Bon lawˬ ve awˬ hpfuhˇ hkʼaˆ jaˇ ve awˬ vuiˬ

1, 2. (a) Aˬ htoꞈ ma te bon lawˬ ve awˬ hpfuhˇ hkʼaˆ jaˇ ve awˬ vuiˬ hpehꞈ ve le? (b) Liꞈ hpu hkʼaw bon lawˬ ve awˬ lawn hkʼaˬ hkʼe kʼoˆ taˍ ve htaꞈ aˬ htoꞈ ma te ngaˬ hui shiˍ cawˇ ve le?

Mvuhˇ naw ma htaꞈ tehˆ ve kʼo, miˬ guiˬ lehˬ i jaˇ ve yoˬ. Yaˬhoˉvaˬ miˬ guiˬ hkʼoˆ nyi ve teˇ yanˇ, chaw ceuˬ teˇ hpaˍ i jaˇ ve pfuhˇ kʼoˍ hkʼaw iˉ kaˆ teˇ jaˆ ceh tiˉ shuˍ ve yoˬ. (Chiˇ mvuh ve 115:15; Iˉsaˍyaˆ 40:15) Mvuhˇ naw ma htaꞈ tehˆ ve kʼo, ngaˬ hui i jaˇ ve htawˇ, Chiˇ mvuh ve liꞈ 145:18, 19 hkʼaw kʼoˆ ve, ‘Yaˬhoˉvaˬ htaꞈ kuˬ ve chaw hui awˬ paˇ lo yawˇ chehˇ taˍ ve yoˬ. Yawˇ htaꞈ yawˆ yan ve chaw hui htaꞈ yawˇ hui loˍ ve hkʼe yawˇ piˇ chehˇ ve yoˬ. Yawˇ hui kuˬ hkawˇ htaꞈ yawˇ na yuˬ leh ponˬ piˇ ve yoˬ.’ Ngaˬ hui lehˬ awˬ hpfuhˇ hkʼaˆ jaˇ ve awˬ vuiˬ cawˬ ve yoˬ! Kanˇ paˆ uiˍ ve Hpanˍ shehˍ hpaˇ Yaˬhoˉvaˬ ngaˬ hui awˬ paˇ lo chehˇ gaˇ leh ngaˬ hui bon lawˬ hkawˇ htaꞈ kaꞈ na yuˬ gaˇ ve yoˬ. Bon lawˬ ve teˇ ceuˬ lehˬ Yaˬhoˉvaˬ geh laˬ ve awˬ hpfuhˇ hkʼaˆ jaˇ ve awˬ vuiˬ leh daꞈ ve laꞈ shawnˍ hpehꞈ ve yoˬ.

² Yaꞈ hkʼaˇ, ngaˬ hui bon lawˬ ve teˇ yanˇ, Yaˬhoˉvaˬ ve a loˍ cawˇ ve ceh tiˉ yawˇ na yuˬ laˇ tuˬ yoˬ. Hkʼaˬ hkʼe le? Awˬ lawn chi ve htaꞈ Liꞈ hpu hkʼaw hkʼaˬ hkʼe kʼoˆ taˍ ve teˇ geh nyi sheˍ.

Aˬ htoꞈ ma te Yaˬhoˉvaˬ geh bon lawˬ cawˇ ve le?

3. Aˬ htoꞈ ma te Yaˬhoˉvaˬ geh bon lawˬ cawˇ ve le?

³ Yaˬhoˉvaˬ nawˬ htaꞈ yawˇ geh bon lawˬ tcuh gaˇ ve yoˬ. Ngaˬ hui hkʼaˬ hkʼe te shiˍ ve le? Hpiˇliˇpiˆ liꞈ 4:6, 7 gʼaw sheˍ. Hkʼaˬ ma ha lehˬ tuˬ cawˬ ve le dawˇ nyi sheˍ. Uiˍ jaˇ mvuh jaˇ ve mvuhˇ naw ma htaꞈ Hpanˍ shehˍ hpaˇ Yaˬhoˉvaˬ lehˬ nawˬ htaꞈ awˬ tehˬ awˬ na a yeˇ yuˬ laˇ leh, nawˬ hkʼaˬ hkʼe dawˇ ve, aˬ htoꞈ ma gʼa hpuˇ ve awˬ lawn yawˇ htaꞈ kʼoˆ piˇ tcuh gaˇ ve yoˬ.

4. Yaˬhoˉvaˬ geh hkʼaˬ htaˆ kaꞈ bon lawˬ ve kʼo, nawˬ yawˇ htaꞈ meuˆ daꞈ maˇ laˇ tuˬ hkʼaˬ hkʼe ga laˇ gʼa ve le?

⁴ Bon lawˬ ve lehˬ Yaˬhoˉvaˬ htaꞈ meuˆ daꞈ tuˬ ga laˇ ve yoˬ. Awˬ chawˇ geh hkʼaˬ htaˆ kaꞈ tawˇ yaw daꞈ chehˇ ve kʼo, yawˇ dawˇ haˍ ve dawˇ hkʼaˇ htaꞈ gʼa shiˍ leh meuˆ daꞈ maˇ la ve yoˬ. Chi lehˬ Yaˬhoˉvaˬ geh bon lawˬ ve hkʼa shuˍ yoˬ. Yaˬhoˉvaˬ Liꞈ hpu htaꞈ cuˇ leh yawˇ hkʼaˬ hkʼe dawˇ ve nawˬ htaꞈ shiˍ tcuh laˇ ve yoˬ. Awˬ gʼuˇ shuˍ hpawˇ yawˇ aˬ htoꞈ ma te tuˬ kʼoˆ laˇ ve yoˬ. Nawˬ kaꞈ nyi ma hkʼaw hkʼaˬ hkʼe dawˇ ve Yaˬhoˉvaˬ htaꞈ kʼoˆ maˍ piˇ hpehꞈ ve yoˬ. Yaˬhoˉvaˬ geh hkʼaˬ htaˆ kaꞈ bon lawˬ ve kʼo, nawˬ yawˇ htaꞈ meuˆ daꞈ maˇ laˇ tuˬ yoˬ.—Yaˍkoˆ 4:8.

Ngaˬ hui ve bon lawˬ hkawˇ htaꞈ Gʼuiˬ sha na yuˬ laˇ tuˬ hkʼaˬ hkʼe gʼa te ve le?

5. Yaˬhoˉvaˬ teˇ gʼaˇ le le ve bon lawˬ hkawˇ htaꞈ na yuˬ ve maˇ heˆ tehꞈ, ngaˬ hui hkʼaˬ hkʼe te shiˍ hpehꞈ ve le?

⁵ Yaˬhoˉvaˬ chaw teˇ gʼaˇ le le ve bon lawˬ hkawˇ htaꞈ na yuˬ˗aw laˇ? Maˇ na yuˬ. Tcuh kaˍ paˍ Iˉsaˍyaˆ awˬ co˗e htaˇ, Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui bon hkʼaˬ ma lawˬ ve htawˇ, ngaˬ na yuˬ laˇ tuˬ ve maˇ heˆ. Awˬ lawn kʼo, nawˬ hui ve laꞈ sheh lehˬ, venˇ baˆ htaꞈ pa taw chaꞈ chiˆ kʼai peuˬ.” (Iˉsaˍyaˆ 1:15) Ngaˬ hui htawˇ shaˍ tiꞈ gʼa te ve yoˬ. Shaˍ tiꞈ maˇ te kʼo, ngaˬ hui Yaˬhoˉvaˬ maˇ dawˇ cawˇ ve awˬ ceuˬ te la gʼa leh yawˇ ngaˬ hui bon lawˬ hkawˇ htaꞈ maˇ na yuˬ.

6. Aˬ htoꞈ ma te yonˍ ve cawˬ tuˬ loˍ ve le? Nawˬ yonˍ ve htaꞈ hkʼaˬ hkʼe te shu gʼa shiˍ tuˬ le?

⁶ Ngaˬ hui ve bon lawˬ hkawˇ htaꞈ Yaˬhoˉvaˬ na yuˬ laˇ tcuh gaˇ ve kʼo, yawˇ htaꞈ gʼa yonˍ ve yoˬ. (Maˍkuˆ 11:24) Tcuh yaˇ Pawˇluꞈ kʼoˆ ve, “chaw yaˇ lehˬ, yonˍ ve teˇ ceuˬ maˇ cawˬ ve kʼo, Gʼuiˬ sha nyi hkʼaˇ suh tuˬ te maˇ gʼa. Awˬ lawn kʼo, Gʼuiˬ sha geh jiˆ kʼai ve chaw lehˬ, Gʼuiˬ sha cawˬ ve htaꞈ maˇ kʼoˆ, yawˇ htaꞈ ca ve chaw hui htaꞈ awˬ bon piˇ ve htaꞈ maˇ kʼoˆ, yawˇ gʼa yonˍ ve yoˬ.” (Heˍbrehˇ 11:6) Yaꞈ hkʼaˇ, yonˍ ve ceh maˇ lawꞈ, teˇ nyi le le yawˇ ve hkawˇ htaꞈ na yuˬ ve yoˬ tehꞈ, gʼa te tawˆ la ve yoˬ.—Yaˍkoˆ 2:26 gʼaw ve.

7. (a) Ngaˬ hui Yaˬhoˉvaˬ geh bon lawˬ htaˇ, aˬ htoꞈ ma te nyi ma nuˇ nehˬ te leh yawˆ yan piˇ cawˇ ve le? (b) Nyi ma awˬ tawˬ hkʼa gaˬ bon lawˬ ve yoˬ tehꞈ, hkʼaˬ hkʼe te tawˆ la gʼa tuˬ le?

⁷ Ngaˬ hui Yaˬhoˉvaˬ geh bon lawˬ htaˇ, nyi ma nuˇ nehˬ te leh yawˆ yan piˇ cawˇ ve yoˬ. Aˬ htoꞈ ma pa taw le? Dawˇ nyi sheˍ. Jawˇmawˇ geh tawˇ yaw daꞈ htaˇ, yawˆ yan ve awˬ hkʼaw lo yaw ve maˇ heˆ laˇ? Yaˬhoˉvaˬ lehˬ Kanˇ paˆ uiˍ jaˇ mvuh jaˇ ve Gʼuiˬ sha hpehꞈ ve yoˬ. Ngaˬ hui yawˇ geh tawˇ yaw daꞈ htaˇ, jawˇ mawˇ geh tawˇ yaw daꞈ ve aꞈ kehˉ nyi ma nuˇ nehˬ te leh yawˆ yan cawˇ ve yoˬ. (Awˬ hkuiˉ puiˍ 17:1; Chiˇ mvuh ve 138:6) Chi hkʼoˆ kaꞈ, Yaˬhoˉvaˬ geh bon lawˬ htaˇ nyi ma awˬ tawˬ hkʼa gaˬ dawˇ ve awˬ lawn yawˇ htaꞈ kʼoˆ piˇ cawˇ ve yoˬ. Tawnˇ gʼaw ve maˇ te cawˇ.—Maꞈhtehˍ 6:7, 8.

8. Ngaˬ hui teˇ ceuˬ ceuˬ bon lawˬ ve kʼo, aˬ htoꞈ ma gʼa te ve le?

⁸ Ngaˬ hui bon teˇ ceuˬ ceuˬ lawˬ ve hkʼe, ngaˬ hui ve te hkʼaˇ dawˇ hkʼaˇ hawˍ daꞈ tuˬ, gʼa coˇ caˇ ve yoˬ. Tawˇ pa haˉ te kʼo, teˇ nyi le le a shaꞈ teꞈ kuiˬ lo loˍ ve htaꞈ Yaˬhoˉvaˬ geh bon lawˬ htaˇ, ngaˬ hui teꞈ chiˉ maˇ te htawˇ, yawˇ peꞈ laˇ ve yoˬ tehꞈ maˇ dawˇ nyi cawˇ leh bawˬ ve taˇ cawˬ piˇ. Yaꞈ hkʼaˇ, kaiˬ ve chaw hpehꞈ leh kanˉ maˇ leuˆ cawˇ ve yoˬ. (Maꞈhtehˍ 6:11; 2 Hteˇsaˍlawˇniˆ 3:10) Maˇ heˆ kʼo, ngaˬ hui maˇ gʼa te yaꞈ tuˬ, Yaˬhoˉvaˬ geh bon lawˬ ve kʼo, ngaˬ hui beˬ ve lawˇ ve cawˬ kuiˬ lo jaw kʼai cawˇ ve yoˬ. (Kawˇlawˇsehˇ 3:5) Chi teˇ hkui bon lawˬ hkawˇ htaꞈ caˉ daꞈ ve na hkawˇ chaw laiˉ gʼaˇ shiˍ gaˇ ve htaꞈ teˇ geh nyi sheˍ.

Bon lawˬ hkawˇ htaꞈ caˉ daꞈ ve na hkawˇ teˇ hpaˍ

9. Ngaˬ hui a shu geh bon lawˬ cawˇ ve le? Yoˇhanˬ liꞈ 14:6 awˬ hkʼaw lo bon lawˬ ve awˬ lawn hkʼaˬ hkʼe maˍ laˇ ve le?

⁹ Ngaˬ hui a shu geh bon lawˬ cawˇ ve le? “Mvuhˇ naw ma hkʼoˆ chehˇ ve ngaˬ hui ve Awˬ pa” geh bon lawˬ˗oꞈ tehꞈ, Yeˍsuˆ awˬ laꞈ gʼawˇ htaꞈ maˍ piˇ ve yoˬ. (Maꞈhtehˍ 6:9) Yawˇ kʼawꞈ kʼoˆ ve, “ngaˬ lehˬ yaꞈ kʼaw yoˬ. Hteˇ ve cawˇ ve teˇ ceuˬ kaꞈ, co ha teꞈ ve teˇ ceuˬ kaꞈ hpehꞈ ve yoˬ. Ngaˬ htaꞈ maˇ cuˇ kʼo, chaw teˇ gʼaˇ kaꞈ Awˬ pa geh gaˬ maˇ hpehꞈ.” (Yoˇhanˬ 14:6) Hkʼe te leh, Yeˍsuˆ ve awˬ meh awˬ hkʼaw lo Yaˬhoˉvaˬ teˇ gʼaˇ tiˉ geh bon lawˬ cawˇ ve yoˬ. Chi kʼoˆ gaˇ ve lehˬ, Yaˬhoˉvaˬ Yeˍsuˆ htaꞈ daꞈ jaˇ ve aˉ yaˇ piˇ taˍ ve htaꞈ taˍ uiˍ taˍ mvuh piˇ ve yoˬ. Chi hkʼe te ve kʼo, ngaˬ hui ve bon lawˬ hkawˇ htaꞈ Yaˬhoˉvaˬ na yuˬ tuˬ yoˬ. Chaw yaˇ ve venˇ baˆ leh suh ve htaꞈ htaiˍ hkʼawꞈ laˇ tuˬ Yeˍsuˆ miˬ guiˬ hkʼoˆ laˬ ve yoˬ tehꞈ, ngaˬ hui henˇ kʼai peuˬ. (Yoˇhanˬ 3:16; Roˉmaꞈ 5:12) Chi hkʼoˆ kaꞈ, ngaˬ hui ve venˇ baˆ htaꞈ hpehˇ laˇ tuˬ, Yaˬhoˉvaˬ Yeˍsuˆ htaꞈ paw hkuˇ ve aˉ yaˇ piˇ leh suhˉ jehˬ shehˍ hpaˇ te tcuh ve yoˬ.—Yoˇhanˬ 5:22; Heˍbrehˇ 6:20.

10. Bon lawˬ htaˇ hkʼaˬ hkʼe te cawˇ ve le? Aˬ htoꞈ ma pa taw le?

¹⁰ Bon lawˬ htaˇ hkʼaˬ hkʼe te cawˇ ve le? Ngaˬ hui bon lawˬ htaˇ hkui tcuhˉ teh ve, mui ve, huˉ taˍ ve, Yaˬhoˉvaˬ yawˇ maˇ kʼoˆ laˇ ve yoˬ. Liꞈ hpu hkʼaw kʼoˆ ve, Yaˬhoˉvaˬ geh bon lawˬ htaˇ hkʼaˬ hkʼe te kaꞈ hpehꞈ ve yoˬ. Yaꞈ hkʼaˇ, yawˆ yan ve teˇ ceuˬ gʼa hpehꞈ piˇ ve yoˬ. (1 Raˍsaˍvanˍ 17:16; Neˍhaˍmiˆ 8:6; Daˍyeˍlaˆ 6:10; Maˍkuˆ 11:25) Yaˬhoˉvaˬ mehˆ gʼuˇ suhˍ a yeˇ uiˍ jaˇ ve teˇ ceuˬ lehˬ ngaˬ hui ve nyi ma hkʼaw cawˬ ve awˬ ceuˬ yoˬ. Ngaˬ hui bon lawˬ ve awˬ hkawˇ tawˆ ve, nyi ma hkʼaw ceh lawˬ ve kaꞈ hpehꞈ ve yoˬ. Bon hkʼaˬ kaˬ lo leh hkʼaˬ htaˆ lawˬ ve kaꞈ hpehꞈ ve yoˬ. Ngaˬ hui Yaˬhoˉvaˬ geh bon lawˬ ve teˇ yanˇ, shu maˇ kaˇ htawˇ yawˇ kaˇ ve yoˬ.—Neˍhaˍmiˆ 2:1-6.

11. Ngaˬ hui aˬ htoꞈ ma awˬ lawn lawˬ hpehꞈ ve le?

¹¹ Ngaˬ hui aˬ htoꞈ ma awˬ lawn lawˬ hpehꞈ ve le? Yaˬhoˉvaˬ nyi ma cawˇ ve kʼo, ngaˬ hui aˬ htoꞈ ma kaꞈ lawˬ hpehꞈ ve yoˬ. Liꞈ hpu hkʼaw kʼoˆ ve, “yawˇ ve a loˍ cawˇ ve hkʼe ngaˬ hui teˇ ceuˬ ceuˬ lawˬ ve kʼo, yawˇ na yuˬ tuˬ yoˬ.” (1 Yoˇhanˬ 5:14) Ngaˬ hui a shu yawˇ ve awˬ lawn lawˬ hpehꞈ˗aw laˇ? Hpehꞈ ve yoˬ. Yaˬhoˉvaˬ geh bon lawˬ ve lehˬ awˬ chawˇ meuˆ daꞈ ve geh tawˇ yaw daꞈ ve hkʼe hpehꞈ cawˇ ve yoˬ. Nyi ma hkʼaw cawˬ ve awˬ lawn hkʼa peu˗eˬ ngaˬ hui Yaˬhoˉvaˬ htaꞈ kʼoˆ piˇ gʼa ve yoˬ. (Chiˇ mvuh ve 62:8) Cawˇ ve htaꞈ te gʼa tuˬ, Gʼuiˬ sha geh awˬ ha hpu lawˬ gʼa ve yoˬ. (Luˉkaꞈ 11:13) Chi hkʼoˆ kaꞈ, cawˇ ve htaꞈ dawˇ cheˆ gʼa tuˬ, Yaˬhoˉvaˬ geh cuˇ yiˍ lawˬ gʼa leh tuꞈ ve hkanˍ ve htaꞈ yeunˇ hkanˍ gʼaˇ tuˬ, awˬ gʼaˇ kaꞈ lawˬ gʼa ve yoˬ. (Yaˍkoˆ 1:5) Ngaˬ hui ve venˇ baˆ htaꞈ hpehˇ laˇ tuˬ, Yaˬhoˉvaˬ geh lawˬ cawˇ ve yoˬ. (Eˇfeˇsuˆ 1:3, 7) Shu awˬ pon kaꞈ lawˬ piˇ cawˇ ve yoˬ. Yehˬ kʼa hkʼaw ve chaw leh awˬ viˉ awˬ nyi Hkriꞈ yaˇ awˬ moˍ awˬ pon lawˬ piˇ gʼa ve yoˬ.—Tcuh yaˇ 12:5; Kawˇlawˇsehˇ 4:12.

12. Ngaˬ hui bon lawˬ ve awˬ hkʼaw lo a yeˇ uiˍ jaˇ ve aˬ htoꞈ ma awˬ lawn le?

¹² Ngaˬ hui bon lawˬ ve awˬ hkʼaw lo a yeˇ uiˍ jaˇ ve aˬ htoꞈ ma awˬ lawn le? Yaˬhoˉvaˬ ve awˬ lawn leh yawˇ ve a loˍ yoˬ. Yawˇ ngaˬ hui htaꞈ te laˇ ve teˇ ceuˬ le le awˬ bon uiˍ jaˇ tehꞈ kʼoˆ piˇ cawˇ ve yoˬ. (1 Raˍsaˍvanˍ 29:10-13) Chi hkʼe kʼoˆ tuˬ a yeˇ uiˍ jaˇ. Awˬ lawn kʼo, Yeˍsuˆ miˬ guiˬ hkʼoˆ chehˇ htaˇ bon chi hkʼe lawˬ tuˬ, yawˇ awˬ laꞈ gʼawˇ htaꞈ maˍ piˇ ve yoˬ. (Maꞈhtehˍ 6:9-13 gʼaw ve) Yawˇ kʼoˆ ve, chaw teˇ gʼaˇ le le mehˆ gʼuˇ suhˍ Gʼuiˬ sha ve awˬ meh htaꞈ yawˆ yan te tuˬ, awˉ lawˉ bon lawˬ cawˇ ve yoˬ. Chi hkʼoˆ kaꞈ, Gʼuiˬ sha ve mvuhˇ miˬ uˉ peunˍ la tuˬ leh miˬ guiˬ hkʼoˆ yawˇ ve a loˍ biˇ la tuˬ, bon gʼa lawˬ ve yoˬ. A yeˇ uiˍ ve chi teˇ hpaˍ htaꞈ bon lawˬ peuˬ hkʼawꞈ nawˉ, ngaˬ hui loˍ ve awˬ ceuˬ htaꞈ kaꞈ lawˬ hpehꞈ ve yoˬ tehꞈ, Yeˍsuˆ kʼoˆ ve yoˬ. Ngaˬ hui Yaˬhoˉvaˬ ve awˬ lawn leh yawˇ ve a loˍ awˉ lawˉ bon lawˬ ve teˇ yanˇ, aˬ htoꞈ ma teˇ ceuˬ a yeˇ uiˍ jaˇ ve hpeuꞈ maw piˇ ve yoˬ.

13. Ngaˬ hui bon lawˬ ve hkʼaˬ hkʼe taw zuhˬ cawˇ ve le?

¹³ Ngaˬ hui bon lawˬ ve hkʼaˬ hkʼe taw zuhˬ cawˇ ve le? Liꞈ hpu hkʼaw maˇ kʼoˆ laˇ taˍ. Ngaˬ hui bon lawˬ ve zuhˬ ve ngeh ve kaꞈ cawˬ ve yoˬ. Tawˇ pa haˉ te kʼo, awˍ maˇ caˇ sheˍ htaˇ, bon chi suhˉ˗ehˍ lawˬ ve yoˬ. Ngaˬ hui Yaˬhoˉvaˬ htaꞈ chiˇ mvuh gaˇ ve maˇ heˆ leh dawˇ haˍ dawˇ hkiˉ ve kʼoˆ piˇ gaˇ ve kʼo, zuhˬ chaweh kaꞈ lawˬ gʼa ve yoˬ. (1 Saˍmo˗eˍlaˆ 1:12, 15) Yaꞈ hkʼaˇ, Yeˍsuˆ awˬ co˗e htaˇ chaw teˇ hpaˍ te ve hkʼa shuˍ, shu dawˇ cawˇ laˇ tuˬ bon zuhˬ chaweh lawˬ ve ngaˬ hui maˇ te gaˇ. (Luˉkaꞈ 20:46, 47) Oˇ hkʼe te lawˬ ve htaꞈ Yaˬhoˉvaˬ maˇ dawˇ cawˇ. Yaˬhoˉvaˬ awˬ pon a yeˇ uiˍ ve bon lawˬ ve lehˬ nyi ma hkʼaw tawˆ la ve te ceuˬ hpehꞈ ve yoˬ.

14. Ngaˬ hui bon hkʼaˬ nyiˇ pawˆ lawˬ cawˇ ve le? Awˬ lawn chi ve Yaˬhoˉvaˬ ve awˬ lawn hkʼaˬ hkʼe maˍ laˇ ve le?

¹⁴ Ngaˬ hui bon hkʼaˬ nyiˇ pawˆ lawˬ cawˇ ve le? Yaˬhoˉvaˬ geh hkʼaˬ htaˆ kaꞈ bon lawˬ˗oꞈ tehꞈ yawˇ kuˬ laˇ ve yoˬ. Liꞈ hpu hkʼaw kʼoˆ ve, ngaˬ hui “bon lawˬ leh shaw taˍ˗oꞈ.” Leh “bon lawˬ tcuhˉ taˍ˗oꞈ.” (Maꞈhtehˍ 26:41; Roˉmaꞈ 12:12; 1 Hteˇsaˍlawˇniˆ 5:17) Yaˬhoˉvaˬ hkʼaˬ htaˆ kaꞈ na yuˬ laˇ gaˇ ve yoˬ. Yawˇ ve haꞈ pehnˇ ve leh yawˇ teˇ ceuˬ le le peꞈ laˬ ve pa taw, ngaˬ hui teˇ nyi le le yawˇ htaꞈ awˬ bon uiˍ jaˇ tehꞈ, kʼoˆ piˇ gʼa ve yoˬ. Ngaˬ hui awˬ gʼaˇ, beˆ maˍ laˇ hkawˇ, nyi ma sha tuˬ loˍ ve teˇ yanˇ, yawˇ geh bon lawˬ gʼa ve yoˬ. Yaˬhoˉvaˬ geh bon lawˬ ve teˇ ceuˬ awˬ hpfuhˇ hkʼaˆ ve awˬ vui hpehꞈ ve tehꞈ dawˇ ve kʼo, hkʼaˬ htaˆ kaꞈ bon lawˬ cawˇ ve yoˬ.

15. Bon lawˬ peuˬ htaˇ, aˬ htoꞈ ma te “a menˬ” tehꞈ kʼoˆ cawˇ ve le?

¹⁵ Bon lawˬ peuˬ htaˇ, aˬ htoꞈ ma te “a menˬ” tehꞈ kʼoˆ cawˇ ve le? “A menˬ” kʼoˆ ve tcuhˉ kuiˬ lehˬ “awˬ tehˬ awˬ na oˇ hkʼe hpehꞈ piˇ˗oˆ.” Ngaˬ hui a menˬ kʼoˆ htaˇ, nyi ma hkʼaw tawˆ la ve bon lawˬ ve hkʼe hpehꞈ piˇ˗oˆ tehꞈ kʼoˆ gaˇ ve yoˬ. (Chiˇ mvuh ve 41:13) Liꞈ hpu hkʼaw kʼoˆ ve, chaw teˇ gʼaˇ ngaˬ hui awˬ pon bon lawˬ laˇ ve kʼo, bon lawˬ ve hkʼe hpehꞈ tuˬ awˬ hkawˇ tawˆ ve maˇ kʼoˆ, nyi ma hkʼaw ceh kʼoˆ ve maˇ kʼoˆ, “a menˬ” tehꞈ kʼoˆ cawˇ ve yoˬ.—1 Raˍsaˍvanˍ 16:36; 1 Kawˇrenˍhtuˆ 14:16.

Ngaˬ hui ve bon lawˬ hkawˇ htaꞈ Gʼuiˬ sha hkʼawꞈ laˇ ve awˬ hkʼaˇ

16. Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ˗aw laˇ? Kʼoˆ maˍ laˇ sheˍ.

¹⁶ Ngaˬ hui ve bon lawˬ hkawˇ htaꞈ Yaˬhoˉvaˬ hkʼawꞈ laˇ˗aw laˇ? Hkʼawꞈ laˇ ve yoˬ. Liꞈ hpu hkʼaw kʼoˆ ve, Yaˬhoˉvaˬ lehˬ “bon lawˬ hkawˇ htaꞈ na yuˬ laˇ ve yoˬ.” (Chiˇ mvuh ve 65:2) Chaw laiˉ lanˬ gʼaˇ nyi ma awˬ tawˬ hkʼa gaˬ bon lawˬ htaˇ, Yaˬhoˉvaˬ na yuˬ ve yoˬ. Yawˇ hui htaꞈ hkʼawꞈ piˇ tuˬ, yawˇ laiˉ hkʼaˇ yehˇ ve yoˬ.

17. Yaˬhoˉvaˬ mvuhˇ naw ma tcuh yaˇ leh miˬ guiˬ hkʼoˆ yawˇ ve kanˉ te ve chaw htaꞈ cuˇ leh bon lawˬ hkawˇ htaꞈ hkʼaˬ hkʼe hkʼawꞈ laˇ ve le?

¹⁷ Yaˬhoˉvaˬ mvuhˇ naw ma tcuh yaˇ leh yawˇ ve kanˉ te ve chaw htaꞈ cuˇ leh bon lawˬ hkawˇ htaꞈ hkʼawꞈ laˇ ve yoˬ. (Heˍbrehˇ 1:13, 14) Chaw laiˉ gʼaˇ Liꞈ hpu hkʼa dehꞈ na gʼa tuˬ, Gʼuiˬ sha htaꞈ shiˍ daꞈ tuˬ, bon lawˬ ve yoˬ. Yawˇ hui bon lawˬ peuˬ hkʼawꞈ nawˉ maˇ maw maw, Yaˬhoˉvaˬ ve Shaˉhkiˆhkanˍ ve chaw laˬ ve yoˬ. Awˬ lawn chi hkʼe ve laiˉ pawˆ hpehꞈ la jaw peuˬ. Liꞈ hpu hkʼaw kʼoˆ ve, miˬ guiˬ hkʼoˆ teˇ kaˬ le le “ha lehˬ ve bon hkawˇ” hto toˇ chehˇ ve htaꞈ mvuhˇ naw ma tcuh yaˇ kaꞈ kanˉ te chehˇ ve yoˬ. (Hpeuꞈ maˍ ve 14:6 gʼaw ve.) Chi hkʼoˆ kaꞈ, ngaˬ hui laiˉ gʼaˇ tuꞈ hkanˍ dawˇ haˍ ve htaꞈ ga laˇ tuˬ, Yaˬhoˉvaˬ geh bon lawˬ jaw ve yoˬ. Maˇ maw maw gaˬ leh awˬ viˉ awˬ nyi Hkriꞈ yaˇ ca ga laˇ ve yoˬ.—Tawˇ naˉ ve 12:25; Yaˍkoˆ 2:16.

18. Yaˬhoˉvaˬ awˬ ha hpu leh Liꞈ hpu htaꞈ cuˇ ve awˬ hkʼaw lo ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le?

¹⁸ Yaˬhoˉvaˬ awˬ ha hpu htaꞈ yehˇ leh ngaˬ hui ve bon lawˬ hkawˇ htaꞈ hkʼawꞈ laˇ ve yoˬ. Ngaˬ hui hpehꞈ bawˬ dawˇ haˍ ve htaꞈ yeunˇ hkanˍ gʼaˇ tuˬ, Yaˬhoˉvaˬ geh bon lawˬ ve teˇ yanˇ, yawˇ awˬ ha hpu htaꞈ yehˇ leh beˆ maˍ laˇ leh awˬ gʼaˇ peꞈ laˇ ve yoˬ. (2 Kawˇrenˍhtuˆ 4:7) Ngaˬ hui bon lawˬ hkawˇ htaꞈ hkʼawꞈ laˇ tuˬ, ngaˬ hui cuˇ yiˍ cawˬ ve awˬ hkʼaw lo dawˇ cheˆ gʼa tuˬ, Yaˬhoˉvaˬ Liꞈ hpu htaꞈ yehˇ leh ga laˇ ve yoˬ. Ngaˬ hui Liꞈ hpu gʼaw ve teˇ yanˇ, hpehꞈ bawˬ dawˇ haˍ ve htaꞈ gu tuˬ, Liꞈ hpu awˬ tawn htaꞈ mawˬ ve yoˬ. Chi hkʼoˆ kaꞈ, Yaˬhoˉvaˬ hpawnˬ daꞈ kuiˬ lo awˬ viˉ awˬ nyi htaꞈ cuˇ leh Liꞈ hpu hkʼaw ve dawˇ hkʼaˇ piˇ tcuh ve yoˬ. Maˇ heˆ leh ngaˬ hui hpehꞈ chehˇ ve htaꞈ cawˇ daꞈ ve awˬ lawn Liꞈ hpu hkʼaw kʼoˆ maˍ laˇ tuˬ, Yaˬhoˉvaˬ nyi haꞈ shaˉ shehˍ hpaˇ htaꞈ cuˇ ve yoˬ.—Gaˍlaˍtiˆ 6:1.

19. Chaw teˇ hpaˍ hpaˍ aˬ htoꞈ ma te Yaˬhoˉvaˬ bon lawˬ hkawˇ htaꞈ maˇ hkʼawꞈ laˇ tehꞈ dawˇ ve le?

¹⁹ Teˇ pawˆ pawˆ ngaˬ hui dawˇ ve, aˬ htoꞈ ma te Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ ve le? Ngaˬ hui ve bon lawˬ hkawˇ htaꞈ hkʼaˬ htaˆ, hkʼaˬ hkʼe hkʼawꞈ laˇ cawˇ ve yawˇ shiˍ ve yoˬ tehꞈ taˇ leunˇ. Ngaˬ hui aˬ htoꞈ ma loˍ ve htaꞈ kaꞈ yawˇ shiˍ ve yoˬ. Ngaˬ hui awˬ tehˬ awˬ na loˍ leh Gʼuiˬ sha htaꞈ awˬ tehˬ awˬ na yonˍ ve htaꞈ yawˇ shiˍ tuˬ, teˇ pawˆ pawˆ kʼo, bon gʼa lawˬ tcuhˉ taˍ ve yoˬ. (Luˉkaꞈ 11:5-10) Teˇ pawˆ pawˆ kʼo, ngaˬ hui dawˇ ve hkʼe Yaˬhoˉvaˬ hkʼawꞈ laˇ ve maˇ heˆ. Tawˇ pa haˉ te kʼo, tuꞈ hkanˍ ve awˬ lawn ngaˬ hui Yaˬhoˉvaˬ geh bon lawˬ ve htawˇ, awˬ lawn chi htaꞈ gu tuˬ yawˇ maˇ ga laˇ. Yaꞈ hkʼaˇ, ngaˬ hui yeunˇ hkanˍ gʼaˇ tuˬ, yawˇ awˬ gʼaˇ peꞈ laˇ ve yoˬ.—Hpiˇliˇpiˆ 4:13 gʼaw ve.

20. Aˬ htoꞈ ma te ngaˬ hui Yaˬhoˉvaˬ geh bon lawˬ tcuhˉ taˍ cawˇ ve le?

²⁰ Yaˬhoˉvaˬ geh bon lawˬ ve lehˬ ngaˬ hui awˬ pon awˬ hpfuhˇ hkʼaˆ ve awˬ vuiˬ hpehꞈ ve yoˬ! Yawˇ na yuˬ laˇ tuˬ yoˬ tehꞈ ngaˬ hui yonˍ gʼa ve yoˬ. (Chiˇ mvuh ve 145:18) Nyi ma awˬ tawˬ hkʼa gaˬ Yaˬhoˉvaˬ geh bon lawˬ tcuhˉ taˍ ve kʼo, yawˇ htaꞈ meuˆ daꞈ maˇ laˇ tuˬ yoˬ.