Htaiˍ hkʼawꞈ ve—Gʼuiˬ sha peꞈ laˇ ve daꞈ jaˇ ve laꞈ shawnˍ

1, 2. (a) Nawˬ ha lehˬ jaˇ ve laꞈ shawnˍ hkʼaˬ hkʼe ve le? (b) Aˬ htoꞈ ma te htaiˍ hkʼawꞈ ve lehˬ daꞈ jaˇ ve laꞈ shawnˍ hpehꞈ ve le?

Nawˬ aˬ htoꞈ ma daꞈ jaˇ ve laꞈ shawnˍ gʼa jaw ve le? Laꞈ shawnˍ oˇ ve awˬ hpfuhˇ hkʼaˆ tuˬ maˇ loˍ. Laꞈ shawnˍ oˇ ve htaꞈ nawˬ dawˇ cawˇ leh loˍ ve mawˇ hpehꞈ ve kʼo, nawˬ ha lehˬ jaˇ ve yoˬ.

² Yaˬhoˉvaˬ ngaˬ hui htaꞈ laiˉ ceuˬ peꞈ laˇ ve awˬ hkʼaw lo a yeˇ uiˍ jaˇ ve teˇ ceuˬ cawˬ ve yoˬ. Chi lehˬ Gʼuiˬ sha chaw yaˇ htaꞈ peꞈ laˇ ve daꞈ jaˇ ve laꞈ shawnˍ hpehꞈ ve yoˬ. Ngaˬ hui co co taiˍ taiˍ gʼa teꞈ chehˇ tuˬ, Yaˬhoˉvaˬ yawˇ ve Yaˇ paˍ Yeˍsuˆ Hkriꞈ htaꞈ miˬ guiˬ hkʼoˆ peu laˇ ve, chi teˇ lawn hkʼaw ngaˬ hui henˇ tuˬ yoˬ. (Maꞈhtehˍ 20:28 gʼaw ve.) Chi lehˬ, Yaˬhoˉvaˬ ngaˬ hui htaꞈ haꞈ jaˇ ve yoˬ tehꞈ hpeuꞈ maw laˇ ve yoˬ.

Htaiˍ hkʼawꞈ ve aˬ htoꞈ ma le?

3. Aˬ htoꞈ ma te chaw yaˇ gʼa suh ve le?

³ Chaw yaˇ htaꞈ venˇ baˆ leh suh ve htaꞈ ponˬ laˇ tuˬ, htaiˍ hkʼawꞈ ve teˇ ceuˬ Yaˬhoˉvaˬ peꞈ laˇ ve yoˬ. (Eˇfeˇsuꞈ 1:7) Aˬ htoꞈ ma pa taw ngaˬ hui htaiˍ hkʼawꞈ laˇ tuˬ loˍ ve le? Awˬ lawn chi na gʼa tuˬ, laiˉ hinˉ hkʼawꞈ htaˇ Eˍdenˍ hko hkʼaw aˬ htoꞈ ma hpehꞈ la ve gʼa shiˍ cawˇ ve yoˬ. Ngaˬ hui ve awˬ pa awˬ e awˉ lawˉ teˇ ca Aˍdanˍ Eˇvaꞈ venˇ baˆ te ve pa taw, gʼa suh ve yoˬ. Ngaˬ hui kaꞈ Aˍdanˍ Eˇvaꞈ ve venˇ baˆ awˬ shinˉ awˬ ka htaꞈ gʼa ve pa taw, gʼa suh ve yoˬ.—Kʼoˆ maˍ ve awˬ lawn 9 htaꞈ nyi sheˍ.

4. Aˍdanˍ a shu le? Yawˇ aˬ htoꞈ ma gʼa ve le?

⁴ Yaˬhoˉvaˬ Aˍdanˍ hawˉ hkʼaˆ awˉ lawˉ htaꞈ te hpanˍ htaˇ, awˬ hpfuhˇ hkʼaˆ ve teˇ ceuˬ piˇ ve yoˬ. Oˇ ve lehˬ biˇ ve a shaꞈ hpehꞈ ve yoˬ. Aˍdanˍ awˬ to leh dawˇ hkʼaˇ biˇ ve yoˬ. Yawˇ lehˬ maˇ naˬ maˇ gawˬ, maˇ mawˇ, maˇ suh puiˉ. Yaˬhoˉvaˬ Aˍdanˍ htaꞈ hpanˍ taˍ ve pa taw, yawˇ lehˬ Aˍdanˍ ve awˬ pa hkʼa shuˍ hpehꞈ ve yoˬ. (Luˉkaꞈ 3:38) Yaˬhoˉvaˬ yawˇ geh hkʼaˬ htaˆ kaꞈ tawˇ yaw daꞈ chehˇ ve yoˬ. Gʼuiˬ sha Aˍdanˍ htaꞈ aˬ htoꞈ ma te tcuh gaˇ ve hkʼa tawˍ lehˆ kʼoˆ piˇ leh, Aˍdanˍ ha lehˬ tuˬ kanˉ piˇ ve yoˬ.—Awˬ hkuiˉ puiˍ 1:28-30; 2:16, 17.

5. Liꞈ hpu hkʼaw kʼoˆ ve Aˍdanˍ htaꞈ ‘Gʼuiˬ sha ve awˬ hoꞈ awˬ han’ hkʼa shuˍ hpanˍ taˍ ve aˬ htoꞈ ma kʼoˆ gaˇ ve le?

⁵ Aˍdanˍ htaꞈ ‘Gʼuiˬ sha ve awˬ hoꞈ awˬ han’ hkʼa shuˍ te hpanˍ taˍ ve yoˬ. (Awˬ hkuiˉ puiˍ 1:27) Kʼoˆ gaˇ ve lehˬ, Aˍdanˍ Yaˬhoˉvaˬ htaꞈ shuˍ ve laiˉ ceuˬ cawˬ ve yoˬ. Tawˇ pa haˉ te kʼo, haꞈ pehnˇ ve, cuˇ yiˍ, hteˇ ve cawˇ ve, kanˇ paˆ chi teˇ hpaˍ hpehꞈ ve yoˬ. Aˍdanˍ yawˇ hkʼaˇ yawˇ leuˆ yuˬ gʼa tuˬ, Gʼuiˬ sha a hkaw˗anˬ piˇ ve yoˬ. Aˍdanˍ lehˬ caꞈ hkʼeun hkʼa shuˍ hpehꞈ ve maˇ heˆ. Gʼuiˬ sha yawˇ cawˇ maˇ cawˇ ve htaꞈ leuˆ yuˬ puiˉ tuˬ hpanˍ taˍ ve yoˬ. Aˍdanˍ Gʼuiˬ sha hkawˇ na yuˬ tuˬ leuˆ yuˬ ve kʼo, Paˍraˍdiˇsuˆ hkʼaw co co taiˍ taiˍ gʼa chehˇ ve yoˬ.

6. Aˍdanˍ Gʼuiˬ sha hkawˇ maˇ na yuˬ ve teˇ yanˇ, yawˇ aˬ htoꞈ ma shonˇ kʼai ve le? Ngaˬ hui htaꞈ hkʼaˬ hkʼe heuˆ la ve le?

⁶ Aˍdanˍ Gʼuiˬ sha hkawˇ maˇ na yuˬ ve teˇ yanˇ, yawˇ suh tuˬ Gʼuiˬ sha suhˉ jehˬ piˇ ve yoˬ. Yawˇ lehˬ awˬ hpfuhˇ hkʼaˆ jaˇ ve awˬ ceuˬ shonˇ kʼai ve yoˬ. Yawˇ Yaˬhoˉvaˬ htaꞈ meuˆ daꞈ maˇ gʼa, biˇ ve a shaꞈ maˇ cawˬ, Paˍraˍdiˇsuˆ hkʼaw maˇ gʼa chehˇ. (Awˬ hkuiˉ puiˍ 3:17-19) Aˍdanˍ Eˇvaꞈ Gʼuiˬ sha hkawˇ maˇ na yuˬ tuˬ leuˆ yuˬ ve pa taw, yawˇ hui teꞈ chiˉ dawˇ law kuiˬ maˇ cawˬ. Aˍdanˍ te ve awˬ ceuˬ htaꞈ pa taw, “miˬ guiˬ hkʼoˆ lo venˇ baˆ loꞈ la leh, venˇ baˆ htaꞈ pa taw suh ve teˇ ceuˬ cawˬ la ve yoˬ. Hkʼe te leh, chaw hkʼa peu˗eˬ venˇ baˆ te peuˬ ve pa taw, chaw hkʼa peu˗eˬ awˬ hkʼoˆ htaꞈ suh ve teˇ ceuˬ gaˬ la ve yoˬ.” (Roˉmaꞈ 5:12) Aˍdanˍ venˇ baˆ te ve teˇ yanˇ, yawˇ awˬ to leh ngaˬ hui htaꞈ kaꞈ venˇ baˆ leh suh ve awˬ ceˬ hpehꞈ tuˬ hawˇ piˇ ve yoˬ. (Roˉmaꞈ 7:14) Ngaˬ hui dawˇ law kuiˬ cawˬ sheˍ laˇ? Cawˬ sheˍ ve yoˬ.

7, 8. Htaiˍ hkʼawꞈ ve tcuhˉ kuiˬ aˬ htoꞈ ma le?

⁷ Htaiˍ hkʼawꞈ ve tcuhˉ kuiˬ aˬ htoꞈ ma le? Chi htaꞈ caˉ daꞈ ve 2 ceuˬ cawˬ ve yoˬ. (1) Htaiˍ hkʼawꞈ ve lehˬ chaw teˇ gʼaˇ htaꞈ hpehˇ laˇ tuˬ, maˇ heˆ leh mawˇ teˇ ceuˬ ceuˬ vuiˬ hkʼawꞈ tuˬ awˬ hpfuhˇ hpehꞈ ve yoˬ. (2) Htaiˍ hkʼawꞈ ve lehˬ, mawˇ luˬ kʼai ve shaiˍ piˇ tuˬ awˬ hpfuhˇ hpehꞈ ve yoˬ.

⁸ Aˍdanˍ venˇ baˆ te ve pa taw, ngaˬ hui gʼa suh ve yoˬ. Aˍdanˍ te shonˇ kʼai taˍ ve htaꞈ chaw yaˇ teˇ gʼaˇ kaꞈ vuiˬ hkʼawꞈ laˇ maˇ gʼa. Yaꞈ hkʼaˇ, venˇ baˆ leh suh ve htaꞈ ngaˬ hui ponˬ tuˬ awˬ hkʼaˇ Yaˬhoˉvaˬ gu teh taˍ laˇ ve yoˬ. Hkʼaˬ hkʼe htaiˍ hkʼawꞈ laˇ ve le? Ngaˬ hui aˬ htoꞈ ma awˬ bon gʼa ve le? Teˇ geh henˇ sheˍ.

Htaiˍ hkʼawꞈ ve Yaˬhoˉvaˬ hkʼaˬ hkʼe gu teh taˍ ve le?

9. Htaiˍ hkʼawꞈ gʼa tuˬ aˬ htoꞈ ma gʼa cawˬ ve le?

⁹ Aˍdanˍ biˇ ve a shaꞈ te luˬ kʼai taˍ ve htaꞈ chaw teˇ gʼaˇ kaꞈ htaiˍ hkʼawꞈ laˇ maˇ gʼa. Aˬ htoꞈ ma pa taw le? Awˬ lawn kʼo, teˇ gʼaˇ le le maˇ biˇ ve chaw hpehꞈ ve yoˬ. (Chiˇ mvuh ve 49:7, 8) Htaiˍ hkʼawꞈ gʼa tuˬ biˇ ve chaw teˇ gʼaˇ gʼa cawˬ ve yoˬ. (1 Tiˆmoˉseˍ 2:6) Aˍdanˍ te luˬ kʼai taˍ ve a shaꞈ gʼa hkʼawꞈ tuˬ, awˬ hpfuhˇ hkʼa ma˗ehˬ ve gʼa htaiˍ hkʼawꞈ ve yoˬ.

10. Htaiˍ hkʼawꞈ ve Yaˬhoˉvaˬ hkʼaˬ hkʼe gu teh taˍ ve le?

¹⁰ Htaiˍ hkʼawꞈ ve chi Yaˬhoˉvaˬ hkʼaˬ hkʼe gu teh taˍ ve le? Yaˬhoˉvaˬ lehˬ awˬ hpfuhˇ hkʼaˆ jaˇ ve Yaˇ paˍ miˬ guiˬ hkʼoˆ peu laˇ ve yoˬ. Yaˇ paˍ chi teˇ gʼaˇ lehˬ Yeˍsuˆ yoˬ. Gʼuiˬ sha yawˇ htaꞈ awˉ lawˉ te hpanˍ ve yoˬ. (1 Yoˇhanˬ 4:9, 10) Mvuhˇ naw ma hkʼoˆ ve chehˇ kuiˬ leh Awˬ pa htaꞈ gʼa hpaˆ daꞈ ve htawˇ, Yeˍsuˆ ha lehˬ ve hkʼaw yaꞈ la ve yoˬ. (Hpiˇliˇpiˆ 2:7) Yaˬhoˉvaˬ Yeˍsuˆ ve a shaꞈ htaꞈ miˬ guiˬ hkʼoˆ jiˆ yaꞈ la leh Yeˍsuˆ paw la htaˇ, yawˇ venˇ baˆ maˇ cawˬ leh biˇ ve chaw hpehꞈ ve yoˬ.—Luˉkaꞈ 1:35.

11. Chaw teˇ gʼaˇ hkʼaˬ hkʼe te chaw hkʼa peu˗eˬ htaꞈ htaiˍ hkʼawꞈ laˇ gʼa ve le?

¹¹ Aˍdanˍ chaw yaˇ awˉ lawˉ teˇ gʼaˇ Yaˬhoˉvaˬ hkawˇ maˇ na yuˬ ve yoˬ. Hkʼe te leh, chaw yaˇ hkʼa peu˗eˬ biˇ ve a shaꞈ ma cawˬ ve yoˬ. Aˍdanˍ ve awˬ yaˇ awˬ duˬ suh ve htaꞈ te mehˉ laˇ gʼa tuˬ, teˇ gʼaˇ gʼaˇ cawˬ˗aw laˇ? Cawˬ ve yoˬ. (Roˉmaꞈ 5:19 gʼaw ve.) Chaw oˇ ve lehˬ Yeˍsuˆ yoˬ. Yeˍsuˆ venˇ baˆ maˇ te jaw, yawˇ biˇ ve a shaꞈ htaiˍ hkʼawꞈ laˇ ve yoˬ. (1 Kawˇrenˍhtuˆ 15:45) Yawˇ biˇ ve a shaꞈ peꞈ laˇ ve pa taw, Aˍdanˍ ve awˬ yaˇ awˬ duˬ suh ve htaꞈ te mehˉ laˇ gʼa ve yoˬ.—1 Kawˇrenˍhtuˆ 15:21, 22.

12. Aˬ htoꞈ ma pa taw Yeˍsuˆ gʼa tuꞈ hkanˍ jaˇ ve le?

¹² Yeˍsuˆ maˇ suh sheˍ htaˇ, hkʼaˬ hkʼe taw gʼa tuꞈ hkanˍ ve Liꞈ hpu hkʼaw kʼoˆ taˍ ve yoˬ. Shu yawˇ htaꞈ jawꞈ piˇ ve, suhˆ hkuiˉ daw hkʼoˆ htaꞈ keu piˇ ve, tuꞈ hkanˍ suh ve yoˬ. (Yoˇhanˬ 19:1, 16-18, 30) Aˬ htoꞈ ma pa taw Yeˍsuˆ gʼa tuꞈ hkanˍ jaˇ ve le? Awˬ lawn kʼo, Saˍtanˍ kʼoˆ ve chaw yaˇ tuꞈ hkanˍ jaˇ ve htaꞈ gʼa hpuˇ ve teˇ yanˇ, chaw teˇ gʼaˇ kaꞈ Gʼuiˬ sha htaꞈ ka tiꞈ yeˬ tuˬ ve maˇ heˆ. Yaꞈ hkʼaˇ, biˇ ve chaw hehnˇ chaweh lawˇ nyi ve htaꞈ gʼa hpu htaˇ, Gʼuiˬ sha htaꞈ ka tiꞈ yeˬ chehˇ gʼa sheˍ tehꞈ Yeˍsuˆ te gʼa peuˬ. Yaˬhoˉvaˬ hkʼaˬ hkʼe taw ha lehˬ jaˇ ve dawˇ nyi sheˍ!—Tawˇ naˉ ve 27:11; Kʼoˆ maˍ ve awˬ lawn 15 htaꞈ nyi sheˍ.

13. Htaiˍ hkʼawꞈ ve awˬ hpfuhˇ hkʼaˬ hkʼe te piˇ ve le?

¹³ Htaiˍ hkʼawꞈ ve awˬ hpfuhˇ hkʼaˬ hkʼe te piˇ ve le? Yeˍsuˆ yawˇ ve a shaꞈ Awˬ pa htaꞈ chiˇ aꞈ piˇ ve yoˬ. Yuˇdaꞈ chaw ha pa liꞈ hkʼaw 33 hkʼawꞈ Niˆsanˍ ha pa 14 nyi htaˇ, Yaˬhoˉvaˬ Yeˍsuˆ ve canˇ paˍ yawˇ htaꞈ tiˇ pehˍ tcuh ve yoˬ. (Heˍbrehˇ 10:10) Shehˆ nyi hkʼawꞈ nawˉ, Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ ve yoˬ. Yaꞈ hkʼaˇ, chaw yaˇ ve awˬ to maˇ heˆ, awˬ ha ve awˬ to hpehꞈ ve yoˬ. Yeˍsuˆ lehˬ mvuhˇ naw ma hkʼoˆ Awˬ pa geh kʼoꞈ˗e leh htaiˍ hkʼawꞈ tuˬ, biˇ ve chaw a shaꞈ Yaˬhoˉvaˬ htaꞈ chiˇ aꞈ piˇ ve yoˬ. (Heˍbrehˇ 9:24) Chi lehˬ htaiˍ hkʼawꞈ laˇ peuˬ. Ngaˬ hui venˇ baˆ leh suh ve htaꞈ ponˬ ve yoˬ.—Roˉmaꞈ 3:23, 24 gʼaw ve.

Htaiˍ hkʼawꞈ ve htaꞈ pa taw, nawˬ aˬ htoꞈ ma awˬ bon gʼa ve le?

14, 15. Venˇ baˆ htaꞈ hpehˇ laˇ gʼa tuˬ, ngaˬ hui aˬ htoꞈ ma te cawˇ ve le?

¹⁴ Gʼuiˬ sha ve daꞈ jaˇ ve laꞈ shawnˍ htaꞈ pa taw, ngaˬ hui awˬ bon gʼa chehˇ ve yoˬ. Chi teˇ hkui leh awˬ gʼuˇ suhˍ hpawˇ awˬ bon chi ve htaꞈ gʼa tuˬ, hkʼaˬ hkʼe gʼa te ve le? Teˇ geh nyi sheˍ.

¹⁵ Ngaˬ hui ve venˇ baˆ htaꞈ hpehˇ laˇ ve. Hkʼaˬ htaˆ kaꞈ cawˇ ve te tuˬ haˍ jaˇ ve yoˬ. Teˇ pawˆ pawˆ kʼo, ngaˬ hui tawˇ yaw ve leh te hkʼaˇ te yaꞈ ve yoˬ. (Kawˇlawˇsehˇ 1:13, 14) Ngaˬ hui ve venˇ baˆ htaꞈ hkʼaˬ hkʼe te hpehˇ laˇ gʼa ve le? Ngaˬ hui te yaꞈ htaˇ, awˬ tehˬ awˬ na nyi ma luˬ jaˇ ve kʼo, nyi ma nuˇ nehˬ te leh Yaˬhoˉvaˬ geh venˇ baˆ htaꞈ hpehˇ laˇ tuˬ gʼa lawˬ cawˇ ve yoˬ. Chi hkʼe te ve kʼo, ngaˬ hui ve venˇ baˆ htaꞈ hpehˇ laˇ ve yoˬ tehꞈ yonˍ gʼa ve yoˬ.—1 Yoˇhanˬ 1:8, 9.

16. Daꞈ ve dawˇ shiˍ puiˉ ve nyi ma cawˬ tuˬ, ngaˬ hui aˬ htoꞈ ma gʼa te ve le?

¹⁶ Ngaˬ hui daꞈ ve dawˇ shiˍ puiˉ ve nyi ma cawˬ gʼa ve. Ngaˬ hui te yaꞈ ve yoˬ tehꞈ dawˇ shiˍ puiˉ ve nyi ma shoꞈ shaꞈ laˇ ve kʼo, nyi ma luˬ ve, dawˇ law kuiˬ maˇ cawˬ, ngaˬ hui teꞈ chiˉ awˬ bon maˇ cawˬ tehꞈ dawˇ la tuˬ yoˬ. Yaꞈ hkʼaˇ, awˬ gʼaˇ taˇ nuˇ. Ngaˬ hui ve venˇ baˆ htaꞈ hpehˇ laˇ tuˬ Yaˬhoˉvaˬ geh lawˬ ve kʼo, yawˇ na yuˬ laˇ ve yoˬ tehꞈ yonˍ gʼa ve yoˬ. (Heˍbrehˇ 9:13, 14) Ngaˬ hui dawˇ haˍ leh awˬ gʼaˇ nuˇ ve teˇ yanˇ, Yaˬhoˉvaˬ geh tawˇ yaw daꞈ gʼa ve yoˬ. (Heˍbrehˇ 4:14-16) Chi hkʼe te kʼo, ngaˬ hui Gʼuiˬ sha geh dawˇ sha gaˇ sha gʼa ve yoˬ.

17. Yeˍsuˆ ngaˬ hui awˬ pon hkanˍ suh laˇ ve pa taw, aˬ htoꞈ ma awˬ bon gʼa tuˬ le?

¹⁷ Ngaˬ hui co co taiˍ taiˍ a shaꞈ dawˇ law kuiˬ cawˬ ve. “Venˇ baˆ te leh gʼa ve awˬ hpfuhˇ lehˬ, suh ve teˇ ceuˬ yoˬ. Yaꞈ hkʼaˇ, Gʼuiˬ sha ngaˬ hui htaꞈ hkʼe leˇ peꞈ laˇ ve awˬ bon lehˬ, ngaˬ hui ve Jawˇmawˇ Yeˍsuˆ Hkriꞈ htaꞈ pa taw, co co taiˍ taiˍ teꞈ ve teˇ ceuˬ yoˬ.” (Roˉmaꞈ 6:23) Yeˍsuˆ ngaˬ hui awˬ pon hkanˍ suh laˇ ve pa taw, ngaˬ hui co co taiˍ taiˍ a shaꞈ leh chehˇ sha cawˬ sha cawˬ gʼa ve yoˬ. (Hpeuꞈ maˍ ve 21:3, 4) Yaꞈ hkʼaˇ, awˬ bon oˇ ve htaꞈ gʼa tuˬ, ngaˬ hui aˬ htoꞈ ma te cawˇ ve le?

Htaiˍ hkʼawꞈ ve htaꞈ nawˬ haꞈ yuˬ tuˬ laˇ?

18. Yaˬhoˉvaˬ ngaˬ hui htaꞈ haꞈ ve yoˬ tehꞈ, hkʼaˬ hkʼe te shiˍ ve le?

¹⁸ Chaw teˇ gʼaˇ daꞈ jaˇ ve laꞈ shawnˍ nawˬ htaꞈ peꞈ laˇ ve kʼo, nawˬ hkʼaˬ hkʼe taw ha lehˬ ve dawˇ nyi sheˍ. Htaiˍ hkʼawꞈ ve lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ leh, Yaˬhoˉvaˬ htaꞈ ngaˬ hui nyi ma awˬ tawˬ hkʼa gaˬ chiˇ mvuh gaˇ ve yoˬ. Yoˇhanˬ liꞈ 3:16 hkʼaw kʼoˆ ve, “Gʼuiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ.” Yaˬhoˉvaˬ ngaˬ hui htaꞈ haꞈ jaˇ ve pa taw, awˬ hpfuhˇ hkʼaˆ jaˇ ve yawˇ ve Yaˇ paˍ Yeˍsuˆ ngaˬ hui geh peu laˇ ve yoˬ. Yeˍsuˆ kaꞈ ngaˬ hui htaꞈ haꞈ ve pa taw, yawˇ ha lehˬ ve hkʼaw ngaˬ hui awˬ pon hkanˍ suh laˇ ve yoˬ. (Yoˇhanˬ 15:13) Htaiˍ hkʼawꞈ ve laꞈ shawnˍ lehˬ Yaˬhoˉvaˬ leh Yeˍsuˆ ngaˬ hui htaꞈ awˬ tehˬ awˬ na haꞈ ve hpeuꞈ maw laˇ ve awˬ hkʼaˇ hpehꞈ ve yoˬ tehꞈ yonˍ cawˇ ve yoˬ.—Gaˍlaˍtiˆ 2:20.

19, 20. (a) Nawˬ Yaˬhoˉvaˬ htaꞈ awˬ chawˇ te gʼa tuˬ, hkʼaˬ hkʼe gʼa te ve le? (b) Yeˍsuˆ htaiˍ hkʼawꞈ laˇ ve htaꞈ haꞈ yuˬ tuˬ, nawˬ hkʼaˬ hkʼe gʼa te ve le?

¹⁹ Gʼuiˬ sha nawˬ htaꞈ hkʼaˬ ma haꞈ ve nawˬ gʼa henˇ kʼai peuˬ ve yoˬ. Nawˬ yawˇ htaꞈ awˬ chawˇ te gʼa tuˬ, hkʼaˬ hkʼe gʼa te ve le? Maˇ shiˍ daꞈ ve chaw htaꞈ haꞈ tuˬ maˇ sha ve yoˬ. Yoˇhanˬ liꞈ 17:3 hkʼaw kʼoˆ ve, ngaˬ hui Yaˬhoˉvaˬ htaꞈ shiˍ daꞈ hpehꞈ ve yoˬ. Nawˬ chi hkʼe te ve kʼo, nawˬ yawˇ htaꞈ haꞈ maˇ la tuˬ, yawˇ nyi hkʼaˇ suh tuˬ te piˇ gaˇ leh, nawˬ yawˇ htaꞈ awˬ chawˇ te tuˬ yoˬ. Hkʼe te leh, Yaˬhoˉvaˬ ve awˬ lawn shiˍ maˇ la tuˬ Liꞈ hpu henˇ tcuhˉ taˍ˗oꞈ.—1 Yoˇhanˬ 5:3.

²⁰ Yeˍsuˆ htaiˍ hkʼawꞈ laˇ ve htaꞈ haꞈ yuˬ ve. Liꞈ hpu hkʼaw kʼoˆ ve, “Yaˇ hpu htaꞈ yonˍ ve chaw lehˬ, co tiꞈ ha tiꞈ cawˬ ve yoˬ.” (Yoˇhanˬ 3:36) Yonˍ ve chi teˇ ceuˬ aˬ htoꞈ ma kʼoˆ gaˇ ve le? Yeˍsuˆ maˍ laˇ ve hkʼe ngaˬ hui gʼaꞈ te ve htaꞈ kʼoˆ gaˇ ve yoˬ. (Yoˇhanˬ 13:15) Ngaˬ hui Yeˍsuˆ htaꞈ yonˍ ve kʼoˆ ve ceh tiˉ maˇ lawꞈ. Ngaˬ hui htaiˍ hkʼawꞈ laˇ ve htaꞈ haꞈ yuˬ tuˬ, teˇ ceuˬ ceuˬ gʼa te ve yoˬ. Yaˍkoˆ liꞈ 2:26 hkʼaw kʼoˆ ve, “yonˍ ve teˇ ceuˬ htawˇ kanˉ maˇ te ve kʼo, suh taˍ ve yoˬ.”

21, 22. (a) Aˬ htoꞈ ma te Yeˍsuˆ suh ve htaꞈ dawˇ nawˇ tuˬ hpawnˬ daꞈ ve ngaˬ hui teˇ hkʼawꞈ le le kʼai cawˇ ve le? (b) Awˬ lawn 6 leh 7 hkʼaw aˬ htoꞈ ma henˇ tuˬ le?

²¹ Yeˍsuˆ suh ve htaꞈ dawˇ nawˇ tuˬ hpawnˬ daꞈ kuiˬ lo kʼai ve. Yeˍsuˆ maˇ suh sheˍ teˇ haˉ htaˇ, yawˇ suh ve htaꞈ dawˇ nawˇ tuˬ te˗o tehꞈ, yawˇ ngaˬ hui htaꞈ maˍ laˇ ve yoˬ. Ngaˬ hui teˇ hkʼawꞈ le le te ve yoˬ. Hpawnˬ daꞈ ve chi lehˬ Yeˍsuˆ suh ve htaꞈ dawˇ nawˇ tuˬ hpawnˬ daꞈ ve maˇ heˆ kʼo, ‘Jawˇmawˇ ve mvuhˇ haˉ caˇ tuˬ’ tehꞈ kʼoˆ ve yoˬ. (1 Kawˇrenˍhtuˆ 11:20; Maꞈhtehˍ 26:26-28) Yeˍsuˆ biˇ ve a shaꞈ htaiˍ hkʼawꞈ laˇ ve yoˬ tehꞈ, yawˇ ngaˬ hui htaꞈ dawˇ nawˇ tcuh gaˇ ve yoˬ. Yawˇ kʼoˆ ve, “ngaˬ htaꞈ dawˇ nawˇ tuˬ chi hkʼe te˗o.” (Luˉkaꞈ 22:19 gʼaw ve.) Yeˍsuˆ suh ve htaꞈ dawˇ nawˇ tuˬ hpawnˬ daꞈ kuiˬ lo kʼai ve teˇ yanˇ, Yaˬhoˉvaˬ leh Yeˍsuˆ ve haꞈ pehnˇ ve leh htaiˍ hkʼawꞈ laˇ ve htaꞈ dawˇ nawˇ ve yoˬ tehꞈ, nawˬ hpeuꞈ maw piˇ gʼa ve yoˬ.—Kʼoˆ maˍ ve awˬ lawn 16 htaꞈ nyi sheˍ.

²² Htaiˍ hkʼawꞈ ve lehˬ daꞈ jaˇ ve laꞈ shawnˍ hpehꞈ ve yoˬ. (2 Kawˇrenˍhtuˆ 9:14, 15) Awˬ hpfuhˇ hkʼaˆ jaˇ ve laꞈ shawnˍ chi htaꞈ suh peuˬ ve chaw laiˉ lanˬ gʼaˇ htaꞈ kaꞈ ga piˇ gʼa tuˬ yoˬ. Chi lehˬ awˬ lawn 6 leh 7 hkʼaw henˇ tuˬ yoˬ.