Hpawnˬ daꞈ kuiˬ hkʼaw awˬ gʼaˇ piˇ daꞈ sheˍ

1. Aˬ htoꞈ ma te hpawnˬ daꞈ kuiˬ hkʼaw ngaˬ hui hkʼawꞈ cawˇ ve le?

Aˬ htoꞈ ma te ngaˬ hui hpawnˬ daꞈ˗e ve le? A yeˇ uiˍ ve awˬ hkʼaˇ lehˬ, Yaˬhoˉvaˬ htaꞈ chiˇ mvuh ve yoˬ. (Chiˇ mvuh ve 26:12; 111:1) Chi hkʼoˆ kaꞈ, tuꞈ ve hkanˍ ve awˬ yanˇ chi ve hkʼaw hpawnˬ daꞈ kuiˬ hkʼaw teˇ gʼaˇ leh teˇ gʼaˇ awˬ gʼaˇ piˇ daꞈ tuˬ awˬ yanˇ cawˬ ve yoˬ. (1 Hteˇsaˍlawˇniˆ 5:11) Ngaˬ hui laꞈ sheh chiˇ leh hkʼawꞈ htaˇ, chi ve lehˬ ngaˬ hui Yaˬhoˉvaˬ htaꞈ chiˇ mvuh tuˬ te laˇ leh awˬ viˉ awˬ nyi awˬ gʼaˇ gʼa tuˬ kaꞈ te piˇ ve yoˬ.

2. Hpawnˬ daꞈ kuiˬ hkʼaw ngaˬ hui hkʼawꞈ gʼa ve hkʼaˬ ve teˇ yanˇ le?

² Teˇ shinˉ le le hpawnˬ daꞈ kuiˬ hkʼaw ngaˬ hui hkʼawꞈ tuˬ awˬ yanˇ cawˬ ve yoˬ. Tawˇ pa haˉ te kʼo, hkawꞈ nyi shinˉ nyi hpawnˬ daꞈ ve hkʼaw Shaw nyi kuiˬ Taꞈ yehˬ henˇ htaˇ hkʼawꞈ tuˬ awˬ yanˇ cawˬ ve yoˬ. Mvuhˇ hpeuꞈ haˉ hpawnˬ daꞈ ve hkʼaw co ha hpawˇ shehnˉ shiˍ duˇ ve awˬ yanˇ htaˇ, ngaˬ hui hkʼawꞈ gʼa ve, Hkriꞈ yaˇ awˬ moˍ hkʼaw Liꞈ hpu henˇ ve te htaˇ ngaˬ hui hkʼawꞈ gʼa ve, leh awˬ nu ve teˇ hpaˍ hkʼawꞈ tuˬ cawˬ htaˇ kaꞈ ngaˬ hui hkʼawꞈ gʼa ve yoˬ.

3. Ngaˬ hui hpawnˬ daꞈ kuiˬ hkʼaw hkʼawꞈ ve haˍ jaˇ tehꞈ dawˇ tuˬ aˬ htoꞈ ma te laˇ ve le? Leh Heˍbrehˇ liꞈ 10:24, 25 hkʼaw ngaˬ hui htaꞈ hkʼaˬ hkʼe ga laˇ ve le?

³ Ngaˬ hui teˇ gʼaˇ le le Yaˬhoˉvaˬ htaꞈ chiˇ mvuh gaˇ leh awˬ viˉ awˬ nyi htaꞈ kaꞈ awˬ gʼaˇ gʼa tcuh gaˇ ve yoˬ. Yaꞈ hkʼaˇ, ngaˬ hui teˇ pawˆ pawˆ kʼo hkʼawꞈ maˇ haˆ ve pa taw sha ve maˇ heˆ. Maˇ heˆ leh ngaˬ hui laꞈ sheh chiˇ ve htawˇ, sheh kʼai paˍ ngaˬ hui hkʼawꞈ gaˇ ve hkʼe hkʼa dehꞈ maˇ kuˬ laˇ ve yoˬ. Chi ve teˇ hpaˍ htaꞈ ngaˬ hui yeunˇ hkanˍ gʼaˇ tuˬ aˬ htoꞈ ma ga laˇ ve le? Pawˇluꞈ awˬ viˉ awˬ nyi Heˍbrehˇ chaw htaꞈ liꞈ bvuhꞈ piˇ ve ngaˬ hui htaꞈ ga laˇ gʼa ve yoˬ. Pawˇluꞈ hpawnˬ daꞈ ve hkʼaw a yeˇ uiˍ ve awˬ lawn htaꞈ kʼoˆ htaˇ, shu htaꞈ dawˇ nyi leh “awˬ gʼaˇ piˇ daꞈ chehˇ˗oˆ” tehꞈ kʼoˆ ve yoˬ. (Heˍbrehˇ 10:24, 25 gʼaw sheˍ.) Ngaˬ hui hkʼawꞈ ve maˇ zuhˬ ve htawˇ, awˬ viˉ awˬ nyi awˬ gʼaˇ gʼa ve tehꞈ ngaˬ hui shiˍ htaˇ, chi ngaˬ hui leuˉ leh hkʼawꞈ gaˇ tuˬ te laˇ ve yoˬ. Sheh kʼai paˍ ngaˬ hui hkʼawꞈ tuˬ hkʼa dehꞈ maˇ kuˬ laˇ ve kʼo, Hkriꞈ yaˇ awˬ moˍ hkʼaw awˬ nu ve chaw gʼa hkʼawꞈ ve htaꞈ ngaˬ hui kaꞈ ha lehˬ ve yoˬ.—1 Peˍtruˆ 3:8.

4. Awˬ lawn chi ve hkʼaw ngaˬ hui henˇ tuˬ 3 hkʼaˇ aˬ htoꞈ ma cawˬ ve le?

⁴ Hkriꞈ yaˇ awˬ moˍ chaw maˇ maˇ ve hkʼaw ngaˬ hui chehˇ leh hkʼawꞈ ve chaw hkʼa dehꞈ maˇ cawˬ ve kʼo, ngaˬ hui hkʼaˬ hkʼe te awˬ gʼaˇ piˇ daꞈ gʼa tuˬ le? Leh Hkriꞈ yaˇ awˬ moˍ chaw maˇ ve hkʼaw ngaˬ hui chehˇ leh hkʼawꞈ ve chaw cawˬ maˇ ve kʼo, ngaˬ hui hkʼaˬ hkʼe te awˬ gʼaˇ piˇ daꞈ gʼa tuˬ le? Chi hkʼoˆ kaꞈ, ngaˬ hui hkʼawꞈ ve shu htaꞈ hkʼaˬ hkʼe te awˬ gʼaˇ piˇ gʼa tuˬ chi ve teˇ hpaˍ teˇ geh henˇ tuˬ yoˬ.

HKRIꞈ YAˇ AWˬ MOˍ CHAW MAˇ MAˇ VE HKʼAW AWˬ GʼAˇ PIˇ DAꞈ SHEˍ

5. Hkriꞈ yaˇ awˬ moˍ chaw maˇ maˇ ve kʼo, ngaˬ hui hkʼaˬ hkʼe te awˬ gʼaˇ piˇ daꞈ gʼa tuˬ le?

⁵ Hkriꞈ yaˇ awˬ moˍ chaw maˇ maˇ ve hkʼaw ngaˬ hui chehˇ leh hpawnˬ daꞈ la ve chaw kaꞈ maˇ maˇ ve kʼo, hkʼawꞈ ve chaw cawˬ tuˬ sheh kʼai paˍ a ciˉ gʼa law ve yoˬ. Chi hkʼe ve hkʼaw hpawnˬ daꞈ ve hkʼawꞈ ve chaw hkʼa dehꞈ maˇ cawˬ leh hpawnˬ daꞈ la ve chaw kaꞈ awˬ gʼaˇ hkʼa dehꞈ maˇ gʼa ve yoˬ hehˉ. Hkʼe kʼo, nawˬ hkʼaˬ hkʼe te tuˬ le? Nawˬ laꞈ sheh chiˇ leh teˇ hkui teˇ hkui hkʼawꞈ ve kʼo, awˬ nu ve chaw kaꞈ nawˬ hkʼa shuˍ hkʼawꞈ gaˇ tuˬ te piˇ ve yoˬ.

6-7. Ngaˬ hui haꞈ hanˉ ve hkʼaw hkʼa dehꞈ hkʼawꞈ tuˬ aˬ htoꞈ ma ga laˇ ve le?

⁶ Nawˬ maˇ hkʼawꞈ haˆ ve kʼo, hkʼaˬ hkʼe te tuˬ le? Chaw laiˉ gʼaˇ kaꞈ nawˬ hkʼa shuˍ hpehꞈ jaw ve yoˬ. Yaꞈ hkʼaˇ, nawˬ awˬ viˉ awˬ nyi htaꞈ awˬ gʼaˇ piˇ gʼa tuˬ, nawˬ haꞈ hanˉ leh hkʼawꞈ gʼa tuˬ aˬ htoꞈ ma ga laˇ gʼa ve htaꞈ teˇ geh nyi sheˍ.

⁷ Awˬ lawn chi ve htaꞈ caˉ daꞈ ve awˬ bon cawˬ ve Shaw nyi kuiˬ Taꞈ yehˬ laiˉ kʼoˆ hkʼaw beˆ maˍ laˇ jaw ve yoˬ.b Tawˇ pa haˉ te kʼo, hpawnˬ daꞈ tuˬ awˬ pon hkʼa dehꞈ gu ve yoˬ. (Tawˇ naˉ ve 21:5) Awˬ lawn awˬ tanˇ htaꞈ nawˬ hkʼa dehꞈ na gʼa ve kʼo, haꞈ hanˉ ve hkʼaw nawˬ hkʼa dehꞈ hkʼawꞈ haˆ tuˬ yoˬ. Chi hkʼoˆ kaꞈ, chi suhˉ˗ehˍ hkʼawꞈ sheˍ. (Tawˇ naˉ ve 15:23; 17:27) Chi suhˉ˗ehˍ hkʼawꞈ ve lehˬ nawˬ hkʼawꞈ haˆ tuˬ ga laˇ ve yoˬ. Chi suhˉ˗ehˍ hkʼawꞈ ve lehˬ chi suh suh hkʼawꞈ ve aꞈ kehˉ awˬ viˉ awˬ nyi na gʼa leh awˬ gʼaˇ gʼa tuˬ te piˇ ve yoˬ. Chi suhˉ˗ehˍ hkʼawꞈ ve kʼo, nawˬ awˬ lawn awˬ tanˇ hkʼa dehꞈ gu leh na gʼa˗oˬ ve tehꞈ hpeuꞈ maw piˇ ve yoˬ.

8. Ngaˬ hui coˇ caˇ ve htaꞈ Yaˬhoˉvaˬ hkʼaˬ hkʼe dawˇ ve le?

⁸ Beˆ maˍ laˇ ve teˇ ceuˬ ceuˬ htaꞈ nawˬ gʼaꞈ te˗oˬ htaˇ, teˇ pawˆ maˇ heˆ leh 2 pawˆ awˬ leuˉ nawˬ maˇ hkʼawꞈ haˆ ve kʼo, hkʼaˬ hkʼe te tuˬ le? Nawˬ hkʼawꞈ tuˬ awˬ pon coˇ caˇ leh te gʼa ve hkʼe te ve htaꞈ Yaˬhoˉvaˬ awˬ hpfuhˇ shiˍ ve tehꞈ yonˍ gʼa ve yoˬ. (Luˉkaꞈ 21:1-4) Nawˬ te maˇ gʼa ve awˬ leuˉ te tuˬ Gʼuiˬ sha maˇ dawˇ law. (Hpiˇliˇpiˆ 4:5) Nawˬ hkʼaˬ hkʼe taw te gʼa ve, nawˬ te gʼa tuˬ dawˇ teh taˍ ve, nawˬ maˇ veˆ jaˇ tuˬ Yaˬhoˉvaˬ ga laˇ tuˬ bon lawˬ sheˍ. Nawˬ awˉ lawˉ teˇ pawˆ hkʼawꞈ htaˇ, chi suhˉ˗ehˍ hkʼawꞈ tuˬ dawˇ teh taˍ gʼa ve yoˬ.

HKRIꞈ YAˇ AWˬ MOˍ CHAW MAˇ VE HKʼAW AWˬ GʼAˇ PIˇ DAꞈ SHEˍ

9. Aˬ htoꞈ ma te Hkriꞈ yaˇ awˬ moˍ chaw maˇ jaˇ ve hkʼaw hkʼawꞈ tuˬ maˇ sha ve le?

⁹ Hkriꞈ yaˇ awˬ moˍ hto toˇ ve chaw maˇ jaˇ ve hkʼaw nawˬ chehˇ ve kʼo, nawˬ kaꞈ shoꞈ shaꞈ ve teˇ ceuˬ ceuˬ gʼa hpuˇ ve yoˬ hehˉ. Awˬ viˉ awˬ nyi laꞈ sheh chiˇ ve chaw cawˬ maˇ jaˇ ve pa taw, nawˬ maˇ gʼa hkʼawꞈ ve yoˬ. Deh˗yeuˆ ve awˬ lawn htaꞈ teˇ geh nyi sheˍ.c Hkʼawꞈ ve lehˬ Yaˬhoˉvaˬ htaꞈ oˉ kʼoˍ pui ve teˇ ceuˬ hpehꞈ ve pa taw, yawˇ hkʼawꞈ gaˇ jaˇ ve yoˬ. Leh chi ve kaꞈ teˇ hkʼaˇ yawˇ awˬ nu ve chaw htaꞈ awˬ gʼaˇ piˇ gʼa leh Liꞈ hpu hkʼaw awˬ tehˬ ve yawˇ ve nyi ma hkʼaw gaˬ tuˬ kaꞈ te piˇ ve yoˬ. Yaꞈ hkʼaˇ, yawˇ Hkriꞈ yaˇ awˬ moˍ chaw maˇ ve hkʼaw jiˆ kʼai htaˇ, yawˇ hkʼa dehꞈ maˇ gʼa hkʼawꞈ ve yoˬ. Teˇ pawˆ pawˆ kʼo, yawˇ laꞈ sheh laiˉ pawˆ chiˇ ve htawˇ maˇ gʼa hkʼawꞈ. Deh˗yeuˆ kʼoˆ ve, “ngaˬ nyi ma hkʼa dehꞈ maˇ sha. Ngaˬ daꞈ ve awˬ vuiˬ hkʼa dehꞈ maˇ gʼa ve htaꞈ shuˍ ve yoˬ. Ngaˬ hkʼa dehꞈ maˇ gʼa hkʼawꞈ htaˇ, ngaˬ htaꞈ maˇ hkʼawꞈ tcuh laˇ gaˇ ve hehˉ tehꞈ dawˇ ve yoˬ.”

10. Ngaˬ hui hkʼa dehꞈ hkʼawꞈ tuˬ aˬ htoꞈ ma ga laˇ gʼa ve le?

¹⁰ Nawˬ Deh˗yeuˆ hkʼe dawˇ jaw˗aw laˇ? Dawˇ jaw ve kʼo, nawˬ awˬ gʼaˇ nuˇ leh taꞈ iˉ mui na taˍ gaˇ ve tehꞈ dawˇ la ve yoˬ. Yaꞈ hkʼaˇ, coˇ caˇ leh hkʼawꞈ sheˍ. Hkʼe kʼo, nawˬ hkʼaˬ hkʼe te gʼa sheˍ ve le? Hpawnˬ daꞈ kuiˬ hkʼaw hkʼawꞈ tuˬ laiˉ tawn gu taˍ ve kʼo, nawˬ awˬ bon gʼa jaˇ tuˬ yoˬ. Awˉ lawˉ teˇ tawn sheh kʼai paˍ nawˬ htaꞈ hkʼawꞈ tuˬ maˇ kuˬ laˇ ve kʼo, nawˬ awˬ nu ve awˬ tawn hkʼawꞈ gʼa sheˍ ve yoˬ. Shaw nyi kuiˬ Taꞈ yehˬ gu htaˇ teˇ tawn leh teˇ tawn a yeˇ uiˍ ve awˬ lawn htaꞈ hkʼaˬ hkʼe caˉ daꞈ ve dawˇ nyi sheˍ. Nawˬ chi hkʼe te ve kʼo, teˇ tawn le le htaꞈ nawˬ hkʼa dehꞈ hkʼawꞈ gʼa tuˬ yoˬ. Chi hkʼoˆ kaꞈ, tcuhˉ kuiˬ naˉ ve awˬ nu ve chaw maˇ hkʼawꞈ ve htaꞈ nawˬ hkʼa dehꞈ gu leh hkʼawꞈ gʼa ve yoˬ. (1 Kawˇrenˍhtuˆ 2:10) Beˆ maˍ laˇ ve chi teˇ hpaˍ htaꞈ nawˬ gʼaꞈ te˗oˬ leh maˇ gʼa hkʼawꞈ sheˍ ve kʼo, hkʼaˬ hkʼe te tuˬ le? Hpawnˬ daꞈ ve maˇ tanˬ sheˍ htaˇ, sheh kʼai paˍ geh nawˬ kʼai leh nawˬ hkʼaˬ ve teˇ tawn hkʼawꞈ gaˇ ve kʼoˆ piˇ sheˍ.

11. Hpiˇliˇpiˆ liꞈ 2:4 hkʼaw ngaˬ hui aˬ htoꞈ ma te tuˬ awˬ gʼaˇ peꞈ laˇ ve le?

¹¹ Hpiˇliˇpiˆ liꞈ 2:4 gʼaw sheˍ. Shu awˬ pon awˬ bon cawˬ tuˬ dawˇ nyi piˇ˗oˆ tehꞈ Pawˇluꞈ awˬ viˉ awˬ nyi Hkriꞈ yaˇ htaꞈ awˬ gʼaˇ piˇ ve yoˬ. Leh chi ve teˇ tawn ngaˬ hui hpawnˬ daꞈ kuiˬ hkʼaw hkʼaˬ hkʼe yuˬ yehˇ gʼa tuˬ le? Hkriꞈ yaˇ awˬ moˍ hkʼaw awˬ nu ve awˬ viˉ awˬ nyi kaꞈ hkʼawꞈ gaˇ ve tehꞈ tawnˇ taˍ sheˍ.

12. Hpawnˬ daꞈ kuiˬ hkʼaw awˬ gʼaˇ piˇ daꞈ gʼa ve teˇ hkʼaˇ lehˬ aˬ htoꞈ ma le? (Awˬ han htaꞈ nyi sheˍ.)

¹² Dawˇ nyi sheˍ, nawˬ awˬ chawˇ geh tawˇ yaw daꞈ htaˇ, nawˬ teˇ gʼaˇ tiˉ yaw leh awˬ chawˇ htaꞈ tawˇ yaw tuˬ awˬ yanˇ maˇ piˇ ve laˇ? Nawˬ chi hkʼe maˇ te taˬ. Nawˬ ve awˬ chawˇ htaꞈ kaꞈ yaw tcuh gaˇ ve yoˬ. Chi ve hkʼa shuˍ shuˍ, hpawnˬ daꞈ ve hkʼaw ngaˬ hui teˇ gʼaˇ le le htaꞈ kaꞈ hkʼawꞈ tcuh gaˇ ve yoˬ. Ngaˬ hui awˬ viˉ awˬ nyi htaꞈ awˬ gʼaˇ piˇ daꞈ gʼa ve daꞈ jaˇ ve teˇ hkʼaˇ lehˬ, yawˇ hui ve yonˍ hkʼaˇ htaꞈ kʼoˆ tuˬ kaꞈ awˬ yanˇ piˇ sheˍ. (1 Kawˇrenˍhtuˆ 10:24) Chi ve ngaˬ hui hkʼaˬ hkʼe te gʼa tuˬ teˇ geh nyi sheˍ.

13. Awˬ nu ve awˬ viˉ awˬ nyi hkʼa dehꞈ hkʼawꞈ gʼa tuˬ ngaˬ hui hkʼaˬ hkʼe gʼa te ve le?

¹³ Ngaˬ hui te gʼa ve teˇ hkʼaˇ lehˬ, awˬ nu ve chaw kaꞈ hkʼa dehꞈ hkʼawꞈ tuˬ ngaˬ hui chi suhˉ˗ehˍ hkʼawꞈ cawˇ ve yoˬ. Nyi haꞈ shaˉ paˍ leh co ha hpawˇ ve chaw mawˇ lehˬ hkʼawꞈ ve htaꞈ daꞈ ve henˇ yuˬ tuˬ gʼa hpehꞈ piˇ ve yoˬ. Nawˬ chi suhˉ˗ehˍ hkʼawꞈ ve htawˇ laiˉ lawn htaꞈ teˇ pawˆ tiˉ taˇ hkʼawꞈ. Awˬ tawn teˇ tawn hkʼaw nawˬ laiˉ lawn hkʼawꞈ˗oˬ ve kʼo, awˬ nu ve chaw hkʼaˬ hkʼe hkʼawꞈ tuˬ maˇ shiˍ ve yoˬ. Awˬ tawn chi ve hkʼaw teˇ geh nyi sheˍ. Chi ve teˇ tawn hkʼaw beˆ maˍ laˇ hkawˇ 2 maˬ cawˬ ve lehˬ, chi suhˉ˗ehˍ hkʼawꞈ ve leh laiˉ lawn htaꞈ teˇ pawˆ tiˉ taˇ hkʼawꞈ. Chi htaꞈ pa taw, sheh kʼai paˍ chi ve teˇ tawn nawˬ hkʼawꞈ tuˬ awˉ lawˉ kuˬ laˇ ve kʼo, nawˬ teˇ lawn htaꞈ ceh tiˉ hkʼawꞈ cawˇ ve yoˬ.

14. Ngaˬ hui laꞈ sheh chiˇ leh hkʼaˬ hkʼe taw hkʼawꞈ tuˬ dawˇ cheˆ ve htaꞈ hkʼaˬ hkʼe ga laˇ ve le? (Awˬ han htaꞈ nyi sheˍ.)

¹⁴ Chi hkʼoˆ kaꞈ, nawˬ hkʼaˬ nyiˇ pawˆ hkʼawꞈ tuˬ hkʼa dehꞈ dawˇ nyi sheˍ. Nawˬ laꞈ sheh chiˇ hkʼeh jaˇ ve kʼo, chaw teˇ hpaˍ kʼo maˇ gʼa hkʼawꞈ sheˍ ve htawˇ, nawˬ hkʼawꞈ gehˇ sheˍ ve kaꞈ sheh kʼai paˍ nawˬ htaꞈ gʼa kuˬ laˇ cawˇ ve tehꞈ nyiˉ piˇ ve htaꞈ shuˍ ve yoˬ. Chi ve htaꞈ pa taw awˬ viˉ awˬ nyi teˇ hpaˍ kʼo, awˬ gʼaˇ nuˇ leh laꞈ sheh chiˇ maˇ haˆ ve yoˬ.—Cuˇ yiˍ piˇ ve 3:7.

15. (a) Sheh kʼai paˍ ngaˬ hui hkʼawꞈ tuˬ maˇ kuˬ laˇ ve kʼo, ngaˬ hui hkʼaˬ hkʼe maˇ dawˇ nyi cawˇ ve le? (b) Sheh kʼai paˍ lehˬ teˇ gʼaˇ le le awˬ pon hkʼaˬ hkʼe dawˇ nyi piˇ gʼa tuˬ le? (Awˇ ceˍ awˇ fa “Hpawnˬ daꞈ kuiˬ hkʼaw nawˬ sheh kʼai paˍ hpehꞈ ve kʼo” htaꞈ nyi sheˍ.)

¹⁵ Awˬ viˉ awˬ nyi laiˉ gʼaˇ laꞈ sheh chiˇ leh hkʼawꞈ htaˇ, ngaˬ hui hkʼawꞈ gaˇ ve hkʼe maˇ gʼa hkʼawꞈ. Leh teˇ pawˆ pawˆ kʼo, sheh kʼai paˍ kaꞈ ngaˬ hui hkʼawꞈ tuˬ maˇ kuˬ laˇ ve yoˬ. Chi ve ngaˬ hui nyi ma luˬ tuˬ te laˇ gʼa ve yoˬ. Yaꞈ hkʼaˇ, yawˇ ngaˬ hui htaꞈ maˇ dawˇ cawˇ ve tehꞈ ngaˬ hui maˇ dawˇ nyi cawˇ.—Cuˇ yiˍ piˇ ve 7:9.

16. Hkʼawꞈ ve chaw htaꞈ ngaˬ hui hkʼaˬ hkʼe te awˬ gʼaˇ piˇ gʼa tuˬ le?

¹⁶ Nawˬ hkʼawꞈ gaˇ ve hkʼe maˇ gʼa hkʼawꞈ ve kʼo, awˬ nu ve chaw hkʼawꞈ ve htaꞈ na taˍ leh hpawnˬ daꞈ peuˬ hkʼawꞈ nawˉ yawˇ htaꞈ chiˇ mvuh piˇ sheˍ. Nawˬ hkʼawꞈ ve htaꞈ awˬ viˉ awˬ nyi awˬ gʼaˇ gʼa ve hkʼe, nawˬ yawˇ htaꞈ chiˇ mvuh piˇ ve kaꞈ yawˇ awˬ gʼaˇ gʼa tuˬ yoˬ. (Tawˇ naˉ ve 10:21) Awˬ viˉ awˬ nyi htaꞈ chiˇ mvuh piˇ ve teˇ ceuˬ kaꞈ ngaˬ hui awˬ gʼaˇ piˇ daꞈ gʼa ve yoˬ.

AWˬ GʼAˇ PIˇ DAꞈ GʼA SHEˍ VE AWˬ CEUˬ

17. (a) Awˬ pa awˬ e lehˬ yaˇ hkʼawꞈ ve gu tuˬ hkʼaˬ hkʼe ga piˇ gʼa ve le? (b) VDO hkʼaw gʼa mawˬ ve hkʼe, hkʼawꞈ tuˬ gu ve 4 hkʼaˇ aˬ htoꞈ ma cawˬ ve le? (Awˬ maiˉ htaꞈ nyi sheˍ.)

¹⁷ Hpawnˬ daꞈ kuiˬ hkʼaw ngaˬ hui awˬ gʼaˇ piˇ daꞈ gʼa tuˬ aˬ htoꞈ ma te gʼa sheˍ ve le? Nawˬ awˬ pa awˬ e hpehꞈ ve kʼo, yaˇ keunˍ daꞈ ve hkʼe hkʼawꞈ gʼa tuˬ gu piˇ sheˍ. (Maꞈhtehˍ 21:16) Teˇ pawˆ pawˆ kʼo, hpawnˬ daꞈ kuiˬ hkʼaw hkʼawꞈ tuˬ awˬ lawn awˬ tanˇ haˍ ve yoˬ. Tawˇ pa haˉ te kʼo, yehˬ kʼa hkʼaw ve awˬ lawn maˇ heˆ leh awˬ liˇ awˬ hkʼaˇ hpawˇ ve awˬ lawn hpehꞈ ve kʼo, awˬ lawn chi ve hkʼaw teˇ tawn maˇ heˆ leh nyiˇ tawn yaˇ hkʼawꞈ gʼa ve yoˬ. Chi hkʼoˆ kaꞈ, yaˇ laꞈ sheh chiˇ ve teˇ pawˆ le le maˇ kuˬ piˇ ve kʼo, yaˇ na gʼa tuˬ kaꞈ kʼoˆ maˍ piˇ sheˍ. Yaˇ htaꞈ kuˬ piˇ cawˇ ve htawˇ sheh kʼai paˍ awˬ nu ve chaw htaꞈ kuˬ piˇ htaˇ, yaˇ maˇ gʼa hkʼawꞈ ve nyi ma maˇ gʼa luˬ tuˬ, yaˇ na gʼa tuˬ kʼoˆ maˍ piˇ cawˇ ve yoˬ.—1 Tiˆmoˉseˍ 6:18.d

18. Ngaˬ hui hkʼawꞈ htaˇ awˬ nu ve chaw ngaˬ hui hkʼawꞈ ve htaꞈ a yeˇ maˇ gʼa yuˬ jaˇ tuˬ hkʼaˬ hkʼe gʼa te cawˇ ve le? (Tawˇ naˉ ve 27:2)

¹⁸ Yaˬhoˉvaˬ htaꞈ chiˇ mvuh tuˬ, leh awˬ viˉ awˬ nyi awˬ gʼaˇ gʼa tuˬ, ngaˬ hui teˇ gʼaˇ le le hkʼawꞈ tuˬ gu gʼa ve yoˬ. (Tawˇ naˉ ve 25:11) Teˇ pawˆ pawˆ kʼo, a shu yawˇ hkʼaˇ yawˇ hpehꞈ laˬ jaw ve awˬ lawn chi suhˉ˗ehˍ kʼoˆ maˍ piˇ gʼa ve yoˬ. Yaꞈ hkʼaˇ, awˬ nu ve chaw ngaˬ hui htaꞈ a yeˇ yuˬ jaˇ tuˬ maˇ te piˇ cawˇ. (Tawˇ naˉ ve 27:2 gʼaw sheˍ; 2 Kawˇrenˍhtuˆ 10:18) Awˬ viˉ awˬ nyi lehˬ Yaˬhoˉvaˬ, Liꞈ hpu, leh yawˇ ve kanˉ te ve chaw htaꞈ a yeˇ yuˬ tuˬ ngaˬ hui te piˇ cawˇ ve yoˬ. (Hpeuꞈ maˍ ve 4:11) A shu yawˇ awˬ to htaꞈ na nyi hkawˇ cawˬ ve kʼo, nawˬ hkʼaˬ hkʼe dawˇ ve le? Tawˇ pa haˉ te kʼo, awˬ hawˉ lo ve awˬ tawn hkʼaw hkʼawꞈ laˇ taˍ ve yoˬ.

19. (a) Hpawnˬ daꞈ la ve awˬ viˉ awˬ nyi teˇ gʼaˇ le le awˬ pon awˬ bon cawˬ tuˬ ngaˬ hui dawˇ nyi piˇ ve kʼo, hkʼaˬ hkʼe hpehꞈ tuˬ le? (Roˉmaꞈ 1:11, 12) (b) Nawˬ hkʼawꞈ htaˇ aˬ htoꞈ ma htaꞈ dawˇ nyi cawˇ ve le?

¹⁹ Ngaˬ hui hkʼaˬ hkʼe gʼa hkʼawꞈ tuˬ a shu yawˇ awˬ to htaꞈ awˬ liˇ maˇ te cawˇ ve yoˬ. Yaꞈ hkʼaˇ, hkʼawꞈ htaˇ teˇ gʼaˇ leh teˇ gʼaˇ awˬ gʼaˇ piˇ daꞈ tuˬ te cawˇ ve yoˬ. Chi kʼoˆ gaˇ ve lehˬ, ngaˬ hui laiˉ pawˆ hkʼawꞈ cawˇ ve yoˬ. Maˇ heˆ leh ngaˬ hui hkʼawꞈ gaˇ ve hkʼe maˇ gʼa hkʼawꞈ ve kʼo, awˬ nu ve chaw hkʼawꞈ ve htaꞈ ngaˬ hui kaꞈ ha lehˬ cawˇ ve yoˬ. Hpawnˬ daꞈ la ve awˬ viˉ awˬ nyi awˬ bon gʼa tuˬ ngaˬ hui dawˇ nyi piˇ ve kʼo, teˇ gʼaˇ leh teˇ gʼaˇ “awˬ gʼaˇ piˇ daꞈ chehˇ˗oˆ” tehꞈ kʼoˆ ve htaꞈ te gʼa ve yoˬ.—Roˉmaꞈ liꞈ 1:11, 12 gʼaw sheˍ.