Piˇ ve lehˬ ha lehˬ tuˬ te laˇ ve

1-2. Gʼa ve aꞈ kehˉ piˇ ve lehˬ ha lehˬ ve cawˬ tuˬ Yaˬhoˉvaˬ hpanˍ taˍ laˇ ve hkʼaˬ hkʼe te daꞈ jaˇ ve le?

Yaˬhoˉvaˬ lehˬ, chaw yaˇ htaꞈ gʼa ve aꞈ kehˉ piˇ ve lehˬ ha lehˬ ve cawˬ tuˬ te hpanˍ taˍ laˇ ve yoˬ. (Tcuh yaˇ 20:35) Yaꞈ hkʼaˇ, chi ve lehˬ gʼa ve teˇ ceuˬ le le htaꞈ maˇ ha lehˬ ve tehꞈ kʼoˆ gaˇ ve laˇ? Maˇ heˆ. Ngaˬ hui teˇ gʼaˇ le le kaꞈ laꞈ shawnˍ teˇ ceuˬ ceuˬ gʼa htaˇ ha lehˬ ve yoˬ. Yaꞈ hkʼaˇ, ngaˬ hui piˇ ve chaw hpehꞈ ve kʼo, leuˉ leh ha lehˬ tuˬ te laˇ ve yoˬ. Awˬ tehˬ kʼo, Yaˬhoˉvaˬ ngaˬ hui htaꞈ chi hkʼe hpehꞈ tuˬ hpanˍ taˍ laˇ ve lehˬ, daꞈ jaˇ ve yoˬ. Aˬ htoꞈ ma pa taw le?

² Yaˬhoˉvaˬ ngaˬ hui htaꞈ chi hkʼe hpanˍ taˍ laˇ ve lehˬ, ngaˬ hui a shu yawˇ awˬ to htaꞈ ha lehˬ ve cawˬ tuˬ te laˇ gʼa ve yoˬ. Ngaˬ hui awˬ nu ve chaw htaꞈ daꞈ ve awˬ ceuˬ te piˇ tuˬ awˬ yanˇ ca htaˇ, ngaˬ hui ha lehˬ jaˇ tuˬ te laˇ ve yoˬ. Yaˬhoˉvaˬ ngaˬ hui htaꞈ chi hkʼe hpehꞈ tuˬ hpanˍ taˍ laˇ ve, anˇ tuˬ cawˬ jaˇ ve maˇ heˆ laˇ?—Chiˇ mvuh ve 139:14.

3. Aˬ htoꞈ ma te Yaˬhoˉvaˬ htaꞈ ‘ha lehˬ ve Gʼuiˬ sha’ tehꞈ kʼoˆ gʼa ve le?

³ Liꞈ hpu hkʼaw kʼoˆ ve, piˇ ve lehˬ ngaˬ hui ha lehˬ tuˬ te laˇ ve yoˬ. Hkʼe te leh, Liꞈ hpu hkʼaw Yaˬhoˉvaˬ htaꞈ ‘ha lehˬ ve Gʼuiˬ sha’ tehꞈ kʼoˆ ve ngaˬ hui anˇ tuˬ maˇ loˍ. (1 Tiˆmoˉseˍ 1:11) Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ leh, yawˇ hkʼe leˇ piˇ gʼa ve chaw teˇ gʼaˇ kaꞈ maˇ cawˬ. Tcuh yaˇ Pawˇluꞈ kʼoˆ ve, “ngaˬ hui teꞈ chehˇ ve, hiˆ hiˆ naˇ naˇ te chehˇ ve” yoˬ. (Tcuh yaˇ 17:28) Chi htaꞈ pa taw, ngaˬ hui hkʼa tawˍ lehˆ gʼa mawˬ ve, Yaˬhoˉvaˬ geh “daꞈ ve awˬ bon hkʼa peu˗eˬ leh, biˇ ve laꞈ shawnˍ hkʼa peu˗eˬ” gʼa ve yoˬ.—Yaˍkoˆ 1:17.

4. Piˇ ve lehˬ aˬ htoꞈ ma te ngaˬ hui ha lehˬ tuˬ te laˇ ve le?

⁴ Ngaˬ hui teˇ gʼaˇ le le kaꞈ piˇ ve htaꞈ ha lehˬ ve cawˬ gaˇ ve yoˬ. Yaˬhoˉvaˬ piˇ gaˇ puiˉ ve htaꞈ ngaˬ hui henˇ yuˬ ve kʼo, ha lehˬ ve cawˬ gʼa tuˬ yoˬ. (Eˇfeˇsuꞈ 5:1) Awˬ nu ve chaw ngaˬ hui yawˇ hui awˬ pon te piˇ ve htaꞈ awˬ bon uiˍ hkawˇ maˇ shiˍ ve kʼo, Yaˬhoˉvaˬ piˇ gaˇ puiˉ ve htaꞈ ngaˬ hui teˇ geh henˇ leh, ngaˬ hui aˬ htoꞈ ma te gʼa tuˬ kaꞈ teˇ geh henˇ tuˬ yoˬ. Piˇ ve lehˬ ngaˬ hui ha lehˬ tuˬ te laˇ gʼa ve tehꞈ awˬ lawn chi ve hkʼaw gʼa henˇ ve yoˬ.

YAˬHOˉVAˬ PIˇ GAˇ PUIˉ VE HTAꞈ HENˇ YUˬ SHEˍ

5. Yaˬhoˉvaˬ ngaˬ hui loˍ ve aˬ htoꞈ ma peꞈ laˇ ve le?

⁵ Yaˬhoˉvaˬ ngaˬ hui htaꞈ piˇ laˇ gaˇ puiˉ ve hkʼaˬ hkʼe hpawˇ hpeuꞈ maw laˇ ve le? Teˇ lawn lawn htaꞈ teˇ geh nyi sheˍ. Awˉ lawˉ teˇ ceuˬ lehˬ, Yaˬhoˉvaˬ ngaˬ hui loˍ ve htaꞈ peꞈ laˇ ve yoˬ. Ngaˬ hui mawˇ awˬ hpfuhˇ hkʼaˆ jaˇ ve maˇ cawˬ ve htawˇ, ngaˬ hui loˍ ve laiˉ ceuˬ Yaˬhoˉvaˬ peꞈ laˇ ve yoˬ. Tawˇ pa haˉ te kʼo, caˇ tuˬ, aˉ poꞈ veuꞈ kʼaˇ, leh chehˇ kuiˬ yawˇ ngaˬ hui htaꞈ peꞈ laˇ ve yoˬ. Yaˬhoˉvaˬ chi hkʼe te ve lehˬ, yawˇ gʼa te cawˇ leh te ve tehꞈ dawˇ ve laˇ? Maˇ heˆ. Leh aˬ htoꞈ ma pa taw Yaˬhoˉvaˬ awˬ ceuˬ chi ve teˇ hpaˍ ngaˬ hui awˬ pon te laˇ ve le?

6. Maꞈhtehˍ liꞈ 6:25, 26 hkʼaw ngaˬ hui htaꞈ aˬ htoꞈ ma maˍ laˇ ve le?

⁶ Yaˬhoˉvaˬ ngaˬ hui htaꞈ haꞈ ve pa taw, nyi haꞈ shaˉ laˇ leh loˍ ve awˬ ceuˬ peꞈ laˇ ve yoˬ. Maꞈhtehˍ liꞈ 6:25, 26 hkʼaw Yeˍsuˆ kʼoˆ ve tawˇ hkawˇ htaꞈ chaˬ nyi sheˍ. (Gʼaw sheˍ.) Yeˍsuˆ lehˬ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh tawˇ pa haˉ tehˆ maˍ laˇ ve yoˬ. Tawˇ pa haˉ te kʼo, Yeˍsuˆ ngaˆ htaꞈ kʼoˆ ve, “yawˇ hui lehˬ caˬ maˇ ti, caˬ maˇ gʼeuꞈ leh caˬ ciˇ yehˬ awˬ hkʼaw lo caˬ shiˍ maˇ pfuhˇ keu.” Leh yawˇ hkʼaˬ hkʼe kʼawꞈ kʼoˆ ve htaꞈ nyi sheˍ. Yawˇ kʼoˆ ve, “mvuhˇ naw ma hkʼoˆ chehˇ ve nawˬ hui ve Awˬ pa lehˬ, yawˇ hui htaꞈ caˍ piˇ taw piˇ chehˇ ve yoˬ.” Leh Yeˍsuˆ na hkawˇ na piˇ ve, “nawˬ hui lehˬ, ngaˆ oˇ ve teˇ hpaˍ aꞈ kehˉ awˬ hpfuhˇ hkʼaˆ ve maˇ heˆ laˇ?” Chi a yeˇ uiˍ ve aˬ htoꞈ ma le? Yaˬhoˉvaˬ lehˬ yawˇ ve kanˉ te ve chaw htaꞈ yawˇ hpanˍ taˍ ve, to nuˇ to shaˆ aꞈ kehˉ laiˉ pun awˬ hpfuhˇ hkʼaˆ jaˇ ve tehꞈ shawˍ ve yoˬ. Chi htaꞈ pa taw, Yaˬhoˉvaˬ to nuˇ to shaˆ chi ve teˇ hpaˍ htaꞈ nyi haꞈ shaˉ piˇ ve kʼo, yawˇ ngaˬ hui htaꞈ kaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Yaˬhoˉvaˬ lehˬ awˬ pa haꞈ pehnˇ ve hkʼaw yehˬ kʼa hkʼaw ve chaw htaꞈ nyi haꞈ shaˉ piˇ ve hkʼe, hpehꞈ ve yoˬ.—Chiˇ mvuh ve 145:16; Maꞈhtehˍ 6:32.

7. Yaˬhoˉvaˬ piˇ gaˇ puiˉ ve htaꞈ ngaˬ hui hkʼaˬ hkʼe te henˇ yuˬ gʼa tuˬ le? (Awˬ han htaꞈ nyi sheˍ.)

⁷ Yaˬhoˉvaˬ hkʼa shuˍ shuˍ, ngaˬ hui yawˇ hui htaꞈ haꞈ ve pa taw, yawˇ hui loˍ ve awˬ ceuˬ ngaˬ hui piˇ gʼa ve yoˬ. Tawˇ pa haˉ te kʼo, awˬ viˉ awˬ nyi hkʼaˬ ve teˇ gʼaˇ caˇ tuˬ, maˇ heˆ leh aˉ poꞈ veuꞈ kʼaˇ loˍ ve nawˬ shiˍ˗aw laˇ? Yaˬhoˉvaˬ lehˬ nawˬ htaꞈ cuˇ leh yawˇ hui htaꞈ ga piˇ tcuh ve yoˬ. Yaˬhoˉvaˬ ve chaw piˇ gaˇ puiˉ ve nyi ma cawˬ ve pa taw, a naˍ 19 ve awˬ yanˇ htaˇ, awˬ viˉ awˬ nyi htaꞈ caˇ tuˬ piˇ ve, aˉ poꞈ veuꞈ kʼaˇ piˇ ve, leh loˍ ve chaw htaꞈ awˬ nu ve awˬ ceuˬ kaꞈ piˇ ve yoˬ. Leh laiˉ gʼaˇ kʼo, miˬ guiˬ chi hkʼoˆ lo Gʼuiˬ sha ve kanˉ awˬ pon hpu tanˇ tanˇ piˇ ve yoˬ. Hpu chi ve teˇ hpaˍ lehˬ mvuhˇ yeˬ mvuhˇ haw lonˉ gʼa hpuˇ ve chaw htaꞈ ga piˇ ve yoˬ. Awˬ viˉ awˬ nyi chi ve teˇ hpaˍ Heˍbrehˇ liꞈ 13:16 hkʼaw kʼoˆ taˍ ve hkʼe gʼaꞈ te ve yoˬ. Choˬ kaˬ lo kʼoˆ ve, “daꞈ ve htaꞈ te ve teˇ ceuˬ leh shu htaꞈ mawˇ jeˬ pehˬ piˇ ve teˇ ceuˬ htaꞈ taˇ leunˇ. Awˬ lawn kʼo, chi hkʼe ve tanˇ tuˬ teˇ hpaˍ htaꞈ Gʼuiˬ sha nyi ma cawˇ ve yoˬ.”

8. Yaˬhoˉvaˬ ngaˬ hui htaꞈ awˬ gʼaˇ peꞈ laˇ htaˇ aˬ htoꞈ ma awˬ bon gʼa ve le? (Hpiˇliˇpiˆ 2:13)

⁸ Yaˬhoˉvaˬ ngaˬ hui htaꞈ awˬ gʼaˇ peꞈ laˇ ve. Yaˬhoˉvaˬ yawˇ ve kanˉ te ve chaw htaꞈ awˬ gʼaˇ piˇ ve yawˇ ha lehˬ jaˇ ve yoˬ. (Hpiˇliˇpiˆ 2:13 gʼaw sheˍ.) Nawˬ beˬ ve lawˇ ve htaꞈ tawˍ daꞈ gʼaˇ tuˬ, tuꞈ ve hkanˍ ve htaꞈ yeunˇ hkanˍ gʼaˇ tuˬ, maˇ heˆ leh lawˇ nyi laˇ ve haˍ jaˇ ve htaꞈ yeunˇ hkanˍ gʼaˇ tuˬ kaꞈ nawˬ bon lawˬ jaw˗aw laˇ? Nawˬ oˇ ve teˇ nyi awˬ gʼaˇ cawˬ leh ponˬ kʼai gʼa tuˬ, bon lawˬ jaw ve yoˬ hehˉ. Nawˬ awˬ gʼaˇ cawˬ tuˬ bon lawˬ peuˬ hkʼawꞈ nawˉ, Yaˬhoˉvaˬ nawˬ ve bon lawˬ hkawˇ htaꞈ hkʼawꞈ laˇ ve yoˬ. Tcuh yaˇ Pawˇluꞈ kʼoˆ ve, “ngaˬ htaꞈ awˬ gʼaˇ awˬ shaˉ peꞈ laˇ shehˍ hpaˇ htaꞈ cuˇ ve awˬ hkʼaw lo, hkʼa peu˗eˬ htaꞈ ngaˬ te puiˉ te hpehꞈ ve yoˬ” tehꞈ kʼoˆ ve hkʼa shuˍ, nawˬ kaꞈ dawˇ ve yoˬ hehˉ.—Hpiˇliˇpiˆ 4:13.

9. Ngaˬ hui Yaˬhoˉvaˬ htaꞈ henˇ yuˬ leh ngaˬ hui ve awˬ gʼaˇ awˬ shaˉ htaꞈ yehˇ leh hkʼaˬ hkʼe te shu htaꞈ ga piˇ gʼa tuˬ le? (Awˬ han htaꞈ nyi sheˍ.)

⁹ Yaˬhoˉvaˬ awˬ gʼaˇ awˬ shaˉ peuˬ kuiˬ leh kuiˬ maˇ cawˬ ve hkʼe, ngaˬ hui maˇ cawˬ ve pa taw, ngaˬ hui yawˇ hkʼe leˇ shu htaꞈ awˬ gʼaˇ hkʼa dehꞈ piˇ maˇ gʼa ve yoˬ. Yaꞈ hkʼaˇ, ngaˬ hui Yaˬhoˉvaˬ htaꞈ henˇ yuˬ leh ngaˬ hui ve awˬ gʼaˇ awˬ shaˉ htaꞈ cuˇ leh shu htaꞈ ga piˇ gʼa ve yoˬ. Tawˇ pa haˉ te kʼo, awˬ viˉ awˬ nyi chaw mawˇ, maˇ heˆ leh naˬ chehˇ ve chaw htaꞈ, mawˇ vuiˬ piˇ ve, maˇ heˆ leh aˉ hkʼaw lo ngaˬ hui daꞈ kehˬ tuˬ te piˇ gʼa ve yoˬ. Hpawnˬ daꞈ kuiˬ yehˬ daꞈ kehˬ tuˬ te ve, maˇ heˆ leh nyi haꞈ shaˉ tuˬ ga piˇ gʼa ve yoˬ. Ngaˬ hui ve awˬ gʼaˇ awˬ shaˉ htaꞈ yehˇ leh chi ve teˇ hpaˍ htaꞈ ga piˇ ve kʼo, awˬ nu ve awˬ viˉ awˬ nyi awˬ bon gʼa tuˬ ngaˬ hui ga piˇ gʼa ve yoˬ.

10. Ngaˬ hui ve tawˇ hkawˇ hkʼaˬ hkʼe te shu htaꞈ awˬ gʼaˇ piˇ gʼa tuˬ le?

¹⁰ Ngaˬ hui ve tawˇ hkawˇ shu htaꞈ awˬ gʼaˇ piˇ gʼa ve tehꞈ taˇ leunˇ sheˍ. Nawˬ a shu htaꞈ tawˇ yaw leh awˬ gʼaˇ piˇ gʼa tuˬ dawˇ mawˬ gʼa ve le? Awˬ gʼaˇ gʼa tuˬ loˍ ve nawˬ a shu htaꞈ dawˇ mawˬ gʼa ve le? Nawˬ a shu teˇ gʼaˇ htaꞈ dawˇ mawˬ ve kʼo, nawˬ yawˇ htaꞈ dawˇ haˍ ve tehꞈ kʼoˆ piˇ sheˍ. Nawˬ yawˇ geh ca guiˇ˗e piˇ ve, tawˇ yaw tuˬ awˬ hkʼeun hkʼaw yaw daꞈ ve, liꞈ bvuhꞈ feu piˇ ve, i˗me bvuhꞈ feu piˇ ve, maˇ heˆ leh tawˇ yaw tuˬ awˬ hkʼeun hkʼaw awˬ hkawˇ feu piˇ kaꞈ gʼa ve yoˬ. Nawˬ na sha jaˇ ve tawˇ htaꞈ yaw tuˬ maˇ loˍ. Yawˇ oˇ ve teˇ nyi hkʼaw ka tiꞈ yeˬ gʼa tuˬ, maˇ heˆ leh yawˇ daꞈ ve dawˇ hkʼaˇ cawˬ tuˬ, nawˬ nyi ma hkʼaw tawˆ la ve tawˇ hkawˇ hkʼaˬ nyiˇ hkawˇ maˇ heˆ ve kaꞈ, awˬ viˉ awˬ nyi oˇ ve teˇ gʼaˇ awˬ gʼaˇ gʼa tuˬ loˍ htaˇ ga piˇ gʼa ve yoˬ.—Tawˇ naˉ ve 12:25; Eˇfeˇsuꞈ 4:29.

11. Yaˬhoˉvaˬ ngaˬ hui htaꞈ cuˇ yiˍ hkʼaˬ hkʼe peꞈ laˇ ve le?

¹¹ Yaˬhoˉvaˬ ngaˬ hui htaꞈ cuˇ yiˍ peꞈ laˇ ve. Yaˍkoˆ kʼoˆ ve, “nawˬ hui awˬ hkʼaw lo teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬ sha geh lawˬ˗oꞈ. Gʼuiˬ sha lehˬ, maˇ deˇ leh chaw hkʼa peu˗eˬ htaꞈ maˇ chaweh hkʼe leˇ piˇ ve hkʼa shuˍ shuˍ, cuˇ yiˍ lawˬ ve chaw htaꞈ kaꞈ piˇ tuˬ yoˬ.” (Yaˍkoˆ 1:5) Chi ve teˇ tawn hkʼaw ngaˬ hui gʼa mawˬ ve, Yaˬhoˉvaˬ yawˇ ve cuˇ yiˍ htaꞈ maˇ veh tiˍ taˍ. Yaꞈ hkʼaˇ, yawˇ ngaˬ hui htaꞈ peꞈ laˇ gaˇ ve yoˬ. Chi hkʼoˆ kaꞈ, Yaˬhoˉvaˬ ngaˬ hui htaꞈ cuˇ yiˍ peꞈ laˇ ve htaꞈ chaˬ nyi htaˇ, yawˇ ngaˬ hui htaꞈ “maˇ deˇ” ve yoˬ. Ngaˬ hui yawˇ beˆ maˍ laˇ tuˬ lawˬ htaˇ, ngaˬ hui nyi ma maˇ sha tuˬ yawˇ maˇ te laˇ ve yoˬ. Yaꞈ hkʼaˇ, ngaˬ hui yawˇ beˆ maˍ laˇ tuˬ lawˬ tcuh gaˇ ve yoˬ.—Tawˇ naˉ ve 2:1-6.

12. Ngaˬ hui shiˍ taˍ ve awˬ ceuˬ hkʼaˬ hkʼe te shu htaꞈ maˍ piˇ gʼa tuˬ le?

¹² Hkʼe kʼo, awˬ lawn chi ngaˬ hui Yaˬhoˉvaˬ htaꞈ hkʼaˬ hkʼe te henˇ yuˬ gʼa tuˬ le? (Chiˇ mvuh ve 32:8) Yaˬhoˉvaˬ ve kanˉ te ve chaw yawˇ hui gʼa henˇ taˍ ve awˬ ceuˬ, awˬ nu ve chaw htaꞈ maˍ piˇ tuˬ awˬ hkʼaˇ laiˉ hkʼaˇ cawˬ ve yoˬ. Tawˇ pa haˉ te kʼo, awˬ viˉ awˬ nyi hpehꞈ la gehˇ sheˍ ve chaw htaꞈ hto toˇ ve cheuˬ tuˬ ngaˬ hui maˍ piˇ gʼa ve yoˬ. Nyi haꞈ shaˉ paˍ ga piˇ shehˍ hpaˇ htaꞈ maˍ piˇ gʼa leh awˬ viˉ awˬ nyi hawˉ hkʼaˆ Baˆtiˆsaˬ haꞈ yuˬ˗oˬ ve Hkriꞈ yaˇ awˬ moˍ hkʼaw awˬ vuiˬ te tuˬ kaꞈ awˬ hkʼaˇ maˍ piˇ gʼa ve yoˬ. Chi hkʼoˆ kaꞈ, Gʼuiˬ sha ve kanˉ hkʼaˇ hpawˇ yehˬ te ve chaw, maˇ heˆ leh hpawnˬ daꞈ kuiˬ yehˬ nyi haꞈ shaˉ tuˬ ga piˇ ve cheuˬ ve chaw, Gʼuiˬ sha ve kanˉ hkʼaˇ hkʼaw yehˬ teˇ hpaˍ htaꞈ nyi haꞈ shaˉ tuˬ, awˬ viˉ awˬ nyi htaꞈ maˍ piˇ gʼa ve yoˬ.

13. Ngaˬ hui shu htaꞈ maˍ piˇ htaˇ Yaˬhoˉvaˬ piˇ gaˇ puiˉ ve htaꞈ ngaˬ hui hkʼaˬ hkʼe te henˇ yuˬ gʼa tuˬ le?

¹³ Ngaˬ hui shu htaꞈ hkʼa dehꞈ maˍ piˇ gʼa tuˬ, ngaˬ hui Yaˬhoˉvaˬ htaꞈ gʼa henˇ yuˬ cawˇ ve yoˬ. Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ ve tehꞈ tawnˇ taˍ sheˍ. Chi htaꞈ pa taw, ngaˬ hui shu htaꞈ maˍ piˇ htaˇ ngaˬ hui shiˍ taˍ ve awˬ ceuˬ shu htaꞈ maˍ piˇ gaˇ leh, ngaˬ hui shiˍ taˍ ve awˬ ceuˬ kaꞈ henˇ gaˇ ve chaw htaꞈ maˍ piˇ gaˇ ve yoˬ. Ngaˬ hui maˍ piˇ ve chaw ngaˬ hui awˬ tan te la ve htaꞈ kawˆ ve pa taw, ngaˬ hui shiˍ taˍ ve awˬ ceuˬ maˇ maˍ piˇ gaˇ ve maˇ te gaˇ. Leh ngaˬ hui ‘chaw teˇ gʼaˇ kaꞈ ngaˬ htaꞈ chi hkʼe maˇ maˍ laˇ jaw. Yawˇ hkʼaˇ yawˇ henˇ piˇ.’ Chi hkʼe kaꞈ taˇ dawˇ. Yaˬhoˉvaˬ ve chaw lehˬ chi hkʼe ve dawˇ hkʼaˇ maˇ cawˬ cawˇ ve yoˬ. Chi hkʼe dawˇ ve aꞈ kehˉ ngaˬ hui shiˍ taˍ ve awˬ ceuˬ leh, ngaˬ hui te gʼa ve hkʼe awˬ nu ve chaw htaꞈ ha lehˬ ha kʼa maˍ piˇ gaˇ ve yoˬ. (1 Hteˇsaˍlawˇniˆ 2:8) Chi hkʼoˆ kaꞈ, ngaˬ hui yawˇ htaꞈ maˍ piˇ gaˇ ve lehˬ, yawˇ “shu htaꞈ maˍ piˇ puiˉ” tuˬ ga piˇ ve yoˬ. (2 Tiˆmoˉseˍ 2:1, 2) Ngaˬ hui chi hkʼe te ve kʼo, ngaˬ hui leh ngaˬ hui maˍ piˇ ve chaw kaꞈ cheuˬ leh ha lehˬ jaˇ tuˬ yoˬ.

NGAˬ HUI TE PIˇ VE AWˬ CEUˬ AWˬ NU VE CHAW AWˬ BON UIˍ HKAWˇ MAˇ SHIˍ VE

14. Maˇ˗awˍ ve kʼo, ngaˬ hui awˬ nu ve chaw htaꞈ teˇ ceuˬ ceuˬ te piˇ htaˇ yawˇ hkʼaˬ hkʼe te ve le?

¹⁴ Awˬ viˉ awˬ nyi htaꞈ ngaˬ hui mawˇ piˇ ve, maˇ heˆ leh teˇ ceuˬ ceuˬ te piˇ htaˇ, yawˇ awˬ bon uiˍ jaˇ tehꞈ kʼoˆ laˇ ve yoˬ. Yawˇ awˬ bon uiˍ hkawˇ kʼoˆ laˇ ve lehˬ, liꞈ bvuhꞈ laˇ ve, maˇ heˆ leh awˬ nu ve awˬ hkʼaˇ kaꞈ te laˇ ve yoˬ. (Kawˇlawˇsehˇ 3:15) Ngaˬ hui yawˇ htaꞈ te piˇ ve awˬ ceuˬ awˬ bon uiˍ jaˇ tehꞈ kʼoˆ laˇ htaˇ, chi ngaˬ hui yawˇ htaꞈ ga piˇ ve ha lehˬ jaˇ tuˬ te laˇ ve yoˬ.

15. Awˬ nu ve chaw ngaˬ hui te piˇ ve awˬ ceuˬ htaꞈ awˬ bon uiˍ hkawˇ maˇ shiˍ ve htawˇ, ngaˬ hui aˬ htoꞈ ma htaꞈ tawnˇ taˍ cawˇ ve le?

¹⁵ Teˇ pawˆ pawˆ kʼo, awˬ nu ve chaw ngaˬ hui awˬ yanˇ, awˬ gʼaˇ, maˇ heˆ leh hpu shi mawˇ jeˬ yawˇ hui htaꞈ ga piˇ ve htawˇ, awˬ bon uiˍ jaˇ tehꞈ maˇ kʼoˆ laˇ ve hpehꞈ kʼai gʼa ve yoˬ. Yaꞈ hkʼaˇ, ngaˬ hui yawˇ htaꞈ te piˇ ve awˬ ceuˬ awˬ hpfuhˇ maˇ shiˍ ve kaꞈ hpehꞈ kʼai gʼa ve yoˬ. Chi hkʼe hpehꞈ ve kʼo, ngaˬ hui yawˇ htaꞈ piˇ ve ha lehˬ leh nyi ma maˇ gʼa luˬ tuˬ hkʼaˬ hkʼe te hpehꞈ kʼai gʼa ve le? Tcuh yaˇ liꞈ 20:35 hkʼaw ngaˬ hui ha lehˬ ve lehˬ shu haꞈ yuˬ ve htaꞈ cawˬ ve maˇ heˆ tehꞈ, awˬ lawn chi ve hkʼaw a yeˇ uiˍ ve Liꞈ hpu awˬ tawn htaꞈ tawnˇ taˍ sheˍ. Awˬ nu ve chaw ngaˬ hui te piˇ ve awˬ ceuˬ htaꞈ awˬ bon uiˍ hkawˇ maˇ shiˍ ve htawˇ, ngaˬ hui ha lehˬ gʼa ve yoˬ. Hkʼe kʼo, ngaˬ hui htaꞈ aˬ htoꞈ ma ga laˇ gʼa ve le? Teˇ lawn lawn htaꞈ teˇ geh nyi sheˍ.

16. Ngaˬ hui awˬ nu ve chaw htaꞈ piˇ htaˇ aˬ htoꞈ ma htaꞈ tawnˇ taˍ cawˇ ve le?

¹⁶ Ngaˬ hui Yaˬhoˉvaˬ htaꞈ henˇ yuˬ chehˇ ve tehꞈ tawnˇ taˍ sheˍ. Awˬ hpfuhˇ shiˍ ve, maˇ heˆ leh maˇ shiˍ ve chaw htaꞈ htawˇ maˇ kʼoˆ, Yaˬhoˉvaˬ teˇ gʼaˇ le le htaꞈ daꞈ ve awˬ ceuˬ piˇ chehˇ ve yoˬ. (Maꞈhtehˍ 5:43-48) Yaˬhoˉvaˬ ngaˬ hui htaꞈ ka tiꞈ te laˇ ve, “kʼawꞈ gʼa tuˬ ve htaꞈ maˇ dawˇ law” htaˇ ngaˬ hui “laꞈ shawnˍ uiˍ jaˇ” ve htaꞈ gʼa tuˬ yoˬ. (Luˉkaꞈ 6:35) Chi htaꞈ pa taw, ngaˬ hui te piˇ ve awˬ ceuˬ htaꞈ awˬ nu ve chaw awˬ bon uiˍ hkawˇ maˇ shiˍ ve htawˇ, ngaˬ hui nyi ma maˇ luˬ cawˇ ve yoˬ. Nawˬ awˬ nu ve chaw htaꞈ daꞈ ve te piˇ leh, “ha lehˬ ha kʼa tanˇ piˇ ve” chaw hpehꞈ ve pa taw, Yaˬhoˉvaˬ laꞈ shawnˍ peꞈ laˇ tuˬ yoˬ tehꞈ tawnˇ taˍ sheˍ.—Tawˇ naˉ ve 19:17; 2 Kawˇrenˍhtuˆ 9:7.

17. Piˇ ve lehˬ ngaˬ hui cawˇ ve dawˇ hkʼaˇ cawˬ tuˬ hkʼaˬ hkʼe te gʼa ve le? (Luˉkaꞈ 14:12-14)

¹⁷ Ngaˬ hui Yaˬhoˉvaˬ htaꞈ henˇ yuˬ gʼa ve teˇ hkʼaˇ lehˬ, Luˉkaꞈ liꞈ 14:12-14 hkʼaw Yeˍsuˆ kʼoˆ taˍ ve htaꞈ gʼaꞈ te ve yoˬ. (Gʼaw sheˍ.) Awˬ tehˬ kʼo ngaˬ hui htaꞈ daꞈ ve te hkʼawꞈ laˇ gʼa ve chaw htaꞈ piˇ ve lehˬ yaꞈ ve maˇ heˆ. Yaꞈ hkʼaˇ, ngaˬ hui a shu yawˇ awˬ to htaꞈ chaˬ nyi leh, ngaˬ hui htaꞈ daꞈ ve te hkʼawꞈ laˇ gʼa ve chaw htaꞈ ceh tiˉ piˇ ve kʼo, ngaˬ hui hkʼaˬ hkʼe te tuˬ ve le? Ngaˬ hui Yeˍsuˆ beˆ maˍ laˇ ve htaꞈ gʼaꞈ te cawˇ ve yoˬ. Ngaˬ hui htaꞈ daꞈ ve te hkʼawꞈ laˇ maˇ gʼa ve chaw htaꞈ htawˇ te piˇ cawˇ ve yoˬ. Ngaˬ hui Yaˬhoˉvaˬ htaꞈ henˇ yuˬ ve pa taw, chi ve ngaˬ hui ha lehˬ tuˬ te laˇ ve yoˬ. Ngaˬ hui chi hkʼe te ve kʼo, awˬ nu ve chaw awˬ bon uiˍ hkawˇ shiˍ ve tehꞈ maˇ kʼoˆ laˇ ve htawˇ, ngaˬ hui ha lehˬ gʼa sheˍ ve yoˬ.

18. Ngaˬ hui aˬ htoꞈ ma maˇ te cawˇ ve le? Leh aˬ htoꞈ ma pa taw le?

¹⁸ Awˬ nu ve chaw maˇ daꞈ ve dawˇ hkʼaˇ cawˬ ve tehꞈ ngaˬ hui maˇ dawˇ nyi cawˇ. (1 Kawˇrenˍhtuˆ 13:7) Awˬ nu ve chaw awˬ bon uiˍ hkawˇ maˇ shiˍ ve kʼo, ngaˬ hui a shu yawˇ awˬ to htaꞈ na nyi cawˇ ve, ‘ngaˬ hui te ve awˬ ceuˬ htaꞈ yawˇ awˬ hpfuhˇ maˇ shiˍ ve laˇ, maˇ heˆ leh awˬ bon uiˍ hkawˇ kʼoˆ laˇ tuˬ yawˇ leunˇ˗e ve laˇ?’ Teˇ pawˆ pawˆ kʼo, yawˇ awˬ bon uiˍ hkawˇ kʼoˆ laˇ ve htawˇ, ngaˬ hui dawˇ taˍ ve hkʼe maˇ heˆ ve yoˬ hehˉ. Chaw teˇ hpaˍ kʼo awˬ bon uiˍ hkawˇ kʼoˆ laˇ ve htawˇ, te tawˆ la maˇ haˆ ve yoˬ. Peuˬ laˬ htaˇ yawˇ awˬ nu ve chaw htaꞈ ga piˇ jaw ve kʼo, yawˇ htaꞈ kʼawꞈ ga laˇ tcuh tuˬ yaꞈ taw ve yoˬ hehˉ. Hkʼaˬ hkʼe hpehꞈ ve htawˇ maˇ kʼoˆ, Hkriꞈ yaˇ haꞈ pehnˇ ve lehˬ, awˬ viˉ awˬ nyi ngaˬ hui htaꞈ ga laˇ ve htawˇ dawˇ nawˬ dawˇ maˇ cawˬ tuˬ te laˇ leh, piˇ ve lehˬ ha lehˬ tuˬ te laˇ ve yoˬ.—Eˇfeˇsuꞈ 4:2.

19-20. Awˬ nu ve chaw htaꞈ ngaˬ hui caˉ leh ga piˇ ve ngaˬ hui ha lehˬ tuˬ te laˇ ve aˬ htoꞈ ma cawˬ ve le? (Awˬ han htaꞈ nyi sheˍ.)

¹⁹ Awˬ nu ve chaw awˬ bon uiˍ hkawˇ laꞈ haˉ kʼoˆ laˇ tuˬ taˇ dawˇ law. Jawˇ mawˇ Sawˉlaꞈmonˍ awˬ lawn chi htaꞈ kʼoˆ ve, “ha lehˬ ha kʼa tanˇ piˇ˗oˆ. Awˬ hkʼawꞈ nawˉ kʼo nawˬ awˬ bon kʼawꞈ gʼa tuˬ yoˬ.” (Cuˇ yiˍ piˇ ve 11:1) Chi ve teˇ tawn ngaˬ hui mawˬ tuˬ te laˇ ve lehˬ, chaw teˇ hpaˍ kʼo laiˉ nyi gaˬ˗oˬ htaˇ, ngaˬ hui htaꞈ awˬ bon uiˍ jaˇ tehꞈ kʼoˆ laˇ ve yoˬ. Awˬ lawn chi hkʼe ve awˬ tehˬ hpehꞈ ve teˇ gʼaˇ gʼaˇ ve awˬ lawn htaꞈ teˇ geh nyi sheˍ.

²⁰ Peuˬ laˬ ve laiˉ hkʼawꞈ htaˇ, toˇ nyi shehˍ hpaˇ awˬ miˇ ma teˇ gʼaˇ, awˬ viˉ awˬ nyi yaˇ miˇ Baˆtiˆsaˬ haꞈ yuˬ gehˇ sheˍ ve htaꞈ liꞈ bvuhꞈ piˇ ve yoˬ. Liꞈ oˇ ve hkʼaw yawˇ kʼoˆ ve, Yaˬhoˉvaˬ htaꞈ ka tiꞈ yeˬ tuˬ a yeˇ uiˍ jaˇ. 8 hkʼawꞈ peuˬ hkʼawꞈ nawˉ, awˬ viˉ awˬ nyi yaˇ miˇ oˇ ve teˇ gʼaˇ liꞈ kʼawꞈ bvuhꞈ hkʼawꞈ laˇ ve, “ngaˬ nawˬ htaꞈ kʼoˆ laˇ gaˇ ve, nawˬ ngaˬ htaꞈ hkʼaˬ hkʼe taw ga laˇ gʼa ve nawˬ maˇ shiˍ.”a Yawˇ kʼawꞈ kʼoˆ ve, “nawˬ ngaˬ htaꞈ liꞈ bvuhꞈ laˇ ve ngaˬ nyi ma gawˬ lehˍ ve cawˬ tuˬ te laˇ leh, nawˬ bvuhꞈ laˇ ve Liꞈ hpu awˬ tawn htaꞈ kaꞈ ngaˬ leunˇ maˇ gʼa.” Shoꞈ shaꞈ ve awˬ lawn yawˇ gʼa hpuˇ ve htaꞈ kʼoˆ maˍ laˇ peuˬ hkʼawꞈ nawˉ yawˇ kʼawꞈ kʼoˆ ve, “teˇ pawˆ pawˆ kʼo, ngaˬ yeunˇ hkanˍ maˇ gʼaˇ˗o tehꞈ dawˇ ve yoˬ. Ngaˬ awˬ tehˬ ve hkʼaw tawˆ˗e gaˇ ve kaꞈ dawˇ ve yoˬ. Teꞈ chiˉ kaꞈ maˇ te gaˇ˗o ve tehꞈ dawˇ ve yoˬ. Yaꞈ hkʼaˇ, nawˬ bvuhꞈ laˇ ve Liꞈ hpu awˬ tawn ngaˬ htaꞈ shaˍ tiꞈ peꞈ laˇ leh, ngaˬ ka tiꞈ yeˬ leh 8 hkʼawꞈ ve hkʼaw awˬ gʼaˇ maˇ nuˇ tuˬ te laˇ ve yoˬ. Nawˬ liꞈ bvuhꞈ laˇ ve leh Liꞈ hpu awˬ tawn bvuhꞈ laˇ ve hkʼe taw, ngaˬ htaꞈ awˬ gʼaˇ peꞈ laˇ ve teꞈ chiˉ kaꞈ maˇ cawˬ.” Chi hkʼe te htaˇ, toˇ nyi shehˍ hpaˇ awˬ miˇ ma hkʼaˬ hkʼe taw ha lehˬ ve htaꞈ dawˇ nyi sheˍ. Hkʼaˬ nyiˇ nyi maˇ heˆ, laiˉ hkʼawꞈ peuˬ kʼai˗oˬ ve htawˇ, hkʼa shuˍ hpehꞈ ve yoˬ. Teˇ pawˆ pawˆ kʼo, ngaˬ hui ga piˇ ve chaw peuˬ kʼai maw jaˇ˗oˬ ve htawˇ, awˬ bon uiˍ jaˇ tehꞈ kʼoˆ laˇ sheˍ ve yoˬ.

21. Aˬ htoꞈ ma te nawˬ Yaˬhoˉvaˬ piˇ gaˇ puiˉ ve htaꞈ henˇ yuˬ tuˬ dawˇ teh taˍ ve le?

²¹ Awˬ lawn chi ve hkʼaw tanˬ htaˇ ngaˬ hui gʼa henˇ kʼai˗oˬ ve hkʼa shuˍ, Yaˬhoˉvaˬ lehˬ ngaˬ hui piˇ ve lehˬ gʼa ve aꞈ kehˉ ha lehˬ tuˬ hpanˍ taˍ laˇ ve yoˬ. Ngaˬ hui awˬ viˉ awˬ nyi htaꞈ gʼa ga piˇ ve ha lehˬ tuˬ te laˇ leh, ngaˬ hui awˬ viˉ awˬ nyi htaꞈ te piˇ ve awˬ ceuˬ yawˇ hui awˬ bon uiˍ jaˇ tehꞈ kʼoˆ laˇ ve kʼo, ngaˬ hui leuˉ leh ha lehˬ jaˇ ve yoˬ. Awˬ viˉ awˬ nyi awˬ bon uiˍ jaˇ tehꞈ maˇ kʼoˆ laˇ ve htawˇ, ngaˬ hui cawˇ ve awˬ ceuˬ htaꞈ gʼa te ve ha lehˬ ve yoˬ. Nawˬ awˬ nu ve chaw htaꞈ hkʼaˬ hkʼe ma piˇ ve htawˇ maˇ kʼoˆ, ‘Yaˬhoˉvaˬ nawˬ htaꞈ oˇ ve aꞈ kehˉ leuˉ leh kʼawꞈ piˇ laˇ tuˬ yoˬ’ tehꞈ tawnˇ taˍ sheˍ. (2 Raˍsaˍvanˍ 25:9) Yaˬhoˉvaˬ nawˬ htaꞈ laꞈ shawnˍ peꞈ laˇ tuˬ yoˬ. Leh nawˬ awˬ nu ve chaw htaꞈ piˇ ve aꞈ kehˉ kaꞈ kʼawꞈ peꞈ laˇ tuˬ yoˬ. Yaˬhoˉvaˬ ngaˬ hui htaꞈ peꞈ laˇ htaˇ, chi ve daꞈ jaˇ ve awˬ ceuˬ hpehꞈ leh, ngaˬ hui ha lehˬ jaˇ tuˬ te laˇ ve yoˬ. Chi htaꞈ pa taw, mvuhˇ naw ma hkʼoˆ ngaˬ hui ve Awˬ pa Yaˬhoˉvaˬ piˇ gaˇ puiˉ ve htaꞈ caˉ leh henˇ yuˬ tuˬ dawˇ teh taˍ sheˍ.