve, yawˇ co ha hpawˇ dawˇ pawnˍ ve chaw hpehꞈ ve pa taw, yawˇ nyi ma gawˬ lehˍ cawˬ leh awˬ viˉ awˬ nyi chaw liˇ vaˇ liˇ maˇ shuˍ daꞈ ve geh laˬ ve htawˇ teˇ geh chehˇ gʼa ve yoˬ.

² Ngaˬ hui co ha hpawˇ ve htaꞈ hkʼaˬ htaˆ kaꞈ dawˇ nyi ve kʼo, awˬ bon laiˉ ceuˬ gʼa tuˬ yoˬ. Chi hkʼe hpehꞈ tuˬ, ngaˬ hui hkʼaˬ hkʼe gʼa te cawˇ ve le? Awˉ lawˉ teˇ ceuˬ lehˬ Liꞈ hpu hkʼaw co ha hpawˇ dawˇ pawnˍ ve chaw htaꞈ hkʼaˬ hkʼe kʼoˆ taˍ ve ngaˬ hui na gʼa cawˇ ve yoˬ. Chi hkʼe ve chaw Gʼuiˬ sha ve awˬ ha hpu beˆ maˍ piˇ ve htaꞈ gʼa leh Yaˬhoˉvaˬ dawˇ ve hkʼe yawˇ hui dawˇ ve yoˬ. Awˬ lawn chi ve hkʼaw na hkawˇ 3 maˬ htaꞈ hkʼawꞈ tuˬ yoˬ. (1) Co ha hpawˇ dawˇ pawnˍ ve chaw hpehꞈ ve tcuhˉ kuiˬ hkʼaˬ hkʼe kʼoˆ gaˇ ve le? (2) Ngaˬ hui co ha hpawˇ uiˍ la mvuh la tuˬ, aˬ htoꞈ ma ve awˬ lawn ga laˇ ve le? (3) Co ha hpawˇ dawˇ pawnˍ ve chaw hpehꞈ tuˬ, “Hkriꞈ ve nyi ma” ngaˬ hui htaꞈ hkʼaˬ hkʼe ga laˇ gʼa ve le?

Co ha hpawˇ dawˇ pawnˍ ve chaw aˬ htoꞈ ma le?

3. Co ha hpawˇ maˇ dawˇ pawnˍ ve chaw leh co ha hpawˇ dawˇ pawnˍ ve chaw hkʼaˬ hkʼe peun daꞈ ve le tehꞈ Liꞈ hpu hkʼaw hkʼaˬ hkʼe koˆ taˍ ve le?

³ “Co ha hpawˇ dawˇ pawnˍ ve chaw” leh “co ha hpawˇ maˇ dawˇ pawnˍ ve chaw” hkʼaˬ hkʼe peunˍ daꞈ ve ngaˬ hui na gʼa tuˬ, tcuh yaˇ Pawˇluꞈ ga laˇ ve yoˬ. (1 Kawˇrenˍhtuˆ 2:14-16 gʼaw ve.) Co ha hpawˇ maˇ dawˇ pawnˍ ve chaw “Gʼuiˬ sha ve Awˬ ha hpu htaꞈ caˉ daꞈ ve teˇ hpaˍ htaꞈ maˇ haꞈ yuˬ. Awˬ ceuˬ oˇ ve teˇ hpaˍ lehˬ, yawˇ awˬ pon cuˇ yiˍ maˇ cawˬ ve awˬ ceuˬ hpehꞈ ve yoˬ.” Yaꞈ hkʼaˇ, co ha hpawˇ dawˇ pawnˍ ve chaw “hkʼa peu˗eˬ htaꞈ fuiˍ daꞈ pehˬ daꞈ gʼa” leh “Hkriꞈ ve nyi ma cawˬ” ve yoˬ. Yeˍsuˆ dawˇ ve hkʼe dawˇ tuˬ, yawˇ coˇ caˇ ve yoˬ. Ngaˬ hui chi hkʼe ve chaw hpehꞈ tuˬ Pawˇluꞈ awˬ gʼaˇ peꞈ laˇ ve yoˬ. Chaw chi 2 moˍ hkʼaˬ hkʼe peun daꞈ sheˍ ve le?

4, 5. Co ha hpawˇ maˇ dawˇ pawnˍ ve chaw hkʼaˬ hkʼe kʼai ve le?

⁴ Co ha hpawˇ maˇ dawˇ pawnˍ ve chaw hkʼaˬ hkʼe ve dawˇ hkʼaˇ cawˬ ve le? Yawˇ miˬ guiˬ ve dawˇ hkʼaˇ ha yuˬ ve pa taw, a shu yawˇ awˬ to pon tiˉ dawˇ nyi ve yoˬ. Chi hkʼe ve dawˇ hkʼaˇ, “maˇ na yuˬ ve chaw teˇ hpaˍ ve nyi ma awˬ hkʼaw lo kanˉ te ve” tehꞈ Pawˇluꞈ kʼoˆ maˍ laˇ taˍ ve yoˬ. (Eˇfeˇsuꞈ 2:2) Chi hkʼe ve dawˇ hkʼaˇ htaꞈ pa taw, maˇ˗awˍ ve chaw awˬ paˇ awˬ kui lo chehˇ ve dawˇ hkʼaˇ htaꞈ henˇ yuˬ ve yoˬ. Yawˇ hui cawˇ ve tehꞈ dawˇ ve awˬ ceuˬ htaꞈ te leh Gʼuiˬ sha ve awˬ liˇ awˬ hkʼaˇ htaꞈ a yeˇ maˇ yuˬ. Yawˇ hui awˬ suhˍ awˬ shaˍ hpawˇ tiˉ dawˇ nyi ve pa taw, aˉ yaˇ, hpu, leuˆ yuˬ tuˬ a hkaw˗anˬ a yeˇ uiˍ jaˇ tehꞈ yawˇ hui shawˍ ve yoˬ.

⁵ Co ha hpawˇ maˇ dawˇ pawnˍ ve chaw “awˬ suhˍ awˬ shaˍ ve kanˉ” te ve yoˬ. (Gaˍlaˍtiˆ 5:19-21) Pawˇluꞈ Kawˇrenˍhtuˆ venˇ chehˇ ve Hkriꞈ yaˇ htaꞈ liꞈ awˉ lawˉ teˇ kʼoˆ bvuhꞈ feu piˇ htaˇ, co ha hpawˇ maˇ dawˇ pawnˍ ve chaw te ve awˬ ceuˬ htaꞈ kaꞈ Pawˇluꞈ kʼoˆ ve yoˬ. Yawˇ hui lehˬ choˬ paˉ oˇ paˉ pawˬ ve, chaw yaˇ hpaˆ daꞈ tuˬ te piˇ ve, shu maˇ na yuˬ ve chaw hpehꞈ tuˬ awˬ gʼaˇ piˇ ve, shu htaꞈ shaˉ nanˉ lo shiˍ kʼai ve, uˉ peunˍ shehˍ hpaˇ htaꞈ maˇ yawˆ yan, leh a shaꞈ teꞈ chehˇ kuiˬ hkʼaw caˇ tuˬ dawˬ tuˬ a yeˇ uiˍ jaˇ tehꞈ shawˍ ve yoˬ. Beˬ ve lawˇ ve gʼa hpuˇ htaˇ, yaꞈ ve dawˇ hkʼaˇ htaꞈ yawˇ hui maˇ tawˍ taˍ. (Tawˇ naˉ ve 7:21, 22) Yuˇdaꞈ bvuhꞈ taˍ ve, chaw chi hkʼe ve awˬ hkʼaw lo Yaˬhoˉvaˬ ve awˬ ha hpu maˇ kʼawꞈ chehˇ.—Yuˇdaꞈ 18, 19.

6. Co ha hpawˇ dawˇ pawnˍ ve chaw hkʼaˬ hkʼe kʼai ve le?

⁶ Yaꞈ hkʼaˇ, co ha hpawˇ dawˇ pawnˍ ve chaw lehˬ Gʼuiˬ sha geh meuˆ daꞈ ve htaꞈ a yeˇ yuˬ jaˇ. Yawˇ Gʼuiˬ sha ve awˬ ha hpu beˆ maˍ laˇ tcuh ve leh Yaˬhoˉvaˬ htaꞈ henˇ yuˬ tuˬ, coˇ caˇ ve yoˬ. (Eˇfeˇsuꞈ 5:1) Yaˬhoˉvaˬ shawˍ ve leh dawˇ ve htaꞈ yawˇ gʼaˇ hteꞈ henˇ yuˬ ve yoˬ. Yawˇ awˬ pon Gʼuiˬ sha awˬ tehˬ teꞈ chehˇ ve yoˬ. Co ha hpawˇ maˇ dawˇ pawnˍ ve chaw dawˇ ve hkʼe maˇ shuˍ, yawˇ Yaˬhoˉvaˬ ve awˬ liˇ awˬ hkʼaˇ htaꞈ yawˆ yan leh a shaꞈ teꞈ chehˇ kuiˬ hkʼaw yuˬ yehˇ ve yoˬ. (Chiˇ mvuh ve 119:33; 143:10) “Awˬ suhˍ awˬ shaˍ ve kanˉ” yawˇ maˇ te leh “awˬ ha hpu ve awˬ shiˍ” yawˇ cawˬ tuˬ, coˇ caˇ jaˇ. (Gaˍlaˍtiˆ 5:22, 23) Awˬ lawn chi htaꞈ dawˇ nyi sheˍ. Mawˇ hawˉ cheuˬ ve chaw hkʼaˬ htaˆ kaꞈ mawˇ hawˇ ve htaꞈ dawˇ nyi chehˇ ve hkʼa shuˍ, a shu teˇ gʼaˇ Gʼuiˬ sha htaꞈ oˉ kʼoˍ pui ve awˬ tehˬ awˬ na a yeˇ yuˬ ve kʼo, co ha hpawˇ dawˇ nyi tcuhˉ taˍ ve chaw tehꞈ kuˬ ve yoˬ.

7. Co ha hpawˇ dawˇ nyi tcuhˉ taˍ ve chaw htaꞈ Liꞈ hpu hkʼaw hkʼaˬ hkʼe kʼoˆ taˍ ve le?

⁷ Yeˍsuˆ kʼoˆ ve co ha hpawˇ dawˇ nyi tcuhˉ taˍ ve chaw lehˬ gʼa ha lehˬ tuˬ yoˬ. Maꞈhtehˍ liꞈ 5:3 hkʼaw kʼoˆ ve, “nyi ma hkʼaw haˍ ve gʼawˇ ve chaw hui awˬ bon uiˍ ve yoˬ. Awˬ lawn kʼo, mvuhˇ naw ma mvuhˇ miˬ lehˬ, yawˇ hui ve mvuhˇ miˬ hpehꞈ ve yoˬ.” Roˉmaꞈ liꞈ 8:6 hkʼaw kʼoˆ ve, Yaˬhoˉvaˬ dawˇ ve hkʼa shuˍ dawˇ ve lehˬ ngaˬ hui a shaꞈ teꞈ kuiˬ hkʼaw caˉ daꞈ ve yoˬ. Liꞈ hpu chi teˇ tawn kʼoˆ ve, “awˬ suhˍ awˬ shaˍ htaꞈ dawˇ nyi tcuhˉ taˍ ve nyi ma lehˬ, suh ve awˬ ceuˬ hpehꞈ ve yoˬ. Awˬ ha hpu htaꞈ dawˇ nyi tcuhˉ taˍ ve nyi ma lehˬ, co ha teꞈ ve leh dawˇ sha ve awˬ ceuˬ hpehꞈ ve yoˬ.” Ngaˬ hui co ha hpawˇ dawˇ nyi tcuhˉ taˍ ve kʼo, chi teˇ hkui ngaˬ hui Gʼuiˬ sha geh dawˇ sha gawˬ lehˍ ve cawˬ gʼa ve, a shu yawˇ awˬ to dawˇ sha gawˬ lehˍ cawˬ gʼa ve, leh co co taiˍ taiˍ ve a shaꞈ dawˇ law kuiˬ cawˬ gʼa ve yoˬ.

8. Co ha hpawˇ dawˇ pawnˍ ve chaw hpehꞈ leh te tcuhˉ taˍ tuˬ aˬ htoꞈ ma te maˇ sha ve le?

⁸ Yaꞈ hkʼaˇ, ngaˬ hui kawˆ tuˬ cawˬ ve miˬ guiˬ hkʼoˆ chehˇ ve yoˬ. Ngaˬ hui awˬ paˇ awˬ kui lo chehˇ ve chaw Gʼuiˬ sha dawˇ ve hkʼe maˇ dawˇ ve pa taw, ngaˬ hui ve nyi ma htaꞈ haꞈ shaˉ tuˬ maˇ sha. Ngaˬ hui ve nyi ma htaꞈ Yaˬhoˉvaˬ ve dawˇ hkʼaˇ maˇ cawˬ tcuh ve kʼo, miˬ guiˬ ve dawˇ hkʼaˇ cawˬ la tuˬ yoˬ. Chi hkʼe maˇ gʼa hpehꞈ tuˬ, ngaˬ hui hkʼaˬ hkʼe te cawˇ ve le? Ngaˬ hui co ha hpawˇ hkʼaˬ hkʼe te uiˍ la mvuh la gʼa tuˬ le?

Daꞈ ve chaw awˬ lawn htaꞈ henˇ yuˬ˗oꞈ

9. (a) Co ha hpawˇ dawˇ nyi tcuhˉ taˍ ve chaw hpehꞈ tuˬ, aˬ htoꞈ ma ngaˬ hui htaꞈ maˍ laˇ ve le? (b) A shu ve daꞈ ve awˬ lawn htaꞈ ngaˬ hui henˇ tuˬ le?

⁹ Yaˇ teˇ hpaˍ awˬ pa awˬ e daꞈ ve awˬ lawn htaꞈ henˇ yuˬ ve hkʼa shuˍ, ngaˬ hui kaꞈ Yaˬhoˉvaˬ geh meuˆ daꞈ ve chaw htaꞈ gʼa henˇ yuˬ cawˇ ve yoˬ. Co ha hpaw dawˇ nyi tcuhˉ taˍ ve chaw hpehꞈ tuˬ, chi ngaˬ hui htaꞈ maˍ laˇ ve yoˬ. Chi hkʼoˆ kaꞈ, ngaˬ hui aˬ htoꞈ ma maˇ te cawˇ ve shiˍ tuˬ, co ha hpawˇ maˇ dawˇ pawnˍ ve chaw htaꞈ kaꞈ dawˇ nyi tuˬ yoˬ. (1 Kawˇrenˍhtuˆ 3:1-4) Liꞈ hpu hkʼaw daꞈ ve chaw leh maˇ daꞈ ve chaw awˬ lawn cawˬ ve yoˬ. Yaˍkoˆ, Maˍriˆ, leh Yeˍsuˆ daꞈ ve henˇ yuˬ tuˬ htaꞈ ngaˬ hui teˇ geh nyi shaˍ.

10. Yaˍkoˆ yawˇ co ha hpawˇ dawˇ pawnˍ ve chaw hpehꞈ ve tehꞈ hkʼaˬ hkʼe te hpeuꞈ maw laˇ ve le?

¹⁰ Ngaˬ hui laiˉ gʼaˇ hkʼa shuˍ, Yaˍkoˆ ve a shaꞈ teꞈ hkʼaˇ maˇ sha. Yawˇ ve awˬ viˉ paˍ Iˉsawˇ yawˇ htaꞈ tiˉ pehˍ gaˇ ve yoˬ. Yawˇ ve awˬ puˍ kaꞈ yawˇ htaꞈ laiˉ pawˆ heˍ caˇ piˇ ve yoˬ. Yaꞈ hkʼaˇ, Aˍbraˍhanˍ htaꞈ Yaˬhoˉvaˬ ka tiꞈ te piˇ taˍ ve Yaˍkoˆ hkʼa dehꞈ yonˍ chehˇ sheˍ. Ka tiꞈ oˇ ve biˇ la tuˬ, yawˇ leh yawˇ ve yehˬ kʼa htaꞈ caˉ daꞈ ve tehꞈ Yaˍkoˆ shiˍ ve pa taw, yawˇ yehˬ kʼa htaꞈ hkʼa dehꞈ nyi haꞈ shaˉ ve yoˬ. (Awˬ hkuiˉ puiˍ 28:10-15) Yawˇ awˬ paˇ awˬ kui ve chaw awˬ suhˍ awˬ shaˍ hpawˇ tiˉ dawˇ nyi ve htawˇ, awˬ ceuˬ chi lehˬ yawˇ htaꞈ Yaˬhoˉvaˬ ka tiꞈ te taˍ ve leunˇ tuˬ, yawˇ maˇ te tcuh piˇ. Tawˇ pa haˉ te kʼo, Yaˍkoˆ yawˇ ve awˬ viˉ paˍ yawˇ htaꞈ te luˬ gaˇ ve tehꞈ dawˇ nyi htaˇ, yawˇ ponˬ tuˬ Yaˬhoˉvaˬ geh bon lawˬ ve yoˬ. Yawˇ kʼoˆ ve, “nawˬ ngaˬ htaꞈ awˬ bon maˇ maˇ naꞈ laˇ leh, ngaˬ ve awˬ ceuˬ awˬ hkʼaˇ teˇ hpaˍ lehˬ gʼaw maˇ peuˬ htaˇ hkʼa gaˬ maˇ jaˇ ve shehˇ shiˍ hkʼa shuˍ hpehꞈ la tuˬ yoˬ tehꞈ nawˬ kʼoˆ laˇ taˍ ve tawˇ htaꞈ a ciˉ dawˇ nawˇ laˇ˗oˆ.” (Awˬ hkuiˉ puiˍ 32:6-12) Yaˍkoˆ Yaˬhoˉvaˬ ve ka tiꞈ htaꞈ hkʼa dehꞈ yonˍ ve tehꞈ yawˇ ve a shaꞈ teꞈ hkʼaˇ hpeuꞈ maw laˇ ve yoˬ.

11. Maˍriˆ co ha hpawˇ dawˇ nyi tcuhˉ taˍ ve chaw hpehꞈ ve ngaˬ hui hkʼaˬ hkʼe te shiˍ ve le?

¹¹ Chi teˇ hkui Maˍriˆ htaꞈ dawˇ nyi sheˍ. Yawˇ co ha hpawˇ dawˇ nyi tcuhˉ taˍ ve pa taw, Yaˬhoˉvaˬ yawˇ htaꞈ leuˆ yuˬ leh Yeˍsuˆ ve awˬ e te tcuh ve yoˬ. Maˍriˆ yawˇ ve awˬ viˉ awˬ nyi Zaˍhkaˍriˆ leh Eˇliˇsaˍbehˆ geh ca guiˇ˗e htaˇ, yawˇ kʼoˆ ve htaꞈ gʼaw nyi sheˍ. (Luˉkaꞈ 1:46-55 gʼaw ve.) Maˍriˆ Gʼuiˬ sha ve hkawˇ htaꞈ haꞈ leh Heˍbrehˇ ve Liꞈ hpu awˬ tawn htaꞈ hkʼa dehꞈ shiˍ ve ngaˬ hui hkʼa tawˍ lehˆ gʼa mawˬ ve yoˬ. (Awˬ hkuiˉ puiˍ 30:13; 1 Saˍmo˗eˍlaˆ 2:1-10; Maˍlaˍhkiˆ 3:12) Yoˇsehꞈ leh Maˍriˆ heuˆ daꞈ peuˬ hkʼawꞈ nawˉ, Yeˍsuˆ maˇ paw la sheˍ ve ceh ceh Yawˇ huiˉ maˬ teˇ geh maˇ zuhꞈ jaw. Yawˇ huiˉ maˬ te gaˇ ve aꞈ kehˉ Gʼuiˬ sha ve kanˉ htaꞈ awˉ lawˉ teh ve yoˬ. (Maꞈhtehˍ 1:25) Chi hkʼoˆ kaꞈ, Yeˍsuˆ uiˍ la htaˇ, Maˍriˆ teˇ ceuˬ le le htaꞈ hkʼa dehꞈ nyi leh yawˇ maˍ laˇ ve htaꞈ hkʼa dehꞈ na ve yoˬ. Maˍriˆ “awˬ ceuˬ oˇ ve hkʼa peu˗eˬ htaꞈ nyi ma hkʼaw lo tawnˇ taˍ ve yoˬ.” (Luˉkaꞈ 2:51) Meˍsiˉyaꞈ htaꞈ caˉ daꞈ ve Gʼuiˬ sha ka tiꞈ te taˍ ve yawˇ a yeˇ yuˬ jaˇ ve tehꞈ ngaˬ hui shiˍ gʼa ve yoˬ. Ngaˬ hui Maˍriˆ htaꞈ henˇ yuˬ leh Gʼuiˬ sha te tcuh gaˇ ve teˇ ceuˬ le le coˇ caˇ leh te gʼa˗aw laˇ?

12. (a) Yeˍsuˆ yawˇ ve Awˬ pa htaꞈ hkʼaˬ hkʼe te henˇ yuˬ ve le? (b) Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? (Awˬ lawn tanˬ htaˇ ve awˬ han htaꞈ nyi sheˍ.)

¹² Co ha hpawˇ dawˇ nyi tcuhˉ taˍ ve chaw htaꞈ kʼoˆ kʼo, Yeˍsuˆ lehˬ daꞈ jaˇ ve henˇ yuˬ tuˬ hpehꞈ ve yoˬ. Yeˍsuˆ miˬ guiˬ hkʼoˆ chehˇ leh Gʼuiˬ sha ve kanˉ te htaˇ, yawˇ Awˬ pa htaꞈ henˇ yuˬ gaˇ ve tehꞈ hpeuꞈ maw laˇ ve yoˬ. Yeˍsuˆ te ve dawˇ ve teˇ ceuˬ le le Yaˬhoˉvaˬ hkʼaˬ shuˍ te ve yoˬ. Yawˇ Gʼuiˬ sha ve aˬ loˍ htaꞈ gʼaꞈ te leh Gʼuiˬ sha ve awˬ liˇ hkʼaˇ htaꞈ yawˆ yan ve yoˬ. (Yoˇhanˬ 8:29; 14:9; 15:10) Tawˇ pa haˉ te kʼo, Iˉsaˍyaˆ Yaˬhoˉvaˬ haꞈ pehnˇ ve htaꞈ kʼoˆ htaˇ leh Maˍkuˆ Yeˍsuˆ ve dawˇ hkʼaˇ htaꞈ kʼoˆ htaˇ, tehˆ daꞈ nyi sheˍ. (Iˉsaˍyaˆ 63:9; Maˍkuˆ 6:34 gʼaw ve.) Yeˍsuˆ hkʼa shuˍ, ngaˬ hui haꞈ pehnˇ ve hkʼaw ga laˇ tuˬ loˍ ve chaw htaꞈ ga piˇ tuˬ gu hehnˇ taˍ˗aw laˇ? Ngaˬ hui hto toˇ ve leh daꞈ ve awˬ lawn sha tanˇ maˍ piˇ tuˬ nyi ma pfuhˇ˗aw laˇ? (Luˉkaꞈ 4:43) Co ha hpawˇ dawˇ nyi tcuhˉ taˍ ve chaw lehˬ shu htaꞈ haꞈ leh coˇ caˇ ve hkʼaw ga piˇ ve yoˬ.

13, 14. (a) Chi beuꞈ teˇ co˗e co ha hpawˇ dawˇ pawnˍ ve chaw ve awˬ lawn ngaˬ hui hkʼaˬ hkʼe te henˇ yuˬ gʼa ve le? (b) Tawˇ pa haˉ kʼoˆ maˍ laˇ sheˍ.

¹³ Ngaˬ hui ve awˬ viˉ awˬ nyi laiˉ gʼaˇ co ha hpawˇ dawˇ pawnˍ ve chaw hpehꞈ leh Yeˍsuˆ htaꞈ henˇ yuˬ tuˬ, yawˇ hui coˇ caˇ ve yoˬ. Yawˇ hui kaiˬ ve hkʼaw hto toˇ ve, hkehˉ chaw htaꞈ haꞈ yuˬ puiˉ ve, shu htaꞈ haꞈ puiˉ ve, nawˬ mawˬ gʼa ve yoˬ hehˉ. Yawˇ hui maˇ biˇ ve chaw hpehꞈ ve htawˇ, daꞈ ve te hkʼaˇ dawˇ hkʼaˇ cawˬ tuˬ, Yaˬhoˉvaˬ te tcuh gaˇ hkʼe te tuˬ, yawˇ hui coˇ caˇ ve yoˬ. Baˬraˬziˇ mvuhˇ miˬ lo awˬ viˉ awˬ nyi Raˍhkeˍlaˆ kʼoˆ ve, “aˉ poꞈ veuꞈ kʼaˇ shu dawˇ cawˇ ve htaꞈ ngaˬ veuꞈ ve yoˬ. Hkʼe te leh, ngaˬ veuꞈ kʼaˇ veuꞈ ve hkʼaˬ dehꞈ maˇ nyi sha. Yaꞈ hkʼaˇ, ngaˬ awˬ tehˬ ve htaꞈ gʼa henˇ htaˇ, co ha hpawˇ dawˇ pawnˍ ve chaw hpehꞈ tuˬ gʼa coˇ caˇ cawˇ ve ngaˬ shiˍ la ve yoˬ. Pa tuˬ maˇ sha ve htawˇ, ngaˬ ha lehˬ jaˇ leh a shaꞈ teꞈ hkʼaˇ kaꞈ awˬ hpfuhˇ cawˬ la ve yoˬ.”

¹⁴ Hpiˇliˇpaiˍ mvuhˇ miˬ lo awˬ viˉ awˬ nyi Reˍlenˍ shoꞈ shaꞈ ve awˬ lawn teˇ ceuˬ ve yoˬ. Yawˇ awˬ tehˬ ve shiˍ ve htawˇ, yawˇ liꞈ chi mvuh mvuh henˇ tuˬ leh kanˉ daꞈ daꞈ ve cawˬ tuˬ dawˇ cawˇ ve yoˬ. Maˇ maw ve awˬ yanˇ, co ha hpawˇ a yeˇ uiˍ ve tehꞈ yawˇ maˇ shawˍ. Yawˇ kʼoˆ ve, “ngaˬ teˇ ceuˬ ceuˬ maˇ lawꞈ ve tehꞈ tanˬ dawˇ la ve yoˬ. Awˬ ceuˬ chi ve ngaˬ ve kanˉ aꞈ kehˉ a yeˇ uiˍ jaˇ tehꞈ ngaˬ shiˍ la ve yoˬ.” Reˍlenˍ yawˇ ve dawˇ hkʼaˇ pa leh Yaˬhoˉvaˬ ve kanˉ awˉ lawˉ teh ve yoˬ. Maꞈhtehˍ liꞈ 6:33, 34 hkʼaw Yaˬhoˉvaˬ ve ka tiꞈ htaꞈ yawˇ gʼaˇ va ve yoˬ. Yawˇ kʼoˆ ve, “Yaˬhoˉvaˬ nyi haꞈ shaˉ laˇ tuˬ ngaˬ hkʼa dehꞈ yonˍ ve yoˬ!” Nawˬ ve Hkriꞈ yaˇ awˬ moˍ hkʼaw awˬ viˉ awˬ nyi teˇ hpaˍ chi hkʼe te chehˇ ve yoˬ hehˉ. Yawˇ hui Yeˍsuˆ htaꞈ henˇ yuˬ chehˇ ve ngaˬ hui mawˬ htaˇ, yawˇ hui ka tiꞈ yeˬ ve awˬ lawn ngaˬ hui gʼaꞈ te gaˇ ve yoˬ.—1 Kawˇrenˍhtuˆ 11:1; 2 Hteˇsaˍlawˇniˆ 3:7.

“Hkriꞈ ve nyi ma” cawˬ piˇ˗oˆ

15, 16. (a) Yeˍsuˆ hkʼa shuˍ hpehꞈ tuˬ ngaˬ hui a htoꞈ ma gʼa te tuˬ le? (b) Ngaˬ hui “Hkriꞈ ve nyi ma” cawˬ ve kʼo, hkʼaˬ hkʼe hpehꞈ tuˬ le?

¹⁵ Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? 1 Kawˇrenˍhtuˆ liꞈ 2:16 hkʼawꞈ kʼoˆ ve, “Hkriꞈ ve nyi ma” ngaˬ hui gʼa cawˬ cawˇ ve yoˬ. Hpiˇliˇpiˆ liꞈ 2:5 hkʼawꞈ ngaˬ hui htaꞈ shaˍ tiꞈ peꞈ laˇ ve “Yeˍsuˆ Hkriꞈ nyi ma taˍ ve hkʼe nawˬ hui htawˇ taˍ˗oꞈ.” Yeˍsuˆ hkʼa shuˍ hpehꞈ tuˬ, yawˇ te ve dawˇ ve ngaˬ hui henˇ yuˬ cawˇ ve yoˬ. Yawˇ a shaꞈ teꞈ chehˇ kuiˬ hkʼaw Gʼuiˬ sha geh meuˆ daꞈ ve lehˬ a yeˇ uiˍ jaˇ. Ngaˬ hui Yeˍsuˆ htaꞈ henˇ yuˬ ve kʼo, Yaˬhoˉvaˬ dawˇ ve hkʼe ngaˬ hui dawˇ tuˬ yoˬ. Chi htaꞈ pa taw, Yeˍsuˆ hkʼa shuˍ dawˇ ve a yeˇ uiˍ jaˇ.

¹⁶ Ngaˬ hui hkʼaˬ hkʼe te dawˇ gʼa tuˬ le? Yeˍsuˆ ve awˬ laꞈ gʼawˇ lehˬ yawˇ anˇ tuˬ te ve htaꞈ mawˬ jaw ve, yawˇ chaw awˬ moˍ lonˉ htaꞈ bon maˍ piˇ htaˇ gʼa kaˇ ve, yawˇ chaw teˇ ceuˬ le le htaꞈ te piˇ ve awˬ hkʼaˇ mawˬ ve, leh Yaˬhoˉvaˬ ve dawˇ hkʼaˇ yawˇ htaꞈ beˆ maˍ piˇ ve awˬ hkʼaˇ kaꞈ gʼa mawˬ ve yoˬ. Yawˇ hui kʼoˆ ve, “[Yeˍsuˆ] hkʼa te ve hkʼa peu˗eˬ htaꞈ ngaˬ hui htawˇ shaˉ hkiˆ hkanˍ shehˍ hpaˇ hpehꞈ ve yoˬ.” (Tcuh yaˇ 10:39) Chi beuꞈ teˇ co˗e, ngaˬ hui Yeˍsuˆ htaꞈ mawˬ maˇ hpehꞈ. Yaꞈ hkʼaˇ, Yeˍsuˆ htaꞈ hkʼa dehꞈ shiˍ gʼa tuˬ, Maꞈhtehˍ, Maˍkuˆ, Luˉkaꞈ, leh Yoˇhanˬ liꞈ ngaˬ hui htaꞈ ga laˇ ve yoˬ. Liꞈ chi teˇ hpaˍ gʼaw leh dawˇ nyi htaˇ, Yeˍsuˆ ve dawˇ hkʼaˇ ngaˬ hui shiˍ la ve yoˬ. “Yawˇ ve hkui ha awˬ hkʼaˇ suh gʼaꞈ kʼai tuˬ,” chi ngaˬ hui htaꞈ maˍ laˇ ve yoˬ. “Yawˇ nyi ma taˍ ve hkʼe, nawˬ hui htawˇ nyi ma taˍ leh, gu taˍ hehnˇ taˍ˗oꞈ.”—1 Peˍtruˆ 2:21; 4:1.

17. Yeˍsuˆ hkʼa shuˍ dawˇ ve kʼo, aˬ htoꞈ ma awˬ bon gʼa tuˬ le?

¹⁷ Yeˍsuˆ hkʼa shuˍ dawˇ ve kʼo, aˬ htoꞈ ma awˬ bon gʼa tuˬ le? Awˬ bon cawˬ ve caˇ tuˬ caˇ leh awˬ gʼaˇ cawˬ la ve hkʼa shuˍ, Yeˍsuˆ dawˇ ve hkʼe ngaˬ hui dawˇ ve kʼo, co ha hpawˇ uiˍ la mvuh la tuˬ yoˬ. Awˬ lawn teˇ hpaˍ gʼa hpuˇ htaˇ, hkʼaˬ hkʼe gʼa te cawˇ ve ngaˬ hui awˬ meu˗eˇ meu˗eˇ shiˍ la ve yoˬ. Gʼuiˬ sha nyi hkʼaˇ suh tuˬ, ngaˬ hui cuˇ yiˍ cawˬ ve hkʼaw dawˇ cheˆ gʼa leh daꞈ kehˬ ve dawˇ shiˍ puiˉ ve nyi ma cawˬ tuˬ yoˬ. Ngaˬ hui “Jawˇmawˇ Yeˍsuˆ Hkriꞈ htaꞈ veuꞈ deh” ve kʼo, awˬ bon maˇ maˇ gʼa tuˬ yoˬ. Nawˬ chi hkʼe dawˇ˗aw laˇ?—Roˉmaꞈ 13:14.

18. Co ha hpawˇ dawˇ pawnˍ ve chaw htaꞈ caˉ daꞈ ve awˬ lawn nawˬ aˬ htoꞈ ma gʼa henˇ ve le?

¹⁸ Co ha hpawˇ dawˇ pawnˍ ve chaw hpehꞈ tuˬ hkʼaˬ hkʼe kʼoˆ ve na gʼa tuˬ, awˬ lawn chi ve hkʼaw ngaˬ hui gʼa henˇ peuˬ ve yoˬ. Gʼuiˬ sha ve awˬ ha hpu beˆ maˍ piˇ ve htaꞈ gʼa ve chaw awˬ lawn gʼa henˇ ve yoˬ. Chi hkʼoˆ kaꞈ Yaˬhoˉvaˬ dawˇ ve hkʼe dawˇ tuˬ, yawˇ geh hkʼa dehꞈ meuˆ daꞈ tuˬ, “Hkriꞈ ve nyi ma” cawˬ tuˬ ngaˬ hui htaꞈ ga laˇ gʼa ve tehꞈ kaꞈ gʼa henˇ ve yoˬ. Yaꞈ hkʼaˇ, awˬ nu ve awˬ ceuˬ kaꞈ ngaˬ hui gʼa henˇ sheˍ ve yoˬ. Tawˇ pa haˉ te kʼo, ngaˬ hui co ha hpawˇ uiˍ la mvuh la chehˇ ve hkʼaˬ hkʼe te shiˍ gʼa ve le? Ngaˬ hui co ha hpawˇ uiˍ la mvuh la tuˬ, hkʼaˬ hkʼe te cawˇ ve le? Ngaˬ hui ve co ha hpawˇ, ngaˬ hui htaꞈ heuˆ la kuiˬ hkʼaˬ hkʼe cawˬ ve le? Gʼuˇ suhˍ teˇ lawn hkʼaw ngaˬ hui teˇ geh henˇ tuˬ yoˬ.