Vinofuna kami-a a-iyana anooni-iwa nyarwa

Va saiti ya jw.org vatokala mwasa wa muru oi “Kuteteza Akazi Zimene Baibulo limanena.” Khomoni wa mwasula vatokala link yoi munooda baxari va PDF ya mwasula. Nyo munooda iprimiri thitho ivinda ira ikale tratado ya mathakuru manai. Rongola mwinango wau Estados Unidos dhinalee Stacy aongile ira: “Miyo ndatooiprimiri mapapeli mangaasi amwasula. Ndidhamale, miyo na rongola mwinango natootukula mapapeli nodhowa maagawela va nyumba inango yoi mwali a-iyana tatamoni mwi-u.”

Namalaba mwinango wa-iyana atoofuka rongoluo akala vinoodeya ira am’iyedhele mapapeli enango ira aagawele atu enango takala vanyumbanivo. Vyo-arelavovyee mafolheto okwaranya 40, vambo-i na makartau 30 ovolowana va jw.org atoogaweliwa. Dambo n’nango, namaing’anela vanyumbanivo atoovepha ira a-iyanao taoni-iwe mwemo funjedha Bibilya munoireela aliwa.

Stacy vambo-i naarongola enango ambili tatookaana vyo-arelavo vyapama va nyumba inango. Weo, aliwa tatoo-iya mafolheto 5 thitho atu tatowavepha ira tamatukule mafolheto enango. M’mbo-i wa anamalaba aongile ira: “Mafolhetoala anokami-a a-iyana vano. Ndi vyevyo vyafuna aliwa.” Vaulendo unango, a-iyana anjinji avanyumbanivo tatoogumaneya ira taone mwemo funjedha Bibilya munoireela aliwa thitho ambili mwaaliwa tatoonga ira anodhiveliwa dhafwanyeya vamigumano ya pingo va Nyumba ya Uwemene va sumana yo-arela.

Stacy aongile ira: “Pyodabwi-a ona mwemo mwasangalalele atu valeri aliwa milanyu yapamila. Yamala iprimiriwa thitho vindiwa, folhetwila inova-a ifunelo maningi thitho ndi ndhila yapama yolaleelana milanyu yapama wa mwinji waa-iyana ninga wen’na. Vyali vyolimbi-a maningi ona mwemo atu mwawachenle aliwa milanyu yapama. Ninodedi-edhela ona moda Yohova munofunela liye raeli-a dhilimbi-edha wi-u ira nidhowenave kami-a a-iyana na milanyu yapama.”