Yaˬhoˉvaˬ ve a loˍ awˬ tehˬ biˇ la tuˬ yoˬ!

1, 2. (a) Yaˬhoˉvaˬ ngaˬ hui htaꞈ aˬ htoꞈ ma kʼoˆ maˍ laˇ ve le? (b) Iˉsaˍyaˆ liꞈ 46:10 leh 55:11 hkʼaw aˬ htoꞈ ma ve ka tiꞈ cawˬ taˍ ve le?

“Awˬ hkuiˉ puiˍ htaˇ Gʼuiˬ sha miˬ guiˬ leh mvuhˇ naw ma htaꞈ te hpanˍ ve yoˬ.” Chi lehˬ Liꞈ hpu hkʼaw awˉ lawˉ peuˇ teˇ tawn hpehꞈ ve yoˬ. Leh hkʼa sha sha˗ehˬ ve tawˇ hkawˇ hpehꞈ ve htawˇ hkʼa dehꞈ na gʼa ve yoˬ. (Awˬ hkuiˉ puiˍ 1:1) Gʼuiˬ sha hpanˍ taˍ ve laiˉ ceuˬ mvuhˇ naw ma miˬ naˆ ma hkʼaw ngaˬ hui teˇ ceuˬ ceuˬ ceh gʼa mawˬ ve yoˬ. Leh miˬ guiˬ awˬ baˬ lo ve, awˬ gʼeuˆ, suhˆ cehˬ hawˆ cehˬ ve awˬ liˇ awˬ ceuˬ chi teˇ hpaˍ ngaˬ hui a ciˉ ceh tiˉ shiˍ ve yoˬ. (Cuˇ yiˍ piˇ ve 3:11) Yaꞈ hkʼaˇ, Yaˬhoˉvaˬ ve a loˍ miˬ guiˬ leh chaw yaˇ hkʼaˬ hkʼe hpehꞈ ve yawˇ ngaˬ hui htaꞈ kʼoˆ maˍ laˇ ve yoˬ. Chaw yaˇ yawˇ htaꞈ shuˍ daꞈ ve te hpanˍ leh yawˇ hui miˬ guiˬ hkʼoˆ chehˇ ve ha lehˬ tcuh gaˇ ve yoˬ. (Awˬ hkuiˉ puiˍ 1:16) Gʼuiˬ sha yawˇ hui ve awˬ pa hpehꞈ leh yawˇ hui Gʼuiˬ sha ve yaˇ hpehꞈ ve yoˬ.

² Awˬ hkuiˉ puiˍ kaˇ nanˉ uiˍ 3 hkʼaw Yaˬhoˉvaˬ ve dawˇ law kuiˬ tawˍ ve tsuhˇ ve gʼa hpuˇ ve ngaˬ hui gʼa shiˍ ve yoˬ. (Awˬ hkuiˉ puiˍ 3:1-7) Yaꞈ hkʼaˇ, Yaˬhoˉvaˬ gu maˇ gʼa ve teˇ ceuˬ kaꞈ maˇ cawˬ leh teˇ gʼaˇ kaꞈ yawˇ htaꞈ jehˇ piˇ maˇ gʼa. (Iˉsaˍyaˆ 46:10, 11; 55:11) Awˉ lawˉ peuˇ htaˇ, Yaˬhoˉvaˬ dawˇ law taˍ ve hkʼe awˬ yanˇ cawˇ htaˇ awˬ tehˬ hpehꞈ la ve tehꞈ ngaˬ hui hkʼa dehꞈ yonˍ gʼa ve yoˬ!

3. (a) Liꞈ hpu hkʼaw a yeˇ uiˍ ve awˬ tehˬ ve awˬ lawn aˬ htoꞈ ma cawˬ ve le? (b) Aˬ htoꞈ ma te awˬ lawn chi ngaˬ hui chi teˇ hkui teˇ geh henˇ cawˇ ve le? (c) Aˬ htoꞈ ma ve na hkawˇ htaꞈ ngaˬ hui henˇ tuˬ le?

³ Miˬ guiˬ leh chaw yaˇ Gʼuiˬ sha hkʼaˬ hkʼe dawˇ law taˍ ve ngaˬ hui shiˍ ve yoˬ. Leh Gʼuiˬ sha ve a loˍ biˇ la tuˬ, Yeˍsuˆ a yeˇ uiˍ ve awˬ vuiˬ cawˬ ve ngaˬ hui kaꞈ shiˍ ve yoˬ. Chi a yeˇ uiˍ jaˇ ve awˬ tehˬ hpehꞈ leh Liꞈ hpu tanˬ henˇ htaˇ ngaˬ hui gʼa henˇ ve awˉ lawˉ peuˇ teˇ lawn hpehꞈ ve yoˬ hehˉ. Leh a yeˇ uiˍ ve chi ngaˬ hui shu htaꞈ maˍ piˇ gaˇ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui shu htaꞈ kuˬ piˇ htaˇ, daꞈ ve awˬ yanˇ chi ve ngaˬ hui shu htaꞈ ga piˇ gʼa ve yoˬ. (Luˉkaꞈ 22:19, 20) Hpawnˬ daꞈ ve a yeˇ uiˍ ve chi laˬ ve kʼo, daꞈ jaˇ ve awˬ ceuˬ Gʼuiˬ sha dawˇ law taˍ ve yawˇ hui gʼa shiˍ maˇ la tuˬ yoˬ. Chi htaꞈ pa taw, Yeˍsuˆ suh ve dawˇ nawˇ tuˬ hpawnˬ daꞈ ve shu laˬ gaˇ tuˬ, na hkawˇ teˇ hpaˍ hpaˍ dawˇ nyi ve chi teˇ hkui a yeˇ uiˍ ve awˬ yanˇ hpehꞈ ve yoˬ. Awˬ lawn chi na hkawˇ shehˆ maˬ htaꞈ ngaˬ hui teˇ geh henˇ tuˬ yoˬ. Miˬ guiˬ leh chaw yaˇ htaꞈ Yaˬhoˉvaˬ hkʼaˬ hkʼe hpehꞈ tcuh gaˇ ve le? Gʼuiˬ sha dawˇ law taˍ hkʼe maˇ hpehꞈ ve aˬ htoꞈ ma pa taw le? Leh Yeˍsuˆ htaiˍ hkʼawꞈ ve awˬ hpfuhˇ Gʼuiˬ sha ve a loˍ awˬ tehˬ hpehꞈ la ve hkʼaˬ hkʼe biˇ la ve le?

Te hpanˍ shehˍ hpaˇ ve dawˇ law kuiˬ aˬ htoꞈ ma le?

4. Gʼuiˬ sha hpanˍ taˍ ve awˬ ceuˬ ‘yawˇ ve awˬ meꞈ awˬ hponˇ htaꞈ hkʼaˬ hkʼe hpeuꞈ maˍ laˇ’ ve le?

⁴ Yaˬhoˉvaˬ anˇ lawꞈ lawꞈ ve hpanˍ shehˍ hpaˇ hpehꞈ ve yoˬ. Yawˇ hpanˍ taˍ ve teˇ ceuˬ le le daꞈ jaˇ ve yoˬ. (Awˬ hkuiˉ puiˍ 1:31; Yeˍraˍmiˆ 10:12) Yawˇ hpanˍ taˍ ve awˬ ceuˬ daꞈ jaˇ leh hteˇ˗ehˍ shawˇ˗ehˍ hpehꞈ ve, ngaˬ hui aˬ htoꞈ ma henˇ gʼa ve le? Ngaˬ hui henˇ gʼa ve, uiˍ ve maˇ kʼoˆ i ve maˇ kʼoˆ yawˇ hpanˍ taˍ ve hkʼa peu˗eˬ awˬ bon cawˬ ve yoˬ. Chaw yaˇ ve she˗o leh paw la guiˇ sheˍ ve yaˇ ehˉ, maˇ heˆ leh daꞈ jaˇ ve mvuhˇ nyi loꞈ˗e ve nawˬ mawˬ htaˇ, nawˬ hkʼaˬ hkʼe dawˇ ve le? Ngaˬ hui dawˇ cawˇ jaˇ ve yoˬ. Awˬ lawn kʼo, Yaˬhoˉvaˬ ngaˬ hui htaꞈ hpanˍ htaˇ, yawˇ aˬ htoꞈ ma awˬ tehˬ daꞈ ve ngaˬ hui shiˍ tcuh laˇ ve yoˬ.—Chiˇ mvuh ve 19:1; 104:24 gʼaw ve.

5. Yaˬhoˉvaˬ hpanˍ taˍ ve teˇ ceuˬ le le teˇ geh kanˉ te gʼa tuˬ, yawˇ aˬ htoꞈ ma te ve le?

⁵ Yaˬhoˉvaˬ hpanˍ taˍ ve awˬ ceuˬ aˬ htoꞈ ma te gʼa maˇ te gʼa ve yawˇ gu teh taˍ ve yoˬ. Yawˇ suhˆ cehˬ hawˆ cehˬ awˬ pon awˬ liˇ gu teh taˍ ve leh, chaw yaˇ awˬ pon kaꞈ hkʼa shuˍ yoˬ. Mvuhˇ naw ma miˬ naˆ ma teˇ geh kanˉ te gʼa tuˬ, yawˇ awˬ liˇ chi teˇ hpaˍ teh taˍ ve yoˬ. (Chiˇ mvuh ve 19:7-9) Mvuhˇ naw ma miˬ naˆ ma cawˬ ve hkʼa peu˗eˬ htaꞈ yawˇ awˬ ti awˬ vuiˬ piˇ ve yoˬ. Tawˇ pa haˉ te kʼo, suhˆ cehˬ hawˆ cehˬ ve awˬ liˇ mvuhˇ haw awˬ shaˉ miˬ guiˬ awˬ paˇ lo chehˇ tuˬ te piˇ ve, laˇ tcuhˇ gʼuiˬ taˆ taˆ yaꞈ yaꞈ te piˇ ve yoˬ. Suhˆ cehˬ hawˆ cehˬ ve awˬ liˇ maˇ cawˬ ve kʼo, miˬ guiˬ chi a shaꞈ teꞈ chehˇ maˇ gʼa. Yaˬhoˉvaˬ suhˆ cehˬ hawˆ cehˬ awˬ liˇ cawˬ tcuh ve pa taw, mvuhˇ naw ma miˬ naˆ ma hteˇ˗ehˍ shawˇ˗ehˍ cawˬ gʼa ve yoˬ. Chi htaꞈ pa taw ngaˬ hui na gʼa ve, Yaˬhoˉvaˬ miˬ guiˬ leh chaw yaˇ awˬ pon a loˍ cawˬ ve yoˬ. Ngaˬ hui hto toˇ htaˇ, mvuhˇ naw ma miˬ naˆ ma anˇ lawꞈ lawꞈ ve hpanˍ shehˍ hpaˇ htaꞈ shiˍ daꞈ tuˬ, ngaˬ hui shu htaꞈ ga piˇ gʼa ve yoˬ.

6, 7. Aˍdanˍ leh Eˇvaꞈ htaꞈ Yaˬhoˉvaˬ aˬ htoꞈ ma laꞈ shawnˍ piˇ ve le?

⁶ Yaˬhoˉvaˬ ve a loˍ lehˬ chaw yaˇ miˬ guiˬ hkʼoˆ co co taiˍ taiˍ chehˇ tcuh gaˇ ve yoˬ. (Awˬ hkuiˉ puiˍ 1:28; Chiˇ mvuh ve 37:29) Yawˇ nyi ma daꞈ jaˇ leh, yawˇ Aˍdanˍ leh Eˇvaꞈ htaꞈ laꞈ shawnˍ laiˉ ceuˬ piˇ ve yoˬ. (Yaˍkoˆ 1:17 gʼaw ve.) Yaˬhoˉvaˬ yawˇ huiˉ maˬ htaꞈ a shu yawˇ hkʼaˇ yawˇ leuˆ yuˬ tuˬ a hkaw˗anˬ piˇ leh, dawˇ ve, haꞈ ve, awˬ chawˇ te daꞈ gʼa tuˬ piˇ ve yoˬ. Hpanˍ shehˍ hpaˇ Aˍdanˍ geh tawˇ yaw daꞈ leh hkʼaˬ hkʼe te daꞈ ve te tuˬ maˍ piˇ ve yoˬ. Leh Gʼuiˬ sha lehˬ Aˍdanˍ yawˇ awˬ to, to nuˇ to shaˆ, oˇ kaˬ lo ve hkʼa peu˗eˬ htaꞈ haꞈ shaˉ tuˬ maˍ piˇ ve yoˬ. (Awˬ hkuiˉ puiˍ 2:15-17, 19, 20) Hpanˍ taˍ ve daꞈ ve hkʼa peu˗eˬ htaꞈ Aˍdanˍ leh Eˇvaꞈ nyi gʼa tuˬ, htawˇ gʼa tuˬ, na gʼa tuˬ, nuˬ gʼa tuˬ, caˇ nyi gʼa tuˬ Yaˬhoˉvaˬ te tcuh ve yoˬ. Chi htaꞈ pa taw, daꞈ jaˇ ve awˬ ti hkʼaw yawˇ hui ve a shaꞈ teꞈ hkʼaˇ htaꞈ ha lehˬ jaˇ ve yoˬ. Aˍdanˍ leh Eˇvaꞈ nyi ma pfuhˇ lawꞈ lawꞈ ve kanˉ laiˉ ceuˬ cawˬ ve yoˬ. Leh yawˇ hui hkʼaˬ htaˆ kaꞈ awˬ lawn awˬ suhˉ henˇ gʼa ve yoˬ.

⁷ Gʼuiˬ sha ve a loˍ aˬ htoꞈ ma cawˬ sheˍ ve le? Yaˬhoˉvaˬ Aˍdanˍ leh Eˇvaꞈ biˇ ve yaˇ cawˬ tcuh gʼa ve yoˬ. Leh yawˇ hui ve yaˇ kaꞈ yaˇ kʼawꞈ cawˬ leh miˬ guiˬ hkʼoˆ chaw yaˇ hkʼa biˇ cawˬ tuˬ yoˬ. Aˍdanˍ leh Eˇvaꞈ htaꞈ Yaˬhoˉvaˬ haꞈ ve hkʼa shuˍ, awˬ pa awˬ e yawˇ hui ve yaˇ htaꞈ kaꞈ haꞈ tcuh gaˇ ve yoˬ. Yaˬhoˉvaˬ miˬ guiˬ leh daꞈ jaˇ ve awˬ ceuˬ hkʼa peu˗eˬ chaw yaˇ htaꞈ piˇ ve yoˬ. Miˬ guiˬ chi hkʼoˆ yawˇ hui ve yehˬ hpehꞈ leh Yaˬhoˉvaˬ maˇ yuˬ hkʼawꞈ.—Chiˇ mvuh ve 115:16.

Aˬ htoꞈ ma hpehꞈ la ve le?

8. Aˬ htoꞈ ma te Yaˬhoˉvaˬ Awˬ hkuiˉ puiˍ ve liꞈ 2:16, 17 Aˍdanˍ leh Eˇvaꞈ htaꞈ awˬ liˇ tawˇ hkawˇ piˇ ve le?

⁸ Yaˬhoˉvaˬ dawˇ taˍ ve hkʼe leˇ awˬ ceuˬ hkʼa peu˗eˬ laꞈ haˉ maˇ hpehꞈ la. Aˬ htoꞈ ma hpehꞈ la ve le? Aˍdanˍ leh Eˇvaꞈ htaꞈ Yaˬhoˉvaˬ awˬ liˇ tawˇ hkawˇ teˇ maˬ hkʼa sha sha˗ehˬ ve piˇ ve yoˬ. Yawˇ hui a shu yawˇ hkʼaˇ yawˇ leuˆ yuˬ ve hkʼaˬ hkʼe tawn cawˬ ve shiˍ tuˬ. Yaˬhoˉvaˬ kʼoˆ ve, “Hko chi awˬ hkʼaw lo hkʼa cawˬ taˍ ve iˉ shiˍ hkʼa peu˗eˬ htaꞈ nawˬ hui caˇ hpehꞈ ve yoˬ. Yaꞈ hkʼaˇ, daꞈ ve maˇ daꞈ ve htaꞈ shiˍ puiˉ ve suhˆ cehˬ oˇ ve teˇ cehˬ ve awˬ shiˍ htaꞈ nawˬ taˇ caˇ. Nawˬ lehˬ suhˆ cehˬ oˇ ve teˇ cehˬ ve awˬ shiˍ htaꞈ caˇ ve kʼo, awˬ tehˬ awˬ na gʼa suh tuˬ yoˬ.” (Awˬ hkuiˉ puiˍ 2:16, 17) Awˬ liˇ tawˇ hkawˇ oˇ ve yawˇ hui na gʼa tuˬ maˇ haˍ. Leh yawˇ hui na yuˬ tuˬ kaꞈ maˇ haˍ. Hkʼo oˇ ve hkʼaw mehˬ ve caˇ tuˬ laiˉ ceuˬ cawˬ ve pa taw.

9, 10. (a) Saˍtanˍ Yaˬhoˉvaˬ htaꞈ hkʼaˬ hkʼe she pfuhˍ ve le? (b) Aˍdanˍ leh Eˇvaꞈ dawˇ cheˆ leh hkʼaˬ hkʼe te ve le? (Awˬ lawn tanˬ htaˇ ve awꞈ han htaꞈ nyi sheˍ.)

⁹ Neˇhaiˬ Saˍtanˍ vuiˬ htaꞈ cuˇ leh Eˇvaꞈ awˬ pa Yaˬhoˉvaˬ hkawˇ maˇ na yuˬ tuˬ heˍ piˇ ve yoˬ. (Awˬ hkuiˉ puiˍ 3:1-5 gʼaw ve; Hpeuꞈ maˍ ve 12:9) Saˍtanˍ kʼoˆ ve, Chaw yaˇ “iˉ shiˍ hkʼa peu˗eˬ” caˇ tuˬ Gʼuiˬ sha a hkaw˗anˬ maˇ piˇ. Chi lehˬ ‘nawˬ loˍ ve awˬ ceuˬ te maˇ gʼa laˇ?’ tehꞈ Saˍtanˍ kʼoˆ ve hkʼa shuˍ yoˬ. Leh Saˍtanˍ Eˇvaꞈ htaꞈ kʼoˆ piˇ ve, “nawˬ maˇ suh taˬ” chi heˍ ve tawˇ hkawˇ hpehꞈ ve yoˬ. Peuˬ hkʼawꞈ nawˉ Saˍtanˍ coˇ caˇ leh Eˇvaꞈ Gʼuiˬ sha ve hkawˇ maˇ na yuˬ kaꞈ hpehꞈ ve tehꞈ kʼoˆ piˇ ve yoˬ. Saˍtanˍ kʼoˆ ve, “Nawˬ hui awˬ shiˍ oˇ ve htaꞈ caˇ ve kʼo, nawˬ hui ve mehˆ shiˍ teˇ cawˬ haˉ hpaw la . . . Gʼuiˬ sha shiˍ taˍ ve yoˬ.” Chaw yaˇ cuˇ yiˍ cawˬ maˇ la ve pa taw, Yaˬhoˉvaˬ yawˇ hui htaꞈ iˉshiˍ maˇ caˇ tcuh gaˇ ve tehꞈ Saˍtanˍ Eˇvaꞈ htaꞈ kʼoˆ piˇ ve yoˬ. Awˬ leh meuˇ htaˇ, “nawˬ hui . . . Gʼuiˬ sha hkʼe hpehꞈ la ve awˬ hkʼoˆ, daꞈ ve maˇ daꞈ ve awˬ ceuˬ htaꞈ shiˍ la tuˬ ve” tehꞈ Saˍtanˍ heˍ leh ka tiꞈ te piˇ ve yoˬ.

¹⁰ Aˍdanˍ leh Eˇvaꞈ hkʼaˬ hkʼe te tuˬ gʼa dawˇ cheˆ ve yoˬ. Yawˇ hui Yaˬhoˉvaˬ hkawˇ maˇ heˆ leh vuiˬ na yuˬ tuˬ laˇ? Sheˉ lai jaˇ yawˇ hui dawˇ cheˆ leh Gʼuiˬ sha hkawˇ maˇ na yuˬ. Aˍdanˍ leh Eˇvaꞈ Yaˬhoˉvaˬ yawˇ hui ve awˬ pa hkawˇ maˇ na yuˬ leh Saˍtanˍ hpawˇ ca chehˇ ve yoˬ. Chi teˇ hkui yawˇ hui hkʼaˇ yawˇ hui gʼa nyi haꞈ shaˉ ve leh, Yaˬhoˉvaˬ yawˇ hui htaꞈ maˇ nyi haꞈ shaˉ piˇ˗o ve yoˬ.—Awˬ hkuiˉ puiˍ 3:6-13.

11. Aˍdanˍ leh Eˇvaꞈ venˇ baˆ te taˍ ve aˬ htoꞈ ma te Yaˬhoˉvaˬ venˇ baˆ maˇ hpehˇ piˇ gʼa ve le?

¹¹ Aˍdanˍ leh Eˇvaꞈ Gʼuiˬ sha hkawˇ maˇ na yuˬ htaˇ, maˇ biˇ ve chaw hpehꞈ ve yoˬ. Chi hkʼoˆ kaꞈ, Gʼuiˬ sha nyi bawˬ jaˇ ve haiˬ ve awˬ ceuˬ te ve pa taw, yawˇ hui Gʼuiˬ sha ve canˇ paˍ hpehꞈ la ve yoˬ. Liꞈ hpu hkʼaw kʼoˆ ve, Gʼuiˬ sha ve “mehˆ shiˍ lehˬ, daꞈ kehˬ jaˇ ve pa taw, haiˬ ve awˬ ceuˬ htaꞈ nyi maˇ hpehꞈ ve yoˬ.” (Haˍbaˍkuˆ 1:13) Aˍdanˍ leh Eˇvaꞈ venˇ baˆ te yaꞈ leh Yaˬhoˉvaˬ teꞈ chiˉ maˇ te ve kʼo, yawˇ hpanˍ taˍ ve awˬ ceuˬ hkʼa peu˗eˬ leh ngaˬ hui awˬ gʼuˇ suhˍ hpawˇ ve dawˆ law kuiˬ kawˆ tuˬ cawˬ ve yoˬ. Mvuhˇ naw ma tcuh yaˇ leh chaw yaˇ kaꞈ Gʼuiˬ sha ve tawˇ hkawˇ yonˍ gʼa˗aw laˇ? tehꞈ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, Yaˬhoˉvaˬ yawˇ ve awˬ liˇ tawˇ hkawˇ htaꞈ ka tiꞈ yeˬ ve yoˬ. Yawˇ ve awˬ liˇ tawˇ hkawˇ htaꞈ maˇ ponˬ leuˉ jaw (Chiˇ mvuh ve 119:142) Aˍdanˍ leh Eˇvaꞈ yawˇ hui hkʼaˇ yawˇ hui leuˆ tuˬ ve a hkaw˗anˬ cawˬ ve htawˇ, Yaˬhoˉvaˬ htaꞈ hpfuhˆ ve yawˇ hui jaw kʼai maˇ gʼa. Awˬ leh meuˇ htaˇ, yawˇ hui gʼa suh leh jeꞈ gʼa hpehꞈ ve yoˬ. Awˬ lawn kʼo jeꞈ yuˬ te taˍ ve pa taw.—Awˬ hkuiˉ puiˍ 3:19.

12. Aˍdanˍ ve yaˇ teˇ hpaˍ aˬ htoꞈ ma hpehꞈ la ve le?

¹² Aˍdanˍ leh Eˇvaꞈ iˉ shiˍ caˇ peuˬ hkʼawꞈ nawˉ Yaˬhoˉvaˬ ve yehˬ kʼa hkʼaw ve chaw maˇ kʼawꞈ hpehꞈ ve yoˬ. Yawˇ yawˇ hui htaꞈ Eˍdenˍ hko hkʼaw kʼawꞈ tawˆ˗e tcuh leh maˇ kʼawꞈ loꞈ˗e la tcuh ve yoˬ. (Awˬ hkuiˉ pui 3:23, 24) Yaˬhoˉvaˬ yawˇ hui dawˇ cheˆ taˍ ve hpfuhˇ tcuh ve yoˬ. (Bon maˍ ve 32:4, 5 gʼaw ve.) Chi htaꞈ pa taw, yawˇ hui Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ henˇ yuˬ maˇ gʼa ve yoˬ. Aˍdanˍ ceh tiˉ maˇ heˆ, yawˇ leh yawˇ ve awˬ yaˇ awˬ duˬ awˬ gʼuˇ suhˍ hpawˇ daꞈ jaˇ ve shonˇ kʼai ve yoˬ. Maˇ biˇ ve, venˇ baˆ, suh ve awˬ ceuˬ chi ceh Aˍdanˍ yawˇ ve yaˇ teˇ hpaˍ piˇ gʼa ve yoˬ. (Roˉmaꞈ 5:12) Co co taiˍ taiˍ ve a shaꞈ yawˇ ve yaˇ gʼa cawˇ ve Aˍdanˍ te luˬ kʼai ve yoˬ. Aˍdanˍ leh Eˇvaꞈ biˇ ve yaˇ cawˬ maˇ gʼa leh, yawˇ hui ve yaˇ kaꞈ biˇ ve yaˇ cawˬ maˇ gʼa. Saˍtanˍ Aˍdanˍ leh Eˇvaꞈ Gʼuiˬ sha htaꞈ hpfuhˆ piˇ ve htaˇ, chaw yaˇ teˇ gʼaˇ le le hkʼa shuˍ te tuˬ yawˇ coˇ caˇ ve yoˬ.—Yoˇhanˬ 8:14.

Htaiˍ hkʼawꞈ ve awˬ hpfuhˇ ngaˬ hui Gʼuiˬ sha geh awˬ chawˇ te daꞈ gʼa ve

13. Yaˬhoˉvaˬ Aˍdanˍ ve yaˇ teˇ hpaˍ aˬ htoꞈ ma gʼa tcuh gaˇ ve le?

¹³ Yaˬhoˉvaˬ chaw yaˇ htaꞈ haꞈ sheˍ ve yoˬ. Aˍdanˍ leh Eˇvaꞈ yawˇ htaꞈ baˬ taˉ ve htawˇ, yawˇ hui ve yaˇ yawˇ htaꞈ awˬ chawˇ kʼawꞈ te daꞈ tcuh gaˇ ve yoˬ. Leh Yaˬhoˉvaˬ teˇ gʼaˇ kaꞈ maˇ suh tcuh gaˇ. (2 Peˍtruˆ 3:9) Chi htaꞈ pa taw Aˍdanˍ leh Eˇvaꞈ hpfuhˆ ve hkʼawꞈ nawˉ, chaw yaˇ Gʼuiˬ sha ve awˬ chawˇ kʼawꞈ te daꞈ ga tuˬ yawˇ teˇ ceuˬ laꞈ haˉ kʼawꞈ gu laˇ ve yoˬ. Yaꞈ hkʼaˇ, yawˇ ve awˬ liˇ tawˇ hkawˇ maˇ yaꞈ ve hkʼaw yawˇ hkʼaˬ hkʼe te ga tuˬ le? Ngaˬ hui teˇ geh nyi sheˍ.

14. (a) Yoˇhanˬ 3:16 chaw yaˇ suh ve leh venˇ baˆ gʼa ponˬ tuˬ Yaˬhoˇvaˬ hkʼaˬ hkʼe te ve le? (b) Aˬ htoꞈ ma na hkawˇ ngaˬ hui shu geh jehˬ daꞈ gʼa ve le?

¹⁴ Yoˇhanˬ 3:16 gʼaw ve. Laiˉ gʼaˇ Yeˍsuˆ suh ve dawˇ nawˇ tuˬ hpawnˬ daꞈ ve laˬ ve chaw Liꞈ hpu chi teˇ tawn tawnˇ gʼa ve yoˬ. Yaꞈ hkʼaˇ, Yeˍsuˆ ve htaiˍ hkʼawꞈ ve awˬ hpfuhˇ ngaˬ hui co co taiˍ taiˍ a shaꞈ gʼa tuˬ hkʼaˬ hkʼe te laˇ ve le? Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve htaꞈ kuˬ piˇ leh hpawnˬ daꞈ oˇ ve hkʼaw yawˇ geh chehˇ ve maˇ heˆ kʼo, yawˇ htaꞈ ca guiˇ˗e ve htaˇ, shu na hkawˇ chi htaꞈ na gʼa tuˬ ga piˇ gʼa ve yoˬ. Yawˇ hui htaiˍ hkʼawꞈ ve awˬ hpfuhˇ gʼaˇ hteꞈ shiˍ maˇ la ve kʼo, Yaˬhoˉvaˬ chaw yaˇ htaꞈ haꞈ jaˇ leh yawˇ kanˇ paˆ uiˍ jaˇ ve yawˇ hui gʼaˇ hteꞈ shiˍ maˇ la ve yoˬ. Htaiˍ hkʼawꞈ ve awˬ hpfuhˇ ngaˬ hui yawˇ hui htaꞈ hkʼaˬ hkʼe maˍ piˇ gʼa ve le?

15. Yeˍsuˆ Aˍdanˍ htaꞈ hkʼaˬ hkʼe peun daꞈ ve le?

¹⁵ Yaˬhoˉvaˬ biˇ ve chaw yaˇ teˇ gʼaˇ gu leh yawˇ ve a shaꞈ htaiˍ hkʼawꞈ ve a shaꞈ awˬ hpfuhˇ awˬ pon. Biˇ ve chaw yaˇ oˇ ve teˇ gʼaˇ Yaˬhoˉvaˬ htaꞈ ka tiꞈ gʼa yeˬ ve yoˬ. Yawˇ ve a shaꞈ chaw yaˇ htaꞈ piˇ gaˇ ve yoˬ. (Roˉmaꞈ 5:17-19) Yeˍsuˆ a shaꞈ teꞈ ve awˬ hkuiˉ puiˍ teˇ ceuˬ hpehꞈ ve Yaˬhoˉvaˬ yawˇ ve a shaꞈ mvuhˇ naw hkʼoˆ lo ve htaꞈ miˬ guiˬ hkʼoˆ peu laˇ ve yoˬ. (Yoˇhanˬ 1:14) Chi htaꞈ pa taw Aˍdanˍ hpehꞈ jaw ve hkʼa shuˍ, Yeˍsuˆ biˇ ve chaw yaˇ hpehꞈ la ve yoˬ. Yaꞈ hkʼaˇ, biˇ ve chaw yaˇ te cawˇ ve hkʼe Yeˍsuˆ Gʼuiˬ sha ve awˬ liˇ awˬ hkʼaˇ gʼaꞈ te ve yoˬ. Leh chi lehˬ Yeˍsuˆ Aˍdanˍ htaꞈ peun daꞈ ve yoˬ. Beˬ ve lawˇ ve hehnˇ jaˇ ve gʼa hpuˇ ve htawˇ, Yeˍsuˆ Gʼuiˬ sha ve awˬ liˇ tawˇ hkawˇ htaꞈ hkʼaˬ htaˆ kaꞈ na yuˬ ve yoˬ.

16. Aˬ htoꞈ ma te htaiˍ hkawꞈ ve awˬ hpfuhˇ hkʼaˆ jaˇ ve laꞈ shawnˍ hpehꞈ ve le?

¹⁶ Yeˍsuˆ biˇ ve hkʼaw suh ve pa taw, yawˇ chaw yaˇ teˇ gʼaˇ le le venˇ baˆ leh suh ve htaꞈ ponˬ piˇ gʼa ve yoˬ. Aˍdanˍ te cawˇ ve teˇ ceuˬ le le Yeˍsuˆ te ve yoˬ. Yeˍsuˆ biˇ ve chaw hpehꞈ ve yawˇ ka tiꞈ yeˬ leh Gʼuiˬ sha hkawˇ hkʼa dehꞈ na yuˬ ve yoˬ. (1 Tiˆmoˉseˍ 2:6) Ngaˬ hui teˇ gʼaˇ le le awˬ pon yawˇ suh ve leh hawˉ hkʼaˆ, yaˇ miˇ, yaˇ ehˉ teˇ gʼaˇ le le co co taiˍ taiˍ ve a shaꞈ gʼa tuˬ htaiˍ hkʼawꞈ ve awˬ hpfuhˇ ngaˬ hui htaꞈ ga laˇ ve yoˬ. (Maꞈhtehˍ 20:28) Htaiˍ hkʼawꞈ ve chi yehˬ miˉ hpaw tuˬ shawˇ laꞈ sheh hkʼe hpehꞈ ve pa taw, Gʼuiˬ sha ve a loˍ biˇ la tuˬ awˬ tehˬ hpehꞈ la ve yoˬ.—2 Kawˇrenˍhtuˆ 1:19, 20.

Yaˬhoˉvaˬ ngaˬ hui kʼawꞈ la tuˬ yehˬ miˉ hpaw laˇ ve

17. Htaiˍ hkʼawꞈ ve aˬ htoꞈ ma hpehꞈ la ve le?

¹⁷ Htaiˍ hkʼawꞈ ve yawˇ awˬ pon awˬ hpfuhˇ hkʼaˆ jaˇ ve gu teh taˍ laˇ ve yoˬ. (1 Peˍtruˆ 1:19) Yawˇ ngaˬ hui htaꞈ haꞈ jaˇ ve pa taw, yawˇ haꞈ jaˇ ve yaˇ paˍ ngaˬ hui awˬ pon suh tcuh laˇ ve yoˬ. (1 Yoˇhanˬ 4:9, 10) Chi kʼoˆ gaˇ ve lehˬ, Aˍdanˍ awˬ tan Yeˍsuˆ ngaˬ hui ve awˬ pa hpehꞈ la ve yoˬ. (1 Kawˇrenˍhtuˆ 15:45) Ngaˬ hui co co taiˍ taiˍ a shaꞈ ga tuˬ Yeˍsuˆ te laˇ ve leh Gʼuiˬ sha ve yehˬ kʼa hkʼaw ve chaw teˇ gʼaˇ hpehꞈ gʼa ve yoˬ. Htaiˍ hkʼawꞈ ve htaꞈ pa taw, chaw yaˇ biˇ ve chaw hpehꞈ la gʼa ve leh Yaˬhoˉvaˬ ve awˬ liˇ awˬ hkʼaˇ maˇ yaꞈ ve hkʼaw, yawˇ yehˬ kʼa hkʼaw ve chaw hpehꞈ gʼa tuˬ ngaˬ hui htaꞈ haꞈ yuˬ laˇ ve yoˬ. Yaˬhoˉvaˬ htaꞈ ka tiꞈ yeˬ ve chaw biˇ ve chaw hpehꞈ htaˇ hkʼaˬ hkʼe tawn ha lehˬ ve dawˇ nyi sheˍ! Awˬ leh meuˇ htaˇ, mvuhˇ naw ma hkʼoˆ leh miˬ guiˬ hkʼoˆ teˇ gʼaˇ le le teˇ yehˬ kʼa ve chaw tiˉ hpehꞈ tuˬ yoˬ. Teˇ gʼaˇ le le Gʼuiˬ sha ve yaˇ hpehꞈ tuˬ yoˬ.—Roˉmaꞈ 8:21.

18. Yaˬhoˉvaˬ “teˇ ceuˬ le le awˬ hkʼaw lo hkʼa peu˗eˬ hpehꞈ” tuˬ hkʼaˬ htaˆ le?

¹⁸ Ngaˬ hui ve awˬ pa awˬ e awˉ lawˉ peuˇ ve teˇ ca Yaˬhoˉvaˬ htaꞈ maˇ haꞈ yuˬ ve htawˇ, yawˇ ngaˬ hui htaꞈ haꞈ sheˍ leh htaiˍ hkʼawꞈ ve htaꞈ gu laˇ ve yoˬ. Ngaˬ hui maˇ biˇ ve chaw hpehꞈ ve htawˇ, ngaˬ hui Yaˬhoˉvaˬ htaꞈ ka tiꞈ yeˬ ve Saˍtanˍ tawn laˇ maˇ gʼa. Awˬ tehˬ hteˇ ve cawˇ ve chaw hpehꞈ tuˬ, Yaˬhoˉvaˬ htaiˍ hkʼawꞈ ve htaꞈ cuˇ leh ngaˬ hui ga laˇ ve yoˬ. “Yaˇ hpu htaꞈ mawˬ leh yonˍ ve chaw teˇ gʼaˇ le le co tiꞈ ha tiꞈ gʼa tuˬ” hkʼaˬ hkʼe tawn ha lehˬ tuˬ le Dawˇ nyi sheˍ! (Yoˇhanˬ 6:40) Gʼuiˬ sha cuˇ yiˍ cawˬ jaˇ ve awˬ pa hpehꞈ leh ngaˬ hui htaꞈ haꞈ jaˇ ve yoˬ. Yawˇ dawˇ law taˍ ve awˬ tehˬ hpehꞈ tuˬ leh chaw yaˇ teˇ gʼaˇ le le biˇ ve chaw hpehꞈ tcuh tuˬ yoˬ. Oˇ ve teˇ yanˇ Yaˬhoˉvaˬ “teˇ ceuˬ le le awˬ hkʼaw lo hkʼa peu˗eˬ hpehꞈ” tuˬ yoˬ.—1 Kawˇrenˍhtuˆ 15:28.

19. (a)  Htaiˍ hkʼawꞈ ve ngaˬ hui gʼa ve ha lehˬ jaˇ ngaˬ hui aˬ htoꞈ ma te cawˇ ve le? (“Nawˬ htaꞈ haꞈ yuˬ laˇ leh na gaˇ ve chaw geh ca˗o” awˇ ceˍ awˇ fa nyi sheˍ.) (b) Gʼuˇ suhˍ teˇ lawn ngaˬ hui aˬ htoꞈ ma henˇ tuˬ le?

¹⁹ Htaiˍ hkʼawꞈ gʼa ve ngaˬ hui ha lehˬ jaˇ ve kʼo, ngaˬ hui coˇ caˇ leh awˬ lawn chi ve shu htaꞈ kʼoˆ piˇ cawˇ ve yoˬ. Htaiˍ hkʼawꞈ ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. Teˇ gʼaˇ le le shiˍ cawˇ ve htaiˍ hkʼawꞈ ve htaꞈ pa taw, Yaˬhoˉvaˬ chaw yaˇ teˇ gʼaˇ le le co co taiˍ taiˍ a shaꞈ teꞈ tcuh gaˇ ve yoˬ. Yaꞈ hkʼaˇ, htaiˍ hkʼawꞈ ve chi aꞈ kehˉ awˬ bon cawˬ sheˍ ve yoˬ. Htaiˍ hkʼawꞈ ve Saˍtanˍ Eˍdenˍ hko hkʼaw shoꞈ shaꞈ laˇ awˬ lawn htaꞈ kaꞈ gu gʼa ve yoˬ. Gʼuˇ suhˍ teˇ lawn ngaˬ hui teˇ geh henˇ tuˬ yoˬ.