N’nga ninaire a-vi ira nidhivelanenga maningi?

1-2. (a) Mwasiwa ngwan’ni rumiwi Paulo atoonga ira udhivela ndi khalelo “nlukulu”? (b) N’nga ninothapanyani vyofuka viivi?

VEVO rumiwi Paulo vaonga liye vya iroromelo, idedi-edho na udhivela, atoomari-a na madhu oonga ira “ilukulu va vyothene vyevi ndi udhivela.” (1 Akor. 13:13) Mwasiwa ngwan’ni atoonga e-no? Namwasa oi sogolou kaninodha funeela roromela vyolanyedha vya Nlungu vyokuza ilambo yavathi ipya, venango kaana idedi-edho yoi vyolanyedhavyo vinodha kwakwaneli-edhiwa namwasa oi vinodhakala ira vitomala kwakwaneli-edhiwa wale. Mbwenye hora dhothene ninodha funeela m’dhiveliwangana Yohova thitho atu. Udhivela unongodhowanave ulukula modhowa nodhowa.

² Voi ninodha funeela udhivela ninga wen’na, yoroma dhoweni nitapanyeni vyofuka viraruvi. Yoroma, mwasiwa ngwan’ni ninofwanela dhivelangana? Yanambili, n’nga ninathonyi-edhe a-vi ira ninodhivelana? Yaneraru, N’nga ninaire a-vi ira nidhiveliwengana maningi afwi-u?

MWASIWA NGWAN’NI NINOFWANELA DHIVELANGANA?

3. N’nga ndi myasa ivi inoniiri-a ira nidhivelanenga?

³ Mwasiwa ngwan’ni pyofuneya maningi dhivelangana? Mwasa m’mbo-i ngoi udhivela ndiizindiyelo ya Makristau aimbarimbari. Yesu atoawandela anamafunjedhee ira: “Othene anodha idhiwa ira muli anamafunjedhanga akala munodhivelana.” (Ju. 13:35) Thitho udhivela unokami-a ira nidhivelanenga. Paulo atoonga ira “udhivela, unovwelani-a atu mwakopolo maningi kwaranya yongo iliyothene.” (Akol. 3:14) Mbwenye vatokala mwasa unango ulukulu maningi unoniiri-a ira nidhivelanenga. Rumiwi Juwau atoawandela Makristau afwee ira: “Mutu unodhiveliwana Nlungu adhiveliwengana thitho abalee.” (1 Ju. 4:21) Nadhivelangana ninothonyi-edha ira ninom’dhiveliwana Nlungu.

4-5. Muonge ifwanafwani-o yothonyi-edha ira dhiveliwana afwinyu unovwelana nom’dhiveliwana Nlungu.

⁴ N’nga m’dhiveliwana Nlungu unovwelana a-vi nodhiveliwana abali naarongoli-u? Ira nivwecheche, kathuulelani vwelana ulivo vari va rimi-u na vikundu vinango vya tutu li-u. Ifirimero unooda idhiwa akala rimi-u uli pama vo-inda wonwi-u ira aone moda unovuma i-yo. N’nga likundo leli linovwelana a-vi na udhivela?

⁵ Molandana na ifirmeiro wenuo unoidhiwa vyokuza rimi-u voona moda unovuma i-yo ani-inda wono, i-yo thitho ninooda idhiwa akala ninom’dhiveliwana maningi Nlungu, voona mwemo munodhiveliwana i-yo afwi-u. Akala nitoona ira udhivela unothonyi-edha i-yo Makristau afwi-u utoroma yeva, yei chiizindiyelo yoi udhiveli-u na Nlungu utoroma thitho yeva. Mbwenye akala hora dhothene ninoathonyi-edha udhivela, yei chiizindiyelo yoi ninom’dhiveliwana maningi Nlungu.

6. Mwasiwa ngwan’ni ninooda onga ira mutu a-iyachi dhiveliwana abali naarongola inokhala yorucha ilukulu? (1 Ju. 4:7-9, 11)

⁶ Akala kaninodhiveliwana abali naarongoli-u, pyoi vatokala yorucha ilukulu. Mwasiwa ngwan’ni ninoonga ee-no? Namwasa oi vinooda thonyi-edha ira uxamwali-u naabali-u kuli phama. Rumiwi Juwau atoonga likundo leli voonga ira: “Wenuo a-anom’dhiveliwana balee wenuo unom’mona liye, kanaode m’dhiveliwana Nlungu wenuo a-anam’monevo liye.” (1 Ju. 4:20) N’nga ninofunjedhavon’ni veva? Ninofunjedhavo ira Yohova unosangalala na i-yo akala “ninodhivelana unango nafwee.”—Muleri 1 Juwau 4:7-9, 11.

N’NGA NINATHONYI-EDHE A-VI IRA NINODHIVELANA?

7-8. N’nga ninathonyi-edhe mundhila dhiivi ira ninodhivelana unango nafwee?

⁷ Madhu a Nlungu anoniwandela moweli-edha weli-edha ira “nidhivelanenga.” (Ju. 15:12, 17; Aroma 13:8; 1 Atez. 4:9; 1 Pe. 1:22; 1 Ju. 4:11) Mbwenye udhivela unokala rimani thitho kavali mutu uliwethene unaode ona vili rimani mwi-u. N’nga ninathonyi-edhe a-vi ira ninodhiveliwana atu enango? Vyoonga na vyoira vi-u ndi vinofuna thonyi-edha ira ninodhiveliwana atu enango.

⁸ Vatokala ndhila dho-iyana i-yana dhedho dhinathonyi-edhele i-yo ira ninodhiveliwana abali naarongoli-u. Mofwanafwani-a, malemba anonilimbi-a ira: “Muwandelengana vyongo vyaimbarimbari.” (Zakar. 8:16) “Mulokotenga rendele vari vinyu.” (Marku 9:50) “Vamwasa othonyi-edhana lemezo, muromenga ngu nyo.” (Aroma 12:10) “Muwachelengana phama.” (Aroma 15:7) “Mudhowenave lolelana . . . nolevelelana unango nafwee.” (Akol. 3:13) Mudhowenave tukulelana vyongo vyonyemela.” (Agal. 6:2) “Dhowananive limbi-ana.” (1 Atez. 4:18) “Mudhowenganave didili-ana.” (1 Atez. 5:11) “Mulobelelengana.”—Yak. 5:16.

9. Mwasiwa ngwan’ni ninooda onga ira didili-a atu enango ndi ndhila yofuneya maningi yothonyi-edhela udhivela? (Muone thitho iruthiruthi.)

⁹ Dhoweni nioneni ndhila imbo-i iongiwile mundima ivirilila, mwemo munathonyi-edhe i-yo ira ninodhiveliwana atu enango. Ninotapanya vyevyo vyaongile rumiwi Paulo ira: “Mudhowenave didili-ana.” Mwasiwa ngwan’ni didili-a atu enango unothonyi-edha ira nitokaana udhivela? Bukhu n’nango loonga madhu a Bibilyani laongile ira madhu oi “didili-ana” enao rumiwi Paulo a-indi-edhele liye basa anothapulela “kala vaduzi na mutu unogumanana nyarwa ilukulu ira mum’limbi-e.” Ee-no nam’didili-anga Kristau fwi-u wenuo ugumanena nyarwa, ninom’kami-a ira avilele nodhowanave wenda vandhila yodhowa mawachela ingumi yo-omala. Hora iliyothene inom’didili-a i-yo bali venango rongola, ninothonyi-edha ira ninowadhiveliwana Makristau afwi-u.—2 Akor. 7:6, 7, 13.

10. N’nga tangaranga dhinovwelana a-vi nodidili-a atu enango?

¹⁰ Didili-a atu enango unovwelana na tangaranga. Mwasiwa ngwan’ni ninoonga ee-no? Namwasa oi rima wa tangaranga ngwenuo unom’limbi-a mutu ira adidili-enga atu enango noakami-a. Ee-no, yoroma kukaana tangaranga nodidili-a atu enango. Paulo atovwelani-a tangaranga dha Nlungu nodidili-a atu enango. Rumiwi Paulo atoonga ira Yohova ngu “Baba wa tangaranga dhilukulu thitho Nlungu wenuo unonididili-a va nyarwa iliyothene.” (2 Akor. 1:3) Paulo atoo-indi-edha basa madhu oi “watangaranga dhilukulu,” voonga mwemo mutu mwinango munovwela liye voonga vyaatu enango. Ee-no “Nlungu unoitaniwa Baba venango ira mwinyaa wa tangaranga dhilukulu, namwasa oi tangaradho dhikumenle wa liye.” Tangarangadho dhinom’mwiri-a ira anididili-enga “vavyowesedha vi-u vyothene.” (2 Akor. 1:4) Molandana na ma-inje enao anokami-a atu takaana tona, Yohova unodidili-a atu anogumanana nyarwa. N’nga ninam’sazi-edhe a-vi Yohova vodidili-a atu enango thitho thonyi-edha tangaranga? Ninooda irana vyevi vodhilimbi-edha kaana makalelo anaode nikami-a ira niodenga didili-a atu enango. Dhoweni nioneni enango mwamakalelo enala.

11. Movwelana na lemba la Akolose 3:12 na 1 Pedru 3:8, n’nga ndi makhalelo avi anofwanela i-yo akaana enao ananikami-e ira nidhivelanenga thitho didili-a atu enango?

¹¹ N’nga chini inanikami-e ira “nikaena udhivela unanikami-e ira nididili-engana” dambo na dambo? Ninofwanela kaana makalelo ninga vwela atu enango tangaranga, dhiveliwana abali thitho ariyela rima. (Muleri Akolose 3:12; 1 Pedru 3:8.) N’nga makalelo enala ananikami-e a-vi? Nakaana makalelo ninga aaongile i-yo ala, kaninairele munango mbwenye didili-a atu enango baa-i. Yesu aongile ira: “Ninoonga vidhanle rimani mwi-u. Mutu waphama unoonga vyongo vyaphama namwasa oi rimanimwee mudhanle vyongo vyaphama thitho mutu othakala unoonga vyongo vyothakala namwasa oi rimanimwee mudhanle vyongo vyothakala.” (Mat. 12:34, 35) Didili-a abali naarongoli-u anogumanana nyarwa, ndi ndhila imbo-i yothonyi-edha ira ninoadhiveliwana.

N’NGA NINAIRE A-VI IRA NIDHIVELANENGA MANINGI?

12. (a) Mwasiwa ngwan’ni ninofwanela ira polepole? (b) N’nga chofuka iivi inofuna i-yo tapanyani va-eni?

¹² Ninofwanela “dhowanave dhivelangana unango nafwee.” (1 Ju. 4:7) Mbwenye ninofwanela thuulelanga ira Yohova atooniwenjeli-a ira “udhivela waatu anjinji unodha towa.” (Mat. 24:12) Mbwenye Yesu kaathapulela ira udhivela wa anamafunjedhee anjinji unodha towa. Angalive ee-no, ninofwanela ira polepole ira na-atukulele rima o-okaana udhivela, udhanle maningi muilamboi. Vothuulela likundo leli, dhoweni nitapanyeni yofuka yofuneya maningila. N’nga vatokala ndhila yoidhiwela akala ninodhiveliwana maningi abali-u?

13. N’nga ninaidhiwe a-vi ira ninodhiveliwana maningi abali naarongoli-u?

¹³ Ndhila imbo-i yoidhiwela ira ninodhiveliwana maningi abali-u, kuona vinoira i-yo vaingumi yi-u. (2 Akor. 8:8) Rumiwi Pedru atoonga imbo-i mwa vyongo vyevyo. Liye aongile ira: “Kwaraya vyothene, mudhivelanenga namwasa oi udhivela unokunela vyodawa vinjinji.” (1 Pe. 4:8) Ee-no, vinoira i-yo nadawi-a vyongo, vinooni-a ira ninoadhiveliwana abali-u venango kabe.

14. Movwelana na lemba la 1 Pedru 4:8, n’nga ninofwanela khaana udhivela uvi? Muoonge ifwanafwani-o.

¹⁴ Ikundu yoroma ya versu 8, inoonga tundu wa udhivela unofwanela i-yo ukaana. Inoonga ira, “nidhivelanengana maningi.” Madhu enao Pedru a-indi-edhele liye basa ira, “mudhivelanenga maningi,” anothapulela “thapula.” Ikundu yanambili ya versuli, inoonga vyo-arelavo vya udhivela ninga wen’na. linoonga ira unovu-elela vyodawa vinjinji vyaabali-u. Vili ninga nino-inda udhivela na mandha menli, ninga muno-indela i-yo nguwo noithapula ira ikunele, a-kala vyodawa vyoyeva mbwenye “vyodawa vinjinji.” Madhu oonga ira kunela venango vu-elela anothapulela levelela. Molandana na nguwo inokunela limburo lothakala, udhivela unokunela vyevyo abali naarongoli-u vinodawi-a aliwa.

15. N’nga dhiveliwana maningi abali naarongoli-u, unonikhami-a iranan’ni? (Akolose 3:13)

¹⁵ Ninofwanela adhiveliwangana maningi abali-u voi ninooda alevelela vyodawa viwa angalive ira irana vyevyo pyorucha. (Muleri Akolose 3:13.) Nalevelelanga atu enango ninooni-a ira ninoadhiveliwana maningi thitho ninom’sangalali-a Yohova. N’nga chini inanikami-e ira na-abalenga vyongo ving’ono ving’ono vyevyo vinidawele aliwa venango makalelo enao a-anisangalali-idhe?

16-17. N’nga chini inanikhami-e ira na-abalenga vyongo ving’ono vinodawi-a abali naarongoli-u? Muonge ifwanafwani-o. (Muone thitho iruthiruthi.)

¹⁶ Muthuulelenga makalelo aphama ana abali naarongola, a-kala vyongo vinodawi-a aliwa. Nifwanafwani-e ira muli vambo-i naabali naarongola. Munaawaredha mosangalala thitho komoniwee mutokoma mafoto. Mutokoma mafoto menli venango mafoto mararu ovela ira enango anodha ta-akume phama. Ee-no mutokaana mafoto mararu. Venango foto inango baluo kaatheile phama. Munoifudha namwasa oi mutokaana mafoto menli enao takumile phama.

¹⁷ Mafotwala ali ninga vyongo vyo-iyana-iyana vyevyo vinothuulela i-yo vyokuza atu enango. Vatokala vyongo vinjinji vyaphama vinothuulela i-yo vyevyo vyairile i-yo na abali naarongoli-u. N’nga a-vi akala bali venango rongola utoonga venango irana vyongo mo-othuulela atu enango? N’nga ninofwanela iran’ni? Ndi phama fudhamo mathuuleloni mwi-u ninga mwemo mwairile i-yo na mafotwale. (Sang. 19:11; Aef. 4:32) Ninooda kumi-amo vyevi mathuuleloni mwi-u namwasa oi vatokala vyongo vyapama vyokuza abali-uao vyevyo vinavithuulelenga i-yo. Vyongo vyapamavyo, piyevyo vinofwanela i-yo vilokotanga mathuuleloni mwi-u.

MWASIWA NGWAN’NI NINOFWANELA DHIVELANGANA MANINGI MALAMBOANO?

18. N’nga muyofunjedha yei, nitapanyileni likundo nlukulu liivi lokhuza udhivela?

¹⁸ Mwasiwa ngwan’ni ninofwanela dhivelangana maningi malamboano? Nitoona ira nadhivelangana maningi naabali naarongoli-u, ninothonyi-edha ira ninom’dhiveliwana Yohova. N’nga ninathonyi-edhe a-vi ira ninodhiveliwana abali naarongoli-u? Ndhila imbo-i yoirela vyevyo, “kulimbi-ana venango didili-ana.” Tangaranga dhinonilimbi-a ira nidhowenganave didili-ana. N’nga ninaire a-vi ira nidhiveliwengana maningi abali na arongoli-u? Ninooda irana vyevyo vodhilimbi-edhanga alevelela abali naarongoli-u vinodawi-a aliwa.

19. Mwasiwa ngwan’ni pyofuneya ira nidhivelanenga maningi malamboano?

¹⁹ Mwasiwa ngwan’ni pyofuneya ira nidhivelanenga maningi malamboano? Pedru atoovelela mwasee voonga ira: “Khomoni wa vyongo vyothene utowandamela. E-no, . . . mudhivelanenga maningi.” (1 Pe. 4:7, 8) N’nga chini inofuna ireya khomoni wa vyongo vyothene wawandamelanga? Vaonga liye na anama-arelee, Yesu aongile ira: “Atu amaziza othene anodha idana na nyo namwasa wa dhina langa.” (Mat. 24:9) Ira niode vilela, ninofwanela vwelananga maningi. Naira e-no, Satana khanaode ni-iyani-a namwasa oi nitokhaana udhivela wenuo “unovwelani-a atu mwakhopolo maningi kwaranya yongo iliyothene.”—Akol. 3:14; Afil. 2:1, 2.