Nitokaana Ngari Yolobela Wa Nlungu

1, 2. (a) Mwasiwa ngwan’ni ninofwanela onanga lobelo kala yotuva yapereso yavadhulu? (b) N’nga mwasiwa ngwan’ni ninofwanela idhiwa vinoonga Bibilya vamwasa wa lobelo?

YOHOVA Utopanducha ilambo yavathi na vyothene vili mwemo. Nadhi nifwanafwani-e na ilambwila i-yo nili oyeva. Thitho Yohova aing’ana vailambo yavathila, unoona mitundu yothene yavathi ninga toto lama-inje. (Salimo 115:15; Esaya 40:15) Angalive ira i-yo atu nili oyeva vinjinji navilingani-a na vyongo vyopanduchiwa vailambo yavathila, lemba la Salimo 145:18, 19 linoonga ira: “Yohova uli vakwikwi naatu othene anammwitana. Liye uli vakwikwi naatu othene anammwitana mwaimbarimbari. Thitho atu anammova unodha airela vyofuna viwa, unodhavwa kuwa wiwa ovepa pedhelo thitho unodha avulumucha.” Yen’na njingari ilukulu vinjinji. Yohova unofunechecha ira akale xamwali thitho ngokozeya vuruwana malobelwi-u angalive ira liye ngunapanducha wanguru dhothene. Ee-no ngari ina-iyo yolobela wa Yohova chotuva yapereso indendai yeniyo ivelele liye wamutu uliwethene.

² Mbwenye ira Yohova avwenga malobelwi-u, ninofwanela lobelanga mmakalelo anofuna liye. N’nga ninaviire a-vi vyevi? Dhoweni nione vinoonga Bibilya vamwasa olobela?

MWASIWA NGWAN’NI NINOFWANELA LOBELANGA WA YOHOVA?

3. Mwasiwa ngwan’ni munofwanela lobelanga wa Yohova?

³ Yohova unofuna ira nyo muongenga na liye dhela mulobelo. N’nga ninoidhiwa a-vi vyevi? Ninouvepani ira muleri lemba la Afilipi 4:6, 7. Madhu ali valembali mbo-inda rima. Namatonga wa vyopanduchiwa vyothene unoudhiveliwanani thitho unofuna ira mummwandelenga nyarwa dhinagumanana nyo thitho mwemo munavwelanyo.

4. N’nga lobela wa Yohova hora dhothene unalimbi-e a-vi uxamwali-u na liye?

⁴ Lobelo linonikami-a ira uxamwali-u na Yohova ukale olimba. Atu ali vauxamwalini taongi-ananga wiliwili, na wandelana nyarwa dhinagumanana aliwa tanoroma kala vaivwelano yolimba. Sawasawa vamwasa olobelo wa Yohova. Dhela Bibilyani, Nlungu unoniwandela mathuulelwee thitho munaonela liye vamwasa unangwee. Unoniwandela vinofuna dhaireya sogolo. Lobela wa Nlungu hora dhothene unouva-ni ngari yommwandela munovwelanyo rimani mwinyu. Mwairanga vyevi, uxamwalinyu na Yohova unokala olimba vinjinji.—Tiyago 4:8.

N’NGA NINOFWANELA IRANGAN’NI IRA NLUNGU AVWENGA MALOBELWI-U

5. N’nga ninoidhiwa a-vi ira Yohova kanavuruwana malobelo aatu othene?

⁵ N’nga Yohova unovuruwana malobelo aatu othene? E-i. Hora ya namaro-edha Esaya Yohova atoawandela Aisraeli ira: “Mwathapulanga mandhinyu, ndinouvithali-edhani metwanga. Angalive ira munolobela fendo dhinjinji, kandinouvuruwanani, mandhani mwinyu mutodhala sangiri ichuchi-idhenyo.” (Esaya 1:15) Ee-no na-aire polepole, ninooda ira vyongo vinanonge uxamwali-u na Yohova, thitho vyevi vinooda mmwiri-a liye a-vuruwananga malobelwi-u.

6. (a) Mwasiwa ngwan’ni iroromelo chofuneya? (b) N’nga ninaoni-e a-vi ira nitokaana iroromelo?

⁶ Akala ninofuna ira Yohova avwenga malobelwi-u, ninofwanela mroromela. (Marku 11:24) Rumiwi Paulo aongile ira: “Va-akale iroromelo kavinoodeya mdhiveliwi-a Nlungu. Neri-a uliwethene unofuna fiya wa Nlungu unofwanela roromela ira liye utokalaodi, ongela ira liye unovelela yotuva waatu anomfunafuna na rima othene.” (Aebere 11:6) Mbwenye onga ira nitokaana iroromelo baa-i kai okwakwanela. Ninofwanela mvwela Yohova dambo na dambo ira nioni-e ira nitokaana iroromelo.—Muleri Tiyago 2:26.

7. (a) Mwasiwa ngwa’ni ninofwanela kala odhievi-a na alemezo nalobelanga? (b) N’nga ninaoni-e a-vi ira malobelwi-u mbokumela vathi varima?

⁷ Ninofwanela kala odhievi-a thitho nikalenga ailemezo na lobelanga wa Yohova. N’nga mwasiwa ngwan’ni ninofwanela lobelanga mwalemezo thitho modhievi-a? I-yo nafunanga onga na Mwene venango prezidenti, ninodhilimbi-edha onga mwalemezo. Yohova ngu Nlungu wanguru dhothene, eeno naonganga na liye ninofwanela dhievi-a thitho mmoni-a dhivelo nlukulu kwaranya mwemo munairele i-yo na Mwene venango Prezidenti. (Maromelo 17:1; Salimo 138:6) Thitho ninofwanela onganga vyongo vili rimani mwi-u, a-kala welelanga madhu mambo-ive hora dhothene.—Mateu 6:7, 8.

8. N’nga ninofwanela iran’ni nalobelelanga vyongo vinonioni-a nyarwa?

⁸ I-yavo vyevyo, navepa Yohova ira anikami-e vanyarwa dhinogumanana i-yo, ninofwanela dhilimbi-edha irana vyongo vinanikami-e ira nifwanye vinofuna i-yo. Mofwanafwani-a, akala nitovepa Yohova ira anikami-e fwanya vyongo vyofuneya vaingumi yi-u, ninga vyodya na vyowara, kaninofwanela kala apwadho na dedi-edhanga ira Yohova unoniva-a vilivyothene angalive ira nitokaana nguru dholabana basa. Ninofwanela i-nda basa modhilimbi-edha thitho rumela basa nlilothene linafwanye i-yo ira nilabe. (Mateu 6:11; 2 Atezalonika 3:10) Venango akala nitovepa wa Yohova ira anikami-e kalelo lina-iyo lothakala, ninofwanela rambela vyongo vinaniiri-e ira niirena kalelolo. (Akolose 3:5) Dhoweni nitapanye vyofuka vyoonga lobelo vinodhiveliwana dhifuka atu anjinji.

VYOFUKA VINOFUKECHA ATU VOONGA VYA LOBELO

9. (a) N’nga ninofwanela mlobelelangaani? (b) N’nga lemba la Juwau 14:6 linanifunji-an’ni voonga vya lobelo?

⁹ N’nga ninofwanela lobela waani? Yesu atofunji-a anamafunjedhee ira tanofwanela lobelanga wa “Babi-u wadhulu.” (Mateu 6:9) Thitho atoonga ira: “Miyo ndili ndhila, imbarimbari na ingumi. Kavali mutu unafiya wa Baba a-avirile wa miyo.” (Juwau 14:6) Ee-no ninofwanela lobelanga wa Yohova baa-i mbwenye dhela wa Yesu. N’nga lobela dhela wa Yesu unothapulelan’ni? Ira Yohova awakule malobelwi-u, ninofwanela oni-a ira ninosimba izo yavakundu iva-iwile Yesu. Ninga vifunjedhile i-yo walelene, Yesu atodha vailambo yavathi ira anivulumuche mmadawo na wukwa. (Juwau 3:16; Aroma 5:12) Yohova atomsakula Yesu ira akale ndimuwa ovelela kuto na namatonga.—Juwau 5:22; Aebere 6:20.

10. N’nga ninofwanela kaana makalelo enango avakundu nalobelanga? Ongani.

¹⁰ N’nga ninofwanela kaana makalelo enango avakundu nalobelanga? E-i, Yohova kananiwandela ira nikokorenga, kaathi venango i-mela nalobelanga. Bibilya linoniwandela ira ninooda mmongana Yohova nangali mwamakalelo aliothene anaoni-e ira ninomlemeza. (1 Limbili 17:16; Neemiya 8:6; Danieli 6:10; Marku 11:25) Yohova vinoing’ana liye nalobelanga kai munokalela i-yo, kaathi venango imela mbwenye unoing’ana vili rimani mwi-u. Ninooda lobela mokuwi-a madhu venango lobelo larimani, valimburo nlilothene, hora iliyothene, nathana venango nama-iyu. Nalobelanga ninofwanela roromela ira Yohova unovwa vinoonga i-yo, masiki ira waatu enango kavinavweya.—Neemiya 2:1-6.

11. N’nga pivyongo viivi vinofwanela i-yo vionga nalobelanga wa Yohova?

¹¹ N’nga ninofwanela lobelelanga vyongo viivi? Ninooda lobelela vyongo vilivyothene vinoona Yohova ira pyofwanelela. Bibilya linoonga ira: “iliyothene inamvepe i-yo movwelana na ifuneloyee, unonivuruwana.” (1 Juwau 5:14) N’nga pyofwanelela lobelela nyarwa dhi-u na vyongo vinango vinofuna i-yo? Ee. Ninofwanela lobelanga wa Yohova mothathuwa rimani ninga munawaredhelecha i-yo nafwi-u wavarimani. Ninooda mmwandela Yohova iliyothene yarimani mwi-u. (Salimo 62:8) Ninooda mvepa Yohova ira aniva-e nemba ochena ira unikami-e irana vyongo vyofwanelela. (Luka 11:13) Ninooda mvepa Yohova ira aniva-e zelu dhonikami-a saka vyongo mwazelu thitho ira aniva-e nguru dhovilelana nyarwa dhi-u. (Tiyago 1:5) Ninofwanela mvepa Yohova ira anilevelele vyodawa vi-u. (Aefeso 1:3, 7) Nilobelelenga atu enango, thangani-avo abali-u atutuni naabali naarongoli-u apingoni.—Mayirelo 12:5; Akolose 4:12.

12. N’nga njimyasa iivi yofuneechecha inofwanela i-yo iwonga nalobelanga?

¹² N’nga njimyasa iivi yofuneya vinjinji yofwanela iwonga malobeloni mwi-u? Njimyasa yoonga vya Yohova na ifunelo yee. Ninofwanela msimba kumela vathi varima, mwasa wavyongo viniirele liye. (1 Limbili 29:10-13) Ninoidhiwa ira vyevi pyofuneya neri-a Yesu angali vailambo yavathi atoafunji-a anamafunjedhee mwafunela moda olobela. (Muleri Mateu 6:9-13.) Liye aongile ira yoroma tanofwanela lobelanga ira dhina la Nlungu licheni-iwe, venango ira lioniwenga kala lavakundu. Voi-eno Yesu atooni-a ira ninofwanela lobelanga ira Umwene wa Nlungu udhe thitho ira ifunelo yee iireye vailambo yavathi. Yesu angamadhi onga vyongo vyofuneelavi, paevo vaongile liye ira ninooda vepa vinofuna i-yo. Naroma lobela mwa dhina la Yohova thitho ifunelo yee, ninooni-a ira vyongo vyevi pyofuneya vinjinji.

13. N’nga malobelwi-u anofwanela kalanga olapa?

¹³ N’nga malobelwi-u anofwanela kala olapa? Bibilya kalinoonga. Malobelwi-u anooda kala okwiva venango olapa, movwelana na vyongo vili aliwa. Mofwanafwani-a, ninooda lobela madhu okwiva na-anarome udya mbwenye ninooda lobela madhu olapa nakala okene thitho vanomsimba i-yo Yohova va vyongo viniirele liye venango mmwandela nyarwa dhi-u. (1 Samueli 1:12, 15) Kaninofwanela lobela malobelo olapa mofuna vioni-edha waatu enango, ninga mwairela atu enango hora ya Yesu. (Luka 20:46, 47) Malobelo oi ee-no Yohova kaanadhiveliwana. Yohova unofuna ira nilobelenga kumela vathi varima.

14. N’nga vadambo ninofwanela lobela fendo dhingasi, n’nga vyevi vinonifunji-an’ni vya Yohova?

¹⁴ N’nga ninofwanela lobela fendo dhingasi vadambo? Yohova unoniwandela ira nilobelenga hora dhothene. Bibilya linoonga ira: “mulobelenga mo-o-iyedhela,” “mulimbi-edhe lobela,” thitho mulobelenga mo-o-iyedhela.” (Mateu 26:41; Aroma 12:12; 1 Atezalonika 5:17) Hora dhothene Yohova unokala okozeya vuruwana malobelwi-u. Ninofwanela msimba mwasa waudhivelee thitho na vyongo vyapama viniirele liye. Nimvepenga ira anisogolelenga, thitho niva-a nguru nagumanana nyarwa. Akala ninosimba ngari yapereso yavadhulu ina-iyo yolobela wa Yohova, ninodha dhilimbi-edha lobela waliye hora dhothene.

15. N’nga mwasiwa ngwan’ni ninofwanela onganga ira “ame” komoni wa lobelo?

¹⁵ Mwasiwa ngwan’ni ninofwanela onga ira “ame” komoni wa lobelo? Madhu oonga ira “ame” anothapulela ira “imbarimbari” venango ira “vikale ee-no.” Onga ira “ame” unothapulela gogomedhela ira viongiwile lobelonimo pyali rimani mwi-u. (Salimo 41:13) Bibilya linoniwandela ira niirenga “ame,” mokuwi-a madhu venango rimani mwi-u, komoni wa lobelo lavamwinjini vooni-a ira viongiwile lobelonimo ninovivwelanana.—1 Limbili 16:36; 1 Akoritiyo 14:16.

MWEMO NLUNGU MUNAWAKULELA LIYE MALOBELWI-U

16. N’nga Yohova unowakula malobelwi-u? Ongani.

¹⁶ N’nga Yohova unowakuladi malobelwi-u? Ee, unowakula. Bibilya linoonga ira liye “Ngovuruwana malobelo.” (Salimo 65:2) Yohova unovwa thitho wakula malobelo okumela vathi varima enao atu anjinji anovelela aliwa mmakalelo o-iyana-iyana.

17. N’nga Yohova uno-indi-edha a-vi basa angelo na anamalabee availambo yavathi vowakula malobelwi-u?

¹⁷ Yohova uno-indi-edha basa angelo na anamalabee availambo yavathi vowakula malobelwi-u. (Aebere 1:13, 14) Vatokala vifwanafwani-o vinjinji vyaatu talobele ira Nlungu aakami-e vwechecha makundo a Bibilyani thitho va-anavire hora, a Mboni dha Yohova tatofiya noroma funjedha Bibilya vambo-i naaliwa. Bibilya linooni-a ira angelo ano-inda basa lolaleya “milanyu yapama” (Muleri Apokalipse 14:6.) Thitho venango anjinji mwa-iyo nitoroma vepa Yohova ira anikami-e nyarwa inango venango ira anikami-e fwanya vyongo vinango vyofuneya mbwenye natokami-iwa na Kristau fwi-u.—Sanganikho 12:25; Tiyago 2:16.

18. N’nga Yohova uno-indi-edha a-vi basa nemba ochena vambo-i na Bibilya vowakula malobelwi-u?

¹⁸ Yohova uno-indi-edha basa nemba ochena vowakula malobelwi-u. Navepanga ira anikami-e vilela nyarwa dhinagumanana i-yo, liye unooda niva-a nemba ochena ira unisogolele thitho nikami-a vilela. (2 Akoritiyo 4:7) Hora dhinango Yohova uno-indi-edha basa Bibilya vowakula malobelwi-u thitho nikami-a sakula vyongo mwazelu. Naleringa Bibilya, ninooda fwanya lemba looda nikami-a. Yohova thitho unooda iri-a bali venango rongola mwinango wakula vamigumanoni, jooda nikami-a va nyarwa dhi-u. Thitho unooda iri-a ndimuwa wavapingoni niwandela likundo n’nango la Bibilyani linofuna nikami-a.—Agalata 6:1.

19. Mwasiwa ngwan’ni hora dhinango ninooda ona ira Yohova kanawakula malobelwi-u?

¹⁹ Fendo dhinango, ninooda dhifuka ira, ‘mwasiwa ngwan’ni Yohova kanowakula lobelo langa fiedhela peeno?’ Thuulelani ira liye unoidhiwa hora na makalelo ofwanelela owakulela malobelwi-u. Liye utoidhiwa vyongo vinofuuneela i-yo. Mbwenye ninofwanela dhowanave lobelanga hora iliyothene vooni-a ira vivepile i-yovyo ninovifunadi thitho ira ninomroromelave Yohova. (Luka 11:5-10) Hora dhinango Yohova unowakula malobelwi-u mo-iyana na mwathuulela i-yo. Mofwanafwani-a, ninooda lobela ira anikami-e vanyarwa inango inogumanana i-yo mbwenye nyarwadho aliwa a-mala. Mbwenye liye unooda nikami-a ira nivilele.—Muleri Afilipi 4:13.

20. Mwasiwa ngwa’ni ninofwanela lobelanga wa Yohova hora dhothene?

²⁰ Malobelo njingari yapereso yavadhulu yokumela wa Yohova. Kanikaikelenga ira Yohova unovwa malobelwi-u. (Salimo 145:18) Ee-no nalobelanga wa Yohova wiliwili thitho mokumela vathi varima, uxamwali-u unodha kala olimba vinjinji.