Shaw nyi kuiˬ Taꞈ yehˬ liꞈ teh kuiˬ bawehˇ in˗teu˗neꞈ
Shaw nyi kuiˬ Taꞈ yehˬ
Liꞈ teh kuiˬ bawehˇ in˗teu˗neꞈ
Laˇhuˍ hkawˇ
?
  • ˆ
  • ꞈ
  • ˇ
  • ˬ
  • ˉ
  • ˍ
  • LIꞈ HPU
  • LIꞈ TEˇ HPAˍ
  • HPAWNˬ DAꞈ VE
  • w17 Junˬ liꞈ mehˆ hpfuhˇ 15-20
  • A yeˇ uiˍ jaˇ ve awˬ lawn htaꞈ dawˇ tcuhˉ taˍ˗oꞈ

VDO chi maˇ cawˬ.

Lawˬ hkawˉ ve yoˬ. VDO chi hpaw maˇ gʼa.

  • A yeˇ uiˍ jaˇ ve awˬ lawn htaꞈ dawˇ tcuhˉ taˍ˗oꞈ
  • Shaw nyi kuiˬ Taˆ yehˬ Yaˬhoˉvaˬ ve Mvuhˇ miˬ Kaˇ laˇ ve (Henˇ ve)—2017
  • Awˬ lawn ehˉ
  • Hkʼa shuˍ shuˍ ve awˬ lawn
  • Aˬ htoꞈ ma te awˬ lawn chi a yeˇ uiˍ jaˇ ve le?
  • Yaˬhoˉvaˬ uˉ peunˍ ve hpawˇ chehˇ ve ngaˬ hui gʼa ponˬ ve aꞈ kehˉ a yeˇ uiˍ ve
  • Yawˇbaˆ yawˇ ve dawˇ hkʼaˇ htaꞈ hkʼaˬ hkʼe te pa ve
  • Hkʼaˬ htaˆ kaꞈ dawˇ tcuhˉ taˍ ve
  • Yawˇbaˆ ka tiꞈ yeˬ ve
    Liꞈ hpu hkʼaw aˬ htoꞈ ma awˬ lawn cawˬ ve le?
  • “Gʼuiˬ sha htaꞈ gʼaˇ va˗o”
    Shaw nyi kuiˬ Taˆ yehˬ Yaˬhoˉvaˬ ve Mvuhˇ miˬ Kaˇ laˇ ve (Henˇ ve)—2022
  • Yawˇbaˆ a shu hpehꞈ ve le?
    Liꞈ hpu hkʼaw ve awˬ lawn ngaˬ hui henˇ ve
  • Yaˬhoˉvaˬ uˉ peunˍ ve hpawˇ chehˇ sheˍ
    Shaw nyi kuiˬ Taˆ yehˬ Yaˬhoˉvaˬ ve Mvuhˇ miˬ Kaˇ laˇ ve (Henˇ ve)—2017
Shaw nyi kuiˬ Taˆ yehˬ Yaˬhoˉvaˬ ve Mvuhˇ miˬ Kaˇ laˇ ve (Henˇ ve)—2017
w17 Junˬ liꞈ mehˆ hpfuhˇ 15-20

A yeˇ uiˍ jaˇ ve awˬ lawn htaꞈ dawˇ tcuhˉ taˍ˗oꞈ

“Nawˬ lehˬ, Yaˬhoˉvaˬ meh leh miˬ guiˬ hkʼa peu˗eˬ hkʼoˆ uiˍ jaˇ mvuh jaˇ ve Gʼuiˬ sha teˇ gʼaˇ tiˉ hpehꞈ ve tehꞈ, teˇ gʼaˇ le le shiˍ tcuh sheˍ.”—Chiˇ mvuh ve 83:18.

Kʼa muiˬ liꞈ: 9, 22

Nawˬ aˬ htoꞈ ma gʼa henˇ ve le?

  • Aˬ htoꞈ ma te Yaˬhoˉvaˬ uˉ peunˍ ve hpawˇ chehˇ ve, chaw yaˇ teˇ gʼaˇ le le awˬ pon a yeˇ uiˍ jaˇ ve le?

  • Yawˇbaˆ Yaˬhoˉvaˬ uˉ peunˍ ve hpawˇ hkʼaˬ hkʼe te chehˇ gʼa ve le? Yaꞈ hkʼaˇ, aˬ htoꞈ ma te Yaˬhoˉvaˬ Yawˇbaˆ htaꞈ gu piˇ ve le?

  • Ngaˬ hui Yaˬhoˉvaˬ uˉ peunˍ ve hpawˇ chehˇ gaˇ ve kʼo, hkʼaˬ hkʼe gʼa te tuˬ le?

1, 2. (a) Ngaˬ hui teˇ gʼaˇ le le awˬ pon a yeˇ uiˍ jaˇ ve awˬ lawn aˬ htoꞈ ma le? (b) Aˬ htoꞈ ma te awˬ lawn chi a yeˇ uiˍ jaˇ ve le?

Chi beuꞈ teˇ co˗e laiˉ gʼaˇ hpu a yeˇ uiˍ jaˇ ve tehꞈ shawˍ ve yoˬ. Awˬ lawn chi ve htaꞈ yawˇ hui dawˇ haˍ ve yoˬ. Hpu chi ma ma cawˬ tuˬ leh hpu gʼawˆ teh gʼa tuˬ, yawˇ hui awˬ yanˇ yehˇ maˇ ve yoˬ. Awˬ nu ve chaw yawˇ hui awˬ pon a yeˇ uiˍ jaˇ leh yehˬ kʼa hkʼaw, chehˇ sha cawˬ sha tuˬ, yawˇ hui te gaˇ ve awˬ ceuˬ yoˬ.

2 Teˇ ceuˬ le le aꞈ kehˉ a yeˇ uiˍ jaˇ ve teˇ ceuˬ cawˬ sheˍ ve yoˬ. Awˬ lawn chi ve lehˬ Yaˬhoˉvaˬ uˉ peunˍ ve hpawˇ chehˇ ve yoˬ. Awˬ lawn chi ve hkʼaˬ htaˆ kaꞈ dawˇ tcuhˉ taˍ ve a yeˇ uiˍ jaˇ ve yoˬ. Ngaˬ hui shaˍ tiꞈ maˇ te ve kʼo, ngaˬ hui ve a shaꞈ teꞈ hkʼaˇ leh haˍ ve awˬ lawn htaꞈ tiˉ dawˇ nyi leh awˬ lawn chi ve htaꞈ leunˇ kʼai la ve yoˬ. Ngaˬ hui Yaˬhoˉvaˬ uˉ peunˍ ve hpawˇ chehˇ ve kʼo, haˍ ve awˬ lawn htaꞈ gu tuˬ sha leh Yaˬhoˉvaˬ htaꞈ meuˆ daꞈ maˇ la ve yoˬ.

Aˬ htoꞈ ma te awˬ lawn chi a yeˇ uiˍ jaˇ ve le?

3. Gʼuiˬ sha uˉ peunˍ ve awˬ lawn htaꞈ Saˍtanˍ hkʼaˬ hkʼe kʼoˆ ve le?

3 Yaˬhoˉvaˬ uˉ peunˍ tuˬ a hkaw˗anˬ cawˬ˗aw laˇ tehꞈ Saˍtanˍ na hkawˇ teh ve yoˬ. Yaˬhoˉvaˬ maˇ daꞈ ve uˉ peunˍ shehˍ hpaˇ hpehꞈ leh chaw yaˇ htaꞈ daꞈ ve maˇ piˇ gaˇ tehꞈ teˇ gʼaˇ le le htaꞈ Saˍtanˍ chi hkʼe dawˇ tcuh gaˇ ve yoˬ. Saˍtanˍ kʼoˆ gaˇ ve lehˬ chaw yaˇ a shu yawˇ hkʼaˇ yawˇ uˉ peunˍ ve kʼo, ha lehˬ ve cawˬ maˇ ve yoˬ. (Awˬ hkuiˉ puiˍ 3:1-5) Chaw teˇ gʼaˇ kaꞈ Yaˬhoˉvaˬ htaꞈ awˬ tehˬ ka tiꞈ yeˬ ve maˇ heꞈ. Tuꞈ jaˇ hkanˍ jaˇ htaˇ, Gʼuiˬ sha htaꞈ maˇ uˉ peunˍ tcuh gaˇ tehꞈ Saˍtanˍ kʼoˆ ve yoˬ. (Yawˇbaˆ 2:4, 5) Chi htaꞈ pa taw, Gʼuiˬ sha maˇ uˉ peunˍ ve kʼo, a shaꞈ teꞈ hkʼaˇ hpehꞈ haˍ jaˇ ve tehꞈ teˇ gʼaˇ le le shiˍ tuˬ, Yaˬhoˉvaˬ awˬ yanˇ piˇ ve yoˬ.

4. Aˬ htoꞈ ma te Yaˬhoˉvaˬ uˉ peunˍ ve a hkaw˗anˬ cawˬ ve tehꞈ teˇ gʼaˇ le le shiˍ cawˇ ve le?

4 Saˍtanˍ ve tawˇ hkawˇ heˍ ve tehꞈ Yaˬhoˉvaˬ shiˍ ve yoˬ. Yaꞈ hkʼaˇ, aˬ htoꞈ ma te yawˇ Saˍtanˍ htaꞈ awˬ yanˇ piˇ ve le? Na hkawˇ chi mvuhˇ naw ma hkʼoˆ leh miˬ guiˬ hkʼoˆ teˇ gʼaˇ le le htaꞈ caˉ daꞈ ve yoˬ. (Chiˇ mvuh ve 83:18 gʼaw ve.) Aˍdanˍ leh Eˇvaꞈ Yaˬhoˉvaˬ uˉ peunˍ ve htaꞈ maˇ haꞈ yuˬ. Laiˉ gʼaˇ yawˇ hui hkʼa shuˍ te ve yoˬ. Saˍtanˍ kʼoˆ ve cawˇ ve yoˬ tehꞈ teˇ hpaˍ hpaˍ dawˇ ve yoˬ hehˉ. Chaw yaˇ leh mvuhˇ naw ma tcuh yaˇ awˬ lawn chi ve htaꞈ htawˇ dawˇ nawˬ dawˇ te ve kʼo, awˬ tehˬ ve dawˇ sha gawˬ lehˍ ve leh teˇ moˍ tiˉ ve maˇ cawˬ. Yaꞈ hkʼaˇ, teˇ gʼaˇ le le Yaˬhoˉvaˬ uˉ peunˍ ve hpawˇ chehˇ la ve kʼo, yawˇ co co taiˍ taiˍ uˉ peunˍ tuˬ yoˬ. Mvuhˇ naw ma miˬ naˆ ma hkʼa peu˗eˬ dawˇ sha gawˬ lehˍ ve tiˉ cawˬ tuˬ yoˬ.—Eˇfeˇsuꞈ 1:9, 10

5. Gʼuiˬ sha uˉ peunˍ ve awˬ lawn ngaˬ hui htaꞈ hkʼaˬ hkʼe te caˉ daꞈ ve le?

5 Yaˬhoˉvaˬ uˉ peunˍ ve cawˇ ve tehꞈ teˇ gʼaˇ le le shiˍ tuˬ yoˬ. Saˍtanˍ leh chaw yaˇ uˉ peunˍ ve te biˇ maˇ gʼa ve pa taw, te luˬ piˇ tuˬ yoˬ. Gʼuiˬ sha uˉ peunˍ ve Meˍsiˉyaꞈ ve mvuhˇ miˬ htaꞈ cuˇ leh te biˇ gʼa tuˬ yoˬ. Chaw yaˇ ka tiꞈ htaꞈ haꞈ shaˉ gʼa leh Gʼuiˬ sha uˉ peunˍ ve hpawˇ chehˇ gʼa ve tehꞈ ka tiꞈ yeˬ ve chaw hpeuꞈ maw piˇ gʼa tuˬ yoˬ. (Iˉsaˍyaˆ 45:23, 24) Nawˬ kaꞈ teˇ gʼaˇ ka tiꞈ yeˬ ve chaw hpehꞈ gaˇ ve maˇ heˆ laˇ? Chi hkʼe te gʼa tuˬ, Yaˬhoˉvaˬ uˉ peunˍ ve a yeˇ hkʼaˬ hkʼe taw uiˍ ve tehꞈ ngaˬ hui hkʼa dehꞈ gʼa na gʼa ve yoˬ.

Yaˬhoˉvaˬ uˉ peunˍ ve hpawˇ chehˇ ve ngaˬ hui gʼa ponˬ ve aꞈ kehˉ a yeˇ uiˍ ve

6. Yaˬhoˉvaˬ uˉ peunˍ ve hpawˇ chehˇ ve a yeˇ hkʼaˬ hkʼe taw uiˍ ve le?

6 Yaˬhoˉvaˬ uˉ peunˍ ve hpawˇ chehˇ ve ngaˬ hui ha lehˬ ve aꞈ kehˉ a yeˇ uiˍ ve yoˬ. Yaꞈ hkʼaˇ, ngaˬ hui gʼa ponˬ ve a yeˇ maˇ uiˍ leh Yaˬhoˉvaˬ ngaˬ hui htaꞈ a yeˇ maˇ te laˇ tehꞈ oˇ hkʼe kʼoˆ gaˇ ve maˇ heˆ. Ngaˬ hui hkʼaˬ hkʼe te shiˍ gʼa ve le?

7, 8. Gʼuiˬ sha uˉ peunˍ ve hpawˇ chehˇ ve kʼo, ngaˬ hui aˬ htoꞈ ma awˬ bon gʼa tuˬ le?

7 Yaˬhoˉvaˬ chaw yaˇ htaꞈ haꞈ jaˇ ve yoˬ. Ngaˬ hui awˬ hpfuhˇ hkʼaˆ jaˇ tehꞈ yawˇ shawˍ laˇ ve pa taw, ngaˬ hui co co taiˍ taiˍ a shaꞈ gʼa tuˬ, yawˇ ve yaˇ paˍ htaiˍ hkʼawꞈ laˇ tcuh ve yoˬ. (Yoˇhanˬ 3:16; 1 Yoˇhanˬ 4:9) Awˬ gʼuˇ suhˍ hpawˇ ngaˬ hui htaꞈ caˉ daꞈ ve awˬ ceuˬ Yaˬhoˉvaˬ ka tiꞈ te taˍ ve hkʼe maˇ gʼaꞈ te ve kʼo, Saˍtanˍ leh tawˍ taˍ paˍ kʼoˆ ve cawˇ ve yoˬ. Yaˬhoˉvaˬ heˍ leh chaw yaˇ htaꞈ daꞈ ve awˬ ceuˬ maˇ piˇ leh maˇ hteˇ maˇ cawˇ ve hkʼaw uˉ peunˍ ve tehꞈ Saˍtanˍ kʼoˆ ve yoˬ. Tawˍ taˍ paˍ Yaˬhoˉvaˬ ve ka tiꞈ htaꞈ kʼoˆ guiˇ gʼuiˬ guiˇ leh kʼoˆ ve “Jawˇmawˇ Yeˍsuˆ kʼawꞈ yaꞈ la tuˬ ve tehꞈ kʼoˆ taˍ ve ka tiꞈ tawˇ hkawˇ hkʼaˬ hkʼe kʼai le? Awˬ puˍ awˬ pi hui kaꞈ suh peuˬ. Yaꞈ hkʼaˇ, miˬ guiˬ te hpanˍ htaˇ kaꞈ tanˬ leh yaꞈ nyi hkʼa gaˬ, hkʼa peu˗eˬ hkʼa shuˍ shuˍ hpehꞈ chehˇ ve maˇ heˆ laˇ?” (2 Peˍtruˆ 3:3, 4) Yaꞈ hkʼaˇ, Yaˬhoˉvaˬ yawˇ ka tiꞈ te taˍ ve htaꞈ gʼaꞈ te tuˬ yoˬ. Chaw yaˇ Yaˬhoˉvaˬ uˉ peunˍ ve hpawˇ chehˇ cawˇ ve tehꞈ teˇ gʼaˇ le le shiˍ htaˇ, na yuˬ ve chaw gʼa ponˬ tuˬ yoˬ. (Iˉsaˍyaˆ 55:10, 11 gʼaw ve.) Yaˬhoˉvaˬ uˉ peunˍ ve haꞈ pehnˇ ve htaꞈ cuˇ ve yoˬ. Yawˇ ka tiꞈ yeˬ ve chaw htaꞈ haꞈ leh yawˇ hui awˬ hpfuhˇ cawˬ ve tehꞈ hkʼaˬ htaˆ kaꞈ shawˍ ve ngaˬ hui yonˍ gʼa ve yoˬ.—Tawˆ kʼai ve 34:6.

8 Yaˬhoˉvaˬ uˉ peunˍ ve hpawˇ chehˇ ve a yeˇ uiˍ jaˇ ve htawˇ, chi ngaˬ hui gʼa ponˬ ve a yeˇ maˇ uiˍ ve kʼoˆ gaˇ ve maˇ heˆ. Yaˬhoˉvaˬ ngaˬ hui htaꞈ a yeˇ te laˇ jaˇ. Yaˬhoˉvaˬ uˉ peunˍ ve a yeˇ uiˍ jaˇ leh ngaˬ hui yawˇ hpawˇ chehˇ cawˇ ve tehꞈ ngaˬ hui hkʼaˬ htaˆ kaꞈ dawˇ tcuhˉ taˍ cawˇ ve yoˬ.

Yawˇbaˆ yawˇ ve dawˇ hkʼaˇ htaꞈ hkʼaˬ hkʼe te pa ve

9. Yawˇbaˆ ve awˬ lawn Saˍtanˍ hkʼaˬ hkʼe kʼoˆ ve le? (Awˬ lawn tanˬ htaˇ ve awˬ han htaꞈ nyi sheˍ.)

9 Yaˬhoˉvaˬ uˉ peunˍ ve hpawˇ chehˇ ve ngaˬ hui cawˇ ve dawˇ hkʼaˇ gʼa cawˬ ve yoˬ. Yawˇbaˆ liꞈ gʼaw ve kʼo, awˬ lawn chi ve htaꞈ ngaˬ hui shiˍ gʼa ve yoˬ. Yawˇbaˆ ve liꞈ kaꞈ awˉ lawˉ peuˇ ve teˇ co˗e htaˇ bvuhꞈ taˍ ve yoˬ. Saˍtanˍ kʼoˆ ve Yawˇbaˆ tuꞈ ve hkanˍ ve gʼa hpuˇ maˇ jaˇ ve kʼo, Gʼuiˬ sha htaꞈ oˉ kʼoˍ maˇ kʼawꞈ pui tuˬ yoˬ. Yawˇbaˆ htaꞈ tuꞈ ve hkanˍ ve cawˬ tcuh tehꞈ Saˍtanˍ Gʼuiˬ sha htaꞈ kʼoˆ piˇ ve yoˬ. Yaˬhoˉvaˬ oˇ hkʼe maˇ te. Yaꞈ hkʼaˇ, Yawˇbaˆ htaꞈ beˬ tuˬ Yawˇ Saˍtanˍ htaꞈ a hkaw˗anˬ piˇ ve yoˬ. Yawˇ kʼoˆ ve “yawˇ hkʼa cawˬ ve mawˇ hkʼa peu˗eˬ nawˬ ve laꞈ sheh hkʼaw chiˇ aꞈ laˇ ve yoˬ.” (Yawˇbaˆ 1:7-12 gʼaw ve.) Peuˬ hkʼawꞈ nawˉ maˇ maw, Yawˇbaˆ yawˇ ve awˬ ceˬ teˇ hpaˍ leh mawˇ jeˬ hkʼa peu˗eˬ shonˇ kʼai ve yoˬ. Yawˇ ve yaˇ 10 gʼaˇ hkʼa peu˗eˬ kaꞈ suh˗e ve yoˬ. Yawˇbaˆ gʼa hpuˇ ve maˇ daꞈ ve awˬ ceuˬ Gʼuiˬ sha geh laˬ ve tehꞈ Saˍtanˍ Yawˇbaˆ htaꞈ chi hkʼe dawˇ tcuh gaˇ ve yoˬ. (Yawˇbaˆ 1:13-19) Yawˇbaˆ naˬ jaˇ leh chaꞈ chiˆ jaˇ ve a naˍ Saˍtanˍ te piˇ ve yoˬ. (Yawˇbaˆ 2:7) Oˇ ve awˬ hkʼoˆ kaꞈ Yawˇbaˆ ve awˬ miˇ ma leh maˇ daꞈ ve awˬ chawˇ 3 gʼaˇ yawˇ nyi ma luˬ tuˬ kʼoˆ piˇ ve yoˬ.—Yawˇbaˆ 2:9; 3:11; 16:2.

10. (a) Yawˇbaˆ Yaˬhoˉvaˬ htaꞈ ka tiꞈ hkʼaˬ hkʼe te yeˬ ve le? (b) Aˬ htoꞈ ma te Yawˇbaˆ ve dawˇ hkʼaˇ htaꞈ gʼa pa cawˇ ve le?

10 Saˍtanˍ kʼoˆ ve cawˇ˗a laˇ? Maˇ cawˇ. Yawˇbaˆ tuꞈ ve hkanˍ ve gʼa hpuˇ jaˇ ve htawˇ, yawˇ Yaˬhoˉvaˬ htaꞈ oˉ kʼoˍ pui sheˍ ve yoˬ. (Yawˇbaˆ 27:5) Yaꞈ hkʼaˇ, awˬ yanˇ teˇ yanˇ Yawˇbaˆ a yeˇ uiˍ jaˇ ve awˬ lawn htaꞈ leunˇ leh yawˇ awˬ to pon tiˉ dawˇ nyi chehˇ ve yoˬ. Yawˇ teꞈ chiˉ maˇ gʼa te yaꞈ tehꞈ hkʼaˬ htaˆ kaꞈ kʼoˆ ve yoˬ. Aˬ htoꞈ ma te yawˇ gʼa tuꞈ gʼa hkanˍ chehˇ ve htaꞈ shiˍ tuˬ a hkaw˗anˬ cawˬ ve tehꞈ yawˇ dawˇ ve yoˬ. (Yawˇbaˆ 7:20; 13:24) Yawˇbaˆ ve dawˇ hkʼaˇ htaꞈ ngaˬ hui shiˍ gʼa ve yoˬ. Yaꞈ hkʼaˇ, Yawˇbaˆ ve dawˇ hkʼaˇ htaꞈ maˇ cawˇ tehꞈ Yaˬhoˉvaˬ shiˍ leh pa piˇ ve yoˬ. Yawˇ hkʼaˬ hkʼe te ve le?

11, 12. Yawˇbaˆ yawˇ ve dawˇ hkʼaˇ pa tuˬ, Yaˬhoˉvaˬ hkʼaˬ hkʼe ga piˇ ve le? Leh Yawˇbaˆ hkʼaˬ hkʼe te ve le?

11 Yaˬhoˉvaˬ Yawˇbaˆ htaꞈ kʼoˆ piˇ taˍ ve Yawˇbaˆ ve liꞈ 38-41 htaꞈ ngaˬ hui gʼaw gʼa ve yoˬ. Aˬ htoꞈ ma te Yawˇbaˆ gʼa tuꞈ gʼa hkanˍ ve Yaˬhoˉvaˬ maˇ kʼoˆ maˍ piˇ. Yaˬhoˉvaˬ htaꞈ tehˆ ve kʼo, Yawˇbaˆ a yeˇ maˇ uiˍ tehꞈ yawˇ Yawˇbaˆ htaꞈ na gʼa tcuh gaˇ ve yoˬ. Yaˬhoˉvaˬ Yawˇbaˆ htaꞈ maˍ piˇ ve, Yawˇbaˆ ve awˬ lawn aꞈ kehˉ a yeˇ uiˍ jaˇ ve laiˉ lawn cawˬ sheˍ ve yoˬ. (Yawˇbaˆ 38:18-21 gʼaw ve.) Yaˬhoˉvaˬ ve tawˇ hkawˇ Yawˇbaˆ ve dawˇ hkʼaˇ htaꞈ pa tuˬ ga piˇ ve yoˬ.

12 Yaˬhoˉvaˬ chi hkʼe kʼoˆ ve Yawˇbaˆ htaꞈ maˇ ha kʼaˉ ve laˇ? Maˇ heˆ. Leh Yawˇbaˆ kaꞈ oˇ hkʼe maˇ gʼa dawˇ. Yaˬhoˉvaˬ beˆ maˍ piˇ ve tawˇ hkawˇ daꞈ jaˇ tehꞈ Yawˇbaˆ dawˇ ve yoˬ. Yawˇbaˆ kʼoˆ ve, “ngaˬ kʼoˆ peuˬ ve teˇ hpaˍ htaꞈ ngaˬ kʼawꞈ yaꞈ taw leh, venˇ baˆ dawˇ hpfuhˆ ve hkʼaw jeꞈ meu˗e leh hkʼawꞈ laˉ hkʼaw chehˇ taˍ ve yoˬ.” (Yawˇbaˆ 42:1-6) Chi awˬ gʼuˇ suhˍ htaˇ, Eˇliˇhuˆ kaꞈ Yawˇbaˆ ve dawˇ hkʼaˇ pa tuˬ ga piˇ ve yoˬ. (Yawˇbaˆ 32:5-10) Cuˇ yiˍ cawˬ ve tawˇ hkawˇ beˆ maˍ piˇ ve htaꞈ Yawˇbaˆ na yuˬ leh yawˇ ve dawˇ hkʼaˇ pa ve yoˬ. Yawˇ pa kʼai ve Yaˬhoˉvaˬ mawˬ ve yoˬ. Yawˇbaˆ ka tiꞈ yeˬ ve pa taw, Yaˬhoˉvaˬ ha lehˬ jaˇ leh awˬ nu ve chaw htaꞈ shiˍ tcuh piˇ ve yoˬ.—Yawˇbaˆ 42:7, 8.

13. Yawˇbaˆ tuꞈ ve hkanˍ ve maˇ cawˬ˗o ve htawˇ, Yaˬhoˉvaˬ maˍ ve tawˇ hkawˇ yawˇ htaꞈ hkʼaˬ hkʼe ga piˇ gʼa ve le?

13 Yawˇbaˆ beˬ ve lawˇ ve hkʼa peu˗eˬ peuˬ kʼai˗oˬ htaˇ, yawˇ Yaˬhoˉvaˬ maˍ ve tawˇ hkawˇ awˬ bon gʼa sheˍ ve yoˬ. “Yawˇbaˆ a shaꞈ teꞈ chehˇ ve awˉ lawˉ peuˇ teˇ tawn aꞈ kehˉ, awˬ leh meuˇ hpawˇ ve teˇ tawn htaꞈ leuˉ leh awˬ bon kʼawꞈ gʼa ve yoˬ.” Peuˬ hkʼawꞈ nawˉ maˇ maw, “yawˇ lehˬ, yaˇ paˍ 7 gʼaˇ leh, yaˇ miˇ 3 gʼaˇ cawˬ ve yoˬ.” (Yawˇbaˆ 42:12-14) Yawˇ yaˇ chi teˇ hpaˍ htaꞈ haꞈ ve htawˇ, suh peuˬ ve yaˇ teˇ hpaˍ htaꞈ dawˇ nawˇ chehˇ sheˍ ve yoˬ. Maˇ daꞈ ve awˬ ceuˬ yawˇ leh yawˇ ve yehˬ kʼa gʼa hpuˇ ve htaꞈ yawˇ leunˇ maˇ gʼa ve yoˬ hehˉ. Awˬ gʼuˇ suhˍ hpawˇ Yawˇbaˆ aˬ htoꞈ ma te gʼa tuꞈ gʼa hkanˍ ve yawˇ shiˍ ve htawˇ, Yaˬhoˉvaˬ aˬ htoꞈ ma te oˇ hkʼe taw tuꞈ hkanˍ tcuh laˇ ve yawˇ htawˇ dawˇ nawˬ dawˇ cawˬ ve yoˬ hehˉ. Yawˇbaˆ htawˇ dawˇ nawˬ dawˇ cawˬ ve kʼo, Yaˬhoˉvaˬ maˍ ve yawˇ tawnˇ taˍ cawˇ ve yoˬ. Yawˇ awˬ gʼaˇ gʼa leh cawˇ ve dawˇ hkʼaˇ cawˬ tuˬ, awˬ lawn chi yawˇ htaꞈ ga piˇ gʼa ve yoˬ.—Chiˇ mvuh ve 94:19.

14. Yawˇbaˆ ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?

14 Ngaˬ hui Yawˇbaˆ ve awˬ lawn htaꞈ dawˇ nyi ve kʼo, awˬ gʼaˇ gʼa leh ngaˬ hui ve dawˇ hkʼaˇ htaꞈ pa gʼa ve yoˬ. Yawˇbaˆ liꞈ Yaˬhoˉvaˬ bvuhꞈ tcuh taˍ ve yoˬ. Awˬ lawn kʼo, “ngaˬ hui htaꞈ maˍ laˇ tuˬ ve awˬ pon bvuhꞈ taˍ ve yoˬ. Hkʼe te leh, ngaˬ hui yeunˇ hkanˍ leh Liꞈ hpu awˬ hkʼaw lo dawˇ sha ve htaꞈ gʼa ve pa taw, dawˇ law tuˬ cawˬ ve yoˬ.” (Roˉmaꞈ 15:4) Ngaˬ hui a shu yawˇ ve awˬ lawn htaꞈ tiˉ dawˇ nyi ve kʼo, Yaˬhoˉvaˬ uˉ peunˍ ve hpawˇ chehˇ ve ngaˬ hui leunˇ kʼai la ve yoˬ. Yawˇbaˆ ve liꞈ maˍ laˇ taˍ ve ngaˬ hui chi hkʼe maˇ te cawˇ. Yawˇbaˆ hkʼa shuˍ ngaˬ hui Yaˬhoˉvaˬ hpawˇ chehˇ gaˇ ve kʼo, haˍ jaˇ ve awˬ ceuˬ cawˬ ve htawˇ, ka tiꞈ gʼa yeˬ ve yoˬ.

15. Ngaˬ hui maˇ daꞈ ve awˬ lawn cawˬ htaˇ, ka tiꞈ yeˬ ve chi ngaˬ hui htaꞈ hkʼaˬ hkʼe ga laˇ ve le?

15 Yawˇbaˆ ve awˬ lawn ngaˬ hui htaꞈ awˬ gʼaˇ peꞈ laˇ ve yoˬ. Ngaˬ hui beˬ ve lawˇ ve gʼa hpuˇ htaˇ, Yaˬhoˉvaˬ ngaˬ hui htaꞈ beuꞈ ve oˇ hkʼe kʼoˆ gaˇ ve maˇ heˆ. Ngaˬ hui maˇ daꞈ ve awˬ lawn cawˬ htaˇ, Yaˬhoˉvaˬ uˉ peunˍ ve hpawˇ chehˇ gaˇ ve tehꞈ ngaˬ hui hpeuꞈ maw piˇ gʼa ve yoˬ. (Tawˇ naˉ ve 27:11) Ngaˬ hui yeunˇ hkanˍ leh ka tiꞈ yeˬ ve kʼo, Yaˬhoˉvaˬ ha lehˬ leh awˬ gʼuˇ suhˍ hpawˇ ngaˬ hui ve dawˇ law kuiˬ hkʼa tawˍ lehˆ gʼa mawˬ ve yoˬ. (Roˉmaꞈ 5:3-5 gʼaw ve.) Yawˇbaˆ ve awˬ lawn ngaˬ hui htaꞈ maˍ laˇ ve, Gʼuiˬ sha lehˬ “haꞈ leh ha kʼaˉ puiˉ” ve yoˬ. (Yaˍkoˆ 5:11) Yaˬhoˉvaˬ uˉ peunˍ ve hpawˇ ngaˬ hui chehˇ ve kʼo, yawˇ ngaˬ hui htaꞈ laꞈ shawnˍ peꞈ laˇ tuˬ yoˬ. Ngaˬ hui “ha lehˬ ha kʼa ve awˬ hkʼaw lo nyi ma yeˬ leh yeunˇ hkanˍ puiˉ tuˬ” awˬ lawn chi ngaˬ hui htaꞈ ga laˇ ve yoˬ.—Kawˇlawˇsehˇ 1:11.

Hkʼaˬ htaˆ kaꞈ dawˇ tcuhˉ taˍ ve

16. Yaˬhoˉvaˬ uˉ peunˍ ve hpawˇ chehˇ ve a yeˇ uiˍ jaˇ ve tehꞈ, aˬ htoꞈ ma te a shu yawˇ awˬ to htaꞈ shaˍ tiꞈ gʼa piˇ cawˇ ve le?

16 Ngaˬ hui a shaꞈ teꞈ kuiˬ hkʼaw maˇ daꞈ ve awˬ lawn cawˬ htaˇ, Yaˬhoˉvaˬ uˉ peunˍ ve hpawˇ chehˇ ve dawˇ nyi ve sha ve maˇ heˆ. Ngaˬ hui maˇ daꞈ ve awˬ lawn htaꞈ tiˉ dawˇ nyi chehˇ ve kʼo, awˬ lawn chi hiˉ˗ehˍ ve kaꞈ nyi˗a kʼo uiˍ ve htaꞈ shuˍ ve yoˬ. Yaˬhoˉvaˬ uˉ peunˍ ve hpawˇ chehˇ ve a yeˇ uiˍ jaˇ leh haˍ ve awˬ lawn hkʼaˬ ma gʼa hpuˇ ve htawˇ maˇ kʼoˆ ngaˬ hui gʼa yeunˇ hkanˍ ve tehꞈ hkʼaˬ htaˆ kaꞈ a shu yawˇ awˬ to htaꞈ shaˍ tiꞈ gʼa piˇ ve yoˬ.

17. A yeˇ uiˍ ve htaꞈ dawˇ tcuhˉ taˍ tuˬ, Yaˬhoˉvaˬ ve kanˉ te ve ngaˬ hui htaꞈ hkʼaˬ hkʼe ga laˇ ve le?

17 A yeˇ uiˍ ve htaꞈ tawnˇ gʼa tuˬ, ngaˬ hui Yaˬhoˉvaˬ ve kanˉ hkʼaˬ htaˆ kaꞈ te tcuhˉ taˍ cawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ Laꞈneh meh ve, uˉ nawꞈ nehˆ hkʼaw ve awˬ suhˍ caˆ tcuhˆ˗e ve yoˬ. Yawˇ hkʼaˬ htaˆ kaꞈ cheꞈ naˬ leh mvuhˇ haˉ kaꞈ caˇ ve yoˬ. Yawˇ naˆ tsuhˇ yehˬ lo chehˇ htaˇ, oˇ kaˬ lo naˬ ve chaw, kanˉ te ve chaw, leh oˇ kaˬ laˬ ve chaw htaꞈ hto maˍ piˇ ve yoˬ. Teˇ pawˆ htaˇ yawˇ naˆ tsuhˇ yehˬ lo 2 shinˉ hpaˆ gʼa chehˇ leh hto toˇ ve awˬ yanˇ 80 naˍ liˍ gʼa ve yoˬ. Yawˇ gʼa suh˗e tuˬ yawˇ shiˍ ve htawˇ, a yeˇ uiˍ ve awˬ lawn htaꞈ yawˇ maˇ leunˇ jaw. Yaˬhoˉvaˬ uˉ peunˍ ve hpawˇ yawˇ leuˆ yuˬ ve pa taw, yawˇ nyi ma hkʼaw ha lehˬ dawˇ sha jaˇ ve yoˬ.

18. Cehˉneˬfeuˬ ve awˬ lawn ngaˬ hui htaꞈ aˬ htoꞈ ma maˍ laˇ ve le?

18 Ngaˬ hui teˇ nyi le le a shaꞈ teꞈ kuiˬ hkʼaw awˬ lawn gʼa hpuˇ htaˇ, Yaˬhoˉvaˬ uˉ peunˍ ve hpawˇ chehˇ ve ngaˬ hui kaꞈ leuˆ yuˬ gʼa ve yoˬ. Awˬ viˉ awˬ nyi yaˇ miˇ teˇ gʼaˇ Cehˉneˬfeuˬ meh ve, yawˇ ve aˉ hkʼaw lo kʼoꞈ˗e tuˬ, caꞈ poˬ ciˇ kuiˬ lo 3 nyi gʼa law ve yoˬ. Caꞈ poˬ laiˉ kaˇ maˇ tawˆ˗e tcuh ve pa taw, yawˇ heuˬ jaˇ leh chehˇ bawˬ ve yoˬ. Yaꞈ hkʼaˇ, yawˇ awˬ gʼaˇ maˇ nuˇ. Caꞈ poˬ ciˇ kuiˬ lo law chehˇ ve chaw htaꞈ daꞈ ve awˬ lawn sha tanˇ hto piˇ tuˬ, yawˇ Yaˬhoˉvaˬ ga laˇ tuˬ lawˬ ve yoˬ. Yawˇ laiˉ gʼaˇ htaꞈ yaw daꞈ leh liꞈ kʼoˆ piˇ ve yoˬ. Yawˇ kʼoˆ ve, “ngaˬ dawˇ ve ngaˬ awˬ lawn cawˬ ve htawˇ, Yaˬhoˉvaˬ ngaˬ htaꞈ awˬ bon naꞈ laˇ ve yoˬ. Yawˇ ve awˬ meh htaꞈ yawˆ yan tuˬ, yawˇ ngaˬ htaꞈ awˬ gʼaˇ peꞈ laˇ ve yoˬ.”

19. Awˬ tehˬ ve htaꞈ oˉ kʼoˍ pui ve chaw hui aˬ htoꞈ ma ve awˬ lawn htaꞈ na gʼa ve le?

19 Yaˬhoˉvaˬ uˉ peunˍ ve hpawˇ chehˇ ve a yeˇ uiˍ jaˇ ve tehꞈ, Yaˬhoˉvaˬ ve chaw ceh tiˉ hkʼa dehꞈ na gʼa ve yoˬ. Awˬ lawn chi htaꞈ na gʼa ve chaw teˇ hpaˍ, awˬ tehˬ ve htaꞈ oˉ kʼoˍ pui chehˇ ve chaw hui yoˬ. Ngaˬ hui teˇ gʼaˇ le le Yaˬhoˉvaˬ uˉ peunˍ ve hpawˇ chehˇ ve hkʼaˬ htaˆ kaꞈ gʼa leuˆ yuˬ ve yoˬ.

20. Yaˬhoˉvaˬ uˉ peunˍ ve hpawˇ ngaˬ hui chehˇ ve kʼo, yawˇ hkʼaˬ hkʼe dawˇ tuˬ le?

20 Yaˬhoˉvaˬ uˉ peunˍ ve hpawˇ chehˇ tuˬ, ngaˬ hui ka tiꞈ yeˬ leh yeunˇ hkanˍ ve kʼo, Yaˬhoˉvaˬ mawˬ leh awˬ hpfuhˇ hkʼaˆ jaˇ ve tehꞈ shawˍ ve yoˬ. (Chiˇ mvuh ve 18:25) Aˬ htoꞈ ma te ngaˬ hui Yaˬhoˉvaˬ uˉ peunˍ ve hpawˇ chehˇ cawˇ leh hkʼaˬ hkʼe te gʼaˇ hteꞈ kʼawꞈ te gʼa tuˬ le? Gʼuˇ suhˍ teˇ lawn ngaˬ hui gʼa henˇ tuˬ yoˬ.

Kʼawꞈ kʼoˆ maˍ taˍ ve awˬ lawn

  • Yaˬhoˉvaˬ uˉ peunˍ ve hpawˇ chehˇ ve: Yaˬhoˉvaˬ Gʼuiˬ sha lehˬ mvuhˇ naw ma miˬ naˆ ma hkʼa peu˗eˬ awˬ hkʼoˆ kanˇ paˆ uiˍ jaˇ ve yoˬ. Chi kʼoˆ gaˇ ve lehˬ teˇ ceuˬ le le htaꞈ awˬ liˇ teh piˇ leh uˉ peunˍ tuˬ a hkaw˗anˬ yawˇ cawˬ ve yoˬ. Saˍtanˍ heˍ leh kʼoˆ ve, Yaˬhoˉvaˬ maˇ daꞈ ve uˉ peunˍ shehˍ hpaˇ hpehꞈ leh uˉ peunˍ tuˬ a hkaw˗anˬ maˇ cawˬ. Maˇ maw maw Yaˬhoˉvaˬ uˉ peunˍ tuˬ ve a hkaw˗anˬ cawˬ ve tehꞈ teˇ gʼaˇ le le shiˍ tuˬ yoˬ. Oˇ ve teˇ yanˇ, a shaꞈ gʼa teꞈ chehˇ sheˍ ve teˇ gʼaˇ le le Yaˬhoˉvaˬ uˉ peunˍ shehˍ hpaˇ hpehꞈ ve tehꞈ haꞈ yuˬ tuˬ yoˬ.

    Laˇhuˍ ve liꞈ k’oˆ (1987-2025)
    Tawˆ˗e ve
    Loꞈ˗e ve
    • Laˇhuˍ hkawˇ
    • Feu piˇ ve
    • Pa gʼa ve awˬ ceuˬ
    • Copyright © 2025 Watch Tower Bible and Tract Society of Pennsylvania
    • Caˉ daꞈ ve awˬ lawn
    • Awˬ liˇ tawˇ hkawˇ htaꞈ caˉ daꞈ ve
    • K'awꞈ gu teh ve
    • JW.ORG
    • Loꞈ˗e ve
    Feu piˇ ve