Haꞈ pehnˇ ve Te hkʼaˇ dawˇ hkʼaˇ awˬ hpfuhˇ hkʼaˆ jaˇ ve

Te hkʼaˇ dawˇ hkʼaˇ daꞈ kehˬ ve awˬ ha hpu geh laˬ ve 9 ceuˬ Yaˬhoˉvaˬ tcuh yaˇ Pawˇluꞈ htaꞈ dawˇ pawnˍ piˇ leh bvuhꞈ tcuh taˍ ve yoˬ. (Gaˍlaˍtiˆ 5:22, 23) Kʼawˇ ceuˬ chi lehˬ “awˬ ha hpu ve awˬ shiˍ nawꞈ la ve teˇ hpaˍ” yoˬ.a (Awˬ maiˉ htaꞈ nyi sheˍ.) “Awˬ ha hpu ve awˬ shiˍ” gʼa veuꞈ deh ve yoˬ. (Kawˇlawˇsehˇ 3:10) Suhˆ cehˬ iˉ kaˆ pfuhˍ piˇ htaˇ awˬ shiˍ nawꞈ la ve hkʼa shuˍ, a shaꞈ teꞈ kuiˬ hkʼaw daꞈ kehˬ ve awˬ ha hpu gʼa htaˇ, teˇ hkʼaˇ dawˇ hkʼaˇ daꞈ la ve yoˬ.—Chiˇ mvuh ve 1:1-3.

Te hkʼaˇ dawˇ hkʼaˇ awˉ lawˉ teˇ maˬ Pawˇluꞈ kʼoˆ taˍ ve haꞈ pehnˇ ve yoˬ. Chi awˬ hpfuhˇ hkʼaˬ hkʼe taw hkʼaˆ ve le? Pawˇluꞈ kʼoˆ ve haꞈ pehnˇ ve maˇ cawˬ kʼo, “ngaˬ teꞈ chiˉ awˬ bon maˇ cawˬ.” (1 Kawˇrenˍhtuˆ 13:2) Yaꞈ hkʼaˇ, haꞈ pehnˇ ve chi aˬ htoꞈ ma le? Ngaˬ hui hkʼaˬ hkʼe te uiˍ la mvuh la leh teˇ nyi le le yuˬ yehˇ gʼa tuˬ le?

Haꞈ pehnˇ ve lehˬ aˬ htoꞈ ma le?

Haꞈ pehnˇ ve lehˬ aˬ htoꞈ ma le, kʼoˆ maˍ laˇ haˍ jaˇ ve yoˬ. Yaꞈ hkʼaˇ, haꞈ pehnˇ ve chaw hkʼaˬ hkʼe dawˇ ve, te ve Liꞈ hpu hkʼaw kʼoˆ maˍ laˇ taˍ ve yoˬ. Yawˇ hui “dawˇ zuhˬ gaˇ zuhˬ leh ha kʼaˉ puiˉ” leh, “hteˇ ve cawˇ ve awˬ hkʼaw lo ha lehˬ puiˉ ve yoˬ.” Chi hkʼe ve chaw lehˬ “hkʼa peu˗eˬ htaꞈ yonˍ puiˉ ve, hkʼa peu˗eˬ htaꞈ dawˇ law puiˉ ve leh, hkʼa peu˗eˬ htaꞈ yeunˇ hkanˍ puiˉ ve yoˬ.” Yawˇ hui shu htaꞈ dawˇ nyi piˇ puiˉ jaˇ leh yonˍ gʼa ve awˬ chawˇ hpehꞈ ve yoˬ. Yaꞈ hkʼaˇ, chaw teˇ gʼaˇ haꞈ pehnˇ ve maˇ cawˬ ve kʼo, shu htaꞈ hkawehˉ ve, uiˍ muiˬ caˆ muiˬ ve, te hkʼaˇ maˇ daꞈ ve, a shu yawˇ awˬ pon tiˉ dawˇ nyi ve, venˇ baˆ maˇ pehˇ piˇ puiˉ ve yoˬ. Ngaˬ hui chi hkʼe maˇ hpehꞈ gaˇ. Ngaˬ hui shu htaꞈ awˬ tehˬ haꞈ gaˇ ve, “maˇ shawˍ maˇ caˆ maˇ te puiˉ” ve yoˬ.—1 Kawˇrenˍhtuˆ 13:4-8.

Yaˬhoˉvaˬ leh Yeˍsuˆ haꞈ pehnˇ ve biˇ jaˇ ve henˇ yuˬ tuˬ hpehꞈ ve

“Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇhanˬ 4:8) Yawˇ te ve teˇ ceuˬ le le htaꞈ hpeuꞈ maw laˇ ve yoˬ. Yawˇ ngaˬ hui htaꞈ haꞈ jaˇ ve teˇ ceuˬ lehˬ Yeˍsuˆ miˬ guiˬ hkʼoˆ lo peu laˇ leh ngaˬ hui awˬ pon gʼa tuꞈ gʼa hkanˍ leh suh˗e tcuh laˇ ve yoˬ. Tcuh yaˇ Yoˇhanˬ kʼoˆ ve, “Gʼuiˬ sha ngaˬ hui htaꞈ haꞈ ve lehˬ, yawˇ ngaˬ hui htaꞈ chi hkʼe hpeuꞈ maˍ laˇ ve yoˬ. Yaˇ hpu htaꞈ pa taw ngaˬ hui co ha gʼa teꞈ tuˬ, Gʼuiˬ sha lehˬ yawˇ ve Yaˇ hpu tiˍ htaꞈ miˬ guiˬ hkʼoˆ lo peu laˇ ve yoˬ. Haꞈ pehnˇ ve teˇ ceuˬ lehˬ chi hkʼe yoˬ. Ngaˬ hui Gʼuiˬ sha htaꞈ haꞈ ve tehꞈ kʼoˆ gaˇ ve maˇ heˆ. Yaˇ hkʼaˇ, yawˇ ngaˬ hui htaꞈ haꞈ leh, ngaˬ hui ve venˇ baˆ htaꞈ hpehˇ hkʼa laˇ tuˬ awˬ pon yawˇ ve Yaˇ hpu peu laˇ ve htaꞈ kʼoˆ ve yoˬ.” (1 Yoˇhanˬ 4:9, 10) Gʼuiˬ sha ngaˬ hui htaꞈ haꞈ ve pa taw, venˇ baˆ hpehˇ laˇ ve htaꞈ gʼa leh dawˇ law kuiˬ leh co co taiˍ taiˍ ve a shaꞈ gʼa ve yoˬ.

Yeˍsuˆ chaw yaˇ htaꞈ haꞈ ve pa taw, Gʼuiˬ sha ve a loˍ te tuˬ yawˇ ve a shaꞈ tanˇ laˇ ve yoˬ. Tcuh yaˇ Pawˇluꞈ kʼoˆ ve, “oˇ hkʼe te tuˬ Gʼuiˬ sha ve a loˍ cawˇ ve htaꞈ pa taw, Yeˍsuˆ Hkriꞈ yawˇ ve awˬ to teˇ pawˆ ceh tiˉ tanˇ piˇ ve awˬ hkʼaw lo ngaˬ hui daꞈ la kehˬ la peuˬ.” (Heˍbrehˇ 10:9, 10) Chaw yaˇ teˇ gʼaˇ kaꞈ chi hkʼe te maˇ gʼa. Yeˍsuˆ kʼoˆ ve, “a shu yawˇ ve awˬ chawˇ awˬ pon a shu yawˇ ve a shaꞈ tanˇ piˇ ve haꞈ pehnˇ ve teˇ ceuˬ aꞈ kehˉ uiˍ ve haꞈ pehnˇ ve teˇ ceuˬ kaꞈ maˇ cawˬ.” (Yoˇhanˬ 15:13) Maˇ biˇ ve chaw lehˬ, Yaˬhoˉvaˬ leh Yeˍsuˆ htaꞈ henˇ yuˬ gʼa˗aw laˇ? Te gʼa ve yoˬ! Hkʼaˬ hkʼe te tuˬ ngaˬ hui teˇ geh dawˇ nyi shaˍ.

“Haꞈ pehnˇ ve awˬ hkʼaˇ suh kʼai˗o”

Pawˇluꞈ ngaˬ hui htaꞈ awˬ gʼaˇ piˇ laˇ leh kʼoˆ ve, “Gʼuiˬ sha haꞈ ve awˬ yaˇ awˬ duˬ hpehꞈ ve hkʼe, yawˇ te ve hkʼa shuˍ shuˍ te˗o. Hkriꞈ nawˬ hui htaꞈ haꞈ ve hkʼe, haꞈ pehnˇ ve awˬ hkʼaˇ suh kʼai˗o. Yawˇ nawˬ hui htaꞈ haꞈ ve pa taw . . . yawˇ ve awˬ to Gʼuiˬ sha htaꞈ chiˇ aꞈ piˇ ve yoˬ.” (Eˇfeˇsuꞈ 5:1, 2) “Haꞈ pehnˇ ve awˬ hkʼaˇ suh kʼai˗o.” Chi kʼoˆ gaˇ ve lehˬ, ngaˬ hui shu htaꞈ hkʼaˬ htaˆ kaꞈ gʼa haꞈ ve yoˬ. Shu htaꞈ haꞈ ve ceh kʼoˆ ve maˇ lawꞈ, ngaˬ hui gʼa te ve yoˬ. Yoˇhanˬ bvuhꞈ taˍ ve, “haꞈ ve yaˇ teˇ hpaˍ˗oˬ, mawꞈ kʼaw ceh haꞈ ve teˇ ceuˬ taˇ te. Yaꞈ hkʼaˇ, kanˉ te ve leh hteˇ ve cawˇ ve awˬ hkʼaw lo haꞈ˗oꞈ.” (1 Yoˇhanˬ 3:18) Tawˇ pa haˉ te kʼo, ngaˬ hui Yaˬhoˉvaˬ leh awˬ chawˇ awˬ paˆ htaꞈ haꞈ ve pa taw, “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” ngaˬ hui hto toˇ ve yoˬ. (Maꞈhtehˍ 24:14; Luˉkaꞈ 10:27) Ngaˬ hui “haꞈ pehnˇ ve awˬ hkʼaˇ suh kʼai” ve kʼo, ngaˬ hui yeunˇ hkanˍ ve, nyi ma daꞈ ve, venˇ baˆ hpehˇ piˇ puiˉ ve yoˬ. “Gʼuiˬ sha nawˬ hui ve venˇ baˆ htaꞈ hpehˇ hkʼa peuˬ ve hkʼe, nawˬ hui htawˇ venˇ baˆ hpehˇ daꞈ˗oꞈ.” Chi ngaˬ hui gʼaꞈ te cawˇ ve yoˬ.—Kawˇlawˇsehˇ 3:13.

Ngaˬ hui shu htaꞈ beˆ maˍ piˇ ve htawˇ, yawˇ htaꞈ maˇ haꞈ ve kʼoˆ gaˇ ve maˇ heˆ. Tawˇ pa haˉ te kʼo, yaˇ hawˬ ve jehˇ tuˬ, yaˇ loˍ ve hkʼe awˬ pa awˬ e te piˇ gʼa ve yoˬ. Yaꞈ hkʼaˇ, awˬ pa awˬ e yaˇ htaꞈ awˬ tehˬ haꞈ ve kʼo, keunˍ lawꞈ cawˇ lawꞈ ve hkʼaw gʼa jawꞈ maˍ piˇ ve yoˬ. Chi hkʼa shuˍ shuˍ, Gʼuiˬ sha lehˬ haꞈ pehnˇ ve teˇ ceuˬ hpehꞈ ve pa taw, “yawˇ haꞈ ve chaw htaꞈ maˍ piˇ” ve yoˬ. (Heˍbrehˇ 12:6) Hkʼe te leh ngaˬ hui shu htaꞈ haꞈ ve kʼo, keunˍ lawꞈ cawˇ lawꞈ ve hkʼaw gʼa beˆ maˍ piˇ ve yoˬ. (Tawˇ naˉ ve 3:11, 12) Yaꞈ hkʼaˇ, ngaˬ hui venˇ baˆ yaˇ hpehꞈ leh teˇ hkui teˇ hkui leunˇ puiˉ ve yoˬ. Chi htaꞈ pa taw, ngaˬ hui teˇ gʼaˇ le le haꞈ pehnˇ ve uiˍ la mvuh la gʼa ve yoˬ. Ngaˬ hui hkʼaˬ hkʼe te gʼa tuˬ le? Awˬ hkʼaˇ 3 hkʼaˇ htaꞈ teˇ geh dawˇ nyi shaˍ.

Ngaˬ hui haꞈ pehnˇ ve hkʼaˬ hkʼe te uiˍ la mvuh la gʼa tuˬ le?

Awˉ lawˉ teˇ hkʼaˇ, haꞈ pehnˇ ve chaw hpehꞈ tuˬ, Gʼuiˬ sha geh daꞈ kehˬ ve awˬ ha hpu gʼa lawˬ ve yoˬ. Yeˍsuˆ kʼoˆ ve, Yaˬhoˉvaˬ lehˬ ‘daꞈ ve kehˬ ve awˬ ha hpu hkʼa lawˬ ve chaw htaꞈ yawˇ piˇ tuˬ yoˬ.’ (Luˉkaꞈ 11:13) Daꞈ kehˬ ve awˬ ha hpu oˇ ve ngaˬ hui lawˬ leh ga laˇ tcuh htaˇ, ngaˬ hui haꞈ pehnˇ ve uiˍ la mvuh la gʼa ve yoˬ. (Gaˍlaˍtiˆ 5:16) Tawˇ pa haˉ te kʼo, nawˬ nyi haꞈ shaˉ paˍ hpehꞈ ve kʼo, haꞈ pehnˇ ve hkʼaw Liꞈ hpu htaꞈ cuˇ leh shu htaꞈ beˆ maˍ piˇ tuˬ, daꞈ kehˬ ve awˬ ha hpu ngaˬ hui htaꞈ ga laˇ tuˬ lawˬ gʼa ve yoˬ. Nawˬ awˬ pa awˬ e hpehꞈ ve kʼo, yaˇ htaꞈ jawꞈ maˍ piˇ htaˇ, beuꞈ ve hkʼaw maˇ te cawˇ, haꞈ pehnˇ ve hkʼaw jawꞈ maˍ piˇ tuˬ, Gʼuiˬ sha ve awˬ ha hpu ngaˬ hui htaꞈ ga laˇ tuˬ lawˬ gʼa ve yoˬ.

Nyiˇ hkʼaˇ teˇ hkʼaˇ, shu Yeˍsuˆ htaꞈ te yaꞈ piˇ ve htawˇ, Yeˍsuˆ yawˇ hui htaꞈ haꞈ pehnˇ ve hkʼaw te piˇ ve htaꞈ hkʼa dehꞈ dawˇ nyi sheˍ. (1 Peˍtruˆ 2:21, 23) Shu nawˬ htaꞈ maˇ daꞈ ve te laˇ ve, maˇ hteˇ maˇ cawˇ ve htaꞈ nawˬ gʼa hpuˇ htaˇ, ‘Yeˍsuˆ chehˇ taˍ ve kʼo, hkʼaˬ hkʼe te ve hehˉ le,’ ngaˬ hui dawˇ nyi cawˇ ve yoˬ. Awˬ viˉ awˬ nyi yaˇ miˇ Leˇ meh ve, yawˇ na hkawˇ chi ve yawˇ awˬ to htaꞈ na nyi htaˇ, awˉ lawˉ dawˇ nyi sheˍ htaˇ˗e te gʼa ve yoˬ. Yawˇ kʼoˆ ve, “teˇ pawˆ htaˇ kanˉ teˇ geh te ve chaw ngaˬ kanˉ te ve maˇ daꞈ ve awˬ nu ve chaw htaꞈ i˗me (e˗mail) bvuhꞈ feu piˇ ve yoˬ. Chi ngaˬ nyi ma naˬ jaˇ tuˬ te laˇ ve yoˬ. Yaꞈ hkʼaˇ, ngaˬ a shu yawˇ awˬ to htaꞈ na nyi ve, ‘Yeˍsuˆ htaꞈ ngaˬ hkʼaˬ hkʼe te henˇ yuˬ gʼa tuˬ le?’ Chi ngaˬ dawˇ nyi htaˇ, maˇ daꞈ ve awˬ lawn oˇ ve maˇ dawˇ nyi˗o tehꞈ dawˇ cheˆ ve yoˬ. Chaw oˇ ve teˇ gʼaˇ maˇ chehˇ sha leh yawˇ dawˇ haˍ dawˇ hkiˉ jaˇ ve tehꞈ, hkʼawꞈ nawˉ htaˇ ngaˬ shiˍ la ve yoˬ. Yawˇ awˬ tehˬ kʼo, oˇ hkʼe maˇ gʼa dawˇ ve yoˬ hehˉ tehꞈ, ngaˬ dawˇ la ve yoˬ. Shu Yeˍsuˆ htaꞈ maˇ daꞈ ve te piˇ htawˇ, yawˇ haꞈ pehnˇ ve te ve htaꞈ dawˇ nyi htaˇ, kanˉ te geh te ve chaw htaꞈ haꞈ pehnˇ ve hkʼaw te piˇ tuˬ, awˬ lawn oˇ ve ngaˬ htaꞈ ga laˇ ve yoˬ.” Ngaˬ hui Yeˍsuˆ htaꞈ henˇ yuˬ htaˇ, shu htaꞈ hkʼaˬ htaˆ kaꞈ haꞈ pehnˇ ve hkʼaw te piˇ gʼa tuˬ yoˬ.

Shehˆ hkʼaˇ teˇ hkʼaˇ, a shu yawˇ awˬ to yuˬ tanˇ ve hkʼaw haꞈ pehnˇ ve ngaˬ hui gʼa te jawˬ ve yoˬ. Yeˍsuˆ awˬ hkʼaˇ suh gʼaꞈ yuˬ ve chaw, chi hkʼa shuˍ gʼa gʼaꞈ te ve yoˬ. (Yoˇhanˬ 13:34, 35) Haꞈ pehnˇ ve chi hkʼe ve Yeˍsuˆ biˇ jaˇ ve henˇ yuˬ tuˬ hpehꞈ ve yoˬ. Yawˇ mvuhˇ naw ma hkʼoˆ tawˆ la leh, ‘yawˇ ve awˬ meꞈ awˬ hponˇ htaꞈ kʼehˆ teh taˉ leh Yawˇ suh htaˇ hkʼa gaˬ na yuˬ ve yoˬ.’ (Hpiˇliˇpiˆ 2:5-8) A shu yawˇ awˬ to yuˬ tanˇ ve, haꞈ pehnˇ ve Yeˍsuˆ cawˬ ve ngaˬ hui henˇ yuˬ htaˇ, ngaˬ hui dawˇ ve nyi ma hkʼaw cawˬ ve, yawˇ htaꞈ shuˍ daꞈ la ve yoˬ. Ngaˬ hui awˬ to aꞈ kehˉ shu htaꞈ awˉ lawˉ dawˇ nyi ve yoˬ.

Haꞈ pehnˇ ve chi awˬ bon hkʼaˬ hkʼe cawˬ ve le?

Ngaˬ hui haꞈ pehnˇ ve te htaˇ, awˬ bon laiˉ ceuˬ cawˬ ve yoˬ. Nyiˇ lawn teˇ lawn htaꞈ dawˇ nyi sheˍ.

• Miˬ guiˬ hkʼa peu˗eˬ hkʼoˆ awˬ viˉ awˬ nyi awˬ moˍ: Ngaˬ hui teˇ gʼaˇ leh teˇ gʼaˇ haꞈ daꞈ ve pa taw, Hkriꞈ yaˇ awˬ moˍ awˬ viˉ awˬ nyi geh ngaˬ hui ca guiˇ˗e htaˇ, hkʼa dehꞈ haꞈ yuˬ laˇ ve htaꞈ yonˍ gʼa ve yoˬ. “Miˬ guiˬ hkʼoˆ chehˇ ve nawˬ hui ve awˬ viˉ awˬ nyi teˇ hpaˍ” nawˬ htaꞈ haꞈ ve shiˍ htaˇ, awˬ bon gʼa jaˇ! (1 Peˍtruˆ 5:9) Haꞈ pehnˇ ve chi, Gʼuiˬ sha ve chaw geh ceh tiˉ cawˬ ve yoˬ.

• Dawˇ sha gawˬ lehˍ ve: Ngaˬ hui “haꞈ pehnˇ ve awˬ hkʼaw lo teˇ gʼaˇ leh teˇ gʼaˇ yeunˇ hkanˍ daꞈ ve” kʼo, ngaˬ hui “nyi ma teˇ shiˍ tiˉ cawˬ hpehꞈ tuˬ” te gʼa ve yoˬ. (Eˇfeˇsuꞈ 4:2, 3) Ngaˬ hui ve hpawnˬ daꞈ kuiˬ hpawnˬ daꞈ lonˉ hkʼaw, dawˇ sha gawˬ lehˍ cawˬ gʼa ve yoˬ. Chi beuꞈ teˇ co˗e, miˬ guiˬ hkʼoˆ gʼaˇ hteꞈ hpaˆ daꞈ chehˇ ve pa taw, dawˇ sha gawˬ lehˍ ve chi hkʼe ve ca haˍ jaˇ. (Chiˇ mvuh ve 119:165; Iˉsaˍyaˆ 54:13) Ngaˬ hui coˇ caˇ leh shu geh dawˇ sha gawˬ lehˍ ve cawˬ htaˇ, chi kʼoˆ gaˇ ve lehˬ ngaˬ hui yawˇ hui htaꞈ haꞈ jaˇ ve yoˬ. Chi mvuhˇ naw ma hkʼoˆ awˬ pa ha lehˬ jaˇ.—Chiˇ mvuh ve 133:1-3; Maꞈhtehˍ 5:9.

“Haꞈ pehnˇ ve lehˬ uiˍ la yeˬ la piˇ puiˉ ve”

Pawˇluꞈ kʼoˆ ve, “haꞈ pehnˇ ve lehˬ uiˍ la yeˬ la piˇ puiˉ ve yoˬ.” (1 Kawˇrenˍhtuˆ 8:1) Chi hkʼaˬ hkʼe kʼoˆ gaˇ ve le? Teˇ hpaˍ hpaˍ kʼoˆ ve, 1 Kawˇrenˍhtuˆ liꞈ kaˇ nanˉ uiˍ 13 chi, “haꞈ pehnˇ ve” kʼa muiˬ hkawˇ hpehꞈ ve tehꞈ kʼoˆ ve yoˬ. Oˇ kaˬ Pawˇluꞈ kʼoˆ maˍ laˇ taˍ ve, haꞈ pehnˇ ve chi shu awˬ to awˬ bon gʼa tuˬ ca ve yoˬ. (1 Kawˇrenˍhtuˆ 10:24; 13:5) Ngaˬ hui haꞈ pehnˇ ve chi cawˬ ve kʼo, shu htaꞈ dawˇ nyi leh yeunˇ hkanˍ ve, ha kʼaˉ puiˉ ve pa taw, yehˬ kʼa hkʼaw haꞈ pehnˇ ve cawˬ leh Hkriꞈ yaˇ awˬ moˍ hkʼaw teˇ moˍ tiˉ hpehꞈ ve yoˬ.—Kawˇlawˇsehˇ 3:14.

Shu htaꞈ haꞈ pehnˇ ve te piˇ ve laiˉ hkʼaˇ cawˬ ve htawˇ, Gʼuiˬ sha geh laˬ ve haꞈ pehnˇ ve awˬ bon cawˬ jaˇ. Aˬ htoꞈ ma pa taw le? Ngaˬ hui yawˇ htaꞈ haꞈ htaˇ, teˇ moˍ tiˉ hpehꞈ gʼa ve pa taw yoˬ! Teˇ mvuhˇ miˬ le le ve chaw, teˇ chaw ceuˬ le le ve chaw, Yaˬhoˉvaˬ htaꞈ oˉ kʼoˍ teˇ geh pui ve yoˬ. (Zeˍhpaˍniˆ 3:9) Gʼuiˬ sha ve awˬ ha hpu ve awˬ shiˍ hkʼaw teˇ hpawˇ ve ngaˬ hui coˇ caˇ leh teˇ nyi le le te sheˍ.