Nawˬ ve dawˇ law kuiˬ awˬ tehˬ hpehꞈ tuˬ yoˬ

1. Aˍbraˍhanˍ dawˇ law taˍ ve hkʼe awˬ tehˬ hkʼaˬ hkʼe hpehꞈ la ve le?

Yaˬhoˉvaˬ yawˇ ve awˬ chawˇ Aˍbraˍhanˍ htaꞈ ka tiꞈ te piˇ ve, nawˬ ve awˬ yaˇ awˬ duˬ htaꞈ pa taw miˬ guiˬ chaw ceuˬ hkʼa peu˗eˬ awˬ bon gʼa tuˬ yoˬ. (Awˬ hkuiˉ puiˍ 15:5; 22:18) Aˍbraˍhanˍ yonˍ yeˬ jaˇ leh ka tiꞈ chi ve awˬ tehˬ hpehꞈ la tuˬ ve tehꞈ yonˍ ve yoˬ. Yaꞈ hkʼaˇ, yawˇ ve a shaꞈ 100 hkʼawꞈ leh yawˇ ve awˬ miˇ ma Saˍraˇ 90 hkʼawꞈ gaˬ˗oˬ ve htawˇ, yawˇ hui yaˇ maˇ cawˬ sheˍ. (Awˬ hkuiˉ puiˍ 21:1-7) Chi hkʼe hpehꞈ ve htawˇ Liꞈ hpu hkʼaw kʼoˆ ve, ‘Gʼuiˬ sha yawˇ htaꞈ kʼoˆ piˇ taˍ ve hkʼe Aˍbraˍhanˍ laiˉ chaw ceuˬ ve awˬ pa hpehꞈ tuˬ yoˬ tehꞈ dawˇ law leh yonˍ ve yoˬ.’ (Roˉmaꞈ 4:18) Aˍbraˍhanˍ ve dawˇ law kuiˬ awˬ tehˬ hpehꞈ ve tehꞈ nawˬ kaꞈ shiˍ ve yoˬ. Yawˇ ve yaˇ paˍ Iˉcaˆ cawˬ tuˬ gʼa law maw jaˇ ve yoˬ. Leh Aˍbraˍhanˍ aˬ htoꞈ ma te Yaˬhoˉvaˬ ka tiꞈ yeˬ jaˇ ve tehꞈ yonˍ gʼa ve le?

2. Aˬ htoꞈ ma te Aˍbraˍhanˍ lehˬ Yaˬhoˉvaˬ ka tiꞈ te taˍ piˇ ve htaꞈ awˬ tehˬ hpehꞈ la tuˬ yoˬ tehꞈ yonˍ gʼa ve le?

² Aˍbraˍhanˍ Yaˬhoˉvaˬ geh meuˆ daꞈ jaˇ ve pa taw, “ka tiꞈ shaˉ caˆ piˇ taˍ ve hkʼe Gʼuiˬ sha te hpehꞈ ve htaꞈ Aˍbraˍhanˍ yonˍ yeˬ jaˇ ve yoˬ.” (Roˉmaꞈ 4:21) Aˍbraˍhanˍ lehˬ Gʼuiˬ sha nyi ma cawˇ jaˇ ve chaw hpehꞈ leh yawˇ yonˍ yeˬ jaˇ ve pa taw, Gʼuiˬ sha yawˇ htaꞈ nyi hkʼaˇ suh jaˇ ve yoˬ. (Yaˍkoˆ 2:23) Roˉmaꞈ liꞈ 4:18 hkʼaw kʼoˆ ve, Aˍbraˍhanˍ lehˬ dawˇ law ve, yonˍ ve cawˬ jaˇ ve yoˬ. Chi teˇ hkui Roˉmaꞈ liꞈ kaˇ nanˉ uiˍ 5 hkʼaw dawˇ law kuiˬ htaꞈ caˉ daꞈ ve, Pawˇluꞈ hkʼaˬ hkʼe kʼoˆ ve htaꞈ teˇ geh nyi sheˍ.

3. Pawˇluꞈ dawˇ law kuiˬ hkʼaˬ hkʼe ve htaꞈ kʼoˆ ve le?

³ Aˬ htoꞈ ma te ‘dawˇ law kuiˬ awˬ tehˬ hpehꞈ tuˬ yoˬ’ tehꞈ ngaˬ hui yonˍ gʼa tuˬ Pawˇluꞈ kʼoˆ maˍ laˇ ve yoˬ. (Roˉmaꞈ 5:5) Chi hkʼoˆ kaꞈ, ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ yawˇ ga laˇ sheˍ ve yoˬ. Roˉmaꞈ liꞈ 5:1-5 hkʼaw ngaˬ hui gʼaw htaˇ, a shu yawˇ awˬ to htaꞈ dawˇ nyi sheˍ. Chi hkʼe te ve kʼo, awˬ yanˇ ponˬ kʼai htaˇ, ngaˬ hui ve dawˇ law kuiˬ htaꞈ leuˉ leh hkʼa dehꞈ yonˍ yeˬ tuˬ ga laˇ ve yoˬ. Dawˇ law kuiˬ htaꞈ caˉ daꞈ ve awˬ tehˬ hpehꞈ la tuˬ, ngaˬ hui teˇ geh henˇ tuˬ yoˬ.

NGAˬ HUI VE DAWˇ LAW KUIˬ DAꞈ JAˇ VE

4. Roˉmaꞈ liꞈ 5:1, 2 hkʼaw aˬ htoꞈ ma ve awˬ lawn htaꞈ kʼoˆ ve le?

⁴ Roˉmaꞈ liꞈ 5:1, 2 gʼaw sheˍ. Roˉmaꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ liꞈ bvuhꞈ piˇ ve yoˬ. Hkriꞈ yaˇ chi ve teˇ hpaˍ Yaˬhoˉvaˬ leh Yeˍsuˆ htaꞈ caˉ daꞈ ve awˬ lawn gʼa henˇ ve yoˬ. Yawˇ hui yonˍ ve pa taw Hkriꞈ yaˇ hpehꞈ la ve yoˬ. Hkʼe te leh, ‘yawˇ hui yonˍ ve htaꞈ pa taw Gʼuiˬ sha htaꞈ kʼawꞈ cawˇ daꞈ ve yoˬ.’ Leh Yaˬhoˉvaˬ kaꞈ Hkriꞈ yaˇ chi ve teˇ hpaˍ htaꞈ daꞈ kehˬ ve awˬ ha hpu leuˆ yuˬ piˇ ve pa taw, yawˇ hui daꞈ jaˇ ve dawˇ law kuiˬ cawˬ ve yoˬ.

5. Leuˆ yuˬ taˍ ve chaw dawˇ law kuiˬ lehˬ aˬ htoꞈ ma le?

⁵ Peuˬ hkʼawꞈ nawˉ, Eˇfeˇsuꞈ venˇ hkʼaw chehˇ ve leuˆ yuˬ taˍ ve chaw Gʼuiˬ sha yawˇ hui htaꞈ piˇ taˍ ve daꞈ jaˇ ve dawˇ law kuiˬ htaꞈ caˉ daꞈ ve, Pawˇluꞈ yawˇ hui htaꞈ liꞈ bvuhꞈ piˇ ve yoˬ. Dawˇ law kuiˬ chi ve lehˬ daꞈ jaˇ ve awˬ ceuˬ “Hkriꞈ yaˇ hui gʼa tuˬ ve awˬ shinˉ hkʼaˬ ma uiˍ jaˇ maˇ jaˇ ve” htaꞈ Gʼuiˬ sha piˇ tuˬ yoˬ. (Eˇfeˇsuꞈ 1:18) Leh Pawˇluꞈ Kawˇlawˇsehˇ venˇ hkʼaw lo chehˇ ve Hkriꞈ yaˇ htaꞈ kaꞈ liꞈ bvuhꞈ piˇ ve yoˬ. Yawˇ kʼoˆ ve, “mvuhˇ naw ma lo nawˬ hui awˬ pon haꞈ shaˉ taˍ ve dawˇ law ve teˇ ceuˬ cawˬ” ve yoˬ. (Kawˇlawˇsehˇ 1:4, 5) Chi htaꞈ pa taw, leuˆ yuˬ taˍ ve chaw awˬ pon dawˇ law kuiˬ lehˬ yawˇ hui suh˗e ve kʼo, kʼawꞈ teꞈ tuˬ la piˇ leh mvuhˇ naw ma hkʼoˆ lo Yeˍsuˆ geh teˇ geh uˉ peunˍ tuˬ yoˬ.—1 Hteˇsaˍlawˇniˆ 4:13-17; Hpeuꞈ maˍ ve 20:6.

6. Leuˆ yuˬ taˍ ve awˬ viˉ awˬ nyi hawˉ hkʼaˆ teˇ gʼaˇ yawˇ ve dawˇ law kuiˬ htaꞈ hkʼaˬ hkʼe kʼoˆ ve le?

⁶ Chi beuꞈ teˇ co˗e leuˆ yuˬ taˍ ve chaw kaꞈ yawˇ hui ve dawˇ law kuiˬ htaꞈ awˬ hpfuhˇ shiˍ ve yoˬ. Tawˇ pa haˉ te kʼo, awˬ viˉ awˬ nyi Feˉdaˬriꞈ Fanˍ leuˆ yuˬ taˍ ve chaw hpehꞈ leh Gʼuiˬ sha ve kanˉ laiˉ chi hkʼawꞈ te˗oˬ ve yoˬ. Yawˇ Gʼuiˬ sha ve kanˉ chi hkʼe maw maw te˗oˬ ve htawˇ, yawˇ ve dawˇ law kuiˬ htaꞈ hkʼaˬ htaˆ kaꞈ awˬ hpfuhˇ shiˍ ve yoˬ. 1991 hkʼawꞈ htaˇ yawˇ ve dawˇ law kuiˬ htaꞈ kʼoˆ ve, “ngaˬ hui ve dawˇ law kuiˬ lehˬ awˬ tehˬ hpehꞈ leh yawˬ awˬ moˍ ehˉ hkʼaw ve 144,000 gʼaˇ teˇ gʼaˇ le le dawˇ law kuiˬ awˬ tehˬ hpehꞈ ve yoˬ.” Yawˇ kʼawꞈ kʼoˆ sheˍ ve, “dawˇ law kuiˬ chi ve htaꞈ ngaˬ hui dawˇ law chehˇ sheˍ leh gʼa law maw jaˇ sheˍ ve htawˇ dawˇ law kuiˬ oˇ ve htaꞈ ngaˬ hui awˬ hpfuhˇ shiˍ ve yoˬ. Chi hkʼe law chehˇ ve htaꞈ awˬ hpfuhˇ hkʼawꞈ jaˇ. Teˇ lanˬ hkʼawꞈ gʼa law ve htawˇ dawˇ law kuiˬ chi ve awˬ hpfuhˇ hkʼaˆ jaˇ.”

7-8. Yaˬhoˉvaˬ ve kanˉ te ve chaw maˇ˗awˍ ve aˬ htoꞈ ma htaꞈ dawˇ law ve le? (Roˉmaꞈ 8:20, 21)

⁷ Chi beuꞈ teˇ co˗e Yaˬhoˉvaˬ ve kanˉ te ve chaw dawˇ law kuiˬ maˇ shuˍ daꞈ. Yaꞈ hkʼaˇ, Aˍbraˍhanˍ dawˇ law ve hkʼa shuˍ ngaˬ hui dawˇ law ve yoˬ. Chi ve lehˬ Gʼuiˬ sha ve mvuhˇ miˬ uˉ peunˍ ve awˬ hawˉ lo ngaˬ hui co co taiˍ taiˍ chehˇ tuˬ dawˇ law ve yoˬ. (Heˍbrehˇ 11:8-10, 13) Pawˇluꞈ daꞈ jaˇ ve dawˇ law kuiˬ chi htaꞈ kaꞈ kʼoˆ ve yoˬ. (Roˉmaꞈ 8:20, 21 gʼaw sheˍ.) Liꞈ hpu hkʼaw ka tiꞈ te taˍ laˇ ve htaꞈ nawˬ gʼa henˇ gehˇ sheˍ htaˇ, nawˬ dawˇ law kuiˬ hkʼaˬ ve teˇ ceuˬ htaꞈ dawˇ cawˇ jaˇ ve le? Dawˇ law kuiˬ chi ve lehˬ nawˬ biˇ ve chaw yaˇ hpehꞈ leh venˇ baˆ maˇ kʼawꞈ cawˬ tuˬ ve laˇ? Nawˬ haꞈ ve chaw kʼawꞈ teꞈ tu la leh gʼa mawˬ daꞈ ve pa taw, miˬ guiˬ awˬ suhˉ hkʼaw gʼa chehˇ tuˬ ve htaꞈ kaꞈ ha lehˬ jaˇ ve maˇ heˆ laˇ? Chi ve hkʼa peu˗eˬ nawˬ ve dawˇ law kuiˬ awˬ tehˬ hpehꞈ la tuˬ yoˬ.

⁸ Ngaˬ hui mvuhˇ naw ma hkʼoˆ ve dawˇ law kuiˬ maˇ heˆ leh miˬ guiˬ hkʼoˆ lo chehˇ tuˬ dawˇ law kuiˬ cawˬ ve htawˇ maˇ kʼoˆ, dawˇ law kuiˬ chi ve ngaˬ hui ha lehˬ tuˬ te laˇ ve yoˬ. Leh ngaˬ hui ve dawˇ law kuiˬ htaꞈ hkʼa dehꞈ yonˍ gʼa ve yoˬ. Pawˇluꞈ bvuhꞈ ve liꞈ ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ hkʼaˬ hkʼe ga laˇ ve le? Pawˇluꞈ dawˇ law kuiˬ htaꞈ caˉ daꞈ ve hkʼaˬ hkʼe bvuhꞈ ve teˇ geh henˇ tuˬ yoˬ. Chi hkʼe dawˇ law ve lehˬ, ngaˬ hui ve dawˇ law kuiˬ htaꞈ awˬ tehˬ hpehꞈ la tuˬ yoˬ tehꞈ yonˍ gʼa tuˬ ga laˇ ve yoˬ.

NGAˬ HUI VE DAWˇ LAW KUIˬ HTAꞈ HKʼAˬ HKʼE TE HKʼA DEHꞈ YONˍ GʼA TUˬ LE?

9-10. Pawˇluꞈ hkʼa shuˍ Hkriꞈ yaˇ teˇ gʼaˇ le le aˬ htoꞈ ma gʼa hpuˇ tuˬ dawˇ law gʼa ve le? (Roˉmaꞈ 5:3) (Awˬ han htaꞈ nyi sheˍ.)

⁹ Roˉmaꞈ liꞈ 5:3 gʼaw sheˍ. Pawˇluꞈ kʼoˆ ve, tuꞈ ve hkanˍ ve lehˬ ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ ga laˇ ve yoˬ. Chi lehˬ hpehꞈ kʼai maˇ gʼa taˬ tehꞈ dawˇ ve yoˬ hehˉ. Yeˍsuˆ ve awˬ laꞈ gʼawˇ teˇ gʼaˇ le le tuꞈ ve hkanˍ ve gʼa hpuˇ tuˬ yoˬ tehꞈ shiˍ ve yoˬ. Pawˇluꞈ kaꞈ chi hkʼa shuˍ gʼa hpuˇ ve yoˬ. Hteˇsaˍlawˇniˆ venˇ hkʼaw chehˇ ve awˬ viˉ awˬ nyi htaꞈ yawˇ kʼoˆ piˇ ve, “tuꞈ ve hkanˍ ve htaꞈ ngaˬ hui gʼa hkanˍ tuˬ yoˬ tehꞈ, ngaˬ hui nawˬ hui geh chehˇ ve teˇ yanˇ ngaˬ hui kʼoˆ taˍ ve yoˬ.” (1 Hteˇsaˍlawˇniˆ 3:4) Leh Kawˇrenˍhtuˆ venˇ hkʼaw chehˇ ve awˬ viˉ awˬ nyi htaꞈ yawˇ liꞈ bvuhꞈ piˇ ve, “ngaˬ hui gʼa hkanˍ peuˬ ve tuꞈ ve hkanˍ ve teˇ hpaˍ awˬ lawn nawˬ hui htaꞈ shiˍ piˇ gaˇ ve yoˬ. Ngaˬ hui a shaꞈ gʼa ponˬ tuˬ ve htaꞈ maˇ dawˇ.”—2 Kawˇrenˍhtuˆ 1:8; 11:23-27.

¹⁰ Chi beuꞈ teˇ co˗e ve Hkriꞈ yaˇ kaꞈ tuꞈ ve hkanˍ ve htaꞈ gʼa hpuˇ tuˬ yoˬ tehꞈ shiˍ ve yoˬ. (2 Tiˆmoˉseˍ 3:12) Hkʼe kʼo nawˬ Yeˍsuˆ ve tawˇ hkawˇ na yuˬ leh yawˇ ve awˬ laꞈ gʼawˇ hpehꞈ ve pa taw, tuꞈ ve hkanˍ ve htaꞈ gʼa hpuˇ chehˇ˗aw laˇ? Awˬ chawˇ, awˬ suhˍ awˬ shaˍ hpawˇ ve awˬ viˉ awˬ nyi nawˬ htaꞈ kʼoˆ guiˇ gʼuiˬ guiˇ laˇ ve, maˇ heˆ leh tawˍ laˇ ve yoˬ hehˉ. Nawˬ teˇ lawn le le htaꞈ ka tiꞈ yeˬ gaˇ ve pa taw, nawˬ kanˉ te kuiˬ lo shoꞈ shaꞈ ve gʼa hpuˇ tuˬ te laˇ˗aw laˇ? (Heˍbrehˇ 13:18) Nawˬ ve dawˇ law kuiˬ awˬ nu ve chaw htaꞈ kʼoˆ piˇ ve pa taw, mvuhˇ miˬ uˉ peunˍ ve tawˍ laˇ ve gʼa hpuˇ˗aw laˇ? Yaꞈ hkʼaˇ, ngaˬ hui tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, Pawˇluꞈ kʼoˆ ve ngaˬ hui ha lehˬ ve cawˬ tuˬ yoˬ. Aˬ htoꞈ ma pa taw le?

11. Ngaˬ hui tuꞈ ve hkanˍ ve hkʼaˬ hkʼe gʼa hpuˇ ve htawˇ maˇ kʼoˆ, aˬ htoꞈ ma te ngaˬ hui yeunˇ hkanˍ cawˇ ve le?

¹¹ Ngaˬ hui tuꞈ ve hkanˍ ve gʼa hpuˇ ve htawˇ ha lehˬ ve cawˬ gʼa ve yoˬ. Awˬ lawn kʼo, Roˉmaꞈ liꞈ 5:3 hkʼaw tuꞈ ve hkanˍ ve lehˬ, ngaˬ hui ve te hkʼaˇ dawˇ hkʼaˇ daꞈ ve cawˬ tuˬ ga laˇ ve yoˬ. Chi ve lehˬ “tuꞈ ve hkanˍ ve htaꞈ pa taw ngaˬ hui yeunˇ hkanˍ puiˉ la ve yoˬ.” Hkriꞈ yaˇ teˇ gʼaˇ le le tuꞈ ve hkanˍ ve gʼa hpuˇ tuˬ yoˬ. Chi htaꞈ pa taw, ngaˬ hui teˇ gʼaˇ le le gʼa yeunˇ hkanˍ cawˇ ve yoˬ. Ngaˬ hui chi hkʼe te ve kʼo, ngaˬ hui ve dawˇ law kuiˬ awˬ tehˬ hpehꞈ tuˬ yoˬ. Awˬ yawˇ teˇ hpaˍ hpaˍ miˬ shaˍ paˇ kuiˬ haˉ pui de lo ce ve, Yeˍsuˆ tawˇ pa haˉ tehˆ maˍ laˇ ve hkʼe ngaˬ hui maˇ hpehꞈ gaˇ. Awˉ lawˉ htaˇ yawˇ hui daꞈ ve awˬ lawn sha tanˇ htaꞈ na gaˇ ve yoˬ. Yaꞈ hkʼaˇ, yawˇ hui tuꞈ ve hkanˍ ve maˇ heˆ leh fawˉ ve mehˍ ve gʼa hpuˇ htaˇ maˇ na gaˇ˗o ve yoˬ. (Maꞈhtehˍ 13:5, 6, 20, 21) Ngaˬ hui kaꞈ tawˍ ve tsuhˇ ve leh tuꞈ ve hkanˍ ve gʼa hpuˇ htaˇ, ha lehˬ ve maˇ cawˬ. Yaꞈ hkʼaˇ, ngaˬ hui yeunˇ hkanˍ ve kʼo, awˬ bon gʼa tuˬ yoˬ. Leh ngaˬ hui aˬ htoꞈ ma awˬ bon gʼa tuˬ le?

12. Tuꞈ ve hkanˍ ve htaꞈ ngaˬ hui yeunˇ hkanˍ htaˇ aˬ htoꞈ ma awˬ bon gʼa tuˬ le?

¹² Yaˍkoˆ kʼoˆ ve tuꞈ ve hkanˍ ve gʼa hpuˇ htaˇ, yeunˇ hkanˍ ve kʼo awˬ bon cawˬ ve yoˬ. Yawˇ kʼoˆ ve, “nawˬ hui teˇ ceuˬ kaꞈ maˇ yawnˇ kʼai leh, teˇ ceuˬ le le awˬ hkʼaw lo hkʼa biˇ hpehꞈ la tuˬ yeunˇ hkanˍ puiˉ ve nyi ma biˇ la htaˇ hkʼa gaˬ te˗o.” (Yaˍkoˆ 1:2-4) Yaˍkoˆ kʼoˆ ve, yeunˇ hkanˍ ve lehˬ ngaˬ hui awˬ pon awˬ bon cawˬ ve yoˬ. Chi ve lehˬ, ngaˬ hui ve te hkʼaˇ dawˇ hkʼaˇ daꞈ ve laiˉ ceuˬ cawˬ tuˬ te laˇ ve yoˬ. Tawˇ pa haˉ te kʼo, yonˍ ve, Gʼuiˬ sha htaꞈ gʼaˇ va ve, leh dawˇ zuhˬ gaˇ zuhˬ ve cawˬ ve yoˬ. Chi hkʼoˆ kaꞈ, a yeˇ uiˍ ve awˬ bon cawˬ ve teˇ ceuˬ cawˬ sheˍ ve yoˬ.

13-14. Yeunˇ hkanˍ ve awˬ bon hkʼaˬ hkʼe gʼa ve le? Leh chi ve ngaˬ hui ve dawˇ law kuiˬ htaꞈ hkʼaˬ hkʼe te caˉ daꞈ ve le? (Roˉmaꞈ 5:4)

¹³ Roˉmaꞈ liꞈ 5:4 gʼaw sheˍ. Pawˇluꞈ kʼoˆ ve, yeunˇ hkanˍ ve lehˬ, “daꞈ ve htaꞈ te puiˉ la ve yoˬ.” Chi htaꞈ pa taw, nawˬ yeunˇ hkanˍ ve kʼo, nawˬ Gʼuiˬ sha nyi hkʼaˇ suh ve chaw hpehꞈ tuˬ yoˬ. Yaꞈ hkʼaˇ, chi ve lehˬ nawˬ tuꞈ ve hkanˍ ve leh shoꞈ shaꞈ ve laiˉ ceuˬ gʼa hpuˇ ve htaꞈ, Yaˬhoˉvaˬ nyi hkʼaˇ suh ve tehꞈ kʼoˆ gaˇ ve maˇ heˆ. Gʼuiˬ sha nyi hkʼaˇ suh ve awˬ ceuˬ lehˬ nawˬ hpehꞈ ve yoˬ. Chi hkʼe shiˍ htaˇ nawˬ awˬ gʼaˇ gʼa jaˇ ve maˇ heˆ laˇ?—Chiˇ mvuh ve 5:12.

¹⁴ Aˍbraˍhanˍ tuꞈ ve hkanˍ ve htaꞈ gʼa hpuˇ ve htawˇ, yawˇ yeunˇ hkanˍ gʼaˇ ve yoˬ. Chi ve lehˬ yawˇ Yaˬhoˉvaˬ nyi hkʼaˇ suh tuˬ te piˇ ve yoˬ. Yawˇ Gʼuiˬ sha nyi ma cawˇ ve chaw hpehꞈ leh Gʼuiˬ sha ve awˬ chawˇ hpehꞈ ve yoˬ. (Awˬ hkuiˉ puiˍ 15:6; Roˉmaꞈ 4:13, 22) Ngaˬ hui kaꞈ chi ve hkʼa shuˍ shuˍ te gʼa ve yoˬ. Ngaˬ hui Yaˬhoˉvaˬ ve kanˉ te maˇ jaˇ ve maˇ heˆ leh daꞈ ve awˬ vuiˬ cawˬ ve htaꞈ pa taw, yawˇ nyi hkʼaˇ suh tuˬ te piˇ ve maˇ heˆ. Yaꞈ hkʼaˇ, ngaˬ hui ka tiꞈ yeˬ ve hkʼaw yeunˇ hkanˍ ve pa taw, yawˇ nyi hkʼaˇ suh ve yoˬ. Ngaˬ hui a shaꞈ hkʼaˬ hkʼe maˬ gaˬ˗oˬ ve, a shaꞈ teꞈ hkʼaˇ hkʼaˬ hkʼe hpehꞈ ve, maˇ heˆ leh puiˉ ve cheuˬ ve hkʼaˬ hkʼe taw te gʼa ve htawˇ maˇ kʼoˆ, ngaˬ hui teˇ gʼaˇ le le yeunˇ hkanˍ gʼaˇ ve yoˬ. Chi teˇ hkui nawˬ tuꞈ ve hkanˍ ve gʼa hpuˇ chehˇ leh ka tiꞈ yeˬ ve hkʼaw yeunˇ hkanˍ chehˇ˗aw laˇ? Chi hkʼe te chehˇ ve kʼo, Yaˬhoˉvaˬ nawˬ htaꞈ nyi hkʼaˇ suh jaˇ ve tehꞈ yonˍ sheˍ. Chi hkʼe shiˍ ve lehˬ ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ ga laˇ ve yoˬ.

DAWˇ LAW KUIˬ HTAꞈ HKʼA TAWˍ LEHˆ MAWˬ VE

15. Pawˇluꞈ aˬ htoꞈ ma awˬ lawn htaꞈ kʼoˆ sheˍ ve le? Leh aˬ htoꞈ ma te awˬ lawn chi chaw teˇ hpaˍ htawˇ dawˇ nawˬ dawˇ cawˬ tuˬ te piˇ ve le?

¹⁵ Chi awˬ gʼuˇ suhˍ htaˇ Pawˇluꞈ kʼoˆ ve hkʼe, ngaˬ hui yeunˇ hkanˍ ve kʼo Gʼuiˬ sha nyi hkʼaˇ suh tuˬ te piˇ ve yoˬ. Peuˬ hkʼawꞈ nawˉ yawˇ bvuhꞈ ve awˬ ceuˬ htaꞈ chaˬ nyi sheˍ. Yawˇ kʼoˆ ve, “daꞈ ve htaꞈ te puiˉ ve pa taw ngaˬ hui dawˇ law puiˉ la ve htaꞈ shiˍ ve yoˬ. Dawˇ law puiˉ ve htaꞈ pa taw gʼa yaꞈ taw tuˬ ve maˇ heˆ.” (Roˉmaꞈ 5:4, 5) Awˬ lawn chi laiˉ gʼaˇ htawˇ dawˇ nawˬ dawˇ cawˬ tuˬ te piˇ ve yoˬ. Aˬ htoꞈ ma pa taw le? Roˉmaꞈ liꞈ 5:2 hkʼaw Liꞈ hpu awˬ tawn chi ve maˇ gaˬ sheˍ htaˇ, Pawˇluꞈ kʼoˆ ve, Roˉmaꞈ venˇ hkʼaw ve Hkriꞈ yaˇ dawˇ law kuiˬ cawˬ˗oˬ ve yoˬ. Dawˇ law kuiˬ chi ve lehˬ, ‘Gʼuiˬ sha ve awˬ meꞈ awˬ hponˇ htaꞈ yawˇ hui dawˇ law chehˇ ve yoˬ.’ Chi hkʼe hpehꞈ ve pa taw chaw teˇ hpaˍ kʼoˆ ve, ‘Hkriꞈ yaˇ oˇ ve teˇ hpaˍ dawˇ law kuiˬ cawˬ˗oˬ ve kʼo, aˬ htoꞈ ma pa taw Pawˇluꞈ dawˇ law kuiˬ htaꞈ kʼawꞈ kʼoˆ sheˍ ve le?’

16. Ngaˬ hui ve dawˇ law kuiˬ htaꞈ hkʼa dehꞈ yonˍ gʼa ve tawˇ pa haˉ kʼoˆ maˍ piˇ sheˍ. (Awˬ han htaꞈ nyi sheˍ.)

¹⁶ Nawˬ awˬ tehˬ ve htaꞈ henˇ gehˇ sheˍ htaˇ ve awˬ lawn htaꞈ dawˇ nyi sheˍ. Liꞈ hpu hkʼaw miˬ guiˬ awˬ suhˉ hkʼaw co co taiˍ taiˍ a shaꞈ gʼa tuˬ, maˍ laˇ ve dawˇ law kuiˬ htaꞈ caˉ daꞈ ve nawˬ gʼa henˇ htaˇ hkʼaˬ hkʼe dawˇ ve le? Dawˇ law kuiˬ chi lehˬ daꞈ jaˇ ve yoˬ tehꞈ nawˬ dawˇ ve yoˬ. Yaꞈ hkʼaˇ, chi awˬ tehˬ hpehꞈ kʼai gʼa tuˬ laˇ? Hkʼaˬ hkʼe hpehꞈ ve htawˇ maˇ kʼoˆ, nawˬ Yaˬhoˉvaˬ ve awˬ lawn hkʼa dehꞈ shiˍ leh yawˇ ve ka tiꞈ htaꞈ caˉ daꞈ ve nawˬ gʼa henˇ htaˇ dawˇ law kuiˬ chi awˬ tehˬ hpehꞈ la tuˬ yoˬ tehꞈ nawˬ hkʼa dehꞈ yonˍ gʼa ve yoˬ.

17. Nawˬ Baˆtiˆsaˬ haꞈ yuˬ˗oˬ ve htawˇ, dawˇ law kuiˬ htaꞈ hkʼaˬ hkʼe te hkʼa dehꞈ yonˍ gʼa tuˬ le?

¹⁷ Nawˬ Baˆtiˆsaˬ haꞈ yuˬ˗oˬ ve htawˇ, nawˬ Yaˬhoˉvaˬ geh hkʼa dehꞈ meuˆ daꞈ leh yawˇ htaꞈ haꞈ tuˬ yoˬ tehꞈ dawˇ teh taˍ ve kʼo, nawˬ ve dawˇ law kuiˬ htaꞈ hkʼa dehꞈ yonˍ gʼa tuˬ te laˇ ve yoˬ. (Heˍbrehˇ 5:13–6:1) Roˉmaꞈ liꞈ 5:2-4 hkʼaw nawˬ awˬ pon awˬ tehˬ hpehꞈ ve tehꞈ dawˇ ve yoˬ. Nawˬ tuꞈ ve hkanˍ ve laiˉ ceuˬ gʼa hpuˇ ve htawˇ, yeunˇ hkanˍ gʼaˇ leh Gʼuiˬ sha nawˬ htaꞈ nyi ma cawˇ ve yoˬ tehꞈ dawˇ ve yoˬ. Yaˬhoˉvaˬ nawˬ htaꞈ haꞈ ve tehꞈ yonˍ gʼa ve yoˬ. Yawˇ ka tiꞈ te taˍ ve hkʼe gʼaꞈ te tuˬ yoˬ tehꞈ nawˬ yonˍ gʼa ve yoˬ. Liꞈ hpu henˇ gehˇ sheˍ htaˇ aꞈ kehˉ, chi teˇ hkui nawˬ ve dawˇ law kuiˬ htaꞈ hkʼa dehꞈ yonˍ gʼa ve yoˬ. Nawˬ ve dawˇ law kuiˬ htaꞈ hkʼa tawˍ lehˆ mawˬ leh, awˬ hpfuhˇ shiˍ ve kʼo, Gʼuiˬ sha lehˬ nawˬ htaꞈ daꞈ ve awˬ ceuˬ peꞈ laˇ gaˇ ve tehꞈ nawˬ dawˇ ve yoˬ. Chi hkʼe dawˇ htaˇ, dawˇ law kuiˬ nawˬ ve a shaꞈ teꞈ kuiˬ hkʼaw teˇ hpawˇ le le awˬ bon cawˬ ve yoˬ. Yehˬ kʼa hkʼaw ve chaw htaꞈ daꞈ ve te piˇ ve, nawˬ a shaꞈ teꞈ kuiˬ hkʼaw dawˇ cheˆ ve awˬ lawn, maˇ heˆ leh nawˬ te ve awˬ ceuˬ htaꞈ kaꞈ awˬ bon cawˬ ve yoˬ.

18. Ngaˬ hui htaꞈ aˬ htoꞈ ma ka tiꞈ te taˍ laˇ ve le?

¹⁸ Pawˇluꞈ kʼoˆ peuˬ hkʼawꞈ nawˉ, Gʼuiˬ sha nyi hkʼaˇ suh tuˬ te piˇ htaˇ dawˇ law kuiˬ cawˬ ve yoˬ. Dawˇ law kuiˬ htaꞈ caˉ daꞈ ve a yeˇ uiˍ ve teˇ lawn htaꞈ Pawˇluꞈ kʼoˆ sheˍ ve yoˬ. Yawˇ kʼoˆ ve, nawˬ ve dawˇ law kuiˬ awˬ tehˬ hpehꞈ tuˬ yoˬ. Aˬ htoꞈ ma pa taw chi hkʼe yonˍ gʼa ve le? Awˬ lawn kʼo, Roˉmaꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ kʼoˆ piˇ ve, “dawˇ law puiˉ ve htaꞈ pa taw gʼa yaꞈ taw tuˬ ve maˇ heˆ. Awˬ lawn kʼo, ngaˬ hui htaꞈ peꞈ laˇ peuˬ ve daꞈ ve kehˬ ve awˬ ha hpu lehˬ, ngaˬ hui ve nyi ma awˬ hkʼaw lo Gʼuiˬ sha ve haꞈ pehnˇ ve teˇ ceuˬ ngeuˍ keu laˇ peuˬ.” (Roˉmaꞈ 5:5) Chi htaꞈ pa taw, Yaˬhoˉvaˬ nawˬ htaꞈ peꞈ laˇ ve dawˇ law kuiˬ awˬ tehˬ hpehꞈ tuˬ yoˬ tehꞈ nawˬ yonˍ gʼa ve yoˬ.

19. Nawˬ aˬ htoꞈ ma ve awˬ lawn htaꞈ yonˍ gʼa ve le?

¹⁹ Yaˬhoˉvaˬ Aˍbraˍhanˍ htaꞈ ka tiꞈ te piˇ ve htaꞈ caˉ daꞈ ve hkʼa dehꞈ dawˇ nyi sheˍ. Yawˇ Gʼuiˬ sha nyi ma cawˇ ve chaw hpehꞈ leh Gʼuiˬ sha ve awˬ chawˇ hpehꞈ ve pa taw, Aˍbraˍhanˍ ve dawˇ law kuiˬ awˬ tehˬ hpehꞈ ve yoˬ. Liꞈ hpu hkʼaw kʼoˆ ve, “Aˍbraˍhanˍ yeunˇ hkanˍ leh law taˍ ve pa taw, Gʼuiˬ sha yawˇ htaꞈ ka tiꞈ piˇ taˍ ve hkʼe yawˇ gʼa ve yoˬ.” (Heˍbrehˇ 6:15; 11:9, 18; Roˉmaꞈ 4:20-22) Aˍbraˍhanˍ dawˇ law taˍ ve daꞈ jaˇ. Nawˬ kaꞈ chi hkʼa shuˍ dawˇ law leh ka tiꞈ yeˬ ve hkʼaw yeunˇ hkanˍ ve kʼo, nawˬ ve dawˇ law kuiˬ awˬ tehˬ hpehꞈ la tuˬ yoˬ. Chi ve nawˬ ha lehˬ tuˬ te laˇ ve yoˬ. Nyi ma luˬ tuˬ te laˇ ve maˇ heˆ. (Roˉmaꞈ 12:12) Pawˇluꞈ kʼoˆ ve, “daꞈ ve kehˬ ve awˬ ha hpu ve kanˇ paˆ htaꞈ pa taw, dawˇ law ve awˬ hkʼaw lo nawˬ hui biˇ la tuˬ, dawˇ law tuˬ cawˬ la piˇ ve Gʼuiˬ sha lehˬ, nawˬ hui yonˍ ve awˬ hkʼaw lo ha lehˬ dawˇ sha ve teˇ ceuˬ le le biˇ la piˇ˗oˆ.”—Roˉmaꞈ 15:13.