Yohova “Unoili-a atu othweya rima”

1. N’nga Yohova unodhivwa a-vi aona vyongo vinoireela arumiwee?

N’NGA Yohova unoona vyongo vinoireela arumiwee vailamboi? Yohova unoidhiwa nasangalalanga venango nasukwala. (Sal. 37:18) Yohova unosangalala aona ira ninovilimbi-edha mwemo munaodele i-yo ira nim’labelenga masiki vahora inovikumbanyedha i-yo. Wenjedhela vevo, Yohova unokala okozeya nikami-a thitho nilimbi-a.

2. N’nga Yohova unolimbi-a a-vi atu othweya rima, n’nga ninaire a-vi ira niganyalinga na vyongo vinoira liye vonisamalela?

² Lemba la Salimo 147:3 linoonga ira Yohova ‘unomanga vilonda,’ vyaatu othweya rima. Veva lembali linoonga mwemo Yohova munosamalela liye mwaudhivela atu anovikumbanyedha. N’nga ninaire a-vi ira niganyalinga na mwemo Yohova munoirela liye vyongo vonisamalela? Kathuulelani ifwanafwani-o ila. Infirimero wadodoliso unooda ira vyongo vinjinji vokami-a mutu upeile ira aile. Mbwenye ira mutuo aile, unofwanela a-rela malangi-o ainfirimeruo. Muyofunjedha yei, ninoona vyongo vyevyo Yohova vinowandela liye atu anovikumbanyedha thitho vyongo vinaire aliwa ira ta-arelenga malangi-oe audhivela.

YOHOVA UNONISIKIMIZELA IRA NILI OFUNEYA

3. Mwasiwa ngwan’ni atu enango anodhiona niga o-ofuneya maningi?

³ Ninokala muilambo yoi atwee katina udhivela thitho pyovi-a tangaranga ira vyevi vinoiri-a atu anjinji ira tadhionenga ninga o-ofuneya. Rongola mwinango ndhinalee Helena aongile ira: “Ndiulukulele mubanja lo-okaana udhivela. Babanga ali wauwalanga thitho dambo nlilothene andiongechana ira kandina basa.” Pyooneelatu ira molandana na Helen, nyo thitho mukadhi muireliwanga vyongo vyauwalanga, nyoziwa venango iri-iwa ira mudhionenga ira kavali mutu unoudhiveliwanani. Akala ndi ee-no, vyevi vinooda uiri-ani thitho rucheyenga roromela ira vatokala mutu unoudhiveliwanani.

4. Movwelana na lemba la Salimo 34:18, n’nga Yohova unonisikimizelan’ni?

⁴ Masiki atu enango tauwirelengani vyongo vyo-olongomana, kamukaikelenga ira Yohova unoudhiveliwanani thitho unouonani ira muli apereso yavadhulu. Yohova “uli vakwikwi naatu othweya rima.” (Muleri Salimo 34:18.) Akala “munodhivwela tangaranga rimani mwinyu,” muthuulelenga ira Yohova atoona vyongo vyapama rimani mwinyu thitho atoouitanelani wa liye. (Ju. 6:44) Hora dhothene Yohova ngokozeya ukami-ani namwasa oi unoudhiveliwanani maningi.

5. N’nga ninofunjedhavon’ni wa Yesu va vyongo vyairela liye atu enao aoniwa ninga o-ofuneya?

⁵ Ifwanafwani-o ya Yesu, inonikami-a idhiwa moda munodhivwela Yohova. Angali vailambo yavathila, Yesu anooriyela atu rima thitho avwela tangaranga atu enao taoneya ninga mbo-ofuneya. (Mat. 9:9-12) Mwaifwanafwani-o, m’ma mwinango abulela marenda malukulu anga-indile yowarayee vom’roromela ira unoila, Yesu atoom’limbi-a nom’simba namwasa wa iroromeloyee. (Mrk. 5:25-34) Yesu atootukulela makalelo a Babee. (Ju. 14:9) Ee-no kamukaikelenga ira Yohova unouonani ira muli apereso yavadhulu. Thitho unoona makalelwinyu apama thangani-avo iroromelo, na udhivela unanyo wa liye.

6. N’nga mutu unaire a-vi akala unolimbanana mathuulelo odhionanga ninga o-ofuneya?

⁶ N’nga munaire a-vi akala munodhowanave dhionanga ninga o-ofuneya? Muleringa thitho thuulela malemba enao anothonyi-edha ira Yohova unouonani ira muli apereso yavadhulu.b (Sal. 94:19) Akala mutoimwanana kwakwaneli-edha ifunelo inango venango sukwala namwasa oi kamunoira vyongo vinjinji ninga atu enango, kamudhitongenga mokwaranyi-a madile. Yohova kanodedi-edhela ira muirenga vyongo vya-anaodenyo. (Sal. 103:13, 14) Akala mwatooireliwa vyongo vyothakala ndulimu, kamudhiombenga landu ira ngunyo airi-idhe. Kamunofwanela ireliwa vyongo ninga vyevyo! Muthuulelenga ira Yohova, unodha tonga atu anoira vyongo vyothakala, a-kala atu anoireliwa vyongo vyothakala. (1 Pe. 3:12) Sandra, wenuo aireliwa vyauwalanga angali mwana, aongile ira, “Hora dhothene ndinom’vepa Yohova ira andikami-e ira ndidhionenga mofwanelela ninga mwemo munondionela liye.”

7. N’nga vahora inom’labela i-yo Yohova, nina-indi-edhe a-vi basa vyongo vyaniireele vaingumii-u?

⁷ Kamukaikelenga ira Yohova unooda u-indi-edhani basa vokami-a atu enango. Yohova utouva-ani ngari yolaba vambo-i na liye basa yolaleela. (1 Ak. 3:9) Vyongo vyaireile vaingumi inyu, vinooda ukami-ani ira muthonyi-edhenga tangaranga waatu enango thitho vwechecha mwemo munodhivwela aliwa. Ee-no munooda ira vyongo vinjinji vowakami-a. Helen um’mongile i-yo mu ndima dhivirile, atookami-iwa va-eeni naliyene thitho unooda kami-a atu enango. Liye aongile ira: “Yohova utoiri-a ira mutu adhiona ninga ‘o-okaana basa’ adhionenga ira unodhiveliwiwa thitho unooda kami-a atu enango.” Helen unosangalalana upainiya okaatheya.

YOHOVA UNOFUNA NIRUMELENGA IRA UNONILEVELELA

8. N’nga Yohova unonisikimizelan’ni valemba la Esaya 1:18?

⁸ Arumiwi enango a Yohova tanoodhiombave landu namwasa wa vyongo vyadawi-idhe aliwa ndulimu, vyali aliwa ta-ana badiziwe venango vyamadhi aliwa badiziwa. Mbwenye vinokala pama roromelanga ira Yohova atoovelela kuto namwasa onidhiveliwana maningi. Ee-no pyooneelatu ira Yohova unofuna ira nisimbenga yotuvayo. Yohova unonisikimizela ira “anikami-a ira nikale vauxamwali wapama na liye,”c kanoniomba landu va vyongo vyadawi-idhe i-yo ndulimu. (Muleri Esaya 1:18.) Ninosimba ira Yohova kanothuulela vyongo vyadawi-idhe i-yo ndulimu. Vahora imbo-ive yeniyo unothuulela vyongo vyapama vinoira i-yo.—Sal. 103:9, 12; Aeb. 6:10.

9. Mwasiwa ngwan’ni ninofwanela dhilimbi-edha ira nithuulelenga vyongo vinoira i-yo va-eeni na sogolou, a-kala vyongo vyairile i-yo ndulimu?

⁹ Akala munorucheya na mathuulelo odaweya namwasa wa vyongo vyadawi-idhe nyo ndulimu, mudhilimbi-edhe ira muthuulelenga vyongo vinoira nyo va-eeni thitho vyongo vinofuna nyo dhaira sogolou, malo mothuulelanga vyongo vyadawi-idhe nyo ndulimu. Ifwanafwani-o vamwasula ndi rumiwi Paulo. Liye anoodhivwela tangaranga ira anooni-a nyarwa maningi Makristau, mbwenye atooidhiwa ira Yohova atom’levelela. (1 Ti. 1:12-15) N’nga Paulo athuulela maningi vyongo vyadawi-idhe liye ndulimu? Mo-okaikela Paulo kaairilena vyevyo ninga mwemo mwa-airele liye vothuulela vyongo vyairile liye ira akale Farisi olemezeya. Malomwee, Paulo atoom’labela Nlungu mwathindhi voing’ana vyongo vyasogolo. (Afl. 3:4-8, 13-15) Molandana na Paulo, kavali yongo inaire nyo ira muchinje vyongo vyaireile ndulimu. Mbwenye munooda m’lemeza Yohova movwelana na mwemo vyongo vili aliwa vaingumi inyu va-eeni, nodedi-edhelanga mwathindi vyongo viulanyedhileni Yohova sogolou.

10. N’nga ninaire a-vi akala vyongo vyairile i-yo ndulimu vyatoosukwali-a atu enango?

¹⁰ Venango munosukwala na vyongo vyairile nyo ndulimu vyevyo vyasukwali-idhe atu enango. N’nga chini inaukami-eni? Muirenga vyongo vyothene vinaode nyo thitho pepesa kumela vathi va rima. (2 Ak. 7:11) Mum’vepenga Yohova ira akami-e atu othene akuzeile na vyongo vyairile nyo. Yohova unodha ukami-ani thitho kami-a atu aasukwali-idhe nyo ira tavilele nokala okoka varendele naaliwa.

11. N’nga ninofunjedhevon’ni va ifwanafwani-o ya namaongela Yona? (Muone thitho yavakapani.)

¹¹ Mufunjedhengavo yongo va vyongo vyadawi-idhe nyo thitho murumelenga ira Yohova au-indi-edheni basa ninga mwemo munofunela liye. Kathuulelani ifwanafwani-o ya namaongela Yona. Malo modhowa Ninive weo wam’rumile Nlungu, Yona adhowile unango. Yohova atoom’sumulula thitho Yona atoofunjedhavo yongo va vyongo vyadawi-idhe liye. (Yon. 1:1-4, 15-17; 2:7-10) Yohova kaa-iidhe m’indi-edha basa Yona. Angava-iwile okoka basa yodhowa Ninive, hora yeniyene Yona atoorumela. Yona kaarumenle ira dhivwela tangaranga va vyongo vyadawi-idhe liye, um’mwimwanani-e irana vyongo vyam’mwandenle Nlungu.—Yon. 3:1-3.

YOHOVA UNO-INDI-EDHA BASA ZIMWEE OCHENA VONIDIDILI-A

12. N’nga Yohova unonikami-a a-vi kaana rendele nadodomeya mathuulelo? (Afilipi 4:6, 7)

¹² Yohova uno-indi-edha basa zimwee ochena, vyongo vyothakala vyaniireela. Kathuulelani vyamuireele Ron na Caro. pyovwi-a tangaranga ira mwaniwa wa lombwana atoodhipha. Aliwa taongile ira: “Nikadhi nigumanangana vyowesedha vilukulu thitho vyali vyorucha maningi. Hora dhinjinji naimwanangana gona nama-iyu, nanoolobelecha wa Yohova. Naira ee-no nanookaana rendele uongiwile va lemba la Afilipi 4:6, 7.” (Muleri.) Akala nyo thitho munolimbanana vyowesedha viiri-idhe ira muthweye rima, mum’mwandelenga Yohova mwemo munodhivwela nyo. Muirengana vyevi hora dhothene thitho wahora yolapela inofuna nyo. (Sal. 86:3; 88:1) Mum’vepenga Yohova moweli-edha weli-edha ira auva-eni zimwee ochena thitho hora dhothene unodha ukami-ani.—Luk. 11:9-13.

13. N’nga zimu ochena unanikami-e a-vi ira nidhowenave m’labela Yohova mororomeleya? (Aefeso 3:16)

¹³ N’nga mutofooka namwasa wa vyongo vinango vyothakala viuwireeleni? Zimu ochena unodha uva-ani kopolo ira mudhowenave m’labela Yohova mororomeleya. (Muleri Aefeso 3:16.) Kathuulelani vyongo vyam’mwireele rongola mwinango dhinalee Flora. Liye na man’nee talaba vambo-i ninga mamisionario. Adhamale man’nee atooira vyongo mo-ororomeleya thitho banja liwa latoomala. Flora aongile ira: “Ndatoothakaleliwa maningi namwasa o-ororomeleya wee. Ndatoom’vepa Yohova ira andiva-e zimu ochena ira ndidhowenave vilela. Yohova atoondiva-a vyongo vyafuneela miyo ira ndiile thitho vilela vyongo vyoi voroma vene ndaviona ira pyo-oodeya vivilela.” Flora unoona ira Nlungu utom’kami-a ira am’nyindelenga maningi thitho a-akaikelenga ira unodha m’kami-a va vyowesedha vyee vyothene. Flora atoowenjedhela onga ira: “Madhu avalemba la Salimo 119:32 anoonga pama moda mwandikami-edhe Yohova. Lembali linoonga ira: ‘Ndinodha a-rela ilamulwinyu na rimanga othene, namwasa oi mutondikami-a ira ndaavwecheche pama.’”

14. N’nga ninaire a-vi ira zimu ochena unikami-enga?

¹⁴ N’nga munaire a-vi ira muirenga vyongo movwelana na lobelo linyu lovepa zimu ochena? Muirenga vyongo vinairi-e ira zimu ochena wuukami-engani. Vyongo vyevi vinothangani-avo fwanyeya vamigumanoni nolaleela. Muleringa Bibilya dambo nlilothene ira muwendelenga mathuulelo a Yohova. (Afl. 4:8, 9) Mwaleringa, muonenga atu alembiwile Bibilyani enao aguman’nenavo vyorucha vyo-iyana i-yana thitho muthuulelenga mwemo Yohova mwaakami-edhele liye vilela. Sandra um’mongile i-yo maromelou, atoogumanana nyarwa dhilukulu. Liye aongile ira: “Mwasa wa Yosefi unondilimbi-a maningi. Yosefi kaarumenle ira vyowesedha na vyongo vyo-olongomana vyam’mwireele, vim’mwimwanani-e kala vauxamwali na Yohova.”—Mar. 39:21-23.

YOHOVA UNONILIMBI-A DHELA MWA MAKRISTAU AFWI-U

15. N’nga mbaani unanididili-e, n’nga ananikami-e a-vi? (Muone thitho iruthiruthi.)

¹⁵ Nagumanangana nyarwa, Makristau afwi-u “anonilimbi-a maningi.” (Ako. 4:11) Vyongo vinoira abali naarongoli-u vinothonyi-edha ira Yohova unonidhiveliwana. Aliwa anonilimbi-a vonivwela tangaranga venango kala vambo-i na i-yo vahora inogumanana i-yo nyarwa. Anooda nilerela maversu enangwee olimbi-a venango lobela vambo-i na i-yo.d (Aro. 15:4) Hora dhinango bali venango rongola unooda nithuucha mathuulelo a Yohova, enao ananikami-e ira rimi-u ukale limburoni mwee. Makristau afwi-u anooda nikami-a mundhila dhinango ninga niva-a yodya vahora inodhikumbanyedha i-yo.

16. N’nga ninaire a-vi ira atu enango tanikami-enga?

¹⁶ Ira atu enango tanikami-e ninofwanela awandela nyarwa dhinogumanana i-yo. Abali naarongoli-u anonidhiveliwana thitho anofuna nikami-a. (San. 17:17) Mbwenye vaokene katinaidhiwe mwemo munodhivwela i-yo thitho vyongo vinofuneela i-yo. (San. 14:10) Mwasukwala mukalenga okozeya wandela afwinyu oi munowanyindela. Mwaawandelenga vyongo vinaukami-eni aliwa. Munooda wandela ndimuwa wavapingoni mbo-i venango ambili enao aalemenle nyo. Arongola enango anoona ira vinowarucha wandela rongola mwinango olimba mwauzimu.

17. N’nga ndi vyongo vinango vivi vinairi-e ira atu enango taimwananenga nilimbi-a, n’nga ninaire a-vi?

¹⁷ Murambelenga rima ofuna Kalanga va mwekene. Rima wapanga, kamunafune waredha naatu enango. Thitho hora dhinango abali naarongola katinodha uvwechechani venango kabe katinaonge pama. (Yak. 3:2) Kamurumeli-e vyongo ninga vyevi uimwanani-ani ira mulimbi-iwe. Ndimuwa mwinango wavapingoni dhinalee Gavin, wenuo unobulela marenda amathuulelo aongile ira: “Hora dhinjinji, kandinodhiveliwana waredha naatu.” Mbwenye Gavin unodhilimbi-edha ira awaredhenga naatu thitho vyevi vinom’kami-a. Rongola mwinango dhinalee Amy aongile ira: “Vyongo vyaireile ndulimu, vinondiiri-a ira ndirucheyenga roromela atu anango. Mbwenye nditofunjedha dhiveliwana thitho roromela abali naarongola ninga mwemo Yohova munoirela liye. Ndinoidhiwa ira vyevi vinom’sangalali-a Yohova na miyene thitho vinondisangalali-a.”

VYONGO VINONILANYEDHA YOHOVA VINONILIMBI-A

18. N’nga ndi vyongo vivi vinodedi-edhela i-yo, n’nga chini inairenga i-yo va-eeni?

¹⁸ Ninolimba rima nathuulela ira vachineneeva Yohova unodha niili-a thitho mathuulelo na manungwi-u anodha kala apama. (Apk. 21:3, 4) Vahora yeniyo vyopa vinogumanana i-yo “kavinodha niruchi-ave mathuulelo.” (Esa. 65:17) Muyofunjedha yei nitoona ira masiki va-eeni, Yohova unomanga vilonda vi-u. Murumelenga ira vyongo vinjinji viuva-idheni Nlungu, viulimbi-engani thitho ukami-ani. Kamukaikelenga navang’ono vene ira “Yohova unoufunelani vyongo vyapama.”—1 Pe. 5:7.