Yesu aphiwele wu Gologota

Andimuwa aasembe tatoom’tukhula Yesu nom’dhowana wanamatonga mwinango dhinalee Pilato. Pilato atoafuka ira: ‘N’nga mutula udawile n’ni?’ Aliwa tatoowakula ira: ‘Unoonga ira ngumweni-u.’ Ee-no Pilato atoom’fuka Yesu ira: ‘N’nga weyo uli Mwene wa Ayuda?’ Yesu atoowakula ira: ‘Umwenanga kai wavailambwila.’

Adhamale Pilato atoom’tumiza Yesu wa Herodi, wenuo ali namatonga waikhundu ya Galileya, ira amam’mone akala utodawadi. Mbwenye Herodi afwaidhe ira Yesu kaadawile yongo iliyothene. Mbwenye tatoom’mweleli-edha wa Pilato. Pilatuo atoawandela atwao ira: ‘Miyo na Herodi nioni ira mutula kadawile. Ee-no ndinom’thathula.’ Mbwenye atwao tatookuwa ira: ‘Mum’phe! Mum’phe!’ Anyakhondo tatooroma m’kwapula Yesu, nom’thurela mare thitho m’khoma. Tatoom’mwari-a thitho ichapowa yaminga nom’nyoza ira: ‘Mucheliwile a-vi Mwene wa Ayuda.’ Pilato atoawandela atwao ira: ‘Miyo kandioni yodawa iliyothene wa mutula.’ Mbwenye atwao tatookhuwa okoka ira: ‘Athomeiwe wenuo.’ Ee-no Pilato atoava-a Yesu ira tamam’thomeye.

Ee-no tatoodhowa wu limburo laitaniwa Gologota, mam’komela vaimurini noimecha imuriyo. Mbwenye Yesu atoolobela ira: ‘Babani mwaalevelele atwala namwasa oi katinoidhiwa vinoira aliwa.’ Atu enango tatooroma m’nyoza Yesu onganga ira: ‘Akala uli mwana Nlungu thitha vaimurinivo. Dhivulumuche wekene.’

Liphanga linango lathomeiwile vambo-i na Yesu latoonga ira: “Yesu, mumandithuulele mwadhavolowa mu Umweninyu.” Adhamale Yesu atom’lanyedha ira: “Mwaimbarimbari ndinaauwandela penene ira, we unodhakala vambo-i na miyo Paradaizo.” Nathana watookala isi mahora mararu. M’mee Yesu naamafunjedha enango tali vaduzi navathomeiwe liyevo. Ee-no Yesu atoom’mwandela Juwau ira am’samalelenga Mariya ninga m’mee.

Moi e-no Yesu atoom’mwandela Nlungu ira: “Nditokwakwaneli-edha ifunelwinyu!” Adhamale atoorami-a murwee vathi thitho atookwa. Vahora yeniyo vatooireya indharandhara yakopolo. Thitho nguo yali kachisini yeniyo ya-iyani-a limburo lochena na lochena maningi yatoong’ambeya vari. Ndimuwa wa anyakondo angaoni vyevi atoonga ira: “Ula ali Mwana Nlungu.”