AWˬ LAWN 46
Miˬ guiˬ awˬ suhˉ ve awˬ lawn awˬ tehˬ hpehꞈ la tuˬ Yaˬhoˉvaˬ ka tiꞈ hkʼaˬ hkʼe te taˍ laˇ ve le?
“Mvuhˇ miˬ hkʼaw chehˇ taˍ ve chaw teˇ gʼaˇ gʼaˇ awˬ bon htaꞈ heuˆ gaˇ ve kʼo, ka tiꞈ yeˬ ve Gʼuiˬ sha geh gʼa lawˬ tuˬ yoˬ.”—IˉSAˍYAˆ 65:16.
KʼA MUIˬ HKAWˇ 3 Ngaˬ hui ve awˬ gʼaˇ, dawˇ law kuiˬ, yonˍ hkʼaˇ
HENˇ TUˬ VE TEˇ HPAˍa
1. Tcuh kaˍ paˍ Iˉsaˍyaˆ Iˉsaˍreˍlaˆ chaw htaꞈ caˉ daꞈ ve aˬ htoꞈ ma awˬ lawn kʼoˆ taˍ ve le?
Tcuh kaˍ paˍ Iˉsaˍyaˆ kʼoˆ ve, Yaˬhoˉvaˬ lehˬ “ka tiꞈ yeˬ ve Gʼuiˬ sha” hpehꞈ ve yoˬ. Ka tiꞈ yeˬ ve lehˬ “a menˬ” tehꞈ kʼoˆ gaˇ ve yoˬ. (Iˉsaˍyaˆ 65:16) “A menˬ” kʼoˆ gaˇ ve lehˬ “oˇ hkʼe hpehꞈ la piˇ˗oˆ” maˇ heˆ leh “awˬ tehˬ” hpehꞈ ve yoˬ. Liꞈ hpu hkʼaw “a menˬ” tehꞈ kʼoˆ ve lehˬ, Yaˬhoˉvaˬ leh Yeˍsuˆ kʼoˆ ve awˬ ceuˬ awˬ tehˬ hpehꞈ ve yoˬ. Chi htaꞈ pa taw, Iˉsaˍyaˆ ve tawˇ hkawˇ Iˉsaˍreˍlaˆ chaw htaꞈ bvuhꞈ piˇ ve tcuhˉ kuiˬ lehˬ, Yaˬhoˉvaˬ awˬ gʼuˇ suhˍ hpawˇ aˬ htoꞈ ma hpehꞈ la tuˬ kʼoˆ taˍ ve, chi awˬ tehꞈ hpehꞈ la tuˬ yoˬ. Awˬ lawn kʼo, yawˇ ka tiꞈ yeˬ ve yoˬ.
2. Awˬ gʼuˇ suhˍ hpawˇ ve htaꞈ caˉ daꞈ ve Yaˬhoˉvaˬ ka tiꞈ te taˍ laˇ ve htaꞈ aˬ htoꞈ ma te ngaˬ hui yonˍ gʼa ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Awˬ gʼuˇ suhˍ hpawˇ Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa˗aw laˇ? Iˉsaˍyaˆ ve awˬ co˗e peuˬ hkʼawꞈ nawˉ aˬ laˬ hkʼe 800 hkʼawꞈ htaˇ tcuh yaˇ Pawˇluꞈ kʼoˆ ve, “Gʼuiˬ sha lehˬ heˍ maˇ hpehꞈ.” (Heˍbrehˇ 6:18) Iˉ kaˆ gʼuiˬ tuˇ hkʼaw iˉ kaˆ tawˆ la ve htaꞈ dawˇ nyi sheˍ. Gʼuiˬ tuˇ teˇ maˬ tiˉ awˬ hkʼaw lo mehˬ ve iˉ kaˆ leh hkʼaˇ ve iˉ kaˆ teˇ geh tawˆ la tuˬ ve maˇ heˆ. Chi ve hkʼa shuˍ shuˍ, Yaˬhoˉvaˬ lehˬ ka tiꞈ yeˬ ve pa taw maˇ heˍ puiˉ. Chi htaꞈ pa taw, Yaˬhoˉvaˬ ka tiꞈ te taˍ laˇ ve teˇ ceuˬ le le htaꞈ ngaˬ hui yonˍ gʼa ve yoˬ. Chi ve lehˬ, awˬ gʼuˇ suhˍ hpawˇ ngaˬ hui htaꞈ kaꞈ caˉ daꞈ ve yoˬ. Yaˬhoˉvaˬ awˬ gʼuˇ suhˍ hpawˇ ka tiꞈ te taˍ laˇ ve aˬ htoꞈ ma htaꞈ caˉ daꞈ ve le? Leh Yaˬhoˉvaˬ ka tiꞈ te taˍ laˇ ve awˬ tehˬ hkʼaˬ hkʼe hpehꞈ la gʼa tuˬ le? Na hkawˇ chi teˇ hpaˍ htaꞈ teˇ geh henˇ tuˬ yoˬ.
YAˬHOˉVAˬ Aˬ HTOꞈ MA KA TIꞈ TE TAˍ LAˇ VE LE?
3. (a) Yaˬhoˉvaˬ ve kanˉ te ve chaw teˇ gʼaˇ le le law maw jaˇ˗oˬ ve aˬ htoꞈ ma ve ka tiꞈ le? (Hpeuꞈ maˍ ve 21:3, 4) (b) Ka tiꞈ chi ve ngaˬ hui yehˬ shehˍ hpaˇ htaꞈ gʼaw maˍ piˇ htaˇ, teˇ hpaˍ hkʼaˬ hkʼe kʼoˆ ve le?
3 Yaˬhoˉvaˬ ve kanˉ te ve chaw law maw jaˇ˗oˬ ve ka tiꞈ te taˍ laˇ ve awˬ lawn htaꞈ ngaˬ hui teˇ geh henˇ tuˬ yoˬ. (Hpeuꞈ maˍ ve 21:3, 4 gʼaw sheˍ.) Yaˬhoˉvaˬ ka tiꞈ te taˍ laˇ ve, awˬ gʼuˇ suhˍ hpawˇ kʼo “suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.” Ngaˬ hui hto toˇ˗e htaˇ, Liꞈ hpu chi teˇ tawn htaꞈ yehˇ ve dawˇ cawˇ jaˇ ve yoˬ. Miˬ guiˬ awˬ suhˉ hkʼaw a shaꞈ teꞈ hkʼaˇ hkʼaˬ hkʼe hpehꞈ ve htaꞈ yehˬ shehˍ hpaˇ gʼa mawˬ tuˬ, Liꞈ hpu awˬ tawn chi gʼaw maˍ piˇ ve yoˬ. Yehˬ shehˍ hpaˇ gʼa kaˇ htaˇ, yawˇ hui hkʼaˬ hkʼe dawˇ ve le? Teˇ hpaˍ kʼoˆ ve, “chi hkʼe taw taw daꞈ ve hpehꞈ kʼai maˇ gʼa taˬ.”
4. (a) Miˬ guiˬ awˬ suhˉ ve awˬ lawn Yaˬhoˉvaˬ ka tiꞈ te laˇ htaˇ, yawˇ aˬ htoꞈ ma htaꞈ shiˍ ve le? (b) Yaˬhoˉvaˬ ka tiꞈ te˗oˬ ve htaꞈ aˬ htoꞈ ma te tuˬ le?
4 Yaˬhoˉvaˬ tcuh yaˇ Yoˇhanˬ htaꞈ dawˇ pawnˍ piˇ leh miˬ guiˬ awˬ suhˉ ve awˬ lawn ka tiꞈ te taˍ ve bvuhꞈ tcuh htaˇ, chi beuꞈ teˇ co˗e yawˇ ve kanˉ te ve chaw awˬ nu ve chaw htaꞈ dawˇ law kuiˬ, chi ve gʼa kʼoˆ maˍ piˇ cawˇ ve tehꞈ yawˇ shiˍ ve yoˬ. Chi hkʼoˆ kaꞈ, laiˉ gʼaˇ awˬ ceuˬ chi ve teˇ hpaˍ hpehꞈ la tuˬ yoˬ tehꞈ, maˇ yonˍ ve htaꞈ Yaˬhoˉvaˬ shiˍ ve yoˬ. (Iˉsaˍyaˆ 42:9; 60:2; 2 Kawˇrenˍhtuˆ 4:3, 4) Chi htaꞈ pa taw, Hpeuꞈ maˍ ve liꞈ 21:3, 4 hkʼaw ka tiꞈ te taˍ laˇ ve, awˬ nu ve chaw yonˍ gʼa tuˬ, ngaˬ hui hkʼaˬ hkʼe te ga piˇ gʼa tuˬ le? Chi hkʼe ceh tiˉ maˇ heˆ. Yaˬhoˉvaˬ ka tiꞈ te taˍ laˇ ve htaꞈ ngaˬ hui hkʼaˬ hkʼe te yonˍ gʼa tuˬ le? Ngaˬ hui ha lehˬ tuˬ te laˇ gʼa ve htaꞈ ceh tiˉ Yaˬhoˉvaˬ ka tiꞈ te taˍ laˇ ve maˇ heˆ. Yaꞈ hkʼaˇ, yawˇ ka tiꞈ te taˍ laˇ ve htaꞈ ngaˬ hui yonˍ gʼa tuˬ ga laˇ sheˍ ve yoˬ. Yawˇ aˬ htoꞈ ma te sheˍ ve le?
YAˬHOˉVAˬ KA TIꞈ TE TAˍ LAˇ VE AWˬ TEHˬ HPEHꞈ LA TUˬ YOˬ
5. Yaˬhoˉvaˬ ka tiꞈ te taˍ ve htaꞈ ngaˬ hui yonˍ gʼa tuˬ Liꞈ hpu hkʼaˬ ve teˇ tawn le? Leh oˇ ve teˇ tawn hkʼaw aˬ htoꞈ ma kʼoˆ taˍ ve le?
5 Miˬ guiˬ awˬ suhˉ ve awˬ lawn Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa tuˬ shaˉ hkiˆ gʼa mawˬ ve yoˬ. Yawˇ kʼoˆ ve, ‘kʼaw jaw hkʼoˆ lo mui shehˍ hpaˇ kʼoˆ ve, nyi loˬ, awˬ ceuˬ hkʼa peu˗eˬ htaꞈ ngaˬ awˬ suhˉ kʼawꞈ te ve yoˬ. Yawˇ teˇ pawˆ kʼawꞈ kʼoˆ ve, Chi htaꞈ bvuhꞈ taˍ˗oꞈ. Awˬ lawn kʼo, tawˇ hkawˇ chi teˇ hpaˍ lehˬ, ka tiꞈ yeˬ leh hteˇ ve cawˇ ve yoˬ. Peuˬ leh, yawˇ teˇ pawˆ kʼawꞈ kʼoˆ laˇ ve, awˬ ceuˬ hkʼa peu˗eˬ biˇ la peuˬ. Ngaˬ lehˬ, awˬ hkuiˉ puiˍ leh awˬ leh meuˇ hpehꞈ leh, awˉ lawˉ peuˇ ve awˬ ceuˬ kaꞈ, awˬ leh meuˇ ve awˬ ceuˬ kaꞈ hpehꞈ ve yoˬ.’—Hpeuꞈ maˍ ve 21:5, 6.
6. Hpeuꞈ maˍ ve liꞈ 21:5, 6 hkʼaw aˬ htoꞈ ma te ngaˬ hui Yaˬhoˉvaˬ ka tiꞈ te taˍ ve htaꞈ yonˍ gʼa tuˬ te laˇ ve le?
6 Liꞈ hpu awˬ tawn chi teˇ hpaˍ Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa tuˬ hkʼaˬ hkʼe te laˇ ve le? Hpeuꞈ maˍ ve liꞈ biˇ la chehˇ˗oˬ liꞈ kʼoˆ hkʼaw Liꞈ hpu awˬ tawn chi teˇ hpaˍ htaꞈ kʼoˆ taˍ ve, “Yaˬhoˉvaˬ ka tiꞈ te taˍ laˇ ve hkʼaw awˬ meh bvuhꞈ ve hkʼa shuˍ, leh awˬ gʼuˇ suhˍ hpawˇ ka tiꞈ yeˬ ve chaw yaˇ htaꞈ awˬ bon oˇ ve teˇ hpaˍ awˬ tehˬ piˇ tuˬ yoˬ.”b Hpeuꞈ maˍ ve liꞈ 21:3, 4 hkʼaw Yaˬhoˉvaˬ ka tiꞈ te taˍ laˇ ve yoˬ. Yaꞈ hkʼaˇ, kaˇ nanˉ ehˉ 5 leh 6 hkʼaw Yaˬhoˉvaˬ ka tiꞈ te taˍ ve htaꞈ awˬ tehˬ hpehꞈ la tuˬ yoˬ tehꞈ htawˆ hkanˍ laˇ taˍ ve htaꞈ shuˍ ve yoˬ. Yaˬhoˉvaˬ ka teꞈ laˇ taˍ ve yawˇ aˬ htoꞈ ma kʼoˆ ve htaꞈ ngaˬ hui teˇ geh nyi sheˍ.
7. Hpeuꞈ maˍ ve liꞈ 21:5 hkʼaw a shu ve tawˇ hkawˇ hpehꞈ ve le? Leh chi hkʼaˬ hkʼe te daꞈ jaˇ ve le?
7 Kaˇ nanˉ ehˉ 5 awˉ lawˉ teˇ tawn hkʼaw “kʼaw jaw hkʼoˆ lo mui shehˍ hpaˇ kʼoˆ ve” yoˬ. (Hpeuꞈ maˍ ve 21:5) Tawˇ hkawˇ chi ve lehˬ daꞈ jaˇ. Awˬ lawn kʼo, Hpeuꞈ maˍ ve liꞈ hkʼaw tawˇ hkawˇ chi ve Yaˬhoˉvaˬ kʼoˆ taˍ ve 3 pawˆ cawˬ ve yoˬ. Tawˇ hkawˇ chi lehˬ mvuhˇ naw ma tcuh yaˇ maˇ heˆ leh, Yeˍsuˆ kʼoˆ taˍ ve maˇ heˆ tehꞈ htawˆ hkanˍ laˇ taˍ ve tehꞈ hpeuꞈ maw laˇ ve yoˬ. Yaꞈ hkʼaˇ, chi Yaˬhoˉvaˬ hpehꞈ ve yoˬ. Chi htaꞈ pa taw, tawˇ hkawˇ chi htaꞈ ngaˬ hui hkʼa dehꞈ yonˍ gʼa ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ lehˬ “maˇ heˍ puiˉ.” (Tiˇtuˆ 1:3) Chi htaꞈ pa taw, Hpeuꞈ maˍ ve liꞈ 21:5, 6 hkʼaw kʼoˆ taˍ ve htaꞈ awˬ tehˬ awˬ na yonˍ gʼa ve yoˬ.
‘AWˬ CEUˬ HKʼA PEU˗Eˬ HTAꞈ NGAˬ AWˬ SUHˉ KʼAWꞈ TE TUˬ YOˬ’
8. Yaˬhoˉvaˬ yawˇ ka tiꞈ te taˍ ve awˬ tehˬ hpehꞈ la tuˬ yoˬ tehꞈ hkʼaˬ hkʼe kʼoˆ laˇ taˍ ve le? (Iˉsaˍyaˆ 46:10)
8 Yaˬhoˉvaˬ kʼoˆ ve, “awˬ ceuˬ hkʼa peu˗eˬ htaꞈ ngaˬ awˬ suhˉ kʼawꞈ te ve yoˬ.” (Hpeuꞈ maˍ ve 21:5) Awˬ tehˬ kʼo, Yaˬhoˉvaˬ lehˬ awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ kʼoˆ chehˇ ve yoˬ. Yaꞈ hkʼaˇ, Yaˬhoˉvaˬ lehˬ hpehꞈ la˗oˬ ve awˬ ceuˬ htaꞈ kʼoˆ chehˇ ve htaꞈ shuˍ ve yoˬ. Ka tiꞈ te taˍ ve chi awˬ tehˬ awˬ na hpehꞈ la tuˬ yoˬ tehꞈ Yaˬhoˉvaˬ yonˍ gʼa jaˇ ve tehꞈ hpeuꞈ maw laˇ ve yoˬ.—Iˉsaˍyaˆ 46:10 gʼaw sheˍ.
9. (a) ‘Awˬ ceuˬ hkʼa peu˗eˬ htaꞈ awˬ suhˉ kʼawꞈ te’ tuˬ ve chi aˬ htoꞈ ma htaꞈ kʼoˆ gaˇ ve le? (b) Chi teˇ hkui cawˬ taˍ ve “mvuhˇ naw ma” leh “miˬ guiˬ” aˬ htoꞈ ma hpehꞈ la tuˬ ve le?
9 Hpeuꞈ maˍ ve liꞈ 21:5 hkʼaw ‘awˬ ceuˬ hkʼa peu˗eˬ htaꞈ awˬ suhˉ kʼawꞈ te ve’ chi hkʼaˬ hkʼe kʼoˆ gaˇ ve le? Hpeuꞈ maˍ ve liꞈ chi hkʼaw Yaˬhoˉvaˬ te tuˬ ve awˬ ceuˬ 2 ceuˬ htaꞈ kʼoˆ taˍ ve yoˬ. Chi ve lehˬ, kʼawꞈ gu te ve leh awˬ suhˉ kʼawꞈ te ve yoˬ. Yaˬhoˉvaˬ hkʼaˬ hkʼe kʼawꞈ gu te tuˬ le? Hpeuꞈ maˍ ve liꞈ 21:1 hkʼaw kʼoˆ taˍ ve, “awˉ lawˉ ve mvuhˇ naw ma leh awˉ lawˉ ve miˬ guiˬ lehˬ, mehˉ kʼai peuˬ.” Leh “awˉ lawˉ ve mvuhˇ naw ma” lehˬ, Saˍtanˍ leh yawˇ hpawˇ chehˇ ve awˬ hawˉ lo ve, chaw yaˇ uˉ peunˍ ve mvuhˇ miˬ teˇ hpaˍ htaꞈ kʼoˆ gaˇ ve yoˬ. (Maꞈhtehˍ 4:8, 9; 1 Yoˇhanˬ 5:19) Liꞈ hpu hkʼaw “miˬ guiˬ” kʼoˆ gaˇ ve lehˬ, miˬ guiˬ hkʼoˆ lo chehˇ ve chaw yaˇ htaꞈ kaꞈ kʼoˆ gaˇ ve yoˬ. (Awˬ hkuiˉ puiˍ 11:1; Chiˇ mvuh ve 96:1) Chi htaꞈ pa taw, “awˉ lawˉ ve miˬ guiˬ” chi beuꞈ teˇ co˗e haiˬ ve htaꞈ kʼoˆ gaˇ ve yoˬ. Yaˬhoˉvaˬ lehˬ chi teˇ hkui cawˬ taˍ ve “mvuhˇ naw ma” leh “miˬ guiˬ” htaꞈ kʼawꞈ gu te ve ceh maˇ heˆ. Yaꞈ hkʼaˇ, yawˇ hkʼa peu˗eˬ htaꞈ kʼawꞈ gu te tuˬ yoˬ. Leh yawˇ “mvuhˇ naw ma awˬ suhˉ leh miˬ guiˬ awˬ suhˉ htaꞈ” kʼawꞈ te tuˬ yoˬ. Chi ve lehˬ, hteˇ ve cawˇ ve chaw htaꞈ Gʼuiˬ sha uˉ peunˍ tcuh tuˬ yoˬ.
10. Yaˬhoˉvaˬ awˬ ceuˬ hkʼa peu˗eˬ htaꞈ hkʼaˬ hkʼe te awˬ suhˉ kʼawꞈ te tuˬ ve le?
10 Yaˬhoˉvaˬ teˇ ceuˬ le le htaꞈ hkʼaˬ hkʼe te awˬ suhˉ kʼawꞈ gu te tuˬ le? (Hpeuꞈ maˍ ve 21:5) Yaˬhoˉvaˬ lehˬ miˬ guiˬ htaꞈ kʼawꞈ gu te leh chaw yaˇ htaꞈ biˇ ve chaw kʼawꞈ hpehꞈ la tcuh piˇ tuˬ yoˬ. Iˉsaˍyaˆ awˬ gʼuˇ suhˍ htaˇ kaꞈ kʼoˆ taˍ ve hkʼe, miˬ guiˬ chi hkʼa peu˗eˬ hkʼoˆ lo Eˍdenˍ hko hkʼa shuˍ teˇ pawˆ kʼawꞈ hpehꞈ la tcuh tuˬ yoˬ. Yaˬhoˉvaˬ lehˬ ngaˬ hui awˬ to htaꞈ chehˇ sha cawˬ sha tcuh laˇ leh chaw awˬ suhˉ kʼawꞈ hpehꞈ tcuh laˇ tuˬ yoˬ. Yawˇ lehˬ hkui luˬ laꞈ luˬ ve chaw, mehˆ cuˉ ve chaw leh naˍ paw pawˇ ve chaw htaꞈ kʼawꞈ gu na˗e piˇ leh suh˗oˬ ve chaw htaꞈ kaꞈ kʼawꞈ teꞈ tu la piˇ tuˬ yoˬ.—Iˉsaˍyaˆ 25:8; 35:1-7.
‘TAWˇ HKAWˇ CHI TEˇ HPAˍ LEHˬ KA TIꞈ YEˬ LEH HTEˇ VE CAWˇ VE YOˬ. AWˬ CEUˬ HKʼA PEU˗Eˬ BIˇ LA PEUˬ’
11. Yaˬhoˉvaˬ Yoˇhanˬ htaꞈ aˬ htoꞈ ma bvuhꞈ tcuh ve le? Leh aˬ htoꞈ ma pa taw le?
11 Ngaˬ hui Yaˬhoˉvaˬ ka tiꞈ te taˍ laˇ ve htaꞈ yonˍ gʼa tuˬ yawˇ aˬ htoꞈ ma htaꞈ kʼoˆ sheˍ ve le? Yawˇ Yoˇhanˬ htaꞈ kʼoˆ piˇ ve, “chi htaꞈ bvuhꞈ taˍ˗oꞈ. Awˬ lawn kʼo, tawˇ hkawˇ chi teˇ hpaˍ lehˬ, ka tiꞈ yeˬ leh hteˇ ve cawˇ ve yoˬ.” (Hpeuꞈ maˍ ve 21:5) Yaˬhoˉvaˬ lehˬ Yoˇhanˬ htaꞈ “bvuhꞈ” tcuh ve ceh maˇ heˆ. Yaꞈ hkʼaˇ, yawˇ aˬ htoꞈ ma te bvuhꞈ tcuh ve kaꞈ kʼoˆ maˍ piˇ ve yoˬ. Yawˇ kʼoˆ ve, “awˬ lawn kʼo, tawˇ hkawˇ chi teˇ hpaˍ lehˬ, ka tiꞈ yeˬ leh hteˇ ve cawˇ ve yoˬ.” Yoˇhanˬ tawˇ hkawˇ chi htaꞈ na yuˬ ve ngaˬ hui ha lehˬ jaˇ. Chi lehˬ Gʼuiˬ sha ka tiꞈ te taˍ laˇ ve miˬ guiˬ awˬ suhˉ ve awˬ lawn leh awˬ gʼuˇ suhˍ hpawˇ ve daꞈ ve awˬ ceuˬ htaꞈ ngaˬ hui dawˇ nyi tuˬ te laˇ ve yoˬ.
12. ‘Awˬ ceuˬ hkʼa peu˗eˬ biˇ la peuˬ’ tehꞈ aˬ htoꞈ ma te Yaˬhoˉvaˬ kʼoˆ gʼa ve le?
12 Yaˬhoˉvaˬ kʼawꞈ kʼoˆ sheˍ ve, ‘awˬ ceuˬ hkʼa peu˗eˬ biˇ la peuˬ.’ (Hpeuꞈ maˍ ve 21:6) Yaˬhoˉvaˬ miˬ guiˬ awˬ suhˉ ve awˬ lawn ka tiꞈ te laˇ taˍ ve htaꞈ kʼoˆ ve lehˬ, hpehꞈ la˗oˬ ve htaꞈ shuˍ ve yoˬ. Yawˇ chi hkʼe kʼoˆ gʼa ve lehˬ, yawˇ ve a loˍ htaꞈ teˇ ceuˬ˗ehˬ kaꞈ tawˍ piˇ maˇ gʼa ve pa taw yoˬ. Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa tuˬ yawˇ hkʼaˬ hkʼe kʼoˆ laˇ ve htaꞈ teˇ geh nyi sheˍ.
“NGAˬ LEHˬ AˍLAˍHPAˆ LEH AWˇMEˍGAˆ HPEHꞈ VE”
13. Aˬ htoꞈ ma te Yaˬhoˉvaˬ lehˬ “Aˍlaˍhpaˆ leh Awˇmeˍgaˆ hpehꞈ ve yoˬ” tehꞈ kʼoˆ ve le?
13 Chi awˬ gʼuˇ suhˍ htaˇ kʼoˆ kʼai peuˬ ve hkʼa shuˍ, tawˇ hkawˇ chi ve Yaˬhoˉvaˬ Yoˇhanˬ htaꞈ zuhꞈ maˆ mawˬ tcuh ve hkʼaw 3 pawˆ kʼoˆ taˍ ve yoˬ. (Hpeuꞈ maˍ ve 1:8; 21:5, 6; 22:13) Teˇ pawˆ leh teˇ pawˆ yawˇ kʼoˆ htaˇ, “ngaˬ lehˬ Aˍlaˍhpaˆ leh Awˇmeˍgaˆ hpehꞈ ve yoˬ.” Aˍlaˍhpaˆ lehˬ Heˍlaˍsaˆ ve tawˇ hkawˇ hkʼaw awˉ lawˉ teˇ hkawˇ hpehꞈ leh Awˇmeˍgaˆ lehˬ awˬ leh meuˇ ve teˇ hkawˇ hpehꞈ ve yoˬ. Chi htaꞈ pa taw, Yaˬhoˉvaˬ yawˇ awˬ to htaꞈ kʼoˆ ve, “ngaˬ lehˬ Aˍlaˍhpaˆ leh Awˇmeˍgaˆ hpehꞈ ve yoˬ.” Chi kʼoˆ gaˇ ve lehˬ yawˇ aˬ htoꞈ ma te tuˬ dawˇ teh˗oˬ ve kʼo, awˬ ceuˬ oˇ ve te gʼa tcuh ve yoˬ.
Yaˬhoˉvaˬ aˬ htoꞈ ma te tuˬ tanˬ˗oˬ ve kʼo, awˬ ceuˬ oˇ ve htaꞈ te gʼa tcuh ve (Awˬ tawn 14, 17 nyi sheˍ)
14. (a) “Aˍlaˍhpaˆ” leh “Awˇmeˍgaˆ” aˬ htoꞈ ma te Yaˬhoˉvaˬ hpehꞈ ve tehꞈ kʼoˆ ve le? (b) Awˬ hkuiˉ puiˍ liꞈ 2:1-3 hkʼaw aˬ htoꞈ ma ve awˬ lawn htaꞈ ngaˬ hui yonˍ gʼa tuˬ ga laˇ ve le?
14 Yaˬhoˉvaˬ Aˍdanˍ leh Eˇvaꞈ htaꞈ hpanˍ peuˬ hkʼawꞈ nawˉ, yawˇ chaw yaˇ leh miˬ guiˬ htaꞈ hkʼaˬ hkʼe dawˇ law taˍ ve kʼoˆ ve yoˬ. Liꞈ hpu hkʼaw kʼoˆ ve, ‘Gʼuiˬ sha yawˇ huiˉ maˬ htaꞈ bon naꞈ piˇ leh kʼoˆ ve, yaˇ maˇ maˇ cawˬ la piˇ˗oˆ. Chaw yaˇ teˇ hpaˍ miˬ guiˬ hkʼoˆ biˇ la piˇ˗oˆ. Leh uˉ peunˍ chehˇ˗oˆ.’ (Awˬ hkuiˉ puiˍ 1:28) Yaˬhoˉvaˬ yawˇ ve a loˍ chi htaꞈ kʼoˆ htaˇ, “Aˍlaˍhpaˆ” lehˬ awˬ hkuiˉ peuˬ ve teˇ hkawˇ hpehꞈ leh Yaˬhoˉvaˬ ve a loˍ awˬ tehˬ hpehꞈ la tuˬ yoˬ. Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo hkʼa biˇ cawˬ leh miˬ guiˬ hkʼa peu˗eˬ hkʼoˆ lo miˬ guiˬ awˬ suhˉ hpehꞈ la tuˬ te ve yoˬ. Yaˬhoˉvaˬ lehˬ “miˬ guiˬ mvuhˇ naw ma hkʼa peu˗eˬ htaꞈ te hpanˍ taˍ peuˬ” hkʼawꞈ nawˉ, oˇ ve teˇ yanˇ “Awˇmeˍgaˆ” tehꞈ kʼoˆ ve yoˬ. Yawˇ Awˬ hkuiˉ puiˍ liꞈ 2:1-3 hkʼaw kʼoˆ taˍ ve yoˬ. (Gʼaw sheˍ.) Yaˬhoˉvaˬ lehˬ 7 nyi teˇ nyi htaꞈ daꞈ kehˬ ve awˬ nyi tehꞈ shawˍ ve yoˬ. Chi hkʼaˬ hkʼe ve htaꞈ kʼoˆ gaˇ ve le? Yaˬhoˉvaˬ ve a loˍ chaw yaˇ leh miˬ guiˬ htaꞈ awˬ tehˬ hpehꞈ la tcuh tuˬ yoˬ tehꞈ yawˇ ka tiꞈ te taˍ laˇ ve yoˬ. Yawˇ ve a loˍ 7 nyi teˇ nyi htaˇ awˬ tehˬ biˇ la ve yoˬ.
15. Aˬ htoꞈ ma te Saˍtanˍ awˉ lawˉ htaˇ Yaˬhoˉvaˬ ve a loˍ htaꞈ tawˍ piˇ gʼa ve htaꞈ shuˍ ve le?
15 Aˍdanˍ leh Eˇvaꞈ Gʼuiˬ sha htaꞈ hpfuhˆ peuˬ hkʼawꞈ nawˉ, yawˇ hui venˇ baˆ yaˇ hpehꞈ la ve yoˬ. Chi htaꞈ pa taw, yawˇ ve awˬ yaˇ awˬ duˬ venˇ baˆ yaˇ hpehꞈ leh gʼa suh˗e ve yoˬ. (Roˉmaꞈ 5:12) Miˬ guiˬ hkʼoˆ lo Yaˬhoˉvaˬ ve a loˍ htaꞈ te ve biˇ ve chaw yaˇ htaꞈ Saˍtanˍ tawˍ piˇ gʼa ve tehꞈ ngaˬ hui dawˇ la gʼa ve yoˬ hehˉ. Saˍtanˍ te ve awˬ ceuˬ htaꞈ nyi ve kʼo, Yaˬhoˉvaˬ “Aˍlaˍhpaˆ” tehꞈ kʼoˆ ve hpehꞈ kʼai maˇ gʼa ve htaꞈ shuˍ ve yoˬ. Yaˬhoˉvaˬ leuˆ te tuˬ ve awˬ hkʼaˇ maˇ maˇ tehꞈ Saˍtanˍ dawˇ ve yoˬ. Yaˬhoˉvaˬ gʼa te cawˇ ve teˇ hkʼaˇ lehˬ, yawˇ Aˍdanˍ leh Eˇvaꞈ htaꞈ gʼa tiˇ pehˍ leh Yaˬhoˉvaˬ ve a loˍ biˇ la tuˬ, biˇ ve chaw yaˇ gʼa kʼawꞈ te hpanˍ ve yoˬ. Yaꞈ hkʼaˇ, Yaˬhoˉvaˬ chi hkʼe te ve kʼo, yawˇ heˍ ve tehꞈ Saˍtanˍ kʼoˆ gʼa ve yoˬ. Aˬ htoꞈ ma pa taw le? Awˬ lawn kʼo, Awˬ hkuiˉ puiˍ liꞈ 1:28 hkʼaw kʼoˆ taˍ ve hkʼe, Yaˬhoˉvaˬ Aˍdanˍ leh Eˇvaꞈ htaꞈ kʼoˆ piˇ ve, nawˬ huiˉ maˬ ve awˬ yaˇ awˬ duˬ miˬ guiˬ hkʼoˆ lo maˇ maˇ cawˬ la tuˬ yoˬ.
16. Yaˬhoˉvaˬ dawˇ taˍ ve hkʼe te maˇ gʼa ve tehꞈ aˬ htoꞈ ma te Saˍtanˍ kʼoˆ ve le?
16 Yaˬhoˉvaˬ te tuˬ ve awˬ nu ve awˬ ceuˬ Saˍtanˍ dawˇ ve teˇ hkʼaˇ lehˬ aˬ htoꞈ ma le? Yaˬhoˉvaˬ lehˬ Aˍdanˍ leh Eˇvaꞈ htaꞈ yaˇ cawˬ tcuh ve tehꞈ Saˍtanˍ dawˇ ve yoˬ. Yaꞈ hkʼaˇ, yawˇ hui ve awˬ yaˇ awˬ duˬ lehˬ maˇ biˇ ve chaw hpehꞈ ve yoˬ. (Cuˇ yiˍ piˇ ve 7:20; Roˉmaꞈ 3:23) Chi hkʼe hpehꞈ htaˇ, miˬ guiˬ hkʼoˆ lo chaw yaˇ maˇ biˇ ve ceh tiˉ cawˬ ve pa taw, Yaˬhoˉvaˬ yawˇ dawˇ taˍ ve hkʼe te maˇ gʼa taˬ tehꞈ Saˍtanˍ kʼoˆ ve yoˬ.
17. Yaˬhoˉvaˬ lehˬ Saˍtanˍ leh chaw yaˇ awˉ lawˉ teˇ ca hpfuhˆ ve htaꞈ hkʼaˬ hkʼe gu tuˬ le? Leh awˬ leh meuˇ htaˇ awˬ hkʼaˇ chi ve hkʼaˬ hkʼe hpehꞈ la tuˬ ve le? (Awˬ han htaꞈ nyi sheˍ.)
17 Yaˬhoˉvaˬ gu tuˬ ve awˬ hkʼaˇ lehˬ, Saˍtanˍ dawˇ maˇ gaˬ ve yoˬ hehˉ. Awˬ lawn kʼo, Aˍdanˍ leh Eˇvaꞈ Gʼuiˬ sha htaꞈ hpfuhˆ ve htawˇ, yawˇ ve a loˍ awˬ tehˬ hpehꞈ la tuˬ daꞈ jaˇ ve awˬ hkʼaˇ htaꞈ te tuˬ yoˬ. (Chiˇ mvuh ve 92:5) Yaˬhoˉvaˬ lehˬ Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo maˇ maˇ cawˬ tcuh ve pa taw, yawˇ maˇ heˍ puiˉ ve Gʼuiˬ sha hpehꞈ ve tehꞈ hpeuꞈ maw laˇ ve yoˬ. Chi hkʼoˆ kaꞈ, Aˍdanˍ leh Eˇvaꞈ ve awˬ yaˇ awˬ duˬ na yuˬ ve chaw gʼa ponˬ tuˬ, yawˇ hui ve “awˬ yaˇ awˬ duˬ” teˇ gʼaˇ Gʼuiˬ sha gu teh taˍ laˇ ve pa taw, yawˇ dawˇ taˍ ve hkʼe te gʼa ve tehꞈ hpeuꞈ maw laˇ ve yoˬ. (Awˬ hkuiˉ puiˍ 3:15; 22:18) Gu teh taˍ laˇ ve chi htaꞈ Saˍtanˍ lehˬ cheˆ˗ehˬ kʼai tuˬ yoˬ hehˉ. Awˬ lawn kʼo, chi Yaˬhoˉvaˬ haꞈ pehnˇ ve tehꞈ hpeuꞈ maw laˇ ve yoˬ. Saˍtanˍ lehˬ haꞈ pehnˇ ve chi hkʼe ve maˇ cawˬ jaw. (Maꞈhtehˍ 20:28; Yoˇhanˬ 3:16) Yeˍsuˆ uˉ peunˍ ve 1,000 hkʼawꞈ peuˬ hkʼawꞈ nawˉ, gu teh taˍ ve htaiˍ hkʼawꞈ laˇ ve chi hkʼaˬ hkʼe hpehꞈ la tcuh tuˬ le? Aˍdanˍ leh Eˇvaꞈ ve awˬ yaˇ awˬ duˬ na yuˬ ve biˇ ve chaw hpehꞈ tcuh tuˬ yoˬ. Yaˬhoˉvaˬ awˉ lawˉ htaˇ kaꞈ dawˇ teh taˍ ve hkʼe, yawˇ hui miˬ guiˬ awˬ suhˉ hkʼaw gʼa chehˇ tuˬ yoˬ. Oˇ ve teˇ yanˇ lehˬ Yaˬhoˉvaˬ “Awˇmeˍgaˆ” tehꞈ kʼoˆ ve hpehꞈ kʼai gʼa tuˬ yoˬ.
MIˬ GUIˬ AWˬ SUHˉ VE AWˬ LAWN YAˬHOˉVAˬ KA TIꞈ TE TAˍ LAˇ VE HTAꞈ NGAˬ HUI HKʼAˬ HKʼE TE YONˍ GʼA TUˬ LE?
18. Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa tuˬ awˬ hkʼaˇ 3 hkʼaˇ lehˬ aˬ htoꞈ ma le? (awˬ ceˍ awˇ fa “Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ gʼa tuˬ awˬ hkʼaˇ 3 hkʼaˇ” htaꞈ nyi sheˍ.)
18 Miˬ guiˬ awˬ suhˉ ve awˬ lawn Gʼuiˬ sha ka tiꞈ te taˍ laˇ ve htaꞈ ngaˬ hui yonˍ gʼa tuˬ, chi ve htaꞈ caˉ daꞈ ve awˬ lawn chi ve hkʼaw ngaˬ hui teˇ geh henˇ tuˬ yoˬ. Yaꞈ hkʼaˇ, awˬ lawn chi htaꞈ maˇ yonˍ ve chaw awˬ pon kʼo, yawˇ hui htaꞈ kʼoˆ maˍ piˇ tuˬ aˬ htoꞈ ma ve awˬ hkʼaˇ cawˬ sheˍ ve le? Awˉ lawˉ teˇ hkʼaˇ lehˬ, ka tiꞈ chi ve Yaˬhoˉvaˬ te taˍ laˇ ve yoˬ. Hpeuꞈ maˍ ve liꞈ hkʼaw kʼoˆ ve, “kʼaw jaw hkʼoˆ lo mui shehˍ hpaˇ kʼoˆ ve, nyi loˬ, awˬ ceuˬ hkʼa peu˗eˬ htaꞈ ngaˬ awˬ suhˉ kʼawꞈ te ve yoˬ.” Yaˬhoˉvaˬ lehˬ cuˇ yiˍ, kanˇ paˆ cawˬ jaˇ leh yawˇ ka tiꞈ te taˍ ve awˬ tehˬ hpehꞈ la tcuh tuˬ yoˬ. 2 hkʼaˇ teˇ hkʼaˇ lehˬ, Yaˬhoˉvaˬ ka tiꞈ te taˍ ve awˬ tehˬ hpehꞈ la tuˬ yoˬ tehꞈ yonˍ gʼa ve yoˬ. Yawˇ kʼoˆ ve lehˬ hpehꞈ la chehˇ˗oˬ ve awˬ ceuˬ htaꞈ shuˍ ve yoˬ. Yawˇ kʼoˆ ve, ‘tawˇ hkawˇ chi teˇ hpaˍ lehˬ, ka tiꞈ yeˬ leh hteˇ ve cawˇ ve yoˬ. Leh awˬ ceuˬ hkʼa peu˗eˬ biˇ la peuˬ.’ 3 hkʼaˇ teˇ hkʼaˇ lehˬ, Yaˬhoˉvaˬ aˬ htoꞈ ma te tuˬ tanˬ˗oˬ ve kʼo, awˬ ceuˬ oˇ ve htaꞈ yawˇ hkʼa dehꞈ te gʼa ve yoˬ. Awˬ lawn chi ve htaꞈ yawˇ kʼoˆ ve, “ngaˬ lehˬ Aˍlaˍhpaˆ leh Awˇmeˍgaˆ hpehꞈ ve yoˬ.” Saˍtanˍ lehˬ heˍ leh dawˇ taˍ ve hkʼe te maˇ gʼa ve tehꞈ Yaˬhoˉvaˬ hpeuꞈ maw laˇ ve yoˬ.
19. Chaw teˇ hpaˍ miˬ guiˬ awˬ suhˉ ve awˬ lawn Gʼuiˬ sha ka tiꞈ te taˍ laˇ ve htaꞈ maˇ yonˍ gʼa tehꞈ kʼoˆ ve kʼo, nawˬ hkʼaˬ hkʼe te tuˬ le?
19 Yaˬhoˉvaˬ ka tiꞈ te taˍ laˇ ve htaꞈ caˉ daꞈ ve nawˬ awˬ nu ve chaw htaꞈ kʼoˆ piˇ htaˇ, nawˬ ve yonˍ hkʼaˇ leuˉ leh kʼawꞈ yonˍ yeˬ la ve tehꞈ tawnˇ taˍ sheˍ. Chi htaꞈ pa taw, gʼuˇ suhˍ teˇ pawˆ Hpeuꞈ maˍ ve liꞈ 21:4 hkʼaw nawˬ awˬ nu ve chaw teˇ gʼaˇ htaꞈ gʼaw maˍ piˇ ve yoˬ. Leh yawˇ kʼoˆ ve, “chi hkʼe taw taw daꞈ ve hpehꞈ kʼai maˇ gʼa taˬ.” Nawˬ hkʼaˬ hkʼe te tuˬ le? Hpeuꞈ maˍ ve liꞈ 21:5, 6 hkʼaw yawˇ htaꞈ gʼaw maˍ piˇ leh Yaˬhoˉvaˬ ka tiꞈ te taˍ laˇ ve chi awˬ tehˬ hpehꞈ la tuˬ yoˬ tehꞈ yawˇ htaꞈ kʼoˆ maˍ piˇ sheˍ.—Iˉsaˍyaˆ 65:16.
KʼA MUIˬ HKAWˇ 145 Paˍraˍdiˇsuˆ Gʼuiˬ sha ka tiꞈ te taˍ ve
a Miˬ guiˬ awˬ suhˉ ve awˬ lawn ka tiꞈ te taˍ laˇ ve Yaˬhoˉvaˬ hkʼaˬ hkʼe htawˆ hkanˍ laˇ taˍ ve awˬ lawn chi ve hkʼaw teˇ geh henˇ tuˬ yoˬ. Awˬ lawn chi ve ngaˬ hui awˬ nu ve chaw htaꞈ kʼoˆ piˇ htaˇ, Yaˬhoˉvaˬ ka tiꞈ te taˍ laˇ ve htaꞈ hkʼa dehꞈ yonˍ gʼa tuˬ te laˇ ve yoˬ.
b Hpeuꞈ maˍ ve liꞈ biˇ la chehˇ˗oˬ! liꞈ kʼoˆ Liꞈ mehˆ hpfuhˇ 303 awˬ tawn 8-9 hkʼaw nyi sheˍ. (Laˇhuˍ hkawˇ maˇ cawˬ.)