Nyi ma awˬ tawˬ hkʼa gaˬ Yaˬhoˉvaˬ ve kanˉ htaꞈ te˗o!

1-3. Yaˬhoˉvaˬ ve kanˉ “nyi ma awˬ tawˬ hkʼa gaˬ” te ve aˬ htoꞈ ma htaꞈ kʼoˆ gaˇ ve le? Tawˇ pa haˉ kʼoˆ maˍ laˇ sheˍ.

Ngaˬ hui teˇ gʼaˇ le le maˇ biˇ ve pa taw te yaˬ ve yoˬ. Yaꞈ hkʼaˇ, Yaˬhoˉvaˬ htaiˍ hkʼawꞈ ve piˇ laˇ leh ngaˬ hui htaꞈ venˇ baˆ hpehˇ laˇ gaˇ ve yoˬ. Hkʼe te leh ngaˬ hui nyi ma nuˇ nehˬ leh venˇ baˆ dawˇ hpfuhˆ ve kʼo, venˇ baˆ hpehˇ laˇ tuˬ ngaˬ hui yawˇ geh lawˬ gʼa ve yoˬ. ‘Ngaˬ hui ve venˇ baˆ’ htaꞈ Yaˬhoˉvaˬ maˇ ciˍ yanˍ laˇ tehꞈ ngaˬ hui hkʼa dehꞈ shiˍ ve yoˬ. (Chiˇ mvuh ve 103:10) Yaꞈ hkʼaˇ, ngaˬ hui “nyi ma awˬ tawˬ hkʼa gaˬ yawˇ ve kanˉ htaꞈ” te cawˇ ve yoˬ. (1 Raˍsaˍvanˍ 28:9) Ngaˬ hui maˇ biˇ ve chaw yaˇ hpehꞈ ve htawˇ, hkʼaˬ hkʼe te chi hkʼe te gʼa tuˬ le?

² Jawˇmawˇ Aˍsaˍ leh Aˍmaˍziˆ hkʼaˬ hkʼe maˇ shuˍ daꞈ ve teˇ geh nyi sheˍ. Yawˇ huiˉ maˬ daꞈ ve htaꞈ te ve htawˇ, maˇ biˇ ve pa taw yawˇ hui kaꞈ teˇ yaꞈ puiˉ ve yo. Yaꞈ hkʼaˇ, Liꞈ hpu hkʼaw kʼoˆ ve, Aˍsaˍ ‘a shaꞈ teꞈ chehˇ ve teˇ co˗e nyi ma awˬ tawˬ hkʼa gaˬ Gʼuiˬ sha htaꞈ tiˉ oˉ kʼoˍ pui chehˇ ve yoˬ.’ (2 Raˍsaˍvanˍ 15:16, 17; 25:1, 2; Tawˇ naˉ ve 17:3) Yawˇ coˇ caˇ leh Yaˬhoˉvaˬ ha lehˬ tuˬ hkʼaˬ htaˆ kaꞈ te piˇ ve yoˬ. (1 Raˍsaˍvan 28:9) Yaꞈ hkʼaˇ, Aˍmaˍziˆ Gʼuiˬ sha kanˉ “nyi ma awˬ tawˬ hkʼa gaˬ” maˇ te. Gʼuiˬ sha ve canˇ paˍ htaꞈ maꞈ bawˆ gʼaˇ peuˬ hkʼawꞈ nawˉ, yawˇ hui ve shaˉ hoꞈ teˇ hpaˍ htaꞈ yuˬ hkʼawꞈ veu laˇ leh oˉ kʼoˍ pui ve yoˬ.—2 Raˍsaˍvanˍ 25:11-16.

³ Yaˬhoˉvaˬ ve kanˉ “nyi ma awˬ tawˬ hkʼa gaˬ” te gaˇ ve chaw lehˬ, yawˇ Yaˬhoˉvaˬ htaꞈ hkʼa dehꞈ gʼa haꞈ leh yawˇ a shaꞈ teꞈ ve teˇ co˗e Yaˬhoˉvaˬ htaꞈ oˉ kʼoˍ gʼa pui ve yoˬ. Liꞈ hpu hkʼaw “nyi ma” htaꞈ kʼoˆ htaˇ, aˬ htoꞈ ma dawˇ ve, aˬ htoꞈ ma haꞈ ve, ngaˬ hui a shaꞈ teꞈ chehˇ kuiˬ hkʼaw aˬ htoꞈ ma awˬ pon yuˬ yehˇ gʼa ve tehꞈ, kʼoˆ gaˇ ve yoˬ. Ngaˬ hui maˇ biˇ ve htawˇ, Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui gʼa ve yoˬ. Ngaˬ hui awˬ tehˬ te gaˇ ve pa taw, yawˇ ve kanˉ te ve yoˬ. Ngaˬ hui te la jaw leh te ve maˇ heˆ. Shu te tcuh laˇ ve leh te ve kaꞈ maˇ heˆ.—2 Raˍsaˍvanˍ 19:9.

4. Ngaˬ hui aˬ htoꞈ ma htaꞈ henˇ tuˬ le?

⁴ Nyi ma awˬ tawˬ hkʼa gaˬ Gʼuiˬ sha kanˉ te ve, ngaˬ hui hkʼaˬ hkʼe gʼa te cawˇ ve ngaˬ hui na gʼa tuˬ, jawˇ mawˇ Aˍsaˍ leh awˬ nu ve ka tiꞈ yeˬ ve jawˇ mawˇ shehˆ gʼaˇ daꞈ ve awˬ lawn teˇ geh nyi sheˍ. Chi shehˆ gʼaˇ lehˬ Yawˇshaˍhpaˆ, Heˍsaˍkiˆ, Yawˇshiˆ yoˬ. Jawˇmawˇ chi awˇ gʼaˇ te yaꞈ ve htawˇ, yawˇ hui Yaˬhoˉvaˬ ha lehˬ tuˬ te piˇ ve yoˬ. Yawˇ hui Gʼuiˬsha htaꞈ nyi ma awˬ tawˬ hkʼa gaˬ oˉ kʼoˍ pui ve Gʼuiˬsha shiˍ ve yoˬ. Aˬ htoꞈ ma te yawˇ shiˍ ve le? Ngaˬ hui yawˇ hui htaꞈ hkʼaˬ hkʼe henˇ yuˬ gʼa ve le?

Aˍsaˍ Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui ve

5. Aˍsaˍ jawˇ mawˇ te htaˇ, yawˇ aˬ htoꞈ ma te ve le?

⁵ Iˉsaˍreˍlaˆ mvuhˇ miˬ nyiˇ moˍ pehˬ peuˬ hkʼawꞈ nawˉ, Aˍsaˍ Yuˇdaꞈ mvuhˇ miˬ jawˇ mawˇ shehˆ gʼaˇ teˇ gʼaˇ hpehꞈ ve yoˬ. Aˍsaˍ Yuˇdaꞈ mvuhˇ miˬ jawˇ mawˇ tanˬ te ve teˇ yanˇ yawˇ ve mvuhˇ miˬ hkʼaw maˇ heˆ heˆ ve bon liˇ hkʼa peu˗eˬ te luˬ leh haˉ chawˇ haˉ paˆ te yaꞈ ve hkʼa peu˗eˬ yuˬ baˬ gaˇ ve yoˬ. Chaw yaˇ oˉ kʼoˍ pui chehˇ ve shaˉ hoꞈ htaꞈ yawˇ te luˬ leh bon yehˬ hkʼaw haˉ chawˇ haˉ paˆ te ve htaꞈ gʼaꞈ baˬ piˇ ve yoˬ. Aˍsaˍ yawˇ ve awˬ pi Maˍhkaˍ htawˇ “shaˉ hoꞈ oˉ kʼoˍ pui chehˇ ve pa taw,” yawˇ htaꞈ jawˇ mawˇ ma lonˉ maˇ kʼawꞈ te tcuh ve yoˬ. (1 Raˍsaˍvanˍ 15:11-13) Aˍsaˍ leh Yuˇdaꞈ chaw hui htaˬ ‘Yaˬhoˉvaˬ ve a loˍ tiˉ te tuˬ maˍ piˇ’ leh yawˇ ve ‘awˬ liˇ tawˇ hkawˇ teˇ hpaˍ htaꞈ hkʼa dehꞈ na yuˬ tuˬ’ awˬ gʼaˇ piˇ ve yoˬ. Shu Yaˬhoˉvaˬ htaꞈ oˉ kʼoˍ pui la tuˬ Aˍsaˍ te gʼa ve hkʼe teˇ ceuˬ le le te piˇ ve yoˬ.—2 Raˍsaˍvanˍ 14:4.

6. Ehˇtaˍyoˇpiˆ mvuhˇ miˬ Yuˇdaꞈ mvuhˇ miˬ htaꞈ ca bawˆ la htaˇ, Aˍsaˍ hkʼaˬ hkʼe te ve le?

⁶ A ˍsaˍ uˉ peunˍ ve awˉ lawˉ teˇ chi hkʼawꞈ htaˇ, Yuˇ daꞈ mvuhˇ miˬ maꞈ bawˆ daꞈ ve maˇ cawˬ. Peuˬ hkʼawꞈ nawˉ Suˍdanˍ (Ehˇtaˍyoˇpiˆ, Miˬ guiˬ awˬ suhˉ yuˬ tawˆ ve Liꞈ hpu) chaw ca bawˆ la ve yoˬ. Yawˇ hui maꞈ yaˇ teˇ lanˬ gʼaˇ leh iˉ mvuhˇ lawˬ 300 lawˬ cawˬ ve yoˬ. (2 Raˍsaˍvanˍ 14:1, 6, 9, 10) Aˍsaˍ hkʼaˬ hkʼe te ve le? Yaˬhoˉvaˬ yawˇ ve chaw htaꞈ ga laˇ gʼa ve Aˍsaˍ hkʼa dehꞈ shiˍ ve yoˬ. Maꞈ te ve chi htaꞈ gʼaˇ tuˬ yawˇ hui Yaˬhoˉvaˬ geh bon lawˬ ve yoˬ. (2 Raˍsaˍvanˍ 14:11 gʼaw ve.) Chi awˬ gʼuˇ suhˍ htaˇ, awˬ nu ve jawˇmawˇ Yaˬhoˉvaˬ htaꞈ ka tiꞈ maˇ yeˬ ve htawˇ, yawˇ ve chaw htaꞈ ga piˇ jaw ve yoˬ. Yawˇ awˬ tehˬ awˬ na Gʼuiˬsha hpehꞈ ve tehꞈ shu shiˍ tcuh gaˇ ve pa taw, yawˇ chi hkʼe te ve yoˬ. (1 Jawˇmawˇ 20:13, 26-30) Yaꞈ hkʼaˇ, chi teˇ pawˆ Aˍsaˍ Gʼuiˬ sha htaꞈ gʼaˇ va ve pa taw, Gʼuiˬ sha yawˇ ve chaw htaꞈ ga piˇ ve yoˬ. Aˍsaˍ ve bon lawˬ hkawˇ Yaˬhoˉvaˬ hkʼawꞈ piˇ leh yawˇ hui maꞈ bawˆ ve htaꞈ gʼaˇ ve yoˬ. (2 Raˍsaˍvanˍ 14:12, 13) Yaꞈ hkʼaˇ, peuˬ hkʼawꞈ nawˉ Aˍsaˍ venˇ baˆ hehnˇ jaˇ ve teˇ ceuˬ htaꞈ te yaꞈ ve yoˬ. Yawˇ Suˇriˆ mvuhˇ miˬ ga laˇ tuˬ lawˬ ve yoˬ, Yaˬhoˉvaˬ geh maˇ heˆ. (1 Jawˇmawˇ 15:16-22) Yaꞈ hkʼaˇ, Aˍsaˍ Yaˬhoˉvaˬ htaꞈ haꞈ sheˍ ve yawˇ mawˬ ve yoˬ. Aˍsaˍ “yawˇ a shaꞈ teꞈ chehˇ ve teˇ co˗e, Gʼuiˬsha htaꞈ ka tiꞈ yeˬ chehˇ ve yoˬ.” Ngaˬ hui Aˍsaˍ htaꞈ hkʼaˬ hkʼe henˇ yuˬ gʼa ve le?—1 Jawˇmawˇ 15:14.

7, 8. Nawˬ Aˍsaˍ htaꞈ hkʼaˬ hkʼe te henˇ yuˬ gʼa tuˬ le?

⁷ Ngaˬ hui Yaˬhoˉvaˬ ve kanˉ nyi ma awˬ tawˬ hkʼa gaˬ te chehˇ ve, ngaˬ hui hkʼaˬ hkʼe te shiˍ ve le? Ngaˬ hui a shu yawˇ awˬ to htaꞈ na nyi cawˇ ve, ‘teˇ pawˆ pawˆ na yuˬ tuˬ haˍ jaˇ ve htawˇ, ngaˬ Yaˬhoˉvaˬ ve hkawˇ na yuˬ tuˬ laˇ? Yawˇ ve Hkriꞈ yaˇ awˬ moˍ daꞈ kehˬ ve haꞈ shaˉ tuˬ, ngaˬ te ceuˬ le le te chehˇ˗aw laˇ?’ Yawˇ awˬ pi jawˇ mawˇ ma maˇ kʼawꞈ gʼa te ve, Aˍsaˍ nyi ma hkʼaˬ hkʼe taw haꞈ hanˉ ve dawˇ nyi sheˍ. Aˍsaˍhkʼa shuˍ, teˇ pawˆ pawˆ ngaˬ hui kaꞈ nyi ma gʼa haꞈ hanˉ cawˇ ve yoˬ. Tawˇ pa haˉ te kʼo, yehˬ kʼa hkʼaw ve chaw, awˬ chawˇ daꞈ jaˇ ve, venˇ baˆ te yaꞈ leh maˇ dawˇ hpfuhˆ ve pa taw Hkriꞈ yaˇ awˬ moˍ hkʼaw gʼaꞈ tawˆ ve kʼo, nawˬ hkʼaˬ hkʼe te tuˬ le? Nawˬ yawˇ htaꞈ maˇ caˉ daꞈ˗o ve laˇ? Nawˬ ve nyi ma hkʼaw hkʼaˬ hkʼe dawˇ ve le?

⁸ Aˍsaˍ dawˇ ve hkʼa shuˍ, ngaˬ hui te ve dawˇ ve htaꞈ pa taw teˇ gʼaˇ le le ngaˬ hui htaꞈ maˇ dawˇ cawˇ jaˇ tehꞈ ngaˬ hui dawˇ puiˉ ve yoˬ hehˉ. Ngaˬ hui Yaˬhoˉvaˬ ve shaˉhkiˆhkanˍ ve pa taw saˍ laꞈ leh liꞈ teˇ geh henˇ ve awˬ chawˇ ngaˬ hui htaꞈ kʼoˆ guiˇ gʼuiˬ guiˇ laˇ jaw ve laˇ? Hpawnˬ daꞈ lonˉ kʼai tuˬ lawˬ jehˇ ve, kanˉ awˬ yanˇ leuˉ kʼai ve maˇ te ve pa taw kanˉ teˇ geh te chehˇ ve chaw ngaˬ hui htaꞈ kʼaꞈ jaˇ kʼoˆ laˇ tuˬ laˇ? Ngaˬ hui chi hkʼe gʼa hpuˇ htaˇ Aˍsaˍ hkʼa shuˍ Yaˬhoˉvaˬ htaꞈ gʼaˇ va sheˍ. Yaˬhoˉvaˬ geh bon lawˬ sheˍ, nyi ma haꞈ hanˉ ve htaꞈ caˉ leh kʼawꞈ te kʼai˗o. Yaˬhoˇvaˬ Aˍsaˍ htaꞈ awˬ gʼaˇ piˇ ve hkʼa shuˍ nawˬ htaꞈ kaꞈ awˬ gʼaˇ peꞈ laˇ tuˬ yoˬ.

9. Ngaˬ hui hto toˇ kʼai htaˇ Yaˬhoˉvaˬ ha lehˬ tuˬ hkʼaˬ hkʼe te cawˇ ve le?

⁹ Aˍsaˍ yawˇ awˬ pon ceh tiˉ maˇ dawˇ nyi, shu ‘Yaˬhoˉvaˬ ve a loˍ htaꞈ tiˉ te tuˬ Aˍsaˍ maˍ piˇ ve yoˬ.’ Shu Yaˬhoˉvaˬ htaꞈ oˉ kʼoˍ pui la tuˬ ngaˬ hui kaꞈ ga piˇ gʼa ve yoˬ. Yawˇ ve awˬ lawn ngaˬ hui shu htaꞈ kʼoˆ piˇ htaˇ, yawˇ nyi chehˇ ve yoˬ. Ngaˬ hui Yaˬhoˉvaˬ htaꞈ haꞈ leh awˬ nu ve chaw awˬ pon awˬ gʼuˇ suhˍ hpawˇ dawˇ haˍ ve pa taw, ngaˬ hui chi hkʼe te ve yawˇ mawˬ htaˇ yawˇ ha lehˬ jaˇ ve yoˬ!

Yawˇshaˍhpaˆ Yaˬhoˉvaˬ htaꞈ gʼaꞈ ca ve

10, 11. Yawˇshaˍhpaˆ htaꞈ ngaˬ hui hkʼaˬ hkʼe henˇ yuˬ gʼa ve le?

¹⁰ “Yawˇ ve awˬ pa Aˍsaˍ hkʼa shuˍ, yawˇ htawˇ Gʼuiˬ sha nyi ma cawˇ ve kanˉ htaꞈ tiˉ te ve yoˬ.” (2 Raˍsaˍvanˍ 20:31, 32) Yawˇ awˬ pa hkʼa shuˍ, yawˇshaˍhpaˆ caˉ leh mvuhˇ miˬ yaˇ Yaˬhoˉvaˬ htaꞈ oˉ kʼoˍ kʼawꞈ pui tcuh ve yoˬ. Yawˇ hawˉ hkʼaˆ paˍ htaꞈ Yuˇdaꞈ mvuhˇ miˬ teˇ kaˬ le le lo kʼai tcuh leh “Gʼuiˬ sha ve awˬ liˇ tawˇ hkawˇ liꞈ daw” maˍ tcuh ve yoˬ. (2 Raˍsaˍvanˍ17:7-10) Yawˇ awˬ na hpawˇ Iˉsaˍreˍlaˆ mvuhˇ miˬ kaꞈ kʼai leh yawˇ Eˇhpaˍrenˍ mvuhˇ miˬ yaˇ teˇ hpaˍ “Gʼuiˬ sha geh kʼawꞈ hpfuhˆ kʼawꞈ la tuˬ” awˬ gʼaˇ ca piˇ ve yoˬ. (2 Raˍsaˍvanˍ 19:4) Jawˇmawˇ Yawˇshaˍhpaˆ lehˬ Yaˬhoˉvaˬ htaꞈ gʼaꞈ ca leh “Gʼuiˬ sha nyi ma cawˇ ve kanˉ htaꞈ tiˉ te ve” yoˬ.—2 Raˍsaˍvanˍ 22:9.

¹¹ Chi beuꞈ teˇ co˗e, Yaˬhoˉvaˬ teˇ gʼaˇ le le htaꞈ yawˇ ve awˬ lawn henˇ tcuh gaˇ leh ngaˬ hui teˇ gʼaˇ le le kanˉ chi htaꞈ ga gʼa ve yoˬ. Nawˬ dawˇ teh taˍ ve kanˉ chi teˇ ha pa le le te˗aw laˇ? Nawˬ awˬ nu ve chaw htaꞈ Liꞈ hpu maˍ piˇ gaˇ leh yawˇ hui kaꞈ Yaˬhoˉvaˬ htaꞈ oˉ kʼoˍ tanˬ pui la tuˬ ga gaˇ˗aw laˇ? Awˬ lawn chi ve nawˬ bon lawˬ˗aw laˇ? Nawˬ coˇ caˇ ve kʼo, nawˬ Liꞈ hpu henˇ ve chaw cawˬ tuˬ Yaˬhoˉvaˬ ga laˇ tuˬyoˬ. Nawˬ awˬ to awˬ yanˇ yehˇ ve maˇ cawˬ maˇ ve htawˇ, shu htaꞈ Liꞈ hpu maˍ piˇ gaˇ˗aw laˇ? Yawˇshaˍhpaˆ awˬ nu ve chaw Yaˬhoˉvaˬ htaꞈ oˉ kʼoˍ kʼawꞈ pui la tuˬ ga piˇ ve hkʼa shuˍ awˬ viˉ awˬ nyi Gʼuiˬ sha ve kanˉ maˇ te ve chaw htaꞈ ngaˬ hui kaꞈ ga piˇ gʼa ve yoˬ. Chi hkʼoˆ kaꞈ, Hkriꞈ yaˇ awˬ moˍ hkʼaw nyi haꞈ shaˉ paˍ lehˬ tawˆ cheˆ ve chaw geh ca kʼawꞈ guiˇ˗e leh yawˇ htaꞈ ga piˇ ve yoˬ.

12, 13. (a) Yawˇshaˍhpaˆ kawˆ htaˇ, yawˇ hkʼaˬ hkʼe te ve le? (b) Yawˇshaˍhpaˆ htaꞈ aˬ hto ma te ngaˬ hui henˇ yuˬ cawˇ ve le?

¹² Yawˇshaˍhpaˆ yawˇ ve awˬ pa Aˍsaˍ hkʼa shuˍ, maꞈ moˍ lonˉ maˇ ve Yuˇdaꞈ chaw htaꞈ ca bawˆ la htaˇ, Yawˇshaˍhpaˆ Yaˬhoˉvaˬ htaꞈ gʼaˇ va ve yoˬ. (2 Raˍsaˍvanˍ 20:2-4 gʼaw ve.) Yawˇ kawˆ leh Yaˬhoˉvaˬ ga laˇ tuˬ lawˬ ve yoˬ. Yawˇ bon lawˬ hkawˇ hkʼaw haꞈ yuˬ ve yawˇ ve maꞈ yaˇ maˇ gʼa taˍ. Yawˇ hui hkʼaˬ hkʼe te tuˬ maˇ shiˍ tehꞈ yawˇ kʼoˆ ve yoˬ. Yawˇshaˍhpaˇ yonˍ ve, Yaˬhoˉvaˬ yawˇ hui htaꞈ ga laˇ tuˬ yoˬ. Yawˇ kʼoˆ ve, “ngaˬ hui nawˬ htaꞈ chiˇ nyi chehˇ ve yoˬ.”—2 Raˍsaˍvanˍ 20:12.

¹³ Yawˇshaˍhpaˆ hkʼa shuˍ, ngaˬ hui dawˇ haˍ ve awˬ lawn cawˬ htaˇ, hkʼaˬ hkʼe te tuˬ maˇ shiˍ leh kawˆ ve yoˬ. (2 Kawˇrenˍhtuˆ 4:8, 9) Yaꞈ hkʼaˇ, Yawˇshaˍhpaˆ hkʼaˬ hkʼe te ve ngaˬ hui maˇ leunˇ cawˇ. Teˇ gʼaˇ le le mehˆ gʼuˇ suhˍ yawˇ Yaˬhoˉvaˬ geh bon lawˬ leh yawˇ hui hkʼaˬ hkʼe taw awˬ gʼaˇ nuˇ ve kʼoˆ maˍ piˇ ve yoˬ. (2 Raˍsaˍvanˍ 20:5) Yehˬ shehˍ hpaˇ Yawˇshaˍhpaˆ htaꞈ henˇ yuˬ gʼa ve yoˬ. Nawˬ ve yehˬ kʼa dawˇ haˍ leh hkʼaˬ hkʼe te tuˬ maˇ shiˍ ve kʼo, Yaˬhoˉvaˬ ga laˇ tuˬ bon lawˬ˗oꞈ. Yehˬ kʼa hkʼaw ve chaw bon lawˬ hkawˇ chi htaꞈ na tcuh tuˬ taˇ yaꞈ taw. Nawˬ Yaˬhoˉvaˬ htaꞈ hkʼaˬ hkʼe taw gʼaˇ va ve yawˇ hui shiˍ tuˬ yoˬ. Yaˬhoˉvaˬ Yawˇshaˍhpaˆ htaꞈ ga piˇ jaw ve hkʼe, yawˇ nawˬ htaꞈ kaꞈ ga laˇ tuˬ yoˬ.

Heˍsaˍkiˆ hkʼaˬ htaˆ kaꞈ cawˇ ve htaꞈ te ve

14, 15. Heˍsaˍkiˆ Gʼuiˬ sha htaꞈ hkʼaˬ hkʼe te gʼaˇ hkʼa dehꞈ va ve le?

¹⁴ Heˍsaˍkiˆ kaꞈ jawˇ mawˇ teˇ gʼaˇ Yaˬhoˉvaˬ htaꞈ “ka tiꞈ yeˬ jaˇ” ve yoˬ. Yawˇ ve awˬ pa shaˉ hoꞈ htaꞈ oˉ kʼoˍ pui leh daꞈ ve henˇ yuˬ tuˬ maˇ hpehꞈ ve htawˇ, yawˇ ka tiꞈ yeˬ ve yoˬ. Heˍsaˍkiˆ “awˬ kaˍ awˬ nu ve gʼuiˬ sha teˇ hpaˍ htaꞈ oˉ kʼoˍ pui kuiˬ bon yehˬ teˇ hpaˍ htaꞈ yawˇ te luˬ piˇ leh, Aˍsheˍraˆ gʼuiˬ sha ma ve shaˉ hoꞈ teˇ hpaˍ htaꞈ htawˇ dawˆ paˆ piˇ ve yoˬ. Chi hkʼoˆ kaꞈ yawˇ lehˬ, Neˍhuˆtanˍ tehꞈ kʼoˆ ve aˬ sho˗e htaˇ Moˉseˍ te teh taˉ ve kuiˇ vuiˬ htaꞈ htawˇ, te luˬ piˇ ve yoˬ.” Iˉsaˍreˍlaˆ chaw vuiˬ oˇ ve htaꞈ oˉ kʼoˍ pui chehˇ ve pa taw, Heˍsaˍkiˆ oˇ hkʼe te luˬ piˇ ve yoˬ. Gʼuiˬ sha Moˉseˍ htaꞈ piˇ taˍ ve awˬ liˇ tawˇ hkawˇ hkʼa peu˗eˬ htaꞈ yawˇ na yuˬ ve yoˬ.—2 Jawˇmawˇ 18:1-6.

¹⁵ Heˍsaˍkiˆ jawˇ mawˇ hpehꞈ htaˇ, Aˍsuˇriˆ ve maꞈ yaˇ awˬ gʼaˇ uiˍ jaˇ leh Yuˇdaꞈ mvuhˇ miˬ htaꞈ ca bawˆ la leh Yeˍruˇsaˍlehnˍ venˇ htaꞈ te luˬ gaˇ ve yoˬ. Aˍsuˇriˆ ve jawˇ mawˇ Seˍnaˍhkaˍriˆ Yaˬhoˉvaˬ htaꞈ maˇ shawˍ maˇ caˆ kʼoˆ leh Heˍsaˍkiˆ laꞈ caˉ yaꞈ tuˬ te gaˇ ve yoˬ. Kawˆ tuˬ uiˍ jaˇ ve htawˇ, Heˍsaˍkiˆ Yaˬhoˉvaˬ htaꞈ gʼaˇ hkʼa dehꞈ va leh ga laˇ tuˬ bon lawˬ ve yoˬ. Gʼuiˬ sha Aˍsuˇriˆ chaw aꞈ kehˉ kanˇ paˆ uiˍ jaˇ leh yawˇ ve chaw ponˬ piˇ gʼa ve Heˍsaˍkiˆ shiˍ ve yoˬ. (Iˉsaˍyaˆ 37:15-20 gʼaw ve.) Bon lawˬ hkawˇ htaꞈ Gʼuiˬ sha hkʼawꞈ piˇ ve yoˬ. Mvuhˇ naw ma tcuh yaˇ teˇ gʼaˇ peu piˇ leh Aˍsuˇriˆ ve maꞈ yaˇ 185,000 gʼaˇ htaꞈ tiˇ pehˍ piˇ ve yoˬ.—Iˉsaˍyaˆ 37:36, 37.

16, 17. Nawˬ Heˍsaˍkiˆ htaꞈ hkʼaˬ hkʼe henˇ yuˬ gʼa ve le?

¹⁶ Peuˬ hkʼawꞈ nawˉ, Heˍsaˍkiˆ naˬ leh suh la paˇ neˇ htaˇ, yawˇ te taˍ ve ka tiꞈ yeˬ ve awˬ ceuˬ hkʼa peu˗eˬ Yaˬhoˉvaˬ dawˇ nawˇ laˇ leh ga laˇ tuˬ yawˇ lawˬ ve yoˬ. (2 Jawˇmawˇ 20:1-3 gʼaw ve.) Yaˬhoˉvaˬ Heˍsaˍkiˆ ve bon lawˬ hkawˇ htaꞈ na leh yawˇ htaꞈ na˗e la piˇ ve yoˬ. Liꞈ hpu ngaˬ hui htaꞈ maˍ laˇ ve chi beuꞈ teˇ co˗e, ngaˬ hui na˗e la tuˬ leh chi maw maw gʼa teꞈ chehˇ kʼai tuˬ, yawˇ anˇ tuˬ maˇ te laˇ. Yaꞈ hkʼaˇ, ngaˬ hui kaꞈ Heˍsaˍkiˆ hkʼa shuˍ te leh Gʼuiˬ sha htaꞈ gʼaˇ va gʼa ve yoˬ. Ngaˬ hui kaꞈ yawˇ htaꞈ kʼoˆ piˇ gʼa ve, “Gʼuiˬ sha˗oˬ, ngaˬ lehˬ ka tiꞈ yeˬ ve awˬ hkʼaw lo nawˬ ve kanˉ htaꞈ te leh, nawˬ te tcuh laˇ gaˇ ve kanˉ teˇ hpaˍ htaꞈ hkʼa dehꞈ te taˉ peuˬ ve htaꞈ a ciˉ dawˇ nawˇ laˇ˗oˆ.” Nawˬ maˇ chehˇ sha ve htawˇ, Yaˬhoˉvaˬ nawˬ htaꞈ haꞈ shaˉ laˇ ve nawˬ yonˍ˗aw laˇ?—Chiˇ mvuh ve 41:3.

¹⁷ Ngaˬ hui Heˍsaˍkiˆ ve awˬ lawn teˇ maˬ kʼawꞈ henˇ yuˬ gʼa ve yoˬ. Ngaˬ hui Yaˬhoˉvaˬ geh meuˆ daꞈ leh yawˇ ve kanˉ maˇ gʼa te tuˬ teˇ ceuˬ ceuˬ taw laˇ chehˇ ve yoˬ hehˉ. Tawˇ pa haˉ te kʼo, laiˉ gʼaˇ chaw yaˇ htaꞈ gʼuiˬ sha hkʼe leˇ te yawˆ yan chehˇ ve yoˬ. Awˬ han te paˍ, yawˇ hui maˇ mawˬ jaw ve chaw htaꞈ chiˇ mvuh piˇ ve yoˬ. Awˬ meh bvuhˬ ve chaw hui ve awˬ han nyi leh awˬ lawn gʼaw tuˬ, yawˇ hui awˬ yanˇ yehˇ maˇ jaˇ ve yoˬ. Teˇ hpaˍ hpaˍ in˗teu˗neꞈ (internet) yehˇ leh awˬ nu ve chaw htaꞈ tawˇ yaw ve dawˇ cawˇ jaˇ ve yoˬ. Yehˬ kʼa hkʼaw ve chaw, awˬ chawˇ htaꞈ yaw daꞈ tuˬ, ngaˬ hui kaꞈ awˬ hkʼaˇ chi hkʼe yehˇ ve yoˬ. Yaꞈ hkʼaˇ, ngaˬ hui kaꞈ in˗teu˗neꞈ yehˇ ve awˬ yanˇ shonˇ maˇ jaˇ ve yoˬ hehˉ. Teˇ pawˆ pawˆ laiˉ gʼaˇ ngaˬ hui ve awˬ han htaꞈ nyi leh dawˇ cawˇ jaˇ kʼoˆ laˇ leh ngaˬ hui kaꞈ ha lehˬ jaˇ ve yoˬ. Maˇ heˆ kʼo, ngaˬ hui in teu neꞈ hkʼaw keu taˍ ve awˬ han htaꞈ shu maˇ nyi˗o ve kʼo, ngaˬ hui nyi hkʼaˇ maˇ suh. Tcuh yaˇ Pawˇluꞈ, Piˇkiˇlaˆ, Aˍkuˉlaˆ ve awˬ lawn htaꞈ ngaˬ hui henˇ yuˬ sheˍ. “Shu aˬ htoꞈ ma te chehˇ ve naˍ” yawˇ hui teˇ nyi le le awˬ yanˇ maˇ yehˇ leh maˇ nyi. Yaˬhoˉvaˬ htaꞈ oˉ kʼoˍ maˇ pui ve chaw htaꞈ yawˇ hui a yeˇ maˇ te˗o ve yoˬ. Liꞈ hpu hkʼaw kʼoˆ ve, Pawˇluꞈ bon ‘gʼaˇ hteꞈ maˍ chehˇ ve yoˬ.’ Piˇkiˇlaˆ leh Aˍkuˉlaˆ hkʼaˬ htaˆ kaꞈ ‘Gʼuiˬ sha ve awˬ lawn shu htaꞈ hkʼa dehꞈ hteˇ lehˍ kʼawꞈ maˍ piˇ ve yoˬ.’ (Tcuh yaˇ 18:4, 5, 26) A shu yawˇ awˬ to htaꞈ na nyi cawˇ ve ‘ngaˬ hui awˬ nu ve chaw htaꞈ gʼuiˬ sha hkʼe leˇ te yawˆ yan˗aw laˇ? A yeˇ maˇ uiˍ ve htaꞈ ngaˬ hui awˬ yanˇ yehˇ maˇ˗aw laˇ?’—Eˇfeˇsuꞈ 5:15, 16 gʼaw ve.

Yawˇshiˆ Yaˬhoˉvaˬ ve hkawˇ na yuˬ ve

18, 19. Yawˇshiˆ hkʼa shuˍ hpehꞈ tuˬ ngaˬ hui hkʼaˬ hkʼe gʼa te ve le?

¹⁸ Yawˇshiˆ kaꞈ “nyi ma awˬ tawˬ hkʼa gaˬ” Yaˬhoˉvaˬ hkawˇ na yuˬ ve jawˇ mawˇ teˇ gʼaˇ hpehꞈ ve yoˬ. (2 Raˍsaˍvanˍ 34:31) Yawˇshiˆ Heˍsaˍkiˆ ve awˬ haˆ hpehꞈ ve yoˬ. Yawˇ yaˇ nehˬ hpehꞈ chehˇ htaˇ, “yawˇ ve awˬ puˍ lonˉ Daˍviˆ ve Gʼuiˬ sha htaꞈ yawˇ oˉ kʼoˍ tanˬ pui ve yoˬ.” Yawˇshiˆ a shaꞈ 20 hkʼawꞈ gaˬ htaˇ, yawˇ Yuˇdaꞈ mvuhˇ miˬ lo shaˉ hoꞈ teˇ hpaˍ htaꞈ tanˬ yuˬ baˬ ve yoˬ. (2 Raˍsaˍvanˍ 34:1-3 gʼaw ve.) Yawˇshiˆ awˬ nu ve jawˇ mawˇ aꞈ kehˉ Yaˬhoˉvaˬ ha lehˬ tuˬ coˇ caˇ leh te piˇ ve yoˬ. Teˇ nyi htaˇ, paw hkuˇ lonˉ bon yehˬ hkʼaw Gʼuiˬ sha ve awˬ liˇ tawˇ hkawˇ mawˬ ve yoˬ. Liꞈ chi ve lehˬ, Moˉseˍ yawˇ awˬ to bvuhꞈ taˍ ve liꞈ hpehꞈ ve yoˬ hehˉ! Ceˇ leˇ lehˬ liꞈ chi ve Yawˇshiˆ htaꞈ gʼaw maˍ piˇ htaˇ, Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui tuˬ, yawˇ te chehˇ ve aꞈ kehˉ gʼa kʼawꞈ te ve yawˇ shiˍ ve yoˬ. Shu kaꞈ hkʼa shuˍ te tuˬ awˬ gʼaˇ piˇ ve yoˬ. Chi htaꞈ pa taw, yawˇ a shaꞈ teꞈ chehˇ ve teˇ co˗e, yawˇ lehˬ chaw yaˇ teˇ hpaˍ htaꞈ Gʼuiˬ sha ve a loˍ cawˇ ve kanˉ htaꞈ tiˉ te tcuh ve yoˬ.—2 Raˍsaˍvanˍ 34:27, 33.

¹⁹ Nawˬ yaˇ nehˬ hpehꞈ ve kʼo, Yawˇshiˆ htaꞈ henˇ yuˬ leh Yaˬhoˉvaˬ htaꞈ shiˍ maˇ la ve yoˬ. Yawˇshiˆ yawˇ ve awˬ puˍ Jawˇmawˇ Maˍnaˍseˍ geh henˇ yuˬ ve yoˬ. Maˍnaˍseˍ venˇ baˆ dawˇ hpfuhˆ ve pa taw, Yaˬhoˉvaˬ venˇ baˆ hpehˇ piˇ ve yoˬ. Yehˬ kʼa hkʼaw, Hkriꞈ yaˇ awˬ moˍ hkʼaw a shaꞈ maˇ ve chaw geh nawˬ kaꞈ henˇ yuˬ gʼa ve yoˬ. Yaˬhoˉvaˬ daꞈ ve awˬ ceuˬ laiˉ ceuˬ yawˇ hui htaꞈ te piˇ ve nawˬ htaꞈ kʼaoˍ maˍ laˇ gʼa ve yoˬ. Gʼuiˬ sha ve tawˇ hkawˇ Yawˇshiˆ shiˍ maˇ la peuˬ hkʼawꞈ nawˉ yawˇ hkʼaˬ hkʼe dawˇ ve le? Yawˇ Yaˬhoˉvaˬ ha lehˬ tuˬ te piˇ gaˇ leh laꞈ haˉ pa ve yoˬ. Nawˬ Liꞈ hpu gʼaw ve kʼo, Yaˬhoˉvaˬ ve hkawˇ gʼaˇ hteꞈ kʼawꞈ na gaˇ ve nawˬ dawˇ ve yoˬ. Chi htaꞈ pa taw, nawˬ yawˇ htaꞈ meuˆ daꞈ maˇ la leh ha lehˬ jaˇ ve yoˬ. Yaˬhoˉvaˬ ve awˬ lawn nawˬ shu htaꞈ kaꞈ kʼoˆ maˍ piˇ gaˇ ve yoˬ. (2 Raˍsaˍvanˍ 34:18, 19 gʼaw ve.) Nawˬ Liꞈ hpu henˇ ve kʼo, Yaˬhoˉvaˬ htaꞈ oˉ kʼoˍ pui ve hkʼaˬ hkʼe daꞈ taˆ la ve nawˬ kaꞈ shiˍ ve yoˬ. Yawˇshiˆ te jaw ve hkʼa shuˍ nawˬ kaꞈ pa cawˇ ve yoˬ.

Yaˬhoˉvaˬ ve kanˉ nyi ma awˬ tawˬ hkʼa gaˬ te ve!

20, 21. (a) Jawˇmawˇ chi awˇ gʼaˇ hkʼaˬ hkʼe shuˍ daꞈ ve le? (b) Awˬ gʼuˇ suhˍ teˇ lawn ngaˬ hui aˬ htoꞈ ma henˇ tuˬ le?

²⁰ Yuˇdaꞈ ve jawˇ mawˇ awˇ gʼaˇ yawˇ hui Yaˬhoˉvaˬ ve kanˉ nyi ma awˬ tawˬ hkʼa gaˬ te ve ngaˬ hui aˬ htoꞈ ma henˇ gʼa ve le? Yaˬhoˉvaˬ ha lehˬ tuˬ yawˇ hui te piˇ gaˇ leh, yawˇ hui a shaꞈ teꞈ chehˇ ve teˇ co˗e Yaˬhoˉvaˬ htaꞈ oˉ kʼoˍ pui ve yoˬ. Canˇ paˍ kanˇ paˆ uiˍ ve ca bawˆ la htaˇ, yawˇ hui Yaˬhoˉvaˬ htaꞈ gʼaˇ va ve yoˬ. A yeˇ uiˍ jaˇ ve lehˬ yawˇ hui Yaˬhoˉvaˬ htaꞈ haꞈ ve pa taw, yawˇ htaꞈ oˉ kʼoˍ pui ve yoˬ.

²¹ Jawˇmawˇ chi awˇ gʼaˇ maˇ biˇ leh teˇ pawˆ pawˆ te yaꞈ ve htawˇ, Yaˬhoˉvaˬ yawˇ hui htaꞈ nyi hkʼaˇ suh sheˍ ve yoˬ. Yawˇ hui nyi ma hkʼaw hkʼaˬ hkʼe cawˬ ve Yaˬhoˉvaˬ mawˬ leh, yawˇ hui yawˇ htaꞈ haꞈ jaˇ ve tehꞈ shiˍ ve yoˬ. Ngaˬ hui kaꞈ maˇ biˇ leh te yaꞈ puiˉ ve yoˬ. Yaꞈ hkʼaˇ, ngaˬ hui nyi ma awˬ tawˬ hkʼa gaˬ Yaˬhoˉvaˬ ve kanˉ te ve kʼo, yawˇ ngaˬ hui htaꞈ nyi hkʼaˇ suh tuˬ yoˬ. Awˬ gʼuˇ suhˍ teˇ lawn, jawˇ mawˇ chi teˇ hpaˍ yawˇ hui te yaꞈ ve awˬ lawn ngaˬ hui henˇ tuˬ yoˬ.