MURU OFUNJEDHA 31
Musimbenga ngari inanyo ya lobelo
“Lobelo langa likale ninga vyotuwela vamethoni vinyu.”—SAL. 141:2.
NYUMBO 47 Muzipemphera kwa Yehova Tsiku Lililonse
VINOFUNA I-YO FUNJEDHAa
1. N’nga nionenga a-vi ngari yolobela wa Yohova?
NATOOVA-IWA ngari ya pereso yavadhulu maningi yoonga mulobelo nanamapanducha wa dhulu navailambo yavathi. Kathuulelani, ninooda m’mwandela Yohova vyarimanimwi-u hora iliyothene thitho iongelo iliyothene mo-oroma vepa rumeli-iwa. Ninooda lobela wa liye akala nili hospitaleni venango perezoni ninororomela ira Babi-u waudhiveluo unongonivuruwana. Kaninoiona movevuwa ngari yen’na.
2. N’nga Mwene Davide athoni-edhe a-vi ira anosimba ngari ya lobelo?
2 Mwene Davide anoosimba ngari ya lobelo. Liye atom’mombela Yohova ira: “Lobelo langa likale losaka-edhiwa ninga vyonukela vamethoni vinyu.” (Sal. 141:1, 2) Muhora ya Davide, vyotuwela vyavakundu vyevyo amsembe vya-indi-edha aliwa basa volambela wava kachisini, vyanoosaka-edhiwa mwapama maningi. (Ekis. 30:34, 35) Voonga vya vyotuwela, Davide athapulela ira anoothulela pama vyafuna liye onga mulobelo wa Babee wa dhulu. Vyevi piyevyo vinofuna i-yo iranga, malobelwi-u takalenga osangalali-a wa Yohova.
3. N’nga nikaengana mathuulelo oi a-vi nalobelanga wa Yohova, n’nga mwasiwa ngwan’ni?
3 Nalobelanga wa Yohova ninofwanela iranga vyongo mwalemezo maningi. Kathuulelani masopenya odabwi-a enao Esaya, Zakiyeli Danieli na Juwau aoni-iwile aliwa. Angalive ira masopenyao ali o-iyana, vatokala yongo inango yolandana. Othenene enala anooni-a ira Yohova ndi Mwene olemezeya. Esaya “atoona Yohova angakaathidhe vapandoni wa Umwene olemezeya wenuo wali valimburoni lavadhulu.” (Esaya 6:1-3) Zakiyeli atoona Yohova angakaathidhe vagaletanivee dhulu “thitho limburo lothene lomrungunuwa vali vowala . . . ninga zirimbo.” (Zakiy. 1:26-28) Danieli atom’mona “wamalambo manjinji” angawarile vyowara vyochena thitho pandoniwee wa Umwene u-indanga mulo. (Dan. 7:9, 10) Thitho Juwau atoona Yohova angakaathidhe vapandonivee wa Umwene angarungunuweliwe na zirimbo ooneya ninga wala wa emarodi. (Apok. 4:2-4) Nathuulela titimi-o nlukulu lina Yohova, ninothuuchiwa vya ngari yapereso yavadhulu loonga na liye mulobelo thitho pyofuneya ira vyevyo mwalemezo. N’nga ninalobelenga a-vi?
“MBWENYE NYO MULOBELENGA MOI E-NI”
4. N’nga ninofunjedhan’ni vamadhu oroma a lobelo laifwanafwani-o la Yesu lava lemba la Mateu 6:9, 10?
4 Muleri Mateu 6:9, 10. Vaulalikee wavamwangoni, Yesu atofunji-a anamafunjedhee mwemo munalobelele aliwa, ndhila yeniyo inamsangalali-e Nlungu. Angaongile ira “mbwenye nyo mulobelenga moi e-ni,” yoroma Yesu atoonga myasa yofuneya inovwelana na ifunelo ya Yohova. Atoonga vyocheni-iwa wa dhinalee, udha wa Umwene wenuo unofuna dha nonga othene anomruni-a Nlungu thitho maraeli-o asogolou okuza atu na ilambo yavathi. Naromolanga vyongo vyevi malobelonimwi-u, ninothonyi-edha ira ninoona ira ifunelo ya Nlungu chofuneya.
5. N’nga pyofuneya ira niromolenga malobelonimwi-u vyongo vyokuza i-yo?
5 Muikundu yo-arela ya lobeloli, Yesu atothonyi-edha thitho ira pyofuneya ira nilobelelenga myasa dhokuza i-yo. Ninooda mvepa Yohova ira aniva-e yodya ya dambolo, anilevelele vyodawa vi-u, anivunele vavyowesedha thitho anivulumuche waothakaluo. (Mat. 6:11-13) Namvepanga vyongo vyevi ninothonyi-edha ira ninomnyindela thitho ninofunechecha kala vauxamwali na liye.
N’nga lombwana na-iyanee tanalobelele vyongo viivi? (Muone ndima 6)b
6. N’nga ninofwanela lobelelanga vyongo viromoliwile mulobelo laifwanafwani-o baa-i? Onganimo.
6 Yesu kaadedi-edhela ira anama-arelee anongoonga movwelana na madhwala mulobelo la ifwanafwani-o. Mumalobelwee enango atoromola myasa dhedho dhali dhofuneya maningi vahoriyo. (Mat. 26:39, 42; Juwau 17:1-26) Mofwanafwana na vyevi, i-yo thitho ninooda lobelela myasa dhedho dhinonisukwali-a. Nafunanga sakula vyoira vamwasa unangwee ninooda mvepa Yohova ira aniva-e zelu thitho anikami-e vwechecha vyongo. (Sal. 119:33, 34) Naromanga urumiwi unangwee orucha, ninooda mvepa ira anikami-e, kala ozindiyela. (Sang. 2:6) Anamabala, anooda lobelela a-imiwa thitho a-ima anooda lobelela anamabaliwa, mbwenye i-yo othene ninooda lobelela anoafunjedhana i-yo Bibilya thitho atu anoalaleela i-yo. Mbwenye malobelwi-u katinofwanela kala ovepanga vyongo vinangovyee.
N’nga ninamtitimi-e nomsimba Yohova vavyongo viivi mumalobelwi-u? (Muone ndima 7-9)c
7. Mwasiwa ngwan’ni ninofwanela mtitimi-a Yohova mumalobelwi-u?
7 Nithuulelenga mtitimi-a Yohova mumalobelwi-u. Kavali mutu unofwanela i-yo mtitimi-a kwaranya Nlungwi-u. Liye “ngwapama thitho ngokozeya levelela.” Thitho “ngwatangaranga na walelo, o-othakaleliwa mobaranya, na odhaliwa na oma rima o-omala, na imbarimbari.” (Sal. 86:5, 15) Vothuulela moda uli liye thitho vinoira liye, nitokaana myasa yovweya inoniiri-a mtitimi-a.
8. N’nga pivyongo vinango viivi vinaniiri-e msimba Yohova? (Salimo 104:12-15, 24)
8 Wenjedhela vomsimba mumalobelwi-u, ninofwanela msimba Yohova namwasa wavyongo vyapama vinoniva-a liye thitho namwasa okaana afwi-u anjinji apama. Babi-u waudhivela unoniva-a vyothene vyevi, na vinango thitho vinjinji namwasa oi unofuna ira nisangalalenga. (Muleri Salimo 104:12-15, 24.) Kwaranya vyothene ninomsimba Yohova namwasa oniva-a yodya yauzimu yoinjiva thitho idedi-edho yosangalali-a ya sogolo.
9. N’nga chini inanikami-e ira nithuulelenga msimba Yohova? (1 Atezalonika 5:17, 18)
9 Vinokala vyo-orucha diwala msimba Yohova vavyothene vinoniirela liye. N’nga chini inanikami-e? Ninooda lemba vyongo vyo-iyana-iyana vyevyo vimvepile i-yo noonanga hora na hora mwemo munowakulela liye malobelwi-uao. Naira e-no nilobelenga vomsimba namwasa onikami-a. (Muleri 1 Atezalonika 5:17, 18.) Kathuulelani vi: Ninosangalala thitho dhivwa ira ninodhiveliwa atu enango tanisimba vaviirile i-yo. Mofwanafwana na vyevi, nathuulelanga msimba Yohova namwasa owakula malobelwi-u na liyene thitho unosangalala. (Akol. 3:15) N’nga ngumwasa unango uuvi nlukulu unoniiri-a msimba Nlungwi-u?
MUMSIBENGA YOHOVA NAMWASA WA MWANEE
10. Movwelana na lemba 1 Pedru 2:21, mwasiwa ngwan’ni ninofwanela msimba Yohova namwasa omruma Mwanee Yesu vailamboi?
10 Muleri 1 Pedru 2:21. Ninofwanela msimba Yohova namwasa omruma Mwanee ira anifunji-e. Funjedha vya Yesu, unonikami-a idhiwa vinjinji vyokuza Yohova thitho vinaire i-yo ira nimsangalali-enga. Akala ninororomelela sembe ya Kristu, ninooda kala vauxamwali wapama maningi na Yohova Nlungu thitho mkaanee varendeleni.—Aroma 5:1.
11. N’nga Yesu un’na izo yoi a-vi vamalobelo anovelela i-yo wa Yohova?
11 Ninomsimba Yohova namwasa oi ninooda lobela wa liye dhela Mwamwanee. Yohova uno-indi-edha basa Yesu voakula malobelwi-u. Liye unovurawana thitho wakula na lobelanga dhela mudhina la Yesu. Yesu atoonga ira: “Iliyothene inofunanyo vepa mudhina langa miyo ndinodha iira, ira Baba alemeziwe Mwamwanee.”—Juwau 14:13, 14.
12. N’nga ngumwasa unango uuvi unoniiri-a msimba Yohova namwasa oniva-a Mwanee?
12 Yohova unonilevelela vyodawa vi-u namwasa wa sembe ya Yesu. Malemba anom’monga Yesu ninga “ndimuwa wamsembe, wenuo ukanle vathi, dhulu udhandha lodyana la pando wa Umwene olemezeya.” (Aeb. 8:1) Liye “ngunamakami-a wenuo uli na Baba.” (1 Ju. 2:1) Ninomsimba Yohova namwasa oniva-a ndimuwa wamsembe wenuo unovwechecha vyofooka vi-u thitho “unonifii-edha mosembezela wa Nlungu!” (Aroma 8:34; Aeb. 4:15) Namwasa oi kanili ochena kaninaode onga na Yohova mulobelo vo-okala sembe ya Yesu. Onga vyaimbarimbari kaninooda simba mokwakwanela namwasa oniva-a—yotuva ya pereso yavadhulu yeniyo ili Mwanee odhiveliwiwa!
MULOBELELENGA ABALI NAARONGOLINYU
13. Vanama-iywee omari-a, n’nga Yesu athonyi-edhe a-vi ira anoadhiveliwana anamafunjedhee?
13 Vanama-iywee omari-a, Yesu atolobelela anamafunjedhee wahora yolapela, vovepa Babee ira “aaing’anele voova othakaluo.” (Juwau 17:15) Veva Yesu atothonyi-edha udhivela ulukulu! Liye anodedi-edha gumanana vyowesedha vilukulu; mbwenye liye anoakumbanyedha maningi arumiwee.
N’nga ninaalobelelen’ni abali naarongoli-u? (Muone ndima 14-16)d
14. N’nga ninathonyi-edhe a-vi ira ninoadhiveliwana abali naarongoli-u?
14 Vomsazi-edha Yesu, i-yo thitho kanithuulelenga vyofuna vi-u baa-i. Malomwee, hora dhothene nilobelelenga abali naarongoli-u. Nairanga vyevi ninokala nivwelanga lamulo la Yesu loi, nidhivelengana thitho ninomthonyi-edha Yohova ira ninodhiveliwana Makristau afwi-u. (Juwau 13:34) Lobelela abali naarongoli-u kokami-a maningi. Madhu a Nlungu anoniwandela ira: “Sembezela wa mutu olongomana unolaba basa mwakopolo maningi.”—Tiy. 5:16.
15. Mwasiwa ngwan’ni ninofwanela lobelela Makristau afwi-u?
15 Ninofwanela lobelelanga Makristau afwi-u namwasa oi naaliwe thitho anogumanana nyarwa dhinjinji. Ninooda mvepa Yohova ira aakami-e vilela marenda, masoka avilengo, kondo, oni-iwa nyarwa venango nyarwa dhinango. Ninooda alobelela thitho abali naarongola ale anolaba basa mwathindhi vokami-a atu anogumanana nyarwa. Venango munoidhiwa enango mwaatu ale anogumanana nyarwa ninga dhedhi. N’nga munoona a-vi aromola madhiniwa mumalobeloni mwinyu avamweeka? Ninothonyi-edha ira ninoadhiveliwana namvepenga Yohova ira aakami-e vilela.
16. Mwasiwa ngwan’ni ninofwanela lobelela atu ale anonisogolela?
16 Abali anosogolela pingo anosimba maningi naalobelelanga thitho malobelwala anoakami-a. Ndi mwemo thitho mwali aliwa na rumiwi Paulo. Liye alembile ira: “Mundilobelelenga thitho miyo. Irani vyevi ira ndadhula valomoni vanga ira ndionge ndiodenga onga mwaufulu ira ndiidhiwi-e atu enango sengeredo yopambuleya ya milanyu yapama.” (Aef. 6:19) Malamboano thitho vatokala abali anjinji anolaba basa mwathindhi vonisogolela. Ninothonyi-edha ira ninoadhiveliwana namvepanga Yohova ira aakami-e vabasa liwa.
NAIMELELA ATU ENANGO MULOBELO
17-18. N’nga ndi vahora dhiivi vanovepiwa i-yo ira niimelele atu enango mulobelo, n’nga ninofwanela thuulelan’ni?
17 Hora dhinango Ninooda vepiwa ira nilobele malo mwaatu enango. Mwaifwanafwani-o, rongola unoiri-a funjedha wa Bibilya, unooda mvepa rongola unango wenuo umdhowilena liye mafunjedhao ira aire lobelo. Rongola mwinanguo vinooneya ira kanam’mwidhiwa pamapama namafunjedhuo. Moi e-no liye unooda dhiveliwa velela lobelo lomari-a. Vyevi vinooda mkami-a ira aidhiwe vinaonge liye vyokuza namafunjedhuo mulobelonimo.
18 Bali unooda wandeliwa ira alobele va gumano wa pingo venango okozeela urumiwi. Abali anova-iwa ngari yen’na anofwanela thuulela ifunelo ya gumanuo, lobelo kai ndhila yovelela malangi-o venango milanyu. Vamigumanoni ya pingo minjinji vanoveleliwa maminitu mathanu a nyumbo na lobelo. Moi e-no bali unolobela, kanofwanela onga “madhu manjinji” simbwasimbwa lobelo loroma wa gumano.—Mat. 6:7.
MUONENGA LOBELO KALA LOFUNEYA MANINGI VAINGUMI YINYU
19. N’nga chini inanikami-e kozeela dambo lotonga la Yohova?
19 Dambo lotonga la Yohova vanokwivela aliwa, nionenga lobelo kala lofuneya maningi vaingumi yi-u. Vamwasa wen’na Yesu aongile ira: “Moi e-no kalani methove thitho mulobelenga mosembezela hora dhothene ira mudhaode tawa vyongo vyothene vyevyo vinodedi-edheliwa ireya.” (Luka 21:36) E-no, lobela hora dhothene unooda nikami-a kalave methove mwauzimu ira dambo la Yohova, la-anifwanye morurumucha na-anakozeele.
20. N’nga ninaire a-vi ira malobelwi-u takalenga vyotuwela vyonukela pama?
20 N’nga nitapanyilenin’ni? Nitoona ira lobela ndi ngari ya pereso yavadhulu. Myasa dhofuneya maningi mumalobelwi-u, dhinofwanela kala dhovwelana na ifunelo ya Yohova. Ninomsimba Nlungu namwasa wa Mwanee na Umwenee. Thitho ninolobelela Makristau afwi-u. Ninooda thitho lobelela vyongo vyevyo vinofuna i-yo vaingumi yi-u thitho ira Nlungu anikami-e kaana iroromelo yolimba. Nathuulelanga mwapama vyevyo vinofuna i-yo novionga mumalobelonimwi-u, ninothonyi-edha ira ninosimba maningi ngari yapereso yavadhulu ya lobelo. Nairanga vyevi, malobelwi-u anodha kala ninga vyotuwela vyonukela pama wa Yohova—vyevyo “vinomsangalali-a.”—Sang. 15:8.
NYUMBO 45 Kusinkhasinkha kwa Mtima Wanga
a Ninosimba maningi ngari yolobela wa Yohova. Ninofuna ira malobelwi-u takalenga ninga vyotuwela vyonukela pama vyevyo vinamsangalali-e. Muyofunjedha yei, ninotapanya vyevyo vinaonge i-yo mumalobelwi-u. Ninotapanya thitho makundo enango anofwanela i-yo athuulelanga navepiwa ira niimelele atu enango mulobelo.
b VIRUTHIRUTHI VYA: Lombwana na a-iyanee talobelelanga a-imiwa ira takale ovuneleya xikolani, ndhimuwa oulula unobulela thitho namafunjedha Bibilyiiwa ira adhowe vasogolo.
c VIRUTHIRUTHI VYA: Zombwe amsimbanga Yohova namwasa wa sembe ya Yesu, ilambo yi-u yobaleyai thitho yodya yova-a manungo apama.
d VIRUTHIRUTHI VYA: Rongola amvepanga Yohova ira akami-e Gulu Lotonga na zimwee thitho akami-e ale anorucheya namwasa wamasoka avilengo naale anooni-iwa nyarwa.