Mudhowenganave mdhiveliwana Yohova naatu enango

1. N’nga ndimakundo avi aimbarimbari aidhinyo, mudharome funjeda Bibilya?

N’NGA munothuulela vyongo vyaidhinyo mudharome funjedha Bibilya? Pyooneelatu ira mwatoodabwa mungaidhi ira Nlungu utokaana dhina. venango mwatoodhivwa pama mungazindiyele ira Nlungu kanooni-a nyarwa atu muloni. Mo-okaikela, mwatosangalala maningi vyaidhinyo ira utokala idedi-edho yoi munodha onana okoka naatu aadhiveliwana nyo enao takwide thitho munodha kala vambo-i naaliwa paradaizoni vailamboi.

2. Wenjedhela vofunjedha makundo aimbarimbari a Bibilyani, n’nga mwairilen’ni ira mudhowe vasogolo? (Aefeso 5:1, 2)

² Vyafunjedha nyo maningi Madhu a Nlungu, paevo thitho varomile nyo mdhiveliwana maningi Yohova. Udhiveluo watoulimbi-ani maningi ira mu-arelenga vyafunjedha nyoovyo. Mwanoosakula vyoira mwazelu movwelana na makundo a Bibilyani. Mwatoochinja mwemo mwaonela nyo vyongo thitho kalelo linyu namwasa ofuna msangalali-a Nlungu. Molandana na mwana wenuo uno-arela anamabala audhivela, nyo thitho munom-arela Babinyu waudhivela wadhulu.—Muleri Aefeso 5:1, 2.

3. N’nga ninadhifuke vyofuka viivi?

³ Venango ninooda dhifuka ira: ‘N’nga va-eni, ndinomdhiveliwana maningi Yohova kwaranya vyamdhiveliwana miyo ndiiranga roma wene kala Kristau? N’nga kumela vabadiziwile miyo, ndinothuulela venango ira vyongo ninga Yohova simbwasimbwa vothonyi-edha udhivela waabali naarongola?’ Akala “udhivela wananyo voroma” utoroma yeva, kamufooke. Vyevi vyatoireela thitho Makristau oroma a muhora yaarumiwi. Yesu kaa-iidhe adhiveliwana, thitho kanodha ni-iyachi nidhiveliwana. (Apok. 2:4, 7) Liye unoidhiwa pama ira ninooda roma okoka kaana udhivela ninga vyaroma i-yo wene idhiwa imbarimbari.

4. N’nga ninotapanyan’ni muyofunjedha yei?

⁴ Yofunjedha yei, inonikami-a ona vyevyo vinaire i-yo ira nidhowenganave mdhiveliwana Yohova thitho atu enango. Namala ninoona maraeli-o enao anafwanye i-yo namwasa omdhiveliwana Yohova thitho atu enango.

MUDHOWENGANAVE MDHIVELIWANA YOHOVA

5-6. N’nga ndi nyarwa dhiivi dhedho dhaguman’nena rumiwi Paulo vaurumiwee, n’nga chini yamkami-idhe dhowanave mlambela Yohova?

⁵ Rumiwi Paulo anoosangalala vomlambela Yohova, mbwenye anoogumanana nyarwa dhinjinji. Hora dhinjinji liye anoowenda maulendo mandandai mandandai thitho hora yeniyo kavyali vyokweya irana vyevi. Vamaulendweyala, hora dhinjinji anoogumanana “vyoopi-a vyama-injeni” thitho “mapanga ndhila.” Hora dhinango atu oruni-a tanom’mwirela vyauwalanga. (2 Akor. 11:23-27) Mbwenye kai hora dhotene vevo Makristau afwee vyathonyi-edha aliwa ira tanoosimba thindhilee lofuna akami-a.—2 Akor. 10:10; Afil. 4:15.

⁶ N’nga chini yamkami-idhe Paulo ira adhowenganave mlambela Yohova? Liye atoofunjedha vyongo vinjinji vyoonga makalelo a Yohova malembani thitho vavyongo vyevyo vyam’mwireele. Paulo kaakaikela ira Yohova Nlungu unomdhiveliwana. (Aroma 8:38, 39; Aef. 2:4, 5) Naliyene thitho atooroma mdiveliwana maningi Yohova. Paulo atothonyi-edha ira anomdhiveliwana maningi Yohova “volabela ochena thitho dhowanave alabela.”—Aeb. 6:10.

7. N’nga ndi yongo imbo-i ivi inanikami-e ira nimdhiveliwengana maningi Yohova?

⁷ Yongo inango yeyo inanikami-e ira nidhowenganave mdhiveliwana maningi Nlungu, kufunjedha madhwee mwathindhi. Mwaleringa Bibilya, mudhilimbi-edhenga ona mwemo vilerile nyoovyo munoukami-edhelani aliwa idhiwa vyoonga Yohova. Mudhifukenga ira: ‘N’nga yofunjedha yei inothonyi-edha a-vi ira Yohova unondidhiveliwana? N’nga inondikami-a idhiwa myasa ivi yondiiri-a mdiveliwana Yohova?’

8. N’nga lobelo linanikami-e a-vi ira nidhowenganave mdhiveliwana maningi Nlungwi-u?

⁸ Lobela wa Yohova kumela vathi varima hora dothene, unooda nikami-a ira nimdhiveliwengana maningi. (Sal. 25:4, 5) Naira ee-no, liye unowakula malobelwi-u. (1 Ju. 3:21, 22) Rongola unango wau Asia dhinalee Khanh, aongile ira: “Voroma ndanomdhiveliwana Yohova namwasa wa vyevyo vyaidhi miyo vyokuza liye, mbwenye ndatooroma mdiveliwana maningi vyaoni miyo moda mwawakulela liye malobelwanga. Vyevi vyatoondilimbi-a ira ndiirenga vyongo vyevyo vinomsangalali-a.”b

MUDHIVELIWENGANA MANINGI ATU ENANGO

9. N’nga Timoteo athonyi-edhile a-vi ira anodhowa vasogolo vamwasa odhiveliwana abali naarongola?

⁹ Vangavirile vyawa Kumela varomile liye kala Kristau, Paulo atoogumanana zombwe unango dhinalee Timoteo. Zombula anomdhiveliwana maningi Yohova thitho atu enango. Paulo atoawandela Makristau au Filipi ira: “Kandina mutu unango wavarimani ninga liye, wenuo unofuna samalela vyanyo moona rima.” (Afil. 2:20) Valembali, liye kaaonga vyokuza mwemo Timoteo mwairela liye vyongo mwamasaka-edho venango dodolisolee loonga vamwinjini, mbwenye pyooneelatu ira Paulo anoodabwa na mwemo Timoteo mwadiveliwana liye abali naarongola. Mo-okaikela, abali naarongola tanoodedi-edhela mwaifunelo maulendo a Timoteo owaredhi-a mipingwiwa.—1 Akor. 4:17.

10. N’nga Anna naman’nee tathonyi-edhile a-vi ira tanoodhiveliwana abali naarongoliwa?

¹⁰ I-yo ninofunafuna thitho ndhila dhokami-edhela abali naarongoli-u. (Aeb. 13:16) Kathuulelani vyevyo vyam’mwireele Anna wenuo um’romonle i-yo muyofunjedha ivirile. Vasogolo va lipevo n’nango nlukulu, liye na man’nee tatoodhowa maona banja n’nango la Mboni tafwaidhe ira soi ya nyumbiwa yali inganongeile. Namwasa wa lipevolo, vyowara viwa vyothene vyatoomala pingidheya. Anna aongile ira: “Ndatootukula vyowara viwavyo nodhowa mavifula, thitho naava-idhe ningamadhi dhiwongomari nodhivinda pama. Wa-iyo, vyevi kaali mwasa nlukulu, mbwenye vyatonikami-a ira nivwelanenga maningi naaliwa fiyedha va-eni.” Dhiveliwana abali naarongolao, vyatom’mwiri-a ira Anna na man’nee taakami-e.—1 Ju. 3:17, 18.

11. (a) N’nga vinoira i-yo vothonyi-edha atu enango udhivela vinowakuza a-vi? (b) Movwelana na lemba la Sanganiko 19:17, n’nga Yohova unoiran’ni nathonyi-edhanga atu enango udhivela?

¹¹ Nathonyi-edhangana udhivela thitho riyela rima atu enango, hora dhinjinji aliwa anoona vyevyo vinoira i-yo vomsazi-edha Yohova vamwasa wa mwemo munothuulela liye thitho irela vyongo. thitho anooda simba maningi vyevyo vinaire i-yo vothonyi-edha riya rima kwaranya mwemo munothuulela i-yo. Khanh wenuo um’mongile i-yo mundima ivirile, anoosangalala athuulela mwemo atu enango mwam’kami-edhele aliwa. Liye aongile ira: “Ndinosimba maningi arongola othene enao tanditukula tadhowanga malaleela. Tadha dhanditukula, tanoondiitanela yodya thitho dhandi-iya. Vevo pazindiyele miyo ira tanoofuneela kaana thindhi ira tairengana vyevi thitho tanooirana vyevi namwasa waudhivela.” Pyaimbarimbari ira kai othene enao anosimba vyaairele i-yo. Voonga vyaatu enao tamkami-a, Khanh aongile ira: “Ndanoofunafuna ira ndaaweli-edhe vyongo vyapama vyevyo vyandiirela aliwa, mbwenye kandinoidhiwa unokala aliwa. Yohova ngunoidhiwa thitho ndinom’vepa ira aaraeli-e.” Khanh atoonga vyaimbarimbari. Yohova unoidhiwa masiki vikale vyongo ving’ono ving’ono vyevyo viirile i-yo voomela rima atu enango. Liye unoona ira vyevi ndi sembe yapereso yavadhulu thitho mangawa anofuna liye dhaweli-edha.—Muleri Sanganiko 19:17.

12. N’nga abali tanathonyi-edhe a-vi ira tanodhiveliwana atu enango pingoni? (Muone thitho iruthiruthi.)

¹² Akala muli bali, n’nga munathonyi-edhe a-vi ira munodhiveliwana atu enango thitho dhivelela ira mwaakami-e? Bali unango wazombwe dhinalee Jordan atom’fuka ndimuwa unango ira amkami-e idhiwa mwemo munairele liye ira akami-enga atu enango pingoni. Ndimuuo atomsimba maningi namwasa wa vyevyo vyaoda liye irana thitho atomva-a malangi-o okuza vyevyo vinaire liye ira adhowenganave irana vyevi. Liye atom’mwandela Jordan ira, afiyenga mombaranya va Nyumbani ya Umwene naifunelo yoi amwenyulenga atu, awakulenga vamigumanoni, hora dhothene alaleelenga vambo-i na gululee la urumiwi thitho sakasaka ndhila dhokami-edha atu enango. Jordan angaromile a-rela malangi-oala kaiira funjedha madodoliso achineneeva, mbwenye atoroma dhiveliwana maningi abali naarongolee. Liye atofunjedha makundo oi kaiira bali akala rumiwi okami-a unoroma kami-a atu enango, mbwenye unodhowanave kami-anga atu enango.—1 Timo. 3:8-10, 13.

13. N’nga udhivela wamkami-idhe a-vi bali unango dhinalee Christian ira arome okoka tumikela ninga ndimuwa wavapingoni?

¹³ N’nga a-vi akala ndulimu mwatootumikelavo ninga ndimuwa venango rumiwi okami-a? Yohova unothuulela vyevyo vyaira nyo vomtumikela thitho mwanoira vyevyo namwasa waudhivela. (1 Akor. 15:58) Liye unoona udhivela wenuo unodhowanave nyo thonyi-edha atu enango. Bali unango dhinalee Christian atoosukwala namwasa o-ii-iwa tumikela ninga ndimuwa wavapingoni. Mbwenye, liye atoonga ira: “Ndatoosakula ira ndiirenga vyothene vinaode miyo viirana vomtumikela Yohova namwasa omdhiveliwana akala ndili vaizo venango kabe.” Vangavirile hora, liye ato-eliwa okoka kala ndimuwa wavapingoni. Christian atoorumela ira: “Ndanokaikela ira ndirumele okoka tumikela. Mbwenye ndatoona ira akala Yohova mwatangarangadhee utondirumeli-a ira ndirome okoka tumikela ninga ndimuwa vapingoni, ndinofwanela tumikela namwasa omdhiveliwana thitho dhiveliwana abali naarongolanga.”

14. N’nga munofunjedhavon’ni va vyaongile rongola unango wau Georgia?

¹⁴ Arumiwi a Yohova anothonyi-edha ira anodhiveliwana atu enango. (Mat. 22:37-39) Mofwanafwani-a, rongola unango wau Georgia dhinalee Elena, aongile ira: “Voroma ndakalelave laleela namwasa omdhiveliwana Yohova. Mbwenye vevo varoma miyo mdhiveliwana Babanga wadhulu, ndatoroma dhiveliwana maningi atu enango. Ndanodhilimbi-edha thuulela nyarwa dhagumanana aliwa thitho myasa yeniyo yaafiye varimani. Vyairana miyo maningi vyevi, paevo vafunechecha miyo akami-a na rimanga othene.”—Aroma 10:13-15.

MARAELI-O ANAFWANYE I-YO NAMWASA ODHIVELIWANA ATU ENANGO

15-16. Movwelana na viruthiruthivi, n’nga ndi maraeli-o avi anafwanye i-yo namwasa odhiveliwana atu enango?

¹⁵ Nadhiveliwangana abali naarongoli-u, ninokami-a atu enango. Sau wa COVID-19 ungaromile, bali unango dhinalee Paolo na i-yanee tatokami-a arongola anjinji oulula idhiwa mwemo muna-indi-edhelenga aliwa basa telefoniwa volaleela. Rongola unango wenuo voromavene vyanoorucha maningi indi-edha basa telefonee, atoidhiwa mwemo munairele liye vyevi. Namwasa wa vyevi, liye atooda itanela abalee Ithuuleloni. Abalee 60 tatoiranao vambo-i Ithuulelo ya wukwa wa Yesu dhela va vidiyo konferensiya. Vyairile paolo na i-yanee, vyatomkami-a maningi rongolula na abalee. Vangavirile hora, rongoluo atomlembela Paolo karta ira: “Nosimba maningi namwasa onifunji-a i-yo uli oulula moda una-indi-edhe i-yo basa telefoni volaleela. Kandinodha diwala mwemo Yohova munothonyi-edha liye ira unonithuulela thitho thindhi linyu.”

¹⁶ Vyoireya ninga vyevi vyatomfunji-a Paolo likundo lofuneya maningi. Liye atothuuchiwa ira udhivela ngofuneya maningi kwaranya idhiwa vyongo venango dodoliso li-u lobaliwana. Liye aongile ira: “Voroma ndali namaing’anela isa. Va-eni nditozindiyela ira masiki namalaleela adiwale mwasa waongile miyo, unave dhowana thuulelanga vyevyo vyaira miyo voakami-a.”

17. N’nga mbaani thitho unofuna ganyali nathonyi-edhanga udhivela?

¹⁷ Nathonyi-edhanga atu enango udhivela, i-yo thitho ninoganyali mundhila yeniyo ya-athuulela i-yo. Jonathan, wenuo unokala wu Nova Zelandia, atoona ira vyevi pyaimbarimbari. Sabudu n’nango nathana wuka-anga, liye atoona painiya unango alaleelanga ndhila. Ee-no atothuulela vyodhowa malaleela vambo-i na painiuo nathana sumana nlilothene. Vahora yeniyo kaazindiyele ira vyaira liye moriya rimavyo, vinodha mkami-a. Jonathan atoorumela ira: “Vahora yeniyo kandadhiveliwana laleela. Mbwenye ndingaoni mwemo painiuo mwafunji-edha liye thitho ira vyongo vyanom’mwendela pama muurumiwini, ndatoroma dhiveliwana maningi basa yolaleela. Liye atokala fwanga wapama wenuo andikami-a ira ndikale olimba mwauzimu, ndidhiveliwengana laleela thitho ira ndikale vauxamwali wapama na Yohova.”

18. N’nga Yohova unofuna ira niirengan’ni?

¹⁸ Yohova unofuna ira nimdhiveliwengana maningi thitho dhiveliwena atu enango. Ninga mufunjedhile i-yo, ninooda mdhiveliwana maningi Yohova akala ninoleri nothuulela madhwee nolobelanga wa liye hora dothene. Ninooda adhiveliwana maningi abali naarongoli-u voakami-a mundhila dho-iyana-iyana. Vevo udhiveli-u vanodhowanave aliwa ulukula, ninodha kala vauxamwali wapama na Yohova na banja li-u lauzimu. Thitho ninodha sangalala na vyevi modhowa nodhowa!