Ilembile Marku

10 Angakhumile weo, atoodhowa madile a Yudeya khombela n’nango la Yordani. Weo thitho mwinji waatu watoogumanyeya wa liye. Mwailemeeloyee, Yesu atooroma thitho afunji-a. 2 Moi e-no Afarisi tatoodha wa liye naifunelo yofuna m’mwesedha. Aliwa tatoom’fuka akala vyali vyorumeli-iwa ira lombwana a-iye i-yanee. 3 Liye atoafuka ira: “N’nga Mose auwandenleni n’ni?” 4 Aliwa taongile ira: “Mose aongile ira lombwana alembenga karta lomwadhani-a banja nom’i-ya i-yanuo.” 5 Mbwenye Yesu atoawandela ira: “Namwasa othakala wa miriminyu liye atoulembelani lamulo leli. 6 Mbwenye romela vapanduchiwile ilambo yavathi, ‘Nlungu aapanduchile lombwana na i-yana. 7 Vamwasa wen’na, lombwana unodha i-ya babee na m’mee, 8 thitho ambilao anodha kala manungo mambo-i,’ moi katinokalave atu ambili, mbwenye manungo mambo-i. 9 Ee-no yongo imangile Nlungu vambo-i, mutu kaithathule.” 10 Yesu angavolowile okoka m’mba, anamafunjedhee tatooroma m’fuka vya mwasa wen’na. 11 Liye atoawandela ira: “Mutu uliwethene u-iidhe i-yanee nothela mwinango utoira unyambi thitho utom’dawela i-yanuo. 12 Thitho akala i-yana uto-iya man’ne notheliwa na lombwana mwinango, utoira unyambi.”

13 Moi e-no atu tatooroma m’dhelana a-ima ang’ono ira aasameli-e mandha, mbwenye anamafunjedhao tatoakhondi-a. 14 Yesu angaoni vyevi atoothakaleliwa thitho atoawandela ira: “Kaa-iyeni a-imao tadhe wa miyo, kamwaakhondi-e. Namwasa oi Umwene wa Nlungu ngwaatu ninga enala. 15 Mwaimbairimbari ndinouwandelani ira, mutu uliwethene o-owachela Umwene wa Nlungu ninga mwana, kanodha volowa mu Umwenuo.” 16 Moi ee-no atootukula a-imao noa-ela mandhanimwee thitho atoo-ela mandhee vaaliwa noroma araeli-a.

17 Vahora yakhuma liye weo, lombwana mwinango atoom’tamangela nokokora vasogolovee. Adhamale atoom’fuka ira: “Namafunji-a Wapama, n’nga ndiiren’ni ira ndidhakaena ingumi yo-omala?” 18 Yesu atoom’mwakhula ira: “Mwasiwa ngwan’ni unondiromola ira wapama? Kavali wapama, mbwenye Nlungu baa-i. 19 We unoidhiwa malamulo oi: ‘Kamuphe mutu, kamuire unyambi, kamube, kamuvelele umboni onama, kamubele mutu mwainyengo thitho loi mulemezenga babinyu na m’minyu.’” 20 Mutuo atoom’mwakhula ira: “Namafunji-a, vyothene vyevi ndikanle ndivi-arelanga romela ndingali mwana.” 21 Yesu atoom’mwing’ana thitho atoom’dhiveliwana. Moi e-no atoom’mwandela ira, “Yongo imbo-i inosoweyave mwa we: Udhowe umaguli-e vyongo vinawe thitho kobiridhee uva-e alimbo sauwa. Waira e-no unodha kaana fuma dhulu, wamala udhe udhakale nama-arelanga.” 22 Mbwenye liye angavwide madhu enao, atoosukwala thitho atookhumavo angali watangaranga namwasa oi atookaana vyongo vinjinji.

23 Yesu angaing’an’ne wu na wu, atoawandela anamafunjedheao ira: “Vinodha kala vyorucha maningi ira atu ofuma tadhavolowe mu Umwene wa Nlungu!” 24 Mbwenye anamafunjedheao tatoodabwa na madhu enala. Moi e-no Yesu atoawandela ira: “A-imanyo, volowa mu Umwene wa Nlungu korucha maningi! 25 Pyo-orucha ira ngamila ivolowe valibengani la singano i-yani-ana ira mutu ofuma avolowe mu Umwene wa Nlungu.” 26 Aliwa tatoodabwa maningi thitho tatoom’fuka* ira: “N’nga mbaani unofuna vulumuwa?” 27 Yesu atoaing’anechecha noawandela ira: “Waatu vyongo vyevi pyo-oodeya, mbwenye kavili e-no wa Nlungu, namwasa oi vyongo vyothene pyoodeya wa Nlungu.” 28 Pedru atooroma m’mwandela ira: “Kaing’anani! I-yo nito-iya vyongo vyothene nou-arelani.” 29 Yesu atoonga ira: “Mwaimbarimbari ndinouwandelani ira, kavali u-iidhe nyumba, abalee, arongolee, m’mee, babee, a-ima venango minda namwasa wa miyo thitho namwasa wa milanyu yapama, 30 oi va-eni kanofwanya vyongo vyoinjiva weli-edha fendo 100 hora* ino. Liye unodha fwanya nyumba, abalee, arongolee, m’mee, a-ima na minda, thitho a-ra-ariwa, mbwenye hora inodhiyo, unodha kaana ingumi yo-omala. 31 Mbwenye anjinji tali oroma tanodha kala omari-a, thitho omari-a tanodha kala oroma.”

32 Moi e-no tatoodhowanave ulendwiwa odhowa wu Yerusalemu thitho Yesu ali vasogoloviwa. Anamafunjedhao tatoodabwa maningi thitho atu tam’arelao tatooroma ova. Liye atoatukulela okoka vakhundu anamafunjedhee 12 ale noroma awandela vyongo vyevyo vya-adhi vang’ono ira vim’mwireele: 33 “Va-eni ninodhowa wu Yerusalemu thitho Mwana mutu unamaveleliwe mandhani mwa andimuwa a sembe na alembi. Aliwa tanamam’tonge ira aphiwe thitho tanamam’velele waatu amaziza enango. 34 Aliwa tanamam’mwirele vyongo vyaiburutu, m’thurela mare, m’kwapula nom’pha, mbwenye vadhavira malambo mararu, unodha venyathi.”

35 Moi e-no Yakobo na Juwau a-ima a Zebedeyo, tatoodhowa wa Yesu nom’mwandela ira: “Namafunji-a, ninofuna ira muniirele yongo iliyothene inofuna i-yo uvephani.” 36 Liye atoafuka ira: “N’nga munofuna ndiuirelenin’ni?” 37 Aliwa tatoom’mwakhula ira: “Munirumeli-e ira m’mbo-i wa i-yo adhakale wu dhandha linyu la ono odyana thitho mwinango adhakale wu dhandha linyu la ono wazwele mu titimi-o linyu.” 38 Mbwenye Yesu atoawandela ira: “Nyo kamunoidhiwa vyongo vinovepha nyo. N’nga nyo munooda umwa vyongo vinomwa miyo? Venango badiziwa ubatizo unobadiziwa miyo?” 39 Aliwa tatoom’mwakhula ira: “Ee ninooda.” Adhaire e-no Yesu atoawandela ira: “Vyongo vinomwa miyo munodha vimwa thitho munodha badiziwa ubadizo unobadiziwana miyo. 40 Mbwenye miyo kandili ofwanelela sakula atu anofuna dhakala wu dhandhalanga lodyana venango la zwele. Babanga unodha velela ngari yeniyo waatu aasakunle liye.”

41 Anamafunjedha enango 10 ale tangavwide vyevi, tatoothakaleliwa maningi namwasa wa vyairile Yakobo na Juwau. 42 Mbwenye Yesu atoaitana noawandela ira: “Nyo munoidhiwa ira anamatonga a ilambo anotonga atu ninga munofunela aliwa. Thitho andimuwa andimuwiwa ano-indi-edha basa kopolo dhiwa, vonyingalela atu. 43 Vyevi kavinofwanela kala e-no vari vinyu. Mbwenye mutu uliwethene unofuna kala ndimuwa vari vinyu, unofwanela kala rumiwinyu, 44 thitho mutu unofuna ira akale oroma vari vinyu, unofwanela kala dhaari wa othene. 45 Namwasa oi masiki Mwana mutu kaadhele dhalabeliwa mbwenye dhalaba novelela ingumiyee ninga khuto* ira aombole atu anjinji.”

46 Moi e-no tatoofiya wu Yeriko. Mbwenye Yesu vambo-i na anamafunjedhee thitho mwinji nlukhulu waatu vyakhuma aliwa mu Yeriko, Batimeyo (mwana Timeyo) ovephavepha oi ali o-oona, atookaathi vathi khundu mwandhila. 47 Angavwide ira Yesu wau Nazareti unaavira, Batimeyo atooroma khuwa ira: “Yesu, Mwana Davide, ndivweleni tangaranga!” 48 Adhaire e-no atu anjini tatooroma m’khondi-a nom’mwandela ira amiyale. Mbwenye taira e-no, pyasimbwa liye khuwa maningi ira: “Mwana Davide, ndivweleni tangaranga!” 49 E-no Yesu atooimela noonga ira: “M’mwandeleni adhe uno.” Aliwa tatoom’mwitana mutu o-oonuo nom’mwandela ira: “Ulimbe rima! Venyathi; unaauitana.” 50 Ee-no liye atootatila nguwee yaundhe thitho atooimela mombaranya nodhowa wali Yesu. 51 Ee-no Yesu atoom’fuka ira: “Unofuna ira ndiuirelen’ni?” Mutu o-oonuo atoom’mwakhula ira: “Rab·bo’ni,* ndikami-eni ira ndirome ona.” 52 Yesu atoom’mwandela ira: “Dhowa. Iroromelwaa itouili-a.” Hora yeniyene mutuo atooroma ona, thitho atooroma m’arela Yesu ndhila.