Bon lawˬ ve lehˬ Gʼuiˬ sha geh meuˆ daꞈ maˇ la tuˬ te laˇ ve

Nawˬ ve a shaꞈ teꞈ hkʼaˇ hkʼaw beˆ maˍ laˇ tuˬ loˍ˗aw laˇ? Nawˬ ve a yeˇ uiˍ ve na hkawˇ htaꞈ hkʼawꞈ laˇ hkawˇ ca gʼa gaˇ˗aw laˇ? Nawˬ htaꞈ awˬ gʼaˇ peꞈ laˇ tuˬ loˍ˗aw laˇ? Nawˬ Yaˬhoˉvaˬ geh meuˆ daꞈ gaˇ˗aw laˇ? Bon lawˬ ve teˇ ceuˬ lehˬ awˬ ceuˬ chi hkʼa peu˗eˬ te gʼa tuˬ ga laˇ ve yoˬ. Yaꞈ hkʼaˇ, bon hkʼaˬ hkʼe lawˬ cawˇ ve le? Teˇ gʼaˇ le le ve bon lawˬ hkawˇ htaꞈ Yaˬhoˉvaˬ na yuˬ˗aw laˇ? Nawˬ ve bon lawˬ hkawˇ htaꞈ Gʼuiˬ sha na yuˬ laˇ tuˬ nawˬ hkʼaˬ hkʼe te tuˬ le? Teˇ geh chaˬ nyi sheˍ.

1. Ngaˬ hui a shu geh bon lawˬ cawˇ ve le? Aˬ htoꞈ ma awˬ lawn lawˬ gʼa ve le?

Yeˍsuˆ maˍ laˇ ve, ngaˬ hui Awˬ pa Gʼuiˬ sha geh ceh tiˉ bon lawˬ cawˇ ve yoˬ. Yeˍsuˆ htawˇ Yaˬhoˉvaˬ geh bon lawˬ ve yoˬ. Yawˇ kʼoˆ ve, “nawˬ hui bon chi hkʼe lawˬ˗oꞈ. ‘Mvuhˇ naw ma hkʼoˆ chehˇ ve ngaˬ hui ve Awˬ pa˗o . . .’” (Maꞈhtehˍ 6:9) Ngaˬ hui Yaˬhoˉvaˬ geh bon lawˬ htaˇ, ngaˬ hui yawˇ geh shaˬ te shaˬ meuˆ daꞈ maˇ la tuˬ yoˬ.

Ngaˬ hui Yaˬhoˉvaˬ geh teˇ ceuˬ le le lawˬ gʼa ve yoˬ. Ngaˬ hui ve bon lawˬ hkawˇ htaꞈ Gʼuiˬ sha hkʼawꞈ laˇ tcuh gaˇ ve kʼo, yawˇ ve a loˍ htaꞈ gʼa hawˍ daꞈ ve yoˬ. Liꞈ hpu hkʼaw kʼoˆ laˇ ve, “yawˇ ve a loˍ cawˇ ve hkʼe ngaˬ hui teˇ ceuˬ ceuˬ lawˬ ve kʼo, yawˇ na yuˬ tuˬ yoˬ.” (1 Yoˇhanˬ 5:14) Ngaˬ hui lawˬ gʼa ve awˬ lawn htaꞈ Yeˍsuˆ kʼoˆ maˍ laˇ ve yoˬ. (Maꞈhtehˍ 6:9-13 gʼaw sheˍ.) A shu yawˇ awˬ pon bon lawˬ ve awˬ hkʼoˆ kaꞈ, ngaˬ hui maˇ leunˇ cawˇ ve lehˬ Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ leh yawˇ shu htaꞈ ga piˇ tuˬ gʼa lawˬ ve yoˬ.

2. Ngaˬ hui bon hkʼaˬ hkʼe lawˬ cawˇ ve le?

Liꞈ hpu hkʼaw ngaˬ hui htaꞈ kʼoˆ laˇ ve, “nawˬ hui ve dawˇ haˍ tuˬ hkʼa peu˗eˬ [Gʼuiˬ sha] htaꞈ hto piˇ˗oˆ.” (Chiˇ mvuh ve 62:8) Ngaˬ hui bon lawˬ htaˇ, nyi ma hkʼaw cawˬ ve hkʼa peu˗eˬ lawˬ gʼa ve yoˬ. Ngaˬ hui nyi ma hkʼaw lawˬ ve, awˬ hkawˇ tawˆ ve, mui ve, huˉ ve, hkʼaˬ hkʼe te kaꞈ hpehꞈ ve yoˬ. Yaꞈ hkʼaˇ, yawˆ yan ve hkʼaw gʼa te ve yoˬ. Leh hkʼaˬ htaˆ kaꞈ, hkʼaˬ kaˬ lo kaꞈ bon lawˬ gʼa ve yoˬ.

3. Ngaˬ hui ve bon lawˬ hkawˇ htaꞈ Gʼuiˬ sha hkʼaˬ hkʼe hkʼawꞈ laˇ ve le?

Bon lawˬ hkawˇ htaꞈ Yaˬhoˉvaˬ laiˉ hkʼaˇ hkʼaw hkʼawꞈ laˇ ve yoˬ. Tawˇ pa haˉ te kʼo, yawˇ Liꞈ hpu htaꞈ yehˇ leh hkʼawꞈ laˇ ve yoˬ. Chiˇ mvuh ve liꞈ 19:7 hkʼaw kʼoˆ ve, Liꞈ hpu gʼaw ve lehˬ “cuˇ yiˍ maˇ cawˬ ve chaw htaꞈ cuˇ yiˍ cawˬ la piˇ ve yoˬ.” (Yaˍkoˆ 1:5 gʼaw sheˍ.) Ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ ngaˬ hui htaꞈ nyi ma gawˬ lehˍ cawˬ tuˬ ga laˇ gʼa ve yoˬ. Yaˬhoˉvaˬ lehˬ yawˇ htaꞈ oˉ kʼoˍ pui ve chaw yehˇ leh ngaˬ hui htaꞈ ga laˇ tcuh gʼa ve yoˬ.

A yeˇ uiˍ ve awˬ lawn

Bon lawˬ ve lehˬ ngaˬ hui Yaˬhoˉvaˬ geh meuˆ daꞈ tuˬ, nyi ma dawˇ sha gaˇ sha cawˬ tuˬ, leh yawˇ ve tawˇ hkawˇ awˬ hkʼaˇ suh gʼaꞈ te gʼa tuˬ ga laˇ ve yoˬ.

Kʼawꞈ gʼaꞈ na ve

• Ngaˬ hui a shu geh bon lawˬ cawˇ ve le?

• Ngaˬ hui bon hkʼaˬ hkʼe lawˬ cawˇ ve le?

• Bon lawˬ ve lehˬ awˬ bon hkʼaˬ hkʼe gʼa ve le?

Kʼawꞈ caˉ nyi gʼa ve

Bon lawˬ ve htaꞈ caˉ daꞈ ve shu na hkʼeh jaˇ ve na hkawˇ htaꞈ hkʼawꞈ laˇ hkawˇ ca ve.

“Bon lawˬ ve htaꞈ caˉ daꞈ ve nawˬ gʼa shiˍ cawˇ ve 7 lawn cawˬ ve” (Shaw nyi kuiˬ Taꞈ yehˬ 2010 hkʼawꞈ ha pa 10 maˬ 1 nyi)

Aˬ htoꞈ ma pa taw bon lawˬ ve lehˬ a yeˇ uiˍ ve le, leh nawˬ bon lawˬ puiˉ la tuˬ hkʼaˬ hkʼe te gʼa ve le, henˇ sheˍ.

“Aˬ htoꞈ ma pa taw ngaˬ bon lawˬ cawˇ ve le?” (Vehˆsaiˉ hkʼaw ve awˬ lawn)

Liꞈ hpu hkʼaw kʼoˆ laˇ ve ngaˬ hui a shu geh bon lawˬ cawˇ ve htaꞈ nyi sheˍ.

“Ngaˬ saˍ laꞈ geh bon lawˬ cawˇ˗aw laˇ?” (Vehˆsaiˉ hkʼaw ve awˬ lawn)

Liꞈ hkawˇ VDO chi hkʼaw, ngaˬ hui hkʼaˬ kaˬ lo leh hkʼaˬ htaˆ htawˇ bon lawˬ gʼa ve tehꞈ maˍ laˇ ve yoˬ.

Hkʼaˬ htaˆ kaꞈ bon lawˬ ve (1:22)