Dhowananive simba khuto

1-2. N’nga khuto chini, mwasiwa ngwan’ni ngofuneya wa-iyo?

MBWENYE Adamu angadawile atoluza ngari yokalao dhowa nodhowa, a-kala waliwa okave, mbwenye thitho waa-imiwa. Kavali pepesa navile Adamu vyairile liye. Liye asakunle dawa ngumwasiwa anoofwanela wukwa. N’nga a-imiwa? Aliwa katana landu va vyodawa vya Adamu. (Aroma 5:12, 14) N’nga vangakaanle yongo inango yoawombolana muukwani? Ee. Adamu angadawile, Yohova atoulula vang’ono na vang’ono vyafuna liye ira aode ombola mamilhau aziza la Adamu yodawa na wukwa. (Maro. 3:15) Yangafiile hora yofwanelela angarumile mwanee kumela dhulu “dhavelela ingumiyee ninga khuto oombolana atu anjinji.”—Marku 10:45; Juwau 6:51.

² N’nga khuto chini? M’malemba aigiriki aikristau, khuto njipereso yapaganle Yesu ira aode gula yaluzile Adamu. (1 Akor. 15:22) Mwasiwa ngwan’ni ninofuneela khuto? Mwasa wa malamulo olongomana a Yohova. Ninga lamulo loonga ira ingumi pagalela ingumi. (Ekis. 21:23, 24) Adamu atoluza ingumi yee yolongomana. Ee-no ira akwakwaneli-edhe malamulo olongomana a Nlungu Yesu afwanela velela ingumiyee yolongomana. (Aroma 5:17) Mwandhila yen’na liye atokala “Baba odhowa” nodhowa wa othene anaoni-a iroromelo dhela mwa khuto.—Esaya 9:6; Aroma 3:23, 24.

3. Movwelana na lemba la Juwau 14:31 na 15:13, mwasiwa ngwan’ni Yesu ali okozeya velela ingumiyee yolongomana?

³ Yesu unomdhiveliwana vinjinji Babee wadhulu thitho unodhiveliwana na uliwethene wa i-yo, ngumwasiwa liye atovelela ingumiyee yolongomana. (Muleri Juwau 14:31; 15:13.) Dhela mwaudhivelula, Yesu ali okozeya kala ororomeleya fiedhela komoni wa ingumiyee thitho irana ifunelo ya Babee. Mwandhila yen’na, ifunelo ya Yohova waatu na ilambo yavathi yangaodile kwakwanela. Muyofunjedha yei, ninafuna nifunjedhe ira mwasiwa ngwan’ni Nlungu atorumeli-a ira Yesu akwe wukwa worucheya. Namala ninodha tapanya mogwandela ifwanafwani-o ya olemba Bibilya wenuo alemeza vinjinji yoombolana. Vo-arela, ninodha ona mwemo munaoni-e i-yo simba yoombolana. Vogomi-edha ninodha funjedha mwemo munawenjedhele i-yo simba va yoombolana. yeniyo iniva-idhe Yohova na Yesu.

MWASIWA NGWAN’NI YESU ANOFWANELA ONA NYARWA?

4. Kaonganimo moda wakwide Yesu.

⁴ Kathuulelani siku logomi-edha la Yesu vailambo yavathi. Liye angaodile itana mwinji waangelo ira tamvunele, mbwenye liye ato-iyachi ira anyathoropa a wu roma tam’mange nomkoma mo-okaana tangaranga. (Mat. 26:52-54; Juwau 18:3; 19:1) Anyathoropawo tano-indi-edha basa chamboko ira takoma tanondharula likungu la Yesu. Vanduli viwa angalive ira Yesu atokaana vilonda nduli, anyathoropa tatomkanyi-edha tukula imiri yonyemela. Yesu atoroma mburula imiri mafiyana wafuna liye piwa. Mbwenye vangavirile hora anyathoropa tatoruma atu enango ira tatukule imiriyo. (Mat. 27:32) Yesu angafiile valimburo vafuna liye piwa, anyathoropa tatomkomela maperego mandhanimwee na manyalo vaimirini. Nyemela wa manungo a Yesu watowenjedhela vilonda mwasa wa maperego. Afwee tangali okumbanya thitho m’mee alanga, mbwenye ayuda tanyozanga Yesu. (Luka 23:32-38; Juwau 19:25) Hora ingavirile uvwa upa watowenjedheleya. Rima na madhadhu vyatoroma fooka ee-no atoroma rucheya ira avume. Hora yamari-eya Yesu atolobela fendo yogomi-edha. Angamadhi atoorami-a muru novelela ingumiyee. (Marku 15:37; Luka 23:46; Juwau 10:17, 18; 19:30) Mo-okaikela wukwa wa Yesu wali mwavang’onovang’ono, ovwi-a upa thitho ova-a manyadho!

5. Wa Yesu, chini yasimbwile mthakalela kwaranya wukwa vaimirini yoonelavo nyarwa?

⁵ Wa Yesu, yasimbwile kaali moda wakwide liye. Yamwiri-idhe kala osukwala ali nukedhiwa weo wamwiri-idhe ira apiwe. Atonukedhiwa na vya-airile liye ira ali mutu onyoza Nlungu thitho o-olemeza dhina la Nlungu. (Mat. 26:64-66) Thuulela nukedhiwa selu onyoza Nlungu vyevyo pyasimbwa mpi-a rimani Yesu fiedha vepa Babee ira kamundiva-eni manyadho. (Mat. 26:38, 39, 42) Mwasiwa ngwan’ni Yohova atorumeli-a ira mwanee odhiveliwiwa ira aone nyarwa fiedha wukwa? Dhoweni nioneni vyongo viraru.

6. Mwasiwa ngwan’ni Yesu anofwanela kwela vaimirini yoonelavo nyarwa?

⁶ Yoroma, Yesu anofwanela kwela vaimirini ira athathule ayuda enao tali otembeleriwa. (Agal. 3:10, 13) Ayuda tali otembeleriwa mwasa oi tatorumela vwela lamulo la Nlungu, mbwenye aliwa kata-arela vyarumenle aliwavyo. Namwasa wenuo, i-yavo kala otongiwa wukwa mwasa okala a-ima a Adamu, Ayuda thitho aliwa tali otembeleriwa. (Aroma 5:12) Lamulo la Nlungu wa ana Israeli laonga ira, mutu adawa ofwanelela wukwa anofwaneladi piwa. Vanduli viwa tutu lee lanofwanela thomeiwa vaimiri yoonelavo nyarwa.b (Dotor. 21:22, 23; 27:26) Ee-no vothomeiwa vaimirini yoonelavo nyarwa, Yesu atoiri-a ira ziza laatu amkondile taganyalina yoombolana.

7. N’nga mwasa wanambili wamwiri-idhe Nlungu rumeli-a mwanee ona nyarwa nguvi?

⁷ Onani mwasa mwinango wenuo warumeli-edhe Nlungu ira mwanee aoni-iwe nyarwa. Yohova airamfunji-a Yesu sogolo lee na izo yee ninga mulimbo velela khuto. Yesu ute vionela eka rucha ovwela Nlungu, vogumanana wesedhiwa orucha. Yesu atopingeya vinjinji fiedha lobela vepa kami-iwa na Nlungu. “Nola ulukulu thitho nokumi-a mi-odi.” Mo-okaikela, mwasa ogumanana nyarwa dhamathuulelo, Yesu unooda vwechecha vyorambulela vi-u thitho “unooda nikami-a nawesedhiwanga” Pyapama idhiwa ira Yohova utoniva-a mulimbo velela khuto watangaranga thitho “unooda vwechecha vyofooka vi-u”!—Aeb. 2:17, 18; 4:14-16; 5:7-10.

8. N’nga mwasa wanararu wamwiri-idhe Nlungu rumeli-a ira mwanee aone nyarwa nguvi?

⁸ Yanararu, Yohova atoiri-a ira Yesu agumanena vyowesedhiwa vyorucha ira aode rumela yofuka yofuneya maningi: N’nga mutu unoodave kala ororomeleya wa Nlungu angalive ira unogumanana vyowesedha vyorucha? Satana aongile ira kabe! Liye aongile ira atu anomlabela Nlungu mwasa wa idyani. Thitho Satana atoonga ira atu, thangani-avo makolwiwa Adamu katinomdhiveliwana Yohova. (Yobo 1:9-11; 2:4, 5) Mbwenye Yohova anonyindela roromeleya wa Mwanee, ngumwasiwa atorumeli-a ira Yesu awesedhiwe mokwaranyi-a madile a mutu. Yesu atodhowanave kaana rima o-ogaaneya thitho atooni-a ira Satana ngonama.

OLEMBA BIBILYA WENUO ASIMBA VINJINJI YOOMBOLIWANA

9. N’nga rumiwi Juwau uni-iyedhe ifwanafwani-o yoi a-vi?

⁹ Makristau anjinji tatokaana iroromelo na mwasa ofunjedha yoombolana. Aliwa tatodhowanave laleela angalive ira tanooruni-iwa thitho gumanana nyarwa dho-iyana i-yana thangani-avo ulula. Onani ifwanafwani-o ya rumiwi Juwau. Liye atooda laleela mororomeleya imbarimbari yoonga vya Kristu thitho yoombolana, venango vyawa vyokwaranya 60. Liye angana vyawa vyowandamela 100, Namatonga wa Roma am’mona kala oopi-a moi atomtumiza udhaari vaisuwa ya Patimu. Selwee ali wan’ni? “Aonga vya Nlungu thitho irela umboni vya Yesu.” (Apok. 1:9) Yei chiifwanafwani-o yororomeleya novilela!

10. N’nga mabuku a Bibilyani alembile Juwau anothonyi-edha a-vi ira anosimba yoombolana?

¹⁰ Mabuku a Bibilya alembile Juwau anooni-a vakwecha moda wamdhiveliwana liye Yesu thitho moda wasimba liye yoomboliwana. Mabukwee atokaana mareferensia okwakwana 100 venango oonga vya yoombolana venango vyoganyali-a vinodhavo na mwasa ovi-arela. Mofwanafwani-a, Juwau atolemba ira: “Akala ira mutu otodawa nitokaana onikami-a wenuo uli vambo-i na Baba; Yesu Kristu wenuo uli olongomana.” (1 Ju. 2:1, 2) Mabuku alembile Juwau anothonyi-edha funeya “oirela umboni vya Yesu.” (Apok. 19:10) Mo-okaikela, Juwau atosimba yoombolana kumela vathi varima. N’nga ninaode a-vi irana vyevi?

N’NGA MUNATHONYI-EDHE A-VI IRA MUNOSIMBA YOOMBOLIWANA?

11. N’nga chini inanikami-e limbana na vyowesedha?

¹¹ Rambelani madawo anoowesedhani. Akala ira i-yo ninosimba yoomboliwana kaninaode thuulela ira: Mwasiwa ngwan’ni ndinofwanela dhilimbi-edha rambela vyowesedhiwa? Miyo ndinooda dawi-a amala ndinovepa leveleliwa. Mo-iyana na vyevyo, nawesedhiwanga ira niire yongo yothakala, ninofwanela onga ira: ‘E-i! N’nga miyo ndinaode a-vi vyevi ndingamadhi idhiwa vyothene vyevyo Yohova na Yesu vindiirele aliwa?ʼ Vo-arela likundo leli ninooda mvepa Yohova ira aniva-e kopolo fiedha ira nivepe mokumela vathi varima ira: ‘Pepani ndinouvepani ira kamundi-iye ira ndigwele muvyowesedhiwa.’—Mat. 6:13.

12. N’nga nina-arele a-vi malangi-o anofwanyeya va 1 Juwau 3:16-18?

¹² Mwaadhiveliwengana abali naarongolinyu. Naoni-anga udhivela thitho ninooni-a ira ninosimba yoombolana. Mwasiwa ngoi Yesu kaavelenle ingumiyee wa i-yo okene, mbwenye thitho na waabali-uene. Ngumwasiwa aliwa mbapereso yavadhulu wa Yesu. (Muleri 1 Juwau 3:16-18.) Ndhila imbo-i yothonyi-edha ira ninowadhiveliwna abali-u kuwairela vyongo vyapama. (Aef. 4:29, 31–5:2) Mofwanafwani-a, ninooda akami-a tabulelanga venango tagumanangana vyorucha ninga gweliwa masoka a vilengo. N’nga ninaire a-vi akala ira bali utoonga venango ira yongo yonikumudwi-a?

13. Mwasiwa ngwan’ni ninofwanela levelela atu enango hora iliyothene?

¹³ Munoona kala vyorucha levelela bali audawelani? (Lev. 19:18) Vyevi vyaireya, a-relani malangi-o ala: “Dhowananive levelelana unango na fwee thitho levelelana na rima wethene unango na fwee, masiki ira mutu mwinango utokhaana mwasa oi amsumele fwee. Mofwanafwana na Yohova utoulevelelani na rima othene, nyo munofwanela irana vimbo-ive.” (Akol. 3:13) Hora iliyothene inolevelela i-yo bali-u, venango arongoli-u, ninoni-a ira ninosimba Babi-u wa dhulu mwasa wa yoombolana. N’nga ninaire a-vi ira nidhowenave wenjedhela simba wi-u va yotuva ya Nlunguyi?

N’NGA NYO MUNAWENJEDHELE A-VI SIMBAWINYU KHUTO WA YOOMBOLANA?

14. Njindhila ivi inanode nyo wenjedhelana udhivelinyu wa khuto oombolana?

¹⁴ Mumsimbenga Yohova na mwasa wa Yoombolana. Joana, rongola wa vyawa 83 unokala ilambo ya India, uongile ira: “Miyo ninoona ira pyofuneya onga vya khuto oombolana malambo othene mumalobelwanga na msimnba Yohova mwasa wa vyevyo.” Vamalobelwinyu avamweka, thuulelani vyodaweya vyoidhiweya viirile nyo va dambolelo. Mwaira e-no, mumvepe Yohova ira auleveleleni na mwasa wa vyevyo. Pyovweya ira, nyo mwadawi-a yongo ilukulu, munofwanela vepa andimuwa avapingoni ira toukami-eni. Aliwa anodha uvuruwanani mwapama no uva-ani malangi-o mwaudhivela oukami-ani okumela Bibilyani. Aliwa anodha lobela vambo-i na nyo vepanga ira Yohova aukami-eni voulevelelani dhela mwa khuto wa Yesu Kristu. Mwandhila yen’na, “nyo munodha ila [mwauzimu] no weleli-edha uxanwalinyu na Yohova.”—Tiy. 5:14-16.

15. Mwasiwa ngwan’ni pyapama kaana hora yofuna thuulela vya khuto wa Yesu?

¹⁵ Muthuulelenga mopwasedha khuto oombolana. Rajamini rongola mwinango wa vyawa 73, uongile ira: “Miyo ndaleringa moda uoni nyarwa Yesu, muthonimwanga munodhala na mi-odi.” Nyo thitho munooda ona ira vyali vyoruchadi Mwana Nlungu moda waoni liye nyarwa. Mbwenye mwathuulela mopwasedha khuto wa Yesu, nyo munoroma mdhiveliwana maningi liye vambo-i na Yohova. Ira vyuukami-eni thuulela khuto oombolana, kavyakale vyapama nyo uthangani-ana mwasa wen’na vafunjedhawinyu wavamweka?

16. Mwasiwa ngwan’ni funji-a atu enango vya khuto oombolana pyapama wa-iyo? (Muone iruthiruthi yavakapani.)

¹⁶ Mwaafunji-enga atu enango vyoonga khuto wa Yesu. Hora dhothene vanoonga i-yo vya khuto wa Yesu, ninawenjedhela simba wi-u. I-yo nitokaana faramento yofuneya inonikami-a vofunji-a atu enango vyoi mwasiwa ngwan’ni Yesu atonikwela. Mofwanafwani-a, ninooda indi-edha basa yofunjedha 4 ya brochura la Milanyu yapama! Yofunjedha yei inamuru oonga ira: “Yesu Kristu mbaani?” Ninooda thitho indi-edhela basa muru 5 wa bukhu loi N’nga Bibilya linonifunji-an’ni? Muru oonga ira “Kuto Chotuva Ilukulu—yokumela Wa Nlungu” E-no vyawa vyothene ninowenjedhela msimba wi-u Yesu na mwasa wa khuto oniombolana voonela Ithuulelo ya wukwawee. No dhilimbi-edha wi-u voitanela atu enango va mwambo ofuneula. Ninosimba ngari iniva-idhe Yohova yofunji-a atu vya Umwenee!

17. Mwasiwa ngwan’ni khuto chotuva ilukulu yokumela wa Nlungu yoombolana atu?

¹⁷ Mo-okaikela, nitokaana myasa yovweya yosimbela khuto nodhowanave wenjedhela simba wi-u. Mwasa wa khuto, ninooda kana uxamwali olimba na Yohova angalive ira nili o-olongomana. Namwasa wa khuto, mabasa a Satana namanami-a anodha nongiwa. (1 Ju. 3:8) Namwasa wa khuto, vyofuna vya Yohova vyoonga vyailambo yavathi vinodha kwakwanela. Ilambo yothene yavathi inodha kala paradaizo. Atu othene aidhinyo anodha mdhiveliwana no labela Yohova. Ngumwasiwa, vakadha siku mwiirenga vinaonada nyo ira muoni-e simbawinyu yotuva yaperesu yavadhuila Nlungu iva-idhe liye atu!