Nawˬ ve nyi ma lehˬ bvuhꞈ taˍ ve hkʼe gʼaꞈ te gaˇ˗aw laˇ?

1, 2. Yuˇdaꞈ ve jawˇ mawˇ awˇ gʼaˇ ve awꞈ lawn ngaˬ hui aˬ htoꞈ ma te dawˇ nyi cawˇ ve le?

Chaw teˇ gʼaˇ yaꞈ kʼaw maˇ daꞈ ve htaꞈ juˇ kʼai leh paiˍ ve htaꞈ mawˬ ve kʼo, teˇ caˆ tiˉ juˇ kʼai cawˇ ve kʼo, ngaˬ hui kaꞈ gʼa faˍ cawˇ ve yoˬ. Chi hkʼa shuˍ shuˍ, shu te yaꞈ ve htaꞈ mawˬ ve kʼo, yawˇ hui hkʼe leˇ maˇ gʼa te yaꞈ ve yoˬ. Tawˇ pa haˉ te kʼo, Liꞈ hpu hkʼaw bvuhꞈ taˍ ve te yaꞈ jaw ve chaw awˬ lawn ngaˬ hui htaꞈ maˍ laˇ gʼa ve yoˬ.

² Ngaˬ hui henˇ laˬ peuˬ ve Yuˇdaꞈ ve jawˇ mawˇ awˇ gʼaˇ Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui ve yoˬ. Yaꞈ hkʼaˇ, yawˇ hui kaꞈ venˇ baˆ uiˍ jaˇ ve htaꞈ te yaꞈ jaw ve yoˬ. Yawˇ hui hpehꞈ laˬ jaw ve awˬ lawn Liꞈ hpu hkʼaw bvuhꞈ taˍ ve pa taw, ngaˬ hui hkʼa dehꞈ dawˇ nyi gʼa ve yoˬ. Yawˇ hui ve awˬ lawn ngaˬ hui htaꞈ aˬ htoꞈ ma maˍ laˇ gʼa ve le? Ngaˬ hui yawˇ hui hkʼe leˇ maˇ te yaꞈ tuˬ hkʼaˬ hkʼe te gʼa ve le?—Roˉmaꞈ liꞈ 15:4 gʼaw ve.

Chaw yaˇ ve cuˇ yiˍ htaꞈ gʼaˇ va ve lehˬ kawˆ tuˬ cawˬ ve

3-5. (a) Aˍsaˍ Yaˬhoˉvaˬ htaꞈ nyi ma awˬ tawˬ hkʼa gaˬ haꞈ ve htawˇ, yawˇ aˬ htoꞈ ma htaꞈ te yaꞈ ve le? (b) Baˍshaˍ ca bawˆ la htaˇ, Aˍsaˍ chaw yaˇ htaꞈ aˬ htoꞈ ma te gʼaˇ va ve le?

³ Aˍsaˍ htaꞈ dawˇ nyi sheˍ. Suˍdanˍ (Ehˇtaˍyoˇpiˆ, MGS) mvuhˇ miˬ ve maꞈ yaˇ teˇ lanˬ gʼaˇ Yuˇdaꞈ chaw htaꞈ ca bawˆ la htaˇ, Aˍsaˍ Yaˬhoˉvaˬ htaꞈ gʼaˇ va ve yoˬ. Yaꞈ hkʼaˇ, Iˉsaˍreˍlaˆ ve jawˇ mawˇ Baˍshaˍ htaꞈ bawˆ daꞈ htaˇ, Aˍsaˍ Yaˬhoˉvaˬ htaꞈ gʼaˇ maˇ va. Raˍmaˆ venˇ lehˬ Iˉsaˍreˍlaˆ mvuhˇ miˬ hkʼaw cawˬ ve Yuˇdaꞈ mvuhˇ miˬ awˬ paˇ lo a yeˇ uiˍ ve venˇ hpehꞈ ve yoˬ. Hkʼe te leh, Aˍsaˍ lehˬ Baˍshaˍ ve maꞈ yaˇ maˇ ve oˇ kaꞈ lo maˇ chehˇ tcuh gaˇ. (2 Raˍsaˍvanˍ 16:1-3) Aˍsaˍ jawˇ mawˇ Suˇriˆ ga laˇ tuˬ laꞈ shawnˍ nawˉ piˇ ve yoˬ. Suˇriˆ maꞈ yaˇ Iˉsaˍreˍlaˆ mvuhˇ miˬ hkʼaw venˇ teˇ hpaˍ hpaˍ htaꞈ ca bawˆ˗e htaˇ, Baˍshaˍ lehˬ “Raˍmaˆ venˇ htaꞈ maˇ kʼawꞈ gʼu te leh baˬ taˉ ve yoˬ.” (2 Raˍsaˍvan 16:5) Awˉ lawˉ htaˇ, Aˍsaˍ yawˇ dawˇ cheˆ ve cawˇ ve yoˬ tehꞈ dawˇ ve yoˬ hehˉ.

⁴ Yaꞈ hkʼaˇ, Yaˬhoˉvaˬ hkʼaˬ hkʼe dawˇ ve le? Aˍsaˍ Yaˬhoˉvaˬ htaꞈ gʼaˇ maˇ va ve yawˇ maˇ ha lehˬ. Yawˇ tcuh kaˍ paˍ Haˍnaˍniˆ htaꞈ yehˇ leh Aˍsaˍ htaꞈ ca maˍ tcuh ve yoˬ. (2 Raˍsaˍvanˍ 16:7-9 gʼaw ve.) Haˍnaˍniˆ Aˍsaˍ htaꞈ kʼoˆ piˇ ve, “Yaꞈ nyi hkʼawꞈ nawˉ, nawˬ lehˬ teˇ hkui teˇ hkui maꞈ gʼa bawˆ tuˬ yoˬ.” Aˍsaˍ Raˍmaˆ venˇ htaꞈ uˉ peunˍ gʼa ve htawˇ, yawˇ leh yawˇ ve maꞈ yaˇ teˇ hpaˍ a shaꞈ teꞈ ve teˇ co˗e laiˉ pawˆ gʼa bawˆ daꞈ ve yoˬ.

⁵ Peuˬ˗aˉ ve teˇ lawn ngaˬ hui gʼa henˇ ve Yaˬhoˉvaˬ Aˍsaˍ htaꞈ ha lehˬ jaˇ ve yoˬ. Aˍsaˍ maˇ biˇ ve htawˇ, Aˍsaˍ nyi ma awˬ tawˬ hkʼa gaˬ Yaˬhoˉvaˬ htaꞈ haꞈ ve yawˇ mawˬ ve yoˬ. (1 Jawˇmawˇ 15:14) Yaꞈ hkʼaˇ, Aˍsaˍ dawˇ cheˆ ve maˇ cawˇ ve pa taw, yawˇ te taˍ ve htaꞈ gʼa hpuˇ ve yoˬ. Aˍsaˍ yawˇ awˬ to leh awˬ nu ve chaw htaꞈ aˬ htoꞈ ma te gʼaˇ va ve le? Yaˬhoˉvaˬ htaꞈ aˬ htoꞈ ma te gʼaˇ maˇ va ve le? Aˍsaˍ yawˇ cuˇ yiˍ cawˬ ve hkʼaw maꞈ bawˆ ve htaꞈ gʼaˇ ve yoˬ tehꞈ dawˇ ve yoˬ hehˉ. Maˇ heˆ kʼo, awˬ nu ve chaw beˆ maˍ piˇ ve maˇ cawˇ ve hkawˇ na ve yoˬ hehˉ.

6. Aˍsaˍ te yaꞈ taˍ ve ngaˬ hui htaꞈ aˬ htoꞈ ma maˍ laˇ ve le? Tawˇ pa haˉ kʼoˆ maˍ laˇ sheˍ.

⁶ Aˍsaˍ te yaꞈ ve ngaˬ hui htaꞈ aˬ htoꞈ ma maˍ laˇ ve le? Teˇ pawˆ le le ngaˬ hui Yaˬhoˉvaˬ htaꞈ gʼaˇ va cawˇ ve, ngaˬ hui ve dawˇ hkʼaˇ htaꞈ maˇ heˆ. Ngaˬ hui gʼa hpuˇ ve uiˍ ve i ve maˇ kʼoˆ, Yaˬhoˉvaˬ ga laˇ tuˬ gʼa lawˬ ve yoˬ. A shu yawˇ awˬ to htaꞈ na nyi cawˇ ve, teˇ pawˆ pawˆ gʼa hpuˇ ve awˬ lawn htaꞈ gu tuˬ a shu yawˇ awˬ to htaꞈ gʼaˇ va˗aw laˇ? Teˇ pawˆ pawˆ Liꞈ hpu hkʼaw bvuhꞈ taˍ laˇ ve htaꞈ dawˇ nyi leh coˇ caˇ ve hkʼaw gʼaꞈ te˗aw laˇ? Tawˇ pa haˉ te kʼo, hpawnˬ daꞈ ve leh hpawnˬ daꞈ lonˉ lo kʼai htaˇ yehˬ kʼa hkʼaw ve chaw tawˍ laˇ ve kʼo, nawˬ hkʼaˬ hkʼe te tuˬ le? Nawˬ hkʼaˬ hkʼe te tuˬ Yaˬhoˉvaˬ htaꞈ na nyi˗aw laˇ? Nawˬ kanˉ maˇ gʼa te ve maw˗o ve, peuˬ hkʼawꞈ nawˉ shu nawˬ htaꞈ kanˉ kʼawꞈ peꞈ laˇ ve kʼo, nawˬ hkʼaˬ hkʼe te tuˬ le? Kʼoˆ piˇ ve chi maˇ sha ve htawˇ, nawˬ teˇ shinˉ le le hpawnˬ daꞈ kuiˬ lo gʼa kʼai tuˬ kʼoˆ piˇ˗aw laˇ? Ngaˬ hui aˬ htoꞈ ma gʼa hpuˇ ve htawˇ, Chiˇ mvuh ve liꞈ hkʼaw beˆ maˍ laˇ hkawˇ chi htaꞈ taˇ leunˇ. “Nawˬ ve awˬ to Gʼuiˬ sha htaꞈ chiˇ aꞈ piˇ leh, yawˇ htaꞈ gʼaˇ va˗o. Yawˇ nawˬ htaꞈ ga laˇ tuˬ yoˬ.”—Chiˇ mvuh ve 37:5.

Ngaˬ hui maˇ daꞈ ve awˬ chawˇ leuˆ ve kʼo hkʼaˬ hkʼe hpehꞈ la ve le?

7, 8. Yawˇshaˍhpaˆ aˬ htoꞈ ma te yaꞈ ve le? Aˬ htoꞈ ma hpehꞈ la ve le? (Awˬ lawn tanˬ htaˇ ve awˬ han htaꞈ nyi sheˍ.)

⁷ Aˍsaˍ ve yaˇ Yawˇshaˍhpaˆ htaꞈ dawˇ nyi sheˍ. Yawˇ te hkʼaˇ dawˇ hkʼaˇ laiˉ ceuˬ daꞈ ve pa taw, Yaˬhoˉvaˬ yawˇ htaꞈ ha lehˬ ve yoˬ. Yawˇ Yaˬhoˉvaˬ htaꞈ gʼaˇ va ve teˇ yanˇ daꞈ ve htaꞈ laiˉ ceuˬ te ve yoˬ. Yaꞈ hkʼaˇ yawˇ dawˇ cheˆ ve maˇ cawˇ ve kaꞈ cawˬ ve yoˬ. Yawˇ ve yaˇ paˍ maˇ daꞈ ve jawˇ mawˇ Aˍhaˆ ve yaˇ htaꞈ heuˆ daꞈ tcuh ve yoˬ. Aˍhaˆ Suˇriˆ chaw htaꞈ ca bawˆ˗e te htaˇ, tcuh kaˍ paˍ Miˆhkaˍ Yawˇshaˍhpaˆ maˇ kʼai tuˬ shaˍ tiꞈ piˇ ve yoˬ. Yaꞈ hkʼaˇ Yawˇshaˍhpaˆ maˇ na. Suˇriˆ maꞈ yaˇ Yawˇshaˍhpaˇ htaꞈ tiˇ pehˍ tuˬ coˇ caˇ ve yoˬ. (2 Raˍsaˍvanˍ 18:1-32) Yawˇ Yeˍruˆsaˍlehnˍ venˇ lo kʼoꞈ˗e htaˇ, tcuh kaˍ paˍ Yeˍhuˆ yawˇ htaꞈ na piˇ ve, “haiˬ ve chaw htaꞈ ca ga piˇ leh, Gʼuiˬ sha canˇ ve chaw htaꞈ awˬ chawˇ ca te piˇ ve lehˬ cawˇ ve yoˬ, tehꞈ nawˬ dawˇ ve laˇ?”—2 Raˍsaˍvanˍ 19:1-3 gʼaw ve.

⁸ Yawˇshaˍhpaˆ shoꞈ shaꞈ ve laiˉ ceuˬ gʼa hpuˇ leh tcuh kaˍ paˍ yawˇ htaꞈ shaˍ tiꞈ piˇ ve htawˇ, yawˇ teꞈ chiˉ awˬ bon maˇ gʼa. Yawˇshaˍhpaˆ Yaˬhoˉvaˬ htaꞈ haꞈ leh ha lehˬ tuˬ te piˇ gaˇ ve htawˇ, yawˇ Aˍhaˆ ve yaˇ Aˍhaˍziˆ htaꞈ awˬ chawˇ ca kʼawꞈ te ve yoˬ. Aˍhaˍziˆ kaꞈ Yaˬhoˉvaˬ htaꞈ oˉ kʼoˍ maˇ pui ve yoˬ. Yawˇshaˍhpaˆ Aˍhaˍziˆ heuˇ shan hpawˇ laiˉ maˬ teˇ geh te ve yoˬ. Yaꞈ hkʼaˇ, maˇ gʼa yehˇ sheˍ kaꞈ luˬ kʼai ve yoˬ.—2 Raˍsaˍvanˍ 20:35-37.

9. Ngaˬ hui maˇ daꞈ ve awˬ chawˇ leuˆ ve kʼo, hkʼaˬ hkʼe hpehꞈ tuˬ le?

⁹ Yawˇshaˍhpaˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? Yawˇ cawˇ ve htaꞈ te leh “Gʼuiˬ sha nyi ma cawˇ ve kanˉ htaꞈ tiˉ te” ve yoˬ. (2 Raˍsaˍvanˍ 22:9) Yaꞈ hkʼaˇ, Yaˬhoˉvaˬ htaꞈ maˇ haꞈ ve chaw geh awˬ chawˇ te ve yawˇ leuˆ ve yoˬ. Chi htaꞈ pa taw, yawˇ shoꞈ shaꞈ ve awˬ lawn cawˬ maˇ jaˇ leh aˬ laˬ hkʼe shu tiˇ pehˍ ve htaꞈ gʼa hpuˇ ve yoˬ. Liꞈ hpu chi teˇ tawn htaꞈ tawnˇ taˍ cawˇ ve yoˬ. “Cuˇ yiˍ cawˬ ve chaw htaꞈ awˬ chawˇ te˗o. Nawˬ htawˇ cuˇ yiˍ cawˬ la tuˬ yoˬ. Cuˇ yiˍ maˇ cawˬ ve chaw htaꞈ awˬ chawˇ te ve kʼo, nawˬ htawˇ gʼa luˬ gʼa sheˆ tuˬ yoˬ.” (Tawˇ naˉ ve 13:20) Yaˬhoˉvaˬ ve awˬ lawn ngaˬ hui shu htaꞈ kʼoˆ piˇ gaˇ ve yoˬ. Yaꞈ hkʼaˇ, Yaˬhoˉvaˬ htaꞈ oˉ kʼoˍ maˇ pui ve chaw geh awˬ chawˇ meuˆ daꞈ jaˇ ve lehˬ kawˆ tuˬ cawˬ ve yoˬ.

10. (a) Heuˆ daꞈ gaˇ ve chaw htaꞈ Yawˇshaˍhpaˆ ve awˬ lawn hkʼaˬ hkʼe maˍ laˇ ve le? (b) Ngaˬ hui aˬ htoꞈ ma htaꞈ dawˇ nawˇ taˍ cawˇ ve le?

¹⁰ Ngaˬ hui heuˆ daꞈ gaˇ ve kʼo, Yawˇshaˍhpaˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ htaꞈ maˇ haꞈ ve chaw ngaˬ hui tanˬ dawˇ cawˇ ve yoˬ hehˉ. Gʼuiˬ sha ve chaw hkʼaw ngaˬ hui heuˆ daꞈ tuˬ ve chaw maˇ cawˬ tehꞈ dawˇ la ve yoˬ. Ngaˬ hui maˇ mawˇ sheˍ htaˇ, gʼa heuˆ daꞈ cawˇ ve yoˬ tehꞈ ngaˬ hui ve awˬ viˉ awˬ nyi laiˉ pawˆ kʼoˆ laˇ ve yoˬ. Ngaˬ hui awˬ nu ve teˇ gʼaˇ htaꞈ haꞈ tuˬ a yeˇ uiˍ jaˇ ve yoˬ. Awˬ lawn kʼo, Yaˬhoˉvaˬ te hpanˍ laˇ ve yoˬ. Yaꞈ hkʼaˇ, ngaˬ hui heuˆ daꞈ tuˬ keunˍ ve chaw ca maˇ gʼa ve kʼo, hkʼaˬ hkʼe te tuˬ le? Yawˇshaˍhpaˆ ve awˬ lawn ngaˬ hui htaꞈ maˍ laˇ gʼa ve yoˬ. Yawˇshaˍhpaˆ Yaˬhoˉvaˬ ga laˇ tuˬ teˇ hkui teˇ hkui lawˬ ve yoˬ. (2 Raˍsaˍvanˍ 18:4-6) Yaꞈ hkʼaˇ, Aˍhaˆ Yaˬhoˉvaˬ htaꞈ maˇ haꞈ ve chaw geh Yawˇshaˍhpaˆ awˬ chawˇ ca te htaˇ, Yawˇshaˍhpaˆ Gʼuiˬ sha shaˍ tiꞈ piˇ ve hkawˇ maˇ na yuˬ ve yoˬ. Yawˇshaˍhpaˆ dawˇ nawˇ taˍ cawˇ ve, “Gʼuiˬ sha lehˬ, miˬ guiˬ chaw yaˇ hkʼa peu˗eˬ ve htaꞈ hkʼa dehꞈ nyi haꞈ shaˉ piˇ chehˇ ve yoˬ. Yawˇ htaꞈ ka tiꞈ yeˬ chehˇ ve chaw htaꞈ yawˇ awˬ gʼaˇ uiˍ la piˇ ve yoˬ.” (2 Raˍsaˍvanˍ 16:9) Yaˬhoˉvaˬ ngaˬ hui htaꞈ ga laˇ ve tehꞈ dawˇ nawˇ taˍ cawˇ ve yoˬ. Yawˇ ngaˬ hui htaꞈ haꞈ leh ngaˬ hui gʼa hpuˇ chehˇ ve awˬ ceuˬ yawˇ hkʼa dehꞈ shiˍ ve yoˬ. Awˬ yanˇ cawˇ htaˇ, nawˬ yehˬ kʼa keunˍ lawꞈ cawˇ lawꞈ ve Yaˬhoˉvaˬ peꞈ laˇ gʼa tuˬ yoˬ!

Nawˬ ve nyi ma taˇ uiˍ tcuh

11, 12. (a) Yaˬhoˉvaˬ Heˍsaˍkiˆ ve nyi ma htaꞈ hkʼaˬ hkʼe te lawˇ nyi piˇ ve le? (b) Aˬ htoꞈ ma te Yaˬhoˉvaˬ Heˍsaˍkiˆ htaꞈ venˇ baˆ hpehˇ piˇ ve le?

¹¹ Heˍsaˍkiˆ ve awˬ lawn ngaˬ hui htaꞈ aˬ hto ma maˍ laˇ ve le? Heˍsaˍkiˆ yawˇ ve nyi ma hkʼaw hkʼaˬ hkʼe cawˬ ve yawˇ shiˍ tuˬ Yaˬhoˉvaˬ ga piˇ ve yoˬ. (2 Raˍsaˍvanˍ 32:31 gʼaw ve.) Heˍsaˍkiˆ naˬ jaˇ htaˇ, yawˇ na˗e la tuˬ Gʼuiˬ sha kʼoˆ piˇ leh yawˇ htaꞈ awˬ heˆ mawˬ tcuh ve yoˬ. Yaˬhoˉvaˬ aˉ gʼuiˬ ha htaꞈ teˇ chi hkʼehꞈ kʼoꞈ˗e tcuh ve yoˬ. Hkʼawꞈ nawˉ htaˇ, awˬ heˆ chi ve Baˍbuˍlonˍ jawˇ mawˇ teˇ hpaˍ shiˍ gaˇ jaˇ ve pa taw, awˬ tan te shehˍ hpaˇ hui Heˍsaˍkiˆ htaꞈ ca na nyi tcuh ve yoˬ. (2 Jawˇmawˇ 20:8-13; 2 Raˍsaˍvan 32:24) Heˍsaˍkiˆ hkʼaˬ hkʼe te tuˬ Yaˬhoˉvaˬ maˇ kʼoˆ piˇ. Liꞈ hpu hkʼaw kʼoˆ ve, Heˍsaˍkiˆ ve nyi ma htaꞈ Yaˬhoˉvaˬ “lawˇ nyi gaˇ” ve yoˬ. Heˍsaˍkiˆ yawˇ ve hpu shi mawˇ jeˬ hkʼa peu˗eˬ yawˇ hui htaꞈ maw piˇ ve yoˬ. Heˍsaˍkiˆ yawˇ chi hkʼe te ve nyi ma hkʼaw hkʼaˬ hkʼe cawˬ ve ngaˬ hui shiˍ gʼa ve yoˬ.

¹² Heˍsaˍkiˆ nyi ma uiˍ ve mvuh ve chaw hpehꞈ la ve yoˬ. “Yawˇ lehˬ Gʼuiˬ sha yawˇ htaꞈ te piˇ taˍ ve kanˉ teˇ hpaˍ awˬ pon Gʼuiˬ sha htaꞈ maˇ chiˇ mvuh.” Aˬ htoꞈ ma pa taw yawˇ nyi ma pa ve Liꞈ hpu hkʼaw maˇ kʼoˆ taˍ laˇ. Aˍsuˇriˆ chaw htaꞈ gʼaˇ ve maˇ heˆ leh yawˇ naˬ chehˇ ve htaꞈ Yaˬhoˉvaˬ na˗e tcuh piˇ ve pa taw yoˬ hehˉ. Yawˇ paw sha leh awˬ meh bvuhˬ ve chaw hpehꞈ la ve pa taw yoˬ hehˉ. Heˍsaˍkiˆ Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui ve htawˇ, awˬ yanˇ teˇ yanˇ Heˍsaˍkiˆ nyi ma uiˍ jaˇ leh Yaˬhoˉvaˬ maˇ ha lehˬ. Yaꞈ hkʼaˇ, awˬ hkʼawꞈ nawˉ Heˍsaˍkiˆ “nyi ma nuˇ nehˬ” la ve pa taw, Gʼuiˬ sha venˇ baˆ hpehˇ piˇ ve yoˬ.—2 Raˍsaˍvanˍ 32:25-27; Chiˇ mvuh ve 138:6.

13, 14. (a) Ngaˬ hui nyi ma hkʼaw cawˬ ve hpeuꞈ maw laˇ ve hkʼaˬ hkʼe htaˇ le? (b) Shu chiˇ mvuh laˇ htaˇ, ngaˬ hui hkʼa hkʼe te cawˇ ve le?

¹³ Heˍsaˍkiˆ te yaꞈ taˍ ve awˬ lawn ngaˬ hui htaꞈ aˬ htoꞈ ma maˍ laˇ ve le? Heˍsaˍkiˆ Aˍsuˇriˆ chaw htaꞈ gʼaˇ ve leh yawˇ naˬ chehˇ ve Yaˬhoˉvaˬ na˗e tcuh piˇ peuˬ hkʼawꞈ nawˉ maˇ maw, yawˇ nyi ma uiˍ ve chaw hpehꞈ la ve yoˬ. Hkʼe te leh, ngaˬ hui daꞈ ve teˇ ceuˬ gʼa leh shu chiˇ mvuh laˇ ve kʼo, hkʼaˬ hkʼe te tuˬ le? Ngaˬ hui te ve lehˬ ngaˬ hui ve nyi ma hkʼaw hkʼaˬ hkʼe cawˬ ve htaꞈ hpeuꞈ maw piˇ ve yoˬ. Tawˇ pa haˉ te kʼo, awˬ viˉ awˬ nyi teˇ gʼaˇ hpawnˬ daꞈ lonˉ hkʼaw bon maˍ tuˬ hkʼa dehꞈ gu ve yoˬ. Laiˉ gʼaˇ yawˇ htaꞈ chiˇ mvuh piˇ ve yoˬ. Yawˇ hkʼaˬ hkʼe te tuˬ le?

¹⁴ Yeˍsuˆ ve tawˇ hkawˇ htaꞈ ngaˬ hui hkʼaˬ htaˆ kaꞈ dawˇ nawˇ taˍ cawˇ ve yoˬ. “Nawˬ hui htaꞈ hkʼa kʼoˆ laˇ ve awˬ ceuˬ hkʼa peu˗eˬ htaꞈ te peuˬ hkʼawꞈ nawˉ, chi hkʼe kʼoˆ loˬ. ‘Ngaˬ hui lehˬ maˇ keunˍ ve awˬ ceˬ teˇ hpaˍ hpehꞈ ve yoˬ. Ngaˬ hui gʼa te cawˇ ve kanˉ htaꞈ ceh ngaˬ hui te peuˬ ve yoˬ.’ ” (Luˉkaꞈ 17:10) Heˍsaˍkiˆ nyi ma uiˍ ve chaw hpehꞈ la htaˇ, Yaˬhoˉvaˬ hkʼaˬ hkʼe ga piˇ jaw ve yawˇ maˇ dawˇ nyi. Chi htaꞈ pa taw, awˬ nu ve chaw ngaˬ hui ve bon maˍ hkawˇ htaꞈ chiˇ mvuh laˇ htaˇ, nyi ma nuˇ nehˬ ve htaꞈ hkʼaˬ hkʼe te haꞈ shaˉ gʼa tuˬ le? Yaˬhoˉvaˬ ngaˬ hui htaꞈ aˬ htoꞈ ma te laˇ jaw ve ngaˬ hui dawˇ nyi ve yoˬ. Yawˇ htaꞈ caˉ daꞈ ve awˬ lawn leh ngaˬ hui htaꞈ ga laˇ jaw ve awˬ lawn shu htaꞈ kʼoˆ maˍ piˇ gʼa ve yoˬ. Ngaˬ hui bon maˍ gʼa tuˬ Liꞈ hpu leh daꞈ kehˬ ve awˬ ha hpu peꞈ laˇ ve kaꞈ maˇ leunˇ cawˇ.

Nawˬ dawˇ cheˆ htaˇ Yaˬhoˉvaˬ beˆ maˍ laˇ tcuh˗oꞈ

15, 16. Yawˇshiˆ aˬ htoꞈ ma te leh gʼa suh˗e ve le?

¹⁵ Yawˇshiˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? Yawˇshiˆ daꞈ ve jawˇ mawˇ hpehꞈ ve htawˇ, yawˇ te yaꞈ leh gʼa suh˗e ve yoˬ. (2 Raˍsaˍvanˍ 35:20-22 gʼaw ve.) Neˍhkawˇ Eˇjiˇtuꞈ ve jawˇ mawˇ geh Yawˇshiˆ maꞈ maˇ ca bawˆ˗e kaꞈ hpehꞈ ve htawˇ, yawˇ hkʼaˇ yawˇ dawˇ cheˆ leh kʼai ve yoˬ. Neˍhkawˇ Yawˇshiˆ htaꞈ kʼawꞈ kʼoˆ piˇ ve yawˇ maꞈ maˇ ca te gʼaˇ. Liꞈ hpu hkʼaw kʼoˆ ve, “Gʼuiˬ sha” Neˍhkawˇ htaꞈ cuˇ leh “kʼoˆ piˇ chehˇ” ve yoˬ. Yaꞈ hkʼaˇ Yawˇshiˆ maˇ na leh maꞈ te kuiˬ hkʼaw shu yawˇ htaꞈ tiˇ pehˍ ve yoˬ. Aˬ htoꞈ ma te yawˇ Neˍhkawˇ htaꞈ ca bawˆ˗e ve le? Liꞈ hpu hkʼaw maˇ kʼoˆ laˇ.

¹⁶ Awˬ tehˬ kʼo, Neˍhkawˇ ve tawˇ hkawˇ hkʼaˬ kaˬ lo laˬ ve Yawˇshiˆ coˇ caˇ leh ca cawˇ ve yoˬ. Yawˇshiˆ Yaˬhoˉvaˬ ve tcuh kaˍ paˍ Yeˍraˍmiˆ htaꞈ na nyi kaꞈ hpehꞈ ve yoˬ. (2 Raˍsaˍvanˍ 35:23, 25) Yawˇshiˆ hkʼa dehꞈ dawˇ nyi cawˇ ve yoˬ. Neˍhkawˇ Kaˍhkeˍmeˆ venˇ lo kʼai leh awˬ nu ve chaw htaꞈ ca bawˆ˗e ve Yeˍruˆsaˍlehnˍ chaw maˇ heˆ. Neˍhkawˇ Yaˬhoˉvaˬ leh yawˇ ve chaw htaꞈ maˇ gʼa kʼoˆ guiˇ. Yawˇshiˆ maˇ gʼa dawˇ cheˆ sheˍ htaˇ, awˬ lawn chi teˇ hpaˍ hkʼa dehꞈ maˇ dawˇ nyi. Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui teˇ ceuˬ ceuˬ gʼa dawˇ cheˆ htaˇ, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve awˉ lawˉ te cawˇ ve yoˬ.

17. Yawˇshiˆ hkʼe leˇ maˇ gʼa yaꞈ kʼai tuˬ, ngaˬ hui hkʼaˬ hkʼe gʼa te cawˇ ve le?

¹⁷ Ngaˬ hui maˇ dawˇ cheˆ sheˍ htaˇ, Liꞈ hpu hkʼaw ve awˬ liˇ awˬ hkʼaˇ hkʼaˬ ve teˇ maˬ ngaˬ hui htaꞈ ga laˇ gʼa leh hkʼaˬ hkʼe yehˇ cawˇ ve, ngaˬ hui dawˇ nyi cawˇ ve yoˬ. Teˇ pawˆ pawˆ ngaˬ hui ve liꞈ kʼoˆ hkʼaw beˆ maˍ laˇ hkawˇ gʼa ca leh nyi haꞈ shaˉ paˍ geh gʼa na ve yoˬ. Liꞈ hpu hkʼaw awˬ nu ve awˬ liˇ awˬ hkʼaˇ yawˇ hui ngaˬ hui htaꞈ maˍ laˇ gʼa ve yoˬ. Awˬ lawn chi ve htaꞈ dawˇ nyi sheˍ. Awˬ viˉ awˬ nyi teˇ gʼaˇ yawˇ ve awˬ hpawˇ mawˇ Shaˉhkiˆhkanˍ ve chaw maˇ hpehꞈ ve yoˬ. Teˇ nyi htaˇ yawˇ hto toˇ ve kʼai tuˬ gu ve yoˬ. (Tcuh yaˇ 4:20) Yaꞈ hkʼaˇ, oˇ ve teˇ nyi awˬ hpawˇ mawˇ yawˇ htaꞈ hto toˇ kuiˬ lo maˇ kʼai tcuh gaˇ ve yoˬ. Yawˇ kʼoˆ ve, chi teˇ shinˉ teˇ geh hkʼa dehꞈ maˇ gʼa chehˇ ve pa taw, yawˇ yawˇ htaꞈ shiˍ guiˇ gaˇ ve yoˬ. Hkʼe te leh, awˬ viˉ awˬ nyi chi teˇ gʼaˇ cuˇ yiˍ cawˬ ve hkʼaw dawˇ cheˆ gʼa tuˬ, Liꞈ hpu teˇ tawn tawn htaꞈ yawˇ dawˇ nyi ve yoˬ. Yawˇ shiˍ ve Yaˬhoˉvaˬ hkawˇ gʼa na yuˬ leh Yeˍsuˆ yawˇ ve awˬ laꞈ gʼawˇ hpehꞈ la tuˬ ngaˬ hui htaꞈ ca tcuh laˇ ve yoˬ. (Maꞈhtehˬ 28:19, 20; Tcuh yaˇ 5:29) Yaꞈ hkʼaˇ, yawˇ kaꞈ tawnˇ gʼa ve awˬ miˇ ma lehˬ awˬ hpawˇ hkawˇ gʼa nu yuˬ leh Gʼuiˬ sha ve chaw lehˬ awˬ hkʼaˇ ca ve hpehꞈ cawˇ ve yoˬ. (Eˇfeˇsuꞈ 5:22-24; Hpiˇliˇpiˆ 4:5) Yawˇ ve awˬ hpawˇ yawˇ htaꞈ hto toˇ kuiˬ maˇ kʼai tcuh gaˇ ve laˇ? Oˇ teˇ nyi yawˇ geh chehˇ tcuh gaˇ ve la? Ngaˬ hui Yaˬhoˉvaˬ kanˉ te ve chaw hpehꞈ ve pa taw, ngaˬ hui awˬ hkʼaˇ ca ve hkʼaw Yaˬhoˉvaˬ dawˇ cawˇ ve hkʼe dawˇ cheˆ gaˇ ve yoˬ.

Nawˬ ve nyi ma htaꞈ haꞈ shaˉ leh ha lehˬ ve

18. Yuˇdaꞈ mvuhˇ miˬ ve jawˇ mawˇ awˇ gʼaˇ ve awˬ lawn hkʼa dehꞈ henˇ ve kʼo, ngaˬ huiˬ aˬ htoꞈ ma awˬ bon gʼa ve le?

¹⁸ Yuˇdaꞈ mvuhˇ miˬ jawˇ mawˇ chi awˇ gʼaˇ te yaꞈ ve hkʼe, ngaˬ hui kaꞈ teˇ pawˆ pawˆ te yaꞈ ve yoˬ. (1) Ngaˬ hui a shu yawˇ ve dawˇ hkʼaˇ htaꞈ gʼaˇ va ve (2) Maˇ daꞈ ve awˬ chawˇ htaꞈ leuˆ ve (3) Nyi ma uiˍ ve (4) Maˇ dawˇ cheˆ sheˍ htaˇ, Yaˬhoˉvaˬ ngaˬ hui htaꞈ aˬ htoꞈ ma te tcuh laˇ gaˇ ve maˇ dawˇ nyi. Yaꞈ hkʼaˇ, ngaˬ hui Yaˬhoˉvaˬ htaꞈ ha lehˬ tuˬ te piˇ maˇ gʼa ve maˇ dawˇ nyi cawˇ. Yaˬhoˉvaˬ jawˇ mawˇ chi awˇ gʼaˇ hkʼaˬ hkʼe daꞈ ve yawˇ shiˍ ve hkʼa shuˍ, ngaˬ hui hkʼaˬ hkʼe daꞈ ve kaꞈ yawˇ shiˍ ve yoˬ. Ngaˬ hui Yaˬhoˉvaˬ hkʼaˬ hkʼe taw haꞈ ve leh ngaˬ hui yawˇ ve kanˉ hkʼaˬ hkʼe taw te gaˇ ve yawˇ kaꞈ shiˍ ve yoˬ. Ngaˬ hui te yaꞈ ve htaꞈ jaw kʼai tuˬ, Gʼuiˬ sha awˬ nu ve chaw ve awˬ lawn laiˉ ceuˬ bvuhꞈ taˍ leh maˍ laˇ ve yoˬ. Chi ve teˇ hpaˍ htaꞈ hkʼa dehꞈ henˇ leh Yaˬhoˉvaˬ htaꞈ chiˇ mvuh sheˍ!