Tzuhˬ dawˬ ve awˬ lawn Yaˬhoˉvaˬ nawˬ htaꞈ beˆ maˍ laˇ tcuh sheˍ

Yaˬhoˉvaˬ nawˬ htaꞈ awˬ hpfuhˇ hkʼaˆ jaˇ ve laꞈ shawnˍ laiˉ ceuˬ peꞈ laˇ taˍ ve yoˬ. Chi ve lehˬ a shu yawˇ hkʼaˇ yawˇ dawˇ cheˆ gʼa ve yoˬ. Liꞈ hpu hkʼaw kʼoˆ ve, a pehˉ meuˇ gʼuiˬ kaꞈ Gʼuiˬ sha peꞈ laˇ taˍ ve laꞈ shawnˍ hpehꞈ ve yoˬ. Liꞈ hpu teˇ tawn hkʼaw kʼoˆ ve, “hti caˇ hti dawˬ ve teˇ ceuˬ nawˬ htaꞈ ha lehˬ la piˇ leh, a pehˉ meuˇ gʼuiˬ htawˇ nawˬ htaꞈ ha lehˬ la piˇ ve yoˬ.” (Cuˇ yiˍ piˇ ve 10:19; Chiˇ mvuh ve 104:15) Yaꞈ hkʼaˇ, chaw teˇ hpaˍ kʼo, tzuhˬ dawˬ maˇ jaˇ ve htaꞈ nawˬ mawˬ ve yoˬ hehˉ. Chi hkʼoˆ kaꞈ, miˬ guiˬ hkʼoˆ lo maˇ˗awˍ ve chaw tzuhˬ dawˬ ve awˬ lawn htaꞈ dawˇ hkʼaˇ maˇ hawˍ daꞈ ve yoˬ. Leh cuˇ yiˍ cawˬ ve beˆ maˍ laˇ hkawˇ chi htaꞈ caˉ daꞈ ve Hkriꞈ yaˇ hkʼaˬ kaˬ lo ca gʼa tuˬ le?

Ngaˬ hui aˬ htoꞈ ma ve mvuhˇ miˬ lo chehˇ ve maˇ heˆ leh chaw liˇ vaˇ liˇ hkʼaˬ hkʼe hpehꞈ ve htawˇ maˇ kʼoˆ, ngaˬ hui hkʼaˬ hkʼe ve chaw hpehꞈ ve le? Ngaˬ hui Yaˬhoˉvaˬ dawˇ ve hkʼe dawˇ leh yawˇ beˆ maˍ laˇ ve htaꞈ cuˇ leh dawˇ cheˆ ve yoˬ. Chi hkʼe te ve kʼo, ngaˬ hui ve a shaꞈ teꞈ kuiˬ hkʼaw ha lehˬ jaˇ tuˬ te laˇ ve yoˬ.

Miˬ guiˬ hkʼoˆ lo ve chaw laiˉ gʼaˇ tzuhˬ dawˬ hkeh jaˇ leh tzuhˬ dawˬ maˇ jaˇ ve yoˬ. Chaw teˇ hpaˍ kʼo nyi ma sha gaˇ ve pa taw, tzuhˬ dawˬ ve yoˬ. Chaw teˇ hpaˍ kʼo shoꞈ shaꞈ ve awˬ lawn htaꞈ maˇ gʼa dawˇ maˇ tuˬ tzuhˬ dawˬ ve yoˬ. Chaw teˇ hpaˍ kʼo yaˇ nehˬ hpehꞈ˗oˬ ve, maˇ heˆ leh yawˇ cheuˬ ve tehꞈ shu htaꞈ mawˬ tcuh gaˇ ve pa taw tzuhˬ dawˬ ve yoˬ.

Yaꞈ hkʼaˇ, ngaˬ hui Hkriꞈ yaˇ hpehꞈ ve chaw awˬ pon kʼo, ngaˬ hui htaꞈ haꞈ ve Yaˬhoˉvaˬ geh daꞈ ve beˆ maˍ laˇ hkawˇ gʼa ve yoˬ. Tzuhˬ dawˬ maˇ jaˇ ve kʼo, heuˆ la kuiˬ laiˉ ceuˬ cawˬ ve tehꞈ yawˇ beˆ maˍ laˇ ve yoˬ. Awˬ lawn chi ve Tawˇ naˉ ve liꞈ 23:29-35 hkʼaw gʼaw nyi gʼa ve yoˬ. Chi ve hkʼaw tzuhˬ dawˬ maˇ ve chaw lehˬ heuˆ la kuiˬ cawˬ ve htaꞈ kʼoˆ taˍ ve yoˬ.a Uˉyawˉpaˆ miˬ guiˬ lo chehˇ ve awˬ viˉ awˬ nyi Deh˗ninˇ yawˇ Yaˬhoˉvaˬ ve Shaˉhkiˆhkanˍ ve chaw maˇ hpehꞈ sheˍ htaˇ ve awˬ lawn kʼoˆ maˍ laˇ tuˬ yoˬ. Yawˇ kʼoˆ ve, “oˇ htaˇ ngaˬ tzuhˬ dawˬ maˇ jaˇ leh maˇ daꞈ ve laiˉ ceuˬ te ve yoˬ. Chi teˇ hkui hkʼa gaˬ ngaˬ nyi ma naˬ jaˇ ve yoˬ.”

Tzuhˬ dawˬ ve htaꞈ heuˆ la kuiˬ maˇ cawˬ tuˬ, Hkriꞈ yaˇ cuˇ yiˍ cawˬ ve hkʼaw dawˇ cheˆ gʼa tuˬ hkʼaˬ hkʼe ga laˇ ve le? Ngaˬ hui htaꞈ ga laˇ gʼa ve lehˬ, awˬ lawn chi Yaˬhoˉvaˬ hkʼaˬ hkʼe dawˇ ve, ngaˬ hui yawˇ dawˇ ve hkʼe dawˇ leh yawˇ beˆ maˍ laˇ ve hkʼe gʼaꞈ te ve yoˬ.

Tzuhˬ dawˬ ve awˬ lawn leh chaw teˇ hpaˍ dawˬ ve awˬ hkʼaˇ Liꞈ hpu hkʼaw hkʼaˬ hkʼe kʼoˆ maˍ laˇ taˍ ve htaꞈ teˇ geh nyi sheˍ.

TZUHˬ DAWˬ VE AWˬ LAWN LIꞈ HPU HKʼAW HKʼAˬ HKʼE KʼOˆ TAˍ VE LE?

Keunˍ lawꞈ cawˇ lawꞈ ve hkʼaw dawˬ tehꞈ Liꞈ hpu hkʼaw maˇ gʼa kʼoˆ laˇ taˍ. Liꞈ hpu hkʼaw kʼoˆ ve, a pehˉ meuˇ gʼuiˬ dawˬ ve lehˬ ha lehˬ tuˬ te laˇ ve yoˬ. Liꞈ hpu teˇ tawn hkʼaw kʼoˆ ve, “ha lehˬ ha kʼa te leh, a shu yawˇ ve caˇ tuˬ htaꞈ caˇ chehˇ dawˬ chehˇ˗oˆ.” (Cuˇ yiˍ piˇ ve 9:7) Teˇ pawˆ pawˆ kʼo, Yeˍsuˆ kaꞈ a pehˉ meuˇ gʼuiˬ dawˬ ve yoˬ. Leh Yaˬhoˉvaˬ ve kanˉ te ve awˬ nu ve chaw kaꞈ dawˬ ve yoˬ.—Maꞈhtehˍ 26:27-29; Luˉkaꞈ 7:34; 1 Tiˆmoˉseˍ 5:23.

Yaꞈ hkʼaˇ, Liꞈ hpu hkʼaw hkʼa tawˍ lehˆ kʼoˆ laˇ taˍ ve, keunˍ lawꞈ cawˇ lawꞈ ve hkʼaw dawˬ leh, dawˬ bvuhˆ jaˇ ve lehˬ, peun daꞈ ve yoˬ. Liꞈ hpu hkʼaw kʼoˆ ve, “a pehˉ meuˇ gʼuiˬ dawˬ bvuhˆ ve taˇ te.” (Eˇfeˇsuꞈ 5:18) Leh kʼawꞈ kʼoˆ sheˍ ve, ‘zuhˬ dawˬ bvuhˆ ve chaw Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e.’ (1 Kawˇrenˍhtuˆ 6:10) Tzuhˬ dawˬ bvuhˆ ve htaꞈ Yaˬhoˉvaˬ maˇ dawˇ cawˇ ve tehꞈ hkʼa tawˍ lehˆ gʼa mawˬ ve yoˬ. Chi htaꞈ pa taw, ngaˬ hui miˬ guiˬ yaˇ hkʼe gʼaꞈ te ve aꞈ kehˉ Yaˬhoˉvaˬ nyi ma cawˇ tuˬ gʼaꞈ te cawˇ ve yoˬ.

Chaw teˇ hpaˍ yawˇ tzuhˬ dawˬ maˇ jaˇ ve htawˇ, maˇ bvuhˆ tehꞈ kʼoˆ ve yoˬ. Chi hkʼe kʼoˆ ve lehˬ kawˆ tuˬ cawˬ jaˇ. Liꞈ hpu hkʼaw hkʼa tawˍ lehˆ kʼoˆ laˇ taˍ ve, hawˉ hkʼaˆ maˇ heˆ leh yaˇ miˇ htawˇ maˇ kʼoˆ, “a pehˉ meuˇ gʼuiˬ dawˬ ponˬ dawˬ leuˉ” ve kʼo, maˇ daꞈ ve awˬ ceuˬ te la leh, Yaˬhoˉvaˬ htaꞈ kaꞈ te yaꞈ la ve yoˬ. Yawˇ Yaˬhoˉvaˬ geh meuˆ daꞈ ve kaꞈ luˬ kʼai la gʼa ve yoˬ. (Tiˇtuˆ 2:3; Tawˇ naˉ ve 20:1) “Tzuhˬ dawˬ bvuhˆ ve” chaw lehˬ miˬ guiˬ awˬ suhˉ hkʼaw maˇ gʼa loꞈ˗e tehꞈ Yeˍsuˆ shaˍ tiꞈ peꞈ laˇ ve yoˬ. (Luˉkaꞈ 21:34-36) Hkriꞈ yaˇ tzuhˬ maˇ dawˬ bvuhˆ leh heuˆ la kuiˬ maˇ cawˬ tuˬ aˬ htoꞈ ma ga laˇ gʼa ve le?

NAWˬ Aˬ HTOꞈ MA PA TAW DAWˬ VE LEH HKʼAˬ HKʼE TAW TAW DAWˬ VE LE?

A shu yawˇ ve chaw liˇ vaˇ liˇ htaꞈ pa taw, ngaˬ hui tzuhˬ hkʼaˬ hkʼe ma dawˬ cawˇ ve tehꞈ maˇ gʼa dawˇ cheˆ piˇ cawˇ. Caˇ ve maˇ kʼoˆ dawˬ ve maˇ kʼoˆ Hkriꞈ yaˇ lehˬ Yaˬhoˉvaˬ nyi hkʼaˇ suh tuˬ te piˇ gaˇ ve yoˬ. Liꞈ hpu hkʼaw ngaˬ hui htaꞈ shaˍ tiꞈ peꞈ laˇ ve, “nawˬ hui caˇ ve maˇ kʼoˆ, dawˬ ve maˇ kʼoˆ, aˬ htoꞈ ma teˇ ceuˬ te ve maˇ kʼoˆ, hkʼa peu˗eˬ awˬ hkʼaw lo Gʼuiˬ sha ve awˬ meꞈ awˬ hponˇ tawˆ la tuˬ te˗o.” (1 Kawˇrenˍhtuˆ 10:31) Hkʼawꞈ laˇ hkawˇ teˇ ceuˬ ceuˬ leh Liꞈ hpu hkʼaw ve awˬ liˇ awˬ hkʼaˇ htaꞈ teˇ geh nyi sheˍ.

Shu dawˇ cawˇ tuˬ maˇ heˆ leh shu maˇ kʼoˆ guiˇ laˇ tuˬ ngaˬ tzuhˬ dawˬ ve laˇ? Tawˆ kʼai ve liꞈ 23:2 hkʼaw kʼoˆ ve, “chaw maˇ ve hpawˇ chehˇ leh haiˬ ve kanˉ htaꞈ nawˬ maˇ gʼa te.” Liꞈ hpu chi teˇ tawn hkʼaw Yaˬhoˉvaˬ Iˉsaˍreˍlaˆ chaw htaꞈ shaˍ tiꞈ piˇ ve, Gʼuiˬ sha nyi hkʼaˇ maˇ suh tuˬ te ve chaw hkʼe maˇ gʼa te. Chi ve chi beuꞈ teˇ co˗e ngaˬ hui awˬ pon kaꞈ yehˇ gʼa ve yoˬ. Tzuhˬ dawˬ ve chaw dawˇ ve hkʼe, ngaˬ hui gʼaꞈ te leh yawˇ hui hkʼe dawˇ cheˆ ve kʼo, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te la leh ngaˬ hui Yaˬhoˉvaˬ geh maˇ meuˆ daꞈ tuˬ kaꞈ te laˇ gʼa ve yoˬ.—Roˉmaꞈ 12:2.

Ngaˬ tzuhˬ dawˬ ve cheuˬ ve tehꞈ shu htaꞈ shiˍ tcuh gaˇ ve pa taw dawˬ ve laˇ? Chaw liˇ vaˇ liˇ teˇ ceuˬ ceuˬ kʼo tzuhˬ dawˬ maˇ ve leh teˇ hkui teˇ hkui dawˬ ve lehˬ a hkʼe leˇ ceh hpehꞈ ve tehꞈ dawˇ ve yoˬ. (1 Peˍtruˆ 4:3) Yaꞈ hkʼaˇ, 1 Kawˇrenˍhtuˆ liꞈ 16:13 hkʼaw Hkriꞈ yaˇ aˬ htoꞈ ma te tuˬ awˬ gʼaˇ peꞈ laˇ ve htaꞈ chaˬ nyi sheˍ. Chi ve teˇ tawn hkʼaw kʼoˆ ve, “nawˬ hui hkʼa dehꞈ shaw taˍ˗oꞈ. Yonˍ ve awˬ hkʼaw lo yeˬ lehˍ chehˇ˗oˆ. Awˬ gʼaˇ yuˬ tawˆ leh, nyi ma haꞈ hanˉ te chehˇ˗oˆ.” Tzuhˬ dawˬ ve lehˬ, ngaˬ hui awˬ gʼaˇ cawˬ tuˬ te laˇ gʼa˗aw laˇ? Te laˇ maˇ gʼa. Tzuhˬ dawˬ ve lehˬ, ngaˬ hui ve dawˇ hkʼaˇ leh te tawˆ la ve htaꞈ hkʼa dehꞈ yuˬ tiˍ gʼa tuˬ kaꞈ te laˇ maˇ gʼa. Chaw oˇ ve teˇ gʼaˇ tzuhˬ dawˬ maˇ ve lehˬ cheuˬ ve tehꞈ hpeuꞈ maw laˇ ve aꞈ kehˉ, yawˇ awˬ gʼaˇ nuˇ ve yoˬ. Iˉsaˍyaˆ liꞈ 28:7 hkʼaw kʼoˆ ve, tzuhˬ dawˬ bvuhˆ ve pa taw awˬ lawn teˇ hpaˍ htaꞈ hkʼa dehꞈ dawˇ cheˆ maˇ gʼa.

Awˬ tehˬ yonˍ yeˬ ve lehˬ, Yaˬhoˉvaˬ geh gʼa leh, ‘hkʼa dehꞈ shawˍ taˍ˗oꞈ. Yonˍ ve awˬ hkʼaw lo yeˬ lehˍ chehˇ˗oˆ.’ Chi ve hkʼaˬ hkʼe te caˉ daꞈ ve le? (Chiˇ mvuh ve 18:32) Chi kʼoˆ gaˇ ve lehˬ, Hkriꞈ yaˇ hpehꞈ ve chaw kawˆ tuˬ cawˬ ve awˬ ceuˬ htaꞈ gʼa jaw kʼai leh, ngaˬ hui Yaˬhoˉvaˬ geh meuˆ daꞈ ve htaꞈ maˇ gʼa heuˆ la tuˬ gʼa dawˇ cheˆ ve yoˬ. Yeˍsuˆ miˬ guiˬ hkʼoˆ lo chehˇ htaˇ yawˇ kaꞈ, chi ve hkʼa shuˍ yonˍ yeˬ ve yoˬ. Hkʼe te leh, yawˇ haꞈ hanˉ ve htaꞈ awˬ nu ve chaw yawˆ yan ve yoˬ.

Ngaˬ shoꞈ shaꞈ ve awˬ lawn htaꞈ maˇ dawˇ nyi gaˇ ve pa taw tzuhˬ dawˬ ve laˇ? Yaˬhoˉvaˬ Chiˇ mvuh ve liꞈ bvuhꞈ paˍ htaꞈ dawˇ pawnˍ piˇ leh bvuhꞈ tcuh ve, “ngaˬ dawˇ haˍ leh nyi ma luˬ chehˇ ve teˇ yanˇ, nawˬ [Yaˬhoˉvaˬ] ngaˬ htaꞈ dawˇ sha laˇ leh, ha lehˬ tcuh laˇ ve yoˬ.” (Chiˇ mvuh ve 94:19) Chi teˇ hkui nawˬ shoꞈ shaꞈ ve gʼa hpuˇ chehˇ ve kʼo, tzuhˬ htaꞈ gʼaˇ va ve maˇ heˆ, Yaˬhoˉvaˬ htaꞈ gʼaˇ va sheˍ. Awˬ hkʼaˇ teˇ hkʼaˇ lehˬ, Yaˬhoˉvaˬ geh bon lawˬ ve yoˬ. Chi hkʼoˆ kaꞈ, awˬ viˉ awˬ nyi teˇ hpaˍ kʼoˆ ve, co ha hpawˇ ve chaw mawˇ beˆ maˍ laˇ tcuh ve kʼo, awˬ bon cawˬ jaˇ. Chaw teˇ hpaˍ kʼoˆ ve, tzuhˬ dawˬ ve lehˬ shoꞈ shaꞈ ve awˬ lawn htaꞈ maˇ dawˇ nyi tuˬ te laˇ ve yoˬ. Yaꞈ hkʼaˇ, awˬ tehˬ kʼo chi ve ngaˬ hui cawˇ ve awˬ ceuˬ htaꞈ te tuˬ ga laˇ maˇ gʼa. (Hawˇseˍ 4:11) Deh˗ninˇ kʼawꞈ kʼoˆ ve, “ngaˬ dawˇ haˍ leh nyi ma luˬ jaˇ ve pa taw, awˬ lawn oˇ ve htaꞈ maˇ gʼa dawˇ nyi tuˬ ngaˬ tzuhˬ dawˬ ve yoˬ. Yaꞈ hkʼaˇ, ngaˬ dawˬ maˇ ve kʼo shoꞈ shaꞈ ve awˬ lawn gʼaˇ hteꞈ cawˬ leh chaw teˇ gʼaˇ kaꞈ ngaˬ htaꞈ maˇ nyi gaˇ leh ngaˬ awˬ to ngaˬ awˬ hpfuhˇ maˇ cawˬ tehꞈ dawˇ ve yoˬ.” Deh˗ninˇ chi ve htaꞈ haꞈ yuˬ gʼa tuˬ hkʼaˬ hkʼe ga piˇ ve le? Yawˇ kʼoˆ ve, “ngaˬ shoꞈ shaꞈ ve awˬ lawn cawˬ htaˇ tzuhˬ htaꞈ gʼaˇ va ve maˇ heˆ. Yaˬhoˉvaˬ htaꞈ gʼaˇ va cawˇ ve yoˬ. Yaˬhoˉvaˬ htaꞈ gʼaˇ va ve kʼo shoꞈ shaꞈ ve awˬ lawn htaꞈ yeunˇ hkanˍ gʼaˇ tuˬ ga laˇ ve yoˬ.” Ngaˬ hui shoꞈ shaꞈ ve awˬ lawn hkʼaˬ hkʼe taw gʼa hpuˇ ve htawˇ maˇ kʼoˆ, Yaˬhoˉvaˬ ngaˬ hui htaꞈ ga laˇ gʼa tuˬ yoˬ.—Hpiˇliˇpiˆ 4:6, 7; 1 Peˍtruˆ 5:7.

Nawˬ tzuhˬ dawˬ ve kʼo a shu yawˇ awˬ to htaꞈ chaˬ nyi tuˬ awˬ hawˉ lo ve na hkawˇ teˇ hpaˍ htaꞈ dawˇ nyi sheˍ. ‘Awˬ chawˇ maˇ heˆ leh yehˬ kʼa hkʼaw ve chaw ngaˬ tzuhˬ dawˬ ve htaꞈ dawˇ haˍ˗aw laˇ?’ Dawˇ haˍ ve kʼo, nawˬ awˬ to nawˬ maˇ shiˍ gʼa ve shoꞈ shaꞈ ve awˬ lawn cawˬ chehˇ ve yoˬ. ‘Ngaˬ leuˉ leh dawˬ ve laˇ?’ Chi teˇ hkui nawˬ tzuhˬ yeꞈ maˇ caˆ sheˍ leh leuˉ leh dawˬ ve kʼo, nawˬ tzuhˬ yeꞈ caˆ la gʼa ve yoˬ. ‘Ngaˬ 2-3 nyi maˇ gʼa dawˬ ve kʼo ngaˬ yeunˇ hkanˍ maˇ gʼaˇ˗o ve laˇ?’ Yeunˇ hkanˍ maˇ gʼaˇ˗o ve kʼo, nawˬ tzuhˬ yeꞈ caˆ˗oˬ ve yoˬ. Chi hkʼe hpehꞈ ve kʼo, nawˬ gʼa tawˍ cawˇ ve yoˬ.

Tzuhˬ dawˬ ve lehˬ shoꞈ shaꞈ ve awˬ lawn laiˉ ceuˬ cawˬ tuˬ te laˇ ve pa taw, Hkriꞈ yaˇ teˇ hpaˍ hpaˍ tzuhˬ maˇ dawˬ ve yoˬ. Teˇ hpaˍ kʼo, maˇ mehˬ tehꞈ dawˇ ve pa taw maˇ dawˬ ve yoˬ. Nawˬ ve awˬ chawˇ tzuhˬ maˇ dawˬ tuˬ dawˇ cheˆ ve kʼo, yawˇ dawˇ cheˆ ve htaꞈ yawˆ yan piˇ leh teꞈ chiˉ maˇ kʼoˆ piˇ cawˇ.

Daꞈ jaˇ ve teˇ hkʼaˇ lehˬ a shu yawˇ awˬ to htaꞈ awˬ liˇ teh ve yoˬ. Hkriꞈ yaˇ teˇ hpaˍ lehˬ tzuhˬ hkʼaˬ hkʼe taw dawˬ tuˬ maˇ heˆ leh teˇ hkui teˇ hkui maˇ dawˬ tuˬ awˬ liˇ teh ve yoˬ. Tawˇ pa haˉ te kʼo, teˇ shinˉ ve hkʼaw teˇ pawˆ maˇ heˆ leh awˍ maˇ caˇ sheˍ htaˇ a ciˉ dawˬ ve yoˬ. Teˇ hpaˍ hpaˍ kʼo, tzuhˬ teˇ ceuˬ ceuˬ ceh tiˉ dawˬ tuˬ dawˇ cheˆ ve yoˬ. A pehˉ meuˇ gʼuiˬ maˇ heˆ leh bin˗a (beer) ceh dawˬ tuˬ dawˇ cheˆ ve yoˬ. Teˇ hpaˍ kʼo, tzuhˬ tiˉ maˇ heˆ leh tzuhˬ htaꞈ awˬ nu ve awˬ ceuˬ pawnˇ daꞈ ve kaꞈ maˇ dawˬ ve yoˬ. Hkriꞈ yaˇ a shu yawˇ awˬ to awˬ liˇ hkʼa dehꞈ teh ve kʼo gʼaꞈ te gʼa ve yoˬ. Co ha hpawˇ ve chaw mawˇ lehˬ yawˇ awˬ to awˬ liˇ teh leh hkʼa dehꞈ gʼaꞈ te ve kʼo shu hkʼaˬ hkʼe dawˇ la ve htaꞈ maˇ dawˇ hkiˉ ve yoˬ.

Ngaˬ hui tzuhˬ dawˬ tuˬ maˇ heˆ leh maˇ dawˇ tuˬ dawˇ cheˆ htaˇ, shu awˬ pon kaꞈ gʼa dawˇ nyi piˇ ve yoˬ. Roˉmaꞈ liꞈ 14:21 hkʼaw kʼoˆ ve, “shaˍ caˇ ve maˇ kʼoˆ, a pehˉ meuˇ gʼuiˬ dawˬ ve maˇ kʼoˆ, hkʼaˬ ve teˇ ceuˬ te ve htawˇ maˇ kʼoˆ, nawˬ ve awˬ viˉ awˬ nyi hkui htiˇ poˬ paiˍ tuˬ hpehꞈ ve kʼo, maˇ te cawˇ ve yoˬ.” Beˆ maˍ laˇ ve chi htaꞈ nawˬ hkʼaˬ hkʼe te gʼaꞈ te gʼa tuˬ le? Awˬ viˉ awˬ nyi htaꞈ haꞈ ve tehꞈ hpeuꞈ maw piˇ sheˍ. Tzuhˬ dawˬ ve lehˬ chaw teˇ hpaˍ nyi ma maˇ sha tuˬ te piˇ ve kʼo, haꞈ pehnˇ ve lehˬ nawˬ tzuhˬ dawˬ gʼa ve htaꞈ ceh tiˉ maˇ dawˇ nyi cawˇ. Chi hkʼe te ve lehˬ, nawˬ awˬ nu ve chaw dawˇ ve htaꞈ yawˆ yan piˇ leh nawˬ awˬ to htaꞈ ceh tiˉ maˇ dawˇ nyi ve tehꞈ hpeuꞈ maw piˇ ve yoˬ.—1 Kawˇrenˍhtuˆ 10:24.

Chi hkʼoˆ kaꞈ, Hkriꞈ yaˇ teˇ hpaˍ lehˬ tzuhˬ dawˬ ve hpawˇ mvuhˇ miˬ ve awˬ liˇ htaꞈ gʼa na cawˇ ve awˬ hkʼaˇ lehˬ, a shaꞈ maˇ gaˬ sheˍ ve kʼo tzuhˬ maˇ gʼa dawˬ, kaˇ gʼaꞈ htaˇ kaꞈ tzuhˬ maˇ gʼa dawˬ, maˇ heˆ leh kanˉ te htaˇ awˬ hkʼeun yehˇ ve kaꞈ tzuhˬ maˇ gʼa dawˬ.—Roˉmaꞈ 13:1-5.

Yaˬhoˉvaˬ ngaˬ hui htaꞈ daꞈ ve laꞈ shawnˍ laiˉ ceuˬ peꞈ laˇ ve yoˬ. Teˇ ceuˬ lehˬ a shu yawˇ hkʼaˇ yawˇ dawˇ cheˆ gʼa ve yoˬ. Aˬ htoꞈ ma caˇ tuˬ dawˬ tuˬ dawˇ cheˆ htaˇ, chi ve htaꞈ ngaˬ hui yehˇ gʼa ve yoˬ. A shu yawˇ hkʼaˇ yawˇ dawˇ cheˆ ve chi htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ, Yaˬhoˉvaˬ nyi hkʼaˇ suh ve awˬ ceuˬ htaꞈ gʼaꞈ te ve yoˬ.